GIVE INTO ME Part XVI-XVIII

GIVE INTO ME (PART XVI)

Mami Lalhmangaihzuali Chawngthu

Engmah harsatna lian tawk lo in ka ni tin hunbi chu ka chhiar chho leh bek bek a, ka rilru zawng zawng ka hnaah ka pek avangin thildang ngaihtuahna hun ka nei lo a, chu chu ka tan tak hian a tha zawk. Ka lu hai zeuh zeuh hi chu ngaiah ka nei deuh tawh a, damdawi ei lai ka neih avangin ka hlauthawng em em lo. Ka email erawh ka check regular hle a, Brazilian doctor fel takin report kimchang min rawn pek hun hnaih ah phei chuan ka check ngun zual a, ak beisei ang erawh chuan ka dawng mai lo thung. Hah hnepin ni ka hmang ral a, mut siai siai chu ka chak tawh tak zet a ni. Ka inbual zo mu tura ka insiam lai mekin phone call ka dawng a,  Joe a lo ni a, inhualna an neih tur chungchang min rawn hrilhin kal ve ngei tura min duh thu a lo ni. Keipawhin kal theih ngei chu ka tum a, ka hnaah ka chawl hman meuh ang em tih erawh ka la hre lo. Ka mut hmaa ka tih ngei ngei pakhat ka email chu ka han check leh thuak a, mail pakhat thar lam tak ka dawn chu ka hawng vat a, thla khat chuang zet ka nghah tawh, ka nghahhlelh leh huphurh ni lawi si ka test result chu a lo ni. Hmanhmawh takin ka han print chhuak a, keia hriatthiam rual a ni lo. Ka phone chu ka han ban a, Joe chu biak ka han tum a, a nupui neihna tur tibuai lo thei ang zawnga chet ka lak ve chu a ngai tih ka hre chhuak a, be ta lo chuan keimah ngeia engkim hma chhawn chu ka tum ta zawk a ni.

Ka chawlh zeuh zeuh tawh avangin chawlh han dil leh chu ka huphurh hlur tawh a, ka hriselna ka ngaihpawimawh a tul hmasa tih erawh ka hre si. Chutia rilru nuam lo taka ka awmlai chuan chung lam hian rem min lo ruat sak zel ni hian ka hria, Delhi ah conference awm turah keimah min han detail leh ta zat mai a, ka hahdam huai mai. Chanchin min ngaichang ve reng tu ka nu chu ka han bia a, ka hna thila kal tur ka nih thu ka hrilh a, a bak hrilh ka tum lem lo. A remchan hmasak berah min rawn tlawh a tum thu a sawi a, mahnia awm thang ka nih vang hian midang ka mamawh lo viauin ka hre thin a, nu te meuh chu a dan a lo dangin a lakah hian aruk tak chuan ka pangchang ve viau in ka hre thin. Han tih lan leh han sawi chhuah erawh ka mizia a ni lo bur a, pasal fanaute neiin a awm tawh bawk nen ka beisei ngam lo a ni ber mai.

Ka rin loh em em thil a thleng leh mauh mai, Rinzuala hmel ka hmuh chuan ka ding chawt a, an tel ve ang tih rin ngaihna ka lo hre tawh lo. Ka hnaah ka buai a, ka hriselna tha lo bawk nen amah ka ngaihtuah loh hi a tam tawh lutuk a, chutia ka han hmu leh pawh chuan keimahah nghawng a nei lian lem lo in ka hria. Inhre ngai lo angin kan inpel nghauh nghauh a, pawi ka ti lo mai ni loin ka duhdan tak zawk a ni. Nihnih chhungin presentation hrang hrang pein kan hotel a him zia te, foreigners tan pawh a him zia chu kan tih lan tum ber a ni a, hetianga conference na a tel thei hi North East-ah chuan Rinzuala leh Guwahati mi hausa Mr. Verma chauh an ni a, hotel ropui sawi zinga Mizo ta ngei a tel ve chu a lawmawm ka ti a, a neitu lam ngaihtuah tel lo a chu rilru chu pu ka ni bawk.

“Dinner kan kil dun thei turah ka ngai ngawt a, inhmelhriat hluite kan lo ni bawk a”

Conference room atanga ka chhuak chiah chu Rinzuala chuan min lo pawt dingin chu thu chu a lo sawi nghal tawng a.

“Ka hman lo, helai hmunah hian ka hna pawimawh vang chauha kal ka ni”ka ti a. Kal leh nghal mai tumin ka inher a, ka banah chuan nghet zet hian a lo chelh a.

“Lawmzual, engtikah nge ka thusawi apiang I hnial ziah hi I sim dawn?”a ti a.

Ka nui hak a, hepa hian eng nge a hriat? A kut chu ka bag chuan ka han vai thla a, min khawih chu haw awm tak hian ka han meng bial vel a, a run tawk a tling tih ka hria.

“Min biak tawh loh rak thlengin ka hnial zel ang che, chu hun a thlen thleng chuan a ni mai”ka nui sak a, mahni inringtawk zet hian ka kal san ta a.

Hotel atanga hospital thlen nan chuan darkar khat dawn hun hman a ngai tih ka hriat avangin tha thara kal ka tum ta zawk a. Ka inthlak fel a, ka inbual zawh chuan dinner ei turin ka chhuak a, kawngkhar bulah chuan bang nghengin Rinzuala chu a lo ding reng a, ka hmu chu ka phu chiang kher mai. Kawngka chu a nam hawng rawk rawk a, min nawr lut nghal thuai a. Ka han au dawn a, ka ka chu a hup tlat a, ka au chhuak thei lo. Khumah chuan min nam tlu rawk a, a theih ang angin a hmaiah chuan ham ka tum a, ka ham fuh ta a ni ang, a au thawt a, min thlah nghal a.

“Ka haw lutuk che”ka au nghek a.

A hmai ka ham na thi chu a kutin a han hru a, a nui sung a, ka huat a zual ngei mai.

“Min pumpelh I tumna hian min ti na”a ti ta thlawt a.

“Rinzual, I duh duha I tihkawi tur ka ni lo asin”ka mittui chu a parawl kang a.

Amaha beiseina ka neih ve te kha amah vekin min tihchhiat sak a, a duh ang ngeia kalsan anih hnuah na a ti leh si, ka hrethiam lo a ni. Ka sam hnawk niai chu a ran hui mam a, ka sawi thiam chiah si loh boruak ka tawng mek a ni. Ka huat em em lai leh hmuh ka duh loh viau lai hian ka thlahlel em em reng si, keimah hi ka inhua a ni.

“Lawmzual, tih nat che hi ka duh ngai lo”

“Min tina tho si alawm”

Min kuah thlawp a, ka mittui chu a rawn luang ngiai a, ka tap chhuak ang tih hlauin ka heh chu ka seh fan fan a. Min kuahna atanga tal chhuah chu ka duh a, ka awmdan chu a tlawmthlak ka ti, mahse, min hip bet miau si a.

“Insawifiahna hun min pe ngai tlat lo a, engmah hi I hrethiam lo anih hi”a ti hul hak a.

Ka phone a rawn rik chuan kan inen dun thawt a, la tura min tih chuan ka bag atangin ka han phawrh chhuak a, ka nu hming a lo lan chuan min thlah vat a, chu chu keiin na ka lo ti leh viau lehnghal. Kan inbiak chhung chuan pawn lam chu a thlir ngar ngar a, a hmel ka hmu thei lo na a a rilru natna kha a la pangngai reng tih ka hria.

__*Some broken hearts nevers mend* tih chu story kal lai mek a zawh veleh tihchhuah leh a ni ang. Min lo chhiar sak leh zel turin ka ngen a che u____

PART XVII

Doctor hmaah chuan ka report hrang hrang chu ka han phawrh a, uluk fe hian a bih a, ka zam lutuk chu ka kut a thlan huh dup a, ka kekawrah chuan ka han tat a. Min rawn melh deuh chhen bawk avangin ka zam zual ni hian ka hria. A tarmit chu hmanhmawh lo fahran hian a han phelh a, chiang tak hian ka mitah chuan min en a, hawisawn lo turin ka infuih sauh sauh a.

“Chanchin lawmawm leh lawmawm lo a inkawp tih sawi tlang nghal mai ila a fuh in ka ring”a han ti a.

Ka thaw halh a, ka inthunun theihna ka hloh ang tih hlauin ka maimitchhing a, rilru fim put hram ka duh a ni.

“Cancer chu a ni lo ngei niin a lang a, mahse, naktuk atangin test kan neih that leh vek a ngai ang. Thla khat pawh hun kan nei tawh lo, cancer ni lo mah se a insiam theihna chance hi 98% vel zet  a nih vangin a rang thei ang bera thil kan tih a ngai ang”a ti a.

Ka khaw hmuh chu a fiah lo ruai hian ka hria a, ka beisei ang tak tak ka nih leh si loh avangin ka rilru chu nasa tak a ni. Taxi atanga ka chhuah chuan khua chu a thim tan tih ka hre chiah a, hotel kawtah Rinzuala chu rilru hah hmel tak hian a lo vei tawn chhen a, min hmuh chuan min rawn pan vat a.

“I phone I pickup thei si lo, I chhuahna arei tawh an tis i, engati nge heng hmunah ngaihtuahawm taka I awm reng zel?”a lo ti tawn tawn a.

Ka hmel a hmuh rual chuan a ngawi ta hmak a, min kuah a, engmah ka sawi thei lo. Room kan luh laite chuan ka thinlung hi a so bulh bulh a, ka kawr chung hak lai chu Rinzuala chuan min phelh sak a, a khai tha thlap a. Ka bulah chuan a rawn thu leh a, a awmah ka hmai ka phum a, ka tap ta zawih zawih a.

“Nangmahin kal suh ka ti a ni lawm ni?”ka rilru nat hlau tak chuan a ti sap a.

“Engkim hi keimaha hmachhawn vek ka duh alawm”ka ti a.

A ka chu a ang zuau a, a phone rawn rik avang chuan a ngawi leh ta zawk a. A kekawr ipte atang chuan a phone chu a phawrh a, min kuah bawk si avangin  a phone rawn lekchuah zawnga caller image chu ka hmu chiang ngang mai. Min kuahna atang chuan ka talchhuak a, engtin nge khanu kha ka hriatchhuah loh theih zawk? An inbiak chhung chuan ka inthlak fel a, hahdam takin sofa single ah chuan ka thu a, a khat tawkin Rinzuala chuan min rawn melh zeuh zeuh tih ka hria, ka hmu lo der tlat a, thlahlel viau mah ila a bialnu vang khan ka hnaih tawh tur a ni lo tih ka inhrilh mawlh mawlh a.

“Naktukah ka rawn hmu ang che, khawiah mah ka tello in lo chhuak tawh suh ang che”a ti a. Ka chalah chuan a fawp zeuh a, min chhuahsan ta a. A chhuak chiah chu ka mittui a rawn tla zawih zawih a, ka beisei rual ni tawh lo chung hian engvanga a lakah hian beiseina la nei tlat thin nge maw ka nih le? Hetiang reng reng hian ka tlawm ang tih ka lo inhre ngai lo a, tunah chuan mahni induhtawk ve tak ni thin, luhlul zet kha mipa pakhat lakah ka tlawm leh vawng vawng thin chu a ni si a.

Ka muhil chu ka harh a, ka thlanfim in min lo bual huh hnep a, ka hnungzang rawn na lutuk chu ka eu ngar ngar a, ka luak a rawn chhuak bawk nen ka han tho lui a. Bathroom lamah chuan rei tawk fang ka awm a, luak chhuah tur a awm loh rak thleng chuan ka uak a.  Ka chau kher mai, bathroom kawngkhar ka hawng a, khum thlenga kal leh pawh chu huphurhawm tak a ni. Ka han insang mar a, theihtawp chhuahin khum lam chu ka pan a, thaw hlawp hlawpin ka thleng a, ka taksa na lutuk chu tuar a har ngei mai. Ka khur dar dar a, engtin nge ka phone chu ka lo ah tih ka hre lo, Rinzual number ka hmetchhuak a, tawng chhuak tur pawh ka awm lo, a tawngri engkim hre siin keimah zawk chu hla taka awm ang mai hi niin ka inhria a, ka tawngchhuak thei tlat lo.

Ka chal chu a rawn hit mem mem a, ka mumang ah chuan ka pa hian puan nem huh in ka chal a lo hru a, ka damloh apiangin chutiang chuan a ti thin. Ka nui sak a, thil eng var vek hian ka pa hmel chu a lo chhun a, ka pa ka ngaih em em thin ngeiin chutianga min lo khawih chu nuam ka ti hle mai. Ka han tal deuh a, ka pa hmuh tuma ka mit ka han men leh chuan ka pa a lo awm reng reng lo. Thawm rawn rikna lam ka han en chuan Rinzuala chu ka khum tlanga a lu nghatin a lo muthlu bawrh bawrh a. Ka chal chu ka han khawih a, puan chu a lo la awm reng a. Ka pa emaw ka tih kha Rinzuala vek a lo ni dawn tihna a nih chu! Ka han maimitchhing vang vang a, nizanah khan Rinzuala chu ka call ngei tak alawm, amah awm lo se engtin tak awm ang imaw?

Tihharh hlau tak chuan ka mutdan chu ka han inlet a, ka dar kham na urh avang chuan ka then sawk a, ka mutna bula ka damdawi lehkha leh damdawi let bal te chu ka han hmu a, min rawn hmuh hlima Rinzuala mangan dan turte chu ka ngaihtuah neuh neuh a.

“I tha em?”

Ka chalah chuan a kut chu a rawn nghat a, ka lo bu nghat a.

“Khatiang reng renga khawsik nasa kha ka la hre ngai lo”a ti sup a.

“Ka lawm e aw”ka tih chuan a nui a, a la meng chuang lo.

“I ril a tam em? Reilote ka muhil anga breakfast kan ei dawn nia”a ti a.

Ka khumah chuan a rawn mu a, chutia a rawn mut veleh chuan rang lutuk hian ka inperh tho nghal a, a nui hawk hawk a, a lu chu puanin a khuh a, a hmel ka hmuh theih loh tur lamah a inher a, bathroom lam ka pansan ta nghal a.

__*Some broken hearts nevers mend* tih chu story kal lai mek a zawh veleh tihchhuah leh a ni ang. Min lo chhiar sak leh zel turin ka ngen a che u____

PART XVIII

Doctor sawi ang chiah chuan a bul atangin test kan la tha leh vek a, Brazilian doctor lehkha en chung chuan a hmaa ka history hrereng chungin uluk takin doctor chuan min ching chhuak vek a ni ber. Nilenga chutia test hrang hrang ka neih hnu chuan ka taksa pawh a zawi rawih a, ka chau ngawih ngawih hian ka inhre thar bawk a. Doctor thurawn min pek angin hospital-ah chuan ka riak a, Rinzuala’n min riahpui a tum viau na a ka hnial tlat avangin min hawsan a, keimaha ka rilru kawm ka duh vang a ni pakhat bawk. Ka naupanlai atanga ka hun hman dan zawng zawngte chu a indawtin ka mitthlaah a lo lang a, ka hmuh chak em em thin ka nu nen kan inhmu a, mahse, khawvelah hian rei tak ka dam ve tawh lo maithei. Vanduai tura piang bik ka ni ka tih dawn chuan chutiang em ema mahni inkhawngaih chu ka duh leh lo a, hlimna tam tak ka dawng ve tho a ni tih chu ka inhrilh mawlh mawlh a. Ka wish hnuhnung ber ka nu nena intawn lehna kan neih vang ringawt pawhin hlim tur ka ni. Ka mittui chu a tla teuh a, mal leh khawhar reng renga ka hun ka hmang bikte chu a fair lo ka ti.

Engtin tin emaw ka lo muhil ve mial a, thawm ri nak nak ka hriat chuan ka han meng a, hospital-ah ka riak tih ka lo theihnghilh lek lek a ni. Rinzuala chu thaw ham ham hian a rawn lut a, a thlan a tichhuak nasa tawh hle tih chu a lang reng a. Min nuih sak a, ka lo nuih let ve a.

“Nizanah I natna chungchangah I boss nen kan inbia a, I hriselna ngaipawimawh tur leh a tul tul ti zo phawt turin a ti che a nia. Kan meeting report erawh a lo nghak reng a”a han ti a.

Ka harhchhuak zawk, helai hmun ka kal chhan ber ka hna ka lo ti zo reng reng lo.

“Ka thawn fel tawh tih hrilh che ila I lawm leh viau lo maithei a”a tih chuan a nui chhuak hawk a.

Thawn peihsa diamin ka laptop ah ka dah na a ka password tello chuan a khawih thei lo tih ka hria. Ka nui ve suk a.

“Taxi in min nghak a, kan kal mai dawn em ni?”a ti a.

Ka sam chu ka han zial sawk sawk a, ka drip khai na bur ruak chu a lo la thla ve mek bawk a.

“Engtikah nge ka result chu a hriat theih ang?”ka ti a.

“Vawiin tlaiah kan beisei thei ang”a ti a. Min kai a, taxi dinna lamah chuan kan inzui chhuak ta a.

Hotel kan thlen chuan room lam pan tlang mai ka tum a, Rinzuala chu a ding chawt a, engvanga ding nge tih hriat tum chuan a melh na lam chu ka han melh ve a, Rinzuala bialnu ngei kha a ni tih ka hria. Nui sangin kan dinna hmun chu a rawn pan a, Rinzuala chu ka han melh hrawk a, inthlahrun hmel tak hian a kun deuh a.

“Hei hi em ni Lawmzuali chu?”Rinzuala chu a han nghawk a.

“Aw.. anih hi..”chiang lo ruai hian a ti a.

“Rinzuala nupui hual Rosy ka nia, ka hmu che chu ka lawm hle mai. I chanchin chu ka lo hre tawh a, ka khawngaih khawp mai che”a ti nghal zung zung a.

Ka hmelhriat pawh ni loin ka chanchin a lo hriat chiam chu a tulna a awm ka ti lo a, ak duh lo hle bawk. Ka chanchin engtia thui nge a hrilh ka hre lo a, mahse, kan pahnih chanchin erawh a hre lo tih ka hria, lawm tur ka ni nge ni lo ka hrethiam mai lo.

“Ka kalsan ang cheu”tih leh kal ka rual a.

“A polite lo reuh”Rosy tih ri chu ka hria a.

“Ngawi mai mai rawh”tia Rinzuala’n a khak ri nen; hmuh dun tawh loh ka duh.

Ka ngaihtuahna a thui kher mai, helai hmunah hian Rinzuala leh Rosy kha an rawn kal tlang anih ngawt loh chuan Rosy chu a rawn kal leh hnuhnawh ka ring lo. Min buaipui chhungte khan ka room piah lawkah khan Rosy chu a awm ve reng awm si a, eng chhuanlam hmangin nge min buaipui tura a rawn kal ang tih ka ngaihtuah laite chuan ka rilru hi a na tak zet a ni. Rinzuala ka hmuh apianga a mitmenga beiseina ka neih thin kha a bo theih nan ka lak atanga ka kal botir a ngai a ni. Min buaipuina hi ka tan hlu hle mah se mi pasal ni mai tur a ni tih ka hriatna leh chu a nupui la ni mai tur ka hmuh theiha a inpho lan hian ka natna hi a tih rih belh a, ka hah a ni.

Ka phone ri char char chu ka en ngawt ngawt a, Rinzuala a nih avangin ka la duh lo. Airport-ah ka nu nghakin darkar hnih ka thu tawh a, flight an delay vangin an tum aia tlaiah an rawn thlen a ngaih phah a ni. Ka rin phak hauh loh in Josua leh a nupui hual ka hmu a, ka chanchin ka hrilh loh avangin chutia kan inhmu hlawl pawh mak ka ti hle. Ka nu in chanchin a lo zawh thin avangin anlo inbe pawp reng a lo ni a, tuna ka condition avanga ka nu rilru hahin Joe a lo bia hi a lo ni a. A rang arangin min hmu turin an rawn kal nghal a lo ni. Ka nu rawn thlen hma deuhin anni pahnih an rawn thleng a, rei vak lo hnuah ka nu pawh a lo thleng a, ka thla a muang ta takzet a ni.

Ka thawmhnaw ka pack fel a, Joe nau te inluahna Gurgaon lamah insawn phei kan tum a, hotel bill vel tifelin  Joe chu a chhuak a, a tihfel hnu chuan taxi lain Gurgaon lam panin kan kal nghal a, ka rilruah erawh Rinzuala lakah ka inthiamlo deuh a, chutia ngawi renga kalsan chu dik ka ti lo, mahse, chutiang ngaihtuah tur ka ni lo.