ROMALSAWMA

ROMALSAWMA
Mami Chawngthu

.

“Chhelo…chhia..”

.

Ka ke pen apiangin ka hnung atang chuan chu thu chu a rawn ri leh sar sar zel a, ka han ding deuh dat a,

.

“Wow…”

.

Ka insum thei tawh lo, ka va ding hnai a, “In nungchang a mawi lo hle mai, zilh loh fa in nih chu ka ring em silova, in Professor te chungah mawihnai zawkin in lo che tawh dawn nia”ka ti a, rum zet hian ka melh hlawm a. Ka inher a, ka hma chiah a rawn kal mek nen chuan kan insu chawrh a, “Ka tihpalh lutuk…” chu pa chuan a ti vat a, ka han en chuan Romalsawma a lo ni, ka chal chu ka tuai heuh heuh a, “Ka thiam loh anih ve tho kha” tih leh kal nghal ka rual a. Ka scooty dahna ka thlen chuan ka han hawi let leh kher a, min lo chhaih tute leh Romalsawma chu an dinna ngaiah ding in min lo thlir thap a. Ka chahbi chu phawrh vat in chu lai hmun chu rang takin ka tlanchhuahsan a, tunlai mipa nungchang mawi lo lutuk thin hian min ti hah! In ka thlen veleh ka inbual nghal a, inbual zawhah eirawng ka bawl zui nghal a, mahni maia awm ka nih avangin rawngbawl a hautak lem lo. Ka tihtur ang ang ka tih zawh chuan tlaitina ka tihdan thin ang bawkin ka nu ka bia a, ka dam tha a harsatna a awm anih loh chuan hei hi kan tihdan pangngai ve reng a ni. Kan inbiak zawh rual chiah in thenawm naupang Zico chu a rawn leng lut a, ani hi ka inleng neih regular ve awmchhun ani a, duat pawh ka duat ve hle a, in a ka awm phawt chuan an in aiin ka inah a tam thin. Tv kan en dun a, kan nui dun a, a khat tawkin Zico chu a zai leh ar ar a, he naupang hi ka hlimpui takzet ani. A sam chir chiat chu ka tuai sak heuh heuh a, “A u, chaw ka lo ei dawn em?”a han ti a, “Aw, siam nghal ang aw”ka tih chuan ka kut chu alo pawt deuh faih a, “Mahse apa in a phal tawh lova”a ti a, a sam chu ka han tuai sak a, “A u in min sawm tlat a I ti dawn nia aw”ka tih chuan hlim takin a nui a, chawei chu ka siam nghal a. Chaw kan eikham a, kan eina ka singsak zawh hnu chuan Zico pawh a haw tawh a, ka room ah lut in zirlaibu chu ka keu vel a, in lama  theihtawpa inbuatsaih hi ka duhdan a ni.

.

Ka hming chu Lallianzuali ani a, Azual tiin min ko thin a, Aizawl a college pakhat ah Asst.Professor hna ka thawk a, kan khua tak erawh Champhai ani thung. Ka hna avangin Aizawlah mi inluah in ka khawsa ve a, ka nu hian a khat tawkin min rawn awmpui a, rei erawh a awm hman ngai lo. Ka hnaah ka tui a, ka chak ber thin thawk ka ni bawk a, naupangte pawhin ka class hi an ning ngai lovin ka hria. Nula ni ve ta chu ngaizawngtu leh min han zar ve tute chu an awm ve nawk a, mahse vawikhat ka tihsual zeuh atang khan ka zawng chhang lo ani chek ang chu, ngaihzawng nei lovin ka awm ta reng mai a ni. Ka hnaa ka kal bak ka chhuak tam lova, inkhawm tura ka kal tih loh chu inah ka inkhung deuh chawt a, chu chu ka hun hman dan tlangpui chu a ni.

.

Ka scooty a nun theih loh avangin kawnah taxi ka chang a, ka mamawh ni takah taxi lah chu a vang phian lehnghal, ka sana ka bih sek a. Rei vak lo hnuah bike pakhat hi ka dinna bulah chuan a rawn ding chawt a, a helmet chu phelhin chuang ve turin min han sawm a, kan thawhpuipa fapa Romalsawma lek chu lo niin. Hmanhmawh takin ka chuang ve mai a, college kan thlen chuan naupang an lo zi hut hut tawh a, chutia Romalsawma nen kan inphur min hmuh chuan an phawk hra hlawm a, engahmah ngai duh lovin office lam panin ka kal hlawk hlawk a. Ka dawhkana ka han innghah fel chuan Romalsawma hnenah khan lawmthu ka sawi miah lo tih ka hrechhuak a, ka lu chu ka dawm a, kei ve zet hi chu! Chawhma lamah period hnih ka nei a, ka zawh hnuah ka thawhpuinu Lianbawihi nen canteen lamah inhnawhpuar tumin kan inzui lut nghal zat a, college staff thutna bik lam chu kan pan ding a, ka han hawi kual vel chuan kilkhata naupang lo bawr laih chu ka hmu a. An nui leh hak thin a, an thusawi tak erawh ka hre thei lem lo, Romalsawma pawh a lo thu ngawi leh ran tawh a, min hmuh chuan a nui sak a, engemawni ka hriat leh pek chu ni, ka hmu lo der a, ka kal tlang ta daih a. Ka awmdan chu ka inthiam chiah lo, vawi tam tak ka hmu fo tawh thin a, khami ni, kan insut atang khan ka tum hauh loh in a ni hi ka ngaihtuah chhuak  fo mai a, ka thil duh ber chu a ni lo chiang alawm. Ka lu chu ka han thing nawk nawk a, Romalsawma nui hmel kha…’Ka ngaihtuah tawh lovang’ tiin ka han phun sap a, “What?” Lianbawihi chuan mi rawn en vat a, “Engmah ni love”ka tih chuan a thil ei lai chu a ei zawm leh mai a, ka thil chah pawh chu ei mang lovin ka thai let kual vel ta mai mai a. Chawhnu lamah Romalsawma te class ah ka lut a, ka ngaihbel nge keimah hi ka dik lo tlat, nidanga ka class la nen chuan a boruak a dang daih mai. Ka hawi apiangin min lo melh reng zel a, rei ka en ngam lo, ka kawchhung chu a so bulh bulh a, hei hi ka duh lo takzet a ni. Scooty ka keng lo tih hria in Lianbawihi chuan min phur haw a, in ka thlen chuan ka thu hnawk a, engtia hmachhawn zel tur nge tih ka hrethiam lo. Tukverh chu ka hawng a, thli rawn thaw heuh heuh chu ka han maimitchhin hnan a, ka cell phone a playlist ka duh bik ka dahna chu ka han hmetchhuak a, nunhlui a inhruai kir tir chu ka tum a ni.

.

“Min ngaidam rawh, a thleng nawn tawh lovang, ka thiam loh ani. Min kalsan suh” ka banah chuan min pawt tlat a, ka mittui chu a hul vek tawh, “Nang leh kei hi suihzawm theih kan ni tawh lo, ka hriat loha thil thleng a tam tawh lutuk” ka ti a, “Ka siamtha leh vek ang, min ngaidam rawh” a tih chuan min vawnna kut chu ka phelh sak a. Mak tih hmel tak hian min en a, “Dinsang, kan pahnih inkar hi a tawp vek tawh, ka mittui hi chhuak tur pawh a awm tawh loh hi” ka ti a, “Azual, ka tisual nasa hle mai tiraw? Kei hi ka ngaihtuahna a lo tawi em a, ka dik lo a ni. Ka tellova awm thei lo turah ka lo dah che a, min duhna khan tawpni a nei thei dawn tih ngaihtuah thlenna chang ka lo hre ngai lo. Tunah chuan I tuar thin kha ka tuar a ngai ve ta a nih hi, hlim reng ang che” tiin min kalsan a. Ka en reng a, a bike a a lawn tur chu a rawn hawilet a, a hmel ah chuan ka la hmuh ngai loh na kha ka hmu ve ta! Na tur khan ka duh ve thin a, mahse a na hmel chu ka hlimpui chuang hauh si lo. Chumi avang ngawta let erawh ka tum der lo thung, a hun ah chuan mi luhlul thei tak Azuali kha ka ni miau alawm.

.

Ka phone rawn ri chuan ka thil ngaihtuah lai mek chu a thlawhbo pui nghal a, ka nu nen kan inbiak hun a lo ni reng tawh tih chu ka lo theihnghilh lek lek a ni. Ka nu nen kan inbiak zawh chuan tha tho lo zetin ka tho a, rawngbawl ka tum zet na a Zico a rawn lan loh ve the mial avangin an in lamah ka kal ta zawk a. Ka va luh chuan Zico chu an Tv hmaah a lo thu a, min hmuh chuan a rawn tlan vat a, ka pawm a, a nu in rawng a lo bawl mawlh mawlh bawk a, “A tibuai thei lutuk che a, ka khung bet lui a, a titau nasa ngang mai”a lo ti nghal bawrh bawrh a. A rawn len loh a ka khawhar thin zia te chu ka sawi a, “Rawn len lo khap tawh reng reng suh u” ka han ti a. Zico chu ka melh a, a lo nui var var a, “A u, enteh saw pa saw”tih pah in ka in lam chu a kawk a, ka va en ve chuan mi pakhat hi kawngkhar bulah a lo ding reng a, Zico pawm chung chuan ka phei a, “Mamawh I nei em ni?” tia ka biak chuan a rawn hawi a, “Dinsang…” kumhnih a liam hnua kan inhmuh leh hmasak berna a ni. Min hmuh chuan a then sak a, ka nau pawm chu a en leh a, “A rei ta hle mai, kan inhmu leh chu ka lawm takzet a ni”tih pahin a kut a rawn phar chhuak a, kan han inchibai a. Inchhung lamah kan inzui lut a, “Rawn tlawh che hi ka chak thin lutuk, ka ngam ngang lova, mahse tun chu a remchang em a ka tia ka rawn kal lui anih hi”a ti a. Kumhnih liam ta ai khan a lang puitling tawh zawk a, a hmaa ka hriat thin pawh kha a ang tawh lo hialin ka hria, sawi em em tur ka hre lova, ngawih reng lah chu thil dik ani chiah bawk si lo. Ka nau pawm chu ka ti che deuh sek a, “Naupang I lawm pawh a la reh lo ani maw?”a ti a, a nui a, “Ni e, inthlak danglam hi alo harsa te pawh ani ang”tiin ka han nui ve hak a, “Engti turin nge I rawn kal?”tiin ka han zawt a, “Helamah ka hna ka rawn zawm ve dawn anih hi”a ti a, eng hna ber nge a thawh tak tih chu ka zawt zui ta lem lo. Chawei turin ka han sawm a, min hnar thung, nidanga rawn kal leh tura insawiin a haw ta a, ka thlir reng a, tum loh taka kan inhmuh leh vang pawh ani ang, ka rilruah chuan a awm ve reng a.

.

College ka thlen chuan ka hma lutuk tawh lova, tlai hi ka duh der lo na in tum dang ai chuan ka kal tlai tih ka hria, ka scooty ka dah fel chiah tih ah chuan Romalsawma a rawn tlan lut ve chiah a, ka hmu reng na in ka hmu lo der a, “Miss..” a rawn au hram a, ka haider lui thei tawh lo, ka nui lui sak a. Ka sana bun lai chu ka kawk zeuh a, a lu chu a thing nar nar a, office lam chu ka pan san ta a. Thil pawimawh ka khawih laklawh avangin Romalsawma te class ah ka lut hman lova, ka ban hun pangngai angah pawh ka bang hman lo. Ka inrem fel meuh chuan ka thiante chu an lo haw deuh vek tawh a, ka inkhung fel a, inhnuai lam ka pan vat a. Scooty ka tih nun lai chuan Romalsawma chu a rawn lang thut a, ka phu nasa ngei mai, “Tinge vawiin?” a ti deuh tawl a, “Ka buai lutuk a, class ka la hman ta lo a”ka ti ve mai a, naupang dang ang a ka en lo hi mak ka in ti ve reng, hetiang anga min zuam tur hian tumah ka duh ngai lo, “Ka pa ber kher I rawn luhtir lehnghal”a tih chuan ka nui deuh hak a, lawm vak lo chuan min melh ralh thung a, “I la haw dawn lo em ni? Ka haw nghal mai dawn asin”ka ti a, ka helmet chu ka khum nghal a, “I hnung zelah ka rawn tlan ang, ka veng ang che”a ti ve mai a. Ka nuih chu a za angreng viau a, ka tlan chhuak a, ka hnungah chuan a rawn tlan ve nghal a. Ka in peng ka thlen dawn chuan horn a rawn hmet ri tuar a, ka ding a, ka bulah chuan rawn ding ve nghal in a helmet chu a han hlip a, “Zanah ka lokal thei angem, ka zirlai ah zawh duh che ka nei” a ti a, han hnar mai ka tum na in hnar dan ka hre chiah lova, “I pa in a thiam zawk ka ring” ka ti a, “A subject ani hleinem, nangmah alawm”a ti a, a hmel chu a lungawi vak lo in ka hria, a chetdan naupang chhia tak chu ka lawm ru hle a, mahse ka tilang ang tih erawh ka hlau, “I pa dil la a phal chuan I rawn kal dawn nia”tiin kan inthlah ta a. In ka thlen chuan engvanga hnar fithla thak lo nge ka nih tih chu ka inzawt a, ka duh aiin he nau hi ka hnaih ta mah mah ani.

.

PART-II

.

Ka TV chunga sana in tar chu ka han thlek zauh a, ka muang lui viau na in ka chawei kham na pawh a rei leh tawh, ka in lam pan a light rawn de zek zek chu ka hmu a. Ka mi nghah mek anih tawh chu ka ring a, chumi ka ngaihtuah mek lai chuan ka kawtah chiah a ding a, ka kawngkhar kik ri in a zui nghal bawk a, ka then sak a, kawng hawng tur chuan ka tho nghal a. Kawngkhar bulah chuan Romalsawma chu a lo ding ran a, lut tura ka tih chuan a rawn lut a, note bu pakhat hi a rawn zakzeh bawk a. A thut lohna lamah chuan ka thu a, a thiam loh ka zawh chuan, “A vaiin” a ti a, a nui suk a, “Nitin class I kal ziah ani lawm ni?”ka han ti leh kher a, za vak lo in a nui a, Tv chu a melh ta daih a. Rei vak lo chutia kan ngawih hnu chuan ka phone a rawn ri a, Dinsanga tih ka hriat chuan ka la chak lo viau a, mahse chhuanlam ka mamawh em avangin ka la hram a, thil pawimawh min rawn zawh avangin kan inbe rei ta phian a, ka phone ka dah meuh chuan kan chanchinthar en lai pawh alo tawp tawh a. Romala chuan min melh ralh a, “I bialpa mi?”a ti a, ka lu chu ka thing a, “Ka awih lo e a”a tih chuan ka chhang tawh lo. A lehkhabu chu ka keu sak a, engmah a inziak lo, “Hei engmah a inziak bawk silo a, inhrilh a va har duh awm ve”ka ti a, “Ka chhuanlam ve mai mai anih kha, ka rawn leng chak a”a ti a, min melh ta reng a. Ka nui hak a, thinrim lamah a kal mah tawh zawk, “Romal, in zirtirtu ka nih hi, min lo zuam viau turin I lakah ka lo awm em ni?”ka ti chang fak a, min en ngaiin min la en reng a, “Va haw tawh rawh” ka ti leh a. Muangchangin a thutna atang a tho a, a lehkhabu chu a la a, “Miss, ka zuam reng reng lo che ania, chuan ka zah em em zawk che. Ka tihpalh..”a ti a, a chhuak ta nghal a. A tlan liam tur chu tukverh atang ka en a, ka ti lutuk mah mah mah niin ka hria a, chutih rualin a tirte atang kei hi ka inven a ngai tih hre tur khawpin ka puitling tawh.

.

Chumi ni atang chuan Romalsawma chu ka hmu tlem sawtin ka hria a, an class a ka luh hian kilkhatah a thu ngawi reng a, ka class lak chhung zawng min melh ngat ngat thin. A chang chuan ka haw em em a, mahse office lama ka let hi chuan ka ruak huaiin ka hre ang lawi a! Thlasik lai anih avangin boruak pawh a vawt vur tawh a, ni lum ai a nuam tawh hle a, office kawtah chuan nilum aiin kan thu dial thin. Keipawh class lak tur ka neih tawh lem loh avangin ka thiante chu ka fin ve a, kan naupang te chanchin chu an lo sawi malh malh a, chutia kan rik bawrh bawrh lai chuan Sir Hmaa (Romala pa) chu hmanhmawh zet hian office atang a rawn tlan chhuak a, a hmel chu a dik lo tih ka hre nghal, “Romala te an accident a, damdawiin lam an pan mek ani awm e”a aw khur chu thup a tum viau na in a thei bik lo. Kan chiai ta nuai nuai a, ka thin chu alo phu dawt dawt bawk a, damdawiin lama kal tur chuan kan inbuatsaih ta vek hlawm a, “Class la nei tur te kha chu rawn kal duh suh u, eng an ti em lovang. Chanchin kan inhrilh zung zung thei alawm”Sir Hmaa bawk chuan a ti a. Lianbawihi nen kan scooty dahna lam chu kan pan vat a, class la nei tur tlem te tih loh chu damdawiin lam pan chuan kan tlan ta hlawm a. Ka kut thlan dap chu ka mal ah ka han tat nawk nawk a, ka hreh viau na in Romalsawma tan chuan ka tawngtaisak bawk a. Hospital kan thlen chuan Casualty atang ward ah an lo sawn zo chiah a, luh erawh an lo remti lo. Pawnah kan awm thap a, Sir Hmaa chu doctor hmu tur chuan a kaltlang nghal a, mi veivak chu ka thlir reng a, engtiang taka serious nge anih ang tih ngaihtuah vang chuan ka thaw hak a, “Kan dinhmun a tha e”rawn titu lam chu ka hawi vat a, Romala nu alo ni. Kan thutnaah chuan a rawn thu ve a, “A lu a hliam awm saw kan ngaihtuah ber chu a ni a, mahse amah a rawn harh tha a, ngaihtuahawm a ni tawh lo” a han ti leh a. Chu lai hmuna awm te chu kan thawveng hawk hlawmin ka hria, a luh theih chuan loh avang leh amah Romala ber a harh avang chuan keiniho pawh kan haw ve ta hlawm a.

.

Zanah chuan ka rilruah Romala a awm reng a, tleirawl cool zet mai, a hunah erawh ri ve pawp ngam, ruihtheihthil in a tihbuai loh tih hriat zet a taksa nung sar kha ka mitthlaah chuan a awm reng a. Ka tawngtaisak a, ka mu thei ta hram a. Zanlaiah ka harh hlawl a, ka mumang chu mak titakin ka ngaihtuah zui a, ka lukham hnuaia ka cell phone dah chu ka ban a, hmet engin darzat chu ka en a, zing lam dar 2 alo pel fel chauh a. Ka muhil leh mai thei lo chu whatsapp ah chuan ka han lut a, ka thawhpuite nena kan awmkhawmna group ah chuan Romala chanchin an lo zawt sap sap hlawm a, Sir Hmaa’n thlalak arawn post te chu ka han en ve a, Romala chu a muhil bam a, a hmai chu a sawh ve nual avangin a rawn ti lang tha duh lutuk lo anih ka ring. Ka phone ka dah a, muthilh leh tum chuan ka puansin lai chu ka han pawt tha a, reiloteah mumang ramah ka kir leh ta vang vang a. Ka harh meuh chuan ni alo tlang sang tawh hle a, thawh ka hai tih hria in hmanhmawh takin ka inperh tho a, inbual turin bathroom ka pan nghal a, chaw ka ei hman tawh dawn chuang lovin ka hria a, rawngbawl buai pawh chu ka tum lo. In atanga ka chhuah chuan ka la tlai chhe lem lova, kawnah ding in ka pum chu ka hnawh puar phawt a ngai ka ti leh hnuhnawh a, Zico te dawrah ka lut a, keimah ang bawka zing chawei hman lo inhnawhpuar tum an lo awm ve nual bawk a. Zico pa chuan min lo ko vat a, ka duhzawng a hriat tawh avangin lam pawh ngai lovin min rawn pe vat a, ka phone ah lai chu ka phawrh chhuak a, miscall lo awm ka hmuh chuan ka han enchiang a, number ka hriat ngai loh ani. Ka ak leh nghal mai a, a pawimawh anih chuan min rawn be leh mai turah ka ngai, “Azual”ka hnunglam atang min rawn kotu chu ka han en vat a, Dinsanga alo ni, “Tun ang hunah te helai hmuna kan inhmuh teh mial a”ka ti a. Ka bula thu tur chuan ka han sawm nghal a, a rawn thu ve mai bawk a, “Tukin a I awmdan kha ka tuktin awmdan a nia”a tih chuan ka hrethiam lo lek lek a, mahse zing chaw ka ei lo tih ka hriatchhuah in ani pawh a ei hman lo ziah tih a sawina ani tih chu ka man veleh mai a. Ngawi rengin kan ei a, coffee chu ka han lem khalh a, “Khawiah nge I thawh kha?”ka ti ta nge nge a, “MBSE ah” “Wow…” “Hmmm”a hmui chu a han ti pawrh a, “Ka kalsan phawt che aw, nang chu tawite I tlan chho anga, I thleng nghal dawn nia. Kei ve hi…la tlan phei char char a ngai”ka ti a, ka nui a, a dar chu a san ak a, “Kan inhmu leh dawn nia”a ti a, ka chhang tawh lo. College ka thlen chuan Lianbawihi chu alo thleng leh reng tawh a, ani hi chu ka thlen khalh thei lo chu a ni e. Pawnah nilum alo ai a, min hmuh chuan a nui sak a, “Vawiin chu chawhma chiah kan nei ve ve in ka hria, Romala tlawh ka rilruk a, I duh ve em?”a lo ti siam siam a. Ka han ngaihtuah a, chawhma chiah chu ka nei tak alawm, “Duh loh pawh a awm hleinem, amah kan hmu mang silo a, kal leh chu a tha khawp ang” ka ti a, chhun a kal tur chuan ka inthurual ta nghal a.

.

“In rawn kal leh duh kher anih kha hei a tha tawh lutuk alawm” Romala nu chuan alo ti a, cabin lama an lo insawn avang chuan awlsam takin kan hmuh ve theih phah a, “Nizan te in mu thei em?” Lianbawihi’n zawhna a zawh lai chuan Romala chu ka va melh a, khap miah lo hian min lo en reng a, ka mit chu ka la sawn vat a. Romala nu chu a tawng mawlh mawlh a, enge a sawi tih pawh hriat ka nei mumal lo. Ka phone chu ka tuai vir leh thin a, “Eitur lamsak ka lo tum lai tak ania, amah a kalsan ka ngaihtuah deuh si a, in awm lai hian ka va kal lawk ange”tiin Romala nu chu a chhuak a, a chhuak fel chiah a, Lianbawihi phone a rawn ri ve nghal zat bawk a, “Ka tawng ring thei sia, pawnah kan be lawk ange”tiin a ni pawh chu a chhuak zui bawk a. Khum tlanga puan rawn tla thla chu ka kut in ka zut ka zut a, “Ka that leh that loh pawh min zawt ve lo reng reng”vui aw zet hian a rawn ti a, “Ni e..”tiin ka nui a, “I tha lo tih hrereng in zawh kher I ngai em ni?”ka ti a, min hmu thei lo turin a inher a, a sir zawng chuan a mu ta daih a, ka han din hnaih deuh a, “Romal.. Hey.. I muhil duh em ni?”ka ti a, a maimitchhing tlat a, a darah chuan dimte in ka han khawih a, “Dam vat rawh aw”ka tih chuan a rawn meng a, a mit chu a hnawm chap a, ka tum lawk pawh ni lovin ka kut in ka han hru a, “Ka zah em em thin che a, chuan vawiin ni thleng pawhin ka la zah reng che”tiin a rawn phun sap a, a hmaa ka tihdan kha a la na tih ka hre mai, ka then sak a, “Um..Ni e, ka hria alawm”ka ti a. Pawn lam atanga thawm rawn awm avang chuan ka thu vat a, Lianbawihi chu a rawn lut a, kan boruak pawh a pangngai veleh mai a. Kan haw dawn te chuan min melh reng a, engmah a sawi lo na in engemaw tak chu a hmelah chuan a inziak tlat si, tlawh leh vat kan tum thu sawiin kan chhuahsan ta a.

.

Class ka lak laiin ka phone ka ken ngai loh avangin ka let leh hnuah whatsapp message lo awm pawh chu ka hmu ve chauh a, “Min rawn kan vang aniang ka dam tha chak hle, vawiinah hospital atang kan chhuak”Romalsawma hnen atang a ni, chu chu kan va kan ni atanga chhiara nihnihna ah chiah a ni. Ka phone ka dah a, pawn lamah ka chhuak ta daih a. Van boruak thiang kak mai chu ka en a, Siamtu themthiamzia leh ropuizia chu hai rual a ni lo. Keini duhtaka a siam mihringte pawh hi harsatnaa inhnuk lut ngawt tur hi chuan min tih ka ring lo, ka khupah ka khabe ka nghat a, ka lehkhabu ken chhuah chu chhiar tumin ka keu a, tlar khat ka chhiar zo a, ka chhiar zawh chiah chu enge tih ka hre reng reng lo. Ka lu chu ka han dawm a, “Ka a zo dawn takngial anih hi” tiin ka phun mawlh mawlh a, ka lehkhabu ka khup a, ka ngaihtuahna tihfim tumin naupang chetla vel chu ka thlir kual ta daih a.

.

Ka haw chuan ka in chu a inkalh lo tih ka hre nghal a, hmanhmawh takin ka lut a, ka nu chuan nui var var in min lo en a, “Nu… Engtinnge..?” ka hamhaih lutuk chu ka tah a chhuak zawk, “I pa in hrilh lawk lovin kal ve thut chhin teh ang a tia, ka rawn hrilh duh ta lo che anih hi”a ti a, kan inkuah vawng vawng a. Ka pa hna buaipui turin an pahnih in an rawn kal hi alo ni a, ka pa erawh alo chhuak daih thung. Ka inthlak zawh chuan ka nu nen rawng kan bawl a, chutia rin loh taka ka nu ka hmu thut chu ka lawm ngei mai, “Dinsanga pawh kan rualin a rawn chhuk ve a, a rawn len thu te a sawi a”bai chawh pah chuan ka nu chuan a ti a, “Nia, vawikhat chu a rawn leng ve ngei alawm”ka ti a, “Bawihi, Dinsanga lam hi I awn ta lo viau em ni?”a tih chuan ka nu chu ka va melh a, min lo en ve reng a, “Nu, awmzia a awm tawh lo”ka ti hul hak a, hrethiam takin a lu chu a bu nghat nghat a. Chawei kan peih hnu chuan ka pa pawh a rawn haw a, chaw kan ei zui nghal a. Zico damloh avangin chaweikhamah tlawh turin ka kal a, min hmuh chuan min lo ban nghal a, ka ngaih tluk zetin min lo ngai ve a ni. A muthilh hma chu ka haw a phal lova, a damdawi eiin a hneh deuh ani ang, rei vaklo hnuah chuan a muhil a, keipawh ka haw  ve mai a. Ka phone chu tv chunga ka charge avangin ka han la nghal a, “A ri nasa lutuk, ka la thiam lo a”ka nu chuan alo ti a, ka han en chuan Romalsawma miscall alo awm thla tuar a, ka room lamah ka lut tlang a, whatsapp ah message alo hnutchhiah bawk a,

.

“Ka rawn kal dawn”

.

“Ka nu leh pa an rawn zin. Chu bakah I damlo, hahchawl rawh”

.

“Ka rawn chhuak daih tawh, in kawmchhak ah ka ding, rawn kal teh”

.

Ka chhiar zawh chuan ka thaw hak a, “Romal, haw rawh, ka rawn kal dawn lo, duh duh a koh chhuah mai mai theih ka ni lo”

.

Ka reply zawh chuan ka phone chu khumah ka theh thla a, tukverh ka hawng a, ral lehlam chu ka thlir vang vang a, engatinge ka duh loh thil hian a um in min um zel tih hi ka hrethiam lo. Ka room kawngkhar chu a rawn ri rak a, ka nu chu a rawn lut a, “Bawihi, I thianpa a rawn leng”a ti a, tunge anih ka zawh chuan a la hriat ngai loh thu a sawi a, room atang chuan hmanhmawh takin ka chhuak phei a, Romalsawma chu ka pa ep chiah ah chuan a lo thu reng a, min hmuh chuan a then sak a.

.

.

PART-III

.

Ka nu leh pa chuan an motor chuan chauh chhuanlamin min mutsan a, Romalsawma nen chuan ngawi rengin tv chu kan en a, ka phone chu ka khawih lui tlat a, thuthlenga lukham te ka dah chuan min rawn pawm a, “A na..”ka hmai chu ka tuai vut vut a, a lo khi suk a, “Inleng nei ve a biak nachang pawh hre lo”a ti hluk a. Lukham te chhuata tla chu ka chhar a, “Naupang rim ka duh mai mai lo”ka ti a, a hmel dur khuih chu ka hmu lo der a, “Damloh laiin lenchhuah tur ani hleinem, va haw tawh rawh” ka ti a, a bawp a khawkherh a, tv chu hmuhnawm tih hmel em em hian a en daih a. A phone a rawn rik chuan ka va melh ru zeuh a, a biak danah chuan a nu tih ka hre mai. A biak zawh chuan zawimuang in a zi mar a, “Azual” a tih chuan ka phu zawk a, “I zak lo emai Romalsawm, I pa ka hrilh dawn ania”ka ti a, a nui hak a, “I ti hauh lovang”a ti a, “Ka naupan vang hian ka duh thei lo che tih dan pawh a awm lo, chuvang chuan tuman min dang thei lo”a ti a, luhlul hmel zet hian min melh tlawk tlawk a. Ka tihdan pangngai chu a ni dan nan hian a tha tawk lo tih ka hria, ka lo dawnsawn dan ka thlak a ngai tih chu ka hria a, “Enteh Romal, nang chu ka zirlai naupang I ni a, chu mai bakah ka thawhpui fapa I ni a, chuvang chuan nang leh kei hi kan khawvel a hran daih, I hrethiam tiraw?”ka han ti dam diai a. A khup ah a kiu a nghat a, a lu chu dawm in a kun a, a rawn hawi chhuah leh chuan na tak hmel hi a pu in ka hria, “Ka hria alawm, ka hre vek asin, engatinge ka hrereng chung hian ka thinlung atang hian ka paih theih miah si loh che. Ka hah asin, ka thinlung hi nangmah ngaihtuah vang hian a chau zo tawh anih hi”a ti a, “A chang chuan min duh ve mai te hi ka ring a, a atthlak ngawt mai”a ti a, a nui lui sak a, “Harsatna I tawk a puih I ngai anih phawt chuan ka tlanchhe hauh lovang, mahse min endan ang ni lo hian mi hriattirh a in zirtirtu ka nih ang khan min en la ka duh ani”ka ti a. A thutna atang chuan a tho a, “Ka lo tum dawn nia”a ti a, ka thutna atang chuan ka tho a, thlah tum chuan kan inzui chhuak a, kawngkhar kan pelh fel chuan a ding dat a, a rawn inher a, “Khawngaih takin min ngaidam rawh aw..a pawi ka ti” a ti a, eng a sawi tumna nge hriat tumin ka han en a, ka hmuiah chuan min rawn fawp thut a, “Romalsawm…”ka thaw hlawp hlawp a, a awmah chuan ka nem vak a, ka thinrim chu ka khur dawt dawt a, “Ka zah loh vang ah che I ngai leh em? A ni lo, ka damchhunga ka hun tawna ka hriatreng tawh tur thil tih kha ka duh mai ani. Khawngaih takin lo ngai kawi suh aw”a ti a, ka chhan na pawh nghak tawh lovin a kal ta nal nal a. Inchhungah ka lut a, kawngkhar chu ka kalh a, ka lungphu dup dup chu ka dawm vang vang a, ka thinrim vangah ka han ngai lui ngawt na a, engemaw tak chu ka feel ve tih ka pha lo.

.

College ka thlen chuan ka indah fel a, Romalsawma te class ah first period ka neih avangin ka han inchhar nawn thuak a, zan hmasa lama a chetdan chu ka mitthlaah a rawn lang leh thin. Ka lu chu ka han thing nawk nawk a, theihnghilh ka duh; a vaiin! Class ka lak chhung zawngin a dan ngai tein min en leh ngat ngat a, an classroom ka chhuahsan rual chiahin a chhuak ve nghal tih chu ka hmu hman a, office ka pan laiin a bike lachhuaka a tlan lai chu ka hmu a, a la dam that hmel loh bawk nen a haw dawn niin ka ngai mai a. Lunch kan ei laiin Lianbawihi chuan zing lama Romala a hmuh thu leh a class laklaia a hmuh tawh loh thu chu a thuphungin a rawn sawichhuak a. Ka hre lo der a, engemawti tak hian ka awm a nuam lo ve ringawt a, thudanga pakai vat chu ka duh ber a ni. A hnu karkhat chhung chu college ah hmuh tur a awm lova, a ruk in a kal leh kal loh hi ka zawng ni ber hian ka hria. Ka lehkhabu bawm chu ka rem fel a, kawngkhar kik ri ka hre tho na in ka nu a awm avangin ka ngaihven lem lo. Rei vak lo hnuah ka nu chu ka room ah a rawn kal a, Dinsanga rawn kal thu chu min rawn hrilh a, ka thiltih lai a laklawh avangin ka chhuak mai hman lo. Ka va chhuah leh chuan ka nu nen an lo titi sar sar a, hepa hian ka nu leh pa a dek thiam riau a, an lakah pawh a tlatlum reng bawk a. Ka laka a thiltih sual chhe te kha la vung viau lo phei ila chuan inrem tak te pawhin kan la inkawp mahna! Ka thil ngaihtuah lai chu ka duh loh avangin ka lu chu ka han thing a, ka nu nena an thutna ep lamah chuan ka thu a, ka awm ve tih chu hre ang pawhin an awm lo. Tv remote chu ka la a, ka hmet sawn deuh chhen a, “Naktukah haw chhoh kan tum tawh a, Azuali hi lo thlahthlam suh aw, I pa Sanga phei hi chuan amaha a awm avang hian a ngaihtuah lutuk thin a”ka nu chuan a ti a, Dinsanga chuan min rawn melh zawk a, “Ni e, rawn ngaihtuah reng reng suh u, ka lo ngaihven reng dawn alawm”a han ti ve mai a. Thingpui lum turin ka tho a, ka pa chaweikham leng chhuak chu a rawn haw chiah bawk a, “Bawihi, thingpui chu min han lum kep leh teh aw”a rawn ti nghal zat a. Ka thingpui lum chu ding chungin ka vil a, tukverh lam chu ka hawi pah bawk a, Zico te kawta lungrem ah chuan mipa pakhat thu reng chu ka va hmu a, khua a thim avangin tunge anih ka va hmu thei lo. Thingpui kan in zawh hnu rei vak lo ah Dinsanga pawh haw a tum a, thlah tumin keipawh chuan ka zui a, kawngkhar bulah chuan kan ding a, dimte hian ka kut chu a rawn la a, “Azual, bul tan that leh hi ka duh ani, khawngaih takin chance vawikhat chiah min pe leh rawh”a ti a, amah vek chuan, “Kumhnih liamta chhung zawng khan inchhir reng reng in hun ka hmang a, engtinnge ilo let leh theih ang tih hi ka ngaihtuah ber ani thin”a ti a. Ka kut chu ka han la sawn a, “Khawngaih takin lo inngaihtuah nawn rawh aw”a han ti leh hram a, “Um, ka lo ngaihtuah tha dawn nia”ka ti ta ringawt a. A motor a a luh dawn chuan a rawn hawi let a, a nui sak a, a hmel ngainat awm tak kha ala paih lo. A tlan liam hnu chuan ka thaw hak a, luh leh mai ka tum a, chutih lai tak chuan Zico te kawta thu chu a rawn tho a, light in a chhun theih na laiah tak chuan a rawn ding a, Romalsawma ani tih ka hriat chuan ka phawk hru a, rilru nat hmel zet hian a nui a, a mawng chu a beng fai a, a bike ah chuang in chak zetin a lim puat a, ka thaw chu a chham mai dawn hian ka hria.

.

Ka mu a, ka muhil lo chiang khawp mai, kha mitmeng khan ka rilru hi a tibuai takzet a ni. Ka phone rawn de zek chu ka hmu a, whatsapp message ka dawng tih ka hre mai a, ka han hawn chuan Romala alo ni,

.

“Ka na….”

.

Ka chhiar zawng chuan ka sa vekin ka hria,

.

“Enge sawi turin min duh?”tih chu ka han thawn a, min chhang let mai lo. Ka out a, minute 5 hnuah min rawn chhang leh chiah a,

.

“ka duh chu I hria alawm, I sawi thei silo a.. hlim reng ang che, in inhmeh khawp mai”

.

Ka chhang let tawh lo, ka rilru chu a ipik churh a, ka thinlungin a sawi hi ka ngaithla anih ngat chuan he naupang hi ka duh a ni tih ka sawi chhuak ngei ang. Ka in let tawn sek a, ka muhil thei chuang lo, ka phone chu ka han hmet eng a,

.

“what if..???” ka inngaihtuah buai hma in send chu ka hmet a, chu chhanna chu second tam nghah a ngai lo,

.

“chutiang ngaihtuah a ngai lo, ka nihna ang hian min pawm tawp la a tawk a ni mai, thil lo thleng tur i ngaihtuah vak vak chuan engmah i ngaihtuah chhuak chuang lo ang"

.

Ka nui hak a, midang ka biak a keimaha phurna awm ngai miah lo kha he naupang lakah hi chuan a awm tlat si a ni. Ka chhan leh dan tur ka ngaihtuah mek lai chuan message dang a rawn thleng leh nghal a, Romala bawk ni turah ka ngai a, mahse Dinsanga zawk a lo ni. Ka phurna te chu a reh nghal rawih hian ka hria a, han chhan loh em chu ka hreh si a, a rul tawk lek chuan ka han chhang hram a. Ka chhan tam peih loh avangin ka data ka off a, ka mu ta ringawt a. Romalsawma nen kan inbiak dan chu ka ngaihtuah let mai mai a, ka khi leh var var thin. Ka maimitchhing a, ka thinlung hi nge ka zui anga ka ngaihtuahna kilkhat a fim pakhat awm ve chu? Ka rum hak a, “Romalsawm…” tiin ka phun sap a. Ka mu chu ka harh hlawl a, ka phone vibrate char char chuan min tiharh leh a, ka muhil tan ve chauh asin tiin ka phun hluk a, ka phone screen a hming rawn lang avang chuan ka harh deuh zawk a, phak chap in ka chhang a, “I lo muhil hman ani maw.. ka message min chhang tawh silo a”inthlahrung tak hian a rawn ti a, “Aw.. ka data ka lo off daih alawm”ka tih chuan, “Sorry, I mu tui lai ka rawn tiharh che a, ka dah phawt, tui deuhin mu ang che”tiin ka chhan na pawh nghak lovin a dah ta daih a. Ka data ka on chuan a sawi ang ngeiin message chu alo awm a,

.

“Ka lo nghah che hi rem I ti anih phawt chuan ka nghak zel ang che..”

.

Ka chhan loh avangin a hnuaiah chiah, “??” tih chu alo thawn bawk a, a rawn online chu ka hmu reng a, chhang lovin ka chhuak ta daih a, ka hrethiam tawh bik lo.

.

Ka nu leh pa haw tur chu kan kawmchhak kawngpuiah motor in a rawn lam a, Zico chu ka pawm a, karkhat chhung zet min rawn chenchilh avangin chutia min hawsan tur chu ka khua a har dawn hle in ka hria. Zico nen chuan ka nu leh pa tlan liam tur chu kan vai liam lawp lawp a, he naute hi awm lo ngat phei se chuan ka khaw har chu a zual viau in ka ring. Ka inchhung a ka lut leh  te chu khawharthlak thar ta riau hian ka hria a, college lam a kal pawh chu ka chak lo. Ka tlai tur thu ka hrilh lawk tawh avangin ka hmanhmawh duh lova, muangchangin ka insiam a, Zico chuan ka incheina hmanrua chu a lo hai darh pheng phung bawk a, kan chhangchhe thin hle reng a ni. Ka insiam zawh meuh chuan first period alo zo tep tawh tih ka sana ka en chuan ka hria a, Zico chu an inah dah in college lam pan chuan ka inkhalh chhuak zui nghal a. Ka va thlen chuan class la turin ka tlang nghal a, kilkhata ngawi renga min en tu chu ka haider lui ngat a, a ruk tak erawh chuan nuam ka ti! Canteen kan luh dawna min rawn su thawi thuak tu pawh chu tudang mah an ni lo, mahse tun tum erawh hmeichhe kalpui a rawn nei ve tlat a, “Sorry” tih paha min rawn kal pel zuai pawh ka run tawk a tling ve ta tlat nia! Ka thil ei a tui lo zo vek a, hlim nui ri ka hriat te chuan ka thin an ti rim a, kei hian ka thik ani chiang mai. Ka haw dawnah pawh chuan ka mood chu a la fuh thei lo, scooty ka la chhuak tur chu bike a rawn tlan lut dawt a, ka ngaihven peih lo, “Hey..”a aw atang chuan ka hre mai a, ni lo, he lai hmuna a rawn tlan luh hma khan a rawn kal dawn tih ka hria ni tawh zawk, “Azual..”ka hawi chiang khawp mai, a nui a, min kohdan avang chuan amah pawh chu a inthiam lo tih ka hria, “Ka tum lawk miah lo”tiin a thupha a han chawi nghal a, “Ti nawn tawh suh”ka ti hmuk a, “Yes Miss” a lo ti dam diai a. Ka tlanchhuak chu min rawn umzui nghal a, a side glass atang ka va en a, min rawn zui char char tih ka hria, a inrin hman hma in ka kawi san thut a, ka va hawi chuan hrilhhai hmel zet hian min lo thlir a, ka then sak a, game ho teh mah nise ka khel chak ve riau!

.

Ka inbual zo a, ka nu in an thlen chanchin min rawn hrilh in rei tawk tak kan inbe zui bawk a, chaw ka ei chak vak loh avangin rawng bawl pawh ka tum lem lo. Ka in ha lum a, kawn lamah ka chhuak a, chawhmeh lei sa ka neih loh avangin tlem azawng lei pah ka tum a ni. Thim thet thet ah ka let a, thingtlang lam atanga chawhmeh an rawn thawn chu ka nghak ve a, chuvangin ka tum ai ka rei ta deuh a ni. In ka thlen hma deuhin ka kawta bike lo ding reng chu ka hmu a, ka inchhung luhna turah tak a neitupa chu a lo thu ran bawk a. Min hmuh chuan a ding vat a, “Khami chauh lei si I va rei ve”a ti a, “Enge tun ang hunah I rawn tih dawn? I class bang kha inah pawh ila haw lo ani maw?”ka ti a, kawngka chu ka hawng a, min rawn zui lut ve mai a. Ka chawhmeh lei vel chu ka dahfel a, “I chetdan hi a mak thei lutuk, I chhungte pawhin an ngaihtuah viau tur che asin”ka tih chuan ka va melh a, khaw dang hawi lovin min lo melh reng a. Ka thu sawi tum leh lai mek pawh chu sawi zawm tawh lovin wai wai ka la a, ka chhum ta daih a. Ka hnungah a rawn ding a, ka thil chhum lai chu a rawn bih duk duk a, “Nula ve si hetiang te han ei”a ti a, ka nui hak a, “Ka ei ve thei lo mi?”ka tih chuan a hmui a ti pawrh a, “Thei lo pawh ka tih loh kha”a ti a. Ka gas hunna dawhkan tlang chu a zut neuh neuh a, “Hmanzana kan thusawi kha kan sawi zawm thei angem?”a ti a, ka wai wai chawh lai chu ka tawp chawt a, “Romal, kan kum inthlauh na zat hi I hria em?”ka ti a, “Kum 5”a ti sap a, “A tam asin”ka tih chuan min chhang tawh lo. Ka hnunglam atang ka kawngah min rawn kuah a, ka darah a khabe a nghat a, “Chuvang mai mai chuan ani tiraw min hnar?” ka ngawi reng a, “Ka lakah thikthu I neih chiah khan ka lawmzia I hrethiam pha lovang, engkim ka huam ani tih hi hrilh tur che in ka lo nghak char char che”a ti a. Min kuahna kut chu ka hmer vawng vawng a, tlema huaisenna ka nei anih chuan ka thlakhlelh ve ngawih ngawih hi ka ta ani dawn tih ka hria.. enge ka la nghah?

.

PART-IV LAST

.

Ka mitthlaah Romala pa chu ka hmu zawk a, min kuahna kut pawh chu ka dah thla nghal a, “Romal, thu phawt teh”ka ti a, dawhkan bula chair ah chuan a thu a, min melh kar a, “A hmaa ka sawi tawh ang khan ka rilru ala pangngai reng, khawngaihin hrethiam  hram rawh”ka ti a, “I nep hle mai, mi nep tak I ni, ka hua che. Mi ngaihdan turah ringawt I buai anih kha”a in sangmar teuh a, a tawngkam avang chuan ka na ve sawk tho, “A tha, engkim hi a tha vek”a ti a, a tho a, “Romal…”a rawn hawi let chuan a hmelah thinrimna leh rilru natna ka hmu, “A pawi ka ti, ka huaisen tawk lo ani”ka ti a, a kal chhuak ta a. Thutthlengah chuan ka thu chawrh a, a sawi dik chiah, kei hi mi nep tak ka ni. Ka phone ka phawrh a, ka call leh thut mai dawn em ni tiin ka ngaihtuah a, mahse kaltlang pui ngei chu ka duh si. Engpawhnise a tawp ka thlenpui ngam dawn lo anih chuan a tir atanga engkim hi ka dan vek a ngai.

.

Krismas hmang tura kan khaw lama ka haw hma class ka lak ni hnunhnung ber ani a, Romala thutna lam ka va hawi chuan nidanga uluk taka zirlai ngaithla thin kha a dawhkan bawhin a mu a, a muhil anih ka ring. Ka va melh leh thin avang chuan a bula thu a thianpa chuan min vengthawng takin a kiu in a va nghawk leh thin a, phak fe hian a rawn meng a, mahse a harh thei lo ani ang a muhil leh nghal zel a. Period zawh hma in an class chu ka chhuahsan a, office atang an classroom chu ka thlir ru deuh reng a, rei vaklo ah Romala chu a thianpa in a rawn kuah chhuak a, a zawi hnuang a, ka awmna hnuai mai chu two wheeler parking na hmun anih avangin an rawn inkuah phei zel a. An awmdan chuan ka ngaih a ti tha vak lo na ngaihsak vak erawh ka duh lem lo. A bike dahna thin lam chu an pan a, rei vaklo hnuah a thianpa chu a rawn tlan chho a, “Miss, Sir Hmaa a awm em?”a rawn ti a, class a laklai anih avangin a awm lova, chu chu ka hrilh a, “Romala khu a awmdan a dik miah lo”a tih chuan inhnuai lam kan pan nghal a. A bike chu alo bawh a, a pang ka khawih chuan a khawsik chu a sang hle tih ka hria, “I khua a sik anih hi..”ka ban chu a rawn vai thla lawp a, “Sir Hmaa chu va ko mai rawh”tiin a thianpa chu ka tir nghal a. A thianpa kal hnu chuan a pang chu ka han dek tha ngat a, “Inenkawl tha ta che, I damlo aih hi”ka ti a, “Ka nep ani tiraw?”a ti sap a, “Romal, khawngaih takin hetiang hian awm suh, ka tan a hrehawmzia hi I hre lo anih kha”ka hnuk chu a ulh teuh a, “A hrehawm maw? Hetianga ka awm hian hrehawm I ti ve maw?”tiin min zawt mawlh mawlh a, ka chhan hma in Sir Hmaa chu a rawn thleng a, a fapa chu a han buaipui zung zung a, a car a phurh haw tum chuan a rawn inkhalh phei bawk a. A bike chahbi chu a thianpa kutah an hlan a, car ah Romala chu an luhpui a, an tlan liam dawn thleng chuan min rawn melh ngawt ngawt a, ka mittui chu ka khap per sak a.

.

“Nizan a chhuak kha a rawn haw tlai angreng viau a, kei phei chu ka lo mu tawh a, a nu hian tunlai chu a awmdan hi rilru hahna a nei ani ang atih avangin a ngaihtuah angreng riau a, a rawn haw hnua a rawn mut pawh chuan a taksa a hit vek a, a vawt tih vang ai ang a duk vek ati nghe nghe a. Hmeichhe ho hi thu an uar a ka tia, ka ngaihtuah zui lem lo. Zingah erawh a mit a sen deuh ram a, a khawsik a awm deuh niin ka ngai a, damdawi pawh ka eitir a, amah hi a accident atang khan a taksa hi a la  in recover lo hrim hrim bawk nen,tunah erawh ngaihtuahawm erawh ani lo”tia a fapa chungchang a thianpa ber hnena a sawi chu ngawi rengin ka lo ngaithla a, a tana ka tih theih tawk tawngtaina chu ka neihsak mawlh mawlh a. Tlai ka haw hnu chuan a whatsapp last seen ka check a, zing lama a online bak ala lut leh lo, ka thaw hak a, ka phone chu ka khumah ka theh thla a, kawng dik ber hriat hi a har ka ti ani. Ka haw dawn avangin ka thawmhnaw chu ka rem tha vel a, kum dangah chuan ka haw tur hi ka phur sarh thin a, tun tum erawh phurna ka nei tlem khawp mai. Dinsanga motor a haw tur kan nih avangin hmanhmawh lutuk a ngai dawn lova, tlemin a hahdamthlak deuh. Ka mut dawn chuan Romala number ah chuan ka han lut leh a, a lo online va tawh a,

.

Tha deuh tawh em?”tih chu ka thawn a, khatiang a hmu reng chunga a chanchin zawh loh chu thil harsa tak ani.

.

“Um…”

.

“A lawmawm e, lo tha zel rawh”

.

A reh vang vang a, mu tura ka khum ka siam laiin a message ka dawng leh a,

.

“Khawvawh vanglai takin nula pakhat ka rim a, inchhungah ka lut ngam silo a, khawvawt tuara pawna thut ngat ngat chu taksa in a haw deuh. Ka nghah chhuah lah chu zanrei tak hnua a inleng tlangval a thlah lai chu a ni mai sia…”

.

Dinsanga rawn len chu ka ngaihtuah chhuak zawk a, dik tak chuan ka duh vang a ani hi hnaih ka ni lo, Romalsawma lak atanga inthiarfihlim hmak hi ka duh a, min hnaih hi ka haw duh lo lui ani ber. A rawn lenchhung zawng khan khawvawt tuarin pawnah a lo thu ngat ngat tih ka hriat chuan ka nghing deuh lawih a, engatinge awlsam taka min kalsan hi a harsat em em?

.

“Ti tawh suh, khawngaihin..”

.

“Ka lo tum tawh ange, beidawn hi a hun tawh viau alawm tiraw?”

.

Ka chhang lo, ka chhiar a, ka chhiar nawn leh thin a.

.

“Ka tihbuai thin na zawng zawngah che khan I ngaihdamna ka dil e. Hlim taka I awm hi ka duh alawm, tibuai tu che ni lovin…. Ka tuar reng bik hi a fair lo, harsa mahse ka mangtha tawh ang che  “

.

Ka chhang tawh lo, ka thingthi a, engkim min hriatpuitu hnenah chuan ka manganna leh ka phurrit chu ka thlen a, a nin min chhawk anih loh chuan a rit mah mah a ni.

.

Mahni in lum ngei han thlen chuan kan hahdam sawng sawng zel mai a, ka nu leh pa, ka unaute hmel ka hmuh chuan ka rilru hahna te pawh chhawk in a awm in ka hria. Zantin khel lovin Dinsanga a rawn bur ngar ngar bawk a, tlem chuan ka rilru pawh a kalkhat ta lo deuh, chumi chu ka duh ber anih rualin Romalsawma ngaihtuah miah lova ni ka len erawh a tam lo khawp ang. Krismas boruak ah Dinsanga nen kan inzui tam a, a hmaa duh taktea lo inkawp tawh kan nih avangin keipawhin engemawchenah ka lo la thlahlel ve a, a hma ang em chuan a lakah pawh ka hel tawh lo. kum alo thar a, hna nei lai kan nih avangin rei tak kan chawl thei lo, kan hnathawhna hmun Aizawl lam panin kal lam ang bawkin kan inzui thla leh a. Kum a lo thar ang hian rilru pawh thar diai sela ka duh takzet a ni. Facebook ka khawih tam lem lova, a khat tawkin ka lut ve zawk thin. Ka friendlist tlemte zingah Romalsawma pawh a awm ve vang a, a thianten thlalak an tag pakhat chuan ka mit ala riau pek a, ka han enchian chuan hmeichhe pakhat nen an lakdun na a lo ni. An comment na chu ka han hmet hram a, an thianten an chhaih vel na hlir ani a, ani erawh chuan pakhatmah in a comment ve lo. Ka hlim viau dawn emaw ka ti a, mahse rilru dang pua hlim taka awm tura ka ngaihtuah te chuan ka na ru tlat lawi a, ka hma ka sial em avang chuan ka zak ru ngawih ngawih. Ka status ka update ve teh mial a, “Safely arrived  “ tiin ka update zo a, ka logout nghal daih a, ka zin chau deuh nen ka mu ta vat a. Ka zing tho chu ka lu a rit bur a, ka phone chu ka han ban hmasa ber a, facebook ah ka lut a, ka status update chu comment pakhat a awm a, “Welcome back” Romalsawma hnen atang ani. Kan khua ka haw hma zana kan inbiak kha kan inbiak hnuhnung ber ani a, a hming ka hmuh leh chuan engemawtitak hian ka awm ve deuh a, a comment chu ka like a, ka out zui nghal a. Exam hma in thla khat vel class kal nan hun ala awm a, kan kal regular erawh a rinawm vak tawh lo. College lam pan turin ka insiam a, ka scooty chu han tih nun mai ka tum a, ka tihnun khat vang anih ka ring, a nung leh thei mai lova. Ka beih fe hnuah pawh a nun theih loh avangin kawnah taxi chan mai chu ka rilruk a, kawngka ka kalh laiin ka phone a rawn ri a, Dinsanga alo ni, ka scooty nun theih loh thu chu a thuphungin ka lo sawi mai mai a, “Kawnah lo awm rawh, ka rawn tlan chhuak dawn chiah, ka thlah mai ang che”a ti a, ka hnial viau na a a tum lui ta tho a. College  kan thlen hma deuh chuan bike pakhat hian min rawn tlanpel zuai a, campus kan luh in chu bike chu a neitu chiang takin ka hmu a, a hmeichhe phurh pawh chu tunge tih ka hre nghal mai bawk. Office kawtah Dinsanga chu a ding a, ka chhuak chu naupang ho in min lo thlir thap a, a then an lo khi sang a, min chhaih an chak tih chu ka hria. Banah hruai ka ngaih leh ngaih loh min zawt a, nidang chu nise ka hnial chiang khawp ang, “Dar 2 ah ka haw hman ang, ka lo nghak ang che”ka piah lawka ding chu ka mitsir in ka hmu reng a, hlim hmel takin Dinsanga pawh a nui vur vur a, a tlan let leh nghal a. Ka ke pen chu a rit riau in ka hria, engemaw vawn tur ka mamawh a, boruak hip vak vak chu ka chak ber. Ka dawhkanah ka bag ah lai chu ka dah a, tukverh chu hawng in thawk ka han la vang vang a, “Ka paltlang ang”tiin ka infuih mawlh mawlh a.

.

Exam laiin ka duty hun leh Romala subject neihdan a in nang lo tluan pharh a, ka rilru tak chuan ka lawm, a chhanchu ka hmuh tam loh hian ka rilru atang ka paih bo tial tial thei dawn tih ka hre tlat ani. A fail turah ka dah lova, University lama a zawm hunah phei chuan kan intheihnghilh ve mai dawn ani tih chu ka ring a, chu hun chu ka nghakhlel a, chutih rualin kan college erawh engemawti chhung a reh huai dawn tih ka chiang a ni. Kan chawlh chhung chuan haw ka chak viau na a competitive exam beih ka rilruk avangin lehkha zir nan mahnia hunthawl neih chu ka duh deuh a, ka haw ta lo. Dinsanga a rawn leng deuh tluk tluk a, inngaihzawng tha leh ang chuan kan awm ani deuh ber. Min ngaihsak a, kei ai a upat na chuan min uap hneh bawk a, keipawhin thinlung taka pawm leh theih chu ka duh ve bawk. Ka exam tumna kawngah nise min buaipui nasa a, material min ngaihven puiin min khawnkhawm sak peih bawk a, min fuih a, min nawr kal bawk a. Heng hi ka duhthusam thin chu ani, chutichung chuan la kim lo hi ka thinlungah a awm reng a, haider luih chu ka tum a, ka bei nasa bawk.

.

Hun alo kal ve zel a, hriat loh chhungin kum chanve kan hmang zo leh der tawh. Nitin college lamah ka liam a, Romala pawh MZU lamah a zawm tih a pa hnen atang ka hria a, ka thinlung takin ka lawmpui a, a hlim tih ka hriat avangin keipawh hahdam takin ka awm ve thei zel a ni. Nikhat chu tum loh takin kan inhmu hlawl a, han hel mai na tur a awm tawh lo, min hmuh chuan a ding deuh dat a, mahse a in control vat a, “Inhmuh a khat hle mai”tiin a nui sak a, “Ni ngawt mai, kan tuanna tlang a in ang ta lo bawk a ni. A nuam em University chu?”ka han ti a, “Nuam pawh ka ti lo”a ti hmuk a, rei inbiakna hun a awm loh avangin ka kalsan ta a. Zan lamah chuan lehkha ka inchhiar malh malh a, exam a hnaih tawh avangin Dinsanga pawh a rawn leng lo. Ka phone rawn ri nghawr dat ah chuan ka harh hlawl a, Romalsawma miscall chu a lo awm a, a pawimawh a nih chuan min rawn call leh mai chu ka ring a, ka ngaichang deuh reng a, keimah zawkin biak let chu tha in ka hria a, a number chu ka dial ta nge nge a. A rawn pickup tu chu ka rin loh daih ani, hmeichhe aw a ni tlat a! engmah pawh sawi lovin ka phone chu ka dah a, engvanga call back thawt thawt nge ka nih tih chu ka inzawt mawlh mawlh a, thil tul lo tak a ni. Ka mut dawn hnaih ah whatsapp ah message min rawn thawn a,

.

“I rawn call em ni?”

.

Ka nui huk a, a miscall ka hmuh vang chauh a call back ka ni a, ka call hmasak ah a ngai chu ka tlawm la leh tlat pek a,

.

“Aih”

.

“Sorry, ka phone ka khawih sual a, ka lo call che anih dawn hi, ka hmu chiah”

.

Ka chhang let tawh lo.

.

Kan exam na tur hmun lam panin ka chhuak a, ka vawikhat exam na tur anih avangin engmah huphurhna pawh ka nei lova, han zuam vak na pawh ka nei hran chuang lo. Exam hall a ka luh hma in ka theih ang angin ka lehkhabu ken te chu ka han keu ve a, ka han hawi vel a hmelhriat hmuh tur pawh an awm lo. Kan luh hnu rei vak lo ah hmanhmawh zetin mipa pakhat hi a rawn lut a, ka thutna atang a hlat deuh avangin ka hmu thei lova, ka exam turin ka rilru a luah deuh bawk nen ka lo ngaihven chiam lo. Ka rin aiin ka chhang thei ve phian a, ka chhan zawh meuh chuan mi tlemte chiah kan lo awm tawh. Ka paper ka dah a, chhuah tum a ka inher chuan mipakhat ka su chawrh a, “Sorry…”kan ti rual thawt a, ka han en chuan Romalsawma alo ni a, mak tih hmel tak hian kan inmelh reng a. Chutah a thil ken chu a hrechhuak ni awm tak ani, nui vur vur chuan a dah a, min rawn zui chhuak nghal a, “I exam ve reng a…?”ka han ti a, “Nia.. ka ti ve mai mai”a ti a, kan motor dahna hmun kan thlen chuan kan ding a, “Kan inhmu khat e…tiraw?”a nui deuh suk a, “Nia”chhan sei dan ka hre ngang lo, “In pa nen khan in inhmeh khawp mai”a ti chuai raih a, “Nangni pawh” tiin ka nui sak a, “I ho e a”a ti leh hmuk a. Ka helmet ka lachhuak a, “Ka kal hmasa ang aw”ka tih chuan chhan pawh min chhang lo. In ka thlen hnu chuan ka exam chhan dan vel te chu ka chhut let neuh neuh a, Romalsawma nen tum loh deuha kan inhmuh dan te thleng chuan, puitlinna kawng a zawh zel chu ka thinlung takin ka lawm a ni.

.

Ka hna dil vel avangin kan khaw lamah ka haw a, kan exam result chhuah pawh ka lo hre lawk lo a, ka thianten min rawn zawh sup sup takah chuan ka hrechhuak hlawl a, result en tum chuan ka online nghal a. Rei vak lo ah ka lut thei a, ka hming ka zawng ve ngat ngat a, ka beidawn tawh hnu lamah ka hmu hlawl a, ka au thawt a, ka hnuai chiah ah Romalsawma hming pawh a lo awm khiau lehnghal! Ka phone ka la a, biak ka tum deuh ut ut a, mahse ka in sum leh thei hram a, Prelims through ve hrim hrim pawh kan tan chona thar ani hrim hrim a, ka lawm a ni. Ka phone a rawn rik chuan ka lo phu leh zuk a, Dinsanga chuan ka chanchin hria in min rawn bia a lo ni. Ka dah fel awrh tih in Romala call ka dawng zui nghal zat a, “I lo hre tawh em?”a rawn titawl a, “Aw, ka lawmpui che”ka lo ti a, “LAwmpui tur chea rawn bia che ka ni zawk a, min sawi khalh bawk sia”a ti a, ka lo nui ringawta, “Engtikahnge I rawn chhuk ang?”a tih chuan calendar ka melh zauh a, “Karleh ah aniang”ka ti a, sawi tur hre lovin kan ngawi deuh ren rawn a, “Ka dah phawt mai ang aw”a ti ban charh a, kan inbiakna kan titawp ta a. Ka biak zawh chiah te pahnih chu ka khaikhin a, a hnuhnung zawk hian ka thinlungah hmun a chang tih chu ka hrechiang khawp mai. Ka tum aia hmaah ka chhuk thei hlauh a, ka hna ka inthlahrun tawh bawk avangin chutia ka chhuk hma thei pawh chu ka lawm hle. Ka thlen zanah Zico te inah chaw ka ei a, chaweikhamah haw mai lovin ka thu khawmuang a, “I awm loh lai khan I in saw vengtu nei ang mai ani, mi pakhat bike nena rawn kal ziah hi  a awm a”Zico nu chuan nui chuang hian a ti a, “Chuti maw?”ka ti liam puat a, “Azual, ka sawi lai mekin khu a lo kal leh tawh ania”a tih chuan ka hawi chhuak a, Romalsawma chu a bike ah a lo thu vung a. Ka in chu tala a ka kalh loh avangin mak tih hmel tak hian a bih a, ka chhuak vat a, “Hey…” a rawn hawi vat a, ka pan nghal a, “I lo chhuk leh thut sia?”min hmu chu mak ti hmel ala pu reng, “Ka ti leh deuh thut a”ka ti a. A bike atang chuan ala chhuk lo fo, “Um.. ka hrethiam e..”a lu chu a bu nghat a, “Ka haw mai ang aw..”ka nui thut a, min biakdan naupang chhia lutuk thin chu ka nui lo thei lo, “Min nuihzat thei bawk si a, a nuam lo ve thin”a ti a. Ka nui tawp hmak a, chutiang zawnga a ngaih chu ka duh hran lo, “Nuihzat lo e, enge tun ang hunah hetah I tih ziah a?”ka tih chuan tlem in a hawihai deuh a, “A…ka lung a leng a, ka rawn thleng veleh tawp zel”a ti a. Kan inbiak lai mek chuan Dinsanga rawn leng tur a rawn thleng chiah a, “I inleng tur pawh a rawn thleng ta e, ka kal phawt mai ang aw.. Chuan, ka lawmpui lutuk che, hlawhtlinna chang zel ang che” a ti a, a helmet a khum a, a tlan nghal a.

.

“Dinsang, min hrethiam rawh, kan inkar hi ka kaltlangpui thei lo ani”inthlahrung tak chuan ka ti a, “Azual, a theih mial mahna tiin ka tuar lui ve ngar ngar a, ka laka I rilru I pek lohzia pawh ka hria, ka beidawn a hun tih hre ma hila ka beidawng phal tlat silo. Mahse I rilru ka hneh thei ngang silo a, tunah chuan ka thlah zalen tawh mai ang che”a ti ta a. Kan in atanga a haw tur chu ka thlir liam a, tunah chuan tumah neih ka nei tawh lo, mahse ka thaw erawh a veng huai a, engmah in min delh tawh lo.

.

“Congrats again..”ka mut dawnin chu message chu ka hmu ve chiah a,

.

“Engvangin”

.

“Bialpa officer I neih vang aniang, ka lawmpui ve tawp che”

.

“Bialpa ka nei lo..”

.

“Engmaw??”

.

Ka chhang lo, enge ka sawi chuang ang? Ka phone a rawn khur der der a, call a rawn kal nghal zat a,

.

“I thusawi kha enge a awmzia?”.

.

“Bialpa ka neih loh thu ka sawi..”

.

“Ka rawn kal dawn, lo muhil suh”phone a dah nghal a, ka mu tur chu ka tho leh a, sitting room ah ah ka thu ta reng a. Rei vaklo hnuah ka kawngkhar chu a rawn kik det det a, ka va hawn chuan engmah sawi lovin min kuah a, inchhungah min nawr lut a, “Ka tuar thei tawh lo, kei min kawp tura huaisenna I neih hma loh chuan ka nghak che anga, ka kalsan tawh lovang che”a ti a. Ka kuah let thlawp a, “Romalsawm..” “Zanin ah hi chuan engmah sawi ka duh lo”a ti a, nghet takin kan inpawm ta hle hle a.

.

.

.

Hun a liam a, duhthlanna ka siam sual lo tih a takin ka hmu ta zel a. Nikhat chu ka class la zo ka chau deuh ka dawhkan bawhin ka lo Mu a. Ka muhil lai chu min rawn thing nawk nawk a, office ah ka lo muthlu chu niin, “Romala’n a nghak tlat che ania”Sir Hmaa chuan a rawn ti sar sar a, ka hmai chu a sa nghal ham ham in ka hria, ka nui suk a, ka tlanthla nghal a, “Hetah rawn kal suh ka tih kha..”midang min hmuh hlau tak hian ka ti a, “Vawiin hian lawmpui tur che in ka rawn kal ani” “Engvang chuan…?” a ngaihna ka hre lo takzet, “Bialpa officer I neih dawn vang aniang”a nui huk a, “Maw……….?”ka ti hu a, ka hrechhuak thut, MPSC  cimbined exam result chhuah ni a ni tak e, a tling tihna a ni chiang mai, engmah ka ngaihtuah thei tawh lo, ka pawm chuk chuk a, “Min rin tlat vang leh ka lam I tan tlat vang anih hi, ka lawm e aw”tiin ka biangah a fawp ta zeuh a………………..

.