APRICITY (Part I )

APRICITY

-Mami Chawngthu

"Ka beidawng tawh, hun tha ka pe hnem tawk tawh viau bawk e" 

A bialnu chungchanga hetiang zawnga a sawi ka hriat vawikhatna!

"Mahse, Akhum, hei chen in inkawp ve tawha, chuti maia inthen leh te chu a chi dawn mi?" Ka han ti ve ngial na a, awmzia a awm chuang lo.

Ni e, ka thianpa hi ka hrechiang a, a tih tawh loh chu a nawrluih theih ngai loh. 

"I inchhir vaih chuan ka buaipui peih dawn lo che nia" ka tih chuan a nui vei suk a.

"Ka thutluknaah ka inchhir ngai lo tih i hriat kha" tih pahin a tho nghal a, a car chahbi min pek pahin,"Khalh teh, ka chau tlat" tiin a kalsawn nghal a. 

Ka en vung vung a, kum 5 zet a lo kawp tawh Thanpuii a then ringawt chu ka la hrethiam thei lo. A rawn lehhawi thut a, ka thut ngaia ka lo la thu reng min hmuh chuan a dar a chhin zauh a, rang fe hian ka va umzui ve ta nghal a.

Zanah U Faka a lo len avangin Akhuma min sawmna ka tihhlawhtlinsak thei lova, thinrim angin lang lo mah se a lawm vak lo tih ka hria. Tihtur pawimawh a la neih avangin U Faka chu a lengrei lo hlauh a, ka lawm ber tum a ni hial awm e. Akhuma ka call nghal a, a phone a pickup tawh dawn lo emaw ka tih hnuah hmeichhia in a rawn pickup a, a aw chu Thanpuii a ni tih ka hre nghal. Engmah sawi lovin ka dah ta daih a, hmela mai mai chu! Dawt min hrilh avangin ka lungawi lo tak zet, ka lo khawngaih ve hman em em a, a bialnu duh ber chu a then ka ring lo reng a ni.

Class ka lak mawlh mawlh laiin ka phone chu a rawn ri a, Akhuma hming ka hmuh chuan ka phone chu ka silent a, ka bag ah ka dah lut daih a. A thiantha ka ni ve emaw ka tia, min tihder mai mai kha ka thin a la rim. School ban ruala gate ka chhuak chiah a bike nghenga a lo ding ka hmuh chuan ka phu zuk a. Ka thawhpuiten an hmuh chuan min rawn hruai dawnah ngaiin min kalsan diak lehnghal.

"Ka phone pawh i chhang duh lo vel a" a mit ti zim sun chuan min melh a.

"Chhan kha ka bat a ni kher emawni le" tih pahin ka nui hak a, ngei hmel zet hian min melh a.

"Lokal rawh ka thlah ang che" a tih chuan ka lu ka lo thing a.

"U Faka nen tihtur pawimawh kan lo nei a, a lo thleng tep tawh ang" ka ti a, a nihna takah chuan engmah tihtur kan nei lo.

"Rohluzual.."

"Zothankhum, i bike ah chuangin khawiah mah ka kal dawn lo" ka tih chuan ka ban rekah a hmer chat a, min hnuk titih nghal a.

"Min thlah rawh. I duh leh i bialnu phur ve mai rawh"ka ti a. Kan awmna chu kan school bul lawk anih bawk si avangin chutia han inpawh chiam chu zia lo la ti leh deuh.

"Bialnu ka nei lo" a ti hmuk a, ngeiawm zet hian ka lo nui thung.

"Dy.. lo chuang teh khawngaih takin" 

"Tikhan min ko ve ziah suh ka bialpa a thinrim leh ang" ka lo ti hlur a.

"I duh loh chuan lo chuang vat la nimai" a ti leh hmak a, ka hnathawhna hmuna mualpho ka duh loh vangin ka chuang ta nge nge a. Hepa hi chu ka hneh thei thin lo chu a ni e.

Paper check tur ka neih nual avangin U Faka a lo leng lova, mahni hnathawh ve veah kan tui dun bawk a, kan buai laiin hunawl kan inpe thin. Mi puitling tak a ni a, kum 6 laiin kei aiin a upa a, a lakah chuan ka naupangchhiain ka pangchang a, kum 3 chuang hret chu kan inzui ve tawh. Department pakhatah officer hna a thawk a, a thawh hma hian kan inngaizawng tan a, kan inngaihzawn hnu reiloteah a inziak tling a, hemi hma hian zirtirtuah a lo tan ve tawh avangin min hrethiam em em a. Naupang enkawl dan engkim a tha tur anga a hriat apiang chu min hrilh peih a, ka chhawr tangkai viau bawk. 

A hna a tui a, a lungawi tawk viau bawk a, keiin a thluak thatzia ka ngaihtuahin officer ni ngei turin ka duhsak a, ka fuihin ka kar peih bawk a. Ka thu awihin inbuatsaihna a nei chho a, a vawikhat exam naah a inziak tling ta mai a, mi mak tih pawh hlawh, mak ka ti ve lem lo. Kan inngaihzawn hma atanga inhria a, kan ina rawn chuangkai ve fo, ka u te nena inkawm an nih avang hian a mizia tha laite, chhe lai deuhte, a thluak thatzia te ka hre kim ve viau. Ama min sawi dan takin mi mizia man hma chi ka lo ni ve hrim hrim bawk a, 'special one' ti ngatin min ko ve fuk zel ania.

Zothankhuma bik hi chu ka naupanlai thianpa, kg ka nih atanga ka kawm tawh, phai lama zirna vanga min bosan leh vang vang thintu a ni a, veng khatah awm lo mah ila kan inah a tal tam a, ka chhungte nen pawh an innel em em. U Faka nen kan inngaihzawn dawn pawha thurawn ka lakna ber, mi tha tak a ni a tih ve avanga keipawhin a thu ka awih a ni a, 'ka zarah bialpa officer i nei' a ti fo lehnghal. Kan inkarah thuruk a awm ngai lova, chhungkaw thu a tha a chhia engkim kan inhrilh a, a hmasa ber kan nih loh chuan kan thin a rim a, inbiak duh loh phah nana hman kan ching viau bawk. A chang chuan U Faka ka hmaizah ve deuh avang hian engkim hrilh hi a tha ber lo ka han ti ve thin a, a theih tak tak chuang lo. MA Shillong lama a zir zawh hnuah an chhungkaw sumdawnna a enkawl chho a, tunah hian Hardware dawr a enkawl a, an dawr dang pawh a kutah engemaw chen a awm avangin ama tawkah a buai ve hle thin. 

Kei ve thung chu ka nih chak ber leh nih tum zirtirtu hna ka thawk mek a. M.A (English) zirzoin St Andrew's Higher Sec School-ah ka thawk mek a ni. Ka thawh hnuah B.Ed ka ti leha, ka zo fel chiah a ni.

*Naupang hmuh laia inpawh buaite kha thil mawi pawh a ni lo a*

Ka mut dawna msg ka hmuh chuan ka nghing deuh lawih a. Engtinnge maw tlaia kan boruak kha a lo hriat ni.

*Chutin kan inpawt buai chiam hleinem, an uar ve deuh anih chu a* tih ka thawn let a, a seen renga, min chhang tawh lo vel. 

Tunlai chu ho teteah min hau veleh zauh zel a, a bik takin Akhuma kaihhnawih engemawah a ni zual.

Ka room kawngka a rawn inhawng a, Akhuma a rawn lang hlawl a.

"Paper ka rawn check pui dawn che" tih pahin ka bulah a rawn thu thla nghal a.

"Midang check ka duh lo tih i hriat kha, ka lawm e"

Ka tukhumah a rawn nam dawt a.

"Dy.. ka lung a leng, i buai ka ring tho a, inah ka awm peih si lo a, ka lokal tawp" a ti zawi sap a.

"Lungleng leh tur si tinge i then a?"ka lo ti deuh hlar a.

"Ka inchhir dawn chuang hleinem" tih pahin ka khumah a insawn a, "Min kaitho mai dawn nia i mut dawnah" a tih chuan ka bu nghat a.

Ka thianpa a ni a, harsatna a tawh laia atana ka awm tam thei lo chu pawi ka ti. A hmangaih em emin a phatsan thin tih a hriat khan eng ang takin nge a awm ang tih ka ngaihtuah thiam lo. Ka chanah ka dah a, ka tuar chhuak thei angem ka hre lo. Dar 11 rik hma deuhin ka in tifel thei a, Akhuma chu a muhil tui viau mai. Han kaihthawh a an venga haw tur chuan ka lainat deuh tlat, sofaah mutna ka siam a, ka mu ta daih a. Zing ka thawhin a lo la muhil reng a, tih tur hmanhmawhthlak a nei chuang lo tih ka hria, ka kaitho duh lo a. Veranda ka phiah mawlh mawlh laiin U Faka exer la haw lam a rawn kawi a, zana min biak that duh loh vel ka lo chhuahchhal a, thinrim hmel pawh a pu hran tawh chuang lo.

Ka u bike bula Akhuma bike ding reng chu a melh tih ka hria, zanah engmah ka lo sawi bawk si lo, tuna han sawi leh vel kha ka duh tawh bawk si lo. Min zawt ta lo bawk nen ka hrilh duh ta lo. A kal liam hnu lawkah Akhuma a rawn chhuak ve a, dawr bungrua a thlen vangin a chhungten dawr lama tlang turinan lo hrilh a lo nia, hmanhmawh zetin a tlan chhuak ta nghal a. A vawikhat nan U Faka lakah ka inthiam lo ve lek lek. 

Chawei laiin ka pa-in min kamkhat ve deuh a.

"Akhuma nen in inkawmngeihzia te chu kan hre vek a, a mawi lo zawngin in awm dawn lo tih pawh kan hria. Mahse, tunah chuan nula tlangval in ni ve tawha, thil hi a mawi lo hma tih hria ula, fimkhur hle ang che u. Faka pawh mi puitling ania, enliam mai che a tum lai hian enliam mai mai theih loh thil hi in tawng ang tih ka hlau" tiin.

Ka nu leh ka unaute chuan an lo zawmve tliar tliar a, keipawhin sawi kher lo mah se nuam ka ti bik hauh lo a, an sawi chhuak erawh ka lawm zawk. A mawi lo laite chu kan inhrilhin kan inhau tur a ni, chhungkua hi hetiang te teah hian a lo nuam mai.

School-ah result siamin kan buai ve nak nak hle a, kan zawh fel meuh chuan a lo tlai ve ta phian. Thianteho chuan tlai chaw ei chhuah law law chu an rawt a, pawi ka ti bik lem lo. Kan inzui chhuak ta dam dam a, hetiang vela ka chhuah ngai lem loh avangin kan kalna tur chu ka hre ve lo. Kan thlen chuan dar 5 a ri thuak tawh a, ka phone chu ka han phawrh chhuak a, U Faka a reh nileng thak tih ka hrechhuak chiah. Ka buai dawn thu ka hrilh a, min tihbuai a hreh pawh a ni maithei e. Keimah zawkin ka call mai ang tih pahin a number chu ka han dial dawn a, dawr chhunga lo thu mekte ka hmuh chuan ka hmet tawp chat a, mak tizetin ka melh ta reng a. UFaka leh nula pakhat hian dawhkan lo kildunin thilan ei a, a hmeichhia chu a tawng mawlh mawlh a,  U Faka chuan ngaihnawm tih hmel zet hian a en bawk a. Ka hah! Ka hawisawn nghal a, ka thiante chu ka zui nghal a, min hmuh theih lohna tur lamah ka thu a, hmuh tumin ka va bih leh zeuh zeuh thin lawi a! 

"Awi, Lalmarami saw a bialpa mi le" tih paha Nutei melhna chu kan thiante chuan an en thap a.

"A mipa hmel chu a lang chiang thei lo a nih saw, in han thlek nasat ve nen" Lana'n a tih chuan an nui hak hlawm a.

"Ka hrechiang ve em a, Marami te chuan a duh a hlah ngai hleinem, hmannia kan hmuhdun kha a ni leh chuang miah lo ang" ti berin nge rawn sawi pawh ka hre lo, ka na ngut ngut tawp a ni mai.

Ka inphih fai hnuah ka mu tawp a, kan chawei kha ka puar leh puar loh pawh ka hre lo. Ka phone ri chu ka en reng a, U Faka a ni. Chhan tumna rilru ka pu lova, tunah tak hi chuan biak ka chak hlawl lo.

*in ka thleng chiah. I buai loh hunah min lo be mai la*

Whatsapp lo thleng pawh ka hawng duh lo.

Zan a rei telh telh a, ka ngai telh telh. Mahse, ka lung a awi thei si lo. Ka va call ta nge nge.

"Min be har reuh hle mai" a lo ti dam dup te chu ka hua.

"Tlaia i chhuahpui kha tunge?'

A reh ta deuh vang vang a.

"Ka hrilh hma chein i lo hria a. A zia lo hle mai"

"Enge zia lo ber chu?"

"Hlute, inthen rih phawt mai ang"

Phone chu ka hmet tawp a, ka mut ngaiin ka mu char char a, ka thaw em tih pawh ka hre lo. Hei aia min thawng lo hian a sawi theih loh em ni le?

Ka phone ri char char chu ka en tlawk tlawk a, inthen maw? Ka ngaihtuah ngai loh thil kha tun leh tunah a lo thleng thut a, ngaihtuah dan pawh ka thiam lo zawk.

Karkhat a liam a, ka nun hi a ruak tih bakin ka sawifiah thiam lo. U Faka hnen atangin insawifiahna emaw kan inthen chhan emaw eng thu mah ka dawng lo. A chhan tal hi hria ni ila ka rilru hi a dam deuhin ka ring. Engvang nge? Tu vang nge? Chhanna a awm thei si lo. Mahse, a tawpah thutlukna ka siam fel ta- engang pawhin duhin hmangaih mah ila, ka tuar tur ka tuar zo tawh. Engtikahmah ka let leh tawh ngai lovang, ka hma hun hre lo mah ila, chu erawh chu ka hrechiang.

School lamah ni tin ka liam a, naupangho hi ka hlimna leh ka nun ruak hnawh khattu an ni. Ka lunglen mangan laia min tihlim a, 'Miss, kan favourite teacher' i ni min han ti ve ngial thin te hi ka tan a hlutzia an hrethiam lo vang. Phai lamah dawr thilah Akhuma a zinbo a, phone vela thil sawi ka peih loh avangin engmah ka la hrilh mumal lo, kan inthen thu erawh ka sawi zuai. Kan venga ka thiante pahnih, Zamtei leh Rti erawh engkim  ka hrilh tawh a, an thinrim a, kan boruak that leh theihna tura hmalak pawh an inhuamzia ka hria. Mahse, keimahah tawp chuan tawp hlen ka duh avang leh awmze nei miah loa inthen kan nih avangin keimah ka dam thei tawh dawn lo, chuvang chuan tunah na mah ila ka tuar chhuak ang tih ka hria a, ka thutlukna min zaksak vangin engmah an ti ta lo.

Thawhtan zan a ni a, kan inkhawm bang kawmchhak dawrah ei tur ka lei kawi a, ka rin loh deuhin U Faka a lo awm hlawl a. Kan boruak that lai kha chuan a lut ngun ve a, tun hnuah erawh a kal ngai pawh ka hre lo.

"I tha em?" Pawn ka chhuak chu min lo zui tih ka hre miah lo.

"I hmuh ang hian ka tha"

Kal ka tum chu ka banah a rawn pawt a.

"Hlu.. inbe lawk ang"

"Sawi tur ka nei lo tlat, ka tihpalh" a kut chu ka paih thlak sak a.

A thaw halh a, ka kal sawn nghal a. Ka thinlung tawt leh ipik lutuk chu ka tap mai ang tih ka hlau. 

"Khatia awm tur kha ka ni lo tih ka hria, mahse, i laka tisual reng chunga vawn che kha ka inthiam thei si lo"

Ka ding chawt a, ka lakah eng thil chiah nge a tihsual? Ani hian min lo bum char char tihna a ni angem?

"Chan che hi ka duh lo, a theih chhung chu chelh che pawh ka tum. Mahse, i laka ka lo tihsual khan mahni inthiam lo reng rengin min siam a, khatia tih mai loh kha thutlukna ka siam thei lo a ni" a ti zawi dup a.

"I tan enge tih loh ka neih? Engtik atang khan nge danglam tura ka lo siam che? Engkim a thlen hnuah ka hmaah i rawn inlan leh a, enge i la beisei?" Ka aw chu a ri chhuak chang chang a, ka natzia lantir duh lo mah ila ani tluka min hrechiangtu tur an awm chuang lo.

"Engkim siamthat leh hi ka duh, khawngaih takin..."

"Aih, ka thei tawh lo tih i hria"

"Khawngaih ka ngen che nih chu.."

"Ka kal phawt mai ang"

Ka banah chuan a rawn man a, chu veleh tha chak zet hian min rawn pawt let dawrh a.

"Mi duh lo chung pawh luih kha a tha berin ka ring lo"

Akhuma chu kan hmaah a rawn ding nghal zat a. A hmel ka hmuh chuan ka insum thei lo, ka mittui chu a tla nghal zung zung a.

"Kal rawh, inah lut ang" tih pahin min kai a, ka hawi let chuan hmel chang zet hian U Faka chuan min rawn en a, engtinnge hetianga awlsam hian min rawn hmuh ngam zawk le?

Ka hmai ka phih zawh chuan darthlalanga ka hmel lo lang chu ka han en a, ka tahna lamah ka mit pawh a bui phah vek. Ka mamawh hun takah Akhuma a lo lang a, ka lawm hle mai. Chutiang ni lo se ka mualpho dawn lutukin ka hria. Room atanga ka chhuah chuan sitting room ah Akhuma chu a lo thu a, ngaihtuah muk hmel zetin a lu a lo dawm a, ka thawm a hre lo aniang, a melh ngai chu a melh reng a.

"I lo kal lo ang tih ka hlau ngawt mai" ka tih chuan a rawn hawi chhuak a.

"Tlaiah ka rawn thleng a, rawn hmuh ngei ngei che ka duh vangin hah chung chungin ka lo kal alawm. Ka hmuh tirh cheu kha chuan ka lawm lo lutuk a, ka hriat lohin in lo tha leh vek tawh a nih dawn hi ka lo ti mai a, kal leh mai ka tum laiin in inpawt ta chawt chawt sia" tih pahin a nui a, a banah ka han chum a.

"I sual e a" ka ti a.

"Tak tak alawm"

"Eng chu?"

"Ka rilru a na hman deuh, hun reilote chhunga lo inbiak that leh a, ka laka zep nei anga ngaih che kha"

"Min ngaihdan a dik lo tih i hre tawh tho a"

"Eng nge in inthen chhan ber chu ni ta?" A tih chuan ka hrilhta vek a. "Hrilh leh lo chea kan lo that vel kha chu ring duh lo la" ngeiawm thei tur ang berin ka han ti a.

"Ni e, ni e. Thingpui va lum rawh" a tih chuan nui vur vurin choka lam ka pan ta a.

Ka thianpa, ka tana engkim ti thin a lo let leh tawh a, malin ka awm hman lo a ni ber mai. Zingah ka school kal tur min thlah a, tlai lam erawh a buai avangin a hman lo, ka khua a har ang tih hi a hlau em em renga, mahni inngaihtuahna hman min siam sak lo a ni ber. Zan ber hi a hrehawm ka ti thin, men chhungin Akhuma a lo lenga, a haw hnua khuma ka mu chiah hi U Faka ka thinlungah a rawn lang hmasaber thin. Mite pawh an inthen thin a, ka thianpa Akhuma te ngei pawh an inthen a, keini hi kan inthen ve thei ang tih ka ring pha ngai lo. Ka rilru tina in haw hle mah ila, ka ngai a ni tih ia zep thei lo. Ka mittui em tla lo mah se ka thinlung erawh a tap vawng vawng fo mai. Kan inhmuh hnuhnun ber atang khan kar a liam leh fe tawh a, kan inhmu nawn leh tawh lo. Ka chhungte bulah sawi kher lo mah ila a lo kal tak ngai loh avangin an hrethiam ve mai a, engmah phei chu min zawt lo. Min ngaihtuah em em reng tih chu ka hre ru tho, ka u phei chuan a hming sawi rik palh hi a hlau hluah hluah niin ka hria. Thian inkawm nasa ve tak, kei nena kan inhriat hma atanga lo inkawm tawh an ni miau a, keimah vang ngawta an inkawm tawh loh a rem kher lo tih ka hre ve. Pawn lamah an inkawm tho tih pawh ka hria, nidanga an thianho chhuah thu awlsam taka a sawi ang khan a sawi ngai tawh lova, min vengthawng ve hle tih ka hai bik lo.

"U, Marami i hre ngai em?"

Ka room-ah perfume a rawn in kap a, ka thil ngaihtuah lai chu ka lo zawt deuh phawng a.

"Ka va hre mai lo, khawia mi nge?"

Ka thutna lam rawn hawi pah chuan a ti a.

"U Faka nen an inkawm maithei"

An inkawm maithei, an inzui tia sawi chu ka la thei thlawt lo.

"E.. oh! Hre leh si e, tinge?" Zangkhai deuh hian a ti a.

"Ka ti ve mai mai"

"Te, a pawi ka ti lutuk. Ka nau i ni a, lehlamah ka thianpa a ni bawk a. Hetiang hun a thlen hi ka hlauh vang ania a tirah pawh inkawp lo ula ka tih em em. In tih lungawi loh hunte hi in la nei ve dawn tih ka hria a, dinhmun harsa leh khirh deuha din hi ka huphurh vang a nia" a tih chuan a dik ka ti.

"Ka tuar chhuak tep tawh alawm, keimah vangin in inkar chhiat phah lo se, hun a lo kal anga, pangngai takin ka awm leh dawn alawm"

"Te, ka ring tawk che. Engmah thuk takin in buaina hi ka hre lo, mahse, a tawpna erawh ka nau hi hlim se tih zel hi ka duh ania" a ti a, ka lo nui sak a.

Period off laiin naupangho che vel chu ka en reng a, anmahnu ang rual kan nih lai velte ka ngaihtuahnaah a rawn lut a, nun nawm vanglai ber chu higher student kan nih lai kha a ni ta ber awm e. Inngaizawng tih hriat ve deuh te pawh an awm nawk, naupang anga en theih an nih tawh bik loh avang hian hauh vak vakte hi a tha ber lo a, dim dawi taka enkawla, thu tha nena enkawl an hun vanglai ber a ni. Ka class neih apiangin a theih ang angin thianghlim taka nun dan turte ka zirtirin ka hrilh ve thin a, kan school kal ve laia kan principal thu tha min hrilh ka hlawkpui em avangin hei hi ka chhawm ve ta zel a ni.

"Tunlai chu i nguai thei e, rilru natna i nei a ni lo maw?" Kan thawhpui Zautea chuan ka bula rawn din pahin a ti a.

"Chutiang lam pawh ni em em lo e" ka lo ti ve mai a.

"Fakzuala hi tunlai chu kan vengah ka hmu ngun lutuk a, in tha vak lo emawni ka ti mai mai a" a ti a. A hrehawm, a chanchin hriat hi ka mamawh loh thin tehlul nen!

"Anih chu, rim tur tha deuh in kawl a nih dawn chu" ka han nui lui sak a.

"I sawi awlsam bawk sia maw" tih oahin a nui ve a, sawi zawm ka peih tawh lo, thildang ka titi pui ta daih a.

Marami te nen vengkhat an ni a, Zautea sawi chu thudik ngei a ni bawk ang. Mahse, ka hriatthiam loh ber chu ka laka tihsual a nei tawh nia a insawi kha? Kha thil kha eng nge ni ang le? Ka hriat chuan ka nat belh maithei, mahse, hriat duhna ka nei, chu chuan amah hi ka thinlung atanga ka paihbo hmak theih pawh ka ring. 

Ni a liam a, kar a liam a, thla a vei meuh chuan hma lam ka pan nasatzia ka inhria. Ka tan ka thiantha ber a awm reng a, kalsan leh phatsan nih hrehawmzia, ama lo tawrh tawh ngei hriatpuitu ka nih avangin kan inpawh zualin kan inhrethiam em em a, ka mal lohzia min hriat nawntir fo bawk avangin ka tan a hlu a, a la hlu dawn chauh. 

Zan khat chu zirlai ka inenlawk zawha intiharh tura ka room tukverh ka hawng chu ka tum loh deuhin U Faka ka hmu a, kan kawmchhakte dawrteah kan in lam hawi zawngin a thu a, min hmuh chuan a nui deuhin ka hria. Ka thin rawn phu nghal dup dup chu ka hria, rang zet hian tukverh ka khar lehnghal a, atthlak zetin ka rum nghat a. Tinge ka thinlungah hian a tlak nat em em reng le? Min phatsana, chhan mumal pawh awm lova min kalsantu vanga tawrh fo hi ka duh lo. Khumah ka thu hnawk a, ka hmuha inlan fo lo tur hian ka va duh tak.

*Fakzuala kan kawmchhakah ka hmu a*

Akhuma ka thawn tawp.

*ka lokal i duh em?*

*ka paltlang thei alawm*

*i thei tih ka hria, lokal tura min duh pawhin ka lokal thei bawk*

*mut ka lo tum chiaha, ngai lo ni mai se, ngaihtha deuhin awm rawh*

Keimah vanga khaw vawt hnuaia a rawn kal buai kher ngai ka ti lo, ka tibuai tam zozai tawh bik lutuk, keimah ngeiin ka paltlang ve hi a ngai.

Class xii study camp kan neihpui a, exam a hnaih tawh avangin kan tang ve nasa hle. Zirtirtu kan inriah chhawk a, mahni inngaihtuahna hman ka nei vak lo. Ka hriat loh chhungin ka rilru pawh a lo dam ve hle tawh tih ka hria, ka ngaihtuahna atanga ka paihbo hmak ni a tam ta mai, ka lawm a, ka hlim bawk.

"Miss, hmangaih i nei tawh em?"

Thingpui in chawlh kan neih laiin ka student pakhat hian min zawt hlawl a, a thiante chu an lo nui deuh hak a.

"Nei ve tawh dawn lawm ni, nangni pawh ka hmangaih cheu a" ka tih chuan an then sak hlawm a.

"Aih, hei, nula leh tlangval inhmangaihna ang hi" amah bawk chuan a rawn ti a.

"Ka nei ve tawh alawm. Mahse, in hriat reng tura ka duh chu, in hmangaih em emte nen hian in innei dawn kher lo tih hi. Chuvang chuan thianghlim taka inngaihzawn tur, a bik takin hmeichhehi kha, pasal in neih hma chuan sex hi hmang reng reng suh ang che u." Ka ti ta duah a.

"Hei hi ka intiamkamna hmanrua a ni a, pasal ka neih hma chuan ka invawng thianghlim ang tih entirna anih hi" tih pahin ka zungbun chu ka han lekkang a. "Ka thian tam takte hian min nuih thin a, a tul kher lo e, khami kher loh pawn a invawn theih an ti thin a. A dik reng mai, mahse a nemnghettu a awm hian a tha lehzual, ka thutiam kha min hriat nawntirtu anih fo avangin.

Exam in zo anga, thutiam la ve thei in awm phawt chuan ka ngaihtuahsak ang che u" ka tih chuan an phur hlawm khawp mai.

Ka nu leh pa min zirtir ngun em em anih avangin ka thanlenpui a, a theihna apianga tan lak hi ka tum ve thin. Ka zirlai naupangte tam tak bulah ka sawi tawh thin a, an zirlaia zirtirna ka pek piah lama ka ngaihpawimawh ber anih avangin a remchan dan angin helam hawi hian zirtirna ka pe thin. An zingah lawmthu min hrilhtu an awm ve ta nual, ka thinlung hi a lawm vawng vawng zel.

Schoola ka riah loh zan a ni a, inah awmin ka insu a, chhun lama ka khawih hman loh inchhung ka tifel pah bawk a. Bathrooma ka insuk ka tleuh zawh chuan sitting rooma U Faka lo thu reng ka va hmu thut a, ka phu zuk lehnghal. A lo luh lai awm pawh ka hre lo, ka chhungte nen inkhel an en a, a tan ber Manchester United inkhel a ni lehnghal. Ka pa in thingpui lum turin min rawn au a, ka lumsak zawhah room ah ka awm ang. 

Sitting room ka tihfel zawh loh ka tifel leh thuak a, a hmaa ka nunphung a tih buai ang khan a tibuai tawh lem lo. Biak ka chak lova, hmuh ka chak lem lo bawk a, chu chu ka danglam tak na chu a ni ta ber awm e.

"I dam tha em?" Thingpui ka pek pah chuan min lo bia a.

"Umm.." tih zawngin ka chhang. Min biak chhunzawm ta bik lo a, sawi dun tur kan nei tawh miau lo.

No ka sil zawh chuan room lam pan ka tum a, a hnung lam chu ka han thlek leh hram a, amaha danglam ka va hmuh hmasak ber chu a lo cher ve ta hle tih chu. Thlahnih a liam deuh chauh a, a tla chak awm hle mai tih ka ngaihtuah zawm ta mai mai. Hriselna a ngai pawimawh em em a, zuk leh hmuama a taksa tihchhiat a phal ngai lo. A dam phawt chuan zingah hma takah a tho a, a insawizawi thin. A lo damlo ve reng pawh a ni mahna, ka ngaihtuah a tul ber lo.

Ka buai ve em avangin Akhuma nen pawh kan inhmu zen zen thei lo, ani a dawr lamah a buai bawk nen kan inbe hman tawk a ni deuh mai. Thanpuii inchhirin a rawn be deuh reng a, an inkar hi tha leh turin ka lo nawr sek a, a thin a rim leh lek lek thin.

"Faka hnena let turin ti reng che ila i duh dawn bik mi?" Ka camp tur min thlah a, titi na hun tha kan nei veleh hlauh.

"Tehkhin chi pawh a nih si loh, ngaihdam a dil nasat em che hi, a sual thlak i ti ve lo mi? Nangpawh hian i la duh reng tih ka hria" ka ti a.

"Engmah kah hi i hre bawk si lo, a hahthlak" a ti nghut a.

"Min hrilh ta mai la"

"Aih"

"Leh tlat bawk si chuan"

"Hrethiam tur hi chu i ni ve tawh"

School kan thleng chiah a.

"Inhrilh awm siloa inhriatthiamtir tum chu a har" motor atanga chhuk pah chuan ka ti a.

"Dy... a engtikawng zawng pawh hian chan che hi ka duh lo, chuvang chuan ka rilru tak tak pawh hi ka sawi ngam ngai loa"

A thusawi vang chuan ka ding chawt a.

"I thian tha ber anga i en hian thian ang mai chuan a en ve ta lo che, chu aia thuk zawk chuan a ngaina che tih sawi tur hian hun a duh rei hle mai" a aw-ah chuan zamna niawm tak a ri tel.

"Min lo hrethiam la, i sawi tum ka man chiah lo ania" ka aw chu a lawi ve deuh.

"Ka duh che, min huat phah anih pawhin ka tuar mai ang, ka zep thei tawh lo" ka bulah a rawn ding a, khaw thim hnuaiah pawh a taksa lian leh inphut zaih chu a hai theih loh.

"Chutiang zawngin ka la ngaihtuah ve ngai miah lo a" ka ti a, ka thawh chhuak halh a.

"Ka hria alawm, i rilru nghehzia leh pakhat i duh chuan midang i ngaihtuah ngai lo tih hi ka hrechiang che alawm. Engtik atang khan nge hetiang rilru hi ka put ka hre bik lo, ka sawi hun hi a fuh lo em tih pawh ka hre lo. Mahse, hrilh ngei che hi ka duh tawh si a ni" a ti a.

Sawi mai tur ka hre tawh lo, ka thianpa ve ngawih ngawihin a rilru dik tak min hrilh a ni a, dawnsawn dan tur ka hre lo a ni ber. Hetiang zawng kher hi a nih ka rin loh vang a ni ngei ang.

"Dy..."

"Sawi tur ka hre rih lo, ka va lut phawt ange" ka ti ta a.

Gate ka pelh lai chuan a motor ri thawm leh a tlan chhuak chu ka hria a, ka awmdan mawi leh mawi loh lam ka hre lo, min hrethiam ve leh mai ang chu maw! 

Ka ngaihtuah nawn leh thin, pasal ka nei anih chuan u Faka hi a nih ka ring thin, Akhuma sawi ang tak tak kha a ni a, ka rilru a nghet a, midang hi ka rilruah vawikhat pawh an la awm ngai lo. Ka rilru ang pu ve leh kan hlim dun viau emaw ka tih laiin inthen thu ka han hre thut kha chu, ka tan a nat turzia in hrethiam ve maiin ka ring. Tunah ka thian tha berin min duh thu min han hrilh leh a, engmah hi ka hrethiam tak tak lo. Ka thuruk engkim hretu, ka tana ding reng thin ni mah se hetiang zawng hian ka en ngai miau lo a, a harsa ka ti rih.

*dy.. a pawi lo, i inpeih hun ka nghak thei reng che*

Akhuma message chu ka en a.

*ka inpeih vat kher lo thei a*ka tih chuan

*ka nghak phawt tho ang che*

Engati nge min duh le? Thanpuii a duhzia leh a hmangaih thinzia ka hre vek a, tunah pawh ngaihdam a rawn dil lawm lawm a, a hnenah a let leh mai loh a, midang duh ka nei tih hre renga kei min thlan tlat? Engmah hi ka hrethiam thei lo e.

Naupangho an exam zo tawh a, school chawlh chhung zin turin ka inruahman fel tawh bawk. Ka nauin chawlh a neih theih dawn loh avangin lehkha zira a awmna hmun Sikkim lamah ka chawlh hman ka tum a, ka haw leh hunah chuan rilru thar put ngei ka tum bawk. Ka zin hma zanin ka u in u Faka chaweiah a lo sawm a, kei erawh chu ka thianteho nen kan dineout daih thung. Akhuma nen kan inzui haw a, in kan thlenin ka chhungten chaw an lo ei ve chiah. Chawei tur kan nei tih pawh ka lo hre lova, ka lo ei chhuak daih chu ka lawm ru veng veng.

"Lo thu la, ka han inthlak lawk" Akhuma hnenah chuan ka ti a, room ah ka lut tlang nghal a. Rei vaklo hnuah ka chhuak a, sitting room ah chuan eng engemaw sawiin kan inkawm a. Ka zin tur chungchang vel kan sawi lai chuan ngawi rengin kan thutna epah u Faka a rawn thu a, ka u in a rawn zui nghal titih bawk. An awm ve tih pawh ka ngaihtuah duh lem lo, kan titi chhunzawm char char a, ka u te pahnih an ngawi reng thung.

"Tei hi naktuk kal a tum tawh sia, ka rawn thlah hman hmel ta lo riau che a" ka u in a tih chu ka hre phak reng a.

"A pawi lo, ka phut lui hleinem che. Han dam phawt ila, hun a la tam dawn alawm" 

An thusawi chu a eng amah ka hrethiam lo. Ka u nen an lo inkawm nasa lutuk hian keimahah theihnghilh tak tak min ti harsa. Kan ina chaw a rawn ei ngun thin em avanga inhria a, innel chho a, inngaizawng kha kan ni reng a, kan inkar that loh vang ngawta rawn lan loh lah chu a tum bik si lo. Ani dik lo hmasa zawk mah a inthlahrun loha a zah loh chuan ka lo zah a ka lo nat hi a ngai bik lo. Ka rilru a dam ve tawh zia lah ka inhai bik lo.