SENORITA PART VI-VII

SENORITA

(The Girl of My Dreams)

Part VI

Ka duh ber chu sang taka invawrh a, tute mahin min hmuhsit theih loh tura dinhmun sanga inhlan kai chu ka rilru lian ber a ni. Chutiang ti thei tur chuan ka theihtawp pawh ka chhuah a ngai tih ka hria, ka ti bawk ang. Rose khan inchhirna nei miah loin a nun atangin min paihchhuak a, hlimna min pekah khan ka lawm a, mahse, heti mai chuan thamral ka tum bik lo.

Martin-a office kawtah chuan ka ding reng a, ka luh mai ngam loh avangin mi che vel chu ka thlithlai reng a, hmu tura min tih hun ka bawhpelh tawh avangin ka tan chance a awm kher tawh lo maithei. 

“John..” ka hnunglama min kotu lam chu ka hawi vat a. Martin chuan mak tih hmel tak hian min lo en a, keipawh chuan hrilhhai angreng takin ka en a, pawn lama hmuh ka beisei loh vang a ni.

“Martin, ka tlai deuh niin ka hria”ka ti a.

A nui hak hak a.

“Ka office-ah min rawn zui ta che tlangval”a ti a, a nelawm kher mai.

A office lamah kan inzui lut a, a phur reng thei chu a fakawm hlein ka hria. Thutna min kawhhmuhah chuan ka thu a, a dawhkan lian vakloa file pakhat chu a hai malh malh a. A tawpah lehkha pakhat hi a rawn phawrh chhuak a.

“Hetah hian fillup tur neuh neuh a awm a, lo ti ta che. I rawn kal dawn lo emaw ka ti hman tawh a, vawiin hi dilna thehluh hun tawp ber a ni a, I vannei hle mai”a ti a.

A lehkha min pek chu ka la a, fillup ngai chu ka ti zung zung a, Martin chuan tu emaw hi phone ah a be mawlh mawlh bawk a, min rawn melh leh zeuh thin tih ka hria. 

“Beiseina sang tak ka nei tlat a ni, tun tum chu ka tih thlawn loh che ka beisei”tiin an inbiakna chu a titawp a. 

“Steve Williams hi I hre ngai em?”

Ka meng zau deuh kawk a.

“Hre lo an awm dawn em ni?”ka tih chuan a nui ta hawk hawk a.

“South London lama kal turin lo inbuatsaih rawh. Karlehah kan thlawk nghal ang”a ti a.

“Martin..”

“I thei tih ka hria ania” a ti a, a rawn ding chhuak a, “John, thla tam tak chhung ka zawn chu ka hmu che niin ka hria. Mahse, Steve hian a duhzawng a hmu ve che ang em tih chu ka sawi lawk thei hauh lo. Beiseina nei phawt ila, a duhzawng I lo ni lo hlauh a nih leh theihtawp kan chhuah dun tho ang”a ti ta.

Ka awm dan chu ka mumang a ang ber hian ka hria. Ka phone ka phawrh chhuak a, Maggie chu biain Martin ka hmuh chungchang chu ka hrilh a, a phur ve kher mai. Ka tih tur awm chhun chu ka theihtawpa ka inbuatsaih chu a ni. Hotel lamah ka let a, ka hna thawh lai chu ka bansan ngawt theih loh avangin kal turin ka insiam nghal a, hetiang reng renga ka phur hi a awm pawh ka la hre ngai lo.

x-----------------------x--------------------------x--------------------------x

LONDON, UK

Thlawhnaa kan chuan chhung zawng chuan ka awm mai mai thei lo, ka zam tak zet a ni. Martin chu a muhil barh barh a, kei erawh ka mi hmuh tur avangin ka rilruah thildang reng reng a awm thei lo. Ka phone chu ka an phawrh chhuak a, ka home screen-a Rose nen kan thlalak lo lang chu ka thlek vang vanga, eng ang pawhin min hnawl mah se vawikhat tal hmuha biak leh chu ka chak a ni. A chhan ka hre lo, engvanga ani kher kher hi lo hmangaih nge ka nih tih ka inzawt ve fo a, mahse, hmangaihna hi chu a mak a ni. Ka hlimna leh ka lawmna te hi ani nen ni se ka hlim lehzualin ka ring. Ka ngaihtuahna chu duh loin ka lu chu ka han thing nar nar a.

“A va hmeltha ve kha” Martin chu a muhil emaw ka ti a, ka phone chu a lo thlek ngar ngar a. Rang zet hian ka kekawr ipteah ka ak a, za lutuk hian a nui ta hawk a.

London khawpui pawh a lang phe uar tawh a, New York ka thlen hlim ang khan baihvai leh beidawnga ka chhuahsan loh hram ka beisei. Martin leh Steve chu an inbe tawn renga, kan thlenna tur hotel engkim a lo ruahman lawk vek tawh avangin chu lam chu pan phawt kan tum a ni. KAn thlenna hotel chu keima pawisaa ka thlen phak leh ka kal ngam reng reng lohna tur hmun a ni a, engkim mai chu duhthusam vek a ni. Khum dup nuam takah chuan ka han tlu zal a, hetiang ka tawng ringawt pawh hi hmasawnna a tling tawh hrim hrim. Ka phone chu ka han phawrh a, Maggie biak ka tum zet na in ka thulh leh a, Juliet zawk chu biak tumin a number ka han dial a. An hnen atanga ka chhuah hnu khan tun hi ka biak leh hmasak berna tur a ni a, a vui hle ang tih pawh ka ring. Ka rin ang ngeiin ka chanchin an hriat loh avanga a thinrim thu a rawn sawi mawlh mawlh a, an beisei ang chanchin ka la neih loh vanga be lo ka nih thute ka sawi ve bawk a, London ka kal thu erawh ka hrilh duh lem lo.

“John, mi special tak I ni a, kan nupa in kan duhsakna sang ber kan hlan a che”a ti a, kan inbiakna pawh kan titawp ta a. Ka phone-a Juliet hmel lo lang chu ti thim mai lo in ka han thlek a, ka ngai thin khawp mai. Anni vanga tun hun ka thleng tih hi engtikah mah ka theihnghilh ngai lo ang.

Balcony ah chuan chhuakin ka han hawi vel a, ka naupanlaia ka kal bak kha London-ah ka kal leh ta lo. Ka nu kha la dam se chuan ka tuina ber hi min tuipui em em ang tih ka hria, ka pa ve thung chuan a hnungzuia a company enkawl tir min duh thung a, chuvanga vawiin nia a laka hrang ta pawh ka ni. A nupui fanaute nen hlim taka an awm phawt chuan keipawh ka inenkawl ve thei em em ang tih ngaihtuahna ka neih kha engtikah emaw chuan a thleng dik dawn a ni. Chawlh hahdam veng veng chu ka mamawh tih hriain ka mu a, a tuk maia ka mi hmuh tur chu ka hma hun hriltu anih dawn avangin engkim chu fel fai thei ang bera ka hmachhawn zel a ngai ang. Ka muhil lek lek tawh tih ah chuan ka room kawngka chu an rawn kik a, peih lo zet hian ka han hawng a, Martin a lo ni.

“John, naktukah Steve a zin chhuak dawn, a chhuah hma ngeia hmuh hman kan ngaih dawn avangin alarm set la, hma takah hotel kan chhuahsan ang”a ti a. Ka hun tawn tawh thilte ka ngaihtuah a, a pamtul leh mai ang tih hlauhna in ka khat nghal. 

Ka mu chu ka mu tui lo tak zet a ni, sana chu ka bih sek a, khua chu a var har duh kher mai. Dar 5 a ri chiah tih ah ka tho a, ka insiam nghal mawlh mawlh a, Martin room lam pan ka tum laiin amah zawkin min rawn sawm a, hotel chhuahsanin Steve hmu turin kan phe chhuak ta dawr dawr a. Kan va thlen chuan ralkhat atanga ka lo ngaihsan em em Steve chuan breakfast a lo ei mek a, amah chu zawm ve nghal turin min ti a, dawhkan chu kan kil ve nghal a.

“John maw I nih?”

“Aw, ni e”

“In hun khawhralin helai hmun in rawn thleng ta si a, tih thlawn che u ka duh hauh lo. Vawiinah studio lamah hun lo hmang ula, zanah ka rawn thlawk let leh nghal dawn a, chutah chuan I thiamna chu kan en dawn nia. Martin, a tha I ti em?”a han ti a.

“A tha khawp ang chu”Martin’n a lo tih chuan Steve pawh a bu nghat nghat a.

A kawtah motor a rawn ding a, a kal a hun tawh tih ka hria.

“A pawi ka ti tak zet a ni. Mahse, kawng zau zawk a inhawnna tur a ni thei ania”tiin a nui sak a. A kut arawn phar chhuak a, kan han inchibai a, “Duhsakna ka hlan che”tiin a nui sak a.

An tlan liam thleng chuan kan thlir zui vang vang a, mi fel tak a niin ka hria.

“Ka pu, studio lamah ka hruai ang che u”tiin Steve thui hruai pakhat chuan inhnuai lam min pan pui ta a. A pawn lama ka en dan ngawt aiin a lo pui ngei mai. Martin chu ka han kheuh a, “A ropui ngei mai”ka ti sap a. Martin chu a nui sang a, min phurpui ve hle tih ka hria.

Nilenga hun kan hman zawh hnuah hotel lam panin kan let leh ta a, kan thlen fel hmain Martin chuan phone call a dawng a, Steve hnen atangin a ni. Thinphu dep depin ka lo awm a, engtak rawn sawi ang maw? 

“Naktuk a nghahhlelh awm hle mai John”hlim takin a ti a.

“Engthil nge ni?”tia ka zawh chuan, “Steve chuan I aw nalh a tih zia hahipin a rawn sawi a, a rang thei ang bera hmuh leh che a duh anih chu tlangval”a ti a. Khatih laia ka hlimna ang kha ka la tawng ngai pawhin ka hre lo, “John, I ti thei a ni”tiin ka infuih thar leh ta mawlh mawlh a.

x-----------------------x----------------------------x------------------------------x

Rim takin hlawhtlin ngei tumin ka theihtawp ka chhuah a, Martin leh Steve tih beidawn chu ka tum lo hle. Ka tihtheih piah lam tih hre mah ila theihtawp ka chhuah chuan ka inchhir dawn lo tih ka hrechiang. Nikhat chu recording kan tih zawh lam a ni a, boruak thar hip ve ka chak deuh bawk nen ka leng chhuak a, ka tum loh deuhin Rose te office chu ral atangin ka hmu a, an hmunpui ber anih avangin a hmunhma pawh duhthusama zau a ni. Ka tum lawk em em pawh ni loin ka va pawh hlawl a, ka rilruah Rose a thar kher mai. Ka phone ka phawrh chhuak a, Rose number chu ka han dial a, ka rin loh deuhin a rawn pickup ve mial a, mahse, mipa rawn tawng thawm ka hriat vang chuan engmah sawi loin ka dah leh ta ngawt a. An awmdan tur ka ngaihtuah ringawt pawhin ka na vawng vawng mai. Hmanhmawh zetin chu lai hmun chu ka kalsan a, heng hmun pawh hian min hnuchhawn ni maia ka hriat chu ka nat pui a ni.

Recording pawh kan zo fel tawh a, tunah chuan hun tha nghah a ka single tihchhuah chu kan hmabak a ni ta. Steve chuan hun tha zawk a ngaichang ve reng tih ka hria a, a kuta innghah mai chu ka tih theih tawk a ni. Keini pawh New York lamah kan let leh tawh a, Steve hnen atanga thu thar kan hriat hma chuan engmah tih theih a awm lo a, Martin min sawmna angin amah chu ka pui chhunzawm ve rih a ni.

Thla khat a liam leh tawh a, engmah thu thar ala awm thei lo. Martin pawhin a khat tawkin Steve chu a be reng a, mahse, hunt ha zawk a nghah thu bawkin a lo chhang thin. A chang chuan ka beidawng ve lek lek fo a, eng ka ang leh dawn lo ni te hian ka hre bawk a, hlawhtlin pui tur khawp theihna ka nei lo em ni ka ti hial bawk a. Tlai khat chu studio-a ka awm laiin phone call ka dawng a, Martin a lo ni. Rang takin a chenna in lama phei turin min ti a, hmanhmawh takin ka thil khawih lai dahin ka tlan nghal a. Ka va thlen chuan Steve chu a lo awm ve reng a, min hrilh lawk lem loh avangin ka hamhaih lek lek.

“John, zanin atangin khawvel hian I hming a hre tawh ang”phur tak hian a lo ti a.

Ka thu hriat chu a tak tak anih ka ring ngam lo, New York ka let leh hnua Rose ka hmuh tlai te kha ka hrechhuak a. “I tingtang ah kual hi inhmeh tawk chiah. John, khawi ah mah sang taka invawrh theihna I nei ve lo”min tih a nih kha, keipawhin kha kha ka lo pawm hman lek lek tawh a, ka thu hriat thar mek chuan Rose kha a dik lo a ni tih min pawmtir chauh.

Steve chuan a sawi sual lo e, ka single tihchhuah chu kar loah a invawrh chak hle a, UK Top 10 a ka hminga chuan ve ni chuan ‘khawvelin I hming an la hria ang’ tia Steve thusawi kha a tihdik zia ka hre ve ta. US lamah pawh ka dinhmun a sang chak hle a, ka mumang ni mai hian ka hria. Toronto khuaa dawr pakhata zai ve thin, a hnua New York lama inbengbel a bar pakhata zai ve mai mai thin kha khawvel hmun hrang hrangah ka zai chu miten an ngaithla a, an duh hle a ni tih hriat chu mumang a ang tlat a, mumangah pawh ka la hmu ngai hek lo.

Steve thurawn min pek angin London lamah awmhmun ka sawn a ngai tih hriain ka puanthuah telin ka thlawk lut leh ta a, chawlh nei miah loin thlakhat chhung zet recording buaipuiin kan awm a, kan hah a, mahse, kan hlim a ni. Music video tihchhuah tumin kan buai chhunzawm a, chawlh ka nei meuh lo. Nikhat chu chutia shooting kan neih lai chuan a thuphungin Steve nen chuan kan titi dun malh malh a.

“Maria tih I hre tawh ngai em?”Steve chuan a rawn tihlawl a.

“Aw, hre tawh e. New York-ah kan inhmelhriat tawh alawm”ka lo ti mai a.

“Amah hian a nia min hmelhriattir hmasa che”a tih chuan ka phawk khawp mai.

“Engtinnge a nih theih?”ka ti ha a.

“Martin nen in rawn thlen tirha ka zin chhuah kha I la hria anga, tah khan Mexico lamah a nia kan programme neihna kha, chutah chuan Maria nen khan kan inhmelhriat hlauh a, a recorder tereuhte ah khan I zai a lo nei alawm”a ti a.

Mak ka ti khawp mai, kha Maria te kha ka kawng min sialsaktu a lo ni reng a nih chu! Ka ngaihtuah chiang telh telh a, mak ka ti telh telh bawk a. Zan lamah biak pawh ngei ka ngai a ni. Kan thiltih lai ah pawh chuan ka rilru ka pe hlei thei meuh lo, Steve chuan ka rilru hrethiam ni awm takin duhtawk rih mai turin min ti a, ka chenna apartment lamah ka kir ta a. Shower ah chuan ka inphuhtir seng senga, ka ngaihtuah ngial pawhin Maria hmel chu ka ngaihtuah chhuak thei tlat lo. Kan inhmuh hun kha a zan thil bawk nen, tin, Rose bak hmeichhe dang ka melh ngai loh bawk avangin chutiang ka chiang lo chu awm lo ka ti hran lo. Ka inbual zawh chuan TV hmaah ka thu thluang duai a, ka chanchin hriatchian chak thalai eng emaw zat lo langte chuan ka nun chu an tihlim a, an ti danglam dawrh a ni. Ka phone chu ka han la kang a, Maria number ka lo save loh avangin min rawn call na chu hailet leh ka tum a ni. Ka bei rei khawp mai, number hrang hrang atanga call ka lo dawn ve bawk avang chuan ka hmu mai lo a, ka beidawn tawh lamah ka hmuchhuak thei ta hlauh. Vawihnih a in ring naah a lo pickup nghal vat a, thawm a bengchhen deuh avangin a tawng ka hre tha thei lo.

“John.. I sawi ka hre thei lo ania”a rawn ti a.

“Maria, hmuh che ka duh”ka han ti tawl a.

A nui hak ri chu ka hria, ka hriat tawh thin ngei kha a ni tih ka chiang lehzual, a danglam hauh lo.

“I hlawhtlinnaah ka lawmpui che John”a ti a. 

“Maria, I hnenah hian lawmthu sawina tur ka ngah hle mai, nangmah vanga tun dinhmun thleng hi ka ni si a, hmuh vat che ka duh ania”ka ti leh a.

“Texas-ah ka pi tlawhin ka zin mek a, hun a awm theih chuan a remchan lai tak a ni ang”a ti a.

Ka phur khawp mai, ka hlawhtlin theihna tura a ruka lo bei ngar ngartu a ni tih ka hriat chuan eng ang hmel nge a put tih hriat chakna in ka khat nghal. Ka hmaa laptop let reng chu ka malah ka chawi kang a, facebook leh Instagram ah lutin Maria tih hming chu ka han zawng ngial a, a hmingpum ka hriat mai tawh loh avangin ka hmu thei lo. 

Ka hun tam zawk chu studio lamah ka hmang a, Magazine hrang hrangin min interview an duh ve bawk nen hun awl ka nei thei mai lo. Maria chuan min ngaichang ve reng tih ka hria a, ka inthlahrung khawp mai. Ka hun hman dan a hrechiang a, hmanhmawh lo turin min ti ve bawk na a, hmuh hlan chu ka nghakhlel em a, hun remchang ka dap ru talh tho. Ka hun tiam a pelh hnu karkhatnaah Maria nen pawh kan inhmu ve thei dawn ta, engtin nge ka lo dawn sawn ang ka hre lo a, mahse ka phur a ni.

PART VII

MARIA del CARMEN

Airport-ah Maria nghakin darkar chanve vel ka awm tawh a, ka phur rualin ka huphurh bawk. Hmeichhe pakhat hi ka thutna lam pan hian a rawn kal a, ka thutna bul awl laiah chuan a rawn thu a, “Min lo hrethiam la, John Wheatley I ni tiraw?”a ti a. Ka nih thu ka sawi chuan a au ta tuar tuar a, a thiante chu a ko chul a, “A ni tak tak, ka awih thei lo”A ti a. A thiante an rawn kal a, thla te min lakpui a, zaithiam min tihzia te chu an sawi chul bawk a, hun hlimawm leh nuam tak a niin ka hria. A thenin an banah te ka signature an duh a, kan han thai leh lawp lawp bawk a, midang kan thawm hria pawh min hmuh chakin an rawn kal khawm a, hetiang hun hi a thlen tak tak ka lo ring ngai lo anih kha. 

Thlawhna a rawn tum a, ka mi nghah pawh a rawn thleng ve tawh dawn tih ka hria. A hming chuanna lehkha chu ka lekkang va a, reiloteah ka bulah hmeichhe chhe lo zet hi a rawn ding vang a, a nui sang a, a pian nalh zia chu hai rual a ni lo.

“Maria ka ni e”a tih chuan ka awih thei lo. Engtin nge khang hunah khan hetiang taka chhelo a ni tih hi ka lo hriat loh zawk?

“Ka lo lawm a che”tiin ka kuah a, zangkhai takin ka motor dahna lam panin kan inzui nghal a.

“Hotel min lo ngaihtuah sak ka lo ring tawp a”nui chungin a ti a.

“Kai nah I thleng ang chu ka lo ti mai asin”ka tih chuan a ner sak a.

“Miin engtin nge an ngaih ang che, a chi lo tawp ang”a ti a, “Tunah chuan chanchin ngah ber pawl I nih mek hi”a ti leh a, kan nui dun a. 

Hotel-ah ka thlah a, dinner kil pui tura ka sawmna erawh mawi takin a hnar thung. Lungawi lohna nei chuang miah loin min siam a, hlim takin ka chenna lam ka pan a ni. Rose nen ka rilruin ka tehkhin lo thei lo a, ani kha chuan ka buaina tur thilah pawh amah ngaipawimawh hmasa lo thei lo in min siam thin. Maria chu hmeichhe danglam tak a ni phawt mai. In ka thlen rual chiahin Maggie hnen atangin call ka dawng a, min lawmpuizia a rawn sawi uar hle. “John, nizanah Nick a rawn kal a, tisual a inti ve khawp ang”tiin a nui hak hak a. Nick kha ka lo hrechhhuak tawh lo zawk, nalh taka min hnar tu kha a ni tih ka hriat chuan ka then sak a, ka hlawhchhamna kha inzirna atan a tangkai tih hriain ka mawhchhiat duh kher lo. 

Zing dar 10 ah chiah hotel kawt ka thleng a, nghah ngai miah loin Maria chu a rawn chhuak chiah bawk. A inchei dan chu uluk fe hian ka lo thlir reng a, a pawnfen chhing fen chu hmeichhe tam tak pawhin an feng ve ngei a, mahse, a inhmeh bik tlat a ni.

“Min en reng dawn nge kan kal dawn?”a rawn tih chuan ka harhchhuak zawk a. Chhang tawh loin motor ka tinung a, kan kal ta nghal a. 

Mi tam lohna tur hmun deuh nia ka rin ah chuan ka hruai kual a, a kianga awm chu a hahdamthlak thlap a, a zahawm bik riau te chu keimaha a danglamna ka hriatthiam ve dan a ni.  Clos Maggiore ah dinner ei turin kan kal nghal a, he hmun hi ka nu damlaia ka pa in a hruaina hmun a ni a, ka nu khan a hmun hi romantic a tihzia a sawi fo vanga ka hriat a ni a, tuemaw ka la hruai ang tih lam kha chu ka ngaihtuah ngai lo. 

“Maria..”

A mitmeng pawl fiah kak chuan min melh ralh a.

“Ka chunga I thiltih that zawng zawng hi ka rul thei lo che a, nang hi awm lo la tun dinhmun hi ka thleng hauh lo ang tih ka hria a ni”ka ti a.

“John, mi special tak I ni a, keimah vang ni loin I thiamna vanga tun hun hi thleng I ni alawm”a ti a, a nui sak a.

“Ka lawmzia hi ka thiam lo”ka tih chuan ka kut a rawn vuan a.

“Kei chuan zaithiam ka tihzia che kha ka sawi ve mai a, I thiamna leh I aw nalh tak khan Steve thinlung a ti tuiral a lawm”a ti a.

A inngaihtlawmna te chuan amah min hnaihtir chak zual sauh a, mahse, zuamawm in a awm mawlh si lo. Kal duhna dang ala nei em tih ka zawh chuan a han ngaihtuah vang vanga, “I chenna hmun ka hmu duh”a ti a, a nui hawk a, a inthiam lo deuh niin ka hria.

“A hnawk viau pawhin mak ti lo la aw”ka tih chuan a lu a bu nghat a, a nui var var a.

Ka chenna lam panin kan chhuak a, kawng tluanin kan tawng lo. A rilru a thlak ang tih mawlh keiin ka hlau a, a tang teuh niin ka hria. Kan thlen chuan ka indah fel a, a ngam lo chung a banah ka kai a, kan inzui ve hnak hnak a. Mi tam lohna lamah ka kual pui a, kawngkapui lo lamah chuan ka luhpui a, a nuih a za kher mai. Ka inchhung kan luh chuan a thim thiap a, light on turin ka kal nghal a. Ka han hmeh en rual chuan an lo au rual thap a, ka hrilhhai ngei mai. Ka team te pawh keimah mai nilo, nula nena min hmu chu an inthiam lo tih hriat tak hian an ri deuh hluai a, tute pawh kan hrilhhai tlang niin a lang.

“Album release hma surprise party kan lo buatsaih ve ringawt a”Matt chuan a lo ti a, ani hi videography bawn leh turu tak a ni a, ka tan chuan mi pawimawh tak a ni.

“A nachang in hre hle mai, ka thiannu awm lai a ni bawk a”ka ti ta zung zung a. Maria chu ka hmelhriattir hlawm bawk a, ka beisei aiin ani pawh a puitling a, hmuh hrehawmin a awm lo.

Tum loh deuhin hun hlimawm tak kan hmangho chu a ni reng mai, Maria chu ka chik ru reng a, hotel lamah let duh pawh nise a sawi ngam lo ang tih ka hria, a hmelah chuan hriat mai ka inbeisei a ni. Matt chuan ka rilru hre zawk ni awm takin tindarh a rawt hlauh a, ka thaw hawk mai. Keipawh Maria thlah turin hotel lamah kan chhuak zui nghal bawk a, ka nui deuh put put reng a, ngaihtha lo tih hriat tak hian min en a, “Engati nge I nuih reng a?”a ti a.

“Keini chauh ni lo, kan thiante min surprise tum lutuk kan surprise khalh kha ka nuih a za a”ka ti a. Maria pawh chu a nui ve var var a. 

Hotel kawtah chuan kan ding reng a, awm reng theih ni bik lo chu Maria pawh Texas lam panin a tuk leh maia kal tur anih ka hrereng a, nihnih chhung lek pawh nise hlimna min thlen avangin a chungah ka lawm hle a ni. Dim tein a kut chu ka vuan a, lak sawn a tum lo tih ka hriat chuan a aia na in ka han hum a, a kun tlat a. A kun zawnga a sam tla hniang chu ka kut lehlamin ka hui chhohsak a, ka insum thei lo, a khabe chu vuanin ka han fawp a. Engtin mah min chhang let lo, mahse, min hnar loh avang chuan a aia uar chuan ka han fawp leh a, chutah chuan min chhang ve ta. Engmah ngaihtuah lo in kan infawp vawng vawng a, motor dahna niloa ka dah vanga security rawn kalin min rawn hauh hma zawng chu kan infawpa, kan thaw a chham lek lek thlengin! Ka nui sak a, motor park na lam chu ka pan nghal a, Maria chu a la kun reng a, a biang chu a sen tarin ka hria. Room lam pana kan kal chuan ka kawrluma lukhum chu min rawn khum tir a, “Mi lar ka kalpui vang hian zankhat thil thuah k alar ve thei tih hrereng la”ka bengbulah a rawn ti sap a. 

A room kan luh rual chuan engdang mah sawi loin kan infawp leh mawlh mawlh a, kan inkham thei lo a ni ber. Khumah chuan ka inbawh let tawp tawp a, kan hun neih an gang chu kan am dun hle. Ka kut chu ka len kual tir ruai a, Maria chu a inveng thiam khawp mai, kan thleng thui dawn tih a hriat chuan a hmui la sawnin a thu chhuak hlawl a. Ka tho ve duh lo, ka ban chuan ka hmai chu ka hliah a, laksawn a tum a, ka lo duh lo.

“John, tho teh”a ti a.

“Rawn mu ve phawt la”ka ti a, a banah chuan ka han pawt deuh a.

“Rawn thu ve zawk rawh, kan awmdan tur sawi ang”A tih chuan nek luih chi a ni lo tih ka hria, ka tho ve mai a.

“Engtin nge awm ila I tih deuh?”ka tih chuan min melh kal a, a mitmeng chu ka zah thar riau bawk.

“John, hmeichhia zawkin sawi a ngai hi ka inthiam lo khawp mai. New York a ka awmlaia I zai ka ngaihthlak hmasak ber kha, kha zan kha ka theihnghilh thei lo. Nangmah ka hriatna hmasa ber a ni a, ka thinlunga thi thei tawh loa I awm tanna a ni bawk”A ti a, a chil chu a lem khalh a. “Hmeichhe pakhat chauh I hmangaih tih I sawi khan ka na asin”a ti a, a ngawi ta reng a.

Chutiang ka sawi lai chu ka hre hauh lo, hotel a ka thlah zan pawh khan fim takin ka awm tih ka hria.

“I chahthlak zan khan chu thu chu min hrilh a ni. I zai zawh khan hmuh che tumin ka zawng che a, mahse, ka hmuh che chuan I lo rui hle a, tumah I hmuh duh loh thu min lo sawi khum chiam a, I hmangaih ber pawh Rose a ni tih thlengin I sawi vek alawm”a mittui a tling pam a.

Ka ngaihtuah chhuak thei ta e, khalai hmuna beidawng taka ka awmlai khan Maria hi ka bulah a lo awm reng a nih chu. Atthlak tak takin ka che aa, Maria hmaah lehnghal. Ka kuah a, duat takin a hnungah chuan ka chul a.

“Tunah chuan nang chauh hi ka ngaihtuah tawh tur che I ni alawm”ka ti a.

“Khami zan atang khan ka hmangaih che tih ka hrechhuak daih tawh, mahse, ka beidawng zui nghal a, Mexico ah ka haw daih a nih kha”a ti a.

A hmui chu ka hup a, sawi zawm tawh lo tura tiin ka fawp a. A mittui a bianga rawn luang chu ka fawp a, a nui ta sak a.

“Mexico-ah ka rawn kal anga, I chhungte bulah nang hi neih ngei che ka duh dawn a ni tih ka rawn sawi ang”ka ti a, lawm takin min kuah ta veng veng a.

Engmah ka nih loh lai atanga min hmangaih a, ka tan theihtawp chhuahtu hmeichhe duhawm tak hi ka phu lo tih ka hria, min hmangaih miau a, ka theihtawpa hmangaih let hi ka tih tur dik tak a ni.