IRRESISTIBLE- XVI

Sixteen

*Feli POV*

Ruata nen bazarah kan inzui a, vawiin chu chawhma chiah kal a ngaih avangin chawhnu lamah bazaar na hun thawl ka nei thei hlauh a, Ruata nen zan lama kan sawi lawk tawh avangin kan chhuak tlang a ni. Thian anga min en theih dawn loh chuan ka kawm dawn lo che tiin a tir atangin ka sawi kha ania, a nuih a za viau lehnghal. Kan inrual tawk bawk a, nuam tihzawng la dang hek lo, tihian kan inkawm thei ta viau a nih hi. Ka duh ka lei zawh chuan MC ah Zampuii dawrah kan kawi leh a, nidang ang bawkin a lo buai lehpek hle. A thawmhnaw hi a dangdai thei bawk a, a nei rei hman ngai lo.

“Lo thu ve phawt ru, thil kan ei dawn nia” a ti a, a eizawnnaah a chiang bawk a, a hausa ru zek tih ka hre reng.

“A hausa lutuk, thil kan ei sak teuh dawn nia” Ruata bulah chuan ka ti a, a nui var var mai.

“E, taka, Zoa chu enge a chanchin ni ta zel a?” customer te an kal hnu chuan kan bulah a rawn thu ve a.

“Karkhat vel chu kan inbe tawh lo” ka lo ti chuai raih a.

“A buaina chu hrilh ve mai tur che a nia, a mak thei e. Hmanniah Kimtei a lo leng reng a, ‘Feli te pu khan nupui a nei dawn an ti tak asin’ a tia, Zoa hi aniang chu ka ti mai a” a ti a.

“Kan hriat chin a inang bawk sia” ka lo ti a, za lo deuhin ka lo nui lui.

“Zampui, Feli bialpa chuan a bialnu hriat lohin nupui neih a tum tihna a ni thei em?” Ruata chuan a lo ti khauh a.

“A ang riau mai, ka call chhin dawn mawni le” tih pahin a phone a phawrh a, rang fe hian ka lo dang a, an pahnih chuan min en rual thawt.

“A ngai lo, a ho lutuk” ka tih chuan chik zet hian Ruata’n min en.

Kan haw kawngah chuan ka ngawi chawi riau, Zoa’n min call a tuma ka lo reject hnu khan a rawn tum nawn tawh lo anih kha. Ka lo ngaih ve danah chuan ka thinrim viau mah se a nghah ka lo ring ve a, ka thinrim loh hunt e nghakin min rawn biak a tumte ka ring ve a, tihian a reh chhunzawm hmak a nia. Ka be bik lo ang ka tih avangin ka ngawi ta kha ania, Zampuii thusawi erawh kha chuan min thawng pha tho. Nupui neih chu a tum tak tak tihna a ni angem? Hei vang hi em ni Kima bula let ka duh em tih min zawh?

“I rilru tihah lo la, I duh tak tak anih chuan inbe rawh u” Ruata chuan ka rilru hria niawm tak hian a ti a.

“Aih, ka be lo ang. A telloa awm thei lo ka ni hleinem” ka lo ti hmak.

“I pride kha a hnawksak ve viau thinin ka ring” tih pahin a nui a, ka lo melh rum thung.

In thleng min thlah thlap a, leng lut tura ka sawm erawh chuan gym kal a la duh avangin min hnial.

“Zanah I lungleng ka lo hnem dawn che nia” a’n ti ngei ah.

Rawng kaw bawllaiin Tatei a lo haw a, nidang ang bawkin a rawn chau haw leh hle. Thingpui ka lumsak a, dawhkanah chu a bawh ar ar a, a phone chu a bih mual mual bawk a.

“A u, U Zoa nen in ni tawh lo mi?” a rawn ti hlawl a.

“Ka hre bik lo” tih pahin thingpui chu ka pe a.

‘En la, nupui a nei dawn a mi?”tih pahin a phone chu min pe a.

IG ah Mali chuan Zoa nen an thlalak a lo post a, ‘Dear future husband’ tih caption ah a lo hmang.

“A bialnu chu tinge I follow kher a ?” a phone pek pah chuan ka ti a.

“A rinawm leh rinawm loh hriat nan ka duh alawm”nui thaw chungin a la ti zui.

Ka khumah chuan ka thu reng a, tlaia ka thil hmuh khan min deng na ve det. ‘Ka thusawi chiah awih ang che’ a tih kha ka hrereng thin. Mahse, hetiang dinhmun a lo thlen chiah hian tawrh harsa ka ti thin. Ka phone chu ka la chhuak a, Zampuii leh Ruata nen ka thlalak chu whatsapp status ah ka hmang a, ka update zo deuh chiah chu Zoa’n a rawn view nghal. Mahse, engmah a sawi lo. A number chu ka delete lek lek a, tlawm thlak ka ti bawk si. Ka chapona hian mi block te, number delete te hi min tih tir thei lo chu a ni. Tun thleng hian Kima number pawh ka la nei, min delete hma chuan delete hi ka tum lo bur.

*Feli, Zoa’n nupui a nei dawn mi*

Ka thiante min zawhna ho chu tumah ka chhang lo, ka phone chu ka thehthla tawp a, ka mu nghal daih. Zan dang ang lo takin ka mu tui phian lehnghal, ka harh leh chuan niin min lo chhun a, a hma tawh lo tih ka hria.

*Dr. Zoa POV*

Ka muhil thei lo chu ka let ka let a, ka rilruah thil tam tak a lo lut a, ruahmanna tam tak ka nei bawk. Tunah chuan thil pakhat chiah tih duh ka nei, Feli hi nupuiah ka nei ang. Tuna ka buaina chungchangah pawh hian a tir atangin engmah ka hrilh lo a, chuti chung chuan keimahah rinna a nghat thlap a, kei hian ka thikthu chhiat leh ngaihtuah tawi vang mai maiin ka chan tur a ni lo.

A whatsapp status chu ka en a, hepa hi a status ah a lang tam malh malh riau, engemaw tak an inkarah a awm a ni maithei. Karkhat chhung zet kan inbe tawh lova, a thinrim lai leh lungawi loh laia biak luih talh ka tum lem lo a, tha taka hmaichhana kan sawi theih ka rin avangin kartawp hi ka nghak kha a nia, ka nghak chhuak thei lo teuh kher mai.

*I thiante pawh hian engmah kan hre lo chu a nia*

Tetea message ka en chuan ka ner sak a, Mali’n IG ah kan pahnih thlalak a lo post a nih leh pek tawh hi.

*Kartawpah ka lo haw dawn, ruahmanna lo nei rawh*

A hrethiam maiin ka ring, tuna ka buaina hi a hmawr ka bawk fel thei tanin ka hria. Ka khuma file let reng chu ka en a, ka duhthusam ang chiahin ka chhungkaw buaina chu ka chingfel dawn ta. Ka hlimna tur leh ka chak zawng angin ka hun ka hmang ve thei tawh ang chu. Chung ka ngaihtuahna te chu ka kawngka chum bur riah a bo nghal duak a, ka han inbeng kang deuh a, ka in ngei nia ka hriat avangin ka va tho a. Kawngkhar bulah chuan Tea chu a lo ding reng a, min hmuh chuan a khi sung a.

“Enge a awmzia?” ka tih chuan inchhungah a rawn lut zui nghal a.

“Biakhmingi ka neih a ngai leh lo hlauh a, ka hmangaih ber nei turin ka lo kal vang vang” a ti a, thutthlengah chuan a thu thla nghal a.

Ka bangbo telh telh, ka nau bulah chuan ka han thu ve a.

“Ka hriatthiam theih turin han sawi la maw le” ka tih chuan a phone min pe a.

Biakhmingi chuan nau a pai thu leh Lianzuala fa a nih loh thute, an inneih kher a ngaih loh thu a rawn thawnna vel a lo ni.

“Tikhan thil ka hrethiam kuar kuar, kan ina min rawn luhkhung a tum ni khan sex min hmanpui a tum nasa lutuk a, ka lo hnar fithla thak a. Midang nen an lo chesual sia, tum nei ranin min rawn pan a lo nih kha” a ti ta a.

“Duhawmi chuan a la pawm thei dawn che em ni?” tiin ka zawt a.

“A chhungten engkim an lo hre ve vek sia, min neih chu an phal lo a ni awm e. Mahse, ka rawn ru chhuak dawn” a ti leh hmiah.

Mi puitling a ni tawh a, tha nia a hriat chu a thlang thei alawm, sawi buai emaw inrawlh emaw ka tum lo.

“Ka pa in motor lian min leisak a tum a, taima takin ka thawk ve ang chu” a ti a, engmah thawk ngai lo leh thawh pawh tum lo a nih thin a vangin chumi hriat ringawt pawh chu a nuam ve deuh alawm.

Chaw kan eikham chuan hna khawih tur tlem ka nei a, ka room lamah ka inkhung a. Tea erawh chuan TV a en a, phone a hmang pah bawkin ka hria. Darkar khat hnu velah ka va chhuak phei ve a, a phone chu a lo bih ngur ngur a.

“U Mali nen in innei dawn tihte hi I hre ve em?” a ti a, ka nui ringawt.

“Feli nen in inthen pawh mak tih laia ani nen in innei dawn tih hriat leh zel chu a mak duh hle mai” a ti leh a.

“Feli nen kan inthen hleinem, kartawp hi lo nghak ula, in hre mai ang” ka ti a, rum deuh hian min melh.

Thil kaldan vel ka ngaihtuah a, ka lo nui leh ringawt zel. Ka ruahmanna fuh lutuk chu a nuam ve hrim hrim. Feli number chu ka lo hmet chhuak leh thin, surprise ka duh ve deuh bawk nen ka tawrh hram hram a la ngai.

*Feli POV*

Kartawpah Zampuii te ina chaw eikhawm kan tum avangin Ruata pawh ka sawm ve a, thian a neih loh em avang hian kan inkawmngeih zual phah a, ni tin lo inhmuh bawk nen ka ngaina ve tawh lutuk. Ka buai deuh niin min pui a, ka buai lohin a rawn lang tho bawk a, mipa a lo ni ve bawk nen kan thlamuanpui hrim hrim.

Nikhat ka haw lam chu U Tetea nen kan inhmu hlawl a, vengkhat mah ni ila inhmuh hi a har ve em em thin a, chutia kan inhmu chu min lo ko ding a. A motor chu a han hung tha ve bawk a.

“Sunday tlaiah chaw I lo ei a ngai a nia” a ti a, ei nachhan tur ka neih ka hre si lo a.

“Tinge?” ka han ti ringawt a.

“I lo kal hunah thil hrilh tur che leh hmuhtir tur che ka nei a, I lo kal ngei ngei a ngai dawn ania” a ti leh tawp.

‘Ka hre lo le, ka lo hrilh leh dawn che nia” ka ti a, kan thianho chaweikhawm kan lo tum ve bawk nen, chutia a tuka maia midang ina ei leh nghal chu ka chhungte ka hmaizah ve deuh bawk a ni.

“I chhungte chu keimah pawn ka rawn dil mai ang” a ti leh ta zel a, hnial dan tur pawh ka hre tawh lo, kal tur ang chuan kan inthlah ta a.

Kartluanin U Tetea te ina chawei kha ka rilruah a awm a, Zoa nen kan boruak thain amah nen ni ta ila chu ka hreh pawh a ni hran lo. Mahse, tunah, keimah lehnghalin ka ni dawn a, ka huphurh lutuk tih hian a sawifiah zo lo.

Inrinni zing hi chu ka tho hma ngai lo, zan atangin K-drama enin ka meng ta ngat ngat thin a, kartawp ka hman nawm ve dan ber a nih avangin ka nghahhleh phah thin reng a ni. Ruata nen bazaar turin kan thian dangten min ti a, a hmanhmawhthlak lem lo bawk a, ka harh hnuah pawh ka tho lawk duh lo. Ka phone ri pawh chu ka ngaihsak duh lawk lo a, Zampuii emaw min tur hmanhmawh tur bak a nih ka ring lo. Thawh ka tum lai takin a rawn ri leh a, ka han ban ta nge nge a.

“Aizawlah ka awm ania” titu Duhawmi number chu ka han thlek thla leh ngat a.

“Enge a awmzia?” ka tih chuan, “Pasal ka nei maw le” zawi deuh sap hian a rawn ti.

Ka te ta chul a, chutia pasal a neih thu in min rawn deng ta chu a mak tih piah lam a ni. Lza nen khan an induh ve viau kha ania, nupui a nei dawn ta sia, a rilru na hian a nei ve ringawt emawni dawn.

“Vawiinah lo leng rawh” a tih chuan chaw kan eikhawm dawn thu leh kan eikhamah kal turin ka ti ta a. An awmna chu whatsapp ah min rawn hrilh ang.

Zohmuna ka thiannu ve ber a nih avangin helama a awm chuan ka buaipui a ngai tih ka hria, an khuaah min duat bawk a, helamah chuan min mamawh a neih phawt chuan ka awm ve zel ang.

*Zoa POV*

Ka nau te nen kan haw chho ta kha ania, ka nu leh pa hriatpuina thlapa nupui ru a ni bawk a, kan thleng chho chu mak an ti lem lo. Duhawmi atanga ka nu leh pa ka hriatchian belh tak chu kan duhzawng an nih phawt chuan khawi ami pawh nise, eng ang mi pawh nise kan neih hi an lo phal tih leh keini aia dinhmun hnuai zawk te pawh hi angkhat vekin an lo en tih hi. Hei hian ka nu leh pa an ni na vang vang a, min ngaihsanzual tir. Sunday tlaiah Tetea te inah Feli pawh ka hmu thei dawn a, ka thianpa ruahmanna angin ka surprise dawn a nih awm chu! Naktukah Mali chu inhmuhpuiah ka sawm a, a phur via lehnghal. Ka hmuh nachhan tur hi hria se chuan rawn kal chu sawi loh, min hmu ngam miah lo tur hi a nia. Engpawhnise, mahni inah, mahni khumah ngei hahdam takin mu vang vang phawt ang.

Dar 11 ah Bon apetite lam panin ka inkhalh chhuak a, kan thiannu Elty te dawr a ni a, keimah vangin Mali nen pawh an innel viau. Ka va thlen pawh hian an lo thu tlang a, an lo nui leh hawk hawk tawh. Ka kut ka vai zauh a, cabin ka book lam chu ka pan nghal a, Mali pawh chuan phur sarh hian min zui a, ka banah chuan a vuan tai a.

“Ei tur chah phawt I duh em?”kan thut fel hnu chuan ka ti a.

“Aih, hmundangah ei zawk ang. Elty I tlawh khat vangin hetah kal I duh a nih ka lo ring ve tawp a, ka chaweina pawh a la rei lo” a ti a.

“Anih chuan ka koh chhan che kan sawi nghal mai ange” tih pahin ka file khai luh chu ka phawrh a. “Hei hi ka nu hmanga min vau na ka chhan letna che chu a nih hi” tih pahin a hmaah chuan ka han theh phei a, a mitmeng buai nghal nak vang chuan ka lo nui suk thung.

“E..Enge.. enge heng hi” tih pahin lehkha chu a phawrh nghal a, a hmai dang nghal sawp sawp chu ka hmu reng.

“Chet I lak rual rualin I pu hi a chhe vek dawn tih chu I hre tawh ang chu maw?” tih pahin tui chu ka in a.

Minute1 vel chu thawm  a reh dak a. A thutna atangin a tho a, ka hmaah chuan a rawn thingthi ta rawp a.

“Zo, min ngaidam rawh. I nu talawh tir ka tum taktak vangte, tih hmingchhiat ka tum vang a ni lo. Ka hmangaih che a, chan che ka hlauh vang chauh a ni” a ti ta a.

“Min hmangaih tak tak ni la khatiang khan I che hauh lo ang, min hmangaih tak taktute hi chuan maw, rilru na chung pawhin I hnenah hian min hlan phal asin” ka ti a.

“Khawngaih takin Zo.. hetiang hian awm suh” a ti a, a tap ta zawih zawih a.

A hma ang chu nise he mittui vang hian ka chak lo leh ngawt ang, hmeichhe mittui tla ka hmu thei lo tih hrechiang bertu pawh a ni miau a, mahse, tunah hi chuan ka hmangaih ber nen hei leh chen min pawtthentu  anih vang hrim hrim pawh hian khawngaihna ka nei thei lo.

“Tho rawh, ka va thlah ang che. Tun hi kan inhmuh tawp ni ber a ni bawk ang, chuvanga helaia kalpui che pawh ka ni. Engtikah mah nang nen hian kan chhuak tlang tawh dawn si lo a” ka ti a, kaihthawh ka tum chuan a lo tal a.

“Zo, ka thi thei ang, I tello chuan ka dam zo lo ang” a ti leh a.

Ka chhuahsan lai pawhin a awm dan ngaiin a awm reng, Elty chu ka ko a.

“Pawnah motorah ka lo nghak ang, rawn chhuahpui mai rawh aw” ka ti a, an in thleng tal ka va thlah ve ang chu.

Sam chu ka bia a, a thil min tihsak zawng zawng vang hian engpawh phut se a phu vek ka ti. Ka nu hriat loha thil thleng kha a buaithlak lai ber kha a signature lo awm ve tlat si kha a ni a, chhui leh buaipui kha thil hautak tawpkhawk a nih thu a tirah pawh a sawi. Mahse, thudik lo hi chu a tawpah a lang chhuak leh nge nge thin a. Mali pu sum tihchengpen turu lutuk thup nana hmanruaah ka nu kha a lo tel ve mai a lo ni. Engkim tihchianna a han chhuah meuh chuan engkim bul leh mawhphurtu chu sorkarin a lo hum tang tang Mali pu a ni ta.

Mali chu mit bui chuk hian a rawn lut a, a mit a sen ram bawk. Engmah a sawi tawh lova, ka sawi bik lo. An chhungkaw va tihbuai zui zel emaw, a mimal nun thlenga va phawrh mualpho hi ka tum ber a ni lo, thudik zawn chhuah chiah hi a tir atangin ka tum.

“I chhungte bulah min neih I duh loh thu I hrilh dawn nia, hetiang zawnga kan inhmuh nawn tawh loh ka beisei bawk” ka ti a, an kawtah ka chhuktir a, ka tlan let leh nghal vang vang.

Ka zungbun chhertirna lam pan chuan ka tlan leh a, ka thiante thu min rawn tih hlawhtlin tumin ka phar kual vel chu a nia, ka nuihte pawh a za deuh. Thiante ka tlawh kual neuh neuh bawk a, ka haw chuan khua a thim tan der tawh. Duhawmi chuan kawt a lo phiat fai a, Tea’n a sirah pangpar tui a lo pe bawk. Ka nu pangpar enkawlsaktu a ni hrim hrim a, tui pekte hi chu tirh a ngai miah lo.

Chaw kan eikham hnuah inchungah ka chho a, tunhnaiah ka ngaihtuahna a chawl lo lutuk a, ka taksa hi a chau ve hluah hluah thinin ka hria. Ka muhil lek lek a, tuna ka muhil a nih chuan zanlaiah ka harh leh ang tih ka hlau si a, ka inperh tho a, balcony ah ka chhuak thla. Kan kawt lama motor thawm ri leh tawng thawmah chuan ka zu hawi thla a, ka tum loh leh beisei loh lutukin Feli te an lo ni. Duhawmi nen chuan an inkuah chuk chuk a, an ri nawk nawk a. A status-a a rawn hman ve ziah mipa kha car ah a lut a, a  nghak dawn lo aniang, a tlan let leh nghal. Inchhung lamah an inzui lut a, ka maimitchhing sawk. Ka ngaih tawhzia leh ka kuah chak tawhzia chu ka rilruah a awm, ka kawr ka ha a, inhnuai lam pan chuan muangchangin ka chhuk thla ta a.

*Feli POV*

Duhawmi’n an awmna min rawn thawn chuan Zoa te veng lam a ni, chumi awmzia chu Lza nen an inru chiang lutuk. Ka thaw halh a, ka kal thei lovang. Chhuanlam siama kal loh ka tum lah chuan a thinrim em em bawk si, chu lo rengah ka pumpelh reng thei dawn chuang lo. Kan chaweikhawm chuan Ruata chu min kalpui turin ka sawm ta nge nge a, thian dangte la remti chu lo chung chu kan chhuak a. Zoa rawn haw ve kher pawh ka ring hran lo a, chuvang chuan ka hreh rualin ka hreh bur lo. An in kan thlen hma zawng ka hah a, ka chau vek, an kawt kan thlen chuan motor dingho ka melh kual a, a bolero pawh a ding ran. Mahse chung ka ngaihtuahna te chu Duhawmi nen kan inhmuh chuan hlimna in a thlak a, kan ri ta chul a, a hmangaih ber nen an innei thei chu ka lawm bawk. An inruk loh chuan kawng dang an neih bik lohzia ka hria a, ka hau duh lo. Ruata chuan min nghah a tum viau na in Lza’n ka rawn thlah ang a tih tlat avangin min hawsan ta kha a nia, a hrethiam em ang chu.

Sitting room lamah kan inkawm chhunzawm a, Zoa nu leh pa chu an fel tak zet. An room lam te fang ula an tih avangin Duhawmi chuan min kalpui a tum a, chutih lai tak chuan Zoa chu a rawn lut ve chiah a, kan inhmachhawn ta ran mai. Ka tha a khur nasa lutuk chu ka malah ka kut ka tat kawk a, ka kal tur chu ka banah a lo man bet hmiah.

“Nu, hei hi Feli chu a nih hi” tih pahin a nu leh pa lamah min phei pui. Midang zawng chuan ngawi rengin min lo melh tawp.

“Ka tum loh dan deuha ka hmuh tir cheu a ngaih avangin min hrethiam dawn nia. Tea te an inneih fel zawh veleh neih ka tum” a la ti zui.

A nu leh pa chuan min han chibai tha leh a, min ti lai khawlo zo vek, awmdan tur ber pawh ka hre lo. Hetiang tur a nih hria ila chu Ruata kha ka haw tir lo tur a nia, ka inphenna tur ber a haw tawh si, ka ni deuh hu in ka hria.

Zoa roomah kan awm a, Duhawmi te room kan en zawh khan a room lamah min kalpui daih a, hreh viau mah ila ka zui ta tho.

‘Ka tum aia hmaa kan inhmuh chu le” tih pahin min rawn kuah a tum a, ka lo thle sawn daih.

“Nupui nei mai tur I nih kha, I room ah midang nen in awm tih hriat ringawt pawh thil tha a ni dawn lo ania” ka lo ti vei hmak a. A hma khan ka hamhaih lutuk khan engmah pawh ka lo hre tawh lo a, ka ngaihtuahna a rawn fim leh tan mek.

“Nupui ka neih dawn chuan ka bula awm mek bak hi neih ka tum lo a” a ti.

“Neih che ka tum ve lo” tih pahin chhuah ka tum a, min phih dawrh a, min kuah bet nghal hmak.

“Ka sawi tur hi ngaithla lo chuan I haw lo vang” a ti a, a tirte atanga vawiin ni thlenga a hun hman dan leh a thil buaipui chu min hrilh ta vek a. Ka thaw huai, mahse, a tirah pawh sawi ve mai se ka hrethiam tho awm si a tih chu ka rilruah a la awm fan.

“Ka hria alawm, engkim kha hrilh vek che ka tum nasa ve lutuk. Mahse, Mali hian min rinhlelh vaih chuan lehkha kha a pu hnena thlen nghal mai dawn si a, ka thil chhui tur kha engmah lo mai a ni thei tlat si a, chuvanga min ring tawk tura ti che ka ni reng bawk a” atih chuan ka rilru a dam leh vek.

“I sual emai” mittui parawl teuh chuan ka ti a.

“Tuna tang chuan ka sual tawh miah lo ang” tih pah chuan min fawp a, keipawh chuan ka lo chhang let ve mial mial a. Ka ngaih tawhzia chu hetia ka bula a awm chiah hian ka hrethiam, ka tah te hi a chhuak vekin ka hria. Inhrethiam tawn takin kan hun hman dante chu kan inhrilh a.

“Tunge nichina rawn thlahtu che kha?” a rawn thut a.

“Ka bialpa thar” nui sung chungin ka ti a, min kuahna chu a phelh rang asin, a tum nghal bur.

“Kawp I duh loh chuan min then mai a ngai a nih chu” ka tih chuan rum zet hian min melh a, “Fiamthu pawhin sawi suh” a ti hmak.

A drawer a va hawng a, engemaw hi a rawn pawm phei a, a rawn nui deuh put put lehnghal. 

"Min kawp dawn loh chuan thil pek tur che ka nei" a ti a, ka kut ka lo dawh a.

"Ka kawp miah lo ang che" nui chung hian ka lo ti a, a nui leh duh tawh lo.

"Ka promise" tih pahin a hmuiah ka han fawp zeuh a, nui chungin min kuah a.

"Surprise..." Tih paha a thil min pek vang chuan ka thidang lo chauh.

"Engtinnge ..." Engmah ka sawi thei tawh lo, Hyun bin photobook ka kuta mi chu ka fawp zeuh a, dawhtheih hmel fe hian min lo en thung.

Ka haw dawn chuan Lza thlah ka duh thu ka han sawi ri leh zeuh a, tum hmukin khumah a hmu tau. Ka kal dawn tak tak erawh chuan a ngaingam chuang lo a, kan inzui chhuah leh tak kha. A kum zawng chuan upa ve tawh mah se chhaih kawlhte hi a la nuam ve lutuk tih ka hre tawh a, ka ching hlen ang tih hlauhawm khawpin  ka peih. Min duat hluah ang hian lang lo mah se min tina phal lo tih hi ka hre ve kar tawh a, mahni aia upa daih hi an lo tha a nih hi.

Sunday chawhnu inkhawm bana in ka haw chu kan inah Zoa chu a lo thu vang tawh. U Tetea te ina chaw kan ei dawn vangin fellowship lovin ka haw ta ringawt a, chaw ei tur ringawta kal ka duh loh vang a ni. Ka intleuh zuai a, muangchang tawh loin kan chhuak zui nghal a.

“An plan angin kan awm ta si lo a, an lawm vak lo” nui sak chung hian a ti a.

Kan va thlen chuan an thianho an lo kim deuh vek a, min lo nuih deuh thaw hlawm lehnghal.

“Plan ang pawha awm thei lo khawpa lo inngaizawng te hi a…” tiin min lo fiam sup sup lehnghal.

“In plan pakhat kha chu ka la khek alawm” Zoa’n a lo ti, an lo ehhh dual a.

Salad vel ka buaipui a, thildang chu engmah tih pawh a ngai tawh lo, an lo ti deuh vek tawh. Eng engemaw sawiin sitting room lam thawm chu a tha hlawm tawp. U Mahlimi chuan min pui ve a, Zoa chetchhiatna deuh deuh a sawi a, kan nui nasa mai.

“In inneih hun chu nalh tawkin kan chei tur che hi a ni ringawt, saw pa lah sawn a thlawnin I chei ang hi a ti ziah lehnghal” a ti a, ka lai leh ringawt tawh. Pasal nei tur anga ka inngaihtuah hian ka zak deuh tlat zel.

Chaw kan eikham hnuah chuan kan haw mai dawn lo tih ka hrethiam mai, a thenin keyboard an lo fit mawlh mawlh a, a thenin guitar an lo herh mil bawk a, a thiante hi ka nel ve hlawm tawh avangin hrehawm ka ti lutuk bik lo. U Sama chu intithupui fun deuh hian a chair a.

“Hei zanin hi kumdanga kan lo tih fo thin angin thianho inhmuhkhawm leh chaweikhawm hun a lo ni leh reng tawh a. Mahni hna theuhah kan buai tlang a, inhmuhkhawm mai mai hi a harsat thin avangin kumkhatah tun ang hun hi inhmuh khawm theih hram nise tiin kan lo rel a, hei kum 5 vel chu a hlawhtling tawh a, a lawmawm hle a ni. Sunday khera kan han ti pawh hi a inthlahrunawm hle a, mahse, naktuk lamah hian loh theih loha hna zawm ngai pahnih kan neih avangin vawiin hi kan rawt ta a ni. Kan peih thleng thleng kan zai anga, kan programme pawimawh ber tunah hian kan lo ti lawk ang” a ti a.

Ka bula thu Zoa chu a ding chhuak a, engemaw a tih dawn tih ka ngaihtuah lai chuan min rawn ko chhuak ta mai a, duh loh theih pawh a ni tawh lo.

“Hei vawiin niah hian kan thianho programme pawimawh taka kan VIP chu ka bula ding hi a ni a “ ati a, a thianteho in kut an lo beng dar dar a, an nui deuh sung hlawm bawk sia, ka zahzia chu.

“Tun atanga reiloteah tlangval pahnih awm thin kha pakhat chauh a awm tawh maithei a, kan VIP kutah a innghat thuk hle dawn a ni” a ipte chu a zen rak rak a, bawm tetak hi a rawn phawrh chhuak a, chutah ka inrin hmain ka bulah chuan a thingthi a.

“Feli, min nei duh angem?” a ti ta anih chu. Ka ka ka hup a, ka meng phawk nghal hrawk.

A thiante thawm a tha si, mittui karah ka lu chu ka bu nghat nghat a, rawn tho chhuakin zungbun chu min bun tir ta a, ani pawh ka buntir ve.

“Pathianin rem a tih chuan tun atanga reiloteah ka nupui a nih ngei ka beisei, min tawimawm zel turin ka thiante ka sawm bawk cheu a ni” a ti a, ka mumang ang ruai hian engkim chu ka hria.

Ka mutnaah te chuan zanina thil thleng kha ka ngaihtuah a, ka khumah chuan ka let leh tawp zel, ka hlim lutuk hi eng nen mah thleng ka phal ka ring lo. A tuk kan chaw eilaiin ka nuin ka zungbun chu a lo hmu chat, zak deuh chung hian thil awmdan chu ka sawi a, ka nau te pahnih an lo au vel chul.

“Engpawhnise, nu leh pa hriatpui thlapin in kal tawh a, a lawmawm viau, amaherawhchu nupa in la ni lo tih hi in theihnghilh tur a ni lo. Zoa hi mipa fel tak a ni tih ka hria a, chutihrual chuan setana hian min bei duh zel tih hi hriat tur a nia, kan innei dawn tho tih vang ngawtte hian a hun hmain in lo chesual hlauh ange, fimkhur lehzualin in awm dawn nia” ka pa chuan a ti a, a dik ka ti khawp mai.

*Vawiin chu I thawmhnaw inhmeh I tih dan berin inchei la, official tawkin kan in date ang*

Chu message chhiar pah chuan ka nui ver ver a. Ka nau te pahnih ka tihbuai leh phah teh e! Ka kawrfual neih thar, ka khup khuh chu ka ha a, ka sam chu Pekpekin min curl sak bawk a, ka makeup erawh Tatei’n a theihtawpa ulukin min tihsak. Min chei zawh chuan darthlalangah ka inen a, chhelo ka inti ve ngawih ngawih. Ka chhuah dawn chuan overcoat chu ka han ha leh a, ka boot hoin ka duh thu an sam tawh loh avangin Pekpeki boot chu ka bun bawk a. Ka nau te pahnihin an kut an han beng ngei a, anmahni vang hian ka confi ve sawt thin. Kan kawtah motor a rawn din chuan room atangin ka chhuak nghal a, ka hnungah ka nauten min zui bawk. Zoa’n min hmuh chuan a mit chu a san ak a, a nui deuhin ka hria. Ka inchei dan hi a duh lo emawni ka ti hman a, mahse, mawi ka inti ve chiang emai. Kan chhuah dawn chuan ka naute chuan kzp min han hmuh ngei bawk a, ka duh dun a nia.

“Tikhan mawi I inti em?” kan tlan chhuah hnuah Zoa chuan a ti a.

“Aw, mawi I intih dan berin inchei rawh I tih kha” ka ti a.

“Keichu I mawi pawh ka ti lo” a ti a nih chu, “Jeans I hak khan I inhmeh zawk, I pian a lan loh khan I nalh a lo nih dawn kha” a la ti tak deuh deuh a. Ka va melh a, a la thutak em em zui.

Ka theihtawpin ka inchei ve a, ka mawi a tih loh pawhin ngawih ve mai mai awm, ka tum hmuk tawh.

“Eyeliner I hman hian I mit a tilang nalh lo deuh bawk, I lipstick rawng te kha…”a sasi zawh hmain ka lo pawt chat a.

Ka insum zo tawh thlawt lo.

“Ding teh” ka ti tuar a, a ding ve mai a, chhuk ka tum nghal, rang fe hian min rawn man.

“Ka mawi lo I tih pawhin I ngawi ve mai mai thei lo mi?” mittui tling deuh pum hian ka ti a, a rawn nui chhuak ta hawk hawk.

“A tak tak emaw I ti em ni? I nalh lutuk a, ka sawifiah thiam lo a, ka uang ta ringawt a ni kha” a ti dam dup a, a lamah min pawt hnai a, min pawm ta vawng vawng a.

A chang hi chuan a chimawm ve thiam lutuk tih ka hre ta, fiamthute hi a thawh thiam viau lo na a, a duh ve lutuk tihte pawh ka hre tawh a, kan pahniha kan awm chiah hian ka famkim thin tih thlengin ka hre ta. Hmangaihna avangin tuar a ngaih hun a awm a, dawhthei taka awm a ngaih hunte a awm bawk a, chung zawng zawng kan paltlang anih chuan hlimna in a tawp kan khar thin a lo ni. Mi pahnihte inkar chu midangin an belh tur a ni lo a, hmangaihna anih avangin a nu but tur a ni hek lo.

Ka lo ngaihtuah ngai loh leh suangtuah phak bakin Zoa nen kan inhmangaihna chuan par a chhuang ve dawn ta. Pasal nei tur ka ni tih ka inhriat zan chuan ka muhil thei lo, ka hmangaih ber bula awm ka chak a, ka chhungte kalsan erawh ka huphurh bawk si. Chu thu kan hriat atanga thla khat leh a chanve a liam chuan Pathian leh kohhran hmaah nupa tak ni turin thu kan tiam dun ta. Kan inneih ni a mipui lo pungkhawm zozai kha a mak ka ti zawk. Hetiang taka ropui hian pasal ka nei ang tih ka lo hre ngai lo a, Pathianin a hun takah min chawimawi ta a nih hi.

“I chau em?” kan thiante pawh an haw zo tawh a, kan nupa room ah chuan kan pahnih chauhin kan awm ta.

“Aw, chau lutuk” tih pahin khumah chuan ka let tawp a.

“Inbual hmasa la, ka thil dahfel loh hi ka lo dahfel lawk ang “ a tih chuan peih lo zet hian ka tho leh a, engmah ngaihtuah loa muthilh nghal bawrh bawrh chu ka chak ber.

Ka inbual nghal zung zung a, Zoa rawn let leh hmain ka lo mu fel leh than. Room a rawn luh rualin bathroom a pan nghal a, tui ri phur phur ri ngaithla pah chuan ka lo chhing sek a.

“Fel, I la meng em?” a tih chuan ka meng diar diar a, “Kan tawngtai dun dawn lo mi?”a tih chuan ka harh zawk. Kan inneih zanah chuan tihtak zetin Pathian hnenah kan inhlan ang ka lo tih tawh kha.

Pathian hnenah kan hma hunt e, kan nupa nun zawng zawngte chu hlanin kan tawngtai ta a, thlamuang takin kan mu ve ta.

“I hria em, ka hmuh hmasak ber che khan zawlaidi min tat emaw ka ti asin, khatiang em ema min hiptu kha an awm theih ka ring ngai lo a” ka sam chul heuh heuh pah hian a ti a, ka lo nui nghawr dat a.

Pathian leh kohhran hriatpui thlapa nupa  nih a, nupa nun han hman chu a thlamuanthlak bik hian ka ring, tunah chuan ka pasal dik tak a ni ta. Vawiina thu tiam kan chham ang ngei khan engtikah mah ka pasal hi ka phatsan ngai lo ang. A sam buk deuh laih chu ka tuai thur a, muthilh tum chuan a awmah ka hmai ka phum a, ka chhing ta vang vang a.

(Min chhiarsak thintu leh comment chawl loa min pe char chartute, min nawr kaltute in ni, ka tan in hlu. Ka thawnthu reng rengah hian ka ngaihpawimawh ber chu nupa nih hmaa sex hman that lohzia hi a ni tih chu a chhiar thang chuan in hriat ka ring, ka theihtawp hian ka tilang ve hram hram hram zel a, kan ramah hian kum naupang tete te pawh hian a pawina an hre lo emaw tih mai tur hian an ngai ho tawh tlat niin a lang. Kan theih ang ang hian zirtirna i pe hram hram zel ang u. Lo inekawl tha ula, lo him ula, thawnthu dang nen intawn leh theuh kan tum dawn nia)