GIVE INTO ME Part XXI-XXIII

PART XXI

PART XXI

Inzaina room ah min nawr lut tep tawh a, ka nu chu rilru hah hmel tak hian a vei tawn chhen a, mi nghah ka nei a, mahse ani chu a rawn lang dawn lo tih ka hria. Ka ngaihtuahna avang chuan ka thaw halh a, ka hmu leh kher ang em tih ka hre si lo.

“Hlau reng reng suh aw Bawihte, tha takin an zai che anga, I dam vang vang tawh dawn alawm”ka nu chuan a ti a.

Ka lu chu ka bu nghat a, ka nu hmel chu uluk fe hian ka en reng a, nu hmangaihna hi a ropui ka ti. A mit chu a bui lak a, keimah vanga a rilru hah na chu a hmelah ka hmu thei. Ani hi awm lo se tun dinhmunah te hian engtin nge ka awm ang le? Ka ngaihtuahna avang chuan ka na zawk a, a hun takah ka nu ka hmu leh chu ka thinlung takin ka lawm a ni.

Min zai turin engkim ruahmanna an peih fel tawh a, inzaina room lam panin min nawr mek a, kawngkhar bula mi pakhat lo ding reng ka hmuh chuan ka thin chu a phu zaih zaih a. Min nawrtute chu ding lawk turin a han hrilh a, ka hmai chu a rawn khawih a, a hmel pawr phang chuan min ti hah!

“I dam that leh hi a ngai ania aw, Lawmzual, thil tam tak hrilh duh ka nei a, tha takin rawn chhuak leh ang che aw”ka beng bulah chuan a rawn ti sap a.

Ka mittui tal chu a kutin a hru a, a lu a thing a, hetiang reng renga Rinzuala’n min ngaihtuah hi ka la hre ngai lo. Ka nu te din lohna lamah chuan a inher a, vawikhat min rawn melh leh a, a kal liam ta. Ka mittui a rawn far fap a, eng nge a rawn sawi kha? Ka dam that leh a ngai a, thil tam tak min hrilh tur a nei tih  a sawi ngei alawm, ni e, ka tha leh ngei ngei ang.

A changing hmun eng lutuk ah hian ka cheng a, a chang leh a thim leh mup bawk a, chutiang chuan eng emaw chen chu ka awm a, mumang ang ruai hian ka hria a, engkim mai chu nunna leh thihna inkar ni vek hian ka hria. Ka mit ka men rual chuan khawl mak pui pui hian min lo hual a, ka hnara an thil vuah chu ka hmu phe ruai a, tumah hmuh tur an awm lo. Ka kut chu tihchet ka tum a, ka tiche thei lo. Ka meng thei tawh lo, ka maimitchhing a, engmah ka hre lo zui leh ta mai a.

“A kut a che ania”

“A mit kha han keu teh”

“A tha e, engkim kha uluk tak vek khan en rawh u”

Nurse leh doctor chu an phe sang sang a, engtia rei nge chutiang chuan ka awm tih ka hre lo a, ka ngaituah thiam hek lo. An reh leh ta thap a, a khawharthlak hle hian ka hre bawk a. Thawm awm deuh chuan min tiharh a, ka mit erawh ka meng peih lo. Ka taksa chu a chau ngawih ngawih a, khawl hmangin ka nun chu an chelh em ni aw ka ti hial a, thihna khawp natna kan tawh lai pawh hian kan ngaihtuahna chhungril ber ah hian fim hi chu a lo awm a ni tih ka hriat phah bawk a. Ka kut chu tuemaw hian a rawn vuan a, a taksa lum veng veng chu ka dam pui hawk hian ka hria.

“Lawmzual, I va mu rei tawh ve, engtia rei nge ka nghah dawn che?”a zawi na a ka hrechiang kher mai.

Rinzuala ngei a ni, min ngaihtuah ve tak tak a nih dawn hi maw le. Ka kut chu tih chet ka han tum a, ka beidawng ngei mai.

“Engtia rei nge hetia awm hi I tum? Lawmzual, ka beidawng dawn miah lo ania aw”a aw ah chuan tumruhna hi a lang telin ka hria.

Thawm dang a rawn awm a, ka kut a vawnna chu a la sawn a, zawi tea phun sar sar ri ka hria a, a hla tial tial a, hriat tur a awm tawh lo.

Ka mit chu ka han meng a, ka nu hmel ka hmuh chuan ka awmna hmun chu ka hre lo. Ka hawi kual a, hlim hmel tak hian min lo en vek chu mak ka ti a. Ka han ngaihtuah ngial hnuah ka awmna hmun chu ka hrechhuak leh chauh a. Ka nu chuan mittui tling pam hian ka harh leh avanga a lawmzia chu a lo sawi mawlh mawlh a.

“Engtia rei nge kan awm tawh?”tia ka zawh chuan, karkhat zet nikhaw hre loa ka awm thu leh ICU ah ka awm char char thu min hrilh a, chiang lo riai hian ka awm lai hun tur awm ang chu ka hre thei a.

“Bawihte, hei I pa Kima anih hi”ka hmaa ding ka nu pasal, Rinzuala pa chu ka han en a. “Sawi hun a ni em ka hre lo a, mahse, I hamhaih lutuk loh nan ka hrilh che a nia”ka nu chuan inthiam loh hmel tak hian min en a.

Pa Kima chu pa hmeltha tak mai, lian tha tak a ni a, Rinzuala nen in anna tam tak an nei a, mahse, Rinzuala chuan a pa a tluk lo nasa hle thung. An pianzia leh nih phung in ang mah se ani hi chu a zaidam hmel thluam thung a, a ngainatawm hlein ka hria.

“Hun rei tak I chanchin hrelo a kan thlahthlam che avangin min ngaidam dawn nia”a han ti a. Ka kut chu  rawn vuan a, an hmela inthiam lohna awm chuan ka awm a tinuam lo zawk.

“Nu, khawnge Joe a awm?”ka ti a, kan boruak rit tak chu tihkian ka duh a ni.

“Ka awm reng alawm Naute..”khum mawng lam ah chuan a rawn dak a, a rawn nui sang a.

“Ka pang a kham hle mai, min tung tho teh u”ka tih chuan rang tak hian ka khum chu an han tikang a, nurse chu a rawn au chul a, chutianga awm chu an la phal loh thu min rawn hrilh a, kan nui ta ham ham a.

PART XXII

Ka tha chho ve ta viau a, damdawiin atanga chhuah mai pawh kan inbeisei ve ta hle. Min zai dawn tuma ka hmuh bak kha Rinzuala ka hmu leh tawh lo. Beiseina min siamsak a, hetia min awmtir leh hi chu a inhmeh ve tawh thlawt a ni. Josua chu an inneihna tur buaipui a ngaih tawh em avangin a haw a, min ngaihtuahzia erawh phone kaltlangin a rawn lantir reng thung. Ka nu leh Pa Kima nen kan pathumin kan awm a, chhuah mai inring kan nih tawh avangin ka nu chuan kan thawmhnaw chu a rem fel mawlh mawlh a, Pa Kima nen tv kan en a, kan reh deuh thiap a. Kawngkhar chu a rawn ri rek rek a, rin loh deuh hian Rinzuala chu a rawn lang hlawl a. Kan lo melh thap a, a tum loh tak a rawn hmuh tel vang a ni ang, a meng phar ve kawk a.  A insum theihzia ka hmu zui nghal, min rawn pan ding a, a nui lui sak a.

“Eng nge I lo an a?”a ti a.

“Ka tha tawh lutuk”ka tih chuan hlim hmel tak hian min en a.

“Ka hnaa ka buai zia chu I hriat kha, ka ngaihsak tha hman lo che a, ka tihpalh tak zet a ni”a ti a.

Chutiang a sawi teh duah chu mak ka lo ti ru hle a, mahse, mi a nileng lo tan  chuan a pa awm vanga chutia ti kher chu a ni tih ka man leh mai. Pa Kima leh ka nu chu inthurual ang hrim hian an tho chhuak a, pawn lamah an insaseng a, tifuh ti zet chuan Rinzuala chu a nui ruh ruh a. Ka kut chu a khal neuh neuh a, a bialnu ang maia min en leh ringawt thin hi ka hrethiam lo. Ka kut chu laksawn ka tum a, a nui ri hak a.

“Min hmusit viau reng suh”ka ti a, ka tum hmak a.

“Hmusit a? Engtiklai mah hian ka hmusit ngai lo che”a ti hmuk a.

Kan ngawi dun ran a, tawng hmasa nih ka tum lo.

“Lawmzual, inti luhlul loin ka thusawi hi ngaithla rawh. Engmah hi awlsam takin ka paltlang bik lo asin. Ngawi renga min kalsan vanga vawiin ni hi thleng kan ni tih hre rawh”a ti charh charh a.

A duh duha a puh tur ka ni lo, kan inkar titawp hmasa tu chu amah hi a ni a, thiam loh min chanter talh a tum chu ka duh lo a ni.

“Ka zawn nasat thinzia che kha I ngaihtuah phak ngai lo ang. Kan inkar a that lehna tur khan theihtawp I chhuah ve kha ka lo ring a, mahse, a teuh lo. Min kalsan kha I duhthlanna thlap a ni tih vawi tam ka inhrilh a, chutichung chuan I chanchin erawh ngaihven ka bansan ngai lo. I pa thlanah kalin vawi tam ka hmuh mial tak chein ka ti thin a, I reh vang vang si. Ka ngaihzual chang chein I pa thlan tihfai pahin I chanchin ka sawi thin asin. Ka hnena I lo let leh ngei theih nan ka duhthusamte ka thlen thin.”a ti a.

Ka chil chu ka lem khalh a, ka pa thlan ka tlawh leh pawh khan fait akin a lo awm reng a ni. Dawt vek chu a sawi lo tih ka hria, mahse, min thlauhthlak tawp dan kha a tlawmthlak ve em a, ka tan chua tawrh har tak a ni tho tho.

“Nupui hual meuh I lo nei hman tho a?”ka aw chu thikna hlirin  a khat tih a hria ang.

“Nupui hual?”a nui hak a, “Rosy I tihna a nih chuan kei chuan ka hual ve hauh lo”a mit a tizim san a.

“Ka pasal hual a tih che pawhin I huat der loh kha”ka ti a.

“Min hual chu a tisual vak em ni? Keiin ka hual let ve loh a hnu”a ti et a.

“I sual si”sawi tur ka hre tawh thlawt lo.


Min rawn thut hnaih a, rem lo zet hian min rawn kuah a, min rawn fawh a tum nia ka hriat chuan ka lo thle sawn vat a. A chek tlak a, min kuahna chu a thlah a, amah pawh chu a inthlahdul ve nghal a.

“Airport-a min zawn pawh khan ka hmu reng che a, pan lo tur chea ka insum nasat zia kha”a han ti leh a. Hmuh inbeisei zeta ka hawi kual vel chu ka mitthlaah a rawn lang a, ka hmu chak em em a, ani erawh chuan min hmu reng chungin min rawn pan a tum der si lo. “Kha pa ka thikzia kha han ngaihtuah tel ve la”a tih chuan Josua ka hrechhuak chiah.

Inthiam lo deuh tak hian ka nui tawi tak a, engtin nge Joe chu ka theihnghilh theih zawk?

“Hun thim ber ka paltlang laia ka kianga ding reng chu amah chauh kha a ni”ka ti a.

“Sawi tawh suh, ka thiam lohzia min hriat nawn tir tawh suh, ka na asin”a ti chuai raih a.

“Ka tan I awm reng dawn tih min tiam hnu lawkah I thutiam sutin mal takin min awmtir ania, ka hun hman chhoh dante kha ka ngaihtuah ngam lo zawk”ka hnuk chu a ulh deuh tlat a.

“I kiangah awmin I tan ka awm reng tawh dawn alawm”a ti a.

“Tunah chuan heng ka natna zawng zawng nen hian ka pan thei tawh lo che”

Ka hmui chu a rawn hup vat a.

“Chu thu chu vawikhatmah sawi tawh suh”a ti a.

“Ka chau, ka mu duh”ka ti ta daih a.

Ka puan chu min sin that tir a, a kal mai dawn emaw ka tih chuan a rawn thu tha leh a.

“Engtin nge awm ila I duh? i duhthlanna chu ka zah sak ang che”a ti a.

“Unau angin min en rawh”

Ka fiamthu anih ringin min melh vat a, ka lo thutak hle si.

“Lawmzual..”a tichang fak a.

Ka nu leh Pa Kima chu an rawn lut a, Rinzuala chuan melh khat pawh a melh lo.

“Ka rawn bia ang che”a ti a, an hmuh lai chuan ka biangah min fawp a, ka lo ip zawk a. A kal chhuak ta nghal a, Pa Kima chuan a thlir zui vawng vawnga, a rilru tur ang chu hrethiam vein ka inhria.

PART XXIII

Ka nu remti lo chung chu ka inah ka awm lui a, ka hna chu ui viau mah ila zawm leh mai thei ka nih loh avangin ban ka dil a, ka theih hun huna zawm turin min ti hram a, kei aia thiam an tam hle laia heti taka min ui der ve chu ka tan malsawmna a ni. Mizoram boruak nuam zet ka hip leh theih avangin ka lawm a, ka let leh tawh ngai lo ang han ti thin mah ila hei lo chu ram ka lo nei reng reng lo. Ka awmpui tura ka nu ten an rawn awm phei tir Mabiaki nen chuan kan inrual tawk hle a, titi duh tak mai a ni a, kan pahnih chuan kan inkawm thei viau a, ka khawhar pawh a hnem hle thin. Ka taksa a la chak loh avangin inah ka tawm reng a, pawnah ka la chhuak miah lo. Vawihnih vel chu Rinzuala  a rawn kal tawh a, ka muthilh lai ve ve anih avangin ka hmu lo. Keimah vangin hna pending a ngah ang tih ka hria a, tin, rawn kal fo lo se pawi ka ti hran lo bawk.

Tlai khat chu kan chaw eikham ka luak vak mai a, ka chau ngei mai. Mabiaki chuan ka nute phone a tum a, ka remtih loh avangin a be ta lo a, hotea tih buai reng chu ka duh lo a ni. Chumi zan chuan ka mu tlem kher mai, ka taksa chu a za vek a, damdawi chu thlan tla zawih zawih in ka ban a, ka ban fuh hlauh a, ka tirilah a khur a, Mabiaki chu ka ko mai dawn em ni ka ti rilru hman hial a, damdawi ka ei hnua ka zia tak deuh avang chuan ka ko duh ta lo a. Ka rin aiin kei hi ka na a ni, ka pawm duh lo mai mai a ni. Mahni inkhawngaih hi a sawt lo tih hre mah ila ka tap ta nghek a, ka thawl hawkin ka hria.

“Bawih, nizan I mu tha lo ni maw?”Mabiaki’n min hmuh veleh min zawt nghal a.

“Ka mu tui lutuk alawm”ka tih chuan a awih lo hmel hle.

“Vawiinah I nu  rawn kal a tum a”a ti a.

Ka ngai ve tawh reng reng bawk a, rawn kal se pawi ka ti lo. Pasal fanau neia awm a nih tawh avangin a nazawnga a rawn kal erawh ka duh hauh lo thung. An theihtawpin min enkawl tawh a, a bak zel chu ka beisei ngam lo a ni. Ka harh deuh inbeiseiin ka inbual a, ka harh phah chuang der lo. Ka mu deuh ngat ngat mai a, khawsikin min thlah meuh lo chu a ni. Ka nu rawn thlen laia mut chu ka duh lo viau na a ka dan theih a ni si lo. Ka nu kut vawt raihin ka chal a rawn khawih chuan ka harh zawk a, min ngaihtuah hmel tak hian min lo en a, ka nuih sak a. Ka khum bula sofa ka dah ah chuan a thu a, ei tur min rawn ken chu siamsa diamin a lo chhawp bawk a.

“Bawihte, I pa Kima(I pa tia vawikhat a sawi bak kha a sawi leh tawh ngai lo) nen kan sawi dun a, checkup tura kal leh hi a tha in kan hria a”a ti a.

“Ka tha lutuk alawm, kal kher pawh ngai ka ti lo”ka lo ti vat a.

“Thla a veil eh tawh a, kal chu a hun tawh reng reng alawm”a ti ta zel a.

Ka ngawi vang vang a, ka dam that kha chuan ka pa pension ka lak hian min chawm zo viau kha a ni a, tunah erawh natna khirh tak vei chung chuan eng tham mah a lo ni lo. Ka pawisa khawl tlem la awm chu ka rilruin ka han chhut a, neih ka nei tawh lo hle tih ka hrechiang bawk a.

“Kan theihtawpa enkawl che hi kan bat liau liau a ni a, inthlahrunna tur a awm lo ania”ka rilru hria ni awm tak chuan a ti a.

“Ka lo ngaihtuah ang”ka ti ta ringawt a.

Ka nu haw hnu chuan ka inngaihtuah nasa tawh khawp mai. A tawp atawpah chuan an duhdana awm mai chu tha ka ti a, ka thutlukna erawh ka hrilh mai lo.

MAbiaki chuan thleng a sil mek a, kei erawh TV ah chanchinthar ka en a, kawngka kik ri pawh ka lo hre der lo. Mabiaki’n lo lut rawh a tih chuan ka va ngaihven ve ta chauh a, Rinzuala chu inthlak pawh inthlak lo chuan a rawn lut hlawl a, ka hmu khat bawk a, a cher kawkin ka hria. Ka thutna lam a rawn pan ding nghal a, ka bulah chuan a rawn thu a.

“Ka rawn hmu zing thei lo chea ka tihpalh aw”a ti a.

“Inthiam lohna tur vak a awm hleinem, I unaunu kha ka ni ve mai a”ka ti a.

Za lo zet hian a nui a.

“Ka unaunu hi kan fawp teh ang”ka beng bulah chuan a rawn ti su su a.

“A teuh…vang”ka lo ti hrep a.

A nui hak a, thutak zet hian min melh chhunzawm a, ka zam duh der lo.

“Lawmzual, kan pahnih chiah hi inngaihtuah ang, a hma ang khan awm leh ang”a ti a.
“Rinzual, mi pangngai pawh ka phak tawh loh hi, ka natna hian engtikah mah min kiansan tak tak dawn lo. Mi tha tak tak I hmu a, Rosy pawhin tih takzetin a duh che a, kei natna in a tihbuai reng nena hun hman chu a thlakhlelh awm hauh lo ang”ka ti a, ka rilru dik tak pawh a ni.

“A tira I laka ka thutiam kha tihlawhtling turin ka theihtawp ka chhuah ang, chance min pe rawh, khawngaih takin”a ti a.

Min khawih a tum chuan ka lo indang hram hram a.

"Lawmzual, harsa viau fo teh suh"a ti a, na tih hmel zet hian min melh bawk a.

"Rinzual, kan relationship hi a workout tak tak i ring em ni?"ka ti a.

Min chhang lo chuan a bu nghat ringawt a. Thawk ka han la a, keichuan ka ring lo a ni tih sawi tlang mai chu ka duh a, ka ka ka ang zuau na a ka ngawi leh ta zawk a.

Ka bulah a rawn mu a, nghet em em hian min kuah bet tlat a, a lamah min kuai her a, kan mit leh mit a intawn chiah chuan ka mur seng seng a, a hmaa ka rilru puthmang lo la danglam lohzia pawh chiang takin ka hria. Ka hmai chua chul heuh heuh a, ka natna avanga ka taksa cher ta viau avang chuan hrehawm ka lo ti ru hle a, mahni tawka nalh leh mawi ka intih vei thin nen!

"Engmah ngaihtuah lo in, kan hmahun tur pawh ngaihtuah miah loin tunah hia chuan awm ang. Ka chau zo tawh a ni"a ti a.

A lamah min pawt hnai leh hret a, kan insi lo chauh tawh a, a thaw lum ham ham chu ka hre thei a, a lakah hi chuan ka tang rei thei lo hle tih ka hrechiang a ni. Ka hmui chu a kut nel thep chuan a khawih a, chutah duat tak si, thlahlel tak si hian a a rawn fawp ta vwwng vawng a. Chhan let nachang pawh ak rhe lo, ka awm ngai chuan ka awm reng ringawt a, a aia uara min rawn fawh leh takah chuan keipawhin ka lo chhang leh let ve hmiah hmiah a. Hun rei tak inngai leh inthlahlel dun takte chuan pawisak kan nei tlem khawp mai. Ka kawr raw nhlim tumin a rawn kun hniam hreta , a kutah ka lo khawih fuh a, ka tum loh tak maiin a zungbun bun lai chu ka khawih fuh a, ka tawlhsawn rang kher mai.

"Eng nge?"a ti hluk a.

Ka insiam that tak mawlh mawlh avang chuan a ngaihna hrelo zet hian min en reng a, ka tah chu a chhuak ngawih ngawih. Engvanga awlsam taka a duhdan awm thin nge ka nih ka hre bik lo, hei erawh ka hrechiang, Rinzuala hi ka hmangaih a, ka hmangaih tak zeta ni. Mahse, a hmelma fanu ka ni tlat a, phuba lakna satliah ka ni lo ang tih tunge sawi thei? Namen loin hlauhthawnna hian min rawn tuam a, ka thin chu a phu zaih zaih hial a.

"eng thil tha lo nge ka tih leh tak?"ka darah chuan a rawn vuan a, amah chu ka hlau zo vek tawh.

A kut chu ka thing thla a.

"Lawmzual, i awmdan hian min tihrilhhai tak zet a ni. Min thlakhlelh ve zia chu tuna hpawh i tilang zochauh a ni lawm ni?"a ti a.

Diman tel miah lo hian min hrawm nawk a, min rawn fawp bawrh bawrh a, a mak lutuk, hlauhna nasa lutuk hian min tuam a, ka au ta vak a.