SENORITA Part IV

SENORITA

(The girl of my dreams)

Part IV

“John, vawiin chu dawr advertise na turah min rawn zai sak dawn em niang?”Maggie’n a tih chuan inhawng takin ka lo remti a, ka mamawh laia min puitu a nih avangin min mamawh ve huna thil tihsak chu ka duh reng reng a ni.

Chumi chungchang Rose ka hrilh chuan  teu hlar a, a ngaihna ka hrethiam lo kher mai. Maggie nen kan inpawhzia engkim a hria a, keiin rem ka tih chuan min remtihpui ve ka rin tehlul nen, chutiang a ni lo.

“A duh duha a kaih kal che hi ka remti lo”a ti bur a, nek luih chi pawh a ni lo.

Ka phone la chhuakin Maggie chu ka be nghal a, ka inthlahrung khawp mai. Tha takin min chhang mah se a lawm lo tih ka hria, engkim ruahmanna a kal fel vek tawha a ngaih laia ka theih loh thu ka hrilh chu lawmna chi a ni lo reng a ni. Rose ka hmangaih em avangin a thu awih loh ka duh si lo, ka rilru chu a hrehawm tak meuh a ni.

Nikhat chu ka thawh theih ang ang thawh ve ka duh avangin kan thenawmpa chu hna chungchang ka zawt chawt a, engti mi nge ka nih min zawh hnuah a lo ngaihtuah tur thu min hrilh a, nihnih hnu lawkah a naute hnena zai tura min sawifelsak thu min hrilh ta mai a, ka lawm hle nghe nghe. Bar ang reng deuh hi a ni a, mahse, mi hausa tak tak lo chu an kal ngai lo thung. Ka hmuh tirh phat atangin mi hausa leh khawsa theite tan lo chuan hmun a awm lo ang tih chu ka hre nghal vek a, a hmaa ka lo zai tawh thinna nen chuan danglam tak a ni. Rose pawhin rem min tih pui avangin harsatna tawk loin ka thawk ve nghal mai a, zantin dar 6 atanga dar 9 chhung ka zai thin. A tirah chuan ka harsat ve deuh a, ka zai khat vang tih ka hria. Karkhat vel ka kal hnu chuan a ziaawm ve ta hle a, min chhawrtute mai bakah chu lai hmuna rawn kal te pawhin min fak ve tan a, nuam pawh ka ti tan ve hle. Thla chanve vel ka zai hnu chuan zan khat chu nula la upat hmel vak lo hi a rawn kal ve hlawl a, ka vawikhat hmuhna a nih vangin mak ka ti angreng hle. A chhan chu helai hmunah hian anni ang rual an rawn kal ngai lo a, a rawn kal berte pawh mi hausa hoin an kawp vanga rawn lut ve an ni chauh thin. Ka zai chu uluk tak hian a ngaithla a, zu chu a lem leh khalh thin. A chezia chu ka thlir reng a, heng laia cheng chu a ni lo tawp ang tih ka hria. Zu pawh chu tui ti taka in a ni lo tih chu a lang reng a, eng emaw tak harsatna a nei a nih ka ring.

Ka haw tur chu taxi nghah pahin meizial ka tan kaia, ka zu vang vanga, ka piah lawka mi awm ve te pawh chu ka ngaihsak lem lo.

“I zaithiam hle mai”titu lam chu ka hawi vat a, English pai hauh lo, aw phawi ah erawh dik chiah lo hian a hmaa ka hmuh nula chuan min bia a lo ni.

Ka nuih sak a. Ka lawm e tih nan ka lu chu ka buk khum zeuh a.

“Hotel min kawhhmuh thei em?”a tih chuan mak ti deuh tak hian ka va melh a, khaw vawh vangin a kut chu a lo khur deuh hlak hlak bawk a.

“A to nge to lo I duh?”ka tih chuan a hnai apiang a duh tih a sawi nghal a. Tun ang hunah hotel book lawk loh chuan chan a harsatzia a hre lo a ni ngei ang.

“Naktuk atan lo chuan a harsat ka ring deuh tawh a, changkang vak lo I duh anih erawh chuan a awm nual ang”ka ti a.

“A awm ang ang ka duh a ni mai, min puih theih chuan ka lawm ngawt ang”a ti a.

Ka inngaituah fe hnuah taxi rawn tlan chu ka lo phar a, hotel lam pan chuan nula ka la hriat ngai hauh lo nen chuan kan chuang ta a. Inchhunga a ruih hmel ang aiin a harhfim leh zek tawh niin a lang. Hotel kan thlen chuan a chhuk vat a, inthlahrun hmel tak hian min en bawk a.

“Ka tibuai chea pawi ka ti takzet a ni. Maria del Carmen ka ni a, I mi puihnaah ka lawm e”a ti a, a vawikhat nan a nui sak a.

“Keipawh ka lawm e”ka ti a, tim deuh tak hian hotel chu a han thlek leh phawt a, “I hming ka hre ve thei ang em?”a tih chuan a meng phi leh deuh chek tawh a.

“John ka nia, chutiang chuan min ko thei ang”ka ti a.

“Hming mawi tak a ni, anih mangtha phawt le”tiin hotel lam chu a pan ta a.
Ka en zui vang vang a, mi pangngai tak anih ka ring, engvanga khatianga awm nge anih ang tih chu ka ngaihtuah zui vang vang a. In ka thlen chuan tumah awm lo tih hriat tak hian a lo la thim thap a, sana ka en chuan dar 11 a lo ri dawn tawh a, tun ang hun thlenga Rose lo la haw lo chu mak ka ti kher mai. Room ah lut tlangin ka inbual nghal a, thawm a rawn la neih loh avangin ka ngaihtuah deuh nen ka han call a, office-a a awm laia biak ka duh loh thin nen tun ang hunah erawh a awm ka ring tawh lo.

“John, kan pu a lo kal a, ka rawn la haw hman lo. Ka be thei lo chea, min lo be hlauh chu ka lawm e. Lo muhil rawh, ka lo haw ve vat ang”a rawn ti zung zung a.

Ka chau deuh bawk nen ka mu chu ka muhil vat a, eng emaw tawng sep sep thawmah chuan ka harh hlawl a. Ka bulah Rose a la mu lo tih ka hriat chuan ka tho vat a, thawm rawn chhuahna lam pan chuan ka kal ta zel a. Rose chu thawmhnaw pawh ha mang lo hian sofaah a lo mu a, mu pahin phone a lo hmang a ni. A hlim hmel hle hian ka hria a, a nui leh ar ar thin a, ka thawm a hriat chuan a rawn hawi vat a, bahlah miah lo in a biak lai hnenah zan a rei tawh thu sawiin an inbiakna pawh chu a titawp nghal a.

“Ka tiharh che alaw Darling”tih pah chuan min rawn pan vat a, min rawn fawp a.

“Zanrei tawh ah tunge I biak a?”ka ti a.

“Rosalind nen kan inbe laklawh lutuk a, kan hna chungchang a nia”a tih chuan dawt asawi ring lo in ka lu chu ka han bu nghat a.

“Mu tawh ang”tih pahin room lamah chuan min kuah lut ta a.

A muhil lai chu ka thlir reng a, Rose hi ka hmangaih a, ka engkim a ni tunah chuan, min phatsan ta se engtin nge ka awm ang tihte chu ka ngaihtuah neuh neuh a. Ka tum ang leh duh angin kei lah ka awm thei der bawk si lo, a hahthlak ka ti kher mai. A duh ang nawmna leh a mamawh phuhru tu ang chauh ten ka han inngaihtuah a, ka rilru chu a na zawk mai. A duh ang tak hian awm thei lo ila min hawisan mai dawnin ka hre bawk. Ka theihtawpa tihhlim a, a duhdan ang taka a hero ni tur chuan ka tlin lo ni ber hian ka hre bawk. Ka sum hmuh na tura ka hna hi taksa hman rim ngai angin lang lo mah se a hautak hle si a, ka rilru chu a buai ve nuai mai hian ka hria. Chutiang ngaihtuah chung zel chuan ka lo muhil ve ta veng veng a.

Chu thil a thlen atanga karkhatnaah chuan Rose pawh hrilh lawk lem loin an office-ah chuan ka va thawng thut a, min hmuh chuan a hlim lo riau hian ka hre lehnghal. Rosalind chuan min lo be vata, Rose erawh a tawng tha duh meuh lo. Keipawhin nuamka ti chiah lo a, a hnathawhna hmuna va hmuh chu a  duh vak lo thin reng alawm ka tin a a, ka kal ta tho si a, tha taka min lo biak chu ka beisei ve a ni.

“Ka kal tawh ang e, tihtur ka la nei a”ka tih chuan ngawi rengin min thlah tur chuan a rawn chhuak ve hram a.

Pawn kan thlen chuan tumah an awm lo bawk a, a biangah han fawh ka tum a, a hawi kual phawt a, chutah hreh hmel tak hian a rawn dawh a, ka lo fawp zeuh a. A awm dan chu ka ngaihbel mai mai thil a ni tawp lo tih ka hrereng. Mi pakhat hi kan awmna lam pan chuan a rawn phei a, Rose a hmuh chuan a nui sang a. Min hmu ve chu hrilhhai hmel a pu deuh hian ka hria.

“Rose, lunch kan ei dun ang ka ti a, ka chang lo che ava nih hmel ve”a rawn ti a.

“Ka kal dawn chiah alawm”ka lo ti a, Rose chu a thaw hawk hian ka hria.

“Inah kan inhmu dawn nia”tiin a rawn phun sep a.

“Ka kal phawt mai ang”tiin ka kalsawn ta nghal a.

Ka ngaihtuahna a vak kual nasa kher mai, hun reilote chhung hian Rose hi a danglam hman lutuk a, ka mangang a ni. In ka thlen chuan zu um chu la chhuakin ka in ta nghek a, ka tawt lutuk chu a reh deuh ka beisei vang a ni. Ka lu na ngut ngut chuan min tiharh a, khua a lo thim tawh. Ka phone ka en a, Rose message pakhatmah a awm lo. A hma kha chuan min ngaihzia thu kha a rawn sawi fo thin kha a ni a, ka Rose hi a danglam thei lo ang. Bathroom ah kalin ka inbual harh a, zai leh tur ka nih avangin ka intihharh that a ngai hle tih ka hria, ka hun tawn mek nen erawh a inrem ka ti chiah lo. Tlai loh hram tumin ka chhuak a, minute 5 chuan ka tlai ta hram. Min chhawrtu nu chu a lo ang hlak hlak a, hun vawn dik pawimawhzia a lo sawi chiam a, ka zai tan tak chu dar 6:20 a ni hman, ka nui sak a, a pawi tehchiam lo. Kilkhatah Maria chu ka va hmu leh a, nilo, hming ka hriat theih loh tehlul nen engvangin nge ka hriat nghal em em, ka maimitchhing ta daih a. Rose chauh ka mitthlaah hmuh ka duh, thildang ka tih reng lai pawhin a mah chauh ngaihtuah ka duh.

“John, no hi min dawm pui ve lawk ta che”ka haw tur chu min lo be leh a.

A thutna ngaiah thu in a in tur chu a lo thlit belh mek a, rui em em ni si lo hian a phelh ve phang thung.

“Haw mai ka duh tawh zawk a”ka tih chuan a bu nghat a, ka kal san zui nghal a.

Pawn ka chhuah chuan ka rilru ka thlak thut a, ka phone la chhuakin Rose chu ka han bia a, ka haw theih loh tur thu ka hrilh leh ta zawk a. Inchhung lam panin Maria awmna chu ka pan ding nghal a, min lo hmuh chuan a lo nui var var a. No chu lakbelhin a lo thli nghal vat a. Engmah sawi lo chuan ka in sak ve ta a, chutiang chuan ngawi rengin um khat kan in zo ta der a.

“Ka thlah thei tawh dawn si lo chea, duhtawk tawh rawh, mahni inveng thei lo khawpa awm hi a tha lo ania”ka han ti a.

A nui hak ringawt a, a in belh ta zel tho a.

“Chutiang khawp tur chuan helai hmunah hian a tam tawk lo ang”a ti duh lek chauh a.

“Engati nge nangmah chauhin I rawn kal thin a?”ka han ti phawng a.

“Achhan chu keimah chauh ka nih vang aniang”a ti a, a nui leh a.

“Ka uang lo”ka ti hmuk a, a nui ta lo.

“Thawnthu sei tak a ni”a ti a, “I ngaithla peih dawn em ni?”a han ti leh a.
Ka sana chu ka en a, hun ka ngah tawk tih ka hria, mahse, dawr khar a hun tawh tih chu ka hrilh ta zawk a. Pawnah chuan ka han din khawmuan pui a, taxi lah chu a vang phar lehnghal.

“Ka thlah ang che, tihian kein kal ang”ka ti a.

Awih lo hmel tak hian min rawn en a, ka thutak tih a hriat chuan a nui deuh a, phur zet hian min zui ta a. Kan kal zel a, tumah chuan tawng kan tum lo. A tawpah chuan ka han ding a, a ding ve dat a, “Thawnthu chu”ka han ti a.

“Um, ka hrilh ngam ang che tiraw? Ka tih awmzia chu I rintlak ang em tihna”a ti a.

“Ka hre lo le”ka tih chuan a nuih a za hle ni tur a ni, a nui ta hawk hawk a.

“Mexico khawpuia awm ka ni a”a ti a, a han chawl det a, “Sawi tan dan tur ka hre chiah lo. Ka naupanlai hun zawng zawng chu chutah chuan ka hmangral a, ka nu te lam hi Texas lam chhuak an ni thung. Ka tleirawl chhuah hlim khan ka pi, ka nu nu bulah hian ka cheng thin a, hun rei tak ka awm zui nghe nghe. Ka pa lam hi Mexican fir tak mai an ni a, hetia ka pa in Texas lam mi daih a nei pawh hi ka pu, ka pa pa chu a thinrim hle a ni awm e. Inhmangaiha innei ta chu tih ngaihna awm tawh hek lo, an en liam lo thei ta lo a. kan unau kan pian hnu phei hi chuan ka pu chu a lawm hle a ni ang, ka nu pawh a duat phah hle tih a hnuah min hrilh thin. Hun a lo kal zel a, ka hriat miah loh laiin ka pu ho chuan ka pasal tur an lo tifel ta mai a, ka hriat tirh chuan awmngaihna pawh ka hre lo. Ka pu hi ka ngaiin ka zah em em a, mahse, chutia a ma thu thua ka hma hun a lo rel fel chu ka duhdan a ni hauh lo. Kan inneih hun tura an tih chu vawiin ni hi a ni a, mahse, ka nei ta lo anih hi”a ti a, ral lehlam chu a thlir ta vang vang a.

“I tlanbo a ni maw?”ka ti nghut a.

“A ni ber anih hi”a ti a, “Mahni hmangaih reng reng loh damchhunga neih chu ka thei lo. Texas lama ka kal an ring ngei anga, min rawn zawng anga, mahse, ka lo awm dawn si lo. Ka pi chuan min ngaihtuah hle ang”a ti ta a.

“I a hle mai”ka ti ta ringawt a.

“Ka tlanchhiat vang hian?”a ti ha a.

“I la naupang a, I khaw thlir a la zim a ni. I nei anih chuan I hmangaih chawp zel mai dawn alawm”ka ti a.

“Ka duh tak lo chu ka nei lo ang”luhlul zet hian a ti a.

“I tlanbo reng thei dawn em ni?”ka tih chuan min chhang mai lo.

“Ka theih chhung chu ka tum alawm, a rei emaw rei lo emaw ka chhungten ka rilru an hriat a ngai alawm”a ti a.

“Mi mak tak I nih reuh hi”tiin ka phun hlak a, “Kan thleng ta e, va lut la, ka lo thlir liam ang che”ka ti a.

“Ka lawm e aw”tiin ka hnungah chuan a rawn beng thak thak a. A lan theih chhung chuan ka thlir a, hmeichhe huaisen tak chu a ni reng reng e.

Muangchang tawh loin taxi rawn tlan chu ka lo phar ding a, in lam pan chuan kan tlan ta vang vang a. Tunah dar 12 a ri dawn tawh a, Rose awmdan ang zela chet lak ka duh vanga riak chhuak tur anga insawi pawh ka ni. Room zawnah chuan ka han ding a, ka han hawi chhoh chuan light chu a eng tang tang a, ka phurna kha hlauhthawnna ah a inlet vek tawh. Ka chahbi spare chu phawrhin dim te hian kawngkhar chu ka han hawng a. Ka bungrua chu ka room ah ka dah lut a, huphurh ru takin ka chhuak leh vat a. Rose room hnaih thei ang berah chuan ka phei ta a, kawngkhar chu a inkhar phui that em avangin a chhunga awm Rose chu ka hmu thei lo. Mahse, room chhung awmdan engkim ka hriat chian em avangin kawngka chu ka han nam deuh nawk a, thawm dang a chhuak thei lo tih ka hriat chiang vang a ni. Ka thawm hriat hmasak ber vang chuan thil dang ti thei tawh loin ka ding khawng ta reng a, ka rin hleih theih loh, ka rin loh theih loh, ka Rose chu midang nen kan pahniha kan room intawm veah chuan duhtawkin an khawsa a nih chu! Ka mit sulh a, awmdan tur ber pawh ka hre lo. Ka va lut anga, ka che buan buan mai dawn em ni tih ngaihdan te ka han nei thut thut a, a tha ber lo tih ka hre si. Ka hriat rei poh leh ka nat a zual tih hriain ka room lam chu ka pan ta a. Khumah chuan ka thu a, ka rilruah hian engmah a awm lo. Ka awm chu a inhnawh up up a, ka hlauhthawn ruk a taka lo thleng vang chuan ka na ngawih ngawih a ni.

Ka muhil lo chiang kher mai, Rose leh a bialpa inthlah thawmte chu ka hre vek a, ka awm tih hre lo in ka Rose chuan amah chauha awm khawharthlak a tih theih zia te chu a sawi ang nawk nawk a, a tawngkam tin chu ka tan natna a ni tih hria se a sawi tho ang em? Tukverh ah chuan ka han dak a, Rose bialpa chu a car ah a lo lut dawn chiah a, ka hai lo ang, ka hmu tawh tlat alawm. An office ka kal nia lunch ei puia sawmtu ngei kha a ni, hei hi em ni kan pu a tih chu ni ang?

Rose chhuah hnu thleng chuan khumah ka mu hlawm reng a, ka chechang peih lo. Ka hmangaih ngawih ngawih chuan min lo bum reng si a, ka thinlung natna hi ka thup theiin ka ring lo. Nileng hi a lo rei thei tak zet a nih hi, tlaia Rose rawn haw in min hmuh chuan a phar deuh awk a, nidanga mi ngaia min thlahleltu khan min hlau ta a ni ber e. Engmah sawi loin room ah a lut a, ngawi rengin ka chhuak a, khawi lam nge ka pan dawn ka hre mai bik lo.  A tawpah Maggie dawrah ka lut ta hlawl a, min hmuh chuan a tum hmak a, a hmaa a thil duh ka puitlin loh vang kha a ni tih ka hre reng. A mi ngeina chu haiderin dawrah ka lut a, rui taka awm chu ka mamawh ber a ni tlat. Um khat ka in zo a, a dang ka lam leh a, Maggie chuan min rawn pan a, ka no chu min laksak ta daih a.

“Eng nge I chungah thleng?”a ti ram hmak a.

“Engmah”ka ti a, no chu laksak ka tum a.

“Hetiang em em I in ngai lo, a tawk tawh”a ti a.

“A la tawk ka ti lo alawm”ka ti a, ka che buai nuai tawh.

“Ka pe thei tawh lo che, min hrethiam dawn nia”a ti a. A kalsawn nghal a.

Ka rui hle a ni ang, pawn ka chhuah lai pawh ka hrelo, eng emaw hi ka pal a, ka tlu chawrh tih ka hria, a bak chu ka hre tawh lo. Ka harh leh meuh chuan Maggie chu lungawi loh hmel tak hian a lo thu tum bar a, ka harh tih a hriat chuan min rawn pan hnai a.

“I bialnu min rawn ankhum leh hmain haw vat rawh”a ti hlar a.

Ka awmna ka han enchiang chuan Maggie dawra ka thawh laia ka riahna thin kha a lo ni.

“I sawi awmzia chu eng nge”ka ti a.

“John, kan dawr leh keimah hrim hrim hi min rawn hnaih suh”a ti leh a.

Ka ngaihdan a ni ta bik lo, ka mutna atang chuan ka tho a, engmah sawi tawh loin ka chhuak nghal a. Ka liam tur chu ka han hawi let leh a, Maggie chu ngui bar hian pawnah a lo ding a, min lo thlir reng tih ka hre reng a ni. Ka hawi let vata, min hmuh phak lohna chin ka thlen chuan ka ding a, engvanga Maggie khan min lawm lo viau nge a nih? A laka tih dik loh ka nei tih chu ka hria, mahse, thian kan niin ka lo ngai a, khati taka a thinrim rei chu ka thin a rim let ve thung.

Rose chhuak tur nen kan intawk a, a hmel chu a phelh ve phang hian ka hria, zan lama a che na lutuk a ni ang chu ka ti rilru a, ka thinrim chu ka lum nghal pup pup thei.

“I rawn haw dawn lo tih I sawi si lo a, ka meng tlaivar thak”a lo ti a.

“Anih chuan ka thiam loh a nih chu”ka ti a.

Min rawn pan hnaia, ka banah a rawn vuan a, ka ten ru tlat tawh.

“Ka lo haw vat ang, dinner kan kil dun theih ngei ka beisei”a ti a. Ka biangah a fawp a, phur lo takin ka han fawp ve a, a motor chu ka han lakchhuah fel sak a, a tlan liam tur chu ka thlir a, lemchan a thiam em avanga award pek tlak hial niin ka hria.