SENORITA Part V

SENORITA

(The girl of my dreams)

Part V

Karkhat chhung chu nunphung pangngai takin kan hmang ve a, kartawp chawlh pawh Rose nen hlim takin kan hmang a, ka kianga a awm chuan a lakah ka thinrimna te hi a reh vek thin a, a mak ka ti thin. Ka hmangaihna hian a hneh ve hun a awm hian ka ring tlat a, a tan theihtawp chhuah hi ka duh a ni. Ka tan tlawm thlak viau angin lang mah se ka duh duha awm thei ka ni bawk si lo a, ka nghah mai hi a ngai a ni.

“John, ka zin a ngai dawn a”Rose chuan zanriah kan ei laiin inthlahrun hmel tak chuan a han ti a.

“Khawi lamah nge?”ka tih chuan a mitah chiang tak hian ka melh kalh a.

“London ah. Ka inthlahrung viau na a, keima project kha a ni si a”a ti charh charh a.

“I hna thil anih te chuan I thawh a I tih a ngai alawm. Engtia rei nge I thang ang?”ka ti a.

“Karkhat chhung chuan kan zo fel thei ang”a ti a, ngaih that lohna pawh ka nei lem lo.

Zan kan mut hmunah chuan an hna chungchang eng eng emaw min hrilhfiah neuh neuh a, tuna a thil buaipui hi a hlawhtling a nih chuan a kaisan tur thu te chu hlim takin a sawi a, a nui hmel ka hmuh hian ka thinlung hi a hlim thin.

“Tu nen nge in kal dawn?”ka han ti leh hram a.

“Rosalind nen kan ni dawn a, kan ngaihtuahawm lo hang”a ti a, a nui har har a.

“Karkhat chhung zet I tello in ka lo awm dawn ania, a lunglenthlak dawn hle mai”ka ti a.

A muhil lai hmel chu ka thlir reng a, Jamie kha ka duh ve hlein ka lo hre thin a, a telloa ka tlei dan ka ngaihtuah hian induhna satliah mai a ni tih ka hre tawh. Rose hi ka engkim a ni a, ka thinlung zawng zawng hian ka hmangaih a ni.

Ka muhil ka harh chuan Rose chu a lo la mu a, dim tein a biangah ka chul a, a hmuhnawm ka ti a, ka en leh ngawih ngawih thin.

“Min en reng dawn nge min fawp dawn?”a rawn tih chuan ka phu zawk a.

Ka kun hniam a, a hmuiah chuan ka han fawp zeuh a, meng chuang lo hian a nui sak a.

“Vawiin chu nilengin hun kan nei thei dawn ania, naktukah ka zin san dawn si che a”a ti a.

A biang chu ka chul den den a, a zi mar ar ar a.

“Maggie bulah sawi I nei em ni?”ka tih chuan a rawn meng zawk a.

“Kha nu hming kha ka hre peih lo. Beisei hmel taka a melh thin che pawh hi ka hai hleinem”a ti a.

“Rose, I ngaih ang kha a ni lo ania”ka tih chuan a in let ta hmak a.

“I duh anih chuan I pan thei alawm”a ti leh hmak a.

“I duh loh zawng a nih chuan ka sawi tawh lo ang, mahse, chutiangin Maggie chuan min en lo ang”ka han ti leh hram a.

A rawn in her leh a, ka biang chu a rawn dawm a, “John, min chhuhsak thei tu tur anga ka ngaih chu I lak atanga hla taka awm turin ka ti zel ang. Ka rilru hahdamna chu I duh ve lo em ni?”a han ti sap a.

“I hlim hi ka duh ber alawm, midang ka ngaihtuah lo”ka tih chuan hlim takin a nui ta var var a.

Rose chhuah hnu chuan ka thawmhnaw bal te ka su fai a, zan lama ka hla sak tur ka ngaihtuah pah neuh neuh a, tin, ka laka thikthu a lo nei ve chu Rose lakah ka lawm hle bawk. Drawer vel chu ka thian fai pah a, ka tih laklawh avangin Rose thawmhnaw bawm te chu ka then fai sak bawk a. Lehkha inthlep tha ho chu phawrh chhuakin ka han rem fel a, file kar atanga lehkha rawn tla chu ka han chhar vat a, ka tum loh deuhin hospital lehkha chu ka han hmu a, enchiang lem loa dah luh ka tum chu ka ngaih a tha lo. Ka han phawrh chhuak leh a, thil inziak ka hmuh chuan ka meng phar kawk a, ka duh loh ber thil ti tur chuan Rose hi ka dah phal lo. Chhuar chunga damdawi chu ka han la vat a, a hming ka en chuan ka thisen kal lai hi a tawp dawnin ka hria. Ka thaw hrawk a, ka awma hnawhtu awm chu tih bo tumin thawk ka la ham ham a. Ka Rose hian nau a titla ang maw? Ka awih thei lo, ka fa pai a duh lo a, a rukin a lo titla tihna a ni thei ang em? Nge, midang lakah zawk? Chhuatah chuan ka thu sawp niai a, ka rilru na lutuk chu thlawh bo vang vang ka chak a ni.

Dar 5 a ri tawh a, hma ka la sawn tam lo kher mai, darkar khat dawn chu bathroom-ah ka inkhung tawh a. Shower ka in phuh tirte chuan ka rilru na hi phuh chhuak se ka ti a, engtia awm tur nge tih pawh ka hrethiam tawh lo. Muangchangin ka insiam a, ka hna thawk ve turin ka chhuah a hun tawh tih ka hria, ka va phur lo kher em! Kha thil kha hmu lo law law ila tha zawk tur. Ka zai chhung zawngte chuan Rose ka hmuh hunah ka chhuahchhal ang nge ka hre lo der zawk ang? Chung ngaihtuahna chuan min tibuai hneh kher mai. Bar hnung lamah chuan ka zu um hnihna ka tlak zo mek a, rilru fim pu loa awm tlang theih chu ka chak ber.

“John, taxi ka koh sak dawn che em niang, boss-in a hmuh che chuan I tan a tha dawn hauh lo” Fred chuan a ti a, ani hi helaia ka awm tirh atanga ka biak ve ber a ni.

“Ka haw duh lo”ka ti a.

“Zankhuaa awm na atan chuan a vawt mah mah”a ti nghut a.

Ka awmdan ka hre mumal lo chhunzawm a, ka muhil a ni ngei ang, vawt lutuk in min nuai avangin ka harh kawk kawk a. Ka awmna lai chu ka hre lo chiang hle, ka sana ka en chuan zing lam dar 3 a lo ri tawh a, ka chatthla a ni ngei ang. Ka tho vat a, ka taksa chu a khawng lo chauh tawh a ni. Pawnah taxi tlan a awm zeuh zeuh a, nghah buai ai chuan kein kali la ka kal lum mai ka ring zawk. Ka rilru a harhfim rual chiahin ka chunga Rose thiltih chu fiah takin a rawn lang leh a, ka na kher mai. In ka thlen chuan Rose chu room ah pawh mu loin sofa ah a lo mu ngal a, ka thawm a hriat chuan a rawn tho vat a, min ngaihtuah hmel zet hian ka awmna min lo zawt mawlh mawlh a, ka chhang thei lo.

“I haw tlai tur thu engmah I sawi si lo a”a ti a, ka taksa vawt vek a khawih fuh chuan a au that a. Room-ah min luhpui a, engtia awm tur nge tih pawh ka hrethiam lo.

“Mu phawt ang, zingah kan inbe dawn nia, zu  I in hnem hlemai John”a ti nghat a.

Engmah sawi loin ka thawmhnaw ka phelh a, ka mu a, ka bula Rose rawn mu pawh chu lo kuah emaw pawh ka tum lo. Amah chuan min rawn hnaih a, min rawn kuah a, a muhil lai te chu rilru na takin ka thlir reng a, ka hmangaihna hian engtia thui nge a ngaihdam zel dawn ka hre lo.

“John, ka tlai ang e tho teh”tih pahin ka rizai chu a  rawn hlim a. “I sek lo nasa si”tih pahin a nui ar ar a.

Ka han men chuan ni chu a lo tlang sang hle tawh a. Rose chu a thawmhnaw in pack fel thlap hian khum bulah a lo ding a, London-a a kal tur chu ka hrechhuak zawk a.

“Thlah I ngai dawn em Rose”ka ti a.

“Ngai lo ang, I tan a buaithlak mai mai alawm”a ti a.

Ka tho a, bathroom lamah intifai turin ka luhsan a. A phone hmang ri chu ka hre riai ruai a, Rosalind nen an inbia a nih ka ring. Ka va chhuah leh chuan kal a hun tawh a sawi a, a bag vel chu ken chhuahsak ka tum chuan min hnial ve tlat a, kawngpuia taxi a hman tur thu a sawi avangin ka hnial duh ta lo. A chezia chu ka chik hle a, a phur hmel te chu ka ngai dik lo zo vek tawh ni mai hian ka hria. A chhuah hnu chuan ka enzui ang nge enzui lo ang tih ka inngaihtuah leh phawt a, a awmdan ang anga enliam chu ka tum leh ta zawk a. Nilengin ka mu a, ka lu na chu ka rit bur a, zan lama ka thil in effect tih chu ka hai lo. Choka lamah chhuak pheiin tlem tla ka in loh chuan a dik thei lo tih ka hria a, ka han lem leh sak a. Tichuan ka mu ta hle hle a, zan lamah chauh ka chhuah dawn avangin mut nilen chu ka pawi ti lem lo.

Ka phone ri ral ral ka hriat chuan ka harh ve chauh a, khua a lo thim der tawh. Ka han inbeng kang a, ka phone chu ka han pick up a.

“John, Maria ka nia”rawn titu avang chuan ka mit chu ka han meng zau deuh kawk a.

“Eng nge ni ta?”ka ti bul hmuk a, ka remtihna telloa miin ka number an nei chu ka duh vak lo a ni.

“Mexico ah ka let tawh a, ka pu pawh a rilru a dam tawh a, chuvanga haw leh chu ka ni a”a ti a, a ngawi dehu vang vang a, “John, I number ka lo nei ve ringawt chu I lawm lo ang tih ka hria”a tih chuan ka inthiam lo leh deuh a.

“A pawi hleinem. Maria, I haw leh chu ka lawmpui a che”ka ti a.

“John, rawn la zin ngei ngei rawh aw”a han ti a.

“Aw le, remchang a awm hunah ka rawn la zin dawn nia”ka ti a.

“I kal a la hun lo em ni?”a tih chuan ka sana chu ka han en a.

“Shit… “ka ti tuarh a, dar 6 a lo ri dawn tawh.

“Hun hman nuam le John”tih pahin phone chu a dah ta a.

Ka insiam sawk sawk a, ka chhuak zui nghal a, taxi lah chu a vang hrep lehnghal. Ka pum lah chu a ri leh ruk ruk thin a, ka awmdan chu a nuam lo vel vek a ni ber. Ka thlen chuan vanneihthlak takin hotunu a lo awm lo a, ka indah fel a, ka zai nghal mawlh mawlh a. Ka lu na bur leh ka pum ruak lutuk vang chuan ka ti hlei thei lo. Zan dang aiin ka zai tha lo hle tih ka hria, tumah chuan min ngaihsak lem lo a ka hriat vang erawh chuan ka lawm hle. Ka haw a hun tawh a, ka bungrua ka inkhung fel lai chuan ka lam pana mi pakhat rawn kal chu ka hmu a. KA bul a rawn thlen chuan a han hawi kual phawt a, pa upa lam deuh tawh a ni a, a rawn kal fo tih ka hria.

“Vala, kan inbe lawk thei ang em?”a ti a. Pawn lamah a chhuak nghal a, heng lai hmunah hi chuan min chhawr mektu te hriat laia inbiak hi an duh lo fo reng a ni.

Pawn ka va chhuah chuan a motor bulah a lo ding a, min lo hui zeuh a, ka va pan hnai a.

“Motor-ah hian rawn lut ve phawt teh”A ti a, thuawih takin ka lut ve mai a.

“I zai hi ka ngaithla ngun ve ta hle mai a, nangmahah hian eng emaw inthup ka la hriatngai loh hi a awm tlatin ka hria a ni”a han ti a, “Karlehah hun I neih chuan min rawn hmu dawn nia”a ti a, a business card chu ka kutah a rawn hmehbel a.

Thil sawi tumin ka han ang zuau a, a kutin min khap a, ngawi rengin ka chhuak a, ani pawh a tlan liam ta nghal a. Ka kuta ka ken chu ka han en a, ka meng bial ta kawk a. Ka awih thei lo, Music Producer lar lutuk Martin Haldman kha engtin nge ka hriat loh theih zawk? Ka kekawr ipteah tha takin ka han ak a, ka haw lam chu ka pheikhai pawh a zang ta vak vak hle.

In ka thlen chuan Rose phone call ka dawng chiah a, tluang taka an thlen thu leh hotel ah an innghah fel tawh thu a rawn sawi a, ka chauh deuh thu sawiin kan inbiakna pawh kan titawp vat a, ka be chak rih lo a ni. Ka mu dawn a, ka mut a chhuak thei ngang lo, ka zu in bang chu ka hrechhuak a, ka han lem zo leh ta vek a, ka na min chhawk ber in ka hria. Peih lo viau mah ila ei tur ka neih tawh loh avangin mamawh lamkhawm turin ka chhuak a, ka han chhuak ta chu ka harh hawk hian ka hria. Ka rilruah Maggie hnena kal chu ka chak viau a, ka ngam chiah si lo. Rose nen an inkar thil thleng ni mah se ka chunga a awmdanah pawh khan tlawh mai ngam chi niin ka hre lo. Ka han hawi vel a, ralah chuan Rosalind ang tak mai hi ka hmu thut mai a, ka hriat sual palh a nih hlau takin ka han en uluk zual a, amah ngei a ni. Hmanhmawh takin ka kal hlawk hlawk a, ka va nang fu lo ang tih hlau takin ka phe dawr dawr a, misual um ka ang hialin ka ring.

“Rosa…”ka thaw hlawp hlawp a.

A rawn hawi a, min hmuh chuan hrilhhai hmel a pu a, kei ngei pawh ka hrilhhai bawk.

“London-ah Rose nen inkal emaw ka ti a”ka tih chuan lei lam chu a bih ngar a.

“John, englo a nia, ka fanu a damlo thut a, ka kal leh thei loa”a ti chuai raih a.

“Rosa.. dawt min hrilh lo tiraw?”beidawng takin ka ti a.

“John…”a chil chu a lem khalh a, “Ka tihpalh, ka hnaah ka let leh angai”a ti a, hmanhmawh em em hian a kal ta nghal a.

Ka theihtawpa au vak vak chu ka chak ber, Rose hian a tirte atang khan min lo bum reng tawh anih dawn hi. Kei hi eng ka ti nge, bum ka nih reng bik? Ka hrethiam thei lo a ni. Khawi lam nge ka pan dawn tih pawh hre lo in ka duhna apiangah chuan ka kal a, ka chau lutuk ka kal thei tawh lo chu kawtthler ah ka thu a, chu lai hmunah chuan thi ila ka duh ber. Ka phone ri pawh ka hre reng a, ka pickup peih lo. Ka ngaihtuahna te chu a fim lo hle a, hlawhtlin ka tumna hmunah beidawngin ka let der a nih hi.

“John, engtin nge I awm?”tih chu ka hre ruai a, ka harh thei lo.

Ka hmuh hmasak ber chu Maggie a ni, rilru hah hmel takin ka khum bulah chuan a tei chhen a, ka awmna hmun chu ka han en a, hospital a lo ni. Engtinnge helai hmun hi ka thlen ka hre lo.

“John, I lo harh ta maw?”Maggie chuan a ti a.

“Maggie, engtin nge hetah hian ka awm?”ka ti a.

“Ka ngaihtuah riau chea vawiin chu, ka rawn call chea, min chhang thei silo a. A hnu deuhah I number atangin call kadawng a, I tlukna hmunah khan ka rawn hruai chea, khalai hmuna kal te khan an lo buaipui mek che a”a ti a.

“A va zahthlak ve”ka ti a, midang tibuai zawnga awm chu a zahthlak ka ti tak zet a ni.

“Maggie, ka kal a hun”ka ti a, thawh mai ka tum a.

“Drip a la kal mek alawm, I taksa a chak lo lutuk”a ti a.

A thusawi pawh ka ngai pawimawh duh lo, drip hrui chu ka phawi a, ka jacket chu ka ha a, Maggie chuan min hau chungin min rawn zui bawk a. Hospital kawtah chuan taxi kan chang a, rei kan chan hmain kan hmu nghal a, ka rilru a insula buai ngei mai.

“I dawrah kal ang”ka tih chuan Maggie chu a bu nghat a.

A dawr kan thlen chuan in tur ka duh thu ka sawi a, ka rin ang ngeiin min hnial a, mahse, pawi ka ti lo, a dahna ami chu ka la a, a awm chhung chu in ka duh. Ka kuta bottle ka ken chu a rawn dawm a, min laksak a, a mitmengah ka tawrh hi min hriatthiampui tih ka hria. Thlang lam bathlarah kan thu a, engmah sawi lo mah ila ka hahdam hawk hian ka hre tho.

“John, a chhan sawi lo mah la ka hre vek alawm. Nangmah chauhin I tuar lo, kei hmeichhia zawk pawhin ka tawrh theih chuan nang mipa chuan I tuar chhuak thei em em ang”a ti a.

Maggie chu ka melh tlawk tlawk a, a kut chu ka han hum vang vang a, “I tuarchhel bik ngawt mai”ka ti sap a.

“I thei ve reng ania aw”a ti a.

“Ka hre lo le”ka ti a, ka hre lo tak tak a ni.

Maggie dawr atanga ka haw chuan zanlai a pel fel tawh a, Rose tello chuan ka nun hi a ho tlat a ni. A rawn haw hunah engtin nge ka lo zawhfiah ang? Engmah ka ngaihtuah thei lo. Midang tel ve lohna hmunah hla takah ka hruai bo daih dawn em ni ang? Ka rilru na hi dam chuang si lo se kan hlim thei ang em? Engkim mai chu zawhna ka chhan theih loh vek an ni.
x----------------------x------------------------x-----------------------------

“John, khawiah nge I awm?”

“Inchhung te chu I va tihnawk em em ve”

A rawn hnai zel a, room a rawn hawn chuan zu um nen ka lo inchhawp hnawk niai a.

“John”a awki a sang kher mai. “Ka in a nih hi, heng zawng zawng hi engthil nge?”a tap lo chauh a ni ber.

Ka thutna atang chuan ka tho a.

“Honeymoon nge I hna nge.. a… engpawh chu nise dam taka I rawn haw leh pawh hi a lawmawm e”ka ti a.

“Engthil nge I sawi chu?”a ti a.

Nuamchenin a ni lawm ni I zin bo?”

“Khatiang khan min tithei lo ang, ka khawngaih vang chauh chea ka ina la awmtir mai mai che ka nih hi”a ti ta phawng a.

“Engmaw? Engmaw tunah khan I sawi?”ka ti a, ka hriatsual a nih ka ring.

“John , ka thinlunga I thihna hi a rei tawh lutuk. Ka kkhawngaih vang chea ka kianga la awm I ni, a chiang em?”a ti ta phiar phiar a.

Ka lo ngaihdanah chuan a thil tihsual avangin ngaihdam min dil anga, keipawh na hle mah ila ka hmangaih vangin ka ngaidam ang ka ti a, mahse, a ni lo. A rawn haw tur ka hriat vanga rui hnepa lo awm pawh ka ni, ka ruih loh chuan ka rilrua thu awm hi ka sawi chhuak thei dawn si lo.

“Rose” kuah ka tum a, a lo tawlh hnung nghal a.

“I chhuak thei ang, ka mamawh lo che”a tih chuan engkim a tawp fel vek tawh tih ka hria.

“Naute pawh kha I mamawh lo tiraw?”ka han ti a.

Min chhan mai nachang a hre lo, a ngawi deuh a, “Aw, ka mamawh loh vang cheua paih ka nih kha”a ti ta.

"Rose, i inchhir lo em ni?" Ka ti hul hak a.

"Aw.. ka inchhir hauh lo"

Min deng na khawp mai.

"Ka inchhir hauh lo ang" a han tinawn leh sak a.

A tawk tawh e, engkim hi hetah hian tawp rawh se. Ka fa nena min kalbo tir duhtu hnenah hian ka awm thei tawh bik lo. Bag ka la a, ka thawmhnaw neih chhun ang ang chu ka khung a, Rose min lei chu pakhat pawh ka la duh lo. Ka inkhung fel hnuah ngawi rengin ka kal a, ka chahbi spare kawl chu dining table ah ka dah a.

“Hei hian I mamawh I lei dawn nia”tih pahin card hi min pek a tum a.

Ka nui hak a.

“Ka mamawh lo”ka ti a, let leh ngai tawh lo turin hun rei tak chhung kan lo chendunna hmun chu ka chhuahsan ta. Ka rui a, mahse, ka harhfim tlat si. Ka nuna a vawihnihna atan ka hmeichhe seng luhin min paihchhuak leh ta.