GIVE INTO ME Part XIV & XV

GIVE INTO ME

PART- XIV

Motor horn a ri tuar a, ka au thawt a, kut tha chak zet hian min pawt her sawk a, ka mit chu a vai nghal rum rum mai.

“Mahni pawh inveng him zo lo khawpa inthunun thei lo I nih ka lo hre ngai lo”

Rinzuala chuan thinrim hmel zet hian min melh a. Min vawnna kut chu ka paih thla a, a lakah hian keimah zawk hi thinrim ngawih ngawih tur ka ni asin. Ka sam chu ka han chul mam a, he hmun atanga kalbo vat hi ka duh a ni. Ka phone a rawn ri hlauh a, Joe a lo ni. Ka ina a kal thu leh kawng ka kalh avanga pawna min nghah thu min rawn hrilh a, ka haw vat tur thu hrilhin phone chu ka dah a. Joe ka biak chhung zawng chuan mit khap lek lo hian Rinzuala chuan min lo en reng a, ka chhungril khur der der chu a hriat hlau tak chung chuan thawk ka han la a.

“I nu awmna chu I hre duh a ni lawm ni? Min rawn zui rawh”a tic hang fak a.

“Ka hre duh lo zawk mai ang e.. “ka nui lui sak a.

Taxi rawn tlan chu ka lo phar ding a, ka lut tur chu Rinzuala chuan ka banah a man bet a, chutih lai tak chuan a phone a rawn ri a, lak tuma a ban lai tak chu remchangah lain ka lut a,  driver chu tlan vat tura hrilhin kan tlan chhuak nghal a. Keimah pawhin ka nu chu ka zawng hmu thei ang tih chu ka inhrilh mawlh mawlh a.

In ka thlen chuan Joe chu pawnah a lo ding reng a, min hmuh chuan a thaw huai hian ka hria. Kawngka chu ka han hawng a, ka lu rawn hail eh lap lap thin chuan ka mit a rawn ti vai leh thin. Ka lu chu ka han thing nawk nawk a, motor min sut teuh zia kha ngaihtuah chhuakin ka tha chu a rawn khur tha leh a. Joe chuan min rawn kuah vat a, ka awm dan dik loh chu hriain ka tha khur reh hma zawng chu min thlah lo.

“NAngmaha chhuak lo turin ka duh che a ni. Khawi hmunah pawh kal ngai se ka kal pui zel angche ka tih kha”a ti dam thlup a.

“Ka ti thei alawm Joe”

“Doctor bulah khan tha taka ka enkawl dawn che tih ka hrilh vang chauha helai hmuna min kal tir phal hi a ni tih hre reng la aw, ka mawhphurhna ka hlen lo anih chuan keimah hi ka inhaw reng tawh ang”a ti a.

“Joe.. ka nu awmna tur awm ang hi engtin nge kan hriat theih ang? Bul tan dan tur hi ka hre lo a ni”ka ti a.

“Ka ngaihtuah vek tawh alawm, kan hmu vat ang tih ka chiang a ni”a ti a.

“Rinzuala hnen atang ni lo, keimah ngei hian hmuh ka duh a ni”ka tih chuan min rawn melh kawk a.

“Chu chu tunge?”a ti hul hak a.

A tirte atanga Rinzuala nena kan chanchin chu ka hrilh ta vek a, min melh tlawk tlawk a.

“Mipa nep tak a ni”a ti sup a.

“Mahse, ka dem lo, ka nu vanga an chhungkaw kehchhiat hi keipawhin ka hriatthiam pui a, ka chan ah ka dah a, keipawh ni ila hetiang tho hian ka che maithei si a”ka ti a.

“Naute, engpawh nise I nu chu kan hmu phawt ang a, chumi hnuah I natna enkawl tur hian kan kal tawh ang. I thil tawn zawng zawng hi nangmah chiaha I tawrh hi a fair lo, a fair hlawl lo.” Ka chalah a fawp zeuh a, a mittui chu a parawl kiang a.

Ka taksa chu a chau ngawih ngawih a, nihnih chhung chu khum atang pawhin ka tho peih lo. Joe chuan hmun dangah pawh kal loin min buaipui a, ka doctor chu a be pawp reng a, enkawl dan tur a rawn sawi ang ang chuan min enkawl a, keipawh ka harh ve ta sawt sawt mai. Darthlalanga ka hmel lo lang chu ka han bih nawn leh ngat a, ka mit khur chu a thuk deuh duk hian ka hria a, ka lung chu a awi lo hle. Doorbell a rawn ri ral ral a, Joe a awm thoa ka hriat avangin room atang chuan ka chhuak lo. Vawithum lai a rik hnu chuan ngaihven a ngai tih hriain ka chhuak phei a, Joe chu a lo awm lo. Kawngka ka hawng a, nu pakhat inthlahrun hmel taka lo ding zum deuh dak ka hmuh chuan ka inring hman lo, ka mittui chu a rawn luang zung zung a.

“Bawihte…”

Ka kuah thlawp a, ka nu ngei a ni. Khawvela ka neihchhun, min hringtu nu ngei chu ka hmu leh ta a nih chu! Kan tap dun zawih zawih a, engtiang taka harsatna thuk nge kan lo paltlang tawh tih kan ngaihtuah lo, kan tap a, kan nui bawk a, hei hi ka lo beisei thin, ka beisei ngam tawh loh ngei chu a ni.

“Nu, engtin nge min rawn zawn hmuh theih?”tiin ka zawt a.

“I thianpa khan min rawn zawng chhuak a. Bawihte, a hma atang tawh khan hmuh che hi ka chak thei lutuk a, mahse, ka ngam thlawt lo a ni. Tunah pawh I thianpa in I chanchin min hrilh vang chauha rawn hmu ngam che ka ni”a ti a.

“Ka chanchin, a vaiin em ni a hrilh che”ka tih chuan a bu nghat a.

“Theihtawp chhuahin I natna pawh kan enkawl anga, I tha leh em em ang”a ti a.

“Nu, Rinzuala nen..” ka tawp leh ta daih a. Eng ber nge sawi ka tum ka hre lo, engvanga ani hming chu lam chhuak nge ka nih pawh ka hre hek lo.

“Engkim hi ka thiam loh vek a ni. Rinzuala’n I nu ka ni tih a hriatchhuah chiah khan ka bulah a rawn kal a, a thin a rim em em a. I chungah thil tha lo thlentir lo hram turin ka ngen a, a hlimna zawng zawng laksaktuah khan min ngai miau a. Chutiang bawk chuan I chungah a ti ang tih ka hlau thin asin. Bawihte, chung chu a thlentir em?”a ti mawlh mawlh a.

Ka tap chhuak ta hawk hawk a, tinge hepa vang hian ka nat em em reng bik? Ka nu chuan min kuah hle hle a, ka tah tawp thak thleng chuan ka awmah ka hmai ka phum a, nu te lo hlutzia a takin ka hre ve chiah a, rei ka tem thei ang em tih lah ka hre si lo. Ni tin mai hian ka thih hun tur ka hnaih zel niin ka hria a, a hun lo thlen hmaa ka nu ka tawng erawh ka nuna vanneihna ka tawn san ber a ni hial awm e.

PART-XV

Airport-ah chuan Joe leh ka nu nen kan pathumin kan thlawh chhuah hun tur kan nghak ran a. Ka nu chuan min thlahlel tih hriat tak hian min vuan reng a, tun atanga reiloteah ka kalsan leh a ngai dawn si a.

“Joe, ka fanu hi I kutah ka dah tawp mai a nia aw. I enkawl tawhna zawng zawngah lawmthu ka hrilh che a, reiloteah ka fanu kiangah ka rawn kal ve ang”ka nu chuan a ti a.

“Ka pi, ngaihtuah reng reng suh, engkim a tha leh vek dawn alawm”Joe chuan a ti a.

Kan thlawh chhuah a hun dawna, beisei miah loh tur beiseiin ka mit chu ka han len kual a, ka thinlunga nung reng hming chu lam chhuak ngam loin ka rum hak a. Ka nu chuan a mittui chu a hru zeuh zeuh a, ka mittui tla tur a awm ve tawh lo. Engkim hi huaisen takin ka hmachhawn vek tawh ang.

Grand Hyatt Rio de Janeiro

Ka hna tan leh phawt ka duh avangin Joe remti lo chung chu Chennai lam ka pan ta kha a ni a, tunah chuan ka damna aim ah chuan ka chak zawng leh ka duhzawng tih a ka nun chu a hlim thei ang ber hman ka duh tawh zawk a ni. Ka hna ka zawm atanga thla pawh a tlin hmain Brazil lamah kan liam nghal a, Rio de Janeiro- a 5star hotel changkang leh khawvelah pawh a hming lang pha ngat Grand Hyatt lamah kan innghat a. Kan pu ber meeting neihna tura tawiawma kal ka ni a, GM in chawpchilh taka a theih loh avanga keimah zawk kal ka ni. Ka hun tawn zinga ropui ber zinga mi ni reng tawh tur chu vanneihthlak takin ka tawng a, ka vanneihna hian min zui ve tan pawh a ni mial maithei.  Balcony ah chuan thut hmun ka rem sauh sauh a, hetiang taka hmun nuam leh mawi hi ka tawng ve fo nia ka lo  hriat te hmuh hniam rawih theih khawpin a chungnung a, thlir kar hring mawi leh van boruak dum pawl ruih te, a lehpek awm thei lo tur hiala ngaih theih tura nula tlangval, chhungkua beach vela an han rak chel chul te chu hmuhnawm leh ngaihawm a tling a. Ka thinlung hi an tihlim veng veng hian ka hria.

Kan hotel ah chhawm lut ila tia ka duh chu ka han list leh nghauh nghauh a. A then hi chu kan tana harsa leh tih theih pawha ka rin loh ni mah se boss min beisei anga engkim chu a tha thei ang ber tih ka tum a ni. Ni thum dawn meeting kan neih hnuah agreement hrang hrang kan sign fel thei a, India leh Brazil tana insumdawn tawnna tha thei ang ber nei tur chuan kan hna kan zo thei ta. Khumah chuan ka bawk thlawp a, ka taksa chauh zia ka hrechhuak chiah. Ka mu chu ka lo muhil tlang daih ni tur a ni, ka harh leh chuan khua a lo thim vek tawh a. Ka lu lah chu a rit deuh luk lehnghal a, inbual harh tumin bathroom ka pan a. Ka lu ka suk lai chuan ka awmna hmun chu a nghing deuh hian ka hria a, ngai pawimawh loin ka inbual chhunzawm a, towel ka ban thei tawk a, enge maw thleng palh thei a awm tih hriain ka thawmhnaw ka inbel sawk sawk a, ka khum lam pan aka kal lai chu khum pawh thleng zo lo in ka tlu tawp a, ka rilru harhfim vek si a chutia ka taksa che thei lo chu mak ka ti em em a. Rei vaklo hnuah ka khaw hmuh a thim tial tial a, ka nu leh ka pa in min lo ko vak vak chu ka hre hla tial tial a, engmah hre lo in ka awm leh ta.

Ka harh chuan nurse pakhat hian min lo vil reng a, ka mit ka meng tih a hriat chuan rang takin a tho a, doctor chu a ko nghal vat a. Doctor chu a rawn kal hlawk hlawk a, ka beisei loh takin boss chu a rawn tel ve bawk a.

“Investigation kan tih nghal char char a ngai anih hi, rem I ti tih chuan ka pu, hetah hian hming min sign sak ta che”Doctor chuan boss melh pah chuan a ti a. Engmah sawi loin boss chuan a sign nghal hmiah a.

“Hetiang hian I awm tawh thin em?”Doctor chuan ka mit keu mawlh mawlh pah chuan a ti a, ka lu chu ka bu nghat a.

Doctor office ah chuan ka lehkha pawimawh tak tak chu ka han phawrh a, a lo bih uluk hle a.

“A lan dan ang hi a nih ka ring ta lo tawp mai”a dar chu a han san ak a.

“Eng I sawina nge?”ka ti ha a.

“A mak khawp mai, cancer hnuhma ni awm tak chuan a lang na a, a nih lohna chance hi a awm tlat a ni”a ti a, a mita beiseina tle sar sar chu ka hmuh hmaih lo.

“Invesigation kan tan nghal ang, mahse, tun atanga thla khat a ral hnuah chauh ka peih fel ka inring a, engpawh nise, information kan inpe zel thei dawn tho a, in rama I inenkawl theih dan tur pawh ka ngaihtuah reng bawk ang”a ti ta zung zung a.

Ka nui a, tih luihna tel hauh loa ka nuih lohna chin pawh a rei tawh zia ka hre chhuak hial a.

Ni li leh zan nga kan cham hnuah Brazil khawpui chhuahsanin Chennai lam kan pan leh ta vung vung mai, beiseina, beiseina sang tak nei chungin thlawhnaah chuan ka chuang ve ta hle hle a.

__*Some broken hearts nevers mend* tih chu story kal lai mek a zawh veleh tihchhuah leh a ni ang. Min lo chhiar sak leh zel turin ka ngen a che u____

Ka room ah ngei ngaihngam takin ka mu ve ta siai siai a, ka thlen hlimah ka nu leh Joe ka bia a, doctor nen kan inbiakna erawh ka sawi ngam lo. Ka beisei ang bawk hian beiseina sang an nei dawn a, kan beisei ang hi lo ni leh ta silo se an beidawn ka duh lo. Ka tan chak taka an awm a ngai si a.