LALMUANKIMA

Valentine's day pualin Short story ka'n thai ve hrim hrim ang e 😊

LALMUANKIMA

"Mei lum hi lo ai ve daih zawk rawh, a lum nuam zawk ania"

Ka inkhawm kal tur chu Lalthana chuan min lo ko zarh zarh a. Kan in piah mai ah hian kawng kawi zau ve deuh mai hi a awm a, awmkhawmna atana hman ching hi an tam thin hle a, hemi zanah chauh lo pawh hian Lalthana te thianho hi ka hmu fo thin.

"Rawn inkhawm ve zawk rawh u. In hlawk zawk daih ang" ka han ti ve ngial a.

"Nidangah le" a ti a, a nui ang suk a. 

"Kha chu Lalmuankima a ni maw?" tiin meilum hnaih taka lo thu zum dak chu ka han be hram a. Min chhang lo chuan a nui suk ringawt a. Keipawh hmanhmawh takin biak in lam pan chuan ka kal ta hlawk hlawk a.

Ka haw lamah chuan ka rin loh deuhin Lalthana te thianho chu an lo la awm a. Min hmuh veleh an lo tho sap sap a. 

"Thingpui kan lo in dawn" Lalthana bawk chuan a ti a. Hnial ngaihna vak awm hek lo, min zui haw ta dial a. 

Thlasik lai ngang anih avangin sitting room ah heater ka on sak a, inthlak turin room lam ka pan a. Room atanga ka chhuah chuan Muankima chuan min lo en reng a, ka melh veleh rang tak hian a hawisan vat a, naupang zak zum tha leh te pawh a ang hialin ka hria. Thingpui lum turin choka lam ka pansan a, an titi chu an phul ve luai a. Nidanga rawn leng ngai lo chutia an rawn kal ve tlat chu ka nuih te pawh a za lek lek zawk.

Thingpui in pah chuan kan titi ve luam a, Muankima erawh tawng thei lo ang mai hian a ngawi reng a, a mit ka en a, a rui lo tih ka hria. Ka hriat tirh atangin ruihtheithil a la ti ngai lo a, tunah hian a la fihlim chiah em ka chiang ngam tawh lo thung. A thiante hmel erawh an fim lo tih hrethiam tur khawp lekin chhungkuaah kan lo tuar ve tawh a, ka hai bik lo. Chutiang chu lo ni ta se, engvangin nge a thiante a kawp tlat si? A.. Ka buaina tur pawh a ni lo.

An haw dawn chuan pawn thleng ka thlah an phut leh ngei a, ka nuih a za telh telh. 

"Muankim, mangtha bik riau  te i duh em?" Lalthana chuan a ti lang lang a. A thianpa a sik nawk chu ka hmu ru reng, ka mangtha hnuah kawngka ka kalh a, ka mu ve ta nghal a. 

Ka mutnaah chuan ka tum hauh loh in thil tam tak ka ngaihtuah a. Muankima che zia kha a mak riau in ka hria. A thiante fiam dan leh kan ina an rawn len ngawt dan te, engkim mai chu a thleng thut vek a ni ber. Kan naupanlaia school kan kal tlan bak kha a chanchin hriat ka nei tam lo khawp mai a, phai lama zirna a chhunzawm  atang phei kha chuan a khawsak zel dan ka hre mang tawh lo. A rawn haw khat hle a, a rawn haw chhunah a inkhawm ngai awm pawh ka hre lo. A thian tha ber Mazuala lah a pro-pastor daih tawh si a, ani hetiang hian a la tal vel chu a ni si a, an in ang lo hle mai ka ti rilru neuh neuh a. Zirna kawngah erawh a thleng sang thung a, a nun erawh a awh awm lohna chen a awm ve bawkin ka hre lawi a, ka lu thing nar nar chungin ka inkhuh tha sauh sauh a, mumang bo vek khawpa mut tumin ka inher ta a.

Ka hnathawhna school lam pana ka kal tur chu kan in bulah Muankima a rawn tei nulh a, ka hmuh chuan ka nuih sak a, lai zet hian a then ve sak a. Han biak mai ngaihna ka hriat loh avangin ka scooty ka tinung a, ka tlan ta daih a. Side glass atang chuan min lo en zui reng tih ka va hmu a, engemaw ti tak hian ka awmin ka hria. Nilengin hnaah ka buai a, rilru dang a put theih loh tluk a ni. Ka haw dawn chuan ka phone a rawn ri ral ral a, ka en chuan ka thiannu Latei a lo ni a, ka han pickup vat a. A dawra kawi ngei ngei turin thu min rawn pe leh ngawt a, kal lo ila min chhuahchhal nasa leh dawn tih ka hriat chian avangin MC lam chu ka pan ta nge nge a. Ka thlen chuan a dan pangngai angin a lo tawng leh zarh zarh tawh a, inleng a nei tih ka hre mai. Ka luh chuan ka rin loh lutuk in Muankima chu a lo thu ve reng a, min hmuh chuan a nui leh sak a, tawng tam lo chi a ni tih ka hriatchian sa avangin chutia min lo nuih ringawt pawh chuan thu tam tak a sawi tih ka hria.

"Mate, Lalmuankima hi lo hruai tha ve rawh aw, inkhawm nachangte hi a hre tawh lo reng reng" nui chungin Latei chuan a ti a. Muankima erawh a nui suk ringawt.

"Mi peih lo chung in tur reng te chu a harsa alawm" nui chungin ka lo ti ve mai a.

"In sawm pawh awm hma hawt a" Muankima chuan a lo boh a.

"I peih phawt te chuan min lo sawm ziah dawn nia" ka ti a.

"Ka'n chhuak phei hmasa ang e, kawi na tur ka la nei a" tiin a ding nghal a, kan inbe tawh lo. Latei nen an in biak zawh chuan a chhuak ta nghal a.

"A la danglam lo reng reng, hman atang tawh khan ala duh reng che tih ka hre chiang lutuk" Latein a tih chuan ka melh kawk a.

"Awih awm loh lutuk" ka ti a, ka nuih pawh a za lo.

"Richard nen in nih ngheh em avang khan engmah a ti lang ngam ngai lo a, amah zakzum chi a lo ni bawk nen engmah I hre lo reng ang chu. Hun rei tak hnuah I chanchin sawi turin a rawn leng vang vang ania" a tih chuan mak ti lutuk hian ka thiannu chu ka melh ta reng a.

"Min lo duh thin pawh nise tunah chuan a danglam daih tawh ang. Hun kal tam tawh zia hi I hria em?" tiin ka thiannu chu ka han nuih a.

"A rilru a thlak mai mai lo ang. Tihian Richard nen boruak in nei tawh lo tih a hriat hnuah a rawn lang leh ania, han ngaihtuah ve teh" a ti a, a thutak phian a.

Chhang tawh lo in ka ngawi reng a, ka ngaihtuahna chu a buai ve deuh nak a, Muankima che zia chu ka han ngaihtuah let neuh neuh a, thil ni thei chu a ni ve ta deuhin ka hria.

Ka haw hnu thleng chuan ka rilru chu hun kal tawh lamah a vak kual ruai a, high school naupang mai kan ni a, chuti taka a lak serious chu ka ring thei lo. Ka inbual fai hnu chuan chaw kan ei deuh nghal mai a, inkhawm zan a nih avangin inkhawm tumin ka insiam a, ka thian tam zawk, Latei tiamin pasal an neih tawh avangin mahnia biak in lam ka pan a ngai fo a, pasal la nei lo hmundanga hnathawka awm an rawn haw hlauh anih loh chuan ka mal tlat viau tawh. Biak in ka thlen hma deuhin bike pakhatin min rawn tlan pel a, min pelh hnu deuhah a ding a, Muankima a lo ni a.

"Min lo nghak dawn emaw ka ti a" a tih chuan a fiamthu emaw tiin ka nui deuh a, a nui ve hauh lo.

"I fiamthu anih ka lo ring a" ka tih chuan a nui ta suk a.

"Banah min lo nghak rawh aw" a ti a, a tlan ta nghal a. 

Ka inkhawm chhung zawng chuan thildang ka rilruah a lut thei lo, Muankima ringawt chu ka lo ngaihtuah leh thin. Anihna takah chuan high school kan kal lai zawnga ka vei ruk theih zia te kha, ka thianthate takngial pawh ka hrilh ngam lo a, tun thlenga an laka ka thu ruk neih chhun a ni hial awm e. Ka vei lutuk thin avanga rilru put ka duh luatah Richard nen kan inzui ta kha a ni a, min duat theih em avangin amahah ka bei nghet ve ta chauh kha a ni a, ka rilru ang a lo pu ve reng tura ka ngaihtuah chuan ka sa hat hat hian ka hria. Banah chuan muang chang hian ka chhuak a. Kohhran hall bulah min lo nghak reng tih ka hmu ru reng a, hmu hmasa angin ka lang duh lo. Min lo ko vat a, a bike dahna lamah chuan kan inzui a. Ka khur ru deuh dar dar a, chutianga ka awm ringawt pawh chu ka duh lo tak zet a ni. Tim dai hian a kawrah chuan ka vuan a, a nui hak chu ka hre reng. Kan in kan thlen chuan ka chhuk vat a, thingpui in turin ka han sawm der a, ka rin loh deuhin a bike chu a hung tha a, min rawn zui ve mai a. Ka chhungten min lo en deuh ha hlawm a, an tum loh deuh ka hruai haw vang tih ka hre reng a, mahse, tha takin an lo be ve luam hlawm a, ka lawm ru hle. Inthlak turin room lamah ka luhsan a, hrehawm a tih hlauin ka chhuak leh vat a, kan monu(u chhantei) nen an lo titi mawlh mawlh a, ka thaw a veng deuh huai. Ka pa in thingpui lum turin min ti nghal zat a, choka lamah chuan ka phei tlang a, U Chhantei chuan Muankima chu a rawn tir phei thuai a, ka nuih a za ru kher mai. Kan dining table chu a bawh a, a kut chu a tlir deuh tlat tlat a, sawi tur ka hre lo a, a hre bik lo a ni ang, kan ngawi dun rauh rauh a.

 "Lalthana te inah kawi ka ngai a" a ti zauh a, "Mahse, hmanhmawhthlak chuang lo a" amah vek chuan a ti leh a.

"Anih chu" ka ti ringawt a, ka va en a, a lo nui suk a, ka nui ve ta ringawt a.

Thingpui a in zawh chuan Lalthana te in lama kal tur chuan a inkhalh chhuak a, a tlan liam hnu chuan inchhungah ka lut leh ta a. Ka pa chuan min lo melh run run s, sawi duh a nei leh a ni ngei ang.

"Lalmuankima te ang lo kawm chiam kha a tha ber lo ania. A thian kawmte atang hian a tha bik tawp lo ang" a ti nghat a.

"Ruihtheihthilah a fihlim viau thin asin" ka tih chuan engmah a sawi zui tawh lo.

Ka mutnaah chuan ka ngaihtuah neuh neuh a, a thiante an ni a, an zingah a tal tam chuan fihlim loh chin pawh a nei thei tih ka hria. Chung ka ngaihtuahna avang ringawt pawh chuan ka rilru chu a hah ut ut a, ka hriat thin mizia leh nungchang kha ka pu se ka ti tak zet a ni.

Inkhawm zan apiangin min rawn sawm ve ta ziah a, a inkhawm remchan dawn lo pawhin tha takin min rawn hrilh thlap thin. Inngaihzawnna thu sawi lo mah ila kan inngaihsak tawn a, kan chhungril hi a inpawh thlap tih kan hria. A thiante nen rawn len chang an nei a, inkhawm bana min zui haw anih loh chuan a hranpa in amahin a rawn leng ngai lo. Nikhat chu school atanga ka haw tur ka scooty ke a puncture avangin kan thawhpuinu rualin ka haw a, kan veng a in an loh avangin Zarkawtah ka chhuk a. Min kotu an awm tlata ka hriat avangin ka han hawi kual a, Richard-a chuan rem leh rem lo hian min rawn ko lawm lawm a, ka bula dinna remchangah chuan a rawn ding chhunzawm nghal a. Ka hnial chung chung min thlah a tum luih tlat avangin ka hnial zo ta lo. Rilru nuam chiah lo chuan ka chuang ve ta nge nge a, kawna chhuk mai ka tum chu a phal leh ta tlat lo. Kan in thleng min thlah a, leng tur pawha sawm chuang lo in ka lut ta nghal a. Ka chet dan chu a mawi lo tih ka hria, mahse, Muankima chu ka rilruah a rawn lang tlat a, ka inthiam lo a ni. Ka beisei loh lutuk in zanah Richard-a leh Afela an rawn lang hlawl a, ka hrilhhai lek lek zawk. Ka chhungte nen an inkawm bawrh bawrh s, kilkhatah ngawi rengin ka thu a, ka phone chu khawih tur bik hre lo in ka khawih kual mai mai a. Rei vak lo hnuah kawngkhar a rawn ri dat dat a, lut tura ka tih chuan Muankima chu zum dak hian a rawn lut a. Sofa single - a ka thut avangin ka thutna bula awlah chuan a rawn thu ve a. Ka chhungte leh Chard-a te inkawm chu kan ngaithla a ni ber. Thingpui ka lum a, kan in zawh chuan kalna tir a neih chhuanlamin a haw ta a. Engmah sawi lo mah se nuam lo ka ti ru kher mai. Veranda thleng ka thlah a.

"Va lut rawh, inleng i neih kha" a ti a.

"Eng nge i hmanhmawh em em a?" ka tih chuan a thaw halh a.

"Lalthana te nen thil tih tur kan nei a, ka va phei phawt ang e" a ti a. A bike dahna lam chu a pan ta a. A tlan liam thleng ka en a, tui lo zetin inchhungah chuan ka lut leh ta a.

Richard-a te haw hnu chuan mu turin room lam ka pan a, ka phone ka phawrh a, whatsapp ah Muankima chu ka bia ang nge be lo ang tih ka ngaihtuah a. A online reng tih ka hmuh chuan ka be leh mai ngam lo. A whatsapp status chuan ka mit a la riau a, ka han en chuan, 

*Beisei bo ka beisei leh thin*

Tih hi a lo hmang a. Ka na zawk ringawt.

Ka phone ka dah a, ka mu tawp a, engemaw tal sawi se ka ti a, a ngawih tlat avangin hrehawm ka ti. Ka lo muhil lek lek tihah ka phone a rawn ri a, Muankima a ni tih ka hriat chuan ka pickup vat a.

"I inlengte chu an haw tawh em?"

"Haw loh a hun mi?"

"Zual.. Tinge ani kher?" a tawp chat a, a aw-ri ah na a ti tih ka hria.

"Ka sawifiah thei alawm, i ngaithla duh si lo a" ka ti a.

"Ka beisei phak miah loh thil ka lo beisei avang hian keimah leh keimah hi ka inti na mai mai a ni. Ka hrethiam tawh e" a ti a. Min mangtha hnuah phone a dah a.

Thil awmzia hre chiang lo leh min zawt duh siloa a ngaihdan a kaltlangpui chuan min tina a, insawifiah kher a tulna ka hre bik lo.

Chumi zan atang chuan kan inah a rawn kal ngai tawh lo a, biak ina ka hmuh oawhin kan inbe ngai lo. Hmeichhe lama a to zia ka hria a, aman a ngaihsak loh thin em avanga a tih beidawn hnem zia pawh a chanchin ngaihben thin ta chuan ka hrechiang ve khawp mai. Tunah erawh tunge a kawp ber tih hriat lohin a zui kual duah hlawm a. Ka rilru tih nat a tum vang a ni lo tih ka hria, mahse, chung ho nena an inzui ka hmuh chuan ka na em em zel a, a bialnu an ni lo tih hre mah ila, min hlat a tumna hmanrua an nih avangin ka thik lo thei lo. Inkhawm bana min zui haw ziah thin kha a lenna hmun a lo dang a, inhmuh fuh chang pawhin kan inhmu lo der ta fo a, a rukin keimahni leh keimahni kan inti na tih kan hai der hlauh thung si.

School ah chuan naupang exam vengin kan duty a, ka thawhpuite chu an phusa riau hian ka hre pek a. A chhan awm ang ka hre lem lo. Naupangin paper an rawn submit kim a, paper chu ka remtha mawlh mawlh a.

"Naktuk lamte engtia hman nge i tum?" kan thawhpui Lawma chuan a ti a.

"Enge hman tur a awm em ni?" ka ti a.

An vai chuan an nui ta vek a.

"A ngaihzawng neih loh thlak mange" tiin min fiam zui ta nak nak a. Valentine's day tih ka hriatchhuah meuh chuan ka nuih a za ru kher mai.

In lam panin ka inkhalh haw a, dawr hrang hrangah chuan tleirawl te te, nula leh tlangval gift lei tur te, lei tawhte chu hmuh tur an awm zut mai a. Ka tan tangkaina awm lo ta chu ka tlan tlang ta zel a. Kan buaipui ve nasat thinzia ka ngaihtuah a, tute mah chu ka dem lo. Zanah paper ka check mawlh mawlh a, Richard-a te thian dun rawn len tum pawh ka lo hnial ve hmak a, beisei tura ka awm ka hriat loh tehlul nen chutia rawn len a ching thar leh chu ka duh lo a ni. Ka check zawh meuh chuan a lo tlai tawh ang reng viau a, ka intihfai hnuah mu turin ka insiam a. Whatsapp ah ka han lut a, group msg ka en kual thuak thuak hnuah whasapp status ka en kual thuak a, Muankima hming zawnah chuan ka tawp chat a. Ka view duh lo na a, a chhiar theih vek tho..

*i duh emaw duh lo emaw, ka valentine i ni tho ang*

Smiley a tlar phei tuar a, ka nuih a ti za pha ve lo. Ka mu a, ka muhil lawk thei lo. Anihna takah chuan pangngai taka inngaihzawnna kan nei lo a, na tur ka ni lo tih ka hria, mahse, ka na tlat si chu ka hrethiam thei lo a ni.

A tukah school lam panin ka chhuak leh ta a, Valentine's day hian danglamna engmsh min thlen ve dawn lo tih ka hria a, ka beisei hek lo. A nih dan tur angin exam ka veng a, ka thiante titi thawm erawh ka hre kar thung. An ngaihzawngte gift an lei an inhrilh tliar tliar a, ka lo nui ve suk suk a, mi hlim hmel hian min tihlim ve thei khawp a lo ni. Banah ka inchinfel hnu chuan haw turin ka chhuak a, garage ah ka scooty lak chhuah ka tum chu ka hmu ta mai lo. Ka thianten min fiam a nih ka ring a, mahse, ka han hawi kual chuan chutianga min fiam duh an awm ka ring si lo.

"Saw chu Zuali scooty a va ang ve" tiin Lawma chuan kan hostel kawt chu a kawk a.  Ka va en chuan a lo ni chiah mai, balloon sen a lo intar chuai a, rose nen  a lo khat chuk a. Ka thawhpuite chuan hmuhnawm tih hmel zet hian an en thap bawk a. A neitu ber ka hrilhhai ta ber niin ka hria. Ka han pan hnai a, hosteller ho chu an lo dak thap a, an nui tha hlawm a. Chutianga en nawm rawn chuahtu chu ka haw tak zet a ni, ka scooty kher kher a hmang chu min hmusit niin ka hre bawk a. Ballon pawh thlak ka tum chuan hostel atangin Lalmuankima chu a rawn chhuak a, chu veleh naupangho chu an lo au a. Ka bulah chuan a rawn thingthi a.

"Will you be my Valentine?" tiin rose sen hi a rawn lekkang a, naupangho chuan kut an lo beng thap thap a, ka zak bawk si chu ka hmai te chu a sen vek hian ka hria.

Rose chu ka la a, ka bu ta nghat a. Chu veleh ka thawhpuite chawp chuan an au a, kut chu an beng ta dur dur a. Muankima chu ka han sik vak a, a lo nui sang a, a hmela hlimna lo lang chhuak chu ka hmu lo rei tawh a, ka ngai hman hle tih ka hrechhuak.

In kan thlen chuan ka hau a, chutiang khera a tih a ngaih loh thu ka sawi chuan a nui mai mai a. Min kuah a, ka talchhuah hlau niawm takin nghet takin a kut a suih a, a thaw ham ham a.

"Mi tam tak karah chuan min hnial ka ring lo a, i duh emaw duh lo emaw ka Valentine i ni ang ka ti lo em ni?" tiin a status a ka thil hmuh chu a rawn sawi chhuak ta a.

"Keimah i tih chhan tak tak maw?" ka tih chuan min chhang tawh lo. Min fawp a, keipawhin ka lo chhang let ve a. Kan inen a, kan nui leh ringawt thin.

"Richard-a nen khan in inkawp leh emaw tia ka natzia kha i hrethiam pha lo ang" ati a.

"Engmah min zawt lo anih kha" ka tih chuan ka biangah a fawp a.

"Ka thikzia chu ka sawi fo tawh kha, ka na em a ni. Min chhanna tur ka ngaithla ngam lo a, a dik tia  min chhan kha ka hlau em a ni. Dik tak chuan ani kher kher ni lo se chuan ka kaltir phal lo ang che. Ani kha chu ka khing pha lo tih ka hria a" a ti ta a.

"Thil pakhat ka hrilh ang che aw" ka tih chuan a bu nghat a. "Richard-a nen kan nih hma atang tawh khan nang hi ka duh tawh chea, chuan, vawiin ni thlengin ka la duh reng bawk che" ka ti a.

Min kuahna chu a thlah a, mak tih hmel zet hian min en ta reng a.

"I uang lo tiraw?" a tih chuan ka lu chu ka lo bu nghat a. A mittui chu a parawl teuh hian ka hria.

"Engtikah mah min kalsan hi ka remti ngai lo ang. Ka nghak chhuak ta che" a ti a, ka chalah chuan a fawp a, "Valentine's day gift ka dawn tawh zingah nang hi i la hlu ber. Ka hmangaih che" a ti a.

"keipawhin ka hmangaih che" ka lo ti ve sap a.

Valentine's day ah tak kan inhmangaihna bul chu kan tan tha ve ta, hlimna chhiar sen loh chang chho zelin hun lokal turah pawh heng aia nasa hi kan la chang ang tih beiseina nen kan thlir a. Mal taka hmang tura inngai kha hlimna chhiar sen loh nen kan hmang ta zawk a, mumang mai anih ringin ka han insik a.

"ai ah...." ka ti hlak a.

Duat taka min kuah chungin Lalmuankima chu a lo nui var var a, kan infawp a, Valentine's day gift hlu ber chu ka kuah ta veng veng a.