HMANGAIHSANGI

HMANGAIHSANGI

.

Ka phone ri chuan min ti harh chiang hle mai. Phur lo zetin kan ban a, ka hlauh ang ngeiin nizan lama ka sulhnu chuan min chhui zui tih ka hrethiam mai. Pickup peihlo in khum mawng lamah ka theh thla tawp a, mumang bo thak khawpin kan muhil zui lehnghal a. Ka harh meuh chuan sikul naupang thawm a ri nak nak tawh, hmanhmawh takin ka inperh tho a, vawiin hi ka tan ni pawimawh tak mai ani. Ka nupui hual nen zungbun kan en ni a ni tlat.

.

Phur fahranin choka lam ka pan a, ka nu chuan rum tawka min melh pah chuan,"nangmahin i chawei thleng sil ang che, mut nachang hrelo, thawh nachang hre bawk silo" a ti hmarh hmarh a. Ka hlim em vang chuan hnial pawh hnial lo chuan ka ei nghal a. Inbual tura bathroom ka pan lai chuan ka fon chuan msg ka dawng tih min han hriattir a, ka bialnu Lucy nih ngei ringin phur takin kan hawng a mahse alo ni tlat lo. Nizan lama ka ck pui Hmangaihsangi a ni tlat! A number chu ka dial nghal a, a chhang tawh dawn lo emaw tih hnuah a lo pickup ve a.

"Hey, min rawn tibuai zui tawh suh ka ti che ni lawm ni?" Kan ti nghal thawr a, thawk a la hak a. 

"Enteh Andy, tihbuai che hi ka tum reng reng lo sin. Nizan khan i wallet i theihnghilh a, ka rawn hriattir mai che ania, i duh leh rawn la la, i duh leh rawn la lo la, ka buaina ani lo," tih leh a fon off a rual a. Ka tlawm la ngang mai. 

"Nizana kan hun hman man ah khan lo nei mai rawh ka mamawh lem lo" tiin msg in kan ti let ve sak a. Ka hlim tehreng nen mood a off vek alawm.

.

Lucy nen zungbun kan en zawh chuan millenium lamah kan in phur phei leh a, kan lut tur chu Hmangaihsangi ang tak ka hmu tlatin ka hria, kan hawi let leh kher a alo ni ngei e. A inchei dan chu ka nuih a tiza kher mai, ka bialnu nen hi chuan an in class hleih deuh chu a ni. Rui viau mah ila engvangin nge he nu kher hi ka lo ck pui chu ni. Ka lu a ri fawk a, rum tawkin Lucy chuan min lo en reng a," enge i ngaihtuah a biak pawh i biak theih loh, mi a ang mai" tih pahin a hawisan hmak. A thinrim tak tak hlau em em in kan nuih tlawn vel a, ka thiam thil kan hman hnu chuan lungawi takin a awm veleh mai a.

.

Zanah chuan vawiin chhuna Lucy nen kan hun hman te ka ngaihtuah a, kan zungbun chher tir te chu lam hun ka nghakhlel hle a, inhualna zungbun nena ka lucy inpeih hun nghah chu ka chak ani . Ka mitthlaah Hmangaihsangi alo lang zawk a, ka duh loh em vangin ka lu ka thing nawk2 a, Lucy chauh mitthlaa hmuh ka duh, Hmangaihsangi nilo in!

.

Thla hnih a liam a, ka nun pawh a nuam ber lai hun ka hmang chho ni in ka hria, ka hnathawha ka kaisang a, nupui hual chhelo zet ka la nei zui. Mahse ka hlimna chu vawilehkhatah lungngaihna in min rawn chim tlat mai. Ka fon ri ral ral chu ka en a, no.hlang anih vang chuan ka han la a,.

"Andy, tihbuai che chu ka duh tawh lo viau naa, mahse i tel ve na thil anih avangin ka rawn hrilh hre ve duh che ani. Ka rai a" 

"Eng a, engmaw i sawi?" Ka ti nghal tuarh a. 

"Nilo , Hmangaihsang , ka ringlo che, ka ring lo bur che" ka ti zuai raih a.

"Andy, i fa ngei a ni e. Mahse i ngaihsak kher chu ka phut loa, i fa anih vangin ka tihtur ka ti mai ani, hei bak chu ka tibuai miah lo ang che tih ka intiam e" tiin a fon chu a off leh ta hmak a. 

Zan khat thil thuah khan a rai ang maw, nilo, min puh a tum mai mai aniang. Mahse kan ngaihtuah chiang a, ka ck pui satliah mah nise khanu kha ngaihsan rukna riau ka nei, a virgin pawh ka ring tawhlo kha a ni a, mahse alo la virgin tlat! Kha ai maha mak ka tih zawk chu college kal paha inhlawh chawp ve mai ani a, ka tanpuina pakhat pawh min dil lo chu ani. Nge ka rin loh dan taka khawsa in sum alo la lut zawk ? Ka ngaihtuah ringawt pawhin thinrimna in ka khat nghal. Ka jacket ka ha sawk sawk a, ka hmuh ngei angai a ni. Chak mangkhenga tlan in Hmangaihsangi te veng lam chu ka pan a, mak ka in ti zawk hial. An kawt ah ka bike chu ka hung rem a, kawngka ka kik a, min chhang lo a reh tlawk tlawk ringawt, beidawng duhlo in ka kik ngat ngat a, a tawp a tawpah a rawn hawng ta. Ka namlut rawk a, a kalh leh mai ka hlau ani. Mak ti takin min en kiau a, a mit chu a tahna ni awm takin a bui deuh a, ka insum hman lo, ka kuah chawt a. Mahse a tawlhsan rang kher mai.

"Enge i rawn tih dawn?" 

"Engvaknge ti ila mi tih a, ka naute nu ka tlawh chu thil sual em ni?" ka tih chuan mak a ti tawlh tawlh mai.

Kei lah chuan nupui hual ka nei tih hrechang tawh lo lekin ka bula ding, ka fa nu ni tur chu pawm vawng vawng ka chak a ni. ka melh reng lai chuan harh chhuak phut ni awm tak hian Hmangaihsangi chu a thaw hawk a, ka mitah tak min en a.

 "Andy, min chhuahsan tawh ta che, mut hahdam ka duh tlat" a ti chang fak a. 

Ka mize hlui chhe ngai mahni induhtawk na chu alo lang rang leh hle mai, "i duh dan anih phawt chuan ka rawn tibuai reng reng lo ang che. Nangmaha i enkawl theih ahnu" tih leh chhuah ka rual a. Ka tel ve na ni siin ka tel ve a hlau em em chuan min ti thinrim takzet a ni.

.

October thla kan chuangkai ve leh ta der mai a, boruak pawh a vawt ve ta. Ka thinlungah midang an awm tih chu mi fing te tak Lucy chuan a hai hauh lo. Ka chhungte bulah inneih a hmanhmawh thu a sawi chuan ka chhungte pawm zawng tak alo ni a. Keilah ka rilru a hah telh telh thung! Huiha.. min ngaihsak ve hauh lo tu laka rilru sen chu alo hrehawm takzet. Mahse he ka thinlung sak leh luhlul hian Hmangaihsangi va ngaihsak hmasak chu a thei silo. Ka ngai em em mai te chu ka thin a rim a, Lucy meuh pawn alo tluk zo lo chu ani si.

.

Nikhat ka office bang chu bazarah ka lut kawi a, tah chuan a ni ka thinlung tikehsawm thil ka hmuh chu ni. Chawhmeh zawrhna lam ka pan lai chuan raipuar pakhat hian chawhmeh tlem alo thut pui ve a, a sam chuan a hmai a hliah deuh hlek a, mahse ka hai hauh lo, Hmangaihsangi ngei a ni. Thawklehkhatah ka chau hluah hluah maiin ka hria; nilo, hetah kher hi chuan hkuh ka inring lo asin . Muangchangin ka pan phei a, a hmel dawldang zet chu lo hawiin kan mit leh mit a in tawng ta siah mai a. Ani pawh a hamhaih ve hle ani ang, a ka hau a.

"Andy, enge hetah te i tih ve a?" zawi sap in a ti a.

"Nangmah zawk hian engthilnge maw i tih le" tih pahin abanah ka kai lawp a, kalpui mai ka han tum a, hetianga ka fa lo piang mai tur nu hi ka hmu theilo a ni. A kut ka vawn chu a phelh a.

"Min hmu a ni lawm ni, hetah hian chawhmeh ka zuar anih hi. Khatianga min ti tur khan engmah inilo, min kalsan rawh" a ti hmak a. 

Mi chuan min en hrek hrek a, nuam lo ka ti hlea, mahse ka zak duh bik lo.

"Ka fa lo piang tur hi ka ngaihtuah hi a thiang ve tho, chu chu i duh loh chuan engvangin nge nau i pai" ka ti salh a.

 Ka sawi zawh rual chuan ka inchhir nghal. A ni chu a kun ngal a, a rilru ana hle tih ka hria, pawi ka ti a, mahse ka sawi zo vek tawh si. A rawn hawi chhuak a,"Andy, min hmusit tur leh min ankhum tur ringawt chuan khawngaih in min hmu tawh suh, ka ngen a che" tih leh kalsawn a rual a. Ka zui ngam ngang lo ani, ka va han sual em ka rilru chuan ka ti mawlh mawlh a. Ka bike dahna lam pan chuan ka kal a, ka rilru na chhawk zangkhaina tur anih beiseiin ka thianpa Johna te in lam ka pan ding nghal a, ka beisei ang ngeiin a sen chi chu alo nei a. Rilru natna zawng zawng tihbo tum chuan ka in ta piap mai ani. Khaleh chen ka lo in tawh loh anih vang ani ngei ang ka rui hma phian lehnghal. Engtin nge in thleng ka inkhalh haw pawh ka hrelo, ka nu leh pa ten tv an lo en a, ka pai lut chu mak ti em em in min lo en a, ka pa chu a chek tlak tlak a,"Mama, ka hau rih lo ang che. I room ah lut la mu nghal rawh " zawi tak mahse zawm ngei ngei ngai siin ka pa chuan a ti a . Nilo, engkim ka sawi vek phawt tur a ni," ka pa, Lucy ka nei duh lo" " Eng a? Enge i sawi ?" phawk fe in ka nu chuan alo ti a. Ka pa chuan tv a off a, "a chhan chu engpawh nise naktukah kan sawi dawn nia, han mu phawt rawh" a ti leh a. Hetianga ka pa in atih tawh chuan hnial chi a nilo tih chu a hrechiang ber zinga mi ka ni ang. Muangchangin ka tho a, ka room lam chu ka pan ta nge nge a . Ka mumangah chuan fapa duhawm em em mai ka lo nei a, tuemaw hian alo pawm a, a hmel nung sarh te chu ka hriat hnu ang ka ti hle mai lehnghal, ka han en chian chuan Hmangaihsangi alo ni a, a nui hmel mawlh chuan min ti buai leh hle. Ka tui in hal lutuk chu ka harh hlawl mai a, ka mumang chu ka ngaihtuah chhunzawm lo theilo, kha nu ngei kha a ni ka mamawh chu. Duat taka enkawl pawh ka chak takzet, mahse atan engmah ka nih loh thu min hrilh si.

.

Muthilh leh ngial ka tum pawh chuan ka theih ngang loh avangin ka tho a, veranda ah chair ka hung a, Aizawl khawchhung eng mawi tak chu ka thlir ta ngawih ngawih a. He khawpuiah ngei hian nuamsa takin ka khawsa chho ve zel dawn emaw ka tihlaiin ka rin loh dan takin engkim chu alo thleng mek ani si a. Ka mut a chhuah tak ngang loh avangin ka in phih fai a, ka bike la chhuakin Venghlui lam panin ka inkhalh chhuak leh ta ngawt a. Hmangaihsangi inluah na bulah chuan ka ding a, a chhungah hian ka tana mi hlu tak pahnih an cheng a ni. Engtia rei nge ka thut pawh ka hre lo, ka lo muthlu sek ani ngei ang, kawngkhar in hawng ri chuan min ti harh zawk a. Ka hawi vat a, Hmangaihsangi chu em phur in alo chhuak dawn mek a, min hmu thut chu a rak teuh kher mai, ka in sum hman lo ka mittui alo tla hman tlat. Ka pan phei a, ka pawm thlawp a,"Hmangaihsang, min va ti hrehawm rei ve" ka ti a,"Andy, nupui nei tur i nih kha, tinge hetiang hian i awm?" a mittui chu tla lo turin a dang hram hram a, a em phurh chu ka la a  inchhungah ka luhpui a, ngawi rengin min zui lut ve zel tih ka hria. Thuthlengah ka pawt thu a, "ka van ti hrehawm rei tak che em" a mittui chu a tla zawih zawih a, in la pa ve tak thin nih lai a hmeichhe pakhat laka chuti em ema ka tlawm chu ka lo inring ngai lo, ka thianten hria se mak an ti ngei ang. Mahse an hrelo; hmangaihna thiltihtheihzia hi. Ka awmah a bei thlawp a, a tap ta zawih zawih a, a chang leh min chum a, mahse duat takin ka kuah bet tlat a. A lungchhe zualpui a reh hnu chuan alo dak chhuak a,"Andy, ka beisei pha miah lo asin. Min hmusit em em ringawt niin ka lo hre thin a, min khawngaih vang ringawt chuan hetiang hi ti suh" a hmui chu ka lo hup vat a, "Ka khawngaih vang che nilo in ka hmangaih vang zawk che ania lawm. Thlamuang takin awm rawh, i huaisenna te  i tumruhna te hi ka hmuh hmaih lo. Ka duhthusam hmeichhia i ni tih ka lo hre har deuh a min ngaidam ang che" ka ti a. Chawei nghal mai turin min ti a, mahse ka nu leh pa bula thil engkim sawi vat ka duh vangin ka hawsan ta a. In ka thlen chuan ka chhungte chuan chaw an lo ei mek a, ka pa chuan a tarmit kar atanga min melh pahin "Office kal tur i ni lawm ni rawn ei vat rawh" a ti a. Chhang let lem lo chuan sitting room ah ka thu a, reife ka nghah hnuah ka pa pawh alo phei ve ta nge nge a. Hmangaihsangi nena kan chungchang chu ka sawi ta vek a, pawi tih hmel zetin a chek tlat tlat a. A tawng tawh dawn lo emaw ka tih hnuah muang changin min en a,"Mama, puitling i ni tawh a, nawr luih che hi ka duh ngailo. Mahse i fa lo piang tur chu fahrah ka nih tir ngawt thei lo, rawn in hruai ve phawt tawh u" a ti a. Ka lawm kher mai, ka nu erawh in ka pa min dawnsawn dab ang hian min dawngsawng pha ve hauh dawn lo tih chu ka hria. Mahse nu hmangaihna hi chu alo mak teh e; min pawmpui thei ve ta mai a . Hmangaihsangi kan ina ka hruai luh zan chuan a zam kher mai, kan bungraw neih tam zawk hi chu ala hmelhriat loh te pawh an ni ang. Mahse min hmangaih em em tu ka nu chuan ka nupui chu thil engkim a hrilh in a zirtir a, nufa dik tak ni awma mawiin an inkawmngeih em em bawk a, ka nu leh pa min hmangaih pui tih hi ka hre lo thei lo ani. Hei hi a ni Hmangaihsangi ka thlan na chhan chu. Ka nu leh pa ten "Sangtei a awm loh chuan in pawh hi a nuam lo" an tih hial tak ka nupui duhtak Hmangaihsangi hi nitinin ka hmangaih zual zel dawn a ni.