IT'S YOU (Dei Maphi) Chapter 2

IT'S YOU (Dei Maphi)

Chapter 2

PART 5

*SANGKIMI*

Krismas chawlh kan hmang zo a, Tim-a pawh a rawn let leh tawh tih ka hria. Engmah thawm a rawn nei lo a, keiin ka nei bawk lo a, ngaih chang ka ngah tih ka pha lo. Kha leh chen lo inkawp ve chu sulhnu pawh kan ngah, hma lam pan tura tan lak ka ngaih nasat bik zia te kha. Kevin awm lo se vawi tam ka tlu sawp ngei ang. Ka mamawh hun apiangah ka koh theihin a awm a, min tibeidawng ngai lo. Kan product thar kan buaipui tawh avangin Mumbai nen a kar tawn sek a ngai a, ka ai a awh zo in ka theih phak bak theihna a nei bawk a, ka mamawh chhanna a ni tak zet a ni.

Office chawlh te a nih avangin ka pa thlan lama kal tumin ka inbuatsaih a, Matleii rawn haw lai a lo ni bawk nen ka sawm a, kan pahnihin thlanmual lam kan pan a. Kawngtluanin Kevin chungchang chu Matleii’n a sawi a, ka hriat tawh loh thil tam tak ka hriat thar phah leh a, Matleii lo buaipuitu Kevin kha anih chuan kei hi a hma atang daihin min hre tawh tihna a ni thei ang em?

“Kolkata ah pawh kan inhmu tak asin”

Ka phun mai nia ka hriat chu ka lo sawi ri a ni ngei ang, Matleii chuan min rawn melh a.

“U Tim-a bak ngaihsak ngai hek lo che, midangte chu I phek en vel mai mai ang chu mawle”a lo ti zat a.

Ka nui a, a ni chiah alawm, Tim kha ka khawvel a ni a, mipa dang reng reng ka ngaihtuah ngai lo.

“A ngaihven hle chein ka hre bawk”a tih chuan ka nui ri hak a, chu chu ka ring lo.

“U, engtia awm nge I tum?”tia min zawh leh chuan chhan ngaihna mai ka hre lo.

“Ti hian kan tawp chu a ni deuh mai. Engtia han awm zel tur nge tih chu ka hre lo a, mahse, let leh kan tum lo ve ve a ni ang”ka ti a.

Matleii chu a thaw halh a, min ngaihtuah tih ka hria. Thlanmual kan thleng a, kan thusawi pawh kan chhunzawm ta lo. Ka pa thlan pawh Mas laia kan chei mawina te a then a lo tla a, kan han chhar khawm a, kan han thian fai bawk a. Nu leh pa tel loin hei chen ka khawsa ve tawh a, mi tam tak chuan min fak a, thenkhatin ka patea te bula ka awm lo chu min dem bawk a, engmah hian min ti buai lo. Ka pa khan puitling ni turin min chher hriam miau a, khawvel hmachhawn dan pawh ka lo thiam ve ta a ni ang. Ka pa thlan chu ka han kuah a, min duatna kha ka la kham lo a, ka la mamawh a ni. Matleii’n ka dar a rawn vawn chuan ka ngaihtuahna ka lo kawm nasa leh hman hle tawh a, ka nau hrilhhai taka ding reng ka hmuh chuan ka khawngaih hle a, ka han nui lui a, a hmel hahdam huai chu ka hmuh hmaih lo. In lam pana kan haw chuan tumah kan tawng lo a, mahni ngaihtuahna kan kawm dun pawh a ni maithei. An in kan thlen chuan chawei turin min sawm nasa hle a, tih tur ka la neih nual avangin haw phawt chu ka duh a, min hnial lui bik lo. In ka thlen chuan hnathawh tur ka neih ang chu thawh ka han tum a, eng tih mah ka phur lo.  Kevin chu biak ka duh viau na a, a hun hman mek dan ka hriat loh avangin ka tibuai ngam chiah lo. Ka ngaihtuahna tih fim tumin bathroom lam ka pan a, inbual ila ka harh deuh mahna!

x-----------------------------------------x------------------------------------x---------------------------------x



Ka phone ri chu a lo tawp hman chiah a, en pawh tum chuang loin ka inthlak fel a, rawng bawl tumin choka lamah ka pan ta daih a. Hetiang teh thuta Kevin ka nuna a rawn lang hi chhan a awm tlata hriatna ka nei, chu mai piah lamah awlsam taka mipa ka hnaih awmchhun chu Tim-a tih loh ah chuan Kevin chauh hi a ni. Matleii khan a sawi dik chiah a, Tim-a kha ka mipa rin ngam awmchhun anih avangin amahah khan thuk takin ka nun pawh hi a innghat thlap. Mahse, kan lo hetih takah chuan eng emaw tak ka nunah hian kim lo a awm tih ka hria, ka ngaihtuah nasat pawhin ka hre mai chuang lo. Ka ngaihtuahna chu ka lo kawm tui lutuk a ni nag, ka cooker sit ri ah chuan ka phu zawk a, keimah chuan ka nui ta var var a. Chaw ka eikham fel meuh chuan a lo tlai leh duai tawh a, mahni awm ka nih avang hian chawei hunbi tak tak pawh hi ka nei lo. Doorbell a rik chuan zan thil a nih avangin fimkhur thu hlaah ka han bih hmasa a, kawngkhar nghenga thatchhe taka Kevin ding ka hmuh chuan mak tak maiin ka thin chu a phu dat dat a. Eng emaw tak a thleng dawn nia hriatna ka thinlungah a rawn lut nghal. Kawngka chu ka hawng a, nui sanga Kevin min melhna chu rei en ngam loin ka hawi sawn san a, lut turin ka sawm nghal bawk a. Thutna ka kawhhmuhah chuan thu duh loin ka bulah chuan a thu a, a chet dan engkim mai chu ka lo ngaihbel vang nge, a mak riau hian ka hre tlat.

“Phone I pickup thei lo a”a tih chuan room lamah ka dah daih tih ka hrechhuak a, ka chaweikham fel hnu pawhin ka la khawih miah lo tak alawm.

“Room-ah a awm daih a”ka ti mai a.

“Um”a ti sap a.

A ngawih tak daih avang chuan ka va en a, min lo en ve reng a, rang lutuk hian ka hawisawn a. Ka kawngah min rawn kuah thut a, a lamah min pawt hnaiin min fawp ta mai a. Ka hamhaih lutuk chu chet ngaihna pawh ka hre lo. Thaw hakin a inla hrang a, ka rilru a fim ve chiah. Thil thleng mek avang chuan zak em em hian ka kun a, engvanga lo dang lo nge ka nih ka hre lo.

“Ka hmangaih che. Sangkim, ka hmangaih tak zet che a ni”a ti a, harsa tih hmel taka sawi a ni tih ka hai lo. Ka kut chu a rawn vuan a, amah en tur chuan min ti lui a, ka en a, chiang tak pawhin ka en ngam lo.

“Kevin, engtik atangin nge min hriat?”ka ti chhuak hlawl a.

“Kum 6 dawn chu a liam tawh ang. Hyderabad-a Matleii buaipui tura I rawn kal tum khan ka hmu che a, ka vawikhat hmuhnaah che khan ka buaipui zui tur awmchhun I ni tih ka inhria”a ti a.

“Anih chuan min buaipui zui ta si lo a”ka ti a, ka nui a.

“Timothy nen ka hmuh cheu khan ka thinlung hi a kehchhe vek. Engtin nge mi duhlai chu ka lo buaipui ngam ang?”a ti a, na a ti tih a tawngkam ah chuan ka hre thei.

“Kevin, khatih lai khan Tim nen khan thian satliah chauh kan ni, ka tan a hlu em a, mipa ka rin ngam awmchhun a ni bawk a. Khami tuma Mizoram kan thlen hnu atang khan pangngai takin kan inkawp chauh”ka lo ti a. Chutiang thlenga Tim nen kan chanchin ka hrilh chu Matleii chauh a ni thin, tunah Kevin hnenah ka sawi leh mek a ni a, hepa hi ka tan eng nge a nih le?

“Anih chuan tunah hian eng rilru nge I put tih ka zawt thei che ang em? A hma khan ka rilru hre miah loin min chhang a, tunah ka rilru I hre tawh a, I chhanna kha a la ngai reng em ni?”a ti a.

“Um.. Chhanna dang ka pe thei rih tlat lo che, kum hei leh chen ka lo kawp thin chuan ka thinlung hi a la luah thuk tlat a ni”ka ti a.

A inla hrang a, “Ka beidawng dawn miah lo ania”a ti a, ka lo nui a. “Kum 6 chhung ka lo nghah tawh chu awlsam takin ka tawpsan ring suh ang che. Beisei tur a awm tawh loh hun thlengin ka lo beisei tlat ang”a ti a. A thutna atangin a tho a, haw a tum anih ringin ka tho ve a. Eng emaw sawi tum hian a ang zuau a, engmah sawi lo chuan kawngka lam chu a pan ta zawk a. Kawngka chu ka ngheng a, ka mangtha a, min mangtha let ve sap a, a tlan liam thleng chuan ka thlir a. Ka ruak nghal huai hian ka inhria a ka ngaihtuahna avang erawh chuan ka zak a, awmdan tur ka hrethiam lo.

PART 6

*KEVIN*

Ka theihtawpin company tan ka thiamna chu ka pe ve zel a, chumi rual chuan Sangkimi hi a chhan lian berah chuan a tel ve zel. Amah hnaih theihna remchang inhawng chu bawhpelh ka tum lo hrim hrim. A cheziaah hian min haw lo tih ka hria, a rilru min pe ve tur erawh chuan hun ala duh ang tih ka hria, chutichung chuan beiseina nung hi ka nei tlat thung. Mizoram sorkar nena kan thawhdunna pawh rin phak bakin a hlawhtling a, Sangkimi hlim hmel hian chakna min pe thar leh thin. Kan product thar pawh launch theih turin kan tifel kim thawkhat tawh a, tunah chuan Mumbai lama kan hotute inpeih hun nghah chu a ni mai tawh. Ka hnathawh loh kar lakah online games ka khel ve zeuh zeuh thin a, ka phone chu bih in ka lo kun ngar ngar a, ka bula ding an awm pawh chu ka lo hre mai lo. Ka hminga min koh avang chuan ka han hawichhuak a, Timothy chu hmel dur deuh hlek hian a lo ding a. A hmel ka hmu chu ka lawm lo kher mai, ka hun tha a rawn tichhe leh vek niah ka ngai nghal hmiah.

“Sangkimi ka hmu duh a”a ti nghat a.

Ka thiante ka en a, tumah room-ah chuan an lo awm lo.

“Han chho mai la”ka ti a.

“Min hmu duh tlat lo alawm, ka hmuh ngei ngei a ngai”a tih chuan ka lo lawm ru ve tawp.

“A hmuh duh miau loh che chuan puih theihna che ka va nei mai awm lo ve”ka ti a.

“Hei hi lo pe rawh, a pawimawh tih lo sawi tel bawk la”tiin lehkha themah hian thil a ziak a, ka kutah chuan a rawn hmehbel nghal a. A inher a, a chhuak nghal vut a. KA kuta lehkha chu ka en a, “Bon Apetite, 5:00pm”tih zawng hi a inziak a. Ka rum nghat a, ka thil pek chak loh ber chu a va chiang tak! Ka hnathawh pawh ka tui lo, ka rilruah eng emaw hian min mawlh tlat a, ka lehkha ah lai chu ka han en leh ringawt thin a. A tawpah chuan phur lo zet hian inchung lamah chhoin ka boss room-ah chuan ka lut a, ka thawm pawh a hre mai lo. Min hmuh chuan a phu deuh zawk a.

“Min ti phu alawm”tiin a nui a.

“Tim-a a lokal a, hei hi pe tur chein min ti a”tiin lehkha them chu ka han pe a. A lak pah chuan a en thuak a, a dawhkanah chuan a dah mai a.

“Thil dang ala awm em?”a tih chuan ka lu chu ka thing a, kal chu ka tum a.

“Ka haw tlai ang, hna zawh fel ngai ka nei tlat”a ti a, a thil tih lai chu a ti leh mawlh mawlh a.

Ka thutna ka thlen chuan ka taksa na deuh ur chu ka hria, ka lo tang ve chiam zel hi a mak a ni. HMeichhe dang tam tak zingah hian eng nge a that vak bikna awm ti tein ka han inzawt leh rih a, mahse, ka tan chuan a danglam miau si a. Ban a hun a, thiante ho an haw sap sap a, ka rilru ruk takah chuan Sangkimi chu ngaihven ka duh a ni. Darkar chanve lai a liam hnuah pawh a room atangin a rawn la chhuak lo, heta lo nghah tawp ai chuan tiin a room lam chu ka pan ta nge nge a. A lo phu leh zawk ang tih hlauin kawngka chu ka han kik a, min lo chhawn vat a. Ka hmel a hmuh chuan hmuh min beisei lo tih hriat tak hian a lo phawk deuh hra a.

“Hna laklawh I nei em ni?”a ti a.

A zawhna pawh chhang lo chuan chair ah chuan ka thu a, a thil tih lai chu a chhunzawm malh malh a.

“Ka puih theih thil che a awm chuan ka lo pui ang che ka ti”ka ti a, phur tak hian lehkha chhah zet hi min pe nghal a.

“List a hming awm ho hi lo circle char char rawh”tiin pencil min pe bawk a. A sawi ang chuan ka han ti nghal a, thawh chak a har phian lehnghal.

“I kal dawn lo em ni?”tiin ka va melh hram a, min en lo chuan a lu chu a thing a, kal a tum lo tak tak anih ka ring.

“Ka kal I duh deuh em ni?”

Ka va melh kawk a, a lo then tha a.

“A teuh lo”ka awki chu ka tum aiin a lo sang a, mak tih hmel takin min melh kal a, ka inthiam lo ru deuh ngei mai, “Tihpalh”ka ti zui sap a.

“A ho lutuk”tih pahin a nui leh ta mai a. Ka insum zo lo, ka thil tih lai chu ka dah a, a thutna lamah ka han pen hma hret a. A chair ban chu ka ha vuan a, kan hmai a insik lohna chu tlem te chauh a ni. A biangah chuan ka dawm a, a hmui fawh chakawm zet chu ka han fawp a, min haw lo tih hriat zeta min chhang let chuan ka tisual lo tih min nemnghettir a, ka hmui ka la sawn tur chu phal lo in ka nghawngah min rawn kuah a, kan thaw a chham rak thleng chuan kan infawp a. A hmui a la sawn a, min nuih sak a, “Ka lawm e”tiin a beng bulah chuan ka phun sap a.

Office atanga kan haw chuan dar 8 a lo ri der tawh a, ka vawikhat thlahna a ni hauh lo, mahse, tun tum chu ka duh ber kut vuan chunga ka thlah hmasak berna a ni tlat a, a dan a dang tlat. Gate bulah chuan motor ka ti ding a, len luh chu chak viau mah ila muangchanga thil hi ka kal tir a ngai tih ka hria.

“I rawn lut kawi lo ang maw?”a tih chuan ka rilru a buai leh hman lek lek a.

“Hna kan ngah dun em mai, naktukah ka rawn sawm ang che”tiin a biangah chuan ka piai a. Motor a tanga a chhuk tur chu a banah pawt letin ka han fawp leh zeuh a, a nui hmel duhawm zet chu thlir reng mai ka duh. Inchhung a luh thleng chuan ka thlir reng a, a ban a rawn vai chu lo vai let ve in in lam panin ka tlan ve ta nghal a. Zan hi ral vat se, hmu leh vat ila ti chung zelin ka tlan liam ve ta a.

x---------------------------------x------------------------------------x------------------------------x

*SANGKIMI*

Thawk leh khata ka nun inthlak hi ka rin phak bak a ni. Mipa pakhat chauha nun innghat thin kha ka hriat ngai pawh ni lo lakah ka rilru ka han pe mai thei chu a mak a, thil thleng thei turah tumahin an ngai lo ang. Ka nuna ruak awm tlata ka hriat thin kha Kevin ka tawn dawn vang hi a ni mai awm mange tiin ka mut hmunah te hian ka ngaihtuah fo a, a kianga ka awma ka hahdamna ang hi tu hnenah mah ka la tawng ngai lo. Tim-a chu ka rilruah a rawn lang zawk a, kum 5 chuang kan inkawp chung khan a nupui tur angin ka insuangtuah thei ngai lo. KA tan mipa tha tawpkhawk a ni tih hre mah ila ka thinlung hi a hel tlat thin kha a ni a, chhan a lo awm reng vang a lo ni ngei ang.

“I rilru I pe lo lutuk”tih pahin ka chalah chuan na lo te hian a rawn pen keuh a. Ka pencil chu ka han seh a, khap lek loa min melh rengtu Kevin chu ka han nuih a.

“Ka zo tawh alawm, I la zo ve nange”tiin ka paper chu file ah ka khung a.

“I phakar hle mai, a tam zawk min pe anih kha”a ti bai bai a.

“Coffee ka in dawn, ka chhuahsan che”tih pah chuan ka tho a.  Ka chhuah dawn thleng chuan a phun zui bal bal a, kan project tih hlawhtlin a ni thuai dawn tih ka hriatna vang pawh chuan hlim tur ka ni reng reng tlat alawm.

Coffee dawm pah chuan tukverh ah chuan ka dak voh voh a, boruak awmdan chu a lunglenthlak lam mah mah a ni. Ka kawnga kuahtu awm avang chuan ka au deuh that a, Kevin chu a nui hak a. A kut chu ka han la sawn dawn a, a aia nghetin min rawn kuah a.

“Kevin, a chi loh em mai, midangin min hmu ang”ka tih chuan min thlah ve ta mai a.

“Midang mitmei ven reng chu a harsa ka ti dawn hle mai”tiin awmze nei tak hian min siai a, a sawi zo hman chauh ang tihin midang pawh an rawn kal ve ta sap sap a, Kevin chu a kalsawn nghal a. Office romance a awm thei lo ang tih ka hrilh lawk avangin a theihtawpa a inthup tur thu a sawi ve a, midang hriat hi ka duh lem lo.

Ka patea te in lamah chaw ka ei avangin inah ka haw har angreng a, Matleii chu min thlah pahin ka ina a thil theihnghilh la turin min zui a. Eng eng emaw kan sawi a, ani a awm hi chuan nuam pawh ka ti thin reng a ni. Ka in kan thlen chuan gate chu a lo inhawng deuh a, ka khar tha viau khan ka hre si a, hmanhmawh takin ka han hawng a. Kawtah chuan Tim chu a lo vei tawn sek a, min hmuh chuan a thaw huai hian ka hria. Matleii chu ka han kheuh zeuh a, a tih tur hai lo zet hian Tim chu a bia a, kawng ka hawng a, inchhung lamah kan inzui lut a. Matleii chu ka room lamah lutin tihtur a neih thu a sawi a, a tum aia rei a awm a ngaih leh phah ngei dawn a ni.

“Tinge min rawn biak I tum miah loh a?”

Ka va melh a, khawdang hawi lek lo hian min lo melh reng a. Chu zawhna chu ka zawh tur niawm tak zawk hi a ni a, kei chuan biak ka tum ngei a, amah zawk hi ka biak tura awm duh lo kha a ni zawk si a. Chhan ngaihna ka hre lo, ka nui ringawt a. Ka nuih avang chuan mak tihna a hmelah a lo lang a, ka nuihzatna chu huatnaah a inlet ve thung.

“Inkawp tur kan ni lo a ni ang tia ka bula I sawi khan ka inngaihtuah nasa khawp mai. Tunah hi chuan I sawi dik tih ka hre tawh”ka ti a. A thu ngil awt a, a telloa nun dan thiam lo thin khan chu thu chu ka sawi chhuak a ni a, mak tih loh rual a ni lo ang.

“Sangkim, thinrim lai chuan kan duh loh deuh deuhte pawh hi kan sawichhuak fo tih I hriat kha”a ti dam dap a.

“Keichuan uluk taka ngaihtuah chungin thutlukna ka lo siam tawh, a pawi ka ti khawp mai. Hna thawh tur ka la neia, min hawsan thei tawh ang em?”ka ti a.

A thutna atanga tho chhuakin a kawng a dawma, a thaw halh a, engmah hi a siam that theih tawh loh tih rin harsa a ti a ni ngei ang.

“Khawngaih takin lo ngaihtuah tha leh rawh, I duh chen chen ka nghak ang che, ka nawr lo ang che”min kuah a tum a, ka lo tawlh sawn a. “Ka thei lo, ka beidawnsan thei lo che”a ti leh a.

“In khuaa I nupui neih tur thang vel pawh kha ka lo hria a, in inkawp fuh zawk ka ring e. Kan pahnih hi chuan tihian kan tawp a ni mai”ka ti a, ka thusawi avang chuan a nui zet a, ka thutak em avangin a nui hmel chu thinrimna ah a inlet nghal a.

“Tenawm lutuk, I rinawm loh hmasak avangin tikhan min puh reng reng suh”a awki chu a sang hle a. Matleii chu room atangin a rawn chhuak nghal a.

“Tim, min hawsan phawt mai rawh”Matleii’n a tih takah chuan rei awm ngam tawh loin a chhuak ta a. Kan boruak tehhrep vang chuan ka chau hluah hluah. Matleii ngaihtha thei lo chu ka bula riah a tum ta hial nghe nghe a, tul ka ti vak lo na min ngaihtuahna chu a zahawm ka ti a, ka hnial duh lo.

Zankhuain ka inngaihtuah a, ka chunga thil thleng mekte, la thleng tur nia ka rin te chu ka suangtuah kual vel a, ka tana tha tur hi eng hi nge ni ang tih ka hrethiam lo. Kevin ka tawn atanga ka nun chhungril hlim ta viau pawh ka hai hauh lo, mahse, ani hian reiloteah min kalsan leh si se engtin nge ka awm zel ang? Ka muhil theilo chu ka inlet leh thin a, hun rei tak ka kawp tawh Tim-a mize tam zawk hi chu ka hria a, misual a ni lem lo. Rei tak ka la hriat loh Kevin ve thung hi hriatchian nan hun ka la mamawh tam maithei a, ka rilru zawng zawng pek tlak a ni em ka hre lo. Chutichung chuan ka rilru zawng zawng a luah khat lawi si. Ka phone a whatsapp msg rawn thleng chu ka han bih dek dek a, Kevin a lo ni. Dar 1 a pel tawh a, chutiang huna min rawn bia chu pawimawh a awm anih ka ring. Msg chu ka han hawng a.

*Ka ngai che, ka muhil thei lo*

Ka chhiar chu ka nui ta var var a, chhan letna chang pawh ka hre lo, ka awm ah ka phone chu ka han dah vang vang a, Kevin chu ka mitthlaah a rawn lang a, a hmel ngainatawm leh hmeichhe duhzawng tak a pian nalh tak te, engkim chu fiah em em hian a rawn lang vek a. Ka tum lawk pawh ni lem loin ka han call ringawt a, a pickup rang kher mai.

“Min ngai ve tho tih ka hria”a tih chuan ka nuih a za hle a, chhan ngaihna pawh ka hre lo. “Ka lokal dawn”tih leh phone dah chu a rual a. Ka phone screen thim reng chu ka melh tawp ringawt a, tun ang hunah chuan fiamthu pawhin a rawn kal peih lo ang. Ka puan sin lai chu ka han pawt a, ka inkhuh tha a, muthilh ngei ka duh a ni. Ka room tukverh zawn chu a rawn ri rak a, misual anih ringin light chu ka on vat a, ka thin chu a phu deuh dat dat bawk a. Ka hminga min rawn koh ri ka hriat chuan ka thaw huai, Kevin ngei a ni. Tukverh chu ka va hawng vat a, thei leh thei lo hian bangah a rawn lawn a lo ni.

“I ti tak tak elaw?”a banah chuan ka lo pawt a.

“Ka tih tak tak loh I ring deuh em ni?”a thaw deuh ham ham a, a hah hle a ni ang.

A rawn lawn chhohna chu ka thlir thla a, ka hlau thar hle a, tla palh se chuan dama chhuah mai na chi a ni lo tlat. Ka khum bula thuthlengah chuan a thu a, a thawk dan a la pangngai lo, tui ka thlitsak a, a lem khalh khalh a.

“A va hau tak ve”a ti a, a nui sang a.

“I ti awm ang lo e, I lokal tak tak dawn tih ka hre lo a”ka ti a.

“Ka ngai che a, ka hmu chak che alawm”a ti mai a. A bulah chuan min kai phei a, mipa tumah ka room-a lut an la awm ngai lo.

“Tumah an lo la lut ngai lo a”ka ti bah niai a.

“A hmasa ber zel nih hi ka duh alawm”a ti sap a. Ka kawngah a kuah a, ka darah a lu chu a nghat a, ka khawr deuh riau chu ka thiam loh pawh a ni lo, hetiang hian tumah ka la awmpui ngai lo. “Minute 10 ka awm anga, ka haw leh mai ang”a tih chuan a thusawi ang takin a ti ngei ang tih ka ring leh hmak. Ka kut chu a khal neuh neuh a, engmah kan sawi lo, mahse, keipawh hian ka thlahlel ru tlat a, ngaiw renga a kianga awm pawh hi a hahdam ka ti.

“Ka va haw tawh ang aw”ka bengbulah chuan a rawn ti a. Ka lu chu ka bu nghat a, ka biangah chuan a rawn fawp zeuh a, chutah kun hniam leh deuhin ka hmuiah a rawn fawp a, keimaha phurna lo awm ve chu ka hrethiam lo, duhthawh tak hian ka chhang let ve mial mial a, hetiang taka min tiphur thiam hi la hre ngai lo. Ka hmui chu ka han la sawn ta hram a, a rum hak a. “Ka fawp ning thei dawn lo a nih hi”a ti a, a hmui ka lo hup sak a, a la nui sak tho a.

“Kawng pangngaiah kal tawh rawh, ka lo thlah ang che”ka ti a. Room kawngkhar ka hawng tur chiah hi room piaha Matleii rizai nen a inpawm chhuak chu ka va hmu thut a, ka phu nasa kher mai. Zanlaiah inkhel a en tur thu a sawi tak alawm, football atchilh tih takah a pawlte inkhel en a tum a ni ngei mai. Kevin chuan a rawn hmu ve hman tho a, ani pawhin tih vak ngaihna  a hre lo. Bangah chhuk dawn se  a hlauhawm nasa mai si a, ka rilru a buai khawp mai.

“Zanin chu ka riah a ngai nih hi”tih pahin ka khumah chuan a mu nghal a.

“A chi loh”tih pahin ka tlan nghal a, a mu chu kaihthawh ka tum a.

“Anih chuan Matleii hmuh ngei ka ngai dawn si a, engtin nge kan tih chuang ang?”tifuh inti zet hian min en a. Duhthlan tur ka nei leh ta lo.

“Engtinmah ka ti lo ang che, ka tiam ache” a ti a. Ka ring tawk khawp mai, mahse, nuam ka ti lo a ni. Min kai a, tui lo zet leh inthiam lo zet hian ka mu ta nge nge a. Hun reilote tak tak kan la inkawp a, hetianga kan awm nghal ringawt hi ka rilru a nuam lo a ni.

“Tui deuhin mu rawh aw”tiin ka chalah a fawp a, min kuah a, a muhil nghal nge ka hre lo. Ka harh kar thung a, kan awmdan chu ka mumanga nise ka ti hial a, a thleng miau si.

Engtin tin nge ka muthilh ka hre lo, ka harh chuan khua a lo var iar tawh a, Kevin mutna chu ka en a, a lo awm tawh lo. Ka zak thar em em a, engtin mah awm lo mah ila ka inthiam thei lo. Ka phone chu ka han en a, msg a lo hnutchhiah a, hmuh ka hreh zo vek mai.

Office ka thlen chuan ka room lamah ka tlang nghal a, ka awmdan lai hu reng chu tih bo ka duh ngawt mai. Hna ka ngah deuh bawk nen ka room chu nilengin ka chhuahsan lo. Ban hun thleng chuan ka buai em em a, khaw dang ka hawi hman meuh lo. Ka room atanga ka chhuah chuan ka naute ho an lo tho sang sanga, Kevin hmel ka hmu lo. Garage atangin an motor an la chhuak hlawm a, motor neih ve hi ka mamawh a ni ka ti rilru neuh neuh a, taxi lak fo ngai hi ka ning tan riau. A hma kha chuan Tim-a ka ring deuh tawpa, tunah chuan keimaha ka inngaihtuah ve tak tak a ngai tawh ang.

“Rawn lut rawh”

Ka bula car rawn ding chu ka han en a, Kevin a lo ni. Ka han hawi kuala, an haw deuh vek tawh avangin hnial duh hran loin ka lut ve mai a. Ka speed duhdan a hre tawh a, muang lutuk lo, hlauhawm si lo in min tlanpui a, ka zamna erawh a bo chuang lo.

“Min hel nileng hle mai”tiin a nui hak a.

“Ka buai alawm”ka ti tha ve mai a.

“Um,, lo awih phawt ila, min ngai lo tan nghal der  maiin ka hria”a ti a, a thle deuh bak a.

“A teuh lo e”tiin ka hmui chu ka liak zeuh a, sawi zawm tur pawh chu ka hre chuang lem lo a.

“Ka pa a tha vak lo a, phai lama kal te kan han sawi leh deuh a, engmah a la chiang lo a”a ti a. A pa that loh avanga Mizoram lama rawn awm leh a ni tih kha ka lo theihnghilh hman lek lek a, ka hrechhuak leh chiah.

“A va zia lo ve, hna lamah chuan engmah ngaihtuah a ngai lo ania aw, I pa chu I buaipui hmasa phawt dawn nia”ka ti a.

Ka kut chu a rawn hum a, “Ka zam khawp mai”a ti a, a zam ve tak tak a ni tih ka hria. “Kawtah hian ka drop mai ang che aw. Ka rawn kawi chak viau na, ka thei rih si loa”a ti a. A kut chu ka han hmer salh a, “Kei chu ngaihtuah ka ngai lo ania, I pa kha ngaihtuah tha viau phawt la”ka ti a. A nui lui sak a, a hmela zamna awm ve chu ka hmuh hmaih lo, mipa inringtawk tak mai kha a ni a, chutianga zam hmel put chu a inhmeh lo. A tlan liam thleng chuan ka thlir reng a, dinhmun tha loa a din loh hram ka duh tak zet.