LET ME LET GO

LET ME LET GO

"Japan lama thlawk chhuak tur Air India flight 306 chu chhum zin nasat lutuk avangin cancelled ani"

"Shitttttttt......"

Ka piah lawka thu chu ka va melh a, pawi tih hmel em em hian a kawng a lo dawm a, a phone la chhuakin tuemaw hi a be zui nghal mawlh mawlh a. Ka en reng a, khawiah emaw ka hmu tawh tlat in ka hria ani. A coat hak chu a inhmeh hle a, a pa lian in a hmel a zahawm hle a, a saptawng thiam dan lah chu awihawm loh zawk niin ka hria. Achhan chu helai hmunah hian heti taka thiam ka la tawn loh vang ani. Chutia ka lo en reng chu a hria ani ang, min rawn melh zawk a, rang takin ka hawi let nghal thuai a, za lo taka a nui hak ri cu ka hria, ka zak lutuk chu ka sen nghal awp awp a. Chutih lai tak chuan ka mi nghah lai mek ka cousin Ramtei chu a rawn lang hlawl a, hlim taka inkai chungin ka inluahna hmun Vasant Vihar lam chu kan pan dun ta nghal a.

Delhi ah hian zirna avangin hun rei tak ka awm tawh a, M.A(English)ka zawh hnuah M.Phil ka bei leh mek a. Chumi pah chuan Chanchinbu pakhatah English article ziaktuah ka tang bawk a ni. Ka hna chu hlawh tam tham ni lo mahse ka tuina ber anih avang hian nuam ti takin ka thawk a, ka zirna min tumsak thei ve ringawt pawh hi ka lawm tawk ani. Ka cousin Ramtei hi Hyderabad a lehkha zir ani a, an chawlh hun chhung reilote ka bula hmang turin a rawn kal a ni. Ani hi ka patea fanu neihchhun ani a, tlema an duat sual ve deuh ani nghe nghe. A u te aiin kei hi min ngaina in min zah zawk a, a thuruk engkim a hrilh na ka ni ve a. Keipawhin ka ngaina a, hun remchangah chuan kan intlawh pawh bik hle ani. Ka chhang chiah nen an inrual a, mahse amah hi lehkhathiam thei tak mai ani a, uluk taka pawl sawm ka beih nawn kum in pawl kua bawhkanin min rawn pawl rual a. Chutatang chuan kan in classmate chho ta char char ani. Higher ah pawh sikul khatah kan kal a, college erawh kan line a in an tak loh avangin kan lut tlang ta lova, JNU Delhi ah ka zawm laiin ani erawh Hyderabad ah Architect zir in a awm ta thung ani. Naupan tet atanga a tuina ber ani bawk a, a tira ka ngaihtuah ang aiin a ti tha thei phian a, lehkhazir chung oawhin life a enjoy theih ti bur chi ani a. Keiin theihtawp takmeuh meuh chhuah chunga ka pass naah ani chuan awlsam takin a ti mai zel ni hian ka hria a, ka awt thin hle nghe nghe. Nula hleitling leh hmelchhe lo tak, kan unau ho ah pawh langsar bik anihna te hi a ruk tak chuan ka chhuang ve em em thin a. Midang tam tak kara kei min ngaina bik pawh hi nuam ka ti a, a harsatna hmunah tlansan ka tum ngai lo. Chaw kan eikham chuan rei vak lo kan titi a, ruah chu a sur cherh cherh a, Ramtei chu a mu vat a, thlawhnaa a chuan apianga a tihdan than ani a, han titi pui luih zel pawh ka tum hran lo. Tv ka en a, hmuhnawm tih viau pawh ka nei lo, hnathawh tur tlem ka la neih chu ka enghelh ru viau a, khaw awmdan avang erawh chuan ka peih lo ru kher mai. Hetiang hunah hi chuan mu chunga lehkhabu chhiar a nuam ka ti a, hnathawh tur lo inchhawp lo ila chuan ka tih ngei tur pawh ani. Tv chu off tumin remote ka han ban a, advertisement ka hmuh cuan ka thil ban chu ka tawp nghal chat a, IT khawvela International ah pawh lang phak khawpa company thangduang "Infoplus" in English thiam tak an mamawh thu chu ka han chhiar a, hlawh pawh tuna ka hlawh let thum lai ani lehnghal. An address kimchang chu ka chhinchhiah a, dil ve reng reng tur ani tiin ka hnathawh tur chu ka tan nghal mawlh mawlh a.

Gurgaon-a Infoplus building lian leh pui em em hmaah chuan ka ding reng a, Ramtei chuan min han nek deuh a, hetiang huna ka zam theih zia min hriatpui a, ani hi awm lo se vawiin pawh hian helai hmun hi ka thleng leh tak tak kher lo ang. Ka kut thlan dap chu ka kekawr ah ka han tat a, ka thaw hawk a, inchhung lam pan chuan kan kal ta nghal a. Kan interview na hmun tur min kawhhmuh lam pan chuan lift ah kan chuang a, Ramtei chuan min fuih mawlh nawlh a. Ka tling ta lo anih pawha ka inchhir loh nan ka theihtawp chhuah tur chuan min hrilh mawlh mawlh a, keipawh a hma ai chuan ka zia awm ve ta deuh bawk a. Interview tur an lo awm nual tawh a, a then chu ka college kalpui te pawh an ni ve a, mahse inbe ngai lem lo kan nih hlawm avangin kan inngaihsak hran lo. Lehkha min rawn sem a, kan luh hun tur alo ni a, a tawp lam ka ni tih ka hriat chuan ka rilru a hmanhmawh nghal ut ut a. Ka article ziah chu thehlut hmanhmawh tura min rawn tih leh thut avangin zan lamah pawh rei tak ka men phah kha ani a, a hunah tak ka thehluh hman loh chuan a pawi thei dawn tih ka hria a, chuvang chuan ka hmanhmawh ru riau ani. 

"No.98 Miss Lalawmpuii"

Ka thutna atang ka tho zawk a, ka rilru in ka tawngtai mawlh mawlh a, Ramtei chuan a kutzungpui ti pir zauh chung chuan,"Gud luck"a ti sap a. Kawngkhar chu ka nam hawng a, ka luh rual chuan mak tak maiin ka zamna zawng zawng chu a bo ta duak a. Thutna tur min kawhhmuh ah chuan ka thu a, vai ho hmaah ka zam lovang ka ti a, ka han insangmar leh a. Zawhna min zawt kual hrep a, a tawpah ka zawna thu pa chuan a chair chu a han pawt hla deuh a, a bula thupa chu bekbawrin a tho a, kilkhata room chu hawmgin a lut ta daih a. Rei vakloah chupa chu a rawn chhuak leh a, mahse a hnungah chuan zui tu an rawn awm tawh thung. An rawn kal hnai zel a, ka ip chawih a, airport a ka hmuh pa ngei kha ani. Ka kut chu ka han hum ruh a, ka zawnah tak chuan a rawn thu a, uluk fahran hian min thlek a, chutah saptawng nalh em em hian min han be zui ta nghal a. Ka theihtawpin ka in control a, tha takin ka chhang a, a mitmeng lian leh zahawm tak maiin min melh pawh chu engahmah ka ngai duh lo. A han inthlahdul a, chair chu a han ngheng a, "Khawi lam chhuak nge i nih chiah le heti em em a english i thiam bik?"a han ti a. Chu fakna chu ka tan thil thar ani lo, mahse tuna min faktu hnen atanga dawn zet chu a nuam dangdai takzet ani. Duhtawka min interview hnuah lehkha pakhat hi min pe a, "Kan company in kan la tih ngai miah loh pakhat vawiin ni hian ka ti dawn, ka duh ka hmu miau si che a. Naktuk atang i hna i rawn zawm dawn nia"a ti a. A tho a, a hmaa a rawn chhuahna lam pan chuan a kal ta nghal a. 

Ka hna thar zawmni anih avangin uluk takin ka inchei a, darthlalang hmaah ka in en a,ka khi sak a. Mahni inrintawkna hian kan hmel a ti danglam tih ka hria a, ka sam chu sang takah ka tawn vah a, room atanga ka chhuah chuan Ramtei chuan min lo nuih var var a, "Ka unaunu hi makeup nena ka hmuh lohna che ava rei ta em! I lang nalh takzet, tuna i hman dan kha atawk chiah, hmang ziah ang che"alo ti a. Ka nui var var a, incheina hun ka neih ngai loh em vang hian ka inchei khat a, ka inchei chuan ka nalh ve tih ka inhria. Ka hnathawhna hmun tur panin in ka kal a, ka awmna atangin metro in minute 20 kal vel ani a, rang takin in report na tur a min tihna hmun chu ka pan tlang nghal a, ka in report fel hnuah pu ber chu hmu turin a office lam ka pan leh a. A secretary nen chuan kan lut a, min hnungchhawn zawngin alo thu a, phone alo hman avangin a secretary chuan min chhuahsan a, keimahin chu room zau nuam takah chuan ka ding ta ran a. Min rawn hmuh chuan a thu tha nghal vat a, a phone hman lai chu a dah a, seat min kawhhmuh a, ka thu ve mai a. Ka hna tur chu a tlangpui min hrilh a, a hma khan lo ngaihtuah lawk vek tur ka ni a, "Ka P.A ah i tan pawh a ngai maithei, ka duhzawng ka hmuh vawikhatna i ni a, harsatna a awm thei angem?"a ti dam dup a. Vai ngaisang lo em em mai ka ni a, mahse mak tak maiin ka boss thar Harshil Bhatia hi chu ka hmuhdan a dang hle a, airport atang tawh khan ka lo ngaisang ru reng tawh niin ka hria. Ka thutna tur min kawhhmuh ah chuan ka thu a, file engemawzat inchhawp hnawk nuai chu a rawn keu a, pakhat chu la chhuakin min pe a, "Hei hi Japan-a ka ken tur ania, hmanniah ka P.A in hmanhmawh takin alo compile ania, nalh deuh zawkin a chhung thu kha min lo renkhawmsak ta che"a ti a. 

"Lunch ei a hun e, i thawkrim lutuk ange chawhma atan chuan a tawk viau alawm"ka bula ding chu tunge tih ka hrechiang khawp mai. Ka han hawichhuah chuan min lo nuih sak a, ka thiltih lai dah in ka zui chhuak ve a. Ground floor kan thlenthlak chuan nula sang leh hmeltha zet hian nui sangin Harshil chu alo bia a, "Hei hi ka nupui hual Roopa anih hi, hei ka hriat tawh ah chuan english ala thiam ber ka tih kha anih hi"tiin min han inhmelhriattir a. Ka bula nula nalh chungchuang tak chu vannei ti zet hian ka melh reng a,Harshil-a secretary Chaya ka hmuh chuan ka boss te chu ka kalsan a,Chaya nen chuan lunch ei tur chuan kan inzui chhuak a. Chaya chu nula ngainatawm deuh hi a ni reuh a, a titi siam siam a, office chungchang ka hriat loh tam tak min hrilh a, ka hriat thar pakhatchu he company hi Harshil-a nupui hual Roopa-i pa ta ani tih chu. Harshil chu vannei ka ti hle a, nupui hual hmeltha tak aneih bakah a rochun mai tur company a nei bawk a, amah a fing in a lar a, pian man a awm hle in ka hria ani. Break ala zawh loh avangin office chu min fan kualpui a, hah hnawka kan kual hnuah kan room lam kan pan leh ta chauh a. Chawhnu pum deuh thaw ka hna ka chhunzawm hnuah ban alo hun ve mai a, Harshil chu alo let tawh lem lo.

Saturday hi half –holiday anih avangin ka office ban veleh Ramtei nen shopping turin kan chhuak a, Monday ah Hyderabad lama min letsan leh tawh dawn avangin kan hun neih that ni a chhuah chu kan duh ani. Saket hmuna Select citywalk mall ah kan kal hmasa a, mamawh a ka hriat lem loh engengemawzat chu Ramtei chuan a khaibawr leh teuh tawh a. A tihdan phung pangngai anih avangin makah pawh ka ngai lem lo. Haw tuma kan inbuatsaih lai mek chuan rin loh tak maiin kan thiante nen kan inhmu fuh hlauh a, movie en an han rawt leh chuk chuk a. Ramtei chuan a lo aw rang leh kher mai, ka tan hnial a nawm loh avangin phur lutuk lo chuan ka zui veleh ta nge nge a. Ka duh aia rei mah kan awm hnuah kan haw ve ta a, in kan thlen meuh chuan khua in min thim hnan tawh a, ka in sirah chuan mi pakhat min hnungchhawn zawngin alo ding a, a thim deuh tawh avangin ka hlau ru viau lehnghal, Ramtei chu ka han sik a, rang takin a aw a thian a, chupa chu a lo hawi a. Ka thisen kal lai te a tawp mai dawn in ka hria, na taka min siama ngawi renga min kalsantu Ramdinpuia kha ani. Min hmuh chuan a nui sak a, Ramtei chuan kawngka chu a hawng vat a, che lova ka din reng avang chuan min nemluh tumin min nawr a, “Pui.. ka be lawk duh che, khawngaihin” Ramtei chuan min nawr na kut chu a la thla a, “U.. in inhre ngai em ni?”a ti a, ka lu chu ka bu nghat a, inchhungah min luhsan ta a. Kan inbula park ah chuan ngawi rengin kan thu a, “Pui.. I laka ka thiltih kha a pawi ka ti lutuk, ngaihdam dil che ka duh ani”inthiam loh hmel tak hian a ti chuai raih a.

Kum nga lai liam tawha thil thleng chu ka hmaah a lo lang zut zut a, “Ramdin, min kalsan suh, I tello in ka awm thei lovang”a kawr a ka pawh beh tawk tawk laia, “Pui, hmangaih dang ka nei tawh, I tan hun ka nei tawh lo”min ti anih kha. Ka mittui chu ka khap per sak a, hun harsa ber ka paltlang laia ka natzia leh ka malzia te chu ka ngaihtuah kir a, engtikawngmah in kha hmunah khan ka let tawh lovang ka ti thin anih kha. Ka kut chu a rawn hum a, ngawi rengin ka lo melh tawp a, “Khatianga na khan ka siam tawh lovang che, chance min pe rawh”a ti ngawih ngawih a. Ka kut chu la sawn a, “Ramdin, kalsan ka nih atang khan ka tan chuan mitthi I ni tawh. Ka hun paltlang zawng zawngte ka ngaihtuah hian nangnena bul tan leh chu ka duh lo”ka ding a, rang takin min vuan a, “Min tibuai tawh lo la a tha zawk ang. Nunthar in ka nung tawh a, hmana I tellova khawsa thei lo thin kha tunah chuan a hlim ve tawh asin”ka ti a. Beidawn hmel zetin min melh a, hawi let tawh lovin ka kalsan zui nghal a. 

“Vawiin chu kan boruak a dik chiah lo anih hmel”ka melh ngai ka lo melh ngawt ngawt a, ka bulah chuan Harshil chu alo ding reng a. Ka harhchhuak thut a, ka hnathawh lai chu ka chhunzawm mawlh mawlh a, khapa Ramdinpuia vang vek kha a ni. Mizoram House ah kan inkhawmnaah kan han inhmu leh zel khan ka nun a ti chau nghulh a, hmuh fo ka chak lo takzet a ni. Chuta karah Ramtei lah a awm tawh bawk silo, engkim chu ka ning vel vek ani ber. Chawhnu pumpui chu boss meeting naah ka awm tluan ve zak a, P.A ah min hmang ani der tawh. Paper a present lai chuan a pawimawh ho chu ka lo chhinchhiah a, ka rilru la pengtu ka tawng chu ka lawm letling viau bawk. Office ban hun pangngai aia tlai ah kan bang a, hmanhmawh takin Metro Station lam pana ka chhuak tur chu car hian min rawn tlan pel fua a, muangchangin a rawn tlan let leh a, tukverh chu in hawngin Harshil chu nui var var hian alo dak chhuak a, “Ka rawn hmuh hma che in I lo chhuak daih a, Vasant Vihar lamah ka kal dawn a, ka rualin lokal ve mai ta che”a ti a. Ka han hnial dawn zet na a remchang zawka ka hriat avangin ka chuang lut ve ta a. Titi phung engengemaw a vawrh chhuak a, a bula awm a nuamin a hahdamthlak hle a, “Gurgaon ah hian rawn insawn I duh em?”a ti a, ka lo nui mai a, “I duh chuan in luah tur ka ngaihtuahsak ang che”a han tih zawm leh a, “Ahh… ka duh vak chuang lo, college hi a hnai a, mamawh thilah kal nan a buaithlak loh a”ka ti a. Mak tih hmel deuh hian min en a, “College a? Master degree I zo tawh si a”a han ti a, “M.Phil ka ti leh mek a” “Oh….Min va surprise ve le!! Nang hi ka rin loh dan hlira I awm chu”a ti a, a nui sang a. A nuih zawnga a biang sum langsar lo taka lo lang chu a inhmeh dangdai hle in ka hria a, “Hun rei tak atanga ka hriat tawh I ni tlata hriatna hi ka nei a, a mak ka ti, kan la inhmu ngai lo tiraw?”a ti a. Aw tia han chhan ka tum zet na in airport a kan inhmuh thu chu ka sawi lang ta talh a, “Oh! Ni dawn tak e! chu chu anih chiah chu khawiah emaw inhmuhna kan nei tawha hriatna ka nei tlat ani. Khami ni khan ka zin tur thulh a ngai anih tak kha mawle”a ti a, a nui hak hak a. India gate kan thlen chuan a motor chu a han tiding a, I hmanhmawh lem loh chuan rei vak lo chawl lawk ang hmiang”a ti a. Hmanhmawh pawh ni ila ka hnial ngam kher lovang, khua chu kan han duan vel a, boruak lum hulh thin a zia deuh a, Delhi boruak nawm vanglai ber a ni awm e. Reilote takmeuh kan chawlh hnuah kan chhuak leh ta a, tawng tur kan hre tawh lo ani ang, kan ngawi reng a, a car hma chu a han hmet zeuh a, music chu rawn in play in ka hla hriatchian leh ka duh em em thin, mahse hun rei tak ka lo ngaihthlak ngai tawh loh, Faith Hill-in “Let me let go”tih chu chimbuai tu awm miah lo in a rawn sa ta hlarh hlarh a. Car seat chu ngheng in ka maimitchhing a, ka duh vang ni hauh lovin Ramdinpuia chu ka mitthlaah a rawn lang zawk a. Ka thu ngil zawt a, Harshil chuan min rawn thlek nghal vat a, zai chu ka kawk zeuh a, rang takin a ti sawn nghal a. A aw a han thian kharh kharh a, “I nunhlui nen inzawmna a nei anih ka ring, ka tihpalh”a ti a, “A pawi lo, a ho lutuk”ka ti chhuak thei ta hram a.

Inchhung ka luh chuan ka taksa mai nilovin ka rilru thlengin a chau hluah hluah a, reilote chhung la inhre mah ila mi hipna ngah tak mai Harshil chuan engemawti tak hian min muan veng veng a, ka duh ber thil erawh ani lo tih ka hrechiang.

PART-II

Ka hmaa mipui zi nuai nuai karah chuan mal in titakin ka kal phei zel a, vawiin ni hian ka dissertation ka thehlut dawn a ni. He college ah hian hun rei tak chu neitu chan chang takin ka lo lut ve tawh a, min kaihruaitu ber ni thin chu Ramdinpuia kha ani. Kawng engkimah min kep hneh em em thin a, kum thum tal tawp chu kan in zui ve a, khatih hun chhung khan sawiselna tur ka hre lo. Mahse B.A kan exam zawh rual deuh thaw in mak takin a awm a, na takin min kalsan ta ani. Chhungte awm lohna hmunah mal takin ka rilru na kha dam tumin ka bei let a, a namai lo viau anih kha. Ka dam taah in ngai in amah pawh theihnghilh ah ka lo in ngai hman hial a, mahse a hmel ka hmuh leh meuh chuan ka lo la theihnghilh lohzia ka hria a, min tina thei tawh dawn lo emaw ka tih kha ka lo la natpui hle bawk a ni. Min rawn kuai her nawk tu chu ka han en ha a, “Sir...”mak ti lutuk hian ka meng bial kawk a, “Mi a ang maiin I ding reng a, ka lo en reng che alawm”nui sang hian a ti a. Engvanga helai hmuna ihmu nawlh nge maw kan nih chu le ka tih rilruk mek laiin amah vek chuan, “Chaya khan college I tlawh hmasak tur thu min hrilh khan helai hmunah hian a ni ang tih rin ngaihna pawh ka hre lo. A mak hle mai”a ti a, “Principal nen an college IT chungchangah meeting kan nei dawn a, kan rei ka ring lem lo. I thil tih tur I zawh hunah helaiah hian min lo nghak dawn nia”a tih zawm nghak zat a. 

Ka batchmate Ankita nen kan inhmu a, ani pawh M.Phil thlenga ti tlang leh kan ni a, hnamdang zingah chuan ka nel ve ber a ni. Harshil ka nghahna hmunah chuan kan thu dun a, kan hnathawh te chu kan sawi dun melh melh a, “Puii, I english thiam dan ang em em hian thiam ila tuna I thawh lai chu ka thawk duh hauh lo ang”a ti a, ka lo nui mai a, “Ph.D I ti leh ngeiin ka ring a”min rawn melh ralh a, “Ka tling te anih ve ngai chuan”ka ti a, “Engvanga hna dang zawng lo nge I nih?” “Ka zirna avang hian 100% in hna ka thawk hman lova, chuvang chuan tuna ka hna hi ka tan chuan a tawk viau a, chuvang chu ani”ka ti a. Chutia kan titi lai mek chuan Harshil chu hla deuh tak atang a rawn kal ka hmu a, a coat sen duk lek lek a hak te, a sam han khuih pial chhoh dan te, engkim chu a inhmeh vel vek ani. Vasant Vihar leh Gurgaon inkarah a vawihnihna atan boss nen kan inphur leh ta. Tun tum chu a hma angin sawi tur kan hre tawh chiam lova, a khat tawka zawhna min zawt tih loh chu kan tawng tam lo hle. Mi fel tak ni mahse pu te uap na hi a na ve hrim a, ka awm a nuam lutuk chiah lo, “Principal chuan alo hre khawp mai che. Ka student ah chuan English a ka dah chungnun ber a ti che a, mi vannei chungchuang tak I ni”a ti a. Chutianga min sawi avang chuan lawmthu ka han hrilh a, “Karlehah an kan company nen function neihna turah host atan min lo dil che a”min rawn mit sir zauh a, awih loh hmel takin ka nui a, “Lehkha in a rawn umzui ngei ang che”a ti a, a thutak tih ka hria a, ka ngawi ta daih a. College function hrang hrangah ka lo host ve nual tawh a, mahse chutiang programme ah chuan ka la dingchhuak ngai lo. Office kan thlen chuan ka hna ka tan nghal mawlh mawlh a, Chaya chuan min rawn kheuh zeuh a, Harshil chu a room atang a rawn chhuak a, a hnugah mi pakhat hian a rawn zui bawk a. Chupa chu ka la hmuh ngai loh anih avangin ka lo ngaihven chiam lo, “A mitmeng sexy zia I lo hmu em?”Chaya chuan ka bengbulah chuan a rawn ti sa sa a. Ka nui a, ka lu chu ka thing a, “Engtinnge I lo en loh theih zawk? Khapa kha boss in kan software engineer thar tur a tih chu a ni thei angem le”amah chuan a phun sap a.

.“Oh my god!!!! Kawng ka lo en miah lo” ka coffee no ken min rawn sut vangin ka kawr chu a huh hnuang a, a scarft chuan ka kawr chu rawn hruk a tum a, rang takin ka lo in her a, “Ka va ti fai lawk ange”Chaya bulah chuan ka ti a, ka kalsawn nghal a. Anihna takah chuan ka thiam loh ve tho ani, thildang ka lo ngaihtuah nasa lutuk a, ka hma zawn kha lo en ila chuan ka pumpelh ngei ang. Washroom atanga ka chhuah chuan kawngkhar bulah hian mi pakhat hi bang nghengin a lo inkuangkuah than a, min hmuh chuan a lo ding ngil zat a,”A pawi ka ti takzet a ni, engtinnge kan tih ang?”a lo ti sawk sawk a. Chupa chu ka vawikhat hmuhna anih avangin ka han thlek deuh vang vang a, “Office copy ka nei tho alawm, a ho lutuk, ka han thlak ange”ka ti a. Ka hnungah chuan min rawn zui a, “Hetah I thawhna a rei tawh em?”a ti a, ala rei loh thu chu ka sawi a. Kan room panna lift a ka luh pawh chuan min la rawn zui ta zel a, “Mamawh I nei em ni?”chutia hmelhriat loh min zui chu ka duh vak lo ani. A dar chu a han chhin deuh ak a, “Ka hming chu Joshua ania, Josh tiin min ko mai thin a, software engineer ka nia, niminah ka hna ka rawn zawm thar a”a ti a, nelawm loh taka awm chu nuam ka ti leh chiah lova, ka awki chu ka han hniam deuh a, “Aw… ani maw… Ah,, keichu Lalawmpuii ka nia, Awmpui, Puii, min ko thei vek”ka han ti a. A kut chu rawn phar chhuakin kan han inchibai a, “Mapui”tiin a phun chhuak sap a, “I lam nalh hle mai”ka tih chuan a nui hak a, “Ni e tiraw”a ti mai a, min siai sak a. Ka tawng leh hma chuan kan room awmna kan thleng a, “Helai thleng hi ka thlah ang che, a pawi ka ti takzet a, ngaihdam dil nan naktuk tlaiah dinner min kilpui thei angem?”a ti a. Ka nui a, “Ka hre lo le”tih pahin room lamah ka lut ta a. Ka kamis chu ka thlak a, reilote hnuah hmanhmawh zet hian Chaya chu a rawn lut a, “Khapa kha, I kawr.. coffee”a ti bah nawk nawk a. Chutah ka hrethiam ta, “Khapa kha ani maw I sawi chu?”ka tih chuan,”Ni chiang e, a chhiat loh zia kha I lo hmu ve em?”a ti a. A hmel a chhe hauh lova, mahse Harshil chu ala tlul lo deuhin ka hre vet hung. Engvanga chupa chu han ngaihtuah chhuak nge maw ka nih? Ka chal chu ka han dawm vang vang a, ka ngaihsanna hian ngainatnaah min hruai lut vat ang tih ka hlau ani.

A tukah chuan office ban veleh Chaya nen kan inzui chhuak a, gate bulah Josh chu alo ding vang a, min hmuh chuan alo then sak a, Chaya chuan min sik nawk nawk a, “Dinner ei chhuak tur chuan ka lo nghak che”a bul kan thlen chuan alo ti a, “Yes pawh ka ti silo a”ka tih chuan ngainatawm tak hian a nui a, “Ngaihdam dilna ania, I pawm ngei a ngai alawm”a ti a, Chaya chu ka han melh a, a mitmenga phurna lo lang chhuak chu ka hmuh hmaih lo, “Anih chuan Chaya pawh hi lo tel ve rawh se”ka ti a, a remtihna ka nghah chhung chuan Chaya chuan mit tla lo chauh hian a lo thlir a. ka nuih a za ru viau a, “Awle, I sawi ang chu ni rawh se”a ti ta nge nge a. A motor la tura a kal chiah chu Chaya chuan min rawn kuah a, “Malsawmna dawng ang che, ka lawm e aw”a ti chul a. Josh chu mipa ngainatawm tak mai hi alo ni a, titi a vawrh thiam in min kawm dan tawk a thiam hle. A ngai ka ti lo chung min thlah a, kawngah pawh chuan kan titi tui ve hle a, “Mizo hmeichhia nen kan inngaizawng tawh a, chuvang ania ka hmuh tirh atang che khan ka ngaina nghal ringawt che a”a ti a. Amah vek chuan, “Mahse a work out ta lo ani, kha ai khan huaisenna lo nei ila chuan ka hmeichhe hmangaih kha ka chan hauh lo ang”a ti a, “In chhungte ah problem in nei mi?”ka tih chuan min rawn en a, “Mapuii chhungte khan inneih an remti lo a, ka chhungteah chuan harsatna a awm lo”a ti a. in hmangaih takte pawh hi an lo innei vek bik kher lova, lungchhiatthlak takin an inhmangaihna thawnthu pawh alo tawp ve thin. Ka inluah kan thlen chuan leng lut turin ka sawm a, hun remchang dangah zawk le tiin a let leh ta a. Kan inhriatna la rei lo mahse ka nel ru ve hle a, a hming atang ringawt pawh khan a thlamuanthlak in ka hria ani. Ka tan eng ang taka thiantha nge ala nih dawn tih ka la hre lova, a tlan liam thleng chuan ka thlir a, unaupa ang maia ka la rin ngam tur ani tih pawh ka hre lo.

College student hmaa din hi ka zam ngai lo, mahse vawiin ni chu a dan a dang a, tlar hmasa bera thu chuan min ti zam ve lek lek a ni. Kan function neih chhan tawi kim takin Principal chuan a han sawi a, kan company nena kan thawhhona a sawi zawh ah Harshil chu thusawi turin ka han sawm veleh a, a ding chhuak chu thawm a tha ham ham hle. Presentation a pe a, IT lama hmasawnna hrang hrang leh JNU hmasawnna atana programme thar a duan te chu a han sawi bawk a. A tawngkam leh aw ri te chuan mi hneh theihna mak tak hi a nei a, tumah bengchheng an awm lo. Roopa chuan chhuan hmel takin alo thlir ve reng a, an vanneih dun zia ringawt chu ka lo ngaihtuah thung a. Function a zo a, lunch ei turin Principal room kan pan zui nghal a, ka phone a rawn vibrate cher cher a, ka han en chuan miscall 20 dawn lai a lo awm a. Chuti taka min rawn biak tum tu chu tunge tih hriat tumin ka han en a, Josh alo ni. Kan hun hman dan tur a hre tho awm si a, chutia min rawn biak a tum viau nachhan chu a pawimawh anih ringin ka han call back a, mahse phone a pick up thei lo. Lunch kan ei zo a, Harshil nen chuan pawn lam boruak chu kan chuan vel a, “Vawiin chu I che tha ngei mai, ka duhthusam ang chiah ani”a ti a, a nui sang reng a, “Vawiin atan chuan I hna a zo, I duh chuan I haw dawn nia”a ti a. Roopa chu a rawn chhuak a, Harshil nen kan inkarah chuan a rawn ding a, “Ka pa call ka dawng a, hospital ah kan kal angai”a rawn ti thawp sat a, “Ava pawi ve aw! Puii hi kan thlah ang chu ka lo ti asin mawle”a ti a, “What the….??? Ka pa chanchin ka hrilh mek che chu”a hmel chu a dur nghal khap a, “Hospital ah a awm tih ka hriat hma thil anih chu”Harshil chuan dam dap hian a ti a. Ka lam a rawn hawi a, “Sir, thlah ka ngai reng reng hleinem, heta tang te chuan a hla lo emai”ka lo ti ve ngat a. A ni reng a, hla pawh nise thlah chu tun dinhmun angah hi chuan ka duh kher lovang. Ka phone a rawn ri leh a, chumi chu chhuanlamah hmangin ka kal ta daih a. Roopa hmel chu ka mitthlaah a cham reng a, a hmelthatna phena a chapona leh thinchhiatna chu vawiin ni hian ka hmu chiang hle in ka inhria. In ka thlen hnu rei vaklo ah call ka dawng a, Josh tih ka hriat chuan ka pick up vat a, “Dinner ka rawn ei dawn, Vasant Kunj ah ka awm mek”a rawn ti a. Karhnih tha zet kan inhre ve chauh a, rei tak lo inhre tawh leh lo inkawm tawh ang maiin min nel em em a, midang ang lo takin keipawhin ka nel a, hnamdang mipa ka rin hmasak ber anih hial ka ring. Dar 7 velah a rawn thleng a, chawhmeh a rawn khaibawr teuh a, chutiang a rawn ken a ngaih loh thu ka sawi chuan a nui vel mai mai a, a phone chu a han vang vang a, “Chaya hnena ka phone number petu hi I ni em?”a ti a, ka lu chu thing in ka nui hak a, “Min rawn be ngun khawp mai. Mahse amah ah hian ka phur lo, a hmelchhe lo, but she’s not my type…” inthiamlo hmel tak hian a ti a. Ka lehkhabu chhuar chu a din hnaih a, Bible chu a han lek kang a, “Mapuii nen khan Bible chhiar chhuah ah kan inel a, a tang thei khawp mai. Tuna I ta ang chiah chiah hi ka present a, chu chu a chhiar chhuak ta bawk a”a then lui sak a. A bulah chuan ka han kal hnai a, “Huaisenna lo nei ila ka chan lovang I tih kha enge a awmzia?”a hmaa a sawi tawh chu ka han zawt a, “Pasal a neih hma khan min rawn call a, min neih theih dawn chuan engpawh a huam tih sawiin amah chu nei mai turin min rawn ngen a, heti tak hian ka inchhir dawn tih hria ila kha risk kha ka la chiang khawp ang. Pathian hnenah pawh hian ka vui ve lek lek thin a, sakhuana vang pawh nilova hnam hrang vanga ka hmangaih ber ka chan kha zawhna ka zawt thin hial reng ani”a ti ta a.

“Nizanah Josh nen dinner in kildun em ni?”Chaya chuan ngaihthat hmel vak loh hian min zawt a, “Aaw.. a rawn kal deuh thut a” “I inah maw a lokal?” henu zawhna ngah lutuk hi chu aw! Ka han chhang lo dawn zet na a ka inbengdai a, “Aw, Vasant Kunj ah a kal a, chumi a haw lam chu a rem em a a rawn ei ta nghal ani”ka ti a. Chutia ka sawi lai tak chuan Harshil chu alo lut ve chiah bawk a, min melh hrawk a, nidanga min be ziah kha min be lovin a room ah a lut tlang ta daih a.

PART-III

Ka chau lutuk chu ka lo chhing sek a, ka phone ri chu ka hre riai riai a, kawngkhar kik ri dat dat chuan min ti harh chiang ngei mai. Ka harh chuan ka thlanfim in min lo bual a, muangchangin ka tho a, tun ang hunah inleng ka nei ngai lova, fimkhur thilah pawna mi chu tunge tih ka han chian phawt a, rin loh deuhin Harshil chu alo ding run a. A ngaihna hrelo zet hian kawng chu ka hawng a, “I tha em?”min ngaihtuah hmel zet hian a ti a, lut tura ka sawm hma chuan a rawn lut tlang nghal a, “Aw…that lohna ka nei hleinem, engati teh thut nge?”ka ti a. A han thaw hak a, “Oh my goodness!”ka tukhum chu a han dawm a, “I phone I pickup thei silo, kawng I rawn hawng har bawk si, I chungah thil tha lo a thleng emaw ka ti hman alawm”a ti sup a. Ka sofa ah chuan a thu a, ka in chik zet hian a han thlek kual a, ka thil neih tlem tham leh inchhung te lutuk chuan min ti chau hman hial in ka hria,”I hmel kha I nawmsam loh hmel”ka sam pawr phang leh mu tho hlim chu ka hmuh tlak loh viau in ka ring, “Pawi I tih loh chuan ka inbual lawk duh a” “Aw, tehreng mai, laptop min hawh tir phal chuan hna ka lo thawk lawk ang chu”ka mitah tak chuan min melh a, ka zam chhe lo chauh ani. Ka laptop ka pe a, keipawh inbual turin bathroom ka pan nghal a. Engvanga ka ina rawn kal nge anih tih ka zawt miah lo, ka mumang chu ka hre chhuak uai uai a, Harshil nen kan khuaah kan lo zin a, motor a kan chuan laiin thli leh ruah nasa tak a lo thawk a, khawiah nge ka awm pawh hrelovin ka lo vak kual a, Harshil chu ka lo ko vak vak a, ka lo hmu thei silo. Chutiang ka ngaihtuah lai chuan mahni inthiam lohna in ka khat a, hepa hi ngaihtuah ka duh lo.

Ka inthlak fel hnuah Harshil chu ka va fin a, ngaihtuahna sen hnem hmel tak hian laptop chu alo bih a, ka aw ka han thian a, a lo hawi vat a, “Tunah chuan I hmel pawh hmuh a hahdam tawh alawm”nui sang hian a ti a, coffee a duh leh duh loh ka zawh chuan a duh thu in min chhang a, chhuang turin ka kal ta nghal a. Coffee chawi chungin ka let leh a, ka lehkhabu chhuar chu alo en leh daih tawh a, “Heng zozai hi I chhiar zo vek tihna em ni?”a ti a, ka lu chu ka han bu nghat a, “Finna khawp chu a ni hrim mai a, mi special ve tak chu I nih dawn hi”a ti a. Ka lehkhabu pakhat chu a phawrh chhuak a, “Competitive exam I tum em ni?”a rawn lek kang va va, “Aw,,, kan la bei ve ang chu”ka lo ti sam et a. A mitmeng chu a danglam deuh a, mahse enge anih ka chhiar thiam lo. Coffee chu a rawn ban a, “Min hrilh lawk bawk silo a, enge I lo tih dawn reng reng?”inthlahrung tak chuan ka han ti a, “Ka hre lo… ka hre bik lo, ka hmu chak che a, ka lokal ve tawp”hnuai lam chu a bih daih a, “Ka rindan chuan…..”a thusawi pawt chatin doorbell alo ri a, ka va hawn chuan Josh chu chawhmeh bawr taka khaiin a lo lut a, “Chaw ka ei nghal dawn..”Harshil a hmuh chuan hamhaih deuh hian a ka hau a, Harshil chu alo ding vat a, “Helai hmunah kan inhmuh hi ka lo inbeisei miah lo a..” “Ahh.. keipawh ka lo inbeisei miah lo. Hei vawiin chu ka birthday ania, Puii nen hman ka lo rilruk a..”min rawn siai zauh a. Harshil chuan min rawn en a, Josh chu a en leh a, laptop bula a lehkha chu a han pawt chhuak nawk a, “Ka tihbuai loh hram che u ka beisei, ka kal tawh ange”a tho vut a, “I coffee I la in zo lo”ka tih chuan rum zet hian min melh a, Josh chu rem lo zet hian a han melh leh a, a chhuak ta daih a. Josh chu za zet hian a nui hawk hawk a, “Ka nau, I zunah a uai der tawh anih kha kan hotupa chu leh!”a hnungah ka han chum dawt a, “Chutiang te chu sawi lo zawk mai teh”ka ti a. A chawhmeh rawn ken chu kan buaipui dun a, “Mipa chuan kan mipat puite rilru kan hrethei alawm, engemaw tak chuan I lakah hian feelings anei chiang alawm, a pha bik hauh lovang”a ti leh a. Thildang sawi pui ka tum pawh chu pawt chat in,”Fimkhur la ka duh, I nat phah hi ka hlau ania”a ti a, “Josh, engvanginnge kei a hnuai a hna hniam tak thawk pakhat hi min duh ve ngawt ang ni? Thil awihawm loh lutuk anih chu, nupui hual hmeltha leh hausa aneih reng lai lehnghal in”ka ti a. Josh chuan ka thil chan lai chu a dah a, “Roopa hi an hausa a, a hmel pawh a tha ngei alawm, mahse Harshil hian hmangaihna mitmeng in a en ngai lo. Chuan a en dan che kha I hrethiam lo em ni, Roopa hnena a tihlan ngai miah lo nangmah hriatchian duhna che leh ngaihsakna kha ka hmu ani”a ti a. Ka ngaihtuahna chu a buai vek a, chutiang thil chu thleng turin ka duh lo. Mihring ve bawk ka ni a, ka in thunun theihna hi ka hloh ang tih ka hlau ani. 

Josh nen chuan kan inkawp tam tulh tulh a, ka ngaina takzet tawh a, a ni pawhin engkim a chanchin a chhia a tha min hrilh a, inpawh takin hun kan hmang ve thin. Harshil pawh Roopa nen an in zui nasa a, Japan thlengin an zin dun a, a hmaa programme ang chuan keipawh kal ve tur ka ni na a, min telh ta lo. Pawi tihna ka nei hauh lova, mahse Harshil chuan Josh nen min rinhlelhna a ti lang lutuk chu nuam ka ti lo. Josh hnena ka sawi chuan a nui liam mai mai a, engahmah ngai lo turin min ti mai thin. Calendar chu ka thlek vang vang a, ka nu leh pa inneih silver jubilee chu karhnih chiah in a dang tawh a, haw thei ngei turah ka in ngai a, a hmaa ka sawi tawh avangin Harshil pawhin a remtih mai chu ka ring ani. Ka thu hnawk a, ka chhungte chu ka ngai thar riau a, dawhkan chu ka bawh a, min en tu awma ka hriat avangin ka han hawichhuak a, Harshil chu a kekawr ipte zen in bang ngheng hian alo ding reng a, ka phu deuh zuk a, a mitmeng hriam hraih chu hmuh nuam ani lo. Ka thutna atang chuan ka ding a, muangchang hian min rawn pan a, “I haw hun tur I lo chhut em ni?”zaidam tak hian a ti a, ka hamhaih letling zawk, ka lu chu ka lo bu nghat a, “Josh a kal ve lo ang tiraw?’ka nui chhuak hawk a, “Nuihzatthlak ka sawi em ni?”a ti nghut a. Engvanginnge a kal ngawt anga, lokal tehreng pawh nise a tan buaina tur a awm ka hre der silo,”I duh leh next Monday hian I haw dawn nia”awih lo hmel zet hian ka en a, “Australia ah meeting pawimawh ka nei a, ka zin dawn tho a, hetah chuan hna I nei lutuk dawn chuang lova, mahse khami programme in hman zawh chuan I rawn kir leh vat erawh a ngai ang, ka zin ka lo haw chuan hna I ngah nasa dawn ania”a ti a. A hnuaia thawk ka ni a, ka chawl tur min buaipui piah lamah keimah zawkin dil tur ka nih laiin ka room ah lokal in engmah a tifel a, hriatthiam a la har tluang zel a ni.

Mizoram boruak chu ka han hip vang vang a, ka haw khat zia chu ka hrechhuak uar uar a. Lengpuiah ka nauten min lo hmuak a, in lam pana kan haw chu ka thla hi a muang em em a, ka hriat loh thiiilll pakhat ka hriatbelh chu ka chhungte leh ka ram hi ka lo thlahlel takzet ani tih hi. Kan in chu ral atanga an rawn sawi dan ang aia nasa in an lo khawih danglam tawh a, a hmaa inhnuaia ka room awm thin pawh inchung an siam tawh avangin ka naute nen min lo sawn chho vek a. A hautak ber thin mahni in tum thei a ka khawsak tak avangin inchhung pawh an khawi thei tawh tih ka hria ani. Ka nu leh ka pa min hmangaihna ka hre thar a, tin, an inhmangaihna chu ka ngaihlu bawk. Engtikahemaw pasal ka la nei anga, ka pa ang hi neih ka duh a ni. An jubilee pawh a hnai telh telh a, chhungkhat laina kan sawm tam lova, kan sawm zim angreng viau. Unaua upa ber ka nih angina ka kutah mawhphurhna a tam ve viau a, ka buai ve thei hle. Ramtei chu rin loh deuhin jubilee hma zanah a rawn thleng hlawl a, an inah pawh tlang lovin kan inah a rawn tlang nghal a, nidang ang lo takin a rawn thlen zanah chuan rei tak kan titi a, hnamdang neih a pawi leh pawi loh chungchang khelin zing lam dar 1 thleng kan meng a, a tuka programme nei kan nih avangin kan mu ta a. Zingah hma takah ka tho a, ka phone ah chuan whatsapp msg alo thleng a, Josh chuan lawmpuina thu min rawn thawn alo ni. Ka reply zo chiah chu a rawn ri leh a, Josh tho anih ringin ka han hawng leh a, Harshil zawk alo ni a. Ka nu leh pa leh kan unau min lawmpui na thu ani deuh ma a a tawpah erawh ‘ka ngai tawh khawp mai che’ tih a rawn telh a, engemawti tak hian nuam ka ti a, zingkar boruak pawh ka hman nawm phah in ka hre hial!

Hlim takin hun kan hmang a, kham lo viau mah ila let leh ka ngai miau si a, Ramtei chu ka sawm angina a rawn riak leh a, ka laka Harshil khawsak dan chu ka hrilh a, “U… a ngaizawng fel der che anih tawh chu”a ti sam et a, “A hmel pawh a that em kha, enge buaina I neih?”a han ti leh nghal zat a. Ka mu lai chu ka tho uai a, “Nupui hual anei tawh alawm, chu lo rengah hnam dang ani lehnghal”ka thaw halh a,”I duh ve tho tiraw?”nui sawng hian a ti a. Ka lukham chu ka han la a, na vak lo in ka vua a, “Sawi teh suh, ka la ngaihtuah ngai lo”tiin dawt chu ka han sawi a. Chutah thutak deuh zawk hian,”Tak tak chuan maw, kei chu hmangaihna hi a pawimawh ber ka tia, hnam dang neih hi ka support ber chu a ni hauh lo, mahse hmangaihna thiltihtheihzia chu ka hria alawm , engkawng pawh zawh la ka u hi ka thlawp tlat zel ang che”a ti a. A rawn tho ve a, min kuah a, “U.. I nat nawn leh hi ka hlau ber ani. Hlim takin awm la tih hi ka duh a, a workout dawn lo ani tih I hriatchian chuan risk la lo turin ka duh bawk che ani”a ti a, kan inkuah vawng vawng a. Pianpui unau hmeichhia neih ka chakna ber chu hetiang hunah hian a ni thin, Ramtei hi awm lo se ka buai thei ngawtin ka ring, ka tan chuan ka laizawn neihchhun ani.

Kham lo leh ngai tak chungin Delhi khaw lum lam pan chuan ka thlawk leh ta vang vang a, karhnih chhung deuh thaw ka awm lohsan ka in chu ka thleng leh ta hlawl mai. Ka chhungte bia in ka thlen thu ka hrilh a, khumah chuan ka muzal a, Josh khan ka thlen huna hrilh tura min chah vangin ka han hrilh veleh a. Tihfel tur ngah viau mahila engmah ka ti peih lo, ka mu chu ka lo muhil tlang nghal  daih a, ka harh leh meuh chuan khua alo thim fel der tawh. Inbual turin bathroom ka pan a, ka phone chu khumah dah in ka inbualsan a, ka phone ri ral ral ri chu ka hria a, mahse ka hmanhmawh phah lem lo. Ka inbual zawh ah ka phone chu ka en a, miscall pathum alo awm a, ka han en chuan Harshil hnen atang vek alo ni. Ka han call back a, a ring quit tep tih ah chuan a rawn pickup a, mahse amah ani lo, Roopa zawkin alo pickup a, engmah sawi lovin ka dah ta daih a. Ka tum vang ni hauh lovin Roopa chu ka thik thar a, Harshil nen an awmdun tur anga ka ngaihtuah chuan ka rilru chu a na zawkin ka hria. Ka thawmhnaw ka ha fel a, ka laptop phawrh chhuakin movie en ka tum a, ka rilruah erawh a lut lo kher mai. Darkar khat a liam leh hnu chuan Harshil phone call chu ka dawng leh a, phur vak lovin ka pick up a, amah ngei alo ni tawh a, ka thlen tluan leh tluan loh thu te min rawn zawt luam a, a tuk Sunday anih vangin office chawlh ani a, rawn len a chak thu a sawi zauh a, mahse ka inkhawm dawn tiin ka lo hnial thung. Hnathawhna hmuna hmuh bak hi hmuh tam loh ka duh a, a laka ka rilru puthmang dik tawh lo hi thunun hram hram ka duh ani. Mizoram house lam panin inkhawm turin ka chhuak a, ka Mizo thiante nena hun hman chu hahdamthlak ka ti a, nidang aiin sharing hun kan hmang rei a, kan ban thin aia tlaiah kan bang nghe nghe. Pawnah chuan titi khawchang sawiin kan ding a, ka haw report te chu a then in min lo zawt bawk a, nui bawk bawkin kan inthen ta hlawm a. Ka thiante kalsan tura ka in her chiah chu ka hmazawn ah tak Harshil chu alo ding a, a car ngheng in min lo thlir vang vang a.

PART-IV

Ka va hmuh chuan min lo nuih var var a, enge a hriat a helai hmunah te a rawn kal, ka pan phei a, a bulk a thlen chuan car kawngkhar chu min lo hawnsak a, “Enge I tih dawn?”ka ti mawl tawp a, “Nangmah hmu turin ka lokal  vang vang mawle. Lokal rawh ka hruai haw ang che”a ti che a. Han hnial vak ngaihna pawh ka hre lo, ka lut tawp a, a rawn lut ve nghal a, ka in lam pan chuan kan kal turah ka in ngai mai a. Mahse chutiang ni lo chuan a tlan tlang daih a, Gurgaon road a Kapashera Amusement Park ah min hruai ta daih a. Chutiang hmuna amah nen chauh a kal chu ka duh lo takzet a, ka hnialna erawh a pawm lo chiang hle a. Ngawi rengin motor chu a khalh chhunzawm hmiah hmiah a, ka tah chu a chhuak ngawih ngawih, “Min hruai haw rawh, inah haw ka duh”ka tih chuan min melh hrawk a, min chhang lo chuan a hma lam chu a bih leh ngar a, motor chu a han kuai her pawp a, “I thu hmu hmasa lova ka hruai chhuah che avang hian min ngaidam dawn nia, I duh dawn lo tih ka hriat lawk vangin ka hrilh duh lo che anih kha, venthawn nei hauh lova I bula hun hman hi ka chak em ani”a ti a, a kut chuan a khabe chu a han tuai zauh a, “Puii, min tibuai takzet ani, ka rilru ka ngaihtuahna zawng zawng hi a buai vek”a ti a. Motor atang chuan a chhuak a, engtia awm tur nge tih pawh ka hrethiam lo. Hrilhhai takin ka thu reng a, min rawn hnaih a, ka thutnaah chuan rawn dak lut in chiang takin min en a, kan inhnaih lutuk chu ka thaw alo chham lo chauh,”Khawngaihin vawiin ni hian hlim taka awm ka duh, min phalsak rawh”a ti sap a. Kawngkhar chu a hawng a, ka chhuak ta nge nge a. Harshil hlim hmel hmuh chu a nuam ka ti, ka lo en leh vang vang thin a, mahse chu chu ka tana thang hlauhawm tak ani lawi bawk si. Mi chi hrang hrang zi nuai nuai karah chuan ka hminga min rawn ko nalh tu an awm a, mak ti leh awih lo zet hian ka han hawi kual vel a, ka piah lawkah Ramdinpuia chu a thianpa pakhat nen hian an lo ding a, min hmu chu mak a tih ang bawkin keipawhin ka hmu chu mak ka ti a, chhanna chang pawh ka hre lo. Harshil chuan chik zet hian min lo en reng a, ka thiante an nih thu ka hrilh chuan a hrethiam ve mai a, Ramdinpuia chuan min rawn pan hnai a, “Helaiah hian hmuh che ka inbeisei miah lo, vai nena hmuh phei che chu beisei lo lehzual”ka hriat phak tawkah chuan a rawn ti a, “Lo buai ve lo mai teh”ka ti hmuk a, a ruk tak chuan nuam ka ti lo. Ka ban chu a rawn man thut a, “Lokal rawh, ka thlah haw ang che, hmeichhe zahawm tak ni thin kha hetiang mai mai a hnamdangin an hruai phar che hi ka duh lo”a ti hmawk hmawk a, “Min thlah rawh, ka boss hi ka hunawl ah ka chhuah pui mai ani”ka ti a, “Ka duh dan in ka nung ang, I buaina tur hi a awm lo hrim hrim”ka han ti leh a. Harshil chuan kan tawng chu hrethiam lo mahse kan boruak chu a hrethiam ve ani ang, Ramdinpuia chu a rawn dinchilh a, polite tak hian ka kut chu thlah turin a ti a, chu veleh rang tak hian min thlah a, mahse inrin lawkna awm hman miah lovin Harshil chu a han hnek pawp a, a hnar ah a fuh a, a thi nghal zawih zawih a, “Tenawmpa, kalbo rawh”Ramdinpuia hmaiah chuan ka ham buan buan a, “Hmeichhe mawl leh lutuk, tikhan an la bum hlum ang che”ten hmel zet hian min melh a, an kalsawn ta a. Harshil chuan a scarf chu phawrhina hnar chu alo hru mek a, puih tumin ka va thutchilh a, keimah vanga kut a tuar chu zahthlak ka ti a, hrehawm ka ti takzet ani. Ngaihdam ka dil mawlh mawlh a, “Engahmah ngai suh, nula hmeltha tak mai chhan nan chuan kha aia na pawh kan tuar mai zel angchu”nui pah chuan a ti a. Kan boruak chu a chhe lehzual ta vek a, haw ka rawt chuan min hnial ta bik lo. In ka thlen pawh chuan ka boruak tawn chuan min ti chau lutuk a, ka mu nghal vang vang a. Harshil hmela engemaw buai nak awm chu ka hmuh hmaih hauh lo, ka ngaituahna a tanga paih bo tumin ka maimitchhing ta vang vang a.

“Rawn haw chho la ka duh tawh, helamah Competitive exam te bei ve la, chhungkuaa awm khawm pawh a chakawm tawh alawm”ka pa hnen atang phone call ka dawng a, chhungkuaa awmkhawm chu a chakawm a, mahse chumi piah lamah engemaw tak hriat anei anih ka ring. A chhanchu a hmain Ph.D thlenga tih ka duh thu chiang takin ka hrilh tawh a, min hnial tlat lo ani. Chuti maia chawlhsan chu keiin ka tum lo bawk a, ka hna neih lai mek chu thawh nuam ka ti em tih ka hrelo, mahse mahni ka inchawm thei a, chhungte tibuai lova ka awm pawh chu a hlu ka ti ve tlat. 

Office ka thlen veleh Chaya chuan min lo ko vat a, Josh nen coffee an lo dawm dun mek a, Josh chu ka han siai sak a, a ner nang a, “I zin tur programme kha I hre tawh em?”Chaya chuan a ti a, ka lu chu ka thing a, “Hei ka thlen veleh ka buaipui nghal a, karleh ah Malaysia ah in zin dawn anih hmel khawp mai”a ti a. A lehkha kenlai chu ka pawtthla a, ka han en a, Harshil leh Roopa te nen kan pathum in kan kal dawn alo ni. Josh chu ka han en a, chiang tak hian min lo melh a, a lu chu a thing a, “Kal suh..”hmui phun chuan a ti a. Chhan ka tum lai takin Harshil chu a room lam panin a lokal mek a, Chaya chuan a zui lut nghal a, “Kal loh dan ngaihtuah rawh, Roopa a kal ve dawn lehnghal”a ti a, “Keipawhin kal loh theih te chu ka duh alawm, mahse engtinnge ka tih ang?”ka ti a. Min chhan ngaihna a hre bik lo aniang, a ngawi reng a, “Chhuanlam siam mai rawh”a ti ban charh a. Nilengin ka rilru ah a awm reng a, enge chhuanlam atan ka hman ang tih chu ka ngaihtuah ngat ngat a, intercom atang Chaya chuan boss in min hmuh a duh thu min rawn hrilh a. Muangchangin ka tho a, Harshil room chu ka pan a, ka va luh chuan Roopa pawh alo awm a, Chaya chu a chhuak chiah a. Thu tura min tih chuan ka thu a, “Business thilah hmanhmawhthlak deuh hlek in Malaysia ah kan kal a ngai dawn a, Chaya khan a hrilh tawh tho che ka ring a”Harshil chuan a ti a. Ka kut thlan dap chu ka kekawr ah ka han tat pawk a, “Nia, ka lo hria alawm. Mahse Sir, kal ve loh theih dan hram a awm angem le?”Roopa chuan min lo melh kawk a, private company a hnathawk ka ni a, chutianga tih chu thil awm ang lo tak ani tih ka hria, mahse, pumpelh chu ka duh ngawih ngawih si. Harshil pawh chuan mak ti awm tak hian min lo en ve bawk a, “I duh duh I thawh a, I duh loh chu thawk lo thei ah I inngai deuh em ni?”Roopa chuan alo ti a, “Maam, karlehah exam pawimawh deuh ka nei a, chuvang chu ania”tiin dawt ka sawi ta ringawt a, “Awle, a tha e, helai hmunah hian I hna hi I thawk tha peih lo anih chuan I tih tur a awm tawh lo anih chu”a ti nghat a. Chu veleh Harshil chu lo inrawlh vatin, “Khi lam ka lo bia anga, I theih hun tur ngaichang chungin in dawr dan ka lo ngaihtuah tha dawn na”a tih chuan ka kal ngei ngei a ngai dawn tho tih ka hria a, ka bang te anih ngawt loh chuan ka kal a ngai tho ani.

Vio hotel a ka room ah chuan engkim a awm a ni ber, khum dup nuam zetah chuan ka thu a, tv chu ka en pah a, ka rilruah Josh chu alo lang a, min ngaihtuah tak chunga min thlah te chu ka mitthlaah a rawn lang a, Roopa mizia hrechiang bertu ani bawk a, buaina ka neih chu a hlau ani. Ka room kik karh karh ri ah chuan ka tho chhuak a, ka va hawn chuan Roopa leh Harshil chu an lo ding a, pawnlama boruak hip ka duh leh duh loh min zawt a, mut hahdam ka duh zawk thu ka hrilh hnuah an kalsawn ta a. Ka khumah chuan ka mu leh a, ka kal ve ang tih pawh la suangtuah ngai lohna hmunah kal in hotel pakhat ah ka mu veng veng chu ani si a, khawvel hi chu a mak ngawt mai, thleng thei lo pawh alo awm lo anih hi tiin ka ngaihtuah neuh neuh a. Kawngka kik dawt dawt thawmah ka harh hlawl a, ka lo muhil tui hle aniang, khua chu alo thim fe der tawh a, kawngka ka hawn chuan Harshil chu mangan hmel tak hian alo ding run a, “Phone ri pawhin a ti harh zo lo che a, min ti mangang mai dawn alawm”a ti a. Ka nui a, a tum hmuk thung a, “Ka muthilh tawh vek chuan ti tlat zel kha ka nia”ka ti a, kawngka chu a ke in a rawn chhir zau deuh a, a rawn lut zui nghal a, “Roopa khawnge?”ka ti a, “A muhil”zawh chhunzawm pawh a chakawm lo. Chair ah chuan a thu a, pawn lam lang thei zawng chu zan ani tih pawh hriat loh khawpin a en uar a, hmuhnawm tih hmel takin a thlir vang vang a, amah kal pelin tukverh ah chuan ka va dak a, khawvel mawina hi helai hmunah hian alo awm zo vek emaw tih mai tur ani. Ka phone rawn ri chuan ka ngaihtuahna chu a la peng vat a, rang takin ka han pickup a, Josh alo ni. Chaya nen an in date thu a rawn sawi a, Harshil a awm ve tih reng ka hre tawh lo. Hlim takin kan nui a, kan phul hlut a, ka haw veleh dinner show a tum thu te min rawn hrilh a, hlim takin kan inbiakna kan titawp a. Harshil a awm ve reng tih ka hrechhuak thut a, ka va hawi chuan alo tum hmuk a, a ding nghal a, “Midang I biak hi chuan I nelawm thei khawp mai”za lo fe hian a nui hak a, “I ngaihdan mai mai nih chu”ka ti a, “Ni e, ani maithei”min rawn pan hnai a, “Khatiang ang khan close takin min be ve thin la ka ti ngawt mai”a tihul hak a. Min din hnaih em vang chuan ka thaw chu a chham lek lek a, “Nang chu an ni ang I ni ve lo alawm, tunge mahni boss te khatianga nel taka ti bawrh bawrh ang?”ka ti a. Ka in rin hma chuan min rawn kuah thut a, talchhuah tumin ka lo tang a, “Khawngaih takin reilote ti hian min awmtir lawk rawh, pliz…”a ti ngawih ngawih a, ka tha a zawi a, ka din ngai chuan ka ding ta reng a. Vawilehkhatah Roopa chu ka hrechhuak thut a, Harshil chu nemsawn in ka inla hrang ta vat a, “Ka tihpalh”a ti a, a chhuak ta nghal a. Khumah chuan ka bawkthlawp a, nep hi ka va han in ti tehreng em!

PART-V

Ka harh chuan ka lu chu a na bur a, engmah tih chakna ka nei lo. Technology Park, Bukit Jalil  hmuna Jaring Communications Sdn Bhd building kawtah chuan darkar chanve dawn ka ding tawh a, Harshil leh Roopa hmel hmuh tur awm thei bawk silo chu ka thin a rim hlur tawh a. Hmelhriat pakhatmah awm lohna hmuna chutiang teh hrepa nghah ngaia an awm chu ka lungawi lo takzet ani. A tawp atawpah an rawn thleng ve ta hram a, Harshil chuan inthlahrun hmel takin thupha a chawi a, ka chhang peih lo. Hmanhmawh takin meeting neihna tur conference hall chu kan pan nghal a, zan lam thil thleng vang chuan nuam tih lohna ka nei ru deuh a, mahse Harshil erawh chu engmah thleng lo ang hmakin a awm thung a, nuam lo tih viau na tur neiin ka in hre ta bik lo. Harshil chuan presentation a pe a, sawifiah ngai lai chu ka lo pui ve bawk a, CEO chuan zawhna mak sak tak tak min lo zawt ve pah reng bawk a, ka hria tih pawh ka hriat loh chu ka lo chhang thei deuh vek a, Harshil chuan mak tih hmel takin min melh a, a hamhaih rei lo. A nui sak a, aman chiang lehzualin a sawifiah zui nghal bawk a, meeting ka attend tawhah chuan a la rei ber a, mahse nuam ka tih ve ber ala niin ka hria. Ka tui tih ka hriat hma in ka hna chu ka lo tui hle tih ka hrechhuak bawk a, meeting kan zawh a pawna kan chhuah meuh chuan khua chu a lo thim thet thet tawh a. Ka hnung lam atanga min rawn kheuh tu chu ka han melh zawk a, kan meeting chhung zawnga uluk taka min lo thlirtu kha ani tih ka hre mai. Tlangval hmel fai sar mai, sang zaih mai hi ani a, a mitmeng chu a zim mah mah tih dawnin amah chuan a inhmeh em em lawi si, “Pawi itih loh chuan car ka nei a, ka lo thlah ang che chu”a ti a, a nui sang a, Harshil leh Roopa chu ka mitin ka han rawn a, “A tha ngawt ang chu, kan lo va kal hmasa ang”a ti a, a in her nghal a. Harshil chuan min rawn en deuh ha a, engemaw sawi tumin a ang deuh zuau a, mahse engmah sawi lo chuan Roopa chu a zui ve ta a. Ka hmelhriat thar pa chuan a motor awmna lam chu kawk in min hruai ta nghal a, Jimmy Choo, Network Engineer anih thu chu min hrilh a, keipawh ka hming te chu ka han sawi ve a. Kan thlenna hotel ka hrilh a, chu lam pan chuan kan chhuak ta nghal a. An company chungchang sawiin dinhmun derthawng taka an din mek thu te chu min hrilh a, “Duhthlang thei kan ni lo chung hian duhthlanna kan hmang sual ang tih a hlauhawm bawk si a, nangni in lo lang hi kan tan vanneihna anih ka ring tlat”a ti a. Engvanga heti zat min thawhpui chak an awm laia helai hmun hi thlang nge anih tih chu ka lo inzawt ru ve mek bawk a. Hotel kawtah chuan rei vaklo kan ding a, “Naktuk ah dinner ka ei pui thei che angem?”ka mitah tak chuan min en a, “Ka va chiang lo ve, ka boss hnenah kan programme ka lo zawt phawt ange”ka ti a. A lu chu a han bu nghat a, nelawm tak hian min nuih sang a, “Ka lo ngaichang reng ang che” ati a. Kan in mangtha a, ka room lam panin hmanhmawh takin ka kal a, Josh nen kan inbiak a ngai tlat. Ka room kawngkhar bulah chuan Harshil chu alo vei tawn chhen a, min hmuh chuan a ding a, engahmah ngailo awm takin kawng chu ka hawng a, luh tlang nghal mai chu ka tum a. Ka lut tur chu na deuh tak hian min nawr lut nawk a, ka tlu tep lehnghal a, “Enge I hriat..”ka sawi zo hman lo, min rawn fawp thut a, ka ngaihtuahna nu nghal but a, engmah tih nachang pawh ka hre lo. Ka ding khawng reng ringawt a, chutah a aia na in min rawn fawp a, ka harh chhuak zawk a, theihtawpa na in ka lo nem a, mahse mipa tha chu ka hneh lo ngang mai. Tlemin a han in hrang deuh a, duat tak hian mi kuah a, a thaw hak a, ka tah chu a chhuak takzet. Ka in rin hman hma in ka mittui chu a rawn luang zawih a, mangang takin min en a, “Ka tihpalh lutuk…. Tihnat che ka tum lo ania”a ti thawp sap a. Ka mittui chu ka han hru a, “I duh duha I tih tur ka ni lo asin”ka sawi zawm thei tawh lo, ka mittui rawn tla leh tur chu dan kir tumin ka lo khap sak sak a, “Puii, min ti a zo vek tawh anih hi, ka duh che, chu chu hria la ka duh ani”a ti a. Nidanga mahni inringtawk taka thusawi thin kha a zam ve hle ani ang, a aw chu a khur vek a, kalsawn ka tum chu min pawt bet a, “Nang ang a ka vei zui hmeichhia hi an la awm lo” “Nupui hual lai nei I nih kha, keipawhin I thusawi kha ka theihnghilhsak ang che”min vawnna chu a thlah a, ka kalsawn nghal vat a. Mi a ang maiin a dinna ngaiah chuan a ding reng a, tukverh ah chuan dakin kan boruak tawn hahthlak zet chu tih bo tumin ka han thaw halh a. Ka phone ri ah chuan ka harh zawk a, rang takin ka la a, Josh alo ni, engkim chu hrilh ka chak em em a, mahse Harshil chu ala din tlat avangin engmah ka sawi thei lo.

Ka thawmhnaw ka pack fel vek hnu chuan zing lam dar 2 alo ri der tawh a, Harshil leh a khawvel hi ka chhuahsan tawh ang. Tlem tal mut ve tha in ka hria a, ka han mu a, mahse muthilh chu a har kher mai. Harshil chu ka duh ve ani tih ka inhria, mahse buainaa in barh luh ka duh lova, ka inthiarfihlim vat a ngai ani. Khawvar dawn hnaih ah chuan ka lo chhing sek a, ka harh chuan hmanhmawh takin ka tho a, ka inphih fai a, Jimmy chu ka bia a, zan lama ka biak lawk tawh avangin engmah zawhna min zawt lovin min rawn hruai turin a rawn chhuak nghal a. Sana chu ka en a, muangchang thei ka ni tawh lo tih hria in ka thawmhnaw nen chuan ka chhuak nghal a. Hotel kawt ah rei vak lo ka ding a, Jimmy pawh a rawn thleng ve deuh nghal mai a. A hma ang bawk chuan a nui sang a, in hre hlim hlawl mah ni ila ka hriat chhun ani miau a, inthlahrung takin ka tibuai lo thei silo. Delhi ah let leh vat ka ngai tih ka sawi chuan a hmelah mak tihna a lo lang a, “Vawiinah meeting ala awm dawn sia…”a mitmeng chu a buai nak a, “Ni e, keimah chauh alawm haw dawn”ka buaina zawng zawng chu ka sawi duh lova, “Mimal thilah harsatna chhe te ka nei a”ka tih chuan engmah min zawt duh ta bik lo. A inluah kan thlen chuan ka bungrua chu lakchhuah a tum a, “Haw dan tur min ngaihtuahpui tur thu kha I sawi si a..?”ka hmel a hlauhthawnna lo lang chu a hmu ani ngei ang, a nui chhuak hawk a, “Hahdam takin awm rawh, inchhungah kan lut fel anga, kan ngaihtuah dawn alawm”a ti a. A in chu a lian lo na in a felfai thlap a, engkim chu a awmna tur hmunah an awm vek a, bal hmuh tur a awm lo. Coffee in pah chuan flight ticket kan en a, a tuk atan chiah ticket chu ka chang a, duhthlan tur dang ka nei lo. Jimmy inbual chhung chuan pawn lam chu ka lo fang kual a, inchungah lawn in khawpui chhung chu ka han thlir kual a, Mizoram chu ka ngai thar vawng vawng a. Ka naupanlai atang tawh in ka unaute ang lo takin ka tum hi a sang a, ka pa thusawi ka hrereng thin, “Tumna a san chuan tlakna pawh a sang”a tih chu ka thinlungah hian a riak reng thin a. Hetiang hmunah hian ka kal ang tih ngaihtuahna pawh ka nei ngai lo, engkim mai chu ka mumang ni mai te in ka hre bawk a.

Jimmy chu office turin achhuak tawh a, chhunah in tifaitu nu pakhat a rawn kal a, nu fel tak mai hi ani a, mahse English a thiam loh avangin kawi khat mah in kan inbe theilo. Mahse nilengin zaizir chuan kan inbe ve nawk nawk a, kan nui hnem kher mai. Rawng a bawl zawh vek hnuah a haw ta a, mahni a awm chu a khawharthlak hle a, Jimmy lah chu alo let thei lawk bawk silo. An meeting chu a kaltluang em ang chu maw tia ka ngaihtuah mek lai chuan Jimmy chu a rawn haw a, a hmel chu a ngui bar a, zinga thlawk chhuak tur ka nih avangin mut hma ka lo tum viau a. A inthlak zawh chuan ka thutna lamah arawn kal a, “In pu chuan kan thawhho tumna kha cancel leh a tum a, rilru a buai ta nak mai”a ti zuai raih a, “Hna thar zawn chu ka huphurh lo, mahse thi leh thau pawlh a kan lo beihna zawng zawng a thlawn a a awm tur hi ka rilru a na ani”a han tih zawm a. Ka phone chu a rawn ri a, number hlang anih avangin pick up pawh ka tum hran lo. A rawn rik nawn leh chuan ka han pickup ta hram a, “Nangmah tanpuitu che kha tanpui let I duh chuan hotel ah rawn let rawh”rawn ti tu chu tudang nilovin Harshil ngei ani. Jimmy chuan uluk fe hian min lo en reng a, phone chu ka dah a, ka thinlung chu a ipik churh a. “I tih kher angai lo ania, engemaw tak chhan awm lo chuan I thutlukna kha I siam lo ang tih ka ring”a ti a.Harshil chuan engkim alo sawi tawh ani ngei ang, chutianga Jimmy hman tangkai a tum chu ka thin a rim em em a, mahnia inngaihtuah ka mamawh ani. Inchungah chuan thu in ka awmdan tur chu ka ngaihtuah a, keimah vanga pawi sawi lo leh min pui tu in a tuar tur chu dik ka ti thei silo, Harshil hnaih leh chu harsa ka ti bawk si, mahse thutlukna ka siam vat chu a ngai ani.

“Hotel ah min hruai rawh”Jimmy chuan file alo inchhawphnawk nuai a, “I ngaihtuah chiang em?”min ngaihtuah hmel tak chuan a ti a, “Aw, uluk takin ka ngaihtuah vek alawm”ka ti a. Hotel lam kan pan lai chuan ka phone chu a ri reng a, Harshil ani tih ka hria, ka phone chu ka switchoff a. Jimmy phone chu a rawn ri leh a, a pickup a, hotel lam pana kan kal mek thu a sawi chuan Harshil nen an inbia tih ka hria. Ka ngaihtuahna chu a buai deuh nak a, engkim hi huaisen taka hmachhawn thei turin ka chak tawk emaw ka lo in ti thin a, mahse chutiang chu alo ni lo. Hotel kawtah chuan Harshil chu alo ding vung a, min hmuh chuan a nui sak a, ngaihnep hmel takin ka lo ner khum a, Jimmy nen an inbiak chhung chuan ka room lam panin ka kal hmawk hmawk a, ka room ah chuan Roopa chu lungngaih hmel takin a lo in dawm kun a, min hmuh chuan alo thutna atang a lo tho a, “I dam that loh te chuan engatinge min hrilh vat mail oh? Enge tunah I an tawh?”alo ti mawlh mawlh a, Harshil chuan engtin tak nge min lo sawi tih ka hrelo a, min lo sawi damlo viau niin a lang. Ka that thu leh mut hahdam ka duh thu ka sawi a, rei awm lovin a chhuak ve mai a. Khumah chuan ka han mu vang vang a, tun ang renga ka nu ka ngaih hi ala awm lovang.

“Infoplus leh Jaring ten thawhhona thuthlung kan siam tawh chu vawiin ni hian nemngheh ani ta e”kut beng thawmin a zui nghal a, kilkhatah ngawi rengin ka thu a, Jimmy chuan min rawn siai zeuh a, ka lo nui lui sak a. Pawnah chuan lawman nui ri a khat emaw tih mai tur ani, Jimmy chuan min rawn pan vat a, min rawn kuah thlawp a, “I thiltih hi ka hrereng ang, harsatna engemaw I tawh hunah min hrilh la, khawi hmun pawh nise tanpui tur che in ka lokal zel ang”a ti a, a hnuk chu a ulh a, keipawh ka bang chuang lo. Hotel thlengin min thlah a, “Engtikahemaw chuan kan la inhmu leh ngei ang, chumi hma chu dam takin lo awm zelang che”a ti a, ka chalah chuan a fawp a, Harshil te chu an rawn thleng chawpchilh ve nghal a. Jimmy chu a tlan liam thleng chuan ka thlir a, helai hmunah hian hriatreng tawh tur thil ka hnutchhiah ve reng mai.

 PART-VI

Malaysia boruak nuam tak chhuahsanin Delhi khaw lum hulh chu kan thleng leh ta a, ka thlen tlaiah Josh leh Chaya an lokal a, ka hmuh dun hmasak ber anih avangin an lai dun viau lehnghal a, a nuih a za ru hle. Chaya chuan phone call a dawn avangin a kalsawn a, “Babe, I zin report kimchang ka ngaithla chak tawh kher mai”Josh chuan a ti a. Engkim sawina hun a awm lo tih hria in remchang hmasa bera ka hrilh tur thu chu ka sawi a, “Kan hmela chuan a ti hrehawm em lovang che chu maw?”a ti a, ka nui sak a, ka lu chu ka thing a, “Chutiang em chu a thleng lo na in rawn haw san vang vang na tur thil pakhat chu a ti ngei alawm”ka ti a. Josh chuan ngun takin min en a, “A ti na che anih vaih chuan ka awm mai mai lovang”a ti a, Chaya a rawn kal leh tawh avangin engmah kan sawi zawm lo.

Office ah report hrang hrang siam in ka buai hle a, lunch ei a ka chawl tih loh chu ka chawl hman lo. Chawhnu lamah Jimmy chuan min rawn bia a, rei tawk tak kan inbia a, tukverh ah dak pahin ka bia a, thil nuihzatthlak tak tak a rawn sawi vang chuan ka nui hak hak a, ka piah a min lo thlir reng tu chu ka lo hmu mai lo. Harshil chuan kawng dawm meuh hian min lo thlir a, ka hmuh veleh chuan ka thutna lamah ka kalsawn ta daih a. Ka awm ati nuam lo zo leh ta vek mai, a mitmeng hriatthiam har tak hi hmuh fo ka duh lo, keimaha danglam a siam vat thin vang hian. Ka haw tur chu Chaya chuan Josh nghahpui turin min sawm a, mahse thildang tih kawi ka duh avangin ka nghah pui ta lo. Metro station ka pan a, ka bengah earphone vuahin muang lutuk lovin ka kal a, min zui tu an awm tih pawh chu ka hrelo. Station ka thlen chuan ka earphone chu ka la thla a, ka bula lo ding ve reng chu ka han en chuan Harshil alo ni. Ka phu deuh zawk a, “Khawnge I kal dawn?”ka ti hmuk a,”Him takin I haw ngei ani tih hi ka hmu duh”a ti a, min rawn en zawk a, a hawisawn lehnghal a, “Chu chu I hmuh kher angaihna ka hre lo ve..”ka ti a. A nui lui hak a, “Ka nun ania, ka duh dan ang in ka khawsa ve ang chu”a ti a, “Enteh, ka private life min tihbuai hi ka duh miah lo ania, hetiang anih dawn chuan…” “Min man tir dawn mi?”ka banah min kai thut a, talchhuah ka tum nasat poh leh min vawnna chu a hmer na a. Han au vak chu mualphothlak ka ti bawk si, a car dahna kan thlen chuan min nam lut nawk a, rang takin driver seat ah a thu a, chak fe hian a tlan chhuak nghal a. Ka phone chu a ri char char a, pickup tumin ka han lek kang a, rang fahran in min pawhthlak sak a, Josh chuan min ngaihtuah leh hle ang. Rum zet hian ka melh a, engmah ka sawi peih lo, ka maimitchhing tlat a, a tira kan tlanchhuah ai chuan kan speed chu a muang ta deuh tih ka hre thei. Ka in kan thlen chuan ngawi rengin ka chhuk a, min rawn zui tih ka hria, engthil chiah hi nge a duh tih ka hrelo a, inhnial lah ka peih hek lo. Rei zet room ah ka inthlak a, awm reng chi ani bawk silo, ka va chhuah leh chuan sofa single ah thu in a bawp a khawkherh a, ngaihtuah muk hmel zet hian a meng zim san a, a khup ah a kut nghatin a khabe chu alo dawm a, min hmuh chuan a thu ngil nghal a, amah hlat thei ang berah ka thu a. Rei deuh tak chu engmah sawi lovin kan ngawi a, a tawpah a rawn tawng chhuak a, “Puii, khatiang khan min en suh, ka tuar thei lo ania”A ti a. “Engtinnge ka en che?”tia ka zawh chuan, “Hmelma ang maiin min en alawm, Josh te, Jimmy te I en ang khan min en ve rawh”a ti a, a aw chu a cool raih a. Engtinnge midang ang a ka en theih a in rin, “A danglamna ka hre lo”ka han ti puat a, ka hrechiang khawp mai. Min rawn hnaih a, a khawsak dan chu ka haider lui tlat a, “Hotel a ka thusawi kha ila hria em? Ka theihnghilhsak ang che I tih kha, theihnghilh lo turin ka duh che ani”a ti a, ka kut chu a la a, a hum vang vang a, ka maimitchhing a, ka rilru chu tih fim hram hram ka duh ani. “Puii, min en rawh, ka mitah hian chiang takin min en rawh, ka hmangaihna che hi I hmu thei ang”a ti a, ka lu chu ka thing a, “Plizz…..”a ti ngawih ngawih a, ka meng a, mahse a mitah ka en ngam lo, ka khabe ah chuan a dawm a, amah en tur chuan min ti leh a, “Huaisen takin awm la ka duh ani, ka rilru ang hi I pu ve tho tih ka hria ani”A ti a, min kuah a tum a, ka lo hnial thung. Tharum hmanga chet chu a tum bik lo, ka hmaah chuan a thingthi rawp a, “Ka in thunun theihna ten min bosan tawh, ka hmuh apiang che hian keimah a kim lo awm thin kha a bo a, ka la neih ngai loh famkim hi keimahah a awm tlat ani”a ti a, “Sir..” “Harshil..”a lo ti vat a, “Roopa I nei lawm, hlim takin in awmdun ngei ang tih hi ka ring tlat ani”ka ti a. Ka thutna atang ka tho a, rang takin ka banah alo chelh a, “Ka chingfel vek ang, ka tiam che, tumah an na lovang”a ti a. 

Ka muhil theilo chu ka in let thak thak a, Harshil hian min tibuai takzet ani. Ka thinlung hi ka zui dawn anih chuan ka duh ve ngei alawm, mahse nupui hual lai nei mek a ni a, Roopa rilru chu ka tihnat sak thei silo. Tumah an na lovang tiin min tiam mahse tu emaw ber na lo chuan a awm theih dawn lo tih ka hrechiang a, chuvang chuan ngun taka ka ngaihtuah hnuah Ramdinpuia chu biak leh ka duh ani. A ni nen kan inkawp leh anih chuan Harshil pawh a beidawn vat ka ring a, chutiang a Ramdinpuia hmanrua a ka hmang tur erawh tlemin ka inthiam lo ve deuh a, mahse ka rilru a tihnat na zawng zawng ngaihtuah chuan eng thamah mah ka ngai lo. Ka tumdan erawh a kaltluang ta lova, Ramdinpuia chu biak tumin a number ka hmetchhuak a, mahse alo hmang tawh lo. Rilru hnual ru zetin ka phone chu ka dahthla a, kawng dang zawn angai dawn ani.

Roopa chu ka office ah a rawn kal a, ka thin chu alo phu dep dep a, mahse rin loh takin min rawn nuih ver ver a, “Kolkata lama kan branch nen kan inbe zo chiah a, karleha an project launch turah tel turin min sawm a, ka pa hriselna a hniam deuh avangin ka kal thei dawn lova, Harshil nen in kal mai a ngai dawn ani”a ti a. Kan pahnih chauh in maw? A ni thei lo, engkim chu ka huphurh vel vek tawh ani. Kan thuneihna piah lam ngang ani si a, hnial leh thei tak maw? A rukin hna dang ka melh reng a, he hmun hi ka tan a him lo tih ka hria, chuvang chuan inthiarfihlim vat hi ka duh ani. Ph.D ti turin entrance exam chu ka hmachhawn bawk a, ka tlin hlauh chuan ka hna hi chawlhsan a, competitive exam tur a inbuatsaih chu ka duh bawk ani. Hna dang ka zawnna ah interview ka neih dawn avangin office ka kal lova, ka interview na tur hmun ka thlen chuan ka tlai tawh thu min lo hrilh ringawt a, ka sana chu ka han en a, ka la tlai tawp silo a. Ka han zawh chian pawh chuan ka tlai tawh thu chiah in min chhang a, thinrim teuh chung chuan ka chhuak a, pawn ka thlen chuan taxi rawn tlan chu ka lo chang a, ka hna chawl meuhin helai hmun hi ka thleng ve a, a thlawn alo nil eh si. Ka hnunglam atanga min kotu chu ka han zawng a, bangnghengin kawi sawi zet hian Harshil chu alo ding reng a, min rawn pan hnai a, a mitmeng chu hlauhawm tak ani, “Ka hnen atanga ngawi renga kalbo I tum chu ani em lo maw?”a ti a. min melh run a, ka lu chu thing a, “Nilo.. chutiang lam ani lo, pay a tha a, ka dil satliah ve mai anih kha”ka ti a. “I hlawh a I lungawi loh chuan min sawipui thei lo em ni?”a ti a, a thinrim ve hle tih ka hre thei.

File chhah lutuk pahnih ka en zo tawh a, a pathumna ka en leh mek a, Harshil chuan nihnih chhung min be tawh lo. Dik tak chuan ka lakah a lungawi lo takzet tih ka hria, midang chu nise min ban nghal hial ka ring. Kolkata programme hman pui tur pawhin amah in a kal a, nikhat a cham a, a rawn let leh pawh chuan min hlat tlat a, ka tana nuam lo tawk vel chiah a khawsak chu a thiam riau lehnghal. A hma lawk pawha min care a min hmangaihzia thu sawi tu in a staff dangte ang maia min han en chuan ka rilru ana leh si, duh lo hle mah ila ka in thunun theih piah lam ani tlat a. Chaya nen meeting programme kan buaipui a, anihna takah chuan Chaya buaipui ani vek zawk. Kan zawh hnua kan thehluh chuan Harshil chuan min rawn ko a, Chaya nen kan kal a, kan tihsual chu kawkin min hau hrep a, pahnih kan ni chungin keimah chu min puh vek a, a hmaa min en dank a ngaihtuah a, ka rilru chu a na zual hle a, ka room a ka let hnuah pawh ka mittui chu a tla zawih zawih a. Ka dawhkan chu bawh in ka kun a, kawngka a ri rak a, Harshil chu a rawn lang nghal a, ka mittui chu rang takin ka hru fai a, “I lemchan kha duh tawk tawh rawh, harsa I ti ve tho anih kha”dam thlap hian a ti a. KA thutna bulah chuan a rawn kal hnai zel a, “Min ring ngam turin ka duh che kha, a bak chu ka kutah dah vek la a tawk ani mai. Huaisen takin min zui la, chu chu I tih theih hlu ber ani ang”a ti leh a. Duat tak hian ka hnung chu a bang thak thak a, Josh chu a rawn lang thut a, ka mittui ka la hru hul lova, ka makeup pherh deuh nuai leh Harshil ka bula awm a hmuh chuan engmah sawi lovin a rawn hnek ta chawrh chawrh a. Josh chu ka dang a, chhuatah Harshil chu a tlu sawp nawk a, a hnar chu a thi duh hle a, ka scarf pawrhchhuakin a hnar thi chu ka hru a, Josh chu ka hau mawlh mawlh bawk a, “Tupawh ni rawh se, I rilru tina tu chu ka hlah ngai lovang”a ti a, Harshil chu alo nui hawk a, “Ropui hle mai”a ti a, Josh chuan khawih leh a tum a, mahse ka lo dan tlat avangin a thei ta bik lo.

PART-VII

Harshil chu bathroom ah a in silfai a, Josh chu thinrim takin ka in atangin a chhuak a, biak tumin ka call char char a, a pickup duh lo. Harshil chu bathroom atang a rawn chhuak a, a kamsir chu alo pilh ve phang a, first aid box chu lachhuakin damdawi ka hnawih sak a, ka rilruah Josh ringawt a awm a, ka thlavang a hauh na ah a thinrim phah tih ka hria, nuam ka ti thei lo. Harshil chuan a coat chu a ha tha mawlh mawlh a, ka en reng a, “Pui..”min chhuk en run a, ka melh zawk a, ka hawisawn lehnghal a, ka bulah chuan a rawn thu a, “Pawi ka ti lutuk, Josh pawh ngaihdam min lo dilsak dawn nia”a ti a. Ka la chhan loh avang chuan ka kut chu a rawn vuan a, “Ka nawr lutuk ang che tih ka hlau, mahse ka tlai ang tih ka hlau tho bawk si”a ti leh a, ka han thaw halh a, “Harshil.. “ ka aw pawh chu a chhuak tawk tawk a, “Engmah hi ka hrethiam lo, ka hrethiam lo takzet ani”ka ti a. Min kuah hle hle a, duat takin ka hnungah a chul heuh heuh a, “Min ring tawk la, engkim hi a tha vek mai ang”a ti a. Ka duh ngai loh leh ka ngaituah ngai loh thil chu ka ti chho mek ani, hmangaihna mit chu alo del takzet anih dawn hi!

Ka mutui lai chu ka phone a rawn ri a, meng mang lo chuan ka han pickup a, “Good morning ka duat.. thawh a hun e”Harshil chuan zangkhai vah hian a rawn ti a. Ka sana chu ka han en a, zing dar 6 chauh alo la ni a, ka inkhuh tha a, ka muhil leh ta daih a. Ka harh leh chuan dar 8 alo ri tawh, hmanhmawh takin ka tho a, ka tlai loh chu ka ring tawh lo. Ka inbual a, ka insiam sawk sawk a, ka in ka chhuahsan lai pawh chuan ka hmanhmawh luatah ka nghilh deuh dup in ka hria. Gate duty in min lo wish pawh ka chhang mumal hman lo, gate pawn ka chhuak chu Harshil chu a motor nghengin alo ding vang a, min hmuh chuan alo nui var var a, mak tih hmel taka ka en chuan hlawhtling in ti awm tak hian min siai a, “Mu rei leh lutuk mai”a tisap a. Hmanhmawh takin ka chuang lut a, car glass chu ti thla in pawn boruak chu ka han hip a, “Gurgaon ah I in luah tur ka tifel tawh”ka va melh kawk a, a thusawi lai chu a tawp chat a, “Ka insawn duhlo ka tih kha”ka ti a. Ngaipawimawh lo awm tak chuan car tape chu a play a, “Min lo hruai tawh suh”ka han ti leh hmuk a. Za deuh hian a nui chhuak ta hawk hawk a, “Hruai ziah I duh loh chuan Gurgaon ah chuan awm mai rawh”a ti a, ti fuh in ti zet hian min nuih a, hepa zet hi chu!

Office ka thlen chuan Chaya chu alo thleng tawh a, min hmuh veleh min lo ko vat a, “Josh nen nizan atang kan la inbe lo, engthilnge a chungah thleng le?”mangang zet hian alo ti a. Keipawhin biak ka tum a, ka la be tlang thei reng reng lo. Lunch ei tura kan chhuah chuan kilkhatah hian inngaihtuah muk hmel zetin alo thu reng a, Chaya chuan rang takin a pan vat a, keipawh chuan ka zui ve nghal a. Min hmuh chuan khawdang a hawi daih a, Chaya chuan a be nghal chul a, a rul tawk chiah in a chhang a, a khat tawkin min melh leh thin a, nuam ka ti lo ru hle a, Chaya erawh chuan kan boruak a hre lem lo. Kan ei zawh chuan ka tho a, Chaya pawh hrilh lem lovin ka kal ta daih a, lift pan a ka kal lai chuan Harshil leh Roopa chu an rawn in zui chhuak ve chiah a, be lovin ka kaltlang a. Room ka thlen chuan ka chair ah ka thu chawrh a, engkim chu ninawm ka ti vel vek. Rei vaklo hnuah ka phone chu a rawn ri a, Harshil alo ni a, ka pickup chuan banah amah chu nghak turin min rawn ti a, thildang a sawi leh hma in ka dah ta daih a. Ka awmdan chu ka hrethiam lo, ka bag ka la a, ngawi rengin ka haw ta daih a. 

Ka inbual a, tlem chuan ka harh deuh in ka hria, doorbell ri chu hria in ka kawr ka ha vat a, ka va hawn chuan Josh leh Harshil chu kawngka bulah an lo ding a, hrilhhai takin ka melh dun a, an nui ta var var a. Inchhungah kan in zui lut a, Harshil chu ka bulah a thu a, Josh chu min ep zawngin a thu bawk a, “In pahniha hmuh rual cheu chu ka lo in beisei miah lo a”ka ti a, “Dear, hepa hian a tihnat vaih che chuan ka chhuah hauh lovang”Josh chuan ati a. Harshil chu ka melh a, min lo nuih sak a, “Engtikahmah ka kalsan lovang che tih hi I hnena intiam tur emaw ka tia, a hnenah zawk intiam alo ngai sia”Josh melh pah chuan a ti a, “Gurgaon lamah I insawn dawn tih pawh ka lo hria a, a ziaawm sawt ka ring”Josh chuan a ti a. “Ka awm dawn tih pawh ka la sawi hleinem”ka tih chuan Harshil chuan min melh hrawk a, engahmah ka ngai duh lo, “Kan hria ang chu”ka bengbulah a rawn ti sap a. Josh chu Chaya nen engemaw tih tur an neih avangin a haw hmasa a, Harshil nen chuan kan dinner tur siamin kan buai dun hle a, a coat phelh in a kamis chu a ban a thlep a, a che vel chu a zei zaih mai a, hmuhnawm ti takin ka thlir reng a, "Min en reng lo khan min rawn pui ve rawh"a tih chuan ka phu zawk a, zak ru deuh tak chuan ka kalsawn daih a. Thla chu a eng bial pup a, balcony ah thu in chu thla eng zet chu kan thlir dun a, "Thla ai mah chuan nangmah hi en reng mai che ka duh"ka sam thli in a chhem vanga ka hmai rawn zar tu chu a han vai kiang a. Ka hmai chu dim tein a kut chuan a thai kual a, ka hmui zawn a thlen chuan a rawn kun hniam a, duat leh uar zet hian min fawp a, ka thiam ang tawk chuan ka lo chhang let ve a. A hmui fawh nuam leh dam zet a lak kian hnu chuan ka mitah min en a,"Ka hmangaih che"a ti zui sap a. Chhanna ngaihna hre lovin ka pawm thlawp a, ka hnungah chuan duat takin min chul a, hmangaihna... hmangaihna hi ka la hrethiam ve lo pawh ani ang. A phone a rawn ri cher cher a, a kekawr ipte atanga a han lakchhuah chuan Roopa alo ni. Pickup loh a tum tih ka hmuh chuan pickup turin ka ti a, hreh hmel tak chuan a pickup a.Gujarati tawng dik tak maia an inbiak avang chuan enge an sawi tih ka hre lo. Ka lo hawi a vel mai mai a, an inbiak zawh chuan inthlahrung awm tak hian min melh a, "Roopa kha a pa a tha vak lo anih hmel a, ka kal mai a ngai dawn a, pawi ka ti hle mai"a ti a. Roopa hming lamrik anih hian ka lo na leh thin, mahse damlohna thil anih vang chuan ka hrethiam ta hram a. Chanchin min rawn hrilh leh tura intiam in a kal ta a, ka ruak huai hian ka in hria. Dar 11 thleng chanchin min rawn hrilh nghakin ka awm a, mahse engmah a rawn sawi loh vang chuan ka mu ta daih a.

Zing ka harh veleh ka phone chu ka en nghal a, msg leh miscall pawh a awm lo. Khummawng lamah ka vawm thlawp a, rilru nuam lutuk lo in ka insiam a, office kal pawh chu ka peih lo ngei mai. Ka  room ka thlen chuan tukverh atang Harshil chu alo thleng ve chiah tih ka hmu a, a hmel chu a pawr deuh phang a, a hma ni a a thawmhnaw ngai chiah chiah a rawn hak avangin hospital ah chuan a riak anih ka ring deuh a. Min rawn hmuh hma in ka lut vat a, Roopa thlauhthlak ngawt theih lohna chin tam tak a awm dawn a, kei hian thutlukna ka siam sual ngei niin ka hria. Ka room kawngkhar chu a rawn ri rak a, Harshil chu a lo lut a, “Nizan kha ka haw lova, hospital ah tih ngai alo tam deuh bawk nen ka haw hman ta lova”inthlahrun hmel tak chuan a ti a. A mitah chuan ka melh kar a, “Harshil, kan kal thui hma in let leh mai ang, Roopa chungah hetiang thil hi ka ti thei lo, min hrethiam rawh”ka ti a, “A theih loh.. “a phun sap a, “Roopa hian a mamawh takzet che ani, a pa vanga a rilru hah lai ani lehnghal, kan inkawp thei tak tak chuang lovang”ka ti a. Thinrim hmel tak hian min melh a, engmah sawi lovin a chhuak a, thutlukna dik ka siam ngei in ka ring.

Tlaia ka haw tur chu Harshil chuan min rawn pawt dawr dawr a, ka han hawi vel chuan tumah hmuh tur an lo awm tawh lo. A room ah min nawr lut nawk a, bang ah min nawr bet a, a khawsak dan chuan min barakhaih em avangin chet ngaihna pawh ka hre lo, “Tiang khan I duh duhin min play suh aw..”Ka bang nghen chu a rawn beng pawp a, a mit chu a sen deuh ram avang chuan ka hlau ve deuh a, “Awlsam taka ka kaltir duh che I ring mi?”a in her a, min hnungchhawn zawngin a ding a. Chutah tlemin a han inthlahdul deuh a, min hmachhawn zawng chuan a ding leh a, “Ka kaltir thei lo che, pawi ka ti lutuk”a han ti leh a, ka chil chu ka lem khawlh a, “Harshil, I hrethiam lo anih kha”ka han ti dek dek a. Min rawn kal hnaih a, “Enge hriatthiam tur awm a, Puii, hmangaihna hi hriatthiam chi ani lo, hriatfiah chi zawk ani asin”a ti a. Ka dar ah chuan a rawn vuan a, “Engkim ka siamtha ang ka tih kha, khawngaihin chance min pe rawh, tiang ringawt chuan a theih loh”a ti a. A mitmeng chu a dul raih a, khawngaih thla a la ngawih ngawih a, ka hrawkah hnawhtu awm vang chuan ka tawngchhuak thei mai lo. Dim deuh tak hian min han thing a, “Tukin a I thusawi kha sut leh rawh, khawngaih takin”A ti ngawih ngawih a, ka hnar thei bik lo. Ka kuah thlawp a, engmah sawi lo mah ila ka awmdan chuan ka chhanna chu a ti chiang in ka hria. Enginnge ka hma hun min hmuak ka hre lo, mahse risk lak mai loh chu duhthlan tur ka hre ta lo.

Gurgaon lamah ka insawn fel tawh a, duhlo mah ila hnial theih ani miau silo, Harshil chuan engkim min lo buaipui fel vek tawh a. Josh chuan a remti vak lo na in a tilang lutuk lova, keipawhin a ruk chuan nuam ka ti hran lo. Ka chhungte pawh ka hrilh duh lem lova, anihna takah chuan ka tana chhuah leh harsa takah ka in barh lut zel tih zawng ka hre ve, mahse ka kal lui ta zel si a, engtinnge ka awm zel dawn tih chu hun in ala hril ang chu! Office kal nan minute 5 bak hun ka mamawh ta lova, chu ringawt pawh chu thawvenkhat chu a tling. Harshil chu min rawn tlawh zing lo turin ka ti fova, a tirah chuan a zawm tha ve viau a, mahse karkhat a liam hnu chuan tlai tin a rawn kawi a, achangin chaw a ei a, a haw veleh mai thin. Roopa chu ka ngaihven ve reng a, a pa damlohna thil avang chuan office ah hmuh tur a awm ngai lova, Harshil nen an inkar chu ka hriatpui lova, amah Harshil han zawh reng pawh nuam ka ti chiah silo, a chang chuan ka rilru hi a tawt ve ut ut thin. Tlai khat chu tum loh deuhin office ah ka hna a laklawh avangin ka awm tlai a, ka haw dawn meuh chuan an lo haw zo deuh vek tawh. Ground floor ka thlen chuan Chaya leh Josh an lo la awm a, min hmuh veleh min lo ko vat a, “Dear, Roopa kha I lo hmu em?”Josh chuan a ti a, ka lu chu ka thing a, “A thin a rim hmel lutuk, Harshil room lam kha a rawn pan a, nangmah kan ngaihtuah deuh che a, kan lo nghak che”Chaya chuan a ti a. Inchung lam chu ka han hawi a, engmah phei chu a hmuh theih loh a, ka inhnamhnawihna thil a nih loh beisei ru takin kan haw a, ka rilru erawh a nuam thei chuang lo. In ka thlen hnu rei vak lo ah ka doorbell a lo ri a, Harshil anih ring in ka hawng vat a, mahse Roopa zawk alo ni. Lut tura ka sawm chuan ka hmai ah min beng ta pawp a, “Tenawm nu, I thiltih hi I hria em? Min khin phakah min ngai ani maw?”a ti a, a au ani ber. Ka inchhungah chuan a rawn lut a, ka bungrua te chu a en kual a, “Heti tak hian ani maw hausak hi I lo thlakhlelh? Ka hnen atanga Harshil min laksak thei tur khawp hian I rilru a bawlhhlawh ang tih ka lo ring lo”min kawk ta sawk sawk a, “Engzat chiah in nge Harshil chuan alo lei che?”ten hmel zet hian min melh a, chutianga Harshil lei theih mai mai anga min ngai chu ka rilru a na em em a, ka mittui chu a rawn baw zawih a, “I ngaihdan ang khan engmah a thleng lo”ka ti a, “Ani maw?”a han meng bial vel a, “Harshil hian a duh tak tak che I ring em ni? Kei hi min kalsan phal I ring amaw? Ka hausakna leh ka hmelthatna hi a hnar thei ngai lovang, lo en ang che”a ti a, a chhuah zawng chuan ka kawngkhar chu na takin a khar bur a. Chhuatah chuan ka thu sawp niai a, ka mittui chu a tla zung zung a, ka dang seng lo. Engtia rei nge chutia ka thut chu ka hre lo, kawngka a rawn in hawng thawm ah chuan ka han dak chhuak a, Harshil chuan hlauhthawn hmel takin min rawn kai tho a, ka mittui chu a hru a, ka chakna zawng zawng te chuan min thlawhbosan ta ni mai hian ka hria.

“Ka hlauhthawn ang ngei thil a thleng ani maw?”a ti a, a chek tlak tlak a, min kuah a, a tih dan ang ang chuan ka awm tawp a, “Engkim a tawp tawh thu ka hrilh a, tha deuh in kan sawi dun a, a ngai thiam ve hle khan ka hre si a, I lakah tuan alo tum vang anih ngei dawn hi”a ti a. Tlemin ka ziaawm ta deuh a, ka ngaihtuahna pawh a rawn fim tan a, min kuahna atang chuan ka talchhuak a, “Khatianga min puh tur kha ani lo asin”ka ti sap a, “I hausakna hi ka duh lo”ka ti leh a, min pawm bet a, “Ka hria alawm, ka naute, ka hria alawm”A ti a.

PART-VIII

Ka entrance exam tur avangin ka hunawlah chuan ka inchhiar ve reng a, ka hna pawh Harshil remti lo chung ka bang ta bawk a, mi mitmei veng reng a awm chu ka kham a ni. Part time a thawh tur hna chu ka hmu leh nghal mai a, a hmaa ka thawh thin ang tho anih avangin harsatna ka nei lo. Tlai lam chanchinbu chhuak ani ve thung a, chawhmaah ka kal a, chawhnu lam chu ka duhtawkin lehkha zirna hun ka nei thei ani. Zankhat chu ka lehkha zir ka bei ngawrh deuh anih ka ring, ka luhai chu ka pai chawn chawn a, ka luak chu a chhuak nghulh a. Ka phone chu ka hmu phe ruai a, ka han lakang a, Harshil number ka dial tih chu ka hria, a bak engmah ka hre tawh lo. Ka harh leh chuan ka khumah ka lo mu reng a, doctor chuan min lo en vel mek a, a piah deuh ah chuan Harshil chu mangang zet hian alo thu a, ka harh tih a hriat chuan min rawn pan vat a. Ka banah chuan drip alo invuah avangin phawi turin ka hrilh a, “I mamawh alawm, a rei tawh lovang, a zo tep”ka lu ah chuan duat takin a rawn chul heuh heuh a. Doctor nen chuan engemaw hi an sawi a, rei vak lo hnuah doctor chu a haw ta a. Ka khum bula ka sana chu ka han melh a, zing lam dar 1 alo ri chiah a, Harshil chuan drip khai chu a herh tawp a, ka bulah a rawn thu a. Ka hmai rawn zar tu ka sam chu a han hui khawm a, “Muthilh tum rawh”a ti dam thlap a, “Ka ngaihtuahawm tawh hleinem, hahchawl rawh nangpawh”ka tih chuan a nui sak a, “I muhil ani tih ka hriatchian hunah keipawh ka mu ve ang, muhil phawt rawh le”a ti a. Ka maimitchhing a, ka taksa chu a chauh em avangin ka muhil vat a, ka harh leh chuan khua alo var tawh a, Harshil chu tui tak hian alo muhil a, ka ban chu a vawn tlat avangin ka chesawn ngam lova, ka tih harh mai ka hlau ani. Ka dar ka delh na chu a kham tawh em vangin muangchangin in her ka han tum a, ka chet veleh chuan Harshil chu alo harh vat a, phak deuh tak hian min en a, “Na I nei em?”a lo ti var a, ka lu ka thing a, ka han nui a, ka lu chu a tuai thur a, a han tho chhuak a. Ka maimitchhing vang vang a, ka lu chu ala hai deuh riai a, mahse nasa tak erawh ani tawh lo.

Harshil chu office turin ka ti a, mahse a tum lo bur, “Ka kal dawn loh thu ka sawi vek tawh, hetiang hian ka kalsan ngawt thei lo che”a ti a, ka hnial thei dawn chuang lo tih hria in ka nawr lui duh lo. Damdawi min ngaihtuahsak vek a, a khat tawkin eitur min siamsak bawk a, ka chakna te pawh an lo let leh tan ta. Chawhnu lamah chuan ka mutna atang ka tho chhuak a, inbual ila a nawm ka ring bawk a, ka inbual a, ka harh sawng sawngin ka hria. Harshil chu ka ngaihtuahawm loh thu leh min hawsan tura ka tih chuan zanriah eikhamah a haw tur thu in min chhang a. Sofa ah chuan a thu thluang duai a, a bulah chuan thatchhe takin ka mu a, kan hmui chu a awl hman meuh lo. Hma hun te chu kan sawi dun ve bawk a, ka rilru erawh chuan a ngaihtuah thui ngam lo. Ka kawngah chuan a rawn kuah a, “I pasal tur angin min dream ve ngai em?”a rawn ti hlawl a, ka lo nui tawp a, “I la ngaihtuah ngai lo tih ka hre mai”titau aw lek lek hian a ti a, “Chutiang lam pawh ani chuang lo, pasal nei tur ang hian ka lo la inngaihtuah ngai miah lo zawk a”ka ti a, thudik pawh ani. Ngawi rengin min kuahbet a, thawklehkhatah min vawnna kut chu lasawn in a tho nulh a, a ngaihna hre lo zetin ka en a, “Ka insum theihna ten min bosan an tum tlat, tihchhiat che hi ka tum ngai lo”a ti a, duhawm em em hian min nuih var var a. 

Hun akal ve zel a, Harshil nen pawh buaina lian tham lutuk tawk lovin kan inkawp ve reng a, hetih lai hian Roopa chuan Harshil chu neih let tumin alo bei tih ka hrelo, amah Harshil pawh chuan engmah min hrilh lova, tlai khat a rawn kal in a han a bansan thut maithei tih chu uang angreng takin a sawi a, ka lo ngai thutak lem lo. Anihna tak chuan Roopa te chhungkaw tan chuan ani tluk hi an awm dawn lo tih ka hria a, harsatna a tawh pawh ka ring lo ani. Thil erawh a kal kual a, thleng thei lo chu a awm lo tih ka hre thung a. Ka phone chu a rawn ri ral ral a, Josh alo ni a, ani hi ka hna ka bansan hnu lawkah a bang ve a, company dangah offer a hmuh that avangin a zawm vat a, duh ang pawhin kan inhmu thei tawh lo ani. Weekend rawn hman a tum thu te min rawn hrilh a, kan inhmuh loh rei tawh avangin a rawn kal thei tur pawh chu ka lawm hle ani. Chaya nen an inthen tirh lai vel anih avangin min rawn tlawh hreh deuh in ka hria a, anihna takah chuan an inkawp tirh khan a workout dawn lo tih ka hria, mahse khatiang alo nih takah chuan engmah ka sawi duh ta lo a, an pahnih a an nat ka hlau ru reng a, mahse ka rin ai tak chuan an tuar thiam in ka hria. Chutih rual chuan na lo tawp erawh an nil ova, Chaya pasal neih tur kan hre chhunzawm bawk nen, Josh chuan Delhi a awm zui chu nuam a ti tawh lo tih ka hria a, chuvanga hmundanga thawk ani tih pawh tlang takin min hrilh. Hun engemawchen hnuah kan hna inhmu leh thei tur chu ka lawm hle nghe nghe. 

“Ka banna ka thehlut”thutthlengah chuan a rawn thu hnawk a, ka thiltihlai chu dah tha in ka va thlek hu a, a hmel chu a chauh hmel hluah hluah a, “Engvanginnge chu chu I tih kher a?”ka ti a, “A tul tlat sia nih hi”ka mitah chuan min melh ran a, “I tan chuan engkim ka huam tih ka hrilh che kha”a ti leh a, a bulah chuan min pawt thu a, hna dang zawng nise a hmu har dawn lo tih ka hria mahse ka ngaihtuah zawk chu a tellova company kal zel dan tur zawk chu ani. Amahah engkim a innghat a, Roopa-I pa lah dam tak tak tih a nei thei tawh silo, chu chuan ka rilru a luah mah zawk ani. Mahse engmah sawi a la hun lo tih ka hria a, ka tana hetiang taka inpe hi ka la tawn ngai loh avangin ka tan chuan a hlu chung chuang lutuk a, engmah ka sawi thei lo. Zanriah ei nghal turin ka ti a, rawng ka bawl chhungin thutthlengah alo muhil a, a hmel ah chuan rim taka thawk ani tih a lang reng a, ka khawngaih reuh ngei mai. A hma atang khan a rilru in sual buai nen fel lo deuha a chhuah chu a duh dawn lo tih a hriat a, theihtawpin a thawk leh ani ngei ang. Ka phone ri pawh ka lo hre mailova, “I daddy cool”Harshil chu ala muhil emaw ka ti a, ka phone chu a rawn lek kang va a, “Hello..”ka pa biak a biak ka tum chuan ka nu zawk alo ni. Room ah lut a, rei tawk fe kan inbiak hnuah ka khumah chuan ka thu a, ka melh ngai chu ka melh tlawk tlawk a. Ka nu chuan hnam dang bialpa ka nei tih ka pa in a hriat vanga a thinrimzia leh thla khat chhunga haw ngei ngei tura min tih thu chu a rawn sawi a, chuta ka haw lo anih chuan a fanu ah min ngai tawh dawn lo tih a rawn sawi tel nghe nghe. Hei hi chu ka rin lawk ni mahse  a taka a lo thlen meuh chuan ka ipik a, ka na vawng vawng mai ani. Harshil chu ka hrechhuak thut a, ka hmai chu phih in ka chhuak a, min ngaihtuah hmel takin min lo en a, ka nui lui sak a, engmah thleng lo ang maia awm chu thil har tak ani. Mahse min hrethiam em em thin tu chuan engmah min zawt lova, ka lawm ru hle.

Engkim chu a thleng rang lutuk a, ka in buatsaih hman lo ani ber in ka hria. Ka exam tur chhuanlamin Harshil lokal tur chu karkhat chhung ka dang tawh a, mahse dan theih loh hun ka nei vat dawn tih ka hria. Inchhungah ka inkhung nasa lutuk chu ka a thei mai dawn te hian ka hria a, pawn lamah boruak thianghlim dawng turin ka chhuak a, engtia rei nge ka chhuah ka hrelo, ka let leh chuan khua chu alo thim tep tawh a. Ka in ka lut tur chu ka kawngka bula lo ding chuan min ti phu zawk a, tiang hawla lo ding chu Roopa-I pa ani tih ka hria. Lut turin ka sawm a, a driver erawh pawnah a awm tir a, thutna ka kawhhmuh naah chuan a thu a, tui in tur ka lak sak a, helai hmun thleng a a rawn kal nachhan tur chu ka rin hriat mai a. Amah epzawngin ka thu a, a hmaa ka hmuh aiin a lo tar leh tawh in hria a, a hriselna that loh vang te pawh ani mahna! .

“Ka fanu, vawiin ni hian I hnenah khawngaihna dil tur che in ka lokal ani, kan hnena reilote I thawh chhung khan kan tangkaipui hle che ani tih ka hria a, lawmthu ka hrilh hmasa duh che a”a aw chu a han thian a, “Kei chu I hriat leh I hmuh ang hian ramtuileilo ka ni tawh mai a, Harshil tello chuan engtihna mah ka ni ta lo. He kan ram mihring heti zat awmnaah hian rin ngam pakhat chiah ka nei a, chu chu Harshil hi ani. Ka fanu nen hian an inhmel duh ve tih chu ka hria, mahse an inkarah hian hmangaihna a piang lo tih chu ka hria, chutichung chuan ka remruatna in innei turin ka ti a, an inhual fel ve ta mai a, anmahni ah hian ka engkim ka hlan a, ka fanu neihchhun pawh ka hlan tel ani. Harshil hian thinlung alo nei ve ani tih chu I lo lan atanga hian amah pawhin a hre chauh ang, a en dan che ka hmuh vawikhatna atang khan danglam nangmahah a hmu tih chu ka hre daih tawh. In lo inhmangaih hi ka dem ngawt lo cheu a, a ti hrangtu nih cheu hi ka hreh em em zawk ani. Mahse khachen ka lo vahvaih pui leh ka taksa pawhin a zawh loh thleng rak a ka lo thawhna midang hnena hlan ai chuan thih hmasak pawh ka duh zawk, Harshil hi min pe let leh turin ka ngen ngawih ngawih che ani”a ti a. A mittui chu a tling pam a, hmuh nuam ka ti lo, ka mittui tla tur chu ka lo khap persak a, “Ka fanu, I khawngaihna dil mai loh chua tih theih ka nei silo… ka fanu saw han en the, vawiin ni hian hmangaihna a hrethiam ve tawh a, nitin mittui nen hun a hmang a, pa thinlung atang chuan fate rilru na hmuh tluka hrehawm hi a awm lo ani. Ka ngenna chu min tihhlawhtlinsak thei hram ang tiraw..?”a ti a. 

Ka thutna ngaiah chuan thu in ka mittui chu ka dang seng lo, Roopa-I pa bulah khan hahdam taka lo awm turin ka ti kha ani a, keimah zawk hi ka hahdam lo takzet ani. Ka doorbell ri pawh chu ka hre mai lo, a rawn rik vak vak takah chuan ka va hawng a, kawngkharah chuan Josh chu a lo ding reng a, ka hmel bui chuk a hmuh chuan mangan hmel takin min nawr lut a, engmah ka sawi theilo, ka kuah thlawp a k tap ta zawih zawih a. Ka lungchhe zual a reh hnuah thil awmzia min zawt a, ka sawi ta ve a, a han thaw halh a, “Dear, kan tawn ang in tawng ve chu hrehawm ka tiin I nat turzia ka hriatthiam pui khawp mai che. Eng thutlukna pawh siam la, keichu I lam ka tang zel ang”a ti a. Zankhua in kan titi a, kan mut meuh chuan zing lam alo ni der tawh, ka dinhmun min hrethiam tu hnena zep nei hauh lova han inbunruah chu a nuamin a hahdamthlak takzet ani.

PART-IX(LAST)

Rei cham theih anih loh avangin Josh pawh a let leh tawh a, a haw dawn chuan min ngaihtuah takzet tih ka hria. Harshil nen uluk taka sawidun turin min chah ngawrh hle a, ngawi renga kalsan lo tur chuan min ti a, huaisen taka engkim hmachhawn turin min ti bawk ani. Hun remchang hmasa berah Harshil chu ka hmuh tur thu ka hrilh a, kan inhmuh leh hun tur hre lovin kan in vai liam ta ani. Nihnih a liam hnuah Harshil chu inhmuh pui ah ka sawm a, phur takin a rawn kal vat a, ka khawngaih zawk. Ka lehkhabu inchhawp hnawk urh chu a keu a, a bih vut vut a, “Mizoramah haw I tum mi?”ka lehkhabu kara ka flight ticket chu a rawn phawrh chhuak a, “Um..”tih pahin ka lu chu ka bu nghat a, a thaw ri hak chu ka hria, “Min tlanbosan I tum ani maw?”pawn lam chu alo melh daih a. Coffee ka chawi phei a, dawhkanah chuan ka dah a, “Harshil, thil hi uluk taka kan ngaihtuah a kan sawifel a ngai ani”ka ti a. A hmaa a hmel phur tak mai chu lungngai hmel hian a inthlak nghal vek a, sawi leh tur hre lovin ka ngawi ta reng a. Ka bulah chuan a rawn thu a, “Puii, I lo kir leh ngei ang tiraw?”a ti a, ka kun a, ka awmah min hnawh a, ka tah a chhuak ut ut mai bawk si, “Harshil, nang leh kei hian kan kawng ve ve kan zawh a ngai tawh ani”ka ti a. Min vawnna kut chu a thlah a, ka va en chuan a hmela mak tihna leh na a tihna kha ka theihnghilh tawh ngai lovang. A ding a, a lu chu a thing a, “Nilo, kawng zawh tur dang ka nei reng reng lo, nangnen anih loh chuan khawvel dang ka nei ve lo”a ti a. Dawhkana a car chahbi chu a rawn la a, “Harshil…”a banah chuan ka vuan a, “Sawi tur ka hre lo, ka kal phawt mai ang”a chhuak tur chu a kutin a mit a han hru zauh chu ka hmu a, a mittui a tla ani ve ngei ang. Ramtei leh Josh ka bia a, ka tah khum ve ve a, min hnem ngaihna an hre vak biklo, mahse mumal lo taka ka biak na chu dawhtheih takin min ngaihthlaksak a, ka thawl hawkin ka hria. Ka mu a, mahse chhin khat mah ka chhing lo, Harshil chu call ka tum a, a phone a switchoff  tlat a, ka mang a ti ang ru hle. Zing lamah chuan khawvar hma deuh in ka tho a, ka inbual a, bathroom atanga ka chhuak chu ka thawmhnaw pawh ka la inbel kim hma in doorbell a ri a, khua a la var chian loh avangin ka hlau deuh hlek a, tunge tih hriat tumin ka han han bih hmasa a, Harshil chu pawr phang hian alo ding a. Kawng chu ka hawng vat a, a rawn lut chu engmah sawi lovin min kuah a, nghet takin min kuahbet a, ka thawk a chham tep thleng chuan min kuah a, chutah muangchangin min thlah a, a mit sen ram leh a sam pawr phang chu ka han melh a. A nui lui sak a, engmah sawi lovin min fawp ta vawng vawng a. 

Ka khumah chuan kan mu a, kan awmdan tur sawiin a changin kan inhnial a, a changin kan tap a, “Puii, ka hmangaih hmasak ber leh ka hmangaih awmchhun I ni, I ni reng tawh ang”min kuah na kut chu a han la sawn a, “Ka tan I vul ve ngai lo tur hian min tin a takzet ani”a mittui tla tur chu a han tawk zeuh a, “Mahse i tana thatna tur chu ka dang phal silo”ka kuah a, a awmah chuan ka hmai chu ka han phum a, “Harshil… “ka mittui bawk chu a rawn tla a. Ka hnungah chuan duat takin min beng thak thak a, “Pasal tha tak neiin chhungkua in la din ve anga, I thinlung phek khatah chuan min chentir ve reng rawh aw..”a ti a, a hmui khur der der chuan ka hmui chu a rawn si a, chutah duat leh uar tak hian min rawn fawp a, keipawhin ka thiam dan berin ka lo chhanglet ve a, kan pahnih a kan khawvel chu kan thlahliam mek zel ani. Amaha danglam lo awm chu ka hmuh hmaih lo, a tho a, khum tlangah chuan a thu a, a hnunglam atang ka kuah a, ka kut chu nghet tak hian a lo chelh a, “Ka hmangaih em vang che hian ka khawih chhe thei lo che, I pasal hnenah zahawmna I chhawm lo anih chuan ka damchhung hian ka in ngaidam thei tawh dawn silo, I kiang aka awm reng chuan insum hi harsa ka ti dawn ani”a ti a. A tha lo tih hrereng mah ila min sawm lui nise hnar turin chakna ka nei in ka ring lo, ka mipa tawn hi ka tawng sual lo ani tih hi ka la hre chho dawn chauh alo ni.

Coffee dawm in inhmachhawn in kan thu a, vawiin ni hi kan pahnih a kan hun hnuhnung chu ani, kan in en a, sawi tur kan hre tawh lo. Nilengin inah kan inkhung a, ka bungrua chingfel in chawhnu pum kan hmang zo a, a tlai tial tial a, nuih luih a har telh telh bawk a. Inhmangaih tak chunga inthen alo ngai leh thin hi a pawi ani tih bak sawi theih kan nei silo, ka mittui chu ka thup seng lo. Harshil erawh mipa anih angina a pachang zawkah a tang a, min tih hlim chu a la tum hram hram a. Mahse a thinlung erawh a tap ru vet ho ani tih ka hria, lemchan thiam lo ber pahnih hian lem kan chan angai si. Zingkara airport a min thlah dawn avangin riak turin ka sawm a, kan mut dawn chuan sofa ah a mutna tur a siam a, “A vawithumna hi ka paltlang angem tih ka hre silo a, hetah hian kan mu ange”nui sak chuan a ti a, kan in mangtha hnuah room ah ka lut a, ka mu ta a. Ka phone ah chuan whatsapp msg ka dawng a, ka han hawn chuan Harshil alo ni, “Ka va ngai tak che em”tih hi, ka han reply a. Hmun leh hmun ah chuan kan inbe ta char char a, thawh hma a ngaih avangin mu turin min ti a, kan mu ta a. Ka mu tlem khawp mai, hma takah ka tho a, Harshil chu alo tho daih tawh a, tukverh chu hawngin pawnah chuan a lo dak vang vang a. Ka thawm hria in a rawn hawi a, min rawn pan a, min rawn fawp zeuh a, tuna tang reiloteah kan khawvel chu a dang tawh dawn ani tih kan hria, ka tah chhuah loh nan ka in sum tang tang a. Pawnah chuan ding in ka hun lo hman na thin chu ka han thlir kual a, ka lung a leng a ni. Car ah ka luh hnu thleng chuan ka thlir zui a, engkim mai chuan ka lung an ti leng ani ber. Airport ah chuan kan thlawh chhuah hun kan nghak a, Harshil chuan ka kut a vuan bet tlat a, mi hriat si loh chuan kan chezia in inthlahna kan sawi dun mawlh mawlh a, kan thlawhchhuah a hun dawn ta, Harshil chuan min vawnna chu a hum nghet sauh a, “Ka thlah phal lo che”a mittui pawh a zahpui ta bik lo, kan inkuah a, mi in min en em tih kan ngaihtuah tawh lo. Ka mittui chu a hru a, “Harshil, min vawnna hi thlah in min kal tir tawh mai rawh”ka ti sap a, chung lam chu a melh chho a, “God… help me”tiin a phun chhuak sap a, min vawnna chu a thlah a, “Goodbye to romance”ka chalah a fawp a. Thlawhna a ka luh dawn pawh chuan ka hawi let ngamlo, ka rilru thlakin ka kir leh ang tih chu ka hlau ani. Mittui nen ka seat ah ka thu a, “Harshil.. mangtha”ka ti a, ka maimitchhing a ka mittui chu a rawn baw ta zawih zawih a.

Ka hna thar zawm in ka office tharah chuan ka thu vang a, Lalawmpuii, MCS ka ni ve ta reng mai. Kumhnih chhung Harshil vanga ka mumal loh hnuah ka han inziak tling ve hlawl a, ka chhungte an lawm a, keipawh ka lawm ani. Ka kal dawna a thi awrh lai min pek chu ka han khawih a, a locket love sign chu ka han fawp a, “Harshil, ka hlawhtling ve ta asin”ka ti sap a. Ka dawhkana Times of India rawn thleng thar chu ka han ban a, a front page a an thuziah chuan min ti khi sak a, “NUPUI NEIH NGAIHSAK LO TLANGVAL HLAWHTLING HARSHIL BHATIA A THLENG SANG ZEL” an heading mai mai chu tiin ka nui chhuak ta hawk hawk a.