IT'S YOU (Dei Maphi)

IT’S YOU
(Dei Maphi)

Mami Lalhmangaihzuali Chawngthu

PROLOGUE

Ka lehkha inchhawp hnawk zozai chu thawk zo hman dawn in ka inhre lo a, pawn lama ruah rawn sur seng seng bawk nen hnathawh chu a nuam tehchiam lo. Ka jacket ipte chu ka han zen a, ka jacket hnuaia ka hak ka kawr tlang rawn lang chu ka han melh zawk a, ka nui lui sak a. Ka hun kal tawh te chhui kir hlauin ka thaw hawk hawk a, phur lo hle mah ila ka hnathawh mek chu ka chhunzawm leh ta mawlh mawlh a. Thawklehkhatah ka computer chu a rawn thim hmuk a, thawh zawm ngaihna reng reng a awm lo. Intercom chu ka han ban dawn a, a hrui a lo chat vek tih ka han hmu bawk a, a ngaihna ka hre lo kher mai. Ka bag chhunga ka phone ah lai chu lakchhuah ka tum a, a chian loh avangin dawrah siamtir turin ka dah tih ka hrechhuak chawpchilh a, ka vanneihna ni chu a ni lo chiang a ni. Ka chair atanga tho chhuakin room lehlama ka naute ho hnathawhna lamah ka lut a, anmahni tawkah an lo buai ve hle a, be buai duhlo in inhuai lam ka pantlang ta nghal a. Coffee chu ka han thli a, tutepawh mahni hnaah kan buai theuh niin a lang, coffee in tura rawn chhuak thla pawh an awm lo. Tukverh inhawng lam chu ka pan a, thli thaw vuk vuk kara ruah rawn tla sep sep pawh chu pawi sa lo in ka hmuh theih hla ber chu ka thlir vang vang a. Ral atanga motor rawn tlan phei zel pawh chu ka hmuh hmaih lo, kan awmna building lam pan chuan a rawn tlan zel a, security ten gate an hawn thleng chuan ka hmu thei a, a rawn tlan lut a, ka hmu thei tawh lo. A hnu rei vakloah gate duty chu rawn lutin tuemaw min hmu duh an awm thu a rawn sawi a, ka room –a chhoh leh ai chuan tiin ka awmna hmunah chuan ka lo nghak a, rei nghah a ngai lo. Hun rei tak ka lo hriat tawh thin leh ka ngaihtuahna zawng zawng neitu chu ka hmaah a rawn inlan hlawl mai, mak tiin ka melh kawk a, min nuih sang a, ka insum hman lo, ka tlan a, ka kuah ta ngawih ngawih a.

PART 1

Ka hming chu Vansangkimi a ni a, company ah Branch Manager hna ka thawk mek a, ka hun tam zawk Delhi lamah lehkha zir nan ka hmang a, ka zir zawh hnuah mahni ramah ngei thawh ka duh avangin hnadang kalsanin Mizoramah ka let leh a. Sorkar hnathawh ka tum loh bawk avangin company lamah ka thawk chhunzawm a, tuna ka thawh mekna hi Delhi ka awmlaia offer tha tak min pe tu an ni a, kan ramah ka awm duh tih an hriatin risk tak meuh meuhin Branch an hawng rup mai a, enkawl turin min dah chhunzawm nghak a ni. Ka nu leh pa hi ka naupanlaiin an inthen a, ka nu in pasal dang a nei a, ka pa hian college ka kal laiin damlohna pawh awm loin min boralsan thut a, ka patea’n min enkawl chhunzawm a. Ka patea hi Department pakhatah a hotu ber a ni a, Mizoram lama ka haw leh hnu pawh hian ka phak tawk hna te pawh min siamsak a tum thu vawi tam min hrilh a, mahse, sorkar hna thawh ka tum loh em avangin ka dil buai duh ngai lo. Ka naupan tet atangin mahnia khawsa thang ka ni a, mahni tawkah ka lu pawh ka zo ve hle chuan ka hria. Ka pa nena kan inah chuan keimahin ka khawsak chhunzawm a, ka patea remti chiah lo chung chu ka dil lui a, puitlin zir nan pawh thaa ka hriat thu ka sawi chuan a hneh ta ber a ni ang, a phal ve ta hram a. Ka nu kha hmeichhe zakzum leh chut tak mai a nih avang khan ho te ah pawh harsatna a tawk mai zel a, ka nu ang nih ka tum lo a, mahni inringtawk taka ka nun hman chhoh hi ka tum hle a, Mizo tawng hriat tur awm miah lohna hmuna school ka kal pawhin buaina ka tawk ngai lo. Chhel hi a zira zir a ngai tih ka hria a, ka bei a, ka hlawhtling hle reng bawk niin ka hria. Ka pa kha pa tawng tam lo tak ni mah se a fanu min enkawlnaah hi chuan a pass chiang hlein ka hre ve thin. Hmangaihna nen min enkawl a, no turin min enkawl ngai lo. A hunlai kha chuan min hmangaih lo a ni ang tih mai tur khawp khan a khirh ve thin a, mahse, chhel min zirtirna a ni tih tun hnu hian ka hrechhuak. Khatia nupui pawh nei tawh loa kei min enkawl a thlang kha a thih hnu hian lawmna chang ka hre chauh a, ka lo a ngawt mai. Chung ngaihtuah chuan ka muhil lawk thei lo a, hma takah office thlen ka ngai tih hriain ka han inlet a, muthilh tumin ka chhing ta vang vang a.

Ka dawhkana chanchinbu inthlep chu ka han ban hmasa ber a, Assistant Manager thar kan lak dawn avangin keipawh ka inhmakhua ve deuh a ni. Ka dawhkanah chuan dilna lehkha rawn lut ho chu ka han dah a, an experience atanga han duh deuh pathum lai chu ka rilruin ka chhinchhiah a, ka thutna tur lam pan chuan ka kal ta nghal a. Ka rin aiin kan rei ta zek a, nileng deuh thaw a kan beih hnuah kan zo ve thei ta hram a, office ban hmaa kan staff thar chu main office lama thawn hman ka ngaih avangin ka buai hle a, tin, pahnih lak duh ka neih avang pawhin ka rilru a buai hle. Pakhat zawk chu ka Mizo pui a ni a, a elpui deuh a kan dah hi thiamna ah a sang deuh a, tin, experience a ngah bawk. Mahse, Mizo kan induhsak theihna awmchhun a ni tih hria in Kevin Vanmalsawma chu ka thlang ta a ni. Ka phone a rawn ri ral ral a, ka phu zawk a, Tim-a hming ka phone screen a a rawn lan rual chiah chuan hriatchhuah ka nei nghal.

“Aw, Tim, ka hman tep”ka ti ringawt a.

“Ka awm tawh ania, I rawn tlai loh ka beisei”tiin phone a dah a.

Hmanhmawh takin ka inkhung fel sawk sawk a, Tim-a nena dinner kan ei tur ka lo theihnghilh ringawt chu ka inthiam lo tak zet a ni. Ka thlen chuan Tim chu a lo tum bar a, thupha ka chawi nghal a, buai tak chungin a rawn kal ve tho tih ka hriat vangin ka inthlahrung a ni.

“I hna aia min ngaipawimawh chang hi awm ve se ka duh ngawt mai”a ti a.

“Tim…”

Ka buai zia han sawi ka tum a, ka sawi leh ta lo.

“Kum 5 chhung zet chu nangmah nghak reng rengin ka hun ka hmang chu a nih hi”a han ti sap a.

“Tim..”ka ner nang a, ka duh reng vang a ni bik tawp si lo.

A nui sak a, ka biangah chuan a han piai a.

“Ka sawi ve mai mai anih kha”a tih chuan ka nui ve thei ta.

Timothy Lalhumhima nen hian kum 5 liamta khan kan intawng a, ka master degree neihna tur ka zir kum a ni a, chutih lai chuan INFOSYS ah bul a tan tawh thung. Mizoram ka chhuah chhoh hnu lawkah ani pawh rawn haw chhoin sorkar hna tha tak a thawk mek a ni. Kan inhriat tirh atanga vawiin ni thleng hian min la tibeidawng ngai lo a, ka tan a awm reng thin. Ka mamawh hun apiangah ka kiangah a awm a, ka tan a hlu tak zet a ni. Mipa rilru tluang tak, nungchang zawi angreng tak a ni a, a tawng tam lutuk lo a, ka bulah erawh a titi tui ve thei hle thung.

“Eng nge I ngaihtuah vung vung?”a tih chuan ka lo nui mai a.

“Kan intawn dante kha ka ngaihtuah a”ka tih chuan a ner sak a.

Kan inei puar zawh chuan nidanga kan tih dan thin ang bawkin kein kan inzui chhuak hnak hnak a, ka chenna hmunah min thlah anga, taxi in a awmna hmun a pan ve thung ang. Motor nei mah se hetiang hunah hi chuan a che lek peih ngai loa, phaia kan nunphung pangngai kha kan la chhawm a ni deuh ber.

“Kumin Krismas chu ka chhungten haw turin min rawn chah reng a, ka haw chho ve dawn em mi ka ti deuh a”a ti a, amah hi Champhai khua a ni.

“Nia, a tha alawm”ka tih chuan, “A tha ka ti ve hleinem”a lo ti boh a.

“Engvangin?”

“Ka hmuh phak loha I awm ka duh hleinem.”a ti a.

Ka nui chhuak hawk a, ani erawh a tum hmuk thung.

“Tak takin, keipawh ka huphurh lawk e a ”ka tih chuan a rawn nui ve ta chauh a.

In kan thlen chuan dar 9 a lo pel tawh a, a haw chhung nen in a thlen meuh chuan dar 10 a ri thuak dawn tih ka hria a, leng lut turin ka sawm duh ta lo. Ka inbual fai a, mut nan a la hma deuh avangin ka hnathawh zawh loh chu thawh chhunzawm ka tum a. Mail rawn thleng thar chu ka han hawng hmasa a, Asst.Manager tura ka lak chu confirmation letter an rawn tichhuak nghal der a lo ni. Tima pawh tluang takin in a thleng tih ka hria a, ka hahdam huai. Rei vaklo kan inbiak hnuah mut zai kan rel ve ta a.

Hun vawn dik hi ka ngaih pawimawh em avangin ka hnaah ka tlai ngai lo a, ka naute ho pawhin min entawn tha ve hlein ka hria. Hnam dang hi a bik takin an hnaah an lo inpumpek khawp mai, keini Mizo te bawk hi hotute mit tikhamtu kan ni thin hi sim atan tha ka ti thin khawp mai. Mawitei chuan kan Asst.Manager thar min hmu tura a rawn kal thu min rawn hrilh a, ka room lama kal turin ka han hrilh nghal a. Reiloteah ka hmaah tlangval sang leh lian tha zet hi a rawn ding a, Mizo mipaah pawh a lian pawl tak a nih ka ring. A hmelah chuan inringtawk hmel hi hmuh theihin a langin ka hria. Kan kalphung pawimawh ka tih zual chu ka han hrilh thuak thuak a, training a kal leh tur a nih tho avangin a tlangpui chauh ka hrilh a, min ngaithla em tih pawh ka hre lo. A che vel chu a hma khan ka lo chik lo nge, a ngeng hmel hian ka hre thar hle bawk a, ka ngainat chi a ni lo tih chu ka hre nghal mai.

“Ka kal thei tawh em?”a tih chuan ka melh deuh ram a, a kal thei a nih chuan ka hrilh mai a ring lo emaw ni.

“Hei hi tunkara training a I kalna tur lehkha a ni a, I kawl hi a that ka ring”ka ti hmak a.

“Ok” tih pahin lehkha chu a rawn ban a, a chhuak ta nghal a.

Kei hian ka tisual ta mai em ni ka ti hial a, mahni indah sang leh midang hmu hniam chi a ni ngei ang. Ka lung chu a awi chiah lo a, mahse, ka inbengdai ta zawk a. Ka kianga awm tura ka duh te chu mahni indah thaa midangte harsatna pui tute, kan mamawh huna kan kianga awm thei te hi an ni. Ka buaina tur a ni lo tiin ka han ngaihtuah zet na a, ka lung chu a awi chiah lo a ni. Ka hnathawh mek chu ka chhunzawm mawlh mawlh a, ka pa thlan tlawh ka duh vangin haw hma deuh ka duh avangin ka thawh tur awm ang ang chu ka thawk zung zung a. Lunch pawh ka ei peih lo, Mawitei chuan thingpui min rawn pe ta tho a, chumi pah chuan Kevin-a chungchang eng eng emaw a sawi a, ka lo ngaihven lem loh avangin a sawi pawh ka hre chuang lo. Dar 2 velah ka inkhung fel a, haw turin inhnuai lam ka pan a, Kevin-a chu a motor atangin a rawn chhuak chiah a, min hmuh chuan engmah sawi lo in a kal tlang a, chu ringawt pawh chu ka run tawk a tling kher mai.  In ka thlen chuan ka hun tawn avang chuan ka chau hnawkin ka hria, hetiang mizia a nei tih hria ni ila ka la lek lo tur, ka thiam loh vek a ni.

Thlan chu ka tlawh khat bawk a, a lo hnim ve tawh hle a, ka han pawt fai a, ka patea te inah chaw ei ka tum tho avangin ka hmanhmawh lo. Khaw thim dawn ruaiah ka haw ve chauh a, motor pawh hmang duh lo in kein ka kal a, boruak chu a dai dap a, min tihahdam huai hian ka hria. Ka patea te in ka thlen chuan a fanu Matleii chuan min lo ko chul a, a room lamah ka kaltlang nghal a.

“A u, Mala a rawn thawk elaw?”a ti a.

“Chutiang an thawh ka va hre lo ve”ka tih chuan, “Aw… Kevin-a mawle”a han leh a.

“E, aw, thawk e. I hria mi?”ka ti a.

“Nge ka hriat loh ang. Hyderabad ah khan kan senior alawm anih a”a ti a.

“A mizia kha ka ngaina lo tawp mai”tiin ka lo phun hlak a.

“Maw..?”Matleii’n a tih chuan ka lo nui ringawt a, “A pa kan ti thei rap mawle”a la ti ta deuh deuh a.

“A nungchang kha ka ngainat chi a ni lo tawp mai”ka han tih leh chuan ka nau chu a lo nui sak a.

“Kha tak kha a pa alawm, a luhlul leh a ngen na tak kha”a tih chuan ka nui ve ta hawk a. Luhlul leh ngeng hi pa tehna anih chuan Tima chu a tel ve hauh lo ang, mahse, ka ngaina fe zawk.

“Inhnuaiah chhuk ila, chaw kan ei dawn tawh ang”ka ti a.

“A u, Mala chu a rilru a nghet lutuk asin, kan college ami nen an inngaizawng thin a, chu nu chuan midang a neihsan te khan a tuar lutuk, amah a luck tehreng nen a miziaa kan fak na tak chu amah hi a rintlak tawp”a ti siam siama, a ngaisang tih hai rual a ni lo.

“Mihring chuan thatna leh that lohna kan nei vek alawm”ka ti a, a lu chu a bu nghat nghat a. Matleii thusawi atang chuan keipawh ka harh chhuak ve a, hun rei tak ka la hriat pawh nilo laka ngaihdan ka lo siam hma lutuk chu thil dik a ni bik lo tih ka hria. Chawei turin kan unau chuan room atangin kan inzui chhuak ta hnak hnak a.

Kartluana mahni hnaa bur ngar ngar hnua kartawp han hman leh chu a hahdamthlak bik a, a hlu bik hian ka hria. Kan product thar tur buaipuiin zanthum zet chu ka tlaivar tawh a, ka ngaihtuahnaa a that ang aiin a takah ka tichhuak tha thei tlat lo a, ka mangang ru viau tawh. Kevin lah training in a kal daih si a, mahniin ka hel nuai a, engtinnge ka puitlin theih ang tiin ka mang ang viau tawh. Nidanga weekend ka hman nawm angin ka hmang thei lo a, Tim nen pawh kan chhuak dun thei lo bawk. Dawhkan chu ka bawh a, ka taksa te chu a zawi vek tawh. Ka phone-a whatsapp message rawn thleng zut zut pawh chu en ka tum lo a, ka rilru chu a chawmawlh vek tawh. Laptop chu ka khup a, ka phone chu ka ban nghal a. Message dang chu hawng loin Tim-a msg chu ka han hawng a, a lo tlar thla dul a, chutianga tam min thawn tih pawh ka lo hre lo.

*Tlaiah tal chuan dinner kan ei dun theih ka beisei*

Chu msg chiah chu ka chhang a, ka inah rawn ei mai turin ka ti ringawt a, pawn lama ei nan hun ka nei chiah in ka hre lo a ni.

Ka phone rawn ri leh chuan ka thin a tirim hlur a, number hlang tawp anih avang chuan han lak loh ngawt ka duh si lo, thil pawimawh tak anih loh chuan ka thinrim khawp ang.

“Pi Sangkimi I ni em aw?”

“Aw, ka ni e”

“Asst.Manager Kevin ka ni e. Tluang takin Aizawl ka rawn thleng tih ka rawn in report e, thawhtan lamah kan inhmuh ka beisei. Kartawp hman nuam le”

Phone chu a dah nghal hmuk a, ka ner sawk a. Ka buai zia hria se kartawp hmang nuam turin min rawn ti hauh lo ang. A number chu ka han save nghal a, ani a rawn thlen tawh chuan ngaihdan pakhat chauh ai chuan pahnih chu a tangkai zawk ngei ngei ang tih ka hria. Inbual harh chu tha in ka hria a, bathroom lamah chuan ka lut zui nghal a. Ka inbual zawh fel meuh chuan zanriah buatsaih a hun tan der a, chawei tura Tim-a ka lo hrilh chu ka inchhir lek lek, pawn lamah ei ila a buaithlak loh tur a ni a. Ka scooty lachhuakin chawhmeh lei turin ka chhuak a, khawpui chhunga han inkhalh chhuah hi ka hreh theih em avangin ka che lek viau lem lo. Ka lei tur ang ang ka lei zawh chuan kal leh mai ka tum a, ka hminga min ko tu an awm avangin ka han hawi let hram a, Kevin chu a lo nui var var a. A nui hmel ka hmuh vawikhatna a ni bawk a, ka hamhaih lek lekin ka hria.

“I va bazar tlai ve”a ti a, a la nui sang tho.

“Hna ka thawk laklawh lutuk a”ka ti a. Dawr chhung chu ka han bih deuh a, amah chauh a awm tih ka hriat chuan, “In dawr em ni?”ka han ti leh a.

“Aw, anih hi. Ka hman ve ni te a ni si a, ka han nghak anih hi”a ti a.

“I va fel ve”ka tih chuan a nui tawi hmuk a.

“Ka zin chanchinte min zawt dawn lo mi?”a ti a.

Ka nui a.

“Office thil chu office ah kan sawi zawk dawn nia”ka ti a.

A bu nghat a, “Rawn lut la, coffee in ila”a ti ve luam a.

Chawei tur ka neih thu leh ka hmanhmawh thu sawiin nidangah ka la insak ang tih ka hrilh a, ka haw ta a. Ka rin loh dan deuha Kevin-a ka hmuh avang chuan ka then sak a, tawh khirh lutuk chu a nih dawn loh kha ka ti rilru a, tin, mi hausa fapa duat sual zawh loh a ni ang tih ka ring ta hial a!

PART 2

“Ka haw chho dawn chiang ta anih chu”

Tim chu ka en vat a, min lo en ve kiau a.

“Ka ngai ngawt ang che”ka tih chuan a thil ei lai chu a han chawl a.

“Kumthar chu rilru in inneih lamte pawh tintuah ve ta tan ila”a ti a.

“Kan la ngaihtuah ang chu”ka ti liam puat a.

“Kum 5 chuang kan inzui ve tawh a, hna kan nei ve ve a, inneih bak hi hmabak kan nei tawh lo”a ti a, a sawi dik chiah. Mahse, kei hi ka la inpeih lo hle si a.

“Tim..”

Chaw chu a bar mawlh mawlh a, ka kohna chu hria ang pawhin a awm lo.

“Min hnialna tur anih chuan ka ngaithla dawn lo”a ti boh a.

Ka thaw hak a, tui lo zetin ka chaw chu ka ei chhunzawm a.

Kan eina vel ka sengfel chhungin ka laptop chiang lo min ensak a, Tim-a neih hi ka hreh ngawr ngawr pawh a ni lo, pasal neih hi la inpeih lo a ni ber. Pasal han nei a, fate han nei tur chuan keimah hi ka la inpeih lo a, kumhnih hnuah chuan ka inpeih ve thei maiin ka ring. Thleng ka sil zawh chuan Tim-a bulah chuan ka thu a, uluk takin ka khawl chu a lo siam mek a, thutthlenga a phone dah chu la in ka lo khawih vel mai mai a. Tum dang ang lo takin han titi hluah tur kan hre lo ve ve niin a lang. Kan thil khawih lai ah chuan kan bur nghet hle ringawt a, nidang ang chu nise boruak dai tak hnuaiah inkai rialin kan chhuak dun leh ngei ang.

“Engmah ka rawn keng si lo a, ka hawn phawt anga, naktukah office ah ka rawn pe mai ang che”a ti a.

Amah ngheng chuan ka thu a, ka kut chu a khawih neuh neuh a, ka zungbun chu a tuai vir a, amah nen inanga kan neih a ni a, kumhnih vel liam taa kan siamtir a ni nghe nghe.

“Hei hian thlaktu a mamawh tawh”a ti a, ka lo nui ringawt a.

Inneih a hmanhmawh tak viau chhan hi ka hre lo a, tiangin min nawr tet tet ngai lo.

Dar 9 a rik chuan haw zai a rel ve ta a, gate bulah chuan kan ding a, kan in mangtha hnu chuan a han tawi khawmuang hret a, thla chu a eng phian reuh a, boruak chu a nuam tawk viau bawk. Ka han pen hma hret a, a kawngah chuan ka va kuah a, a nui ri hak a. Min lo kuah ve vat a, inthurual zet hian engmah sawi tawh loin kawngah chuan kan inzui chhuak a, kalna tur pawh hre chuang lo in kan kal ta zel a. Kawngah tawh tur vak an awm tawh lo a, a awm chhun te lahin mak ah an ngai lo, min nuih sak a, kan inpel mai zel bawk a, kan nunphung ve reng a ni a, mawi lo ah tuman an la bik lo. Kan let leh lam chuan kan hna chungchang a thuphungin kan sawi a, kan harsatna apiangah inpuih kan tum thin.

“Kevin-a chuan I harsatna a sutkian pui ngei che ka beisei”a ti a, ka chalah chuan a fawp a.

“Keipawhin ka beisei. A tlai tawh, haw tawh rawh le”ka ti a.

Thuawih takin a motor ah chuan a lut a, a tuka inhmuh leh tumin kan inmangtha a, a tlan liam chu ka thlir a, keipawh inchhung lamah ka lut ta a. Ka mut chu a chhuak lo kher mai. Thil tam tak ka ngaihtuah a, innghahtir reng chu thil ni thei a ni lo tih ka hria a, mahse, hun rei lo te chauh a ni tawh anga, Tim-a duh ang ngeiin inneih mai chu ka pawi ti lutuk lo. Kum te han thar se, keipawhin rilru thar ka put a ka insiamrem chu a ngai ngei dawn niin ka hria. Ka hmangaih a, a duh anga a thu zawm mai chu ka tihtur a ni alawm. Ka inphih fai hnuah ka mu a, Tim-a hnen atangin in a thleng tawh tih ka hria a, tui taka mut tumin ka inkhuh tha sauh sauh a, ka hun lokal tur ngaihtuah buai avanga rilru sen ka duh lo.

-----------------x--------------------------x-------------------------x------------------

Thawhtan tuk hi chuan tlemin kan zawi deuh tlangpui a, ka naute ho pawh hriatthiamna thuk tak ka nei thin. Ka office ah Kevin nen kan product thar buaipui tur chu kan sawi dun a, ka laptop a awm loh avangin inhrilhfiah dan a vang viau thung. Tim-a chu ka han call lek lek a, a siam zawh chuan a rawn dah mai ka ring deuh bawk si, ka nghak leh ta zawk a.

“Ka theihtawp chhuah chu ka tum ve reng, tangkaina ka neih phawt chuan min ko hreh lo la”Kevin chuan a ti a.

Ka nui a, hetiang tur hi a ni reng a ni.

Kawngka kik dat dat chu chhawnin rawn lut turin ka ti a, Tim-a chu ka laptop bag nen a rawn lut a.

“Ka rawn chhuak hma thei lo a, I lo buai hman viau lo ang chu maw?”a ti a.

A thil rawn ken chu ka lo la vat a, thu tura ka tih chuan min hnial a.

“Office ka la thleng ve si lo a, ka tlang phawt ang”a ti a.

Ka thutna atanga tho chhuakin kawngka bul thleng chuan ka thlah a, ka biangah chuan a fawp zeuh a, ka ip zawih a, Kevin chu ka hrechhuak zawk a. Ka va hawi a, a phone a lo bih avangin min hmu lem lo niin a lang. Tim-a kal hnu chuan ka thutna lam ka pan leh a, ka awmdan chu a lai hu hian ka hria.

“Kan en nghal dawn em niang?”ka tih chuan a rawn hawi chhuak chauh a.

“Pendrive ah dah ila ka lo inzir chiang ve phawt ang chu”a ti a.

Kevin chhuah hnu chuan ka biang sa hat hat chu ka han khawih a, nidangah kha chuan engahmah ka ngai lo a ni thin a, chutia ka danglam thut chu mak ka inti zawk! Lunch ei dawn thleng chuan ka hna khawih lai chu ka zo fel thei lo a, ka pum ri rak rakah chuan ka riltamzia ka hrechhuak chiah. Ka room atang chuan ka chhuak phei a, ka naute ho pawh an tiffin phawrhin an lo ri nak nak hlawm a. Ka tiffin lak tuma ka kal chu Kevin chuan min lo ko vat a, ka tiffin chu a rawn chawi kang a, a lo la fel diam tawh a lo ni. A bul chiaha seat awlah chuan ka thu a, a lo nui deuh var var a, ka han nuih let ve ngawt a.

“I va pai tlem em em”Kevin chuan a ti hluai a, ka lo nui ringawt a.

“Zingah ka tho peih si lo a, ei leh in lama ka in diet mai loh chuan”ka ti a, a dar a san ak a.

“Ka tlan ziah asin, ka rawn sawm thin ang che”a tih chuan ka nui hak a.

“Ma’am, keipawhin ka sawm ve thei tho che ania”Mathana’n atih chuan kan nui ta vek a.

Ka room-ah Kevin nen kan inzui lut a, a thil siam thenkhat min kawhhmuh a, a hma khan ka lo inchhir teuh viau na a hnaah chuan duhthusam in a thiam tih ka hre tawh. Ka nui sak a, kan pute pawhin kan product thar chu an pawm ngei ang tih ka chiang.

“Zing tlan chu?”

Ka va melh a, chiang fe hian min lo melh kalh a.

“Ka peih lo alawm”ka ti a, ka nui sak a.

“Ka rawn sawm tho ang che”a ti a.

Ka in a hre chuang lo a, min rawn sawm thei ngawt lo tih hriain ka nuihsan mai a. A laptop chu a khup a, uluk fe hian ka room chu a han thlek a, min hriatchian vek tum ni awm tak hian min han en leh a, ka zam lek lek hial a ni.

“Ka kal ang aw”tih pahin a tho a, kawngka hawn pah chuan min rawn melh leh a, “Naktuk zing chu ka fiamthu lo ania”tih nghat pahin a chhuak ta a.

Ka hnathawh lai chu ka thawh chhunzawm malh malh a, ka phone a rawn rik chuan dar zat ka zu hmu ve chiah a, office ban a lo hun tep tawh. Tima nen dinner kan kildun hun a ni tih ka hria a, rokhawlhna a nei a nih hran loh chuan min lam tura a rawn chhuah thu a sawi ngei ang. Ka rin ang ngeiin kawngah a thang mek tih a sawi a, ka insiam fel meuh chuan a rawn thleng fel tawh ang. Ka hmaiah chuan powder chu ka han tat tha nawk nawk a, ka sulhnu chu a fel thei ang bera kalsan ka duh thin avangin ka inthianfai nghal bawk a. Ka room ka chhuahsan a, office kawt ka thlen chuan Tim-a chu a rawn inhung fel chiah a. Ka naute ho pawh garage atangin an rawn inkhalh chhuak sap sap a, Tim-a nen kan chungchang an hriat vek avangin tlangnel takin an rawn be hlawm a, Kevin erawh chu vung zet hian a tlan chhuak nghal a. Motor ah lutin keini pawh kan chhuak ve nghal a, Tim-a chu a ngawi deuh ran a, a hmel ka en chuan eng emaw ngaihtuah a nei tih ka hre mai, ka be buai duh ta lo. Bon Apetite lam panin kan tlan zel a, ka thiannu Elty hnenah dinner kan ei dawn tih ka sawi tawh avangin ka be nawn ta hran lo. Kan va thlen chuan a dan pangngai angin a lo ri hlut a, Tim-a nen an innel tawh em avangin an infiam nghal bawrh bawrh a, an bulah chuan ka lo khi ve sak sak a. Kan ei tur pawh min rawn chhawp nghal zung zung a, nidang ang lo takin sawi tur ka van riau!

“Thawhtanah ka haw chho dawn a”

Ka va en a, min lo en reng a.

“Engati teh thut nge?”ka tih chuan min chhang mai lo in a thil ei lai chu a han ei leh a.

“Ka pa tha vak lo a, min lo hrilh duh lawk lo a”

A pa hi a hriselna a tha vak lo a, hei vang hian tun kum pawh Krismas han hman tum hram a ni reng a ni. Mahse, a tum dan ah chuan karhnih hnuah chauh chhoh tum kha a ni a, a pa chu a tha lo hle a ni ang.

“A va zia lo ve, helamah te inenkawl dan a awm zawk lo maw?”ka ti a.

“Chu chu keipawhin ka ngaihtuah ve reng a, amah hian a duh tlat lo a, a buaithlak khawp mai”a ti a.

Engmah sawi tawh lo chuan kan ei dun malh malh a, kan boruak chu a hahthlak ru hlein ka hria. Kan ei zawha ei man te kan pek fel hnu chuan pawn lamah chuan kan thu a, boruak chu a vawt sung tawh a, ka kawr hak lum lutuk lo avang chuan ka ip leh zeuh thin. Tim-a chuan min kai a, motor chhungah chuan min thuttir a, amah pawh a rawn lut ve a, motor tinung mai lo chuan ka kut chu a rawn vuan a.

“Sangkim, inneih hi ka duh tawh a ni”a ti sap a.

Ka maimitchhing a, ka chhan dan tur hre lawk ni awm takin amah bawk chu a rawn tawng leh a.

“Nawr che ka duh lo, mahse, kan inzuina pawh a rei ve tawh a, a hun viau tawhin ka hria a ni”a ti leh a.

“Tim, tunah branch thar enkawlin ka buai hle a, thildang hi ka ngaihtuah thei rih lo a ni. Rei vak lo min nghah chu nangpawhin rem I tih kha”ka ti a.

“Ka dinhmunin a zir ta si lo atin ni”a ti zawi raih a.

“Ka hrethiam che alawm. Mahse, inneihna chungchangah ngat phei chuan uluk taka kan ngaihtuah hi a ngai a. Keipawh ka dinhmunte hi ka han insawh nghet deuh anga, hun rei a ni tawh bik nang”ka tih chuan ka kut a vawn chu a thlah a.

“I rilru hrethiam tur hian kum engzatnge ka mamawh tih hi ka hre lo a ni”a ti nghat a.

“Chu chu eng I sawi tumna nge?”ka tih chuan motor a tinung a/

“Theihnghilh rawh”a ti bung nghut a, min melh duh tawh loin chak zet hian a tlan chhuak a.

Motor chak taka chuan hi ka hlau a ni tih a hria, mahse, min tlanpui tho si. Ka bag chu ka hum ngawt ngawt a, ka chesawn ngam der lo. Aizawl khawchhung kan tlan luh lai pawh ka hre lo, tlemin a speed a ti hniam a, ka thaw hawk mai. A hmel ka va en a, a hmel lan dan chu a tha lo tak zet a ni. Ka in kan thlen chuan ngawi rengin ka chhuk a, rawn chhuk a tum ve lo tih hriat takin a thu ngul a, kal san mai ka tum a, ka rilru thlak lehin ka han be leh ta zawk a.

“I rawn kawi dawn lo em ni?”ka ti a.

“Ka thusawi kha lo ngaihtuah la, ka sawmna che kha I hnar dawn anih chuan inkawp zui zel hi a tulna ka hre lo”a ti a.

A thusawi chuan min thawng kher mai. Ka phu zawk a ni ber. Tima nen hian inthen turin vawikhatmah ka la inngaihtuah chhin ngai lo.

“Tim..”

“Ka hrethiam rei ve tawh bawk che alawm, I hna aia ka pawimawh lo anih chuan I nuna tel ve reng a tulna ka hre tawh lo. Ka haw chhoh hmain lo inngaihtuah fel ang che”a ti a. A motor a tinung a, a tlan zui nghal a. A tlan liam thleng chuan ka en reng a, ka thin phu dawt dawt chu ka han dawm a, ka dik lo tawp mai.

Inchhungah lutin ka inthlak fel a, Tim-a thusawi chuan min tibuai tak zet a ni. Ka mipa hmangaih awmchhun leh ka innghahna awmchhun chu amah hi a ni a, ani hi chan ta ila ka dinhmun tur ka ngaihtuah ngam lo. Mahse, a hma zawng pawha ka inpeih hunah kan innei ang tia kan thutlukna tih sawn a tum chu ka lung a awi bik lo. A pa dinhmun avanga inneih a duh vat a nih chuan that akin kan sawi thei reng a, mahse, ka rilru lo ang zawnga a la anih vaih chuan ka duh bik lo ang. Ka hna hi nuam ka ti a, ka tui bawk, chutihrualin amah aia ngaipawimawh zawka a ngai kha a rilru ka duh lo hle bawk. Ka theih ang ang chuan ka ngaihsakna pawh ka tilang ve bawk alawm, ka hna ka ngaihpawimawh zawk chuan inthen a duh tih a sawi vek bawk. Ka thaw hak a, inthen tur anga ka inngaihtuah chuan ka ipik churh a, dik tak chuan a telloa nun hman hi ka thiam pawh ka inring tawh lo. Ka room ah lutin ka taksa leh rilru chau tih reh tumin ka han mu a, a sawt chuang lo.

Kawngkhar ri bur burah chuan ka harh hlawl a, zan lam ka mut tlem avangin zing lamah ka lo muhil a ni ngei ang, khua a lo eng vek tawh a. Ka han tho a, kawngkhar lam chu ka pan a, ka hawng chiah tih chuan Kevin chu a lo nui sang a.

“Good morning”a lo ti zang vah a.

“Eng nge zing zingah?”ka ti ngui bur a.

“Ka rawn sawm dawn che ka tih kha”a tih chuan ka hrechhuak chiah/

Ka hmel a hmuh chuan tlemin inthlahrunna a lang deuh a.

“Tak taka ka haw lam tawh zawk ania, a landanah chuan I mu tha vak lo anih hmel”a tih chuan ka lu ka lo bu nghat a.

“Office ah kan inhmu dawn nia, mu leh rawh ka tih chuan I tlai awm sia, chaw eitui phawt le”tiin min kalsan ta a.

Choka lamah rawngbawl turin ka awm zui nghal a, ka lu te chu a rit bur hian ka hria. KA office kal dawn thlengin Tim-a chu a reh vang vang a, biak hmasak ka tum bik lo. Taxi la in office lam panin ka kal a, ka rilru chu nuam lo hle mah se sawi tur ka hre lo a, nghah tawp mai loh chu. Office ka thlen chuan Kevin chu a thutna atangin a rawn tho a, mail check tura min hrilhin inhnuai lam a pan a. Ka room ka thlen veleh ka computer ka on a, mail chu ka check nghal a. Kevin nen meeting pawimawh takah Mumbai lam kan pan a ngai a lo ni. A hun tur ka en chuan nihnih hnuah Aizawl kan chhuahsan a ngai tawh ang. Ka tho vat a, Kevin thutna lam ka pan chuan inhnuai atangin a rawn chho ve chiah a, coffee a rawn keng va va a, min hmuh chuan pakhat chu min han pe nghal a.

“A va chawpchilh ve”ka han ti ngawt a, a dar chu a san ak a.

“KAn thu lo ve sia tiraw ma’am”a ti a, ngeiawm lek lek hian a nui a.

“Kan project chungchang a nih ngat chuan I kut anih kha”ka ti a.

“A kimchang chu chawhnu lamah kan rawn thawn ang che u boss in a tih kha”a ti a, tukverh ah chuan a dak vang vang a.

“Matlan, room-ah min lo zui lawk mai ta che”tiin Matlana chu ka han melh a.

Ka room kan thlen chuan eng nge tih hmasak tur ka hre lo.

 “Ka presentation tur kha lo check chiang la, tihbelh ngai a awm chuan kan ennawn dawn nia" ka ti a.

"Aw le ma'am" tih pahin ka laptop chu a la a.

"Kevin kha rawn luh tir la aw" ka han ti zui a.

Tukverh lam ka hawi a, Tim-a nen kan inkar boruak tha lo chuan ka awm a ti nuam chiah lo bawk. Khuh kharh ri ka hriat chuan ka hawi vat a, Kevin chu ka dawhkan bulah a lo ding reng tawh a.

"Sorry.. Thil ka lo ngaihtuah nasa lutuk a" tiin thipha ka han chawi a.

Thutna kawhhmuh pahin keipawh ka thu a, ka ngaihtuahna chu tilang duh lo in ka han nui lui sak a.

"Tunah hi chuan chawlh hahdam i mamawh niin ka hria"a ti dam dap a.

Min hrechiang lutuk chu ka thin a rim zawk.

"I hre sual a nih chu" ka han ti takna a, a dik thlap bawk si.

"Ka awm tawh a, lungngai suh. I tha chhang dawltu tha tak nih hi ka tum tlat alawm" tiin min hnem a. Ka hahdam huai pawhin ka hria.

PART 3

Ka office bang chu haw tlang peih lo in ka patea te inah ka kawi a, ka nutei chuan chawei turin min lo ti vat a. Ka hnial duh lem lo, keimaha awm ka chak lo a ni ber. Ka phone chu ka han hmet eng a,Tima hnen atangin engmah ka dawng lo. Hetiang mizia hi a nei tih ka hre ngai lo a, min nawr a tum vang nge a mize dik tak ka hrethiam lo. Chaweikham chuan muangchangin ka haw a, in ka thlen chuan ka kawtah awm an awm tih ka hre nghal. Ka han kal chak sawt a, Tima bak an ni lo ang. Gate ka hawn chuan thawm a rawn awm nghal a, veranda light in a hmel a chhun chuan mak tiin ka ka hau a, Kevin maw?

" Eng nge tun ang hunah te i rawn tih?" Ka ti a.

"Ka hre bik lo, vawiin i awmdan a dik lo em a, ka ngaihtuah deuh che a, ka rawn thlithlai che" a ti ve mai a.

Ka nui hak a, ngaihtuah rual ka niin a hria em ni le? Inchhung lamah kan inzui lut a, light ka on fel vek hnuah inthlak turin room lamah ka kalsan a, rei vak lo hnuah ka chhuak leh vat a. Kevin chuan a ke a thluang duai a, a bawp chu a sei ngei mai. A phone a sik neuh neuh a, ka thawm chu hria ang pawhin a awm lo.

"Thingpui kan in dawn em?" A ti a.

A piaha thuthlengah chuan ka han thu a, a thusawi chu ka hre lo der a, zawhna mitmenga min en run chuan ka nui deuh put put a, a mizia luhlul leh ngeng zet hi a duh tu tan chuan duh tham a ni hialin ka ring.

"Va lum mai rawh ka peih lo" ka ti hmuk a.

A tho a, gas a va on hrut hrut a, a zai ri rat rat ka hriat chuan ka ngaihtuahna pawh a hruai peng daih. Ka phone ri chu ka lo hre lawk lo a, a tawp dawn lamah ka la hman hram a, Tim-a a ni.

"Hello"

"Lo insiam rawh, ka rawn sawm dawn che" a ti a, engmah ka sawi leh hma in a off nghal hmak a.

"Hello" ka han ti vak vak a, awmzia a awm lo.

Kevin chu thingpui keng chungin ka bulah a lo ding reng a, no chu min pe a.

"Ka chhuah lawk a ngai" ka ti ringawt a.

"Tun ang hunah khawiah nge i kal anga?" A ti a.

"Tim-a'n min rawn hruai dawn a" ka tih chuan a hmel a inthlak nghal vek.

A mit chu a ti zim san a, a thingpui chu a in zo a, engmah a sawi tawh lo. Thuthlenga a jacket chu a la a, chhuah a tum a.

"Kevin, ngaih loh lamah i ngaih loh hram ka beisei" ka ti a, a ke pen a tawp a.

A rawn inher a, min nuih sak a, a chhuak ta. Ka en reng a, a hmel kha hriatthiam a har tak zet! No chu ka seng a, ka sil zawh rual chuan kawtah motor a ding dat a, Tima a lo thleng tih ka hre mai. Pawnah chuan ka va chhuak a, motor chhunga la thu reng chuan min hui zeuh a, kawngka ka kalh fel a, motor lam chu ka pan ve ta a. Ngawi rengin ka chuang a, min be bik chuang lo in hma lam chu a bih ngar a. Khawi lam nge kan pan dawn ka hre lo. Kan tlan zel a, Tim-a inluah lamah kan kal dawn tih ka hrethiam mai. Ka va en a, hma lam chu a bih ngar ngar a, biak pawh a chakawm lo. Kan thlen chuan a chhuk thurh a, ka thutna kawngkhar chu a han hawng a, ka chhuak ve nghal a. A in chhung lamah kan inzui lut a. Kawngka chu a kalh nghal hmak a. A chezia chuan min tihlau lek lekin ka hria.

"Tikhan kan inru a ni mai" a ti nghal tawng a.

Ka nui a, a hmelah nuihzatna a lang ve lo.

"I ho emai" ka han ti ngawt a.

"Ka nawr lui lo ang che tiin ka lo tiam tawh che a ni maithei, mahse, theihnghilh rawh" a ti a.

"Tim, pangngai taka inneih loh chu ka duh teuh lo mai"ka ti a.

"Sangkim, kum5 chhung zet ka nghak tawh che asin. A thlawn tur chuan ka phal bik hleinem. Mahse, ka thu zawm aia i duhdana i kal a nih ngat chuan i cho chhuah a ni ang" a ti a.

"Tim, ka laka i dawhtheihnaah hian ka lawm hle reng asin. Tunah hi chuan min hriatthiam ka ngai tak zet a ni. Ka hna hi tlin taka thawh ka duh, min hriatthiam pui ve hram rawh. Hun reilo te chauh ka mamawh tawh a ni" ka ti a.

"Min nei chung pawhin i ti thei reng alawm. Ngaihzawng atan chauha i duh, pasal atana i duh si loh ka nih ber hi, tiraw?" A ti ta salh a.

"Chutiang chuan vawikhatmah ka la ngaihtuah ngai lo" ka ti sap a.

"I rilru chu ka hre tawh ah ka inngai, kal rawh le, ka va thlah tawh ang che" a ti a.

Ngawi rengin ka zui a, kum 5 chhunga a mizia a la put ngai loh a put thar thut avang chuan kan mihrang awm nghal der chu a ni a, a hrehawm tak zet a ni. In kan thlen chuan motor atanga chhuak mai lo in Tima chu ka melh a, min melh duh der lo.

"Tihian kan inthen tihna em ni?" Ka ti a.

A thaw hak a.

" Duhthlan tur kan nei tawh lo in ka hria. Inkawp lo tur kan lo ni reng pawh a ni mahna" a ti hul hak a.

Ka mittui tla tur chu duh lo in ka khap sawk sawk a.

"Mangtha le" tiin motor atang chuan ka tlan chhuak a. Inchhung ka luh rual chuan ka tap ta zawih zawih a. Kan inhriatthiam tawnna kha khawnge a awm zawh tak? Ka innghahna, ka engkim ni thin chutia vawilehkhata ka chan thut chu awmdan ka thiam lo tak zet a ni. A thu kha zawmin inneih kha lo duh mai ila tiin ka ngaihtuaha, min hriatthiamna telloa min nawr chu ka lo duh bik der si lo. A sawi ang khan inkawp lo tur kan inkawp a lo ni ang e.

Khumah chuan ka let hnawk a, ka mittui pawh hruk tum chuang lo in ka mu reng a, ka rilru chu a na telh telh dawn tih ka hre reng. Mahse, amah pawhin a theih chuan chak lo zawk nih chu ka tum ngai lo ang. Ka tho a, bathroom lam ka pan a, ka inbual a, ka harh hawk pawhin ka hria. Ka mu a, mutchhuahna pakhatmah ka nei lo. Tim nen kan inhmuh hmasak ber ni te, kan inbiak zui dan te, vawiin ni thlenga kan hun hman tawhte ka ngaihtuah kir a, ka ngai vawng vawng mai. Ngaihdam dil mai chu ka duh hial a, chu em erawh ka ti a lo. Khaw var pawh chuan ka la muhil eih lo. Ka lu chu a na ngut ngut a , ka khum bula damdawi chu banin ka han ei ringawt a. Ka chau ve bawk nen ka lo muhil ta vang vang a. Ka harh chuan khua a lo eng ut tawh a, ni a lo tlang sang hle tawh. Sana ka han en a, dar 10 a lo ri lek lek tawh. Ka han tho thut a, ka luhai lutuk chu chet pawh ka che ngam tawh lo. Zawi muangin ka mu leh ta riai riai a, nizan lama thil thleng chu ka ngaihtuah chhuak nghal zawk bawk a. Ka mumang mai emaw ka han ti dawn a, a tak tak ngei a ni. Ka inring hman lo ka mittui chu a rawn baw leh zawih a, hetiang teh hrepa ka tawrh bik hi ka ring lo. Engtia rei nge chutia ka awm ka hre lo, kawngkhar kik dawt dawt thawm chuan min tiharh leh a. Ka chau tak zet a ni, peih lo chung chungin ka tho a, kawngka chu ka va hawng a. Kevin chu hlauthawng fe hian a rawn lut nghal a.

"I dam lo em ni?" Ka hmel a hmuh chuan a phawk hra a.

Ka lu chu ka bu nghat a.

A thaw hak a, a kawng a dawm a.

"Thu hahdam phawt rawh" tiin thuthlengah chuan min thuttir a.

"Nizanah in chhuak rei a ni maw?" A ti leh a. Ka chhang lo.

"Office lamah i rawn lang thei si loa, ka ngaihtuah lutuk che a. Kan zinna tur lehkha a rawn thleng tawh bawk a, i hmuh ngei ngei a ngai a ka rawn  chhuak thei hram a nih hi" a ti a.

A lehkha ken chu min pe a, nihnih hnuah Mumbai lam panin kan chhuak ang. Ka dinhmun tawn mek nen chuan a inmil ber lo hle mai. Kevin chu ka va en a, chik zet hian min lo en reng a.

"Nihnih hnuah kan inhmu dawn nia. Chawlh hahdam ka mamawh rih"ka tih chuan a thutna atangin a tho a. A kal mai dawn emaw ka tih chuan ka bulah a rawn thu a. Ka sam hnawk nuai chu ka hnung lamah hui phei in min kuah ta hlu hlu a, engvang nge ka hre lo, ka tap chhuak rawn inhnawh chu inthunun zo lo in ka tap chhuak ta hawk hawk a.

"I thawl hawk thlengin tap rawh" a ti dam diai a.

Kevin chhuah hnu chuan chutia awlsam taka ka chak lohna midang bula ka tilang chu ka inthiam lo hle a, engangin nge min ngaih ang tih ah ka buai a ni. Ka inbual harh a, rilru kawmna hun nei loa awm ka duh ber. Ka inthlak fel a, kalna ber tur pawh hre loin ka chhuak a, tlai thim rak thleng chuan ka vak a, ka duh tawka ka inbunruah hnuah in lam panin ka haw ve ta chauh a.

x----------------x------------------x-----------------------------x--------------------------x

Nihnih a liam hnu chuan Mumbai lam panin Kevin nen kan chhuak a, mi chak lo tak anga lang kha ka mizia ve reng emaw ti an awm anih chuan an hresual a ni ang. Kevin chuan a mitsir in min melh zeuh zeuh a, a tanga beia lungchhe vankaia tap hmeichhia kha ka ni tih a ringhlel rum rum pawh a ni mahna! Hotel lamah kan innghat fel a, a tuka meeting naa kan hmanrua tur enfelin kan buai leh ngat ngat a, Kevin ka thawhpui hi ka tisual lo tih ka hrechiang telh telh bawk.

"Bar ah kal ang hmiang"

Ka va en a, then tha hian min lo en a.

"Kan lifestyle a in ang lo" ka han ti a. A chek deuh tlak tlak a.

"Ka hruai tho ang che"a tih chuan ka lo ner khum a. Anihna takah chuan Delhi ka awmlai khan kal zeuh chang chu kan nei ve reng, Kevin han chhaihkawlh chu ka chak ve reng reng a ni.

"I hna kha ngaipawimawh zawk teh" ka tih chuan phur zet hian a laptop chu a han bih leh a.

Dinner ei a hun tawh a, keini lah kan la buai nak nak hle thung.

"Inei puar phawt ang" tia Kevin ka sawm chuan ihe loin a thutna atangin a tho a. Keipawh chu ka han zi mar a, ka awmhmun thawmhnaw nena kal ka tum chu Kevin chuan a remti ta tlat lo. Pawna min nghak tura ka tih chuan rang zetin a chhuak a, ka inthlak ta nge nge a. Ka va chhuah chuan min lo kai vat a, hotel pawn lamah min kai chhuak a.

"Hmun nuam deuh ka hria"tih pahin kan inzui ta zel a.

Hmun nuam leh thawveng tak pakhatah hian min hruai a, a hmun a changkan loh hmel loh ang aiin a hmun chu a lo nuam phian a. Kevin chuan tifuh intih hme zet hian min mitsir ralh a, ka kiu chuan ka han nghawk a, a nui hak a.

"Naktuk chawhnu ah chiah thil eina hun i nei dawn nia, puar deuhin ei ang che"a ti a, ka lo nui mai a.

Kan in ei puar zawh chuan beer thahnem zet hi Kevin chuan a lei a, ka melh nghek a, hre ang pawhin a awm duh lo. Hotel kan thlen chuan a room lama kal lo in ka room lamah min zui duan duan a, room ka luh dawn chuan ama room lama kal turin ka han ti a. A nui mai a, ka chahbi chu la in room a hawng a, a lut ta daih a.

"Inthlak rawh, pawnah thu rih ang" a ti a.

"Ve ngawt zel a che" ka ti bak hlar a.

"Ngawi rengin a ding a, ka kal hma chuan a kalsawn dawn chuang lo tih ka hria. Pawnah min lo nghak tur chuan ka ti leh ta nge nge a. A kal ve mai bawk a, ka inthlak sawk sawk a, Kevin mi nghahna lam pan chuan ka kal ta a. Boruak chu a dai nuam tawk chiah a, Mizoram lamah chuan a vawt mah mah tawhin ka ring.

"Ma'am"

Ka va melh a, a lo khi suk a.

"Hnathawhna hmunah lo chuan khatia koh kha ka ngai lo ang" ka han ti nghat a.

"Ka thiam pawh ka ring lo" a ti a, "Sangkimi.." Zawi sap hian a han ti zui a.

A beer ken chu min pek a han tum a, ka lu ka lo thing a.

"C'mon.." Tih pahin can khat chu min han hawnsak lui hram a. Ka inthlahrung ve deuh chuan ka lo la a, kum engzat chiah nge beer ka in tak loh ka hre mai tawh lo. Ka han lem khalh a, in harsa ka tihdan a la ngai reng.

"I rilru na hi ka hmu thei lo che, hlim tak hian awm reng ka ka duh" a ti a.

Ka thil in chuan hnaa a thawk tan der a ni tih hriat zetin ka lu chu a hai deuh a, hrehawm lutuk erawh a ni lo.

"Ka hlim lutuk alawm" ka ti liam puat a.

"Engkim i sawi thei alawm"a han ti leh a.

Ka chhang lo, ka thil in lai chu ka han tlak pawp a. Tim-a ka rilruah a rawn lang a, ka ngai tak zet a ni. Beer in a phal loh thin zia te, ka nun eng emaw chen a khalh ngil thin zia te ka hrechhuak a, free taka phaia hmeichhe awm tam tak khawsak dan kha a hrechiang em em a, ka nung ve ang tih hlauin min veng uluk hle thin anih kha.

“Timothy nen khan engtia rei nge in inzui?”

Ka va melh a, a mit chu a lo ti zim san a.

“Kum 6 dawn a ni tawh ang”ka ti a, a nui hak a.

“I hria mi?”ka han ti leh a.

“Kan senior a ni thin alawm”

Ka hrechhuak chiah, ka cousin Matleii khan Kevin te nen college khatah an kal thin thu a sawi tak e, Matleii leh TIma-a chu college in ang chhuak an ni chiah bawk tak alawm.

“Anih tak chu”ka ti liam puat a.

“In boruak chu ka hre hauh lo na, a tha lo tih erawh ka hrethiam. I mimal hna leh I eizawnna chu I thliar hran thiam ka beisei”a ti a. Ka lu chu ka lo bu nghat a.

Ka thil in chu a thawk tan a ni chek ang chu, ka tah chu a chhuak tlat pek a.

“Inthen hi ka ngaihtuah ngai lo, Tim-a kha mi fel tak a ni asin”ka han ngawi dat a, “Ka hmangaih bawk”ka mittui chu a rawn tla tan ta mai a.

“Mi sual a ni hleinem, tha takin bia la, in sawi fel leh mai tur a ni lawm ni?”a ti a, min thlek ha a.

“A fel thei lo chu a nih hi”ka ti a. Ka mittui chu ka kawr ban in ka hru a, hei hi a ni beer ka in duh loh thin na chhan chu, ka rilrua awm ang anga chet chhuah mai ka chin a vang hian.

Kevin chu a rawn tawlh hnai a, min rawn kuah ta hlu hlu a, kei lah chu insum hauh lo in ka lo tap chhuak bawrh bawrh a.

“I thawl hawk thlengin tap rawh, I rilru na hi ka hmu thei lo”a ti sap a.

Ka room ka thlen chu ka mang hriat ruai a, ka awmdan chu a mumal lo nuai a, ka harh a, ka muhil leh a, chutiang chu ka awm reng mai hian ka hria. Ka harh chhuah meuh chuan zing lam a lo ni der tawh a, ka mutna ka en chuan khumah fel tak hian ka lo mu a, ka han hawi chhuah chuan Kevin chu ka khum bula sofaah alo mu bam bawk a. Ka hrechhuak e, ka chanchin mittui tla chunga ka hrilh te, Tim-a vanga ka rilru natna ka lanchhuah tir zawng zawngte chu chiang em em in ka hrechhuak a, ka zak lutuk chu rizai chuan ka inlukhuh a, ka insik ngar ngar mai a. Engtin nge Kevin hian min ngaih ang? Ka thlan a rawn bawl tawk tawk a, loh theih loh in rizai chu ka han hawng a. Kevin ka va en chuan chiang zet hian min lo en reng a, min hmuh chuan a nui sak a, za lo tak hian ka han nuih let ve a, ka zak tih a hrethiam a ni ngei ang, engmah a sawi lo.

Meeting tura kan kal te chu sawi tur ka hre lo, ka ngawi ngal a, Kevin pawh a tawng bik chuang lo. Taxi-a kan chuan laite chuan a maimitchhing tlat a, a muhil nge a ngaihtuahna a kawm ka hre lo. Conference hall kan pan lai chuan thil pawimawh zual tur chu Kevin nen kan sawi dun mawlh mawlh a, kan hotute mit thlung chu kan tum hle tih a hriat, chu chuan min tihlim ve deuh a, Kevin chu ka ring bawk a, a rintlak em em ang tih ka hria. Darkar thum zet a liam tawh a, branch hrang hrang hmalakna enkual a ni a, a tawp berah Kevin a rawn ding chhuak a, amah pui bawm turin a bulah ka lo awm ve bawk a. Presentation a pek lai chuan a hmela inrintawkna chu tupawhin an hmu in ka ring, kan product thar duan tura kan hmalakna hrang hrang a han chhawpchhuah chuan kan pute mit a la hle a, an hawi sawn phal lo hrim hrim. A tawpa kut beng thawm pawh a ring hle a, a tawp a khar ruala min rawn siai zeuh chuan min ti lai viau a, a nuih zui var var avangin ka nui ve sak a, a namai loh zia ka hriatbelh zel chu a ni.

Hotel lam pana kan tlan lai chuan ka phone a rawn ri a, ka rin loh takin Tim-a a ni tehmial a, ka la dawn nge dawn lo tih ka inkhap vel a, ka la ta hram a. Engvak mah chu a rawn sawi lo, Champhaia a chhoh tawh thu leh inngaihtuah tha tura min duh thu a ni deuh ber. ENgmah ka tiam thei lo tih ka hrilh nawn leh a, ka rilru ka la thlak lo tih ka hrilh nawn bawk tak e. Kan inbiak zawh chuan Kevin chu ka va melh a, inthiam loh hmel deuh tak hian min lo en reng a, engmah sawi lo in ka hma lam chu ka melh ngar a, luhlul min ti anih pawhin ka pawi ti lo. Ka duhdana kal vek ka tum tihna ni loin, hun rei lo te min nghak thei lo tu chuan nakin zelah pawh min hriatthiamna a neih ka ring lo a, chuvanga ka rilru thlak tum lo ka ni. Ka luhlul tlang zel ang ka ti hran lo a, mahse, Tim hian min hriatthiamna ti lang se ka ti mai chauh a ni a, chutiang a nih phawt chuan thla lehah pawh inneihna kan buatsaih mai ang. Ka thaw halh a, ka ngaihtuahna atanga chawlh hahdam tumin ka maimitchhing ta daih a. Hotel kan thlen pawh chuan Kevin chu ka be tawh lo, ka room ka pan ding nghal a, keimah chauha awm ka duh. Ka inbual a, chau zet hian ka mu thlawp a, Tim-a chu ka be chak ngawih ngawih a, mahse, ka induh tawkna chu a buk a rit leh ta zawk. Ka lo muhil vang vang a, ka room kawngka a rawn rik dawt dawt thawmah chuan ka harh zawk a, kawngkhar chu hmanhmawh tak hian ka va hawng a. Ka hawn rual chiahin Kevin chu a rawn lut nghal a, a hmela manganna chu ka hmu nghal. Min kuah thlawp a, a awmdan chu ka hrethiam lo tak zet.

“Min ti mangang hman lutuk tih I hria em? Ka call che a, I pickup thei si lo, thil tha lo  thleng emaw ka ti hman asin”a ti tham chal a. Kevin awmah chuan ka hmai ka phum a, mak tak maiin him riau hian ka inhre bawk a. Ka awmdan chu hrechhuakin min kuahna atangin ka tal chhuak a, tunah chuan a hmel pawh a lang pangngai leh deuh tawh.

“Naktuk zingah kan chhuak dawn si a, insiam fel ka duh deuh a”ka ti a.

“A tha alawm”ti chauhin min chhang a, sofa-ah chuan a thu nghal a.

“Mut hma pawh ka duh dawn a”ka tih chuan a nui deuh sak a.

“Aw le, I phal lo chung ka riak lo ang. Insiam la, I zawh hunah ka room lam ka pan mai ang”a ti dam dap a.

“Ka sawi awmzia chu…”

“Ka hrethiam alawm”a ti leh mai a.

Engmah ka sawi tawh lo. Ka thawmhnaw chu ka thlep fel mawlh mawlh a, ka rilruah Tim-a chiah a awm bawk. Aizawl kan thlen hunah tha takin ka bia anga, rilru dam loa kan awm ve ve hi a tulna a awm kher lo maithei, sawi fel theih thil anih chuan kan sawi fel ang tih rilru pu chuan ka awm a, ka mizia hre khawpin kan inkawp rei ve tawh bawk a, chhuna min rawn biak khan ka rilru ka thlak lo tih sawi mah la ka biak danah khan phut ka nei tih a hrethiam em em ang. Ka ngaihtuahna avang chuan ka nui deuh sak a, Kevin a awm tih hrechhuakin ka han insum leh deuh a. Aizawl thlen hlan chu ka nghakhlel tak zet tawh.


PART 4


Mahni in ngeia han mut veng veng chu a hahdamthlak bik riau hian ka hria a. Ka mu pawh ka lo mu tui ngang mai, chawei hman loa office ka kal a ngaih phah hial a! office ka thlen chuan ka room lamah ka kal tlang nghal a, Tim-a biak vat chu ka duh a  ni. Kawngka ka khar tha a, ka phone phawrh chhuakin Tim-a chu ka han call a, a pickup thei lo. Beidawng duh loin ka han call nawn leh a, a tawpah hmeichhia hian a rawn la ta hlauh a, a nau nih ringin Tim-a ka biak duh thu ka sawi a. A unaute ho nen kan innel vek avangin an lo pickup chang pawhin biak ka duh thu ka sawi hreh ngai lo.

“Tunge I nih aw?”

Ka nui ri hak a. Ka ngaihtuah chiang a, tu nge ka nih maw?

“Tetei I ni lo em ni?”ka ti a.

“Ka ni lo tlat”

Chutiang chauh chuan min chhang, ka hming save danah pawh ka hming chu a hre tur a ni lo em ni?

“Ka tihsual palh anih dawn chu”tih pahin phone chu ka dah ta hmak a.

Ka ngaihtuah chiang a, ka tha chu a na tulh tulh.

Ka awmdan chu ka sawi thiam lo, tlawmna rilru ka lo put ve tan mekte chu a bo zo nghal vek. Ka tlawm a, ka tlawm nawn tawh lo ang tih chauh chu ka rilruah a awm. Tun ni rei lote chhung hian engtin tak nge a phone ah ka hming a save ang? Chu chuan ka ngaihtuahna a luah ngut ngut a, kan pahnih khan inkoh duat vel kan nei ngai lo. Kan number pawh kan hming pangngai ngeiin kan save thin anih kha. Ka awm chu ka dawm vang vang a, helai hmun hi ka hnathawhna hmun a ni a, ka mimal nun nen inzawm tir ka duh lo. Intercom chu ka han ban a, Kevin ka hmu duh.

“Ma’am, min mamawhna I nei em ni?”Kevin chu a rawn lut mek a.

Ka inring hman lo, ka lehkhabu pakhat chuan ka lo vawm pawp a, a dul chu a dawm vang vang a, lehkhabu chu a chhar nghal a.

“Thurawn lak tlak loh zet min pek vang a nih kha”ka ti a, ka tum hmak a.

Chutia ka tih veleh chuan za em em hian a nui ta hawk hawk a, ka nui duh lo.

“Ka thurawn I pawm duh kha ka lawm hrim hrim. I beidawng hma lutuk anih kha, lo nghak la, amah zawkin a rawn be em em ang che”a ti a.

“Biak tumna ka nei tawh hauh lo ania”ka ti nghat a, a nui vei sawng a. “Chawhnu dar 2 ah video conference kan nei dawn nia, lo inring ang che”ka ti a, a lu a bu nghat a. A kal thei tawh ka hrilh hnu chuan min nuih var varin a chhuak zui a. Ka rilruah chuan ka hna a lang thei meuh lo, anihna takah chuan Tim-a nen kumkhuaa inthen tur anga ka inngaihtuah chuan thil theih ni hian ka hre tlat lo a, kha chen kha kan lo inkawp ve tawha , heti tawpa a tawp hi ka ring lo a ni ber.

Chawhnu dar 2 ah chiah video conference nei turin hall kan pan a, ka rilru ka la pek loh ber tum a ni hial awm e. Kan product thar tihchhuah turah kan idea chu a tha ber lawr lak a, chuvangin thlathar atanga kan hna pawh tan nghal tura tih kan nih thu te chu thinlung taka lawm tur ka nih laiin ka rilru hmundanga a chen nasat luatah lawmna chang pawh ka lo hre lo. Kevin chu ka ring tawp a, ka aiawh zo a ni bawk a, amahah ka innghat deuh tawp.

“I mimal thil leh I hna kaikawp tawh suh”

Ka room pan kan kal lai chuan Kevin chuan a ti hmuk a. Ka chhang lo, insawi thiamna tur ka nei miau lo a.

“Ka insiamrem thuai ang”tih pahin ka room ah ka luhsan a. Ka awmdan hi ka duhdan a ni bik hauh lo, mahse, a thleng miau si a, ka inthunun theih piah lam a ni.

In ka thlen chuan khua  a thim fel vek tawh a, chhungkua ka awh thinna ber chu ka hnathawk haw min lo hmuak tu awm te, ei leh in peihsa diama lo awm te kha a ni thin. Ka mal ngawih ngawih hian ka hre thar a, nidanga ka ngaihtuah ngai loh ka nu ngaihna te pawh ka nei hial a! Peih vak lo chung chuan rawng ka bawl a, tv ka on bawk avangin thawm dang ka hre lem lo. Chaw ka eikham hnuah rei fe ka thu khawmuang a, ka inbual a, ka hna thawh tur hawn thawh tumin ka inbuatsaih a. Ka phone let reng chu banin whatsapp msg ka hawng hlawm a, ka beisei vak loh in Tim-a msg a lo awm tel a, ka han hawng hmasa ber a.

*I lo call a ni maw? Ka lo hre miah lo a*

Ka phone chu ka thutna piah ah ka vawm phei a, chhan kher a tulna ka hre lo. Ka thawh takah chuan ka in thawk tui leh ta phian a, ka tuina ber a nih avangin ka bansan tak tak thei lo ang. Ka phone a rawn rik leh pawh chuan ka ngaihsak lem lo a, hna ka thawh laiin engmah ka intihbuai tir ngai lo. Tim khan min hrechiang em em a, hna ka thawh laiin min be buai ngai lo a, hun thawl tak min pe thin. Ka han ngaihtuah chiang a, min ngaihtuah tak tak lo ang hiala ka lo puh hman chu ka inthiam lo lek lek mai. A nihna takah chuan ani tluka min ngaihtuah kha an awm kher awm lo asin! Ka lu chu ka thing a, ka ngaihtuahna ka inthunun tir lo ang.

Mu tura ka inpuahchah meuh chuan dar 11 a lo pel tawh a, ka indah fel a, ka room lam panin ka kal zui a. Ka phone theihnghilh chu la lehin missed call lo intlar thla dul chu ka han en a, Kevin vek!

“A pawimawh viau em ni?”

Phone a rawn lak rual chuan ka lo ti nghal hmiah a.

“Pawimawh lo ah ka biak mai mai che I ring em ni?”a ti ve thung.

“Han sawi la”

“Naktukah zawk le”

“I thu thu le”

Phone ka dah a, ka awmdan avang chuan ka nui hak a, engtik atang nge hetiang mizia hi ka lo neih ka hre lo. Ka mu chu ka lo mu tui ta phian a, ka zin haw hnua ka la muttui ber tum a ni ngei ang.

Ka harh leh meuh chuan khua a lo var iar tawh a, tui taka ka mut theih avangin lawmthu tawngtaina ka nei a, rinna kawngah chak lo hle mah ila pen bosan erawh ka ngam bik lo. Ka khum bula parda chu ka han hawng a, tukverh ah chuan ka dak vang vang a, ka mut that vang a ni ngei ang, chakna ka nei thar hian ka inhre bawk a. Ka che vel chu ka zang vak a, engkim mai chu a nih tur ang zaih a ni mai hian ka hria.

Nilengin ka buai a, Kevin nen pawh kan inhmu hman lo. Mizoram sorkar nen kan inbiakrem tawh angin project kan tan a ngai a, chu chu Kevin hian a hma anga, keiin kan product thar tur lamah ka insawrbing ang tia kan lo ruahman chu bul kan tan chho mek a ni. Kan naute ho pawhin theihtawp an chhuah a, tute pawhin hlawhtlin kan duh vek, chu chuan thawhhona tha a siam a, nuam tit akin kan hmaa hna awm chu kan thawk vek a ni. Office ban hun a ni tawh a, ka hna a la laklawh avangin ka la haw ve thei lo a, kan receptionist Mawitei nen chauh kan awm tawh a, mamawh ka neih thut takin tih thuah Mawitei chu min hawsan lo turin ka chah a, computer hmaah thuin ka hman hun a nghak mek a ni. Ka phone a rawn ri a, ka thiannu rei tak ka biak tawh loh, Mazawni a lo ni a. Keimah zawkin ka bia ang ka tih thin laia ama hnen atanga call ka dawng chu ka lawm rilru hle.

“Engmah ka lo hre ve hauh lo a, hre hmasa pawl ka nih ka lo inbeisei nen”a rawn ti nghal tawng a. Thuhma han neih pawh a tum hran lo.

“Eng thil nge ni leh ta”nui chungin ka lo ti a.

“Kan Timothy hian nupui a nei dawn anih chuan nangmah lo tunge a neih chuang ang?”

Ka thu ngil zawt a.

“Hey.. Sangkim, tinge I ngawih daih?”

“Aw.. Hello, Mazawn, ka lo be leh ang che line a clear lo”tih pahin kan inbiakna chu ka titawp a. Ka tha khur nasa lutuk chu thunun tumin ka han bei ve bawk a, awmzia a awm tam lo kher mai.

“Ma,am…”

Mawitei tim deuh daia ding ka hmuh chuan ka harh fim chiah, engtia rei nge ngawi renga ka lo thut ka hre mai lo.

“I nuam sam lo em ni?”a tih chuan ka nui lui sak a.

“Nuam e, ka tha lutuk. Haw taw hang”ka ti a. Phur takin a chhuak a, muangchangin ka zui bawk a.

Inah haw tlang mai lo in ka tei kual vel mai mai a, ka boruak tawn hahthlak zet chu ka hmachhawn peih rih lo. Khawlaia mi vei vak chu ka thlir kual a, ka awmdan chu a nuam lo tak zet a ni. Ke hlirin ka kal bawk a, ka in thleng tur pawhin hun a duh rei kher mai. Gate ka hawn chuan kawtah Kevin chu a lo vei tawn sek tih ka hmu nghal a, min hmuh chuan a thaw huai a, min rawn pan nghal a.

“Tun ang hunah khawiah nge I awm? Min ti mangang hman lutuk. Office ah ka rawn kal a, I awm tawh si lo, ka call tlang thei bawk si lo che a, hetiang tur a ni hleinem”a lo ti mawlh mawlh a.

Ka insum hman lo, Kevin chu ka kuah a, ka mittui chu a luang zung zung a. A hmaa a lungawi lohna chu dah tha in min ngaihtuah tih hriat zet hian min lo kuah ve a, ka hnungah chuan a chul ta heuh heuh a. Tap chhuak lo turin theihtawp ka chhuah a, ka mittui erawh ka dang zo ngang lo a ni. Inchhungah min hruai lut a, ei tur a ken chu a ti lum nghal sawk sawk a, a che vel chu ka lo en reng ringawt. Ei tur chu min rawn chhawp a, min duhsakna chu a zahawm ka ti a, ka ei ta hram a, ka ei chak loh ang aiin ka ei tui phian lawi a. Ka bulah a thu a, a hnathawk zo a la haw lo tih hriat zet hian a thawmhnaw pawh a la thlak lo. A hmel chu a pawr phang a, hna a thawk rim tih a hai theih loh.

“Tim-a’n nupui a nei dawn ni awmin an sawi a”

A thu ngil zawt a, ka thusawi chu keipawhin ka awih lo a, ka bula thu hian a awih lo lehzual.

“A theih loh”min chhang ni pawhin ka hre lo.

“A nih tur ang ang hi ni zo vek se pawi ka ti lo”ka ti a. Ka rilru tak tak pawh a ni.

“Sangkim…”

Min koh dan vang chuan a inthiam lo leh deuh a, pawi ka ti lo tih ka mitmengin ka hriattir a, a then ve sak a.

“Sawi hun a ni lo in ka hre leh deuh e”a ti ta daih a. Mi nawr lui chi ka ni lo a, a duh tak huna min hrilh turin ka ti mai a, min hrilh mai ang chu.

A haw dawn chuan pawn thleng ka thlah a, gate chu ka ngheng a, kal mai lo chuan a han tawi hret a.

“I thawk rim si a, tui deuhin I mu dawn nia, I taksa dim la”ka ti a.

Min melh zawk a, ka ban chu a rawn vuan a, a chet leh dan tur ngaichangin ka lo ding reng ringawt a. A lamah min pawt hnaia, min kuah ta vawng vawng a, nam sawn ka han tum a, min kuah nghet sauh a.

“Reilote chu hetia awm hi ka duh”a ti sap a. Rilru bei lo zet chuan a tih dan ang chuan ka awm ve ta ngawt a.

Ka awm a nuam thei lo, min kuahna atangin ka inla hrang a, a rum nghut a.

“Mangtha”ka ti a, min chhan leh hmain inchhungah ka luhsan ta nghal a.

Tim-a vanga ka rilru natna aiin Kevin khawsak dan chuan ka rilru a tinuam lo zawk. A chezia ka lo chik ngai lo a, a chang chuan min lo en leh vung vung thin tih ka ngaihtuah chhuak a, Kevin hian min hnaih thut chhan hi eng nge ni thei ang? Ka in khuh tha sauh sauh a, mut ka mamawh a ni. Ka maimitchhing a, kar lovah ka lo muhil ta mai reng a.

x---------------------------------x------------------------------x----------------------------

*KEVIN*

Hyderabad Mizo Welfare ten intihhlimna kan buatsaih tum kha ka la hrereng mai. Kan junior Matleii damloh thut avangin ka chanvo neih ve turah pawh ka tel thei ta lo a, a chhungte rawn thlen hma loh chuan hospital ka chhuahsan thei lo. Delhi atanga a cousin rawn kal tur an sawi chu ka lo nghak ve ringawt mai a ni. Nikhat leh zankhat ka awmpui hnuah a cousin pawh chu a rawn thleng ve a, ka hmuh tirh phat atang khan ka thinlungah hian midang chuhpui theih rual lohin hmun a chang nghal a ni. Hmeichhe dang ka en ang chuan ka en thei lo tih ka chiang nghal em em a, a unaunu buaipuitu anga a hmaa inlan pawh ka ngam der lo. Kan hruaitu thenkhat an lo awm a, kei erawh chhuanlam hote siamin ka chhuak a, ka hming erawh an lam zing viau tih a hnuah min hrilh leh a, chu ringawt pawh chuan ka thinlung a tilawm a ni. Matleii hospital atanga a chhuah hnu rei vak loah Delhi lamah a hruai ta bawk nen, a chanchin ka hre zui ta lo. Mak tak mai leh beisei loh takin Aizawla ka haw dawn tumin Kolkata airport ah ka hmu ta hlauh mai a, khami tuma ka phurzia leh ka zam zia kha ka sawifiah thiam lo. Mahse, second khat chhung lekin ka phurna te chu an tham ral leh zo ta vek a, a chhan chu a bula mipa rawn kal chu atan mi satliah a ni lo tih ka hriat nghal vang a ni. Ka thu hnawk a, ka thinlung hi a na zui vang vang hian ka hria.

“Kevin”

Ka hawi chhuak a, Timothy chu nui sang hian ka bulah a lo ding a, ka han nui lui ve ngial a.

“In haw dawn em ni?”tih pahin Sangkimi chu ka han melh a, a lo nui ve var var a.

“Chawlh kan han hmang ve lawk ang e”tiin Sangkimi chu a han kuah kher bawk a, hmuh hrehawm ka tihzia a hre ru anga min runluih em ni ka ti hial zawk!

Ka hmuh phak loha an liam chuan ka thaw huai a, ka insangmar teuh chu ka nuih a za zawk. Ka chan miah loh tur buaipui nan ka hun ka ui a, ka buaipui hi ka sim a ngai a ni tih ka inhrilh mawlh mawlh bawk a. Chu chu ka nuna Sangkimi lo luh tan dan a ni.

Ka pa hriselna a that loh avanga Aizawl lama ka let hlim khan nuam tihna ka nei miah lo, ka lo tum dan chuan phaiah hna ka thawk chhunzawm ang ka ti thin a, mahse, kan chhungkaw kut leh ke ber ka pa theih loh takah chuan inchhungkhur enkawl ka ko ah a tla miau a, ka hnial thei lo a ni. Chhungkaw sumdawnna kan enkawl ve ngar ngar a, ka talent a ni lo chiang khawp mai. Ka inzir thiam mai erawh ka ring a, tuina kawng zawh a hlutzia ka hre chiang hle bawk. Kan dawr hmunkhat ami chu loh theih loh in kan tiral a, hmunhnih erawh ka kutah a awm thung. Chutianga hma thar te ka lak chhoh ve lai chuan ka theihnghilh ngai loh Sangkimi ka nunah a vawihnih nan a rawn inlar a. Engtikawng mahin beisei tur a awm lo tih hre mah ila ka hnaih duhna chu thulh theih a ni lo. Ka tuina leh ka thiamna pholanna tur remchang a lo ni lehzel chuan min tiphur a, an company a hnathawk turin ka tling tawk tih ka chiang bawk. Ka han interview a, ka tling ta reng bawk a, ka hmuh phaka a awm ringawt pawh hian min tihlim tawk em em a ni.
x-------------------------------------x---------------------------------x---------------------------------
Ka phone chu ka melh vang vang a, ka rilruah Sangkimi lo chu engmah a awm lo. Timothy vanga a tah ka phal lo a, ka phal loh avanga tap lo ngawt tur erawh a ni chuang si lo. Ka awmdan hi ka la hriat ngai loh ang a ni. Hna chungchangah pawh ni se hmeichhe thuhnuaia awm tum ngai lo kha phur takin ka awm ta chu a ni a, ka awmdan hi a mak a ni! Ka phone screen a hming lo lang chuan ka ngaihtuahna a la peng thuai a, a nihna takah chuan Sangkimi hian a rilru thlakin Tim-a hi a pan ang tih ka hlau a ni. Ni e, ka hlau tak zet a ni.

“Hello”

Ka aw chu a khur ru deuh tlat a.

“Kevin, ka inah I lo kal thei ang em?”

A tap zo chiah a ni ngei ang, a aw pawh a la dik lo.

“Ka lo kal nghal ang”

Sangkimi anih chhung chuan eng hunah pawh ni se kal zel ka duh ang.

Ka insiam a, ka zo hma khawp mai. Bike la chhuakin Sangkimi in lam chu ka pan nghal vat a, eng vanga min ko nge a nih ka hre lo, mahse, phur takin ka pan tho a ni. Doorbell ka han hmet a, min rawn chhawn mail oh avangin ka nghak deuh a, a hnu deuhah hmel pawr deuh phang hian a rawn hawng a, lut tura min sawm pawh nghak loin ka lut nghal a.

“Tumah ka tibuai lo ang ka ti a, mahse, ka lo phone ta tho che a”inthlahrun hmel tak hian a ti a.

“A pawi lo, a pawi reng reng lo”tiin thutna min kawhhmuh lamah chuan kan inzui a.

“Min hmuh ang hian ka chanchin share pui tur tumah hetah chuan ka nei lo a, ka unaunu Matleii lah helamah a awm bawk si lo a. Tim-a nen kan chanchin I hre tho a, ka rawn ko tawp che nih kha”a ti a, a aw chu a han thian kharh kharh a. A thusawi leh tur ngaichangin ka han ngawi a. “Nichin khan Tim-a nau nen kan inbia a, a nupui neih tur chungchang engmah an hriat loh thu a sawi a, inah a awm tlem thute pawh a rawn sawi bawk a. Ka hriatthiam loh chu nupui chu lo nei dawn pawh ni se tunge chutianga neih tur khawpa a lo biak thin ni ang? Ka tan a hun neih chu min pe vek zel a, hunawl a neih loh zia pawh ka hria a, midang buaipui nan hun a neih hi ka ring thei lo a ni. Mahse, min be miah lo a awm thei hian ka ngaihdan chu min thiahsak leh ang lawi a”a ti a, a khur chu a khawih neuh neuh a.

“Engti tur berin nge min duh?”ka ti a, min en a, min chhang mai lo.

“Ka hre lo”

A bulah ka insawn a, a kut chu ka han vuan a, a tang deuh na a a tang rei lo.

“An khuaah chuan han kal rawh tiin thurawn pe ta che ila, engtin nge min chhan ang?”ka ti hlawl a.

Ka zawhna avang chuan a hamhaih tih ka hria, a nui a, mahse, a nuih a za chuang lo.

“Ka chhanna chu I hria ang chu, ka rilru hi nah le mah se mahni ngaihdan anga a kal phawt chuan ka kalsan hlen tawh ang”a ti ta reuh a.

Engtia awm tur nge ka hre chiah lo, ka rilru chuan han kuah a, a rilru natna ka hriatthiam pui a ni tih lantir ka duh a, mahse, kei hi chutiang ti tur khawp chuan a lakah engmah ka ni lo.

“Ka thawl hawk ta mai, ka rilrua awm ang ka sawi zo in ka hria”tiin a kut ka vawn chu a la sawn a. “Kan khawl thar pawh naktukah a lo thleng dawn a, hna kan tan tak tak thei tawh dawn e”tiin thudang a sawi ta daih a.

Ka haw dawn meuh chuan ka thlen hlima lungngai hmel kha hmuh tur pakhatmah a awm tawh lo. Phur takin min thlah a, a awmdan hi ka hrethiam lo, keichuan hetiang hi ka thei ve lo tih ka hria. Gate bulah chuan kan han ding leh ren rawn a, min nuih sen sen chu en duh lo in ka hawi sawn a, ka insum zo lo ang tih chu ka hlau a ni.

“Naktukah kan inhmu dawn nia”a ti sap a.

“Tui deuhin I mu dawn nia”ka ti a.

Ka banah a rawn vuan a, “Ka lawm lutuk aw”a ti leh a, a chalah chuan ka fawp a, a aia thui kal lo tura ka inven nasat zia kha.

Ka tlan liam dawn chuan side glass atangin ka han melh leh hram a, vawt tih hmel tak hian gate nghengin min lo la thlir ta reng a, chu ringawt pawh chuan min tihlim a ni.