NGURTHANPUIA

NGURTHANPUIA

"Awi a goal ang tih ka hlau emai, ka en ngam lo" tih pahin ka thiannu Makimi chuan ka awmah a hmai a rawn phum a, kei chuan ka hmu lo ang tih hlau em em in ka lo thlir thung a, thin a phu dep dep a, hamrik a ri a, ball a thlawk fua a, kan zuang suau a, keeper tha leh rintlak zet, ka hmangaih ni bawk Thanpuia chuan a lo save a, kan chak zui nghal a. Kan khua leh a chhehvel inelnasang berah a vawikhat nan kan champion ve ta. Kan hlim a, kan lawm a, kan sapatal ani ber e.

Naupang te kan la nih laiin ka pa hnathawhna avangin thingtlangah kan awm a, khawpui nun nen chuan a lo inpersan a, a tirah chuan ka nung thiam lo lek lek fova, mahse kumkhat dawn kan awm hnuah chuan a nawmna ka pawh ve ta. Thian tha leh fel tak tak ka nei chho a, khawpui ka ngaihna pawh a bo ve zel a, thingtlang naupang dik tak ka ni ve ta. Sikul chawlhlaia thing phurh te chu nuam ka ti thei em em a, ramhnuaia thawmhnaw su tura kal mawlh chu ka thlahlel a, inrinni ka nghahhlelh chhan pakhat a ni thin. Kum alo vei ve zel a, high sikul ka kal meuh chuan ka taksa lian hle tawh a, thuante zingah pawh ka dawk a, ka tleirawl ti a chhuak a, ka nu ang maiin vun paw no chek ka nei ve a, nuam ka ti in ka inchhuan ve na ber a ni hial a ni. Kan chhungkua hi paruk kan ni a, ka nu leh pa leh kan unau pali kan ni a, unau ah hmeichhe awmchhun leh a naupang ber ka ni a, ka u te pahnih erawh Aizawl lamah ka pi leh pu bulah sikul an kal a, ka u chiah pawh matric a passed hnu in a awm phei ve nghe nghe a, ka nu leh pa nen kan pathum chauh in kan khawsak chhunzawm ta zel a ni.

Keipawhin pawl kua ka zir ve tan a, high sikul naupang han nih takah chuan kan in ti nula ve tan viau mai. Ka thiannu Makimi tih loh chu han kawm zui tak ka nei vak lova, ralkhat thian erawh ka nei nual thung. Nikhat chu vengchhak lamah tihtur pawimawh ka neih avangin ka kal a, field ah huan inkhel antam thin avangin mahnia kal hi ka huphurh hle thin. Makimi hman remchan loh avangin keimahin ka kal a, ka hlauh ang ngeiin field ah chuan an lo tam leh hle a, tleirawl leh tlangval an lo zi nuai nuai a, kun deuh chal in ka kal zel a, vawilehkhatah ka hmaiah ball a rawn thlawk fua a, ka thal nghal der mai. Thawh ka han tum a, ka luhai deuh avangin ka tho mai thei lova, hmanhmawh deuhin mipakhat hi a rawn tlan phei a, min kaihthawh pah chuan,"Ana em? A zialo hle mai" a ti nghal mawlh mawlh a. Ka han hawi kual a, min lo thlir thap a, a then chu an lo nui bawk a, ka zak lutuk chu khuk ral daih ka chak ber. "Na i nei em?" Min kaitho tupa bawk chuan a han ti leh a, "A...aih..." tih leh in lam pana kal ka rual nghal a. Ka thil tihtur pawh ka hrechang tawh lo, in ka thlen chuan ka mittui chu a rawn tla zawih zawih a. Khatiang taka zahna kha ka la tawng ngai lova, thleng lo tura ka duh thin ngei chu a lo thleng a ni si a. Mahse chutih lai chuan min kaitho tu aw ri erawh ka beng ah a cham reng a, ka kalsan laia hrilhhai taka min melh chu ka mitthlaah a cham reng bawk a. Mipa ka vawikhat hmuhna, chupawh a hmel chianga ka hmuh hman loh chu ka vei zui ta reng a.

Kan khua hi thingtlang khuaah pawh a lian pawl tak a ni a, high sikul atanga higher thleng awmna hmun a ni. Vengchhak leh vengthlang kan awm a, kan intlawh pawh lutuk loh avangin hriat ka nei tam lem lo. Sikulah chuan ka chetchhiat thu Makimi ka hrilh mawlh mawlh a, a nuihza insum vel ka hmuh chuan ka thin a ur hle a. Mahse anihna takah chuab keipawh nuihzat lamah a kal tawh a, ka zahna erawh ala bo chuang lo. Chhun chawlh ah zung turin kan chhuak a, higher ho hi kan thlangah an awm a, field erawh kan intawm a, chhun chawlh laiin high sikul nen an inkhel thin a, a chang changin kan en ve thin a ni. Zun in atanga kan let leh dawn chuan Makimi chuan inkhel en lawk ang a ti a,ka lo hnial lem lo. Kan class ho leh pawl sawmpakhat ho an lo inkhel mek a, pawl sawmpakhat hmeichhe ho chu an lo tangin an lo au nasa hle a, ka han kawi kual a, ka mit ka tak mai thil ka va hmu a, engdang ni lovin lehlam keeper chu ka tluk ni a min kaithotu ngei kha a ni. "U Thanpuia chu hetah a lo lut reng ani maw? Ka va hmu ngai lo em em" Makimi chuan a ti nuah nuah a, hriatchian ka chak a, ka zawt hreh deuh bawk si. "Tu Thanpuia maw?" Ka han ti hram a, "I hre vak lo maithei, Government Middle school lamah a lut thin a, high sikul kha Kolasib ah akal daih bawk sia, inkhelh hi atchilh a, a pa hian a phal silo a, chuvang ania Kolasib ah pawh an dah daih" a han ti ta duah a. Ka rilru chuan Thanpuia hming chu ka lo lam ve sap a. Sir Biaka'n text bu a explain mawlh mawlh a, ka zirlaiah chuan ka rilru a awm lo, pian zei leh sang thlarh mai, hang ngaihnobei zet, keeper hmuhnawm em em mai Thanpuia ngawt chu ka rilru ah a lian a. Engtikawng emaw tak chuan hnaih ka chak riau a, tumah hrilh ngam erawh ka nei lova, ka thiantha ber pawh ka hrilh ngam lo.

Thla khat alo vei leh meuh chuan sport kan nei dawn a, kum dang ang lo takin high school leh higher chuan sport kan hmang tlang dawn a, group ah insiam in kan in thlan pawlh a, Makimi nen kan awmna a in an loh avangin ka hnual rawih a, kan group leader hming ka hriat erawh chuan min ti phur viau thung; chu chu tudang ni lovin Ngurthanpuia ngei a ni. A mize cool raih leh a pian sang thlarh mai te, mi in vawngfel tak tih hriat tak maia a fai sar reng te chu hmeichhe dang pawhin an lo hmuh hmaih hauh lova, a luck zia chu tu hrilh chhawn mah ka mamawh lo. Hmeichhe volleyball ah ka tel dawn avangin kan practice ve tlauh tlauh a, kan ban hnuah keimahin ka haw a, school field atang ka chhuak fel chiah chu Thanpuia leh Maria-i canteen atanga rawn in zui chhuak chiah hi ka hmu a, ka kawng kal lai hi ka zawi nghal hnawk thei. An ni tluka inhmeh tur chuang an awm hauh lo anga, mahse sawi thiam chiah silo hian ka thinlung hi chemtea vih ang maiin a rawn na zawk a, Thanpuia chuan min rawn hmuh chuan a nui sak a, nuih let pawh ka tum hran lo. An bul ka va thleng tur chu ka tha a khur der der a, let leh mai te ka duh hial a, a tih chi tawh si lo.

"Hmanni tlai kha pawi ka ti lutuk a, ka tihpalh tih pawh ka sawi hman ta silo a, i tha zel maw?" A ti a, a nui sang a. Maria-i chuan mak tih hmel zetin min lo en tawn zak zak a, "Aw tha lutuk e, engmah a nih loh kha a ho lutuk" ka ti a. Za lo fahran in ka han then lui a, ka kal nghal a,Maria-i nui ri ka hriat chuan Thanpuia'n ka tluk dan a hrilh ni ngeiin ka hriaa, an nui ri pawh chu keinah min deuhna ri ni tlata hriatna ka nei bawk a. In ka thlen chuan ngawi rengin room ah ka lut tlang a, ka engtihmah chu a tui lo. Ka lo muhil ni ngei tur a ni, ka harh chuan khua alo thim vek tawh a, ka tho vat a, ka nu leh pa chuan chaw an lo ei mek a, "I chau deuh anih kan ring a kan kaitho duh lo che a" ka nu chuan alo ti a. Thleng ka la a, ka ei ve nghal mawlh mawlh a. Kan eikham a thleng ka sil zawh hnu chuan ka inbual a, tawng ri nawk nawk thawm ka hriat chuan Makimi alo kal tih ka hre thei nghal a, hmanhmawh lo zetin ka che a, kawngka a rawn chum ri bur a, "Rawn chhuak vat rawh, chuti em em a inbual a ngai lo" a ti a. A nui har har a, keipawh rei awm tawh lovin ka zo ve mai a. Room lam ka pan a, min rawn zui nghal a, "Za-mawi(Kan inkoh ve dan ani, ani pawh hi Za-kim tiin ka ko ve bawk a) field bulah min lokal lawk teh, keimah chuan ka ngam lo a" a ti a, "Ninawm.. Enge i tih dawn?" Ka lo ti bak deuh hlar a. Min han nuih tlawn zet a, "Apa in min tir a, tlaia kal tur kha ka nia ka lo theihnghilh daih a" a ti a. Ka inthlak fel hnu chuan kan inzui chhuak ta hnak hnak a. Field bulah hian dawr aawm a, Pu Finga dawr kan ti mai a, tlangval thutkhawmna ber a ni a, chaweikham lai phei chuan an tam thei hle a, kaltlang a huphurhawm thei hle reng a ni. Kan va thlen pawh chuan kuhva leh zial lei an lo tam leh tawh hle a, kan kal pelh dawn lai chuan Thanpuia chu dawr atang a rawn chhuak chiah a, "Makim khawnge in kal dawn a?" A rawn ti a. Makimi chuan,"Pu Chawia te inah lehkha lam lawk a ngai a, ka u ten an lo thawn ani awm a. Nang zawk nula i rim dawn mi" a ti a, a nui leh har har a. Ka bulah chuan a rawn kal ve nghal a, "Rim tur pawh kan hriat ve si loh... Tunge i thiannu hi a hming?" A ti nghal zat a. Makimi chuan ka banah a rawn vuan a, "Ka bestfriend anih hi, Za-mawii.. ohh.. Mawimawii anih hi, a chhelo ania aw" a ti a. A kut chu ka lo hmer sawk a, hria ang pawhin a awm chuang lo. Thanpuia chu a nui a, "Anih chu lo in chibai ila, Thanpuia ka nia" a ti a. Kan han in chibai lawp lawp a, a kut chu a lum thar thar a, kei erawh inbual zo hlim ka ni bawk a, ka kut te chu a vawt hle. Amah vek chuan,"Kan group a i awm chu ka lawm khawp mai, i volleyball beng kha ka lo en che a, i thiam hle mai" a ti a. Chhan naihna pawh ka hre lo, ka nui ve mai a. Mahse chutia min lo en reng tih ka hriat chuan ka zak hnuhnawh viau a, mahse min lo en tih ka hrelo chu ka lawm viau a, hmu ila chuan ka khawr leh vek ngei awm si. Kan kal tumna kan thlen avangin kan pensan ta a, Pu Chawia te in kan luh dawn chuan ka va hawi let a, Thanpuia chu a lo hawi ve chiah a, a nui sak a, ka han nuih let ve a, nuam chu ka ti ru veng veng.

Sport pawh kan zo dawn tawh a, kan group kan che tha a, Thanpuia chuan min uap hneh a, kan inlungrual a, nuam kan ti tlang hle. Volleyball kan khelh dawn chuan Thanpuia chu arawn kal a, "Makimi te house kan tum dawn a, hei kan tan ve dawn chiah bawk sia, ka lo buaipui hman dawn lo cheu a, mahse ka ringtawk cheu a, tha deuhin ti ula, keinipawh theihtawp kan va chhuah ang" ati a. Ka bulah a rawn kala a, "Goodluck" zawi sap chuan a ti a, "Nangpawh le" ka ti a. A nui ver ver a, a kalsawn ta a. Kan inkhelh chhung chuan theihtawp kan chhuah a, harsa lo takin blue house chu kan hneh in kan champion a. Thanpuia te inkhel en turin kan tlan nghal a. Kan va thlen chuan Makimi pawh alo au lauh lauh a, goal ala lut lo ve ve a. Kan house awmnaah kan thu a, ka thianteho chu an au pawr nghal hle a. Kan thut hnu rei vaklo ah kan pawl chuan an pet goal a, kan au ring kher mai. Ral atang Makimi chu ka va au a, hawi pawh a rawn hawi tha duh lo a, ka nuih a za hle. Hun a tawp dawn tawh a, hun pekbelh an hmang mek a, vanduaithlak takin kan defence Rema chuan penalty a chawi ta hlauh mai. Thawm reh vek tawh lehlam pawl chu an rawn phur thar hle a, Blue house captain Kima arawn pen chhuak a, Thanpuia chu kan thlir ta thap a. Ka thaw dep dep a, mahse kan chakna ni turin mawi takin alo dang pial a, hun atawp zui a, khuang nen kan ri dup dup a. House champion kan ni chiang tawh bawk nen, mimal tak pawhin nuam ka ti ve hle a ni. Ka hawi kual a, Thanpuia chu ka zawng ru deuh a, a hmel hmuh tur erawh a awm lo. Nakin deuh ah chuan Maria-i nen an rawn phei chu ka va hmu fuh a, ka boruak chu an thlak danglam chiang hle.

NGURTHANPUIA-II

Sport a zova, kan house chuan champion lawmna neih kan tum a, ka phur lo hle. Kal loh chu ka han tum zet na a, kal kim vek tur an tih tlat si avangin ka tum leh hnuhnawh a, Makimi awm lo bawk nen, ka phur lo takzet ani. Kan Principal te huan chu kan dil a, alo remti a, hmun nuam leh rem tak ani a, picnic nan an hmang fo thi nghe nghe. A then in tui an cheng a, ka kawm ve deuh ber Siami nen chuan rawngbawlna lamah kan awm a, Thanpuia chu a rawn kal ve a, min rawn be bawrh bawrh a, min hnai pauh leh ka na ting mai si. Ka hlauh ruk an ngeiin Maria-i chu arawn lang ve vat a, rei vaklo hnuah an chhuak zui nghal a. Siami chuan,"Maria-i boruak han ngam zia hi chu aw... khati khawp khan Thanpuia kha a duh lo thin ania, tunah lah a ti leh hiam hiam a" a ti bawrh bawrh a. Ngawi rengin ka lo ngaithla a, Thanpuian a hma atang daihin Maria-i chu alo duh tawh thin tih ka hriat phei chuan ka thik ngut ngut a, mak ka in ti hial zawk. Chawei hma chuan an kal darh pheuh pheuh a, keinipawh in chiah dai turin tuikhuah awmna lam chu kan pan a, khaw awmdan chu a lunglenthlak hle lehnghal, Siami chu an rawn ko a, a kal nghal vat a. Keimah in ka thu a, Makimi ka ngai kher mai.

Siami chu arawn let leh mai tak loh avang chuan huan chu fan kual mai mai ka tum a,ka kal a, thlam chhak deuh ka thlen chuan an lo thu bial laih a, zu an in hi a lo ni a, hmeichhia pawh an lo awm vr nawk mai. Mak ka ti hle a, Thanpuia hmel erawh ka hmu lo. Ka kalsawn nghal vat a, haw vat chu ka chak ber tawh. Ka kal kual fe hnu chuan thlam lamah let ka tum a, thawklehkhatah thawm ri ka hre thut a, ka piah deuh ah chuan Thanpuia leh Maria-i chu an lo in kuah a, an lo in fawp dun mawlh mawlh a. Ka mit ka hup a, ka tlan ta vang vang a. Ka thil hmuh chuan ka awm a ti nuam lo zual a, thlam ka va thlen chuan tumah an lo awm lo. Ka bag ka la a, ka haw ta vangvang a. Ka dawih thin tehlul nen engma hlauh nachang pawh ka hrelo, in ka thlen chuan khua a thim zui nghal a. Ka nu leh pa chuan kan hun hman nawm leh nawm loh te min lo zawt a, ka aw liam ve ta mai mai a. Room ah ka lut a, ka mu nghal hmak a, ka rilru puthmang hi kei ngei pawhin ka duh lo, mahse ka in thunun thei bik silo. Ka chan loh tur buaipui reng chu hrehawm ka ti a ni.

A tuk tlai kan school bang chu kan school piah ah Thanpuia chu a lo ding reng a. School form a ha lova, inkhelh tum a chhuak anih ka ring. Min rawn hmu lem lo niin ka hria a, Makimi chu a titi lehbawrh bawrh a, "Za-mawi..." Makimi nen kan hawi rual thawt a, Thanpuia ngei a ni. A nui ver ver a, a bul chu kan tgleng chawpchilh nghal a, "Niminah tinge ngawi renga i haw daih a?" A ti a. Chhan mai dan tur ka hre lo hle a, "Nia.... ka lu a na lutuk a" ka ti a. Awih hmel loh deuh hian min melh a, "Mahnia i haw kha chu i ti awm ang lo khawp mai. Ka hlauhthawnzia chu, engemaw lo tawk palh ta la...." a ti charh charh a. Kei hi min lo ngaihven ve amaw? Ka awm loh pawh a hriat ka rin lo tehlul nen., "Mahse him takin ka thleng alawm" ka ti a, ka han nui lui ve sak a, a nui ve hauh lo. Uluk takin min en kara, ka zam lek lek, "Kan kal mai ang aw" ka han ti a. A tawlhsawn deuh a kan kal zui nghal a. In ka thlen hnu chuan Thanpuia khawsak dan chu ka rilru ah a awm ve reng.

Exam a hnaih tawh avangin keipawh ka zir ngawrh ve tawh hle a, sikul kan chawl tawh a, ka chhuak lutuk ngai lo. Chawlhni ah chuan inkhawm turin ka insiam a, Makimi ka nghak a, anau inkhawm kal tur chuan a pum nat vanga a inkhawm dawn loh thu arawn sawi a, mahniin peih lo zetin ka kal ve ta nghal a. Banah chuan in lam ka pan nal nal a min lo ko tu an awm tih pawh ka lo hre lo. Ka banah min rawn vuan a, Thanpuia bawk chu a lo ni. Ka hamhaih deuh hlek tih a hmuh chuan a kiai sak a, "Inbia ang" a ti a, "Eng thila maw?" Ka lo ti let hu a, "Min lo zui phawt mai rawh" a ti a. Mahse chuti maia kal chu ka tum lo, "A chhan sawi phawt rawh" kati a. Ka kut a vawn chu ka phelh bawk a, "Hmeichhia zawhna ngah tak hi ka ngaina lo viau ania" a ti hmak a. Amah vek chuan, "Ka nawr lui lo ang che, i duh loh chuan ka thil sawi tum hi sawichhuah a tul lo ah ka ngai ang" a ti a. A chetdan leh a mizia te chu pa hliah hliah hian ka hria a, rei vaklo ka inngaihtuah hnuah ka zui ve ta nge nge a. Makimi te in kan pan tih ka hria, enge kan tih dawn erawh ka la hre lo. Makimi chu sitting room ah alo mu a, min hmuh veleh a lo thu chhuak a, a lo nui har har a, "U Thanpui, engmah ka la hrilh lo tak tak ania aw" a han ti a. Ka thiannu thusawi awmzia chu ka man lo hle, "I fel lutuk e. Thingpui kan hlawh dawn em?" A han ti zui nghal a, "Dawn lutuk chhang ka va lei lawk ange" tih leh chhuah a rual nghal a. Bangbo zetin ka lo thu ngawi reng a, "Za-mawi... hei hi hrilh che ka duh a,ball in a per tlai che kha ka hmuh hmasak ber che a ni a, chuan vawiin ni thleng hian ka rilruah i awm reng chu anih hi" a ti a, "Bialnu i nei reng sia" ka ti a, "I hre sual a nih ka ring" a ti dam thlap a, "Hre sual lo ang, kan champion kan lasm tlaiah pawh Maria-i nen ka hmu cheu" sawichhuah kher pawh ka tum lo asin, ka sawi hman tawh si, a hmel chu a inthlak danglam deuhin ka hria, "I ngaih ang kha ani lo ania" a ti a. Mahse ka hmu chiang ve em a, ka tlawm duh bik lo, "I luck vang hian i duh duh i kawp thei ah in ngai ngawt suh aw" ka ti a. A lawm vak lo in ka hria, "Chutianga tih theih tawk lekah chuan i in ngai em ni?" A ti let thung a. A mitah ka en kal a, "Ka nih loh vang zawka sawi ka ni" ka ti a. Ka bul chetah arawn tawlh phei a, ka darah nghet zetin min rawn chelh a, "Min ti a thei takngial dawn, ka rilru puthmang hi ka duh ang tawka sawichhuah theih ka chak asin. Mahse ka hmuh che hian ka sawi duh hi an bo leh thin, mahse hei erawh hria la ka duh, ka duh takzet che a ni" a ti a. A kut khur der der chu ka hria, "Maria-i kha?" Ka ti sap a. Min thlah a, in thunun theih hmel zet hian a thu leh tawh a, "Ka bialnu a ni lo, theihtawp chu a chhuah ve tih ka hria, mahse ka thinlungah hian a thi tawh a ni. Tun hnuah sawi chhuah leh pawh ka duh lo" a ti a. Min en a, hnuai lam ka bih vat a, "Ka laka i rilru puthmang hi ka hre ve duh ani" a ti a. Makimi chu a rawn lut a, "Ka rawn let hma mah mah em?" Arawn ti lut a, "I mawl thei emai mi thil pawimawh sawi laia lo haw te chu a" Thanpuia chuan a ti a. Makimi chu a nui hawk hawk a, min en a, "Za-mawi, thingpui va lum ve thung teh" a ti a. Kal ka tum a, Thanpuia chuan ka banah alo vuan a,"I zak lo mi Kimi, va lum rawh. I inleng kan nih hi" a ti a. Makimi chuan a hnar a han tum a,"Awi.... Ngurthanpui, i va han zaklo zawk tak" a ti a. A kal ve mai a, Thanpuia chu ka en a, a vei nuih seih a, a tha chiang hle ani hepa zet hi chu! Inrinni zan lama inkhel anrawn highlight a, kan en a, "Eng club nge i tan?" A ti a, "Ka en ngai lo hrim hrim a tumah pawh ka tan lo" ka ti a. Ngaihtuah chhuak thut niawm takin a rawn hawi ha a, "Min la chhang ve lo" a ti a, "Eng chu maw?" Ka ti a,"I rilru....." a ti a. Ka hmui ka lo ti pawrh a, "Ka hre mai mai lo" ka ti a. A nui chhuak hawk a, "I hriat hma chu ka nghak char char ang che" a ti a. Ka thinlung chu a nui ver ver mai.

Hun a liam ve zel a, exam pawh kan zo tawh a, Thanpuia pawh kan in hmu ve fo a, chhanna la pe lo mah ila ka hnar lo ani tih a hria a, hlim takin hun kan hmang ve thin. Nikhat chu an inkhelh banah a rawn kawi a, thingpui ka lumsak a, "Za-mawi... school hi chawlh mai ka duh" a ti a. Phawk fe hian ka melh a, "Engvang chuan maw?" Ka ti a, thingpui chu a han lem khalh a, "Ka tui thlawt lo a ni" a ti a. Mahse school chawl ngawt se enge a tih ang, "I chawlh te chuan enge i tih chuang ang?" Ka ti a. "Aizawlah ka cousin hian an team zawm turin min sawm a" a ti a. A kal tak tak ang tih chu ka hlau hle a, "Kal i tum amaw?" Ka awki chu a ring deuh hlek a, min en ha a , "Pawl sawmpahnih tal pass phawt la tiraw?" Ka ti a, ka tlawn ani ber zawk, "Ka inngaihtuah nasa, ka lo inngaihtuah tha leh ang" a ti ta a. Dawhkanah chuan ka kut ka nghat a, ka kut chu a rawn hum a, a hum pil hneh hle, "Za-mawi" "Umm.." "I rilru tur chu ka hre tho a, mahse ka tui na kawng hi zawh ka chak ani. Ka la hlawhtling ve te anih ngai chuan chhuang takin min thlir thei dawn ani" a ti a. "Tunah pawh ka chhuang lutuk che alawm, Thanpui(U a duh loh avangin ti hian ka ko ani) i awm loh te chuan engtinnge ka awm anga, ka ngaina che, ka duh takzet che ani" ka ti a. Mak ti takin min en a, "Enge i sawi tunah khan, han sawi nawn leh teh" a ti a, "Ka duh che" zawi sap chuan ka ti a. A tho , ka hnunglam atang min kuah a, "Kha thu kha i sawi hun alawm ka nghahhlelh em em" a ti a. Ka biangah min fawp zeuh a, "I rilru thlak ngai suh ang che aw" a ti a. Ka lu chu ka lo bu nghat nghat a.

NGURTHANPUIA-III

Hun leh ni te an ral ve zel a, pawl sawm ka zir ve tawh avangin Thanpuia nen pawh kan in hmu tam thei lova, chawlhni zan inkhawm banah erawh a rawn leng deuh ziah a, ka pa nen inkhel an en thin. A chang chuan ka mutsan daih a, ka chhungte nen an inkawm thei viau a, a chang chuan ka ti tau der hial thin. Kan khua leh a chhevel ah football tournament lian tham tak kumtin hian aawm ziah thin a, kan khua pawh chu tel turin an inbuatsaih a, Thanpuia pawh captain atan an ruat a, khawdang an champion kim deuh thawtawh laiin kan khua erawh kan la champion ve ngai lo. Sikul kal ka ngaih avangin ka en tam thei lova, Thanpuia te pawh an la che tha tluang zel a, final an luh chuan sikul chawl a en ka tum ruh ve hle. Vanneihthlak takin final an in pet kai ve a, kan khaw mipui kan khur a, sikul pawh an khar hial a, field ah khuang nen kan ri mup mup a, an inhnehtawkin thin phu a rang leh zawih zawih thin. Hun tawp thlengin goal a lut lova, penalty hmanga chak zawk zawn a ngai ta. Ka rilru in ka tawngtai mawlh mawlha, Thanpuia chu a zam ang tih ka hlau takzet a ni. Penalty pet turin lehlam pawl a rawn ding a, awlsam tein a ti goal a, kan pawl atang Dina a pen chhuak a, a goal lo hlauh lehnghal. Lehlam an thawm aring thei hle a, amaherawhchu a tawpah hlim hmasa zawk a lungngaiah an tang a, Thanpuia chuan vawi li lai lo save in kan khua chu min champion pui ta ani. Thanpuia thiamzia chu akhaw phum ah a khat a, Inkhel thiam tia kan sawi thin U Dina te ho a luahlan ta vek mai. Hemi tum hian Aizawl lam atang football hruaitu zinga mi khuallian ah an sawm a, Thanpuia chezia chuan a mit a la ngang ni tur a ni, av venga khel turin a sawm a, mahse Thanpuia pa chuan aw a pawh duh chiah lova, ani chuan lehkha hi zir zel phawt se a duh a ni. Chawlhni zan ani a, Thanpuia pawh alo leng a, ka pa nawmsam loh avangin inkhel a en pui peih lo a, a mu a. Kan pahnih chuan kan en a, mahse a rilru ah kan thil en chu a bet vak lo niin ka hria, "Za-mawi..." ka mitah min en a, "Aizawl kal chu ka tum tlang ta mai" muang charh chuan a ti a. Anihna takah chuan Thanpuia hian a tuina kawng a zawh hi ka dal duh hauh lo, mahse kan pahnih inkar min pawt hla tu anih ka hlauhna hian min hneh em a, ka phur pui thei lo a ni ber. "Ka pa chuan remti lo mahse ka nu in min support a, chuan ....." a chawl dat a, "Nangpawh hian min support ka ring" a ti a, "Thanpui... engtiklaimah in i kawng daltu nih ka duh ngai lo. Mahse ka hlauthawng ani, hmun hran a i awm chuan kan inkar hi a chhiat phah ka hlau a ni" ka ti a. Ka bul chetah arawn thu a, min kuah a, "Chutiang chu ngaihtuah pawh ngaihtuah tawh suh, ka hmangaih che a, kalsan leh mai mai turin ka kawp lo che. I rinawm chhung chuan kei chu ka ngaihtuahawm ngai lo ang" a ti a, "Ka la hlawhtling ve te anih ngai chuan nuamsa takin ka siam che anga, ka tuina ber anih avang pawhin ka hlim lehzual ang tih hi ka hrechiang a ni" a han tih zawm a. Ka kut chu a khal niap niap a, "Ka ngai dawn lutuk che, lehkha pawh ka zir tha thei dawn mi?" Ka ti a, ka mittui chu atling pam a, duat takin ka mit chu a fawp zeuh a, "Nangpawh tha deuh a i zir angai alawm, kan hlawhtling ve ve anga, kan fate nuamsa takin kan dah thei dawn alawm" a ti a. Amah vek chuan,"I pass chuan i pa in Aizawl ah i zir zawm a tih kha, reiloteah kan awmdun leh vat thei dawn alawm" a ti a. Chu chuan tlemin min ti hlim ve ta deuh a. A haw dawn chuan pawn thleng ka thlah a, "Va lut tawh rawh ka lo thlir ang che" a ti a, keiin kal hmasa turin ka ti ve thung a, min nawr tlat avangin luh chu ka tum a, kawngka ka vuan chiah tih ah chuan min pawt her thut a, kan mit leh mit chu a in tawk a, a san em avangin ka chhoh en ha a, chu thla eng hnuaiah chuan lungchim takin kan in fawp ta vawng vawng a.

Thanpuia pawh Aizawl lamah a kal tawh a, ka lung a lengin ka ngai thei em em a, phone ka la neih lohavangin ka pa phone ah min rawn be thin a. A changin katahlhum a, a mamgang thei hle a, ka lo haw mai ang a tih in ka phal chuang bawk silo. Pachang taka awm turin ka in fuih mawlh mawlh thin. Ka zirlaiah theihtawp ka chhuah ve a, selection exam pawh tha takin ka passed ve a, kan lawm hle. Kan exam chawlh lai chuan Thanpuia a rawn haw a, karkhat vel chawl turin, kan in zui chawt a, Makimi chuan ka hmel pawh a thar sawr sawr tiin min sawisa fo a, anihna chen pawh a awm ngei ang. Rei awm thei anih loh avangin a chhuk leh vata, tlemin ka khawhar lutuk pawh a ziaawm ve tawh. Ka zirlaiah pawh thahnem ngai takin ka zir ve thei a, khawkhatah kan la awmdun vat dawn tih ka ring a, chu chuan min ti phur a ni. Hlim takin Krismas te pawh kan hmang a, kum alo thar chau emaw kan ti laiin exam alo hun der a, thla khat dawn exam ka neih hnuah pass un ring ve takin ka zo fel ve ta. Ka thawveng a, nuam ka ti a,Thanpuia nen pawh zantin kan inbe leh thei a, chubaka nuam tih ka nei ngai lo. Aizawl lamah keipawh ka awm a, kan veng inhlat hle mahse Thanpuia chu hunawl a neih apingin alokal a, ka pi pawhin a ngaina hle a, hmanlai thil a sawipui peih a, ka pi chuan fel a tihzia a sawi chamchi a, ka u te nen pawh an inbe tam lo na in an in ngaina der ve viau a ni. Makimi pawh a nu damloh avangin Aizawl ah an rawn kal a, damdawiin ah an lo admit avang chuan keipawhin ka riah pui ve thin a, sunday zan  a ni a, Thanpuia chu a thianpa nen an rawn kal a, Makimi chu a lo ri chul a,kan hlim hle. In kan hun a tawp tawh avangin haw an tum a, pawnah chuan kan thu a, "Za-mawi, thu lawmawm deuh hrilh tur che ka nei a" ka beng bula chuan a rawn ti a, "Enge?" Ka tih chuan ka kut a la a, "Mizoram aiawhin ka chhuak ve dawn a, vawiinah ka hria a,hrilh hmasak ber che ka duh si a, ka chhungte pawh ka la hrilh lo" a ti a. A biangah ka piai a,"Ka lawmpui che.... I thei tih ka hria alawm" ka ti a,"Nang leh ka nu awm lo ula tun hi ka thleng lovang, ka lawm e aw min rin tlat vangin" a ti a. Thla chu a eng nuam hle a, kan thlir dun vang vang a, "E taka hei hi nei rawh" tih pahin a phone chu min pe a, "Engvang ngawtin maw?" Ka ti a. A phone chu a rawn phawrh a, "Hei ka nei alawm, kha kha ka dawn ania,i tan liau liau ka lo dah anih kha" a ti a. Phone thar tha tak chu ka kutah a rawn hmehbel nghal a, "Min pek dawn rau rau chuan a hlui kha ka lo hmang ang" ka ti a. A nui mai a, "I inhmeh zawk alawm... sim card ka vuah sa ania aw, chuan min rawn biak fo nan ka ti ania, lunglengin min siam suh" a ti a. A biangah chuan ka fawp zeuh a, a hmui a rwn dawh a,a malah ka beng a,"I sual... tak hian ka duh zawk" a ti a. Ka hmui ka tih pawrh khum a, a nui ta hawk hawk a. A thianpa chuan a nghah ve reng avangin an haw ta a. Makimi hnenah chuan ka phone thar te chu ka han show a, "Za-mawi, i vannei dawn chuh niin ka hria" a ti a. Ka ngawi vang vang a, "Za-kim...." "Eih..." min en miah lo chuan a han ti a, "A chang chuan ka hlauthawng ngawih ngawih thin" ka tih chuan min en ha a, "Engvang ngawt chuan maw?" A ti a, "Thanpuia hian min kalsan ang ti ka hlau, khawpuiah phei chuan chhelo an tam si" ka ti a. A dar a han san ak a , "Thanpuia hi ka hrechiang, rilru nghet tak a nia, chutia midang ti kual zung zung chi ani lo, chu lo rengah i chhelo tihhi hre ringawt rawh" a ti a. Kan nui dun ta har har a.

Kan result a chhuak a, keipawh tha takin ka passec ve a, Aizawl ah ka zirna chu chhunzawm turin ka in admit fel a, ka thiannu Makimi pawhin a chhungte a dil nasa bawk a,an remti ve ta hram a. Govt. Mizo higher ah kan in zui kumtluan leh dawn a ni. Kei chu k pi te bulah ka awm a, Makimi erawh private hostel ah a awm thung a. School kan tan ni chuan Thanpuia te an lo haw a,an champion avangin hmuahna te neih ani a, school ban veleh Makimi nen Lammual lam kan pan nghal vat a,mipui chu an lo tam em em a, Thanpuia pa leh a u chu kn va hmu hlawl a,an bulah kan thu ve nghal a. A suangtuahna a tak thlen chho mek chu ka lawmpuiin ka hlim takzet a ni. Zanah a lokal a, kawr nalh zet mai min lo hwn a, ka pi pawh alo hawn a, kan hlim ve dar dar hle. An inkhelh chanchin a sawi te chu ka piin ngaihnawm ti zet hian a ngaithla a, thingpuite kan in hnu chuan Thanpuia chu a phone a rawn ri a, pawnah a biaa, a rawn luh leh hnu chuan a awmdan chu a dang ta riau in ka hria a, ka chik bwk a, ka hre thei a ni. Ka pi mut hnu chuan a phone chu ka laksak a, ka han en chuan Maria-i nen an inbiakna chu alo tlar thla dul a, ka awmdan tur chu i ngaihtuah thiam mai em?

NGURTHANPUIA-IV

A phone chu min laksak a tum a, ka lo phal lova, kan in chuh ani deuh nghal mai, "Min pe vat rawh" a ti a,kan inngaihzawn hnua a vin ber tum ala ni hial ang. Ka chhiar hma chuan pek ka tum bik silo, ka chhungten an hria ang tih hlau bawk siin kan boruak chu a tang tha et awt hle a, "Engmah ani nen khan in zawmna kan neilo" ati a, mahse an inbiakna chu ka chhiar a phal chuang bawk silo. Chu chuan min ti thinrim takzet a, ka inrin loh deuh lai tak chuan min kuai lawp a, phone chu a la ta a. Chuh ka tum buai peih tawh lo, ka mittui hi a luang zawih zawih a, min khawih a tum a, "I kut bawlhhlawh khan min khawih suh" ka ti a, rilru hah hmel takin thutthleng ah chuan a thu hnawk a. Tukverhah chuan ka dak chhuak daih a, hetiang thil hi a thlen ka hlau thin reng a ni, "Za-mawi... tunah chuan engmah ka hrilh theilo che, mahse i tan hian ka rinawm lo ngai lo" a ti sap a. Ka bulah chuan a rawn kal a, "Maria-i chuan thil tam tak min hrilh a, mahse sawi chhuak lo turin ka ko in tiam tawh tlat a, i hnenah pawh hian ka sawi thei lo ani min ngaidam rawh" a ti a. Ka mittui chu rawn hruk atum a, a kut chu ka lo paih sak a, "Kan inkarah hian sawi chhuah theih loh khawp thuruk alo awm reng ani maw?" Ka nui lui hak a, "Min rintawk lohzia kha khan a ti lang chiang khawp mai" ka ti a. Ral lehlamah eng phe uarh chu ka thlir a, "In hauh hi a hrehawm, hlim takin ka rawn haw a, kan zan hmasa ber thinrima hman nghal chu a nuam lo emai" a ti a, ka ngawi reng a, amah vek chuan,"Ka va haw phei phawt ange ka rawn bia ang che" ati a. Dawhkana ka phone chu ka la a, "Min rawn be suh, kha hei pawh hi hawn rawh" ka ti a. Phone chu ka pe a, mak tih hmel deuh hian min en a, "Biak che i duh lo maw?" "Aw min rawn be reng reng suh" kati vin tuar a, "Awle... a tha e. I duh dan anih chuan le" a ti a. A tho nghal a, ka phone erawh a dah let a, "Za-mawi.... inchhir ngai suh ang che" a ti a. A kal chhuak ta nghal a. Ka room ah ka kal a, ka tap ta zawih zawih a, a thleng rang lutuk a, ka in ring hman lo a ni. Makimi ka bia a ka tahkhum hrep a, thil awmzia pawh ka sawi hleithei lo, atawpah chuan ka sawi thuak thuak a, atuka sawi tha turin kan inbiakna chu kan titawp ta a. Chu zan zet chu chhin khat mah ka chhing lo. Ka thinrim a reh tial tial a, thil awmzia hriatchian chakna te chu ka nei ve ta zel a, mahse Thanpuia chuan vawikhat te pawh min rawn biak a tum lo. A mizia ka duh em em thin hi a induhtawkna a hun taka alantir thin kha ni a, tun hunah erawh hmang lo se ka duh viau thung. A chang erawh chuan ka laka zep a nei chu ka hrethiam lo a, Maria-i nen ber kher lehnghal min bum a tumna mai mai ah ka ngai bawk a, chutianga ka ngaihtuah chuan ka thinrimna chu a so leh bulh bulh thin.

Ni a liam a, kar a liam a, thla hial a vei dawn a, Thanpuia nen chuan kan inthen ani ta reng mai. Ka ngai thei em em a, mahse huat chu ka tum lui tlat thin. Makimi chuan kan inkar siamthat chu atum ve nasa hle a, mahse kan chapo dun lutuk chuan kan inkar a tichhe hneh hle a, hetiang hi kan thleng ta a ni ber. Mahse englaimah in ka theihnghilh lova, kalawm chang te hian kahrechhuak hmasa ber thin. Lehkha zir tha turin min fuih ngun hle thin a, ka result that ni te hian ka ngai zual thin. Heti teh thuta kan inkar a chhe ta mai hi mak ka ti thin a, tlawm zawk nih a biak tawp mai te chu ka duh fo a, mahse ka luhlulna hi ka hneh lo leh thin. A tum a ruh bawk a, a hming chu inkhel ngaina tuten ang hre tam a, ralkhat atang ka lo lawm ve viau zel a, a hming a rik tawh chuan ka beng hian hriat loh a hlau a, ka tun hra zel mai a ni. Nikhat chu kan school bang kan class ami Muana nen kan haw a, Makimi'n hostel ah min pensan tawh avangin kan pahnih chauh chuan kan haw a, Zarkawtah bus kan chang a, a tawt em avangin kein kan kal ta zel a, kan zirlai chungchang kan sawi a, kan sawi tui dun hle nghe nghe a, kawiah chuan Thanpuia leh a thianpa hi an rawn lang thut a, ka hmu khat bawk a, ka thin chu a phu dup dup a, kan mit leh mit a in tawn chiah chuan engemaw tak hi chu ala awm tih ka hre thei, ka kalpui chu a en leh a, mahse rei min melh lo, min kalpel a, ka awmdan chu a danglam nghal vek. Muana thusawi pawh hriat hriat ka nei mumal lo. Kan veng penna kan thlen chuan kan in mangtha a, ka rilruah chuan thildang reng a awm lo, Thanpuia chauh lo chu.

Exam kan zo a, ka nu in min ngaih avangin haw turin min rawn ti a, mahse haw chakna ka nei lo. Thanpuia khuaa a awmlai ani tih ka hre lehnghal a, Maria-i nen ka hmu tlang anga, ka tawrh theih ka ring lo a ni. Ka room ah awm in fb ah ka lut kual mai mai a, Thanpuia leh Maria-i thlalak dunna chu Maria-in alo post a, ka rilru chu a na vawng vawng a. Comment ka en vat a, ka thinlung ti na tak thil ka hmu fuh lehnghal a, Thanpuia thianten "engtiknge kan tih huk dawn" an tih a Thanpuia'n, "Lo nghak ru hun rei ani tawh lo ang" a tih chu ka tah tlaivar pui thak a. Min duh der tute chu hmu ve bawk mah ila midang hnenah ka rilru ka pe thei ngai lo. Mahse Thanpuia tan chuan chung chu thil har ani silo, engvanginnge ani nen kan lo in tawn kher tiin ka in zawt fo thin. Theihnghilh a hmalam pan chu ka tum ve ta, amah vanga rilru na reng renga awm chu ka tum lo a, ka hlawhchham anih pawhin ka tum reng reng tur a ni. Ka hriatreng theihna thil min hnutchhiah pawh ka dah bo tan a, hun reilo te chhung pawhin a hnen atang thil ka dawng hnem hle a, bawm ah ka khung khawm a, ka dahbo vek a, bul tan thar turin ka in tuai thar ve tan ta.

Pawl sawmpahnih kan nih ve takah chuan a hma aia nasa in ka zirlai ka bei a, chanchinbua Thanpuia chanchin chhiar tur a awm changa ka chhiar tih loh chu a chanchin hriat theihna chu ka ti bo vek a ni. Zankhat chu Makimi'n min rawn bia a, "Za-mawi, news i en em?" A ti a, ka en loh thu ka sawi chuan en turin mun han hrilh a, tv ka on vat a, ka han en chuan Thanpuia chu Mohan Begun fc in contract an sign pui thu an lo puang a, a duhthusam ram a taka thleng chho mek chu ka thinlung tak takin ka lawmpui a ni. A nu lawmdan tur mawlh chu ka ngaihtuah a, a pa dodalna kara a rin ngam tlat na te, a tawngtaisakna zawng zawngte chu a thlawn lo tih ka hria a, chu chuan min ti lawm a ni. Chung zawng zawng ka ngaihtuah lai chuan ka phone chu a vibrate cher cher a, ka han en chuan msg ka lo dawng a,"Za-mawi, a tawk em em tawh lovem ni?" Athawntu chu tu hrilh mah ka ngai lo, Thanpuia ngei a ni. Ka chhiar a, ka chhiar nawn leh a, hetianga awm hi ka duhdan ani bik hauh lo. Mahse kan duhdan lo te pawh hi kan chungah alo thleng si thin a, Maria-i bawk ka rilruah alo lang leh hmasaber a, "I ngaihpawimawh hmasak ka nih ve hunah chuan a tawk thei tawh maithei asin" tiin ka chhang a. Min chhang let ta lo, min chhan let chu ka ring lo sa reng a, rin loh takin ka mut hnuah a chhanna erawh ka hmu ta tho a, "Chiang takin min en ni la chuan ka thinlung hi i hmu tlang tur, ka rilru i hriatthiam hi ka phut ve tho asin, vawikhat chiah sawi dun leh ang" tiin, hepa rilru hi engtikah nge ka hriatthiam ang?

NGURTHANPUIA-LAST

Phaia a kal hma zanah rawn len a tum a, mahse a rem tak ngang loh avngin min rawn call a, "Za-mawi,a rei tawh lovang, khawngaih takin lo nghak hram rawh aw" a ti a. Keipawhin tha takin ka lo chhang a, engtiang chiah in nge rin ngam tur tih hre lo mah ila tunah chuan a sawi anga lo nghah tawp mai chu ka tum a ni. A thlen thlak hnuah min rawn hrilh a, a lunglenzia te a rawn sawi a, inhmu miah loa a kal avang chuan keipawhin ka ngai zual a, tawngtaipui bak tihtheih ka nei lo. Tawng athiam lo chu a buaina ber a ni chho a, a chang chuan a tap lek lek a, mahse inhneh tir erawh a tum lo. Kan inbe tam lutuk thei lova, kartawpah erawh rei tawk tak kan inbe thin a, vai chaw ei har a tihzia te a rawn sawi ve nauh nauh thin. Keipawh selection test ka passed a, ka tih that loh em avangin hostel ah ka pa in awm turin min ti a, keipawhin pawi ka ti lo. Makimi te hostel a full tawh avangin adang ka zawng a, ka pa duh na tak kan hmu a, phone pawh ken luh an phal lohna hmunah chuan ka lut a. Ka huphurh viau a, mahae kartawpah phone hman erawh an phal dawn a, a ziaawm viau. Ka luh dawn tlaiah Thanpuia nen kan inbia a, ka lehkha zirna turah tha taka ka tih theih nan min lo fuih a, kartawpah min rawn biak thin tur thu a sawi bawk a,in ngai tak chungin ka luhsan ta.

Thlasik khawvawt hnuaiah lehkha kan hanzir tlauh tlauh a, lunglen nen zir a har thin khawp mai. Mahse Thanpuia a hlawhtlin em em laia lo hlawhchham bik chu ka hlau a, chu chuan min nawr kal leh thin. Inrinni tlaiah chuan kan hostel kawt vel kan thianfai a, a thlang lam hi ko awih tak maia ni a, fimkhur a nai thin hle a, bawlhhlawlh alo awm leh nual tawh avangin ka roommate nen kan lut a, kan room zawn anoh bawk avangin thenfai chu kan duh a ni. Kan tifai zo kan let leh tur chu lungte ka rah sual a, katleng ta thut mai. Ka au tuar a, ka thiannu chu ka hmaa kal anih avangin a rawn hawi let vat a, kahmu phe vuai a, ka in sawh chawrh chu ka hriat hnuhnung ber a ni ta. Kaharh chhuah leh chuan damdawiinah ka lo awm reng a, ka bulah chuan ka nu leh pa an lo awm a, ka harh tih an hriat chuan ka bulah anrawn kal hnai vat a, "Bawihi a harh ania, paa doctor va ko teh" ati a, a mittui chu ahru a, ka banah a vuan a, "Mamte... i lo harh ta maw? Ka va lawm tak em" a ti a. Ka accident dan chuan kanaihtuah kir a, ka hrechhuak ta uai uai a, ni 3 chhung nikhaw hre lovin ka lo awm reng tawh a ni. Thanpuia ka hrechhuak zawk a, min rawn biak ni tur anih avang khan ka phone pawh ka kekawr ipteah ka ak a, mahse ka tlakna lamah a keh darh vek a, Thanpuia chuan engtin tak ngai ang maw ka ti a, ka rilru a hah hle ani. Mahse ka dinhmun ka thlir a, engtiang chiah in nge ka insawh chhiat ang tih a la hriat loh a, ka dinhmun ka hriatchian hmasak loh chuan engmah ka hrilh ngam lo a ni. Test an nei kim tawh a, result kan nghak a, ka nu leh pa hmelah chuan lungngaihna thuk tak ka hmu in ka hria, ka u te pawh an bang bik lo. Ka lakah hian zep leh thup an nei tlat in ka hria a, damdawiin atanga kan chhuah dawn ni chuan doctor in ward a rawn fang a, "Beidawn hi a pawi ber chu a ni a, nangni pawh theihtawp in chhuah tlan phawt chuan a kal leh mai ang" a ti a. Ka rilru a so bulh a, eng thu nge ka hriat hi, kei hi ka kal thei dawn lo tihna ani thei angem? Zawhna mitmengin ka chhungte ka zawt a, an mittui atla vek a, ka pa chuan min kuah a, "Bawihi,kan beidawng tur a ni lo, i kal leh ngei ngei ang" a ti a. KA nu chu a puan in a in khuh a, a tap tih ka hre mai. Ka hmalam hun ka suangtuah ve thin te kha, tunah pawl sawmpahnih em pawh ka la passed lova, enge ka chungah hian lo thleng ta bik le?

Ka tan chuan hun hian awmzia nei lo, Makimi nen kan inhmuh phei chuan kan tap ani nghal zel si a, kabeidawn phah in an hriaa, thlahnih vel zet chu inhmuh pawh an phal tha lo a ni. Thanpuia chuan Makimi arawn be thin a, ka chanchin engmah ka hrilh tir phal loh avangin engmah a hre lova, a tana phurrit nih ka duh lo a ni. Thanpuia hi ka hrechiang em em a, heti chung pawh hian min kalsan duh dawn lo tih ka hria a, chuvangin hetia tha then tawp mai hi ka duh a ni. A chanchin ka hriat chuan ralkhat atang ka lo hlim ve thin. Krismas alo thleng a, mite hlim takin an inbuatsaih a, mahse kei erawh ka wheelchair chunga thu in mite che vel chu ka thlir a, kumdanga kan hlim thin nen vawilehkhat a ka chungathil lo thleng hi hriatthiam harka ti takzet a ni. Ka in rinloh laiin ka mittui chu a lo tla a, ka hnunglam atang ka thiannu Makimi chuan min rawn kuah a, "Za-mawi... Thanpuia hi ka khawngaih emai, ka hrilh mai dawn" a ti a. Ka tah a ti chhuak zual sauha, "Za-kim, khawngaih takin hrilh suh, tunah a hlawhtling ve dawn tan chauh a, amah tibuai tu leh phurrit a tan chu ka duh lo a ni. Ka dinhmun ah hian lawm chu harsa mahse Thanpuia chauh ka ngaihtuah thei a, hei hi a thatna tur a ni" ka ti a. Kan tap dun hawm hawm a. Ka khawhar hlau in ka kiangah a awm reng a, a changin alo riak a, mahse kum alo thar a, exam hmachhawn tur anih avangin hostel lamah a lut leh a, kangai thin hle. Ka accident hnu lawk khan ka pa hi Aizawl lamah an transfer thei hlauh a, ka dinhmun avang pawh chuan an lo khawngaih a, kan khaw hlui lam kha chuan ka chanchin hi an hre lem lo a ni. Laptop min leisak a, nileng in ka hun hman dan te ka ziak thin a, ka nun pawh chu chuan a ti hlim ve ta deuh. Ka suangtuahna vakvel chu ka puang chhuak a, lehkhabu ah te pawh ka la remkhawm thei maithei asin.

Nikhat chu nilum ai pahin in chungah ka awm a, ka hun kal tawh te ka lo ngaihtuah kir a, inchung arawn kal pen ri ka hriat chuan ka harh zawk a, rin loh deuhin Maria-i chu alo lang hlawl a. Mak tih hmel deuh hian min melh tlawk tlawk a, arawn kalhnai zel a, kan inhmachhawn ta ran a, a mitah chuan mittui atling pam a, a rawn kun thla riai riai a, min rawn kuah thlawp a, inkawm ngai leh innel tak lawhkan ni lo, chutianga a,rawn khawsakna chuan min ti hrilhhai lek lek zawka ni. A mittui a hru sawk sawk a, "Mawimawi, hetia hmuh che hi ka in beisei lo asin" a ti a. A han chawl dat a, "Thanpuia mang a ang lutuk a, khuaah ka haw chhoh in in lo awm tawh silo a, in awmna hi ka rawn zawng chhuak ta hrama nih hi. Makimi lah biak theih in a awm silo, engatinge nanah choah a hetiang hi i tuar?" A mittui bawk chu a tla leh a. Sawi tur pawh ka hre lo, kan ngawih dun vang vang hnu chuan, "Maria, khawngaihin Thanpuia chu hrilh suh aw... hei hi ka khawvel a ni a, ani chu hmachhawp tam tak ala nei" ka ti a. Min melh vawng vawng a, "I hnenah hian sawi tur ka nei asin, Thanpuia tluka mi tha leh rilru nghet hi an awm lo. Ka thuruk min vawn pui avanga in inthen pawh kalo hre lova, tunhnuah hian min hrilh chauh a, ka inthiam loa, in inkar ah hian tih tur nei ve in ka in hre tlat a ni" a ti a. Kan buai na anih avang khan chu thil chu han hriatchian ka chak ve deuh a, ka zawt ta rawih a, "Khatih lai khan ka beidawng lutuk kha intihhlum mai te ka duh hial a, kan khuaa kan ktp leader fa kha ka pai a, mahse mualpho ngam silo khan titla turin min ti a, ka tihtlak loh chuan ka chungah thilthalo  a thleng ang tiin min vau zui bawk a. Tu bulahah ka sawi ngam silo, ka mi rin ber chu Thanpuia chauh khaa ni. A hnenah ka manganna thu leh ka chanchin ka hrilh vek a, tu hnenah mah sawi lo turin ka ngen bawk a. Min fuih a, min tawngtaisak a, inkhel a an fehchhuah tum pawh khan ka tibuai thin hle reng a, phone kaltlang te in min tawngtai thin. Chuvanga vawiin ni a nunthar nei leh hi ka ni, in chanchin ka zawt ngai lova, in buai tih pawh ka lo hre lo bawk a, tha taka inkawp zel ahka lo ngai mai cheu a, mahse keimah vang in hrehawm in lo tuar alo ni reng si" a ti a. A mittui chu ahan hru zauh a, "Thanpuia tluka mipa mahni in thunun thei leh rin ngam hi an awm tawh lovang" a han ti zui a. A kut chu ka vuan a, "Maria hemi vang tak hian alawm ka chanchin hrilh hi ka duh loh, engpawh a huam leh dawn tih ka hria, mahse kei rualban tawh lo hi atan hian ka tling tawh lo. Khawngaih ka dil takzet che, engmah hrilh lo hram ang che" ka lo ti a. Beidawng takin kan in chu a chhuahsan ta a.

Maria-i lo len atang chuan thla a vei leh ta hial a, nikhat chu fb ah ka lut a,ka khawih khat tawh avangin ka han lut ve deuh mai mai a ni. Thanpuia thlalak chu ka homepage ahalo lang hmasa ber a, hmeichhe pakhat hmeltha tak nen an lakdunna a ni. Ka en reng a,an inhmeh hle lehnghal a, "Thanpui hlim reng rawh aw..." tiin ka phun sep a. Ahma kha chuan ka natnaah hian dam chhuak leh tura beiseina hi ka nei lo hrim hrim, mahse Thanpuia hmel kahmuh khan a tumruhzia leh a beidawn duh ngai lohzia ka hrechhuak a, dam leh chakna te, beiseina te ka lo nei thar leh ta. Ka chhungten an hriat in an lawm em em a, engkimah min pui a, ka rilru ti huaisen turin fuihna an chhak chhuak reng reng a. Mahse vawilehkhata hlawhtlin mai erawh a theih bik loh. Mahni awmhmunah chuan hma chu ka sawn chuan ka hre ve a, ka khum atanga wheelchair a mahnia lawn kai pawh ka thei tawh hle a, ka hmel pawh a eng a, Makimi nen pawh kan nui ring leh thei ta viau a, ka hlimna chuan kachhungte ati hlim a, engkimah an phur em em zel a ni.

Ka room ah ka hringnun hman chhoh dan te chu ka laptop ah ka chhu lut a, ka phone rawn rik pawh ka lo hrelo. A hnu deuh ah ka hmu a, Makimi alo ni a, ka han call back a, "Za-mawi, i mawi ber..." arawnau deuh chul a, a ngaihna ka hre lo tih ahriat chuan, "Tu chanchin nge ka chhiar i hre duh em? I hmangaih Ngurthanpuia chanchin mawle" anui har har a, "Enge han sawi tha mai mai teh Za-kim.." ka ti a, "Fb ah online rawh" a ti a. Ka han lut ve nghal a, ka thil hmuh chu mak ka ti lutuk, ka it ka nuai a, ka ennawn leha, Thanpuia'n wheelchair a ka thu lai, beidawng taka pawn lam ka thlir lai chu a lo post a, "Eng dinhmunah pawh ding se ka hmangaihna hi ala pangngai reng, a ke a hman theih laia ka hmangaihna ai khan tunah hian ka hmangaihna a zual zawk. Za-mawi, ka tan mi sang tam tak aiin i mawi zawk" ka mittui chu aluang zawih zawih a, "Thanpui.... mi mawl pa..." ka ti chhuak sap a. Ka room kawngka chu arawn in hawng a, "Za-mawi... mi mawl nu" ka hawi chho a, Thanpuia, Makimi leh Maria-i chu anlo ding a, Thanpuia chu arawn lut a, midang erawh sitting room lamah an phei a, "Eng hremna nge min pek tih hi i hria em?" Ka hnarah a piai a, "Thanpui.... engatinge hetiang hian i awm..?" Ka hmui ahup a, "Ka Za-mawii hi ka tan i mawi ber, i mawi ber fo bawk ang" kan mittui chu a dir zawih zawih a. Min pawm a, ka thlakhlelh em em thin atangah ka bei ta hle hle a, "I tana tha tur zawk in ka ngaihtuah ve asin" ka ti a, "Engmah thatna a rah chhuak lo, chaw ka ei thei lova, ka mu thei lova, min ti beidawng asin . Mahse Maria-i lehMakimi te zarah thudik ka hria a, ka nun hi a pangmgai leh thei chauh asin. Hetiang hian awm twh suh aw, kan pahnih in kan nei anga, hlawhchhamna tih hming hi ka hre duh lo ani" ati a. Ka suangtuah phak tawh loh hlimna chuan min tuam a, ka mumang mai ani ang tih k hlau a, mahse ani silo. Beidawng ve ngai lo ka kiangah a awm miau a, kan hneh ngei ang tih chu ka ring ve ta.

Hei i kum 10 liamtaa ka thawnthu chu a ni, kal thei tawh lo tura an ngaih, mahni pawhin beiseina nei ngam tawh lo, mahse hlawhchham tum ngai lo ka kianga awm reng thin avanga vawiin ni a kea lo kal leh ta ka ni. Ka pasal ka hmangaih em em, min hmangaihtu Ngurthanpuia nen chuan engpawh hmachhawn ka huam a, ka fapa te pahnih pawh hi beidawng ngai lo turin ka enkawl chho ve anga, hmangaihna thiltihtheihzia pawh ka hrilh nawn fo ngei ang.

"Za-mawi...."

"Um..."

"Ka tan i mawi ber fo ang ka hmangaih che"

"Ka hmangaih che NGURTHANPUI"

(Ka story min ngaihhlutsak thin tute, ka tan in hlu takzeta, ka lawm em em ani tih ka sawi leh duh. In vaiin ka lawm e)