SOME BROKEN HEARTS NEVER MEND Part II

SOME BROKEN HEARTS NEVER MEND

-Mami Lalhmangaihzuali Chawngthu

Zotei nen kan khawvel kha eng nen mah thleng ka phal ngai lo, hmeichhe nun nem tak, mi pawisawi hlau tak anih avang hian a nun hian min hneh em em a, kei lah mahni tawka chapo ve tak ka ni bawk nen min hau ve fo thin. Kan veng chhungah kan inngaizawng tih hre lo an awm lo ang tih tur khawpin kan inzui nasa ve a, kan chhungte hriatpuina thlap a ni bawk a, tu mitmei mah ven a ngai lo. Chutihrualin mi mit kham zawnga awm erawh kan tum bik lo a, naupang te kan la nih bawk avangin mawi lo taka nun kha kan tum lo bur a ni. Zotei te inah tlangnel taka ka len theih avangin pawn lamah lenchhuaha han tal hran kan nei tam lo a, inah kan inkawm mai thin. An ina chaw ei mai te kha ka tih than tak pakhat a ni a, kan in lamah erawh ka tih luih ngial tumin a rawn leng ngam ve chauh thin. Naupanlai atanga inkawma inlen pawh reng kan nih avangin ka chhungte a nel em em a, mahse, thil mawi lo hma tak anih avangin a rawn kan zen zen ngai lo. Pawl sawm pahnih kan nih kumin Zotei chu a pa in nat lawk pawh awm loin a thihsan thut mai a, kan mangang a, kan chiai tlang kher mai. Thawklehkhata fahrah dinhmuna an han ding thut chuan a nun chu engemaw chenah a thlak ve hle a, mi zum zuk leh khaw eng ngam lo tak thin kha a ko ah engkim a tlak tak avangin a nundan chu nasa takin a inthlak ti ila ka sawi sual lo ang. Hei hian Zotei chu hmeichhe zak thei lo takah a chhuak ta tihna a ni lo a, engkim a hmaa awm ang chu sun gam turin huaisenna a nei zawk a ni. A pa thihna in a nghawng na bawk a, pawl sawm pahnih chu a pass zo ve ta lo. College lamah ni tin ka liam a, ani pawh ka thuawihin pawl sawm pahnih chu a kal nawn leh a, bike ka neih ve tak avangin a school kal tur hi harsatna ka neih loh chuan ka thlah ziah thin. Tlai lamah erawh kan ban hun a inan loh avangin mahni remchan danin a haw mai thin. Nikhat chu ka nu dawrah ka kawi avangin ka haw hma lo hle mai a, kan veng peng kan thlen chuan Zotei ang deuh chu bike in an rawn phur ka hmu a, ka tlan leh mai tur chu ka ngaih a tha thei lo. Biak in bulah a chhuk ka hmuh chuan ka en reng a, amah ngei a ni. A phur tu chu ka lo nghak ran a, a rawn tlan chho ta ngei a, ka zawn a thlen chuan a hmel hmuh tumin ka lo en a, mahse a tlan chak deuh avang leh full-face helmet a khum avangin ka hmu thei ta lo. Zotei chu ka um zui nghal a, a bul ka thlen chuan ka ding a, tim dai hian min en in ka hria.

“I va bang tlai ve”ka ti nghal tawng a.

“Nia. Kan stayback a”a ti ve mai a.

“Tunge rawn thlah tu che kha?”ka tih chuan min melh deuh kawk a.

“Sir Thatea”a ti zawi sap a.

Ka ngaihdan a ni lo kher mai, bike ah chuang turin ka ti a, a rawn chuang chu nidang a ang lo, min vuan deuh de de ngam chauh a, chu chuan ka thin a tirim zual a, ka inthunun theih nan ka tawngtai hial a! An in kan thlen chuan a chhuk a, engmah sawi tawh loin ka tlan nghal daih a, in ka thlen chuan ka inthlahdul ve thei chiah. Ka inbual fai a, ka rilru chu tih fim hram hram ka duh a, zanah pawh ka leng chho peih ta lo. Dar 9 velah sms ka dawng a.

*Hruai, ka tihpalh aw. Sir khan ka thlah ang che a ti lui tlat sia ka hnial ngam loa*

Zotei hnen atanga ka dawn chu ka chhiar a, tlemin ka thinrim chu a reh deuh, mahse, ka chhang let duh lo. A hnu lawkah a rawn thawn leh a.

*Ka nghak char2 che a, I rawn len ka rin tehlul nen.. muttui*

Chu message ka hmuh chuan ka insum zo ta lo a, ka han call leh ta nge nge a.

Zotei lakah hian rei tak ka thinrim thei ngai lo reng a ni, ka chhungte tv en chuan pawnah ka chhuak tih pawh an hre lo a ni ang, tumah in ka kalna tur min zawt lo, nge an hre lutuk zawk. An verandah thim lai ah chuan a lo thu reng a, min hmuh chuan a tho tharh a, a bul ka thlen chuan min lo kuah nghal chat a.

“Ka rilru a hah hman lutuk a, min ngei emaw ka ti a”a lo ti siam siam a.

“Ngei deuh e”ka tih chuan a nui hak a. Ka hmuiah a rawn fawp a.

“Tikhan a reh tawh em?”a han ti zui nghal zat a, ka nui hmel a hmuh chuan hahdam huai hmel hi a pu ta a.

Rei awmna chi a nih tawh loh avangin ka haw san a, ka liam hma chuan min thlir reng a. Kawng kawi ka thlen chuan ka hawi let a, a ban a lo vai lauh lauh a, ka han vai let ve a, kumhnih chuang zet inkawp tawh mah ila kan in ning lo a, kan inhmangaihna a zual zel a nih ber. Ka mut hnuah sms in ka han mangtha a.

*Him takin I thleng tih ka hria a, ka mu ve thei ta e* a rawn ti a, ka nui sak a, mumanga hmuh zawm tum takin rizai chu ka inkhuh tha sauh sauh a, ka muhil ta siai siai a.

-----------------------x----------------------------x------------------------------

Ka office bang chu Awmawmi te nufa chu kan inah an lo awm a, a fanu pawh a birthday zawh atang khan a lo nikhua sawt hian ka hria a, inthlak pawh inthlak loin ka pawm a. Kan naute hmuh hmasak ber anih avang hian kan duat rawn a, a pa lamah an hmuh hmasak a lo nit el bawk nen duat a hlawh ve hle. Ka fa kha lo dam nise engtinnge tunah te hian a awm ang tih chu ka ngaihtuahnaah a rawn lut thut a, ka lu chu han thing a, engmah ngaihtuah chhuah ka duh lo. Kan unau pahnih chauh kan nih vang hian a chang chuan a hrehawm thei hle a, chuvang chuan ka nau hnenah pawh fa tam tak nei turin ka hrilh fo thin.

“Mama, U Zotei nen in inhmu tawh em?”a ti a.

“Bawihtei birthday lawmnaah ka hmuh kha”engah mah ngai lo ni awm tak chuan ka han ti puat a.

“Ka tih awmzia chu in inbe tawh em?”a han ti leh a, ka lu chu ka lo thing mai a.

“U Thara hian a dem ve ziah che a”a tih chuan ka nui suk ringawt a. Thara chu Awmawmi pasal a ni a, Zotei first cousin a ni.

“A awm lutuk alawm, Mate, engahmah ngai suh”ka ti a.

“Nang pawh hi I dik bik lo a ni ngei ngei ang”a ti a, a nur deuh nang a.

“I ho em mai, hun kal tawh an sawi chhuak fo ngai lo”ka tih chuan a ngawi ve ta mai a.

Ka han ngaihtuah let hian Thara hnenah Zotei hian engemaw tak sawi a nei a nih ka ring ta khawp mai a, an cousin te ro roah Thara hi a close ve ber a ni tih ka hria, kan inthen dan chungchangah khan heilh a nei ngei ang tih chu ka ring thiam mai. Mahse, chung chu ngaihtuah loh ka duh zawk, engtikah mah Zotei nen hian kan inkar hi a tha tawh dawn lo a, chu mai ni loin pasal fanau hial a nei tawh ania, min hmangaih tawk lohzia a lang reng a, eng nge hriat belh tur awm chuang ang? Chaw kan ei lai chuan Nu Kimi’n ka nu a rawn phone a, ka nu hi nurse pension anih vangin kan veng ho hi chuan damloh nikhua hian rawn berah an nei ve thin. Nu Kimi pawh chuan Zotei fapa nawmsam loh vangin ka nu chu a rawn rawn hi a lo ni a, a chawei lai dah meuhin damdawi an han inchawh a, a rawn ei leh meuh chuan ka lo kham fel der tawh. 

“Mama, kan inkhawm dawn nia, banah I nu Kimi te inah kan rawn dak kawi ang”ka nu chuan a ti a.

“Mi pawh rawn hma hmain thutlukna hi I siam fel der mai zel a”ka pa chuan a lo ti a.

An pahnih chuan an nui dun ta hawk hawk a. Ka nu leh pa ang bawka nupa hlim tak nih kha kan chak ber a ni thin, ka thinlungah hian kan thutiam tam tak kan tihpuitlin tak loh kha a rawn lang leh uai uai a, kum tam tak ka hriatchhuah tawh loh te nen lam ka rilruah a rawn lang ta zawih zawih a.

------------------------------x----------------------x---------------------------------

Zotei te exam zawh tlai chuan ruah a sur deuh sang sang a, class ka kal loh avangin a exam zawh hun awmah amah lam tur chuan ka kal a, canteen-ah ka lo nghak a, kan luh laia a nghaktute an la nih avangin keipawh chu ka tlangnel ve a, duh duha kan awm ngam ve na hmun a ni. An nula chhawr Thartei chu a titi siam siam reng a. Zotei luck zia te chu a sawi a, a nui ar ar a.

“Sir Thatea hian a beisei tlatin ka hria, finkhur hle rawh”a tih chuan ka ngawi ngal a.

A hmaa Zotei thlahtu kha a ni tih ka hria a, ka thin chu a rim dawn lo zet na a chutianga ka tana hnawksak an awm chu ka duh lo. Thartei bawk chuan thingpui min pek pah chuan Sir Thatea chu nula mi tak anih thute chu a sawi kai ta zel a, chu chuan mi tihlauthawng ve ta deuh. Zotei chu zum deuh dak hian a rawn lut a, min hmuh chuan a nui ver ver a, a duhawm tak zet a ni. Kan haw kawngah chuan ka tawng tlem khawp mai, ani chu a tawng bawrh bawrh a, a tih that loh thute chu a sawi a, ka lo ngaihsak tehchiam lo. Ka rilruin thildang daih ka ngaihtuah a, Zotei hi ka chan ang tih ka hlau a ni. An in kan thlen chuan leng lut turin min sawm a, ka bike chu hung thain kan inzui lut a. An inah chuan tumah an lo awm lo, a nu chu a han ko a, tumah chuan an chhang thei lo. Sitting roomah ka awm a, ani room lamah inthlak turin a kal a. Ka rilruah engemaw hi a rawn lut thut a, Zotei roomah chuan ka lut a. Min hmuh chuan a phu zawk a, a kamis a lo phelh mek chuan a inhliah tat tat a. A kamis chu ka lak sak a, chiang zet hian ka en reng a. A zak tih hriat tak hian a kimki deuh chaih chaih a. A khabeah chuan ka han kuai dak a, ka fawp vawng vawng a, a tirah chuan inveng deuh tak hian a awm deuh run a, mahse tha ka thlah duh lo. Kan infawp rei tial tial a, kan inthlah phal meuh lo. A khumah chuan ka nam thlu a, ka kut chu a hlei telh telh a, a kawrhnuai phelh ka tum lai chuan min nam sawm thut a, a thu chhuak ta hlawl a. A kut chu a khur der der a, ka mut ngai chuan ka mu reng a, ka chesawn duh lo.

“Hruai, lo va phei rawh. Ka inthlak anga ka rawn chhuak nghal ang”a ti a.

Ngawi rengin ka tho a, ka chhuak a. Room atanga a rawn chhuah lai pawh chuan ka lo melh duh lo. Ka bulah a rawn thu a, ka lungawi lo tih chu a hai lo. Min biak dan phet a ngaihtuah a, a rul tawkin ka chhang let a.

“Hruai, tinge khatia I awm tlat a?” a tih chuan ka chhang lo. “Kan insum thei lo ang tih a hlauhawm alawm, ka dan loh che chuan kan thleng thui dawn asin”a han ti leh a.

“Eng nge pawi?”ka ti hmuk a.

“Maw?”

“A pawina a awm em ni? Kan inkawp rei ve tawh tho a”ka tih chuan mak tih hmel deuh hian min en a.

“A hun hmaa khatianga kan awm chuan a tha lo asin. NAkinah kan inneih hunah zawk le”a ti dam diai a.

“Zote, midang hi an inrawlh ka hlau alawm. Ka ta ni la, rilru hahdam deuhin awm ila ka duh ber tawh”ka tih chuan min rawn thuthnaih sauh a. Min kuah a, ka awmah chuan a han bei a.

“I ta chauh ka ni alawm, tumah midang hi kan inkara an inrawlh ka remti teuh lo mai. Ka hmangaih che alawm”a ti a.

Chawpchilh hian ka lungawi nghal mai, ka kuah a, a samin a hmai a hliah chu duh lo in ka han hui kiang a, a hmui fawh chakawm takah chuan ka han fawp a, min chhang tha deuh kher mai. Khami ni atang khan kan inpawh zual hian ka hria, Zotei pawh hian min hmangaih ve tak zet ni hian ka hria.

An exam zo an chawlh chhungin beautician a training a, chutiang chuan hlim takin kan hun kha kan hmang ve thin. Zotei chu an chhungkaw tan a pawimawh em em a, a pa awm loh hnu phei chuan fa upa ber anih avangin a mawhphurhna pawh a lian tih ka hria, chuvangin kei hian tha taka lehkha zir a, Zotei chhungte tan pawha makpa tha tak ni thei tura ka beih hi a ngai a ni tih hriain hlimhlawp bawlna ah ka hun ka khawhral ngai lo. Kei chu ka nu leh pa zarah ka mamawh engkim ka nei thei a, kan hma hunah nuam taka awm thei tura ka nu leh pa awm laia ka in hai kuak hi a ngai tih hriain ka zirna kawngah pawh thahnem ka ngai hle thin.

Zotei pawh pawl sawm pahnih chu a pass a, a chhungten college kal zawm tura an tih pawh chuan a rilruk lem loh thu sawiin parlour a thawha, amaha dawr hawn a duh thu a sawi mai thin. A pa u chuan a duh phawt chuan bul rawn tan sak a inhuam bawk a, a nu te pawh chuan an hnial duh ta lo. Keipawh min rawn ve tho a, a duhdan chu tha ka tih thu ka hrilh a, rilru nuam deuhin awm se ka duh a ni. Amah a felin a hmel a tha a, a kalna tur kawng tak a zawhte pawh a ni ang, a tluang hle lehnghal a, a tum aia hmaah dawr pawh a hawng thei ta mai reng a, ka class banah a dawrah kawi loin ka awm ngai lo. A hnena training lai leh thawk chhunzawm ta an awm ve nial a, hmeichhe rual an ni bawk a, a dawrah chuan an nui nasa thei hle. Keipawh min nel ve hlawm hlea, min chhaih a, an nui dar dar thin.

Kar loah keipawhin college ka zo ve der a, ka rilru takah chuan Zotei nen inneih mai te ka duh rum rum thin. Mahse, a chhungte tan ei a tling ve chauh a, chutia kan inneih daih chuan keiin hna ka la nei bawk si lo a, tih chi ah ka ngai lo a ni. Ama hnenah erawh ka sawi fo thin, hna ka neih veleh inneih ka duh thu chu. A nui mai zel a, a chang chuan a thutak lo hian ka hria a, kan inhauh phah ve fo thin. Mahse, a puitling zawk a ni bawk a, kan inkar buaina chu a siamtha tuah a tang zel thin. Kan inngaihzawn atanga kum 6 hmel kan hmuh ve meuh chuan puitling tia sawi theih kan ni ve tan der tawh. Khang hun chhung zawng khan buaina kan nei ngai lo a ni bik lo a, vawi tam takah kan inhau a, kan in ti thiam lo ve thin. A chang chuan karkhat dawn te kan inbe lo a, chutiang chuan kan awm ve thin. Mahse, chutiang hunah pawh chuan rilru dang kan pu ngai lo a, kan inhmangaihna avangin kan tihsualah pawh kan inngaidam tawn zel thin.

-------------------------x-------------------------------x-----------------------------

“I va inngaihtuah nasa vung vung ve”

Rotea chu a rawn luh lai reng reng ka lo hre lo. A nui tak ang vur vur a.

“Vawiin tlai chu kan ti tan leh tawh dawn em ni?”a han ti a, ka ke ruh nat vangin hun rei tak badminton khelh ka chawlhsan tawh a, min sawm thar leh a ni.

“Ka infit lo lutuk em mai”ka ti a.

“I fit chho leh dawn alawm, I ti lo laklawh leh ang e”a ti a, “Upat lamah hian insawizawi that loh chuan nupui neih hunah a pawi thei ania”a tia, a nui hak hak a.

“Kan tum dawn nia”ka ti a, min chhuahsan ta a. Ka dawkana file chu ka han khawih chhunzawm a. 

Ka ngaihtuah a, engmah hi han tih chak em em pawh hi ka nei lo, ka taksa leh ka ngaihtuahna hi a ro hulh a ni ber hian ka hria. Ka phone chu ka phawrh a, hun rei tak ka biak tawh loh Thartei, kan school kal laia canteen nghaktu chu ka han bia a, tlaiah hmuh ka duh thu ka hrilh chuan a lo inhawng khawp mai. Ka bansan tawh leh hnuchhawn tawh ah khan engtia rei nge ka let leh ngai dawn ka hre lo, mahse, ka tifel hmasa a nih loh chuan kei hian kawng dang reng ka pen thei dawn lo tih ka hre si, huphurh takin ka thinlung dam theihna tur hi ka tih a ngai a ni.

Ka inthlak zawh chuan badminton khel turin hall lam ka pan a, ka thlen chuan an lo tam angreng khawp mai a, Rotea hmel chu ka han zawng deuh a, ka hmu mai lo. Ka phone phawrh ka tum chuan ka lo ak miah lo hi a lo ni a, thildang ti ta lo chuan Thartei hmu turin an in lam chu ka pan ta vang vang a. Ka thlen chuan a fanu a lo bual mek a, lo thu hahchawl turin min ti a, an sitting roomah tv en pahin ka lo nghak a. A zawh fel hnu chuan ka ep zawngin a rawn thu a.

“Kum tam a liam tawh hnu hian ka thusawi ngaithla turin I rawn kal duh ta ania, eng rilru nge I put?”a ti a. A nui lui deuh sang a.

“Tharte, engkim khatih hunlaia thil thleng kha I hriat apiang kha min hrilh turin ka duh che”ka ti a.

“Hruaia, I thinlung a thar mai mai, theihnghilh tawh rawh. Zotei pawhin pasal fanau a nei tawh a, hetianga la awm reng bik chu an nuihte pawh I ti za mai tur asin”a ti a.

“Zotei nen kan inan lohna tak chu ani chuan awlsam takin min kalsan thei a, kei chuan ka thei ve tlat lo hi a nia, chu chu tun thlenga hetia ka awm chhan pawh hi a ni asin”ka ti a.

A thaw hak chu ka hria, ka va melh a, inngaihtuah muk hmel tak hian khawdang a lo hawi daih a.