GIVE INTO ME

GIVE INTO ME

Mami Lalhmangaihzuali Chawngthu

PART- I

“Dar 1 rik hmaa report peih fel vek tur a ni tih kha i hria em?”

Ka meng phar kawk a.

Ka sana bun lai chu ka han bih a, darkar chanve chiah awm tawh ah hian report peih fel vek turin min beisei maw? Ka pa ka sun avanga ka mittui pawh a la hul hma hian hetiang em em chu ka lo beisei lo.

“Ka hna ka rawn zawm leh chiah a, keichuan ka peih fel hman lo ang”

“I private life leh I hna chu I thliar hrang thiam tawk turah ka lo ngai a”

Kan boss chuan min lo melh run a, ka mit ka khap eih duh lo.

“ka hrilh che hi ka duty ania, a bak chu I bawhzui ve tawh mai aniang chu”mi tham lo zet hian a then sak a.

Ka dawhkana hmanraw awm apiang chu tham khawm bawrh bawrh a, vawm hrep chu ka chak tak zet a ni. Ka insum hram hram a, he sakawlh pa bulah hian thinrimna bak a awm lo. Ka thu hnawk a, ka computer chu ka han ti nung a, he hna ka thawh chhan ve ber ka pa lah a dam tawh si lo a, ka thawh zel hi a tulna a awm tawh pawhin ka hre lo. Ka file pawimawh chu ka copy vek a, ka banna ka ziak ang a, ka bang vang vang tawh ang. Ka tihfel ngai awm zawng zawng ka tihfel hnu chuan ka banna tur lehkha chu ka han ziak a, tunah chuan ka duh dan ang angin ka nun ka hmang ve tawh ang.

“Lawmzual, lo ding teh” Ka ke pen a tawp chat a.

Ka hmaah chuan kan pu ber Rinzuala a lo ding a, a hmaa ka hlauh leh ka zah em em thin kha la ni reng mah se a thuhnuaia awm ka nih tawh loh avangin ka hlauhna tur a awm tawh lo.

“I banna hi ka pawm dawn miah lo ania”min melh ngur a.

“Eng ang pawhin pawm dawn lo mah la ka thawk tawh chuang lo ang”ka ti nghat a.

“Engvangin nge hetia ban hi I tum teh thut?”

“Ka thawk peih tawh lo a ka bang a ni mai alawm”ka tih chuan za lo tak hian a nui hak a.

“Tun kar chu I duh leh chawl hahdam rih la, I pa thihna hian a la ti na che anih kha, karleh atangin I hna I rawn zawm leh dawn nia”a ti a, ka chhan leh hmain a kal sawn nghal a.

A mizia rawn danglam thut avang chuan ka hamhaih lutuk chu ka dinna ngaiah ka ding reng a. Ka lu chu ka han thing deuh nak nak a, a chang chuan hlauhawm khawpin min hau a, rin loh takin a zaidam leh phian ang lawi si a, mihring mizia hriatthiam har tak chu a ni ve hrim hrim.

Ka khumah chuan chau zet hian ka mu tawp a, ka pa nen khan hun harsa tak kan paltlang a ni. Mahse, khatiang taka harsa leh khirh kha ka pa nen kan nih chhung chuan hreawm ka ti ngai lo. Tunah erawh keimah chauhin engkim ka beih a ngai tawh a, ka mal lutuk na hian ka nun a tichau a, a tihah hluah hluah a ni. Ka paah khan engkim ka lo innghat a, ka innghah luatah min awm loh san hnu hian midang ka lo mamawh ve thozia ka hriat phah a ni. KA hnaah ka tui em em thin a, achhan pawh ka pa khan min tui pui em vang a ni.

Ka hming chu Lallawmzuali a ni a, tunah hian kum 26-na ka hmang mek a ni. Ka pa hi sipai anih avangin ka naupan tet atangin vairamah kan khawsa a, ka nu hi chiang takin ka hre mang tlat lo. Ka pa farnu in ka naupanlai hun tam zawk min enkawl a, ka pa duty zo lo haw hi nghakhlel takin ka ni malchunga thu chung khan kan lo nghak thin. Ka nu hmel hi ka ngaihtuah ngial pawhin ka hrechhuak zo lo a, nikhua ka hriat deuh hnua ka pa hnena a chanchin ka zawh tum hian pa huaisen leh chhel ka pa mit atangin mittui a lo luang a, ka nu chu kan thinglungah a thih tawh thu chiah min hrilh a, ka pa mittui titla tu anih avang khan vawikhatmah ka zawt nawn tawh lo. High sikul ka kal tirh khan min enkawltu ber ka ni chuan nat lawk em em pawh awm loin min thihsan thut a, ka pa nen khan kan tuar teh asin. Nikhat chu ka pa duty a lo la haw lo a, keimahin eirawng ka bawl keuh keuh a, ka ni damlaia kan hlim ve theihzia chu ka ngaihtuah chhuak a, ka mittui hi a rawn tla zung zung a. Ka ni room ah ka tlan lut a, a khum hnuaia thingrem chu ka han hawng ringawt a, a thlalak en ka tum a ni deuh ber. Ka rin loh deuh mai hian envelope ka hming inziak hi ka hmu nawlh mai a, rang takin ka la chhuak a, ka room lamah ka tlan phei pui a. Ka nu chanchin min hrilhna lehkha a lo ni, ka nu chuan ka pa alo uiresan hi a lo ni a, ka pa rilru natzia leh a chanchin reng reng sawi a phal loh dante, a thlalak phei chu min hmuh reng reng lo tura a tih thute alo inziak a, thlalak pakhat a lo inzep tel a, hai rual loh in ka nu a ni tih chu ka hre thei mai a, ka nu chu ka lo chhun tak zet a ni. Ka pa ka khawngaih rualin chutia min hringtu nu hmel ka han hmu ka lawm em em a, ka pa in a hmuh mai theih loh nan ka thingrem mawngah chu thlalak chu ka dah tha a, ka theih hun apiangah ka en thin.

Hun alo kal zel a, ka pa pawh a pension ve a, sipaia a tan hma avangin a pension pawh hian a la naupang hle a, nula tam takin neih tumin an hel thin tih pawh ka hria, mahse, ka pa khan nuhrawn ka hrawn a phal ngai lo. Min enkawl puitlin loh kha a thil hlauh ber a ni a, ka zirna kawngah pawh theihtawp min chhuahpui a, school leh college tha ber berah min luhtir reng thin a ni. College ka han zir zo a, ka pa in Mizoram lama let leh a duh pawh khan keichuan ka chak lo, ka khawsak tamna hmuna awm hlen chu ka duh a, mahse, ka pa bawk hian Mizo ka nih chhung chuan Mizoram hi ka ram a ni tihte, ngaihlu tura min duhzia leh eng ang pawhin lehkha zir sang ila ka ram ka ngaihsan loh chuan awmzia a awm lo tih min hrilh khan min hneh a ni chek ang chu, Aizawlah in hmunte leiin kan inbengbel ve ta a ni. Vairama khawsa thang tih takah ka nunphung a pangngai lo rei khawp mai a, thian kawm pawh ka chak loh phah hial a, mahse, inkhawm tur khan ka pain min nawr peih bawk a, a sawi ang chiahin thian pawh ka chhar ve nual phah a, nuam ka ti ve ta vat reng a ni. Saptawng leh vai tawng duh tawkin ka thiam a, hna pawh ka thawh sen loh min offer ve reng a, hlawh tam tak ai chuan ka tuina ngaipawimawh tura ka pa min tih thin avangin tuna ka hna, Mizorama Hotel lian leh changkang ber pawlah hian Manager in ka thawk ta a ni. Kartawp chawlh ka neih ve chhunah ka pa nen hun hman kha ka thlahlel em em thin a, kan buai changa hotela riah ngaih chang a tam avangin ban ka tum ru fo a, ka pa erawhin a remti ngai lo.

Ka mittui cu ka han hru tawk a, ka hna min tui pui bertu ka pa awm tawh si lo chuan ka khawvel hi a tiruak ngawih ngawih a, thlakhlelh em em lah ka nei hek lo. Engmah thawk lo pawh ni ila ka pa pension ka lakna pawh hian nuamsa takin min siam thei tih ka hria, mahse, ka pa kha la dam se ka talent leh ka thiamna hi dahbo mai maiah a phal ka ring lo a, kal zel tura min nawr leh ka rinna chauh hian min tichak leh thin.

Nihnih chhung ngawt ka mu tawh a, engmah ka ei chak lo a, ka nun hi a nguai ngawih ngawih a ani ber. Doorbell rawn ri ral ral chuan ka muhil lai chu min tiharh zawk a, a tawp leh mai ka rin avangin ka tho mai peih lo a, a rik leh thin avangin peih lo zet chuan ka han tho a, kawngkhar bulah chuan Rinzuala chu a lo ding a, min hmuh chuan hmuh thiang lo hmu ang mai hian a ka hau a, ka thophang hmel a la hmu ngai lo tih ka hre nghal mai.

“Eng nge I duh?”ka han ti nghal tawng a.

“Ka lo lut ve phawt ang”tih pah chuan min su her sawk a, inchhungah chuan a rawn lut a.

Banga thlalak in tar chu a en dan dan a, ka pa nena kan thlalak a en lai chuan khawdang reng a hawi thei lo.

“I ngai ngawt ang”a ti sup a.

“Eng nge I rawn tih dawn?”ka han ti leh a.. . “I tello chuan kan hotel a kal thei lo, naktukah I hna rawn zawm tawh la ka duh a ni”a ti a, a aw ah chuan a hmaa min khawngaihna kha hriat tur a awm tawh lo, thupe aw takin a ni min biak ni.

“Duh lo ta ila?”

“I duh theih nan ka hmanrua neih ang ang ka hman mai a ngai tihna a ni ang”

Ka en a, min en ve reng a, hawisawn hmasa nih chu ka duh lo viau n aka ngaihtuahna a hriat ka duh loh avangin ka hawi sawn a.

“Ka pa hi thi tawh mah se min la chawm zo khawp asin”ka han ti ringawt a.

“Mahse hetia awm tur chuan a duh tawp lovang che. I pa kha hun reilote mah nise ka hrechiang ve hman tlat”a han ti a.

Ka thaw hak a, ka chhanna a nghak tih ka hria.

“Ka pa nen kan sulhnu kha ka chhui leh phawt ang a, chumi zawhah chuan min la chhawr duh anih leh ka thawk leh dawn nia”ka ti a.

A sam chu a han tuai puat a, a beidawng tih ka hria, min nawr vak a duh bik lo tih ka hriat vangin keipawhin ka zuam a ni.

“Ka hna thawktute chungah hetiang em em hian ka tlawm ngai lo, engvanga I laka hetia awm hi nge ka nih ka inhre lo”a ti a, a sawi dik chiah ang, a elpuite lakah pawh a tlawm ngai lo. Amah vek chuan, “Engpawhnise, chu hun chu ka nghak thleng thei kher ang em tih ka hre lo a, I lo haw hunah chanchin erawh ka rawn ngaihven leh dawn nia, nang leh kei kan indawrna hnuhnung ber ni turin”a han ti nghat a. A induhtawkna a bo ang tih a hlauh vanga chu tawngkam chu hmang kher a ni tih ka hria, ka nui sak a, lungawi hmel vak lo hian min lo melh thung a.

Chhuatah ka thu sawp niai a, naupang chhia min tih hmel zet hian min nuih suk a, a thutna atangin a rawn tho chhuak a, ka hmazawnah a ding a, a kut chu a kekawr ipteah a zen a, ka hmuh tirha amah ka nel ka rin ngai loh ang chiah khan vawiin niah pawh hian ka nela ka hnaih tak tak theih ka ring chuang lo. A rawn kun hniam a, eng nge tih a tum tih hriat tuma ka han hawi chhuah chuan ka hmuiah min rawn fawp a, ka hamhaih em avangin chet ngaihna pawh ka hre lo. A hmui nel thep chuan ka hmui ro khir ur chu a fawp tih ka hrechhuak zawk a, rang zet hian a awmah ka nam vak a, a nui sak a, ka zah em avangin ka kun chal a, ka la zak dawn chauh ni ber hian ka hria.

“I vawikhatna a ni maw?”a tih chuan min hmusit ni ta ber hian ka hria a.

“I hriat a tul lo”ka ti a, chutianga min zuam ngawt chu ka thin a rim telh telh bawk.

Ka tho a, amah hmachhawn zawng chuan ka han ding a, kan insanhleih ngei mai.

“Min va zah lo ve, i hnuaia thawk ka nih vanga i duh duha i tih kawi tur pawh ka ni lo”ka han ti tawn tawn a.

Min chhang lo, a ngawi reng a.

“Ka haw lutuk che”ka tih chuan a ip deuh chawih in ka hria.

“Lawmzual, ka zuam vang che leh ka hmuhsit vang chea khatianga i laka awm kha ka ni lo. Ka rilrua a thawh angin ka che ve tawp a nih kha”a ti a.

“Vawikhat pawh min rawn hnaih tawh suh”ka ti a, kalsawn ka tum a. Ka banah nghet zet hian a lo chelh a.

“Ka ta ni turin ka duh che, chumi vang chauh chu a ni”a ti a, mak ti em em hian ka melh ngawt ngawt a. Ani hian hetiang lam hawi zawnga min lo en chu mak ka ti a, ka awih lo hial zawk.

Ka han thaw halh a.

“Chutiang zawng chuan ka la en ve ngai lo che”ka ti hul hak a.

Mipa hleitling leh hmelchhe lo tak a ni tih ka hria a, mi hausa fa, retheihna la tem ve ngai lo leh a duh apiang neih tum ang hi a ni ang tih ka ring, englai mahin a mizia hian min hip ngai lo a, hmeichhe tam tak duh rawn ri mah se ka tan chuan mipa pakhat, ka hnathawhnaa ka boss chauh a ni.

PART-II

-Mami Lalhmangaihzuali Chawngthu

Ka thlenna hotel balcony ah chuan coffee in pahin ka hawi khaw thawng vel mai mai a, ka naupanlai hun tam zawk kha helai hmunah hian ka hmang ral a, ka pa erawh a hna avang khan kan bulah a awm tam thei lo a, ka ni nen hlim takin ka pa chawlh theih hun kha kan thlir ve thin. Ka inrin hman hmain ka mittui a rawn tla a, ka neihchhun ka ni leh ka pa ka chan tawh a, khawvelah hian ka mal ngawih ngawih bik chu a ni si a, nun hi hahthlak ngawih ngawih tih chang hi ka ngah bik mange. Ka phone a rawn ri ral ral a, ka han en chuan number ka hriat ngai lo a ni.

“Hello”

“Hi.. Naute, I chanchin hriat a va khat ve”

Joshua a ni tih ka hre mai, ka pa thih thu pawh a la hre tawp lo ang.

“Joe..”ka mittui chu a rawn luang zung zung a.

“Naute, tinge? Engtin nge I awm? I tap elo?”

Min ngaihtuah thin dan ngai reng khan min la ngaihtuah tih ka hre mai, chu chuan ka lung a tichhe zual tak meuh meuh a. Ka pa thih thute chu ka han hrilh tlai hnuhnawh leh a, a rum hawk a, ka tana ka pa pawimawhzia a hrechiang bawk a, min tuar pui hle dawn tih ka hria. Ka pa nen kan sulhnu chhuia ka zin thu ka sawi chuan, “Naktuk zingah ka rawn thlawk chho nghal ang, lo lungngai reng reng suh aw”a ti dam diai a.

Engvanga hrechhuak har em em nge ka nih tih ka hre lo, ka ni thih pawh khan ka pa duty lai a rawn haw theihna kha Joshua vang a ni, kawng engkimah kan tan khan a inpe em em thin a nih kha. Phur lo zetin inbual turin bathroom lamah ka lut a, khawi hmun mah hi nuam tihna hmun ka neilo, ka mittui titla tu an ni zel mai zawng a nih hi. Chawhma chhung ka inkhung a, chawhnu lamah erawh chhuah harh thaa ka hriat avangin peih lo tak chung chuan ka chhuak a, beach a chhungkua leh inngaizawng hlim taka an kal vel chu ral atangin ka thlir a, hetiang zat mipui an awmna hmunah hian ka chhungte tia sawi tur pakhatmah an awm lo chu ka inkhawngaih em em a, vanduai riau hian ka inhre bawk a.

“Ka naute..”

Ka hnung lawka Joshua lo ding reng ka hmuh chuan ka phu zawk a, ka mit chu ka han nuai a.

“Nang, tunah maw?”ka ti a, ka mak ti hmel a hmuh chuan tifuh inti tak hian a nui hak hak a.

“Hetah ka awm reng alawm, ka hna avangin nikum kumtir atang khan ka awm alawm. Surprise che ka duh vang a nia”a ti a.

Lungchhe takin ka kuah a, ka in sut hraih hraih a, duat takin ka hnungah a chul heuh heuh a.

“Ka awm tawh alawm, lungngai reng reng suh aw”a ti mawlh mawlh a.

.

Inkai rialin hotel lam chu kan pan a, ka pa thihdante chu kimchang takin min zawt a, ka hrilh bawk a. Min en leh tlawk tlawk thin, min khawngaihzia chu a hmelah a lo lang chhuak thin.

Joshua nen kan inhmuh hmasak ber ka la hrereng, class x ka zirlaiin ka sikul luhna kha sipai sikul a ni bawk a, discipline kha a khauh em em thin a, Joshua te thianho hi class an lo tlanbo chu niin, nilengin an hrem a, pawnah thil rit tak chawiin nisa an tuar tir a, kan senior a lo ni bawk nen, ka vawikhat hmuhna a ni. A hmel ka en thin a, chutia school tlanbo zinga a tel chu a inhmeh lo ka ti ngawih ngawih a, kan class tukverh atang chuan ka va en leh thin. Vawihnih vel chu kan mit a intawng nghe nghe, min lo nuih sak thin a, ka zak lutuk chu ka mal te chu ka han sik vak vak a. Khami ni atang khan a chanchin hriat chakna in ka khat a, a hnu rei vak loah ka hre ta reng a. Thiante tana engkim huam thin, mahni sahimna aia thiante himna ngaipawimawh chi hia lo ni a. Chu chuan amah kha min ngaihsan tir a, ka bialpa ni tura ka dream hmasak ber a ni nghe nghe. A hnu rei vak loah min duh thu leh hmeltha min tih thute kha ka thiante hnenah a lo sawi a, khami ni a ka lawm zia kha aw! Ka pa ka hlauh vang khan ka chhang ngam lo a, mahse, inngaizawng lo mah ila kan thinlung erawh a inzawm a, kan inhmuha kan inbiak ringawt pawh khan kan lawm tawk em em thin. College ka zawh dawn khan sipai officer ah a inziak tling tih ka hria a, ka lawmpui thute kha email khan ka thawn a, a training hmain vawikhat a rawn leng a, chu chu kan inhmuh tawpna ber a ni zui ta a ni. College ka kal chhung zawngte, a hnu zelah te pawh ka harsatna ka thlenna ber a ni reng thin a, ka pa vangin college ka zawh dawn kum atang khan inbiak pawhna ka tichat a, vawi tam min hmuh tum khan a rawn kal thin a, mahse, a rem dawn chuang lo, kan na mai mai tiin tha takin kan inthlah ta a ni. A training dawn erawh kha chuan ka hnar thei bik lo a, ka pa phalna thlapin kan inhmu a, chumi hnu chuan tun hi kan inhmuh leh hmasak berna a ni.

“Naute.. I pa thi chu pawi ka ti tak zet a ni, pangngai takin nang hi ka dil ang che ka ti asin, tih theih engmah ka nei tawh si lo a”a ti a.

.

“Joe, ka pa thu kha ka hnial thei si lo a”

Ka hmui chu a hup a.

“Naute, ka hrethiam lutuk che asin, ka hrethiam che. I pa kha ka dem reng reng lo ania”a ti a.

Sawi leh tur hre lovin kan ngawi ta reng a.

“Pasal I neih tawh te ka lo ring zawk hial a”rilru natna thuk tak a nei tih hriat zet hian min en reng a.

“Joe, nupui tha tak neih hi I phu a ni, hlim takin awm la, ka mamawh hun apianga ka tan I awm theih nan hrisel tha taka I awm hi a ngai a ni”ka ti a.

Van lam chu a en a, a awm chu a han dawm vang vang a.

“Aw le, ka tum reng ang”a ti a, za lo tak hian a nui sak a, ka rilru nawm nan chu pawh chu a ti hreh dawn lo tih ka la hre reng.

Ka inthlak zo ka chhuak chu uluk fe hian min lo en reng a, a kut a rawn phar a, inkai chungin hotel chhuahsan chuan a car nalh zetah kan chuang a, vawiin ni bak hun kan hmang dun thei dawn lo tih hria in chu hun tha chu ka tualchaina hmun min tlawhpui nan hman a tum a ni. Nilengin hun lunglenthlak leh hmun khawhar lo chang ta chu kan fang kual a, ka pa kha ka mitthlaah a rawn lang zawk zawk a, ka inrin hman hmain ka mittui a rawn tla leh zawih thin. Engtikah emaw chuan pasal ka la nei ve anih chuan he hmun hi honeymoon hman nan ka duh ang tia ka pa hnena ka sawi te kha ka hrechhuak a, tunah chuan pasal neih chakna reng reng ka nei lo.

“I phone a ri ania”

Ka phone ri pawh hre chang lek loin ka suangtuahna ka lo kawm a, inthlahrung takin Joe chu ka en a, a lo nui sak a.Ka phone ka en chuan Rinzuala a ni, ka reject a, chhan chakna ka nei lo.

“A pawimawh lo em ni? Khatia rawn biak tumtu te tih chu a tha ngai lo e”a ti a.

Phone a rawn rik leh rual chuan za lo takin ka han pickup a.

“Khawiah nge tunah khan I awm?”

“I hriat a tulna ka hre lo e a”

Chutia inti thunei taka min rawn ti chu ka ngai thei bau lo.

“A tul mah mah zawk a ni. Kha vai chhe pa bulah khan eng nge I tih?”

Ka thin chu a sa zak mai.

“Khatiang thlenga ka nuna I lo inrawlh buai kha a tulna awm lo”

Ka phone chu ka dah hmak a, ka nun ania, eng nge a lo buai ve em em.

“Naute, khatiang em ema I thinrim kha ka la hre ngai lo”a tih chuan ka inthiam lo leh deuh a.

“Ka hnathawhnaa ka boss ania, chawlh laia intih buai reng kha ka ning deuh alawm mawle”ka tih chuan a lu chu a bu nghat a.

Hotel kan thlen leh chuan khua a lo thim fel der tawh, motor atanga ka chhuak tur chu Joe chuan ka banah a lo chelh vat a.

“I rilru I thlak thut anih chuan ka rilru a la pangngai reng e aw”a ti a, a mitmenga na tuar hmel kha hmana ka hmuh thin ang tho kha a ni.

“Joe, hlim reng ang che”ka ti a.

Ka kut a chelh chu la thla in ka chhuak a, hotela ka lut tur chu ka va hawi let a, a mittui karah a rawn nui sak a, thei leh thei lo hian ka han nuih a, a ban a rawn vai lawp lawp a, engtikah mah kan inhmu tawh dawn lo ni mai hian ka hria, uar takin ka han vai let a, a hmuh loh chinah ka mittui ka khap per sak a.

Ka room ka luh chuan ka thil hmuh avangin ka tlanchhuak lo chauh a, tukverha dak chung hian Rinzuala chuan no hi a lo dawm a, ka rak hlut pawh chuan a tibuai eih lo. Chu chuan ka thin a tirim zual a. Engtin nge ka room ah hian a luh theih, ka thin chu a rim tak zet a ni.

“Engvangin nge he lai hmun thleng thleng hian min rawn zui? Ka phalna lovin ka room ah I lut bawk a,, police ka ko dawn”ka ti tawn tawn a.

Ka phone ka phawrh chhuah chuan rang zet hian min rawn phih sak a, a kut chu chelhin na zet hian ka seh nghek a.

“I duhtawk thei tawh em?”a aw reng reng chu ka kham hluah hluah.

“Ka haw lutuk che, ka hua che”ka mittui chu a rawn tla nghal zawih a.

“Tih hrehawm che leh tihnat che hi ka tum lo, Lawmzual, tikhan awm suh”min kuah a tum a, ka lo inher sawn nghal vat a.

“Midang nen ka hmuh cheu khan eng ang takin nge ka thinlung hi a nat tih pawh I hre lo, ka na asin”ati a. A hmel ka en chuan dawt a sawi lo tih ka hria, mahse, hepa hi tinge ka ngainat theih miah loh?

PART-III

-Mami Lalhmangaihzuali Chawngthu

Darthlalang hmaah chuan uluk fe hian ka han inen a, ka naupanlai hun leh tuna ka hmel chu dang tawh tak hi a ni a, ka khum bula ka nu thlalak ka tar chu ka han thlek zauh a, ka pa ai mahin ka nu chu ka lo chhun zawk a ni. Ka nu hi a la dam anih chuan khawiah emaw a awm ve ngei ang a, kei lah chu ka chhungte tia sawi tur pakhatmah nei loin ka awm chu a ni si a, ka dinhmunte hi hria se min khawngaih ve ngei ten kan ring ve bawk a, chak taka ka awm hi a ngai a ni. Ka pangpar lei chu ka thlek vang vanga, thlan ka tlawh lohna chin pawh thlakhat lai a ni tawh, vawiin ni hian ka pa thlan tihfai pahin pangpar ka dah dawn a ni. Ka insiam zawh chuan taxi chang turin kawn lam ka pan a, reiloteah taxi rawn tlanin thlanmual lam chu ka pan a, kawng tluanin ka mittui chu a tla a, side glass atangin driver chuan min rawn melh leh zeuh thin a, ka inthlahrun ve deuh avangin ka inngaihtuah lungchhe duh ta lo a. Fur lai a nih vangin thlan pawh chu hnim tlem a lo to leh tawh a, ka theih ang angin ka han thlo fai a, ka pangpar phunte pawh chu an lo nung tha ve hle tawh a, hlim takin a bul vel chu ka tifai a. Ka nunah hetiang thleng tur hian ka lo ngaihtuah ngai lo a, ka pa vang khan khawvel hi ka hmachhawn hreh ngai lo, ka innghahna ber ka pa a han kal bo a, ka naupanlaia ka ni in Isua chanchin min hrilh thinte kha ka hrechiang chak zual a, mahse tunah chuan min hrilh tu tur pawh ka nei tawh lo. Ka pa kha pa fel, taima,ruihtheihthil ti lo ni mah se Pathian lam kha a hawi em em hran lo a, inkhawm ve thin mah se min hrilh ber kha chu taima taka ka zirlaia zir tur leh mahni intanpuite chu Pathianin a tanpui thin a ni tih kha min hrilh tam ber pawla ni mai a, hriat duh tam tak ka neih mekte hi engtin nge ka hriat ang tih pawh ka hre chuang lo.

“Lawmzual…”

Ka han hawi chhuak vat a, ka piah lawkah hian Rinzuala chu a lo ding reng a, trackpants a ha a, t-shirt a ha bawk a, chutianga a inchei lai chu ka vawikhat hmuhna a ni.

“Thlana I kal dawnte chuan min sawm ve tur che alawm, mahni chauha kal chu a nuam ngai hleinem”a ti a.

Ka chhang peih lo, ka thiltih lai chu ka tihsan hmawk hmawk a, engtiang pawhin min chhaih buai rei mah se engmah a hlawh chhuak chuang lo ang ka ti rilru mawlh mawlh a.

“Khawi ka lo tihpui ang che”a tih chuan ka tuthlawh chu ka pe a, uluk em em hian a han thlo a. A thiam pawh ka rin loh nen a lo thiam em em leh zei tak maia a han che vel chu mak ka ti ru hle a, ka hmelah erawh lantir ka tum lo.

“Kum 5 lek ka nih hian ka nu leh pa ka chan a, nang chu I vannei ngawt zawk alawm”a ti a. Amah vek chuan, “Vanduai bik emaw intih mai hi a awl khawp mai, mahse, keini aia vanduai zawk hi an lo awm zel tih hi hriatreng tur ania”dam dap hian a han ti a.

“Kan vanduaina a in ang tih sawi chu tum suh. Nang chuan chhungte I nei alawm”ka han ti nghat a.

“Lawmzual”a thaw hak a.

“Sawi vak pawh ni ila I rilru ka thlak dawn chuang lo tih ka hria, engpawhnise paltlang tur hian I chak tawk tih ka hria a, tun atan chuan a tawk viau rih e”a ti a. A hnim thlawh sa chu a han phiat fai leh vek a, ka thutna bulah chuan a rawn thu a.

“Kan hotel-a I rawn thawh tirh atang khan eng ang mi nge I nih tih hi ka hre daih tawh, chuvanga duh che pawh chu ka ni, min hrechiang lo I ti pawh a ni maithei, ka hriat chin che hi ka duhtawk viau e”a ti a. Van lam chu a han melh vang vang a, “I pa nen khan vawihnih lai chu thingpui kan in dun ve hman a, a fanu a chhuang viau che pawh hi a awm ka ti hliah hliah”a tih chuan ka insum zo lo, ka tap chhuak hawk a. Ni e, ka pa kha chuan min chhuang thin reng a ni.

“Lawmzual, thil tam tak chu ka tihsak thei kher lo ang che, mahse, neih ngei che ka duh a, ka neih theih phawt che chuan I harsatna tam tak hi sutkian pui che ka duh a ni”a ti a.

Ka va melh a, min lo melh ve reng avang chuan ka hawi sawn a, ka kut chu dimte hian a la a, tal pawh ka tum chuang lo. A han hmer vang vang a, tunah hi chuan ka kianga awm thei tur ka mamawh tlat si a ni.

“Rinzual, min zuam viau suh aw”ka han ti a.

“Lawmzual, khatiang khan min ngai ziah suh aw, ka zuam vang chea hetianga awm ah hian min puh tawh lo la, ka duh lutuk vang chein min duh lo tih ka hriat reng pawh hian ka kalsan thei lo zawk che anih hi”a ti a. A darah chuan ka lu ka nghat a, ka rin aiin a ang chhungah hian ka him maithei asin, mahse, amah ngainatna pakhatmah neilo chung hian ka kalpui zel thei ang em? Eng ber hi nge pawimawh ta ang le?

“I harsatnate hi nangmah chauha I hmachhawn hi ka phal lo, tunah chuan keimah nen zel kan ni tawh ang”a ti a. A motor khalha ka chuan vawikhatna a ni lo chungin ka vawikhat chuanna ang maiin ka tang tung a, a hma lam chu uluk tak hian a melh ran a, ka hun hman mek chu ka chauh pui a ni ngei ang, traffic jam karah chuan ka lo muthlu leh sek thin. Ka in kan thlen chuan muangchang hian ka chhuk a, Rinzuala chu ka va en a, a thutna ngaiah a lo la thu reng a. Ka bag chu ka la thla a, leng lut tur pawha sawm lem lo chuan ka kal ta nghal a. Thingpui tal in turin ka sawm dawn em ni ang ka tih lai chuan ka bag chu a rawn la nawlh a, a motor hun that lai pawh chu ka hre lo. Ka chahbi ka hmuh mai loh avangin rei ngial ka zawng a, ka han hawn chuan kan inzui lut ta nge nge a. Ka inbual zawh chuan thingpui ka lum a, Rinzuala ka ve en chuan sofa-ah a lo mu a, a lo muhil bam a. Ka nui sak a, hnathawk ngai lo in hnim te a han thlo ve chu ka nuih a za ru hle a, hria se a tum leh hmuk ngei ang. Thingpui ka siam zawh chuan ka chawi phei a, ka han kaitho chu a awmna a hai a ni ang, rei erawh a ni lo.

“Engtik atangin nge I hna I rawn zawm ang?”a ti a.

“Ka zawm duh tih pawh ka la sawi loh kha”ka han ti a.

“I rawn zawm ngei ang tih ka ring”mahni inrintawk hmel tak hian a ti a.

“Ka la inngaihtuah mek”

“I rilru I siam fel chiah tih ka hria” Ka nui a, a tum hmuk thung.

“Karleh thawhtan atangin ka rawn zawm ang” A nui ta var var a. Ka no ken lai chu a la a, side table-ah a dah a, ka kut la vuan reng chung chuan a lamah min pawt hnai hret a.

“I rilru hi min pe tak tak emaw, pe tak tak lo pawh ni la, ka pawi ti lo. Ka ta ni la ka duh a ni mai”a ti a. A vawihnih nan ka hmuiah chuan a rawn fawp a, tun tum chu keipawhin ka thiam ang angin ka lo chhang let ve a, a nui deuh suk tih ka hriat chuan inlak hran ka han tum a, rang fe hian min lo pawt let a.

“Ka ta chauh I ni, tumah an awm tur a ni lo”a han ti deuh hmuk a. Phone call a dawn leh chuan hotel lamah an mamawh avangin phur lo tak hian min kalsan ta a, ka ruak huaiin ka inhria.

PART-IV

Hotel ka thlen chuan ka naute ho chuan min lo chibai liam liam a, ka room-ah lutin ka inthlak nghal zung zung a, room an pek dan vel chu ka han bih deuh thuak thuak a, felhlel leh duh loh deuh deuh ka neih thin chu tunah chuan kan bansan fel ta niin ka hria a, ka lawm ve hle. Ka dawhkan lam ka pan a, chinfel tur tlem azawng awm chu ka han ti nghal a, ka tuina ber a ni bawk a, chawhma chu reiloteah ka hmang zo ta mai.

“Eng nge kan lo an a?” Ka hnung lam chu ka han hawi a, Rinzuala chuan min lo nuih var var a.

“Engkim a tha vek chuan ka hria”ka ti a.

“I awm chuan ka thla a muang thin reng a ni. Business thar ka buaipui mek bawk sia, indaih a har dawn khawp mai”a ti a.

“Zanin I haw hman lo maithei aw, naktukah ka zin a ngai a, ka ken tur lehkha chinfel tur a tam ania, Pu Nghaka pawh ka hrilh tawh kha”a han ti a. A phone a rawn rik chuan a han bih a, “Ka kalsan ang che aw, hna ka la ngah deuh a”a ti a, ka biangah chuan a rawn fawp zeuh a. Ka bula a awm hi chuan ka thla a lo muang ve ta hle a ni ta berin ka hria, min kalsan chiah hian ka khua hi a har ru ta tlat a, ka duh loh ber thil a ni thin, mahse, min ngaihsakna hian min hneh ta a ni ber e. Ka hna ka zawh hnu chuan ka sana chu ka han en a, dar 11 a lo ri chiah a, zan hmasa lamah ka mut tlem vang a ni ang, ka mut chu a chhuak deuh riai riai reng a, zan dang chu nise ka mut chhuah hun pawh a la ni chiah lo ang. Ka room kawngkhar chu a rawn ri rak rak a, hawn tawh loh kan tum zet na a ka va hawng leh ta zawk a.

“Naktuk zing ka chhuak hma dawn sia, ka hmuh hman loh tak chein ka tia”Rinzuala chuan a ti a.

“Tun ang huna rawn kalte chu a tih chi loh emai, miin min hmu se engtin nge ni ang?”ka ti hluk a.

“Tunge maw min hmu chuang ang le?”tih pahin a rawn lut a.

“Ka ti tak tak ania”Ka tum deuh hmuk a, kan mimal nun leh kan hna hi kaihkawp ka duh ngai lo.

“I hmingchhiatna tur thil ka duh hleinem. Lokal teh, ka lo kuah teh ang che, ka ngai tawh lutuk che”a ti a.

“Ka ngai lo che pawh a ni bik chuang lo a”

“Min ngaih thu I sawi ve tiraw tunah khan”phawk fe hian min en a. Ka lu chu ka bu nghat a. Chu veleh hlim em em hian min kuah chuk chuk a, “Chu thu chu sawi ziah rawh aw”a ti thawp sat a.

"I cham rei ang em?"ka tih chuan a lu a thing a, "Rei tak ka kalsan phal che i ring mi" a ti a, ka lo nui sak a.

"Nula chhe lo deuh te hian an lo char bet lo ang che tih a sawi theih loh" ka tih chuan a tum hmuk a, min rawn bawh rawk a, "Vawikhatmah sawi tawh suh aw" a ti a.

"Aw ka sawi tawh lo ang, tho rawh i rit si" ka ti a.

Ka hmui chu a hup a, ka chalsam ka hmaia rawn tla hniang chu a han hui chho a, ka hmai chu a chul a, "Tih chhiat che ka tum lo, min hlau suh aw. A hun hmaa insum theih loh ka tum hleinem, thlamuang takin ka bulah awm la ka duh a ni" a ti a.

Ka hlauhthawnna zawng zawng lak kianin a awm a, a hnungzangah ka kut pahmih rawlh chho in ka han kuah a, nghet zet hian min lo kuah let a. Tunah chuan ka pa aiawhtu tak tak ka tawng ta niin ka hria, ka thla pawh a muang ta ngei mai. Ka muhil ka harh meuh chuan ni a lo tlang sang hle tawh a, ka phone chu ka ban vat a, Rinzuala chuan message a lo hnutchhiat a, ka khi var var a, a message tur chu ka han thawn let ve nghal a. Ka nun zel dan tur ngaihtuah a ka buai ka buai lai khan ani hi lo hnaih daih tawh ni ila ka khawharna kha a zia tur a ni a, mahse hetiang tak hian ka ngaina dawn tih tunge hre bik ang? Tukverh chu ka han hawng a, pawn boruak chu ka han hip vang vang a, van dum pawl riai chu ka thlir a, ka pa khan hlim takin min lo en hian ka han ring ringawt a. Thil pakhat ka hrechhuak a, ka purse ka lachhuak a, ka nu thlalak chu ka han en a, "Ka nu khawiah nge i awm le?"tiin ka phun chhuak sap a.

PART-V

.

Thlanmual atanga ka haw chu ka ngui riai a, tunlai hian chhan hriat mai theih si lohin ka nun hi a buai ru riau tlat a ni. Zantin mai hian ka ni kha ka mumangah ka hmu thin a, thu eng emaw tak min hrilh duh nei ni hian ka hria a, ka hnathawhna hmunah pawh chu chuan ka rilru a la peng nasa hle thin. Rinzuala lah a chanchin hriat theih loh in a cham vang vang mai si a, biak pawh ngaihna reng ka hre lo. In ka thlen chuan ka inbual vat a, khua a lum em avang chuan ka chau hle nghe nghe. Ka inbual zo bathroom atanga ka chhuak fel chiah chu ka phone a lo ri ral ral a, hotel atangin phone call pawimawh tak a lo ni. Ka day off a ni na a, pawimawh bikah chuan on call angin englai pawhin kan inpeih thlap a ngai thin. Ka inthlak sawk sawk a, hmanhmawh takin hotel lam pan chuan ka chhuak nghal a. Hotel kawtah chuan ka motor hmuh than em em mai chu a lo ding ran tawh a, ka hmuh sual a nih ringin ka mit chu ka han nuai a, mahse ka hmu sual tlat lo. Taxi atanga chhuak mai lo chuan ka awm chu ka han dawm vang vang a, Rinzuala a lo let tawh maw? Ka tah chu a chhuak ut ut a, a rawn haw chuan a hre hmasa ber tur ka ni dawn lo em ni? Pawisa ka pek hnu chuan muangchangin ka chhuk a, ka room lam pan chuan phur lo zetin ka pen a, ka hlauhthawn ruk thil hi thleng lo hram rawh se!

“Sir, kan theihtawp chu kan chhuah ve asin”

Dawhkana ka lehkha dah chu a darh chuai a, ka nau pakhat chu hlauthawng tak hian a lo khur zawih zawih a, ka hmuh veleh rang takin ka tlan hlawk hlawk a. A hmaah chuan ka  va ding nghal a.

“Ka naute aiawhtu hi ka ni, thil tihsual kan nei a nih chuan ka naute ni loin keimah hian ka tuar ang. Tin, heng thil thleng mekah hian tihsual kan nei miah lo ang tih ka chiang bawk”ka ti nghal thawng a.

Rinzuala hmela thinrimna lo lang chhuak chu hlau lo turin ka insangmar sauh sauh a.

“Min rawn hmu rawh, tunah, ka room-ah”a ti hluk a, a kal nghal a.

Ka kal dawn nge dawn lo tih ka ngaihtuah fe hnuah kal turin thutlukna ka siam a, ka kal nghal a. A room ka luh chuan tukverh bulah dingin pawn lam chu a lo hawi a. Ka thawm chu hre ang pawhin a awm lo. A dawhkan bulah ka ding reng a, a thinrimna chu thunun a tum ve hle tih ka hre thei. Muangchangin a rawn inher a, a beka thisen zamte chu a pawng deuh tawlh tawlh a, a awmdan avang chuan nuam ka ti lo hle.

“Lawmzual, kan inkara thil thleng zawng zawng kha thleng lo angah ngaiin kan theihnghilh vek thei ang”a ti a.

Ka hamhaih lutuk chu ka han nui ringawt a, a hmel ka en chuan fiamthu reng a lang si lo.

“Rinzual, engmaw I sawi kha?”ka aw chu a chhuak lo teuh hle.

“Min hrethiam dawn nia, thil hi ka duhdan vekin a kal thei lo a ni e”a tih chuan ka thu hnawk a, ka innghahna awmchhun chu engmah lo maiah a chang leh ta.

“Lawmzual, ka tihpalh takzet”min rawn khawih a tum chuan ka duh lo, ka mittui chu ka biangah a luang zawih zawih a. A dinna ngaiah dingin pawn lam chu a melh reng a. Ka hlimna a intan ve dawn chauh a, engmah lo mai a ni leh si.

“Tinge hetiang leh mai mai tur si beiseina min lo siamsak? Rinzual, I thutiam sut leh nan pawh a rei lo lulai em mai. Mahse, chu chu I thutlukna anih chuan pawm mai tur ka ni alawm”ka ti a. Ka mittui chu ka hru a, engtikah mah he hmunah hian ka let leh tawh lovang. Ka room-ah lutin ka bungrua chu ka khung mawlh mawlh a, engtin nge ka awm zel ang tih hre lo mah ila he hmun hi rang taka ka chhuahsan a ngai tlat a ni.

Room atanga chhuah ka tum mek lai chuan Rinzuala chu a rawn lut thut a, ka bungrua nena min rawn hmu chu a hamhaih ve hle tih ka hre thei.

“Lawmzual, he hmun hi chhuahsan kher  a ngai em ni? Mimal thil leh hna chu I dah hrang thiam lo em ni?” a ti a.

“Rinzual, I nunrawng em mai. Engtin nge pangngai taka he hmunah hian hna ka thawh zel theih ang?”ka ti a, ka hnuk chu a ulh deuh tung a.

Ani chu a thaw hak a, ngawi rengin a chhuak a, keipawh rei awm tawh lovin ka chhuak zui ve nghal a. Ka naute ho chuan mittui tla zawih zawihin min thlir liam a, ka chhuah chhan dik tak hre lo mah se ka hnathawh danah kan pu lung ka tiawi lo nia an hria chu pawi ka ti lo a, ka duh zawk mah a ni.

Zan a lo thleng a, ka mu thei dawn chuang lo tih hre rengin ka mu a, ka mittui chu a rawn baw leh zawih thin. Ka phone ka la chhuak a, Rinzuala number chu ka hmetchhuak a.

“Rinzual, a chhan tal min hrilh thei lo em ni?”

Chu message ka type lai chuan tlawm ka inti em em a, mahse, ka hre chak miau si a. Min chhang let lo ang tih hre mah ila thawn chu ka duh tlat a, ka thawn a ni. Ka rin ang chiahin min chhang lo a, keipawhin chu zawhna chu ka damchhung hian ka zawt nawn leh tawh ngai lo bawk ang. Khawvar dawn lamah ka lo chhing sek a, ka harh veleh ka chunga thil thleng mek chu ka hrechhuak a, ka mittui chu a rawn hnam leh tiam tiam a, kei hi ka chak lo ta viau em ni tiin ka inzawt hial a. Ka tho a, hetia ka awm reng chuan hmuhsit awm takin ka awm reng tihna a ni dawn tih hria in ka hmaa thil thleng apiang chu huaisen takin ka hmachhawn tawh ang. Sipai huaisen, ral hmaa zam ngai lo, a nupui ngei pawh hawisan theitu fanu kha ka ni miau a, harsatna chu ka thiantha tak a ni ve reng reng alawm, thil danglam thleng  thut pawh a ni lo, engvangin nge ka indawm kun reng ang? Darthlalang hmaa dingin ka infuih sauh sauh a, harsa mah se ka paltlang ang.

Ka ticket chu ka han thlek leh zauh a, tunah chuan ka awmna tur dik tak lam ka pan ang a, hlimna ka chan ve ngai lohna tur hmunah hian ka kir leh tawh lo ang. Ka bag chu ka han hmer na zual sauh a, a tawp nan tiin tui tak leh nuam ti taka hna ka lo thawhna thin hotel lian zet chu ka thlir a, min mamawh tawh lo tih chu ka thinlungah a ri tluk tluk a, chu ber chu a ni na ka tih chu ni! Thlanmual lam panin kan chhuak leh a, ka pa thlanah chuan ka bawk thlawp a, ka mittui erawh tla tur a awm lo.

“Ka pa, kalsan dawn che avangin min ngaidam rawh aw, I duhdan angin ka awm thei ta si lo a, min ngaidam dawn nia”tiin ka phun sap a.

A tawp nan tiin motor atang chuan ka hawi let leh tawk tawk a, ka pa, ka neihchhun ngawih ngawih chu ka kalsan ve dawn ta.

Thlawhnaa a thlawk chhuak dawn a, ka taksa leh ka rilru chuan Mizoram a chhuahsan tel ve dawn, ka ram tia ka sawi ve hi a rem lo, Mizoram, mangtha le tiin vansangah kan thlawk ta vang vang a.

PART-VI

Park Jent Hotel Chennai

Thla thum chhung zet chu rim tak leh hah pawh sawi thei loin ka awm a, taksa chau mah se hmabak eng tak nei nia ka inhriatna chuan rilru a tihlim veng veng thin.  Manager dinhmuna ding tura ka thawhrimna hi a thlawn dawn lo a ni tih ni tin ka inhrilh nawn thin. Rinzuala hnen atang khan natna chiah ka hlawh chhuak emaw ka inti hman a, mahse, ka hma hun atana pawimawh em em kha a hnenah khan ka lo zir chhuak reng a lo ni. Chennai ka thlen thlak tirh kha chuan ka zam em em a, 5star hotel anih loh chuan khawiah mah khan thawh ka tum lo. Thla khat chhung zet chu hna zawng reng rengin ka buai a, a tawp atawpah ka nuna malsawmna ka dawn ve thin khan min la kiansan lo tih hriat zetin Hotel changkang leh hlun, Park Jent-ah ka hna tur ka hmu ve ta. He hotel hi Chennai-a mi hausa te leh hmundang atanga rawn kalten nuam an tawlna hmun a ni a, pawisa hi a luanin a rawn luang lut a ni ringawt mai. Chennai International Airport atanga minute 15 vel lek tlana awm a ni. Hmun pathumah dilna ka thehlut a, ka rin loh ber Park Jent hian min la ta a ni.

Ka hah luat avanga ka tah zawih zawih zan a tam a, zan engzat nge tih hi ka chhiarin ka hre seng lo. Ka theihnghilh duh ber Rinzuala min hriatchhuahtirtu chu heng ka harsatna tawhte hi an ni lawi si! Amah vanga heng hi tuar nia ka inhriat chang chuan ka thinlung hi a na vawng vawng thin. Mahse, vanduai ka intihna te, ka mittuite hi ka kianga awm reng tur an lo ni bik reng reng lo. Ka beisei ngam loh thil chu ka rin aia hmaah a lo thleng ta tlat mai. Thla thum chhung lekin Hotel lian leh ropui zetah Assistant Manager hna ka thawk thei dawn ta reng mai. Ka ni thu min hrilh kha ka hrechhuak zawk a, ‘Mahni in tanpuite hi Pathianin a tanpui thin’a tih kha a a taka ka hriatna hmasa ber a ni.

Ka thiannu thar Aashima, thurawn engkim ka lakna, min duhsak em em tu nen chu hmuna hna kan han thawk tlang tak tak chu kan record pawh a tha chak em em a, ka theih ka inrin ngai loh dinhmun pawh thleng ve dawn hialin ka inhria a! Nikhat chu kan mikhual khirh leh duh tui zet avangin tawngkam hriat nuam lo tak ka hman a ngaih phah a, ka tih tur a ni lo tih leh eng mi pawh lo thleng se a tlawm zawkah kan tan a ngai tih hre mah ila ka inthunun theihna ka hloh a, chumi tum pawh chuan Aashima vang liau liau in thil pawi a thleng ta lo. Zana ka mu chu ka mut reng a chhuak lo, ka dinhmun sawhnghet sauh sauh tur hian hmabak ka la nei thui lutuk tih hria in kan mikhualpa chunga ka chet sual teuhzia chu ka ngaihtuah a, ka mur sung sung thei hial a ni.

“Chennai-ah I awm tih hi keima hriat hriatin ka rawn hre leh tawp chu a ni si a, Naute, a mak em em deuh lo maw?”

Ka phu zawk a, ka hnungah chuan hrilhhai zet hian Joshua chuan min lo en a, ka hamhaih luatah keipawh chu ka meng phar kawk a.

“Joe… “

Ka ang deuh pam a, sawi leh tur reng reng ka hre ta lo.

“Thil mak tak tak hi ka tawng ve fo a, hei chu thil makah pawh ka ngai phal lo, vanneihna a ni zawk e”a ti dam diai a.

“Eng nge I rawn tih dawn?”ka nui sang a, ka nui ve thei ta e.

“Holiday hmang turin ka naute ka rawn hruai a, nimin piah khan kan rawn thleng tawh. Nichin lawk khan ka nau te chu ka vai liam a, kei hetah meeting pawimawh tak nei turin ka rawn kal leh a nih hi, han thlen chilh nan em chuan ka pawisa hi a chhah tawk si lo a”a han ti ta duah a.

“Hausa inren dik tak chu I lo nih hi, I tlai hlauh ang e, sir”tih pahin ka sana chu ka han melh zauh a.

A mit ko chu a han san a, “Aha.. Ka hmuh leh ngei che ka beisei”tih pahin an meeting neihna tur lam pan chuan a kal ta hlawk hlawk a.

Ka dar chu ka han chhin a, ka thaw hak a.

“Wow! Hmuh tha kan hmu em ni?” Aashima chuan nui var var hian a lo ti a.

“Ka unaupa anih kha, thisenah inzawm lo mah ila amah chiah kha ka neihchhun a ni tawh”ka ti a.

Aashima chuan rang tak hian, “Joshua a ni ngat mai”a lo ti a, ka then sak a.

Ka quarter nuam leh chang tlung zetah chuan ka phu tawk aia nuam mah turah ka cheng ve a, ka suangtuah phak loh hlirin min rawn zui ni hian ka han hre thar bawk a. Zan lama ka duty avangin am taka mut tumin ka inkhuh tha sauh sauh a, engtia rei nge chutia ka mut ka hre lo. Ka doorbell ri ral ral chu ka mang hriat ruai a, a rik nawn sek avang chuan peih lo chung hian ka tho a, kawngka ka va hawn chuan Joshua chu a lo nui sak a. KA la mut tui em vang chuan ka nuih let peih lo.

“Joe, lo lut la, ka mu leh nghal dawn”ka tih chuan a nui ri ta hawk hawk a.

“I duh tawk khan muhil rawh, ka duh dan danin ka lo awm ve tap ang”a ti zat a.

Room ah lutin khumah chuan ka inthawlh leh a, mumang bo thak khawpin ka muhil leh ta vang vang a. Thil rim tui zet ka hriat avangin ka hnar chu ka han len leh deuh a, ka inchhung atanga ka hriat ngei a ni. Ka han ngaihtuah ngial pawhin chutiang ei tur rimtui chu ka in atanga a chhuah theihna tur reng reng ka hre lo. Ka han inbeng kang deuh a, Joe kha a la awm a ni chiang mai. Ka tho vat a, room kawngka atang chuan ka bih dek dek a, Joe chuan faifuk rat rat chung hian ei tur a lo siam a, ka ding ngil zawt a, ka pum chu khawih in ka riltam zia chu ka hrechhuak ram ram mai.

“Khatia min en reng lo khan lo kal vat rawh”a ti a, a nui hak lehgnghal.

“A va han rimtui em em, ka mu tui lai pawh ka harh zawt alawm”ka ti a.

“I cher lutuk, khatiang tur a ni lo, thil I ei that loh chuan hna pawh I thawk tha thei dawn miah lo ani”a ti a,.

A eitur siam chu ka dining table lian lem lo takah chuan a rawn chhawp zung zung a.

“Ka hria alawm”ka lo ti satliah mai a.

“I kiangah ka awm reng thei lo a, chuvang chuan ka ngaihtuah em em thin che. Thil I ei tam ngai lo tih hre mah ila I chakna tur khawp I ei hi chu ka duh a ni. Naute, I hnaah hian I tui tih pawh ka hria, feedback pawh I dawng tha, mahse, I hriselna I ngaihpawimawh loh chuan heng zawng zawng hian awmzia an nei lo ang”a ti leh ta dap dap a.

“Just like my father”ka phun ri sap a.

“Ka ngaihtuah vang che a ni”a han ti tha leh a.

“Joe, ka hria, ka hria e, ka lawm lutuk min ngaihtuah vang hian. Ka inenkawl thei ve tawh alawm, naupang chhia ka ni tawh lo a, nula ka nih ve tawh hi”ka han ti a.

Engmah sawi zawm tawh lo in chaw chu kan ei dun malh malh a. A hmel awmdan en tuma ka va melh chuan min lo melh ve chiah a, ka hawisawn vat a, engmah a sawi lo.

A haw dawn chuan ka biangah a fawp a, “Naute, hmuh leh vat che ka duh, hun remchang hmasa berah ka rawn kal leh ang. Ka flight hi ka cancel ngawt thei si lo a”a ti a, a fiamthu tih hriain kan nui dun hak a. “Ka rawn hmu leh vat ang che, lo inenkawl tha ang che”tiin kan inthlah liam a. A lan theih chhung chu ka thlir a, a ban a rawn vai lauh lauh chu hmuin ka lo vai let vat a, a liam ta, ka ruak huaiin ka inhria.

PART-VII

Krismas pawh a lo thleng lek lek tawh a, ka nunah awmzia a neih ka hre ngai lem lo. Tun tum erawh engtin emaw tak ka lung a leng hian ka hria a, han ngaih viau tur lah ka nei pawh a ni chuang lo. Housekeeping lam atanga complain ka dawn bawhzuiin kan mikhual pakhat, a rangkachak zungbun bo chu rei tak kan buaipui a, heng boruak hian min tichau thin. A duhtawkin min ankhum a, tawngkam chhe tinreng a hmanga, dawhtheih hi a va han ngai thin tak em. A tawpah kan naute chuan a bathroom ngeiah an zawn hmuhsak a, thupha chawi ahnekin hotel chhuahsanah min han vau zui lehgnghal a, lu a hai duh thin hle. Chutiang buaina chu kan tan thil thar a ni lo a, kan hnain a chhawm niin kan ngai hial tawh.

Ka duty hun chhung hi chuan engkim felfai thei ang bera tih ka duh thin avangin records maintain pawh ka duh ulukin ka khirh a, a chang chuan staff dangte nin ka hlawh tih ka hria. Mahse, heng hi kan zavai himna tur a ni tih ka hriat avangin ka uluk zual sauh a, huat leh nin hlawh mah ila a tha zawka chet zel chu ka thlang.

“Room reservation chungchanga kan buaina hi chu ka pumpelh tawh viauin ka hria a”Aashima chu ka dawhkan bawhin a rawn kun hniam a.

“Tute nge buai?”ka lo ti ha a.

“Room an lo pe double leh tawh a ni maw?”tih pahin ka tho vat a, General Manager nen kan intawk chiah a.

“I enkawl zo turah ka lo ngai ngawt pek a ni”tiin min han tawngkhum leh phawt a.

A hnungah kalin a lu chu khawn sak hrep ka duh, ka kut chu ka han lekkang a, Aashima chuan nui uar uar chungin min lo thlir a, za lo zet hian ka nui ve ta mai mai a.

Reception counter kan thlen chuan receptionist Maya chu zum dai hian a lo ding a.

“Thil fel lo a awm palh hlauin vawi tam tak check nawn thin rawh u ka ti a ni lawm ni?”GM chuan a ti tun tun a.

“A thleng nawn tawh lo ang”Maya chuan a lo ti thawp sat a.

Kan mikhual tur niawm tak chu a thutna atangin a rawn ding chhuak a, ka awm chu ka han dawm ringawt a, a boruakah hian ka awmdan a danglam apianga tel ve thin mi pakhat a awm alawm. Rinzuala nen chuan inhmatawnin kan ding a, kan hmelah chuan helai hmuna hmuh kan inbeisei lohzia a lang chiang hle ang. Engmah sawi tur reng reng ka hre ta lo, ani pawh a pangngai lo tih ka hria, a thin a lo rim a nih pawhin tunah tak hi chuan a thinrimna chuan an kiansan a ni ngei ang.

“Sir, room pakhat zawk kan han buatsaih nghal ang e, kan tihsualah I ngaihdam kan dil mawlh mawlh che.”GM chuan a ti zung zung a, hre ang pawhin a awm lo.

Min melh a, min melh tlawk tlawk a, hnuai lam ka bih ngar a, chutia awm chu ka tum hran lo, mahse, ka awm miau si a.

“Zuali, take care of our customer”GM in min nghawk zeuh pah chuan a ti a, ka harh chhuak zawk mai.

“Sir, min rawn zui rawh”ka ti a.

Lift-ah chuan ka naute pahnih nen, Rinzuala nen kan chuang a, ka kut chu a thlan dap hian ka hria. Ka hnungah a din avangin a hmel ka hmu thei lo a, mahse, uluk takin min en a ni tih ka hai lo. A room turah chuan kan lut a, a hawi kual zet a, harsatna a siam loh hramna turin ka rilruin ka tawngtai mawlh mawlh a.

“Pangpar ka ngaina lo, dahbo rawh u”a ti hmuk a..

Dawhkana pangpar inkhawi chu ka la sawn vat a, ka naute chuan min lo pui vat a.

“Sir, I duhthu a sam loh chuan hmundangah pawh I insawn thei ania”ka ti a.

“Biak che ka duh”

Chu thu chu a sawi ang ka hlau a, a sawi ta ngei e.

Ka naute chu min chhuahsan turin ka ti a, hlauthawng deuh tak hian ka thu hnial hreh si chuan an chhuak a.

“Ka zawn nasatzia che I hria em?”

Ka va melh a, inchung lam chu a lo melh ngar a. Ka chhang lo.

“Ka rinlohna hmunah, ka beisei lohna hmunah che ka hmu a, dinhmun tha takah I ding tih ka hmuh erawh hi chuan min tihahdam deuh e”a ti sup a.

“Kan mimal chungchang kha chu engmah sawi tur kan nei lo. Kan hotel-ah I tawn thleng duh hi kan lawm lutuk, mamawh I neih chu I sawi zel ang a, kan tihthlawn loh che ka beisei”ka ti a, kal tum chuan ka inher a.

“Lawmzual, khatiang khan min kalsan ngawt thei lo ang. In hotel ang hotel lian leh larah hian mikhual satliah chauh pawh ni ila, reservation felfai loh avanga in buaina hi ka sawichhuah chuan nghawng a nei thui ve viauin ka ring”a tichang fak a.

“Chu chu I ti hauh lo ang”ka ti a.

“Ka ti duh mai ang, ka tana chet harsa turin awm suh”a ti a.

“Rinzual, I duh duha I tih kawi turah min ngai suh”

“A chhan min zawt rawh, Lawmzual, engvanga khatianga awm kha nge ka nih min zawt ta che a ti mawlh mawlh a.

“Ka thawk tek tek chhung chuan chu thu chu ka zawt nawn leh tawh ngai lo ang che, engtikah mah”ka tih chuan a mitmengah na a ti tih ka hria.

“I tawngkam kha fimkhur rawh”pawisak nei lo tih hriat zet hian min phih dawrh a, ka te that a.

“Chhuak rawh”min huat hmel tak hian min melh a, ka chhuak vat a, pawnah chuan ka naute chuan min ngaihtuah tih hriat zet hian min lo nghak a.

Engkim a tha tih hrilhin an duty na lam pan turin ka ti a, ka tha khur der der chu an hriat ka duh lo tak zet a ni. Ka inthlak fel hnu chuan muangchang tawh loin ka haw a, ka inbual zawh chuan sofa ah thluang duaiin ka thu a, ka mittui chu a rawn baw zawih a, Rinzuala ka huat lutuk vanga ka mittui tlak vawikhatna a ni.

PART-VIII

.

Ka doorbell rawn ri leh ral ral thin chuan ka mu tui lai chu min tiharh leh thin a, ka harh hlei thei lo. Ka mit chu ka han meng dawn a, ka lu chu a hai chhuai thin a, ka meng thei der lo. Ka phone ri pawh chu ka mang hriat ruai a, ka taksa chu ka che thei der lo. Ka meng lui dawn a, a thim hmuk a, engmah ka hre lo chhunzawm nghal a, engtia rei nge chutiang chuan ka awm ka hre lo. Ka han men leh meuh chuan hospital khumah ka lo mu reng a, a ngaihna ka hre lo hle. Ka hriat hnuhnun ber kha chu ka khumah ngei ka mu si a, engtin nge hetah hian ka awm ngawt ka hre chhuak thei lo. Ka han inlet a, khum bula damlo awmpui tana thutna an siamah chuan Rinzuala chu a lo muthlu a, chutia ani ber kher ka hmu chu ka bangbo leh zual. Ka maimitchhing vang vang a, helai hmunah hian Rinzuala hian min hruai tihna a ni mai ang em?

“I lo harh tawh a ni maw?”

Meng chuang miah lo hian min bia a, ka chhang lo.

“Mahni hriselna ngaipawimawh lo khawpa hnathawh hi a tangkaina a awm em ni?”a han ti leh nghat a.

Amah hnungchhawn zawng chuan ka han inlet a, ka be chak lo.

“Lawmzual, I luhlulna hi a hmanna hun leh hmun a awm”

“I lo buaina tur a awm lo, kal tawh rawh”ka ti a.

“Ka kal dawn lo tih chu I hrechiang khawp ang”a ti a, rawn tho chhuakin ka hmaah tak chuan a rawn ding a. “Vawiinah meeting pawimawh tak ka nei dawn a, I tha tih hre lo chuan ka kalsan thei lo che”khap miah lo hian min en a.

“I hna pawimawh chu thawk rawh, ka inenkawl thei”ka tih chuan a nui hak a.

“Engpawh chu nise, doctor ka va hmu anga, a hriat mai ang”tih leh kalsawn a rual a.

Ka kut hum chu ka han pharh a, ka lo sanmar nasatzia ka hrechhuak chiah! Engvangin nge helai hmunah kan intawn leh kher? A tangkaina leh a tulna awm miah loah hian engvanga let kual leh thin nge maw kan nih le?

“Vawiinah test engkim kan la vek ang?”

Room-a rawn luh rual chuan a ti a, ka drip khai lai ka lo la thla mawlh mawlh min hmuh  chuan a rawn tlan phei vat a, kan innawr buai chu a ni deuh nghal mai.

“Ka nunah hian ka hna aia ngaihpawimawh ka nei lo, ka tlu tawpa ka tho thei lo anih chuan ka hna ka chawlh a thiang lo”ka ti a.

“Luhlul chhuah suh, I hriselna hi I ngaihpawimawh hmasak a ngai”a ti ve thung a.

Ka awmdan leh ka chetdanah min dang thei dawn lo tih a hria a ni ang, a thaw halh a.

“Doctor-in test tura a tih hrang hrang hi I hman veleh ti ngei ngei ang che”a ti a.

Taxi nghah pahin pawnah chuan kan ding a, a vang hrep lehnghal. Ka lehkha ken lai chu min pawhthlak sak a, a kekawr ipteah chuan a ak daih a, ka chuh buai peih lo. Rei vak lo hnuah taxi pawh a rawn lang ve ta hram a, ngawi rengin kan thu lut a, kan inbe tawh lo. Hotel kan thlen chuan ni a lo chhuak tan der tawha, Rinzuala chu a hmel a phak deuh chap a, mut a kham lo tih a hriat hle. Ka in peng kan thlen chuan a ding chawt a, hre lo ang takin ka kal hmawk hmawk a, min thlir zui reng tih hriain ka pen chak sauh sauh a, a mak a ni, hetiang taka keimaha nghawng nei mipa hi ka la tawng ngai lo. Ka rilru tina in min tibeidawng hle mah se ka ngaihna te kha a la pangngai reng a, ka thlakhlelh zia ka hriat rualin ka haw zual bawk a, ngaihtuah ringawt pawh hi a phu hlawl lo. Ka inbual faia. Breakfast ka ei hnuah hotel lam pan chuan ka chhuak a, dan pangngai ang bawkin vei vak kan insulpel leh nghal sup sup a, ka room pan nghalin ka inthlak a, ka hnathawh zawh hman loh tlem azawng chu ka thawk nghal a, board meeting atana inbuatsaihna kal mekah ka thawh tur bak piahlamah ngaihtuahna sen a ngai a, ka taksa chak tawk loh vang nge, engkim mai chu dik lo riauin ka hria a. Boruak tha hip tumin inchung zawlah ka chho a, Mizoram ang khan boruak thiang tak hip tur a awm ve lo, ka maimitchhing a, ka tukhum chu a rawn za mem mem hian ka hria.

“Intihlul vak chi pawh a ni lo, doctor sawi ang khan hospital ah khan zankhat tal riak la tha tur”

Ka hnungah chuan Rinzuala chu a kekawr ipte zen hian a lo ding ngul a, thip zet hian ka melh a, ka hawisawn leh nghal a. Ka lam panin a rawn kal hnai tih ka hriat chuan ka kut chu ka lo hum ruh ve ngawt a!

“Lawmzual, hmelhriat ngai loh angin min en lui suh, ka tuar thei lo mai ang”aw ki hriam hrak hian a ti a.

“Nang nen hian inzawmna kan nei emaw I ti ang’e, nang nen hian eng inzawmna mah kan nei lo. Chuan, ka hmelhriat anga ka en kher che hi a tulna ka hre hek lo”ka ti a.

“Engkim kan chunga thil lo thleng hian chhan a nei thin tih I hria em?”

“Ka hre lo aniang, hriat pawh ka chak lem lo e”

Min kuai her sawk a, a lamah chuan min pawt hnai a, kan chal leh chal chu a insi deuh thaw ta mai a, ka awmdan dik lo nghal pawh chu ka hre thei, ka theihtawpin ka nam vak a, a nui suk a.

“I va nunrawng ve..”ka mittui chu a rawn tla mai dawn hian ka hria.

Min thlah vat a, a kawr chu a han pawt mar tha a, ka tawngkam khan a ti na tih ka hria, mahse, eng nge pawi?

“Inenkawl tha ang che”tih pahin min kalsan a, a rawn hawi let tawh lo.

Ka thaw ham ham a, ka mittui chu ka hru tawk a, ti nge awlsam tak hian ka mittui a tlak mai thin?

PART-IX

Ka file pawimawh chu ka hai mawlh mawlh a, helai hmunah ngei hian kan hotute meeting na tur pawimawh kha ka dah chiang si a, tunah ka hmu leh si lo. Ka rilru chu a buai tak zet a, ka ina lut tur awm ang ka hre bawk si lo, security chu ka han hmu a, tun hnaiah ka inah tumah an kal ngai loh thu min hrilh bawk si. Ka thlan fim chu a rawn bawl tek tek a, ka hna atana pawimawh tawpkhawk chu ka hnen atangin engtin nge a bo theih? Khumah chuan ka bawk thlawp a, ka promotion hmuh theihna chance leh ban mai theih ka nihna chu tunah a inchen ta chiah mai. Ka phone rawn ri ral ral pawh chu lak tumna ka nei lo. Ka ngaihtuahna zawng zawng hi a buai vek ni mai hian ka hria, a rawn rik leh chuan ka han pickup mawl tawp a.

“I a zo ta em ni? Kawng hi rawn hawng vat rawh”

Ka inperh tho nghal vat a, Rinzuala bawk a ni.

Kawngkhar chu ka hawng sawk sawk a, engvanga awlsam taka chutia hawnsak nge ka nih pawh ka hre chuang lo, ka mangang chu ka hamhaih vek ni maiin ka hria. Ka va hawn sak chuan min rawn su lut deuh nawk a, chung pawh chu engah mah ka ngai tawh lo. A kekawr ipte atangin lehkha a rawn phawrh a, ka hmaah chuan a han pharh a.

“Hetiang thil pawimawh lutuk hi engtin nge I thlauh theih? Doctor khan min rawn be leh hlauh lo phei sela chuan I tan a pawi tur zia hi I hria em?”a ti a, a hnuaia thawk la ni ila chuan min pawh sawm vek mai duh hmel hi a puin ka hria.

“Oh, ka lawm lutuk e”ka aw ah chuan han phur hluai na emaw, lawmna emaw tih lan loh chu ka la tum fan a.

“Chu te chauh chu maw?”a ti hmuk a.

“Ka lawm lutuk e, ka harsatna min rawn chinfel avangin ka lawm lutuk e”ka ti liam puat a. A lehkha ken lai chu ka pawtthla a, ka ngaihtuah let a, khami ni khan GM hnenah signature la turin ka kal a, ka bag ah ka ak ta zel a ni tihte ka ngaihtuah chhuak a, Rinzuala awm lo se engtin nge ka neih leh theih ang? A  chungah hian lawm viau tur ka nih laiin lawm hmel put erawh harsa ka ti em ems i a.

“Mimal thil leh hna hi kaikawp suh ka tih chhan che chu kha kha a ni, tinge I chak loh em em reng le?”a ti sup a.

“I duh ang ang I sawi kha ngaithla tur ka ni lo, min chhuahsan rawh”a mitah chuan ka en ran a.

“Hei vang hi alawm nangmah hi I nat leh thin”

“Ka chungchang sawi thei tur hian eng thuneihna mah I nei lo”

Min rawn dinhnaih a, ka tawlh hnung hret a.

“I chunga ka thil tih sual kha ka hre lo emaw ti suh, ka hria a, ka inchhir em em asin”

“Awmzia a awm chuang lo, inhre ngai lo angin awm ila, chu chu ka duh ber”ka lo ti hmawk hmawk a.

“Chu chu I duh dan a nih chuan a tha alawm, aw le, ni rawh se”bang ngheng chuan a han ding a.

“I khum bula thlalak i tar ka hmuh nia ka thinlung natna kha ka bengdai zo ngang lo a ni”a ti sap a.

“Engmaw? Ka nu chungchang em ni I sawi?”ka ti a, a lu a thing a.

“Engmah a ni lo e, naktukah ka haw tawh dawn a, I dam tha a ni tih ka hriat hian ka lawm tawk viau e. Lo inenkawl tha ang che”a inher a, a kal tur chu a banah ka chelh tlat a.

“Rinzual, ka nu chu khawiah nge a awm?”

“Engmah ka hrilh thei lo che”ka ban chu a la thla a.

“Ka neih chhun ngawih ngawih a ni tawh asin”ka tih chuan a hmela buai lo awm nak chu ka hmu hman a.

Engmah a sawi tawh lo, kawngkhar a ri rak a, ka mittui a baw zawih a, ka hmangaih hnena ata min then hrang leh tu chu ka nu leh bawk maw!?