LALTHANSANGI

LALTHANSANGI

Kan hna avangin karhnihlai ka thangbo a, mutna hun nei mang lovin hna kan thawk a, kan thawk rim ve kher mai. Kan zawh fela mahni ina thlamuang taka han mut siai siai chu a hahdam bik hliah hliah hian ka hria a. Nilenga ka mut tawh hnuah tlai pawh chaw ei lovin ka mu tlang nghal a, ka room kawngkhar kik  thawm ah chuan ka harh a, ka sana ka han bih chuan zan dar 10 alo ri chiah chiah a, peihlo zeta thoin ka va hawng a, ka nau chuan inleng ka neih thu min rawn hrilh a, mahse chutianga inleng kawm turin chakna ka la nei lo. A tuk lama kal leh mai tura ka hrilh hnuah ka khum lam ka pan leh mai a. Ka room kawngka erawh ka kalh ta lova, ke pen thawm chuan ka room a rawn hnaih tawh viau anih ka ring a ring telh telh a, ka nau bawk anih ringin han hauh mai ka tum a, mahse ka khum bula ding chu ka han hmuh chuan ka phu zawk a. Tlangval kum 30 vel hmel pu, lian tawk tak, hlim hmel pu ngai lo ni mai awm, hmel dang bel mai chu mak ti takin ka melh kar a.

“Ka rawn tibuai che a pawi ka ti hle mai” a han ti dam thlap a.

Peihlo zetin ka tho a, ka room a thuthlengsei kan hunah chuan ka thu a, thu ve tura ka tih hnu chuan muangchangin a rawn thu a. Ka la hriat ngai loh leh la hmuh ngai loh chutianga zanrei tawh lama rawn kal chu a pawimawh viau anih ka ring. Bottle a tui chu ka han thli chhuak a, ka han in pap pap a.

“Țanpui theihna che ka nei em?” ham bai bai chuan ka ti a. Anihna takah chuan chutiang huna han in țhawn chu ka lawm tehchiam lo, hna chungchanga min rawn hmuh tum anih ngat phei chuan! Min chhang ta mai lo chuan ka room chu a han thlek vang vang phawt a.

“I thuziah ka lo chhiar ve thin a” ka hnathawhna dawhkan lam chu a en dauh dauh a, ka laptop chu kawk zeuhin, “I chhawr rim ve hle ang maw?”

Ka thinin a tuar ta lova, ka tho lawk a, ka room kawngka chu ka hawng a, a chhuahna tur atan ka va hawng a ni ber.

“Hna chungchang anih chuan office ah min rawn hmu dawn nia, anih loh chuan mut ka mamawh tlat” ka han ti chang fak a. A chesawn chuang lo, muangchangin min rawn melh a.

“Kum 10 lai liam tawh mah se ka thinglungah hian ala thi bik lo asin, nangpawh i ni ve tho ang tiraw?”

A thusawi awmzia chu ka man lo tih a hrethiam a ni ngei ang, a wallet chu phawrh in thlalak pakhat chu a rawn phawrh a, nula leh tlangval inhmangaih hmel taka inkuah lai thla chu min han pe a, ka han bih zawk a, ngun lehzuala ka han en chuan a mipa chu tuna ka bula awm mek hi a ni tih ka hre thei. A hmeltha hle a, tuna mi nen chuan han khaikhin chi pawh niin ka hre lo.

“Zotluangpuia  chanchin kha ka lo chhiar ve alawm, ka tuar pui takzet che ani. Kan dinhmun kha engemawchen chu a in ang khawp mai” a han ti ta charh charh a.

Chu thu a sawi zawh rual chiah chuan chiang takin Zotluangpuia chu ka mitthlaah a rawn lang nghal zawt zawt a, kan pahnih thlalak ka room banga lian taka ka tar chu ka thlir ta ngawih ngawih a. Ka inlengpa chu a thutna atang tho chhuakin Tluangpuia nen kan thlalak chu uluk zetin a en a.

“A hmeltha hle mai” a chawl dat a, “In in hmeh kher mai” a han ti lehnghal zat a.

“Chu thu sawi tur chuan tun ang hunah hian i rawn kal vang vang a?” ka lawm lo takzet tawh a ni. Ka rilru na chawk tho tur ka mamawh belh lo viau si a.

“Hun i neih lohzia ka hria a, i zinlai pawh khan ka lo ngaichang reng tawh zawk che. Ka chanchin hi ziak ve la ka ti ani” a thutna ngaiha chuan a rawn thu leh tawh a, a sam chu a han tuai mam puat a, “Lalruatmawia ka nia, Kawlkulh khua kan ni a”

“Chuan min hmu turin i rawn kal vang vang a?” ka  lo tih khalh a, a chanchin ziak tur ringawt a min rawn tihna chhan awm reng chu ka la hre chuang lo.

“Rawn kal ka duhna hi chu a rei tawh, kan chanchinte kha puangchhuak turin ka rilru na hi ka paltlang tawh chiah em ka hre thei lova”

“Engvanga kei kher min ziah tir chu tum nge maw i nih le. Ziakmi ka nilova, ka thinlunga thu awm te hi ka puangchhuak mai thin chuah ani a, tuemaw hetiang lam ziak thin leh thiam deuh an awm ang, pan zawk mai ta che?”  ka theihtawpa aw dam chuan ka han ti a.

“Nangmah kher hian min ziahsak la ka duh ani. I tuina ber ani tih ka hre bawk a, thinlung taka ka tuarna min hriatthiampuitu hi ka mamawh a ni.”

“Tu nena in chanchin nge ni reng reng a?”

“Kei leh Sangtei, Lalthansangi”

A ipte ah lai atang chuan note bu pakhat hi a rawn phawrh chhuak a, engemaw hi a thai zeuh zeuh a.

“Hei hi  khawngaihin min lo chhiarsak la, ani nena hun kan hman thindan a ni a. I hman hun hunah rawn hmu tur chein ka rawn kal leh ang. A kawmah khan ka phone number ka ziak a, khawngaihin min lo be dawn nia” a ti a. Mut ka chak tawh em avang chuan ka aw liam puat a, tichuan a chhuak ta a. A lehkhabu min pek chu dawhkanah ka vawm kai tawpa, ka muthilh chhunzawm nghal ta bawrh bawrh a.

Inleng danglam tak ka neih atang karkhat a liam leh tawh a, hna ah kan buai bawka , ka hrechang tawh der lo. A lehkhabu min pek pawh kha ka nu room tifaiin a lo dah nge a paih ta pawh ka hre lova, ka hmu ta miah lo. Zankhat erawh file ka zawnan lamah ka file karah alo inrem fel ran a, ka han la chhuak a, anihna takah chaun phek khat chiah chhiar tuma keu ka ni. Mahse ka han chhiar a, ka chhiar zel a, ka tawp thei ta tlat lo. Ka nau leng haw thawm ah ka sana chu ka han en a, dar 11 alo ri lek lek tawh a. Ka chhiar lai chu dahin mu turin ka han insiam zet na a ka phone lachhuakin Ruatmawia chu ka phone ta zawk a. A tuk zana kan ina local tura hrilhin ka mu ta a.

Nilengin office ah ka buai a, tlai lamah pawh ban hun pangngaia bang lovin dar 6 velah kan bang thei ta chauh a. Ka inleng neih tur hrerengin ka haw tlang nghal a, in ka thlen chuan Ruatmawia chu alo awm reng tawh. Tlailama thil ka ei avangin chaw chu ka ei chak lova, ka inbual a, ka room lamah kan in zui lut ta a. A lo kal hmasaka a thutna ngaiah bawkah chuan a thu leh a, Tluangpuia thlalak chu a han thlir leh vang vang phawt a.

“Leng tura min sawm avangin ka lawm e” a khap fek fek a, thu tam pai hmel a pu lo.

“Mi chanchin ka la ziak ngai lo hrim hrim a, bakah hun ka nei vak dawn lova, chu chu min hriatsak dawn nia” ka han ti hmasa a.

“A taka tuartu ngeiin i ziah chuan midang aiin min hrethiam thuk ang tih ka ring tlat a ni. Sangtei tana ka tih theih hnuhnung ber chu hetia kan chanchin ziaka a bu a dah hi a ni. Ka rilrua thu awm te, ka sawichuah thiam siloh te hi mite chhiar theih tur si a chhawpchhuah ka duh a ni” a ti a. Ka nau thingpui min siamsak chu kan han in hmasa te te a. Ka hnathawhna dawhkan lamah insawn pheiin a chanchin chu min hrilh nghal mawlh mawlh a.

BUNG- 1 NA

Thingtlang atanga khawpui nun han tem ve tur chuan keini ang mi hausa fa pawh nilo tan chuan hmachhawn tur a tam hle ang tih ka hria a. Mahse thahnem ngaihna leh rualawhna avangin college chu Aizawl College ah kal ve turin ka pa nen kan neih tlemte kengin kan chhuk ve ta rawih a. Loneia eizawng kan ni mai a, kan unau hi paruk niin hmeichhia pathum leh mipa pathum kan ni a, a naupang ber ka ni. Kan unau ah chuan lehkha zir awmchhun ka ni tawh a, kan chhungkaw retheihna chu ka thiamna hmanga nuai bo ve tumin kan neih zawng zawngin ka zirna chu chhunzawm ka tum ani. Naupanlai atang unau ah pawh danglam bik hi ka ni reng reng a, ka unaute hi a hmei a pa in ngo tak an awm lova, kei erawh ngo sen sar mai ka ni a. Ka tleirawl chhuah hlimah phei chuan ka vun chu tih han deuh tumin kan ram kalnaah pawh kawr ka ha duh lo lui thin a, ka u te chuan min hauh phah hial thin a ni. Ka thang duh hle a, high sikul ka kal tirh hian kan sikulah chuan a lar ber pawl ka ni nghe nghe. Lehkha ka lo thiam theih vang a ni pakhat bawk a,amaherawhchu kan chhungkaw dinhmun chu ka hre chiang em em a, ngaihzawng neih chu ka ngam ngai lo.Kan zirtirtute min beisei ang tak chu pha zo lo mah ila pawl sawmpahnih chu first division ah ka passed ve hlauh mai a, ka pa chuan min lawmsak chak viau mah se ka kal lehna tura kan senso tur ngaihtuahin min lawmsak ta lova. Ka ute pasal nei tawhte pawh chuan an neih ang tawk tawk min pai ve a, Aizawl lamah ka nliam thla ta vawn vawn a.

Aizawl College kawtah chuan ka ding reng a, darkar chanve dawnlai chu ka dinna ngaiah ka ding tawh a. Kan classroom tur ka hriat loh avangin chutah chuan ka ding reng tawp mai a ni. Mi chu an vei suau suau a, min ngaihsak hmel pakhatmah hmuh tur an awm lova, han biak ngam pawh ka neibawk hek lo. Mi hausa fa tih hriat ngawih ngawih te chu ka thlir reng a, kan dinhmun chu a inthlau takzet a ni.

“Thianpa hetah i lut ve dawn em ni?”

Chu aw lo chhuahna lam chu ka han hawi vat a, ka bul mai ah chuan hmeichhe pakhat, hmeltha zet mai hi a lo ding reng a, midang a bia em ni chu tiin ka han hawi kual vel a, tumah kan bulhnaiah an ding chuang  silo.

“Aw, lut ve dawn e. Kan room tur ka hre lova” zawi deuh sap chuan ka han ti a, chutah mawi takin a han nui sak a.

“Keipawh ka lut dawn alawm, ka la hre bik lova, hawh i zawng dun ang hmiang” a han ti nghal a. Kan vawikhat inhmuhna mah nise mi fel tak an i ngeiin ka ring nghal mai a. A hmel atang rengin mi hausa fa ani ang tih a hriat hle bawk, chutia han zui ve pawh chu a inthlahrunawm hle in ka hria a, mahse min tanpui theitu tur a ni bawk si.

“Eng subject nge i lak dawn?”

“Ah.. a... Economics” ka han ti bah nak a, ka lu chu ka han hiat zeuh a.

“Anih chu, kei chu History a nia, i subject combination tur te?” no zeta min melh pah chuan a han ti a.

“History leh Geography”

“Ehe.. kan in ang dawn anih chu. Inkawm zel ang aw, ka thiante ho hi HBC ah an lut deuh vek a, phaia awm ka tum avang khan ka lo ngaihven mai silova, seat ka chang tawh lova” a ha nti leh niah niah a.

Kan room awmna tur chu kan han hmu mai a, ka lut tur chu min han ko let leh a.

“Ka hming chu Lalthansangi a nia, Sangte tiin min ko thin a” a han ti leh a.

“Lalruatmawia ka nia, Amawi  min ti mai zel” ka han ti ve vat a, a ha var rual siau chu a then sak a.

“Kan inhmu leh vat dawn nia” tih pahin min kalsan zui nghal a.

Kan chhungte Republic a awm te inhnuai chep zet chu ka luah ve rawih kha ani a, khum leh ka rawngbawlna chu ban phak a ni deuh mai. Lehkhazirna dawhkan a awm a, thutheng pakhat a hmingin ka nei ve bawk a. Stove ah eirawng ka bawl mai zel a, thleng pahnih, fian pahnih, no pakhat leh ka thawmhnaw tlem te bakah cooker leh bel tlem nen ka in vawmlut ve a ni. Class kal loh niin inhlawhna tur awm ang angah ka inhlawh ve thin a, ka chhungte chuan an theih an gang min rawn thawn ve bawk a. Hautak lo thei ang bera chet chu ka tum ber ani. College ah chuan Sangtei nen chuan kan inzui ve hnak hnak thin a, a felin a tawng duh hle a, tawngtam lo tak ka ni na a ka sawi duh ve tawh lamah erawh sawi ve chiam thin ka ni. Ka titi duhzawngte a man chak em em a, tawng tlem ti a hriat ni mah ila a bulah chuan ka tawng tlem lem lo. Kan class CR ah min han thlang tlat te chu mak ka ti viau a, ka nihna chu ka tlin chiah pawh ka ring lo thin. Sangtei erawh chuan min fuih nasa hle thin a, azarah mualpho lo chuan ka la awm ve zel niin ka in hria.

Hun alo kal ve zel a, kum chanve lai kan hmang ve der tawh a, College week kan hmang dawn a, house ah inthen in Red house ah chuan Leader ka han ni leh pang a, naupanlai atanga football khel nasa tak mai hi ka ni a, college ka kal hnu erawh chuan ka khel leh tawh hrih lo. Week kan tan dawn kar atang chuan Sangtei chu a rawn lang ta hauh lova, chutia nitina ka kawm ber mai a rawn kal loh takah chuan ka ngai hle a. A hmel hmuh chu ka chak ngawih ngawih a, an veng lah chu Zarkawt tih bak hriat ka nei si lo. Nitin a hmel hmuh inbeiseiin college ka thleng a, hmuh tur erawh a awm ngai lo. A tellova week han hman pawh chu ka hreh kher mai, football  final kan khelh dawn ni chuan dressing room ah thawmhnaw ka inthlak mawlh mawlh a. Ka thiante chu an chhuak vek tawh a, tawngtaina te neiin chhuah mai ka han tum a, kawngkhar ngheng chuan Sangtei chu a lo ding reng a, ka han hmu thut chu ka phu chiang hle. A nui var var , ka mitvai emaw tiin ka mit chu ka han nuai a,amah ngei ani. Ka pan hnai a, a hnarah chuan ka han piai a.

“Engatinge i rawn kal ngai loh a, min ti mangang dawn alawm” ka ti a.

“Min ngai lo lutuk a, min ngai ve deuh la ka tia ka rawn kal lo lui anih kha” ahan ti ve a, a sen deuh ap ap a, chu chu ka haider lui thung.

“Min lo au nasa viau rawh aw, kan chuan ka treat ang che” tih pah chuan ka han nuih sak a.

“Hlen chiah, min treat loh vaih” tih leh chhuah kan rual a.

Kan inkhel chu kan tang bawk a, ka inhnehtawk hle. Semi-final ah awlsam takin kan chak a, final erawh a boruak a dang hle a, ka duh angin ka taksa pawh chu ka hmang thei lo. Sangtei chuan min lo au lauh lauh reng a, chu chuan chakna thar min pe leh thin. Hun atawp tep tawh a, free kick ka hmu hlauh mai a, pet turin ka ding chhuak a, mipui chu an au dur dur a, a then chuan min lo auh zam an tum a, a then erawh min tantute an ni. Ka han hawi let a, Sangtei chuan a ban alo vai vat a, van lam a kawk zeuh a, a maimitchhing chu ka hmu a, ka pet ta. Ka thianpa in min rawn pawm lawp a, a goal tih ka hre chiah. Hun a tawp zui nghal a, kan pawl kan chak ta, hlim au thawmin a zui a, khuang nen kan ri chel chul a. Ka hun hman tawh a hun hlimawm ber pawl chu ava ni chiang em!

Kan house hmeichhe ho chuan min bawr laih laih a, Sangtei chu ka hmu reng na a hank al mai theih ani bik si lo. A thutna ngaiah chuan a thu reng a, ka hawi let leh zauh thin a, a lo nui sen sen ka hmuh chuan ka han nuih let ve seih a. Kan class a mi tho Akimi chuan min lo ko a, kan house a ni nghe nghe. Ka treat ang che a ti tlat a, chhuanlam ka siam fe hnuah pawh min kalsan duh chuang lo. Ka han hawi leh chuan Sangtei chu alo awm tawh lova, ka hawi kual vel pawh chuan ka hmu chuang lo. Tui lo zet chuan Akimi chu ka zui ta a, ka rilruah Sangtei chu a awm reng mai.

BUNG-2 NA

Karkhat zet chu Sangtei chuan college a rawn kal tawh lova, a chanchin hriatna ka nei bawk silo, rilru nuam lo takin class chu ka kal ve a. Zankhat chu college a la thianpa ve ber Thantea chu ka inluah ah a rawn leng lut a. Amah hi tlangval zangkhai vah mai, biak nuam tak a ni a. Amah in in a luah ve tho a, an khua tak chu Serchhip lam a ni. A nu leh pa zirtirtu an ni a, chhungkaw khawsak harsa lo tak an ni ang tih ka ring bawk.

"Chaw min chhumkep rawh aw, rawng ka bawl peih lo"

Ka khuma mut pah chuan a han ti a. Chhang lem lo chuan ka nui mai a, a tihdan than ve reng a ni a. Ka rawngbawl tur min rawn nan fuh hi chuan a ei mai zel a ni. Ka faifuk rat rat a, min biakna pawh ka lo hre pek lova, stove a cooker ka chhuan lai chuan pen in ka lu ah min rawn vawm kawrh a.

"Bengchhet ang mai" a han ti zui sap a. Pen chhar pah chuan ka tho a, khum lam chu ka pan ve a, a zawhna chu inthlahrung deuh takin ka han zawt nawn nghal bawk a.

"Sangtei te inah ka kal pui ang che, a tello hian i hlim thlawt lo ani hi" min melh ralh pah chuan a han ti a. Chutianga hmaichhana ka thianpa in a tih chuan ka lai hle a, ka sen deuh ap ap a. A ni lah chu a then ang thaw a,.

"Engemaw harsatna a nei te pawh a niang chu, an ina len te chu ka duh teuh lo mai"

Ka sawi zaeh rual chiah chuan ka hmuh chak tawh zia ka hrechhuak nghal bawk a. Mahse ka in thup hram hram a. Thantea chuan a mobile phone a kheuh neuh neuh a, kei erawh chuan ka note ka ziak tha thung a. Chaw kan eikham chuan thleng sil ka tun a, Thantea chuan min nawrsawn pahin,

"Lo va insiam rawh, hei chu ka lo ti ang" a ti ta tlat a. Min lenpui chu a tum tak tak a nih hmel hle mai. Kei lah chuan thih hreh in ka hreh si a. Khumah chuan ka thu reng a, thlen a sil zawh pawha cheaawn lova ka lo la thu min hmuh chuan a ner sawk a.

"Tikhan i kal duh a mi? Pawi hleinem, let's move" a han ti a. Kal dawn tho chuan tiin peihlo zetin ka han inthlak leh hnuhnawh a. Zarkawt lama leng turin Thantea bike ah chuan ka chuang ve ta ran a, ka chhungril erawh a khur der der thung. Engtinnge Thantea chuan Sangtei te in alo hriat tih pawh chu ka hre lova, han zawh tawp ka inthlahrun avang chuan ka ngawi ta hle hle a. Kan tlan zel a, in pakhat nalh zet mai, compound zau tak awmna ah min tlan luh pui a, bike a hung rem a, inchhung lam chu kan pan zui nghal a. Ka han hawi kual vel a, a fai hi a ni tawp mai. Bal hmuh tur pawh a awm reng reng lo, an in lah chu a lian in a felfai hle a, a chhungah hian a ruka ka vei em em ka cho phak rual ni silo Sangtei chu a cheng ani si a. Hetiang khawpa hausa in kei thingtlang tlangval satliah ve tak min kawm suh te chu ka lawm thar em em bawk a. Inchhunga lut tura kawngka hawnsak kan nih hnu chuan kan han lut zui nghal a, ka insehruh teuh a, an choka ringawt pawh chu ka in luah aiin a lian ang tih ka chiang. Sitting room lamah kan lut zel a, Sangtei chu a lo awm ngei a. Mipa pahnih hi an lo leng ve bawk a, mi hausa fa an ni ang tih ka hre nghal. Min hmuh veleh mak tih hmel takin min en a, a nui var var a, a hmeltha thlawt a ni. Mipa pahnihte chu rei vaklo hnuah an chhuak ta mai a, tlem chuan kan boruak chu a dai ta deuhin ka hria.

"In va fel ve in lo len a, engtinnge kan awmna in hriat zawk?"

Thantea nen min melh tawn pah chuan ahan ti a, ka lo nui mai a. Thantea chuan in la zei fahran a min melh pa chuan,

"Kan damlo thei mai dawnin a lang a, kan zawng char char mai mawle" a lo ti ve a. Sangtei chu ka va melh a, min lo melh ve chiah a, ka mit chu ka la sawn vat a. Rei ka en ngam tlat lo.

"Class i kal ngai bawk silo"

Ka han ti deuh charh a, anihna takah  chuan chutianga ngawi renga akal lo chu hauh hrep ka chak a, mahse atan engmah ka ni ve lo.

"Nichina lo lengte pahnih kha ka thiante Lunglei lam ami an nia, office min dawr pui rawh an tia ka kal pui an ngai a, vawiinah kan ti fel ve thei chiah alawm mawle" dam dap hian a han ti a. Thingpui lum turin a tho ta nghal bawk a. Thantea chuan min kheuh zeuh a.

"In thup ve deuh ka, i rilru a hriat lutuk ania" alo ti leh zauh a, ka theihtawpa na chuan a mal ah ka han aik vak a, a rak thawt a, rang takim Sangtei a lo kal a, kan hmel a hmu chuankan infiam tih a hria a, nui var var in a let leh nghal a. Thingpuite kan in zawh hnu chuan kan haw ve ta a.

Mu pah chuan thil tam tak ka ngaihtuah a, zirlai ka ni a, ka zirlai bak ka ngaihtuah tur a ni lo. Kan retheihna avanga theihtawp chhuah ka ngaihzia te chu ka ngaihtuah thleng a, Sangtei chu thian satliah ang mai chuan ka en lo tih in hre mah ila ka cho phak rual loh a ni a, ka beisei ngam bawk lo ang. Kan inthianthatna hi vawnhim zel ka duh zawk a ni. Thenawmte ar khuang al al chuan min ti harh zawk a, reiloteah ka muhil leh nghal thuai a, ka han harh leh chuan sana ka en vat a, dar 8:30 alo ri tep tawh. Ka in perh tho nghal vat a, ka ha ka nawt a, ka hmai ka phiha, chaw pawh wi lovin college lamchu ka pan nghal ta vang vang a. Canteen ah chuan ka lut a, ka riltam lutuk loh nan thingpui nokhat ka han in a, ka chhuak tur chiah chu Sangtei ka hmu nghal var a. Min hmuh veleh phur takin min rawn pan a, a awm hi chuan college hi a nuam ka ti takzet. Thantean min lo hmuh chuan min lo siai zeuh a, ka kut tum ka hmuh chuan a nui chhuak ta hawk hawk a. Sangtei pawh chuan a hrethiam deuh nge ni min melh a, Thantea chu melh lehin a mitko a san deuh ak a.

Hun a kal ve zel a, exam a hnaih tawh em avang chuan theihtawpin lehkha ka zir ve a. Class kan kal tawh loh avangin Sangtei nen pawh kan in hmu ngai lo. Thantea chu a rawn kal ve reng a, rei erawh a awm ngai lo. Kan exam tan ni chuan hma takah ka kal a, rilru engthawl taka exam ka duh thin avangin ka naupanlai atang exam laiin ka kal tlai ngai lo. A then chuan ennawn atan an lehkhabu an keng thin a, chutiang chu ka ti ve ngai lem lo bawk.

"Van confi hmel bik tak"

Chu aw lo rik na lam chu ka hawi vat a, Sangtei chu ka piah lawkah a lo ding reng a, kamis aen trial a ha a, jeans paw dal lek lek a ha a, pheikhawk nalh zet mai hi a bun bawk a, a inhmeh kher mai. A kut no nalh tak chuan a sam tle siau chu a han hui zeuh a, a nuih zawnga a ha var rual thiau mai lo lang te hlei hlei chuan a hmelthatna a ti zual a. Ka hnungah chuan min han ben dawt a.

"I nalh hle mai" ka ti chhuak phawng a. Mak tih hmel takin min melh zawk a, ka thusawi chu a nhai hua ang tih hlau ru deuh tak chuan

"I thiam em?" Ka han tih zawm nghal a. A lu chu a thing ner ner a.

"Lehkha pawh ka zir thei lo" a mitko san ak pah chuan a han ti a. Thiandangten min rawn chim tak avang chuan thildang kan sawi ta a..

Ka inbuatsaihna chu a tha thawkhat ve bawk a, exam pawh ka chhang tha ve viau chuan ka in hria. Exam zawh tlaiah ka pa te chuan min rawn bia a, in neitute phone ah min rawn be mai thin a. Kan chawlh chhunga ka u te pui turin min rawn chah a, ka lo tum sa anih thu te ka han sawi a, kan khaw motor lokal tur chu seat min lo hauhsak turin ka han chah nghal bawk a. Sangtei nen pawh inhmuhna hun nei leh ta miah lo chuan ka haw ta a. Kan khua ka thleng chu ka chhungte chuan min lo ngai ve hlawm khawp mai a. Ka u fate pawh chuan min bawr deuh reng mai a ni. Krismas a ka haw theih loh avangin ka thiante ho chuan min lo hau nak nak hlawm a. Kumthar a exam mai tur ka nih avangin khuaah pawh ka haw lo a ni. Ka du angin lehkha ka zir thei dawn lo tih ka hria a, ka chhungte pawhin min hrethiam a, min chah haw duh ta lo reng a.

Thlahnih kan chawlh hnu chuan kan result a chhuak ve ta a, first ah ka passed a ni tih ka hriat chuan ka lawm hle a. Sangtei leh Thantea chu enge anan ve ang aw ka ti rilru a, biak pawh dan erawh ka hre ko thung. Ram lamah nitin kan chhuak a, ram hna ka thawk khat ta bawk a ka chau ve thei hle. Sangtei chu ka hrereng thin a, a nui hnel mawi tak chu ka mitthlaah ka hmu thin. Aizawl lamah ka chhuk a hun leh tawh a, ka pa chuan inbiakna a buaithlak lutuk tiin phone leina tur min pe a, ka hnial fe pawh chuan ka u te pawhin ka mamawh thu an sawi vek avang chuan ka la ta nge nge a. A man tlawm ber chi chu ka lei ve ta ran a, Sangtei biakna tur ka nei ve ta chu ka hlim veng veng. Kum hmasa aiin college ah pawh kan tlatlum zawk a, SU ah te kan han tling chho ve a, ka vanglai hun chu a nawmlai ber ka hmang tih ka hria. Sangtei nen pawh chuan kan inkawm ta zel a, kan in zui nasa in college ah pawh chuan inngaizawng ang in min sawi nasa hle.

BUNG-3 NA

Heti tak hian in kawm nasa mah ila Thantea nen vawikhat an ina kan len bak kha ka leng ta miah lova, ka duh ngaiin ka la duh reng bawk a, ka rilru an hi a lo put ve loh chuan min huat ka hlau bawk nen a ruka lo duh ngawih ngawih chu ka tih theih chhun niin ka hria a, kan unthian thatna chu chhasm nun zel ka thlang zawk a ni. Ka nawmsawm loh avangin nihnih lai class ka thulh tawha, Sangtei chuan min rawn bia a, ka hritlan thu ka lo sawi chuan a chek tlak tlak a.  Ka awmna lai min zawh chuan ka sawi duh lova, ka tha alawm ka ti tlat a, rawn kal a tum luih tlat avang chuan ka hrilh ta nge nge a. Darkar chanve dawn a liam hnu chuan ka kawngka chu a rawn di dat dat a, lut tura ka tih chuan Sangtei leh Thantea chu an rawn lut a. Eitur an rawn khai bawr teuh bawk a,  ka inluah chu a tet em avangin kan khat ani deuh der a. Khumah ka mu zawi reng a, ka khawsik chu a rawn sang leh tawh anih ka ring. Ka lehkhabu hnawk takngial pawh ka remfel peih lo. Sangtei chuan a han remfel zung zung a, Thantea chuan ka chal a rawn dek a.

"Mi te pawh hrilh ve bawk tur alawm, i khawsik ala sang a nih hi, damdawi ka han lei ange" tih leh chhuah a rual a. Nachhawkna ringawt chuan min ti dam zo lo a ni. Sangtei chuan a rawmawl chu a ti huh a, min hru mawlh mawlh a, a hmel ka han en chuan khawngaih hmel zet hian min lo en reng a, tawng ka tum a, a hmui chu a rawn hup a, a lu a thing a. Thantea alo thlen chuan damdawi chihnih lai mai a rawn hawn a, eitur an rawn ken chu min han eitir hmasa a, tlem chu ka ei a, damdawi pawh ka ei nghal a. Ka muhil vang vang a, ka harh leh chuan khua alo tlai tawh hle a. Ka bula chuan Sangtei chu a lo thu reng a, ka harh tih a hriat chuan ka pang alo dep vat a.

"Um... a reh ta e.. ka mangang hman tep alawm, damdawiin lama inphurh mai a tha lo maw?" Ahan ti a.

"Ka tha mai ang, damdawiin chu a ngai lo ang" ka ti a. Ka ban chu a hmet neuh neuh a, a tlai tawh em avang chuan haw tawh turin ka ti a, lehlam a hawi ta hmak a.

"Sangte.."

Min chhang lova, ka koh nawn leh pawh chuan min chhang chuang lo. Nuam lo ka ti hle a, a pawi ka sawi ta mai em ni chu ka ti hman a.

"Amawi... dam vat rawh aw. I tello chuan college pawh a nuam lo"

A kut chu a sik leh neuh neuh a, a zam ve hle  niin ka hria. A kut chu ka la a, min la en chuang lo. Ka hum a, lak sawn a tum tak loh avang chuan ka han hum deuh vang vang a.

"Ka tha vat dawn alawm, Sangte...."

A mitah tak ka en a, min lo melh ve kar a, kawngka ri rak thawn kan hriat chyan kan inthlah vat a, Thantea chu a rawn lut zui nghal a. Chawei ve nghal mai tura ka tih avang chuan Sangtei chuan a chhungte a phone a, ei rawng a bawl zui nghal a. Tlemte chu ka han ei ve a, mahni chuan awm ila ka ei leh lovang tih ka hrechiang. Sangtei chuan anhnah a bai a, rawngbawl axthiam ka rin loh tehlul nen chuti taka bai a thiam chu mak ka ti hle. A chhungte hauh a hlauh avang chuan rei pawh thu lovin an haw ta mai a, an chhuak chiah chu ka ruak vekin ka hria.

Class pawh ka kal thei veleh tawh a, ka damloh laia kan titi kan chhunzawm tak loh pawh chu sawi lehna hun kan nei ta hrih lo. Khatih lai khan ka rilru kha puan chhuah mai ka duh a, tunah chuan khang huaisenna kha ka nei leh tawh lo. Nikhat chu SU kan committee avangin class ban hnuah kan thu fual a, week kan hman dan tur vel te kan rel a, tlai angreng takah kan haw thei ta chauh a. Kan khua ami U Siama kan tih Khatla a awm chu ka nuten thil an rawn thawn avangin lam turin ka kal nghal a, kan classmate Akimi te inhnuai alo luah hi alo ni a. Akimi chuan an kawt alo phiat mek a, min hmuh chuan mak tih hmel dwuh ian min lo ko a, ka kal chhan te ka sawi chuan an inhnuai lam chu ka pan nghal a. Rei pawh thu lo chuan ka kal leh nghal a, Akimi chuan pawnah min lo nghak reng a, scooty in ka va thlah ang che a ti a. Ka hnial hneh leh chuangin ka rin loh bakah khua atlai tawh deuh avang chuan ka remti be ta mai a. Ka in thlen hma kawngpuiah chuan ka chhuk a, a kal leh nhhal mai a. Ka in lam pan tuma ka hawi thlak chuan Sangtei chuan min lo hmu reng a, a hmui chu a ti pawrh a, kal leh mai a tuma. Rang takin ka tlan thla a, a kutah ka vuan a.

"Ka lo nghak char char che a, nang lah chu nula i lo lenkual mai mai a"

Tihel tih hriat tak hian a han nui sak a. Thenawm ten min hmu ang tih ka hlauh avang chuan ka in lamah ka pawt lut vat a.

"Sangte, chutuang chu a ni miah lo ania, ka nuten thil min rasn tgawn a ka lam a, Akimi te inhnuai kha ani tih pawh ka hre lo hrim hrim" ka ti a. Ka ag atang chuan ka tjil hawn chu ka la chhuak a, ka hmuh nghal a. Lei lam chu a bih ngar a.

"Ka inhrethiam bik lo, ka chan ang che tih ka hlau em a ni" sawi sap fiah tak si chuan a han ti a. Ka va melh a, lei lam alo la bih tlat thung a. A bulah chuan ka thu a.

"Sangte, kei thingtlang tlangval satliah ve mai mai chuti takin mi te hian min buaipui duhin i ring em ni?"

Nui chung chuan ka han ti a. Min melh a, a nui lova, thutak hmel a pu tlat a.

"Engmah hi i hre lo tak tak aniang... kan college mipa ah chuan nang ai luck an awm dawn em ni?"

Ka awih lo lutuk chu ka nui chhuak hial a, a kiu in min nghawk a, ka nuih chu a za telh telh thung a. A hmui chu a han ti pawrh a, chu veleh ka fawp thut a. Min chhang lova, min namsawn hek lo. Muangchangin ka han meng a, min lo melh ve nghal vat a, a tho thut a a bag a la a, a chhuak zui nghal a. Ka thiltih dan chu ka ti diklo tih ka hria, mahse sawi ai chuan ka chezia a lantir kha awlsam zawkin ka hria a ni. Ka umzui vat a.

"Amawi... khawngaihin min zui suh. Ka haw phawt a ngai"

Ka ding a, hnial chi ani lo tih ka hria, taxi a lo phar ding a, a haw ta a. Ka thlir zui vawng vawng a; an tlan liam thleng chuan. Ka awm chu a nuam lo hle a, engtin chiah nge Sangtei chuan min ngaih ang tih chu ka hre lova, ka in control hman lo chu pawi ka ti. Ka phone ka phawrh a, a number vawitam ka hmetchhuak a, ka be ngam lo. Mut dawnah chuan msg tal hnutchhiah a tha in ka hria a.

"Sangte.. vawiin thil thleng avang khan min ngaidam rawh. A thleng nawn tawh lovang"

Ka inngaihtuah buai hma in send button chu ka hmet a. Hlauthawng tak si, nghakhlel tak siin min chhanna chu ka nghak ta reng a.  A hnu deuh ah ka phone chu a lo ri a, ka han en vat a.

"Ngaihdam ngaiin eng thilmah i tisual hleinem"

Ka thaw hawk a. Ka hlauhthawnna pawh a bo zui ve ta a. Khami ni a thil thleng erawh engmah kan sawi chhunzawm ta lo. Thian pangngai ang chuan kan la in en reng a, ka rilru erawh a dang ani tih a hrechiang ang. Ka inthup viau na a ka thup zo lo chu a ni ber. Thantea chuan a bialnu present tur leipui a min rasn sawm a, bazar lam ah kan chhuak phei ta a. MC ah kan kal a, Akimi chuan dawr alo nghak a, min lo au a, kan lut a. An dawr chu ka han enkual a, an thawmhnaw zawrh te chu ka lei ngam loh tur vek ni maiin ka hria, thingpui in rawh u a ti ta tlat a, a han order nghal a. Thantea nen chuan an titi bawrh bawrh a, mi kal vel chu ka lo thlir mai mai a. Elevator lam chu ka melh thla a, ka hmuh duh hauh loh thil ka zu hmu a, Sangtei leh mipa pakhat in zui dun ka hmuh chuan ka thinlung hi a na zawk a. Hetiang tak hian ka lo duh thuk tawh tih ka hre lo. Kan awmna dawr lam an rawn pan tih ka hria a, ka phone chu ka phawrh vat a, ka bih ta tlat a. Thantea lah chu ka ngaihtuahna chu hre hauh lo chuan la ko ta deuh deuh a, a mipa zawk chu an ina kan len tuma lo awmte kha an ni tih ka hre nghal a, rei awm lovin an kal nghal mai a. Ka melh zawk a, min rawn melh ve chuan ka hria, ka phone bawk chu ka bih leh ta daih a.

"Engmah pawh min hrilh ve duh si lo aa, hm hmmm..."

College a kan inhmuh leh hmasak ber chuan ka ti a.

"Min zawt si lo alawm"

A tawi tek tawk hle. Engmah thil thleng a awm lo tia min chhan ka duh fan laiin chu chu min chhanna a ni ta thung a. Alakah hian ka beidawng ngawih ngawih tawh a ni.

"Nang pawh Akimi nen in chanchin.."

A sawi zawh hma chuan kan awmna lam pana Akimi lokal chu kan hmu a, Sangtei chu a tho vat a.

  "Ka tibuai palh ang che u"

A banah chuan ka vuan a, ka kuai her deuh lawp a, mak tih hmel deuhin min en a, ka en ve ta reng a.

BUNG-4 NA

Kan boruak chu a hrethiam a ni ve chek ang chu kan lam pana lokal mek Akimi chu a ding a, a inher a, a let leh ta daih a. Sangtei ka vawnna ban chu ka thlah a.

“Ka  tihpalh”

Ka ti sap a. Sangtei chuan min en reng a, engmah pawh sawi tawh chuang lo chuan classroom lam chu kan pan a, kan class kan thlen dawn chuan a ding a, ka lo ding ve nghal vat a.

“Anihna takah chuan Jerry  nen khan kan inkarah engmah a awm lo”

Min kalpelin a kal nghal a. Sawi tur hre lovin ka ding reng a, ka nui sak a, ka umzui ta nghal a. A bulah chuan ka va thu nghal vat a, ka thu pawh chu hre awm ang pawhin a awm chuang lo. Ka en a, min en duh chuang lo.

“I thik chiang mai”

Canteen a kan  awm hnu chuan ka han ti a.

“I inngaihdan ve mai mai anih chu aaa”

A dar san ak pah chuan a han ti a, han fiam zui ka chak viau na a kan thian dangten min rawn fin tak avangin thildang kan sawi a.  Tlaiah chuan kan honours class a in an loh avangin kan inhmu lova, kan veng lam panin ka kal nghal a, kawi ka thlen dawn chuan Sangtei chu a lo ding reng a.

“Chaw ka rawn ei dawn”

Tih leh a phone phawrh a rual a, Thantea chu a bia tih ka hria. Amah in rawn ei zawk se ka ti hle a, ka sawi ngam silo. Kan inzui thla hnak  hnak a, ka kawmchak dawrah chuan artui leh alu te chu kan lei a, in kan thlen chuan ka inthlak sawk sawk a, rawng kan bawl nghal a. Alu ka vel mawlh mawlh lai chuan Sangtei chuan, “Amawi.... midang nena ka hmuh dun chiah cheu khan ka lo duhzia che ka inhrechhuak a ni”

Phawk hru in ka va melh a,  a buhfai sil lai chu a la sil reng tho a.

“Hmeichhia zawkin ka sawichhuak hi ka zak ve tho ania, chet lak i tum bawk silo a” a han ti leh charh charh a, ka mumang a ni mai ang tih hlau chuan ka chemte ken chuan ka han invit a, ka duh ain a in ka vit a, ka te hlut a, Sangtei chu a rawn tlan nghal a, ka kut chu a la a, thisen lo chhuak ser ser chu a hmet a, a sam chuan a hmai chu a hliah deuh avangin ka han hui kiang a, kan mit leh mit a in tawn chiah chuan kan hunt awn mek chu a tak ani tih ka hria, khur der der chuan a hmui nalh tak chu ka fawp ta vawng vawng a, a ni pawh chuan min chhanglet ve nghal a. Ka hmui chu lasawnin, “Ka hmuh hmasak ber atang che khan ka duh che, Sangte, englaimahin ka rilru a la danglam lo. Ka cho phak rual i nih loh avang.. ”

Ka hmui chu a rawn hup vat a.

“Min duh thu i sawi kha ka tan chuan a tawk, a bak sawi suh”

Kan in fawp leh ta vawng vawng a. Kawngka kik thawmah chuan kan phu zawk a, kan inen a, kan nui a, Thantea chu a rawn lut zui ve nghal a, kan hmel a hmuh chuan thilsual ti lai phawk ang hrim chuan min melh a, a nui tut tut a. Tunah chuan khawvela mipa hlim ber ka ni mai awm mange ka ti a, ka lo then ve sak a.

Khawvel tharah ka cheng a, ka la tawn ngai loh thil tam tak ka tawng zel a. Ka kiangah Sangtei a awm phawt chuan khawvel hmachhawn pawh ka cho ta zak mai. Theihtawpin lehkha chu ka zir ve thin a, nakinah ka hmangaih ber hi hrehawm taka a awm loh nan ka ti ve thin.

BA kumhnihna pawh kan lo zo ve dawn ta reng mai, exam hmabak in kan awm a, Sangtei te inah a khat tawkin kan leng ve zeuh zeuh a, veng kar a hlat bakah lirthei te ka neih lem loh avangin ani pawhin min phut ngam ngai lo. Krismas a lo thlen dawn chuan ka pa in haw ngei ngei turin min rawn chah a, lehlamah Sangtei chuan ka hman ngei alo beisei ve bawk si. Ka rilru chu a buai ve hle a, kum hmasa lama ka haq tawh loh avangin ka chhungte ka hmaizah ve tawh bawk nen haw chu ka tum ta zawk a. Scho vel buaipuiin college ah chuan kan buai hle a, Sangtei chuan nilengin min nghak tawh a, scho lak tlai te anih avangin bazar chu kan tum ve a ni. Bazar lamah kan in zui a, ka chhungte thawmhnaw tur kan lei a, ka unaute duhzawng tak tur te chu a hre hle a, a tawpah chuan kawr leisak ka tum a. Mahse min leisak a tum ve tlat a, krismas present ah kan ring nghal anga a ti a, kawr ka leisak a, ka pawisa neih tam ve ber tum anih avangin to deuh hlek pawh leisak ka in huam viau a, mahse ka dinhmun hrechiang em emtu hian to tak erawh a thlang duh ta chuang lo. Ka neih tur atana ka lo suangtuah phak ngai loh pheikhawk nalh tak mai, sangthum chuang man chu min leisak a. Ka hnial nasa ve hle a, a lungawi loh lek lek zawk avang chuan lawm takin ka pawm ta a. Ka thil leisak ve chu ka sit thar kher mai.

Ka haw dawn zan chuan an inah ka leng a, an kawtah thu in shawl kan in zawn a, nitin inhmu a in zui kan nih avang chuan inthen hran chu kan huphurh hle a. Kan inkuah chial a, sawi mai tur hre lovin kan ngawi leh vang bang thin, Sangtei chu ka han en chuan a mittui a lo luang ngiai a.

"Sangte....."

"Um.."

"Ka ngai dawn lutuk che" a kut chu ka hmer vawng vawng a.

"Amawi.. lo chhuk leh vat rawh aw.. i tellova awm chu ka huphurh emai" a ti a.

Hun reilote chhung pawh kan inhmuh loh chuan a rei a, kan awm tlan erawh chuan hun a kal chak em em lawi si. Chu zan thiang kak mai, van boruak thiang nuam tak hnuaiah chuan a changin kan infawp a, kan in pawm a, hun chu ral thei lo in ding reng sela kan duh awm e!

Kan khua ka thlen zan chuan ka muhil lo chiang hle a, Sangtei zunzam chuan min phuar nghet takzet a ni. Kan inbia a, kan balance zawh thak thlengin kan inbia a, a tal leh deuh par thin chuan ka mipa thinlung hi a hneh takzet a, inngaihtuah lawk hauh lova chhuk leh daih mai chu ka duh rum rum hial a ni. Krismas pawh kumdangah thiante nen kan hmang ho thin kha a ni a, pawn pawh chhuak peih lovin inah ka inkhung deuh chawt ringawt a ni. Ka chhungte ngaih pawh a tha lo vat reng a, anmahni avang chuan ka chhuak lui ve ta zeuh zeuh a. Ruai theh tlai chuan kan thianho chu hmeithai Pi Puii inah kan leng a, kan hlim ve ta phian a, Sangtei chu chhun lam atang a nuamsam lova, ka ngaihtuah angreng hle. Zanah chuan a la nawm theih loh thu leh a tuk lama in entir an tum thu a rawn sawi a. Ngaihthat lohna nei lem lo chuan ka awm a. Kumhlui thlah turin kan inbuatsaih ve nasa hle a, ar kan turte kan buaipui a, lenkhawm ban lamah Pi Puii ina kim leh thap turin kan haw ta rih a. Ka phone chu inkhawm chhungin ka charge a, ka haw chuan Sangtei msg pahnih lai a lo awm a, phur takin ka hawng vat a.

"Amawi... pawi ka ti.. kan inkar hi kan tihtawp mai a tha zawkin ka hria. a hma ang khan thian angin awm leh zawk ang" tih leh, "Ka thian i nih khan nuam ka ti zawk"

Call ka tum a, switchoff a in ta tlat a. Ka mangang lutuk chu pawnah ka tlanchhuak ringawt a. A ni thei lo, chutiang maiin kan inkar hi a tawp thei lovang.

BUNG-5 NA

Vawi tam tak call tumin ka bei a, switchoff a in ti reng bawk si. Chutianga thutlukna rang lutuk a a rawn siam thei chu mak ka ti a, tihsual ka nei ta mai em ni le? Ka rilru a buai kher mai. Ka thiante awmna lamah pawh kal ta lo chuan khumah ka mu a, ka mitthlaah Sangtei ka hmu a, ka haw dawn zana ka  thusawite pawh theihnghilhna hun ala awm hauh lo. Engvanginnge kan inkarchu tihtawp a duh? Ka inlet thak thak a, ka thinlung chu a na vawng vawng a. Ka muhil thei lo chu ka tho a, ka kal zel a, kumhlui thlah tum thalai rual leh naupang deuh te pawh hmuh tur an awm nual a, ka kal zel a, biakin zawn ka thlen chuan ka lut a, mittui tla zawih zawihin ka tawngtai a, a vawikhatna atan hmeichhia vangin ka tap a!

Kumtharah class neih tawh tur anih loh avangin exam dawnah chauh chhuk ka tum a, lehlhazir in duhthawh laia chutianga rilru nat chu a hrehawm duh khawp mai. Exam hma karkhat ala awm chuan ka chhuk chauh a, ka in chu ka an melh kual a, Sangtei min ngaihzual tir hle. A chettlatna te chu ka han khawih kual vel a, hmuh ka huphurh a ni. Ka mualpho mai ang tih ka hlau takzet a. Exam ni chuan hma taka kal thin kha tlai lo tawk vel chiah in ka kal a, Sangtei pumpelh dan ngawt chu ka ngaihtuah a ni. Tum thum kan exam naah chuan pumpelh ngaihna a awm ta lo, kan room luhna tur kawngka bulah chuan a lo ding tlat a, min hmuh veleh min lo nuih seih a, ka thinlung chu a rum vawng vawng thung a.

"Amawi.. thian kan ni thei lovem ni? Tinge min pumpelh dan ringawt i zawn a?"

A tih chuan chhan ngaihna hrelovin ka ngawi ta reng a. Awlsam takin thian atan min sawm leh chu ka hrethiam theilo a ni, mahse thiam chauh pawh nise a kianga ka awm ve min phalsakna tur anih dawn phawt chuan ka pawm zel ang. Ka vuan tawh a, awlsam takin ka thlah thei lo a ni.

A hlim ngaiin ala hlim reng a, mipa dang a melh ngai chuang lova, kei hi min ngai pawimawh em em thung a, engvanginnge kan inngaihzawn theih loh tlat si? Mahniin ka inzawt fo thin a, chhanna min pe theitu chu amah chauh a ni.

"In khuaah ka rawn zin dawn"

Exam kan zawhni chuan a ti a, ka en reng a, a thutak nge a fiamthu tih tumin a mit chu ka en a ni. A nui san a.

"I ngai thutak leh run tawh a ni maw? Lungngai suh ka lo kal lovang"

A kiu a min nghawk pah chuan a han ti a, ka lo nui ve mai a.

"I mizia hi a mak leh tawh a nia, i cool lutuk" ka beng bulah chuan a rawn ti a. Ni e a sawi dik ang, ka tawng duh ve tawh zia te kha kei ngei pawhin mak ka ti thin a, tunah chusn sawi mai tur ka hre ta tlat lo a ni. Kan chawlh chhung chuan kan khaw lamah ka haw a, ka chhungte puih an lo ngai nasa hle a, ka phak ang tawka ka chhawk ve thei chu ka lawm hle. Kan vannei em em a, kan ram hi a tha in kan thil chin apiang a tha em em zel a, tuikhuah zau tha tak pawh sorkar tanpuina kan dawn hmangin kan siam tha a, thlai chi hrang hrang te kan ching ve a, kan khawsak pawh a ziaawm chho ta viau nghe nghe a ni.

Sangtei nen chuan kan inbe fova, min ngai ve tak tak tih chu ka hria, chu ngawt pawh chu ka hlim a ni. Ka lo hmangaih thuk em a, inchhuang tak leh in duh larh in ka kalsan thei lo a ni. Tlawm ka in ti ve ngawih ngawih a, mahse chu chuan alak ata min then hrang thei chuang lo. Mahni khuaa han haw chuan kohhran leh khawtlangah kan lo inhmang ve nasa a, tih tir pawimawh a tamin keini khua angah phei chuan kan ko a tla a tam hle thin . Hun ka nei loh deuh chuan Sangtei chu a titau ve lek lek thin a, in ngaizawng tawh lo mah ila kan inngaihzawn lai ai mah khan a thikthu a chhia in ka hria. Zankhat kan leng pawh kan lo rei ta zek a, min rawn biak chuan kan len thu ka hrilh a,  phone chu a dah ta daih a. Chutiang ka ngaihtuah chang chuan min la duh ve reng niin ka hriat phah thin. Mahse kan inthianna piahlam thil kan sawi ngai tawh lo.

Class tan leh hma deuh chuan Aizawl lamah ka liam thla leh ta a. Ka in luah pawh a chung zawk tlema zau deuh zawk ah ka insawn chho a, a nuam tawk ve hle. College ah kan tlin loh ang angin kan pawimawh chho ve hle a, mawhphurhna sang tak takte pawh kan kovah a tla leh nawlh thin. Sangtei chu min fuihtu ala ni reng a, awmdan zahawm thlengin min hrilh thlap thin. Nikhat chu ka nutei fapa damlo an rawn phurthla a, hospital ah ka va tlawh ve a, a remchang em a tiin Sangtei chu tlawh kawi ka rilruk a. Hrilh lova thawn thut chu ka tum a, an veng lam panin ka kal ta nghal a. An in ka thlen dawn chuan a lo awm loh thut takin tiin phone chu ka han tum tha leh a, ka call chu a pickup thei lo. Vawihnih vel a ring quit chuan ka beidawng ta deuh a. Kal leh mai tumin ka in her a, motor pakhat hi an in lamah a rawn tlan mek bawk a. Ka zawn an rawn thlen chuan Sangtei leh Jerry chu an lo ni a. Hlim hmel takin an rawn nui phei a, ka thinlung hi chemtea vih ang maiin ana vawng vawng mai a ni. Min hmuh hmain lehlam ka hawi a, min pelh fel hnu chuan rang takin ka let ta vang vang a.

Nihnih chhung class ka kal tawh lo, Sangtei call pawh ka pickup ngai lova, phatsan nia ka inhriatna chuan min ti na a ni. Ka kawngkhar kik dat dat riah chuan ka muhil lai chu ka harh hlawl a, ka va hawn chuan Sangtei chu pawnah alo ding reng a. Inchhunga lut tura ka sawm hnu chuan a rawn lut a.

"Nihnih lai college ah i rawn kal tawh lo. Phone i pickup ngai silo, engatinge i damlo mi?"

Mangan hmel tak chuan a ti a. Ka rilru natna chu thup hram hram ka tum a, za lo takin ka nui sak a.

"Ka nuamsam vak lo atin lawm mawle"

Ka han ti liam ve mai a. Chiang zetin min en a, ka rilru hmuh tlang tum ni mai in ka hria.

"Amawi, ka hrechiang ve tawk che, ka lakah thup i nei tiraw? a ti ta chat a.

"Sangte, Jerry nen khan ka hmu che u a"

"Chuan..?"

"I hlim hmel ka hmuh khan ka lawm"

Ka thusawi mah nise ka awih bik lo, ka kiangah nilo mipa dang kianga a hlim hmel hi ka hmu duh lo.

"I kianga ka awm ai pawha hlim zawkin min hria a ni maw?" A ti a. Ka lu ka lo zu nghat a.

"Enteh Amawi, ka tan hian i hlu lutuk, ka thian tha ber i ni. Jerry chu kan inkarah engmah a awm lo, khami ni pawh khan a nupui inneihna tur thil buaipuia chhuak kan ni"

A tih chuan ka thawl ta hawk a. Alakah hi chuan ka in zep zo ngang lo a ni.

"Sangte, engvanginnge nang nen hian kan inkawp theih loh? A chhan ka hre duh a ni"

Ka theihtawpa a rilru hneh tum chuan ka han ti a, hnuai lam a melh a, muangchangin a rawn hawi leh a, a tawng tawh dawn lo emaw tiin ka thinphu chu a lo rang sauh a.

"Amawi, ka thian i nih hian ka hlim zawk, in thianthatna, chubak chu kan pel thei lo a ni"

Muang charh chuan a han ti a.

"Kei hi min han en teh, i thian mai nih hi ka hlim pui ve in i hria em?"

Ka rilru tawt lutuk chu ka puakkeh lo chauh a ni, a banah chuan ka han hmer salh a, a nghawngah chuan ka han kuah bet a, fawh chu ka tum a, a mitmeng ka hmuh chuan min thlahlel tih ka hai bik lo. Ka fawp a, min chhanglet lo, thawklehkhatah min namsawn ta dawrh a, a ding a.

"Hetiang hi i ni tih ka lo hre lo, kan in thianna hi khatianga tih tawp kha i duh zawk maw?"

A khur dar dar a, a thin a rim hle tih ka hria.

"Sangte, enge i tan ka tlinlohna? Kan retheihna vang hi em ni? Enteh min ngaia min thelhlel ve ani tih chu ka hria asin, ka hai bik hauh lo. Engvanga he thutlukna hi siam tlat nge i nih?"

Zawhna hlirin ka khat a. A chhan tal ka hre duh tlat si a.

"Engmah tlin lohna i neilo, thiantha tak ni ila ka duh a, ka harsat lai ber leh ka .amawh lai bera ka tana ding tlat turin ka duh che a ni"

"Nangmah chauh o inngaihtuah a, ka hmangaihna che hi engahmah i ngai lo anih hi. I duh duha i tihkawi atan chiah min duh"

Ka tum loh thleng thleng chuan ka sawi ta vek a, chutah zet chuan a thinrim ve ta hle a, a mittui tling pam chu ka hmu a, ka in atang chuan a chhuak ta nghal a. Vawikhatmah a rawn hawilet lo. Chumi zan chuan  chhin khatmah ka chhing lo. Ka hmangaihna chuan min tlawm tir leh ta, ka ngai a, ka be chak a ni. Midang ang ni ila min duhlo tu chu ka kalsan ve mai tur, mahse ka hmangaih hmasak ber hi chuti maiin ka thei ve si lo. Nep ka in ti a, chuvang chuan ka rilru chu a sak phah thei chuang lo. Vawi tam tak a number chu ka hmetchhuak a, mahse ka be ngam lo.

BUNG-6 NA

College ah chuan inhmu mah ila min hmu angin a awm duh ta ngai lo. Vawitam tak ngaihdam dil tumin ka chang thin a, mahse hun min siamsak duh lo. Nikhat erawh ka tum em avangin canteen a awmlaiin ka nang fuh hlau a, abulah tumah an thut loh avang chuan ka pan vat a, a bula thut pah chuan, "Sangte, khawngaih takin min ngaidam rawh, ka thiamlo takzet a ni" ka ti a. Min en lova, a thil ei lai chu a eizawh chuan a tho a, ka zui nghal vat a, pawnah chuan a din a.

"Awle ka ngaidam che.. a tawk mai em?"

Kal leh nghal mai a tum a.

"Sangte, i thian nih chu ka duh e, ka tihpalh takzet ka thusawi te avang khan pawi ka ti" ka han ti nghal a. A ngawi vang vang a.

"A tha e. Ka duhdan min pawm pui theih chuan kan inkawm leh thei ang" ati a.

Chu chu kan inkar kan chinfel lehna chu a ni. Nitin in zui leh mah ila ahmaa kan inpawh ang khan kan in pawh tak tak lovin ka hria a. Ka chetdan atthlak tak avang kha ani tih ka hria a, hrehawm ka ti thei hle. Ka lo sawi hmaih chu Thantea kha a ni, hna a hmuh tak avangin college chu regular in a ti ta kha a ni a. Chawlhni hian a rawn leng ve zeuh zeuh tih loh chu kan inhmu khat ta hle. Ka pa damloh avangin khuaah ka haw a, nidang angah chuan Sangtei chuan ka chanchin hriat tumin min rawn be awllo kha ani thin a, a rehin a reh ta vang vang a. Ka ngai em em a, mahse ka inthlahrung chuan ka be ta bik lova. Karkhat lai ka cham hnu chuan ka pa pawh a ziaawm leh ta deuh a, chawl rei thei ka nih loh avangin ka chhuk leh ta a. College ah chuan Sangtei hmel ka hmu lova, nihnih lai a rawn lan tak loh ah phei chuan ka tuar thei tawh lo chuan ka be ta ringawt a. A damsam vak loh avangin a kal lo tih a sawi a, ka zinna chancjin te chu min zawt ve luam a, tlem tal pawha min ngaihsakna a tihlan ve na pawh chu ka hlimpui tawk a tling leh em em a. Ka beisei aia a dam loh rei avang chuan an inah ka va kan a, min hmuh chuan a lo hlim ve hle a. Class kal a chak tawhzia te a sawi a, kan zirlai te chu ka hrilh ve bawk a. A khumah chuan lo mu be rawh a ti a, ka hnial thung. Tih takzeta min sawm tak avang chuan a bulah chuan ka va mu ve a, lukham chu kan dahsang a, ka thu mu a, ka darah chuan a lu a nghat a, a muhil ta vang vang a. A sam chu ka chul a, ngun takin a hmel chu ka en a, ka hmangaih a ni henu hi, ka hmangaih takzet!

A rawn harh chuan min rawn en a, ka lo en ve reng a, a chalah ka fawp zeuh a. A nui sak a, ka kut chu a la a, a khal niap niap a, kan inkar daidantu bang hi thiah in han awm sela ka ti ngawih ngawih a ni. Haw ka tum chuan min ui der ve hle a, ka hmuiah chuan a rawn fawp zeuh a.

"Kan inthianthatna pualin"

A ngaihna hre lo zeta ka lo melh chuan a nui var var a, an in chu ka chhuahsan ta. Hmangaihna chhanlet loh natzia ka hre thar a, thian hlutna ka hre thar bawk a. Engtikniah emaw chuan Sangtei chu ka la nei let leh ngei ang tih ka rinna chuan beiseina thar min siamsak leh ta. Ka zirlai pawh ka beingawrh chho zel a, Sangtei chu class rawn kal loh a nei chho ve ta fo a, an chhungkaw sumdawnna thila buai niin a insawi mai thin a, ka hmuh khat chuan ka ngai thei em em a ni.

Kan khuaah chuan high sikul zirtirtu an lak dawn avangin ka chhungte chuan min chah haw a, zirtirtu nih chu ka thil tum a nih loh bakah officer nih chu ka lo tum ve ran avangin tlin pawh tum em em lovin ka interview ve a. Hetih lai hian BA final year selection exam kan zawh lai tak a ni a, result chhuah a chuan khuaah chuan ka awm pah a ni. Karhnih ka awm hnu chuan Sangtein min rawn bia a, coaching class kalna tur ka lo tihfelsak ve ang che a ti a, ka documents pawimawh te chu min lo tihfelsak vek a ni.

Ka chhungte hnenah chuan ka nih tum leh ka kal zel duhdan te ka han sawi a, ka naupanlai atang kan khua mite hian hei chu kan khaw MCS val tur anih hi min ti ve thin a, amaherawhchu atak ram thleng em tur chuan ka chhungte pawhin an ring ngam lo tih ka hria. Ka tumna erawh min sawi hnawmsak duh lova, tichuan tha takin min thlah ve mai a. Sangtei te in lamah ka leng phei ngun ve ta viau a, ka pa in secondhand bike to lem lo tak min leisak ve tak avangin ka kal tam theih phah ve a ni. Lehkhabu tha tak tak an nei tam hle a, chung chu kan chhiar thin a, ka tangkaipui hle nghe nghe. Sangtei nu leh pa leh a nau chauh an cheng a, a chhungte chuan min hrechiang thawkhat ve tawh bawk a, mi pawh an ring ngam tak tak tih ka hria. Inrinni vawikhat chu Sangtei nen a room ah lehkha kan chhiar a, ka lo inchhiar tui viau a ni ang, Sangtei ka va en chuan a lo muhil bam a, a hmel chu ka en reng a, a dang deuh in ka hria.

"Amawi, tui min lak lawk thei angem"

Meng chuang miah lo chuan a rawn ti a, rang takin an choka a mi chu ka va la a, damdawi a ei a, a mu leh mai a. A bulah thu in a thlan tla chu ka hru  a, a khuasik niin ka hria. Darkar khat vel hnu chuan pangngai takin a rawn harh a, min hmuh chuan a nui seih a, a va han duhawm chiang tak em! A nu chuan chawei tura min sawm tlat avang chuan ka ei nghal a, ka haw dawn chuan Sangtein min thlah a, ka bike bulah chuan kan ding a.

"Sangte, in enkawl tha rawh aw.. i dam loh chuan ka kawm tawh miah lo ang che" ka ti a.

A nui ver ver a, a lu chu a bu nghat a.

"Ka fawp dawn che nia... thian ang chauh in mawle"

A maimitchhing a, ka fawp zeuh a, ka pawm vawng vawng a. Engemawti takin ka asm, kan chungah hian thil tha lo thleng tur ang maiin ka ngai tlat a. Ka inhrethiam bik lo.

Krismas hmanga kan khuaa ka haw dawn chuan Sangtei chuan a phallo hle a, kumthar hmang nhei tura ka intiam chuan a remti ve ta a. Ka haw ta cheng a ka rilru chu a nuam ta chuang hauh lo. Sangtei chu ka ngaihtuah reng a, kan inbiak erawh chuan that lohna a nei lo niin ka hria.

A tawi zawngin sawi tawh mai ila, exam kan tan ni chuan Sangtei chu ka nghak reng a, dar rik tgleng pawha ka nghah chhuah tak loh avangin ka lut ve ta a. Engvanga rawn exam lo nge anih ang tih chu ka ngaihtuah reng a, kan inbiak tawpna ber pawh ala rei lo viau ani si a, ka lakah hian engemaw tak zep hi chu a nei a ni. In ka thlen veleh ka call nghal a, a pickup thei lova, vawithum bel ka call naah a nu in alo la a, phaiah a kal thut thi a rawn sawi a. Chutiang a min hrilh lova a kal chu a mak ka tiin ka dem ru hle a, thinur teuh chungin lehkha ka zir a. Vawikhatmah min rawn call lova, call ka tum bik hek lo. Ka tlawm nawn tawh bik lovang ka ti rilru ve a ni. A awlsam lo khawp mai a, a number ka lo hmetchhuak leh nawlh thin.

Kan tih nek nek chhungin exam chu kan zova, coaching class ka kal chhunzawm a, ka leng chhuak tam lo kher mai. Nikhat chu Thantea a rawn lenglut hlawl a, kan inhmu khat bawk a, chawei tur chuan ka sawm nghal a. Sangtei chanchin kan sawi chhuak a, bazarah a hmuh thu a sawi chuan engtinemaw tak ka awm a. Kan inbiak ngai loh thu ka sawi a, kan inngaizawng char char a a ngaih thute chu a sawi ve luam a. A haw hnu pawh chuan Sangtei chu ka rilruah a awm reng mai. Khawkhatah awm mah ila kan inkar chu a zau ta viau mai si a, an inah len tawp mai te chu ka chak rum rum a, ka hmangaihna chuan min nawr kal leh ta, an ina ka va kal tum chuan a nu a lo awm a, Sangtei chu phai lamah a awm rih dawn tih min lo hrilh a. Min bia emaw be lo emaw pawi ka ti lo, a number ka nei a, zantin ka mut dawnah msg ka hnutchhiah ta ziah a.

BUNG-7 NA

Kumkhat lai a lo liam ve ta, BA pawh tha taka passed in kan departmebt ah pakhatna ka ni a, a ropui ka ti a, nikhat te pawh ka la theihghilh ngai loh Sangtei lawmpuina pawh ka dawng a. Hmuh erawh kan inhmu leh ta miah lo. May thla chawhma lamah chuan MPSC chuan competitive exam a buatsaih a, keipawh ka inbuatsaih nasa ve hle a, kan exam pawh chhang chhe lo chuan ka inhre ve a ni. Ka rin ang ngeiin Prelims chu ka through ve hlauh mai a, Main exam turin ka inbuatsaih veleh sauh sauh a. Ka inbuatsaihna chu a vawrtawp a ni ve takmeuh, ka naupanlai atang kan chhungkaw beiseina ka ni tih ka hria a, ka zirnaah pawh thiam loh ka neih ka hre ngai lo. Tha takin Main exam paah ka bei a, result erawh Pathian kuta dah chungin kan khaw lamah ka haw a, thlawhhma te ka zauh a, hna ka thawk ve nasa hle. Ka pa pawh kan tana a thawhrim tawhna te chuan a taksa chu a tichak lo ve ta hle a, harsa ve tak thin kha tunah chuan a taimak zar a faten kan zo a, nuamsa taka dah chu kan chak ve theuh a ni. Zankhat chu ka inkhawm bang ka thiante te inah ka kawi a, chanchinthar an lo en mek a, MCS exam  result an lo puang mek a, inchhung ka pen rual chiah in ka hming an puan chu ka hre pha nghal a, ka thianpa chhungte chu an lo hawi thap a,mak kan ti tlang hle a. Kan han inchibai nawk nawk a. Ka mumang ang rum rum in ka inhre ve a ni. Interview la hmachhawn tur ka nih avang erawh chuan hmabak ala ko hle a. Aizawl lamah ka chhuk leh vat a, ka inah chuan lehkhamawi chu ka hmu ve a, ka address ah Aizawl ka lo ziah avangin hetah alo thleng ani tih ka hria.

Ka chaklohna ber erawh ka hmeichhe hmangaih, min hmanaih let ve lo tu ka theihnghilh thei lo chu a ni. Ka biak ka bansan ngai lova, ka hman remchang apiangin a chanchin ngaihvenin an inah ka kal thin. Phaiah a awm tih bak hriatbelh ka nei chuang lo. Nikhat chu tum loh leh beisei loh takin inleng ka nei a, tudang ni lovin Sangtei a ni. A hmel nung sarh thin te kha an awm ta lo a, a hmelthatna erawh ala ngai reng thung. Ka result a lo hria a,min lawmpui nan thilpek min rawn pe a, ka han hawn chuan jacket nalh tak mai alo ni a.

"Sangte, ngawi renga min kalsan kha a fair in i hria em?"

Ka sawi ring lo na a, a fiah tha khawpin ka hria. Min en a, a mittui a luan ngiai a, ka kuah vat a, ka awmah chuan a bei hle hle a.

"Amawi, ka ngai thei lutuk che asin"

Kan mittui a tla a, kan infawp a, ni e a ni pawhin min fawp a, kan in ngai a, kan inthlahlel takzet a ni. Ka thlah phal lova, ka pawm bet tlat a, khawvel chu ral mai sela ka duh a ni.

"Ka thlah tawh dawn lo che, engtin pawn min hnial la, i  kal chuan lovang. Sangte, ka hmangaih che, ka hmangaih lutuk che"

Min kuah nghet sauh a, eng thu mah a sawi lo. Ka tan awm reng sela ka duh a, min hmangaih ve kher lo mahse ka ta nise ka duh a ni. Chutiang khawp chuan ani hi ka lo hmangaih tlat si a!

Vawi tam an inah ka chuangkai a, interview hmachhawn dan te min hrilh a, ka hriat loh tam tak min tih pui thin. A kiangah chuan ka hlim a, engkim hi a nuam ka ti thin. Kan interview dawn ni chuan a car in min thlah a, ka kal liam thlengin min thlir a. Ka ban ka vai lauh lauh a, a kutzungpui chu a rawn ti pir va a. Ka kal liam ta. Ka hawilet a, hmuh tur a awm tawh lo. Ka lung a leng nghal vawng vawngin ka hria a. Tlaiah phur takin ka haw a, ka interview chungchang report pek te pawh ka chak a mahse ka be tlang thei lo. Zanah pawh chuan vawitam tak ka call a, switchoff a in ti ta tlat a. A ngaihna ka hre lova, hlauhthaanna in ka khat nghal bawk. A tukah an in lamah ka kal a, anawmpuinu chiah alo awm a, Delhi ah an chhungkuaa an zin thu a lo sawi chuan ka rilru chu thinrimna in a inthlak a. Ka hmagaihzia hriaa hetia min ti hi na ka ti ve a ni. Ka nun erawh a ruak a, a khawhar takzet a ni.

Tunah chuan MCS val ka ni ve dawn ta, kan khuaah chuan ka chanchin lo chu sawi tur an hriat lo thu ka thiante chuan min rasn hrilh sap sap a. Ka nih chak em em thin chu ka ni ve dawn ta, ka mittuihial a tla ve a. Ka awmna tur khua pawh ka hre tawh a, ka kal hma in kan khaw lamah ka haw a, thlakhat zet ka cham hnuin Aizawl lamah bawk ka let leh a. Ka in ka luh chuan lehkhathawn a lo awm nual a, ka nun yi danglam vektu pakhat alo awm tel ve ran a. A kawmah chuan ka hming a inziak a, ka hai ngai lovang; Lalthansangi kutziak a ni. Khur ru der der chuan ka han hawng a,  chu lehkha chu tui huh in a far hnan ni awm takin a val thluah a, ka chhiar a, vawihnihlai ka chhiar a, ka che chang thei ta tawp lo, chu lehkhaah chuan hei hi a lo inziak a.

"Khawvela ka hmangaih ber Amawia,

He lehkha i hmuh hunah chuan i hmuh phak lovah hla takah ka lo awm tawh anga, mahse Amawi, ka ngai che a, kalsan hi ka chak lo ani tih lo hre hmasa ang che aw.

Krismas hmang a in khuaa i haw laia ka damloh kha ila hria em? Doctor kan inentir chuan kei hi thisen cancer ka lo ni reng tih an hmuchhuak a, zankhuain ka tap asin. Amawi, i hmeichhe hmangaih hmasak ber ka nih thu i sawi kha ka ringhlel lova, ka ni ngei ang tih pawh ka hria. Mahse chu i hmeichhe hmangaih chuan cancer a vei si. Hrilh che ilang chuan min kalsan i tum dawn silo, mahse i hmakhua ka ngaihtuah in min kalsan hi i tan a tha zawk tih ka hria a. Chuvang chuan thian ah ka sawm leh che anih kha. theih se chuan i nupui nih a, kumkhuaa i kianga chen ka chak asin.. mahse... chu chu a theih dawn si loh. 

Amawi... i kiangah khan ka hlim a, nangnena kan khawvel kha sum tam tak pawhin ka hralh phal lovang. Ka natna alo nasat tawh em avangin ka chhungte pawh an mangang em em a, phaiah kan kal a, treatment te la mah ila rei tak ka daih dawn lo tih doctor te chuan an hria ani. Kalsan hlen che a, i nun atanga ngawi renga kalbo ka tum ta a. Mahse Amawi, nikhat te pawh hi i hming lam lovin ka awm ngai lova, ka theihnghilh ngai lo che. A vawikhatna atan hmangaih ka tawng che a, mahse phurrit mai ka ni dawn ta si a tiin vawitam tak ka tap a, Pathian lakah  pawh ka vui hial thin asin. Vawikhat chiah i hmel hmuh leh tumin i inah ka lokal anih kha, kalsan tawh lo chea i kianga hun hman tluka chak kha ka nei lo, mahse a theih si loh. I nat na tur anih hrerengin ka rawn hmu leh che kha ka inthiam bik lo asin, mahse ka lo hmangaih ve em che a vawikhat tal hmuh leh che kha ka chak em atin ni, min ngaidam rawh aw.

Tunah chuan hmun hla takah ka kalbo dawn a, mi ka atanga he ka natna hi i hriat ai chuan tiin keimah ngeiin hrilh che hi ka duh a ni. I hnaah rinawm takin thawk la, kan ram siamthat i chak em em chu he i hna hmang hian rawn tihlawhtling ang che.

Ka sawi chak em em thin, ka sawi chhuah theih ngai siloh hmang hian kan mangtha ang che,

Ka hmangaih che a, ka hmangaih awmchhun i ni reng ang.

Lalthansangi"

Ka mittui chu a tla zawih zawih a, Sangte... tiin ka phun chhuak sap a. Khawi hmunah pawh awm se ka zawng chhuak dawn a ni. A tel ve lohna hmun hi ka tan awm chakna chhan tur pawh a awm lo.

BUNG-8 NA

An inah ka kal a,a chhungte chu vawi tam tak Sangtei awmna ka zawt a, min hrilh theih loh thu hlirin min chhang a. Ka beidawng lova, ka beidawng ngai lo bawk ang. A tawpah zaang an zep thei ta bik lova, thingtlang hmun pakhat Aizawl atanga hla lo teah a awm tih ka hria a, ka hna aia pawimawh zawk ti turin ka chhuak dawn. Ka chhungte chu engkim ka hrilh a, a tirah chuan an lungawi lo hle a, ka rilru erawh ka thlak thei chuang lo. Rilru dam zan lo chuan min remtihsak a, mite ngaih chuan mi a ka ni nhei ang, mahse ka tan hian Lalthansangi tluka hlu an awm theilo.

Sangtei awmna khua ka thlen chuan khua a thim lek lek a, chawhnu chhuak ka ni bawk a, ka duhdan takin ka thleng a. A awmna in chu ka pan ding nghal a, kaangka ka kik chuan hmeichhe pakhat in a lo hawng a, a phawk hru a, kawng chu khar leh mai a tum a, ka lo dang thung a. Ka lut lui a, thuthlenga Sangtei lo mu bam chu ka hmu zui nghal a. Ka mittui chu a luang zawih zawih a, ka kuah a, nula lo awm chuan, "Ka chiu zo chiah a, tih harh a chi ri lo ang"a lo ti vat a. Ka thawmhnaw te chu a dah fel a, inbual ka duh leh duh loh min zawt a, ka duh tih ka hrilh chuan a kalsawn a. Sangtei chu ka thlir reng a, a ban chu la in ka hmer a, a lo cher tawh takzet a ni. Ka inbual zawh chuan thawmhnaw ka thlak a, nula leh Sangtei inbe thawm chu ka hre phak a, an awmna lam chu panin ka va fin a, Sangtei chuan mak tih hmel zetin min en kiau a, nula chu a kalsawn ta nghal a.

"Engatinge i lokal?"

A aw chu a ri chang chang a, a kiangah thu in ka melh reng a, a mit chu lasawn in a hmui chu a seh ruh a.

"Sangte, khawiahmah min kalsan suh, eng dinhmunah pawh ding la, ka hmangaih reng ang che. I tello hian ka na asin, i hre lovem ni?"

Ka mittui chu tla lo turin ka dang hram hram a, a insum thei ta bik lo. Min rawn kuah thlawp a, kan mittui chu a tla zawih zawih a. Ka hna kalsan chungchang ka hrilh chuan a thinrim hle a, a kianga awm ka duh zawk tih chiang takin ka hrilh a. Pawm harsa chu ti mahse ka rilru thlak ka tum lo bur a ni. Nula lo awm ve chu nurse a lo ni a, Tluangtei a ni a, amah enkawl in hetah alo awm ve alo ni. Kan chanchin te chu a hre em em a, engkim Sangtei chuan alo hrilh vek a ni. Aizawl lama let leh ka rawt a, chu hmun chu nuam ala tih avang in haw erawh a la duh lo thung a. Zankhat chu pawnah kan thu a, arsi chu kan chhiar a, kan hlim hle a.

"Amawi... "

"Um.."

"Vanrama ka hawsan hunah che tap miah suh aw.. he ka natna hi ka ning tawh emai"

Ka en reng a, a rilru chu ka hrethiam ngei mai. Mahse a tellova awm chu kei hian ka thei lovang.

"Chutiang sawi suh.. i dam leh vat dawn alawm.. kan innei anga,fate kan nei anga hlim takin kan awm dawn alawm"ka han ti a. Min kalsan mai dawna hriatna erawh ka nei tlat a, ka na a ni. Thlakhat dawn lai ka aam vw hnu chuan tlem in a kang deuhin kan hria a, Aizawl lamah haw kan tum a. Kan kal dawn zan chuan a buai zual ta thut a, Tluangtei chuan damdawi a chiu lut mawlh mawlh a, en hrehawm ka ti hle. Theih nise a tuar ai chu tuar vek ila ka duh a ni. Zingkamah chuan tlemin a tha deuh a, kan in hruai haw ta a. Muangchangin driver chuan motor a khalh a, kawnglakah kan chawl zeuh zeuh a, tlai lamah an in kan thleng a. Sangtei nu leh pa in min hmuh chuan an mittui an hru leh zeuh thin. Kan haw tuk atang chuan Sangtei chu a tho chhuak peih ta miah lova, ka in leh an in chu ka kartawn sek mai a ni. A nu leh pa te chuan an ina riak ve mai turin min ti ta hial a, ka awmloh laia min kalsan chu ka hlau ber a ni. Inrinni zan a ni a, Sangtei khum bulah thu in ka en reng a, kan inhriat tirh atanga tun thleng ka mitthlaah alo lang a, ka mittui chu alo far kauh a, Sangtei thawm chuan ka ngaihtuahna chu a la peng vat a. A chhungte chu ko in a awmdan dik chiah loa ka hriat chu ka hrilh a, damdawiin lam panpui thaa hriain kan inphur phei ta nge nge a.

Kan thlen chuan ICU ah an dah lut nghal a, a dinhmun chu a hniam chak hle a. Zing khawvar hma deuhin ka hmangaih Sangtei chuan a kal chak em em na hmun Vanram lamah min hawsan ta. Ka tap a, mu leh mal ka nei lo ani ber. A khumah chuan thu in awrawl tawpin ka tap hawm hawm a. A sulhmu hrang hrang chu ka khawih kual a, tahna hlir a ni. Lehkhabu pakhat ka haichhuak a, a kawmah chuan 'Kan chanchin' tih a in ziak a. A chhungah chuan kan pahniha kan chanchin chu alo ziak tlar dul a, a phek tawp berah chuan hei hi alo inziak a.

"Van khawpui ah ka kal thuai dawn partin vulna ramah chuan..

Min ngaih chang apiangin Van lam rawn hawi la, ka awmna Vanram atang ka lo thlir thin ang che"

Ka mittui ka hru hul a, pawnah chhuakin Van lam chu ka thlir ta vawng vawng a...

TLIPNA

Ka bula an thawnthu sawi mektu chu ka en a, ka lo paltlang ve tawh avang khan ka hrethiam hle a. A mittui chu a hru leh zauh thin. An chanchin a saai chhung khan vawi engzatnge ka mittui ka hruk tih ka chhiar seng lova, ka lainat takzet a ni.

Amawia alo len atanga thlakhatnaah chuan Aizawlah hna pawimawh ah ka zin a, Sangtei thlan chu tlash ka tum ruh hle. Amawia chu biain ka tum dante ka hrilh a, Aizawla a awm ve mek thu a sawi chuan inhmuh chu kan tum ta a. Ka thlennaah min rawn hruai a, thlanmual lam chu panin kan chhuak ta nghal a. Sangtei thlan chu a mawiin enkawl uluk tih a hriat hle a, Amawia chu ka han en a, a mittui chu a lo hru mawlh mawlh a, ka dem love, hmangaih ber chan zet zawng a na em a ni. Zanah chuan ka muhil thei lo chu ka in let leh thak thin a, ka kalna apianga ka ken thin Zotluangpuia thlalak chu ka en a, "Tluangpui.. kei chauh hi hmangaih te chan avanga na ka ni bik lo a, ka tuar bik viau emaw ka in tih pawh kha alo ni bik lo ve.. nangmah ngaih avanga ka tah chang pawhin mi min dem hlau takin ka awm tawh lovang" tiin ka phun sap a, ka maimitchhing ta vang vang a.......