GIVE INTO ME Part X-XIII

GIVE INTO ME

Mami Lalhmangaihzuali Chawngthu

PART X

Mizoram thlen nan minute tlemte a la awm a, ka thin chu a phu dep dep a, ka kaisan theihna chance tha ber kalsanin kumkhua atana ka mangtha tawh Mizoram chu ka pan leh ta, eng hi nge maw ka beisei ber tih pawh hi ka hrethiam tawh lo. Thla khat chawlh ka neih chhung hian ka thil duh hi hmuh ka duh vek a, chumi hnuah chuan lungkham nei loin ka hnaah chiah ka insawrbing thei tawh ang.

Rinzuala office bulah chuan darkar chanve dawn ka thu tawh a, secretary thar a lo neih tawh avangin tu nge ka nih min hre lem lo. Meeting a neih avangin a hmuh lawk theih dawn loh tih chiang takin min hrilh na a, chuti maia beidawnga haw chu ka tum lo. Chawhnu dar khat a rik chuan an rawn chhuak thei ta hram a, chutia a rin loh taka min hmuh avang chuan a ke pen lai chu a tawp deuh chawt a, nidanga a tih thin angin engmah sawi lo in min kal pel a, a rawn let leh vat dawn tih ka hriat avangin a office ah chuan ka lut nghal a. A secretary chuan min dang nasa viau tak na a, Rinzuala tan eng emaw taka pawimawhna ka neih a ring leh ta a ni ang, min luh tir ta nge nge a. A dawhkan dah dante chu a lo thlak kual a, engkim chu a lo danglam vek tawh ni mai hian ka hria. Kawngkhar a ri khap a, pawn lam chu ka la thlir ta reng a.

“Ka beisei aia hmaah…”

“Ni lo, I beisei ang chiah zawkin” ka lo tawng khalh a, a nui hak a.

“Office ah chuan hna chungchang anih loh chuan tumah ka hmu ngai lo tih hre tur khawp chu I ni ve in ka hria”a ti nghat a.

“Ka ngaiawimawh lem lo”ka inher a, amah hmachhawn zawng chuan ka ding a.

A mitmeng tawrh har zet chuan min melh a, a meng zim san a, eng tak nge a ngaihtuah ang tih ka chhut thiam mai lo. A kuangkuah a, uluk theihtawp hian min en a, min hmu tlang vek ni mai hian ka hria, ka chil ka lem khalh a.

“Rinzual, khawiah nge ka nu chu a awm? Ka hre duh tak zet a ni”

“Sawi tan dan tur ka hre lo, hria ni ila a tirah khan ka hrilh tawh tur che a nia”chair ah chuan a thu a, a ke chu a thluang duai a. A chal chu a ti chuar nang a, a maimitchhing tlat a, a hmel awm dan chuan min tihrilhhai lek lek a ni.

“I tan sawi harsatna tur eng nge awm? I nu a ni lo a, ka nu chanchin anih hi kan sawi”ka ti a, ka thin chu a rim hlur tawh.

Muangchangin  a rawn meng a, min rawn melh chuan ka lo melh ve reng a.

“Ka nu nena vakvaia min siam tu leh fahrah dinhmuna min dintirtu chu I nu anih vang a ni”

A hmela natna lo lang chhuak chu en ngam lo in ka kun a, ka pa in ka nu chanchin min hrilh dan kha a lo dik tihna a ni maw? Ka inrin hman hmain ka mittui chu a rawn luang zung zung a, a ni thei lo. Ka ni khan ka nu kha a tan tlat thin a, chuvang chuan ka nu hian thil sual a tih tak tak ka ring ngai lo. Ka pa ka hlauh em vangin ka rindan erawh ka sawichhuak ngam ngai lo. Mahse, tunah ka nu chuan thil a tisual ngei a, ka pa nen min phatsan tih kha thudik a ni tih ka hre ta si a, chu ai maha na zawk chu ka hmangaih awmchhun Rinzuala thinlunga ser siamtu a ni chu a ni. Ka thutna atangin ka ding hluaia, ka zahna tur hmun ka pan a lo ni reng si. Ka mittui chu ka han hru tawk a, Rinzuala chuan min en duh tawh lo, tukverh lam chu a hawi tlat a, kei hi an chhungkaw tidarhtu fanu ka ni si a, ka va tenawm dawn em! KAwngkhar chu a rawn inhawng a, hmeichhe pakhat chu a rawn lut zan zan a, a hmel chu a tha kher mai. A pian leh a incheina engkim chu a inhmeh hliah hliah a, Mizo hmeichhia ti taka nalh hi ka la hmu tam lo khawp mai.

“Dear, kan chhuah dawn kha, meeting I zo tawh bawk si a, ka nghak rei tawh lutuk che a ka rawn kal tawp anih hi”a rawn ti zung zung a, min hmuh chuan mak tih hmel tak hian min en deuh ha a.

“Ka kal phawt mai ang”tih pahin ka bag chu ka la a, rang takin ka kal chhuak ta nghal a.

Taxi a ka chuanlai te chuan ka mittui chu a tla zung zung a, ka neih zawng zawng ka chan vek tawh, tumah ka nei tawh lo, vanduai tur reng hian ka lo piang em ni? Driver hnenah chuan thlanmual lam pan turin ka hrilh a, ka hmel bui deuh lak avang chuan glass atang chuan min rawn melh leh zeuh thin a. Ni chu a sa hle a, thlanmual ka thlen erawh chuan thlifim a lo thaw deuh her her a, ka pa thlana ka thingphun chu a lo nung tha viau tih ka hriat chuan ka lawm hle a. Ka awm loh chhung ngaihtuahin hnim pawh a lo to leh tawh viau ka ring a, mahse, hnim pakhat mah hmuh tur a awm lo.

“Pa, la dam ni la chuan hetiang em em hian I fanu hi ka khua a har lo tur, ka van ngai tak che em”tiin thlan chu ka bawh a, ka tap chhuak ta hawm hawm a.

Engtia rei nge chutia ka awm ka hre lo, haw tumin kawngpui lam chu ka pan a, motor rawn tlan remchang ka hmuh mai loh avangin kein ka kal a, ka lungngaihna min hriatpui tu leh min hnemtu ka mamawh tak zet a ni.

Ka mu chu ka muhil lo chiang kher mai, Rinzuala chu ka mitthlaah a cham reng a, chhuna nula kha a ngaihzawng thar a ni ngei awm si a, an inhmeh ka tih rualin ka thik a, ka thinlung hi a na ngawih ngawih a ni. Chutianga ti thei ka ni lo tih ka inhriat rualin zahna hian min rawn tuam leh a, chuti taka min siamtu ka nu chu vawikhat tal hmuh erawh ka la chak fan si a!

PART-XI

Ka thawmhnaw chu ka pack fel mawlh mawlh a, helai hmunah hian ka chawlh lak hi ka hman zawh kher a ngai pawhin ka hre lo. Joshua nen kan inbiak fel tawh angin a hnenah ka chawlh la neih zawng chu ka hmang ang. Doorbell a rawn rik chuan hawn ka tum hran lo a, mi pawimawh tak hetah hian an rawn kal ka ring lo. Vawihnih vawithum lai a rik takah chuan ka va hawng ta nge nge a, hmel pawr deuh phang hian Rinzuala chu a lo ding a, ka hmuh rual chuan kawngka chu ka khar leh mai dawn em ni ka ti rum rum a, ka rilru hria ni awm takin a rawn lut nghal nalh a. Ka thawmhnaw ka lo chhep deuh nuai chu a en vung vung a, a hmel hmu lo turin leh kan mit intawng tur pumpelhtir tumin ka phe buai lui tang tang a.

“Lawmzual, I nu chu hmuh I tum lo em ni?

“Hmuh kher a ngaihna a awm tawh hleinem”

A thaw halh a, ka taksa chu a khur der der thung a.

“I hmuh duh chuan a address ka hrilh ang che”

“Min mamawh loa min kalsan tu chu pan leh kher a chakawm hran lo e, min ngaihtuah suh, harsatna te chu ka thiantha a ni ve reng alawm, vawiin ni thlengin nung damin ka la awm ve theih hi”ka nui lui sak a.

“Engtia awm nge I tum?”

“Huh… Engtia awm nge ka tum?”a mitah tak chuan ka en a, a hmaa ka mizia, mahni induhtawkna kha ka nei let chiahin ka hria.

“In check-up leh tura ka tih che kha I kal em?”

Ka chhang tawh lo, ka inkhung mawlh mawlh a, ngawi rengin min en a.

“I sawi duh ang I sawi zawh tawh chuan min lo chhhuahsan tawh mai ta che, thil tihfel tur ka la nei tlat”ka ti a.

Min pawt tho dawrh a, a chet dan avang chuan ka phu zawk a, ka thawmhnaw rem sa te chu a darh deuh nuai bawk a.

“Hetiang hian awm tawh suh ka tih che kha, Lawmzual, engkim hi awlsam takin ka paltlang lo tih I hnenah pawh ka sawi kha”a ti a. Min thing deuh nawk nawk a, min tihnat erawh a tum lo tih ka hria.

“Engmah sawi tur ka nei lo, kan pahnih chungchang ngat phei chu”ka ti a.

Min vawnna chu a thlah a, ka ti tak tak em tih hriat tumin min en a, a mitah chuan chiang tak hian alo en ve reng a.

“Ka hrethiam e, ka beidawng har mah mah a ni. Tunah chuan I duh ang ngeiin inhre ngai lo leh la inhmu ngai lo ang in kan awm tawh ang, heng zawng zawng hi I duhthlanna ngei a ni bawk”a ti a, a sawi ring lo; ka thinlungah erawh ring taka sawi ang mai a ni.

Ka inchhung a chhuahsan rual chiah chuan ka ruakzia leh ka malzia chu a tharin ka hre leh ta, mahse, tunah chuan ka tan ngei hian khawvel thar ka din a ngai ve tawh, ka pasal fanaute nena kan khawvel thar tur chu, chutah chuan tute nge cheng ang tih hre lo mah ila beiseina ka insiam zel tawh ang. Delhi lam panin ka thlawk leh ta vung vung a, Joshua bulah khan chawlh ka tum tawh zet na a ka rilru thlak leh thut vanga helama kal hi ka ni. Mizoram House ah room ka hauh lawk sa tawh avangin awlsam takin ka tlang nghal a, ka nunhlui hahthlak tak tak chuan min kiansan tawh turin ka nun atang hian a mal te tein ka chhuah tir tawh a ni.

Ka naupanlaia ka pa nen kan kalna thin Gurgaon road a Kapashera Amusement Park-ah chuan ka kal a, ka naupanlai hun kha rawn inherchhuak leh se ka ti kher mai. Chhungkuaa chu hmuna lengte chuan ka mit an la nalh a, keipawh hlim takin ka pa nen he hmunah hian kan kal tawh miau si a. Tlangval pahnih hi ka thutna lam hian an rawn phei mek a, an titi ka hriat chuan Mizo an ni tih ka hria a, ka khawharna te chu a reh chawpchilh nghal maiin ka hria a, ka nui sak nghe nghe. Ka thutna piah deuh lawkah chuan an thu a, Delhia-a lehkha zira awm an ni tih an titi atang chuan ka hre mai. An thusawi chu a hla tial tial a, ka mit chu a rawn thim deuh suk hian ka hria a, ka lu chu ka han thing nawk nawk a, ka khaw hmuh a rawn phe ruai a, ka awn deuh ruai ruai hian ka hria a, a thim ta hmuk mai a.

“Hospital ah kalpui mai a tha ang”tih a rik zawh rualin hneh zet hian min pawm nawlh a, ka chungah eng nge thleng tih ngaihtuahna tlem ka la nei a, mahse, engmah chu chiang takin ka ngaihtuah thei lo.  Motor horn ri tuar tuar chu ka mang hriat ruai a, engmah hre lo chuan ka awm zui leh nghal a.

Ka harh leh meuh chuan hospital ah ka lo mu reng a, ka ban chu ka han en a, drip an lo khai mek a, engtin nge helai hmun hi ka thlen tih reng ka hre thei lo. Ka han chet leh chuan ka khum mawng lamah che zeuh ka hmu a, thawm ka han neih deuh avangin rang takin a rawn tho chhuak a, Joshua a lo ni, a mit a sen ram a, mut kham lo hmel hi a pu a, ka meng tih a hriat chuan rang tak hian min rawn hnaih a, min be mawlh mawlh a, a hmelah chuan manganna ka hmu.

“Doctor ka va ko nghal ang’e”tih leh chhuah a rual a.

Joe, ka mamawh hun apianga ka kianga awm thin ngei chu hun harsa ka tawh lai pawhin ka kiangah a lo awm leh der tawh. Joe, dam reng ang che aw…

PART-XII

Ka muhil lai chu ka harh hlawl a, ka mutna chu zing ni chhuak dawng tha tak a nih avangin ka hmai vel chu niin a lo em lum tha tawh hle a, ka inlet thawk a, muthilh leh mai ka tum lai chuan ka piah lawka pawn lam thlir chunga phone hmang mektu Joe-a thusawi chuan min tiharh chiang hle a. Test hrang hranga a landanin kei hi cancer nia rinhlelh mek ka ni ang maw? Thawm chu ka han nei deuh a, hmanhmawh tak hian Joe chuan phone chu a dah a, ka mutna chu a rawn pan vat a.

“I mu tui em? Nui sang hian a ti a.

Ka lu chu ka han bu nghat a, a thusawi kha hria anga awm loh hram ka duh a ni.

“Vawiinah test pakhat kan tih leh a ngai dawn a, naktukah chuan hospital atangin I chhuak thei vah tawh ang?” a han ti leh a.

Ka puan tlang chu ka han zut a, ka zam tak zet a ni. Tuna min rinhlelh ang hian lo cancer tak tak ila engtin nge ka nun ka hman zel ang ka ngaihtuah ngam lo. Ka mittui tla tur chu ka han khap let a.

“Joe…”

“Engmah hlauhthawn tur a awm lo ania aw naute. Doctor thiam tak takten an enkawl che a, I tha leh tep tawh ania”a ti a, ka lu chu a chul heuh heuh a.

Ka nunkawng bumboh bik zia chu ka ngaihtuah a, hetiang tur ringawta ka lo piang ve chu pawi ka ti vawng vawng mai.

Test hrang hrang kan neih zawh chuan ka taksa chu a chau hnawkin ka hria. Tukverh chu ka han nam hawng a, pawn boruak thiang tak chu ka han hip vang vang a, tun hunah hian ‘Nu’tia koh tur ka va mamawh em! Van lam chu ka han hawi a, ka pa chuan van atanga min rawn thlir ve reng ang hian ka ngai a, a fanu duat em em heti tak maia ka han awm chu min lainat hian ka han ring ringawt a, mal ngawih ngawiha awm tura min kalsan atang khan lungngaihna hlir hian min la zui a ni.

“Engkim a tha leh vek dawn ania aw, I rilru tihah miah suh ang che”

Room kawngkhar nghengin Joe chuan min lo en reng a, engtik laiin nge a rwan luh tih pawh ka hre lo.

“Joe, Mizoramah ka kir leh a ngai”

“Tunah chuan ni lo e, I dam fel hunah kan pahnihin kan kal dawn nia”a ti dam thlup a.

“Ka nu chu eng mi pawh nise, mite tana tenawm ni mah se ka neihchhun a ni si a, kei hi chuan ka ngaihdam a ngai lawm tiraw Joe?”ka hnuk chu a ulh teuh a.

“Ni chiah e, I nu chuan a hmuh hunah che a lawm viau ang. Fanu hmeltha leh bright tak a nei si che a”a ti a.

“Fanu chhuanawm tak ka ni lo tih chu I hria alawm”ka ti a.

Min rawn pan phei a, ka bul a rawn thlen chuan ka dar tawn tawnah a vuan a.

“Fanu chhuanawm tak I ni alawm, I dam that phawt chuan ka ngaihtuah ngai lo che, ka ring tawk che. Chuvang chuan naute, I dam that hi a pawimawh tak zet a ni”a ti a, min ngaihtuahna a hmela lo lang chhuak thin kha tunah pawh a la awm reng.

“Nupui neih I tum hnai deuh emaw ni le, in tawng dan vel chu”tiin ka han fiam a.

Min vawnna chu a thlah a, pawn lam chu a han melh vang vang a.

“Arrange-marriage”

Ka va melh chuan min lo melh ve chiah a, sawi leh tur hre lo in ka ang deuh ha a.

“Nupui neih ka hreh nachhan ber chu nangmah hi I ni asin. Nupui ka neih hunah chuan duhtawkin ka buaipui thei tawh dawn si lo che a, I hrethiam tiraw?”a ti a.

Ka nui lui sak a, ka neihchhun apiang ka chan mek zel chu a ni si a.

“Ka lawmpui lutuk che Joe. Mi fel leh tha tak a ni ngei ang”ka ti a.

“Sawi tawh rih lo ang, tunah chuan I dam theihna tur chiah hi ka rilruah a awm”a ti a. Engmah sawi leh tur hre lo in kan ngawi dun vang vang a.

PART-XIII

Ka mittui chu a tla zung zung a, engtia rei nge bathroom-ah chuan ka awm tawh ka hre lo. Joe chuan kawngkhar chu a rawn chum dawt dawt a, hawn ka tum lo. A tawpah chuan a beidawng ve ta a ni ang, a reh ta a. Mahse rei a ni lo, kawngkhar chu a ri rak rak a, a rawn inhawng ta mai a. Joe mangang chuan security a lo ko hi a lo ni a, awlsam takin an rawn hawng thei ta a ni. Shower hnuaia huh zawr hnapa ka lo thu chu hmanhmawh em emin Joe chuan min pawm chhuak a, puan lum in min tuam a, ka awmdan atthlak tak avanga a mangang hmel mawlh kha, hmuh a nuamin a va hrehawm tak em!

“Naute, engkim a tha leh vek ang ka ti lo em ni?”a aw ah chuan lungawi lohna hriat tur pakhatmah a la awm lo.

Ka cancer tih ka hriat rual khan khawvel hi chhuahsan ka duh asin. Eng nge khawvelah hian dam chhan la awm? Engkim mai hi ka tan chuan thihpui tham khawpa natna vek a ni, ka thil tawn zawng zawngte nen hian.

Ka thawmhnaw ka thlak chhung chuan Joe chuan min veng thawng tak hian ka thawm hriat phak loh hlau takin min veng reng a, ka khawngaih zawk. Ka inthlak zawh chuan Joe chuan pawnah min hruai chhuak a, khawi lam nge kan pan dawn tih pawh ka hre lo. Hmun pakhat nuam leh reh tak mai hi kan thleng a, khawi lai nge tih pawh ka hre lo. Motor chu a ding a, Joe chuan min kaichhuak a, ka zui mawl ve tawp a ni. Kan kal thui tawh fe hnuah dil lian vak lo hi kan thleng a, ka hahdam huai hian ka inhria.

“Hetah hian ka lo awm ang aw, I duh leh va tap la, va inbunruak rawh”Joe chuan a ti a, min vawnna chu a thlah a.

Muanchangin ka kal a, khaw awm dan chuan a zir bawk a, ka harh sawng sawng hian ka hria. Dilah chuan ka ke ka chiah a, duat taka ka enkawl thin ka vun te chu cancer in a duh tawkin a han nuai vel tur ka ngaihtuah chuan ka mittui bawk chu a rawn tla leh a, vanduaina a indawta ka chunga rawn thleng zawng zawngte chhuikir chuan ka tap ta hawm hawm a. Ka aw pawh a chhuak tha thei tawh lo, Joe chuan ka darah a rawn vuan a, mittui karah ka han melh tawk tawk a.

“I kir tawh ang le”a ti a.

Hotel lam pan chuan kan kal leh a, a hma ai chuan ka rilru tawt pawh a ziaawm ta hle. Joe chuan room-a amah lo nghak tur chuan min ti a, ka kalsan a. Ka inbual zawh chuan ka thawmhnawm chu Joe chuan a lo pack fel tawh a.

“Naute, thla khat hnuah chemo khai tan a ngai tawh dawn a, chumi hma chuan I nu hi hmu ila tha in ka hria”a ti sap a.

“I tihdan dan a ni mai, mahse, Joe, keimahin ka kal thei ania, I hna I chawlh reng chuan promotion a chak loh thin kha”ka ti a.

“Promotion ai chuan nangmah hi I pawimawh zawk alawm”ka bag zipper chu a pawt ri sawk a.

“A awmna chu awlsam takin ka hmu dawn tho a, ka rawn kir leh vat dawn tho a”ka la t ihram a.

Min chhang tawh lo. A mutna a siam mawlh mawlh a, ka en reng a.

“Zing dar 6 ah kan thlawk chhuak ang, nangpawh mu hma rawh aw”a ti a.

A mu lai chu a rawn tho leh hluai a, t venin ka lo la thu tih a hmuh chuan a thaw huai a.

“Ka mumang lek chu niin”tiin a phun sap a, ka lo nui var var a.

Mizoram boruak bawk chu hipin ka nu hmu turin ka let leh a, a fanuah min lo pawm lo ta se engtin nge ka awm ang tih ngaihtuahin ka tha chu a khur ru dar dar a. Ka inah ka indah fel hnu chuan Joe chu a ding vat a, a bag ah lai chu dah tura ka tih chuan a nui hawk a.

“Ni lo e, ka thlenna tur lam ka pan tawh zawk ang”a ti a.

“Hetah I thleng thei reng alawm Joe”ka tih chuan a lu a thing a.

“Hote ah I hmingchhiat ka duh hleinem, naktukah kan inhmu dawn nia naute”a ti a.

KA chelh bet zo dawn chuang lo tih hriain taxi ka phar din sak a, Hotel lam pan chuan a tlan liam ta a. Darthlalangah chuan ka han inen a, a hmaa ka la hriat ngai loh ka nu hmuh dawn avanga phur riau na chu hai rual a ni lo, ka rilru pakhatah erawh min lo hnawl mai ang tih hlauin ka khur der der thung a.

Dar 10 chiah chiah a ni a, Rinzuala office bulah chuan ka ding ran tawh. Meeting pawimawhah a chhuah avangin ka nghak ang nge ka kal leh tih ka han ngaihtuah a, lo nghah chu tha zawkin ka hria a, ka lo nghak ta ni. A office pana a rawn kal ka hmuh chuan ka thutna atangin ka tho a, a hnunga zui tu avang chuan ka tha chu a zawi nghal vek hian ka hria. Min hmuh lohna turin bang chu ka han inphen tir a, min kal pel chiah chu ka rilru hi a na zawkin ka hria. Midang chutianga tih takzeta a kawp tih ka hmuh chuan min ti na a ni. Mahse, tun hunah hi chuan ka mamawh zawk si a, ka pan a ngai a ni mai. Darkar chanve dawn ka nghah hnuah a bialnu nia ka hriat chu amah in a rawn chhuak a, Rinzuala driver chuan a lo dawng sawng vat a, motor lam chu an pan nghal a. Chu veleh hmanhmawh takin Rinzuala office-ah chuan luh ka tum a, tumah min lo dangtu an awm lo hlauh chu ka lawm kher mai.

“Rinzual..”

Dawhkanah lehkha a lo bih mawlh mawlh a, chutianga chianga amah ko tu chu tunge hriat tumin uluk fe hian min rawn en a.

“Hun ka nei lo, ka chhuak leh nghal dawn”a ti ta hmuk a.

“Ka nu awmna min hrilh la, chu chu a tawk mai”ka ti a, en pawh min en duh lo.

Minute 5 vel a ni ral tawh ang, a coat chu la in a ha tha mawlh mawlh a, file pakhat chu kengin chhuah a tum a, a banah chuan ka lo chelh a.

“Vai in duh duha an khawih hnu kha kut bawlhhlawh khan min dek hlek suh”a tic hang ta fak a, ka thlah chiang kher mai.

Kei hi chutiang mi ni chuan min ngai a maw? Ka kawr tlang chu ka han hmer tawk a, ka thinlung a so bulh bulh chu ka tuar zo lo ang tih hlauin ka tlanchhuak ta dawr dawr a.