IT'S YOU (Dei Maphi) Chapter 3

IT'S YOU (Dei Maphi)

Chapter 3

PART 7

*KEVIN*

A ni telin ka pa dinhmun a tha lo telh telh a, ka dinhmun tur chu a lang deuh riai ruai tawh, ka pa a awm loh chuan ka hna ka ban ngei a ngai ang. Kan chhungkaw sumdawnna hi ka kutah a tla lo thei dawn loa, ka pa duhthusam hnuhnung ber a nih dawn bawk avangin ka hnial thei hauh lo ang. Sangkimi bula ni tina hun hman nuam ka tih thinzia te hi tuman min hriatthiampui phak lo ang. A kianga ka awm tam loh chuan ka chan mai ang tih pawh ka hlau alawm.

Ka pa hnara khawl an vuah chu ka melh tlawk tlawk a, a kuta hrui inthlung nei nuai te chuan min ti zam tak zet a ni. Chau zeta a thaw tawk tawkte chu ka tan chauha thaw ni tawh mai te hian ka han hre bawk a, ka chhungte biak tlak an awm tawh lo. Ka pa chu kan chan ta mai emaw tih turin an tap reng a, ka pa hi han sun mai atan chuan ka la phal ve lo. A kut chu ka han vuan a, ka thinlung hi a na a ni. Nurse te chuan min chhuahtir tak avangin pawn lamah ka awm a, ka ngaihtuahna chu a vak kual nasa hle. Ka pa nena kan titi hnuhnun ber tum kha ka ngaihtuah chhuak a, a khum bulah thu in ka awm zel dan tur kan sawi dun anih kha. Hmeichhe hmangaih ka nei tih ka hrilh khan hmuh a chakzia a sawi nghal a, mahse, chu hmeichhia chu midang ta mai tur anih thu ka sawi tlang ngam lo. Tunah chu hmeichhia nen chuan pangngai takin kan inkawp tan ve chauh a, a hmel pawh a hmuh ve hma in nikhaw hre lo in a awm ta char char si, vawikhat tal hmu se tiin duhthu ka sam thin a, a thleng lo anih ngat  chuan ka na dawn mange!

“Kevin”

Ka hnung lam chu ka hawi vat a, thli thaw vuk vuk pawh chu ka lo hre chang lo. Ka cousin Puii a lo ni a, hun rei tak hnuah kan inhmu leh a, kan inhmuh chhan erawh ka pa dinhmun that loh vang a ni. Phai lamah model hlawhtling tak niin awm hmun a beng bel a, a eizawnna hi ka tui pui chiam loh bakah ka unaute tan ka duh pui lem lo. Chuvang erawh chuan ka sawisel sak ngai lo a, ka ngainatna a tlahniam tih erawh a inhre leh kiau tho ang.

“I hritlang ang, inchhungah lut ang”a han ti leh a.

“Engtikah nge I rawn haw a?”ka lo ti let thung a.

“Dar 2 khan ka rawn thleng, ka inbual a ka rawn kal nghal”a ti a. Min ko lut tura rawn kal mah nise ka bulah chuan a rawn ding a, ral lehlam chu kan thlir dun vang vang a.

“Kev.., mipa chak tak I nih kha aw, engpawh lo thleng se chak tak zelin kan ti ang chu”a ti a. Amah vek chuan, “I unaute zingah I ngainat loh ber ka ni tih ka inhria a, mahse, ka ngaihsak em em reng tho che ania”tiin  a nui a.

“Ka ngaina lo che tih ka sawi ngai lo e a”ka tih chuan a nui ri hawk a.

“Min chhuang viau lo mahse Pa Puia hi chuan min chhuang teh ania, in in ang lo hi ka lawm lo lek lek thin”a ti a. A fiamthu tih ka hria, mahse, a mood ah ka awm thlawt lo.

“Pui, ka pa chu I va hmu ve tawh em?”ka ti a.

“Aw, ka hmu tawh e”a ti a, sawi tur a hre bik lo a ni ang a ngawi ta daih a.

“Lut ila”ka tih chuan a inher a, kan lut ta a. Ka ngainat loh ber thin ka unaunu hi min hrechiang ber tu a ni tlat lawi a, ka naupanlai atang tawhin ka rilru hi a man em em thin.

Tlemin ka pa chu a rawn kang veleh deuh a, doctor thu min rawn angin phai lama kal turin rilru kan inbuatsaih ve bawk a, ka hna atangin chawlh ka la fel a, Puii nen kan kalpui phawt anga, a tul dan ang zela midang lokal turin kan tifel a. Vawi tam tak ka pa nen zin dun tawh thin ma hila tun ang renga zin pui huphurh hi ka la nei ngai lo. Ka pa chuan min melh vawng vawng thin a, a tawng hriat that tur a awm lo chung hian min ko turin a aw neih chhun hi a rawn chhuah zel thin. Chu chuan a tan ka hlut bik zia a lantir a, ka hnuk a ti ulh thin.

“Bawiha” tiin damdawi ka pek zawh chuan min han ko a. A kut chu ka vuan vata, a hmui bulah ka beng chu ka han dawh a, “I thiannu kha ka hmu duh a ni”a ti a. Ka lo theihnghilh lek lek a ni, ka pa nena inhmelhriatna hun tha ka zawn reng thin kha ka rilru buai lutuka ka lo hrechang lo a, ka inthiam lo kher mai. Sangkimi hmu turin office lam ka pan vat a, meeting neia a lo chhuah daih avangin a in lamah ka kal a. A in pawh a lo la inkalh avangin lo nghah mai chu ka duh a. Zing lama kan inbiak khan meeting a neih tur chungchang  a sawi ri miah lo a, a thiam loh pawh a ni hran chuang lo. Reife ka nghah hnu chuan khua pawh a thim mai dawn a, ka phone ka ken loh avangin biak ngaihna ka hre der si lo. Ka nghak laklawh tawh a, ka nghak zel phawt ang tih rilru puin ka nghak ta reng a. Khua pawh a thim fel tawh, Matleiin te inah chaw a ei dawn anih ka ring ta ringawt a. Step a ka thutna atangin ka tho chhuak a, kawng kawi atanga motor rawn tlan mek light chuan gate chu a rawn chhun paw sat a, ka motor ka dah ve tho avangin kal ngaihna a la awm dawn chuang lo tiin ka lo nghak ta zawk a. Gate piah deuhah chuan motor chu a ding a, ka rin loh lutukin Sangkimi chu car atang chuan a rawn chhuk a, Tim-a hmel ka hmu tel chu ka chhungril hi a tawt nghal ut ut a, chet nachang pawh ka hre lo. Anni chuan min hmu  ve lo a, kei erawh chuan chiang em em hian ka hmu a, ka pa damlo buaipuia hun ka hman laiin a bialpa hlui nen duhtawkin an lo inkawp leh vel a nih awm chu! Tim-a chuan Sangkimi chu a kuah a, ka en ngam tawh lo, ka hawisawn ringawt a, engtia rei nge chutiang chuan kan awm ka hre lo. Motor ri ka hria a, light a eng hla tial tial a, gate a rawn inhawng a, chutah chuan ka meng ngam ta chauh a.

x------------------------------------------x--------------------------------------x-----------------------x

*SANGKIMI*

Meeting pawimawh tak ka neih avangin DC Conference Hall lam panin ka chhuak a, Kevin awm se chuan kan pahnihin kan kal anga, hnehsawh takin engkim chu a hma leh vek ang tih ka hria. Apa damloh avangin chawlh a la a, phai lama kal mai tur an nih bawk avangin ka tibuai ngam der si lo. Mahnia engkim ka buaipui lohna a la rei loh tehlul nen ka khawr nghal viau chu a mak ka ti a, Kevin hlutzia min hriatchhuahtir lo thei lo. Darkar hnih vel zet meeting kan neih hnuah kan zo thei ve ta hram a. Pawn kan chhuah chuan ka rin loh tak maiin Tim-a chu ka hmu hlawl a, office lama min rawn en thu leh hetah ka kal tih a hriat avanga min rawn nghak a nih thu a sawi a. Engvanga min hmuh la tum fo nge a nih ka hrethiam lo. Inhauh buaia inhnial buaina hun a ni lo tih ka hria a, a motor ah chuan ka chuang ve ta ringawt a. Ka tum dan chuan Kevin te zin hma ngeia a pa hmuh chu ka duh a, chutiang tur chuan ka in ruahman bawk. Ka haw anga, ka inthlak fel hnuah ka kal ang tiin ka ngaihtuah roh roh a. Ka duh loh dan takin Tim-a chu a che leh tlat, ka in lama min hruai lo chuan hmundangah min kal pui ta daih a. Ka thinrim kher mai. Motor tiding turin ka ti a, ka tawng chu hria ang pawhin a awm lo. A hmaiah ka ham sak a, a thi ser ser lehnghal, engahmah ngai duh loin ngawi rengin a motor khalh chu a chhunzawm hmiah hmiah a. Engvanga min tibuai fo nge a nih ka zawh pawhin min chhang chuang lo. Ka duh lo chung dinner min ei pui a, fian khat bak ka ei lo. Ka rilru a na a, min zah lo lutuk nia ka hriat vang pawh chuan ka na a ni.

“Mangtha che harsa ti viau mah ila engtikawng mahin I rawn let leh tawh dawn lo tih ka hria a, dinner kan ei dun hnuhnung berah hi chuan buaina siam lo hram rawh”a ti leh lawi a. A tir atang khan tha takin sawi nise ka hnial buai lo mai tur. In thleng min thlah a, leng lut tur pawhin ka sawm duh lo, Kevin te in lama kal chu ka la tum fan a, zan thil pawh nise ka kal tho ang. Motor atangin hmanhmawh takin ka chhuak a, Tim chuan min pawt bet tlat a, ka rilru hmanhmawh tawh lutuk nen ka ding ta ringawt a.

“HLim reng ang che, I lo let duh phawt chuan ka awm reng ang, mahse, ka tibuai tawh lo ang che”a ti ta nge nge a. Min kuah pawh chu inthlahna a nih tawh avangin ka lo dang lem lo, kei erawh chuan ka kuah let ve lo. A tlan liam pawh ka thlir lo, hmanhmawh takin gate ka hawng sawk sawk a, step a Kevin ka hmu thut chu ka ding chawt a, thil sual ti ang hrimin ka ding khawng ta reng a.

“In hmuhnawm khawp mai”a ti sap a. A sawi ring lo na a, ka hrechiang ngang mai.

“Kevin”tiin ka pan hnai a.

“Sawi ngai loin a fiah vek e, ka rawn kal chu ka lawm khawp mai. Tikhan engkim a chiang nge nge alawm”a ti ta sak sak a. Ka rilru mangang lutuk chu ka mittui a tla ringawt a, engtin nge ka tih tak ang?

“Ka sawifiah thei”ka tih chuan a kut a rawn phar a.

“Engmah sawi a ngai lo ka tih kha, engtin nge awlsam taka ka lo rin theih che tih hi ka lo inzawt mek a ni. I bialpa nen in inthen chhung reiloteah I lunglen hnem turin min kawp ve mai mai a, in boruak a that leh takah chuan min mamawh tawh lo ang chu. Mi rilru nghet lo tak I ni tihte chu hre tur ka ni asin, kum 6 dawn I lo kawp tawh kha I thlah hmak thei a, kei min kawp kha I hreh lo ania. Thla tlemte chauh I la kawp hman hi min thlauhthla leh mai dawn tihte chu hre rual ka nih tehlul nen”a ti a, ka insum zo lo. A hmaiah chuan ka beng thuai a. A ri sawk a, a na ang tih ka hria, chu ai mah chuan min tawngkhum dan kha a na zawk.

“Hmuh leh che hi ka duh ngai lo ang”tiin inchhung lam ka pan a, ka rilru na lutuk hi ka puahkeh mai loh nan ka tawngtai hial asin.

Ka insawifiahna pawh ngaithla duh loa a chhe thei ang bera min puh mai chu ka rilru a na em em a, ka mittui a tla thei lo. Ka mu te chu ka harh fim em em a, Kevin kher kherin chutianga min tawngkhum chu ka rin phak bak a ni a, Tim nen min hmuh vanga a rilru tur chu ka dawn phak ve in ka hria. Mi rilru nghet lo leh leplerh ang maia min chhuah kha a ti lutuk deuh a ni. Engpawhnise, hun hian thudik chu a la lantir em em ang.

Ka eng tih mah a tui thei lo, Kevin chuan min rawn biain ngaihdam min dil te chu ka ring ve deuh a, a reh hmak si. Tlemin lo inthunun thei deuh ila, thil awmzia kha lo sawi mai ila ti tein ka han ngaihtuah a, a sawt tawh si lo. Keimah zawkin ka be hmasa mai dawn em ni tihte ka rilruk a, chu em chu a ni theiin ka hre bawk silo. An zin haw hunah hmaichhanah ngei engkim ka sawifiah mai ang tiin ngaihdan ka siam ta a.
x-----------------------x---------------------------x--------------------------------x

Ka thuhriat chuan min ti nghing lawih a, Kevin biak tumin a number ka dial a, a tlang thei lo. PA neih loh hrehawmzia ka hrechiang a, Kevin pawhin pa a nei ta lo. Ka ngaihtuah em em a, kan boruak that loh lai kher khera a pa a thi chu ka rilru a hrehawm hle. Matleii nen Kevin te in lam panin kan kal a, kan boruak that loh vel engmah ka hrilh lem loh avangin Matleii chuan engmah a hre lo. Kan thlen chuan mi an lo tam tawh hle a, vawiin hi phai lama kal tura an inbuatsaih ni kha a ni a, an kal hma in a peih lohsan ta mai niin kan bula thu te chuan an sawi a. Kevin chu ka zawng ru deuh ngar ngar a, hmuh tur a vang hle. Vuina hun hman zawh hnuah Kevin te upa ber khawdanga hnathawka awm nghah a ngaih avangin nghah tur a ni a, haw mai ka rilruk deuh na a Matleii chuan nghah ve tha a tih deuh tlat avangin kan nghak ve ta a. Rei vak lo hnuah Kevin chu pawn lama kan thutnaah chuan a rawn chhuak ve ta hlawl a. Matleii chuan a lo hui zeuh a, a rawn kal a, min hmu ang pawhin a awm lo.

“Hmu lo chea haw kan hreh sia kan lo nghak tawp che a”Matleii chuan a ti a.

“In fel hle mai”a ti a, hmundang chu a hawi vung vung a. Rei pawh a thu lo, an rawn koh leh mai avangin a kalsawn ta a. Vawikhat mah min melh lo. Matleii’n haw a rawt chuan kan haw ta a, ka rilru a nuam thei lo.


“U, Mala nen intihthiam lohna in nei mi?”

Matleii chu ka melh zawk a, min lo melh kiau a, ka hawi sawn vat a.

“Ho te mawle”ka ti liam puat a, min zawt thui lo se ka duh a ni.

“A chhan chu ka hre lo na, I thinrimna te dahthaa Mala tana hun I pek a ngaih lai tak ania”a ti a, a sawi dik tih ka hria.

Kan haw hnu pawh chuan ka ngaihtuah chhunzawm ve ngial a, bul tan dan tur ka hre lo hle a, engpawh nise naktuk lamah keimahin ka leng leh anga, thil awmzia pawh ka sawifiah mai dawn a ni.

Ka zing tho chu ka inbual vat a, chaw ka ei chak lem loh avangin office lam ka pan hma a, ka tih tur pawimawh zual ka thawk anga, Kevin te in lam ka pan ang tia ka ngaihtuah lawk vek tawh avangin hmanhmawh takin ka thil tih tur neih ang chu ka han ti sawk sawk a, ka naute ho rawn thlen hnu rei vak loah chhuah ka ngai tih sawiin office chu ka chhuahsan ta nghal a. Zing chaw ka ei loh avangin ka pum chu a rawn ri deuh rak rak a, kan office bul chiaha restaurant ah chuan ka han inhnawhpuar leh a, hmanhmawh lutuk loin Kevin te in chu ka pan ta a. A tirah chuan Matleii ka lo sawm chu ka han inchhir viau dawn a, keimah ngeiin hmachhawn ka duh avangin ka intihuaisen lui a, ka tha khur ru der der thin pawh tih reh tumin ka bei ve bawk a. An in ka thlen hma deuh chuan ka han ding leh phawt a, thlan thut ni a nih avangin an ina leng tura kal pawh an la tam hle a, inchhung kil lam pangah chuan thu lut ve in Kevin chu ka zawng ru deuh reng a. Chhungkaw zahawm tak an ni ang tih ka ring thiam mai, thusawi tura ding reng rengin an chhungkaw khawsak phung an sawi dan a in ang vek a, tin, Kevin miziaah pawh hmu ve bawkin ka inhria. Thingpui kan inzawh hnu chuan pawn lamah ka insawn chhuak a, keimah ang rual kal an awm loh avangin hrehawm chu ka ti lek lek a, mahse, chuti maia haw leh ringawt erawh ka tum bik lo. Ka beidawn lek lek tawh hnu chuan Kevin chu inhnuai lam atangin a rawn chho ve ta hlawl a, ring vak lo hian ka lo ko sap a, min rawn pan ding nghal a. Ka bula thutna awmah chuan a rawn thu a, a mit sen deuh ram leh bui deuh chur ka hmuh chuan a tap nasa viau a nih ka ring. Ka pa thih laite kha ka hrechhuak a, a dinhmun tur chu ka hriatthiampui hle a ni.

“Nangmah in em ni I lo kal?”a ti bung deuh nghut a. Anih thu ka sawi chuan a ngawi reng a, min hmu chu a lawm hmel pawhin ka hre lo. A hmaa thil thleng chu hrilhfiah hun a nih leh nih loh ka hre loa, mahse, mi nikhua lo ang maia min ngaih theihna thil anih avangin insawifah ka duh a ni.

“Kevin”

“Um”

Min en miah lo in min chhang a, chu ringawt pawh chu hrehawm ka ti.

“Thil hrilh tur che ka nei a”ka tih chuan a ding hluai a, “Ka sawifiah thei..”

“Engmah sawi tur a awm tawh lo. Sangkim, khami zan khan engkim kan sawi fel vek tawh”a ti ta hmak a. Sawi leh tuma ka ang zuau chu hmu in a nui sak a, chutiang taka a mitmenga min ngaihnepna ang chu tu hnen atang mahin ka la dawng ngai lo.

“Kevin”

Kan hawi rual thawt a, hmeichhhe chhe lo zet hi kan lam pan chuan a rawn phei a, ka hriat tawh hnu ni tlatin ka hria a, khawiah nge ka hriat tih erawh ka ngaihtuah chhuak zo mai lo.

“Ka zawng nasa lutuk che a, hetah I lo awm daih a”tiin a banah chuan a raw nvuan chat a.

“Hei office-a kan pi anih hi”tiin min kawk zeuh a.

“Aw.. A ni maw, I va fel ve. Lo inchibai ila, Puii ka nia”tih pahin a kut chu a rawn lek chhuak a, ka hrechhuak nghal e. Model lar zet, India ramah pawh lang pha ngat Mizo in kan neih kha a ni chiang lutuk, zam zet hian ka kut chu ka han pe ve a, ka insitna a nasa zual ngei mai. Kevin chu a ngheng deuh reng a, ka mit a kham tak zet a ni. Vanneihthlak takin office lam atangin call ka dawng ta hlauh a, ka hna chhuanlamin ka haw san thei ta. Motor chhungah chuan ka mittui a far kauh a, ka rilru a na tih pawh hre hman lo khawp khan ka lo insehruh a, tunah chuan min hmu pha tawh lo bawk a, zawi zawiin ka rilru natna chu a rawn inhnawh chho a, ka inthup thei ta lo.

Office pawh pan lo chuan inah ka haw tlang nghal a, ka inthlak a, khumah chuan ka bawk thlawp a. Hmeichhe namai lo tak, nalh chungchuang lutuk nen khatiang khawpa inhnaiha an awm chuan an inkarah enge maw chu a awm ngei a ni. Tin, a pa boral laia rawn tawiawm thei khawpa a hnimhnaih chu a tan a pawimawh hle ang tih ka chiang bawk. Ka thaw hak a, ka na lutuk chu ka puakkeh ang tih ka hlau. Bathroom lam panin shower chu ka han inphuh tir a, ka rilru natna te hi phuh bo vek theih nise ka ti.

PART 8

*KEVIN*

Sangkimi kal liam tur chu ka thlir reng a, ka thil tih hi a dik em ka hre lo, mahse, ka chunga a thil tih kha ka theihnghilh thei lo ang. KA unaunu Puii a hmuh chiah khan a hmela thikna nasa tak chu ka hmuh hmaih bik lo. A thu min hrilh tur kha ngaihthlaksak ka chak rualin college ka kal laia mawi leh nalh lutuka min bumtu hmeichhia kha ka hrechhuak lo thei lo a, kha vang khan ka dawih ru em em tawh a, kehsawm vek khawpa awm leh ka hlau a ni. Ka room lam ka pan a, ka pa vanga ka tawrhna a nat tawh tehlul nen Sangkimi natna min belh chhah hi a tam lutuk a, thawk ka lak a ngai a ni. Ka room kawngka rawn inhawng chu ka melh vat a, Puii chu a rawn lut nghal a. A hmaa ka sawi tawh ang khan ani hi ka cousin teah chuan ka ngaina lo bera, mahse, ka pa damloh atang khan ka ngaina ve deuh tawh a, mi ngaihsak chi a nih bawk avangin ka haider thei bik lo.

“Kev, vawiin kha ka tisual em lo maw?”inthlahrung deuh tak chuan a ti a.

A lokal avanga ka lawmzia leh ka him thu ka hrilh chuan a tawh huai a, “I hmel ka hmuh khan chhan I ngai tlatin ka hria a, ka rawn pawh che a nih kha. Mahse, hmeichhe nikhua lo leh sual chu a ni hauh lo ang tih ka chiang a nia”a ti a. Ka nui lui sak a, chhan kher ngai ka ti lo.

Karkhat zet ka chawlh hnuah office kal turin ka inbuatsaih ve ta a, Mizoram sorkar nen kan indawrna ka chinfel zawhah ka hna bansanin kan chhungkaw sumdawnna ka khawih tan tawh ang. Office ka thlen chuan ka thleng hmasa ber tih ka hre nghal a, Sangkimi room chu ka pan ding nghal a, a room ka luh apianga ka hmuh thin a dawhkan chunga thlalak chu a ngai angin a lo la intar reng a, Tim nen an thlalak a ni. KAn pahniha kan inkawp chhung reilo te pawh khan he thlalak hi a dah reng a, a thinlunga a la thih lohzia kha lo hre tur ka ni asin. Kan room lam panin ka kal ta vat a, ka hmuh fo chuan ka rilru hi a na zel dawn tih ka hria, he hmun ka chhuahsan hma leh ka na rei lo a ni mai dawn a, chak takin ka hna ka thawk anga, felfai takin ka chhuahsan bawk ang.

Staff meeting kan neih chhung zawng chuan vawikhat te mah Sangkimi chuan min melh eih lo. Kan project hlawhtlin theihna tura ka presentation pek chhung chuan pawn lamah chhuakin phone a hmang a, min pumpelh hi a tum ve tih ka hria a, chuvangin kan pahnih inkar hi chu a tawp hmak tawh ah ka ngai. Tlaiah chuan ka hna laklawh avangin ka haw tlai deuh a, Sangkimi room lam chu ka melh a, a la haw bik lo tih ka hria. Muangchangin ka insiam a, tukverh ah chuan dak chhuakin tual zawla car ding reng chu ka va hmu a. Rin dan ka nei thiam mai, garage lamah ka kal tlang a, kawta Timothy hmel ka hmuh chuan chemtea vih ang hian ka na zawk a, an pahniha an sawi chhuah changa min nuihzat tur zia te chu ka hrethiam vek a, ka zak a ni. A vawihnih nan hmeichhe bumin ka awm leh ta a ni a, a tlawm thlak ka tiin ka zak ngawih ngawih a, chutichung chuan ka thinlungah erawh a thi thei si lo. Inah pawh haw lo in khaw pawn lam chu ka pan ding a, tuma awm lohna hmuna awm veng veng chu ka chak ber. WBR peng ka thlen chuan tlan zel turin ka steering chu ka han herh kawi a, hmun reh leh mi tlemna hmun ka tlan tlang zel a, kawng kawiah chuan ka ding ta dawt a. Pawnah chhuakin khawk rum rum khawpin ka au ta nghek a, ka thawk hawkin ka hria. Tlan mai lo chuan ka han ding deuh ren rawn a, motor rawn tlan chu a tam sawt hle a, hlim nui khek tuar tuar ri te chu ka tan bengchheng mai an ni. Zawi muang hian motor chu ka tinung a, ka tlan leh ta delh delh a.

Zing nichhuakin ka hmai a rawn chhun chuan ka harh ve chauh a, chhuata beer bur awm nuai ka hmuh chuan ka tho vata, ka chhar khawm vat a, ka nu hmuh hmaa ka paih a ngai tih ka hria. Ka lu a na ngut ngut a, beer ka in lohna chin pawh a rei tawh a, rilru mumal lo zet pu chunga in ka nih avangin ka in tam tih pawh ka lo hre lo. Ka inbual zawh chuan room atangin ka chhuak chiah a, Puii chu sitting room-ah ka nu nen an lo titi mawlh mawlh a. Min hmuh chuan then sakin a let leh a hun tawh thu chu min lo hrilh nghal a. Ka bana sana chu melhin office kal vat ka ngai tih ka mitmeng hmang chuan ka han hrilh a, a hre lo der leh hmak tawh.

“Airport thleng min thlah ang chu ka lo ti a, ka lo nghak tawp che”a ti a.

“Ni e, I hman chuan thlah la, office chu I tlai tur thu hrilh mai rawh”ka nu in alo tih bawk a.

Ka phone chu phawrh chhuakin Alex chu ka bia a, tlema ka tlai tur thu ka hrilh chuan pi ber pawh airport ah a chhungte rawn kal tur a hmuah thu leh a kalna a rei tawh thu a lo sawi a, kan inhmuh tawh loh hram ka beisei. Airport lam panin Puii nen chuan kan inphur ta nge nge a, a awmna hmuna a chet chhiatna leh thil thleng mak pui pui chu a sawi a, a sawi thiam bawk a, kawng pawh a titawp sawt hian ka hria. An thlawh chhuah hun nghak chuan kan thu ta ran a, ka tum miah lo hian Sangkimi chu ka lo zawng ru leh thin a, amah theihnghilh hi chu ka hlat khawp hian ka hria. A tawp atawpah chuan an thlawk chhuak ve dawn ta, Puii chuan min kuah a, ka pa vagn liau liau a buai chung chunga rawn haw a nihna chu ka hre ve reng a, hei hian amah pawh min ngainattir sawt hian ka hria.

“Lo intipaukhauh hram hram ang che aw. Pa Puia beiseina che ti thlawn lo hram ang che”a ti a, ka lo bu nghat a. A nui sak a, ka naupanlaia min tih dan thin angin ka biangah a piai a, a nui ta var var a.

Ka tih tur ka ti zo ta chenga, eng emaw tih hmaih nei ang mai hian ka awm a, motor a ka thu lut pawh ka rit deuh luk hian ka hria. Muangchanna hun a ni tawh lo tih hriain ka tlan ta par par a.

x----------------------------------x----------------------------------x-------------------------------x

*SANGKIMI*

Office ka thlen chuan ka thu hnawk a, airport-a ka thil hmuh vang teh hrep chuan ka chau hluah hluah! Induh hmel taka Kevin leh Puii inkuah kha ka mitthlaah a awm reng a, ka na ru ngawih ngawih. Ka boss pakhat zawk Mizorama rawn kal hmuah ka ngaih vanga kal mah ni ila Kevin ka hmuh chiah khan ka kal chhan pawh ka hre lo lek lek chu a ni. Hetiang taka keimaha nghawng a nei hi a mak ka ti a, Tim khan kawng engkimah a tluk lo tih ka chiang tawh. KA tum hauh loa a hmel ka hmuh khan atthlak takin min rawn umzui ah ka han ngai ve ngawt kha a ni a, a bana kai tu hmel ka hmuh rualin zahna in ka khat nghal. Vawikhat kha chu min rawn hmu hman lek lek lehgnghal a, min hmuh loh nan ka tawngtai hial a! Ka boss rawn zin chu puanzar kan duh lem loh avangin office lam pawh rawn pan lovin hotel ah ka dah a, keimahin office lam ka pan ta a ni. Chhun chawlh hun a pel tawh a, engmah ka la ei bawk si loh avangin ka ril a tam hle a, inhnuai lam pan ngei ngei ka tul tlat. Kevin te room ka thlen chuan an lo phu deuh mar mar a, anmahni zawn theuha an buai tih ka hria, sorkar nen kan inremsiamna ang chuan karkhat hnuah kan hnathawh lai hi kan hlan tawh ang. Chumi hma chuan kan la inpeih fel loh zawng zawng kan inpeih hman tur a ni. Kevin chu a laptop hmaah uluk tak hian a lo thu vang a, a hna chu tha takin a thawk ang tih ka ring, hei hi atan kan company-a a sulhnu hnuhnung ber tur a ni tawh tih ka hria a, chuvangin tha taka kalsan a duh dawn tih ka hria a ni.

Ka inhnawhpuar zawh chuan ka room lama let mai peih loin inhnuaiah chuan ka thu hahdam a, coffee chu ka lem khalh khalh a.  Ral lehlama kawng laih tlang ruah chu ka thlir a, he building kan lei tirh kha chuan hmun fal leh tlawh pawh loh tak hmun kha a ni a, tunah erawh in eng emaw zat a tlar dul a, motor kawng that akin atlang ruih bawk a, a la fuh dawn chauh tih hriain ka nui sak a.

Ke pen thawm ka hriat chuan ka hawi chhuak vat a, Kevin chu ka awmna lam pan hian a rawn kal thauh thauh a. Coffee chu a han thli a, ka thutna lam rawn melh pah chuan a coffee chu a in a.

“I hriat tawh tho chu ka ring a, thla thar atang chuan heta ka rawn kal hi a rem tawh dawn lo a, midang I zawnna hun ka tih buai ka hlau a, ka hrilh lawk ve hrim hrim che a nih chu”a ti a. A tira a mizia ka ngainat loh em em kha a pu leh tawh a, hetiang hian awm se ka tan a mah hlat hi a awlsam zawk.

“Ka lo hria ange”ka ti nghat a.

“A that chu”tiin a kal sawn ta nghal a.

Engtin nge a mizia hi awlsam tak hian a inthlak zung zung theih bik? A bialnu pian nalh lutuk chu ka mitthlaah a rawn lang nghal zawk a, mi hausa fapa, chhungkaw sumdawnna chhunzawm tur khawpa rintlak tan chuan hmeichhia te zawng an tam lutuk tih ka hre ve bawk e.

Ni tin mai chuan buai leh hah em emin hun kan hmang a, mahni zawn theuhah kan buai tlang bawk a, hmel kan inhmu hman meuh lo. Ka dawhkan hnawk nuai chu chinfelna hun pawh ka nei lo. Kawngka kik dat dat chu ka chhawn vat a, Kevin chu a rawn lut a.

“Ka banna ka rawn thehlut dawn a”a ti a, nidang aiin a tawngkam a hriam lo.

“Ok”a mah pawh en lo chuan ka ti a.

“Sangkim, thawhpui nuam leh tha tak ka ni lo tih ka hria, mahse, ka thawh chhunga hma ka sawnnaah I chungah ka lawm tak zet a ni”a ti ta duah a.

Ka nui suk a, amah chu ka en a, thutak deuh hian min lo melh run a, “I thiamna kan chhawr nasa alawm keinipawhin, kan lawm ve veah ngai ang”ka ti a.

“Dinhmun sang takah company hi I vawrh chhoh ngei ka beisei a, ka ring bawk”tiin ka dawhkanah lehkha chu a dah a. A inher a, a chhuak ta a. Ka mittui chu a rawn luang ngiai a, ka biang chu ka han hru thuak a, a kianga ka hlim hman tehlul nen rei a va daih lo em! Tukverh ah chuan ka dak a, motor-a a tla liam chu ka thlir renga, vawikhat chauh tal a kianga hun hman leh kha ka chak asin.

Kan project hautak zet chu zawhfel a ni ta, Kevin finna leh remhriatna, thiamna vang liau liau a ni tih ka chiang a, amah ka ngaih pawh a zual. A hna a chawlh atangin ka hmu ngai tawh lo a, a buai ve viau ang tih ka ring. Sorkar nen kan inremna lo ziah tawh sa chu thiatin tunah chuan an hnenah Mizoram tana thil tangkai tak chu kan hlan thei ta. Tunah chuan awlsam takin mi tamtakin duhthalin  electric hnianghnar takin an dawng thei tawh ang. Fakna chi hrang hrang kan dawnte chuan Kevin min ngaih zual tir a, amah vang chauha tun hi thleng thei kan ni tih ka hria.

Ka haw chu ka chau hluah hluaha, nilenga function pui tham tak kan neih avangin staff chau lo kan awm pawh ka ring lo. Ka inbual hnu chuan tlemin a ziaawm ta deuh a, Kevin biak chu ka chak tlat. Ka chak rualin ka huphurh bawk a, ka zam lutuk tih reh nan fridge a ka beer dah that chu ka han lem zauh a. A ring ta ngei a, ka zam lutuk tih reh nan ka han thaw leh hak a. A tawpah a rawn pickup thei ta hram a.

*I thawhrim vang liau liaua tun dinhmun thleng kan ni tih hrilh che hi a tulin ka hria a”ka han ti nghal tawng a, a rawn nui hak a, tun tum chu min hmuhsit vang a ni lo tih ka hria.

*Ka lawmpui  che* a rawn ti dam thluam a.

*I chungah ka lawm tak zet, hlawhtlinna chang zel turin ka duhsakna ka hlan che* tiin phone chu ka hmet thi a, “Ka ngai lutuk che”tiin ka phun sap a. Ka kai deuh bawk nen ka tap ta hliam hliam a, beer chu ka in zel a, engzatnge ka in tih lam ngaihtuah hauh loin ka chah thlak thleng rakin ka in ta a.

Ka lu na lutuk chu ka tho a, damdawi ka ei a, engmah ka ti thei lo, ka mu leh ta hmak a. Ka harh chian hnu chuan sana ka en vat a, a lo tlai tawh hle a lo ni. Ka phone ka zawnga, zan lama ka dahna mai ka hre lo, a tawpah ka beidawngin fridge ka hawnga, a lo let ngat a. Ka la chhuak vat a, a nun chu a lo la nung a, a speaker erawh a chiang lo hman a nih ka ring, tu tawng mah ka hre thei lo. Ka chet dan atthlak chu ngaihtuah chhuakin ka call log ka en vat a, Kevin ka biakna ka hmuh chuan ka ip zawk a, darkar khat chuang ka bia a nih chuan eng enge ka sawi ang? Ka hmai chu a sa hat hat a, beer ka lo in kher chu ka inchhir kher mai.

Bazar ah kawiin ka phone chu siam tir turin ka dah a, office ka thlen chuan ka tlai ta deuha, coffee pawh in hmasa lo in ka room lam ka pan ding nghal a. Ka lu na ngut ngut reng chuan ka awm a ti nuam lo. Ka hnathawh mawlh mawlh lai chuan ka khawl chu a rawn thi tawp a, ka thawhsa ka lo save hman loh avangin ka mangang kher mai. Ka bag chu ka hai rak rak a, ka phone ka khawih fuh theih loh avangin ka han bun chhuak veka, siam tir turin ka dah tih chu ka hrechhuak a, ka nui zui hak a. Intercom chu ka han ban a, a lo thi tho chu niin, engmah fuh reng reng a awm lo. Ka thutna atanga tho chhuakin inhnuai lam chu ka pan a. . Coffee chu ka han thli a, tutepawh mahni hnaah kan buai theuh niin a lang, coffee in tura rawn chhuak thla pawh an awm lo. Tukverh inhawng lam chu ka pan a, thli thaw vuk vuk kara ruah rawn tla sep sep pawh chu pawi sa lo in ka hmuh theih hla ber chu ka thlir vang vang a. Ral atanga motor rawn tlan phei zel pawh chu ka hmuh hmaih lo, kan awmna building lam pan chuan a rawn tlan zel a, security ten gate an hawn thleng chuan ka hmu thei a, a rawn tlan lut a, ka hmu thei tawh lo. A hnu rei vakloah gate duty chu rawn lutin tuemaw min hmu duh an awm thu a rawn sawi a, ka room –a chhoh leh ai chuan tiin ka awmna hmunah chuan ka lo nghak a, rei nghah a ngai lo. Hun rei tak ka lo hriat tawh thin leh ka ngaihtuahna zawng zawng neitu chu ka hmaah a rawn inlan hlawl mai, mak tiin ka melh kawk a, min nuih sang a, ka insum hman lo, ka tlan a, ka kuah ta ngawih ngawih a.

“Kevin”

Ka hmui chu a rawn fawp nghal a, duhthawh zet hian ka lo chhang let ve hmiah a.

“Ka ngai lutuk che”tiin ka beng chu a rawn seh sak a.

“Ka mumang chu a ni em lo tiraw?”tiin ka han insik a, a lo nui hak a.

“Nizana min rawn biak hnu kha chuan ka awm mai mai thei tawh lo, Silchar atangin ka rawn zan tlan nghal a, inah pawh ka la lut lo, ka rawn tlang nghal a nih hi”a ti a. Ka banah chuan min kai a, ka zui ve mai bawk a, security guard in mak tih hmel taka min en pawh chu engahmah ngai duh lo in Kevin car ah chuan ka chuang a, min nuih sak chung hian motor chu a khalh ta delh delh a. Kan kalna tur pawh ka zawt chuang lo, amah ring tawk zet hian ka zui tawp mai a ni. An in lam kan pan tih ka hriat chuan ka melh deuh kawk a, ka kut chu arawn hum nghal chat a, engmah ka sawi lo. An in kan thlen chuan a nu a lo chhuak vat a, a tum loh taka min hmuh tel avangin a hamhaih ve deuha, rei erawh a ni lo.

“Ka nu, hei hi ka sawi fo thin Sangkimi chu a nih hi”tiin min han inhmelhriattir nghal zung zung a. A nu chu nu fel tak a ni tih ka hre nghal mai, a fapa inbual chhung zawngin kan titi a, a fapa hnen atanga ka hming a hriat fo thute chu nui chungin a sawi a,ngaihnawm titakin ka lo ngaihthla a. Kevin inbual zawh chuan a nu remtihna thlapin a room ah min hruai a, a nu a zah zia ka hmuh chuan amah Kevin ka ngaihsanna pawh a zual sauh mai. Kawngkhar a khar rual chuan a lamah min pawt a, min fawp leh phawt a, min thlah thei dawn lo ni mai hian a lang. Ka nui chhuak hawk a, min melh run a, a nui ve miah lo.

“Ka tello chuan engtin maw I awm?”a ti a, a ngaihna hre lo zet hian ka en a, “Nizana min rawn biak khan beer I in anih ka ring reng ah..”a ti a, a nui ta var var a.

“Eng nge ka sawi? Ka lo bia che tih chu ka hria a, ka sawi ka hre mang tlat  tawh lo alawm”ka ti a.

“A pawimawh ber lo, a pawimawh zawk chu nang leh kei kan inneih vat hi a ni mai”a ti ta a.

“Kevin.. Ka hmangaih che”ka ti a, min pawm kang nawlh a. Khumah chuan min nghat a, “Ka hmangaih lutuk che”tiin min rawn fawp leh ta a. Ka kawr hlih a tum chuan ka lo dang bet vat a, a nui chhuak ta hawk a. “Hei vang te reuh hian anih hi ka lo atchilh hlum loh chauh che. Fair reuh lutuk mai”tiin ka biangah a piai zeuh a.

“Model chungchang kha min hrilhfiah ve dawn lo em ni?”tiin ka nam sawn a, ka thu chhuak nghal a.

“Model a?”tiin za zet hian a nui ta a, ka lo tm bar thung.

“KA cousin Puii a nih kha, ka pa thih hma lawk khan a rawn chho a, inhmelhriattir che ka tum laiin kha mi laktlak loh pa nen ka hmu cheu a, kan hetih phah ta anih kha”a ti a, Tima a sawina tih ka hre mai, a biang pawng tawlh tawlh ka hmuh chuan Timothy hming lam a hreh hle tih ka hria.

“Ka sawifiah thei ka tih mawlh mawlh pawhin I ngaihthla duh lo anih kha”ka ti ve thung a.

“A pawi ka ti lutuk”a ti a, min kuah ta hle hle a. “Office kawta a motor ka hmuh phei kha chuan ka puakkeh lo chauh”a ti a.

“Mizoram sorkar nen kan indawr tih I hrereng a ni lawm ni? Tim hi a khawihtu department mi leh sa a ni tih chu I hre turah ka ngai a, khami ni khan meeting kan nei a, I chhuah vangin I hre lo mai mai nih kha”ka ti ta zek a.

“Ka ring che lawm”a ti dam leh thluam a. Ka hmui chu ka han ti che zeuh a, “Engmah sawi a ngai tawh lo, ka lak atang hian khawiah mah I kal bo lo ang”a ti a, a awmah chuan min pawm bet a, thlamuang zet hian ka bei ta hle hle a.

EPILOQUE

Kan sitting room ah chuan ka pa thlalak lian puiin kan tar a, Kevin nen kan inneih hnu lawka ka siamtir a ni nghe nghe. Ka chak em em thin chu nu neih ve a, ka nu tia koh tur an awm kha a ni thin a, tunah chuan nu fel leh tha, nu nih tlin em em mai chu ka nu a lo ni ve ta reng mai. Ka khawhar rukna kha ani hian a hliahkhuh hneh em em a, min hringtu nu ang maiin ka en a, ani pawhin a fa hrin ang chiahin min en a, nufa dik tak tia mi sawi pawh kan hlawh reng a ni. Kevin lah ani aia pasal tha an awm lo ang tih tur khawpin a tlin a, min hmangaihna hi sawi duah lo mah se a cheziaah a lantir awl lo a, ka pangchan chhan pawh hi min duat lutuk vang ni ber hian ka hria. Ni tin office lamah ka la kal reng a, Kevin pawhin kan chhungkaw sumdawnna enkawlin hma a lak zau belh zel a, ka nuna ka seng lut hi ka inchhir ngai lo ang. KA hnaah pawh Asst.la loin kawng engkimah ani hian min pui bawk a, chawimawina chi hrang hrang kan room ah kan tar ve chei chuai tawh. Kum 2 zet kan inneih hnuah nau ka la pai tlat lo chu ka harsatna ruk a ni a, Kevin bulah ka sawi fo a, rilru hah lo turin min hrilh chamchi a, mahse, hrehawm ka ti ru thin hle thung. Zan khat chu tlai angreng takah hian hna atangin ka haw a, Kevin chu kan room ah a lo mu tawh a, ka thawmah a rawn harh vat a. Kan inneih hnua a vawikhat nan beer a in tih a rim ah ka hre thei, ka rilru a na em em a, a chhan pawh zu leh a kaihhnawih reng reng, te lua awm loa insum tura kan intiam vang a ni.

“Kevin”a puan sin lai chu ka theh hlim sak a.

A rawn meng zawk a, a inkhuh tha leh a. Ka thinin a tuar lo, ka hlim sak leh a, chutah thinrim zet hian a rawn tho a, a puan chu a la a, sofa ah chuan a insawn a, mut leh a tum chu ka phal lo a. Kan innek buaina lamah sofa banah chuan ka insawh a, engahmah ngai lo awm taka a mut luih avang chuan ka rilru chu a na zawk a. Hetiang hian kan awm ngai si lo, ka awm thiam lo a ni ber.

“Fa ka duh”

Ka meng kawk a, kei hian ka duh loh bik a ring em ni?

A thusawi chu a chhunzawm ka rin nen engmah a sawi ta lo, a muhil a nih ka ring. Ka inthlak fel a, khumah chuan ka mu a, ka muhil lo chiang hle. Thil tam tak ka ngaihtuah a, engvanga doctor hi la pan lo nge kan nih tihte ka rilruah a awm a, zingah harhfima a awm hunah tha takin ka sawi pui ang tiin ka ngaihtuah a, ka pasal hi ka lo ti beidawng viau a ni ang tih ka rilrua a awmlai chuan ka na zawk a, fa neih hi min neih chhan ber a nih loh thu vawi tam min hrilh a, mahse, hun a lo kal anga tun ai hian fa a awhna hi a na dawn tih pawh ka hria. Muhil thei lo in ka thaw halh halh a, fa dilin ka tawngtai leh mawlh mawlh a, hei bak tih theih ka nei si lo.

Ka muhil lai chu ka harh hlawl a, ka bulah Kevin chu a lo mu reng tawh a, min kuah chial a, a rawn insawn lai ka hre miah lo. A sam chu ka chul heuh heuh a, a hmel chu ka en thin a, a tha thlawt a ni. A taksa lian inphut zaih mai te, engkim mai hi ka phu loh vek a ni. Ka mittui chu a rawn tla a, fa ka neihsak thei lo anih chuan engtikah emaw a nun atang hian min la kal botir mai ka ring a ni.

“I tap ami?” a rawn meng kawk a, ka mittui chu thup tumin ka hru sawk sawk a. Ka lu chu ka thing a, “Min bum lo ang. Engati nge I tah?”tiin ka mittui chu a hru a. A awmah chuan ka hmai ka phum a, ka tap ta zawih zawih a.

“F aka hrinsak thei si lo che a”ka tih chuan a thaw hak a.

“Ka tihpalh aw. Engtikah mah beer pawh nise ka in tawh lo ang. Fa chu kan duh ve ve alawm tiraw? Mahse, tih nat che ka duh loa, ka sawi chhuak lo mai mai thin alawm. Vawiin khan ka chau lutuk a, ka lo in pek a, ka tisual der a ni. Fa kan nei emaw nei lo emaw, ka rilru chu a  danglam ngai lo ang”a ti dam leh thluam a.

“Ka hlauthawng a ni”ka ti a. Ka hmui chu a hup a.

“Naktukah doctor hnenah kan kal dawn nia, tha takin kan inenkawl anga, kan beidawng tur a ni lo. Kan theihtawp kan chhuah pawha engmah awmzia a awm lo anih  pawhin kan inhmangaihna hi a tawp dawn chuang lo a, ka thutiam kha engtikah mah a danglam lo ang. Nang hi ka thlang tawh che a,damchhung kawppui atana ka thlan chu Nangmahchauh  hi i ni reng fo ang”a ti ta a. Ka ipik churh chu a kiang ta a, ka thinlung pawh a dam nghal huai hian ka hria.

*After 5 Months*

Meeting pawimawh tak mai neiin DC Office lamah chawhma pum hun kan hmang a, office lam pana kan let leh chuan ka taksa chu a na thum hian ka hria. Ka room ka thleng hman tawk a, ka luhai luak chhuak lutuk chu toilet ah ka tlan lut a, ka luak ta nghek a. Ka pum nuam lo zui riai riai chu ka hria a, ka mangang hman hle. Hetiang taka luak chhuak hian ka la awm ngai lo a, ka thil ei fuh tawk loh vangah ka ngai. In ka haw chuan kan nula in a chawhmeh siam chu intithei tak hian a lo show a, nidangah pawh a siam fo a, tui ti takin ka ei thin. Mahse, tun tum chu a dan a dang ta, ka uak ta nghek a, bathroom lam ka pan zui nghal a. Ka pum chu ka dawm a, kan nula mangang chuan ka nu pangpar tui pe lai a lo ko chu niin, kawngkhar chu a rawn chum dawt dawt a. Ka hmaite ka phih fai hnu chuan ka hawng ta chauh a, ka nu hmela mangangna lo lang vang chuan ka hahdam huai thung a. Chhun atanga ka awm dan ka sawi chuan ka nu chu a nui deuh hian ka hria a, a phone chu la chhuakin Kevin chu a phone a, pregnancy test kid lei turin a hrilh a nih chu! Ka hmai chu a sa het het a, ka zakin ka zam a ni. An beisei ang hian lo rai si lo ila, ka ngaihtuah thui ngam lo.

Kevin chu a rawn haw rang kher mai, a thil lei min pek pah chuan kan room ah min kai chhoa, bathroom lam ka pan a, rawn luh ve a tum chuan ka lo hnial rang kher mai. A nui suk a, pawn lamah chuan a lo ding run a. Ka thil hum lai chu ngam leh ngam lo hian ka han en a, fiah lutuk lo hian pahnih a lo in rin ta kalh a. Ka lawm lutuk chu awmngaihna pawh ka hre lo. KAwngka ka hawng a, beiseina sang tak nena min lo en tu Kevin chu tihder ka chak thut a. Ka hmela lungngaih hmel a hmuh chuan min lo kuah vat a.

“A pawi lo, a pawi miah lo ania aw”tiin ka chalah min lo fawp a. Ka thil ken lai chu ka pen a, a en chuan a au ta chul a, kan inchhungah hlimna a rawn thleng leh ta.

Ka naupai chhung zawngin duat tinrengin ka nu leh Kevin chuan min duat a, a lehpek awm thei lo tur vekin enkawlna ka dawng. Keimah pawh ka chak tha a, ka pum puar chuan inrintawkna leh hlimna chhiarsen loh min pe a ni. Nau ka neih thlengin sawiselna tur pakhatmah ka hmu lo, min duat lutuk hian min ti zuau zawk nit e hian ka hria a, min duat lo deuh se tihna rilru erawh ka pu phal chuang lo.

Ka pa thlalak tarna bulah chuan kan ding a, ka thil tihsual ber chu a dam laia amah hmu hman lo a ka awm kha a ni.

“Ka pa, ka nupui leh ka fapa hi I lo hmu ve ang tiraw? I hlim tawh ang tiraw, a chhan chu I fapa hi ka hlim em em si a”Kevin chuan zawi sap hian a ti a. A kawngah chuan ka kuah a, kan fapa chuan kan boruak hrethiam ve ni awm tak hian aw rawl a rawn chhuah vei ham ham a, kan inen a, kan nui dun ta sak a.

x------------------------------------------------------x----------------------------------------------x