ROSE (I TELLO IN)

ROSE

(I tello in)

.

Mami Chawngthu

“A hma kan boruak kha kan pha tawh lo tih chu i hrechiang tho a nangpawn, hetia a hminga nupa nih mai mai ai hi chuan inthen a tha daih zawkin ka hria ani.”

Ka pasal khuma thu chu ka melh tlawk tlawk a, ka han thaw hak a, ka beisei loh lutuk thil a sawi vang pawh chu ani maithei, ka mit deuh sulh in ka hria. Kan boruak chu ka hrechiang khawp mai, mahse hun a kal anga kan hna a kan buai zual te a reh hunah chuan a hma ang bawk khan nupa hlim tak kan nih kha ka beisei thin. Mahse chung ka beiseina zawng zawng te chu engmah lo mai an ni dawn ta niin a lang.

Ka pasal khuma tui taka mu chu ka thlir vawng vawng a, a hmeltha thlawt ani. Mahse mu thei lo leka kan nupa inkar ka ngaihtuah laiin ani ve thung chu tui takin a mu bawrh bawrh bik a, ka thik a ni. Engtinnge hetiang taka mihring hi kan danglam hma theih zawk? Kan khum bula kan inneih thlalak kan tar chu uluk takin ka melh vang vang a, Pathian leh kohhran hmaa kan inneih thutiam kha k thinlungah a lo thar leh iar iar a, ka na takzet ani. Kum 5 dawn kan innei tawh a, fa kan la nei lo ani mai a, mahse chupawh ka pasal Sawma ngei hian pawi a tih loh thu leh min hmangaih vang chauh a min nei a nih thu min hrilh chamchi thin a. Mahse a bul berah chuan ka puh lo theilo.

Ka harh chuan khua a lo var tawh a, sofa ah ka lo muhil daih chu niin, khum lam ka va en vat a, tuk dang angbawkin kan pa chu a lo mu tawh lo. Mi khawngaihna chu a la tlachham bik lo ani ang, puan min lo sin tir a, ka tui in tur a lo chhawp thlap bawk a. Ka tho a, rawngbawl tumin choka lam ka pan a, rin loh deuhin Sawma chuan rawng a lo bawl mek a. Ka mitvai emaw tiin ka mit chu ka han nuai a, mahse amah ngei a ni. Ka thawm chu hre awm angin a lang lo a, engemaw tak ngaihtuah hmel a pu a, tihbuai ka hlauh avangin kan room ah ka let a, bathroom ah lutin tui vawt chu ka han in phuh tir seng seng a. Rilru fim hman hram hram chu ka duh a ni. Kan TV programme ah mi interview tur ka neih avangin ka rilru chu a hmanhmawh deuh a, ka inthlak nghal a, dressing table hmaah thu in makeup chu ka inbel mawlh mawlh a, “Chawei lo a kal i tum mi?” room kawngkhar ngheng in Sawma chu alo ding a, uluk zet hian min melh ran bawk a, “Aw ka hman tawh lo, sawtah ka inhnawh puar mai ang” ka ti a. Min chhang tawh lemlo chuan a chhuak ve mai a, car chahbi ka zawn hrep hnuah ka hmu hram a, kawngka ka chhuak tur chu Sawma bawk chuan min rawn ko leh a, “Dawhkanah khan i tiffin tur ka dah” a tih rual  chuan ka va en a, hepa hi engemaw a hriat teh hrep le? Tiffin chu lak pahin ka ner sawk a, chhan awm lovin hetiang hian a ti tawp lovang.

Tv station pakhat ah anchor hna ka thawk a, ka tuina ber ani bawk a, nuam ka ti. Ka naupanlai atang tawha ka nih chak leh tum ber ani thin bawk a, he hna avanga ka pasal ka hmangaih em em Malsawma hi tawng ka ni nghe nghe. Police officer chhuanawm tak leh hmeltha tak ani a, nula te ngaihven rawn a ni. Interview ka neih tum in fiamthu ti tak deuhin a hmeichhe duhzawng ka zawt a, min chhang mumal lo in thildang daih a sawi a, a hnuah a hmeichhe duhzawng chhanna chu keimah ka nih thu phone a min rawn biak tumin a sawi a, ka lai em em mai lehngal a. Chutatang chuan phone hmangin min rawn be zeuh zeuh a, a rei deuh hnu phei chuan chhuahpuiah min sawm a, hemi hnu rei vak loah kan inngaizawng zui nghal a. Engkimah a famkim in ka hre thin, min hrethiam in ka hnaah min tuipui hle a, kawng engkimah a theih ang ang in min pui ani ber. Kum khat zen zawn kan inzui hnuah kan innei a, nupa hlim thei tak, kan thiante pawhin an awh ruk kan ni ve a ni. Fa a awt em em a, mahse kan beisei angin kan awh tak chu kan nei thei lo. A chang chuan a lakah ka inthlahrung a, a ruk in ka tap fo a, mahse fa ka neih loh avanga kan nupa nun a danglam loh tur thu min hrilh fo a, ka hlimna tur apiang chu min tihsak loh pawh a nei lo. Kum a vei zel a, kum nga lai chutia kan awm hnu chuan ani alo danglam chhoh tak ni. Ka piah a thu te pahnih hlim taka inbe vel chuan chung chu min ngaihtuah tir a, kan hlim ve thin zia te chu ka rilru ah an lo thar leh a, tukverh lam chu hawiin kan office piah lawk a pangpar par vul chuk chu ka va melh ta zawk a. Nunhlui lamah bawk min kir tir a, office a pangpar min rawn thawn fo thin tu ka pasal nihna hmasa kha neih let leh ka duh ani, “Va ngaihtuah muk awm ve a, koh i hre theilo hle mai” chu aw lo chhuahna lam chu ka han hawi a, kan cameraman Pepea chu ka dawhkan bulah alo ding reng a. Za lo zetin ka han nui sak a, “Lo thu ve rawh” tih pahin thutna chu ka kawhhmuh a, “Interview i nei zo kha i chhuah lai ka hre silo a, studio ah i awm bawk silo a, ka rawn zawng zel che anih hi” a ti a. Zawhna mitmengin ka han melh a, “Zan lam news kha i hun ania, vawiin chu engtihmah i phur hmel loh” a dar chu a chhin ak a, ni e, zep rual ani lo. Ka hun tawn mek hian min ti chau ngawih ngawih, nuthlawi ni mai thei dinhmuna ding mek ka ni miau a, ka rilruah thildang a lang hlei thei lo ani.

Station atanga ka chhuah chuan zan dar 9 a ri chiah chiah a, news puan zawh ah a tuk a ka hna tur tlem ka ti leh a, chumi hnuah ka haw ve hman chiah a ni. Garage ah motor ka dahfel lai chuan Sawma chu a chhuak lo tih motor awm dan atang chuan ka hre thei a, inchhungah ka lut tlang nghal a, tv a lo en a, kan programme  chu a lo thlir ve anih hmel, ka thawm chu a hre lo ani ang a rawn hawi chhuak lo a, a bul ka va thlen chuan a muthlu tih ka hria, a hmel chu a chauh hmel ngawih ngawih a, chik fea ka thlir hnuah inthlak turin room ah ka lut nghal a. Sitting room ah chuan ka kal leh ang nge kal lo ang tih chu ka inngaihtuah a, ka chhuak leh ta nge nge a. Kawngkhar ka khar thawm ah Sawma chu alo harh a, “Ka lo muhil sek ani maw... I lo thlenna a rei tawh em?” aw tham chal chuan a han ti a. Hetianga ka han atanga ka haw min lo nghah hi a khat tawh lutuk a, hetia alo awm hi nuam lo ka ti lek lek zawk in ka hria, “ Ka inthlak fel  ve chiah, i chau anih kha lo mut mai tur alawm” ka ti a. A mutna atang a tho chhuak a, “Zanin i news puang chu nidang i pha lo tlat, mut hnem i mamawh in ka hria, mu ang hmiang” a ti a. Ka chhanna pawh nghak lovin tv chu a off a, room lamah a lut nghal a. Rei vak lo ka han thu muang lui a, mutchhuakin min rawn zem deuh chiai chiai ah chuan mu turin ka lut ve chauh a.

 Muhil lawk thei lovin thil tam tak ka ngaihtuah a, “I muhil thei nange?” ka pasal chuan ka kawnga rawn kuah pah chuan a ti a. Ka phu deuh zawk a, engvanga hetianga inthlak thut thut hi nge anih ka hrethiam lo. A hma zan lawkah inthen a rawt a, tunah chutiang lam engmah a sawi leh bawk silo, “Engvanga i mizia hi inthlak thut thut nge i nih? Ka hrethiam lo ani” ka ti chhuak ta nge nge a. Mahse min chhang lo, ka sam karah a lu a phum a, nghet zetin min kuah bet a, a thaw hak chu ka hre thei. Zawhna zawhbelh vakin awmzia a nei dawn lo tih hria in ka zawh chhunzawm duh ta lo. Zandang ang lo takin tui takin ka muhil a, ka harh meuh chuan khua alo var uar tawh a. Sawma pawh a lo la tho bik lo, min kuahna kut chu dim tein ka la sawn a, rawngbawl turin ka tho chhuak nghal a. Zan lamah chiah chhuah ka ngaih avangin ka hmanhmawh lo. Chawei ka peih fel hnu lawkah Sawma pawh a rawn tho a, chaw kan eikham hnuah hmanhmawh deuhin a insiam a, a chhuak zui nghal a. Insuk tur ka la khawm a, Sawma hak lai chu suk tumin ka la a, a ipte chu ka han check a, a wallet a ken theihnghilh lehpek anih hi tiin ka lachhuak a, han hawn ka tum satliah a, thlalak pakhat hi a rawn tla chhuak nawlh a. Ka hmu chu ka phu zawk a, ka kut chu a khur nghal zawih zawih a, Sawma leh hmeichhe pakhat hlim hmel taka an in kuah lai thlalak a ni. An lakna hmun chu uluk lehzual in ka en a, kan kawt ngei ani. An lakna pawh ala rei lo tawp ang tih ka ring, kan garage bula pangpar ka lei thar a lan dan atang hian thla hnih ai chuan ala rei thei tlat lo. Ka awmloh lai chuh in henu hi a lo leng fo pawh ani thei, ka ngaihtuah zawng ringawtin ka khur thei.

Tlai a lo thlen chuan veranda ah ka tei sek a, thuchiang  ka hre duh ani. Ka pasal hi ka lakah alo rinawm lo anih chuan ka tuar theih bak ani ngei ang. Inchhung ah ka lut leh a, motor thawm ka hre zui nghal a, ka thinlung chu a tawt up up mai. Inchhung a rawn luh rual chuan thlalak chuan ka lo vawm nghal a, “Hei hi sawifiah rawh” ka aw chu a nem fahran lo tih ka hria, mak tih hmel takin min en a, thlalak chu a chhar zui nghal a, chutah mangan hmel deuh hian min melh leh a,”Bawihi....hei hi” sawi leh tur hre lovin a ngawi ta daih a. Room lam pana kal a tum a, mahse ka dang tlat a, “Sawifiahna ka phut ani” ka ti a, “Engmah sawifiah tur a awm lo, ka chau mut ka duh” min tawntlang a, mahse chu ti maia min palzam chu ka duh lo. Ka zui zel a, “ka thian hlui anih kha, engmah a bak a awm lo”  a ti ta nge nge a. Mahse ka ring eih lo, “I thian hlui satliah ania, mahse i wallet ah i ak reng tho a” ka nui hak a, thinrim in sum nui chhuak chu ngaihno a bei fahran lovang. Ka banah min vuan a, “ A bak engmah min zawt suh, khawngaihin” a ti a, “Zanin hian engkim hriat vek ka duh, dawt hian ka thinlung na a ti dam dawn chuang lo. Engkim min hrilh rawh” ka ti ve thung a. Rilru hah hmel zet hian khumah a thu a, “Ka hmangaih hmasak ber ani a, tleirawl chhuah hlim atang kan inngaizawng thin.  College kan kal thlengin kan inzui a, mahse chhungkaw khawsak in an loh avangin a chhungten kei min then tir a, mi hausa fapa chu pasal a tan an neih tir zui bawk a. Kan rilru na lutuk kha thih dun mai te kan tum thin. Mahse ka rilru natna kha thatpui nan ka hmang thei ta hlauh a, tun dinhmun ka thlen phah ta hial a. Tin, nang ka tawng leh che a, ka hlimna ber i ni zui bawk a” a chil chu a lem khalh a, rei vak lo min melh a, ka lo en ve reng avang chuan a hawisawn a, “Englaiamahin then che ka duh ngai lo. Mahse engvang kher nge maw ni Rini(thlalaka hmeichhia kha) kum tir atang khan ka nunah a rawn inlar leh a. A tirah chuan engahmah ka ngai lo, ka danglam lo ka tihna anih chu” a ding hluai a, tukverhah a va dak vang vang a, kei chu ka lo thaw dep dep a, thudik hian min tina dawna hriatna ka nei tlat ani. A aw a thian a, chutah a sawi chhunzawm leh a,”min rawn hmuh fo takah chuan inbiak loh theih ani lo a, kan inbe ve ta fo a, phone ah te hial kan inbiaa, a pasal neih fuh lohzia te chu min rawn hrilh ve thin a ni” “ Chuan i lo khawngaih ta hle ani maw?” ka lo ti vat a, “Bawihi....khawngaihin min ngaidam rawh. Inthen ka rawn sawichhuah chhan pawh kha keimah ka inthiam loh em vang chauh ani asin. Mahse nang chan che hi ka duh lo ani, ka hmangaih che” a ti dam diai a. Min rawn pan a, “Anih leh thudik tak min hrilh teh, in mu dun em?” a ke pen chu a tawp chat a, dawt sawi thei ah ka dah ngailo. Dikna ngaina mi ani miau a, “Min chhang rawh, in mu dun lo tih hi sawi hram teh” ka aw chu a chhuak chang chang a, “Bawihi, min ngaidam rawh...” a tawngkam chuan engkim a ti chiang ani. Chhuatah chuan ka thu sawp nuai a, min rawn pan vat a, “Ding rawh, min khawih reng reng suh, mi tenawmpa.......” ka tawngchhuak thei tawh lo. Ka mittui chu a dir zung zung a, “Ka thiam lo takzet a ni, min ngaidam rawh, a thleng nawn tawh lovang” a ti mawlh mawlh a. Mahse ka tuar theilo, ka hmangaih leh ka rin em em in min bum chu ana ka ti ani.

Ka tho a, ka thawmhnaw chu ka khung mawlh mawlh a, “Ti suh, khawngaihin hetiang chu ti lul lo teh, i tello in ka awm thei hleinem” ka kawngah a kuah a, “Keipawh i kiangah ka cheng thei bik lo” min vawnna chu phelh ka tum a, min vuan nghet sauh a, “Engkim ka siamtha leh ang, min kalsan suh” a ti a. Mahse ka na lutuk tlat, ka puakkeh mai ang tih chu ka hlau ani. Engkim saimthat leh chu a theih ka ring tawh lo, “Anih Bawihi, i duh leh zanin chu va riak thawveng la , mahse ka then dawn chuang lo che nia. Zingah ka rawn lam leh angche” a ti a. Ka car chahbi ka la a, ka tlanchhuak a, min um zui a, ka duh lo chung chu a ma motor zawkah min nawr lut a, a khalh a, ka nu te in lam kan pan a. Kawngtluanin ka mittui a tla a, min rawn en leh zeuh thin tih ka hria, ka in sum thei ngang lo ani. Ka nu te bulah chuan hna laklawh a neih vanga office a let leh a ngaih thu leh zinga min lam leh tur thu chu a sawi a, kei erawh chu ngawi reng in in chungah ka chho a, rei vak lo hnuah motor thawm ka hriaa, tukverh atang ka dak chhuak a, Sawma chu a tlanliam chiah a, “Mangtha le” ka ti sap a, let leh tumna rilru ka pu lo.

A tuk ah chuan Sawma chu a lokal leh ngei a, ka nu in min rawn kaitho a, mahse ka haw duh loh thu in ka chhang a, mak ti zetin min melh a, mahse puitling kan ni tawh a, min nawr luih chu  a tum lo. Inhnuai lama a pen thla ri chu ka hria a, rei vak lo hnuaha ke pen thawm ka hre leh a, ka nu ani tawh lo tih ka hria. Kawngkhar  chu dimtein a rawn inhawng a, Sawma chu a lo lut a, “Bawihi, ka rawn hruai dawn che, tho teh” dam dap hian a ti a. Ka chechang lo tih a hriat chuan ka puansin lai chu a rawn hlim a, “Ka rawn haw tawh dawn lo” ka ti hmuk a, ka thu chhuak nghal a. Ka bulah chuan a rawn thu ve a, “Ngun taka i ngaihtuah hnua i thutlukna em ni chu chu?” beidawn hmel zet hian a ti a, “Aw, ngun takin ka ngaihtuah vek tawh. I thiltih kha ka ngaidam thei lo che” “Engthil pawh min ngaihdam na tur anih chuan ka ti vek ang, enge ka tih ang?” a han ti leh a. Ka sawi tur ngaichangin min en reng a, “I thiltih ang chiah hi ka ti ve anga, min ngaihdam theih chuan ka ngaidam ve thei ang  che” ka sawi tum lawk pawh nilo chu ka han sawichhuak phawng a, mak tih hmel takin min melh reng a, rei vak lo a ngawih hnu ah a lu a thing a, “Ni lo, ni lo e, Bawihi i damchhunga i inchhir na tur i tih ve chu engtikahmah ka phal ngai lovang. Kei chuan ka ngaidam thei ngei ang che, mahse nangmah kha engtikahmahah i in ngaidam thei ngai lovang, chu chu ka rem ti lo ani. Min ngaidam theih hun alo awm anih ngai chuan chumi hun chu ka lo nghak zawk ange” a ti a. A tho a, ka room atang chuan a chhuak nghal a, a thusawi chu ka hrethiam lo. Ka tih nise min ngaidam theiin ka ring lova, ka rilru chu sawhsawn ka duh lo a ni.

Tunah chuan tum loh takin nuthlawi ka ni ve ta reng mai, ka chhungte chuan min dem tih ka hria, kan inthen chhan dik tak hi tu hnenah mah ka sawi thei lo a ni. Khawvela makpa tha bera an ngaih thin kha kumkhuaa an thinlung a mi tenawm ber anga an hriatreng chu ka duh lova, chu chu ka hmangaih avanga a tana ka tih theih hnuhnung ber niiin ka hre ve a ni. Ka hnaah ka tluang a, lunglen chang chu a awm lo thei bik lova, mahse ka chunga thil thleng kha ka ngaihtuah lui hram hram thin. Sawma chu ka hmu khat khawp mai, kan hnathawhna hmun a kawng a in ang lo bawk a, inhmuh a khat a, ka duhthusam chiah a ni. Ka thawhpuite mak tih a tling a, mihring an ngaihsan ve pawl tak ani thin a, chutianga nupui then ani chu mak an ti a, an rin a an loh thu an sawi a, ngaihthlak a nuam chuang lo. Nikhat chu kan Tv show atan khawpui chhung ah kal kualin mipui kan kawm a, kan beisei aiin kan tui tlang a, kan zawh meuh chuan khua alo thim lek lek a,haw nghal mai a theih loh abangin station ah kan kawi leh a, kan haw theih meuh chuan alo tlai tawh viau a,  kan thawhpui zinga mi Mamuana chuan min thlah a, kan in kan thlen chuan thingpui in kawi turin ka sawm a, a duh ve mai a, kan in hi kawng an chiah ani lova, kawngpui chhak deuh hlek anih avangin kea tlem kal a ngai ani. Thianho inkawm, innel tak tak vek kan ni a, Mamuana pawh chuan min kuah pah chuan a titi chho a, chhun lama kan hun hman vel chu sawiin kan titi pah zel a, kan thenawm ah hian dawr te a awm a, ka va hawi deuh chuan Sawma lo thu ka va hmu thut a, a lo hawi hma in ka hawilet nghal a, min hmu hman em tih erawh ka hre lo. Mamuana lenchhung chuan ka rilru ah kan thenawm te dawr ringawt a lang a, ka rilru a nuam thei lo. Reivak lo a len hnu chuan Mamuana chu a haw ve ta a, keipawh mu turin room ka pan a, chhun lam ka chauh ve deuh avangin ka muthilh mai ka ring a, mahse ka mu thei lo. Ka phone ah message ka dawng tih ka hriat chuan ka han hawng a, Sawma  a lo ni a, “Nghahchhuah i har ta hle mai, i thil pawimawh a nih ringin ka rawn ken che a, in thenawm dawrah ka dah a, ilo la mai dawn nia. Thlahtu fel tak i nei a, tunah chuan ka ngaihtuah che a ngai ta lo takzet  anih hi” tih hi min lo thawn a. Ka tho a, dawr lam chu ka pan a, a thil dah chu ka la a, bawm pakhat, kan inneih tirh atanga tlereuh leh ka ngaihhlut ka dahna chu alo ni a, khatia bungrua kan lak pawh khan ka hrereng a, mahse Sawma min lei deuh vek anih avangin ka la tel ta lo kha  a ni a. Chutianga min rawn pek takah chuan ka dah tha mai aniang chu!

Kan inthen atang thla nga a liam tawh a, Sawma chanchin ka hre khat khawp mai, ka lo rin dan chuan a ngaihzawng hlui nen khan an inkawp zui kha ka lo ring thin a, mahse sawi zui tur leh ngaihbel turin vawikhatmah an awm lo. Ka laka a thiltih kha avang khan ka rilru nat a la reh thei lova, a chang chuan na taka siam chu ka chak ve thin. Chu chuan ka natna hi a tih nep ka ring hial thin a, tin, mi fel tak anga a nung chhunzawm chuan min ti na tel bawk niin ka hria. Kan veng thenawm ah hian kan chhungkaw thian an awm a, fapa Zartea an nei a, ani hi ka nulat lai atang tawh a min beisei ve tu a ni a, hetia ka nuthlawi tak hnu pawh hian min beiseina chu a la tawp lo. Amah hi fapa chhuanvawr ani a, college ah lecturer hna a thawk a, kei nuthlawi mai min buaipui peih em em reng hi mak ka ti thin. A nu leh pa te chu chhuanlam ah ka hmang a, mahse min bansan a tum loh thu bak min hrilh duh chuang lo. Tlangval naupang a ni tawh lova, a thutlukna chu a chhungten an pawm vek dawn thu min hrilh a, hnial a buaithlak ve thei hle. Anih na takah chuan Sawma hi ka rilruah alo la thih lohzia ka hriat phah a, midang nei mai tur chuan hun ala duh dawn niin ka hre bawk. Chung chu ka hrilh vek a, “I inpeih hun chu ka nghak mai ang” a la ti fan a, chhan ngaihna ka hre lo. Kan tleirawl chhuah atanga sikul kal tlanga college kal ho kan ni a, ka hrechiang ve viau in ka hria a, mi nun tha leh nun tlang tak mai a ni a, mahse tun maiah chuan mipa hi rin harsa ka ti a ni.

Nuthlawi han nih takah chuan rin ai takin zuam kan lo awl deuh pawh ani ang, fiam kan hlawh viau zel mai a, a chang chuan a nuam lo ve lek lek thin. Kan duh bik vanga thlawi kan ni lova, kan chan hi ahrehawm tawh tehreng nen fiamthu nana min hmang lehzel phei hi chu thil nuam a ni ngai lo. Hengte hian Malsawma chunga ka thinrimna a  tizual thin.  Zankhat chu inleng kan nei a, Sawma chuan min rawn ko alo ni. Hna atanga ka haw chu ka nu leh pa in min lo nghak reng a, ka inthlak zawh chuan sitting room lamah ka chhuk a, ka pa chuan a tv en lai chu a han off a, “Bawihi zanin chu inleng i nei a, Sawma’n haw turin a rawn ko chea, hetia awmze awmlova i rawn haw ringawt hi i nu nen a tha kan ti lo. Chuvang chuan haw leh turin i rilru siamfel ang che” a ti a. Ka nu chuan,”Ni e, i lungawi lohna engmah i sawi duh silo, hetiang tur hi a ni ngai lo. Mihring te chu kan famkim lova, chuvang chuan in ngaihdam tawn hi a pawimawh ani” a ti a. Ka muthmunah chuan nasa takin ka inngaihtuah a, ngaihtuahna thar ka nei ta- ka haw leh ngei ang, mahse a hmaa nupui tha taknih erawh ka tum lo bur, ka tih tur chu ka chiang a, ka ti ngei bawk ang.

Tunah chuan pasal neilai ka ni leh tawh a, ka hna ah ka chhuak nitin bawk a, Sawma chu ka chungah a tha em em reng a, mahse ka rilru erawh a dang zar thung. Anihna takah chuan ka rilru natna ang kha tuar ve se, a natzia hi hre ve se ka duh ngawih ngawih a, chuvang chauh a let leh ka ni. Tin, ka chhungte rilru na chu hmuh a lo nuam lo bawk nen, thil pahnih vang chauh chuan ka kir leh ani. Ka awmdan leh landan chu mi fing tak ka pasal chuan a hrechiang em em a, mahse engmah a sawi lang ngai lo. Min endan ngai rengin min en a, a hma ai mahni a tha zawk emaw tih tur ani. A hmaa ka sawi tawh Zartea nen chuan kan inbe pawp reng a, anihna takah chuan keiman ka va pawh leh ani mah zawk. Ka pasal hnena ka let leh atang khan min beisei ngam tawh lova, mahse kha chen min lo duh ve tu chuan min hnar thei bik lo ani. Ka tidik lo tih chu ka hria, mahse ka thinlunga phuba lak chakna hian min hneh em a, Zartea kher tawktarh a ka hmang erawh pawi ka ti thin. Mahse ka mi hriatchian, misual ani lo tih ka hriatchian avanga amah hi thlang ka ni.

Haw hma chang chu nei mah ila ka haw tlai hi a tam zawk a, chung hunah pawh chuan Sawma chuan min lo nghak reng thin. Pawn lama ka hun hman dan chu hre awm ang pawhin a awm lova, pasal tha ber ni mai awm hian min lo dawngsawng peih reng ani. Ka hunawlah Zartea nen kan chhuak dun fova, ka nun  chu ka duhdan anga zalen taka hman chu ka tum ani ber. Zankhat station atanga ka haw tur chu ka motor ke a puncture avangin Zartea ka biaa, min rawn hruai mai tur chuan ka ti a. kan in kan thlen chuan tukverh a Sawma dak chu ka han hmu thawi thuak a, mahse hmu angin ka awm duh lo. Zartea biangah chuan ka han fawp zauh a, a tlan liam thlengin ka thlir a, muangchangin in lam chu ka pan a. Sawma chu tv hmaah alo thu leh tawh a, a tv en chuan a rilru a luah hmel loh viau lehnghal, room a ka lut tur chu min ko a, “Bawihi, engthil pawh ti dawn la, i inchhirna tur thil hi ti ngai suh ang che aw” dam dap hian a ti a. Ka bag ka la a, “Ka hlimna tur chiah ka ngaihtuah, thildang engmah ka ngaihtuah lo” ka ti a, ka luhsan nghal a. Zana ka mu lai chu ka harh hlawl a, ka pasal chu ka bulah alo awm lo. Ka sana ka han bih zawk a, zing lam dar 2 alo ri dawn chiah a, ka han hawi kual leh chuan kan room sofa ah Sawma chu alo thu a, tukverh chu hawngin pawn lam chu alo thlir vang vang a, a landan chu a khawngaihthlak ve hle in ka hria. Ka lu chu ka thing nawk nawk a, muthilh tumin ka han inkhuh tha leh sauh sauh a.

Nitin kan hun hman dan kan la thlak lova, inchhunga ka awm ai pawn lama ka hun hman chu a tam zawk, pawn lamah hlimna ka zawng ani ber. Theihtawpin inchhung tan ka hun ka hmang thin a, ka pasal tan ka inpumpek ka ti ve thin. Mahse min chhanlet dan hi ana em a, pawisak ka nei tlem tawh ani mai. Nikhat  chu Zartea nen kan lengchhuak a, inchhung chakkhai ka lam khawm pah a, rin ai kan rei ta zek a. Kan haw dawna motor awmna lam kan pan lai chuan Sawma chu a thawhpuite pahnih nen keimahni awmna lam pan chuan an rawn kal a, hmuh loh der ka tum ngial naa ka tlai hret! Zartea chuan Sawma a hmuh chuan min vawnna chu a thlah vat a, mahse vanneihthlak takin a thiante pahnih chuan min lo hmu lawk lova, Sawma erawh chuan a hmu hman tih ka hrechiang, “In la haw hman lo deuh em ni?” engmah thleng lo ang maiin Sawma chuan min biaa, a thiante laka mawihnai ah min bia tih ka hria, “Aw, kan haw dawn chiah” ka theihtawp a awki zangkhai chuan ka han ti ve a, a thiante nen kan inbiak luam hnu chuan kan kalsan ta a. kan inah kantlang a, Zartea chu a tawng tlem em em a, nuam lo a ti tih ka hria. Sitting room ah ka inthlak chu min lo nghak a, ka inthlak zo ka chhuah leh chuan inngaihtuah muk hmel takin min lo melh a, “Kan awmdan hi a dik lo ani. Bawihi... kan kal thui hma hian kan let leh a ngai” inthiam lo hmel tak hian a ti a. ni e, kawng dik chu ani lo maithei, mahse ka rilru damna tura ka thiltih hi a diklohna bik ka hre thei tlat lo ani, “I duh chuan i ti tawp thei alawm, i thu thu ani e” ka kawngzawh tuma min thurualpui thei lo chu kawp zui zel a tulna ka hre bik lo ani. Min en reng a, ka rilru chhungril ber thleng hriat a tum ni maiin ka hria,”Min thurualpui ve dawn lo tihna em ni?” a ti a, ka chhanglet lo. Chutih lai chuan Sawma chu a rawn haw a, Zartea tan pawh han awm reng na chi ni hek lo, a haw ve ta nghal a. Chhun lam atanga thilthleng avang chuan Sawma chuan min hauh a, a thinrimna te chu a tihlan ka ring a, mahse tawngkam khat pawhin a sawichhuak lo. Zartea erawh ka biak chhunzawm duh lova, vawitam min rawn call a, ka pickup duh lo.

Ka hna atanga ka haw tur chu ka motor bul ka thleng chiah a, Zartea chu a rawn lang thut a, biak ka chak lo tih ka hmel ah ka han tilang  naa, a hrethiam duh lo. Ka chahbi kenlai chu a laa, aman motor chu a khalh a, kan in lam kan pan lo tih ak hria. Kan tlan zel a, Zartea u chiah pasal neitawh te in chu kan thleng a, motor atang a chhuak a, kei erawh ka la thu reng a, kawngkhar a rawn hawng a, chhuak turin min ti a, inchhung lamah chuan kan inzui lut a. hmeichhe pakhat chauh alo awm a, Zartea nen chuan min en tawn chhen a, a nui leh sak thin a, thingpui lum tura a tih chuan choka lam chu a pan a, “Suii zet hi chu buaithlak, ka u lah hian a rin ve ber ani sia” Zartea chuan a han tih zawm nghal a. Ka bulah  a rawn in sawn a, “Min be duh tawh em?”  ka bengbul setah  chuan a ti a, ka hmui ka ti pawrh a, a rawn fawp nghal zeuh a. Ka kut chu a vuan a, “I tello chuan ka awm thei lo, hun tha in her hun chu ka nghak thei ang. Chu chu i hnena sawi ka duh ani”  a ti a. chhan tumin ka han ang zuau a, kan piah ah chuan mak tih hmel zet hian Suii chuan min lo en reng a....

Ka in la hrang vat a, ka pasal laka ka awmdan a ka inthiam loh ber tum ani hial ang. Nuam ka ti lo tih Zartea chuan a hrethiam ve mai a, thingpui kan in zawh chuan min thlah haw a. in ka thlen chuan Sawma motor alo la awm lova, Zartea chu leng lut tur pawhin ka sawm lova, ka awmdan teh thut chu ka in hrethiam bik lo. Room ah ka inthlak a, ka drawer a ka thil hlu dahna bawm chu ka hawng a, kan inneih zungbun ka dah chu ka melh vang vang a, engemawti tak hian ka thinlungah thu a sawi niin ka hria. Ka pasal hi haw viau mah ila ka hmangaih ani tih hi phatrual ani lova, a natna tura ke ka pen hian keimah zawk min ti na a, ka chauh phah lo chauh ani. Nidang ang lo takin Sawma chu a rawn haw har em em a, office ah ala awm nge a rawn haw mek tih te chu hriat ka duh a, mahse be hmasa tur chuan ka la tlawm thei meuh silo. Rawng ka bawl zawh pawh chuan ala rawn hwa thei silo a, chaw chu ka eisan ringawt a, thleng ka sil fel meuh chuan dar 7 alo ri der tawh. Tv en pahin ka longhak a, ka haw har em em lai a a hun lo hman thin dan tur te chu ka ngaihtuah a, a khua alo har ve thei in ka ring ta hial a. Dar 8 a rik dawn chuan motor thawm a rawn awm a, parda ka han keu dek a, amah ngei ani. Ngaihsak anga lo lan chu ka hreh a, tv chu hmuhnawm tih hmel takin ka lo melh a, inchhung a rawn luh chuan ka melh zawk a, ka hriat tirh atanga a vawikhat nan Sawma chu rui hmel in ka va hmu anih chu! Min melh run a, room lam a pan a, a rawn chhuah leh mai ka ring a, mahse a rawn chhuah mai tak lo ah chuan ka va lut a, a form pawh thlak lovin khumah chuan alo mu a. A bulah chuan ka va kal hnai a, “Chaw i ei dawn lo em ni?” ka han ti a, min chhang lo. A pheikhawk chu ka phelhsak a, a thawmhnaw thlak tuma ka va ban chuan alo in her sawn a, ka ban chu a paihthla a, a rawn tho chhuak a, rizai pakhat chu ala a, sofa ah chuan ava mu a. A awmdan chu ka hrethiam lo hle a, ka ding reng a, min rawn melh leh kawk a, “I tan tenawm mai ka ni, i bula mu tlak pawh ka ni lo” a ti bah nawk a.

Kan khum zau takah chuan keimahin ka mu ve ta ran a, kan inneih tirh atang ka han ngaihtuah kir a, ka rin loh lutuk dana kan awm ta mai chu ka rilru ana ani. Chu zan chu ral thuai se ka ti a, a tuk khawvar chuan beiseina thar min siamsak ka ring ani. Ka muhil ka harh chuan ni alo tlang sang tawh hle a, Sawma chu hmuhtur a awm lo. Ka tho chhuak a, rawng chu alo bawl peih diam a, garage chu alo in hawng a, motor nen a chhuak anih hmel. Hnaa tlai ka hlauh avangin chaw ka eisan a, ka chaweikham pawh chuan a la rawn let lo. Phur fahran lo chuan ka chhuak a, ka phone ah tal chanchin min rawn hrilh ka ring a, mahse a reh vang vang ringawt a. Chhun ah a rawn ri a, amah anih ring tak chung chuan ka han en a, Zartea zawk alo ni. Tlaiah hmuh ka duh thu ka hrilh a, engkim hi ka titawp vek tur ani. Ka hlimna tur emaw ka tih hian min tihchhe zawk dawn tih ka lo ngaihtuah thleng pha ngai lova, Sawma thusawi te kha tunah chuan ka hrethiam ve ta in ka hria. Zartea chu a hna a laklawh deuh avangin ka hawsan a, a tuk a inhmu mai turin ka ti a. Mahse in ka thlen hnu reloteah kan in chu a rawn thleng hnuhnawh a, “I sawi hmang khan a pawimawh hmel a, ka rawn um che” a ti a. Inhma tawnin kan thu a, “Zarte, ka thei tawh lo ani min ngaidam rawh. Ka tana mi tha tak ni reng hi hmanruaah ka hmang thei tawh lo che ani, min hrethiam rawh aw” ka ti a, amah pawh ka en ngam lo. Rei vaklo chu kan ngawi dun a,”Ka hria alawm, i pasal i hmangaihzia hi hairual lohin ka hria asin. Chutichung chuan remchang ka lo zawng ve reng tho a, ka thiam loh zawk alawm. Bawihi, vawi tam tak ka lo ngaihtuah ve tawh thin a, kan tidik lo tih pawh ka hria, mahse thlah che hi harsa ka lo ti ve em a ni. mahse kan la tlai lo, thian tha tak nih hi chunglam remruat sa a ni. kan tidanglam thei lova, chuvang chuan i thutlukna chu keipawhin ka pawm e” a ti a. Inpawh takin kan titi a, tunah chuan ka zalen ta. A haw tur chu pawn thleng ka thlah a, a motor a aluh hma deuh chuan Sawma chu alo a haw ve chiah a, hlauhthawnna in ka khat nghal ringawt a, mahse min hmu ang pawhin a awm lo. Zartea tlan liam hnu chuan inchhung lamah ka lut a, Sawma chuan min rawn zui bawk a, sawi tur a vang duh hle. Room ah inthlak turin a lut tlang nghal a, rawng ka bawl thung a. A inthlak zawh chuan sitting room ah rawn chhuakin tv a en a, kan inbe ta chuang lo. Kan in chu inpawh lo taka awmna atan chuan a zau ta mah mah ani. Chaw ei chhung zawng pawhin kan inbe lova, chaweikham thleng ka seng lai chuan motor chabi a la a, “Ka chhuak dawn a, ka lo haw har ang” tih leh chhuah a rual a. min chhuahsan chiah chu ka nun hi a ruak nghal rawih rawih in ka hria. Engvanga heti tak maia hmangaih hi nge ka lo nih tiin ka in zawt a, ka tlawm ngawih ngawih in ka inhria ani.

Ka lehkhabu chhiar chu ka lo mutthluksan a, ka harh chuan puan ka lo sin tha vek a, ka han hawi a, sofaah Sawma chu alo mu reng tawh a. ka en reng a, kan inkar hla ta lutuk chuan min ti na ani. Kan nupa nun hmasa zawk, hlim tak ni thin kha engtikahmah kan nei let leh in ka ring lova, a hminga nupa, a takah chuan in hlat em em kan ni. hetiang reng chuan rei kan awmtlan theih ka ringlo a, kan la inthen nge nge dawn niin ka hria. Ka thinlung hi amah ngaidam tak tak turin ka inpeih em tih ka hre lova, tin, ka thiltih te hi min ngaidam bik kher angem tih ka hre lo bawk. Humsual chu dai lo mahila min rinhlelhna na chu a nei ve ngeiin ka ring a, chung avang chuan kan inkar hi chu awlsam takin a tha mai maiin ka ring lo.

Ka hna atang ka haw hma a, ka nute ina ka lenkhat deuh avangin tlawh ka tum a, ka va thlen chuan rin loh takin Sawma chu alo awm reng a, kan inhmu thut chu mak tih hmel takin kan in en a, a nui lui sak a, chhungte laka lemchan ngai chu ka ning ru hle ani. Ka nu chuan chawei nghal mai turin min ti a, Sawma chuan hna laklawh tih ngai aneih thu leh ka duh chuan ei mai turin min ti a, reiloteah a chhuak zui nghal a.  Inchung lamah ka chho a, khumah ka tlu zal a, ka nun ruak ngawih ngawih chuan min ti chau a ni. Fa tal nei ila chuan ka ziaawm deuh tur, engvanginnge heng hi ka chunga a lo thleng bik? Mahni inkhawngaihna chuan min rawn hneh a, ka mittui chu alo luang ngiai a. hmangaihna hi ka duh a ka tihtawp a ka dan theih alo nih lohzia pawh ka hrechiang ta hle mai. ka pasal hi a thilsual tih hi ka ngaidam dawn nge kumkhua atan ka kalsan ang tih chu keima duhthlanna alo ni ta. Chaweikhamah muangchangin ka inkhalh haw a, ka rilru ka lo kawm nasa lutuk nge ni kan in thlen hma kawiah chuan bike chak tak a lo tlan nen kan insu thelh a, steering chu theihtawpin ka herh kawi a, mahse kopang chu ka han su ta chawrh a, ka chal ka sawh thi chu ka hmu hman a, luhai riai riai in min rawn zui a, a bak chu ka hre tawh lo.

Ka harh leh chuan kan khumah ka lo mu a, ka bulah ka pasal leh ka nu leh pate an lo thu thap a, ka chal chu na in min rawn tur ut ut a, ka accident dan chu ka hrechhuak zui nghal a. Ka pasal chuan duat takin min buaipui a, ka nu leh pa hmuh ah chauh lan mawi a tum niin ka ring bawk a. Ka ngaihtuah awm lem loh avangin Sawma chuan ka nu leh pa chu a va thlah a, a rawn haw leh hnu chuan ka bulah a rawn thu a, “Bawihi min ngaidam rawh aw” a ti dam diai a, chhanlet pawh ka tum chuang lo. Amah vek chuan,”A thiam lo leh diklo hmasa zawk ka ni chungin ka awmdan anga awm tura ka ngaihtuah apiang che in ka na ngawih ngawih thin. I awmdan apiang ka pawm vek ang tiin keimah ngei pawh ka intiam hial a, mahse a taka khapa nen ka hmuh cheu kha chuan ka puakkeh lo chauh ani” a chawl dat a, uluk tak hian min en a, “Tlaiah khan Zartea khan min hmuh duh thu a rawn sawi a, chuvanga i nu te ina chaw pawh kha ei lo ka ni. A hmangaihzia che leh dinhmun che berah pawh a phatsan dawn lohzia min hrilh a, mahse nangmah zawkin hmanrua ah mai i hman thu leh kei min hmangaih avanga chu pawh i chhunzawm theih tawhloh thu min hrilh a, Bawihi, ka mittui a tla hial asin! Hetiang tur hian i lakah thiltha tih ka nei ve der silo, ka zak ngawih ngawih ani” a ti a. A darah ka lu ka nghat a, a kut chu la in ka han hmer vang vang a, “Ka lak atang a kumkhuaa kalbo tir ai che chuan i thiltih kha ngaihdam che ka thlang a ni” ka ti a. Mittui tling pamin min en a, “Bawihi, i chunga ka thil sual tih vang khan nang chuan min ngaidam mah la, keimah zawk hi ka damchhungin ka inngaidam tawh lovang. Mahse i hmangaihna hi a ropui ka ti, ka dam a k thawk theih tek tek chhung chuan lehpek awm thei lo tur khawpin ka hmangaih reng che anga, lo tisual tawh mah ila ka tisual nawn tawh lovang” a ti a. Electric eng hnuaiah chuan a mittui tla ngiai chu a lang tle var a, a darah ka lu ka nghat a, ka maimitchhing vang vang a, “Bawih, i muhil em ni?” a ti sap a, ka melh a, chiang tak hian min lo en ve reng a, ka nui sak a, min rawn fawp ta vawng vawng a. Kan khum bula rose par nalh tak inkhawi thar chu ka han lek kang a, Sawma chuan ka kut atang alo la sawn vat a, “He rose par ang hi kan hringnun thawnthu chu a ni. rose par hi mawi hle mahse hling zum chhun na tak tak in a hual vel a, awlsam taka lawh tuma kan ban chuan a hling in min lo chhun mai thin. Mahse a chhun na chu na ti chung pawha lawh kan tum luih talh chuan a tawpah  kan lo nge nge thin. Kan inhmangaihna pawh hi harsatna hrang hrangin a hual vel thin a, chung harsatna te chu tuar harin hrehawm tam hle mahse, kan inkar tihtawp tum mai lova i beihna chu a thlawn lova,i hmangaihna avang chauh hian he rose par kiangah ngei kan inhmangaihna bul chu kan tan tha leh dawn ani” a ti a. ngaihnawm ti takin a thusawi chu ka lo ngaithlaa, “Chuan.... i tello in ka awm thei lo, i tello chuan kei hi engmah lo mai ka lo ni. i hmangaihna vang hian lawmthu ka la hrilh zel dawn che chu anih hi” a ti leh a,”K a tello in engtinnge i awm theih ang? i taksa peng pakhat ka ni a, keipawh hi i tello in ka awm thei lo ani” ka ti a. Ka kawngah chuan nghet takin min kuah a, “Ka hmangaih che” a ti a, hmangaihna mitmeng mawi taka min melh chung chuan min fawp ta vawng vawng a.

A hmaa kan tihsual chu insiamthat nan kan hmang a, khang hun ho lam taka kan hmangral emaw kan tih a, kei ngei pawhin ka lo beidawnpui tawh chu siam that ani leh ta. Nupa hlimni hmel hmu tawh ngai lo te chu khawvela nupa hlimna ber kan lo ni ta. Kan hlim reng hauh lovang, mahse hmangaihna hian engkim a hneh a, lungngaihna karah pwh hlimni zawng alo herchhuak leh fo ang tih hi ka hrechiang tawh a, beiseina nen hmalam panin ke kan pen zel dawn ani.

.