GIVE INTO ME Part Xix & Xx

PART XIX

Hospital kan luh tlai atangin ka luak vak vak a, ka chau em em mai a, ka chhungrilah hian ka khur dar dar reng a, a hrehawm tak zet a ni. Ka nu in min riahpui a, nu te bulah ngei chuan a thlamuanawm deuh e. Ka muhil char char a, ka harh chuan ka nu in ka kut a lo vuan reng a, ka harh tih a hre lo a ni ang, a mittui chu a lo hru a, chutianga a awm ka hmuh chuan ka thinlung hi a na a ni. A tihsual a awm anih pawhin chu chuan a vuak let ka duh lo a, inchhira a hun a hman hi ka duh lo a ni.

“Nu..”

A mittui chu a hru mawlh mawlh a, a nui lui hram a.

“Bawihte, I lo harh tawh a ni maw? Ka mangan hman lutuk a”a ti a.

Banga sana intar chu ka han en a, dar 9 chiah chiah a lo ri a. Ka lukham hnuaia ka phone chu a rawn vibrate cher cher a, peih lo zet hian ka han ban a, Rinzuala hming ka hmuh chuan ka reject a, ka phone chu ka off ta daih a. Ka chezia chu ka nu chuan min lo en reng a, ka nui sak a.

“Bawihte… thil tam tak hrilh tur che hi ka nei asin. Min haw viau ang tiraw?”a han ti phawt a. Ka chhan hmain amah vek chuan, “Ka damchhung hian inchhir reng reng hian hun ka hmang tawh dawn a nih hi”a ti a. A kut chu ka la a, ka han hmer salh a, “Nu, hun kal tawh chu hun kal tawh a ni a, a liam tawh alawm”ka ti a.

“Ka kalsan atang chea vawiin ni thleng hian ka ngai em em thin chea, ni khat chauh pawh hrechhuak lo chea ka awm hi ka hre ngai lo.”A mittui chu a han hru zeuh a. “I nu hi ka thiam lo a ni”a ti a, a tap ta zawih zawih a.

“Nu, ka tan chuan ka nu I ni reng a, ka mamawh dan che a la pangngai reng alawm”ka ti a.

“I pa khan a hmangaih em em che a, nangpawhin I hmangaih tih ka hria. I pa hi a chhe zawnga sawi emaw, ka insawi thiam tum vanga I rilru tina zawnga sawi hi ka duh lo bawk. Mahse, Bawihte, I pa nen kha ka hmangaih a, ka hmangaih tak zet a ni. A kiangah khan ka hlim a, mahse, ka him si lo. Chu chu a ni vawiin ni thlenga ka thinlung natna ni reng thin chu”a han ti a. A thusawi awmzia chu ka hrethiam lo tih ka mitmengah chuan a man vat a. “I piantirh hian kan awh em em hmeichhia kan han nei che kha I pa nen kan lawm khawp mai a, I pa in duhtakin Lallawmzuali tiin I hming hi a phuah nghe nghe a. Mizoramah pawh thingtlanga khawsa kan nih avangin inenkawl a harsa khawp mai. I pa khan a bula min hruai theih hun kha a nghak zo ta lo a, a awmna hnaih theih ang ber tura a rinah inluah tur zawngin kan nufa leh I ni kha min la thla ta nge nge a, a theih anga zingin amah pawh kha a rawn haw ve thin. Kan hlimna ber I ni a, khawvelah khan thildang reng reng kan awt ngai lo. I pa kha pa rorum leh thikthu chhe zet mai a ni a, chutih rualin a nupui fanau te erawh a enkawl hneh em em thung a, engmah tlakchham kan nei ngai lo. Nangmah I la naupangin I la hautak lo bawk a, pawisa pawh kha kan khawl ve em reuh asin”, a nui a, khang hunlaiah khan a cheng a ni tih a lang reng.

“Kumhnih I nih khan I damlo vak mai a, kan mangang em em a, I pa lah kan be thei si lo. I ni nen kan remhriat nain damdawiin kan pan pui ta rawih mai che a, tawng lah kha kan han thiam lo dun em em mai bawk si a, chutih lai chuan tuna ka pasal ni ta hi a fanu damlo enkawlin an rawn awm ve bawk a. Kan harsatna engkim kan han sawi a, amah chuan min buaipui ta vek mai a, khami tuma I ni nen kan lawmzia te kha aw! Nithum chhung kan awm hnuah keini chu kan chhuak ta mai a, kan awmna te hrilhin remchanga rawn leng turin I ni chuan a ti nghe nghe a. Pa fel tak mai hi a ni a, keini pawhin kan nel nghal thuai mai a ni. Nangpawh I dam tha ve ta hle a, I pa pawh reilote chawlh a neih hmangin a rawn haw a. I damloh thu a hriatte khan I ni nen khan min hau nasa teh ania, a fanu duat ngawih ngawih kha I ni miau a. A chawlh a zo mai a, ngai tak chung khan kan vai liam leh ta a, a tawi zawngin sawi mai ila, chutia I pa kal liam fel chiah chu U Kima (Rinzuala pa, tuna ka nu pasal) chu a rawn lang hlawl mai a. I ni bazar kal chhung lawk hi a ni a,  chhuatah I naute lem I lo khal a, a rawn fiam bawrh bawrh che a, I thawmhnaw ka suk zarin ka chhuahsan zui nghal mai bawk cheu a. Chutia ka inzar mawlh mawlh lai chuan I pa chu a rawn lang leh hlawl mai a, chutia ka hmu thut chu mak ka ti hle nghe nghe. Mi pawh be ta lo chuan inchhungah a lut tlang nghal a, U Kima pawh chu ka lo hrechang tawh lo, “Theihnghilh I nei em ni?”tia ka zawh chuan thinrim em em hian min en a, U Kima chuan a lo pawm chea, chutia kan inchhunga a hriat ngai pawh ni lo a hmu chu a thinrim tih ka hre ta a, hrehawm ka tih zia mai chu! Room ah min nawr lut a, khumah chuan min theh thu lawp a, “Ka awmloh hi remchangah lain mipa I lo khawih thin a ni maw? Hmeichhe tenawm tak I ni, ka fanu enkawltu atan ka duh lo che”a ti a. Engmah sawi tur ka hre lo, mak ka ti lutuk hi ka a lo chauh a ni.”

A thaw ham ham a, a maimitchhing a, a rawn men leh chuan a mit sen ram a, a hmel chu en ngam loin ka maimitchhing ta ringawt a.

“I damloh laia min tanpuitu a nih thu ka sawi lai te chuan ten hmel em em hian min en a, chutiang mi chu ka ni si lo. I tap vawn vawn a, ka kal tur chu min dang tlat a, amah chuan a pawm chea, U Kima chu hrilhhai zet hian a ding reng a, kan boruak hre chiah lo mah sea awm ang chu a hria a ni chek ang, a lo inrawlh vat a. Mahse, I pa, mipa azawnga zahawmna ngaipawimawh leh rilru thlak mai mai lo chuan in atanga chhuak turin min ti ta nih chu”a hmai a hup a, a tap ta zawih zawih a.

Ka mittui chu ka han hru a, tute pawh hrehawm in kan lo awm vek a ni si a, zawt ngam lo mah ila vawi tam kha ka pa biangah mittui a luang tih ka hmu thin tlat a, thudik hriat tum ta zawk se aw ka ti vawng vawng mai a ni. Ka pa kha dik lo thei lo ah ka lo ngai thin a, ka ngaisang a, ka tan ka engkim a ni. Mahse, mihring ve bawk a ni a, thil chu a lo tisual ve thei teh meuh mai, chuvang chuan a damchhung khan thinlung na takin a awm ve phah a ni si a.

“U Kima chuan an thlenna lamah min hruai ve ta ringawt a, mi fel tak a ni ka tih tawh kha, amah vanga ka hunt awn mek, mumang ang maia chiang lo ruaia ka awm lai chuan min buaipui a, a fate pawhin min nelin min ngaina ta hle a. I pa chuan min rawn hruai leh mai ringin ni tin ka thlir thin, mahse, ka beiseina chu beiseina beidawnthlak ah a chang zo ta. Mizoramah ka let leh a, I ni hian a rukin pawisa min rawn thawn thin a, chu chuan ka mamawh zual chu min pui ve thei thin. Ka ngai lutuk che hi ka a mai dawn hian ka hre thin a, engtin nge khang hun kha ka lo paltlang tih hi ka inzawt thin. I birthday a lo thlen apiangin I rualpui awm vel hmu turin ka chhuak thin a, ka tap zawih zawih thin. Nikhat chu chutia ka vah velnaah chuan U Kima nen hian kan inhmu hlawl mai a, a hmel chu a lo pawr deuh fap mai a, rilru hahna nei hmel hi a pu a, a chanchinte ka han zawh chuan keimah vanga hrehawm ti taka hun a hman thin thute chu min hrilh a. Anihna takah chuan I pa ah khan beiseina ka neih zawng zawng hi a bo hneh lutuk a, tu lakah mah beiseina hi ka nei ngam tawh lo a ni. U Kima nen chuan kan inhmu zing telh telh a, ka lo suangtuah ngai lo leh ka duh ngai hauh loh thil chu kan lo ti ta a, mi nu lan tu ka lo ni reng mai. Hetih lai hian Rinzuala chu a tleirawl ve uai tawh a, a kum phu lo hian a taksa a lian a, a pa pawh hian a zah ru hle tih ka hria. An mumang lamah pawh an la hmuh loh tur thil an chhungkaw chunga ka thlentir avang chuan a pa nen an inlaichinna chu a chhu chat a, khami nia a pa rilru natna kha engtikah mah a reh tawh lo ang. Ka inhua a, ka inten ngawih ngawih a, thih chakna khan ka khat a, ka khawvel kha a tawp a ni ber.”A thaw ta huai a.

Ka thaw ve ta hak hak a, a thusawi chhung zawng khan ka lo thaw tha ngam lo tih ka hrechhuak chiah.

PART XX

Ka nu muhil bam chu ka melh tlawk tlawk a, keini hi engtia vanduai bik em em nge maw kan nih le? A hun hrehawm paltlang avangin ka na a, ka pa chu ka han dem dawn ngawt na a, engvanga ka nu khan a dik a nih chuan ka pa hnenah khan thudik hailan nan chuan engkim a huam mai loh? Chung chu a ni ka rilru a rawn lang chu, ka pa dinhmun atanga ka thlir khan, ka nu in ngawi renga a kalbosan khan ka nu chu a dik lo a ni tih a tichiang ve thei tlat a, inkawp lo tur an lo ni reng reng pawh a ni mahna!

Khawvar dawn lamah chuan ka lo chhing sek a, ka harh chuan khua a lo var uar tawh. Ka nu ka en a, a lo mu tawh lo. Thawh tumin ka han inbeng kang a, ka nu chu phone hmang mawlh mawlh hian a rawn lut a, min hmuh chuan a phone biak lai chu dahin min rawn pui vat a.

“I pa in I chanchin min rawn zawt a”a tim deuh dak a, chutia I pa a tih chuan keipawh chu ka phu deuh zawk a. “I pawm leh pawm loh ka hrelo a, mahse, khatia ka sawi kha a ngai si a”inthiam lo hmel tak chuan a han ti a.

“A pawi lo, a pawi hleinem, I sawi thei alawm”ka ti a, ka pa tia koh chu ka tan harsa mah se ka nu in a sawi chu a pawina a awm lem lo.

“Joe kha doctor in a office-a hmu turin nimin khan a ti a, hei a rawn la thleng lo a, keimah zawk hi va kal ngawt ila tawng ka hrethiam ve mang awm si lo”a ti a.

“A rawn thleng mai ang, nang chu tihian lo awm hahdam rawh”ka ti a.

Pawnah chuan boruak dang hip ka duh avangin ka chhuak a, gate a Joe rawn lut chu ka lo thlir reng a, min hmuh chuan a then sak a.

“Morning naute, I mu tui em?”a ti a. Ka lu chu ka bu nghat a, “I nu in min rawn kaitho hma ropui si”a ti a, a nui zui vak a.

Ka nu hi ka hre tam lo na a hetia ka han hmuh leh chinah ringawt pawh hian thil tih zung zung duh mi a ni tih ka hria, ka lo then ve sak a.

Doctor hmu turin min kalsan leh ta a, keipawh rei awm lo in ka lut ve mai a, ka taksa chau deuh reng chuan min tinguai vek mai. Ka nu chuan min chul heuh heuh reng a, ka rin aiin Joe chu a rei zek lehnghal. Ka nu pawh chuan sawi lem lo mah se ngaihthat lohna a nei tih ka hre mai a, tumah mah chuan sawi chhuah kan tum lo mai chauh niin ka hria. A tawpah chuan a rawn lut ve ta hlawl a, lehkha sen leh a var hi a rawn keng lut  a, a hmel atang chuan eng boruak chiah nge kan tawn tih hriat ka tum a, mahse, mi inthup thei tak Josua hmelah chuan engmah hmuh tur a awm lo.

“A rang lama zai hi duhthusam ber a ni a, doctor duhdan takah chuan tunkar tawpah hian zai nghal mai a duh a, chhungkua lo inrawn ula a ti a”a han ti a.

“A hlauhawm viau em? Engtiang chiahin nge a natna hian nghawng a neih?”ka nu chuan a lo ti a.

“Cancer ni lo mah se a hnathawh hi cancer ang chiaha awm thei a nih avangin a rang lama chet lak vat hi doctor duhdan chu a ni a, zai hlawhtlin ngei pawh a inring khawp mai”Joe chuan a ti a, tlemin a aw chu zam aw a tel in ka hria, ka ngaihbel pawh a ni maithei e.

Ka inngaihtuah nasa khawp mai, ka nu leh Joe chu inhnawh puar turin ka tir chhuak lui a, keimaha awm ka duh tih ka hrilh a, min ngaihtuah viau mah se min nawr luih an tum lo. An kal hnu chuan ka rilruah eng engemaw a rawn lut a, a tawpna chu Rinzual tho a ni. Chutia ka ngaihtuah roh roh lai chuan ka room kawngkhar chu a rawn ri rak a, Joe te an lo let leh ta anih hi ka ti rilru zo chiah a, Rinzuala zawk a lo ni. Ka phawk deuh hra a, Mizoram lama a let leh daih tawh ka ring kha a ni a, eng nge a la tih cheu ang?

“Eng nge I rawn tih dawn?”a mah pawh en lo chuan ka ti a.

Rosy a rawn pen luh rual chiah chuan ka kut ka hum ruh mek chu ka thlah dul ta zal zal a, rawn kal tura ka duh loh ber pahnih chu ka hmachhawn mek a ni si a.

“Ka hmu leh thei che chu ka lawm hle mai, hotel atang khan I lo chhuak daih a, I awmna kan hre si lo a, kan haw tum pawh kan sawn hlat a ngaih phah ta hial si a, Rinzuala tan hian eng ang takin nge I lo pawimawh chiah le?”min zawt pawh a ang lo.

Rinzuala chu a rawn inrawlh vat a, Rosy chu a khak zeuh tih ka hmu hman hram a, ka be chak hlawl lo.

“Lawmzuali hi amaha biak ka duh a, min lo chhuahsan phawt rawh”a ti a.


“Rinzual..”mak ti zet hian a vin deuh tuar a.

“Ka sawi ang chuan ti mai rawh. Vat…”kawngkhar chu a hawng a, lungawi lo em em hian Rosy chu a chhuak a, kawngkhar chu na tak mai hian a rawn khar zui bawk a, ka phu nasa ngei mai.

“Ka ngaihtuah zia che hi I hria em? Eng vangin nge ngawi rengin min kalsan leh tak? I ngawih reng vanga kan tawrhna zawng zawng hi a tawk em em tawh lo em ni?”a chal chuan ka chal chu a rawn si a, a mittui chu a tling pam a.

Ka en a, ka en nawn leh a, mahni induhtawk ve tak Rinzuala mitah mittui a tling ve anih chu. Ka maimitchhing a, ka ngawih reng vanga kan tawrhna chu eng nge? A thusawi awmzia hi engmah ka hrethiam lo.

“Rinzual, ka nu te an rawn let leh tep taw hang”ka ti a.

Ka nu tih ka sawi rual chiah chuan a inla hrang a, a hmel chu a danglam nghal vek bawk. Ka hmai chu a rawn chul a, engmah sawi lo in a chhuak ta daih a, kawngkhar chu ka en renga, rei vak lo ah darthlalang atang chuan min rawn en leh tawk tawk a, rei min en lo in a kal a, a lan theih chhung chuan ka thlir ta reng a.