LALNUNPUIA
LALNUNPUIA
-Mami Lalhmangaihzuali Chawngthu
“Ka lak atang hian I tlanbo hlen theih hi I ring em ni? Mawh…”
.
Min thing nawk nawk a, ka mittui tla tur chu ka khap let sak a, a mitah tak ka melh a,
.
“I lak atang hian ka tlanbo reng reng lo. Ka tan engmah I ni loh vang in ilak atang ka kalbo mai zawk ani” ka ti a, mak tih hmel zetin min melh reng a, zawi muangin min vawnna chu a la thla riai riai a,
.
“I ni lo, a hmaa ka hriat thin kha I lo ni tawh lo takzet anih hi” a lu chu a thing nak nak a, a kal nghal a.
.
Ka thlir zui reng a, ka mittui chu dan rual loh in a tla zung zung a, engvanga hetia awm nge ka nih tih pawh min zawt lova, chhan a awm reng em tih pawh hriat a tum ngai lo.
-------X--------------------------------------------------------------------------x-------------------------------------------------X----
Kan kohhran ah Inkhawmpui lian tak kan thleng a, zaithiam lar tak tak pawh an rawn kal a, zaipawl lar tak pakhat atanga lokal ve pakhat chu ka vawikhat hmuhna atang ka mit a la nghal. Mahse ka mit alak na chhan chu ka ngaihzawn vang lam ni lovin a din mai mai lai pawha in uluk hmel fahran a a kekawr a ben leh thak thak thin vang chu a ni. Tlangval khirh tak ani ngei ang tih ka ring nghet bur a, ka ngainat chi ai hauh lo. An zai lai te chuan ka lo chik bik hle a, vawihnih vel chu kan mit a in tawng ve in ka hria, a nui sak zel lehnghal. An thutna bulah ka duty thei hle a, a thiante zingah chuan a lian fahran lo hle a, chumi rual chuan a hmelchhe ber erawh a ni lo chiang. Inkhawmpui tawp zanah chuan Usher duty ka awl a, mipui thutnaah ka thu ve a, a tira ka ei vak loh, zan thumna vel a ka mit in a zawn ruk tak, hmelngainatawma(a hming tak Lalnunpuia tih pawh ka hre fel vek tawh a) kha ka mit chuan a zawng leh chat a. Zawn hmuh a harsa lo khawp lehnghal, an zai lai te chuan khawdang ka melh thei lo, tihtak zeta Pathian fak hla a sa te chu a hmuhnawm takzet a ni. Inkhawm ban hnu chuan usher kan han inhmukhawm leh a, pawn lamah inkhawm ho in thingpui an in a, an thawm pawh a tha hle a. Thla la duh ho in pawn lamah chuan min lo nghak thup bawk a, keini ho chuan thla te kan la fel a, pawn lam pana ka chhuak tur chu ka baah lo vuan tu hi an awm a, rang takin ka hawilet a, ka bulah chuan Nunpuia chu alo khi sang a,
“Khawngaihin thla ka lakpui thei che angem?” a ti a,
.
“A….Aw…” ka ti bah nak a, maicham hma lamah chuan kan in zui phei hnak hnak a, ka zam chhe lo chauh a ni.
.
An member pui pakhat chu camera nen kan hnungah alo kal bawk a, kan thla chu alo la mawlh mawlh a, ka thaw tha ngam lo. Min hnaih thei ang ber chuan a rawn ding a, a perfume rim tui tak te chuan ka thawk a ti buai lek lek in ka hria. Thla kan lak zawh hnu chuan pawn lamah kan inzui chhuak a, thingpui in turin min sawm a, kan intlar ve a, a thiante chuan an lo ko a, a then in an rawn siai a, ka lawm na nge ka zahna kha tam zawk ang tih ka buk thiam lo. thingpui kan in zawh chuan ka thiante chuan haw turin min rawn ko a, Nunpuia chu a thutna atang a tho vat a.
“Fb ah engtinnge I hming I dah?” a ti a, ka hrilh ve mai a, “Naktuk zingah kan haw tawh dawn a, kan in hmu khat tawh dawn hle mai” a ti a, a lu chu a tuai deuh puat a, “Fb ah ka lo zawng ang che, I thian atan min lo pawm ve ngei pawh ka beisei ang” a ti a. Nidang ang bawk in a han nui leh sak a, kan in mangtha hnu chuan keiapwh in lam panin ka haw a. In ka thlen hnu te chuan ka han insik vel a, a tak ngei chu ani si a ka ti rilru a, nui ver ver chuan ka mu a. Chumi zan ang renga ka muttui ka la hre lo.
.
Nitin beiseina nen fb ah ka lut thin a, mahse ka beisei ang chu thlakhat dawn ka hmu lo. An ni ang mi lar te chuan min hre tawp nang ka ti a, mawl ka in ti, engtinnge beiseina sang tak te ka lo neih theih zawk? Ka hun hman dan pangngaiin ka hmang leh tawh a, nitin college lam ka pan a, Nunnpuia lam pawh rilru ah a lang lutuk tawh lo. zankhat chu assignment tih pahin ka online a, rin loh deuhin message alo awm a, ka han hawn chuan kha chen beiseina nen ka lo nghah, Nunpuia msg ngei chu alo ni.
.
“I friend atan min lo pawm ve thei ang em?”
tih te mai hi ani a, friend request min lo thawn ngei bawk a.
Rilrua ti tau deuh hlek chuan ka han chhang duh lawk lo a, ka mut dawnah a request chu ka confirm a, msg erawh ka chhang lo.
.
“Ka lawm e aw” tih alo thawn vat a,
.
“Keipawh le” tiin ka chhang ve a,
.
“Kan haw ni khan ka phone motor atang ka thlauh a, a chhe darh vek a, thla khat hi alo rei duh hle mai” a tih chuan chawplehchilhin ka lo tih tauh rukna chu a reh nghal vek.
.
Eng emaw kan sawi dun a, zanrei tak thleng kan inbiak hnuah kan in mangtha ve ta hram a, a nua mka ti takzet ani. A profile chu ka check chhuak dap a, a propic pakhat chuan la mit a la ta zar mai. Hmeichhe pakhat Julie tih in a comment na leh an inbiak dan velah chuan inhmelhriat satliah an nilo tih chu ka hre mai a, Julie profile chu ka han bih ve nghal zat bawk a, a hmel chu a chhe hran lo. College pakhata Asst.Professor ani tih thlengin ka hre nghal a, ka thik nghal ngawih ngawih. Engkawngahmah chuan ka tluk hauh lo tih ka hria, chutichung chuan rilru dam takin Nunpuia chu a tan ka phal chuang lo.
.
Thla khat dawn fb ah kan inbe ve ngat ngat a, zankhat chu ka no.min dil ve ta hlawl a,
.
"Ka naute hi a whatsapp em o... a number ka duh riau mai"
.
Chu msg chu vawi thum vel ka chhiar nawn a, reply nachang pawh ka hre lawk lo. Ka no.ka hrilh hnu rei vak loah ka whatsapp tone alo ri a, ka en vat a, Nunpuia ngei chu a lo ni a. Thil ho tak tak kan sawi a, kan inbiakna chu ka chhiar nawn sek a, thu holam maiai sawi mah ila ka hlimpui ve tlat si!
.
Zantin kan inbiak ve tak ziah ah chuan a hmaa ka rilru kha ka pu leh rang hle a, a tan chuan a thian leh hmelhriat satliah chauh ka ni tih ka hai lo chungin ka thinlungah erawh hmun a chang thuk viau thung. Tv ah an zai ka hmuh fo chu duhtawk mai lovin an hla zawng zawng chu ka download kim vek a, ka mut hma in ka en ngei ngei thin. Amah an focus lai takte chuan ka pause a, rei tawk tak ka en vawng vawng thin. Hla zir in an buai ve bakah amah hna nei anih avangin a buai tawk viau a, mahse ka tan hun min siamsak chu a thulh phah ngai lo. A laka ka rilru puthmang hi hre ta se min huat phah in min biak duh loh phah ka hlau a, ka in thup hram hram thin.
.
Zirna chhunzawm turin Delhi lamah ka kal a hun leh tawh a, ka kal hma zan chuan min rawn call a,kan inbe ta reng a. Aizawl ah inhmuh chu kan intiam a, chumi zan chuan ka muhil zeuh zeuh ani ber, ka hmuh chak em em ka hnu thei tur chu ka hlim a, ka rilruah thildang a lang lo. Zing lam ah ka lo chhing ve sek ni tur ani, ka harhchuan ni a lo tlang sang viau tawh mai a, ka in perh tho zawt a, ka phone ka han dap a, whatsapp a Nunpuia msg chu nui ver verin ka chhiar a,
.
"Gud morning... zing kawng nuam tak ron zoh la, tlaiah hmuh theih ngei che ka lo in beisei ang"
.
Chaweikham dar 9 vela chhuak tawh kha tlai lam dar 4 ah pawh Seling kan la thleng lova, pa fimkhur em em mai ka pa in motor a khalh miau a, tur hmanhmawh chi lah a ni der si lo. Thlen tlai ka hlauh chhan phei chu hria se khalh chak chu sawi loh, min zilh leh hrep ani awm si a, ka ngawi ta hle hle tawp a ni. Aizawl khawchhung kan luh chuan dar 6 a ri chiah chiah a, Ramhlun South ah ka ni te inah kan innghat a. Nunpuia chu an hla zir hmaa rawn kal hmasak a tum avangin a rawn thlen hma ngeia lo inbual zawh hman tumin bathroom ka pan nghal a, ka la innual rei loh ber tum anih ka ring. Dar 7 a ri a, ka fon pawh arawn ri ral ral a, Nunpuia alo ni a, kanawmna vel te min rawn zawt chiang a, ka hrilh hnu rei vakloah kan in chu a rawn zawng hmu ta mai a, kan han inhmu chu ka lai em em a, ka biang te chu a sa het het ka hria. Rei a awm hman loa, pawnah ka thlah a, gate bulah chuan kan indinchilh ran a, "Mali.. (tuman Mali min ti ngai lova, ani erawh chuan tihian min ko tlat a) ka tum dan ai a hmaa kan inhmu leh chu ka lawm hle mai" a ti a. Sawi tur pawh ka hre lo, ka lo nui mai a, ka kutah a rawn vuan a, "Sawi duh tam tak ka nei a, hmaichhanah ngei sawi ka duh thin. Naktukah lokal leh ngei ka tum ang" a ti a. Ka in rin hma in ka biangah a rawn fawp a, ka phu zawk a, a nui ta var var a. A motor dahna thleng ka thlah a, a tlan liam thleng chuan ka thlir zui reng a.
*-----------*-----------*
DELHI -LUNG A LENG EM MAI
.
Ka zirna hmun ka thleng leh der tawh a, class pawh min lo tan san tawh nghe nghe. Khua chu rin ai takin a nuam lo a, ka room tukverh ah dakin Aizawl ka chhuahsan hmaa ka hun hman dan te ka chhuilet neuh neuh a.
Ka mutui lai chu ka fon riin min tiharh hlawl a, tudang ni lovin Nunpuia alo ni. Chaweikham ah lenchhuahoui min tum a, chung vel sawi chuan rei tawk fang kan inbiaa, nidanga thawhphan pe na ve tak chu chumi zing chuan ka nui chhuak ver ver a. Chaw kan eikham fel hnu reivak lo ah Nunpuia chu arawn thleng phei a, ka ni leh ka pachuan min zawt kher lo mahse thil awmzia chu an man thiam pawh ani ve ang, insiam ve vat tur chuan min lo tur chhen a. Ka duhtawka ka inchei hnuah chuan kan inphur chhuak ta a. Hmun hrang hrang kan fankual hnuah an inah min hruai leh a. A u nupui leh a fapa naute chu an lo awm a, min lo be siam siam a, a fel ka ti hle. Thenawm dawra kal chhuanlamin min chhuahsan daih a, sitting room a an thil tar te chu ka enkual a, Nunpuia hi zai lamah sulhnu alo ngah in lawmman pawh a dawng hnem hle a.
.
"Hmuhnawm awm ve" ka hnunglam atang chuan arawn ti a,
.
"Ka rin ai i lo bon hi ka tia"
.
"Ani mai dawn asin" a nui var var a,
.
"Thingpui ka lum a, i siam ve thung ang" a han tih zawm zat a.
.
Choka lamah kan inzui phei a, ka thingpui siam lai chu uluk fe hian min lo en reng a,
"Khati vak vak a in en te chu ka dawl bik hleinem" nui chungin ka ti a.
.
A lu a hiat nauh nauh a, a thutna atanga tho tharh a, tukverh ah a dak ta daih a. Dawhkanah thingpui ka dah a, ka no bulah chuan a fon a dah a, ka thu fel chiah tih ah a fon chu a rawn ri a, ka tum vang pawh ni em em lovin ka han melh a, Julie calling tih alo lang ta va va a, ka lungphu chu a rang nghal kher mai. Nunpuia chu ka melh a, a fon chu a rawn ban a, a reject nge ka hrelo,a chhang lova, mahse ka awm a nawm phah chuang lo. Dik tak chuan a hma pawhinka lo hre thawi tawh a, an inkarah engemaw tak a awm kha ka rin lawk sa ani a. Mahse ka laka a awmdan avang hian beiseina ka lo nei ngawt pek ania, ka va han mawl tak em!
.
"I ngawichawi ta riau mai, vawiin ka hruai chau che nilo maw?" A tih chuan ka harh chhuak thut a,
.
"Teh nang, thil ho mai mai ka lo ngaihtuah alawm" ka ti a.
.
"Pathian zarah kan dam chuan December thla tir hian Delhi ah programe kan nei dawn asin"a ti a.
.
"tak tak maw... Zaipawl angin nge mimal?"
.
"Zaipawl.. Upa Ngura kan rawn zui dawn a"
.
"Nuam dawn ve... ti ve ringawt ila, min rawn hmu hman awm tawp silo"
.
"Kan lokal phawt chuan i khua chu min fanpui ang chu leee" ka sam chu a chul thur vek a.
.
Muangchangin kan in lam pan chuan kan chhuak leh ta a. Millenium Centre kan thlen chuan a thianpa ka hmelhriat ve tho chu min hmuhpui a tum a, a dawr lam chu kan pan a. 2nd floor kan thlen chuan keimahni min tawk zawngin hmeichhe pahnih an rawn kal a,pakhat chu ka lo hmelhriat ve fo tawh hnu ni awm maiin ka hria, kan in tawk ani chawpchilh nghal a,
.
"Nunpuia chu i damlo emaw ka tia, kha i va tha si ve" ka hriat hnu ang ka tih deuh nu chuan a han ti a, ka hrechhuak, henu hi Julie ani chiang lutuk tlat,
.
"Julie, nakinah kan sawi dawn nia, kan hmanhmawh deuh a kan kal phawt mai ang" ka kutah min kai a, min kalpui daih a.
.
Ka va hawilet hram a, mak tih hmel zet hian an lo hawi reng a,kan hawihai tlang ani ber. Min vawnna chu ka paih thla a.
"Keimah vanga dawt sawi kher kha angai em ni? I hman lo chung tihbuai che kha ka duh reng reng hleinem" rilru na ru takin ka han ti a.
"Mali, engmah i hre lo. Inhnial nan kan hun neihchhun hi a uihawm lutuk tlat, chuvang chuan inhnial lovang" a ti a.
.
Sawi duh leh zawh duh tam tak nei mah ila a sawi dik ve tho bawk si, lungawi vak lo chuan ka zui a. Vena te dawr kan thlen chuan ka theihtawp in hlim hmel ka pu lui a, kan Biakina anrawn zai tuma Nunpuia nena thla min laksak tu kha ani a. An inkawmngeih hle a, engkim an inhrilh tih pawh ka hria. Min hmuh chuan min lo chibai vat a, hepa hi chu a fel thlawt a ni, Nunpuia ai mahin a mizia pawh a ngainatawm, he Nunpuia hi a hmeltha twh vur pawh ni silo engvanga heti taka vei nge ka nih pawh ka hre lo.
.
"Sawmpui, Delhi kan programme vel chu i lo hre tawh in ka han ring ve ngawt a.. kan rawn tibuai hle dawn che ani" a han ti a.
.
"Min rawn tibuai duh lo ang tih a hlauhawm alawm" ka lo ti vat a.
.
Rei vaklo kan thut hnu chuan kan chhuak leh a, in lam kan pan ding nghal a. Nunpuia chu a tawng tlem lehtawh hle a, Julie nena an inkarah hian eng inzawmna chiah nge awm tih hriat chu ka mamawh takzet a ni. Vena chu zawt ila ka hre thei mai anga, mahse ngaihven vut anga lan chu ka duh bik silo. Kan in kan thlen chuan leng lut turin ka sawm a, mahse anu office hruaiangaih chhuanlam in a rawn kawi ta lo. A tlan liam thleng ka thlir a, nilengin a bulah awm mah ila ka ngai veng veng tho mai. Mak ka in ti hial zawk, mahni tawka in duh ve larh thin kha ka dinhmun hniam tih hrereng chung pawhin mi pakhat chu ka vei ngut ngut mai si .
.
Lengpui ah ka thlawhchhuah hun ka nghak a, zan lam atangin Nunpuia msg emaw call pawh ka dawng lo. Ka hlim ve hman tehlul nen, ka hlim chhung a rei lo takmeuh a ni. Kan thlawh hma in minute 10 chiah a awm tawh a, ka fon a rawn khur cher cher a, no.ka hriat ngai loh anih avangin pockup loh ka han tum a, mahse pawimawh thut takin tiin ka han pickup a,
.
"Malsawmtluang, khawnge i awm?"
.
Ka thu ngil zawt a, tun hun thlenga ka rilru in a nghah chu hepa hi ani chiang a ni.
.
"E...hetah..."
.
"I ban han phar teh"
.
"Engvang ngawtin maw?"
.
"Apawi love"
.
Phone adah nghal a,
.
"Chhekeh lutuk" ka ti sap a.
.
Thaw hlawp hlawp in ka bulah chuan Nunpuia chu arawn ding a, ka lo dingchhuak ve mek a,
"Ka hrethiam thei ngai dawn lo che anih hi tiraw?" Ka mitah tak min en a,
.
"Min hriatthiam hi i tum ve tawh ngai reng reng em ni?" Ka lo ti let ha a,
.
"Nimin ka haw kha ka lu na lutuk ka mu nghal a, ka lo muhil tlang nghal daih a, zingah kaharh veleh rawn call che ka tum a, i fon i switchoff tlat bawk si,min ti mangang hman hle mai" a ti a.
.
Ka fon charge laia ka off kha ani ngei ang, mahse han chhaih ve chu ka chak reng reng a,
.
"Ka laka insawifiah vak kha enge a tulna awm?"
.
"Chhekeh lo mai teh aaa..." a nui sak a.
.
"Ka tawngkam kha copy ve suh, mi lar plus rawngbawltu tan a mawi ve lo" ka ti a.
Ka bul hnai setah a rawn ding a, ka ban chu a hmer vang vang a,
.
"I thlen hunah min lo hrilh rawh aw" sawi sap chuan a ti a.
.
Ka lu chu ka lo bu nghat a, kan kal a hun ta. Ban vai lauh lauh in thlawhna chhungah ka luhsan ta, ka mittui chu ka khap per sak a. Ka ngaihzawng leh ka chhungte pawh nilo vanga ka mittui far vawikhat na a ni.
.
Ruah arawn tla ser ser a, Delhi khaw lum leh uap churh pawh in a ziaawm phah ka beisei. Ka fon ka la a, Nunpuia nen kan lenchhuah tuma kan thlalak chu ka han hmetchhuak a, Delhi khawpuiah hian lunglen theihtawpin ka lung a leng mek a ni.
*----------*------------*------------*
.
Ka nunphung pangngai ka hmang leh mek tawh a, Nunpuia nen pawh kan la inbe reng a. Whatsapp a kan thianho group ah chuan vawi tam awm min dil hnuah ka add ve ta hram a.amah hi uang reng ang chi ani lo na fiamthu hi a duh ve phian a,ka thiante nen pawh an inkawmngeih nghal phian a. Zankhat chu ka thinlung tina em em tu thu ka hre ta tlat, ka thiannu Asiami leh Nunpuia hi ka thiante ah chuan an inbe nasa a, keimah ang maiin an in close a ni. Lehkha ka zir a, presentation tur vel ka buaipui laiin ka whatsapp tone a rawn ri ta ral ral a, ka ngai pawimawh duh lawk lova. Vawithum vel a rik hnuah kahan en a, Asiami msg alo ni.
.
"Chhekeha hi ka haw lutuk" tih leh an in text na a screenshot chu min rawn thawn a.
"Mali hi chu ka ngaina lutuk alawm, bialnu nghet chu lo nei lo ni ila chuan a rem maithei asin. Mahse ka lo nei bawk si a, khawngaihin amah chu hrilh kher suh aw" tih chu ka han hmu a, ka mit deuh sulh in ka hria.
.
Ka zirlai pawh ka zir zawm thei lo, khumah chuan ka thu a, ka thiannu bula a thil sawi chu ka chhiar nawn a, ka chhiar nawn leh a, ka mit alo hnam tiam a, mittui a tla tih pawh ka lo hre lo. Heti khawp hian hepa hi ka lo duh ani maw? Mak ka in ti hial zawk. ka biak rei leh ka na rei ani mai, chuvang chuan ka be tawh tur ani lo. Ka contact list atang a number chu ka hmetchhuak a, delete na chu ka han hmet vang vang a, ka delete zo nghal a. Mahse ka thinlung atang hian engtikahnge ka delete ve theih ang?
.
Vawi tam tak min rawn biak a tum a, whatsapp ah ka block avangin sms hmangin min rawn be reng a, a call pawh ka dawng ngun khawp mai. Mahse biak loh chu ka tumruh bur a, ka chhang ngai lo. Zankhat erawh Vena fon atangin min rawn be fuh nawlh a, hn dah leh mai ka tum a mahse induhna tlem azawng ka lo la nei a,engahmah ngai lo anga lan chu ka duh a ni.
.
"Mali, engvanginnge ka call i chhan ngai loh, chuan ka msg zozai te kha.. whatsapp ah min block bawk a, min haw viau em ni?" A ti thlawt a.
.
"Nunpui, huat na chhan tur che ka nei hleinem. Ka zirlaiah in sawrbing ve deuh ka duh a, chuvang mai mai alawm" ka ti a, za lo fe hian a nui hak a,
.
"Chu ka lo tibuai viau thin che tihna alo ni maw?"
.
"Nichiah lo e. Chutiang chuan ngai duh suh, in lokal huna huntgawl neih loh ka hlau a, ka lo in hmakhua lawk ve alawm" ka han ti ve nghal zat a.
.
Lungdam zan lo chuan kan in mangtha a, ka thaw hawk a, kan inbiak chhung khan ka inthlahdul lo tih ka hre ve chiah. Anihna takah chuan ka theihnghilh mai mai hi ka ring lo a ni, zankhat chauh pawh an zai ngaithla lovin ka la muhil thei lo. Jaipur ah kan class kan kal a, tlemin ka hlim ve deuh tawh a hetih hun lai hian, kan haw dawn chuan youtube ah video thar ka en mai maia, Nunpuia te chuan hla thar pakhat hi an lo dah a, ka hmuh chuan chang dang ka kan thei lo. Ka download nghal a, kawng tluanin ka ngaithlaa, amah alo lan apiang in nidang ang bawkin pause button chu ka han hmet leh nawlh thin a, ka lo thlir leh veng veng thin.
.
Ka zirlai chu tha taka zir a, engemaw tak nih ve ka chak vawikhatna ani hial ang. Dik tak chuan hetianga min siamtu chu Nunpuia hi ani. A tan chuan engmah ka nilo ani maithei a, mahse min hriatchhuah ve hun anei anih ngai chuan mi pakhat ve tak lo nih chu ka duh a ni. Ka class bang chu nidang aiin assignment kan ngah lova, ka online khat deuh avangin ka han lut ve zuai a, Nunpuia wall check chu ka sim hlei thei lo. A propic alo thlak a, an voseo thar an shoot na mi anih ngei ka ring, comment vel chu ka chhiar pah a, Julie hming chu ka zawng deuh naa ka hmu miah lova. Chuvang ringawt pawh chuan han comment chu ka chak ta riau pek a,
.
"Chhekeh chu chhelo ve hle ani"
.
Ka comment zo hman tawk ang tihah min rawn chhang nghal a,
"min unblock tawh rawh"
.
Ka nui chhuak hak a, ni e a hun ve tawh alawm. Ka fon ka la a, ka unblock nghal a. Ka rilru kilkhatah erawh ka infuih sauh sauh a. Engtin pawhin min bia se amah ka beisei tur ani lo.
.
"Ngaihawm..ka lom e" a rawn thleng nghal zat a.
.
"Music video a i lan that vang mai mai a i lawmman anih hi"
.
"Engpoh chu lo nise ka lawm e "
.
"In video ah khan tinge i lanna hmun kha a va dang bik ve?" Engtinnge chung te chu chik taka ka lo en hman pawh ka hre bik lo.
.
"Thil hi chu i chik ve thei ngawt mai. Khami kha an shoot lai khan beat contest a awm a, ka tel a ngai sia, a hnuah keimah in ka bei leh alawm mawle" a ti a.
.
Thil ho mai mai kan sawi hnu chuan kan in mangtha a, ka data ka off a, ka lehkhabu phawrh in ka zirlai chu ka en nghal a. A hma ai chuan hma ka sawn ve ta deuh e, a chhan chu kan inbiak zawh hian hetiang taka tuiin lehkha ka la zir ngai lo. Hetihlai hian kan khua a kan thenawm deuh lawk ami Ruata te chu a pa damlohna avangin Delhi ah an rawn kal a, damdawiin ah te ka tlawh a, Ruata tak hi khuaah a awm tam lo a, lehkha zirin hmundangah a awm char char a. Ka chhuk hma deuh khan MBBS zir zovin a rawn haw a, a rawn haw tukah kei ka kal leh nghal a. Chutiang chuan in thenawm hnai viau e ti lovin kan innel hran lo. A nu leh pa leh a unaute nen erawh kan inpawh em em thung a. Heta an rawn kal pawh hi ka pa in min rawn hrilh a, kan ngei tura min tih avangin ka va zawng chhuak ve a ni. Ruata hi mi tawng tam lo tak alo ni a, kei lahin ka lo nel viau hran lo bawk nen, ka va tlawh pawh chuan kan in melh hrek hrek a, ka ngaihtuah let hian ka nuih a za thin. A fon no.chu ka dil a, phur hmel loh zet hian min pe a, dik tak chuan ka be chak bik lo. A pa chanchin zawh nan chauh asin ka dil, ka tau chhuak deuh nghawng nghawng a. Nithum vel chu ka be duh lo, mahse ka paten min rawn zawh fo avangina ni li naah chuan ka va be ta hram a, an chanchin te ka zawt a, tha takin min chhang ve mai a,ka rinai tak leh ka tum aiin min lo chhang tha ve a. Zanah te chuan whatsapp ah min rawn be ve hial a, a awihawm loh zawk.
.
Kartawp ani bawk a, class pawh ka bang hma a, Ruata pa pawh damdawiin atang an chhuak tawha, Mizoram house ah an awm a, thawhtan lama haw an tum tawh avangin va tlawh chu ka tum hram a, ka va thlen chuan Ruata chu alo nui var var a, min ti hamhaih lek lek zawk. Rin aiina pa pawh alo tha tawh a, damdawiin an awm laia a taksa thim deuh pawh alo nung ve ta sar a, ka lawmpui khawp mai. Ka haw dawn chuan Ruata chu a pa in min thlah turin a ti tlat a, a ngai lo ka tih pawh chuan an pafa chuan an tang a, ka hnial hneh lo. Hostel kan thleng tep tawh a, Ruata chu a ding a, ka ding ve a, muangchang hian ka kut a rawn la a, lehkha dun te tak te hi ka kutah chuan a hmehbel a,
.
"Zanah i en dawn nia" a ti a, a in her a, a kal nghal vut a.
.
"Ruat...." a hnungah ka va um a,
.
"Khami i en hma kha chu inbe lo ang, dik tak chuan ka zak ani" rawn hawilet miah lo hian a ti a.
.
Ka ding a,
.
"A tha alawm" keima hriat tawk lek chuan ka ti a, hostel lam ka pan nal nal a.
Ka room ka thlen chuan Ruata thil min pek chu ka han en a, memory card alo ni. Ka laptop ka on a, a chhungah chuan engthil nge awm tih chu hriat ka tum a ni. Thlalak hlir alo awm a, chupawh keima thlalak hlir lehnghal. High school ka kallai a ka sam tawi lai te, chhia hi ka in ti mai mai khawp a. Ka sport dress kim nen kan kawt a basketball ka khel lai vel te, higher ka kal lai Ruata nau Bzi nen kan thlalak dun te, a tam ber chu kan kawt a ka awmlai thlalak ani. Heng hi Ruata hian ka hriat loh ina lo la thin tihna em niang? A ngaihna hre lo zetin ka thu reng a, thil pakhat hriatchhuah ka nei. Higher kan kallai khan Bzi hian vawikhat chu U Mama hian a star che niang i thlalak a ngah lutuk a tih kha ka hrechhuak zawk a, mahse ka ring lo viau anih kha. A lo haw chhunah pawh kan inbe ngai lova, an ina ka kal lahin mi pawh a melh ka hre ngai lo.
.
Zana chaw kan eikham fel hnu chuan whatsapp ah Ruata msg alo awm a,
"Sawmpui, high school i kal lai atang tawh khan ka thinlungah hian hmun i lo luah daih tawh. Zaninah chauh ka sawi chhuak ngam hi nep ka in ti ve thin khawp mai. I laka nelawm lo taka ka awm thin pawh kha ka hmuh che hian awmngaihna ka hriat ngai loh vang zok ani. Tunah chuan soi chhuak turin huaisenna ka lo nei ve tawh ani ang, engtinnge min lo chhan ang tih chu ka hrelo a, mahse ka duh takzet che ani"
.
Ka chhiar chhung chuan ka thaw chiah em ka hre lo, Ruata mi ngawichawi leh zakzum,kan veng nu ho in makpa atana an awh rawn hian kei hi rei tak atang khan min lo duh tawh maw? Ka awih thei lo, mahse amah ngeiin a sawi tlat si. Kei hi ka duh em em in midang a nei a, ka tana ruat loh zawk hi ka lo buaipui viau ani thei angem? Nunpuia tih loh ah chuan Ruata aia han thlan tur chuang an awm lo ang. Engtia han chhan tur nge pawh ka hre lo, ka don chu ka dah a,khumah ka tlu zal mai mai a. Ka fon ri chuan min ti phu zawk a, Ruata bawk anih ka ring a, mahse Nunpuia zawk alo ni.
"Chhekeh, bialpa ka nei dawn..." teh tawp mai a, second thum vel chu lehlam atang thawm aawm lo.
"Hello"
"Aw...ka hria alawm. Ava nuam awm bik ve aw" a aw chu a danglam a ka hriat tlat chu,
"Ni e a nuam dawn khawp mai, i damloh pawhin a thlawnin kan lo enkawl char char ang che" ka nui har har a,
"Eheu... chu doctor ani maw kan makpa dawn? Ava ropui ve aw"
Engengemaw kan sawi zawm a, kan inbiak zawh hnu chuan khumah ka thu a, engvanga Nunpuia bulah khan khatia sawi vak nge maw ka nih le? Hlim awm tak a nui chunga khatia sawi lha ka tum sa reng pawh ani lo, mahse a thleng vek tawh si. Nunpuia aw ah khan midangah ka hriat tel ngai loh thikna aw a tel tlat in ka hria.
*-------*---------*----------*-----------*
.
Anihna takah chuan Ruata chu ka phu hauh lo tih ka hria,mahse thinlung hi duh duh a tih danglam theih ani silo. Midang thinlunga dah reng chunga ani kawp chu ka thei loa ni. A hnenah pawh thudik tak ka hrilh tawp a, hmangaih ka neih thu leh min hrethiam mai turin ka hrilh a. Chutichung chuan ka lo nghak tho ang che tih chu ka chhanna hmuh let a ni. Mahse keipawhinNunpuia lakah hian tun thleng hian beiseina nung ka la nei tlat a, a mak a ni. Engatinge kan duh tak te nena rem chuang silo hi min duh ve tu te duh let mai a harsat thin tiin ka ngaihtiah phah hial a!
.
December thla chanve dawn kan hmang ve ta reng mai, zankhat chu tlai tawh deuh hlekah call ka dawng a, ka han pickup chuan Vena a lo ni a. Kan hostel awmna vel chu min rawn zawt a, tha deuh in ka lo hrilh ve mai a. A tuk tlai ka class bang hostel ka thlen chuan ka roommate in visiting room ah inleng ka neih thu min lo hrilh a. Ka cousin te ni dawn se min rawn biak hmasak ka ring si. Ka inthlak zawh hnuah ka chhuk a, ka thil hmuh chuan min ti phu chiang hle. Nunpuia leh Vena chu an lo then tha a, ka mak ti hmel chu hmuhnawm an tih hmel zawk.
.
"Teh thut cheu chuan, min hrilh hmasak ve bawk tur cheu alawm" tih pahin ka kut ka phar chhuak a, kan in chibai a.
.
"Doctor nupui nih kan tum a chin hi induh riau kan awm an ti em ni?" Vena chuan min melh ralh chung chuan a han ti a.
.
"awihawm loh thei emai, engtik thleng nge in awm dawn a?" Ka ti a.
.
"Tunkar tawp hian kan haw leh ang, i rawn tel ve dawn lo mi kan programe rawn hman turah te chuan?" Vena bawk chuan a ti a, Nunpuia chu ala ngawi reng a, ka che vel chu uluk fe hian min lo en a,ka khawr deuh tut phah in ka hria.
.
"Tel ve dawn tehreng mai, ka lo nghakhlel tawh lutuk alawm" ka ti a,
.
"Kan haw hma in nikhat tal te chu min lenpui ve ang chu" Nunpuia a ni ve thung a.
.
"Kha te chu chiang sa alawm" nui chung in ka han ti a.
.
An haw tur chu ka thlah a, Vena chu kan hmaah a kal a, mi a thlah fal ve na a awmzia a awm tam lo khawp mai. Ngawi rengin kan in zui a, a khat tawkin min melh leh ralh thin. Nuam ka ti chiah lova,a hnenah khan bialpa ka neih tur thu te kha lo sawi zawt zawt lo ila a tha tur tiin ka han in hau leh rih a, engkim a ni zo vek tawh si.
.
"Mali..."
.
"Um..." a mitah pawh ka en ngam lo, a mita ka en chang apiang hian ka hmangaihna hi a thar leh thin.
.
"Ka ngai thin khawp mai che" hul hak in a nui a.
.
"Ka awih chiah lo" sawi tur ka hre ngang lo a ni.
.
"Min ngai ve miah lo anih hi tiraw?"
.
"Hehe.. a atthlak e, thil tul lo tak ka sawi a ni" ka chhan hma in amah vek chuan a ti a.
.
An kal liam thleng ka thlir a, midang zawng zawng zingah hian kei chauh hi a thlan han ni ila ka la ti zui vawng vawng a. Khati khawpa chianga ka thiannu bula a sawi chung pawha amah ka la beisei fo hi ka duhdan a ni bik lo. Mahse, sawi tawh ang khan ka duh a ka theihnghilh theih ni miau hek lo le.
.
Delhi an cham chhung chuan kan in zui ve dat dat reng a, zan lamah an programme ah ka tel ve ziah bawk a. Hostel a min rawn hmuh ni atang khan Nunpuia hi ka laka a awmdan a dang daih a, nau en in min en niin ka hre ber. Mi zingah min duat a, mahse tupawhin min hmu sela inngaizawngte inkara in duatna ang hi ani lo tih an man thiam ka ring. Ni thum an cham hnuah ni li naah an haw leh ta a, a hma ai nasa in ka thinlungah a cham leh dawn a ni ngei ang.
.
Krismas hmang turin ka haw a, Lengpuiah Nunpuia chuan min lo hmuah a tum a, mahse hmuh ka chak em em rualin pumpelh theih ka duh a, ka thlen pawh ka hrilh duhlova, ngawi rengin kan kjaw lam panin ka haw tlang nghal daih a. Hemi tum hian karkhat zet a thin a rim a, min be duh lo. Ka tan chuan a farnu ang chauh a en nih kha a na ani tih a hrethiam pha lo. Ruata ve thung chu kan in lamah atam em em a, ka unaute lah in ani tluka duh tur an awm lo tiin min lo tur ve chhen a, mahse ka la inpeih lo hrim hrim. Min nghah dawn chuan min nghah chhuah hun pawh anei ve mahna! Krismas ruai theh ni chuan Ruata leh ka cousin Mapuii nen kan in zui a, kan phur thut chuan thla kan la kual vel chiam a, zanah kan thlalak pakhat Ruata nen kan lakna chu fb ah rawn upload a, min lo tag tih pawh ka lo hre lawk lova, zanrei hnuah ka online in ka hnu chauh a. Comment vel chu alo tam angreng a, innei tawh mai ru tihte, inhmeh min tihna vel chu alo ni tlangpui a, Ruata'n a comment let apiang chu like tu an awm tih ka hmu a, ka han en chuan Nunpuia alo ni. Ruata comment zawng zawng alo like kim vek a, lawm tur ani em tih pawh ka hrethiamlo.
.
"I lakah hian ka tlawm ta e, ka tibuai tawh lovang che"
.
Ka zing thawh chuan chu msg chu Nunpuia hnen atang ka dawng a, ka call nghal a, mahse a pickup duh lo. Chutiang teh ngawt lo deuh chuan min hrilhfiah ve tur ania, heti ngawt chuan a tawp thei lovang.
.
*-------------------------*------------------------------*---------------------------------*
Krismas leh kumthar vuakvet a zova, Lalnunpuia chu biak theih in a awm duh lo. Keipawhin biak luih talh chu ka tum lova, dik tak chuan a duh hun hunah hetianga min ti reng tur ani bik lo. Ruata nen chuan thian tha tak angina kan la in zui a, ka laka a rilru chu a la pangngai tih a sawi lang fo a, ka inpeih hun min nghah a in huam thu nen, mahse ka rilru atanga Nunpuia ka paih chhuah theih hunah chauh midang chu ka nei ang.
.
Aizawl ah awm hahdam ka duh avangin ka chhuk vat a, Ruata pawh ka chhuk hnu rei vaklo ah order a hmu a, Aizawl ah a thawk dawn ani. Chanchin min rawn hrilh ve reng a, anihna takah chuan kei ve tehlul hetia min duh ve hi ka tan chuan a lawmawm lutuk a, ka inthlahrung zawk. A nu leh pa lah hian mi hi an duh der ve viau a, ka nu bulah phei chuan an monu hual ka nih thu te a lo sawi zauh lehnghal a, ka chhungte pawhin kan inkarah engemaw a awm niin an lo ngai nghet ve hmiah bawk a.
.
Bazar lamah mamawh lamin ka chhuak a, ka haw pah chuan Vena tlawh turin MC lam ka pan a, ka inhmuh chuan kan hlim dun ve hle a.
.
“Nunpuia nen in inbe ngai em?” a ti a, kan inbiak ngai loh thu ka sawi chuan a chal chu a ti chuar deuh nang a,
.
“Hei chen hi kan inkawm tawh a, tunhnai atanga a mizia ang hi ka la hmu ngai lo. Rilru hahna a nei aniang ti ila min hrilh loh a nei ngai vak silo a” a ti a.
.
“Aw….julie nen an boruak a tha lo aniang chu” nui chungin ka ti a,a nui ve mai a.
.
Rei vak lo ka thut hnu chuan haw ka tum a, ka ding deuh uaih tih ah a chanchin kan sawi mek Nunpuia leh Julie chu an rawn lut vehlawl a, an pahnih a hmuh chu ka inbeisei hauh lo.
.
“I dam maw?” min melh zawk a, a hawisawn lehnghal a,
.
“Um..ka dam e” ka bag ka la a,
.
“Ven, ka kal nghal mai ang, ka hmanhmawh deuh bawk sia” ka ti a, Vena chu min thlah turin a rawn ding ve nghal a.
.
“Tih huk lampang kan tum hnai ania, sawi pui tur chein kan lo kal a” Julie chuan a ti lang lang a, ka hriat lh hlau ni awm fahran in a nui zui hak hak a.
.
“Dik tak chuan Julie hi chu ka phur pui thlawt lo ani” Vena chuan zawi sap hian a ti a,
.
“Nangmah emaw ka tia ka lo phur ve hman viau asin le” a han tih zawm nghal a,
.
“Julie te chu keini tluk phak ni ve hek lo” fiamthu titak deuh hian ka lo ti a. kan nui dun hak hak a.
.
In ka thlen chuan ka zawi vek, tinge hepa huhang hi a nat em em le? Zanah chuan Ruata a rawn leng phei a, Delhi lama ka chhuk hma in nihnih chiah ka nei tawh a, tun tum ang renga chhukthlak peih loh hi ka neih ngai pawh ka hre lo. Chumi zan chuan Ruata chu ka chhang ta nge nge a, Nunpuia theihnghilh theih nana hman hi ka duh hauh lo a, mahse hetia ka awm avang hian ka theihnghilh phah dawn chuang in ka hre lo ani. Nula te kan ni ve a, min lo duh der tut e an awm ve thin a, thinlung takin a tutemah hi ka la ngaihven zui ngai lo. Hei vang pawh hi anih ka ring, ka duh tak vawikhat ka tawn hi ka thinlunga a tlak nat em em!
.
Kan tih nek nek chhungin hun alo liam ve zel a, Ruata pawh kan inbe tam a, ka ngaina ve takzet tawh. Nunpuia hriatchhuah chang chu la nei mah ila Ruata hian min ngaihsak in min duat a, ka tan chuan a hlu takmeuh a ni.
.
Paper presentation tur ka buaipui zo a, fb ah ka lut khat a, ka han lut kual mai mai a, ka sim hleih theih loh Nunpuia wall ah ka lut a, a lut vak ngai lo aniang thil thar hmuh ka nei lo. Mahse thlalak hlui deuh Julie rawn tag chu ka en a, Julie profile chu ka en chak ta tlat a. ka luh chuan ka rin loh deuh thil ka hmu a, ka thin te chu a phu zeih zeih in ka hria. Julie chu midang nen relationship an lo dah a, mak ka ti lutuk chu ka mit ka nuai a, ka ennawn leh a, mahse ka hmu sual lo. Inthiam lo ru deuh chuan Vena ka biaa, Julie leh Nunpuia chungchang ka zawt a, an inthen tawh thu a sawi a, a chhan erawh a hre bik lo ani awm e.
.
Ka muhil thei lo chu ka inlet leh thak thin a, whatsapp tone a rawn ri a, chutiang hunah chuan Ruata bak an nih ka ring lova, ka han en chuan Nunpuia a lo ni, ka mu lai chu ka thu chhuak hlawl a, thla nga dawn kan inbe tawh lova, a msg hmuh chu ka inbeisei lo ani.
.
“Ruah a sur a, thli lah chu a tleh duh phian bok si a, ka hrechhuak che a, I omna hmunah heng hi I tuar ve angem? Tiin….. zanin hian tu tah pawh ni la hei hi ka soi duh, ka ngai takzet che”
.
Ka mittui chu a tla ve tawp,
.
“Lalnunpui…chhekehpa.. ka rilru hi tinge heti taka I sawisak retheih le?” tiin ka phun sap a.
.
Khuanu ruat loh di an tih thin hi ka lo hrethiam ngai lova, mahse ka thil tawn mek hi chutiang chu anih ka ring. Ruata chu Aizawlah kum chanve pawh a awm tlin hma in Lawngtlai lamah an sawn thut a, a huphurh hle a, ban te a duh rum rum a, mahse lo ti hram hram turin a chhungten lo fuih rawh an ti a, thiam dan ang ang chuan ka han fuih ve a, ka zirlai chu bansan a, inneih mai te a rawt a. Mahse doctor nupui graduate tal nih loh chu ka duh lo tiin ka lo hnial thung a. Amah hi ka ring tawk bawk a, rinhlelh tur in a awm ngai hek lo.
.
Hun chu a kal ngai in a kal ve zel a, mihring nunah hian zirtur ka ngah bik viau nge ka hre lo, kumkhat chuang zet Ruata nen kan inzui ve hnu leh keipawh ka gruaduate ve hnu chuan ka chungah mak taka lo thleng leh a. Hetihlai hian Ruata te hian palai rawn tirh an tum a, tawngka chuan kan chhungte chu an inbe tan mek a, Ruata pawh ral atang a rawn phur ve hle a. A ruk tak chuan kan chhungkua pawh kan inbuatsaih ve nasa tan viau a ni. Chutiang vela boruak a in mun chhoh mek lai chuan zankhat chu thu thin thawng deuh ka dawng a, Ruata'n nupui a ru tih thu chu! Phone tum in vawi tam tak ka bei a, ka call tlang thei lo. Ka chhungte bula sawi dawnin thu chiang ka la hre silo, khatiang tluka rilru vakvaia ka awm kha ka la hre ngai lo. Nikhat a liam a, nihnih a liam pawhin ka la be tlang thei lo. A ni thumna zanah call ka dawng a, Ruata a ni, khur ru dar dar in ka lo pickup a,
.
"Sawmpui, i ngaihdam tlak pawh ka ni lo, naktukah ka lo haw dawn, engkim ka hrilh ang che" a ti a,
.
"Ruat, mi thusawi hi a dik em? A dik lo tiraw?" Beidawng zet in ka ti a,
.
"Ka lo haw ang, Sawmpui, engkim ka siam tha vek ang"
.
Phone ka dah a, ka melh ngai ka melh char char .
*_____*_______*
.
“Sawmpui, min hriatchian em kha, naupanlai atang ruihtheihthil vawikhatmah ka la ti ngai lo. Hmanzan khan ka in luahna te fanu Kimi leh a thiante an rawn leng a, buhfai zu ang hi an lo keng a, in ve chhin turin min ti a, a taste kha ka hre chak ve deuh nen ka lo in ve mai a, a ruih theih loh an tih vangin ka no hnih vel chu ka lem a, mahse khami ka in hnu rei vak lo kha chu ka la hria, mahse engmah ka hriat chhunzawm tawh lo. Zinga ka harh chuan ka bulah chuan Kimi chu alo mu ve reng a, zan lamah engthil nge thleng tih kha ka ngaihtuah ngial pawh hian ka hrechhuak zo lo. Ka thil in turah khan telh an nei anih loh chuan khatiang hmak khan mihring hi a awm theih loh. Haw turin ka ti a, mahse haw chu a tum lo bur a, a hma atang min ngaizawng tih ka lo hre tawh bawk anen, min awhtir a tum ani tih chu ka hrethiam nghal a. Sawmpui, sawi ngaihna pawh ka hre lo, hetiang zawnga thil a in her hi ka ring lo ani. Khawngaih takin min ngaidam rawh, nang lo chu hmangaih ka nei lo asin” mittui tling pam in Ruata chuan a ti a, ka thinlung hi a kehsawm vek.
.
“Ruat, ka tan a zahthlakzia hi I hria em? “
.
“Nang lo chu nupuia neih ka tum lo, Sawmpui, min ngaidam the ihram lo em ni?” ka banah a vuan a.
.
“Ruat, awmzia a awm tawh lo, Kimi chu i neih a ngai, I inven zawh loh avang a thil thleng ah hian ani chiah dem tur ani lo. Nangmah pawh I tel ve tlat si a, nupa nun hial in hmang tawh a, a nih tur ang chu ani vek tawh. Ka chhungte pawh ka lo hrilhfiah mai ang” ka ti a.
.
Ka inngaihtuah nasa ve em em a, ka chhungte pawhin ka thutlukna chu min zahsak a, ngun taka inngaihtuah turin min ti a, kan veng chhungah leh pawnah pawh a tam zawk chuan innei ngei turah min ngai a, kan thu leh hla lo hria pawh an awm nual a, ka zak lutuk hi pawn chhuah loh mai te ka duh rum rum thin. Ruata nu leh a naute chuan ngaidam hram turin min ngen reng a, a pa erawh chuan mi fanu te mualphopui tawh midang neihsan chu a remti lo thung. An chhungkua pawh in hau ngai lo leh inhnial ngai lo chu an inhnial ve ta bat bat fova, a pa tih loh zawngin keimah nen innei tlang turin an duh a, pa ber erawh chuan a ngaihdan sawhsawn a tum lo. Keipawh ka tan zahthlakin na hle mahse Ruata pa ngaihdan chu ka tawmpui khawp mai. Ka chhungte bulah pawh ka ngaihdan chu tlang takin ka hrilh a, an chhungkua nena inzawmna neih kan tum chu kan kaltlangpui dawn ta lo.
.
Khuaa awm reng pawh nuam ka ti lova, a hman apiangin kan chanchin min zawt a, ka tan chhan a nawm lohdan an ngaihtuah phak lo. Aizawl lamah ka awm bo a, ka hun tawn mek chu ka tlanchhiatsan a ni ber. Vanduai ka in ti a, engtak hi nge ka tana ruat tih ka hrethiam pha lo. Inah ka tawm deuh ngawt ngawt a, ka ni chuan chhuak harh turin min ti fova, ka peih ngang lo ani. Ruata chuan min rawn biak a tum reng a, Aizawlah min rawn kal chilh hial a, mahse ka be chak lo. Zankhat chu ka ni nen chauh kan awm a, Ruata chu a rawn lang hlawl a, han in hnar haw ngawt thu a awm bik silo, ngawi rengin tv chu kan en reng a, ka ni chuan thingpui ka va lumsak ang cheu tiin choka lam a pan a. Ka bulah chuan a rawn in sawn phei a,
.
.“Ka lak atang hian I tlanbo hlen theih hi I ring em ni? Mawh…”
.
Min thing nawk nawk a, ka mittui tla tur chu ka khap let sak a, a mitah tak ka melh a,
.
“I lak atang hian ka tlanbo reng reng lo. Nang leh kei hi inkawp tur kan ni lo, chuvang zawk ani” ka ti a, mak tih hmel zetin min melh reng a, zawi muangin min vawnna chu a la thla riai riai a,
.
“Sawmpui, min ngaidam thei thlawt lo em ni?” a ti leh a, a landan chu khawngaih thla ala ngawih ngawih,
.
“Ruat, I pa ngaihdan kha a dik chiah alawm” ka ti a.
.
“Ka pa thusawi vang chauh khan em ni hetia I awm? Hlim takin ka siam ang che, chu chu ka tiam a che” a ti a. Ka banah chuan a chelh tlat a,
.
“Thinlunga ser awm reng chung chuan kan hlim tak tak hi ka ring lo ani. Tunah te chuan pawm harsa I ti maithei a, mahse in han innei anga, nupa te chu a inhmangaih chhoh theih zel alawm” ka ti a.
.
“I ni lo, a hmaa ka hriat thin kha I lo ni tawh lo takzet anih hi” a lu chu a thing nak nak a, a kal nghal a.
.
Ka thlir zui reng a, ka mittui chu dan rual loh in a tla zung zung a, ka chunga thil thleng zozai hi ka hrethiam lo a ni.
.
Zanah chuan ka muhil thei lo chu ka in let ka in let a, ka inchhirna tur kawng ka zawh ni mai te hian ka hria. Mite pawhin an dai pelh fova, sawn hial an thlak chung pawhin ngaihdam an ni thin tih te ka rilru ah alo lang a, ka rilru hi thlak thutin ka ngaidam mai dawn em ni tih thlengin ka ngaihtuah a, ka nu biak phawt tha ka tih avangin ka ngaihtuah zawm duh lova, ka tal ka tal a, zing lamah chuan ka lo muhil ve siai siai a.
.
Ka nu nen ngun takin kan sawi dun a, uluk takin thil thleng thei kan ngaihtuah lawk bawk a, Ruata chu vawikhat tal sawi pui leh turin min ti a, keipawhin rem ka ti a, he mi ni hian Ruata nen engkim kan sawi dun a, mahse tun maia thil tihfel chi anih loh avangin nghah rih chu kan tum a ni. A theih anga ranga transfer turin a nu pawhin hma ala nghal char char a, thil an lo ti thei viau anih ka ring, Aizawl lama awm turin an sawi fel mai . Heng buaina zawng zawng kan tawh hma khan lo ti daih se a tha tur, hetia buaina tlanchhiatsan a tum hi chung lam hian a rem ti lo nge kan chungah a ai zahthlak zawk a lo thleng leh ta tho a!
.
Ka mutui lai chu ka nu min rawn biak tumin min tiharh a,
.
“Bawihi nizanah thil duhawm vak lo a thleng a, Ruata kha a hmeichhe nu khan a rawn luhkhung a” a tih chuan ka harh chiang kher mai. Thil awmzia chiang zawk ala hre bik lova, Ruata nu mangang chuan ka nu alo kaitho ani awm e. Engkim a tawp vek, sawi zawm awm leh thei tawh lo turin a tawp ta anih chu ka rilru in ka ti a, na ti lo turin ka infuih sauh sauh a.
.
Hetih lai hian rilru mumal ka pu thei lo, ka a deuh chhaw ani ber. Engmah ka hre rei thei lova, ka thil tih tawh pawh ka lo mangnghilh leh thin. Mahse ka chhungte zawng zawng in min hrethiam em em a, ka awmdan ang ang in min en liam a, in hnem vak chi pawh ani lo. Ngawi rengin min thlir tawp a, mahse tute pawhin min ngaihsak vek thung. Ina tawm reng ai chuan tiin ka ni fanu Rini, Lunglei a hnathawka awm rawn chawl chuan min len chhuahpui a, ka chhuah lohna a rei bawk a, ka harh ve sawng sawngin ka hria. Kal chhuah takah chuan Vena tlawh ka tum rilru a, Rini bula ka sawi chuan an lo inhre nasa mai hi alo ni a, kan thlen chuan a bungrua hnawk tak chu a lo chingfel mek a. A tum lo deuha chutia min hmu chu a meng bial kawk a, min lo kuah deuh nawk nawk a,
.
"Lalrini nen daih in rawn in zui lut chu ava mak ve" a ti hluai a, ka cousin a nih thu ka sawi chuan mak a yi lehzual.
.
"Sawmpui, mo thuam vel in rawn buaipui dawn em ni a?" a ti a.
.
Rini nen chuan kan in melh zauh a, ka nuih chu a za hran lo viau,
.
"Mo thuam chungchang chu kan va hre lo ve" Rini chuan alo ti khauh a.
.
"Haha... In ho emai a.. min rawn sawm ve dawn amaw ka ti zawk asin. Tu emaw pawh Delhi lamah a liamthlak phah thak ania" Vena chuan a ti leh a, a thusawi chu kan man lo tih kan mitmeng ah a hria ani ang,
.
"Nunpuia chungchang ania ka sawi" amah vek chuan a ti a.
.
Ka bo lehzual, engvang ngawtin nge Delhi ah chuan Nunpuia chu a kal ang? Kum khat zet kan inhmu tawh lovin kan inbe tawh lova, engtinnge a hun hman zel pawh ka hre tawh lo khaani a,mahse a hming lamrik apiang hian keimaha danglam awm thin hi a va hai theih loh thin si em!!
.
*-------*-------*------*------*
.
Ka muhil thei lo chu veranda ah ka chhuak a, Aizawl khawpui eng tuar chu ka thlir a, chhun lama Vena thusawi chu ka ngaihtuah let nauh nauh a.
.
"Nangni pahnih hi ka hrethiam lo cheu, in hmangaih ru reng si in nangmahni ngei pawhin chu chu in hrethiam lo anih hi. Vawi tam tak puih cheu ka tum a, mahse ka hlawhchham zwl a,nangmahni ngei in inbiak a,in sawifel a ngai in ka hria" a ti charh charh a.
.
"Chutiang tur chuan mitmei vawikhat pawh min hmuh lo, bakah i hresual anih chu. Nunpuia ngei hian asin ka thiannu bulah bialnu nghet anei a, kei nen hian a remlo tih thu sawi tu chu" ka ti a.
.
"Aih, ka thianpa hi ka hrechiang lutuk tlat, bialnu chu lo nei pawh nise chutiang ththu chu a sawi ngai lovang" a ti a.
.
"Enteh Ven, ama number atang ngeiin asin ka thiannu chuan a dawn"
.
"Inrawlh an awm anih chu"
.
Kan ngawi ta thap a, thudik tak chu Nunpuia chauh in a hria. vena chuan keimah ngeiin biaa thil awmzia hrechiang turin min ti a. Mahse a awlsam lo khawp ang, keiman be hmasa tur phei chuan ka thei kher angem ka hre lo. Ngawi rengin min kalsan a, kan inthianna pawh a pawtchat vek a, va pawh leh hmasak chu ka ngam dawn em ni?
.
Thil fim thaw heuh heuh chuan ka sam a rawn chhem leng siau siau a, ka hun tawn mak tak tak te chu ka ngaihtuah kir a, mal ngawih ngawih a inhriat na chuan ka thinlung chu a rawn deng dawt dawt a, ka thinlung hian mamawh anei a, chu chu haider tumin kum khat chuang ka lo bei tawh ani tih chu hai rual lovin ka rilru ah a rawn lang a. Ni e, chu chu a dik a,ka pawm loh avanga thudik lo chang thei ngawt pawh a ni lo. ka thinlung hmun ruak hi mipakhat Lalnunpuia tih chauh hian a hnawhkhat thei a ni.
.
Vena dawra kan len atang karhnihna chiah a ni a, ka ni pasal lungphunna tur vel buaipuiin kan chhungkhat hnai te pawh an rawn leng a. Ka ni hi pasal sun tawh niin a pasal hian kum 5 kal ta khan a lo thihsan tawh ani. Pawn lama ka awm lai chuan kan kawtah motor a rawn ding dat a, ka hawichhuah chuan Vena leh Nunpuia an lo ni a, ka lung chu a phu leh ta dup dup mai.
.
"I lo dam thin em?" A kut a rawn phar chhuak a,
.
"Um, ka dam thin alawm" lo chibai let pah chuan ka ti a.
.
"Sawmpui, chhuahpui lawk che kan duh a, i hman em?" Vena chuan a ti a.
.
Kan buaina vel ka sawi chuan inchhungah a lut nghal a, rei vaklo hnuah a rawn chhuak leh a,
.
"I ni bulah ka dil a, a phal e" nui deuh chung chuan a ti a.
.
Khawi lam nge kan pan tih pawh ka hre chiah lo, kan tlan zel hnu chuan Vena te veng kan pan tih ka hria. An in kan thlen chuan a lo reh thap a,
.
"Ka chhungte an zin vek a, zanin hian in pahnih chungchang hi engkim sawi fel vek nisw ka ti a ruahmanna ka lo siam ve tawp ani. Tihian ka room ah lo awm ula, inpawh deuh in engkim sawi ang che u. T.v ka en dawn a, thawm dim vak angai lo duh leh vin tak pawhin inbia ula, in thawm chu ka hre dawn lo ania" Vena chuan a han ti a,
.
"Sawmpui i lungawi rak thleng in khapa kha ankhum ang che" tih leh chhuah a rual a.
.
Ngawi rengin kan thu a, ka lai deuh hu a, Nunpuia pawh nidang ang ngawt chu a ni bik lo. Kan aw kan thian leh kharh kharh thin a, mipa zawk chuan hma ala hmasa ta nge ngea.
.
"Mali, min lo hmangaih ve thin reng em ni?" A khi deuh sung a,
.
"I hriat reng kha" ka ti lawi rut a,
.
"I sawi ngai silo a"Engvang in nge ka sawi ngawt anga?"
.
"i sawi loh te chuan engtinnge ka hriat ang?"
.
"Ka thiannu bulah chiang takin bialnu i neih thu leh kei nen chuan kan inkawp theih loh thu i sawi miau alawm" ka aw ri chu a dik ta thlap mai.
.
"Engatinge chu chu ka hriat miah loh le? Vena pawh khan min hrilh a,a mak a ni" hla tak chu a melh vang vang a.
.
"Ka sawi tawp mai ang, dik tak chuan ka hmuh hmasak ber atang che khan ka rilru i tibuai vek. Julie nen kha chuan kan inkawp thin ngei a, mahse in khuaa kan rawn kal hma khan kan inthen ani. Min la duh tih chu ka hriaa, mahse keimah lamah chuan a thi hmak thung. Tichuan kan rawn kal a,kan in tawng ta a. Ka ta i nih hi ka thinlung hian a ring nghal hmak a. Kan inhmuh leh pawh lhan i awmdan kha ka hai bik lo, ka lo confi ve viau nghe nghe anih kha. Mahse ka ta ni tura ka lo ngaih lai che khan bialpa i neih dawn thu min rawn hrilh a, ka thinlung natzia kha ka sawichhuak thiam lovang" a kut chu a han hum ruh a, a thusawi ah chuan a cheng hle a ni.
.
"Nang berin beisei tur i awm lo tih i sawi miau sia, ka nat loh bik kha i ring em ni? Chu mai bakah khatih lai khan ka thinlung hian a nghak tlat chea, awlsam tak khan ka nei nghal bik lo asin" ka ti a.
.
"Pasal i nei dawn tih ka hriat khan awmngaihna ka hre lo, inneih hun tur nia an sawi ah khan Mizoram ah pawh ka awm ngam lo. Kan sulhnu fang turin Delhi lam ka pan hial a, heti tak hian ka lo hmangaih che tih ka lo hre ngai lo."
.
"Min hmangaih maw?" Ka ti hu a,
.
"Chhekeh nu, ka hmangaih che, ka hmangaih lutuk vang che anih hi hrehawm ka tuar" ka mitah tak min melh a,
.
"A tirte atang khan a mak ka ti, nang hi ka tana Pathian ruat ah ka ngai hmiah che a. Mahse kan ni lo anih hi tiin ka ngaihtuah leh a, mahse kan lo ni ngei anih ka ring ta. Pasal nei hial tawh tur kha ka tana ruat i nih vangin heng hi kan tuar phah a nih hi" a ti a.
.
A mak a ni, kha leh chen kha inhmangaih ru tak chungin in kawp thei silo in kan lo awm tawh a,enge zir chhuah tur kan neih reng reng le?
.
"Mali thil ka hre tawh asin" phone atang chuan arawn ti lauh lauh a, enge tih ka zawh chuan,
.
"Julie nen nizanah kan inbiaa, msg thawntu kha amah a nih thu a sawi a. Ngaihdam min lo dilsak rawh a rawn ti asin" a aw chu a zang vah a, hlimna in a khat tih a hriat hliah hliah.
.
Lungngaihna karah hlimna ni engmawi tak kan tawng ve dawn ta niina lang a, keipawh hmuh theih in ka hmel te chu a thar sar sar a, zir chhuah tur enge kan neih tia zawhna ka neih pawh kha tunah chuan ka hre ta- kawng bumboh tawh chang te nei mah ila Pathian hian chutiang tuar reng turin min lo ti bik reng reng lova, kan tana kawng tha zawk a buatsaih hi a lo ni.
.
"Krismas hla music video kan shoot dawn a, lokal ve la" Nunpuia msg chu chhiar in ka nui ver ver a, a chang hi chuan thil awm ang lo tak tak hi a sawi ve fo thin.
.
"Nakinah uluk tawkin ka la en zawk dawn nia" ka ti a.
.
Ka sawi zawh rual deuh thaw in kawtah motor a rawn ding dat a, doorbell a rik atangin rin ka nei nghal,ka ring sual lo hle bawk,
.
"In siam rawh, ka nghak dawn che"leh tawp zel a.
.
"A zahthlak, ka duhlo" chutiang hmunah kher chuan ka duh lo takzet ani.
.
"Zanin chuan couple a kal vek tur alawm, nupui nei ho pawh an nupui te hruai tir ania" min nawr leh et et a, kan in zui chhuak leh ta nge nge a.
.
Ka hlimna bo hnu kha tunah chuan an lo let leh ta, kan hmangaih takten min hmangaih let tluka hlu hi a awm thei dawn em ni? Kan innei kher angem tih ka sawi thei lova, mahse Khuanu hian kan tan rem min ruatsak em anga, nupa hlim tak niin kan khawvel ni hi kan chhiar dun ang tih ka beisei tlat a ni.
*--------*-------***
-Mami Lalhmangaihzuali Chawngthu
“Ka lak atang hian I tlanbo hlen theih hi I ring em ni? Mawh…”
.
Min thing nawk nawk a, ka mittui tla tur chu ka khap let sak a, a mitah tak ka melh a,
.
“I lak atang hian ka tlanbo reng reng lo. Ka tan engmah I ni loh vang in ilak atang ka kalbo mai zawk ani” ka ti a, mak tih hmel zetin min melh reng a, zawi muangin min vawnna chu a la thla riai riai a,
.
“I ni lo, a hmaa ka hriat thin kha I lo ni tawh lo takzet anih hi” a lu chu a thing nak nak a, a kal nghal a.
.
Ka thlir zui reng a, ka mittui chu dan rual loh in a tla zung zung a, engvanga hetia awm nge ka nih tih pawh min zawt lova, chhan a awm reng em tih pawh hriat a tum ngai lo.
-------X--------------------------------------------------------------------------x-------------------------------------------------X----
Kan kohhran ah Inkhawmpui lian tak kan thleng a, zaithiam lar tak tak pawh an rawn kal a, zaipawl lar tak pakhat atanga lokal ve pakhat chu ka vawikhat hmuhna atang ka mit a la nghal. Mahse ka mit alak na chhan chu ka ngaihzawn vang lam ni lovin a din mai mai lai pawha in uluk hmel fahran a a kekawr a ben leh thak thak thin vang chu a ni. Tlangval khirh tak ani ngei ang tih ka ring nghet bur a, ka ngainat chi ai hauh lo. An zai lai te chuan ka lo chik bik hle a, vawihnih vel chu kan mit a in tawng ve in ka hria, a nui sak zel lehnghal. An thutna bulah ka duty thei hle a, a thiante zingah chuan a lian fahran lo hle a, chumi rual chuan a hmelchhe ber erawh a ni lo chiang. Inkhawmpui tawp zanah chuan Usher duty ka awl a, mipui thutnaah ka thu ve a, a tira ka ei vak loh, zan thumna vel a ka mit in a zawn ruk tak, hmelngainatawma(a hming tak Lalnunpuia tih pawh ka hre fel vek tawh a) kha ka mit chuan a zawng leh chat a. Zawn hmuh a harsa lo khawp lehnghal, an zai lai te chuan khawdang ka melh thei lo, tihtak zeta Pathian fak hla a sa te chu a hmuhnawm takzet a ni. Inkhawm ban hnu chuan usher kan han inhmukhawm leh a, pawn lamah inkhawm ho in thingpui an in a, an thawm pawh a tha hle a. Thla la duh ho in pawn lamah chuan min lo nghak thup bawk a, keini ho chuan thla te kan la fel a, pawn lam pana ka chhuak tur chu ka baah lo vuan tu hi an awm a, rang takin ka hawilet a, ka bulah chuan Nunpuia chu alo khi sang a,
“Khawngaihin thla ka lakpui thei che angem?” a ti a,
.
“A….Aw…” ka ti bah nak a, maicham hma lamah chuan kan in zui phei hnak hnak a, ka zam chhe lo chauh a ni.
.
An member pui pakhat chu camera nen kan hnungah alo kal bawk a, kan thla chu alo la mawlh mawlh a, ka thaw tha ngam lo. Min hnaih thei ang ber chuan a rawn ding a, a perfume rim tui tak te chuan ka thawk a ti buai lek lek in ka hria. Thla kan lak zawh hnu chuan pawn lamah kan inzui chhuak a, thingpui in turin min sawm a, kan intlar ve a, a thiante chuan an lo ko a, a then in an rawn siai a, ka lawm na nge ka zahna kha tam zawk ang tih ka buk thiam lo. thingpui kan in zawh chuan ka thiante chuan haw turin min rawn ko a, Nunpuia chu a thutna atang a tho vat a.
“Fb ah engtinnge I hming I dah?” a ti a, ka hrilh ve mai a, “Naktuk zingah kan haw tawh dawn a, kan in hmu khat tawh dawn hle mai” a ti a, a lu chu a tuai deuh puat a, “Fb ah ka lo zawng ang che, I thian atan min lo pawm ve ngei pawh ka beisei ang” a ti a. Nidang ang bawk in a han nui leh sak a, kan in mangtha hnu chuan keiapwh in lam panin ka haw a. In ka thlen hnu te chuan ka han insik vel a, a tak ngei chu ani si a ka ti rilru a, nui ver ver chuan ka mu a. Chumi zan ang renga ka muttui ka la hre lo.
.
Nitin beiseina nen fb ah ka lut thin a, mahse ka beisei ang chu thlakhat dawn ka hmu lo. An ni ang mi lar te chuan min hre tawp nang ka ti a, mawl ka in ti, engtinnge beiseina sang tak te ka lo neih theih zawk? Ka hun hman dan pangngaiin ka hmang leh tawh a, nitin college lam ka pan a, Nunnpuia lam pawh rilru ah a lang lutuk tawh lo. zankhat chu assignment tih pahin ka online a, rin loh deuhin message alo awm a, ka han hawn chuan kha chen beiseina nen ka lo nghah, Nunpuia msg ngei chu alo ni.
.
“I friend atan min lo pawm ve thei ang em?”
tih te mai hi ani a, friend request min lo thawn ngei bawk a.
Rilrua ti tau deuh hlek chuan ka han chhang duh lawk lo a, ka mut dawnah a request chu ka confirm a, msg erawh ka chhang lo.
.
“Ka lawm e aw” tih alo thawn vat a,
.
“Keipawh le” tiin ka chhang ve a,
.
“Kan haw ni khan ka phone motor atang ka thlauh a, a chhe darh vek a, thla khat hi alo rei duh hle mai” a tih chuan chawplehchilhin ka lo tih tauh rukna chu a reh nghal vek.
.
Eng emaw kan sawi dun a, zanrei tak thleng kan inbiak hnuah kan in mangtha ve ta hram a, a nua mka ti takzet ani. A profile chu ka check chhuak dap a, a propic pakhat chuan la mit a la ta zar mai. Hmeichhe pakhat Julie tih in a comment na leh an inbiak dan velah chuan inhmelhriat satliah an nilo tih chu ka hre mai a, Julie profile chu ka han bih ve nghal zat bawk a, a hmel chu a chhe hran lo. College pakhata Asst.Professor ani tih thlengin ka hre nghal a, ka thik nghal ngawih ngawih. Engkawngahmah chuan ka tluk hauh lo tih ka hria, chutichung chuan rilru dam takin Nunpuia chu a tan ka phal chuang lo.
.
Thla khat dawn fb ah kan inbe ve ngat ngat a, zankhat chu ka no.min dil ve ta hlawl a,
.
"Ka naute hi a whatsapp em o... a number ka duh riau mai"
.
Chu msg chu vawi thum vel ka chhiar nawn a, reply nachang pawh ka hre lawk lo. Ka no.ka hrilh hnu rei vak loah ka whatsapp tone alo ri a, ka en vat a, Nunpuia ngei chu a lo ni a. Thil ho tak tak kan sawi a, kan inbiakna chu ka chhiar nawn sek a, thu holam maiai sawi mah ila ka hlimpui ve tlat si!
.
Zantin kan inbiak ve tak ziah ah chuan a hmaa ka rilru kha ka pu leh rang hle a, a tan chuan a thian leh hmelhriat satliah chauh ka ni tih ka hai lo chungin ka thinlungah erawh hmun a chang thuk viau thung. Tv ah an zai ka hmuh fo chu duhtawk mai lovin an hla zawng zawng chu ka download kim vek a, ka mut hma in ka en ngei ngei thin. Amah an focus lai takte chuan ka pause a, rei tawk tak ka en vawng vawng thin. Hla zir in an buai ve bakah amah hna nei anih avangin a buai tawk viau a, mahse ka tan hun min siamsak chu a thulh phah ngai lo. A laka ka rilru puthmang hi hre ta se min huat phah in min biak duh loh phah ka hlau a, ka in thup hram hram thin.
.
Zirna chhunzawm turin Delhi lamah ka kal a hun leh tawh a, ka kal hma zan chuan min rawn call a,kan inbe ta reng a. Aizawl ah inhmuh chu kan intiam a, chumi zan chuan ka muhil zeuh zeuh ani ber, ka hmuh chak em em ka hnu thei tur chu ka hlim a, ka rilruah thildang a lang lo. Zing lam ah ka lo chhing ve sek ni tur ani, ka harhchuan ni a lo tlang sang viau tawh mai a, ka in perh tho zawt a, ka phone ka han dap a, whatsapp a Nunpuia msg chu nui ver verin ka chhiar a,
.
"Gud morning... zing kawng nuam tak ron zoh la, tlaiah hmuh theih ngei che ka lo in beisei ang"
.
Chaweikham dar 9 vela chhuak tawh kha tlai lam dar 4 ah pawh Seling kan la thleng lova, pa fimkhur em em mai ka pa in motor a khalh miau a, tur hmanhmawh chi lah a ni der si lo. Thlen tlai ka hlauh chhan phei chu hria se khalh chak chu sawi loh, min zilh leh hrep ani awm si a, ka ngawi ta hle hle tawp a ni. Aizawl khawchhung kan luh chuan dar 6 a ri chiah chiah a, Ramhlun South ah ka ni te inah kan innghat a. Nunpuia chu an hla zir hmaa rawn kal hmasak a tum avangin a rawn thlen hma ngeia lo inbual zawh hman tumin bathroom ka pan nghal a, ka la innual rei loh ber tum anih ka ring. Dar 7 a ri a, ka fon pawh arawn ri ral ral a, Nunpuia alo ni a, kanawmna vel te min rawn zawt chiang a, ka hrilh hnu rei vakloah kan in chu a rawn zawng hmu ta mai a, kan han inhmu chu ka lai em em a, ka biang te chu a sa het het ka hria. Rei a awm hman loa, pawnah ka thlah a, gate bulah chuan kan indinchilh ran a, "Mali.. (tuman Mali min ti ngai lova, ani erawh chuan tihian min ko tlat a) ka tum dan ai a hmaa kan inhmu leh chu ka lawm hle mai" a ti a. Sawi tur pawh ka hre lo, ka lo nui mai a, ka kutah a rawn vuan a, "Sawi duh tam tak ka nei a, hmaichhanah ngei sawi ka duh thin. Naktukah lokal leh ngei ka tum ang" a ti a. Ka in rin hma in ka biangah a rawn fawp a, ka phu zawk a, a nui ta var var a. A motor dahna thleng ka thlah a, a tlan liam thleng chuan ka thlir zui reng a.
*-----------*-----------*
DELHI -LUNG A LENG EM MAI
.
Ka zirna hmun ka thleng leh der tawh a, class pawh min lo tan san tawh nghe nghe. Khua chu rin ai takin a nuam lo a, ka room tukverh ah dakin Aizawl ka chhuahsan hmaa ka hun hman dan te ka chhuilet neuh neuh a.
Ka mutui lai chu ka fon riin min tiharh hlawl a, tudang ni lovin Nunpuia alo ni. Chaweikham ah lenchhuahoui min tum a, chung vel sawi chuan rei tawk fang kan inbiaa, nidanga thawhphan pe na ve tak chu chumi zing chuan ka nui chhuak ver ver a. Chaw kan eikham fel hnu reivak lo ah Nunpuia chu arawn thleng phei a, ka ni leh ka pachuan min zawt kher lo mahse thil awmzia chu an man thiam pawh ani ve ang, insiam ve vat tur chuan min lo tur chhen a. Ka duhtawka ka inchei hnuah chuan kan inphur chhuak ta a. Hmun hrang hrang kan fankual hnuah an inah min hruai leh a. A u nupui leh a fapa naute chu an lo awm a, min lo be siam siam a, a fel ka ti hle. Thenawm dawra kal chhuanlamin min chhuahsan daih a, sitting room a an thil tar te chu ka enkual a, Nunpuia hi zai lamah sulhnu alo ngah in lawmman pawh a dawng hnem hle a.
.
"Hmuhnawm awm ve" ka hnunglam atang chuan arawn ti a,
.
"Ka rin ai i lo bon hi ka tia"
.
"Ani mai dawn asin" a nui var var a,
.
"Thingpui ka lum a, i siam ve thung ang" a han tih zawm zat a.
.
Choka lamah kan inzui phei a, ka thingpui siam lai chu uluk fe hian min lo en reng a,
"Khati vak vak a in en te chu ka dawl bik hleinem" nui chungin ka ti a.
.
A lu a hiat nauh nauh a, a thutna atanga tho tharh a, tukverh ah a dak ta daih a. Dawhkanah thingpui ka dah a, ka no bulah chuan a fon a dah a, ka thu fel chiah tih ah a fon chu a rawn ri a, ka tum vang pawh ni em em lovin ka han melh a, Julie calling tih alo lang ta va va a, ka lungphu chu a rang nghal kher mai. Nunpuia chu ka melh a, a fon chu a rawn ban a, a reject nge ka hrelo,a chhang lova, mahse ka awm a nawm phah chuang lo. Dik tak chuan a hma pawhinka lo hre thawi tawh a, an inkarah engemaw tak a awm kha ka rin lawk sa ani a. Mahse ka laka a awmdan avang hian beiseina ka lo nei ngawt pek ania, ka va han mawl tak em!
.
"I ngawichawi ta riau mai, vawiin ka hruai chau che nilo maw?" A tih chuan ka harh chhuak thut a,
.
"Teh nang, thil ho mai mai ka lo ngaihtuah alawm" ka ti a.
.
"Pathian zarah kan dam chuan December thla tir hian Delhi ah programe kan nei dawn asin"a ti a.
.
"tak tak maw... Zaipawl angin nge mimal?"
.
"Zaipawl.. Upa Ngura kan rawn zui dawn a"
.
"Nuam dawn ve... ti ve ringawt ila, min rawn hmu hman awm tawp silo"
.
"Kan lokal phawt chuan i khua chu min fanpui ang chu leee" ka sam chu a chul thur vek a.
.
Muangchangin kan in lam pan chuan kan chhuak leh ta a. Millenium Centre kan thlen chuan a thianpa ka hmelhriat ve tho chu min hmuhpui a tum a, a dawr lam chu kan pan a. 2nd floor kan thlen chuan keimahni min tawk zawngin hmeichhe pahnih an rawn kal a,pakhat chu ka lo hmelhriat ve fo tawh hnu ni awm maiin ka hria, kan in tawk ani chawpchilh nghal a,
.
"Nunpuia chu i damlo emaw ka tia, kha i va tha si ve" ka hriat hnu ang ka tih deuh nu chuan a han ti a, ka hrechhuak, henu hi Julie ani chiang lutuk tlat,
.
"Julie, nakinah kan sawi dawn nia, kan hmanhmawh deuh a kan kal phawt mai ang" ka kutah min kai a, min kalpui daih a.
.
Ka va hawilet hram a, mak tih hmel zet hian an lo hawi reng a,kan hawihai tlang ani ber. Min vawnna chu ka paih thla a.
"Keimah vanga dawt sawi kher kha angai em ni? I hman lo chung tihbuai che kha ka duh reng reng hleinem" rilru na ru takin ka han ti a.
"Mali, engmah i hre lo. Inhnial nan kan hun neihchhun hi a uihawm lutuk tlat, chuvang chuan inhnial lovang" a ti a.
.
Sawi duh leh zawh duh tam tak nei mah ila a sawi dik ve tho bawk si, lungawi vak lo chuan ka zui a. Vena te dawr kan thlen chuan ka theihtawp in hlim hmel ka pu lui a, kan Biakina anrawn zai tuma Nunpuia nena thla min laksak tu kha ani a. An inkawmngeih hle a, engkim an inhrilh tih pawh ka hria. Min hmuh chuan min lo chibai vat a, hepa hi chu a fel thlawt a ni, Nunpuia ai mahin a mizia pawh a ngainatawm, he Nunpuia hi a hmeltha twh vur pawh ni silo engvanga heti taka vei nge ka nih pawh ka hre lo.
.
"Sawmpui, Delhi kan programme vel chu i lo hre tawh in ka han ring ve ngawt a.. kan rawn tibuai hle dawn che ani" a han ti a.
.
"Min rawn tibuai duh lo ang tih a hlauhawm alawm" ka lo ti vat a.
.
Rei vaklo kan thut hnu chuan kan chhuak leh a, in lam kan pan ding nghal a. Nunpuia chu a tawng tlem lehtawh hle a, Julie nena an inkarah hian eng inzawmna chiah nge awm tih hriat chu ka mamawh takzet a ni. Vena chu zawt ila ka hre thei mai anga, mahse ngaihven vut anga lan chu ka duh bik silo. Kan in kan thlen chuan leng lut turin ka sawm a, mahse anu office hruaiangaih chhuanlam in a rawn kawi ta lo. A tlan liam thleng ka thlir a, nilengin a bulah awm mah ila ka ngai veng veng tho mai. Mak ka in ti hial zawk, mahni tawka in duh ve larh thin kha ka dinhmun hniam tih hrereng chung pawhin mi pakhat chu ka vei ngut ngut mai si .
.
Lengpui ah ka thlawhchhuah hun ka nghak a, zan lam atangin Nunpuia msg emaw call pawh ka dawng lo. Ka hlim ve hman tehlul nen, ka hlim chhung a rei lo takmeuh a ni. Kan thlawh hma in minute 10 chiah a awm tawh a, ka fon a rawn khur cher cher a, no.ka hriat ngai loh anih avangin pockup loh ka han tum a, mahse pawimawh thut takin tiin ka han pickup a,
.
"Malsawmtluang, khawnge i awm?"
.
Ka thu ngil zawt a, tun hun thlenga ka rilru in a nghah chu hepa hi ani chiang a ni.
.
"E...hetah..."
.
"I ban han phar teh"
.
"Engvang ngawtin maw?"
.
"Apawi love"
.
Phone adah nghal a,
.
"Chhekeh lutuk" ka ti sap a.
.
Thaw hlawp hlawp in ka bulah chuan Nunpuia chu arawn ding a, ka lo dingchhuak ve mek a,
"Ka hrethiam thei ngai dawn lo che anih hi tiraw?" Ka mitah tak min en a,
.
"Min hriatthiam hi i tum ve tawh ngai reng reng em ni?" Ka lo ti let ha a,
.
"Nimin ka haw kha ka lu na lutuk ka mu nghal a, ka lo muhil tlang nghal daih a, zingah kaharh veleh rawn call che ka tum a, i fon i switchoff tlat bawk si,min ti mangang hman hle mai" a ti a.
.
Ka fon charge laia ka off kha ani ngei ang, mahse han chhaih ve chu ka chak reng reng a,
.
"Ka laka insawifiah vak kha enge a tulna awm?"
.
"Chhekeh lo mai teh aaa..." a nui sak a.
.
"Ka tawngkam kha copy ve suh, mi lar plus rawngbawltu tan a mawi ve lo" ka ti a.
Ka bul hnai setah a rawn ding a, ka ban chu a hmer vang vang a,
.
"I thlen hunah min lo hrilh rawh aw" sawi sap chuan a ti a.
.
Ka lu chu ka lo bu nghat a, kan kal a hun ta. Ban vai lauh lauh in thlawhna chhungah ka luhsan ta, ka mittui chu ka khap per sak a. Ka ngaihzawng leh ka chhungte pawh nilo vanga ka mittui far vawikhat na a ni.
.
Ruah arawn tla ser ser a, Delhi khaw lum leh uap churh pawh in a ziaawm phah ka beisei. Ka fon ka la a, Nunpuia nen kan lenchhuah tuma kan thlalak chu ka han hmetchhuak a, Delhi khawpuiah hian lunglen theihtawpin ka lung a leng mek a ni.
*----------*------------*------------*
.
Ka nunphung pangngai ka hmang leh mek tawh a, Nunpuia nen pawh kan la inbe reng a. Whatsapp a kan thianho group ah chuan vawi tam awm min dil hnuah ka add ve ta hram a.amah hi uang reng ang chi ani lo na fiamthu hi a duh ve phian a,ka thiante nen pawh an inkawmngeih nghal phian a. Zankhat chu ka thinlung tina em em tu thu ka hre ta tlat, ka thiannu Asiami leh Nunpuia hi ka thiante ah chuan an inbe nasa a, keimah ang maiin an in close a ni. Lehkha ka zir a, presentation tur vel ka buaipui laiin ka whatsapp tone a rawn ri ta ral ral a, ka ngai pawimawh duh lawk lova. Vawithum vel a rik hnuah kahan en a, Asiami msg alo ni.
.
"Chhekeha hi ka haw lutuk" tih leh an in text na a screenshot chu min rawn thawn a.
"Mali hi chu ka ngaina lutuk alawm, bialnu nghet chu lo nei lo ni ila chuan a rem maithei asin. Mahse ka lo nei bawk si a, khawngaihin amah chu hrilh kher suh aw" tih chu ka han hmu a, ka mit deuh sulh in ka hria.
.
Ka zirlai pawh ka zir zawm thei lo, khumah chuan ka thu a, ka thiannu bula a thil sawi chu ka chhiar nawn a, ka chhiar nawn leh a, ka mit alo hnam tiam a, mittui a tla tih pawh ka lo hre lo. Heti khawp hian hepa hi ka lo duh ani maw? Mak ka in ti hial zawk. ka biak rei leh ka na rei ani mai, chuvang chuan ka be tawh tur ani lo. Ka contact list atang a number chu ka hmetchhuak a, delete na chu ka han hmet vang vang a, ka delete zo nghal a. Mahse ka thinlung atang hian engtikahnge ka delete ve theih ang?
.
Vawi tam tak min rawn biak a tum a, whatsapp ah ka block avangin sms hmangin min rawn be reng a, a call pawh ka dawng ngun khawp mai. Mahse biak loh chu ka tumruh bur a, ka chhang ngai lo. Zankhat erawh Vena fon atangin min rawn be fuh nawlh a, hn dah leh mai ka tum a mahse induhna tlem azawng ka lo la nei a,engahmah ngai lo anga lan chu ka duh a ni.
.
"Mali, engvanginnge ka call i chhan ngai loh, chuan ka msg zozai te kha.. whatsapp ah min block bawk a, min haw viau em ni?" A ti thlawt a.
.
"Nunpui, huat na chhan tur che ka nei hleinem. Ka zirlaiah in sawrbing ve deuh ka duh a, chuvang mai mai alawm" ka ti a, za lo fe hian a nui hak a,
.
"Chu ka lo tibuai viau thin che tihna alo ni maw?"
.
"Nichiah lo e. Chutiang chuan ngai duh suh, in lokal huna huntgawl neih loh ka hlau a, ka lo in hmakhua lawk ve alawm" ka han ti ve nghal zat a.
.
Lungdam zan lo chuan kan in mangtha a, ka thaw hawk a, kan inbiak chhung khan ka inthlahdul lo tih ka hre ve chiah. Anihna takah chuan ka theihnghilh mai mai hi ka ring lo a ni, zankhat chauh pawh an zai ngaithla lovin ka la muhil thei lo. Jaipur ah kan class kan kal a, tlemin ka hlim ve deuh tawh a hetih hun lai hian, kan haw dawn chuan youtube ah video thar ka en mai maia, Nunpuia te chuan hla thar pakhat hi an lo dah a, ka hmuh chuan chang dang ka kan thei lo. Ka download nghal a, kawng tluanin ka ngaithlaa, amah alo lan apiang in nidang ang bawkin pause button chu ka han hmet leh nawlh thin a, ka lo thlir leh veng veng thin.
.
Ka zirlai chu tha taka zir a, engemaw tak nih ve ka chak vawikhatna ani hial ang. Dik tak chuan hetianga min siamtu chu Nunpuia hi ani. A tan chuan engmah ka nilo ani maithei a, mahse min hriatchhuah ve hun anei anih ngai chuan mi pakhat ve tak lo nih chu ka duh a ni. Ka class bang chu nidang aiin assignment kan ngah lova, ka online khat deuh avangin ka han lut ve zuai a, Nunpuia wall check chu ka sim hlei thei lo. A propic alo thlak a, an voseo thar an shoot na mi anih ngei ka ring, comment vel chu ka chhiar pah a, Julie hming chu ka zawng deuh naa ka hmu miah lova. Chuvang ringawt pawh chuan han comment chu ka chak ta riau pek a,
.
"Chhekeh chu chhelo ve hle ani"
.
Ka comment zo hman tawk ang tihah min rawn chhang nghal a,
"min unblock tawh rawh"
.
Ka nui chhuak hak a, ni e a hun ve tawh alawm. Ka fon ka la a, ka unblock nghal a. Ka rilru kilkhatah erawh ka infuih sauh sauh a. Engtin pawhin min bia se amah ka beisei tur ani lo.
.
"Ngaihawm..ka lom e" a rawn thleng nghal zat a.
.
"Music video a i lan that vang mai mai a i lawmman anih hi"
.
"Engpoh chu lo nise ka lawm e "
.
"In video ah khan tinge i lanna hmun kha a va dang bik ve?" Engtinnge chung te chu chik taka ka lo en hman pawh ka hre bik lo.
.
"Thil hi chu i chik ve thei ngawt mai. Khami kha an shoot lai khan beat contest a awm a, ka tel a ngai sia, a hnuah keimah in ka bei leh alawm mawle" a ti a.
.
Thil ho mai mai kan sawi hnu chuan kan in mangtha a, ka data ka off a, ka lehkhabu phawrh in ka zirlai chu ka en nghal a. A hma ai chuan hma ka sawn ve ta deuh e, a chhan chu kan inbiak zawh hian hetiang taka tuiin lehkha ka la zir ngai lo. Hetihlai hian kan khua a kan thenawm deuh lawk ami Ruata te chu a pa damlohna avangin Delhi ah an rawn kal a, damdawiin ah te ka tlawh a, Ruata tak hi khuaah a awm tam lo a, lehkha zirin hmundangah a awm char char a. Ka chhuk hma deuh khan MBBS zir zovin a rawn haw a, a rawn haw tukah kei ka kal leh nghal a. Chutiang chuan in thenawm hnai viau e ti lovin kan innel hran lo. A nu leh pa leh a unaute nen erawh kan inpawh em em thung a. Heta an rawn kal pawh hi ka pa in min rawn hrilh a, kan ngei tura min tih avangin ka va zawng chhuak ve a ni. Ruata hi mi tawng tam lo tak alo ni a, kei lahin ka lo nel viau hran lo bawk nen, ka va tlawh pawh chuan kan in melh hrek hrek a, ka ngaihtuah let hian ka nuih a za thin. A fon no.chu ka dil a, phur hmel loh zet hian min pe a, dik tak chuan ka be chak bik lo. A pa chanchin zawh nan chauh asin ka dil, ka tau chhuak deuh nghawng nghawng a. Nithum vel chu ka be duh lo, mahse ka paten min rawn zawh fo avangina ni li naah chuan ka va be ta hram a, an chanchin te ka zawt a, tha takin min chhang ve mai a,ka rinai tak leh ka tum aiin min lo chhang tha ve a. Zanah te chuan whatsapp ah min rawn be ve hial a, a awihawm loh zawk.
.
Kartawp ani bawk a, class pawh ka bang hma a, Ruata pa pawh damdawiin atang an chhuak tawha, Mizoram house ah an awm a, thawhtan lama haw an tum tawh avangin va tlawh chu ka tum hram a, ka va thlen chuan Ruata chu alo nui var var a, min ti hamhaih lek lek zawk. Rin aiina pa pawh alo tha tawh a, damdawiin an awm laia a taksa thim deuh pawh alo nung ve ta sar a, ka lawmpui khawp mai. Ka haw dawn chuan Ruata chu a pa in min thlah turin a ti tlat a, a ngai lo ka tih pawh chuan an pafa chuan an tang a, ka hnial hneh lo. Hostel kan thleng tep tawh a, Ruata chu a ding a, ka ding ve a, muangchang hian ka kut a rawn la a, lehkha dun te tak te hi ka kutah chuan a hmehbel a,
.
"Zanah i en dawn nia" a ti a, a in her a, a kal nghal vut a.
.
"Ruat...." a hnungah ka va um a,
.
"Khami i en hma kha chu inbe lo ang, dik tak chuan ka zak ani" rawn hawilet miah lo hian a ti a.
.
Ka ding a,
.
"A tha alawm" keima hriat tawk lek chuan ka ti a, hostel lam ka pan nal nal a.
Ka room ka thlen chuan Ruata thil min pek chu ka han en a, memory card alo ni. Ka laptop ka on a, a chhungah chuan engthil nge awm tih chu hriat ka tum a ni. Thlalak hlir alo awm a, chupawh keima thlalak hlir lehnghal. High school ka kallai a ka sam tawi lai te, chhia hi ka in ti mai mai khawp a. Ka sport dress kim nen kan kawt a basketball ka khel lai vel te, higher ka kal lai Ruata nau Bzi nen kan thlalak dun te, a tam ber chu kan kawt a ka awmlai thlalak ani. Heng hi Ruata hian ka hriat loh ina lo la thin tihna em niang? A ngaihna hre lo zetin ka thu reng a, thil pakhat hriatchhuah ka nei. Higher kan kallai khan Bzi hian vawikhat chu U Mama hian a star che niang i thlalak a ngah lutuk a tih kha ka hrechhuak zawk a, mahse ka ring lo viau anih kha. A lo haw chhunah pawh kan inbe ngai lova, an ina ka kal lahin mi pawh a melh ka hre ngai lo.
.
Zana chaw kan eikham fel hnu chuan whatsapp ah Ruata msg alo awm a,
"Sawmpui, high school i kal lai atang tawh khan ka thinlungah hian hmun i lo luah daih tawh. Zaninah chauh ka sawi chhuak ngam hi nep ka in ti ve thin khawp mai. I laka nelawm lo taka ka awm thin pawh kha ka hmuh che hian awmngaihna ka hriat ngai loh vang zok ani. Tunah chuan soi chhuak turin huaisenna ka lo nei ve tawh ani ang, engtinnge min lo chhan ang tih chu ka hrelo a, mahse ka duh takzet che ani"
.
Ka chhiar chhung chuan ka thaw chiah em ka hre lo, Ruata mi ngawichawi leh zakzum,kan veng nu ho in makpa atana an awh rawn hian kei hi rei tak atang khan min lo duh tawh maw? Ka awih thei lo, mahse amah ngeiin a sawi tlat si. Kei hi ka duh em em in midang a nei a, ka tana ruat loh zawk hi ka lo buaipui viau ani thei angem? Nunpuia tih loh ah chuan Ruata aia han thlan tur chuang an awm lo ang. Engtia han chhan tur nge pawh ka hre lo, ka don chu ka dah a,khumah ka tlu zal mai mai a. Ka fon ri chuan min ti phu zawk a, Ruata bawk anih ka ring a, mahse Nunpuia zawk alo ni.
"Chhekeh, bialpa ka nei dawn..." teh tawp mai a, second thum vel chu lehlam atang thawm aawm lo.
"Hello"
"Aw...ka hria alawm. Ava nuam awm bik ve aw" a aw chu a danglam a ka hriat tlat chu,
"Ni e a nuam dawn khawp mai, i damloh pawhin a thlawnin kan lo enkawl char char ang che" ka nui har har a,
"Eheu... chu doctor ani maw kan makpa dawn? Ava ropui ve aw"
Engengemaw kan sawi zawm a, kan inbiak zawh hnu chuan khumah ka thu a, engvanga Nunpuia bulah khan khatia sawi vak nge maw ka nih le? Hlim awm tak a nui chunga khatia sawi lha ka tum sa reng pawh ani lo, mahse a thleng vek tawh si. Nunpuia aw ah khan midangah ka hriat tel ngai loh thikna aw a tel tlat in ka hria.
*-------*---------*----------*-----------*
.
Anihna takah chuan Ruata chu ka phu hauh lo tih ka hria,mahse thinlung hi duh duh a tih danglam theih ani silo. Midang thinlunga dah reng chunga ani kawp chu ka thei loa ni. A hnenah pawh thudik tak ka hrilh tawp a, hmangaih ka neih thu leh min hrethiam mai turin ka hrilh a. Chutichung chuan ka lo nghak tho ang che tih chu ka chhanna hmuh let a ni. Mahse keipawhinNunpuia lakah hian tun thleng hian beiseina nung ka la nei tlat a, a mak a ni. Engatinge kan duh tak te nena rem chuang silo hi min duh ve tu te duh let mai a harsat thin tiin ka ngaihtiah phah hial a!
.
December thla chanve dawn kan hmang ve ta reng mai, zankhat chu tlai tawh deuh hlekah call ka dawng a, ka han pickup chuan Vena a lo ni a. Kan hostel awmna vel chu min rawn zawt a, tha deuh in ka lo hrilh ve mai a. A tuk tlai ka class bang hostel ka thlen chuan ka roommate in visiting room ah inleng ka neih thu min lo hrilh a. Ka cousin te ni dawn se min rawn biak hmasak ka ring si. Ka inthlak zawh hnuah ka chhuk a, ka thil hmuh chuan min ti phu chiang hle. Nunpuia leh Vena chu an lo then tha a, ka mak ti hmel chu hmuhnawm an tih hmel zawk.
.
"Teh thut cheu chuan, min hrilh hmasak ve bawk tur cheu alawm" tih pahin ka kut ka phar chhuak a, kan in chibai a.
.
"Doctor nupui nih kan tum a chin hi induh riau kan awm an ti em ni?" Vena chuan min melh ralh chung chuan a han ti a.
.
"awihawm loh thei emai, engtik thleng nge in awm dawn a?" Ka ti a.
.
"Tunkar tawp hian kan haw leh ang, i rawn tel ve dawn lo mi kan programe rawn hman turah te chuan?" Vena bawk chuan a ti a, Nunpuia chu ala ngawi reng a, ka che vel chu uluk fe hian min lo en a,ka khawr deuh tut phah in ka hria.
.
"Tel ve dawn tehreng mai, ka lo nghakhlel tawh lutuk alawm" ka ti a,
.
"Kan haw hma in nikhat tal te chu min lenpui ve ang chu" Nunpuia a ni ve thung a.
.
"Kha te chu chiang sa alawm" nui chung in ka han ti a.
.
An haw tur chu ka thlah a, Vena chu kan hmaah a kal a, mi a thlah fal ve na a awmzia a awm tam lo khawp mai. Ngawi rengin kan in zui a, a khat tawkin min melh leh ralh thin. Nuam ka ti chiah lova,a hnenah khan bialpa ka neih tur thu te kha lo sawi zawt zawt lo ila a tha tur tiin ka han in hau leh rih a, engkim a ni zo vek tawh si.
.
"Mali..."
.
"Um..." a mitah pawh ka en ngam lo, a mita ka en chang apiang hian ka hmangaihna hi a thar leh thin.
.
"Ka ngai thin khawp mai che" hul hak in a nui a.
.
"Ka awih chiah lo" sawi tur ka hre ngang lo a ni.
.
"Min ngai ve miah lo anih hi tiraw?"
.
"Hehe.. a atthlak e, thil tul lo tak ka sawi a ni" ka chhan hma in amah vek chuan a ti a.
.
An kal liam thleng ka thlir a, midang zawng zawng zingah hian kei chauh hi a thlan han ni ila ka la ti zui vawng vawng a. Khati khawpa chianga ka thiannu bula a sawi chung pawha amah ka la beisei fo hi ka duhdan a ni bik lo. Mahse, sawi tawh ang khan ka duh a ka theihnghilh theih ni miau hek lo le.
.
Delhi an cham chhung chuan kan in zui ve dat dat reng a, zan lamah an programme ah ka tel ve ziah bawk a. Hostel a min rawn hmuh ni atang khan Nunpuia hi ka laka a awmdan a dang daih a, nau en in min en niin ka hre ber. Mi zingah min duat a, mahse tupawhin min hmu sela inngaizawngte inkara in duatna ang hi ani lo tih an man thiam ka ring. Ni thum an cham hnuah ni li naah an haw leh ta a, a hma ai nasa in ka thinlungah a cham leh dawn a ni ngei ang.
.
Krismas hmang turin ka haw a, Lengpuiah Nunpuia chuan min lo hmuah a tum a, mahse hmuh ka chak em em rualin pumpelh theih ka duh a, ka thlen pawh ka hrilh duhlova, ngawi rengin kan kjaw lam panin ka haw tlang nghal daih a. Hemi tum hian karkhat zet a thin a rim a, min be duh lo. Ka tan chuan a farnu ang chauh a en nih kha a na ani tih a hrethiam pha lo. Ruata ve thung chu kan in lamah atam em em a, ka unaute lah in ani tluka duh tur an awm lo tiin min lo tur ve chhen a, mahse ka la inpeih lo hrim hrim. Min nghah dawn chuan min nghah chhuah hun pawh anei ve mahna! Krismas ruai theh ni chuan Ruata leh ka cousin Mapuii nen kan in zui a, kan phur thut chuan thla kan la kual vel chiam a, zanah kan thlalak pakhat Ruata nen kan lakna chu fb ah rawn upload a, min lo tag tih pawh ka lo hre lawk lova, zanrei hnuah ka online in ka hnu chauh a. Comment vel chu alo tam angreng a, innei tawh mai ru tihte, inhmeh min tihna vel chu alo ni tlangpui a, Ruata'n a comment let apiang chu like tu an awm tih ka hmu a, ka han en chuan Nunpuia alo ni. Ruata comment zawng zawng alo like kim vek a, lawm tur ani em tih pawh ka hrethiamlo.
.
"I lakah hian ka tlawm ta e, ka tibuai tawh lovang che"
.
Ka zing thawh chuan chu msg chu Nunpuia hnen atang ka dawng a, ka call nghal a, mahse a pickup duh lo. Chutiang teh ngawt lo deuh chuan min hrilhfiah ve tur ania, heti ngawt chuan a tawp thei lovang.
.
*-------------------------*------------------------------*---------------------------------*
Krismas leh kumthar vuakvet a zova, Lalnunpuia chu biak theih in a awm duh lo. Keipawhin biak luih talh chu ka tum lova, dik tak chuan a duh hun hunah hetianga min ti reng tur ani bik lo. Ruata nen chuan thian tha tak angina kan la in zui a, ka laka a rilru chu a la pangngai tih a sawi lang fo a, ka inpeih hun min nghah a in huam thu nen, mahse ka rilru atanga Nunpuia ka paih chhuah theih hunah chauh midang chu ka nei ang.
.
Aizawl ah awm hahdam ka duh avangin ka chhuk vat a, Ruata pawh ka chhuk hnu rei vaklo ah order a hmu a, Aizawl ah a thawk dawn ani. Chanchin min rawn hrilh ve reng a, anihna takah chuan kei ve tehlul hetia min duh ve hi ka tan chuan a lawmawm lutuk a, ka inthlahrung zawk. A nu leh pa lah hian mi hi an duh der ve viau a, ka nu bulah phei chuan an monu hual ka nih thu te a lo sawi zauh lehnghal a, ka chhungte pawhin kan inkarah engemaw a awm niin an lo ngai nghet ve hmiah bawk a.
.
Bazar lamah mamawh lamin ka chhuak a, ka haw pah chuan Vena tlawh turin MC lam ka pan a, ka inhmuh chuan kan hlim dun ve hle a.
.
“Nunpuia nen in inbe ngai em?” a ti a, kan inbiak ngai loh thu ka sawi chuan a chal chu a ti chuar deuh nang a,
.
“Hei chen hi kan inkawm tawh a, tunhnai atanga a mizia ang hi ka la hmu ngai lo. Rilru hahna a nei aniang ti ila min hrilh loh a nei ngai vak silo a” a ti a.
.
“Aw….julie nen an boruak a tha lo aniang chu” nui chungin ka ti a,a nui ve mai a.
.
Rei vak lo ka thut hnu chuan haw ka tum a, ka ding deuh uaih tih ah a chanchin kan sawi mek Nunpuia leh Julie chu an rawn lut vehlawl a, an pahnih a hmuh chu ka inbeisei hauh lo.
.
“I dam maw?” min melh zawk a, a hawisawn lehnghal a,
.
“Um..ka dam e” ka bag ka la a,
.
“Ven, ka kal nghal mai ang, ka hmanhmawh deuh bawk sia” ka ti a, Vena chu min thlah turin a rawn ding ve nghal a.
.
“Tih huk lampang kan tum hnai ania, sawi pui tur chein kan lo kal a” Julie chuan a ti lang lang a, ka hriat lh hlau ni awm fahran in a nui zui hak hak a.
.
“Dik tak chuan Julie hi chu ka phur pui thlawt lo ani” Vena chuan zawi sap hian a ti a,
.
“Nangmah emaw ka tia ka lo phur ve hman viau asin le” a han tih zawm nghal a,
.
“Julie te chu keini tluk phak ni ve hek lo” fiamthu titak deuh hian ka lo ti a. kan nui dun hak hak a.
.
In ka thlen chuan ka zawi vek, tinge hepa huhang hi a nat em em le? Zanah chuan Ruata a rawn leng phei a, Delhi lama ka chhuk hma in nihnih chiah ka nei tawh a, tun tum ang renga chhukthlak peih loh hi ka neih ngai pawh ka hre lo. Chumi zan chuan Ruata chu ka chhang ta nge nge a, Nunpuia theihnghilh theih nana hman hi ka duh hauh lo a, mahse hetia ka awm avang hian ka theihnghilh phah dawn chuang in ka hre lo ani. Nula te kan ni ve a, min lo duh der tut e an awm ve thin a, thinlung takin a tutemah hi ka la ngaihven zui ngai lo. Hei vang pawh hi anih ka ring, ka duh tak vawikhat ka tawn hi ka thinlunga a tlak nat em em!
.
Kan tih nek nek chhungin hun alo liam ve zel a, Ruata pawh kan inbe tam a, ka ngaina ve takzet tawh. Nunpuia hriatchhuah chang chu la nei mah ila Ruata hian min ngaihsak in min duat a, ka tan chuan a hlu takmeuh a ni.
.
Paper presentation tur ka buaipui zo a, fb ah ka lut khat a, ka han lut kual mai mai a, ka sim hleih theih loh Nunpuia wall ah ka lut a, a lut vak ngai lo aniang thil thar hmuh ka nei lo. Mahse thlalak hlui deuh Julie rawn tag chu ka en a, Julie profile chu ka en chak ta tlat a. ka luh chuan ka rin loh deuh thil ka hmu a, ka thin te chu a phu zeih zeih in ka hria. Julie chu midang nen relationship an lo dah a, mak ka ti lutuk chu ka mit ka nuai a, ka ennawn leh a, mahse ka hmu sual lo. Inthiam lo ru deuh chuan Vena ka biaa, Julie leh Nunpuia chungchang ka zawt a, an inthen tawh thu a sawi a, a chhan erawh a hre bik lo ani awm e.
.
Ka muhil thei lo chu ka inlet leh thak thin a, whatsapp tone a rawn ri a, chutiang hunah chuan Ruata bak an nih ka ring lova, ka han en chuan Nunpuia a lo ni, ka mu lai chu ka thu chhuak hlawl a, thla nga dawn kan inbe tawh lova, a msg hmuh chu ka inbeisei lo ani.
.
“Ruah a sur a, thli lah chu a tleh duh phian bok si a, ka hrechhuak che a, I omna hmunah heng hi I tuar ve angem? Tiin….. zanin hian tu tah pawh ni la hei hi ka soi duh, ka ngai takzet che”
.
Ka mittui chu a tla ve tawp,
.
“Lalnunpui…chhekehpa.. ka rilru hi tinge heti taka I sawisak retheih le?” tiin ka phun sap a.
.
Khuanu ruat loh di an tih thin hi ka lo hrethiam ngai lova, mahse ka thil tawn mek hi chutiang chu anih ka ring. Ruata chu Aizawlah kum chanve pawh a awm tlin hma in Lawngtlai lamah an sawn thut a, a huphurh hle a, ban te a duh rum rum a, mahse lo ti hram hram turin a chhungten lo fuih rawh an ti a, thiam dan ang ang chuan ka han fuih ve a, ka zirlai chu bansan a, inneih mai te a rawt a. Mahse doctor nupui graduate tal nih loh chu ka duh lo tiin ka lo hnial thung a. Amah hi ka ring tawk bawk a, rinhlelh tur in a awm ngai hek lo.
.
Hun chu a kal ngai in a kal ve zel a, mihring nunah hian zirtur ka ngah bik viau nge ka hre lo, kumkhat chuang zet Ruata nen kan inzui ve hnu leh keipawh ka gruaduate ve hnu chuan ka chungah mak taka lo thleng leh a. Hetihlai hian Ruata te hian palai rawn tirh an tum a, tawngka chuan kan chhungte chu an inbe tan mek a, Ruata pawh ral atang a rawn phur ve hle a. A ruk tak chuan kan chhungkua pawh kan inbuatsaih ve nasa tan viau a ni. Chutiang vela boruak a in mun chhoh mek lai chuan zankhat chu thu thin thawng deuh ka dawng a, Ruata'n nupui a ru tih thu chu! Phone tum in vawi tam tak ka bei a, ka call tlang thei lo. Ka chhungte bula sawi dawnin thu chiang ka la hre silo, khatiang tluka rilru vakvaia ka awm kha ka la hre ngai lo. Nikhat a liam a, nihnih a liam pawhin ka la be tlang thei lo. A ni thumna zanah call ka dawng a, Ruata a ni, khur ru dar dar in ka lo pickup a,
.
"Sawmpui, i ngaihdam tlak pawh ka ni lo, naktukah ka lo haw dawn, engkim ka hrilh ang che" a ti a,
.
"Ruat, mi thusawi hi a dik em? A dik lo tiraw?" Beidawng zet in ka ti a,
.
"Ka lo haw ang, Sawmpui, engkim ka siam tha vek ang"
.
Phone ka dah a, ka melh ngai ka melh char char .
*_____*_______*
.
“Sawmpui, min hriatchian em kha, naupanlai atang ruihtheihthil vawikhatmah ka la ti ngai lo. Hmanzan khan ka in luahna te fanu Kimi leh a thiante an rawn leng a, buhfai zu ang hi an lo keng a, in ve chhin turin min ti a, a taste kha ka hre chak ve deuh nen ka lo in ve mai a, a ruih theih loh an tih vangin ka no hnih vel chu ka lem a, mahse khami ka in hnu rei vak lo kha chu ka la hria, mahse engmah ka hriat chhunzawm tawh lo. Zinga ka harh chuan ka bulah chuan Kimi chu alo mu ve reng a, zan lamah engthil nge thleng tih kha ka ngaihtuah ngial pawh hian ka hrechhuak zo lo. Ka thil in turah khan telh an nei anih loh chuan khatiang hmak khan mihring hi a awm theih loh. Haw turin ka ti a, mahse haw chu a tum lo bur a, a hma atang min ngaizawng tih ka lo hre tawh bawk anen, min awhtir a tum ani tih chu ka hrethiam nghal a. Sawmpui, sawi ngaihna pawh ka hre lo, hetiang zawnga thil a in her hi ka ring lo ani. Khawngaih takin min ngaidam rawh, nang lo chu hmangaih ka nei lo asin” mittui tling pam in Ruata chuan a ti a, ka thinlung hi a kehsawm vek.
.
“Ruat, ka tan a zahthlakzia hi I hria em? “
.
“Nang lo chu nupuia neih ka tum lo, Sawmpui, min ngaidam the ihram lo em ni?” ka banah a vuan a.
.
“Ruat, awmzia a awm tawh lo, Kimi chu i neih a ngai, I inven zawh loh avang a thil thleng ah hian ani chiah dem tur ani lo. Nangmah pawh I tel ve tlat si a, nupa nun hial in hmang tawh a, a nih tur ang chu ani vek tawh. Ka chhungte pawh ka lo hrilhfiah mai ang” ka ti a.
.
Ka inngaihtuah nasa ve em em a, ka chhungte pawhin ka thutlukna chu min zahsak a, ngun taka inngaihtuah turin min ti a, kan veng chhungah leh pawnah pawh a tam zawk chuan innei ngei turah min ngai a, kan thu leh hla lo hria pawh an awm nual a, ka zak lutuk hi pawn chhuah loh mai te ka duh rum rum thin. Ruata nu leh a naute chuan ngaidam hram turin min ngen reng a, a pa erawh chuan mi fanu te mualphopui tawh midang neihsan chu a remti lo thung. An chhungkua pawh in hau ngai lo leh inhnial ngai lo chu an inhnial ve ta bat bat fova, a pa tih loh zawngin keimah nen innei tlang turin an duh a, pa ber erawh chuan a ngaihdan sawhsawn a tum lo. Keipawh ka tan zahthlakin na hle mahse Ruata pa ngaihdan chu ka tawmpui khawp mai. Ka chhungte bulah pawh ka ngaihdan chu tlang takin ka hrilh a, an chhungkua nena inzawmna neih kan tum chu kan kaltlangpui dawn ta lo.
.
Khuaa awm reng pawh nuam ka ti lova, a hman apiangin kan chanchin min zawt a, ka tan chhan a nawm lohdan an ngaihtuah phak lo. Aizawl lamah ka awm bo a, ka hun tawn mek chu ka tlanchhiatsan a ni ber. Vanduai ka in ti a, engtak hi nge ka tana ruat tih ka hrethiam pha lo. Inah ka tawm deuh ngawt ngawt a, ka ni chuan chhuak harh turin min ti fova, ka peih ngang lo ani. Ruata chuan min rawn biak a tum reng a, Aizawlah min rawn kal chilh hial a, mahse ka be chak lo. Zankhat chu ka ni nen chauh kan awm a, Ruata chu a rawn lang hlawl a, han in hnar haw ngawt thu a awm bik silo, ngawi rengin tv chu kan en reng a, ka ni chuan thingpui ka va lumsak ang cheu tiin choka lam a pan a. Ka bulah chuan a rawn in sawn phei a,
.
.“Ka lak atang hian I tlanbo hlen theih hi I ring em ni? Mawh…”
.
Min thing nawk nawk a, ka mittui tla tur chu ka khap let sak a, a mitah tak ka melh a,
.
“I lak atang hian ka tlanbo reng reng lo. Nang leh kei hi inkawp tur kan ni lo, chuvang zawk ani” ka ti a, mak tih hmel zetin min melh reng a, zawi muangin min vawnna chu a la thla riai riai a,
.
“Sawmpui, min ngaidam thei thlawt lo em ni?” a ti leh a, a landan chu khawngaih thla ala ngawih ngawih,
.
“Ruat, I pa ngaihdan kha a dik chiah alawm” ka ti a.
.
“Ka pa thusawi vang chauh khan em ni hetia I awm? Hlim takin ka siam ang che, chu chu ka tiam a che” a ti a. Ka banah chuan a chelh tlat a,
.
“Thinlunga ser awm reng chung chuan kan hlim tak tak hi ka ring lo ani. Tunah te chuan pawm harsa I ti maithei a, mahse in han innei anga, nupa te chu a inhmangaih chhoh theih zel alawm” ka ti a.
.
“I ni lo, a hmaa ka hriat thin kha I lo ni tawh lo takzet anih hi” a lu chu a thing nak nak a, a kal nghal a.
.
Ka thlir zui reng a, ka mittui chu dan rual loh in a tla zung zung a, ka chunga thil thleng zozai hi ka hrethiam lo a ni.
.
Zanah chuan ka muhil thei lo chu ka in let ka in let a, ka inchhirna tur kawng ka zawh ni mai te hian ka hria. Mite pawhin an dai pelh fova, sawn hial an thlak chung pawhin ngaihdam an ni thin tih te ka rilru ah alo lang a, ka rilru hi thlak thutin ka ngaidam mai dawn em ni tih thlengin ka ngaihtuah a, ka nu biak phawt tha ka tih avangin ka ngaihtuah zawm duh lova, ka tal ka tal a, zing lamah chuan ka lo muhil ve siai siai a.
.
Ka nu nen ngun takin kan sawi dun a, uluk takin thil thleng thei kan ngaihtuah lawk bawk a, Ruata chu vawikhat tal sawi pui leh turin min ti a, keipawhin rem ka ti a, he mi ni hian Ruata nen engkim kan sawi dun a, mahse tun maia thil tihfel chi anih loh avangin nghah rih chu kan tum a ni. A theih anga ranga transfer turin a nu pawhin hma ala nghal char char a, thil an lo ti thei viau anih ka ring, Aizawl lama awm turin an sawi fel mai . Heng buaina zawng zawng kan tawh hma khan lo ti daih se a tha tur, hetia buaina tlanchhiatsan a tum hi chung lam hian a rem ti lo nge kan chungah a ai zahthlak zawk a lo thleng leh ta tho a!
.
Ka mutui lai chu ka nu min rawn biak tumin min tiharh a,
.
“Bawihi nizanah thil duhawm vak lo a thleng a, Ruata kha a hmeichhe nu khan a rawn luhkhung a” a tih chuan ka harh chiang kher mai. Thil awmzia chiang zawk ala hre bik lova, Ruata nu mangang chuan ka nu alo kaitho ani awm e. Engkim a tawp vek, sawi zawm awm leh thei tawh lo turin a tawp ta anih chu ka rilru in ka ti a, na ti lo turin ka infuih sauh sauh a.
.
Hetih lai hian rilru mumal ka pu thei lo, ka a deuh chhaw ani ber. Engmah ka hre rei thei lova, ka thil tih tawh pawh ka lo mangnghilh leh thin. Mahse ka chhungte zawng zawng in min hrethiam em em a, ka awmdan ang ang in min en liam a, in hnem vak chi pawh ani lo. Ngawi rengin min thlir tawp a, mahse tute pawhin min ngaihsak vek thung. Ina tawm reng ai chuan tiin ka ni fanu Rini, Lunglei a hnathawka awm rawn chawl chuan min len chhuahpui a, ka chhuah lohna a rei bawk a, ka harh ve sawng sawngin ka hria. Kal chhuah takah chuan Vena tlawh ka tum rilru a, Rini bula ka sawi chuan an lo inhre nasa mai hi alo ni a, kan thlen chuan a bungrua hnawk tak chu a lo chingfel mek a. A tum lo deuha chutia min hmu chu a meng bial kawk a, min lo kuah deuh nawk nawk a,
.
"Lalrini nen daih in rawn in zui lut chu ava mak ve" a ti hluai a, ka cousin a nih thu ka sawi chuan mak a yi lehzual.
.
"Sawmpui, mo thuam vel in rawn buaipui dawn em ni a?" a ti a.
.
Rini nen chuan kan in melh zauh a, ka nuih chu a za hran lo viau,
.
"Mo thuam chungchang chu kan va hre lo ve" Rini chuan alo ti khauh a.
.
"Haha... In ho emai a.. min rawn sawm ve dawn amaw ka ti zawk asin. Tu emaw pawh Delhi lamah a liamthlak phah thak ania" Vena chuan a ti leh a, a thusawi chu kan man lo tih kan mitmeng ah a hria ani ang,
.
"Nunpuia chungchang ania ka sawi" amah vek chuan a ti a.
.
Ka bo lehzual, engvang ngawtin nge Delhi ah chuan Nunpuia chu a kal ang? Kum khat zet kan inhmu tawh lovin kan inbe tawh lova, engtinnge a hun hman zel pawh ka hre tawh lo khaani a,mahse a hming lamrik apiang hian keimaha danglam awm thin hi a va hai theih loh thin si em!!
.
*-------*-------*------*------*
.
Ka muhil thei lo chu veranda ah ka chhuak a, Aizawl khawpui eng tuar chu ka thlir a, chhun lama Vena thusawi chu ka ngaihtuah let nauh nauh a.
.
"Nangni pahnih hi ka hrethiam lo cheu, in hmangaih ru reng si in nangmahni ngei pawhin chu chu in hrethiam lo anih hi. Vawi tam tak puih cheu ka tum a, mahse ka hlawhchham zwl a,nangmahni ngei in inbiak a,in sawifel a ngai in ka hria" a ti charh charh a.
.
"Chutiang tur chuan mitmei vawikhat pawh min hmuh lo, bakah i hresual anih chu. Nunpuia ngei hian asin ka thiannu bulah bialnu nghet anei a, kei nen hian a remlo tih thu sawi tu chu" ka ti a.
.
"Aih, ka thianpa hi ka hrechiang lutuk tlat, bialnu chu lo nei pawh nise chutiang ththu chu a sawi ngai lovang" a ti a.
.
"Enteh Ven, ama number atang ngeiin asin ka thiannu chuan a dawn"
.
"Inrawlh an awm anih chu"
.
Kan ngawi ta thap a, thudik tak chu Nunpuia chauh in a hria. vena chuan keimah ngeiin biaa thil awmzia hrechiang turin min ti a. Mahse a awlsam lo khawp ang, keiman be hmasa tur phei chuan ka thei kher angem ka hre lo. Ngawi rengin min kalsan a, kan inthianna pawh a pawtchat vek a, va pawh leh hmasak chu ka ngam dawn em ni?
.
Thil fim thaw heuh heuh chuan ka sam a rawn chhem leng siau siau a, ka hun tawn mak tak tak te chu ka ngaihtuah kir a, mal ngawih ngawih a inhriat na chuan ka thinlung chu a rawn deng dawt dawt a, ka thinlung hian mamawh anei a, chu chu haider tumin kum khat chuang ka lo bei tawh ani tih chu hai rual lovin ka rilru ah a rawn lang a. Ni e, chu chu a dik a,ka pawm loh avanga thudik lo chang thei ngawt pawh a ni lo. ka thinlung hmun ruak hi mipakhat Lalnunpuia tih chauh hian a hnawhkhat thei a ni.
.
Vena dawra kan len atang karhnihna chiah a ni a, ka ni pasal lungphunna tur vel buaipuiin kan chhungkhat hnai te pawh an rawn leng a. Ka ni hi pasal sun tawh niin a pasal hian kum 5 kal ta khan a lo thihsan tawh ani. Pawn lama ka awm lai chuan kan kawtah motor a rawn ding dat a, ka hawichhuah chuan Vena leh Nunpuia an lo ni a, ka lung chu a phu leh ta dup dup mai.
.
"I lo dam thin em?" A kut a rawn phar chhuak a,
.
"Um, ka dam thin alawm" lo chibai let pah chuan ka ti a.
.
"Sawmpui, chhuahpui lawk che kan duh a, i hman em?" Vena chuan a ti a.
.
Kan buaina vel ka sawi chuan inchhungah a lut nghal a, rei vaklo hnuah a rawn chhuak leh a,
.
"I ni bulah ka dil a, a phal e" nui deuh chung chuan a ti a.
.
Khawi lam nge kan pan tih pawh ka hre chiah lo, kan tlan zel hnu chuan Vena te veng kan pan tih ka hria. An in kan thlen chuan a lo reh thap a,
.
"Ka chhungte an zin vek a, zanin hian in pahnih chungchang hi engkim sawi fel vek nisw ka ti a ruahmanna ka lo siam ve tawp ani. Tihian ka room ah lo awm ula, inpawh deuh in engkim sawi ang che u. T.v ka en dawn a, thawm dim vak angai lo duh leh vin tak pawhin inbia ula, in thawm chu ka hre dawn lo ania" Vena chuan a han ti a,
.
"Sawmpui i lungawi rak thleng in khapa kha ankhum ang che" tih leh chhuah a rual a.
.
Ngawi rengin kan thu a, ka lai deuh hu a, Nunpuia pawh nidang ang ngawt chu a ni bik lo. Kan aw kan thian leh kharh kharh thin a, mipa zawk chuan hma ala hmasa ta nge ngea.
.
"Mali, min lo hmangaih ve thin reng em ni?" A khi deuh sung a,
.
"I hriat reng kha" ka ti lawi rut a,
.
"I sawi ngai silo a"Engvang in nge ka sawi ngawt anga?"
.
"i sawi loh te chuan engtinnge ka hriat ang?"
.
"Ka thiannu bulah chiang takin bialnu i neih thu leh kei nen chuan kan inkawp theih loh thu i sawi miau alawm" ka aw ri chu a dik ta thlap mai.
.
"Engatinge chu chu ka hriat miah loh le? Vena pawh khan min hrilh a,a mak a ni" hla tak chu a melh vang vang a.
.
"Ka sawi tawp mai ang, dik tak chuan ka hmuh hmasak ber atang che khan ka rilru i tibuai vek. Julie nen kha chuan kan inkawp thin ngei a, mahse in khuaa kan rawn kal hma khan kan inthen ani. Min la duh tih chu ka hriaa, mahse keimah lamah chuan a thi hmak thung. Tichuan kan rawn kal a,kan in tawng ta a. Ka ta i nih hi ka thinlung hian a ring nghal hmak a. Kan inhmuh leh pawh lhan i awmdan kha ka hai bik lo, ka lo confi ve viau nghe nghe anih kha. Mahse ka ta ni tura ka lo ngaih lai che khan bialpa i neih dawn thu min rawn hrilh a, ka thinlung natzia kha ka sawichhuak thiam lovang" a kut chu a han hum ruh a, a thusawi ah chuan a cheng hle a ni.
.
"Nang berin beisei tur i awm lo tih i sawi miau sia, ka nat loh bik kha i ring em ni? Chu mai bakah khatih lai khan ka thinlung hian a nghak tlat chea, awlsam tak khan ka nei nghal bik lo asin" ka ti a.
.
"Pasal i nei dawn tih ka hriat khan awmngaihna ka hre lo, inneih hun tur nia an sawi ah khan Mizoram ah pawh ka awm ngam lo. Kan sulhnu fang turin Delhi lam ka pan hial a, heti tak hian ka lo hmangaih che tih ka lo hre ngai lo."
.
"Min hmangaih maw?" Ka ti hu a,
.
"Chhekeh nu, ka hmangaih che, ka hmangaih lutuk vang che anih hi hrehawm ka tuar" ka mitah tak min melh a,
.
"A tirte atang khan a mak ka ti, nang hi ka tana Pathian ruat ah ka ngai hmiah che a. Mahse kan ni lo anih hi tiin ka ngaihtuah leh a, mahse kan lo ni ngei anih ka ring ta. Pasal nei hial tawh tur kha ka tana ruat i nih vangin heng hi kan tuar phah a nih hi" a ti a.
.
A mak a ni, kha leh chen kha inhmangaih ru tak chungin in kawp thei silo in kan lo awm tawh a,enge zir chhuah tur kan neih reng reng le?
.
"Mali thil ka hre tawh asin" phone atang chuan arawn ti lauh lauh a, enge tih ka zawh chuan,
.
"Julie nen nizanah kan inbiaa, msg thawntu kha amah a nih thu a sawi a. Ngaihdam min lo dilsak rawh a rawn ti asin" a aw chu a zang vah a, hlimna in a khat tih a hriat hliah hliah.
.
Lungngaihna karah hlimna ni engmawi tak kan tawng ve dawn ta niina lang a, keipawh hmuh theih in ka hmel te chu a thar sar sar a, zir chhuah tur enge kan neih tia zawhna ka neih pawh kha tunah chuan ka hre ta- kawng bumboh tawh chang te nei mah ila Pathian hian chutiang tuar reng turin min lo ti bik reng reng lova, kan tana kawng tha zawk a buatsaih hi a lo ni.
.
"Krismas hla music video kan shoot dawn a, lokal ve la" Nunpuia msg chu chhiar in ka nui ver ver a, a chang hi chuan thil awm ang lo tak tak hi a sawi ve fo thin.
.
"Nakinah uluk tawkin ka la en zawk dawn nia" ka ti a.
.
Ka sawi zawh rual deuh thaw in kawtah motor a rawn ding dat a, doorbell a rik atangin rin ka nei nghal,ka ring sual lo hle bawk,
.
"In siam rawh, ka nghak dawn che"leh tawp zel a.
.
"A zahthlak, ka duhlo" chutiang hmunah kher chuan ka duh lo takzet ani.
.
"Zanin chuan couple a kal vek tur alawm, nupui nei ho pawh an nupui te hruai tir ania" min nawr leh et et a, kan in zui chhuak leh ta nge nge a.
.
Ka hlimna bo hnu kha tunah chuan an lo let leh ta, kan hmangaih takten min hmangaih let tluka hlu hi a awm thei dawn em ni? Kan innei kher angem tih ka sawi thei lova, mahse Khuanu hian kan tan rem min ruatsak em anga, nupa hlim tak niin kan khawvel ni hi kan chhiar dun ang tih ka beisei tlat a ni.
*--------*-------***
Comments
Post a Comment