UKIYO 3

Three

Mpi pasal neih pawh thla a tling ve ta der mai, zanhnih vel chu muhil thei loin min rawn be tawh a, a hnuah erawh a pangngai thei ve ta. Micky pawh a hna zawmin a kal leh tawh a, helama awm theih dan pawh an ngaihtuah ve mek bawk a, a rawn awm thei turah kan ngai. Zodina pawh exam turin Bangalore lamah a kal leh tawh a, min rawn be ve reng a, keimah chuan ka be hmasa ngai lo. A rawn call zawng zawng erawh ka chhang duh bik lo a, chuti chung chuan a beidawng duh thak lo.

Tlai khat chu school ban hnuah bazaar ah lei tur ka neih avangin ka kawi a, thlan tla hluamin ka vak kual a, ka lei duh ka la hmu kim lo lehnghal. Ka hminga min ko ri ka hriat avangin ka han hawi let a, ka piah deuhah Zodina chu a lo ding a, a lo nui var var a.

“Kan dawr I kal pel zing lutuk a, ka lo ko tawp che” a tih chuan a dinna bul chu an dawr tih ka hrechhuak chiah. Mpi nen vawikhat ka kal ve tawh kha ania, ka lo hre tawh lo reng reng.

“A ni tak tiraw, ka lo hre tawh lo reng reng” tih pahin ka let leh a.

“Mi hi chu I va ngaihsak lo ve tak” lungawi lo hmel a pu ve deuh a.

“Kan tar tawh a, engmah hi kan hre rei thei tawh lo alawm” ka ti a, ka nui a.

“Coffee tal rawn in rawh” tiin an dawrah chuan kan inzui lut a.

“Engtikah nge I lo haw a?” ka ti a.

“Niminah ka lo thleng a, zaninah rawn surprise che ka tum a, ka hmu thut che kha ka surprise tur che ka theihnghilh a “a ti a, a lu chu a han hiat a.

“I exam I chhang tha em?” tiin thudang ka lo sawi a.

“Um.. Tha turah chuan ka ngai” tih pahin coffee chu min rawn pe a, ka bulah chuan a rawn thu a.

“Ka rilru chu a la ngai reng a nia aw” a ti a, a coffee no chu a tuai neuh neuh a.

“Zodin, in la naupang a, tuna I thil thlir ang hian thil a ni thei reng dawn lo” ka ti a, a ngawi reng. Ka thil in a zo a, ka ding a, ka banah a rawn vuan nghal zat.

“Zanah ka lo leng ang” a tia, ka no min laksak a, a nui sak a.

Ka inbual zo chu khumah ka thu reng a, Zodina call lo kal chu ka en reng a, ka thaw halh a. Rei vak lo hnuah ka nauin min rawn ko a, inleng ka neih thu a rawn sawi a, ka thaw vak ringawt. Hetianga a awm reng chuan ka inthununna hi thiahin a awm mai dawnin ka hria. Ka thawmhnaw ka ha sawk sawk a, ka va chhuak ta a. Mahse ka rin loh deuh ka va hmu ta zawk. Chhuanawma leh a thianpa Chhana chu sitting room ah an lo thu reng  a, eng thil nge thleng ta?

‘Enge in duh ve tehmial a?” thutthlak pah chuan ka ti a.

“Aw, kan lo leng ve a nih hi” Chhana chuan nui chungin a lo ti a.

“A mak em alawm” ka la ti hram.

Chhuanawma chu ka hmuh tum aiin a lang fai, thawkkhatlai khan ka hmu pawr riau khan ka hria a, a lo fai ve vang mai. Ka nu leh pa te kan chhak lawkah an thu ve reng a, a nuam thlawt lo. Chhana titi kan ngaithla a ni deuh ber, a hma ang bawkin a tawng leh deuh char char a, Chhuanawma erawh chuan engmah a sawi lo. Thingpui lumsak tuma ka ding chiah chu Zodina a rawn lut heu mai, ka lo en reng ringawt. Ka nu chuan a lo be hlauh a, ka thaw huai. Thingpui ka lum lai chuan ka nu nen an lo titi ve a, Mpi te inneih shooting kan neih dawn khan kan inah min rawn lam thlap a, ka nu bulah a introduced thlap bawk a,  chuvanga ka nu hian hre em em a ni. Amah hi a smart ve em bawk a, ngainat loh a har. Thingpui chawi phei chungin ka let leh a, Chhuanawma te pahnih thingpui ka pek lai chuan an thutna lamah Zodina a rawn thu thla ve. Thingpui ka pek lai chuan uluk fe hian min lo melh a, ka nuih ta ringawt a. Kan boruak chu a ruk takin a hahthlak ka ti, engmah inthiam lohna leh inthlahrunna tur awm lo mah se thil nuam tak a ni lo reng reng. Thingpui in zawh chuan Chhuanawma te thiandun an haw ta a, tlemin ka hahdam sawt.

“Tinge phone I pickup duh miah loh a?” no ka sil zawha ka va thut leh chuan a lo ti a.

“Ka phone ka kalsan daih a” tiin dawt ka sawi tawp.

“Engati nge an lo len a?”

Ka va melha, hriatthiam loh hmel deuh hian min lo melh.

“A.. Ka hre bik lo” ka ti ban charh a.

Ka nu te min rawn hmuh phak si loah ka kut chu a la a, a hum vang vang a.

“Ani bulah khan let tawh suh” ngenngawl zet hian a ti ta a.

Hetiang tak hian min umzui duh ang tih hi rin ngaihna pawh ka hre lo kha a nia, a sawi tawh chu hlawhtlintir tum tlat mi a ni tih ka hre tawh.

“Zodin, leng reng rawh aw, Dingpuii pa kha a nuam vak loa, ka va lut ve ange” tiin an room lam a pan a. Ka pa kha tlai atangin a insawisel a, a lo la nuam chuang lo a nih dawn chu.

“Engtik thleng nge ka nghah che a ngaih ang?” a tih chuan ka kut a humna chu ka lo vawn hnan ve a, mak ti deuh hian min thlek ha. Ka lo nuih sak a, hlim hmel tak hian a rawn nui chhuak ve ta var var a.

“Tunah chuan ka enthla phawt ang che, I rintlak dawn em tih te, I hrethiam tiraw?” ka tih chuan phur deuh hian a lu a bu nghat a.

“I duh ang thlapin ni rawh se, mahse, thil pakhat phut ka nei ve ang?” a ti a, ka mitko ka lo san ak a. “I pasal hlui kha in inah lokal tawh lo se ka duh a, chuan, pawnlamah pawh nise ka thu lo chuan in inhmu tur a ni lo. Chu chiah chu ka phut ang” a ti ta a.

“Zodin, ka enthlak hun chhung tur che hi ka hre lo, chumi chhunga ka rilru hmin theihloh thil I tih chuan engmah ka tiam thei lo che ania” ka ti a, ka kut a vawn chu thlahin ka darah a rawn vuan a.

“Mi famkim ka ni lo tih chu I hre ve tho anga, mahse, chan che hi ka tum lo hrim hrim” a ti a, ka chalah chuan a rawn fawp zeuh a.

Ka school kal tur pawh kan kawtah motor a rawn ding ve ta zat zel a, nuam lo ti viau mah ila a thil tih tawh tihtlang tum mi a ni a, ka hnial hi a sawt chuang lo. Mpi ka hmaizah em avangin school thlengin ka chuang duh ngai lo a, kan school piah lawka coffee dawr kawtah ka chhuk thin. Ni khat erawh chu ka chesual teuh kher mai, motor atanga ka chhuak chiah Mpi a rawn lang thut a, a rawn hawi lo hlauh chu ka vanneihna  a ni.

“Tinge U Mpi hriat I hlauh em em a?” Zodina chuan a ti ta nge nge a.

“Inngaizawng tak tak pawh kan la nih loh hi” ka tih chuan a ner nang mai.

Engtikah emaw chuan a la hre dawn tho tih hre mah ila tunah kher kher hi chuan hrilh turin ka la inpeih lo. Chutiang chuan hun engemaw chen chu kan han awm ve lauh lauh a, chhun lamah hlim viau thin mah ila zanah mahnia ka awm chiah hian thil dik a ni chiahloin ka hre leh thin.

Ka rin loh deuhin ka pa in scooty min lo lei mauh mai a, ka khalh ve thiam dawnin ka hre lo a, sawi pawh ka sawi ri ngai miah lo. Chutia a lo lei takah chuan khalh thiam chakna ka nei ta vat a, Zodina lahin min zirtir a lo inhuam nasa mai a. Unaua mipa awm lo, hmeichhe hlang tih takah chutia min zirtir tur a awm chu ka chhungte an lawm phian a, kan boruak dik tak an la hriat loh vangte pawh a ni ang.

Karhnih vel chu kan veng field ah tlai tin kan han zir ta tlauh tlauh a, ka rin aiin ka lo ngam ve a, ka thiam chu a ni deuh der.

“Ka duh aiin I thiam chak mah mah” Zodina pawhin a ti nghe nghe.

Duh ang tawka thiama ka inngaih hnuah kan zir pawh kan duhtawk ta a, naktuk atang chuan keimahin ka kal ve thei tawh ang chu. Chu ber chu Zodina lahin a huphurh a, zingtin inhmuh kha a lo thlahlel ve bawk si a, a nuihzatthlak angreng viau. Zan lama rawn len pawh ka phal hunah lo chuan a rawn kal lo ve mai a, inthup ngai boruak hian amah min duh zualtir a ni ta berin ka hria, zankhat inbe loa awm pawh harsa ka ti ve ta.

School ka thlen chuan naupangho in min en thap mai a, chutia scooty ka han khalh ve mai chu ka thawhpuite lahin mak an ti. Garage ah ka khalh lut ve thlap a, Mpi’n min rawn zui nghal.

“Awi, nangpawhin I thiam chuan ka thiam ve awm e” a’n ti nghal a.

“Ni e, kei aiin I thiam hma zawk ang, lei ve rawh” ka ti a.

“Tunge khalh zirtir bik che a?” a tih chuan ka phu deuh zuk a.

“Kan thenawm tleirawl” tiin dawt ka sawi ta ringawt.

Mpi lakah hian ka inthup hlen thei dawn lo tih ka hria, engtika hrilh tur nge, engtia hrilh tur nge? Chung zawng zawng chu a ni ka rilru tibuaitu chu, kei lah ka lut thuk telh telh bawk si a.

Krismas boruak in min chiah tan a, school kan kal tawp ber ni tur a nih avangin thawhpuiten chaw ei chhuah an rawt a, Mpi nen pawh kan phur leh viau. School ka thlen chuan Mpi a lo la thleng lo ve tehmial a, nidangah min kal khalh deuh ziah avangin mak ka ti deuh. Dar rik hnu pawhin a hmel a rawn la lang chuang lo a, first period ka neih avangin class ka laksan ta a. Kumin chhunga kal tawp ni tih takah lehkha pawh kan zir tawh lo a, Krismas hman dan tha tih velte ka thiam ang angin ka han sawi ve a, nun uluk ngaih hunlai ber an nih thute sawiin kumthar lama inhmu leh tura duhsakna inhlan tawnin ka chhuahsan ta a. Office ka luh chuan ka phone ka ban a, Mpi miscall a lo awm va. Ka han call back vat a, chauh hmel deuh hian min lo chhang.

“Engati nge I aw te chu?” ka ti nghal thawr a.

“Thiannu.. thu lawmawm lam zawk” a ti a, a nui ri hak a.

“Enge sawi vat vat rawh”

“Nau ka keng ve a nih hmel”

Ka khek ta raih a, a ngaihna hre lo zet hian min lo en nghal thap. Pawnah ka chhuak nghal vat a, amah tluk zetin ka lawm ve in ka ring.

“Tukin ka rawn kal tur kha ka luhai lutuk a, chaw ei lai atangin a ni mah zawk ang chu, chaw pawh ka ei thei lo ka luak a chhuak ngawih ngawih a ni mai. Ka nu in damdawiin kal hmasa turin min tia, Sangtea’ min va hruai ta ringawt a. Tuna ka hrilh che kha a result chu ni mai” a ti a, a hlim tih a hriat hliah hliah.

“Ka lawmpui tak zet che, ka haw pahin rawn kawi ka tum ang” ka ti ta a.\

Ka pum chu ka han khawih ringawt a, kum hnih chuang pasal ka neih ve chhung khan rai ka chak thinzia kha ka theihnghilh ngai lo. Mi in nau an pai tih ka hriat chang hian ka rilruah a rawn lang ve nghal zat thin, fa tal lo nei ila tiin khang hun chhung zawng khan duhthu ka lo sam ve thin a, mahse, chung lam hian ka thatna tur lo chuan ro a rel lo ang tih ka ring ve tawp.