LET IT RAIN

                            "LET IT RAIN"

“Hello… I thlalak ka hmuh apiang hian ka bialnu thi ta kha ka hrechhuak ziah thin, ngaih loh lamah ngai lo la, ka nunhlui ka nawhreh theih loh kha chiang takin ka hmaah hian chhawpchhuahin a awm leh thin. I thian atana min lo pawm avangin ka lawm e”

Ka laptop chu ka off a, thlahnih dawn kan exam avangin ka online ngai lova, vawiin ni hian exam zo in ka tihtur hre lo chu facebook ah ka lut a, ka hmelhriat pawh nilo hnen atang message chu ka dawng ani. Tun hi hetiang thu ka dawn vawikhatna ani lova, high sikul ka kal laiin hetiang chiah hian mipakhat hnen atang ka dawng tawh bawk ani. Muthilh tumin ka han maimitchhing vang vang a, exam zo mah ila ka haw thei lo tur chuan min tilunghnur takzet ani. Ka muthilh theih mai loh avang chuan ka tho a, ka khum bula tukverh chu ka han hawng a, kan hostel kawta thingzar lian tak chu ka en reng a, he hmuna ka awm tirh te chu ka ngaihtuah let a, kumthum lai alo liam veleh ta reng mai. Ka zirlai zir zo a ka let leh hunah meuh chuan ka khua a har dawn viau in ka hre nghe nghe.

Volleyball court ah ball chu ka beng leh lauh lauh tawh a, ka dam that phawt chuan tlaitin ka inkhel ziah a, kan college volleyball star ka ni ve hial a, pumrua ah lian lo mahila tluk loh enin min en ve ani. Nidang ang lo takin ka ngaihtuahna chu a chau ruih a, “Rinte, ball…” ka roommate Julie thusawi ka hriat chuan chetsawnna hun a awm tawh lo, ka hmaiah a ri thlawrh a, leiah chuan ka let tawp a. Ka han tho mai tur chu ka thei hauh lo mai, ka tluk zawng khan ka ke ka chhep sual deuh anih ka ring mai a, ka thiante chuan min rawn pui sap sap a, hostel ah ka let leh ta ringawt a. Doctor in min han en vel chuan ka kheimit ka lo ti na ve deuh hi alo ni a, indim tur chuan min han hrilh a, ka inhliam khat hle a, chutianga ka tuina ber pawh engemaw chen ka chawlhsan angai tur chu ka huphurh ani.

Ka rin ai daihin ka hliam chu alo serious a, dam mai tur a ka ngaih chu a dam hleihthei meuh lova, class ka kal theih loh avangin chhunah khawhar taka hun hman a ngai thin a. Thildang ka tih peih lem loh avangin facebook chu ka khawih tam hle a, chutia nilenga han khawih ve chuan a nawmna ka pawh ve in ka hre hial a. Tlai khat chu message ka dawng a, ka han en chuan a hmaa mi Zothana tih tho chu alo ni a, ka hriat ngai loh anih avangin ka ngaihven zui lem lo kha ani a, tun tumah pawh hian a hmaa mi ang bawk chuan polite takin min rawn be leh a, “Tihbuai che ka tum lo ania aw, nupui neilai ka ni a, I tana a tha lo zawng chuan ka ti miah lo ang. Mahse khawngaih takin thian angina min kawm ve hram rawh aw”tih ka chhiar zawh chuan amah hriatchian chakna chuan ka khat ta tlat a. Ka tih ngai miah loh anga awm in a message chu ka lo reply ve a, chutatang chuan a khat tawkin kan inbia a, inhresa ang maiin inpawh takin kan inkawm thin. A mimal chanchin chu a sawi tam ngailo a, mahse a nupui lakah a hlim loh thu erawh a zep lem lo. A sawi chin bak chu zawh ka tum lem lova, mi chanchin hriat lo tum vak pawh ka duh lem lo ani. Amah hi mi rilru tha leh tluang tak ani tih ka hre mai a, keimah nen pawh hian a tha lo lam leh inngaihzawnna lam hawizawngin kan inbe ngai lo.

Hun alo liam ve zel a, exam pui pawh zo felin mahni khaw lam pan tur chuan kan inbuatsaih sang sang a. Kum thum chhung zet unau ang maia lo khawsa ho kan nih avangin kan inthen darh tur chu a huphurhawm duh khawp mai. Ka thiannu ber Julie nen chuan Aizawlah in hmu ngei turin kan intiam a, practical exam tur ala neih avangin ala haw ve thei dawn lo ani. Ka haw dawn zan chuan kan pahnihin pawnah kan thu a, engkim inhrilh tawn kan nih avangin kan inkarah zep ruk a awm ngai lo. Zothana nen kan inbiak dan pawh ka hrilh vek a, pawi tham in inbe lo mah ila inbe tam lo turin min hrilh fo a, tlangval anih loh avangin hmingchhiat a awl thu pawh min hrilh nasa thin. Keipawhin a dik tih ka hria, mahse thian ang baka ka en loh avangin inthiam lohna ka nei hran lem lo. Thli chu a thaw heuh heuh a, kan sam chu a chhem leng siau siau a, “Bae.. Ka ngai ngawt ang che, rokhawlhna dang a awm loh chuan rawn cham chhoh ka tum ang”a han ti a, “Zankhat tal I rawn riah loh chuan ka lungawi lo viau ang”ka lo ti vat a, “Chuan I thianpa thar kha hnaih suh ang che”a han ti nghal zat a. Ka lo then sak a, “Ka uang miah lo ania aw”a tih chuan, “Ka uang bik hleinem, Bae, lungngai suh I hlauhthawn thil kha chu ka hlauthawng ve tho alawm, engmah a thleng lovang”ka ti a, hahdam huai hmel hi a pu a. Ka hma hun hi min ngaihtuah ve takzet tih ka hria, hnam dang karah in hmangaih dun takin kan awm a, Champhai khua anih avangin kan duh hun hunah kan inhmu thei tawh dawn lo tih lah kan hrechiang, thahnemngai takin min zilh ve tawk tawk a ni. Zanrei tak thleng kan inkawm a, kan hma hun turte chu kan sawi dun bawk a, zir zawm leh chu ka chak viau rualin hnathawh tur ngaihtuah ka duh ve deuh thu te chu ka sawi a, ka chhungte chu kawng khat tal a puih ve theih chu ka chak tawh ani. A tuka inthen tawh tur kan nih hrereng chung chuan kan mu ta a, kan muhil tlem ngang mai. Hma takah tho in airport lam kan pan a, dam taka inhmuh leh beiseina nen kan invai liam ta. Ka khua chu a har ruih a, mahnia engmah hmachhawn ngailo khan tunah chuan keimah vekin ka hmachhawn a ngai tawh dawn tih ka hria.

Lengpui Airport ah ka chhungten min lo hmuak a, chhungte han hmuh meuh chuan kan lo thlakhlelhzia hriatchhuah a awl duh hle. Mahni ram ngei han rah leh chu a thlamuanthlak bawk a, ka hun tam zawk ram dang a ka hman hnuah ka pianna ram ngeiah ka kir leh ta a, ka phak tawk hna ka hmu te anih chuan he ram ngeiah hian ka thiamna te hman ka duh ngei ang. Ka thiante pawh ka haw tih hria in an rawn leng ve nak nak a, a tam zawkin nupui pasal an nei tawh a, a hmaa kan hun hman ho thin ang kha hman a rem vek tawh lo. Ka thian tamtakte zingah chuan Mami chu ka kawmngeih fal nalh ani a, ani nen hi chuan tette atang kan inkawm tawh a, in thenawm hnai kan nih bawk avang hian kan in zui tam a, zirna avangin hmun dangah ka awm tam a, ka awm loh chhungin thian tam tak alo neih belh a, a zarah thian ka ngah ve ta ani.  Ka thil hawn chu nidang ang bawkin a lawm thiam leh hle a, ka inbual chhung chuan haw lovin ka room ah min lo nghak leh mai a, ka inbual zawh a room ka luh chuan lukham hian min lo vawm nghal a, “Ka lakah zep I nei a maw?”lawm lo tih hriat tak hian min melh rum ran bawk a, “Enge ka zep anga?”tih pah chuan lukham chu ka chhar a. Ka inthlak chhung zawng chuan Mami chu a ngawi reng a, a bula thut phei pah chuan a hmel chu ka han en a, “I lakah zep ka nei ngai reng reng hleinem”tih pah chuan ka han nui vel a, “Hepa nen hian in inbe fo ani lawm ni”tih pah chuan Zothansanga thlalak chu min lo hmuh a, “Engtinnge..?”mak tih hmel taka ka awm avang chuan a thaw hak a, “Ka ring dik chiah ani, in inbiak tak tak ka ring miah lo asin. Mi hian fiamthu an thawh mai mai anih ka lo ring a”a ti a, chutia a tih chuan ka ngai serious ta viau mai. Tu sawi kai tur mah in ani nen chuan kan inbe ngai lova, hre tur an awm pawh ka hre lo hrim hrim, “Mam.. dik tak chuan kan inbe ve zeuh zeuh ngei alawm, mahse chutianga mi sawi kai tur khawp leh pawi khawp chuan kan inbe lo hrim hrim”ka ti a. Ka lawm lohzia chu ka tawngkamah a hria ani ang, “Rin.. I  thinrim atan ka sawi miah lo ania, engmah min hrilh silo a hmana I thlalak a rawn comment atang khan ka ringhlel mai mai alawm”a ti dam leh ta dap a. A tirte atang thil awmzia chu ka hrilh ta vek a, mahni in veng zo lo ka ni ngai lo tih min hrechiang ber tu ani a, “I tana pawi tur chuan engthilmah I ti lovang tih ka ring alawm”a ti ta a.  Keipawh chuan biak tam loh chu ka tum rilru a, ka thiante sawi hi a dik ani tih ka hai lo.

“Mahni khuaa awm chu a nuam ani ang reh vung vung mai alawm”Zothana hnen atanga ka message dawn chu ka chhiar a, ka haw atang thla hnih a ral tawh a, ka haw hlima kan inbiak bak chu kan inbe ta miah lo kha ani a, biak pawh tawh loh kha ka tum be rani bawk a, ka thei khawp mai. Chu message pawh chu chhang lovin ka delete daih a, a chang chuan ka rilru hi a dik tawk lo a, rilru tha lo ka puttir ve mai mai ani lo maw tiin ka ngaihtuah ve tho a, mahse inbiak tam loh tluka kan tana tha tur dang a awm chuang lo. Kan result pawh chhuak in tha tawk tak chuan ka pass ve a, zir leh zel chu chak mah ila ka phak tawk hna zawn phawt ka rilruk a. Ka chhungte erawh chuan ka zir peih chhung zir tur chuan min duh a, kumkhat chu chawlh ka duh ve reng reng avangin hna zawn chhuanlam in hahdam ka tum ani.

Mami chuan an office-ah Accountant hna a ruak thu sawiin dil ve tur chuan min ti a, tlin pawh in ring chuang lo leh kal pah angreng tak chuan dilna chu ka han thehlut ve a, interview pawh ka nei ve lawp lawp a, ka beisei san loh em avang chuan hna dang chu ka melh pah ve zel bawk a. Nikhat chu kan thiannu pasal Lata chu chhungkaw mamawh thil ah hmuh tumin an office ah ka kal a, inleng alo la neih avangin ka  nghak a, rei vak lo hnuah chuan a inleng te nen chuan an rawn inzui chhuak a, kawngkhar epzawnga ka thut avang chuan min rawn hmu thei mailova, keipawh in ka lo en uluk vak bik lo. Lata zawk chuan min rawn hmu hlauh a, “Rinte, lo va lut rawh ka inleng te hi kan thlah lawk ange”tiin min rawn hui ta zeuh a, a hma chiaha kal a inleng pakhat zawk chu a ding dat a, keipawh chu ka ding ta reng a, ralkhat atanga  lo inbe fo leh lo innel ve tawh takte pahnih chu kan inmelh ta reng a. Ka chil chu ka lem khalh a, chutah hmanhmawh takin Lata room ah chuan ka lut ta vat a. Ka thin phu dap dap chu ka han khawih a, tum loh leh beisei loh lutuk a Zothansanga ka hmu chuan ka awm a ti nuam lo. Lata pawh chu a rawn lut vat a, “Pu Zothana nen khan in inhria em ni?”Lata chu a nui var var a, ka lu chu ka lo bu nghat ringawt a, “A va tihzia ve, ka la mamawh dawn chauh lehnghal a”a ti leh mai a, chutah amah vek chuan, “Kan office nen hian thawhho tumin ka bei mek a, agreement chu kan la sign chiah lo na kan tihfel vat chu ka beisei a, amah ang hi Mizoram ah hian an tam lo em a, ka ngaisang ve kher asin”a tih chuan ka lo nui tawp a, a chanchin hriat ka nei tam loh em avang chuan sawi ve tur pawh chu ka hre lo ani. Private company neiin mi tlemte a chhawr a, an dai chin erawh a theuneu lo tih ka hria, sawrkar department hrang hrang nen thawk ho in a sum hailuh pawh a tlem lo angtih chu ka hria, tin, computer hmanga mi chhui hna a thawk thiam hle a, police ho rawih ber ani tih ka hria a, chung lo pawh chu chanchin a ngah viau in ka ring. Ka mamawh ang thil ka tihfel hnu chuan Lata te office chu ka chhuahsan a, pawnah chuan thawk ka han la vang vang a, ka motor dahna lam ka pan lai chuan min kotu an awm avangin ka han hawi let a, ka  motor bul deuh lawkah chuan Zothana chu a lo ding a, pumpelh ngaihna a awm tawh lo, muangchangin ka pan phei a. A lo then sang a, in la thutak theihtawp chuan ka awm thung, “I tum lohna hmunah min hmu”a ti a, “Nia, nangpawh…”ka ti muang charh a, a kut chu a rawn phar chhuak a, “In chibai ve reng reng ila”a ti a, kan han in chibai a, “Danglam suh”zawi sap hian a ti a. Engmah sawi lo chuan ka ding reng a, “Thil tam tak hrilh duh che ka nei a, tuma hnena ka sawi ngam loh thil tam tak. Nang lehzel hetianga I awm chuan inbunruahna tur ka nei dawn lo asin”a ti a. Ngawi rengin kan ding a, “Naktukah Lunglei ah ka phei dawn, zanah lo len ka duh, address min hrilh la ka rawn kal ang”a ti a. Rilru ni lo deuh tak pu anga min ngaih chu ka hlau leh hnuhnawh deuh a, tha deuhin boruak dai thei ang ber chuan kan awmna chu ka hrilh a, pangngai tak chuan kan inthlah fel ta a. Zanah chuan a thianpa pakhat nen an rawn leng ta ngei a, chhungkaw kimin TV kan lo en a, an rawn lai angreng viau lehnghal, ka bulah chuan an thiandun chuan an rawn thu a, ka chhungte mi tawng tam lo an ni a, hrehawm an ti ang tih chu ka hlau ru angreng a, mahse mi puitling an ni tawh a, an hriatthiam ve tho chu ka ring. Thingpui kan in zawh hnu chuan ka chhungte pawh mahni room lam panin an kal ta vek a, an ni pawh an tawng ngam ve ta sawt a, ka nuih chu a za angreng viau. Zothana thianpa  Ela chu la naupang ve deuh tak hi ani a, a thil en duhzawng pawh ka naute ho nen inrual khat tawk tak an nih ka ring. Tv hnaih ber thutthleng ah chuan a ve in sawn vei nulh a, uluk fahran in TV chu a en a, “I fapa rual vel lek alawm a thil hmuhnawm tih te chu”ka ti a, Zothana pawh chu a nui ve var var a. A phone a rawn rik chuan a en vung vung a, chutah inthlahrun hmel tak chuan a han pickup a, naupang rawn tawng zet zet chu ka hre pha a, a fapa anih ka ring. Rei vak lo a inbia a, an inbiak zawh chuan a thaw hak a, “A ngai tawh ngawt ang che”ka ti a, a nui mai a, kan titi pawh chu a tui ta chiah lo niin ka hria, thingpui lumsak leh ka tum chuan an hnial a, haw chu an tum ta zawk a. Pawn thleng ka thlah a, rei vaklo gate bulah chuan kan ding a, sawi tur erawh kan hre lem lo, a tuk maia haw tur an nih avang chuan dam takin tiin kan in vai liam ta a.

In an thlen hnu lawkah min rawn call leh a, “Rinte.. I laka beiseina ka neih vangah min ngaih sak lo la, kan  nupa chungchang hi chipchiar zawkin engmah ila hre lo anga, ka fapa avang chauh hian nupa angin kan la inkawl mai mai ani. Min uiresan mahse ka fapa hi ka lainat si a, tihian kan tal vel ta mai mai anih hi”a ti ta khawl a. A hma atanga ka rin ni mahse chutiang lutuk ni tur chuan ka ngai lova, a pawi ka tihpui takzet. Mahse chumi vang ringawt a mi nupa inkara lo tlakzeh chu ka duh lova, ka tum lo bawk. Ka laka rinna a nghah thuk em avang erawh chuan keipawhin lo biak duh loh ngawt chu ka thei bik chuang lova, thiantha tak angin ka lo en ve deuh tawp mai ani. Hetih lai hian pangngai takin ngaihzawng ka nei chho a, Zothana nen pawh a khat tawk chuan kan inbe ve tho a, ngaihzawng lam hawiin kan inbe lo bawk a, harsatna kan tawh chang erawh in kan inhrilh vek thin. Zankhat chu inleng ka neih avangin ka phone chu room ah ka dah a, ka mut dawnah ka phone chu ka khawih ve chiah a. Zothana message a lo awm nual a, miscall pawh a lo awm nual bawk, ka han call back a, a pickup tawh dawn lo emaw tih hnuah a rawn pickup ta hram a, “I bialpa neih chu a hriat hle mai maw..”a ti hul hak a. Sawina hun remchang tak nia hria in ka bialpa neih thu chu ka sawi a, ka sawi zawh chuan a ngawi reng a, “Ka lo tibuai tawh lovang che”tih leh phone dah chu a rual a, min tihrilhhai hle. A hnu lawkah amah zawk chuan min rawn be leh a, “Sorry.. I laka khatianga awm tur kha ka ni lo”a ti a, “Keimah leh keimah ngei pawh hi ka in hrethiam ta lo ve, tu chiah nge maw ka nih le?”a ti a, zan tai rek thleng chuan kan inbia a, a nuna harsatna a tawh tam tak chu mi nazawngin an paltlang theih loh tur thil niin ka hre ve a, ka khawngaih a ni. Chumi zan atang phei chuan kan inbe nasa zual sauh a, ka bialpa ngei ai pawha ka biak hi a tam zawk chang pawh a tam. Inbe tam na na na chu keipawhin ka ngaina takzet tih ka hria, a tha lo chin chu ka thliar hrang thiam ve in ka inhria a, chutihrual chuan ka duh loh dan deuhin thil a kal dawn ni a hriatna ka nei bawk a, engtia tihtawp chi nge tih erawh ka hre mai lo.

Ka thiannu Mami te office-a kan interview na result alo chhuah chuan rin loh takin ka tling ve a, ka lawm ve hle. Dik tak chuan Zothana hi hlat ka duh, ka hna tlin chungchang pawh engmah hriattir ka tum lova, ka chanchin hi a chhia emaw, a tha emaw hrilh loh hi kan inbiak tlemna tur awmchhun niin ka hria a, chuvang chuan chutianga nun chu ka tum ve tawp mai ani. Ka hna pawh ka zawm ve tawh a, ka zawm atanga karkhat a liam hnuah Zothana call ka dawng a, chumi tum chuan nasa takin kan inhau a, a chhan ber pawh ka chanchin engmah ka hrilh duh tawh loh vang chu ani deuh ber. Mipa zaidam ve tawpkhawk niin ka hre thin, “I sms thawn chhuah zawng zawng te, I call zawng zawng hi ka hre vek, I chanchin hi ka hre lutuk, I hrilh tlak ka ni tawh lo anih chuan tha takin sawi rawh, I nun atang ka kal bo vang vang ang”a tih chuan ka thinrim lutuk chu ka insum zo tawh lo, “I enthlak kha ka ngai lo, I enthlak tur khawp pawhin nang leh kei hian relationship thuk tak kan nei lo. Ka mimal nun min tibuai tur zawnga I thiamna kha I hman duh ka ring ngai lo, ka lo ring sual hle mai che”ka ti a, ka mittui chu a rawn tla sawk a. Chumi zan chuan ka muhil lo chiang hle, ka ring em em thin a, ka ngaina ani tih pawh ka zep lo, mahse misual hnu a chhui te ang maia kei hi min chhui tih ka hriatna chuan min ti na takzet a, chutihrualin humsual ka dai loh nan Pathian hian ruahmanna dang min lo siamsak ani tih tun hnuah hian ka hre ve chauh a ni. Kum khat dawn thian in ngaina tak ang khan kan lo inbe ve a, a ngaihawm tih chu phatrual a awm lo, mahse ani nen hian engtikahmah thiantha tak tak hi kan ni thei ngai dawn chuang lo, a tawp dan chu a lungawithlak chiah lo anih pawhin kan thatna tur anih avang ringawt pawhin lungawi chu ka zir mai tur a ni.

Ka mamawh hun apianga ka koh thin leh min pui thin tu tello chuan hun leh ni ka chhiar chho ve ta beuh beuh a, thil ni thei miah lo tur nih tir tuma beih ai chuan kawng dik zawh chu ka thlang ta mai a ni. Ka ngai lo ani lova, mahse mi nupa pawt thentu leh naupang pawi sawi lo fahrah nihtirtu chu engtikahmah ka duh ngai dawn lova, ka thutlukna siam hi a tha ani. Vawi tam Zothana chuan min rawn biak pawh a tum a, a call ka pickup lova, message ka chhang let ngai hek lo. A beidawng rak thlenga chutia ka awm hnuah chuan hreh tak chungin mangtha na thu min thawn a, a reh zui ta vang vang a ni. Ka nun chu hlim taka hman ka duh a,  ka hmang chho ve zel bawk. Ka nunah thil hrang hrang ka tawng a, min tihlim vawng vawngtu leh na tu pawh ka tawng ve thin, hei hi hringnun a ni a, mi te tawrh tur chauh emaw kan tih pawh hi kan chungah alo thleng  ve thei tho alo ni. Ka tih tawh lamah chuan thil ti vak chi ka ni a, ngaihzawng ka neih pawhin inthup thiam lo chi ka ni a, ka duh tawh chu ka duh bur a, chutiang ka nih avang chuan ka nuna mi thar Mapuia pawh chu ka rilru zawng zawngin ka lo nei a. Kawng engkimah min ngaihsakna leh ka tana a awm tlat na chuan ka hriat loh chhungin amahah min lo innghahtir hle alo ni. Vengkhata awm kan ni lo a, rokhawlhna tawp a tawk anih ngawt loh chuan kan ina rawn kal lovin a awm ngai lo. Inkhawm zan anih pawhin inkhawm banah a rawn kal hram thin. Kan hlim ve hle thin a, tudangmah kan ngai bik lo. Chutianga in rem tak leh in duh tawn taka kan hun hmang chhung chuan kum alo liam ve zel a, kumhnih lai alo ni ta reng mai. Ka thiannu dawrah thil lam tur ka neih avangin office ban veleh ka kal nghal a, ani nena kan inhmuh tawh hi chuan kan sawi tur ngah lutuk hi duh ai rei kan awm phah ziah thin. Chutia dawr atanga ka chhuak tur chu mipakhat rawn lut turn en chuan kan in su chawrh a, ka tarmit chu chhuatah a tla a, “Ka tihpalh lutuk”tiin inthiam lo takin ka tarmit chu a chhar a, ka thiam loh a nih zawk thu sawi pah chuan ka tarmit chu ka ban a, “Rinte…”ka kut chu ka dah ngil nghal zawt a, mak ti takin Zothana nen chuan kan inmelh ta ran a. Chutah hrechhuak thutin ka tarmit chu ka la a, ka bun nghal a, “Ka hmanhmawh deuh a, ka kal phawt mai ang”tih pah chuan ka kal ta dawr dawr a. Ka motor dahna hmun ka thlen chuan ka thin phu zeih zeih chu ka hre thei, hlauh vang chu a ni hauh silo. Mapuia call ka dawng hlauh a, pangngai takin ka awm leh thei ta, engvanga ka tana rem ve ngai reng reng lo tur khan ka rilru hi tibuai tlat thin nge anih tih hi ka hrethiam lo ani.

Zothana nen kan inhmuh atang nihnih a liam tawh a, zan khat chu Zothana thianpa Ela hi a rawn lang ve hlawl a, Mapuia rawn len lai ani nghe nghe. Chutia ani meuh rawn lang ta chu mak ka ti rilru khawp mai a, mi zakzum tak anih avangin amah mai a a rawn kal ringawt pawh thil mak ani. Inkhel en in kan phul hlut a, Ela chu ngawi rengin alo thu ve reng a, thingpui lum tum a choka ka kal chuan min rawn zui vat a, “Rinte, Zothana’n a hmu duh che”a han ti tawl a. Engang hmeichhia ah nge hepa hian min ngaih chiah? Ka thin chu a rim hle a, mahse tih lan chiam a rem lo.  Ka thinrim vanga ka aw khur tur chu theihtawpin ka thup ve bawk a, “Ela, I hmuh ang hian inleng ka nei a, min hmu duh anih chuan rawn kal se, min hmu thei alawm”ka ti a. A duh duh huna a hmuh tur leh a kohchhuah tur ka ni lo, min hmu duh tak tak nise a rawn kal ang tih chu ka ngaihdan nghet tak ani.  Ka mut hnu pawh chuan ka ngaihtuahna a ti buai vek, a zuam theih turin alakah khan zuamawm in ka lo awm em ni tih te thleng chuan ka ngaihtuah phah a, ka rilru a na ani. A tuk office ka kal tur pawh ka phur lo hle a, zan lam boruak chuan min la nghawng a, ka mood pawh fuh thei lo. Office ka thlen hma deuhin Mami chuan min rawn call a, kan office piah lawka coffee dawrah min nghah thu chu a rawn sawi a, chu lam pan chuan ka kal ve nghal a. Ka va thlen chuan rilru buai deuh hlek hmel hi a pu a, ka ngaihbel vang zawk pawh ni maithei. Min lo ko vat a, coffee chu min lamsak ve nghal a, engemaw sawi duh nei, sawi hreh si hmel a pu ni berin ka hria. Ka kut chu a han hmer deuh vang vang a, “Rin, ka thiantha ber I nia, I natna tur pawh nise ka hrilh lo thei lo che. Mapuia hian a kawp che”a tih chuan ka phu zawk a, ka chhah mawp thei! Thil sawi ka tum a, ka hrawkah hnawhtu a awm a, engmah ka sawi thei lo, “I na ang tih chu ka ring, I nat tluk hian keipawh ka na”a ti a. Ka mittui tla tur chu ka han khap per sak a, “Awih a va har duh ve!”tih chu ka sawi chhuah theih chhun a ni. Mami chu a then lui sak a, “Ka hriatna chu a rei leh deuh tawh a, mahse dawt mai mai anih ringin ka hrilh duh lo che a, mahse ka mit ngei hian ka hmu a, ka man a, ka hrilh ngam chiah che ani”a tih phei chuan ka thawk chu a chham mai dawn hian ka hria. Engtinnge office kan thlen tih pawh mumal in ka hre lo va, ka rilru chu a vakvai ani ber. Kum hnih chhung kan inzui a, min bum duh tur khawp anih ka ring lo. Kan chhungte ve ve pawhin min hriatpui a, chhungkaw inpawh tlang taka kan awm hnuah hetiang hian ka chungah alo khawsa thei ania, mipa rintlak hi an awm miah lo em ni?

Ka phone chu a ri char char a, ka pickup thei lo, a tawp a tawpah chuan ka phone battery chu phawrh in khumah ka vawm thla tawp a, min ti na tu vang hian ka tap lovang.  Ka hnathawh tur hawn chu dawhkanah ka inchhawp hnawk hle a, mahse thawk turin ka rilru chu a fim tlat lo. Ka room kawngkhar chum ri bur bur ah chuan ka suangtuahna atang ka harh chhuak a, ka va hawn chuan Mapuia chu mangan hmel tak hian alo ding reng a, kawngka chu khar leh nghal ka tum a, rang takin a lo dang vat a, “Rinte, I hnenah insawifiahna tur ka nei, hun min pe rawh”a ti a. Ka kut a vawnna chu ka thing thla a, “Nang nen hian sawidun tur kan nei tawh lo”ka ti a. Ka thinrimna zawng zawng chu sawichhuak bawrh bawrh ila ka hahdam deuh ka in ring, chutiang tur chuan engmah ka sawi chhuak thei silo. Ka room ah chuan min nawr lut a, kawngkhar ah min nem bet a, “Thil chu ka tisual ngei alawm ka pha lo, mahse a thleng leh tawh ngai lovang, min ngaidam rawh”a ti a. Ka tha chu a khur dawt dawt a, “Hun ka pe thei che, mahse min then suh”a ti a, a tlawm ngawih ngawih hmel chu hmuh nuam ka ti chuang lo. A tihsual avang chuan tuar se ka duh ani lawm ni, mahse a na hmel hmuh chu harsa ka ti leh viau tho si, ka hrethiam thei lo ani. Chu thil a thlen atang karkhat pawh a ral hma in Mapuia bialnu chu alo rai tih kan hrechhuak a, ka na lutuk kha ka na tih pawh ka in hre lo zawk. Pawnah ka chhuak ngam lo, inchhungah ka in khung tlat a, vawi tam min rawn hmuh tumin a rawn kal a, ka hmu thei lo. KA chhungte ka zah ngawih ngawih bawk a, na leh tur chuang awm hian ka in hre lo. Ka mu thei lova, ka chawei a tui hek lo, tiang tak hian ka la tlawm ngai lo.

Mapuia chuan ngaihdam min dil mawlh mawlh a, mahse ka ngaihdam phak ani tawh lo. Ka hmangaih em ka hrelo, ka duh takzet tih erawh ka chiang ani. Mi inkara lo tlakzeh chu ka duh hlawl lo ani, chuta karah a fa alo piang mai anga, pa a mamawh em em dawn ani si a. A fa lo piang mai tur chu a duh lo pawh ani lo, a nu zawk chu neih a tum tlat lo. Ka biak chak tawh loh tehlul nen nei tura nawr thei awmchhun ka ni miau si a, vawi engemawzat ka nawr hnu leh kei hi a hnenah ka let thei tawhlo tih ka hrilh hnuah lungawi lo tak chung chuan inneih chu a remti ve ta hram a. Ka thinlung na ngawih ngawih kara ka hlimna awm ve chhun niin ka hre hial! Ka natzia chu ka thup thiam hauh lo, mahse ka paltlang dawn tih ka hrechiang a, ka natna chu inhneh tir ka tum lo.

Hun a liam leh fe tawh a, nikhat chu office thilah bank ka dawr a, rin loh takin Ela nen kan inhmu hlawl a. Ka hmu hmasa zawk a, min rawn hmuh ve hma chuan kalsawn mai ka tum chu  min rawn hmu hman ta tlat, ka nui lui sak a, min rawn nuih let pah chuan min rawn pan a, “I dam thin maw?”tiin min rawn chibai a. Inhnawhpuar a rawt tlat avang chuan kan inzui ta nge nge a, “Zothana’n a ngai thin khawp mai che”eitur kan lam zawh chuan a han ti nghal a, chhang lo in ka nui hak ringawt a. A thutna a siam tha a, thu tak deuh zawk hian min han melh a, “A nupui nen an inthen hnu hi chuan a rilru hah deuh thin pawh kha reh ve ta, mahse a ngaihtuahna atang I hla thei lo chu a ni ber”a ti a, an inthen tih reng reng chu ka lo hre hauh lo. Ka hmel a hmuh chuan a hrethiam a ni ang, amah vek chuan, “In in a ka rawn kal pawh khan an inthen tawh alawm, zep lo chuan thinlung taka hmeichhia a vei zui hi nangmah chauh I awm, a hmangaih che tih hi sawi lo mahse ka hria ani”a ti a, “El, fa an nei tawh a, inthen mai mai tur ani hleinem”ka lo ti daih a. A han thaw halh a, “A tuar hnem ve tawh bawk alawm, a fapa fahrah ai chuan tiin a dawh ve hram thin a, mahse mihring insiamthat tum miah lo hi tihngaihna tak a awm lo ani”a ti a, sawi tur hre lovin ka ngawi ta reng a. Kan ei zawh hnu chuan office lama let leh ka ngaih avangin han khawtlai na hun ka nei tawh lo, ka motor bul thleng min thlah a, “Tute pawh hian second chance chu kan nei tur ani dawn lawm ni?”a ti a, “El, tunah hi chuan engmah ka ngaihtuah thei lo, min hrethiam phawt rawh, mipa hi rin har ka ti em em a, chu zawng chu ani mai tuna ka dinhmun chu”tiin ka tlanliamsan ta a.

Ka thil tih engmah a tui thei lo, ka hawina lam apiangah mite hian min en bik tlata hriatna ka nei a, nuam ka ti lo a ni. Zanah pawh inah ka inkhung deuh chawt a, KTP branch committee pawh ka tih ngai loh ang takin ka pha a, hma taka mut hahdam chu ka duh ani. Ka muhil lai chu ka phone ri avangin ka harh hlawl a, phak chuapin ka han pickup a, “Rinte.. I mutui lai ka rawn tibuai che ani maw?”ti a aw dam thlapa min rawn betu chu tudang nilovin Zothansanga ngei a ni. Ka mit chu ka han nuai a, ka muttui ve tehlul nen ka thin chu a rim zawk, “Enge mamawh I nei em ni?”ka ti hmuk a, “A… I ngaihawm lutuk a, ka rawn be tawp che. Ka lung a leng riau a”a ti a, “E! In nu be mai te che, I lunglen vanga kei teh daih min rawn bia chu a va mak ve”ngeiawm tak chuan ka han nui lui hak a, “Rinte, ka rilru hi ala danglam miah lo ania”a ti a. Kumhnih a liam hnu leh ka thinlung a kehsawm vek hnu hian awlsam takin a thusawi hi ring turin min ngai em ni ang? Ka thaw halh a, “Pathian chiah hi danglam ngailo tur chu a ni, keini mihringte hi ni lovin”tih leh phone dah chu ka rual a. Ka thaw chu a ipik churh a, tukverh chu hawng in thlifim rawn thaw her her chuan ka sam chu a chhem leng siau siau a, Zothana ka lo tawngkhum dan chu a mawi lo tih ka hria, mahse a nupui then lungleng ah chuan ka ngai lui tlat a, a duh duh huna a biak leh a tih kawi tur niin ka in hre lo a ni.

Ka hna khawih lai chu a laklawh em avangin thingpui in hun pawh ka lo hre lo hial a, Mami chu ka thutnaah a rawn kal a, thingpui in tur chuan min rawn sawm a. Ka sana chu ka han bih a, ka lo thawk tui ve hle anih hi ti rilru pah chuan canteen lam chu kan pan a, Zothana min rawn biak leh boruak vel chu Mami ka hrilh mawlh mawlh a, “A chang chuan ka khawngaih ve thin”a rawn ti chhuak hlawl a. Ka thiantha be rani a, ka tana tha lo tur a duh lo tih ka hria, Zothana chungchang pawh hi kan sawidun tam lo, sawi tam tur in chanchin kan nei hek lo, mahse hei erawh thil chiang phat rual loh ani; ani nen hian kan in ngaina takzet tih hi. Mahse rem lo tur rem tir talh tum hian kan in ti na tawn ve ve dawn tih ka hria, thinlung natna bak hlawhchhuah tur a awm dawn silo.  Chawhnu lamah chuan tlem in ka hna pawh ka thawk kaw deuh a, ka buai pawh a ziaawm ta, pawisa chhut fel in ka lo kun deuh ngar a, ka bula aw thian karh chu hmuh tumin ka han hawi chhuak a, Zothana chu a lo nui var var a. Ka hamhaih em avang chuan biak ngaihna pawh ka hre lo, “I va buai awm ve”a tih chuan, “Nia”tih chauhin ka chhang a, “In pu hmuh lawk ka ngai a, ka va lut lawk ange”tiin kan pu room lam chu a pan nghal a. Min lo thlir reng tu ka thiannu Mami chu a rawn kal phei vat a, “Kha kha ani chiang mai, ka rin ai a lian daih”tih pah chuan min rawn sik a, “Lo buai chung suh, ka hamhaih lutuk engmah sawi tur pawh ka lo hre lo”ka ti a. Ka hmai sa hat hat chu ka han tuai puat a, “Mam, ka hua”ka ti tawl a, “Pangngai takin lo bia la, a ho lutuk, engmah hi lak serious angai lo”a ti leh mai a. Ni e, a sawi dik chiah, mahse kei chuan thil lak serious loh hi ka thiam ve lo. Rei deuh hlek hnuah kan pu room atang a rawn chhuak a, ka thutna lam bawk chu a rawn pan a, Mami pawh a lo la thu ve bawk a, “Zothana I niin ka hria, Rintei thiannu Mami ka nia”tiin alo be hmasa hlauh a. Zothana chu thutna  a kawhhmuh ah chuan a thu a, “Aw, ka ni alawm, lo in chibai ve reng reng ila”tiin an han in chibai lawp lawp a. Kan room ah thu kan tam lova, a awm chhun dang pawh an chhuah lai anih avangin mitmei ven hran a ngai lo, “Engtikahnge I haw leh dawn a?”tiin Mami bawk chuan a han zawt a, “Vawiin a haw leh nghal mai tumin ka rawn kal a, mahse kan tifel thei ta chiah silo a, cham a ngaih hmel ta anih hi”a ti a. Engmah ka la sawi chuang lo, “Rintei lah hian chawei turin min sawm duh mang silo a”tih pah chuan min han melh ralh a, “I duh leh rawn ei la ni mai lawm”ka ti a, Mami chuan min han nghawk ru sawk a, “Ka lo mikhual ang che”a han tih zawm zat a. Ka thiannu hian engtik atang khan nge Zothana lam hi alo tan tak tih ka hre chak ngawt mai!

Tv en in inhmachhawn chuan kan thu reng a, kan office atanga a haw hnu khan min rawn bia a, rawn len chu min dil ngawih ngawih a, chutichung lo hnar kha nuam ka ti lova, ka rem ti ta kha a ni a. Ka chhungte an mut tawh avangin kan pahnih chauh in kan meng tawh a, a rawn luh hlim atang thu tam kan la sawi lo hrim hrim.  Anihna takah chuan ka hul ve takzet a, tawng duh ve barh barh thin viau mah ila kan pahnih chungchangah hi chuan sawi tur ka hre lo. Ka bulah chuan a rawn insawn hnai a, remote chu la in a hmet sawn a, rei vak lo chutia kan awm hnu chuan tawng chhuak hmasaah a rawn tang a, “Engmah sawi tur hi I nei lo tak tak em ni?”a ti a, a aw ah chuan beidawnna ri chhuak tel hian ka hria a, “Enge sawi tur kan nei em ni?”ka la ti talh a, “I laka rilru ka put ang hi ka laka I pu ve emaw ka ti a, ka lo hre sual hle alo nih hi”a ti a, kan ngawi leh ta reng a. Thingpui lum turin choka lam ka pan a, min rawn zui ve nghal vat a, “I rilru ang chu lo pu ve pawh ni tehreng ila, future kan nei chuang em ni?”a mitah chuan ka melh ran a, mualphona leh natna bak kan hmu chuang lovang. Min rawn din hnaih a, “Future ngaihtuah vak chu enge a tangkaina? Tun hun hi a pawimawh ber chu ani zawk lo em ni?”a ti a, “Zothan, min hrethiam rawh, engmah hi ka hrethiam lo, engtinnge lo dawnsawn tur che tih pawh hi ka hre lo ani”ka ti tawp a, a kun deuh lap a, “Ka hrethiam che, ka lo nawr mah mah che pawh ani mahna, chutiang alo nih chuan min ngaidam dawn nia”a ti a. Thingpui kan in zawh chuan haw a tum ve ta a, pawn thleng ka thlah a, gate bulah chuan ka ding a, kal tumin a han pen zuai a, a rawn let leh a, “A hma anga kan inbiak tal kha remti hram rawh.. aw??” a ti mawlh mawlh a. Ka remti tih lantir nan ka lu chu ka lo bu nghat a, a tlan liam thleng chuan ka thlir a.

Kum hnih liam ta ang mai khan chhum lo chat lovin kan inbe leh ta nge nge a, mahse keimah hian venthawn tam tak ka nei. Mi min ngaihdan tur te, ka hmingchhiat theihna thil tamtak chuan min tibuai ru fo a, a chang leh hetiang hian ka ngaihtuah thin, mi innei tha lai tibuai pawh ka ni lo alawm tiin. Mahse chu chuan min hnem tak tak chuang lo, an inneih lai khan inngaizawng lo mah ila kan inbia k tanna kha ani miau si a, kan bul tan na kha a fuh ka ti thei lo. Chu chuan keimahah harsatna min thlen a, inngaihzawn lam thu chiang taka kan sawi lo chu pawi ka tih loh phah zawk. Hetiang boruak anih mek lai hian nikhat chu phone call ka dawng a, ka hriat ngai loh number ani a, mahse ka rin loh leh beisei ngaihna pawh ka hriat loh Zothana nupui hlui chu alo ni, “Ka pasal hi lo beisei tawh suh, ka fapa vang hian min pawm leh ngei ngei dawn, chu chu lo hria la lo inthiarfihlim ang che”a rawn ti a, chu mai chu duhtawk lovin, “Kan inbiak tawh loh te hi I ring em ni? A rawn kal fo a, nizan ah mai pawh kan chhuak”a rawn tih phei chuan ka sa phat a, “I pasal kha lo veng tha la kei chuan ka tibuai hauh lovang. Kei min rawn tibuai lo hian I pasal chu tha takin I lo hrilh dawn nia”tiin phone chu ka dah a. Chutiang ka tawk mai chu ka zak a, ka rilru a na bawk a, nula in vawngfel ve tak nia miten min hriat ve thin laia mi pasal tibuai tu ang maia ka awm chu ka zak ani. Zothana call pakhatmah ka pickup lova, a beidawng chuan Mami alo bia ni ngei tur ani,engengemaw min rawn zawt a, mahse a zawhna pawh mumal in ka lo chhang lo.

Thla khat vel chu pumpelh dan kawng ka zawn atang a liam veleh tawh a, engmah sawi lovin ka ngawi tlang ve thei dawn niin ka inhria a, ka thiantha ber hnenah pawh engmah ka sawi lo. Ka office bang ka haw chu kan inah Zothana chu alo thu reng a, ka tum loh lutuka ka hmu chuan min tibuai ve lek lek. Ngawi rengin roomah inthlak turin ka luhsan a, ka chhuak leh ang nge ka chhuak tawh lo ang tih chu ka inngaihtuah rauh rauh a, engkim chu puitling taka tih a tha zawk tih hria in ka chhuak a. Sitting room ah ka thu a, rawn thu phei ve tur chuan ka ti a, a rawn thu ve mai a, “Chhuak lawk ang”a tih chuan ka chhang lo, “Ka sawi I hria em?”chang fak hian a ti a, ka melh zawk a, chutiang awki chu ala hman ngai loh vang ani. Ka dar chu ka han san deuh ak a, “I sawi duh chu hetah hian sawi mai rawh, chhuak turin hun ka nei lo”ka ti a, “I nu ka dil vek tawh, min rawn zui mai rawh. Ka mualpho tawh sa anih chuan engmah tih hreh ka nei lo tihna ani mai”a ti a, ka han ngaihtuah chian hnu chuan chhungte hriat loha sawi fel chu tha in ka hre leh ta zawk a. Kan kal na tur pawh ka zawt buai duh lo, kan tlan zel chuan Zemabawk dai ah motor a ti ding a, motor atang a chhuak a, kei erawh ka chhuak mai lo. A rawn let phei leh a, “Lo chhuak rawh”a ti a, motor kawngkhar chu a hawng a, ka chhuak veleh mai a. Motor nghengin ka ding a, “Ka hrethiam thei ngai dawn lo che anih hi”a ti a, a thaw hrawk a, “Tinge I danglam thut thut zel?”ka darah a rawn vuan a, “Min ti a zo vek tawh, hetiang mi hi ka ni ngai lo asin”a ti a. Ka thinlung chu a tawt vek, ka tawng chhuak anih chuan ka tap mualpho dawn tih ka hrechiang ropui si a, ka ngawi reng ringawt mai ani. Zothana chu ka hmaah a thingthi rawp a, “Misualnu.. min tuartir reng tawh suh, ka tuar thei tawh lo”a ti a, chutiang tak chuan tu mipa mah hi ka hmaah an la tlawm ngai lo, “Khatiang khan awm suh, khawngaihin tho rawh”ka ti a, kaihthawh ka tum a, “I lakah tihsual ka neih chuan min hrilh rawh, ka insiam tha vek ang”a ti a, “Zothan, engmah I tisual lo, kan pahniha kan tihsual erawh kan lo in tawng hi ani”ka ti a. Ka mittui chu dan kir tumin ka khap sak a, mahse ka biangah a rawn luang thla ta tho a, “Thian tha tak kha ni le hang”ka ti a, a lu chu a thing a, a bulah chuan ka thingthi ve a, a kawr hmaah chuan ka tham a, “Rilru natna bak hlawhhchhuah tur kan nei lo, I hrechiang lutuk nangpawh hian”ka ti a. Ruah rawn sur seng seng avang chuan motor ah min hruai a tum a, ka duh lo, “Hetah hian tawp tawh ang”ka ti a. Min melh ta reng a, “Mi min sawi dan tur te, kan hmingchhiat dan turte hi I ngaihtuah ve lo em ni? Mi nu a lan tia min sawi tur ringawt hi ka duh lo”ka ti a, “Rinte.. I tan chuan mualpho ka lo inhuam ve viau asin, ka hmangaihna chauh lo che hi chu chhuan tur ka nei lo, pathlawi ka nihna takte hi ka in iai ve a, ka inthlahrung ngawih ngawih thin. I rilru dik tak hi vawikhatmah ka lo zawt ngai reng reng lo che a, engkim huamin min hmangaih ve dawn emaw ka lo ti thin. Ka lo hre sual takzet ani, tibuai nawn tur che chuan ka rawn kir tawh lovang, ka tihpalh”a ti a. Motor ah a lut nghal hmak a, ngawi rengin ka lut ve a, in kan thlen thlengin kan inbe tawh lo. Ka thawmhnaw huh chu ka thlak hul a, ka zalen ta cheng a, ka hlim hauh silo. Ka ngaihtuah chian nasat poh leh Zothana chu ka thlakhlelhzia leh ka duhzia chu ka inhrechiang ani mai si, mahse ka paltlang ang tiin ka insehruh a. Inbe miah lova han awm thut chu a hrehawm lo hauh lo, inbia tih ah pawh inbe em em mai kan ni thin bawk a, ka phone chu ka lo melh leh reng thin. Ka duhdan angin thil a kal emaw ka tih laiin ka natna tur chauh alo ni si a, mahse let leh thei ka ni in ka hre lova, hrehawmna te chu a mal te te in ka hmachhawn ang. Ka nun chu pangngai takin ka hmang chho ve nawk nawk a, Zothana chu ngaihtuah reng lo mah ila ka theihnghilh ngai lo. Engatinge in tawng lo tur hi kan lo intawn kher tiin ka ngaihtuah thin a, harsa tak chungin inkawp tum thin mahila a tawp leh nge nge zel a, chung lam ruat khi kan ni lo a ni mahna ka hre lo.  A nih dan ngai te in zingah ni a rawn chhuak a, tlaiah a tla leh a, hun hian min nghak ve mawlh silo.

Krismas a hnai tawh a, mitin ten chu lam hawi chuan rilru kan pu thup a, ka u fate thawmhnaw lei turin keini pawh bazar lam pan in kan chhuak a. Mi kan in sul pel suau suau a, hmelhriat hmuh fuh erawh thil har tak a tling pha. Kan haw dawn hnaih chuan naupangho chuan thil ei an ngen ta tlat a, restaurant ah kan in zui lut ta thliah thliah a. Naupang nawi tih takah thil an ei chak thei lem lova, ka ei zawh hnu fe ah pawh rei tawk tak ka la nghak a, a tawp a tawpah chuan kan ei fel thei ta hram a. Kan ei man chu counter ah ka pe fel a, chhuah ka tum mek lai chuan Zothana chu a rawn lut hlawl a, mipa naupang hi a rawn kai lut a, hai rual lovin a fapa tih ka hre nghal, helai hmunah hian inhmuh kan inbeisei lo lutuk chuan min ti hamhaih a, kan in nuih ta ringawt a. Naupang in min nghah tawh bawk avangin hmanhmawh takin ka chhuak zui nghal a. In ka thlen hnu pawh chuan Zothana te pafa chua ka rilru an la luah reng, a nupui nen an in hruai ta lo em ni ang tih te chu ka rilruah alo awm a, ka lu chu ka han thing nawk nawk a, ngaihtuah loh tur thil bawk ka ngaihtuah leh thin.  Krismas urlawk zan chu chhungkuaa hman khawm mai mai ka duh a, thianhoa hmankhawm an tih pawh chu ka pha a, kum dangah chuan a phur ber ah tang in thiante huikhawm tu ber ka ni ve thin. Ka room ah keimah in ka awm a, hla ngaithla in ka hun hman chhoh dan te chu ka chhut ve neuh neuh a, hmangaihna kawnga ka vanduai bik thin chu a mak ka ti. Ka room kawngkhar chum dawt dawt thawm avang chuan ka hla ngaihthla ka chu ka han ti zawi a, lut turin ka ti zui nghal a, Mami chu a rawn khur lut beuh beuh a, ka pua sin lai chu pawt thla in a sin ta daih a. Ka chesawn peih lo tih hria in khum atang chuan min han hnuk thla leh kher a, a nui ar ar a, min tihhlim a tumna hmanrua tih ka hria, ka han nui lui sak a, “Hetia lunglenga inkhung ngawt ngawt te chu a dik lo, insiam rawh ka chhuahpui ang che”a ti a, “Ka peih thlawt lo ani min hrethiam mai teh Mam”ka ti a. Ka thawmhnaw bawm chu a hai rawk rawk a, “Ka thu hi I hnial fo mai a, ka lawm tawh lo, ka chhuahpui tho ang che”a ti a, ka hnial leh thei dawn chuang lo tih ka hria. Ka thawmhnaw chu ka thlak ta nge nge a, khua a vawh em avang chuan a scooty rawn khalh chu kan inah a hnutchhiah a, car la chhuakin kalna tur bik pawh hre lovin kan inkhalh chhuak ta a. Kawn chei thlir in kan tlan kual vel a, tlem in ka mood pawh a fuh ve ta deuh a, ina inngaihtuah ngut ngut ai chuan han tei chhuah chu a lo nuam a ni. Kan thiante chuan min rawn call reng a, Mami chuan pickup a ngai lo a tih deuh tlat avang chuan ka pickup lo vek a, a tuka min chhuahchhal tur chu ka huphurh ru lawk viau tho. Kan kual fe hnu chuan Mami chuan an ina kal lawk a duh thu a sawi a, an in lam chu kan pan leh ta a. Kan thlen chuan an in chu a lo reh thiap a, “Ka nu leh pa zaikhawmnaah an kal a, ka u an thiante nen an hmang dawn bawk si a, kan pahnihin kan hmang ve mai dawn nia”a ti a, a nui deuh har har reng a. Inchhung kan luh hnu rei vak loah phone a hmang a, min rawn melh leh ralh thin a, engemaw tak tih ruk tum a nei tih ka hria, eng tak nge tih erawh ka hre lo. Tukverh zawn sofa ah ka thu a, mahni in ang maia ka khawsakna hmun a nih avangin ka mu deuh nghal tawng a, motor light in parda a rawn chhun tlang pawh chu ngaihsak lem lovin ka phone a hla chu ka han play a. Doorbell rawn rik chuan Mami chu rang takin a tlan a, a va hawng vat a, kan thiante tuemaw ber an rawn kal ani ngei mai ti rilru chung chuan kawngkhar lam chu ka va hawi a, Zothansanga leh Mami rawn in zui lut ka hmuh ka in perh tho nghal zawt a, Mami chuan min siai zeuh a, “Dawrah ei tur ka lam dawn, lo inkawm hmasa rawh u”tih pahin a chhuak nghal daih a. Rin loh tak leh beisei loh tak hian kan in tawng leh nawlh thin, ka bulah a rawn thu a, ka hawi chhuak than gam mang tlat lo, ka thin a min hnawh ut ut tu hi a baw chhuak ang tih ka hlau ani. Zothana pawh nidang ang mai chu ani bik lo, “Rinte, I lo dam thin maw?”a aw chu a khur ve tlat, “Aw, ka dam alawm, nang zawk?”ka ti a, “I dam chuan ka dam ani mai”a ti a, a nui zui hak a. Sawi leh mai tur hre lovin kan ngawi dun vang vang a, chutah amah zawk chua rawn tawng chhuak a, “Ka ngai thin khawp mai che, hman atanga vawiin ni thleng hian ka rilru a I thawh dan chu a la ngai reng”a ti muang ban charh a. Ka heh chu ka pet fan fan a, “Min ngai ve thin em?”ka sam tla hniang chu a rawn zut a, ka lu chu ka bu nghat a, chutah a lamah min pawt hnai a, min kuah ta hle hle a. Engmah sawi lovin kan inkuah vawng vawng a, kan ngawih reng na pawh chuan thu tam a sawi si a. A kut zungtang chuan ka hmai chu a thai neuh neuh a, “Ka nihna ang ang hian ka hmangaih che, tute thusawi mai mai emaw vanga nang chan che hi ka duh lo ani. Ka la danglam lo ka tih kha I la hrereng em? Ka la danglam chuang lo asin, Pathian chu ka ni chuang hauh silo”a ti a, a hmaa ka thusawi hmang chuan min rawn ti let vel tih ka hria, ka lo nui hak a, “Kan nih nih ni mai tur hian kan nih ang anga nih zel I tum mai ang hmiang?”ngenngawl tak hian min melh a. Ka kuah nghet sauh a, a awm ah ka hmai ka phum a, “Zothan, ka tihpalh aw, ka hma ka lo sial em vang ani”ka ti a, duat takin ka hnung a chul heuh heuh a, “Kha mi I sawi hun kha alawm hei leh chen ka lo nghah.. Kan in tih nat tawn hian eng hlawkna nge kan hmuh le tiraw? Tunah chuan midang min ngaihdan tur mai mai ngaihtuah lovin kan hma hun tur ngaihtuah zawk ila, in hmangaih tawn tak inhmangaih hlei thei loa nun hman nan zawng hringnun hi a tawi mah mah ani. Kan hun tawn tur ang chu tawn tlang tawp mai ila, nang leh kei kan nih chhung chuan tute mah hian min tichhe zo ngai lovang”a ti a. A thusawi tlar tin chu dik ti em em in ka lo ngaithla a, hun harsa kan tawh ve te kha kan inhmangaihna ti zual tu lo ni zawk se ka ti a ni. Kawngka ri rak thawmah chuan kan inthlah vat a, Mami chu nui sung hian a rawn lut a, “Kan boruak a tha deuh em?”a han ti a, “Rintei hi a in duh lutuk a, kan be tawng hlei thei lo”Zothana chuan a lo ti a, Mami chuan ka hmel chu a rawn thlek ha a, “Awihawm loh ber e!”tiin a nui kur kur a.

“I hna hi bang daih la a tha ang”

“Ka ban daih te chuan thawh tur ka nei dawn lo asin”

“Ka bulah I awm tawh ang chu, mahnia thawmhnaw hak tur in zawn reng pawh hi a ninawm zozai ve tawh alawm”

“Nulat hi nuam ka la ti alawm”

Ka zak ah a rawn kheuh zawk a, ka lo eu dawrh a, “Vawikhatmah chutiang chu sawi tawh suh”a ti hmuk a. Ka nuihza chu ka la khur chur chur a, “A nuihzatthlak viau mi?”a tih chuan a kawngah ka han kuah a, “Nuihzatthlak loh e. I kianga awm hi a hlimawm, nun hi a hahdam”ka ti a. Awih loh hmel deuh tak hian a nui a, “Min bawl hnehsawh thei mai si a, I bulah hian thin pawh a rim thei lo chu anih hi”a ti a. Chutah thutak deuh zawk hian min en run a, “Enge ni leh ta??”ka ti a, “Sawina hun ani em tih chu ka hre lo a, ka fapa chungchang hi sawi ka duh a. A nu chanchin chu I hriat kha, engtikawngmahin a hnenah ka awm tir phal dawn lova, I tan phurrit a nih loh hram ka beisei”a ti a, “Engkim huam in kan kal tawh a, chutiang mai mai ah ka buai I ring em ni?”ka tih chuan, “Teuh lo mai, ka ring ngam che a, chuvang zawk chu ani”a lo ti vat a.

Kan veng chhung ah leh kan kohhran mi tam takin min sawi dan te chu ka hre lo ani bik lo, mahse engang pawhin min lo sawiin min lo dem mahse hmangaihna thiltihtheihzia an hriat loh vang chauh ani ang tih ka ring a, ka haw duh ngai lo. Pathianin thudik a hria a, thil dang mamawh ka nei lo. Hmangaihna kawng kan zawhna turah hian engkim huam in thutlukna kan siam tawh a, a tawp pawh kan thleng mai ang tih chu ka ngaihdan nghet tlat ani a, harsa lai a lo awm anih pawhin beidawng lovin kan bei zel anga, pahnih chu pakhat aiin a chak zawk em em ang tih chu ka ring a ni.

“Rinte, Zothana nupui khan pasal a um daih a, a uire na pa kha ala ni lo lehnghal a”Mami chuan phone a mi rawn biak tum in Lungleia a cousin hnen atanga a thu hriat chu min rawn hrilh ve a, ka thaw hawk a, ka sawifiah thiam chiah si loh hian nuam tih ruk veng veng na chu ka nei a. Chumi hnu lawkah Zothana pawhin palai a rawn tir a, ka venthawn ruk thil chutia thawklehkhata a kiang duak chuan min ti hlim viau na a ka sawi chhuak lem lo. Zanah chuan a rawn leng a, ka lo fiam hlut a, “I rilru ana em?”tia ka zawh chuan a ngaihna hre lo zet hian min en a, “Pasal um an awm an ti si a”ka tih chuan rum zet hian min melh a, “Nang ang em em chuan ka tuar na lo aniang, ka mittui a tla ve lo tlat”a ti hmak a. Ka nui tih a hriat chuan min han sik zeuh a, “Rinte, kha pa kha chu tun thleng hian ka la thik”a ti ta thlawt a. Mapuia a sawina tih ka hria, kha pa tluka natpui kha ka nei tlat lova, chumi vang chuan ka hmangaih ber tihna phei zawng ani hauh lo, “I number ka trace vanga min hua anih pawhin pawi tihna ka nei lo, kha pa nen in inbiakna ka hmuh apiang kha ka na ngawih ngawih thin. Thil diklo ani tih hrereng chung khan ka bansan thei tlat silo a”a ti a. Ka han kuah a, “Tunah chuan ka tana mi pawimawh ber ka tawng tawh che alawm, hun kal tawh chu hun kal tawh ani a, tun hun hi a pawimawh zawk chu ani alawm”ka ti a. Dik tih hmel tak chuan min thlek a, a then ta sak a. Inneih hun tur engkim ruahman fel vek ani tawh a, Zothana pawh mamawh lam khawmin Aizawl lamah a awm deuh chawt a, a fapa nen pawh kan inpawh ve tawh hle a, naupang duhawm tak mai hi a ni reuh a, ka la hlimpui dawn chauh tih pawh ka hria. Hei hi ka khawvel thar chu a ni a, ka khawvel thara mi pahnih rawn cheng ve te chu ka tana mi bik an ni a, an lak atang hian thihna chauh lo chuan min then hrang lo se tih hi ka tawngtaina a ni.