SENORITA (The Girl of My Dreams) Part I-III

SENORITA

(The Girl of My Dreams)

 

Part I

-Mami Lalhmangaihzuali Chawngt

.
“John, min kal pah deuh mah mah lo maw?”
.
Ka bul a rawn thlen chuan a thinrim zia ka hai lo, a mitmeng thim mukte chu ka hlauh a ring a ni maithei.
.
“I hnenah kumkhuain ka awm ang ka ti hleinem”ka lo ti sam et a.
.
“Tenawmpa… thlawk bo nghal rawh”tih pahin ka kawrah chuan min tham a.
.
“Duhtak, duhtawk rawh. John, nangpawh I rui tawh anih kha, han mu rawh” Juliet chuan a lo ti a.
.
Ka no chu ka han dawm a, ka han tlak leh pap a, rum zeta Donny min lo en chu hre lo ang hmakin ka kalsan a, ni e, nidang ai chuan ka rui tih ka hai lo.
.
Ka khumah chuan ka bawk thlawp a, ka muhil zui nghal mai a. Zanlaiah chuan ka tui hal lutuk chuan min tiharh a, ka khum bula tui chu ka in bawrh bawrh a, ka harh hawkin ka hria. Helai hmunah hian kum thum chhung zet chu ka lo tal ve ta reng mai a. Ka tan chuan Donny te nupa hi ka nu leh pa ang mai an ni, he hmun ka thlen hlim khan an ni hian min ring lo se chuan khawiah emaw ka la vakvai maithei a, ka thiam ve chhun chu tingtang perha zai kha a ni mai a, an dawrah zai tura min sawm ni khan ka eizawnna a intan ve chiah a ni. Ka pa zaithiamna kha ka pha lo a ni maithei a, mahse, keichuan eizawn nan ka hmang miau a, min tluk lo a ni. An hnena ka awm dawn khan intiamna ka nei lo a, chuvang chuan helai hmuna awm reng hi ka bat a ni lo. Anmahni vanga mi hriat hlawh chho ka ni chung hian helai khaw pakhata ka nun zawng zawng hman hi ka rilruah a awm ngai lo.
.
Zing ni chhuak chuan ka hmai a rawn chhun a, meng tha thei lo chuan ka han inbeng kang a, zan lama ka zu in hnem avanga ka lu na fak fak pawh chu ka hria. Zawi zetin ka tho a, ka thawmhnaw tla darh nuai chu ka han chhar a, ka ha nghal mawlh mawlh a, vawiin ni hi helai hmun ka awm tawpna ber tur a ni tawh. Inhnuai ka chhuk chuan Juliet chiah ka hmu a, a pasal erawh ka hmu ve lo. Min hmuh chuan min lo be vat a, a hmelah chuan lungngaihna eng emaw tak hmu hian ka inhria.
.
“John, kei chuan ka hrethiam lutuk che ania. Kan pa pawh hian a la hrethiam ve mai ang”a lo ti dam diai a.
.
“Juliet, ka tan in hlutzia hi ka theihnghilh ngai tawh lo ang”ka ti a.
.
“Nangmah avanga tun kumhnih chhunga kan dawrin hlawkna a hmuh hi kan pa pawhin a hai lo a, chuvang chuan I awm lo tur pawh hi a ui hle reng che a ni, ngaih loh lamah I ngai lo hram aniang chu”a tih chuan a nui sak a.
.
Chhang tawh loin breakfast chu kan ei dun a, a nihna takah chuan helai hmun chhuahsan hi ka chak viau lem lo. Mahse, hmasawn ka duh a, khawvelin ka hming hria se, ka talent hi tipung ila tih ka duh vanga kalbosan tur chauh ka ni. Ka hlawhtling emaw, hlawhtling lo emaw, helai hmun hi ka inpui ber a ni reng tawh ang.
.
Ka thawmhnaw ka pack mawlh mawlh lai chuan Donny chu a rawn lut a, ka khumah chuan ngawi rengin a rawn thu a, ka che vel chu min en reng a, a huat zawng sawi leh hnuhawh chu ka duh kher loh avangin ka ngawi ve ta reng a. A aw chu a han thian karh karh a.
.
“John, nizan avang khan pawi ka ti khawp mai, min thawng lutuk a, ka inveng hman lo a ni”muang ban cherh chawrh hian a ti a.
.
“Ka hrethiam che alawm”ka ti a.
.
“Min la rawn tlawh leh ang chu tiraw?”a tih chuan ka han ding mar a, ka thiltih lai chu ka dah a.
.
“Enteh Donny, ka tan chuan ka nu leh pa ang mai in ni. Helai hi ka inpui a ni a, engtikah emaw chuan ka lo kir leh em em ang”ka ti a.
.
A nui ta suk a, tha taka kan inthlah theih dawn avang chuan keipawh ka thawl hawk a, tha taka sawi theih reng ka mawl vanga khati teh nuaia tih a ngai kha pawi ka ti leh hnuhnawh khawp mai. Thla eng emaw zat kalta atanga ka ruahmanna kha thawklehkhatah ka han hrilh tawp a ni a, a rilru tur pawh lo hrethiam ve ila tha tur a ni a, ka thiam loh  vek a ni. Dawrah chuan min ngaina tu eng emaw zat an lo pungkhawm a, Toronto khaw boruak nuam tak chhuahsanin New York khawpui lam ka pan dawn a, helai hmuna min ngainatute ang hi NY khawpuiah ka hmu zo ve ang em ka hre lo. Engkim hi hmasawnna tur leh hlawhtlinna tur chuan risk lak phawt a ngai miau si a. A thenin mittui nen min chibai a, kei ve tehlul heti taka ngainatu ka nei hi lawm lohna chi ziazang a ni lo.
.
“Hey Little John, hla pakhat tal chu inthlah nan min sak sak dawn lawm ni?”tia rawn au tu lam chu ka han hawi a. Mr.Parker chu mittui tling pam hian a lo ding a, putar kum 80 mi ni tawh mah se ka zai ngaithla turin an in atanga km 3 teh meuha hla kan dawr a rawn pan thin.
.
“Tehreng mai. Mr.Parker, eng hla nge ka sak ang le..?”ka han ti vat a.
.
Ka guitar ka ah fel vek tawh chu ka han dah thla a, ka phawrh mawlh mawlh a.
.
“Don Williams hla ‘Flowers won’t grow’ ngat khan min han thlah ta che tlangval”a ti a, midang pawh chuan an lo zawm ve tliar tliar a.
.
.
*Flowers won't grow in gardens of stone
The ground must be tended but we left it alone
The seeds that we scattered are all parched and blown
Flowers won’t grow in gardens of stone.*
.
.
Ka zai chhung zawng chuan a thenin min lo sak pui a, a thenin an mittui an lo hru bawk a, pawisa hlawh tura ka zai loh tum ni mah se ka guitar bawmah chuan pawisa eng emaw zat a lo tla hman tho. Taxi a lo thleng tawh a, engtikah nge helai hmun hi ka kal leh ang tih hre lo mah ila ka la ka leh ngeiin ka ring a, ka chhungte tia ka hriatreng tawh turte nen hlim takin kan intawng leh ang.
.
“John, chanchin min rawn hrilh ve thin rawh aw”Juliet chuan a ti a.
.
“Ka tana in thatna hi engtikah mah ka theihnghilh tawh lo ang “ka ti a, kan inkuah thlawp a, ka mittui pawh a tla ve sak a.
.
“Chanchintharah I hming an lam ve hun tur nghakhlel takin kan lo thlir thin ang. Ka fapa, malsawmna dawng turin ka duhsakna ka hlan a che”Donny chuan a ti a.
.
Taxi tlan liam thleng chuan min lo thlir thap tih hriain kawng kawi kan thlen dawn chuan driver chu ka din tir a, tukverha dakchhuakin ka ban chu ka vai a, chu veleh an vai chuan an rawn vai ve ta sauh sauh a.
.
Rel Station-ah darkar khat chuang ka awm tawh a, kan train an delay vangin ka tum loh deuhin ka tangkhang ta rih a ni. Hetiang tur tih hria ila min ngai em em tute kianga hun la hman kha ka chak a, ka hre lawk miau bawk si lo. A tawp atawpah kan chhuak ve dawn ta, ka han hawi vel a, ka lung a leng dawn hle mai. Ka seat ah chuan ka han thu fel a, ka earphone phawrh chhuakin zinkawng thui lo zawk ka zawh theih nan ka hla chi hrang hrang chu ka ngaithla kual a, ka naupanlaia ka hla duh em em thin ‘SENORITA’ chu ka ngaithla a. He hla hi Don Williams hlaa ka ngaihthlak nasat ber pawl a nih ka ring. Cowboy pakhat, Mexican nula zuna  a uaina hla a ni a, chu nula chu ka dream nasat theihzia kha. Engtikah emaw chuan ka la tawng ngeiin ka ring tlat thin a nih kha, khawiah emaw, engtin emaw kan intawn hi ka ring tlat thin. Chumi ngaihtuah reuh reuh chung chuan ka lo muthlu ta vang vang a.  Ka harh leh meuh chuan ralah New York khawpui chu a lo lang phe uar tawh a. Ka sana chu ka han en a, darkar 13 zet chu kan lo tlan tawh reng a, ka ei tur lei sa pawh chu a lo zo reng tawh a, tui bottle khat chiah ka lo nei tawh. Ka pawisa khawl ve chu eng tham a ni dawn hauh lo tih ka hria, hotel ka thlenna tur leh ka ei leh inah a zo vat dawn tih ka hria a, chuvang chuan a rang thei ang bera sum ka hmuh a ngai a ni.
.
Station-ah chuan a then an chhungten an lo hmuak a, an ri chel chul a, ka thawmhnaw paw deuh phak chu ka han beng thuak thuak a, New York khawpui ka thleng ve ta reng mai. Ka rilru chu a zam ru viau na a, chuti maia tlawm erawh ka tum bik lo ang. Taxi rawn tlan chu ka lo phar ding a, hotel lam chu kan pan ta vang vang a. Hotel changkang tak tak, thlen chakawm tak tak awm mah se ka phak tawk ka zawn a ngai a, engtia rei nge ka pawisa hian min daih dawn ka hre si lo. Hotel ka thlen chuan ka hahdam ve ta hiai a, ka awmna tur atan chuan a tawk ren rawn viau. Ka mamawh engkim a awm kim a, hahdam taka ka mutna tur khum dup nuam takah chuan ka bawk thlawrh a, ka mu ta veng veng a. Ka phone a rawn rik chuan ka kekawr ipte atang chuan ka han lachhuak vat a, New York kal tura thurawn min petu ka thianpa Landon a lo ni. Ka han pick-up chuan pheikhai zang vah hian chibai min buk a.
.
“Vawiin chu chawlh hahdam nan lo hmang phawt la, naktukah ka rawn hmu ang che”a han ti a.
.
“Landon, ka huphurh riau a nia”ka tih chuan a nui ta hawk hawk a.
.
“Kan inhmu vat dawn nia”tiin kan inbiakna chu a titawp ta a.
.
Ka han tho chhuak a, inbual fai ka mamawh tih hriain zai rah rah chungin bathroom lam chu ka pan ta . Ka inbual zawh chuan ka pum a ruak zia chu ka hre ve chiah, in hnawh puar turin room chu ka chhuahsan ta a. Ka thil ei pah chuan mi che vel chu ka en reng a, tute pawh mai chu phur tak hian an che surh surh ni mai hian ka hria. Ka awmna hmasa nen khaikhin chuan helai hmuna insiamrem tur chuan hun ka la duh deuh dawn tih ka hria.
.
“Ka va hmu ngai lo che ve”
.
Ka hawi vat a, waitress pakhat hian nui sangin min lo en reng a.
.
“Mi thar ka nia”ka han tingawt a.
.
“Kan lo lawm a che”a ti a, a ha var rual sar chu a then tha a, ka lu ka lo bu nghat a.
.
“Engtik thleng nge dawr hi in hawn thin?”ka tih chuan, “Dar 9-ah kan khar ang. Naktuk zing dar 9-ah kan hawng leh ang”a ti a. Lawmthu ka sawi hnu chuan a kal ta a, ka rin ai daihin eitur an siam tui lehgnghal, atukah pawh helai hmuna kal leh ngei chu ka tum a ni. Dawr atanga ka chhuah chuan dar 9 a lo la ri lo deuh a, train-ah ka mut nasat em avangin ka mut chu a chhuak lo tak zet a, hotel bul vela kal kual mai mai chu ka tum ta zawk a. Ka guitar ka lo ak chhuak lo chu pawi ka ti leh hnuhnawh khawp mai a, hetiang taka hmun reh leh nuam ah hian duhtawka han zai vang vang chu a chakawm riau a ni.
.
Ka phone ri ral ral chuan ka mumang lam chu a um bo nghal vek a, phak chuapin ka han lakang a, Landon hming ka hmuh chuan ka pickup vat a. A thu min rawn hrilh chuan min tihnual kher mai. A hnaah chawlh a neih theih loh vanga min rawn hmuh theih loh tur thu leh nghak leh tura min tih thu a ni. Ka beisei angin thil hi a kal dawn hauh lo tih chu ka hrethiam vek tawh. Engpawhnise, he lai hmun ka thleng tawh a, ka kawng tur chu keimahin ka dap chawp tawh mai ang. Mite chunga beiseina kan nghah thuk lutuk hian kan beidawng mai mai a ni. Ka hun hman dan tur te chu ka han ngaihtuah neuh neuh a, nileng hun ka neih chu a tangkai thei ang bera ka hman a ngai a ni. Ka contact list chu ka han en thuak thuak a, ka tum loh deuhin Jamie hming ah chuan ka tawp chat a, a number ka lo la nei chu mak ka ti kher mai. Amah vanga hlawhtlin ka chak zia te, dinhmun sang taka din duhna ka neih tak dante chu ka rilruah a rawn lang thar ta iar iar a.
.
“Guitar ah kual ringawt hi eizawnna a tling lo”a ti a, a hmel chu a nur nang a.
.
“Jamie, nuamsa taka ka dah theih loh avang che hian hrehawm ka ti, ka theihtawp ka chhuah mek a nih hi”ka ti a.
.
“Inbiak ka duh tawh lo”a tih tak avanga ka mangan zia kha.
.
“Kum hnih min nghak la, engmah ka nih loh chuan I duh ang ngeiin I pa hnuaia thawk turin ka rawn kir leh ang”ka tih chuan a thaw huai a.
.
Kum hnih ni lo, kum thum a liam tawh a, Jamie hnenah ka let ta lo. Ka tuina ber zawha ani thlah hlen chu ka thlang ta zawka, tin, min ring miah lo tu chungah ka rinna ka nghat ngam bik hek lo. Delete button chu hmetin ka thinlungah delete thei lo mah ila ka thununnna hnuaia awm ka phone atang chuan ka paih bo ta.
.
Coffee ka in lai chuan waitress ka hmelhriat thar kha a rawn kal a, engtik lai mai pawha a hlim hmel hmuh tur awm reng chu mak ka ti deuh hlek a, hlim hmel pu khat ve tak ka nih vang pawh a ni ang.
.
“I hming min hrilh thei em ang chu maw?”a ti a, ka thutna bula dawhkan chu a tifai mawlh mawlh a.
.
“John tiin min ko thei ang”ka tih chuan a dar chu a san ak a.  “Nang ve le?”ka tih chuan, “Margareth”a ti a, a nui leh sang a.
.
“Maggie tiin ka ko thei che anih chu”ka tih chuan a nui ta hak hak a.
.
“Engti tur berin nge I rawn kal?”a tih chuan thutak leh ran tawh.
.
“Thil pawimawh tak tih tur ka nei a”ka ti a, ka ngawi ta daih a.
.
“Oh! Sorry. I duh loh zawng ka lo zawt che nih chuan min hrethiam dawn nia”a ti a, a kalsawn ta a.

x---------------------------x---------------------------x------------------------x

“Maggie, biak lawk che ka duh a”
.
Dawr hnungah chuan ka ding a, Maggie haw hun chu ka lo nghak ngar ngar a ni. Min hmuh chuan a phawk deuh hlek a, keimah tih a hriat chian chuan a awm chu a dawm a, a thaw ta hak a.
.
“Ka hlau tep che alawm”a ti a, a nui ta hawk a. “Engthil nge ni ta?”hawihhawm zet hian a ti a.
.
“Ka zai ve thin a”ka han ti tawl a. A meng chu a buai deuh hian ka hria a, a nui ta mai a.
.
"Chuan..." a han ti dat a.
.
"Chuan... Aa.. ka sawi ve mai mai" ka tih chuan insum tih hriat zeuh hian a nui khur dat dat a.
.
“I zai chu ka la ngaithlak ve ngei ka beisei”a ti a, “Engpawh nise kan inhre tawh alawm tiraw John?”min rawn nek deuh a.
.
“Engtik hunah pawh”ka lo ti a, a nui ta var var a.
.
“Ka kalsan phawt ang che aw, naktukah kan inhmu leh dawn nia”a tih chuan ka lo bu nghat a. Kan in mangtha hnu chuan a kal ta a, ka enzui reng a, engvanga kha thu kha sawi ve ngawt nge ka nih? Ka tukhum chu ka han hiat a, ka lungte rah chu ka han chhuih ringawt a.
.
Hotel-a ka let leh hnu chuan helai hmuna awm reng hi awmzia a awm lohzia ka hrechiang ta hle a, ka pawisa ka hman zawh hma ngeia eng kawng emaw tak ka zawh a ngai a ni. Ka guitar chu lachhuakin hla ka siam thar chu ka han play a, ka rilruah Mexican girl kha a lo lang a, ka nui ta var var a. Ka mut meuh chuan zing lam a ni tawh zawk mah, muhil mai thei lo chuan ka inlet sek a, khawvar dawn hnaih ah chuan ka lo muhil ve ta a. Ka zing tho chu ka lu chu a nuam lo hle a, helai boruak hi ka la zo lo deuh niin ka hria. Tho chhuak peih lo in khumah chuan ka mu ta reng a, Landon-a number chu ka han hmet chhuak a, beidawn nan han biak leh reng reng pawh chu a tha in ka hria. Vawihnih ngawt a ring quit thak a, tihngaihna ka hre tawh lo, engvanga he hmun min kawhhmuh hi nge a nih ka hrethiam lo tak zet a ni. Ka maimitchhing vang vang a, tunah chuan ka thawh theih awm apiang ka thawh mai hi a ngai a ni.
.
Ka phone call rawn kal chu lak mai nachang hre loin ka en reng ringawt a, Landon a ni.
.
“John, Brooklyn lamah rawn kal rawh. Ka awm mek a, kawng kan zawng thei ang”a ti a. A aw chu a zang khai vah a.
.
“Landon, helai hmun thleng hian ka rawn kal tawh a, Brooklyn ka rawn thlen vanga I tih theih hi  a tam ka ring ta hauh lo. “lungawi lo tak chuan ka ti a.
.
“I tana tha tur ka ngaihtuah tih hi I ringhlel a ni maw?”a tih chuan kan inbiakna chu ka titawp daih a. Ka tisual maithei, mahse, ka ring tawh tlat lo.
.
Hotel ka chhuahsan phawt hi a ngai a ni, hotel tlawm zawk ka dap a ngai a, tin, inhlawhna ka zawn a ngai bawk. Ka tum ang ngawt hian kawng a awlsam dawn lo a ni tih ka hre chiang telh telh a, engvanga Toronto khua kha chhuahsan nge ka nih ka ti vawng vawng hial a ni. Maggie te dawr ka thlen chuan mi an lo thahnem leh hle tawh a, min hmuh chuan a lo nui sak a. Ka nuih let thei lo, ka hmu lo der ta ringawt a. Ka ei tur lam min rawn pek hnu chuan a buai chhunzawm avangin kan inbe lo. Bathlar lam chu ka hawi a, mi che vel hmuh chu ka peih lo a ni.
.
“I zai kan ngaithla dawn em ni ang?”Maggie chuan a rawn tifiam hlut a.
.
“Helai hmun hi ka chhuahsan a ngai dawn a”ka ti chuai raih a.
.
A nui lai chu a tawp a, min ngaihtuah hmel tak hian min en a.
.
“Engtin nge I awm dawn?”a ti a, ka bulah chuan a rawn thu a.
.
“Helai hmun min kawhhmuhtu kha engmah a lo ni lo a, Brooklyn lam a ti leh tawh a, ka ring tawh lo”ka ti a.
.
A chek tlak tlak a.
.
“John, han nghak deuh la hun tha chu a inher mai lo ang maw?”a ti a.
.
“Ka pawisa khawlsa ka hmang zo thei mai dawn”ka tih chuan ngaihtuah thui hmel tak hian min en ran a.
.
“KAwng I zawn chhung chu kan dawrah hian I thawk mai dawn em ni?”a tih chuan ka phu zawk a. Helai hmunah hian waitress hna thawk mai maia ka ngaih a ni a, a dawr a lo ni reng chu ka zak ru khawp mai.
.
“A remchan chuan ka hnial thei hauh lo ang”ka ti a.
.
“Kan nau pakhat hi a thawk thei tawh dawn lo tih tukin lamah min rawn hrilh a, a remchang hlauh a ni mai alawm”a tih chuan ka thaw ve ta huai a, a remchang apiang thawh mai hi tuna ka mamawh a ni tlat si a.

Part II

Maggie dawrah chuan ni tin ka thawk ve ta a, a hranpaa hotel-a awm tawh lo in dawrah chuan ka riak nghal a, a remchang a, a hautak lo bawk a, chu chu tuna ka phak tawk a ni. Nilenga hah hnepa ka thawh thin avangin zan lamah chuan ka mu hle hle ringawt zel a, thu chunga eizawng thin kha tunah chuan mi min kohna apianga kal kual a ngai tawh thung. Nikhat chu khua a nuam loin ruah a sur cherh cherh reng a, min dawrtu pawh an awm mang lo. Maggie pasal hual Nick chu kan inleng awmchhun a ni a, kan inhralh tha dawn hauh lo tih ka hriat chuan pawi ka ti kher mai. Kan eitur siam zozai te chu a tuk atana rin chi a ni dawn si lo a, keima tawka ka rilru a buai viau mai. Chung ka ngaihtuah lai chuan Maggie chuan min rawn ko a, an thutna ka thlen chuan Nick hnenah chuan ka zai thin thu a lo sawi mawlh mawlh a. Nick chuan uluk fe hian min en a, ka zai thin a ni tih chu a awih lo hmel ni berin ka hria.

“Engtik atangin nge I zai tan?”

“Ka hriat theih tirh atangin”

“Eng lam nge I sak ber?”

“Country music hi ka ngaina a, hip hop pawh ka sa tel tho”

A hnar chu a tum dat a, eng emaw ngaihtuah ni awm takin a chil chu a han lem khalh a.

“Min han zai sak ta che”

Teh ngawt chuan! Engvangin nge ka zai ngawt ang? Ka ngaihdan chu a ni vak lo a, ka zai thin tih vang ngawta ka zai sak kher na tur chu ka hre lo a ni. Maggie chu ka han melh zawk a, zai turin min lo mitmei zeuh lo phei se chuan lungawi lo takin chulai chu ka chhuahsan hial ang. Ka guitar dah that chu ka va la chhuak a, phur lutuk lo chuan ka han zai ta a. Ka zai ta chu ka rin aiin ka lo tui a, a tira phur lo zeta ka zai kha a tawp lamah chuan ka lo chhing diar diar tawh. Kut beng thawm ka hriat chuan ka harh chhuak zawk a.

“John, ka awih thei lo, I aw nalh zia kha”Maggie chuan a lo ti chul a.

“Ka lawm e”ka han ti khawmawi ve a.

“Nick hi Brooklyn lama zaithiam zawng chhuak tu pawl a mi a ni tih hrilh ta che ila, engtin nge I awm ang?”a han tih zawm zat a.

Ka meng phawk nghal hra a, engmaw a sawi hi? Engmah sawi thei lo in ka ngawi ta reng a, Nick ka en chuan a lo khi suk a. A duhzawng ka ni lo emaw ni chu aw ka ti hial a, a tir atanga tha taka ka lo zai lo chu ka inchhir hnuhnawh kher mai.

“Tun atanga thlakhatah Brooklyn-ah kan inhmu dawn nia”a ti nghut a.

Ka lawm lutuk chu au chhuah ka duh hial a, mahse, bul tan tur chauh ka ni tih chu ka hrechhuak leh vat a. Ka phei khai chu a zang ta vah vah hle. Nick tlan chhuak tur chu ka thlir zui vang vang a, beiseina thar ka nei leh ta. Maggie chuan ka hnunglam atang chuan min rawn ko a, lawmthu ka hrilh laite chuan a nui hak hak a.

“John, Toronto I awmlaia I zai thin ang khan zai la a tha ang a. Nangma tan pawh a tha dawn riau in ka hria, audition neih hun atan”a han ti a.

“Maggie, a mak ka ti lutuk”ka han ti tawng a.

“I zai thin tih min hrilh ni khan ka nuih a za viau a nih kha, mahse, hman zan khan ka thil hawn tur theihnghilh vangin dawrah ka rawn let a, I lo zai vang vang ka hriat khan nangmahah hian eng emaw danglam bik a awm tih kha kei mimawl mai pawh hian ka hre nghal a. Nick ka be nghal a, I tan kawng a inhawn ngei hi ka beisei tlat a ni”a ti a. Sawi tur ka hre tawh lo, Maggie biangah chuan ka han fawp a. Ka vanneihna chu a lo la bo bik lo e, ka nui ve ta sak a.

Chumi ni atang chuan waiter hna thawk tawh loin dawr kilkhatah chuan ka zai ve tan ta a, music hi tu tan pawh hian hnawksak a ni ngai lo tih a takin a lo lang a, karkhat vel chutia ka zai tlauh tlauh hnu chuan ka zai ngaithla chaka rawn kal an tam ve telh telh a, Maggie tan inhralhna tha tak a lo ni bawk a, kan hlim ve thei hle. KArtawpah phei chuan chawlh hmang paha rawn kal an tam thin hle a, dawr chhung chu a zau lem loh avangin kawt zawlah kan insawn chhuak hial a ni. Nikhat chu chutia ka zai lai chuan kan dawr kawtah motor hi a rawn ding a, ka han hawi chhuah chuan nula pakhat hi a rawn chhuak zan zan a, a hawiher ah chuan mi hausa tak fanu a ni ang tih ka hre nghal. Ka awmna lam a rawn pan lai te chuan khawdang hawi lek loin ka lo en reng a, a nui hmel ka hmuh rual chuan ka hawisawn nghal vat a. Kum eng emaw zat a liam tawh, Jamie kha ka en zui vang vang hmeichhe awmchhun a ni thin, tuna ka hmelhriat ngai loh ka hmuh hma hi chuan. Ka zai zo ka han hawi chhuah leh chuan uar zet hian kut a lo beng a, ka chil chu ka lem khalh a, ka zam thar riau a. Hla dang ka sak leh pawh chuan ka hawichhuak ngam tawh lo, ka zai te chu ka rilru ka pe thei tawh lo, a lai laklawha chawlh te chu ka duh hial a. A tawpah ka sa zo ve thei ta hram a, dawr chhung lamah ka hrawk tih hnawn tumin ka lut a, min rawn zui tih reng ka hre lo. Ka tui in lai chuan ka bul a lo thleng der tawh, a ban a rawn phar chhuak a.

“Hey.. Rose ka nia”a ti a.

A kut a rawn phar chhuah chu ka lo vuan a, ka han chibai ve a, ka  lai kher mai.

“John ka nia”ka tih chuan ka aw chu a tial ruaiin ka hria.

“Oh.. ka hre tawh alawm”a ti a, a nui ta hak a. “Helai hmun ka rawn tlan lai hian I zai ka hre thin a, hun ka neih loh vangin ka rawn ngaithla hman ngai lo a, vawiin chu ka hna thulh meuhin ka rawn kal a nih hi, a hmunah nge nge chuan a nalh lehzual kher mai”a ti a, a nui sang reng a.

“I mi fakna ah chuan ka lawm e”ka ti a. Sawi tur dang ka hre tlat lo.

“Hun I neih chuan lunch kan eidun dawn em ni ang?”a ti a.

Ka han ngaihtuah a, ka chak zia chu phat rual a ni lo, nula hmeltha lutuk main lunch ei pui min sawm a ni a, mahse, kei hi ka che buai ru tlat. Min hrechiang em em tu Maggie chuan min rawn fin vat a, inhmelhriattirna a rawn nei zung zung a, inhmelhriatsa ang maiin an inbe bawrh bawrh a. Ka nakah chuan a rawn nghawk zeuh a, “John, va chhuak rawh u, I free tawh alawm”tih pahin min han siai zeuh a. Kan inzui chhuak chu a ni ve ta der mai. Car khalh pah chuan min be siam siam a, company pakhata a thawh thu te chu tui takin a sawi a, ka lo ngaithla tawp a, chanchin sawi ve chiam tur ka neih loh vang a ni pakhat bawk. A duhna hmun kan thlen chuan a motor chu zei tak mai hian a han her kual a, a park fel hnuah kan chhuak ta a. A mipa zawkin a tih tur ang ang chu aman a ti vek ti ila ka sawisual lo ang. A duhzawng a chah kim hnuah chuan ka lam hawiin a rawn nui sang a.

“Ka hnaah hian ka tui a, chawlh hahdamna hunk a neih ve pawh hian in lamah ka inkhung mai thin. Ka ngainat zawng tak I ni tih sawi nan chuan a la hma mai thei a, mahse, I aw hian min hip thlawt tih erawh ka pha thei lo ang”a ti a.

“Chutiang ang taka fakna chu ka la dawng ngai lo a, ka lawm tak zet e”ka ti a.

“John, kan la inhmu fo thei ang chu tiraw?”a ti a.

“I duh phawt chuan le”ka ti a.

Kan ei tur chah pawh a rawn thleng tawh a, tawng tawh loin kan ei dun malh malh a, hmeichhia in mawina an neih theih zawng zawng hi Rose hian a inbel zo vek ni maiin ka hria, a bula awm chu a ngawl a vei theih dawn hian ka hre bawk.

“Ka va thlah leh ang che, chuan, office lamah ka let leh ang”a ti a.

Kan inzui chhuak ta nghal a, ka ban a rawn vawn chuan ka lo phu deuh zawk a, a nui hak a, nghet tak hian min kai a, hmanhmawh lo fe hian a motor dahna hmun chu kan pan ta a. Dawrah min drop a, office lam panin a kal ta vang vang a, A tlan liam lai chu ka thlir reng a, Maggie-in darthlalang chhung lam atang chuan min lo thlir reng tih ka hre lo. Dawr chhunga ka luh chuan a lo then tha a, ka mitmeng hmangin eng nge chutia min nuih chhan chu ka han zawt a, a dar san ak pah chuan a kalsawn ta daih a. Bathlar lamah chuan ka ding a, ka hun tawn mek vang chuan ka nui ve ta var var a.

Rose nen kan inhriat atanga karhnih a liam leh chuan kan innel hle tawh a, pangngai tak chuan inkawp lo mah ila inti neitu taka min han tih vel chuan keimah pawh inrintawkna min neih tir vat a, ani pawh ka taa siam chu ka tum nghet viau tawh. Kartawp chawlh hmang turin Riverside Park lama hun hmang turin kan inkhalh chhuak a, ka motor khalh vel chu uluk tak hian Rose chuan min en a, a khat tawkin ka biangah a fawp leh zeuh thin. Mi han tihphur vel dan chu a thiam riau a, a kianga awm ka ning thei lo. Kan thlen chuan mi an lo phe suau suau tawh a, keini pahnih pawh inkai rial chuan kan kal kual vel a. Mi zingah chuan ka kianga awm hi ka chhuang ru riau a, nuam pawh ka ti hle. Phul cham dulh hmunah chuan kan han bawk a, engkim mai chu a thiang deuh kak vek a, chu chuan min tihlim zual hian ka hria.

“John.. ka apartment lamah rawn insawn mai rawh”Rose chuan a han ti a.

Ka nui mai a, ka han melh chuan thutak fe hian min lo melh ve reng a.

“A tih chi ber dawn em ni Rose”

“A chi lohna a awm zawk em ni? John, formal deuha relationship neih hi ka duh, nang lah hian I sawi ngai bawk si lo”a ti ta a.

“Rose, hei bak baka formal a awm em ni?”ka ti a, keipawhin kan awmdan hi chin fel tha ka lo ti ve reng reng tawh a, mahse, han fiam hmasak chu ka chak phawt a ni.

“Ka thawhpuite bulah pawh ka bialpa tiin ka introduce thei lo che chu a nih hi”a tih chuan ka chhang tawh lo, a hmui fawh chakawm takah chuan ka fawp ta vawng vawng a. Ka thlah mai dawn a, ka tukhumah vuanin uar leh duhthawh emem hian min rawn fawp a, kan inthlah thei lo. Thaw chham lek lekin kan inen a, kan nui ta hawk hawk a, “Tikhan I bialpa angin min sawi thei taw hang”ka tih chuan min chum taih taih a.

“Karlehah hian Brooklyn lamah audition ti turin ka kal dawn a”

“I awm rei ang em?”min vuan reng chung chuan a ti a.

“Ka hrelo le, ka tla nghal thei ve tho bawk a”ka tih chuan ka awmah a lu a rawn nghat a.

“Tla mahla pawi ka ti lo, ka kiangah awm reng la ka duh”a ti sap a.

“Ka kawng thlan tawh saah chuan hlawhtling ngei ila I ti zawk lo em ni?”ka tih chuan a ngawi reng a.

“Min awm bosan rei ang tih ka hlau alawm”a ti khut a, ka nuih a za hle.

“Chumi hma chuan I rawn insawn phei a ngai ang”thupe aw tak hian a ti a, “Boss thu chu kan hnial ngam nang”ka ti a. A nui thei leh ta.

Tlai thim thak thlengin kan awm a, remchang hmasa berah ka insawn tur thu ka hrilh chuan hlim takin min bawh rawk a, a lehpek hlimna awm thei tawh lo mai tur angin min fawp ta vawng vawng a. Dawr ka thlen chuan light a lo eng riai riai a, Maggie haw daih tawh ka rin nen chutia dawr a lo la eng chu ka ngaih a tha lo zawk khawp mai. Ka tlan lut vat a, kilkhatah hian Maggie chu zu um inchhawp hian a lo thu sawp nuai a, ka hmuh chuan ka pan vat a.

“Maggie”ka sawi deuh nawk nawk a. Meng a riai hian min rawn en a.

“John.. I lo thleng tawh a ni maw?”tih pahin zu chu a han lem leh a, a um chu ka lak sak a. Min chhuhsak tumin a rawn ban ve bawk a, a rui lutuk a engmah a ti thei lo.

“Engati nge hetianga I awm a?”ka ti a.

“Ka hre lo”a ti a, a thle lawp lawp a, han thut that tir ka tum chuan abanin min vai ta chiam a, “Mipa tenawm lutuk”tiin a au ta chiam chiam a. A ngaihna hre lo in ka en ta tawp a.

“Nick misualpa… tenawmpa”tih pah chuan a ban chu a vai leh ta chiam chiam a, ka kuah bet a, reiloteah a chatthla nghal mai a. Mangang zet hian ka pawm a, ka khum lamah ka sawn phei ta a. Ka en reng a, Nick nen an inkar a tha lo tih chu ka hre mai, khua han var se thil awmzia chu ka zawt mai ang tih pahin chhuatah chuan mutna ka siam ve ta nghal a.

Ka harh chuan khua a lo la var lo deuh a, ka mut theih ka rin tawh loh vangin ka tho a, pawnah chuan zial ka zu vang vang a. Inchhunga thawm ka hriat chuan ka tlan lut vat a, Maggie chu pawr hniang hian a lo tho ve tawh a, min hmuh chuan inthlahrun hmel tak hian min nuih a.

“Pawi ka ti lutuk, mu thei lo in ka siam che a nih hmel”a ti a.

“Ka mu nasa lutuk alawm, ka tho ve deuh chiah a ni”ka ti a. “Nick nen in boruak a tha vak lo a ni maw?”ka tih chuan rilru hah hmel tak hian min en a.

“John, ka thinrim lutuk hi ka puakkeh lo chauh a ni. Nick tenawmpa kha zaithiam a promote pakhat nen an chengdun tih ka hrechhuak a, ka a mai dawn hian ka hria”a ti a. Dawhkanah chuan a bawk a, a hmel chu a lang khawngaihthlak kher mai.

“A pawi ka tihpui lutuk che”ka ti a, pawi ka ti tak zet a ni.

“Ka tha veleh mai ang”a ti a, a nui lui sak a, “Nangmah thleng hian I tuar ang tih ka hlau a ni. I va zawng chhuak mai dawn em ni John, I tuar ve ngawt hi ka duh hauh lo”a ti a. Amah vek chuan, “Min rawn tlawh ngam dawn lo tih ka hre si a, a awmna ka hrilh che anga, I bawhzui mai hi a ngai dawn a ni”a ti ta a.

Ka kawng zawh mek chu ka ngaihtuah a, a chang chuan hlawhtling ve mai dawn te hian ka inhre thin a, mahse, a tawp ka thlen hma hian harsatna ka tawk leh thin. Engpawhnise, Rose duhdan anga a hnena ka chen phawt hi a tulin ka hria a ni. Chumi chungchang chu Maggie hnenah ka sawi a, ani pawhin tha a ti a, zai zel tur erawh chuan min duh tih a sawi a, keipawhin bansan ka tum lo.

                        ------------------x----------------------x---------------------

PART III

“John, ka chhuak dawn ania”Rose chu inpeihsa at hian room atangin a rawn chhuak a.

“Fimkhur viau turin ka duh che aw Rose”ka ti a, a nui sak a.

Min kal pel tur chu phal loin a banah ka lo vuan a, ka lamah ka pawt let a, a hmui sen vam ham ah chuan fawh ka han tum a, “John.. ka lipstick”a ti a, a nui har har a. A thusawi chu ngaipawimawh duh loin ka fawp lui a, a tang rei ta bik lo. Ka tukhum sam chu a ham ve tang tang a, sofa ah chuan ka bawhthlu rawp a. A nui har har reng te chuan min tiphur tulh tulh hian ka hria. A awm bawrah ka kut han tawp chat a, thei leh thei lo hian ka kut chu a han la sawn a, “Ka tlai dawn nia”ka bengbulah chuan a ti a, ka thlah ve ta hram a.

“Ka rawn haw hunah lo awm ang che”a ti a, ka lo bu nghat a. Min han fawp leh phawt a, a kal ta nge nge a. Ka nui hak a, hmeichhe duhawm lutuk tak mai nena chen dun chu insum a har telh telh dawn tih ka hre reng.

Room lamah lutin advertisement site a ka thiltih laklawh chu ka chhunzawm a, Nick biak pawh ka ngai tak alawm. Ka phone chu phawrhin Maggie min pek a number chu ka hmetchhuak a, mahse, a tlang thei reng reng lo. Ka thaw halh a, a hmang tawh lo anih vaih chuan kei hian biak ngaihna ka hre dawn lo. A inah pawh chuan risk la in kal pawh ni ila a fuh ber ang em ka hrethiam tawh lo. Rose rawn haw hun nghakin ka nileng hun pawh chu ka hmang zo ve mai a. Room bathlar atanga kawngpui lang thei lai ka thlir chuan Rose pawh a rawn inkhalh phei delh delh a, a hmel phur sarh reng chu hmuhnawm ka ti tawp thei lo.

“Vawiinah Nick biak pawh tumin ka bei a, ka hlawhchham a”mut hmunah chuan ka han ti a.

“John, I hmanhmawh lutuk a ni lo maw? Kartawp lamah chawlh hman pahin Brooklyn lamah chuan kan kal thei alawm”a ti a.

A chalah chuan ka fawp a, hetia Rose kianga engmah ti ve lo a awm reng chu a inthlahrunawm duh dawn hlein ka hria a, chuvanga hmanhmawh viau pawh chu ka ni.

“John..”

“Um..”

“Lar viau pawh chu eng nge a tangkai na?”a ti phawng a.

“Rose, ka thiam thil neih ve awmchhun chu zai chauh a ni a, hlawhtlin tumin ka bei chauh a lawm”ka ti a, a bu nghat a.

“Nilengin hnaah buai reng rengin ka awm a, ka rawn haw hi chuan rilru hahdam ka duh ania”a ti nghat a.

“Ok. A pawi hleinem”ka tih chuan ka lam hawiin a rawn inlet a, “I thinrim turin ka sawi lo aw duhtak”a ti a. A sam chu ka chul a, min rawn hnaih a, min rawn fawp a. Ka chhan let loh avang chuan mak ti deuh tak hian min thlek ha a, “I pawi ka sawi em ni?”a ti sap a. Ka kuah ta hle hle a, ka awmah a hmai a phum kak a, “Rose, ka mutna tur va siam teh”ka ti ta daih a.

“Ka bula mut I hreh riau chhan hi ka hre thei em?”a tih chuan ka lo nui mai a. “Ka thutak hle ania”a tih chuan chiang zet hian min melh kal a.

“Ka insum theih loh ka hlau a”ka tih chuan a nui chhuak ta hawk hawk a.

“John, I ta ka ni alawm”a ti a, nghet tak hian min chelh a, min chul kual ruai a. Ka mamawh tluk zet hian min mamawh ve tih ka hai lo, a inchhirna tur thil tih ka duh loh vang chauha insum ka ni. Ka ta a ni tih chiang takin a sawi a, a bak chu kan pahnih chanpual liau liau a ni tawh. Chumi zan atang chuan kan pahnihin khawvel thar kan din a, a chhungah chuan kei leh Rose chiah kan cheng.

Ni chhuak chuan Rose hmai a rawn chhun chuan ka kutin ka lo hliah vat a, ka angchhunga thlamuang taka mu siai siai chu hmuhnawm ti takin ka thlir reng a, a biangah chuan ka han fawp zeuh a. A rawn che tial tial a, min hmuh chuan a nui sak a, hetiang taka hmeichhe duhawm ka tan an awm ka rin theih loh kha a tak ngeiin ka kiangah a awm si a.

“Ka inbual dawn asin”ka tih chuan a lu chu a dah sawn a, bathroom lam chu ka pan san ta a.

Ka chhuah leh meuh chuan Rose chu a lo mu tawh lo, choka lamah ka phei a, breakfast a siam mek tih ka hmuh chuan ka va nuih a, a rawn nui ve var var a. Ka pan phei a, a kiang ka thlen chuan kekawr ha lo in kamis fual deuh chiah a lo ha a, a mal nalh tak ka hmuh chuan ka thlek dauh dauh a, “Zingkar atangin I ngaihtuahna a tha lo”a ti a, za zet hian ka nui ta hawk hawk a.

“Vawiin chu Maggie dawr lamah kal ka tum a”ka ti a.

“A tha alawm, a ninawm ve ang mahni chauha helaia lo awm chu”a ti ve mai a.

A insiam chhung chuan ka lo en reng a, engkim mai hi a inhmeh vek ni berin ka hria.  A duhtawka a inchei zawh chuan office lam panin min chhuahsan leh ta. Ka thlir zui vang vang a, mipa dang lakah ka chan mai ang tih hlauhthawnna chu ka nei thar ta thut a, hlim taka ka siam hi a pawimawh ber tur a ni. Maggie dawr lam panin muangchangin ka chhuak a, ral atang chuan ka han thlir phawt a. A hmelah chuan rilru na hmel lutuk ka hmuh loh avangin ka thawveng deuh hawk a, ka pan ta zel a. Min hmuh chuan a lo nui sang a, ka guitar ka han tung tha a, in tur chu ka lam a, rang takin min rawn pe vat a.

“John, I vang ta raih alawm, Rose chuan a duat bawk che a niang maw?”tiin min han fiam a.

“Nick kha ka be thei miah lo a”katih chuan a hmel chu a dur deuhin ka hria, a inthunun leh vat a.

“A thlak tawh a ni maithei, a address ka pek tawh che kha I lo bawhzui mai dawn em niang?”a ti a.

“Ni e, Rose nen kan lo tumdan chuan tunkar tawp hian kal kan rilruk a”ka ti a. Nick chungchang sawi nuam a ti lo tih hriain thildang ka sawi pui ta daih a.

Ka guitar chu la in ka hla thar chu ka han sa a, thil ti thei lo lekin Maggie chuan min en a, a ngaithla a, “A hnar tu che chuan a hlawkna tur a hnar a ni ang”ti hialin min fak ve a, ka lawm ve hle. Rose rawn haw huna ina lo awm ngei tumin muangchang tawh loin ka haw ve ta a.

x-------------------x--------------------

*BROOKLYN, NEW YORK*

Darkar chanve chuang kan tlan par par hnuah Brooklyn chu kan thleng a, 669 Avenue kan thlen chuan Nick awmna tur nia ka rin lamah motor chu ka han kual tir a, tuemaw ber chuan an hre tur a ni. Mi pathum vel kan zawh hnuah Nick awmna hmun chu kan hre thei ta, ka kut chu a thlan dap a, ka zam a ni ngei ang. Chutia a rin loh taka ka hmu thut chu a beisei loh tawp thil a ni tih ka hria, thu turin min han ti a. A in thlang lam chu music zirna hmun tih ka hre nghal mai a, a lian tawk hle tih pawh ka hria.

“Nick, I thusawi bawhzui khan kan rawn kal tawp anih hi”ka ti a, uluk fein Rose a lo melh tih ka hriat chuan ka thusawi chu sawi zawm pawh ka chak lo.

“John, khami chungchang kha Margareth hnenah chiang takin ka sawi kha, kumin ah chuan engmah ka ti thei tawh lo”a ti a. “Mahse, I duh anih chuan ka hnenah kumin chhung chu I thawk thei ang”a ti ta daih a.

“Maggie chuan min hrilh hauh lo mai”ka ti a.

“Mi laktlak lo tak ni miau hek”a tih chuan ka thutna atangin ka tho a, “Chutiang chuan I sawi thei lo ang”ka ti a. Rose chuan min pawt thu a, a laktlak loh zawk chu amah hi a ni.

“X-Factor a inlan I duh anih ngawt loh chuan kawhhmuh theih che ka nei tawh lo, chu lah chu nakum kumtirah chauh a ni dawn lehgnghal”a ti a.

Rose chu ka kai sawk sawk a, he hmun hi chhuahsan vat ka duh.

“I inchhir lo ang maw John Wheatley”a han ti hram a.

“Nangmah I nih vang hrim hrimin ka hnar zawk mai ang e”ka ti a, a nui a, a nui ri ah chuan elsenna a tel.

“John, tha taka mi dawr hi I thiam lo em ni?”Rose chuan ka vawnna paih thlak pah chuan a ti a. “Khatiang anih chuan tumah I dawr thei lo ang”a han ti leh a.

Ka ngaihtuah chiang a,  a dik hlein ka hria. Ka induh tawkna hi tuna tan a tangkai lo mai ni loin ka kawng tihnawktu a ni tih hrechiang tur ka ni asin. Ka tukhum chu ka dawm vang vang a, inthunun theihna ka tlakchham zia ka hrechhuak rum rum bawk.

“Khatianga a melh che kha ka duh lo”ka han ti a.

Za lo takin Rose chu a nui a, “John, i kawng hai kuak sa tawh I hnawh phu zelte chuan engtikah nge I hlawhtlin ang?”a ti a. Car chahbi chu min laksak a, a lut ta daih a. Ngawi rengin ka zui a, kawngtluanin kan inbe tawh lo.

In kan thlen hnu pawh chuan kan inbe lo, Rose chu room-ah a lut tlang a, keipawh ka room ka pan a, ka mut lohna a rei tawh bawk a, a lo hnawk niai mai, Ka han thian sawk sawk a, khumah chuan ka han bawk thlawp a. Rose sawi kha a dik chiah, kei hi hlawhtling ve chi ka ni lo. Room kawngka chu a rawn inhawng a, Rose chu tim deuh hlek hian a rawn lut a.

“John, ka tawng na mah mahin ka hria, min ngaidam dawn nia”a ti a.

“Sawi dik loh I nei hleinem”ka lo ti a.

“Khatianga ti tur che kha ka ni lo tih ka hria alawm, thutlukna I siam apiang chiang takin I ngaihtuah ang tih ka hria”a ti a. Ka chhang tawh lo. Min rawn pan hnai a, ka mutna bulah chuan a rawn thu a, “Ka tihpalh tak zet”a ti a. Ka pawt thut a, a inring lo hle ni tur a ni, a rawn let thla tawp a, “John”tih pahin min chum taih taih a. A kut chu man betin ka bulah chuan ka mut tir a.

“Rose, Nick bulah khan ngaihdam ka dil mai dawn em ni?”ka ti a.

“I thu thu  a ni mai, kei chuan a hnena I thawh leh thawh loh ah khan pawi tihna ka nei lo. Hmundangah pawh engvangin nge I zawn mail oh ang?”a ti a. Kan inen a, kan nui dun leh thei ta.

                                                                  x----------------x----------------x

Maggie dawra zai chu ka chhunzawm leh ta a, kawng dang hre miau rih hek lo le. Nikhat chu thlai leh eng ilo lei turin Maggie nen chuan kan chhuak a, kan haw lamah tum loh deuhin Rose motor ka hmu a, chiang takin ka en a, a ta ngei a ni. Tun ang huna office-a awm loa a chhuah nachhan tur ang ka ngaihtuah a, ka hre tlat lo. Maggie chu hlim tak hian a titi siam siam reng a, ka rilru la pengtu thil chu a hmu ve lo tih ka hria. Dawra kan let leh hnu chuan chhuanlam siamin ka haw san ta vat a, ka rilru takah chuan tunhnaia Rose khawsa zia ka chik ruk viau chu sim ka duh a. Mahse, vawiina ka thil hmuh vang a ni mahna, a aia chik lehzual chu ka duh a ni. Ka rin ang ngeiin a rawn haw tlai leh viau mai a, ka room lamah guitar ka perh a, a thawm chu ka hre reng a, min koh lem loh avangin ka uk sak bik lo. A reh rei tak deuh avangin ka chhuak a, room atangin a lo la chhuak lo tih hriain ka pan phei a, phone a lo hmang mek tih ka hmuh chuan thawm ka nei duh lem lo. A rawn hawia min hmuh chuan a phu nasa hle a, a awm chu a dawm hial a. A biak mek hnenah chuan a biak leh vat tur thu sawiin an inbiakna chu a titawp ta zung zung a.

“John, I la haw lo emaw ka ti a”a ti a.

“Ka haw daih tawh alawm”tha takin ka ti mai a.

“Dinner ka rawn ei tawh ania aw”a tih chuan ka lo bu nghat a. “I ei ve tawh em? Ka siam sak dawn che em ni?”a ti zung zung a.

“Maggie nen kan ei dun a”ka ti ta ringawt a.

“Ok. Anih chuan a tha hlauh anih chu”a ti a, min rawn pan hnai a, min rawn fawp a.

Nghet tak hian ka kuah a, a laka thinrim ka chak rualin ka chan mai ang tih hlauhna avangin ka thinrim ngam der lo. Min kuah let a, min ngai ber awm ang tak chuan min thlah phal lo. Kan duh takte lakah chuan kan lo nem hma hle hi a lo ni a, ka thinrim rukna te chu a kiang leh nghal vek, inbual tura min chhuahsan thleng chuan ka thlir zui vang vang a.