ZOTHANTLUANGA

ZOTHANTLUANGA

“Story hi I ziak nasa lutuk a ka tan hun pawh hi I nei mang lo chu anih ber hi mawle” tih pah chuan nui san sanin min melh a, “Exam zawh veleh chiah ka tan leh ang, ka zirlai ka ngaihtuah tha thei lo”ka tih chuan ka biangah min piai a, “Promise em?” “Promise chiangkuang..”a nui a, thlanglam chu a hawi a. Higher student kan nihlai a ni a, thu ziah lama ka tui tantirh tak tak lai kha a ni ve a, ka thilziah chhiar tur mai mai khan zanrei tak min nghak thleng thintu a ni, amah chu Zothantluanga a ni. Mipa smart tak mai hi a ni reuh a, keiin arts ka laklaiin ani erawh chuan Science ala thung. Kan off period a inang ngai mang lova, a awmchhunah erawh kan school phul rem lai, langsar uchuak tak si loah chuan kan thu a, thil ho mai mai sawi khan kan phul ve hlut thin, kan tuizawng pakhatmah a inang lo chung khan kan inthlawp ve em em tho a, a nuam kan ti ve thin hle. Sports lamah a hmingtha a, zirna lamah lah a duai hek lo, a hming an sawi changin chhuang takin ka lo nui ve thin. 

“Te, thil pakhat ka zawt ang che aw?”inngheng rialin kan thu a, “Aw, min zawt la?”ka tih chuan a thaw hak a, “Ih, kan inneih I ring em?”a tih chuan ka nui a, “A nuihzatthlak vak em ni?”a ti nghat a. “Ka hrelo le, chutiang thleng chuan ka la ngaihtuah ngai miah lo a”tiin ka rilru dik tak chu ka hrilh a. Ka kut chu a khawih neuh neuh a, “Lo innei lo ta ila, midang lo nei ta la, I pasal neih ni chuan min sawm ve rawh aw?”a ti a, a thusawi duhdan chu a dan em avang leh a thutak em avangin ka nui duh ta lova, “Um, nangpawh aw”ka tih chuan a lu chu a bu nghat a. Ka kut la vuan reng chung chuan, “Engtikah emaw chuan nangnena kan nun hi thawnthu ala chang ve maithei asin, a tawp chu engpawh nise..”a ti a, thlanglama kan thiante nui thawm chu a rawn ri leh hak thin.

“Nangni pahnih kha rawn chhuk teh u”kan sir pakhatin a tih chuan kan piah step-ah a lo ding run a, Zothantluanga nen chuan kan inmelh zak zak a, “Ka thi…”ka phun sap a, “Sir hi chu van tullo thei tak..”a ti ve niap niap a, kan kal lo ngam si lo, kan inzui phei hnak hnak a. A bula kan va din chuan a lo nui vur vur a, “Va thu leh mai rawh u, nakinah in la ngai dawn teh mai ania”tiin office lam chu a pan leh nghat vut a, kan inkheuh a, kan nui var var a, “Ka thawveng hawk thei”ka ti a, ka lawm ngei mai. Khatiang khan kan zirtirtute pawhin a khat tawkin min man leh zauh zauh a, mahse mitkham khawp leh mawi lova kan awm ngai loh avangin min nuih liam ve mai thin. 

Tumkhat Annual sport kan neih tumin Zothantluanga chu Best Boy-ah an thlang a, lawmman la tura stage-a thlen hnuah kan sir(amah chu science teacher-a ni nghe nghe) chuan lawmman pe ta mai lo chuan Zothantluanga chu naupang lam hawi zawng chuan a han din tir leh phawt a, “Kumin bak hi kan school-ah chuan best boy anih pawh a rinawm tawh lova, a partner nen rawn dawng rawh se”tiin ka hming chu a han lam a, ka hming chu an sawi rual ta thup thup a, ka zak lutuk kha khuk ral mai ka chak asin aw! Ka thianten min nawr chhuak a, khur der der chuan ka han chhuak ve a, amah pawh a lai ve takzet tih ka hria, “Ava zahthlak tak”a bul ka thlen chuan ka ti sap a, “Ka chhuang che”a lo ti sap a. Kan let leh pawh chuan zah vangin ka nunphung chu ala dik thei lo, ka thiante chu ka han sik ringawt a, ka damchhunga ka hriatreng tawh tur thil alo ni reng mai. 

Board exam tur anih avangin tan ala ve nasa hle a, kei ve thung chu ka thawven ngaiin ka thawveng reng a, Zothantluanga min fuih lai chauhin ka tang ve niin ka hria. Khaw dang an nih avangin hostel-ah a awm a, school chawlh tawh phawt kha chuan inhlawhin a chhuak deuh ngei ngei thin. An chhungkaw khawsak harsat vang a ni lova, a nu leh pa tlem tala chhawk kha a thupui ber a ni a, a ti reng bawk thin. Kan inah a rawn leng zen zen lova, a rawn len chhunah erawh kei ai mahin ka chhungte nen an inkawm nasa zawk thin. Kan tleirawl chhuah sweet sixteen kan hman chhoh ve lai tak tak kha a ni bawk a, engmah kha serious taka han lak run ka nei ngai lo. Zothantluanga pawh atan ka rinawm em em a, midang ka ngaihtuah ngai lo chung khan chutiang takin ani nena hmahun kan nei tur ang pawhin ka ngaihtuah thleng pha lo. Krismas hmang turin an khuaah a haw a, a awm ta lo chu ka zalen ta sawt hian ka inhre pek a! Ka lengchhuak ngai lem lova, inah tawmin ka tuina ber thu eng eng emaw ziakin ka inkhung bo thin. Kan landline kha amah vangin a ri ve fo a, han inbiak chuan sawi tur a lawi ka hre lem lova, ani erawh kha chuan min ngai ve tak zet thinin ka hre leh hnuhnawh?! Kum alo thar a, ani pawh a rawn let leh tawh a, lehkha a zir nasat avangin kan inhmu khat hle. Kan in exam hmasa a, anni class-xii ho erawh February thla tawpa exam nei mai tur an nih avangin class an kal tawh lo. Kan exam zawh tlaiah Economics la hoin chaweikhawm kan rawt thut a, chawpchilh takin kan eikhawm chuk chuk a. Ka haw chuan kan veranda-a Zothantluanga lo thu reng chu ka hmu a, ka phu deuh zawk a, min hmuh chuan a nui sang a, hepa hi chu a duhawm ngawih ngawih tawp mai a ni. Inchhungah kan inzui lut a, ka school form pawh thlak lova kal kha ka ni a, inthlak turin room lamah ka luhsan a, ka va chhuah leh chuan a hmel kha nguai deuh hlekin ka hria. Min hmuh chuan inthup tum tak hian a lo khi leh sak a, “Inchhungah lo awm tur che a nia, nge pawn khawvawtah chuan I lo awm kher a?”ka ti a, “Ka ngaihtuahna tihfim hram hram ka duh a”a ti a, amah vek chuan, “Ka pa a chau tawh khawp mai tih vawiinah min rawn hrilh a, ka rilru hi a buai nuaih mai. Thla tharah kan exam tawh dawn a, chutih laiin lehlamah ka pa hetiang hi a lo ni lehzel bawk nen..”a kun ta lap a, ka khawngaih ngei mai. A bulah chuan ka thu a, a kawngah chuan ka kuah a, min lo kuah ve vat a, “A chang chuan nun hi a hahthlak ve thin khawp mai”a lung chu a chhe ve lek lek tih ka hria. A pa hi an khaw middle school headmaster-a ni a, mah se kum khat kalta khan cancer natna avangin a hna atang pension a dil a, a tha chho ve zela an ngaih laiin hetiang hian a chanchin chuan min rawn deng zui ta mai a ni. “A tha leh mai ang, lungngai reng reng suh, kan tawngtai ang a, I pa chu a tha leh em em ang”ka ti a, “Ka hlauthawng a ni, ka hlauthawng tak zet a ni”min kuah nghet sauh a, a, “Naktukah ka haw ang chu ka ti a, engpawh nise ka haw hi a ngai a ni”A ti a, a exam hnaih tawh tehlul nen ka khawngaih ngei mai. Chumi zan chuan ka thinlung zawng zawngin Zothantluanga chu ka ngaihtuah ve a, ka tawngtai a, tih theih hi ka nei tlem emai pawh a, atana tihtheih neih tam ka chak ber tum a ni hial awm e!

Exam an tan hma karah chiah a pa chuan a boralsan ta nge nge a, min rawn biak tum chuan kan tap dun a, ni e, ka chhungte thih pawha mittui tla ngai lo kha Zothantluanga pa vangin ka mittui a tla ve a! A exam theih a rin loh thu min hrilh phei chuan ka lainat zual a, mahse, a hun tawnin a zir ta miau si lo a. kawngkhar kik karh karh riah chuan ka tho vat a, kawngka ka va hawn chuan Zothantluanga chu a lo ding reng a, ka tum loh lutuk a ka hmuh vang chuan ka ka deuh hau a, “Nang..mah…engtin..”ka ti bah deuh nawk a, inchhungah kan inzui a, “Ka rilru ka thlak a, ka pa thu min chah hnuhnung ber kha tihhlawhtlin hi ka duh a ni”a ti a, “Ka exam ang a, tha takin ka pass ngei ngei ang”mahni inringtawk tak chuan a ti a, hei hi anihna dik tak a ni, mahni inringtawk takin engkim a hmachhawn thin.

Thla khat chhung vel zet an exam a, ka rilru chu ka hriat loh Karin a lo luah thuk ve tawh hle tih ka hria. A exam zawh tlaiah kan inah chaw a rawn ei a, Aizawlah chhuk vat a tum thu te, entrance exam pek a tum thute chu min hrilh a, engineer nih tum kha tunah chuan doctor nih alo tum nghet hle tawh a, a pa vang anih thu min hrilh nghe nghe. An khuaa a haw hma zanah a rawn leng a, tv chu kan en a, sawi tur kan hre lo dun hle. Kan inen a, kan nui leh ringawt thin, ka kut chu a hum a, a hmer leh vawng vawng thin. “Kan zirchhuah hunah chuan kan lo puitling ve viau tawh ang a, kan la inthen lo anih chuan a nuam ngawt ang, a chhan chu ka pa ang bawka first love nupuia neih ka chak ve” a ti a, ka lo nui hak a, “Nang hi chuan min neih I tum lo tih ka hre chiang a..”a ti a, ka inthiam lo ve deuh, “Chutiang pawh a ni chuang lo, a la rei dawn em a..”ka ti a, “Nia..”a ti a, a nui tawi tak a, “Min hre ve reng ang tiraw?”a tih chuan a thutak leh viau tawh, “Aw, ka theihnghilh tawh che ka ring lo, mi rintlak leh fel tak hi ka thinlung hian a hrereng tawh ang che”ka ti a, ka tawngkam chu ka nuih a za lek lek a, mahse, ka insum hram hram a, “Pasal I nei duh anih pawhin I kawng chu ka dal miah lo ang, mahse, min sawm chu ka phut viau ang. Rinawmna intiam tih vel hi chu a ngai pawh ka ti lo, midang ka nei lo ang ti kur dup mah ila kan hma hunah eng nge thleng dawn kan hre lova, mahse, ka nupui tura ka suangtuah awmchhun erawh chu I ni chiang khawp mai”a ti a, hepa nun tlang lutuk hi a ngainatawm ka ti thin! Kan inhlat tawh dawn emai pawh a.

Entrance exam-ah pawh a ti tha ber pawl niin a duhna hmunah tak MBBS a zir thei a, ka lawmpui em em a, ani zawng a hlawhtling ngei ang. Chanchin kan inhrilh tawn ve reng a, a lung aleng thei em em a, ragging a nasa bawk nen, a kumkhatna kha chu hrehawm takin a hmang tluan ve a. Mobile phone a rawn awm ta bawk a, landline-a inthlahrung taka inbiak kha a ngai ta lo bawk a, kan inbe nasa ve thei tlak tlak hle. Mahse, hun alo kal zel a, inhmu thei lo na na na chu a ni telin kan inngaihna te pawh a lo kiam ve zel hi a lo ni a, ka zirna chhunzawmnain Aizawlah ka awm ve ta bawk nen, kan hun hman dan kan inhrilh tawn pawh kan bansan ta hial a. A khat tawkin ka dam leh dam loh erawh min rawn zawt fo a, ka damloh tum chuan ka damdawi ei tur ngaihtuahin an senior te a zawt kual nasa thin hle tih ka hria. Chutiang chuan kan awm chho zel a, a tawpah phei chuan inthenna mumal tak awm chuang lovin kan intha then chu a ni ta mai a, ngaih chang chu ka nei ve thin, a bik takin ka damloh changin! Rilru thar puin midang keipawhin ka kawp chho ta a, ani erawh a chanchin ka hre zui ta lo, ka number ka thlak avangin ka number thar hriattir kher pawh chu ka tum ta lo. Kan la naupang a, rilru kha a la nghet charh lo bawk nen, thil awm ang lo pawh a ni chuang lo. Thil thar tem chakna te, midang han kawp vel te kha thil nuam tak a la ni miau a, Zothantluanga pawh ka hre zui ta run chuang lo. Zankhat ka lehkha zir chu ka phone a rawn ri ral ral a, ka number hriat ngai loh atangin a ni, ka han pickup chuan Zothantluanga a lo ni reng a. Ka number a nei chu a mak ka ti deuh hlek a, 

“I dam tha em?”

“Aw, dam e, nang zawk? Ka number engtinnge I neih?”“Engtin nge ka neih lo hang?”a nui hak a, “Ka rawn haw dawn a, Aizawlah inhmu ang aw”a ti a. 

“Ka haw chho dawn asin, engtikah nge I lo chhoh dawn?”ka ti a,

“I la haw hman lo ang, naktuk tuk lehah”a tih chuan ka la haw hman dawn lo tih lo tih ka hria,“Awle, I duh phawt te chuan” tiin kan inbiakna kan titawp a.

Ka ngaihtuah neuh neuh a, kumhnih a liam hnuah kan inhmu dawn a ni a, a la pangngai reng ang em tih te chu ka rilruah a rawn lut a.

Ka nghakhlel ve rilru hle tih amah Zothantluanga ka hmuh chiah chuan ka hrechhuak a, tlemin a lo thau ve deuh tawh a, a lang puitling deuh hlekin ka hre nghe nghe. Ka football club tan em em Chelsea jersey  leh lukhum min rawn hawn a, ka lawmdan chu pui tak a ni. Ka kuah a, mahse, ka thlah leh vat a, a nui hawk hawk a, “I inla mihrang ta emai”a ti a. Zanrei tak thleng a rawn leng ve a, a zirna chanchin ka zawh chuan ngaihthlak a nuam leh viau mai, a chhan chu a thiam pawl a ni pha leh miau a! A haw tur chu ka thlah a, gate bulah kan ding a, “Ka ngai thin khawp mai che”a ti a, “Nangpawh I ngaihawm thin khawp asin”ka ti a, “Hun ka neih chuan ka rawn chhuk leh hunah rawn len leh ka duh”a ti a, min vawnna chu a thlah a, “Mangtha phawt mai aw” tiin kan inthen ta a.

Kan pahnih inkarah induh tawnna chu a la awm ve tih ka hria, chumi vanga inkawp leh erawh kan ngaihtuah lem lo. Kan la puitlin tawk lohna a lang bawk a, mi tam tak hi kan awm ang hian an awm ve ka ring ta hial. Induh ve si, induh dan thiam si lo chu hetiang hian kan awm zel chu a nih hi.  A zirna zawm tura Aizawla a chhuk leh laiin kei kan khuaah ka awm a, kan inhmu nawn ta lo. Kan inbe zeuh zeuh a, a hnuah phei chuan kan ngaihzawngte chanchin hial kan inhrilh tawn ta a, bialnu a neih thu min rawn hrilh hmasak ber zan chuan ka ni ve deuh sawkin ka hria. A hnuah erawh ngaiah ka nei ta vat a, chutiang chuan hun eng emaw tichhung chu inpawh takin kan awm a, bialpa thikthu chhe zet ka neih zarah kan inbiak thinna pawh kan ti tawp leh ta. A rawn haw apiangin thil min rawn hawn ziah a, chumi min pek tuma a rawn kal dawna min biak bak chu kan inbe chhunzawm ngai chuang lo.

Dawhkana inneih sawmna card mawi fahran chu ka melh reng a, kan tleirawl lai hun leh amah Zothantluanga nen kan hun lo hman thin dan chu ka mitthlaah a rawn lang zut zut a. Card chu dimtein ka la kang a, ka fawp a, 

“Kan fapa,

Dr.Zothantluanga

leh 

Lalrinsangi” 

tih thleng chu ka chhiar a, ka khup a, tunah chuan doctor rawn zir chhuakin nupui hial a nei dawn ta a ni. Min rawn biak hnuhnun ber tumte chu ka rilruah a rawn lang thar a, “Kan thutiam kha pakhat tal tihhlawhtlin ka duh a ni, karlehah card I dawn lo beisei rawh”a ti a, ka nui a, “Nupui tur I hmuh zawh phawt chuan ka va lawm dawn em” ka ti a, “Nupui meuh han nei dawn takah chuan ka rilruah I awm nasa khawp mai, neih atan min duh thei ngang si lova, min duh tu kan zawn mai ngai ta si hek le” a ti a. 

Ani hian ka duh lo ah a la inngai reng anih dawn hi ka ti rilru a, innei tur ni ila chu kan innei ngei awm tho si a tih chu ka ngaihtuahnaah a rawn awm a, ka sawi duh lem lo. “Kan thutiam tihhlawhtling turin  I rawn kal ngei ngei angai ang, I duh leh changtupa pawh I rawn hruai ang a” a ti a, "Te, ka pa ka ngai khawp mai. Ka ngai tak zet a ni. Ani khan nang hi ka neih che a ring tlat leh nghal a" a ti a, ka hnuk chu a ulh teuh a, amah zawk chu a rawn nui deuh hak a, keipawh chu Ka nui ve thei ta, chutiang chuan pangngai takin inhuatna tel hauh lovin kan inbe leh ta a ni. Ka maimitchhing a, amah ka la duh vangte, ka beisei leh tak vangte ni hauh lovin, Zothantluanga nen thianghlim taka kan inkawp hunlai chu ka ngaihtuah kir a, khang hun kha ka ngai a ni. Rilru chhia leh mawi lo awm hauh lova kan nun kan hman thin laite, thinlung bawlhhlawh pu lova rilru thianghlim tak pu chunga kan inzui lai te chu ka ngaihtuah a, “Nupa hlim tak innih ka duhsak a che u”ka hriat tawk lek chuan ka ti a, rilrua an inneihna hman pui tum ran chung chuan ka mu ta siai siai a.