SOME BROKEN HEARTS NEVER MEND Part III

SOME BROKEN HEARTS NEVER MEND PART- III

-Mami Lalhmangaihzuali Chawngthu

Ka graduate ve takah chuan hmachhawp hrang hrangte ka han nei ve bawk a, keimah maia thutlukna han siam erawh ka thiam chiah lo. Ka pa chuan Delhi lamah hawi zau paha MA kal turin min duh thu a sawi a, ka nu erawh chuan hmundanga awm hi a remti lutuk lo thung. Kan unau pahnih chauh kan nih avang hian han awmbo hi a ti vak thin lo a, chutihrual chuan ka pa thu erawh a hnial duh lo. In lama hna ka thawh zawh hnu chuan Zotei dawr lam pan chuan ka inkhalh chhuak a, ka buai ve deuh avangin ka kal hman loh chang a tam ve ta a, zan lamah pawh ka lut tam lo. Chhunah a hah ve tih ka hriat avangin zan lama rei tak han men leh chu amah ka khawngaih a, ka inthiarfihlim deuh a ni. A dawr ka va thlen chuan costomer an lo nei nual a, amah pawh a lo awl bik lo. Min hmuh chuan min lo nuih sak a, a seat awlah chuan thu turin min ti a, keipawh engmah sawi lo in ka thu ve mai a. Ka phone chu phawrhin ka online san a, nidang aiin Zotei chu ka hmu cher deuhin ka hria, a hah lutuk a ni ang tih chu ka hlau. A khawih lai a zawh chuan ka bulah chuan a rawn thu a, kuhva min dil a, amah pawh en lem loin ka pe mai a.

“Min va ngaihsak lo tak”zawi sap hian a ti a.

Ka en vat a, a hmel chu a lo nur deuh nang a, ka han siai zeuh a.

“Vawiin tlai chu in khar hma mai la”ka ti a.

“Engvang ngawt chuan maw?”a ti deuh ha a.

“A chhan chu haw hma la kaduh a”ka tih chuan a ngaihna a hriat hmel lo hle.

“Sam pawh tur ka nei asin, a rawn thlen tep tawh ka ring a”a ti a, “Kan zo har leh awm si a”a han tih zawm leh a.

Ka ngawi reng a, ka chhang tawh lo. Midangin an biak buai avangin a kalsawn a, tukverh lam chu hawiin ka dak voh voh a. Kan inngaihzawnna hi ngaiah kan nei deuh tawh em ni ka ti rilru melh melh a. Ka zirlai hi lo chhunzawm ta ni ila, Zotei hi ka hmuh phak loha awm tur hi chuan ka ngaingam meuh lo chu a ni. Amah a rinawm loh leh a lepler tihna lam a ni lo a, amah hian a lo zir bawk a, be tha tu a ngah tih ka hre ve reng a, ngaihngam taka awm chu a har dawn hle a ni. Ka tho uai a, a tawng lai chu a tawp chat a, ka chhuak tur chu min zui a.

“Thingpui pawh I la in si lo a, I va hmanhmawh ve”a ti a. A dawr kawtah chuan kan ding a.

“Eng emaw han sawipui che ka duh deuh a, a rem rih lo ni mai rawh se”ka ti a.

“I mak e tunlai I awmdan hi”a ti a, keimah zawk hian sawi tur ka ni asin.

“Mak hran lo e, ka va phei phawt ang e”ka ti a, helmet chu ka khum a, bike a ka lawn hma chuan ka banah chuan a lo chelh a.

“Eng nge lungawi lohna I nei em ni?”a ti raih a.

“Chutiang ka nei hran lo, mahse, I hna hian I lak atang hian min pawt hla telh telh hian ka hria”ka ti a.

“Hruai, I remtihna ngeia he thil hi ti ka nih kha, engmah I laka min ti hla tur khawp hian pawimawh a awm lo”a ti a.

Ka thinlung chu chawp leh chilh hian a nep nghal vek,  a ban chu ka hmer salh a.

“Zanah ka rawn kal ang”ka ti a, a bu nghat a.

Ka tlan liam dawn thleng chuan min la thlir zui tih side glass atang chuan ka va hmu a, ka nui sak a.

Delhi lamah ka awm dawn tih Zotei’n a hriat chuan a ngui ve lap a, keimah ang bawkin awm hran chu a hreh a ni tih ka hria, kan pahnih tan vek a ni tih a hriatna vang chauhin ka kal chu a remti a. Ka theih ang angin online in admission te chu ka buaipui ve nawk nawk a. Ka tihfel meuh chuan thla khat awrh chauh chawlh hun ka nei dawn ta, ka kal anga, ka awm bo ve vang vang tawh dawn a ni. Kan hun neih ang ang chu am taka hman kan duh a, ni tin dawr lamah ka hmel hmuh tur a awm a, kan haw rual a, zanah ka leng chhunzawm leh nghal mai thin. Mite pawhin mawi lo leh awm lo an ti hial ang tih tur khawpin kan han inngaizawng thar leh ni mai hian ka hria a, nuam pawh kan ti a, ngaia kan lo neih lek lek tawh thil kha a bul kan tan tha leh a ni ber. Ka lungawi loh hlau takin engkim chu a ti thin a, tin, keipawhin Zotei rilru tina zawnga awm chu ka tum bik lo. Kan chhungte nen inpawh tlang takin kan awm a, chhungkhat ang mai hian kan inen a, pa nei tawh lo an ni bawk a, Nu Kimi pawh hian engkimah ka pa a rawn rawn ve thin. Ka nu nen thiantha tak an lo ni bawk nen, kan chhungte atang dodalna engmah kan tawk lo.

Nilengin hna ka thawk a, tlai lamah chauh Zotei dawr lamah pawh ka kal thei a, karkhat hnuah Delhi lam ka pan tawh dawn avangin in lamah pawh tih tur ka nei ve nual a, ka inhmakhua zel a ngai ve a ni. Ka thlen hnu rei vak loah ruah chu a rawn sur sep sep a, khua a nawm loh nilen deuh avang a ni ang, mi pawh an reh angreng hle. Zotei naute training lai an chhuah tawh avangin a nau chhawr pahnih nen chiah an ni tawh a, amah a inhuam lutuk lo bawk nen a hnena training nei duh pawh a lo hnar ve rih a ni. A naute pahnih chuan sam an colour mawlh mawlh a, Zotei nen chuan ka phone khawihin video kan enkual a, midang hmuh theih loh tur hian a kut chu ka hum ran bawk a. Kan inthlakhlelhna chu a zual telh telh hian ka hria. Khua a tlai ta deuh bawk nen a naute chu haw mai turin Zotei chuan a ti a, nihliap an ken tho avangin pawi an ti lem lo. Khaw awmdan chu ka han thlir vela, ruah lah chu a tla tam tawlh tawlh a, bike ka ken avangin haw ngaihna kan tan ala awm lo. Ka lut leh a, Zotei chu haw rilruk deuh tak hian a lo insiam a, khua chuan a ti buai ve deuh a ni ang, a lo hawi ve voh voh a. Kawngka ka khar rik ralh ah chuan a rawn hawi chhuak a, ka kalh nghal hmak a. Min en a, ka chezia chu min thlir reng a.

“Kan la haw thei chuang lo a, tikhan tuman min tibuai lo anga a tha zawk daih”ka ti a, a nuih a za hle.

Amah si chet chuan ka thu a, kan inkuah chial a, kan hmui chu a awml hman meuh lo. Kan inkeih mial mial a, a khat tawkin kan inen a, kan nui leh sak thin. Nidangah pawh hetiang hian kan awm fo a, kum rei tak lo inzui tawh kan nih avang hian kan inzah țit țet lo a, kan inpawh tawh viau. Mahse, tun țum erawh eng emaw ti tak hian insum theih lohna kan nei tlat hian a lang, mipa zawk ka ni a, tawp mai tur a ni tih pawh ka hria. Ka han inlahrang dawn a, a harsa tlat. Zotei chu ka han en a, min kuah chial paha duham zeta min fawp te chuan min tibuai a, ka rilru ka thlak thut a, kan duh ang apianga aawm zel chu ka duh leh ta zawk a. Mipa leh hmeichhia, inhaw hauh loa duhtawka han awm tlang chuan ramri kham pelh chin kan lo nei ta ngei a, kan tum ngai miah loh danin kan awm ta tlat mai. Zotei chu a tap deuh tih ka hria, keipawh ka rilru a nuam bik lo. A kawr ka hak that tir lai chuan a khur der der a, a kun tlat a, min en ngam lo. A khabeah ka han kuai dak a, min en ve ta hram a.

“Zote, hrehawm tisuh aw. Ka phatsan dawn lo che ania”ka han ti a.

Min pawm bet tlat a, a aia nghet chuan ka lo pawm ve chial a, a tawh halh a, duat takin a hmaiah chuan ka chul kual den den a, a hmel landan pawh a pangngai leh tan a, ka ta anih takna chuan ka thinlung chhungril ber hi a tihlim a.

“Ka ta I ni a, I ta ka ni”ka ti sap a.

“Min kalsan leh si chuan ka chan a chhe teh ang chu”a ti a, a hmuiah chuan ka lo fawp chat a, a rum hak a.

------------------x--------------------x--------------------------

Ka room-ah inkhungin ka inngaihtuah nasa hle a, Thartei thusawi zawng zawng chu ka han ngaihtuah let a, khang hun chhung khan Zotei leh Thatea te kha an inkawp lo anih si chuan engati nge chiang taka an inzawmna hmuh theih tur kha ka kawl tlat si. Ka tukhum chu ka han tuai puat a, engpawh chu lo thleng se, hma lam ka pan theih lohna hi ka vai kian a ngai a ni. Ka insiam sawk sawk a, Zotei te in lam pan chuan ka chhuak nghal a. Inchhung ka pen luh chuan min lo en thap hlawm a, he inchhungah hian neitu chan chang tak khan ka lo khawsa ve tawh thin a, tuna ka dinhmun nen chuan ngaihtuah chhuah loh ka duh hial.

“Hruaia, lo leng thu rawh”Nu Kimi chuan a lo ti vat a.

Zotei leh a naute chuan min melh hrek hrek a, ka ngai pawimawh duh lo. An sitting room-ah chuan ka thu a, Nu Kimi chu a rawn thu ve nghal a, Zotei fapa te zawk chu a pua a, ka hmuh rual chuan ka rilru chu a rawn na zawk lehnghal.

“Zotei hmuh lawk ka duh a, a rem chuan?”tiin ka kal chhan chu ka han sawi nghal a.

“Mate, Hruaia’n a be duh che anih chu”tih pahin a tho chhuak a, rei deuh tak ka nghah hnuah Zotei chu zawimuang hian a rawn phei a. Ka thutna epah chuan a thu a, a hmaa min zah ve em em thin khan tunah chuan min cho hmel zet hian min melh kal a. Khawdang hawi loin ka en ve reng a, a hmelthat dante chu a la pangngai reng a, a heh sen hiam thin te pawh kha a fa neih hnuah pawh a la danglam lo. Ka thaw hak a, ka thutna chu ka han siam rem a.

“Khatih lai khan Thatea nen khan in inkawp lo niin ka lo hria a”thu khuh nei loin ka han ti tawng a.

“Hun kal tawh sawi turin hun ka nei lo”a ti hmak a.

“Ka hriat hi a pawimawh miau si a”ka tih chuan a hmel chu a tur nghal phat a.

“A pawimawh lo aniang chu, vawikhat chauh ngaithla tura ka tih lai che pawh khan I ngaithla duh hleinem”a ti a, a ding nghal a.

“Zote..”ka ti hman tawk a.

“Min chhuahsan phawt mai rawh”a ti leh ta hmak mai.

Kawngkhar lam chu a kawk a, ka sawi tum pawh sawi ta lo chuan ka ding a, kan thawm hriain a chhungte chu an lo hawi thap a, ngawi rengin an in chu ka chhuahsan leh ta. Ka inchhir hnuhnawh viau mai, engmah sawtna awm tawh lo leh tangkaina awm tawh loa inhambuai reng chu a dik lo ve bawk a ni. Mahse, khati thuta Zotei nen kan inthen thei kha mi zawng zawng pawhin mak an ti a, pasal hial neia a awm hnu hian kei hian kan inthen chhanah khan dik lo a awm a ni ang tih ngaihdan ka nei thar leh a, kum rei tak hnua ka mithmuha a rawn inlar leh takah hian!

Ka drawer chu ka han hai chiam a, a hnuai lama thlalak chu ka han phawrh a, Zotei chu Thatea'n duat hmel takin a kuah a, Zotei lah chuan kun deuh chial hian a lo hnar bik lo ni awm tak a ni, a ban ve tak ang țawk țawk a. Ka thaw kawk kawk a, tun thlenga na taka min siamtute hi hmanah khan lo halral tawh ila tha tur a ni a