GIVE INTO ME Part XXIV-XXVIII +EPILOQUE

PART XXIV

Ka nuna hun thim lai ber ka pal mek a, ka paltlang zo ang em ka hre lo. Ka chhehvela mite chu ka tana hlauhawm an ni vek mai hian ka hria a, a chang chuan rilru pangngai tak ka pu thung lawi si. Ni tin mai hian ka taksa chu a tau tial tialin ka hria a, chungte chuan min ti na zual hluah hluah bawk a. Ka nu chuan min awmchilh chawt a, ka chet hlek chuan min ngaihven turin MAbiaki chu a mitmei vat zel, chung chu ka hai hauh si lo. Phaia inentir leh tura kan kal tum lai takin ka doctor a zin a, kan sawn hlat phah ta kha a ni a. Kan kal theih hun tur ngaichangin Pa Kima chu a buai hle tih ka hre bawk a, heng ngaihsakna zawng zawng hi ka phu reng em ka hre lo. Ka room ah thlalak hlui ka en a, ka pa nena kan thlalak chu ka chap darh nuai mai a, ka nu rawn luh lai reng ka hre lo. Ka darah a rawn vuan a, ka thil en lai chu hmanhmawh takin ka lakhawm a, ka nu chuan ka kut chu rawn chelhin a lu a thing a, ka nu tana hmuh nuam a nih ka rin loh vang a ni.

“A pawi lo, a pawi ka ti reng reng lo.” A thaw halh a, “A pawi ka tih ber zawk chu khang thlalak zinga hmuh tur ka awm ve lo kha a ni asin”a ti a. A hmel chu hmuh hrehawm ka ti.

“Nu, heng hi ka dahbo vek thei alawm”ka ti a.

A nui lui sak a.

“ I pa hmangaihna che kha engtikah mah kei hi chuan ka tluk zo ve dawn lo. Ani chuan nupui dang pawh nei loin a tul pui thak che ania, Bawihte, I pa kha ka va tluk lo tak em!”A ti ta tlawk tlawk a.

Ka kut chu a vuan a, a fawp a, a mittui chu ka lakah thup a tum hle tih ka hria, mahse, a far zawih zawih a. A kut chu ka chul a, a kianga ka awm thei ringawt pawh hi ka lawm a ni tih chu hrilh ka chak a, mahse, ka tawng chhuak thei lo.

Pa Kima leh ka nu nen kan pathumin Delhi lam pan turin kan inbuatsaih a, ka nau Mapuia (ka nu hian Pa Kima lakah fapa a hring a, Rinzuala nen kan nau intawm tihna a nih chu) pawh min thlah turin a rawn thleng tawh a. Kan awm chin tur a hriat loh avangin ka thawmhnaw pawh Mabiaki chu min kentir tam deuh turin ka hrilh a, a ruk tak chuan hlauhthawnna thuk tak ka nei a ni; zan lamah chau hnawpa ka luak leh avangin. Dressing table hmaah chuan ka thu a, darthlalanga ka hmel lo lang chu uluk tak hian ka han thlek a, ka hmai dang bam chu ka hmuh hmaih lo. Ka hup a, tis en siah hmuh tur pawh a awm tawh lo. Room kawngka chu a rawn ri rak a, Mabiaki chu a rawn lut a, ka lo nui lui ngial dawn a, ka thei ngang lo. Ka thutna atangin ka tho a, ka lu chu a hai deuh muai muai reng a, chu erawh ka sawi lang duh lo. Bathroom ah chuan ka lut a, ka luak thei hlauh anih chuan ka harh hawk ka ring a, ka lut fel hman tawk a ni. Ka luak leh ta nghek a, MAbiaki chuan bathroom kawngka chu a rawn kik a, hawn sak turin min rawn au a, mahse, tuman min hmu lo se ka duh zawk. Zawi deuh tak hian ka han chhuak a, mangang zetin ka chhungte chu ka khumah an lo thu a, Mabiaki chuan min rawn kuah vat a, ka chau ta takzet a ni. Sana chu ka han en a, kal a hun hnai tawh tih ka hria, hetiang ngawt chuan thui ka thleng dawn lo tih ka hrechiang si. Ka khumah chuan min muttir a, a tul anga awm zel chu an han rel chawpchilh bawk a, keipawh ka that leh mai ka ring a ni.

Ka muhil ka harh leh chuan damdawiinah ka lo awm tawh a, engtik laiin nge min kalpui tih reng reng ka hre lo. Ka hmuh hmasak ber chu Rinzuala a ni, rilru hah hmel tak hian min lo en reng a, ka meng chiah chu a thaw huai hian ka hria. Min rawn pan vat a, ka nu awmna ka zawh chuan min chhang lo. A kawng a dawm a, thil tam tak a ngaihtuah tih ka hria, a hnaah a buai tawk em em a, kei min rawn buaipui chu ngai ka ti loa, ka nu te an awm tho avangin a hmel hmuh loh chu ka duh zawk.

“Ka hlauhthawn zia I hria em? Inenkawl uluk turin vawi tam tak ka ti che a ni lawm ni?”a ti a.

Ka chhang lo. A thusawi chuan sawtna a nei lo tih a hria a ni ang, a hui pawp pawp a, min ngaihtuah ve hle niin a lang. Ka en reng a, kan inhmuh loh chhungin a cher ve deuh niin ka hria a, a hnaah a thawhrim a ngai a, keiin ka lo tibuai ve zel chu ka inthlahrung a ni. Ka kianga a awm piangin ka hlauhna hian min tuam thin a, min hrethiam takin ngai ka awh hma chu min hmuh rih loh tur thu min hrilh anih kha, ka chanchin a hriat erawh chuan a ti chi-ai ve hle a ni ang, a hmel a rawn inlan leh vat danah hian-

Ka mutna bulah chuan a rawn thu a, ka kut chu a han vuan a.

“Lawmzual…”

“Rinzual..”

Kan inko rual thawt a, kan inen a, kan nui dun ta hak a.

“Sawi hmasa rawh”a ti a.

“Min ngaihtuah tawh lo turin ka duh che a ni.”

“Chu chu I duhdan a nih chuan  ka thei lo tih ka hrilh tlang tawp ang che”a ti a. A aw chu a han thian a, “Min la hlau em?”a ti dam thluam a.

Ka lu ka thing a, a nui suk a. Ka hmai chu a chul heuh heuh a, hmuhnawm ti hmel taka min en reng chuan ka chhiat tawh tur zia min hriatchhuahtir a, ka hmai chu ka hup a, ka kut lasawnin ka biangah chuan a rawn fawp a.

“Innei mai ang”a rawn tichhuak hlawl a.

Ka meng zau kawk a, eng thu nge a rawn sawi kha? Ka melh ta reng a, a aia chiang zawk hian ka bengbulah a rawn kun hnai a.

“Min nei rawh”a han tinawn leh ngat a.

Ka puan sin lai chu ka pawt chho tawk a, ka inkhuh a, ka thinlung hi a na a ni. Ka hmangaihzia ka inhria, mahse, ani hi ka nei thei lo ang. A hma hun turte ka thlir sak a, hmabak eng tak a neih laia kei kher a nun tichhe tura ka awm tur chu ka ngaingam lo a, engtiang chiaha nasa in nge ka tihbuai a la ngaih dawn tih phei chu ka ngaihtuah ngam lo. Ka puan chu a han pawt hawng a, a mitah chuan ka lo melh kal a.

“Unau an innei ngai hleinem”ka ti a, min hlat theih nan chu chu ka sawi a ni.

“Ka unaunu I ni lo, I ni ngai lo bawk ang. Kan inhriat tirh ang chiah khan awm leh ang”a ti a.

“Min khawngaih hian ka chakna ka hloh tih I hria em? Tu khawngaih mah nih ka duh lo”ka ti sap a.

A tho thurh a, tukverh chu a nam hawng sawk a, pawn boruak chuan kan inkar a siam that theih beisei niawm tak hian boruak chu a hip kawk a.

Rinzuala haw hnu chuan ka ngaihtuahna a kal thui ngei mai, min khawngaih vang ringawta min neih chu ka duh lo a, ka lo suangtuah thin dan nen a inan loh em avangin pasal neih lah ka duh hek lo. Pa Kima rawn luh lai pawh hre map lo hian ka rilru ka lo kawm a, a rawn khuh chuan ka lo phu zawk a.

“Bawihi, I nu tluang takin athleng thla tawh a, keini pahnih pawh kan chhuah a hun e”a ti a, kan dawt chiaha thlawk turah ticket inthleng duh an lo awm hlauh avangin an lo thleng kual a, ka nu erawh a hun pangngaiah kalin ka buai zual a reh veleh kal nghal turin an lo inbuatsaih a lo ni. Ka drip an khai lai a zawh chuan nurse te an lokal vat a, damdawi eng emaw hi min ei tir a, ka that mai tur thu an sawi bawk a, in lama tlang tawh loa airport lam pan nghal tur kan nih avangin ka sam hnawk niai te chu ka han tawm tha mawlh mawlh a. Hospital kawta Pa Kima leh Rinzuala ka hmuh rual chiah chuan ka thin chu a phu deuh dat dat a, an lo inhnial mek tih ka hriat phei chuan va pawh mai ka hreh ngei mai. Min hmuh chuan an tawng chu a tawp chat a, Rinzuala chuan huat hmel tak hian a pa chu a melh run a, ka haider lui dawn ngial a, a harsa lam chu a ni.

“Keimah nen kan kal ang, mihrangin an buaipui che ka remti lo”Rinzuala chuan a ti hmuk a.

A ngaihna hre lo zet hian ka en dun zak zak a.

“Rinzual, min kalh zawnga I awm hi bansan tawh rawh”Pa Kima chuan a ti a.

“Ka nupui ni mai tur hi ka hriat ngai loh te kuta dah hi ka remti vak lo a, min lo hrethiam dawn nia”a han ti leh ngat a.

Min kai a, a motor awmna lamah chuan min hnuk ta dawr dawr a. Ka va hawi let a, hrilhhai zetin Pa Kima chuan min lo en a, chet ngaihna a hre lo. Ka tap ri hawk a, tutee maw in infiamnana min hmang chu ka na a ni. Rinzuala chu ka bulah a thu a, min kuah a, engkim chu lemchanna zawl ni vek mai hian ka hria.

“Ka enkawl ang che, tute hnenah mah hian ka hnutchhiah thei lo che a ni. I laka ka thutiam tawh kha ka tihhlawhtlin theih nan chance min pe hram rawh”a ti a, ka tla chhuah mai hlauin nghet em em hian min kuah ta hle hle a.

PART XXV

A beisei loh tak thil thleng avang chuan ka nu chu a lawm lo tih ka hria, engtik lai maha amah lawm ngai lotu nena a fanu han enkawl tlan chu a chak lo tih a hriat hle a, Rinzuala hmelah erawh ka nu rilru hre awm ang pawhin a awm ngai lo. A tihtur a ti mawlh mawlh a, ka nu chu awm ve lo ang maiin a en niin ka hre ber. Hei tak hi ka nu rilru tina tu a ni tih ka hai lo. Damdawiin lamah test hrang hrang nei turin kan han riak lut leh a, ka ta chuan damdawiin hi ka in pakhat a ni mai tawh hian ka hria.  Zanah pakhat chauh riah an phal avangin loh theih lohin ka nu leh Rinzuala chu an inbe ve a, vawikhatmah an inmelh lo. Ka nu in min riahpui dawn avangin Rinzuala chu hotel lamah a let dawn a, ka nu awm lai reng chuan engahmah ngai lo awm tak hian ka chalah a rawn fawp a, ka mit sulhin ka hria.

“Engati nge Rinzuala nen kher?”ka nu chu a phun sap a. Min zawt pawh a ni lo, amah leh amah a inbia a ni ber. Ka nu chu melh ngam loin khawdang ka hawi ta daih a.

Ka muhil lai ka han harh chuan mi lo an phe suau suau tawh a, ka nu hmel chu ka hmu mai lo. Ka han inbeng kang a, kan awmna hmun chu ka ngaihtuah ngial pawhin ka hre chhuak zo tlat lo. Ka mutna bula thil intarte chu ka han thlek a, ka hmuh ngai loh hmu ang hrim hian ka awm a, thil thlen dan chhui kir tumin ka ngaihtuahna ka han hmang dawn thin a, engkim mai chu a thim hmuk zel mai hian ka hria, ka hlauthawng tak zet a ni. Ka muhil anga, ka harh hunah engkim a tha leh vek ang tiin ka han insiamrem a, muthilh leh chu ka tum ta ngar ngar a.

Kut vawt raih hian min deh avangin ka harh zawk a, Rinzuala chuan nui var var hian min lo en a, ka han nuih let ve sak a. A lehkha ken chu ensak tumin ka han ban a, a ak tha ta daih a. Min kaitho tura ka tih chuan min han kaitho vat a, pawn lama vah harh ka duh tih ka hrilh chuan phur tak hian ka kawrlum min hak tir a, damdawiin kawt velah chuan kan inkai dat dat a. Thutna nuam deuh mai an siamah chuan kan thu a, boruak chu a vawt lek lek a, Rinzuala chuan ka kut chu a hum lum a, a hmel chu ka en ning thei lo, ka melh tlawk tlawk a.

“Min melh reng bik lo la”a tih chuan ka phu zuk a, a nui hak a.

“Ka melh lo reng reng che”ka han ti tan tan a.

“Lawmzual, ka nupui I ni duh ang em?”a tih chuan a thutak hmel kher mai.

“Rinzual..”

“Khawngaihin min hnial lo hram rawh”ngenngawl zet hian a ti a.

“Kei kher hi tinge? Midang tha tak tak an awm si a, kei dam tur pawha beih tang tang ngai kher hi tinge min neih I duh?”ka ti a.

“Ka tan chuan Lawmzuali pakhat chiah a awm, ka nupui tur”a ti ta hmak a.

“I bialnu pawh ka ni tawp si lo a”ka tih chuan ka hmui a hup rang kher mai.

“Ka la then ve lo hrim hrim che, khang hun chhung zawng pawh khan ka bialnu I ni reng”a ti a.

A darah chuan ka lu ka nghat a.

“Min neih kher a ngai hleinem. Bialpa in a tihtur ang ang chu a hlenchhuak tawh alawm”ka ti a.

“I pa bula ka thutiam kha I la hria em? A fanu hi him takin ka dah ang tih ka tiam anih kha, ka kianga I awm loh chuan I him leh him loh ka hre dawn si lo a, chuvang chuan ka kiangah I awm reng tawh ang”a ti a.

Ka mittui chu ka han hru zeuh a, dam tha pangngai niha ka hmangaih ber kianga awm tluka thlakhlel hi ka nei lo asin. Engtikah nge ka thih ang tia ni tin ka inzawh laia pasal neih chu ka suangtuah pha lo. Tute tan mah hian phurrit nih ka duh lo, ka natna avanga hmangaihna ni lo, khawngaihnaa min neih chu kei hian ka duh ngai lo ang.

“Naktuk atangin chemo an khai che a ngai dawn a”hreh tak chunga rawn sawi chhuak a ni tih ka hria.

“Ka hlauhthawn ang ngei maw ka lo nih?”ka ti chuai raih a.

“A tantir chauh ala nia, chance a la tam alawm”a tih chuan ka kut chu a hmer na zual sauh a.

“Engtia rei nge hun ka neih?”tlang taka engkim hriat chu ka duh a ni.

“Kan fate an puitlin a, tute kan neih hun thlengin I dam ang, min kalsan vat i lo inring ngawt ang e” a ti a. Ka mittui chu ka biangah a luang ngiai a, duat leh dim tak hian a hru a, eng nge ka lakah hian a beisei a, a hmelma fanu hi heti taka a ngaihsak mai le?

Ka nu chu a mit a sen ram a, a tap nasa hle a ni ang, ka inrin ruk anih avangin kei erawh chu min thawng tehchiam lo. Ka huphurh ber zawk erawh chu dam tak tak si lo hian ka chhungte tibuai reng hian ka awm ang tih chauh hi a ni. Chemo ka la tan a, rilru a hnual duh ngei mai. A chang chuan tlanbo daih maite hi ka duh rum rum thin. Chutiang ngaihtuahna ka neih apiang chuan Rinzuala hi chiang takin ka mitthlaah a lo lang thin. Eng nge a chhan ka hre lo, atana tih theih ka neih tlemzia ka hria a, engvanga hrechhuak fo nge ka nih hre lo mah ila ka thinlung chhungril berah hian hmun a luah thuk em a, a hriat hlau takin ka thup tawk tawk mai chauh a ni.

“Vawiin khua chu a thiang nuam hle mai”, parda inzar chu a rawn hlim a, a hmelah chu a hlim deuh sarh hian ka hria.

“Kan haw theih tur thu doctor in min hrilh a, chu thu chuan a tih hlim ve ngei che ka beisei”Rinzuala chuan a han tinawn leh a.

Ka lo nui sak a, ka kianga mite an hlim chuan hlim mai tur ka ni e. Ni zung rawn lutin ka khum a rawn chhun sat sat a, engkim mai chu a thar sar vek hian ka hria. Ka tana engkim huam tute tan hian that chhuah leh tumin ka theihtawp ka chhuah tur a ni tih chu ka rilruah a rawn lian ve ta hle a, ni e, beiseina hi engtikah mah a chuai tur a ni lo reng a ni.


PART XXVI

Mahni in ngeiah chuan natna te pawh hi a ziaawm sawt hian a hriat a, ka pangpar ten mawi takin par an rawn chhuah a, chung ka hmu ringawt pawh chu manhla ka ti. A hmaa lawmna chang ka lo hriat ngai lohnaah lawmna ka hmu thar zel a ni ber. Kawmthlang huanah chuan ka tei vel mai mai a, kawnga daisy lo par chiai te chuan min tihlim a, lawmna tur hi a lo tam mang e ka ti a, hetiang hmu leh theia ka awm pawh hi ka thinlung tak takin ka lawm a ni. Ka hminga min rawn ko vak vak tu an awma ka hriat avangin in lam chu ka han hawi chho a, tukverhah Rinzuala chu a rawn dak a, min hmuh chuan a thaw huai hian ka hria. Kan haw hnu lawk khan sumdawnna thilah a zin bo nghal vang vang a, keimah vanga a pawisa chan hnem turzia leh a hna ka thawh that tir theih loh te chu ka hre ve kar a, a lakah pawh ka inthlahrung em em a ni.

“Khua a vawt si a, rawn chho tawh la”a ti a.

Thuawih takin keipawh chu ka chho ve mai a, verandah ah chuan min lo hmuak a, a kiang ka thlen chuan min lo kuah vat a, inchhungah kan lut a. Mabiaki hmel chu ka han zawng deuh a, ka hmu lo.

“Nizanah Kolkata ah meeting pawimawh ka nei leh a, ka sumdawnna huang hi tihlen belh ka tum a, chumi atan chuan khulam nen inbiakna kan nei a, a hlawhtlin theih chuan ka hrilh hmasa ber ang che”a ti a.

“Min ngaihtuah suh, I hnaah hian I rilru zawng zawng pe la, I hlawhtlin hian ka lawm thin tih hria la”ka han ti a.

“Ka hna ai chuan I pawimawh zawk alawm”a ti a, “Lawmzual, inneih chungchang ka sawi kha ilo ngaihtuah ta em?”a ti a.

Ka ngawi vang vang a, engvangin nge kan inneih kher ang?  Ka kawrlum kilhna chu ka tuai neuh neuh a.

“Rinzual, inneih chu ka duh lo a ni”ka ti a, ka hlauthawng tak zet a ni.

“I phurrit zawng zawng hi min hlan la, keimah nen engkim kan hmachhawn vek dawn a lawm. I natna zawng zawngte, I lungngaihna leh I hlimna te hi a vaiin ka hnenah hian min hlan vek rawh, keimah nen kan nih chuan engmah hian min ngam lo ang”a ti a.

Ka mittui chu a tlak hlau takin ka inseh ruh a, min hmangaih miah lo tih hrereng chung hian a hnen hi ka pan thei lo a ni, khawngaih nih ka duh lo, khawngaihna vang chauha min neih chuan a hma hun ka tichhe mai mai a ni.

“Ka thei lo..”ka ti hul hak a.

“Hun ka pe leh ang che, lo inngaihtuah tha rawh”a ti a.

“Ka chhanna che chu a ngai reng ang”ka ti a, ka tho a, room-a luhsan ka tum a.

“Lawmzual, engvanga min hnar tlat nge I nih hi ka hre lo a ni. I tan hian ka tha tawk lo ang tih chu ka hria, mahse, ka theihtawp chu ka chhuah ve asin. Ka rawn tel ve n ache hian a tin ache a, a tibuai che anih chuan ka inthiarfihlim ang. I hlimna tur leh I hahdamna tur chu engvangin nge ka tihchhiat kher ang?”a ti a.

Min rawn din hnaih a, ka hnunglam atang chuan ka kawngah min rawn kuah a, ka darah chuan a khabe a nghat a, a thaw halh a.

“I rilru I thlak thut anih chuan ka awm reng ang aw”a ti sap a. Min thlah a, a chhuak ta vang vang a.

Room kawngkhar ngheng chuan ka tap ta zawih zawih a, he natna hi ka va haw tak em! A nupui nih maw? Ka duhthusam ber a ni asin, ka thinlung zawng zawngin ka hmangaih a, a ta nih tluka duh ka nei lo. Mahse, mahni hmasial taka ani neih chu ka thei lo a ni. Mabiaki chu a rawn zai lut hlarh hlarh a, ka ngaithla reng a, ka mittui chu hru in ka hmai ka phiha, thil thleng awm lo anga lantir chu ka tum a ni.

Room atanga chhuah pah chuan, “Khawnge I kal a?”ka ti a.

“Kawmthlangah secondhand ka en lawk a, an hawng nalh lutuk asin”a ti bawrh bawrh a.

“I duhzawng a awm chuan la ve la”ka ti a, keimah nena en a duh thu sawiin rawngbawl zawh lama kal chu kan tum a, phur takin rawng chu a bawl ta sauh sauh a.

Korean serial enin thuthlengah chuan kan mu dun ar ar a, ka ngaina lem lo na a Mabiaki duhzawng a nih vangin ka en ve ta mai mai a.

“U Rinzuala hi a Korean e”a rawn tichhuak phawng a.

“Engvang ngawt chuan maw?”ka ti a.

“Changtunu an care dan ang chiah hian a care che a, a nuam ngawt ang. Ka hre tam lo na a a zia hi a Korean tawp”a han ti leh a.

Ka ngawi ta roh roh a, ka nuih te chu a za zawk lek lek mai.

Zanrei tak thleng whatsapp-ah chuan ka online a,  Rinzuala number chu ka han hmet chhuak a, a lo online ve vu mai. A khat tawkin ka en leh zauh thin a, tun ang thleng thlenga biak a nei chu ka thinrim urh ringawt a. Titau deuh hlek hian ka phone chu ka dah a, muthilh ka tum a, ka harh tulh tulh lenghal. Ka phone bawk chu ka ban leh a, whatsapp group a an thusawi hrang hrang chu ka han chhiar kual a, a then chu fiamthute a ni a, ka nuih za chu keimahin ka then ka then a, engtiklaiin nge ka lo muthilh tih pawh ka hre lo. Ka harh chuan khua a lo var tawh a, Mabiaki’n ka room bula pangpar tui a pek paha a zai ar ar chu ka ngaihthla ta reng a, a nun hi a hlim bik riau hian ka hria. Ka phone chu ka han zawng a, ka lukham hnuaiah a lo awm mai lo a. Chhuat ah a lo let reng ka hmuh chuan ka han ban a, message lo awm reng ka hmuh chuan ka han hawng vat a, ka beisei loh zawk Josua message a lo ni. An nupa thlalak min rawn thawn pahin ka dam that leh that lohte min rawn zawt a, an nu in nau a pai ve tawh thute chu a rawn sawi a, ka lawmpui kher mai. Ka lawmpui thute, ka dam that thute chu ka han hrilh ve ta nghal a, u an pai tih ka hriat chuan mahni rila rah ngei fa han neih chakawm ka tih chu a zual kher mai. Ka dinhmun ka en a, engtikah mah ka pai ve theih ka ring lo, khumah mawng lamah chuan ka phone chu ka han theh thla tawp a.

Ka kawrlum chu ka ha tha mawlh mawlh a,  ka pa thlan ka tlawh lohna chin pawh a rei tawh a, kal ngei ka duh a ni. Sitting room a ka va chhuah chuan Mabiaki hnenah thlanah kal ka tum thu ka hrilh a, keimaha ka kal chu a remti lo hle a, mahni ngeia kal ka duh thu sawiin mi ngaihtuah lo turin ka hrilh a, pawnah taxi chang turin ka chhuak ta a. Taxi ka chuanlai chuan ka hnar chu a rawn thi ringawt a, ka shawl chuan ka han hru a, a tawp zui ve nghal mai bawk a. Ni a sa lem lo a, thlasik khua a nih tawh avangin boruak chu a nuam tawk chiah a, khawdan chu a lunglenthlak ngawih ngawih tawp a ni. Ka pa thlan ka thlen chuan nidang ang bawkin a lo fai hiar a, pangpar ka phun chu a lo par chiai bawk a, tihtheih a tam tawh lo na chungin ka hahdam hawk hian ka hria. Ka pa hming inziak chu ka han khawih a, ka pa duhtak ngaih luatah ka mittui chu a tla zawih zawih a. A fanu dinhmun hi han hria se zawng a thinlung nat dan turzia te chu ka hriatsak hialin ka hria.

PART XXVII

Ka muhil chu ka harh hlawl a, thlanah ka la awm emaw tiin ka han hawi kual a, ka awmna chu ka hre thei tlat lo. Ka ngaihtuah ngial a, engmah ka hrechhuak thei tlat lo.

“I lo harh tawh a ni maw?”

Chu aw lo chhuahna lam chu ka han hawi vat a, khum mawng lamah chuan mipa pakhat hi a lo ding reng a. Ka hriat tawh thin ni ngei chuan ka hria, tunge anih tih erawh ka hre thei mai lo.

“Nangmaha chhuak lo turin ka hrilh fo che a ni lawm ni?”lungawi lo aw lek lek hian a ti a.

“Tunge I nih?”ka tih chuan hlauhthawnna eng emaw tak hian min rawn tuam a.

“Lawmzual, min hre lo maw?”mangan hmel tak hian a ti a.

Ka lu chu ka thing a, a rawn kal hnai a, chiang tak hian ka en a, min hriatchhuahtir tum tak hian ani pawh chuan min en reng a.

“Ka hre lo che a ni ang”ka tih chuan a thaw halh a. Ka khumah chuan a rawn thu a, ka hmaiah a chul a, eng emaw ti takin nuam ka ti riau a, hepa hi ka bul hnaia cheng thin a ni ngei ang.

“Han ngaihtuah tha leh teh, min hre thei tawh miah lo em ni?”a ti leh a.

Ka maimitchhing ta ringawt a, engati nge engmah ka hriatchhuah theih tlat loh. Ka meng a, a mittui chu a lo tling pam a, ka lu chu ka han khawih a, a lo intuam bur mai bawk si, kei hi eng ka ti ta nge ni?

“Thlanah ka kal si a, tinge hetah ka awm?”ka tih chuan a mittui chu a hru a.

“Ni e, I kal ngei alawm. Ka rawn thlen chuan I lo tlu reng a, I lu ah hliam ilo tuar bawk si, mangang  takin damdawiin lamah ka hruai che a, nihnih chhung zet chu engmah hreloin I awm reng a, ka hlauhthawng hman tak zeta sin”a ti a. Amah vek chuan, “ Lawmzual, ka hlauthawng takzet a ni”a han ti leh a.

“Tunge I hming?”

“Rinzuala, Rinzuala kha ka ni e”a ti dam diai a.

“Muthilh leh lawk ka duh”ka tih chuan ka puansin chu min sin thattir a, ka biangah chuan a fawp a, a kal ta a.

Engati nge ka ngaihtuahna hi a chawlh thup mai chu le? Engkim mai chu mumang ang ruai vek hi a ni a, ka duhdan a ni bik lo asin. Ka mittui chu a rawn tla a, Lalpa, min tanpui rawh ka ti mawlh mawlh a.

Pawn boruak thiang tak chu ka hip vang vang a, ka piah lawka Rinzuala inti chu ka en pah reng a, a chetdan leh awmdanah misual a nih ka ring lo. A kiangah chuan him riauin ka inhre tlat a, min tina dawn lo tih ka hria. A insawizawi zawh chuan min rawn pan a, a nui sang a, he nui hmel hi khawiah emaw chuan ka hmu tawh tlat a ni.

“I tho tha maw?”a ti a, ka lu chu ka lo bu nghat a.

“Vawiin chu ka office ah rawn kal ve rawh aw, I dam tha tawh bawk a, I vah harh hi a ngai a ni”a ti a.

Ka lu chu ka han khawih a, a la intuam bur si a, ka dam tha tak tak ang em tih chu ka hre lo. Ka kut chu a rawn vuan a, a lamah min pawt hnai a.

“Ka nupui tur duhtak hi dam tha vat se, inneih vat hi ka duh a ni, ka nghak thei tawh lo”a ti a.

A mitah chuan ka en a, chiang tak hian min lo en ve reng a.

“Ka thei lo ang, tunge I nih pawh hre lo leh hetiang natna nei chung hi chuan ka thei lo”ka ti a.

“I dam lo em ni?”a ti vat aa\.
“Ka cancer alawm”ka tih chuan a au chul a.

“Thildang eng nge I la hriat?”a ti a.

“Ka hre tawh bik lo”ka ti a, ka ngaihtuahna ka hmang tih lantir nan ral lehlam chu ka thlir ta vang vang a.

Nilengin keimah chauhin ka awm leh ta, chhunah hian Rinzuala kha khawiah nge a kal thin ang tih chu ka ngaihtuah reuh reuh a, a ngainatawm phian bawk si a. Chhunah chuan thingpui ka lum a, ka chet velna chu ka hriat hnu ang riauin ka hre thin a, engtik lai emaw chuan helaiah hian ka kal tawh tlatin ka hria a ni. Doorbell a rawn rik chuan ka hawng vat a, Rinzuala chu kawngka bulah chuan a lo ding a, rawn lutin min rawn fawp a, ka khawng vek hian ka hria.

“Ka rawn hruai dawn che a ni”a han ti a.

A office-ah min kalpui  atum tih ka hrechhuak a, phur tak hian ka insiam a, reiloteah ka inpeih vat a, kan chhuak zui nghal a. Hotel lian tak bulah kan ding a, uluk tak hian chu hmun chu ka han en a, engati nge ka mumanga ang ruaia heng hmunte pawh chu ka hriat ni?

“Chhuk ang hmiang”Rinzuala chuan a ti a.

Kan chhuah rual chiah chuan helai hmunah hian ka kal tawh ngei a ni tih chiang takin ka hria, ka ke pen a tawp chat a, mak tih hmel tak hian min melh a. Ka tukhum chu ka han hiat a, hma lam pan chuan kan kal ta zel a. Rinzuala office kan thlen chuan hahdam tak hian sofa ah ka thu a, ka taksa chu a chau hle a ni ang, engtin emaw tak hian ka awm a, ka muhil zui ta ni mai hian ka hria. Ka han men chuan Rinzuala chu min kuah chung hian a lo muhil sak sak a, tih harh hlau tak hian ka han insiam rem a, ka kut ka lek chhuah zawng chuan Rinzuala kekawr ipte atang chuan wallet hi a rawn tla tawp a, hmanhmawh takin ka chhar a, ah that tir ka tum lai tak chuan wallet chhunga thlalak chuan ka mit a la ta zar mai. Khur deuh chung hian ka han hawng a, keimah leh Rinzuala kan ni. Uluk lehzualin ka han en a, ka hrechhuak ta uai uai mai. Rinzuala kut chu ka han dahsawn a, thawm dim takin ka chhuak ta zal zal a.

PART XXVIII

Ka in ka thlen chuan Mabiaki chuan mittui tla zawih zawih hian min lo kuah a, ka nu pawh chu a bang bik lo. Ka ngaihtuahna fim leh dan chu min lo zawt mawlh mawlh a, ka awmdan chu a make m avangin ka chungah eng nge thleng tih min hrilh turin ka han ti phawt a. Ka nu chuan ka kut chu a vuan a, a mittui chu a han hru a.

“I pa thlana I kal ni khan kan ngaihtuah lutuk che kha Mabiaki nen hian I kal hnuah kan rawn kal ve ta ringawt a, kan rawn thlen chuan mangang takin Rinzuala hian a lo pawm mek che a, damdawiinah ti chiah a sawi a, a motor-ah chuan kan chuang nghal a. Damdawiin kan thlen khan I hb a lo hniam hle a, I tluknaah khan I lu I sawh na hle lehnghal a, nihnih chhung chu engmah hre lo in I mu reng a. Kan mangang hman tak zet a ni. Phaia I doctor khan nikhaw hreloa I tluk hi a hlauh ber anih avangin kan mangang zual em em a, Rinzuala phei chuan a zu be pawp nghal nghe nghe a, a kiangah pakhat chauh awm tura a tih avangin Rinzuala khan amah ngeiin enkawl a duh thu che a sawi a. Midang min hmuh vak chuan I rilru a buai telh telh kan hlauh avangin kan rawn pawh ngam lo che a ni. Doctor sawi ang ngeiin hun rei loteah I rawn tha leh ta hi ka va lawm tak em!”a ti a, min kuah ta ngawih ngawih a.

Kawngkhar chu a rawn inhawng a, Rinzuala chu mangan hmel tak hian a rawn lut a, min hmuh chuan thawveng hawk hmel hi a pu a, ka nu ep zawngin a rawn thu a,  dik tak chuan keimah vanga ka nu a hmachhawn fo a ngai hi pawi ka ti a, ka inthlahrung takzet a ni.

“Mi tihhlauhthawn chiah hi em ni I thiam?”a ti a.

Ka inthiam lo ve kher mai.

Kan pahnihin verandah ah chuan kan thu a, ka kut chu a khal niap niap a.

“Lawmzual, ka hlata I awm hi ka remti lo.”a ti a.

“I hlatah ka awm hleinem, ka mangan apiangin min pui tura lo lang hmasa ber I ni ziah alawm”ka ti a.

“Kan innei anga, hlim takin awm dun tawh teh ang”a ti leh a, tawngkam thiam a ni lo tih ka hriat avangin a duhzawng tlang takin a sawi mai a ni tih ka hria.

Engmah ka sawi thei lo, a darah chuan ka lu ka nghat a.

“Engpawh lo thleng se I kiangah ka awm reng ang, hrehawm lai leh bawrhsawm lai pawhin ka kalsan ngai lo ang che. Lawmzual, engtikah mah ka phatsan ngai lo ang che”a ti a, “Keimahah hian engkim hlan la, I tan ka nung reng ang”a tih chuan a kawnga ka kuahna chu ka kuah nghet sauh a.

“Chemo ka lak a hun leh tep tawh si a, treatment ka lak zawha incheck-up kan zawh fel hunah ka remti ang”ka ti a, hlim hmel tak hian min melh a, nghet zet hian ka kut chu a hmer a.

Ka taksa danglam awm ni tin mai chu ka kham tak tak tawh a ni. Doctor chu ka hmachhawn ran a, ka awmdan danglam thut thut reng ka sawi lai chuan chik tak hian min en a, a ziak leh zauh thin a. A tawpah chuan ka mit chu a han keu a, lehkha hring chu lachhuakin eng eng emaw a ziak teuh a, ward lamah min tir phei a, pawnah Rinzuala chuan min lo nghak reng a, ka hmela hlauhthawnna lo lang chu thup ka tum hram hram a.

“Doctor khan eng nge a sawi?”a ti vat a.

“Engmah chu a sawi lo, eng eng emaw kha chu a ziak nualin ka hria”ka ti a.

“Nurse ho in an nghak reng tawh che a”a ti a.

Ka huphurh tawh tak zet a ni. Rilru harhfim kara na han tawrh chu chhel a har duh ngei mai. Rinzuala chuan ka kut chu a hum ran a, a hmel ka hmuh chuan ka hahdam chawpchilh leh mai thin. Chumi ni chemo an khai zawh atang chuan ka taksa chu a chak lo tlat hian ka hria a, a hmasa aiin ka bet zawk tih chu tu min hrilh hran mah ka ngai lo. Beiseina ka lo neihsan tawh tehlul nen engkim mai chu engmah lo maiah an chang zo dawn hian a lang tlat a, beiseina sang tak nena min thlir rengtu Rinzuala chu ka zah ngawih ngawih a, a hmuh loh laiin ka mittui a tla ngun hle.

Doctor room atanga a rawn chhuah chuan a hmel chu a ngui deuh lap hian ka hria a. Ka lo en chik deuh bawk a ni ang, ka nat dan hian ziaawm lam aiin a tha lo lam a pan tih doctor in ahrilh ngei tih ka hrethiam ve mai.

“Eng nge doctor chuan a lo sawi a?”ka ti a.

“I tha vat dawn tih a sawi loh te chuan eng nge a sawi vak ang a?”nui chungin a ti a, a nui te chu alem vek hian ka hria.

“Rinzual, engtikah nge kan chhuah dawn?”ka ti a, min chhan a huphurh tih ka hria.

“Enteh LAwmzual, reilote kan la nghah hi a la ngai a ni”a ti a, “Kan awm lai la la hian tha taka an enkawl che hi ka duh a ni”a ti leh a.

Ka inlet a, ka mittui chu a tling pam a. Ka inherna lamah chuan a rawn kal a, ka biang chu a chul heuh  heuh a.

“Lungngai ma ta che, dam takin kan haw dawn alawm”a ti a.

Ni thar chuan beiseina eng a herchhuahpui thei lo. Ka beisei ang chhanna ka hmu lo a, ka bei hi a dawng lek lek tawh a ni ber. Phak chap hian Rinzuala chu ka khumah a rawn inthawlh a, ka kawngah nghet takin a kuah a, keimah ka inkhawngaih ai mahin amah hi ka khawngaih tawh a ni.

“Rinzual, kan inneih kher hi a ngai lo ania aw”ka ti a.

“Chutiang sawi suh”a ti nghat a, “I dam vat anga, kan innei dawn alawm”a ti a.

“Beiseina der siamsak reng che hi ka duh tawh lo a ni”ka ti a.

“Lawmzual, thihna in min then hma loh chuan nupa ni turin Pathian hmaah kan intiam hun a lo thleng ngei ang, chu chu keipawhin ka tiam che”a ti a. “Naktukah I natna chungchangah doctor nen thutlukna kan siam dawn a, I nu nen pawh kan inbe tawh a, I nunna thuah hian risk ka la ngam lo. Mahse, I dam leh theih nan chuan engkim ka ti ang”a ti ta a. A biang chu ka chul a, a mittui chu ka hru a.

“Ka hmangaih che”ka ti sap a.

“Chu aia let tam takin ka hmangaih che”a ti a.

Ka en ha a, min hmangaih thu a sawi ve ta nge nge e. Ka nui sak a, a mittui karah a rawn nui ve ta sak a.

EPILOQUE

Lalrinzuala ka ni a, phuba lak chak reng renga nun hmang thin kha hmeichhe pakhat avangin ka nun chu a danglam vek a. Chu hmeichhia chu Lawmzuali a ni, a hringtunu ka hriat chhuah ni khan ka beiseina khawvel chu a thim mup a, kal ngaihna ka hre lo hial a, engati nge midang fa anih loh? Keimah leh keimah chu hmalam pan turin ka infuih mawlh mawlh a, mahse, midangah hlimna ka hmu lo. Ka thinlung hian a pawm a ngai a, ani hi ka hmangaih a ni.

A natna avanga a sam lo tla kawlh chu hrehawm ti tak hian darthlalangah chuan a melh a.

"Pawi ti miah suh aw, i dam anga heng mai maite chu a to leh vat dawn ania" ka ti a.

"Rinzual, a zahthlak e" a han ti a.

Ka mitah chuan ani aia tha hi an awm chuang lo. Ka kuah a, a hmel nur nang chu ka han piai a.

" Kan inneih hun tur thlir zawk teh ang" ka tih chuan a thaw ri hak a.

"Inneih hi chu sawi tawh lo ang" a ti a.

Sawi pui ngial ka tum pawh chuan a ngaithla duh der lo. Kei lahin hlim taka a awm theihna tur leh a duhthusam famkimna tur chu kan inneih hi a ni tih ka hre chiang si a. Ka hmangaih a, min hmangaih a, chu bak eng nge kan la mamawh cheu ang ni?

Amah vang hian hringnun awmzia tak tak ka hre chho ve zel a, engtikah mah ka ngaihdam theih tura ka ngaih loh ka pa nen inrawn in Lawmzuali awm zel dan turte kan sawi dun thei tawh a, hmangaihna hi chu a mak a ni. Kan tih theih ngai reng reng loh tur thlengin kan tih phah hial si a. Ka nu tawrhna kha hriatreng sak ka duh lo a, amah ka hmangaih loh vang ni hauh loin ani chuan hahdam takin khawvel hrehawm ata a chawl tawh a, ka hlimna tur hi a duh ve em em ang tih chu ka ring tawh a ni.

"Neih chu i tum tho em ni?" Lawmzuali nu, ka nu ni ta chuan min han zawt a.

"Ani lo chu neih ka tum lo" ka ti a.

Ka pa nen kan pathum chuan dawhkan kan kil a, kan thil ei lai hu tumah in kan ei zawm thei lo. Doctor sawi ang kha a dik anih chuan hun reilote atangin a hriatna a hloh tan anga, a chhungte ngei pawh min hriat loh a nei maithei. Chung hunah pawh chuan hmangaihna nen ka enkawl zel a ngai anga, ka mawhphurhna chu ka hlen zo lo ang tih min hlauhpui tih ka hria.

"Pastor chu lo bia ula, engkim a hriat lai ngei hian inneih ka duh a ni" ka ti a.

"A rang thei ang berin ka lo be dawn nia" ka pa chuan a ti a.

Ka eizawnna nasa taka tlahniam chu ka hmuh hmaih lo a, chutichung chuan chung aia pawimawh zawk chu ka buaipui mek a ni. Ka nui sak a, sum leh paia pawimawh zawk hlimna hi ka ban phakah a lo awm reng a, ka duhthlannaah a lo innghat thuk hle a lo ni. Gate bul atang chuan verandah-a Lawmzuali thu chu ka thlir reng a. A pangpar duat em em te chuan theihtawpa tihhlim tum ni ve awm hrim hian mawi takin par an chhuang a, ka hmangaih em em tan a ni an par ni. Gate ka hawn rik rak ah chuan a rawn hawi chhuak a, min hmuh chuan a lo ding vat a.

"I lo tha em ka duat" ka ti a. A nui ver ver a.

"I sam mawi chak zia hi i hria em?" Ka han ti leh a. A sam rawn to far tawh chu a han khawih a.

Atana ka lei, sam lem chu ka phawrh chhuak a.

"Kan inneihni atan hei hi ka rawn lei a" ka ti a.

A meng phar kawk a, a hmela hlimna chu a thup zo bik lo.

"Rinzual" a hnuk chu a ulh teuh a.

"Eng nge ni?" Tih pahin a hnungah chuan ka han beng thak thak a.

"Heng hi i tih a ngai lo asin" a ti thawp sap a.

"Hmahun hlimawm tak kan neih hi engmah tihchhiattir ka duh lo"ka ti a.

A ka chu a han ang zuau a, a ngawi leh ta daih a.

"Ka lawm e aw" a ti a, a mittui chu a biangah a luang ngiai a.

"Ka tawn che avang hian ka lawm a, vannei ka inti asin" ka ti a.

"Kan dam dun chhung zawng hmangaiha inpawm a, i tana ka nun zawng zawng hlan hi ka duh a ni" ka ti a.

Min chhang tawh lo, a dingdihlip ak a, ka hmuiah  chuan a rawn fawp zeuh a. Inlakhran a tum lai chuan ka lo kuah nghet sauh a, uar zet hian ka fawp ta vawng vawng a.

Pathian leh kohhran hmaa kan inneih min hriatpui tura lo kal khawmte chu ka han en a, biak ina leng lo khawp hian mi an tlim hmur a. Kan phu lohzia ka hriatin lawm avangin mittui a tla a. Ka hmangaih em em ka nupui ni mai tur chu ka han en a, minute reiloteah ka nupui a ni dawn a ni. Min rawn nuih sak a, a duhawmin a hmeltha tak zet a ni. Inneih thutiam kan lak lai chuan uluk takin Lawmzuali chu ka melh a, ka thinlung zawng zawngin thu chu ka tiam a ni.

Zana kan mu chu Lawmzuali taksa sa lutuk chuan min tiharh a, ka han khawih chuan a khua a lo sik hluah a, ka mangang kher mai. Damdawi ka han ei tir a, ka mangan rual rualin amah enkawl theia ka awm chu ka lawm a, ka telloa rei tak a lo tuar tawh avang khan ka thin a rim zawk hial bawk a. Ka kuah a, a rawn rum tiah tiah a, a taksa sa lutuk a reh hnu chuan min kuah chial a, a muhil ta bawrh bawrh a.

Harsatna chi hrang hrang kan tawk a, chutichung chuan rilru na in kan insiam ngai lo. A na a chhuah chang chuan thil paih keh mai te a ching chho a, amah a intih nat ka hlauh lutuk avangin ka hau thin. Hrehawm ti takin a tap a, ka hauh vangin keiin hrehawm ka ti thung a, indawm tawnin hun kan hmang leh thin. Ka hmangaih a, hrehawm lai leh bawrsawm lai pawha hmangaih taka enkawl tura ka intiam ang ngeiin thihna in min then hma loh chuan ka enkawl zel ang. A zawng zawng min hlantu, min ring ngama min nghenchhantu ka nupui duhtak hi kan damlai ni a tlak hma loh chuan hmangaih takin ka enkawl zel ang.