IRRESISTIBLE - 1

LALRAMMUANPUIA

(NANG MALSAWMNA NI ANG CHE)

By Mami Lalhmangaihzuali Chawngthu

"Khawngaih takin min luhtir hram rawh, ka hmuh ngei ngei hi a ngai ania"

Hospital atanga ka duty zo ka haw tur chu tlangval sang thlerh thlawrh hian gate duty  chu a chhunga luh alo dil mek a,a hmel pawh chu hmuh tumin ka lo ngaihven lem lo.  Ka motor dahna pan chuan ka kal zel a, emergency kan ngah deuh avangin ka duty hun pelh thleng ka awm a, zan lam ka mut that vak loh avang in ka mutchhuak chuan min zem chiai chiai a, ka han ham deuh bai bai bawk a. Ka car bul ka thlen dawn chuan tuemaw hian min rawn su deuh sawk a, ka hawichhuah chuan nichina tlangval kha ani tih ka hria, "Ka tihpalh lutuk, ka hmanhmawh lutuk a ka inveng hman lo ani"tiin thupha chu a han chawi zung zung a. Ka damlo ten ka rilru an luah thuk em avangin ka bul maia tlangval hmel chu chiang pawhin ka hre tlat lo! Ngawi rengin motor ah ka lut a, in lam panin ka inkhalh haw ta delh delh a.

In ka thleng chu ka in bual nghal thuai a, mut veng veng chu ka chak ber anih avangin ka khumah chuan ka han inthawlh lut nghal a, mumang bo thak khawpa mut tumin ka han maimitchhing a, thil hriatchhuah chiang tak mai ka nei! Ka meng nghal kawk a, kha tlangval min su tu kha, ka hria ani. Ni e, engtinnge ka hriat loh theih zawk? Tuna ka dinhmun ka thlen theih nana ni pawimawh em em ni thin Lalrammuanpuia kha engtiinnge ka theihnghilh mai theih ang? Ka thu chhuak a, ka drawer hnuai ber chu ka han pawt hawng a, ka album atang thlalak pakhat ka phawrh chhuak a, Rampuia nena kan thlalak chu ka en a, vawi engzatnge hmuh leh tuma ka beih a, hmu chak ngawih ngawih a ka awm thin tih pawh ka chhiar seng lovang. Awlsam takin ka hmaah a rawn in lan leh a, mahse ka lo hre silo. Ani pawh khan min hre tawh lo chu ani ngei anga, engtinnge a nun a hman tak zel tih hriat chakna in ka khat a, hmuh leh ngei ka tum tur a ni. Ka mutchhuak chu a hnawtbo chiang hle a, ka tho chhuak a, ka study room ah ka va lut a, ka album ken lai chu ka han melh leh a,  kan hun liam tawh kha ka mitthlaah alo lang ta zut zut a.

HMANAH CHUAN…

St.Pauls School kawtah chuan kan driver in min drop a, ka kal hmasak ber ni tur anih avangin ka zam ve hle a, mi chevel en chuan ka hawi kual mai mai a. Ka sana bun lai hu ka han melh zeuh a, tan a hun tep tawh ani mai si, ka hmuh hmasak ber hnenah kan classroom tur ka zawt mai ang ti rilru chungin kawngah chuan ka ding a. Mipa pakhat hi hmanhmawh em em in arawn tlan a, a thaw hlawp hlawp a, ka bul a rawn thlen chuan a ding a, a thaw halh halh a, min rawn en chuan a nui sak a, ka vawikhat hmuhna mah nise ka thlamuanpui nghal ngawt thei nia! New comer ka nih thu leh kan class tur ka hriat loh thu ka sawi a, min nuih ta ver ver a, "Lokal rawh, i school thar turah chuan ka lo lawm a che. Lalrammuanpuia ka nia, 'Rampui' tiin min ko thin a ti a,a ban chu a rawn phar chhuak nghal a, "Hmingthanzuali ka nia, Zualtei tiin min ko thin"ka han ti ve a. Kan in chibai zawh chuan school chu kan pan ta nghal a.

Classroom kan thlen chuan min nuihsak a, “I lar dawn hle tih ka hre nghal”a ti sap a, a thusawi awmzia pawh chu ka hre chuang lo. Chumi ni atang chuan kan inkawm chawt a, thian thar pawh ka neih belh em em lo. Mipa dang te ang lo takin a cool raih a, mahse a nui hmel hi engtiklai pawhin hmuh tur a awm ani ber. Tupawhin an nel em em vek a, a bula awm chu nuam kan ti tlang hle a, tawng tam lutuk ani lo na in fiamthu a ngaina hle a, a thutna hi kan kil bial leh laih thin. School ban hi ka huphurh ru hle thin a, a chhan chu Tlangnuam ah an awm a, keini Zarkawt ah kan awm daih thung a. Kan haw kawng chu in ang se, a kiangah reilote tal awm belh thei ila ka tih thin vang ani. Kawng engkimah ka hmahruaitu ani a, ka zirlaiah min pui nasa em em a, ka nih tum ber pawh doctor ani tih ka hrilh atang phei chuan a phur hle a, engvanga lo phur ve hluai nge anih phei chu ka hre lo. A nih tum ka zawt ve fo thin a, “Zualte, kei chu maw Midang tana malsawmna nih hi ka tum ber chu a ni mai. Midangte tan ka theihna zawng zawng hi hlan ka duh a, chumi tur chuan ka inchher hriam ve zel ani”tiin min chhang thin. A thiam theihzia ka hria a, kan class ah a tit ha ber ni lo mahse a thiam ber niin ka ngai. A chhan chu kan zirlai hi a byheart ngai lova, a hriat hian a hre hneh ani tawp mai. Kumkhat lai kan inkawm ve hnu phei chuan a mizia ka hrechiang telh telh a, mahni aia midang ngai pawimawh anihzia te, midang te tanpui nuam a tihzia te chu ka hmu tam tulh tulh a, ka ngaina mai nilovin ka ngaisang takzet tawh a ni.

Hun a liam ve zel a, pawl sawmpahnih kan nih kum chuan kan rilru pawh kumhnih liamta ai chuan a puitling a, hma hun pawh kan ngaihtuah thiam ve ta. Tin, sawifiah thiam chiah si loh hian Rampuia nen kan inkarah hian engemaw a awm a, nidanga awlsam taka thil kan tih thin pawh lai deuh hu a tih ka ngah tan viau a, nuam ka ti lo a, chutianga awm chu ka zak bawk a ni. Nikhat chu exam inbuatsaih nan chawhnu atang chawlh an puang a, nidangah chuan Rampuia nen hian an in peng thleng kan inzui thin a, chutatang chuan kan in vai liam thin. Mahse a hmel ka hmu miah lova, ka han zawng ru deuh na in ka hmu ta chuang lo. Tun hnai atang hian min hlat a tum nia ka ngaih kha a dik taah ka ngai a, ka lunghnur em em a, ka rilru ka lo tilang lutuk em ni ang tiin keimah chu ka han in haw bawk a. Ka haw rual pui thin te pawh ngaihsak lovin ka kal nal nal a, an in peng ka thlen thlak chuan mi garage bulah hian alo ding tih ka hmu a, hmu ang chuan ka awm duh chuang lo. Ka hma lam ka melh ngar a, min rawn ko a, ka hre duh lo lui a, a aia ringin min rawn ko leh a, ka hawi sang vah a, ka pen hmawk hmawk a. Ka banah min rawn phih lawp a, ka tlu thelh lehnghal, “I beng a chhet anih loh chuan ka koh kha hre tur I ni asin”a thinrim dawn emaw ka tih lai chuan nidang ang bawkin a khi leh ver ver a, “Kan inah lo leng ve hrim hrim la, ka thlah haw leh ang che”a ti a. Hei chen hi kan inkawm ve tawh a, kan la inlen pawh miah lo tih chu ka hrechhuak bawk a. Mahse ka lung chu a la awi zan loh avangin ka lo hnial thung a, “Ka kalsan che avang khan I lung a awi lo tih ka hrereng ania aw…ka tihpalh”a beng chu a han pawt a, “Saidinga khan min titipui laklawh lutuk a, hetah hian ka lo nghak ta mai che anih hi”a ti a. Ka va melh zawk a, a lo nui sang a, a bulah hi chuan a thinrim theih thlawt loh a ni. An in lamah chuan kan inzui ta nge nge a, school a a nundan leh an in lam chu a inpersan ka ti ru hle a. A chhan chu mi inngaitlawm tak, chapona amaha hmuh tur awm reng reng lo anih laiin chutianga awm duh nise a theih chianzia chu a takin ka va hmu ta. An in chu a zau in a lian tha hle a, compound zau leh nuam tawk tak an nei a, motor pawh pathum lai chu a in hung dal a, bike pawh ka hmu, enkawl that tih hriat takin pangpar a par chiai bawk a. Thingkung buk nalh tak hnuaia thutna an dah te chu hah ti dam sawng sawng thei khawpa rem a ni. An inchhungah kan lut a, pawn lama a lan dan ai mahin alo la ropui zawk a, mahni nihna aia sang a che thin kei ngei pawh min tlawm tir vawng vawng thei nia. Pitar pakhat hian tv alo en a, kan thawm hria in a lo hawi chhuak vat a, Rammuana a hmuh chuan hlim takin a ban a rawn phar chhuak a, hmanhmawh deuh hian ani chu a tlan phei a, an in kuah thlawp a, “Ka tupa duat, I lo haw ta maw?”a ti a. An pitu khawsak dan chuan min hneh takzet a ni. Min han inhmelhriattir a, “Nula hmeltha tak I ni, I fel hle ang tih ka ring bawk”tiin min han fak der ve a. An sitting room zau puiah chuan kan lut tlang a, thlalak pakhat hi lian deuh hian alo in tar a, hmeichhia la upa lutuk lo thlalak ani. Rampuia chu a tho a, thlalak hmaah chuan a ding a, a han chul riai a, “Ka nu anih hi, ka hriatchian ve hma in min boralsan tawh ani”a ti thawp sat a. A hmelah chuan nui hmel reng a lang lo, chu chu ka hriattirh atanga rilru na hmel ka hmuh vawikhatna ani bawk. Ka thutna atang ka tho a, a bulah chuan ka va ding a, hnem ka duh a mahse hnem dan tur ka hre silo. A banah chuan ka han vuan ringawt a, ka lam rawn hawiin a nui sak a, he mihring tluka belhchian dawl hi ka hre tawh ngai lovang. Thlalak chu a han en leh vang vang a, “Vawiin ni hian ka nu bulah inhmelhriattirna ka nei dawn che ani”min rawn melh leh zauh a, thlalak lam bawk chu a thlir a, “Nu, hei hi a nih hi ka hmeichhe hmangaih ka sawi chu, vawiin ni hian a vawikhat nan  chu thu chu a hnenah ka sawi ta, min pui la, thinrim tir lo hram ang che”a ti a, a tawng chu zawi hle mahse ka hrechiang khawp mai. Engthil nge a sawi chiah kha, kei hi min hmangaih maw? Mak tihna in ka khat a, chutah ka lama rawn inher in ka dar lehlam lehlamah a vuan a, “Zualte, ka hmangaih takzet ani, kumhnih liam ta atang daih khan chu chu a intan tawh. Mahse ka huaisen tawk lo fo a, hrilh lo che in tun hi ka thleng ta anih hi. Ka nu in ka tana lehkhathawn a lo hnutchhiah ah chuan, huaisen taka hringnun hi hmachhawn turin min fuih a, laksak hlauh avanga engmah ti ngam lo ni lo turin min ti bawk a ni. Vawiinni hian chu thu min chah tu hmaah chuan, engtinnge min lo dawnsawn ang tih ngaihtuah lawk lovin, ka thinlunga thu awm chu ka puangchhuak ta anih hi”a ti dam dap a. Min en ngam tawh lo, a kut thlan dap chuan a thusawiin a tih zam zia a lantir chiang hle a, a sawina hmui chu khur lo mahse a aw ah khan zamna aw ri a lang tel a, ka hriat hmaih hauh lo. Engmah sawi lovin ka kuah ringawt a, sawi dawn pawh ni ila ka sawichhuak thei kher lo ang. A thaw hak ri chu ka hria a, chutah duat tak hian min lo kuah let a, sawi kher lo mah ila thinlung a thuhmun miau si a, kan hlimdun a ni. Eitur chu dawhkanah alo awm teuh a, puar nalh in kan ei a, ka hmaa thu mipa chu ka han melh ru zauh a, min lo en reng tih ka hriat chuan ka hawisawn nghal vat a, “Duhawm lutuk”a ti a, a nui hak hak a. A uniform chu a thlak a, an kawt zawl ah chuan khua ka lo chuan vel a, ka bula a rawn din lai pawh chu ka lo hre lo, ka kawngah rawn kuah in a lamah min han pawthnai deuh a, “Min hmangaih ve em tih pawhila sawi ve lo”pangchang aw tak hian a han ti a, ka nui a, “A chiang tho lawm ni?”ka tih chuan a lu a thing a, “Ka hmangaih che, kumhnih liamta atang kha chuan ani ve chiah lo na in a rei veleh tawh viau tho mai”ka ti a, a hmui chu a han ti pawrh a, ka nui hmel a hmuh chuan a insum thei bik lo, “Hmingthanzual, ka hmangaih che, thinlung takin”a ti a, a sawi ang chiah chuan ka han sawi ve a, a kiangah chuan hringnun hi a mawi a ni.

Ka chhungte zawng zawngin an ngaina a, ka thianten nel har an tih e. Em ka pa meuh pawhin aring tawk a,a ngaina ve em em a, chu chuan min tihlim thin. A theihna zawng zawng hi ja tan a hlan ti ila, khatih laia ka laka a thiltih kha a hrilhfiah deuh ber in ka ring. Exam kan zawh hnu te chuan thawveng taka hun hman ka duh thin a, chutiang bawkin ani pawhin a chak ka rin hle laiin entrance exam atana pawimawh tur min buaipui leh ta tlat thung . Ka lung pawh aawi lo hle nghe nghe a ni. Mahse lungawi lo leh thinur in a awm duh reng reng lova, zaidam takin ka hmahun min ngaihtuah pui vang ani tih a sawi thin. Zing ah coaching class ka kal a, chhunah zinga kan zirte min enchhuah pui leh vek thin. A chang chuan a khawsak dan hi hriatthiam har ka ti a, lehkhathiam leh special tak ani tih ka hria a, engineer lam emaw engemaw tak nih a tum ka rin em em laiin chutiang nih a tum loh thu a sawi tlat a. A nun chu midang tan a tam thei ang ber hlan a duh tih chu ka zawhna min chhanna ala ni fan!

A tawi zawngin sawi zel mai ila, kan result chhuah ni chuan phur takin kan in ah arawn phei a, MBSE office lamah kan result ngaihven ve kan tum a ni. Ka insiam chu min nghak a, zing lamah inchhungah chet tur ka ngah deuh avangin kan hun tiam ah kan chhuak thei lo a. Kan chhuah dawn lai tak chuan Rammuana phone chu a rawn ri a, a chhan dan atangin a result an rawn heilh tih ka hre mai. A nui sang a, a hmel chu a hlim sarh a, a ti tha hle ani tih pawh ka hre nghal. Phone a dah hnu chuan min rawn pan a, min kuah a, "Ka awih lo hial zawk, topper ka ni anih chu"hlim tak hian a ti a. A thiamna hi up beh rual ani lo reng ani, lawmpuina ka hlan mawlh mawlh a, ka lawmpui a, ka lawmpui takzet ani. Mahse ka result ka la hre ve lo tih ka hrechhuak zawk a, min kuahna atang chuan ka talchhuak a, "Ka pass ve angem le?"hlauthawng deuh tak hian ka ti a, min siai zeuh a. Thutthlengah chuan a thu a, hahdam hmel tak hian min en reng a, ka thinphu a rang sauh a, "Saidinga te school ah an awm a, rawn kal ve rawh u an tia, va phei ve ang hmiang darling"a ti a, min kohfiamna avang chuan a zak ve deuh hlek niin a lang, a aw a han thian kharh kharh a. Ka kawr hak lai chu ka thlak leh a, ka nervous apianga ka chin than a ni a, ka kawr haklai chu ka thlak chhen thin. Bike a rawn keng emaw tiin kan kawtah chuan a bike chu ka han zawng ru a, "Vawiin chu bus in kal mai ang hmiang"tak deuh ran hian a ti a. Ka lawm hran lo viau mai, vawiin ang ah hi chuan kan lenkual te pawh ka ring ve ania, ka lawm lova, ka lawn lo takmeuh ani. Min kaih tuma ka kut rawn vawn a tum chu ka lo duh lova, ka tum deuh hmak a, pawitihna a neih hmel lem lo. Kan in thlang deuh kan thlen thlak chuan dawr bulah a bike chu a lo in hung reng a. Ka va melh a, alo nui sawng a, ka ngei lutuk leh ka lawm bawk si chuan lei ka han chhuahkhum ringawt a, a nui ta vur vur a. Bike bulah chuan kan ding a, "I result i hriat hunah mak ti viau suh aw"a ti a. Chu chuan min ti hlauthawng lehzual a, ka lu hu ka buk khum zauh a, "Distinction ah i passed"ka biangah a rawn piai a, ka awih thei lo. Ka lu ka thing a, "Infiamna chi ani lo ania"ka ti hul hak a. A han hawikual a, kan awmna belah chuan timah an awm lo tih a hriat chuan min kuah a, nghet takin min pawm a, "Nangmah hi inringtawk turin ka hrilh fo che kha, engmah hi theih loh a awm lo, kan tum a ruh a thu ani mai"a ti a. Ka tah a chhuak thut a, ka hrawkah min hnawh a, engmah ka sawi thei lo. Rammuana hi Pathianin ka tana a tirh ani tih hi hairual ani lo, ama min puihna vang ani ka hlawhtlin theih tih hi ka hrechiang em em mai a. A hnen atang thil tam tak ka zir a, mahni inrintawkna vawiin ni hian min zirtir leh ta ani.

Mahni inringtawk takin entrance exam pawh ka pe ve a, ka beisei chu entrance ka pek hnuah Rampuia chuan min tihhlawhtlinsak chauh a. A hun tam thei ang ber ka kiangah a hmang a,kan leng chhuak a, a thiante min tlawh pui a, an kiangah chuan chhuang takin ka hmung hi a lam thin. A nun lang tlang tak phenah hian inthup leh inphum ru hi hmuhsak in ka inhrecthin a, mahse englai pawha hlim hmel pu reng anih avang hian chu chu ka hriatchhuah sak thei lo. Ka tan engkim atih thin laia hlim taka lo thlir reng ringawt chu ka duhkhawp lo fo a, atan tihsak theih neih ve ka chak thin. Aizawla college kal a tum tih min hrilh zan chuan ka hnual rawih a, kei hi ka lo tling ve thei anih ngai chuan loh theih loh in kan zirna chuan min pawt then dawn ani. A kiangah ka hlim em em a, engtinnge a tello in ka awm theih ang tih hi ka hre lo ani. Nikhat chu an ina leng turin min rawn sawm a, ka nu ka dil hnuah kan chhuak zui nghal a. A pi chiah inah a lo awm a, an inchungah min hruai chho a, Aizawl khawchhung zi hut hut leh boruak ipik churh hip lova boruak thiang tak han hip vang vang chu a nawmdan a dangdai hle. Thli fim a tleh heuh heuh reng a, ka sam chuan ka hmai a rawn zar buai leh thin a, Rampuia chu ka bulah dingin ka sam chu a han hui kiang a, nidanga ka hmuh ngai loh a hmelah chuan tak raihna hi ka hmu a, k ngaih a titha lo hman hle. Mahse a in siamrem vat a, nelawm takin a khi sak a, "I rilru a hahdam sawng sawng lo maw helai hmuna boruak han dawn chu?" Tiin min zawt a. Ka lo bu nghat a, a nui a, ka nui ve mai a, "Zualte, loh theih loh avangin kan awmhran atul dawn a, ka ngai dawn hle mai che"a ti a. Min kuah a, duat takin ka sam chu a chul heuh heuh reng a, "A hriat ngawt hleinem. Tling lo ta ila, hetah pawh ka zawm maithei a"ka tih chuan a lu a thing a, "I tling dawn tih ka hria alawm, ka chiang khawp mai"a ti a. Chu chuan min ti phur ve sawtin ka hria, "Ka lo tling anih chuan a lawmawm ngawt ang. Mahse i tello chuan ka lawm a kim lo hle dawn ani sia"ka ti a, ka lung a chhe lek lek. A ngawi reng a, sawi leh turcpawh ka hre bik lo, "Engpawh lo thleng se ka hmangaih em em reng che ani tih hi hrereng la ka duh a. Eng mi pawh lo ni ila nang hi ka thinlung hian a thlang fel tawh che a, chhan awm lovin engthil mah hi ka ti dawn lo ani tih hi hrereng la ka duh ani "a ti a. Ka awm a ti nuam thei thlawt lo, min kuahna atang ka talchhuak a, hmachhawn zawngin ka ding a, "Rampui, i thusawi dan kha ngaihthlak nuam ka tih zawng ani miah lo ania aw"ka ti a. Inthen tur ang maia thu a sawi vel chu ka hrethiam lo ani. Ka ngaihtuahna chu a hria ani ang, a lu chu a han thing a, a nui a, "I ngaihtuah mek kha ka hria ania, chutiang chu a thlen ka phal ngai lo. Hlim takin awm ang, kan hlim tur ani"a ti a. Keipawh ka lungawi chawpchilh leh nghal mai a. Engmah hian min then hrang lo se ka duh ani.

Hun a liam zel a, keipawh entrance exam paltlang in ka duh leh chak em em MBBS zir turin Christian Medical College, Vellore lamah ka liamthla a, Rampuia pawh Pachhunga University College ah a lut a, sociology lak a tum chu rei tak kan inhnial phah a, mahse thinrim duh miah lovin a tum chu a kaltlangpui ta tho a, eng rilru nge a put tih hi ka hrethiam thlawt lo a ni . Lungleng leh hrehawm ti reng rengin nitin hun ka hmang a, haw leh mai chakna hlirin ka khat thin. Mahse Rampuia chuan nasa takin min fuih a, min tawngtaipui reng ani tih a sawi thin. Keipawh ani telin ka hlim ve telh telh a, nuam ka ti chho ve zel a, kum alo vei ve ta hial a. Ka zirnaah ka tui telh telh a, mahse Rampuia chuan min hlat ve telh telh tih reng ka lo ngaihtuah ngai lo. Kan zirnaah pawh a ti tha pawl ka ni chho zel a, mahni inrintawkna ka nei tam telh telh a, hlim taka nuih fo hi midang tan malsawmna ani tih Rampuia hnen atanga ka zir pawh ka hlawhtlinpui a, thian ka ngah in min ngaina tu an awm ve nuk a ni. Rim takin ka zir a, ka bei a, hlawhtlin ngei ngei ka tum a, hma hun duhawm tak neiin ka in hre ve thin.

Krismas ah ka haw thei lutuk lova, exam pui a zawh ah erawh ka haw ve ziah a. Ka awm turh kumhnih vel kha chu Rampuia nen pawh kan boruak a tha a, ka haw chang pawhin min ngai takin a rawn leng a, kan inzui chawt thin. Mahse kumthum a liam leh meuh chuan a zia a damg a, ka biak loh chuan min biak a tum tawh lo. Ka biak chang chuan tha takin min chhang a, mahse a mizia a dang tih chu ka hai bik lo. Ka zir zawh dawn meuh chuan kan inbe pawp ta miah lova, biak ngaihna ka hrelo. A phone number a thlak a, chuti taka chhan mumal awm lova min then avang chuan ka rilru chu na hle mahse ama min zirtir tawh kha kahmang tangkai a, inrintawkna nen hmalam chu ka pan ve ta zel ani. Result tha tak nen ka zirna hmun ka chhuajsan a, ka zir chhungin lawmman engemawzat ka dawng a, offer pawh tha tak tak ka hmu a, mahse kan ramah ngei hnathawh ka duh a, chung sawmna duhawm tak tak pawh chu hnawlin Mizoram lamah ka kir leh ta a ni. Ka thinlungah hian Rampuia chu a thi thei lova, vawikhat tal biaka hmuh leh chu ka duh ngawih ngawih a ni. An ina kal tum in vawitam ka in ngaihtuah a, mahse chhan awm hauh lo a kan inthenna chuan chu chu tlawm thlak min tih tur bawk si. Lungkim lo takin ka awm ve ta mai mai ani. Hna remchang ka melh ve reng a, ka vawikhat dilnaah ka hlawhtling ta nghal mai a, mak ka ti zawk. Khawpuia awm chu duhthusam ni mahse a harsatzia ka hrechiang ve em em a, mahse Aizawl Civil Hospital ah ngei hna ka han zawm thei tlat chu mak ka ti lehzual ani. Ka thawh hlim deuh hian St.Pauls a kan zirpui thin pakhat nen kan inhmu hlawl a, arawn in entir ve a, chutah chuan thu thindeng tak min hrilh a, "Zualte, Rampuia nen in lo inthen daih vang hi ani lo maw heti taka anun a baw raw tak?"tiin min zawt hlawl a. Lalrammuanpuia kha chutiang chuan a awm theih ka ring ngai lo.

IN TAWN LEHNA

Album chu ka khup thak a, ka drawer ah chuan ka han nawr lut a, kum 7 liamtaa ka thinlunga a tlak nat dan tho khan Rammuanpuia hi ka thinlungah a la tla na ani. Kan classmate hlui thusawi kha bawhzui chi ani angem tih ka han ngaihtuah leh a,engvanga chutianga bawraw taka nung nge anih ang tih ka ngaihtuah fe pawhin ka hre thei lo. Amah bakin chu zawhna chu min pe thei lovang. Ka tan theihtawp a chhuah thin a, tuna ka dinhmun kathken theih chhan hi amah vang pakhat ani tih ka theihnghilh tur a ni lo. Nunkawng alo zawh sual anih pawhin kei hian ka hruii kir leh ngei tur ani ang.

Hospital ka thlen chuan nidang ai ka kal hma tih ka hria, ka motorcka hung fel a, Rampuia chu ka mitin kahan zawng ru nghal zat bawk a. Chuti mai chuan ka hmuh ka in ring leh ta chiah lova, hmanhmawh hauh lovin ka che tur a ni ang. Damlo chi hrang hrang in pel zut zut chu ka thlir reng a, a then hlim takin damdawiin chhuahsan in an in lam an pan a, thenkhat erawh damna beiseiin an rawn in pu lut ve mek bawk a. Ka tan chuan ka damlo te hi an hlu a, kanaupan lai atanga doctor nih ka chakna chhan pawh duat taka enkawltu an mamawh tih kahriat vang ani. Ka la hrereng mai, ka naupanlai in ka pu chu thih ngam in a na a, a hnuka a chah mai an rin tawh avangin keini a tu leh fate hmuh tir tumin hispital ah min hruai a. Chutah chuan thil mak tak ka tawng a, ka damchhungin ka theihnghilh tawh lovang. Ka pu chu Aizawl pa hausa leh lar ani a, doctor pakhat(a hming thup mai ila, thingtlang lamah an transfer tawh nghe nghe) chuan a ngaihsakin keini a chhungte thleng pawhin min ti tha hle a. Mahse chhungkaw berh leh retheih ve hmel tak chunga a khawsak dan chuan kei hi doctor ni ngei ngei turin min nawr ta tlat a ni. A hau a, a ankhum a, mawl leh thingtlang mi an nih vang chuan tham lo tak takin a ti a, in humruh zetin chu thawm chu ka ngaithla ve reng a, kei hi doctor hlawhtling yak ka la ni anga, mi lian leh te ka thliar vecngai lovang tih chumi ni chuan ka in tiam ta ani. Chung ngaihtuah kuala ka rilru ka lo kawm lai chuan Dr.Sawmi arawn lut a, in entir tur an awm tawh lo anih ka ring. Ka hmaa chair ah chuan athu a, "Vawiin chu i taksa awmna hmunah hian i rileu a awm loh tawo mai"ngainatawm takin min nuih a, ka lo nui ve mai a, ka pha kual peih lo a ni. Ka bana sana chu ka han en a, "Maternity ward ah min kal pui teh thingpui in hma  hian"a ti a, an chhungte nau nei an awm thu ahan sawi zui nghal bawk a. Inngaihtuah ngut ngut ai chuan tiin ka kal pui ta a, nau nei an lo tam hle a, ka han hawi vel a hmelhriat lah chu ka nei hauh lo lehnghal. Kilkhata mipa pakaht thu chuan ka mit a la nghal chat a, a nupui ni awm tak chu a muhil bam a, ani chuan naute hi a lo pawm a, a awi anih ka ring, a su darh darh a. A nupuinih chu nawmhmel riauxin ka hria a, chung ka ngaihtuahna avang chuan ka nui hak a. Tun nihnih khat chhunga ka ngaibtuahna ka kawm nasatzia ka hrechhuak a, ka lu chu ka han thing nawk nawk a. Ward chu chhuahsan tura ka tho chiah chu kilkhata mipa kha a thutna atang a tho ve chiah a, naute chu a tap ri ka hre bawk a, a nu chu lo harh in naute chu a pe a, chupa arawn hawi chiah chu ka meng ohar awk a, mak tih hmel fe hian min rawn en ve ta reng a! Ka lu chu a hai deuh thut a, ka thutna bula khum chu ka hmer vak a, Lalrammuanpuia ngei khaani. Engmah sawi lovin min kalsan a, tunah a nupui fanau te hmaah kher ka tawng leh hi ka hrethiam lo. Ka mittui tla tur chu ka khap let sak a, hmanhmawh takin ka chhuak ta nghal a. Ka sa chhuak vek a, ka pum chu a so bulh bulh a, Sawmi chuan a ngaihaa hrelo zetin min en a, ka that thu ka sawi pawh chuan a awih lo tih a hmelah ka hria. Mahse ka tha ka tih tlat avangin tihtheih erawh a nei lo.

Ka car steering chu ka hum ngawt ngawt a, ka puakkeh mai dawn hian ka hria, hmana a mizia  kha danglam a la awm lo, a cool a, a hlim bawk a, mahse thil pakhat erawh a danglam tawh-midang ta ani tawh. Ka mittui chu amah avangin a vawikhat nan a rawn far ta zawih zawih a, a hma zawng kha chuan beiseina sang tak neiin a dinhmun chu englawh nise lakchhuah ka tum anih kha, mahse ka luhlul na leh induh luat ah kumkhua atan ka chan dawn ta niin ka hria. Midang bula hlim hmel taka a awm chu ka thik bawk a, chu chuan a laka ka rilru la danglam lohzia a tilang bawk ani. Ka car lam pana rawn kal an awm chu side glass atang ka hmu reng a, tunge tih pawh chiang takin ka hria. Hmanhmawh takin motor ka ti nung a, ka tlan chhuak nghal a, amah vanga ka na lai hi a hmu tur ani lo. Ka chak lohna hi ahma ah ka ti lang lovang.

Chakkhai lamin bazar ah ka chhuak a, ka thiannu dawrah ka peng lut a, kan inhmuh khat avangin ka haw leh mai pawh chu a phal lova. Hmanlai hinte sawiin kan phul hlut a, a dawr thlanga thawm rawn ri huk ah chuan kan han hawi thlaa, mipa panga vel hi step ah an thu a, engemaw sawiin an ri leh hak zel a. Ka thiannu chu nin hmel zet hian a han chek tlak a,"Awi ka ninzia chu helai hmun hi addict ho hmunpui anih tawh ber hi"a ti hlak hlak a. An zinga palian ber chu ka thlir reng a, hlauhthawnna in ka khat nghal, ka maimitchhing a, "Lalpa ni lul suh se, nupui chu duh leh panga pawh nei se pawi ka ti lo, mahse hetiang kher chu nih tir suh"ka rilry chuan ka ti mawlh mawlh a. Ka han meng leh a, chiang leh fiah zet hian Laldammuanpuia chu ka zuk hmu ta a. Ka thaw halh a, "Enteh thiannu, a pa lian ber pawh khu addict tho em ni?"la ring ngam chiah silo hian ka han ti a. A rawn dak zawk a, "Ni awm emai, nilo se arawn kal fo lo tawp ang. A hmelthat tehreng nen ka ui ngawt mai"min rawn melh pah chuan,"I hriat zawng em ni?" A tih zawm zat a, "A nupui hian kan hospital ah naute a nei a, kar hmasa lawk khan an chhuak a"ka ti a. Mak tih hmel tak hian ka thiannu chuan Rampuia chu a melh reng a, "An nu chu ka van khawngaih e aw"a ti sap a. Ngaihtuahna kawm zuiin kan ngawi dun ta reng a.

Hetiang taka mihring danglam theih hi a mak ka ti ani, lehlamah erawh thil awm lo lutuk a nih loh na lai awm in ka hre bawk a. An hausa a, a duh tawk pawisa hman tur a nei, chutiang vang pawh chuan a chak apiang kawngzawh chu a harsa hauh lo ang tih ka hre bawk. Beisei tur awm lo beisei reng hi keipawhin ka bansan a, hmalam ka pan hi a ngai ve a ni. Mipa pakhat avanga hrehawm ti taka ka nun ka hman hi a tul lova, tuemaw tan ka nun hi ka hman ve a ngai ani. Ka in thing harh a, inbual turin bathroom lam ka pan a, ka tel ve an phal lohna hringnun ah hian tih tur ka neih ka hre bik tur a ni lo. Ka hna ka tuichilh bawk a, ka damlo ten min ngaina a, chu chu nuam ka ti thin. Nula ni ve ta nafam chu be tu leh duh dertu pawh an awm ve nuk a, mahse ngaihzawng neih leh lam reng reng ka rilru ah a awm lo. Ka hna bak thil dang ngaihtuah nan hun ka neilo a, ka hunawl erawh ka chhungte tan hman ka duh. Rampuia kha ka lo duh viau em ni tiin ka ngaihtuah a, mahse amah vang ringawt a midang ngaihven lo chu ka niin ka inhre bik chuang lo. Hei erawh chiang takin ka hria a, ka tana malsawmna ni tura Pathianin ka hnena a rawn tirh hi a ni tih hi. Huat ka tum zawh pauh leh ka tana thil min tihsakte ka hrechhuak a, ka haw theilo. Tanpui theih dan ngaihtuah ila chuan puih dan te pawh a awm maithei, mahse nupui pawm lai nei anih tawh avangin chu chu a rem in ka hre silo. Ka chhungril hi a hah ngawih ngawih thin, mahni chauha amah hmachhawn chu ka ngam lo a ni ber; a laka ka rilru kha ala danglam ve si lo a.

Zingah clinic lamah ka thu a, damlo in entir tur an tam deuh avangin tuk dang aiin ka haw tlai a, traffic jam nasa bawk nen Hospital ka let leh meuh chuan ka duh aiin ka tlai a. Casualty ah min lo ko vat a, emergency an lo awm nual nghe nghe. Dr.Atea leh nurse Afeli chu an lo vir buai hle a, min hmuh chuan an thaw ve hawk a, ka che nghal zung zung a, pakhat phei chu a kut a lo kak thui viau a, Afeli chuan a lo thui mek a. Chutiang a kan buai nuaih nuaih lai chuan aw ka hriat than em em hian pawn ah phone a hmang mek a, ka thil tih lai chu ka chawl a, hriatchian tumin ka beng ka dawh a, aw chu alo hnai zel a, inchhung ah a rawn lut ta. Chiang zetin ka lo melh a, min rawn hmuh chuan a phone biak lai chu a dah chawt a, min en ve ta reng a. Ka harh chhuak thut a, hre ngai lo ang chuan ka awm chhunzawm a, mahse ka chhungril erawh a khur ru der der thung. Heti taka ka laka huhang anei hi ka tha a na a, hrehawm pawh ka ti, ka dan theih a ni si lo. Afeli bulah chuan a kal a, kan damlo pa chu a bia a, a hmaa kan biak pawha min chhang duh miah lo pa chuan Rampuia a hmuh chuan hlim hmel tak hian a nuih a, “Bro, ka lawm lutuk, I lokal dawn lo emaw ka ti hman asin”a lo ti tuak a. Rampuia chu a nui sak a, a la danglam reng reng lo, chupa sam chu a han tuai thur a, “Khawi hmunah pawh nise ka lokal ang tih ka hrilh che kha”a ti dam dup a, ka lo ip zawrh thung. Drugs addict tih hriat ngawih ngawih chutia buaipui tu chu a addict pui a nih loh a rinawm loh a, hmana ka hriat thin Rampuia kha tunah chuan drugs addict alo ni reng si tih chu ka rilruah a rawn lut nghal a. Ka khawngaihna leh ka huatna chu a in zat chiah awm e, casualty atanga an chhuah hnu chuan ka mit sir in ka melh zui a, a kut kan thui sak pa in ngaihsan hmel taka amah rawn hruaitu Rampuia a melh lai chu chiang takin ka hmu a, tunge anih chiah le?

Ka duhtawka ka han inchei hnu chuan darthlalang ah ka in en a, hmelchhe tak chu ka ni bik lo tih ka hria. Hna zahawm tawk tak ka thawk bawk a, mi sawisel turin ka awm ngailo a, mahse chutichung chuan ka hmangaih ber ka chan tho. Ka thaw halh a, ka khumah ka thu chawrh a, nghen chhan tlak mipa a mamawh a ni. Ka hlim pui theih tur leh min fuih phur thiam, ka thian ni thei bawk si hi Rammuanpuia chauh em ni khawvelah hian lo piang? Ka lu chu ka dawm vang vang a, he thinlungah hian thi se ka duh ani.  Dr.Atea nupui neihna tur Mission veng lam panin muangchangin ka inkhalh chhuak a, kan thawhpui te zingah pawh ka kawm nasat ve tak anih avangin ka ngai pawimawh a. Inneih programme a zawh pawhin haw mai lovin ka awm khawtlai ve a, chawei tura min tih tlat pawh chu ka hnial duh lem lo. Thiante zingah chuan hlim takin ka nui ve bawk bawk a, heti taka ka nuih loh na chin hi ka hre tawh lo. Rin loh takin Rampuia chu a rawn lang ve hlawl a, ka mood a off nghal vekin ka hria. Thenkhatin an lo melh hrek hrek chu ka hmu ru reng a, a hmelah chuan zamna pakhatmah a lang lo. Ka awmna lai chu tlemin a biru deuh a, min hmu thei kher pawhin a rinawm lo. A chezia chu ngun takin ka en reng a, phone a be mawlh mawlh a, a hnu lawkah nula pakhat chu a bulah a kal a, innel hmel takin an inbia a. Reiloteah pawnah an chhuak zui nghal a, ka insum hman tawh lo, ka tlan dawr dawr a, pawna ka va chhuah chuan motor ah an lo lut dawn chiah a, ka va au nghek a. Ka rin aiin ka au ring lehnghal, pawna lo awm ve dangte chu an lo hawi thap avangin nuam lo ka ti thut a, ka inher a, inchhunga luh leh tumin ka ke ka pen a. Thawklehkhatah min pawt her dawrh a, min vawnna kut chu ten hmel tak hian ka melh a, rei min vuan lo, “Tih….Tihpalh”a hmelah chuan inthiam lohna chu ka hmu ve zawk a, mahse a rei lem lo. Kal leh nghal a tum a, “In lamah I nupui fanau ten an nghak reng che sia, nula fawr kualpui na hun ani chiah in ka hre lo”aw chang rat hian ka ti a, hriatthiam loh hmel takin min melh reng a. Chutah thil hrechhuak thut ni awm tak hian a nui ta hak a, ka thin a rim ngei mai. Min rawn pan hnai a, “Min rawn hnaih hlek suh, I nun tenawm tak hi ka hre vek tawh”ka ti a, ka aw chu a zawi viau naa a fiah hle thung. Ka taksa chu zir chiang ni awm takin a enkual a, ka mitah tak chuan min en leh a, “Z ualte..” “Min hre ngai em ni? I hriat thin Zualtei kha a awm tawh lo, nangpawh ka hriat thin Rammuanpuia kha I ni tawh lo bawk”ka ti a, “Ka hmelhriat nih hi I duh ta lova, min zahpui ta anih hi tiraw?”a ti a, “AW, ka zahpui takzet che”ka ti a, a hmelah chuan nui hmel pakhatmah hmuh tur a awm lo.

Khami zana kan inhmuh bak chu hmuh zui tur a awm lova, ka tawngchhuah dan kher chu ka inthiam thei lo. Ka tum vang ani bik lo, mahse ka hmuh chiah khan ka thinrim ka insum zo ngang lo ani. Ka muhil lai chu ka harh zawk a, pawl sawmpahnih result kan nghah laia an in chunga a thu min hrilh chu ka hrechhuak zawk a. Engthil chiah nge tih ngaihtuah chhuah tumin ka han maimitchhing vang vang a, min hmangaih reng dawn thu leh engthil pawh lo ti se chhan tha tawk taka wma ti anih tur thu min hrilh anih tak kha! Ka thu chhuak hlawl a, chhan tha tawk awm vanga nupui neih te, drugs addict nih te…ka ngaihtuah chhunzawm thei lo. A hmasa berah a pi kha ka hmuh a ngai ani. Ka muthilh theih tawh loh avangin khumah chuan ka inlet sek a, khua chu var har ka ti em em a, engvanga a hma khan lo hrechhuak lo nge maw ka nih chu le? Hma takah ka tho a, duhthusamin khua chu a thiang nuam a, clinic lam chu pan phawt tha in ka hria a, ka inkhalh chhuak zui nghal a. Ka rilru in Rampuia pi ka hmuh huna zawhna ka zawh turte chu ka han khawn kual a, a tupa nungchang hi a lo hre ve miah lo anih chuan ka hrilh hriat kher chu tul ka ti lova, chutiang tur chuan engtinnge pehhel takin zawhna ka zawh ang tih te pawh ka ngaihtuah ta zel a. Ka hmuh hunah a tlachawpin sawi tur chu alo awm ve mai turah ka ngai lui ta zawk a. Nidang ang chu nise damlo ka en zawh chuan riltam em em in inah ka haw ngei tawh ang, mahse tunah erawh Rampuia te in peng ah ka ding vang a. Minute 10 vel ka din hnu chuan gate inhawng ah chuan ka motor ka khalh lut a, ka beisei ang tak chhanna hmuh theih loh chu ka hlau hle ani. Pawnah chuan nula pakhat hian hmun alo phiat a, min hmuh chuan a thiltih lai chu a dah a, Rampuia nupui kha ani mai awm mange ka tih lai chuan tlem tawng pai deuh hian enge ka duh tih min rawn zawt a, “I pi ka hmu duh a, a hmuh theih em?”ka ti a. Motor atang ka chhuak zui nghal a, “Ka pi chu ala mu a, I duh chuan ka ko ang”a ti a. Inthlahrung duh hran lovin inchhungah ka zui lut a, rei vaklo hnuah nu la upa lutuk lo hi pawr phang in a rawn chhuak a, ka hmuh tum anih loh avangin ka lo ner sak a. A hmelah chuan lawm vak lo hmel a lang a, “Dr.Hmingthanzuali ka nia, ka rawn tihbuai che avangin pawi ka ti hle mai. He in neitu ber hi hmuh tuma lokal ka ni a”ka ti a, nelawm tak anga lan hram chu ka tum a, “Kei hi a neitu ber chu ka nia lawm, enge ni ta?”a ti a. Ka bo lutuk hmel chu alo man thiam ani ang, “Aw..!! A neitu hmasa I tihna ani ang tiraw? Keichu kum 2 vel chiah hetah hian ka la awm a”a tih chuan ka lu ka lo bu nghat a. Amah vek chuan,”A neitu pitar kha chu a thi tawh a, a tupa khan ka hnenah a hralh tawh alawm”a ti ta zung zung a. Pawnah chuan rei tawk tak ka ding a, ka thinrim chu ka in sehruh nasa hle a, “Heti tak hian ani maw I nun I lo hloh tawh, Rammuanpui”tiin ka phun chhuak sap a. Chak zetin ka inkhalh haw a, ka buai nawn leh tawh ngai lovang tiin ka rum hak a, engmah tihtheih ka nei tawh lo.

“Lalrammuanpuia” chu hming a rik zawh rual chiah chuan ka room parda a rawn inkeu a, midang ni zawk se ti rilru chungin ka lo melh hrawk a. Huatna zawng zawng nena lo en ka tum laiin a hmel cher leh dang bam ka hmuh chuan ka rilru chu a let chiang kher mai. A khawsik reh thei lo vanga rawn inentir anih thu a sawi lai chuan namen lovin hlauhthawnna in ka lo khat a, drugs addict, nula kawpching, hri tha lo kai theihna chance hlir ka lo ngaihtuah hman a, “I la danglam lo”a nui hmel ka hmuh chuan ka harh zawk a, “Ni e, kei chu ka la danglam lo, mahse nang erawh nasa takin I danglam tawh thung a”ka lo ti a. Test ngai test turin ka ti a, hawihhawm takin ka room a chhuahsan a, a hmelah chuan lungawina engemaw tak ka hmu ani. Ka hriatthiam si loh engemaw tak hian min mawlh a, hepa hian min ti a zo tawh anih ber hi. A thisen ah chuan malaria hrik a lo awm a, a khawsik chu ala san deuh bawk avangin a duh lo chung ka admit a. Ka hlauhthawn ber zawk a lo vei lo chu ka lawm em em a, chan chhia a chan hi ka duh lo ani. Hospital khumah chuan a mu ve bam a, amah rawn kan a rawn tlawh tute chu a damdawi khawihpui te an ni ang tih ka ring thiam mai a. Hlim hmel takin a alo chhawn vek a, a kiangah chuan chungho pawh chu an hlim ve hle in a lang tlat. Ni e, Lalrammuanpuia hi ngainatawm tak, a kianga awm nuam em em ani tlat lawm.

“Pi Zualte, ka lo be buai lawk thei che angem?”Mipa pakhat hi a rawn dak dek dek a, lut tura ka ti hnuah inthlahrun hmel tak hian a rawn lut a, “Tanpui theihna che ka nei em?”ka han ti a, inti nelawm takin ka nui a, tlemin a zam hmel chu a ziaawm ve nghal a. Thutna ka kawhhmuh ah chuan a thu a, a hawi kual zak zak a, “Sawi tan mai dan pawh ka hre lo, tuna damlo ka awmpui mek Rampuia saw misual ani lo”a han ti deuh tawng a. A ngaihna hre lo takin chupa chu ka han melh a, “A hnathawh hi fak a phu em em zawk asin, ani hi awm lo se keipawh hi vawiin ni hian I hmaah inlan tur hi ka awm tawh lovang”a ti a, a chil lem khawlh ri lo chu thawm dang hriat tur a awm lo. Ka thutna chu ka han in siamrem a, “Ka hriatthiam theih dan turin han saiwfiah teh”ka ti a, “Khawvelah hian ka mihrin pui ngaihsan pakhat chiah ka nei, chu chu RAmpuia hi a ni asin. Drugs addict tia miten an kawh rawn luai luai, nun pawh thlakhlelhna nei tawh lo kha ani hian min chhanchhuak a, vawiinah chuan keimah anga sualin a phuar mekte tan ka phak tawkin hna ka thawh ve theih asin”a hnuk a ulh a, a han chawl dat a, “Kan zinga a rawn tel tirh chuan addict ve tho emaw kan ti a, min zui kawi reng thin. A ni lo tih ka hriat tirh chuan ak thinrim em em a, kut pawh ka thlak hial a, a chhan chu police nen an tangrual emaw ka tih vangin, mahse min hlat phah lo. A hmel hlim sarh reng mai chuan zawi zawiin min hneh a, amah anga hlim ve theih chu ka chak ta hial a. Ka chhungten in atang min hnawtchhuak a, kalna tur ka nei lo tih hria in a inah min awmtir a. Ka tan chuan vantirhkoh dik tak ani”a sawi zawng pawhin a ngai sang hle ani tih a hriat theih a. Ka kawchhung hi alo so bulh bulh a, athu sawi leh tur pawh lo pawtchat in,”Hmanni deuh pawh khan a nupuiin nau a rawn nei a, fa duhawm tak an neih nghe nghe kha mawle”ka rilru natna tih lan loh hram chu ka tum a. Hamhaih zet hian min en a, chutah a rawn nui hak hak a, “Ka hre leh si e, khanu kha a nupui a ni hleinem. A chhanchhuah zinga mi tho anih kha, a nau pain a pa khan a nei duh leh silo a, nau tihtlak mai a tum laiin Rampuia tnapuina in huaisen takin a pai tlang a, a hrin thleng khan Rampuia chuan ngaihsak takin a tlawh fo thin alawm. A chhungte pawh an lawm teh asin, mi hriat loh hian hna tam tak pawimawh em em si a thawk hi ania keini misual ten kan ngaihsan em em na chu. Mi ngaih ah chuan drugs addict pawh alo ni maithei, mahse chiang takin amah hi I en anih chuan ani tluka Isua ang teuh hi an awm ka ring lo”a ti ta dap dap a. Ka thinlung hi lawmna leh phurna in a rawn khat a, a lakah chuan te ngawih ngawih hian ka in hre bawk a. Kei sawrkar in hlawh tam tawk tak min pe a, ka hna hi tlin ka in ti ve viau in ka lo inchhuang ru viau thin, mahse Rampuia hnathawh ropui tak chuan min hneh em em a, mi fak phut hauh lovin mite hriat loh in hna a lo thawk reng si a. “Zantin I hming lam hian a tawngtai thin”ka bula thu pa in a rawn tih chuan ka phu deuh zawk a, “A hmangaih takzet che niin ka hria, I thlalak hi a room ah a awm a, ka tihfai chang hian ka hmu fo thin. Chuvang a hria che pawh ka ni a, ka hmuh hmasak ber atang che khan ka hre tawh che a, mahse ka be pawp ngam lo che anih kha”nui sang chuan a ti a, ka room a chhuahsan zui nghal a. Tukverh ah chuan dak in boruak chu ka han hip kawk kawk a, hmana Rampuia thusawi chu ka hrechhuak a, “Engpawh lo thlengin eng ang mi pawh ni ila ka hmangaih reng ang che, thil reng reng hi chhan awm lovin ka ti lo tih pawh hrereg ang che”a tih kha. Van boruak thiang kak chu ka han en a, “Rampui… ni e, chhan awm vek in I lo che anih hi”tiin ka phunchhuak sap a.

                                    

“Damlo kha a lo chhuak daih ania”nurse pakhat in a ti lang lang ri chu ka hria a, hmanhmawh takin ka tlanchhuak a, ka hlauh ang ngeiin Rampuia khum chu alo ruak hiai a, dam ver vawra awm phawt a mamawh zia ka hrechiang a, tin, keimah ngei hian enkawl ka duh a ni. Ka hnunga motor hirn ri tuarh ah chuan ka phu deuh zawk a, traffic jam ah rei tawk tak kan ding a, ka hmaa motor a tlanchhuak chu hre lovin ka ngaihtuahna ka lo kawm leh chiam alo ni. In ka thlen hnu chuan Rampuia awmna ka lo zawt lo chu mawl ka in ti em em a, khawi hmunah nge a khawsak ang tih ngawt chu ka ngaihtuah a. Ka inbual zawh hnu chuan zawnna tur hmun bik hre chuang lovin ka inkhalh chhuak a, hmuh mai in ring lo ma hila ka hunawl apiangah zawn chu ka tum a ni.

Karkhat a liam leh hnu pawh chuan engmah ka hmuh chhuah belh lova, mahse ka beidawng mai tur a nilo. Ka duty zo haw tumin ka motor dahna ka pan a, Rampuia chhuah nia nurse duty Lily chu a scooty lam panin alokal ve mek a, min hmuh chuan a nui seih a, “U Zualte, hmannia kan damlo tlanchhuak daih kha nizanah ka hmu hlawl a, alo serious viau reuh lehnghal”a ti a, “Khawiah?”ka aw ah chuan phurna leh hlauhthawnna a khat nghal vek,”Durtlang hospital ah kan monu in nau a nei a, chutah chuan ka kal ve a, ward danga kan chhungte damlo ka kan na lamah ka hmu alawm”a ti a. A thusawi dang pawh chu ka hre tawh lo, motor ah ka lut a, Durtlang hospital lam pan chuan ka tlanchhuak nghal a. Rammuanpuia hian min hel a tum ani tih ka hre ta mai, traffic jam karah ka inkhalh thleng ve ta hram a. Motor chhungah chuan ka thu reng a, ka thinlung ipik lutuk chu vai kian ka tum ani. Vanneihthlak takin Rampuia chanchin min hrilh tu kha pawnah a rawn chhuak hlawl a, hmanhmawh takin ka motor atang ka chhuak a, “Dr.Zualtei kha ka nia, kan inhmuh tawh kha”min hmu thut chu a meng bial lap a, a hawi kual zak zak a, “I hming min lo hrilh ve siloa han in mawl biak tawp chu ka hreh ve deuh a”ka han tih leh chuan,”Valtea ka nia”hul hak hian a ti a. Min hmu chu a lawm loh hmel hle in ka hre lehnghal, “Valte, Rampuia chu enge a an? Ngawi rengin kan hospital atang khan in lo chhuak daih sia”ka ti a. Ka mitah chuan min en a, “Dr.Zualte..” “Zualte tia koh mai kha a tawk e”ka lo ti a, “Zualte, Rampuia’n a hmuh che chuan keima hrilh che maw a ti leh ngei dawn ania”a ti a. Rampuia hauh a hlauh vanga min hmu kha lawm lo ani tih ka hriat chuan ka thawveng huai a, “Thudik ka hrilh mai dawn alawm Valte, hlauthawng suh”ka ti a. A awmna lamah chuan min hruai a, khumah alo muhil bem a, a hmel chu a dang hle a, a chau takzet niin a lang. Amah enkawltu doctor chu ka hmu a, a chanchin min hrilh dan chuan Malaria bakah a lung hi a chak lo hle tih an sawi a. Dam tha vara awm tur chuan hun a duh rei dawn thu a sawi ani. A hmel chu ka thlir ngawih ngawih a, a hmai chu chul in ka mittui chu a rawn hnam tiam tiam a, “Rampui, ngawi renga thawh kher kha a tulna a awm em ni? Kei tal chu min hrilh thei tho si a, I kawng daltu ka nih I hlauh vang ani tiraw nangmaha hmachhawn tura min kalsan?”ka ti a. Ka awm chhung chuan a harh miah lova, awm reng theih anih loh avangin ka phone no.chu Valtea ka pe a, ka haw ta a. Zanriah kan eikham fel hnu lawkah Valtea phone call ka dawng a, Rampuia a zual a ICU ah an dah tih min rawn hrilh a, hmanhmawh em em in ka in siam a. KA chhungte bulah chaw kan ei laiin Rampuia chanchin ka hrilh  vek tawh avangin tuna a chanchin kan hriat pawh hian keimah a kal chu an remti lova, ka nau nen kal turin ka pa chuan min ti a, kan kal ta nghal a. Hospital kan thlen chuan Valtea ka call a, tihtheih nei silo hian an lo thu thap a, an hmel en a sual hmel tak takte pawh Rampuia chanchin hria in an lo kalkhawm alo ni. Hlauthawng takin kan thu thap a, kan rilru ah thildang engmah a awm lo, Rampuia chu dam tha leh se tih chu kan duh ber a ni.

Zanlai dar  12 a pelh hnu pawh chuan tumah haw tum kan awm lo, duty room ah min rawn ko a, ka hlauthawng lutuk chu ka huh deuh dap thei. Dr.Tetea ka hmuh chuan ka ngampa nghal zat a, ani hi ka zirpui thin ani a, internship te pawh kan ti tlang a, ka nel ve hle ani. Min hmuh chuan a lo nui sak a, kan han in chibai a. Rampuia nen kan inlaichinna chu min zawt a, “Thian mai aia ril deuh”ka tih chuan a nui ta hawk hawk a, rirlu hah laia za taka a nuih vang chuan ka thian mah nise ka haw lek lek ani. Inthiam lo deuh hlek hmel chu a pu vat a, “Zualte, a chanchin hi vawiin tlai ah ka lo hre ve chiah a, ka ngaisang ani tih hrilh che ila a hmaa a chunga ka rilru put vangin min ngaidam duh maithei”a ti a, amah vek chuan,”An rawn admit hlim kha chuan addict ah ka lo ngai ve ngawt a, a taksa a chhe angreng sia, a ranw kal pui tu te lah kan veng a ka hriat chian ve em em te kha an ni bawk nen, mahse a cahnchin dik tak ka hriat chuan ka zak chem chem mai alawm”a ti a. Chutianga midang ka atanga ka hriat chuan nuam ka lo ti em em a, “Tuna a dinhmun chiah hi enge?”tiin ka zawt a, ka hlauhthawnna chu ka thup buai peih lo a ni. A tarmit chu a han la thla a,”A tha ve zelah turah han ngai ila, a taksa hi khawl emaw a ti aniang”a insehruh deuh chu ka lo hmu a, “A tha lam han beisei phawt ila, a thiante ho pawh kha a ngaihtuah awm loh thu hrilh a, haw darh tawh se a tha ang. Ngaihtuahawm lutuk a ni tawh lo e”a ti ta a.

Rampuia ka hmuh atang karkhatnaah chuan Durtlang lam panin ka chhuak leh a, Valtea’n a rawn harh that thu min hrilh chuan hmanhmawh takin ka insiam a, ka chhuak nghal a ni. Ka thlen chuan a khumah mu chungin phone a lo hmang mek a, va pawh mai chu ka ngam chiah loh avangin pawn atang ka thlir reng a, chutah ka dinna lam chu a rawn hawi a, min rawn hmuh chuan min hria ang pawhin a awm lo. Engmah hre lova a awmlai khan ka hming a rawn lam a, kha khan min ti lawmin beiseina pawh ka nei sang hman viau a, tunah lah min hre lo ang maiin a awm leh si chu ka hrethiam lo. Ka luhlul ka chhuah a, ka va pan ta tho a, “I va tha tawh awm ve”ka ti a, min en lovin a phone chu a bih ngar a. A khum bula thutthlengah chuan ka thu a, ka phone chu phawrh chhuakin ka bih ve hmak a. Rei tawk tak chutia inbe lova kan awm hnu chuan amah chu rawn tawng chhuak in, “Kan in hre ngai em le?”a ti a. A hmaa a laka ka tawngkam hman ang chiah kha a rawn hmang ve tih ka hriat chuan ka nui sak a, “kan in hre thin anih ka ring. Engmah hrelo a I awm lai pawh khan ka hming hi I rawn lam tlat a”ka ti a, a chal a ti chuar nang nang a, “Chutiang pawh ka hre lo”a ti sap a. A hma khan thil ka hriat loh vangin a laka mawi lo takin k ache a, tunah hian chu chu ka tuar let ah ka ngai mai a, engtiang pawhin thinrim se ka thinrim let ve tur ani lo. “Enteh Rampui, tha deuhin thil sawi ang”nem thei ang berin ka han ti a, a kut chu la kangin ka vuan a, “Ka hriat lohna avanga I chunga ka chetdan mawi lo tak avang khan ngaihdam ka dil che”ka han ti leh a. Chutah ka kut chu a hmer ta vawng vawng a, ka hmuh chak em em thin a nui hmel chu ka hmu leh ta. Ka phur sawt a, “Ngawi renga ka lak atanga I kalbo vang khan I chungah ka thinrim em em a, ka hmuh leh hmasak ber dan che lah kha a duhawm lo hle bawk a”ka ti a, “Zualte, ka tihpalh takzet ani. I lak atanga kalbo tura thutlukna ka siam kha ka thutlukna siam tawh ah chuan ka la inchhir ber leh ka tihsual awmchhun niin ka hria”a ti a. A mitmeng hmangaihnaa khat chuan min melh de sawr a, “Tunah hian ka inchhir ani tih sawi nan a tlai lutuk tawh em?” a ti a. Ka lu chu ka lo thing a, “Ka nunah hian midang in hmun an la chang ngai lova, an chan hi ka phal ngai lo bawk ang”ka ti a. Midang awm vet e chu kan zah zo lo, kan inkuah thlawp a. A mittui hnam chap chuan ka hmai a rawn far a, “Mahse Zualte, engthil mah hi ka hnathawh lai titawp tur hian in dal tir ka tum lo”a ti a, “Titawp turin ka ti ngai lovang che, I tan tangkaina ka neih phawt chuan puih che hi ka duh zel zawk ang”ka ti a. Kutbeng ri kan hriat chuan kan in thlah vat a, kan bulah chuan Valtea chu nui sang hian alo ding a, “Duhthusam a taka thleng mek chu a hmuh a nuam a, a hahthlak hle mai”tih pahin min  han siai zauh a.

Rampuia hospital atang a chhuah ni chuan a inah mi tam takin an lo hmuak a, ain chu a hmaa an in ngaihtuah chuan lian lo tak hi a ni a, mahse chutah chuan lungawi hliah hliah in a khawsa thung. Pawn lam bathlar ah chuan kan thu a, boruak chu tlemin a vawt lek lek a, “Min zawh duh apiang min zawt thei ang”nui var var chuan a ti a. Ni e thil tam tak zawh duh ka nei a, mahse eng ber nge ka zawh ang tih ka lo ngaihtuah lai mek a ni, “Engatinge ngawi renga min kalsan?”ka han ti thawr a. Min melh vang vang a, “Ka tan a awlsam zawk ka rin vang ania, ka hnathawh tur hi I hriat chuan min dan ngei ka ring bawk a, keiin bansan ka tum dawn silo. Boruak tha lo deuha nang nen inthen kha ka hlau em em a ni. A dang leh ah chuan nang chuan hna zahawm tak I thawk dawn tih kha ka hria a, mahni pawhin I damkhawchhuak ang tih ka hriat vang ani bawk. Mahse kha thutlukna ka siam avang khan ka inchhir a, ngaihdam dil che a I hnen lo let kha ka tum fo thin. I thinrim dawn tih ka hria a, kei hi min haw hle ang tih ka ring bawk a, chuvang chuan engmah sawi lova awm tlang ka tum leh ta ani. Mahse ka hlawhchham chu anih tak hi…”a ti a. Ka bulah a rawn insawn a, duat takin min kuah a, “Kan inhmuh hmasak ber khan ka inchhir nachhan chu ka hrechhuak chiah a, nang hi I duhawm em em a, hmangaih tlak I lo takzet a, thutlukna kha ka lo siam sual ani tih chu a takin ka hre ta, mahse min hmuh dan erawh a duhawm ta lo hle anih kha”ka lu chungah a khabe a nghat a. Ka lo thaw dep dep a, ani hi ka chan hlen ang tih hlauhna chuan min rawn tuam a, ka lo chan hlen lek lek ani tih ka hriat phei chan ka hlauthawng hnuhnawh leh viau ani. An in chungchang ka zawh chuan min chhang lawk lova, kha in kha a tan a hlut ve tur zia ka hria a, ka lo zawt ta mai pawh ka inthiam lo angreng viau a, “Ka pi in min boralsan takah kha chuan mahnia han luah ngawt kha a khawharthlak a, chutihlai tak chuan naupang khawngaih tak mai a lung a pawp avanga thih nghaka awm mek ka tawng fuh a, an tan chuan enkawl leh ngaihna a awm tawh lo. Ka mang lam thleng chuan ka hmu chhunzawm reng a, in chu hralh mai ila, a theih ang angina buaipui ila tiin thutlukna ka siam ta tawp mai ani. Chu chu I rawn zirchhuah dawn kum chiah kha ani a, Vellore ah ka rawn hruai nghe nghe. Hospital atanga I duty haw kha ral atang ka hmu reng che a, rawn pawh lo tur chea ka in control nasat zia kha aw!”a maimitchhing a, a hun kal tawhah a cheng mek tih ka hria. A rawn meng leh a, “Hlawhtling takin naute chu zai ani a, sum ka hman ban chuan he in hi ka lei ta ani”a ti a, chutah amah vek chuan, “Zualte, tunah chuan engmah neih ka nei tawhlo takzet ani. Hmana I hriat thin Rammuanpuia kha ka ni tawh lo, nuam pawhin ka siam ve thei lovang che tih ka hria”a ti a. A sawi zawh hma in a hmui chu ka hup a, “Chutiang engmah ka ngaithla duh lo ania, nangmahin engmah I ti tawh lovang, I kiangah nangmah pui tur che hian ka awm zel ang”ka ti a, hlim takin a nui a, keipawh a kianga thlamuang taka ka awm thin ang khan ka awm leh thei ta.

Midangte tanpui nan a hun tam zawk a hmang a, ning hmel a pu ngai lo. Hlim takin a nui thei reng a, lawmthu sawina lehkhathawn hi a dawng tam thei em em a. A then chu nupa inthen hial tum tawh innei leh te hnena remna a thlen vangte, an fate addict avanga rilru hah ten hahdamna an chan avanga lawmthu sawina leh amahni addict ngei ten beidawnna atanga beiseina an lo neih leh vang te ani ber. Khawi atanga lokal nge tih hriat miah loh hian pawisa fai tam tawk tak a dawng fo a, hei hi a duh lo hle thin nghe nghe. Mahse thawn let ngaihna a awm loh thin avangin a mamawh a a hman  atan Pathian in a pe ani tiin ka hrilh a, a pawm chauh thin. A ruk thei ang bera hnathawk a, mi hriat pui lova rawngbawlna pawimawh tak thawk thin chuan sorkar beng alo thleng ve ta a, zau zawka hna a thawh theihnan office te hial hawnsak alo ni ta. Miten misual tia an sawi sep sep thin Lalrammuanpuia chu a hun takah Pathianin a chawimawi a, midangte tana malsawmna ni zel turin hun leh hmun tha zawk a lo buatsaih sak ta ani. A office ah chuan ka leng a, harsatna tawk engemawzatin an lo pan avangin duh ang pawhin ka hmu mai thei lo. A tawpah chuan ka lut thei ve ta hram a, a  thutna chung zawnah chuan he thu hi mawi takin a lo in tar a, “NANG MALSAWMNA NI ANG CHE” tih chu, a hnuaia thu ka pasal hual chu lungawi fahran in ka melh a, a rawn hawi chhuah chuan a nupui duhtak in ka lo thlir reng ani tih a hria a, duhawm em em mai hian min rawn nuih ta var var a…….