LALTHUTTHLENG KIANGAH

LALTHUTTHLENG KIANGAH

Kristian Thalai Pawl inkhawmpui lian ber General Conference Champhaiin kan thlen dawn avangin keini thianho pawh usher turin min ruat chhuak ve a, kan naupanlaia Conference kan thlen bak kha Champhaiah hian kan thleng ta miah lo va, chutia inkhawmpui lian kan han thleng tur chu a phur awm zawnga ngaihtuah  chuan phur awm tak pawh a ni ve reng reng. Chutih rual chuan chanvo nei lova awm chu ka chak a, tling lo chung chunga kan phak tawk rawngbawlna a nih vang chauh zawkin a tira inhnuhdawh ka tum pawh ka thulh leh ta a ni.

Mikhual tam zawk an rawn thleng tawh a, mahni mikhualte pawh ngaihsak hman lek lovin kan duty tur hrerengin chaw kaw puar pawh ei hman lovin Pandal awmna hmun New Champhai lam panin kan liamthla vat a, inkhawm turin a then hma takah an rawn kal dawn tih hrerengin inpeih atin kan duty na tur hmun takah kan ding nghal sang sang a, vawi tam tak ka tih tawh thin ni mah se hetiang inkhawmpui lianah hian ka la tih ngai loh avangin a ruk tak chuan ka zam ngei mai. ka duty na hmun chu Missionary leh Pastor te, Pro-Pastor ho thutna tura an dah bik na lamah a ni a, tlar hnih anni ho thutna atan kan zuah a, a bak zawng chu midang thutna tur a ni. Mi chi hrang hrang an rawn lut a, mipui thutnaa thu tura ka tih tam tak kha pro-pastor te an lo ni a, zak ru viau mah ila zak lo anga lan a ngai tlat a, hlim hmel put reng a ngaih bawk avangin mi hriat loh in kan thaw leh hak hak thin. Thalai sing tel kalkhawmnaah chuan mi chi hrang hrang, hmeltha deuh leh chhe deuh te, hausak hmel deuh leh retheih hmel deuh te, mi chi tinreng hmuh tur an awm kim hle a, chung zinga ka thil tawn chu a ni ka thiam ang tawka han ziah chhuah ka tum ve chu.

Inkhawmpui tiak zan a ni a, taksa a lo rim tawngkhawng ve deuh bawk nen ka duty na hmun atang chuan pandal pawn lamah ka han chhuak a, boruak dang han dawn ve chu ka tum a ni. Pandal chhunga leng lo mi eng emaw zat chu pawn lamah an awm fer fur a, ka han hawi kual vel a, thalai heti zat mai inkhawmpui ngai hlu a Champhai khaw vawt tak mai an han pankhawm sang sang te chuan ka thinlung hi a ti lawm em em a ni. Ka han hawi kual leh chuan mi pakhat ka mit la tak mai hi ka hmu fuh ta tlat a, thian a nei lo anih ka ring, pandal sirah chuan inthlahrun hmel tak hian a ding a, a thawmhnaw chu ka han en a, inkhawmpuina atan chuan mi tam takin an iai ka ring. Khiangkawi ipte hlui tawh tak mai hi a ak a, a pheikhawk te chu siai a hmu ngai lo tih hriat tak hian a ro hrup a, a kekawr leh a kawr pawh chu kum tak a lo ha tawh ang tih a rin theih, ka en reng lai chuan muangchangin a inher a, pandal chhungah luh a tum ni maiin ka hria. Eng nge ka hriat tih pawh ka hre lo, hmanhmawh takin ka zui vat a, pandal chhungah chuan a hnung berah thutna awl awmchhunah chuan a thu vat a, kei chu a sirah ka ding nghal bawk a, ka zui lut tih a hriat chu ka ring hran lo. Chu lai hmuna duty ka thiannu chu ka han kheuh zeuh a, ka duty lam min lo ngaihven sak turin ka ti a, thuawih takin ka duty na lamah chuan a kal ve mai bawk a. Chupa che tla vel en chu ka duh tlat a ni. Hla sa turin kan ding a, mi din vek tawh hnuah inthlahrung tak hian a rawn ding ve a, kan hla sak tur lam pawh ka lo hre chiah lo. A changhnihna kan sak atang chiah ka zai ve a, “LALTHUTTHLENG KIANGAH” tih hla kan sa a lo ni. A chang kan sa zo a, a bul atangin kan la nawn leh nghal a, ka piaha ding chu ka va melh zawk a, chutah chuan a ni ka thinlung tikeh sawm vek thil ka va hmuh tak chu ni!

“Phurrit phur leh chau takin lungngaia rum changin
Khawvel hi hrehawm ka ti thin
Mahse zam mai lovin hma lam ka pan zel ang a
Chatuan chawlhna ka la thleng ngei ang”

A mittui a hru zeuh a, ni e, a thawmhnaw chu ka han ennawn leh ngat a, khawvel hi nuamsa takin a hmang lo a ni tih chu a lang chiang khawp mai. Khawvel hi hrehawm ti em ema a hman hi a va tam ve dawn tehreng em! A chang chuan a vela mite a han thlir ve thin ang a, khawvel changkanna leh hmasawnna te chu a zuanin a zuang a, chung karah retheihna in a duhtawkin a han nuai vel bik tur chu a hrehawm dawn lutuk hian ka hria a ni. Pathian biakin pan tur pawhin kan neih tlin bak bak kan inthuam tawhna khawvelah hian pheikhawk ro khir hlui tawh tak nena Pathian fak hi thil chakawm a nih ka ring hlawl lo, mahse, hemi hi engati bik nge? Chu chu a ni vawiin ni thlenga ka nun khawih em em tu lo ni ta leh Pathian neih hlawkzia ka hriat tharna lo ni ta chu.

“Van kawtthler mawiah min rawn zawn chuanin
Lalthutthleng kiangah min rawn hmu ang
Van Angel leh tlante nen fakin kan lo zai ang a
Lalthutthleng kiangah min hmu ang”

A thunawn kan sak lai chuan a insum theihna zawng zawng kha thiah a ni ta, a mittui chu a sur hian a rawn sur zung zung a, a ban chu chung lamah a phar chho a, a ti der lo a ni tih chu tupawhin hmu se an hria ang. He leiah chuan a hringnun zinkawng a mam lohzia leh retheihna in a tuam hnehzia chu a takin ka hmu a, mahse, a awmna tur hi a va han hrechiang si em! A phuahtu in a phuah avanga sa mai mai a ni ve lo, ani chuan a takin a tawmpui tlat a ni. Van kawtthlerah khian ani chuan address a nei a ni tih a hrechiang tlat a, Lalthutthleng kiangah min rawn zawng ula, min hmu nghal ang tiin chu a awmna tur chu a hmufiah bik tlat a ni. Ka mittui chu ka han hru zauh a, ka thawmhnaw chu ka han en vel a, chupa ai chuan ka dinhmun a tha zawk tih ka hria, mahse, ka neih ve miah loh thil a nei tlat tih chu fiah em em hian ka thinlungah a rawn lang a, kan dinhmun hi inthleng ta chiah ila, Pathian hi ka la fak thei tho ang em tih thlengin ka inzawt a, mite hi chuan an va lo hmu chiang thin tak em! Tha ve leh Pathian tana inpe ve tawka ka lo inngaihna te chu chumi darkarah chuan thiah sakin ka awm a, chu mi tlawm tak Pathian a nuna nei tak tak tu chuan zirlai thar min lo zirtir reng mai. Ka zak ru ngawih ngawih a, malsawmna chhiar sen loh ka dawn laia lawmna chang hre lova ka vui em em thin te, ka chantawka lungawina ka lo neih lohzia te chu ka hrechhuak uai uai a, Lalthutthleng kiangah chuan kei hi min rawn hmu ve ang em? Hei hi ka ngaih pawimawh ber tur zawk a lo ni tihte chu ka han hre thar a, thinlung lawm em emin ka duty na lam pan chuan ka phei ta a.

-Mami Lalhmangaihzuali Chawngthu
110320170705