BOUQUET

BOUQUET

"Hla kan zir zo tep,haw hunah ka lo bia ang che"

Ka phone chu ka khumah ka vawm a, zantin hetiang message dawn hi thil nuam anih pawh ka hre lo. Ka inphih fai a, ka ha ka nawh zawh hnu chuan ka mu a,ka mut pawh a chhuak lo. Thil tam tak ka ngaihtuah a, min hmangaihtute hi nge hlu ang kn hmangaih te tia chhun lama kan thianho titi na chu ka ngaihtuah let a. Ka muhil tep tih-ah ka phone chu a rawn ri a, whatsapp message rawn thleng chu ka han hawng a, Duhsanga a lo ni.

"Kan bang ve chiah a, in ka thlen meuh chuan tlai tawh viauin ka ring, i duh leh lo mu mai rawh"

Ka data ka off a, ka maimitchhing ta daih a. Duhsanga nen hian inkawp tur kan ni lo em ni aw tiin ka inngaihtuah ve nasa thin hle. Tlangval fel tak a ni a, an kohhranah pawh an tangkaipui ber a ni. Music lama talent a neih hi an hmuchiang em em a, engkimah an hawlh lar ber pawh a ni. Branch mai nilovin bial ah, Mizoram chhunga KTP thiltih pui eng emaw a awm tawh phawt chuan a tel ti ila kan sawi sual tamin ka ring lo. Mahse, engvang nge ka hre lo, amahah hian ka duhkhawp ka hmu lo ti ila a chiang ber awm e. Hmeichhia ka nih angin ngaihsak nihte ka duh a,ngaihpawimawh nih ka duh bawk. Kartluanin office lamah a kal a ngai a, inkhawm loh zan hunawl angah chuan a rawn kal hi ka beisei ve thin. Chumi branch ah chuan item kan nei dawn, hla zir a awm dawn tih angreng hi a ngah em em a, a rawngbawlna daltu nih ai chuan tiin then pawh ka tum ve thin. Chumi vang ngawta han then lah chu ka ngaihtuah chian hian ni berin ka hre leh mang si lo a, ka tangkhang ti ila a dik berin ka ring. Duhsanga hi High School ka kallaia ka thian kawm ve ber Apuii cousin a ni a, class-X kan nihlaiin hostel-ah kan awm tlang a, visiting day-ah ka thiannu hi a rawn tlawh ve a, chuta tanga inhre chho a inngaizawng ta chu kan ni. Hetih lai hian ani chuan BA 1st year a zir mek a, kum 6 dawn kan inkawp ve tawh tihna a nih chu. Ka tan a rinawm lohna leh a fellohna sawi tur ka hre ngai lova, chutiang chu ni mah se kan ina rawn len erawh a rem ngai lo. Ka chhungte tan khan naupang mai ka la ni miau a, inleng nei rual ka la ni hek lo. Kohhranah a inhmang hmain a tangkai ber a ni chho zel bawk a, college ka rah ve meuh chuan mi buai tak a lo ni tawh. A hman chang chuan a rawn leng ve fo na a inleng neih ka ngam ve hunah chuan inhmuh fo ka duh ve tawh ang tia a hnenah pawh ka lo sawi tawh kha a thleng thei ta mang tlat lo a ni.

Darthlalanga ka hmel lo lang chu uluk takin ka en a, ka chantawk apiangah ka lungawi ang ka tih thin kha thil awllai a lo ni reng reng lo. Muangchangin ka insiam a, khua a nawm loh avangin chhuah pawh thil chakawm a ni lo. College zawh thuai hi ka chak tawh a, ka nu hnungzuia sumdawnna lama kal ve hi ka chak a ni. Ka room kawngka chu a ri rak a, ka nu chu a rawn dak a,"Class i tlai ang e, i pa rual hian chaw rawn ei ve mai rawh"a ti a, a kalsawn leh nghal a. Zing lamah hian chaw ka ei thei meuh lova, engmah ei lova chhuah hi ka nu phalloh thil anih avangin chak lo chungin tlemte tal ka ei thin.

"Naktukah Rosangkima kha a rawn thleng dawn nia nu-i, vawiin lamah a room tur lo tihfel a ngai ang"ka pa chuan a ti nghut a.

Ka pa chu ka en reng a,"Eng nge mamawh i neih?"min en chuang miah lo hian a ti a, mi hi chu a hrechiang mah mah a ni, "Engmah"ka nui put put a, "Ka graduate zawhah Master degree neih kher ngai ka ti lo ania" ka ti a.

"Delhi-ah i u bulah awm turin thutlukna ka siam vek tawh"a ti leh hmuk a, ka pa mizia ve reng a ni a, a hre ngai lo tan chuan nelawmna pakhatna a nei lo. Ka nu chu ka melh a,a dar a lo san ak ringawt a.

"Ka tui lo,ka nu dawrah ka pui ve tawh ang"ka ti a, ka chaw chu ei lovin ka thai let kual vel mai mai a.

"Dawr nghak mai mai turin lehkha ka zirtir lo che"a ti a, a thleng a chawi a, a tho ta daih a.

Ka pa rilru hneh nan ka theihtawp ka chhuah a ngai tih ka hai lo, khawi hmunah mah hian ka awmbo dawn lo, ka duh lo hrim hrim a ni tawp mai.

Unau pathum zinga a milai ka ni a, ka u hian nupui nei tawhin a hnathawhna hmun Delhi lamah a nupui fanaute nen an khawsa mek a, ka nau hostel lamah a awm bawk a, ka nu leh pa nen kan pathumin in kan nghak a ni. Ka pa hian nitin chanchinbu Dolphin Times a enkawl a, mahniin press changtlung tak neiin sumdawnna a bei ve a, ka nu pawhin bazar lamah thawmhnaw dawr a nei bawk a, harsa lutuk lovin chhungkua kan khawsa ve a ni. Unau zingah hmeichhe awmchhun ka ni a, chutihrualin ka unaute zinga khawsa tam ka nihna hi a lang ve zeuh zeuh a, ka nu lutuk lem lo a ni. Mahni induh tawk ve tak, mahnia thu tihtlang tum thin ka ni a, hei vang hian buaina ka tawk zeuh zeuh ti ila thu ka thup lutuk lo in ka ring. Ka phak tawk rawngbawlna chelhin kan kohhranah a mawi tawkin ka inhmang ve a, mahni indah thaa midang tanpui ka duh thinna hi ka nunah chuan ka thlak phal loh ber mai a ni ve awm e.

“Ds-a te kan vengah concert an rawn nei dawn asin”ka thiannu Biaktei chuan a ti siam siam a, engmah hre lo anga awm chu nuam ka ti chiah lova, “Nia..”ka han ti ringawt a, a nihna takah chuan bialpa te programme thiante zawkin min hrilh hria chu zialo ka ti ve deuh a ni.

“Kan venga in prog.neih pawh ka lo hre ve hauh lo a..?”message chu ka thawn a, min chhan leh lawk pawh ka ring lo. Mahse, ka rin loh deuhin min chhang nghal ve mial a.

“Nia, lo la hrilh hman lo che a, sorry.. Rawn kawi ang”a tih chuan tlemin ka rilru a dam veleh deuh.

A office bang chu a rawn kawi a, thingpui ka lumsak a, choka lamah dawhkan kilin kan thu dun a, a phone chu a bih sek a, ka thaw hak a, min rawn melh vat a.

“Tlaiah ennawn leh an tia, ka hman loh thu ka hrilh mai”a ti a.

Ka kut chu a han hum vang vang a.

“Ka ngai lutuk che”a ti a, he thu hi karkhat zet chu min hrilh tawh lo.

“Ka beisei..”ka ti sap a, “Min ngai ve lo ni maw?”a tih chuan ka nui a, “I hrechiang khawp alawm.. ka ngai che tih chu”ka ti a.

Hepa hi ka hrethiam lo takzet, then duh hial thin mah ila ka ngai ve em em tho a, hun rei tak kan lo inkawp tawh vangte pawh hi a ni mahna! A haw tur chu kawtah ka thlah a.
“Zanin chu min rawn tawiawm ang tiraw?”a ti a.

“Ka hre lo le, kan exam tawh dawn sia, ka hman angemaw chu..”ka ti mai a.

“Ka phut lui chuang lo che a, lokal la tih erawh ka duhthusam ber chu a ni a”a ti a.

Kal ve tum angreng deuh chuan kan inthen ta a, kal ve pawh chu thil pawi lo tak a ni alawm tiin ka thiannu Biaktei chu kalpuiah ka sawm a, ani pawh chu a lo phur khawp mai. Hma lutuk loah kan veng kawnah chuan kan chhuak ve a, mi pawh an lo tam tawh a, ka rin aiin mi hian an lo hlut a nih hi ka tih phah hial a. Charity concert anih vanga mi chu rawn kal tam an ni nge hetiang hian mi hian an hlut ve hrim hrim thin pawh ka hrethiam lem lo. A tawp thleng pawh awm lo chuan kan haw ta daih a, nuam ka tihzawng a ni tlat lo. Ka inthlak zawh chuan ka lehkha zir tur inchhawp vel chu ka keu ve a, rilruah erawh a lut tha duh lo hle. Dar 11 velah chuan ka phone a rawn ri a, Duhsanga alo ni a, ka han pickup vat a.

“I la mut loh chuan thingpui ka rawn in kawi ang chu”a ti a, pawi ka ti lem lo.

A thianpa Johntea nen an rawn kal a, a thian kawmngeih ve tak anih avangin kan innel em em a, a thiante zingah chuan ka harsatna engkim ka thlen ngam ve na a ni.

“Zanin chu neitu chan changin a hma lamah I rawn thu ve ang chu ka lo ti ania”fiamthu hian a han ti a.

“A hnung atanga in perform lai lo en kha a nuam zawk alawm”ka ti a, Ds-a chuan phawk zet hian min lo en deuh ha a.

“I rawn kal tak tak em ni?”a ti sup a, ka lu chu ka bu nghat a, a nui vur vur a, ka inthiam lo zawk.

Zan a rei tawh avangin len reina chi a nil ova, an ni pawh thingpui an in zawh chuan an haw ve nghal mai a. Ka mu tur khum ka siam lai chuan ka phone chu a rawn ri a, whatsapp message a rawn thleng a.

“Hming, ka lawm e aw…. Zanin I rawn kal ve avang khan ka thinlung hi a lawm tak tak, I peih vang a ni hauh lo tih ka hria, chutichung chuan I rawn kal a, ka tan chuan ka chhinchhiah reng tawh tur thil a ni. ka hmangaih che”

Ka tah a chhuak zawk, hetiang tak hian a lawm dawn tih hria ila, vawi tam tak ka tawiawm ngei ang. Keima duhdan chauhin ka kal thin a, a ruk tak chuan hei hi a lo beisei ve thin dawn a nih hi ka ti a, ani nena kan inkawp rem theihna tur chuan ka zawn peih phawt chuan kawng alo awm reng dawn a ni tihte chu ka hrechhuak ta uai uai a.

PART-II

Exam ka neih avangin ka inkhung deuh ngar ngar a, inkhawm tura ka chhuah bak chu ka chhuak lo. Thla khat zen zawn chutianga ka inkhung beh hnu chuan exam pawh ka zo fel ta, a thawventhlak takzet. Tunah chuan chhungte tan pawh puitling tia chhiar theih ka ni ve ta in ka hria a, mahni inrintawkna pawh ka neih belh a, ka tan chuan rahbi thar ka rah tan na alo ni ve ta. Ka exam zo tih hriain Ds-a pawh a rawn leng ve vat a, kan inhmu khat bawk a, kan thu tlangte chu ka ni deuh huih hian ka inhre pek a. Inkhel kan en a, ka chhungte an mu tawh bawk a, kan hnena rawn awm Sangkima leng erawh a rawn la haw lo. Ani hi kan chhung hnai tak chu a ni lova, ka pa te khaw lama chhungkhat anga kan neih te an ni ve a, a hna avangin Aizawl lamah a rawn awm a, inluah mai tur a hmuh loh avangin kan hnenah a rawn awm a ni. Dar 10 a pelh hretah Sangkima a rawn haw a, inkhel chu rei vak lo a rawn en ve a, Ds-a nen chuan inhmelhriattirna te ka nei a, amah hi mipa tawngtam a ni lo a, chutihrualin a polite em em thung. An inhre tan chauh na a an titi tlang ve nghal bawrh bawrh a, mahse rei erawh a thu lo.

“Engtin nge kan awm dawn?”teh tawp zel hian, “Engtin vak nge kan awm ang a?”ka khi suk a.

“Inneih lamte hi mawle”a tih chuan a zawhna ka man lo lutuk chu ka nui huk a, “Ka nghak rei ve tawk tawh chein ka hria a, ka chhungte lah hian min nawr ve reng bawk sia”a tih chuan a hmel chu a thutak hle a, uanna hun a ni lo tih ka hria.

Ani hi neih ka hreh em em pawh a ni lo, chutihrualin college life ka hmang zo ve chiah a, chutia pasal han neih ringawt pawh chu ni theiin ka hre chiah bawk silo, ka rilru chu a insual buai a ni ber. Ka va melh chuan min lo melh reng a.

“Ahh.. ka hre bik chuang nang”ka ti sap a.

“Hre bik chuang rawh…”a nui ve suk a, “Tak takin ka nawr lui miah lo che ania, min lo la nghak rawh I tih pawhin ka thei lutuk tlat, mahse, inneih hi chu ka duh ve tawh”a ti muang charh a.

Ka kum zat ka ngaihtuah a, nulat ka hmang chho dawn chauh tihte chu ka ngaihtuah thleng a, felfai takin ka hma hun turah hian ruahmanna ka lo nei reng reng lo tihte chu ka hrechhuak chiang hle.

Ka kut chu a rawn vuan a, “Hming, ka nghak thei che ka tih kha aw..”dam dup hian a ti leh a, “Tun rum ruma inneih chu ka lo la ngaihtuah miah lova, neih ngei che chu ka duh ve tho alawm , thawk erawh han la ve phawt ila”ka ti a, hrethiam takin a bu nghat nghat a, hepa hi mi puitling tak a nihzia ka hriatbelh zel chu anih hi.

Ka nu dawr lamah ka liam nitin a, ka pa lah chuan ka pass anih phawt chuan zir zawm turin min ti deuh bur a, Ds-a hrilh chu ka hreh ru hle a, ka pa rilru thlak dan tur chu ka ngaihtuah nasa ve hle. Nikhat chu ka rin loh deuhin chhunah Ds-a chu a rawn lang hlawl a, a hmel chu a ngui deuh burin ka hria a, ka ngaihbel deuh nge tih phei chu ka hre lo. Dawrtu neuh neuh ka neih avangin a lo thu ve mai a, ka ngaihsak hman mai lo. Mi an awm loh hnu chuan a bulah ka thu a, a phone chu a bih deuh ngur a, ka kiu in ka han nghawk a.

“I phone ringawt khawih bik suh”ka ti a.

“Nangpawhin min ngaihsak chuang hleinem”rawn hawichhuak miah lo hian a ti a, ka nui mai a.

Ka phone chu ka han ban dawn a, min lo lak khalh daih a,

“Khawi maw ka lo en ve lawk ang”ka tih pawh chuan a ak daih a. A phone chu ka phih sak lawp a, kan inchuh buai lai chuan Sangkima chu a rawn lut chiah a, phone ka ken lai chu Ds-a ka pe vat a, Sangkima ka en chuan a lo nui vur vur a, “I nu in rawn inkhar hma se I rawn lam haw mai dawn nia a tic he a, mahse, Ds-a a awm tho a, ka kal leh mai ang”a ti a, a inher vut a. Ds-a chu a ding hluai a, “Ka la haw hman lo deuh sia, in hmanhmawh chuan lo va haw zawk ula”a ti a, Sangkima chu lai fe hian a ding a, ka chhanna a nghak tih ka hria. Ds-a chuan a helmet a la vut a, ka phone chu min pe a, “Pawi lo tiraw?”mawihnaiah chuan a han ti ve a, mahse, a awm dan chu ka lawm hlawl lo a ni. Sangkima chu min nghak turin ka ti a, Ds-a pawh a kal nghal zat a, min ngaihsak ve tan tawh dawn anih hi tia ka lo lawmna te chu a bo zo leh nghal vek.

“Ka rawn kal chu a fuh vak lo aniang a..”motor khalh pah chuan a ti a, ka lo ngawih deuh vung vung tihte chu ka hrechhuak chiah.

“Chutiang engmah a awm lo, ani hi chu mibuai a nia, hriatthiam hi a ngai ve thin a”ka ti a.

In kan thlen hnu pawh chuan room lamah ka inkhung deuh char char a, chawei dawnah chiah ka chhuak a, thil tam tak ka ngaihtuah a ngai. Chaw kan ei lai chuan ka pa bawk chuan Delhi-a chhuk turin min nawr leh sek sek tawh a.

“An result pawh a chhuah a hma a”ka nu chuan a lo ti a, kei erawh ka ngawi reng thung.

Ka mut dawn thleng pawh chuan Ds-a hnen atang call emaw message emaw engmah ka dawng lo. Engkim hi hriatthiam tum thin mah ila theih loh chinte hi a lo awm a, ngaia neih mai tawh tur anga lang pawh hi harsa tih chin chu a lo awm ve tho. Ka muhil chu ka harh deuh zawk zawk a, ka mutui lo tak zet a ni. Zing lamah ka lo muhil veleh sak a, ka harh meuh chuan ni alo tlang sang tawh hle. Sangkima chuan rawng a lo bawl leh vut vut tawh a, mipa che fel tak mai a ni a, zingtin exercise a la a, a haw hnuah a theih ang angin ei rawng min bawlpui thin. A lo zai rat rat a, min hmuh chuan a nui sang a, eng emaw ti tak hian a bula awm hi a hahdam ve riau thin. Ka hmai phih turin bathroom lam ka pan nghal a, ka chhuah leh chuan dawhkanah thingpui a lo inhung ran tawh a.

“Nizan I mu tha lo tih ka hre mai”a ti a,.

“Awihawm loh”ka ti zawi deuh sap a, a nui ta hak a.

“Dawp lah hi I awl ve si a”a ti a.

Ka nui ve ta nge nge a, ka phone dawhkana ka dah chu ka melh zauh zauh a, inhauhna awm miah lova kan inngawihsan ngawt chu thil nihphung ni pawhin ka hre lo. Engang pawhin kan inkar hi tha loin tihtawp lo duh mah ila heti ngawt lo hian tihdan a awm tur a ni.

“Ka va inbual harh teh ang”tiin ka tho nulh a, rilru la peng thei thil ka mamawh a ni.

“Nizanah Lalduhsanga leh Johntea kan thenawm dawrah an rawn thu ve reng a, thil ka leiin ka hmu a, I exam zo chu inchen hle dawn emaw ka tia”Biaktei chuan a rawn ti bawrh bawrh a, ka lo nui ringawt a.

“Hey, nangni pahnih hi ka hrethiam ngai dawn lo cheu anih hi, in inhau ani maw?”a tih chuan thil awmdan chu ka hrilh ta vek a.

“Mate.. nangpawh ngawi reng lo hian I ngaihdan leh duhdante hi chiang takin sawi ve thin la, hetia ngawih theih lutuk pawh hi rah tha chhuahtirna a ni lo a nia”a ti a, a dik pawh a dik ang.

Ka thaw hak a.

“Ka hrethiam lo, kan inkawp rem ve viau dawn nia ka hriat hian hetiang buaina ho deuh hi a awm zel, kan inkawp rei tawh vang chauha la inkawp ve mai mai kan angte hian ka hre thin. Ka hrethiam lo, ka thiam vek bik lo tih ka hria, mahse, mipa a nih angin a lakah beiseina ka nei sang tih tal hi chu hre ve tawh tur chu a ni alawm”ka ti a.

“Ka hriatthiampui ve tho che, mahse, I hriat ve tho kha, Ds-a pawh zei khawpa a tleirawl atanga mi hrang hrang kawp a ni lova, tihian in inkawp ve ngar ngar ania, a sual vang ni lovin a ngaihna a hriat loh vangte pawh a ni ang. In boring ngawih ngawih..”a ti a, ka thiannu hian a sawi sualin ka ring lo.

A phone chu a phawrh chhuak a, a kheuh nuap nuap a, amah chuan a nui leh hak thin.

“Duhhawihloa chu a rawn kal dawn, ka lo hau hrep teh ang”a ti a.

“A ngai kher lo”ka tih chuan min nuih sawng ringawt a.

A hnu rei vak lo ah chuan Ds-a chu a rawn lang tak tak a, min hmuh chuan hahdam hawk hmel hi a pu a.

“I tha deuh tawh mi?”a tih chuan a ngaihna ka hre lo ngang mai, ka thiannu chu kan melh rual thawt a.

“Inngaihsak dan thiam hlawl lo pahnihte hi zirlai kan pe ang che u, in induhtawkna neih ve khanglang kha paih ula, tha takin awm rawh u”a ti a, a bag a la a, rang fe hian a chhuak ta daih a.

Ds-a pawh chu a thu ve ta reng a, “Nizan..”kan ti chhuak rual chiah a, kan inen a, kan nui a.

“Min biak hun ka nghak a”ka ti a.

“Keipawh, nimin tlaiah khan ka che mawi lo tih ka hria, mahse, a chhan ka hre bik lo, min ngaihsak lo riauin ka hre tlat a, ka thin kha a rim ve tawp”a ti a, tha takin engkim chu kan sawifel veleh mai bawk a. Tha takin kan inthlah a, keini aiin kan thiante hian min hrechiang zawk tih vawiin ni pawh hian a lang leh ta.


Sitting room ka thianfai a, office chawlh a nih avangin Sangkima pawh inah a awm a, nula inleng a nei a, ka nuih deuh ruh ruh a, tunlai hmeichhiate kan huai tawhzia ka ngaihtuah thlen lai chuan ka nui chhuak huk a, Ds-a nen kum 6 kan inzui chhungin an inah keima thuin vawikhat pawh ka la kal ngam lo. A chhungte nawrluihna avangin vawihnih chu ka kal ve tawh a, a bak chu ka kal nawn ngam lo. Chhuat ka nawh lai chuan Sangkima room atang chuan a inleng nu nen an rawn inzui chhuak a.

“Ka va thlah lawk ang aw”a ti a, ka thlir zui reng a, engtinmah an awm loh chu ka ring ve ngawt a, a chhanchu minute 10 pawh tling lo ah khanu kha a rawn kal ve chauh tlat a ni. Thingpui ka lumlai chuan Sangkima chu a rawn let leh mai a, ka lo nuih deuh sung a.

“I ngaihdan ang khan engmah a thleng lo a nia aw… Bialnu ka nei ka tih pawhin min biak a thulh duh miah lo mai”a ti a, a ning ve hle tih chu a hmelah a lang reng, mahse, chhaih chu ka duh ve reng reng a.

“Tunlai mipate chuan inhmuh remchan phawt chu chhuah in tum lo a ni lawm ni?”ka ti a.

Chair-ah chuan a thu a, “Tunlai mipa ka ni ve lo aniang”a thutak leh ran tawh.

“KA fiamthu mai mai anih kha..”ka ti a.

“Ka hria alawm”a ti leh mai a, “I bialpa hi a vannei ve ngawt mai”a rawn tichhuak hlawl a. Thingpui pek pah chuan ka han melh a, a khi deuh sung leh nghal.

“Ka vannei daih zawk alawm”ka tih chuan, “I tih kha kha ring reng ah.. I chhan ve ropui si”a ti a, kan nui dun ta hawk hawk a.

PART-III

Kan kawmchhakah eng emaw leiin ka chhuak a, an nula U Mafeli’n dawr chu a lo nghak a.

“Nizan chu Lalduhsanga’n hmeichhe pakhat a rawn thlah ve nasa mai mawle, kan veng a mi chu a ni lo chiang a, kawnah an rawn tlan tlang a, Ramhlun lampang anih hmel” thawveng tak hian a ti liam puat a.

“U Mafel, nizanah maw?”ka ti leh ngat a, a chhan chu KTP Presbytery Meet an thlen turah musician ho an inhmuhkhawm dawn tih min rawn hrilh tlat a, U Mafeli chuan a hre sual a nih ka rin vang a ni. Ka pawisa min kir pah chuan a nui hak a.

”Lalduhsanga kher hi chu ka hai lovang Hmingte..”a ti a, mak ka ti telh telh mai.

Ka haw hnu chuan biak ka tum a, ka la call tlang thei lo zui leh nghal a, ka ngaihtuah a, ka thin chu a rim telh telh mai. Ka mut dawn pawhin kan inbe tho a, zanrei ve tawh tak a ni a, hall-ah an la awm thu min hrilh a, chumi hnuah chuan a chhuak leh tihna a ni ang em? Chumi chu a ni theiin ka hre lo, U Mafeli te hi zan lamah dar 9 thleng bak an inhawng ngai lo. Ka sa pup pup a, dawt min hrilh a nih chuan ka lawm lo ngawt ang. A hmuh hun huna a chhiar atan message chu ka hnutchhiah ta tho a, nilengin ka awm a nuam lo. Tlaiah eirawng ka bawl laiin ka phone chu a rawn ri a, Ds-a anih ringin ka han ban vat a, Sangkima zawk a lo ni, hmundanga chaw a ei tur thu min rawn hrilh a, chungte chuan ka thin a tirim hlur tawh.

“Kolasib-ah kan lehlang lawk a, office ka thlen hnuah kan kal leh deuh thut sia, engmah pawh ka lo hrilh ta lo che a, ka phone battery low lutuk a, ka charge zawhah ka rawn call ang che”

Ds-a message rawn thleng chu ka bih ran a, ka hlauhthawn thil hi thleng dik se engtin nge ka awm ang le? Ka lu chu ka thing a, chutiang mihring chu a ni lo tiin ka inhrilh mawlh mawlh a, vawi tam tak ani hi then tumna rilru te hial lo pu tawh thin mah ila amah ka duh loh vang a ni lo tih hi ka hrechiang a, tunah phei chuan ka nghet em em zawk a ni.

“Nizan chu thenawm veng nula I thlah tihte ka lo hria a, nuam ngawt ang”tih chu ka thawn ringawt a, sawichhuah dan ka hre lo a ni. Ka message chu a tlang lova, a phone switchoff in a charge leh tih ka hre mai.

Ka phone rawn ri chu rang zet hian ka ban a, call ni lovin whatsapp message bawk a ni.

“Tunlai I awmdan hi ka sawithiam dan ber chuan min then duh si, thinrimna tur zawng I ang ber. I ngaih dan chu lo kalpui phawt zel mai rawh, ka chau, ka mu dawn”

Ka thinrimna hi amah ka then duh vang a ni amaw? Ka thinrim tih hre reng chungin a mu thei bik a ni a, amah zawk hian zawi zawia min kalsan hi a tum ni ta berin ka hria.

“I sawi ngam loh thil hi ka rawn sawi law law mai ang, tun atang chuan nang leh kei hi mihrang kan ni tawh. I zalen tawh e, I duh ang ang chuan I awm thei e”tiin ka thawn let a, hnawl leh kalsan nih ai chuan na tak chung pawhin thu tawp ka siam ang.

Ka mu chu ka muhil thei lo, engvangin nge thutawp kha ka siam thawt thawt tiin ka han in haw lek lek a, mahse, ka chelh theih loh chelh din tum hian tha ka thawh hnem ta in ka hria a ni.

Ka tho leh ta nge nge a, sitting room-a ka va chhuah chuan Sangkima chuan tv a lo en a, min hmuh chuan mak ti deuh hian alo phawk hra a.

“Ka muhil thei lo a”ka ti ringawt a.

Thingpui lum turin choka ka pan tlang a, dawhkan bawh chuan ka thu a, thawm ka hriat chuan ka hawi chhuak vat a, Sangkima chu a rawn phei ve hi a lo ni a. Chair chu a pawt chhuak a, a rawn thu ve a.

“Harsatna I nei em ni?”dam diai hian a ti a, ka lu chu ka thing a, “Engkim I sawi thei alawm, I thawl hawk maithei asin”a ti a.

Ka thaw hak a, “Engmah sawi tur a awm lo, kan tawp tawh”ka ti a, “Mipa tha tak a ni si a..”a tih chuan ka tah a chhuak zawk.

“Ni e, a ni ngei alawm, keimah hi ka tha ve lo, kan inkawp rem thei thlawt chuang si lo chu a nih hi”ka ti a.

Kan ngawi dun ta vang vang a, amah chu a rawn tawng chhuak hmasa a.

“Hming, inlaichinnaah hian tlawm zawk kan awmte hi a ngai a, zawldawh zawk kan awm loh chuan inlaichinna tha a awm ngai lo. Mi tha tak a nih si chuan chelh tumin I theihtawp I chhuah tur a ni lo em ni?”a ti a.

“Mahse, ‘mahse’ tih hi a awm tlat si anih hi, tihian kan inthen hian a tan pawh a tha zawk. Kawng engkimah amah hrethiamtu a mamawh a, chuan keipawhin ngaihsaktu ka mamawh, chu chuan kan inkar chu a tichiang ber ang”ka ti a.

“Hei leh chen in inkawp thei tho si a, tun atakah a harsa tih chu ka awih lo deuh a ni. Midang duh I nei te hi a ni zawk lo maw?”a ti ta khauh a, ka melh deuh ram a, “Thil awm thei tho a nia”a han tih zawm nghal a. Chutiang zawnga ngaih tura ka awm pawh ka la hre chuang lo.

“Ka na ve viau ang, mahse, ka na rei lo ang. Thawk han lak te pawh ka mamawh alawm”ka ti a, a nui ve ta sak a. Thingpui kan pahnih in tur chu ka siam a, ngawi rengin kan in a.

“Kan harsatna hi kan hre ve ve a, mahse maw, kan chingfel thei miah lo. Inkawp tur kan nih loh vangah ka ngai vek tawh”ka han ti leh a. “Ni e, ka hrethiam alawm, chutiang chu thil ni thei ania lawm. Mahse, awlsam taka inlaichinna tihchhiat hi ka duhlo a, ka ngaihdan ka sawi ve mai mai anih kha”a ti a.

Ds-a hnen atang message emaw call emaw ka dawng lo, ka thutlukna chu a pawmah ka ngai nghet hmiah bawk. Ka nu hman loh avangin dawr lamah ka thu a, ka rin loh deuhin Johntea a rawn lang hlawl a, “Hmuh ngei ngei che ka mamawh”a rawn ti deuh tawl a, ka lo nui tawp a, “Nui suh, ka thin a rim a nia”a han ti a.

“Engvangin nge ka thianpa chu then I duh a?”tlang takin min zawt bawk a, tlang taka chhan chu tha vein ka hria a ni.

“John, ka thiam loh a tam ang tih chu sawi ngai lovin ka hre reng tho a, mahse, kei hi Ds-a tan mi tha ka ni lo, kei aia tha, amah hrethiamtu hi a neih a ngai a ni”ka ti a, “Mi buai tak a ni a, a rawngbawlna kawngah pawh hian ka chhuang khawp mai. Engkima hrethiamtu, tawiawmtu ka ni theilo hi hrehawm ka ti, tihian chang dang kan ve ve ila a tha zawk”ka ti a.

“Hming, midang duh I neih vang a ni tiraw?”SAngkima zawhna min zawh ang chiah kha a ni.

“Aih, chutiang chuan ngai lo hram rawh. Ds-a tana ka rinawmzia chu a hretu I nih kha”ka ti hmak a.

“Ni e, chuvang tak chuan asin mak ka tih em em” a thaw hak a, “Ka thianpa hi ka tan vang ni lovin, ka duhpui em em che a, hetia in inthen ringawt hi ka ngaihtuah nasat poh leh ka remtih lohna hi a nasa telh telh a nia”a ti charh charh a.

“John, engmah hi ka hrethiam lo”ka ti hul hak a.

“Khawngaihin lo inngaihtuah nawn leh hram teh”a ti a.

“Amah pawn engmah a sawi hleinem, khami zana ka message thawn kha a chhanna ka hmu lova, chuan, min ngaihpawimawh lohzia a rawn tilang bawk a. Thu tawp ka siamna kawngah lah min hnialna a nei lo, chuvang chuan tihian mahni kawng zawh ve ve ila a tawk a ni mai”ka ti a.

“Thutlukna I lo siam fel tawh em a, sawhsawn pawh a harsa khawp mai, mahse, ka thiana rilru a na tih chu ka zep tel hram ang e. Inhmu ula, sawi dun ve reng reng ula ka la duh fan”a ti a, ka lo nui ringawt a.

“Ni e, kan ngaihtuah dawn nia”ka ti a, ka rilru tak tak erawh chuan ka thlah liam fel der tawh.

PART-IV

Ka ute chhungkua chawlh hmangin an rawn haw chho a, an fate pahnih nen kan inhnuk kawi reng a, kan chhungkua kan lo hulhar rei ta deuh bawk nen, nuam kan ti tlang laih laih khawp mai. A naupang zawk Bawihpuia chu ka pua a, inchung zawl atangin motor tlan vel chu kan thlir a, ani hi a pian hnuah Mizorama an rawn chhuah hmasak ber a ni a, mi che vel reng reng chu mak ti tak hian a en vel a, ka hlimpui khawp mai. Thawmhnaw zar tur khar bawr chungin Sangkima chu a rawn chho ve a, Bawihpuia’n a hmuh chuan a lo ngen vat a, kei ai mah pawhin a duh zawk emaw tih tur a ni.

“Hei lo zar la, Bawihpuia chu ka lo pawm ang”a han ti a.

Thawmhnaw chu ka zar a, Bawihpuia te pawh an inchhaih nui leh ar ar tawh a.

“Chhungkua kan ang lutuk”

Ka va hawi chuan Sangkima chu a lo then deuh thaw a, inthiam lo deuh hmel hi a lo pu bawk a. “I duh lo awm…”a han ti leh nghal zat a.

“Hm…”ka hmui ka tipawrh a.

A thaw hak ri chu ka hria a, ka va hawi chuan hmun dang alo hawi leh daih tawh.

“Ka chhuk aw.. “tih leh chhuk ka rual a, step-a ka chhuk pah chuan min rawn zui leh zui loh hriat tumin ka va hawi let a, Sangkima chu a din ngaiin a lo ding reng a, min lo en reng a.

Ka room-ah ka lut a, tukverh lam chu ka thlir vung vung a, engtin emaw tak ka awmin ka hria. Ka lu chu ka han thing a, ka thil ngaihtuah lai chu ka ngaihtuah duh loh thin kha a ni tih hriain thawk ka han la ta hawk hawk a. Nilengin in leh a vel tifaiin kan buai a, dik tak chuan kum 6 chhung zet Dsa nen kan inzui lai khan inkawp nghet em em mah ila amahah hian ka innghat thei tak tak lo, midang duh ka neih ka hre ngai lo chung hian ka bei nghet tlat lo. Kan intih tau rau hnua keimaha nghawng a neih loh dan atang hian ka lo ngheh lohzia ka hriat belh ni berin ka hria. Ka hriat miah si loh hian ka naupanlai atanga u ena ka lo en ve ngat ngat thin, a hna avanga kan ina rawn awm ta, Rosangkima hi keimahah engtin emaw tak a awm a, a rawn awm tirha ka en ang ngawt khan tunah chuan ka en tawh lo tak zet a ni. Chu erawh hai der ka tum ngar ngar a, hlawhtling tak ang maw?

“Dsa te an rawn kal a, rawn chhuak la”tiin room-a ka awm lai chu ka u nupui U Ruati’n min rawn ko a.

Phur lo zet hian ka tho a, sitting room lam chu ka pan a, Dsa leh Johnte-a chu ka va hmu nghal a.

“I va mu hma ve”Johntea chuan a han ti a.

“Ka la mu chiah lo, ka lo tlu zal vel mai mai”tiin ka chhang a.

Kan chhangchhiat deuh avangin nidang ai chuan Johntea pawh a zum ve dakin ka hria. Sangkima leh Bawihpuia an inpawm deuh chawt a, Bawihtei erawh ka mal chungah a rawn thu chat a, kan awm kim ve deuh dal avangin nuam an ti lo tih ka hre mai. Ka u chuan motor chahbi a zawng a, chhuahna tur nei lo hram se ka tih ber zan a ni hial ang. Ka hlauh ang ngei chuan U Ruati nu te inah an riak dawn hi a lo ni a, an kal zui nghal deuh mai bawk a. Sangkima a room lamah a lut chho a, ka nu leh pate nen tv chu kan thlir tlang a, anni tal hi chu thu ve reng se ka ti rilru ngawih ngawih.

“Bawihi thingpui va lum ta che”ka pa chuan a ti a, choka lam ka pan nghal a.

Dawhkan ah chuan ka kiu ka nghat a, ka rilrua awm ber pawh ka hre lo. Sangkima chuan ka darah a rawn khawih a, ka lo phu deuh zuk a, a then tha a.

“Ka rawn haw har lo ang”min siai zeuh a.

“Khawnge I kal dawn?”

“Nula ka rim ve ang chu”

Ka na zawkin ka hria.

“Thingpui chu min siam kep lo mai rawh aw, ka kal nghal mai”a ti a, a chhuak chu ka en zui vung vung a, tinge hetiang hian ka awm? Ka duh lo tak zet a ni.

Ka nute an mu tawh a, Dsa leh Johntea nen kan pathumin kan awm a, chhungte awm loh hnu chuan Johntea pawh a tlangnel leh tawh ngang mai, titi vawrh tur a hre leh hle a, ka ipik ang aiin boruak pawh a ti nuam ta khawp mai. A ding nulh a, Dsa nen chuan kan melh rual thawt a.

“Sawi duh in neih ka ring, chance ka pe ang cheu”a ti a, a nui vur vur a.

“A ho emai, thu ve mai mai rawh, a nuam alawm ti hian”ka ti a.

“A.. ka hnawk pal hang, engkim sawi ula ka duh a ni. Min hrethiam teh u, kawmchhak nula dawrah khian ka lo thu ang”a ti a, han hnial luih chu mawi ka tih chiah loh avangin ka hnial duh ta lo a.

Dsa nen kan boruak chu a tang ru deuh at a, sawi mai tur a hre bik lo a ni ang, a phone chu a tuai vir deuh chhen a.

“Hming..”
Ka va melh a, a dar chu a lo san ak a.
“Ka tihpalh, ka tihpalh tak zet a ni”
Ka thaw hak a, tum dang ang chu nise awlsam takin ka ngaidam leh ngei ang, mahse, tunah chuan ka rilru hi a danglam ve ta tlat si a ni.
“Ds, I tana mi tha tak hi a ka ni lo tih ka hre tawh, chuvang chuan kawng engkima nangmah hrethiamtu I mamawh, I hmu mai ang”ka ti a.

Ka kut chu a rawn vuan vat a.

“Hming, ka hun tha zawng zawng chu nangmah nghah nan ka hmang ral vek tawh asin, ka tana mi tha nilo la hei chen hi ka nghak dawn che em ni?”mangan hmel tak hian min melh reng a.

Ka maimitchhing a, a sawi dik chiah a ni. Hmeichhe tam takin an hel rawn leh an ngaihven em em ni reng chung khan ka tan a rinawm hle a, vawikhat pawh sawisel turin a awm ngai lo. Khang hun chhung a liam hnua rinhlelhna vawikhat ka han nei pawh kha ka thinlung tak hi chuan a fihlim tih ka hre reng a, mahse eng emaw te avangin ka hel laklawh ve mai chauh a ni.

“Ka nghak dawn che em tia ka zawh che pawhin min hnialna I nei ngai lo, tinge tunhnaiah hian I danglam tak em em?”a ti tham chal a.

A kut chu ka han hmer a, tawng chhuah harsa ka va ti tak em!

“Ds, I danglam emaw ka tih vang alawm”ka ti chhuak the ihram a.
“Midang duh I nei mi?”
Ka lu ka thing a.
“Anih chuan kan inkarah harsatna a awm tawh lo tiraw?”
Ka lu chu ka han bu nghat a, min kuah a, ka chalah chuan a fawp zeuh a.
“Ka hmangaih che, ka hmangaih lutuk che”a ti sap a, hmana ka rilru kha put leh theih hi ka va duh tak em!

Ka inlet sek a, ka sana bun lai chu ka han bih a, zing lam dar 2 a ri tawh a, ka mut lah chu a la chhuak lo nasa mai si. Ka rilru hi engtikah mah a danglam lovang tia ka pasal ni tura ka lo suangtuah thin chu Dsa hi a ni ngei a, mahse, amaha ka hmuh ve ngai miah loh kha Sangkima ah hian ka hmu lawi si, hmelma hnawksak tak mai chu he ka thinlung hi ava ni tehlul em!

“Ka lo nghak ve reng che ang a, midang duh hi I neih leh daih si ang a”tia Dsa’n min zawh thin laite khan mahni inringtawk tak khan a tan ka rinawm dawn a, min nghak thlawn dawn lo a ni tiin ka chhang thin a nih kha. Tunah awlsam takin ani hi kalsanin ka thinlung hi ka zui thei lovang, lo duh teh reng pawh ni ila Sangkima tan chuan engmah ka ni kher lovang. Ka room lehlamah chuan thawm a rawn awm a, Sangkima chu a tho tih ka hria. Ka phone ka phawrh a, ka han hmet eng a, ka tihtur hre lo chu whatsapp-ah ka lut a, Sangkima hming ah chuan ka tawp chat a. A status chu ka han check a, “It hurts…”tih chu ka han chhiar a, darkar 3 liamta maia a thlak a ni nghe nghe. Ka phone chu ka lukham bulah ka dah a, hepa hian a rilru tina tu a tawng a ni ngei ang.

PART-V

A hma ai mahin Dsa pawhin min ngaihsak a, ka lungawi loh chhan leh a laka ka beisei engkim a hriat tawh avangin a theihtawpin a insiamtha ve tih ka hria, tlemin a tlai deuh tih mai loh chu tihsual pawh a nei lo. Sangkima nen pawh inchhung hmunkhata cheng ta reng chu ni tin zan tin inhmuh reng tur a lo awm a, ka ngainat thin kha a la ni reng a, mahse a hmaa engkim ka hrilh ngam ang khan engmah ka hrilh ngam tawh lo. A hma ang khan ani pawh hian min pawh loh rukna a nei tih ka hria, a chang chuan ka rilru ang hi a pu ve em ni tiin ka ngaihtuah phah fo mai. Zan lama lengchhuak ngai lo kha zan tin a chhuak a, inkhawm zan anih loh chuan Dsa a rawn lang ve deuh reng bawk a, a chang chuan Dsa haw hmain a rawn haw a, zan danga rawn titi ve siam siam thin kha kan bulah pawh a awm ngai tawh lo.

“Min huatna I nei mi a?” .

Rawng ka bawl lai chuan ka bulah a rawn awm ve a, thingpui in pahin chanchinbu a chhiar a. A thingpui in lai chu a dah a, chiang zet hian min en a.

“Ka neih ka hre hleinem”a ti a, a chanchinbu chhiar lai chu min chhiarsan leh mai a.

“I hre lo der anih chu”ka ti nghut a, a rawn nui ri hak a, “Eng nge nuihzatthlak vak a?”ka melh deuh ram a.

“I hmel a tha a, thinchhiat hi I inhmeh ve lo em a”a ti a, a la nui deuh rah rah a.

“Dsa hi eng nge I hmuhdan?”ka sawi tum pawh a ni lo, ka sawi laklawh tawh si.

“Mipa fel leh tha tak a ni, hetiang bakte chu tunlaiah an awm chuang hleinem. I vannei lutuk ringawt, I u ka nihna angin ka duh pui lutuk che”a ti a.

Nilengin ka ngaihtuah a, nau angin min en ta sa sa, keipawhin ka en thin ngai khan ka en reng tawh ang. Dsa lakah pawh ka theihtawp ka chhuah ang a, kan hlim em em ang tih ka ring tlat bawk. A hma ang khan kan titi bawrh bawrh ngai tawh lo a, inah a awm tlem hle bawk a, pawi ka ti lo zawk.

“Ka pa, thla thar atang chuan in luah hran lam hi ka ngaituah ve tawh dawn em ni ka ti deuh a”Sangkima chuan kan chawei lai chuan a ti a, kan melh thap a.

“A ngai kher em ni? I lo inthlahrung lutuk ania nge, engmah inthlahrunna tur a awm lo a nia”ka pa chuan a ti a.

“Ni e, I nau lahin a thlamuanpui nasa mai si che a, chutia I awmhran daihte chuan a ni thei nang”ka nu chuan a lo ti ve bawk a.

“Engmah hrehawm tihna leh inthlahrunna chu ka nei lo, ka chungah in tha em em a, fa ang tak takin min en tih pawh ka hria. Mahse, hmasawn zel nan chuan han awm hran ve te pawh hi tha dawnin ka hria a, nangmahni ah ka lo innghat lutuk ang tih pawh hi hlauhawm ve a”a ti a.

Ka chaw lem chu a sak deuh talh hian ka hria, engkim kan sawi dun thin kha a ni a, engkim a danglam zo tawh.

“I tih tlat chuan kan dang ngam hauh lo ang che, hetah awm ho reng ila tih hi keini duhthusam ber chu a ni a, mahse, I ngaihdan chu a puitling khawp mai. Engpawhnise, tun vut vuta chhuah erawh tum lo la, kan veng chhungah ngei hian kan hmuh phakah awm la ka duh a”ka pa bawk chuan a ti a.

“Ni e, biakin bula in sa mekte saw ka be chhin mai mai a, a hnuai saw thla thar atangin a luah theih an beisei a, a nuam tawk viauin ka ring a”a tih chuan ka pa te pawhin an lo pawmpui khawp mai.

A duhthlanna anih miau avangin kan phal loh ngawt theih a ni lo va, chuvangin Sangkima pawh thla a thar chuan a inthar lamah a invawm lut a, kan in erawh a rawn lut chhuak reng a, inpui tak takah a rawn nei ve a ni. A hmaa kan inpawh ang erawhin kan inpawh chiah tawh lo va, ka chhungte nen erawh danglam awm hauh lovin an inpawh em em a, ka dik lohna ka hriat loh avangin min be chak lo chung lo biak vak ka tum hran lo.

KTP General Conference neihna tur hmun Champhai lama kal ve ngei turin kan thianho pawh kan inbuatsaih ve sauh sauh a, Dsa pawh musician zingah a tel ve avangin a hma atangin hla zirin an buai tawh a, tawiawm loh a hlauh em avangin buai chung chunga kal ve chu ka tum hle a ni. Kan kal hma zan chuan Dsa a rawn leng a, sofa-ah chuan mu chungin tv a en a, keipawh kan dawr thil buaipuiin ka inchhut buai a, ka zinsan dawn avangin engkim tihfel hmasak chu ka duh a ni. Kawngka a rawn ri rak a, reilo teah Sangkima chu a rawn lut a, ka bulah chuan a rawn thu a, kan inthut hnaih em avangin a rim chu ka hre vat a, zu in ngai pawha ka hriat loh chu zu rim a rawn nam tlat a ni.

“Ka nu te an mu tawh mi?”a ti a, an mut thuin ka chhang a.

Dsa mu chu a rawn tho a, a ham deuh bai bai a, an men rim avangin a hmelte pawh chu a pawr deuh phang a.

“Ka va haw tawh mai ang aw, zing chhuah tur a ni bawk sia, thawh ka hai ang tih a hlauhawm”a ti a.

Pawnah kan inzui chhuak a, a bike bul thleng chuan ka thlah a.

“I inlengpa kha len rei tir suh aw, mut hma I mamawh ve tho kha”a han ti a, a nui a.

“Ka lo hnawt haw vat dawn nia”ka han ti fiam ve a. . A tuka inhmuh leh beiseiin kan in vai liam ta a.

Inchhung ka va luh chuan Sangkima chu a lo tho ve chiah a. . “Haw nghal I tum mi a, thingpui te in phawt la”ka han ti a.

“Hming, ka danglam zo tawh a nih hi”a ti a, a thaw hak a.

“Kan danglam fo thin alawm, mahse a tha lo lam zawnga danglam chu a tha dawn lo e”ka ti a.

“Hrehawm ka ti, engkim hi sawi chhuak vek thei ila chuan ka thawl ve hawk maithei a, chu lah thil theih a ni silo”a ti a, a thutna ngaiah chuan a han thu leh a.

“Sangkim, I unaunu angin min en thin a ni lawm ni? Engkim I sawi thei alawm, tihtheih pawh ka lo nei mial maithei asin”ka ti a.

A ka chu a han ang deuh zuai a, a lu chu a thing leh a.

“Ni lo, engmah hi ka sawi thei lo, min hrethiam rawh aw. Hetianga nun hi ka duh dan a ni bik lo, mahse ka theihtawp ka chhuah ang”

“Ka ring tawk che, I inpeih hun hunah I harsatna pawh chu min hrilh dawn nia. I chhungte kan awm reng tih hi I hre dawn nia”ka ti a.

PART-VI
Sangkima haw hnu chuan keipawh mu turin ka inbuatsaih a, ka zin tur ka insiam lawk sa tawh avangin ka mu nghal a, Champhai khaw vawt tuar tura rilru inbuatsaih chung chuan ka muhil ta vang vang a. Ka mu tui lai chu ka harh hlawl a, ka mumang avang chuan ka thlan chu a lo huh dup a, ka han inhru a, ka khum bula light chu on nghalin ka sana chu ka han en a, zing lam dar 1 a lo pel chiah a. Ka han mu leh dawn ngial a, ka rilru chu a nuam thei lo. Ka phone chu ka han la a, Sangkima number chu ka hmetchhuak a, rilrua inthiam chiah lo chung chuan ka han call a. A ring quit tep tihah hmeichhe pakhat hian a lo pickup a, ngawi renga dah ka tum leh lai chuan, “Sangkima’n accident a tawk a, Aizawl Hospital-ah an enkawl mek a, a phone a lock tlat avangin tumah kan rawn be thei lo a”chu nu chuan a han ti a. Ka inperh tho vat a, ka nu te room lam ka pan nghal a, thil awmzia sawiin damdawiin lam pan tur chuan kan insiam nghal chuk chuk a. Hospital kan thlen chuan thil awmzia kan han zawt zung zung a, kan in atanga a haw hnu lawk khan a inchung ten thawm ri rak an hria a, Sangkima in atanga thawm rawn chhuak nia an hriat avangin rang takin an kal nghal a, a khum bulah thisen nen a lo inchiah piah deuh nuaih chu an zu hmu ta a ni awm e. Misual kut hnu awm ang an hmuh loh thu leh amah Sangkima hian a hma atanga in sawiselna neuh neuh a neih thin thute chu an sawi bawk a, chu chu doctor report-ah pawh chiang takin a lang a ni.

Hospital kawtah chuan mangang takin ka vei tawn chhen a, ka rin loh deuha thil lo thleng avang chuan ka ngaihtuahna te pawh chu a buai nak a, zing khawvar ruala Champhai lam pan tum kha ka thulh mai a ngai dawn niin a lang. Sangkima chhungte pawh ka pa-in a be tawh a, zanah engmah tih theih a awm chuan loh avangin zing khawvar ruala Aizawl rawn pan turin an in ti a, an rawn thlen hma chuan keipawh hospital-ah ka awm chawt a ngai dawn a ni. Kawl eng tan iar chu ka thlir reng a, huphurh tak hian ka phone chu ka han hmet eng a, Dsa number chu ka han hmetchhuak a. Eng ang takin lo dawng sawng ang maw, huphurh tak chuan ka han call a. Ka zin ve theih dawn loh thu ka sawi lai te chuan ka khur der der a, a hma atanga ruahmanna kan lo siam ve vek tawh thil chutia a thulhsan tu bera han tan chu thil nuam tak pawh a ni lo, thil awmzia ka han sawi chuan, “A tha alawm” a ti nghut a.

“Thih leh dam inkar thil ania, I hriatthiam hram ka beisei”ka han ti ve a.

“Ka thil lo ngaihtuah daih chu maw, khatiang chiah khan awm ve ila, tu zawkin nge I thinlung luah khat ang tih hi a ni. Mahse, a tha e, ka ngaihtuah loh tur tur ka ngaihtuah a ni”a ti a.

“Ds, hetianga awm ve hi I duh em ni? Sawi pawh sawi ri tawh reng reng suh, hlim takin hun in han hmang dawn nia. Chanchin min rawn hrilh ve dawn nia”ka ti a.

Ka han thaw hak a, hma kan sawn emaw ka tih chhung hian a ngaiah bawk kan let leh thin ni ber hian ka hria. Nilengin ka buai a, investigation hrang hrang tih a tul a, chinchang hre ber tiin keimah chu a buaipui tu berah ka han tang chhunzawm a. Tunah chuan engkim a chiang ta, khatia Sangkima han tlu ta khan a lu a sawh chiang hle a, chu chuan engtiang taka thuk nge pawi a khawih dawn tih la hre lo mah ila a hriatna erawh a bo then dawn tih chu tlang takin doctor chuan min hrilh a ni. Ka thlan fim chu a rawn bawl tek tek a, ka han hru thuak a, eng chin nge a hriat ang a, khawi chin nge a hriat miah loh thil ni tur chu tih ka ngaihtuah a, ka sa hut hutin ka hria. A rawn harh chhuah hun chu kan nghak a ni ber tawh a, nghakhlel leh huphurh tak chungin a ni kan nghah ni! Thawkna dawt hnawk zeta a hnara an vuahna te chu ka thlir dauh dauh a, kan inah khan engvangin nge riak tur khan ka lo tih mai loh tihte chu ka han inzawt a, tuman kan hma hun kan hre mawlh si lo.

“A rawn harh tawh anih chu”ka pa chuan ka hnugah chuan zawi tein a rawn beng a, ka tho vut a, hmanhmawh takin ka tlan chhuak nghal a. Doctor-in a lo la endik vel avangin room bulah chuan kan ding thap a, Nu Mawii(Sangkima nu) chuan a mittui a hru zeuh zeuh a, a fapa neihchhun ngawih ngawih a ni a, a hma hun a han ngaihtuah ve ang a, na a tih dan turte chu ka lo chhut ve neuh neuh a. Amah hmu tur pawh chuan mi tam tak luh an phal lo va, Nu Mawii chuan luhpui min duh thu a sawi a, kan pahnih chuan kan inzui lut a. Sangkima chuan inchung lam chu a lo melh a, chauh hmel zet hian a mit chu a lo khap ve sak sak a.

“Bawiha, I tha em?”Nu Mawii chuan tah insum aw zet hian a han ti chhuak a.

Sangkima’n a nu aw a hriat chuan a rawn hawi vat a, a lu chu tlem a han ti che a, chutah chiang zet hian min han en leh a, a chal chu a han ti chuar deuh a, min hre ngai lo hmel a pu vat a. A hriatna in a chhiatpui zingah kei hi ka tel a ni tih chu hrilh hranpa ka ngai lo. Ka mittui chu ka han hru zauh a, Nu Mawii chuan ka kut chu a lo vuan a, nghet zet hian ka hmer vawng vawng a, ka rilru hi a na a ni.

Ka inbual zawh chuan hospital lam pan tumin muangchangin ka insiam a, ka sana bun lai chu ka han thlek a, tlai lam dar 5 ala ri lo deuh a. Ka phone chu ka han lekkang a, Dsa number ka hmetchhuak a, an thlen hlima kan inbiak bak kha kan inbe tawh miah lo va, ka lo buai bawk nen, ani lo buai bawk nen nihnih lai chu kan inbe tawh lo a ni. Ka be tlang thei der lo lehnghal, ka thiante biak ka tum pawh chuan tumah biak theih ka nei lo. Beidawng zet hian ka phone chu ka melh ran a, signal an nei tha lo anih ka ring. Ka room atanga ka chhuah chuan sitting room-ah Nu Mawii chu a lo thu a, a hmel chu a pawr phang a, ka khawngaih ngei mai.

“Hmingte, I hah tawh tak mange aw”a lo ti a.

“Ka hah reng reng lo, nangmah zawk hi I hriselna I ven that loh chuan I lo chau lutuk ang e”ka ti a.

Ka kut chu lain a han hum vawng vawng a, a mittui chu thup tum viau mah se a thup seng lo. KA kuah vat a, a insut ta hlawp hlawp a.

“Hmingte, Mama hian a hmangaih che tih I hria em?”a tih chuan ka phu zawk a.

“I khawngaih ka beisei vanga sawi ka ni lo ania aw, mahse indang a luah tak chhan kha I hriat loh chuan amah I hua ang tih ka hlau a, a chhan chu unau tak tak angin I en tih ka hria a, khatia a chhuahsan thut cheu kha amah I dem ang tih hi ka hlauh vang zawk a ni. Chu chu hria la ka duh vang chauh zawk a nia”a ti a.

Ka thaw hak a.

“Nu Mawi, chutiang zawng chuan ka lakah rilru a pu ang tih hi ka lo ring ngai miah lo asin. Ka thlamuanpui em em thin a, khatia min chhuahsan kha chu dik tak chuan ka lo dem ru ve khawp asin. Ka nuna harsatna ka neih pawhin a hnenah ka thlen a, min sut kian pui dan a ngaihtuah thin. Engmah min hrilh hmasa lova min chhuahsan kha chu ka rilru a ti na ve tak zet a ni”ka ti a.

“Damdawiinah hei hi I chhiar dawn nia, hei hi a lukham hnuaia a dah ania, mimal thil mah nise I hriat hi tul ka ti tlat si a ni”tiin a bag atangin diary pakhat hi a rawn la chhuak a, min pe a.

Ka riah dawn avangin chaw ka ei hmasa a, chaweikhamah chuan muangchang tawh lovin ka chhuak phei ta nghal a. Ka thutna piaha diary chu ka thlek vang vang a, eng thu tak inziak ang maw? Sangkima nau Tetea chuan min lo hmuak a, cabin lamah chuan kan inzui lut a. .

“Nichinah I hming a rawn lam hlawl a, a mak asin”Tetea chuan a han ti a.
“Mahse… Min hre si lo a”beidawng deuh hian ka han ti a.
“Nia, ka hre lo le…”a u muhil lai chu a melh vang vang a.
A mutna bulah chuan ka ding a, a kut chu ka han hmer a, min hre lo tih ka ngaihtuah ringawt pawh chuan ka thinlung hi a na a ni.

PART-VII

Rei vak lo a rawn harh a, min hmuh apiang hian mak ti deuh hian min melh kuau thin a, tawrh hrehawm ka ti ngei mai. Tetea chu a muhil bawrh bawrh a, Sangkima khum ngheng chuan ka thu a, a diary chu ka han keu dek dek a, ka hming a lan lohna chu ka chhiar kher lem lo.

#DAIRY
“An hnena ka chenna pawh thla ruk lai a lo ni ve ta. Chhungkaw fel tak an ni a, kei ngei pawh hrehawm tihna nei miah lo in min siam a, kan naupanlaia kan duh duh dana an ina kan awm thin ang mai kha ala ni reng mai. Hmingmuanpuii, hmeichhe naupang zakzum tak ni thin pawh kha nula tia sawi theih alo ni ve tawh a, a hmel hlim taka nui thei reng thin kha a lo la paih lo va, ka lawm hle mai.

“Ka nau, ka farnu ang maia ka en thin mah nise ka rilru hi a va danglam nasa tawh si em! Ani lahin a nuta ang chiahin min en tih ka hai si lo. Nitin, zantin a hmel ka hmuh pawhin hmuhnawn fo hi ka duh si a. Hetiang ang anih zel chuan ka inthup seng lo ang tih pawh ka hlau hlel lo ve…

“A bialpa vanga a rilru na hmuh hi hrehawm ka ti, tu fa hian nge heti taka naa siam tih hi ka hre duh a ni. Engvang mahin a lungngaih hi ka phal lo, ka phal lo tak zet a ni.. Hming, I mittui hruk hulsak tu che nih hi ka va chak tak em!”

 Engtikah emaw chuan a hnung ka la zui ve mahna….(“Vawiin chu khua a nuam hle mai, Puia(ka u) te chhungkua an rawn haw a, ka thianpa ber thin kha a ni bawk a, kan inhmu leh chu kan hlim ve hle. Ani chu nupui fanau nen an rawn ni deuh tup tawh a, kei lah heti hi ka la ni vel mai mai si

“Ka thawh hlim atanga ka mut thlenga ka rilrua thi thei lo chu Hmingi hi a ni, englai mai pawh hian ka rilruah a awm a, hria se min haw awm mange! Vawiin chhuna inchunga puan pho kan zar laia a hnena ka thusawi kha ka ngaihtuah let a, chhungkua kan ang tia ka sawi kha a laka ka rilru ka phawrh hmasak bera leh ka tihlan ngam dan awmchhun chu a ni. A pawi ka sawi anih ka ring, room-ah a tawm reng lehnghal a, ka inthiam lo ru kher mai. Mahse, ka puakkeh ang tih hlau reng renga awm ai chuan kha thu avanga min huat pawh pawi ka ti zo ta lo.”

“Ruah a tla reng a, ka nun pawh a nguai deuh nghulhin ka hria. Ka lu na leh vak thin pawh chu ka ngai mawh seng lo va, chhuah ka ngai a ni. Ka nau duhtak hi zan tam a mu tawh lo tih ka hria, Dsa nen an boruak a tha lo tih ka hriat avanga ka lawmna nge nasa ang a, Hmingi mittui tlak avanga ka rilru natna hi nasa zawk ang tih ka buk tawn vel a, HMingi rilru na hi ka hmu thei lo. Dsa hmu turin ka kal a, an inkar a that leh theih nana theihtawp ka chhuah kha ka inchhir ngai lovang. Dsa duh ang ngeiin Hmingi te in atangin ka chhuak ang a, hlim takin an awm lai ka hmuh phawt chuan chu baka duh ka nei hlei nem..”

Ka mittui chu a rawn tla a, ka chhiar zawm thei tawh lo. Sangkima chu ka han melh a, ama duh thu pawh ni lovin Dsa’n chhuak tura a tih avangin a chhuak a lo ni reng si, “Mawla, engvangin nge engmah min hrilh loh?”tiin ka phun chhuak a. Ka chhiar zawm leh a.

“Hmingi nui hmel hmuh tluka nuam tih ka nei lo, a hlim chuan hlim takin ka nui ve thin… Zanin erawh ka mualpho teuh ngei mai. A inkhawm kal tur chu ka thlir reng a, ka lu na lutuk chu tuar chhuah harsa dawn riau a ka hriat avangin in lam panin ka haw a, ka khaw hmuh a fiah loh thut avangin ka pai nawk a, ka tluk loh hram beisei tak chungin ka dinna bula ban pakhat chu ka han ngheng a. Min rawn kal peltu chu tunge tih ka hrechiang lutuk tlat, phone a rawn hmang phei a, hlim taka a nui ri ka hriat chuan min ti dam sawng sawngin ka hria. Ka maimitchhing a, Pathian hnenah hetiang taka a hlim reng theih nan ka dilsak a…”

“Ka nuna a vawikhat nan zu ka in ve chhin a, Hmingi’n hria se a lawm hauh lo ang tih ka hria. Engvangin nge ani hi ka lam hmasak ber zel tih ka hre lo. A lungawi lo hmel chu ka mitthlaah a rawn lang a, maah theihnghilh theih nana hman ka tum hi amah tilungawilo tu tur tih ka hria a, ka chhunzawm ngam tawh lo.”

“Ka hun neih hi a tawi riau in ka hre thin, a chang chuan ka hmangaihna hi puan chhuah ka chak a, mahse, ka huaisenna hian a ngam thlawt si lo. Vawiin ni thleng hian ka dawihzepna zawk hi ka nunah hian a la ding chang chu anih hi..”

Heng hi a tlangpui chu a ni a, ziah vek sen pawh a ni lo. Ka mittui chu a tla zung zung a, kei ve tehlul heti taka min lo duh ve tu ka nei chu a hlu ka ti a, a hmel atanga a rilru tur ka lo ngaihtuahpui ngai lo chu mawl ka inti bawk.

Kan inchung zawlah chuan ka tei kual ka tei kual a, kawmthlanga Dsa rawn tlan mek pawh ka hmu a, ka rilru hi a nu bulh hian ka hria. Ka awmna ka hrilh sa avangin a rawn chho tlang ve mai a, a hmelah chuan lungawi lo hmel ka hmu nghal vat a, ka lung a awi bik lo tih lo lantir chu ka hreh hran lo.

“A pawimawh viau anih ka ring, ka hna dah meuhin ka rawn kal chu ania”a han ti a.
“Ds, engvangin nge Sangkima kha kan in atanga chhuak turin I tih?”
“Ka ti thei lo em ni?”
“Aw, tih theihna dan I nei lo.”
“Ha… Chuti maw? Anih chuan, eng nge min koh chhan hi?
“Inthen ang”
“Tuna Sangkima hetia a awm hi in in atanga chhuak tura ka tih vangah khan I puh chu ani em lo ang chu maw?”
“A inzawm tlat si a ni. Ani kha kan inah la awm nise hetiang hian a awm kher lo maithei asin.. Duhsang, mahni hmasialpa, ani vang hian I laka ka rilru a danglam phah I ring em ni? Engvangin nge min rin tawkna kha I neih loh? “ka mittui chu a ran dir zung zung a.
“Aw, ka hlauthawng a ni. Ka lak atanga min laksak thei tu chu amah kha a ni tih ka hre miau a, kal botir kha ka tih theih neihchhun ani si alawm. Hming…”min rawn khawih tumin a ban a rawn phar chhuak a, “Min khawih reng reng suh aw”ka lo ti vin hlar a.
“Hming, ka hmangaihna che ai chuan khapa kha I thlang dawn tih ka hria alawm, chan che ka hlau em atin ni”a ti dam diai a. A hmaa a awmdan, mahni induhtawkna a neih zawng zawngte chu a paih thla vek tawh.
“Ka thlan tawhna che kha ring ngam ni la chuan I rin ang ngei pawhin ka awm reng tur hi ania, tunah chuan kan inkarah engmah a awm tawh lo”ka ti a.
“Chutiang chuan ti lo hram rawh, tuar tura min tih chuan ka tuar ang, mahse, inthen chu ka duh lo a ni”a ti a.
“Engmah sawi tur ka nei tawh lo”ka ti a, kal ka tum chu min pawt bet a, ka theihtawpin ka tal a.
“Ka thei lo a ni, khawngaih takin hetiang hian awm suh”a ti a.

Ka luhlulzia a hrechiang bawk a, awmzia a awm dawn chuang lo tih a hria a ni ang, hreh tak chungin a haw ta a.

PART-VIII

Hospital kawtah chuan ka ding reng a, Sangkima chhuah ni anih avangin lehkha pawimawh ka buaipui a, ka buaipui zawh chuan cabin lama let mai lo chuan mi che vel chu ka han en hmasa a. Damlo chi hrang hrang an awm a, engvangin nge hetiang zawng kher hian a awm bik tihte chu ka ngaihtuah a, phaia an refer na chu ka han melh vang vang a, eng chen chiah hi nge enkawl dam theih chin chu ni ang? Ka awmah min hnawh a, ka thaw tha thei lo mai dawn hian ka hria. Tetea chuan ka darah a rawn vuan a, ka mitmeng buai nak a hmuh chuan min hrethiam tak hian a nui sak a, cabin lam panin kan inzui nghal a.

Kan luh chuan Nu Mawii chuan tui in tir a lo tum mek a, min hmuh ngun tawh vang pawh a ni maithei, mak ti hmel a pu tawh lem lo. Keiman tui chu ka in tir a, a mitmeng chu a dul raih a, ka insangmar a, ka rilru a hnual a ni tih lantir chu ka duh lo. Ka pa a rawn thlen chuan motor-ah kan inthiar lut fel a, in lam panin kan haw thei ta. Tukverh bulah ka thu a, Tetea nen kan inkarah SAngkima chu kan thuttir a, a kut chu ka la a, engtinmah a awm lo. Ka han hmer deuh a, min rawn melh a, min hriatchhuah chu a tum ve hle tih ka hria.

“Sangkim, Hmingi ka nia, Hmingmuanpuii kha ka nia, mak tih hmel deuhin min en tawh suh aw”ka ti a. A hmaa thu Nu Mawii chu a rawn nui ri hak a.

“Nakinah min hrechhuak leh vat mai ang, lungngai lo la, ngaihtuah vak vak lo la”ka han ti a.

A thaw halh a, a maimitchhing a.

“Hmingi…”tiin a rawn phun ri sap a.

A room hluiah bawk chuan a lut leh ta, a han hawi kual vel a, a lu chu a dawm vang vang a, mangan hmel tak hian min melh a.

“I room atan I hmang thin a, kan hnenah hun eng emaw ti chhung chu I cheng thin a”ka han ti a. . A maimitchhing a, a mittui chu a tling pam a, ka han hru a, ka kut chu a lo vuan vat a.

“Ka tihpalh aw. Ka tana mi pawimawh tak I nih ka ring, kei lah chuan ka hrechhuak zo der mai si lo che a, ka tihpalh lutuk aw”a ti a.

“Sangkim, a pawi reng reng lo. Nakinah engkim I la hre vek dawn alawm”ka ti a, ka nui sak a.

Ka room-ah chuan ka lut a, ka maimitchhing vang vang a, mihringte hian kan hma hun hi kan lo va hre lo tak em tih chu ka rilruah a rawn lut a, tlangval lehkhathiam em em, nu leh pa te tana innghaha tlak khawpa chhungkua hmangaihtu kha heti hian a awm chu a ni ta si a, ka rilru tak chuan ka vui pui ve a ni. Kan thuneihna piah lam daih anih avang erawh chuan tih vak ngaihna a awm der mai si lo. Ka phone chu a rawn ri ral ral a, ka han en chuan Dsa a ni, pickup loh ka tum zet naa ka pickup leh ta zawk a.

“Hming, heti tawpa kan inkar tihtawp hi chu ka thei lo. I duh chen chen khapa kha enkawl rawh, mahse, ka hnenah hian lo kir leh rawh, chu chauh chu ka ngen che”ngenngawl tak chuan a ti a.
“Ds, I hun tha hi ka paih sak hnem tawh lutuk che. I lakah hian risk ka la ngam lo, I hmakhua ka ngaih vang zawk a nih chu”ka ti a. Ka rilru dik tak pawh a ni, ani hi ka hmai zah tawh tak zet a ni.

“Ka lo nghak ang che, chu chauh tal chu min phalsak rawh”a ti a.

“Ds… Nghah chhuah tur awm ta lo ta ila?”ka tih chuan, “Chutih hunah chuan ka beidawng ve chauh ang”a ti ta charh charh a.

Tukverh atanga thlifim rawn thaw lut heuh heuh chuan ka sam chu a chhem leng siau siau a, ka kutin ka hmai chu ka hup a, min hmangaih ve em em tute pahnih chu ka han buk tawn vel a, a lai laklawhah kei hi ka ding a ni. Sangkima hian hetiang hi tawk lo nise chuan, inngaihtuah nawn ngai hauh lovin Duhsanga hi ka thlang ang, amah ka hmangaih vang zawk ni lovin, kha chen min nghaktu leh keipawhin amaha thuk taka ka lo innghah tawhna avang pawh khan beidawngin ka siam hauh lovang. Mahse, tunah Sangkima hetiang dinhmunah hian a ding ta si a, amaha danglam ka hmuh thin kha ka ngaihbel ni lovin a tak ngei alo ni reng tih ka hriatna avangin kei hi ka danglam a ni. Eng ka ti ta mai nge hetiang rilru phir hi ka put tak tih pawh ka inhre zo tawh lo. Mi pakhat, mahni tuma chiang ve tak thin kha ka ni tawh lo tak zet a ni. Ka lu chu ka han thing a, he boruak rit tak mai lak atang hian engtin nge ka talchhuah tak ang? .

Airport thlengin ka pa nen kan thlah a, beiseina sang tak nen phai lam an pan dawn a, hlim takin an rawn let leh ang em? Ka ban chu ka han vai a, rilru baihvaih hmel taka min melh chung chuan a ban chu a rawn vai ve lauh lauh a, Nu Mawii chuan a banah a vuan a, kal tawh ang le tih nan a han mitmei zeuh a, chutah Sangkima chuan min melh vang vang a, “Ka hriatna hi a lo let leh veleh nang hi hriatchhuah che ka duh hmasa be rang”a ti a, a then lui sak a. An liam thleng chuan ka thlir a, ka mittui chu a rawn hnam tiam tiam a, ka pa bulah chuan ka mualpho ang tih hlauvin ka kalsawn ta vat a. kan haw kawngah chuan ka pa nen sawi tur kan hre lo hle a, kal lamah kha chuan Nu Mawii ho khan kan phul hlut a, kawng pawh kha a thui vakin ka hrelo. Kan haw kawng erawh a thui duh kher mai.

“Sangkima nen chuan in lo inhmel duh ve deuh thin a ni lo maw?”ka pa chuan a rawn ti khauh a.

Ka pa chu ka melh tawp a, chhan dan tur ka hre lo kher mai.

“Ka pa hi, I ti awm ang lo e a. Dsa nen kan inkar I hre tho sia”ka han ti a.
A nui suk a.

“Rosangkima chu mi fel tak a ni alawm. Dsa ai chuan ka lo it mah mah zawk asin, unau anga in inen avang hian in inkarah engmah a awm lo turah ka ngai thung a”a ti leh mai a.

“Dsa chu I duh vak lo tihna em ni?”

“Ka duh lo pawh ka tih chuan loh kha, ka it zawk ka ti mai chauh alawm, Dsa sualna sawi tur ka nei hran chuang lo”a han ti nghal zat a.

Ka thaw hak a.

“Min hrechhuak miah tawh lo ta se….”ka sawi zawm thei tawh lo, ka mittui chu a rawn tla zawih a.

“A tha leh em em ang. Beiseina hi kan nunpui tlat tur a ni”a ti a. Amah vek chuan, “Dsa chu inneih lam te a sawipui tawh che em?”a han ti a.

“Ani te chuan college ka zawh veleh inneih a duh mawle”ka ti a, a zawhna min zawhte chu a mak ta riau a

“Pasal nei rual chu in ni ve tawh alawm, mipa hi beidawng taka siam tur an ni lo a, neih duh loh tur hi beiseina siam sak tur pawh an ni lo”a ti a.

“Chu, pasal nei tawh se min va ti awm ve a”lungawi lo deuh chuan ka han ti a.

“Ekhai! Tih thu ah chuan ti lul lo mai, nei lo mah ula nu leh pa tan chuan a lawmawm a ni mai a, mahse in hma hun kan ngaihtuah pui lo thei lo che u alawm” a ti dam diai a.

“Pa, keimah ngei pawh hi ka inhrethiam lo”ka ti a.

Min rawn melh zawk a.

“Ni e, ka hria a ni, ka hre sual lo e. Mi pahnihte hian I nunah pawimawhna an nei miau a, ka hrethiam alawm. Ngun takin engkim ngaihtuah la, thui tak thlir lawk a ngai bawk a ni. Kei chuan I duhthlanna hi engpawh nise dan che ka tum lo, mahse, I tihsual erawh ka hlau a ni”a ti a.

Ka maimitchhing a, ka hahdam huaiin ka inhria.
“Pa, ka lawm e”ka ti sap a.

PART-IX

Thla a vei leh meuh chuan keipawh Delhi-ah ka zirna chhunzawmin ka awm tawh a, Dsa chuan min rawn be reng a, ka be chhe duh lo na in beiseina erawh ka siam sak zui lem lo. Ka duh tawk a zalena awm phawt chu ka duh a, ka rilru chu min hriatthiampui khawp mai. Ni tin college kalin ka chhuak a, chau hnepin tlaiah ka haw a, ka u te fapa Bawihpuia ka hmuh erawh chuan chauh hre lek lovin ka awm a, ka hlimpui hle thin. Tlai khat chu phone call ka dawng a, min rawn betu chu Sangkima a ni. A khat tawkin kan inbe ve zeuh zeuh a, engmah a natnaah hmasawnna ala awm loh avang hian min biak a hreh thu a sawi thin. Khatia phai atanga an rawn haw hnu khan min be duh ta miah lo a, An khuaah an haw phei nghal bawk nen, a chanchin ka hre tam lo. Delhi-a ka chhuk dawn zanah mi rawn be hlawl a, chumi zan chuan lungchhe takin a tap a, hnemtu tur zawk ka ni tih hre rengin ka lo tap ve tlawk tlawk a, hringnun hi a fair lo tiin ka ngaihtuah zankhua a nih kha.

“Hming, vawiin chu ka nu in ka memory-card min pe a. Thlalak ka neih ho ka enkual a, kan pahniha kan lak pawh a tam khawp mai”a ti a.

“Kan inkawmngeih thei em alawm”tiin ka nui hak hak a. . “Karlehah kan rawn kal dawn, in checkup turin”a ti a.

“Rawn kal rawh u, inhmuhte pawh a chak awm alawm”ka ti a.

“Hming, thian satliah kan ni tak tak em?”a han ti a, a awri ah chuan ngenngawl takin min zawt tih ka hria.

Ka hmui chu ka han liak huh zeuh a, “Aw, kan ni thin ngei alawm”ka ti a. . “Awle, ka lawm e, hriat vak vak tuma ka beih hi ka duh tawk tawh mai dawn, ka beidawng tawh. Nang hi ka thian I nih chuan, thian tha tak I lo ni thin a ni ngei ang. Nang ang thian tha ka nei che chu ka vanneih tehlul nen, I thianpa hi ka laktlak ta lo em a, min ngaidam dawn nia”a ti a.

“Sangkim, mi tha tak I ni, ka tan thil tam tak min tihsak a, ka hlimna tur kha I ngaihtuah reng thin. Ka hlimna tur atan chuan engpawh I ti thin a, ka thian tha em em kha I ni a, I la ni reng bawk”ka ti a.

“Engtikah emaw chuan ka la hrechhuak leh mial mah na, a thleng ta lo anih pawhin ka vui lo ang, engkimah ka lawm e”a ti a, ka chhanna pawh nghak lovin a dah ta daih a.

Ka lehkhabu chu ka keu a, zir nasat ka ngai tih ka hai lo, mahse ka rilruah lehkha zir a lang thei lo. Ka tho a, ka drawer chu ka han pawt hawng a, Sangkima diary chu ka han la chhuak a. Ka pawm a, ka fawp a, “Lalpa, dam that leh hi a phu I lo ti em ni?”tiin chunglam chu ka au lawm lawm a.

Zan lama ka tah nasat avangin ka mit chu a bui deuh luk a, ka u ten an hriat ka duh loh avangin room atangin ka chhuak duh lawk lo va, ka inbual hnuah uluk takin ka hmaiah make-up ka hnawih a, tunah chuan ka land an pawh a pangngai ve ta. Bawihpuia nen kan inkuah leh chawt a, ka u in Bawihtei school kal a thlah a, U Ruati chu bathroom atangin a rawn chhuak a.

“Dsa’n a be thei lo che a, I la mut thu ka lo sawi a”a rawn ti chhuak a.

“Um, anih chu”ka ti mai a.

“Training-in an rawn kal dawn a ni awm e, I u in kan ina thleng turin a lo sawm a”a ti a.
“Maw?”ka hawi deuh hu a, ka hmel a hmuh chuan a nuih a za hle a.
“Mahse, lungngai suh, a huhoa thlen tur ania ti tlat a, rawn thlen chu a thei dawn lo”a ti a, ka thaw huai a.
“Ka huphurh pawh a ni chuang lo a, Sangkima te an rawn kal dawn bawk sia, mikhual kan ngah awm em a ka ti mai mai”ka ti ta daih a.
“A khawharthlak ve a, mikhual neih chu a nuam viau alawm”a ti a.
“Ni ve tho mai”ka ti a, anihna takah chuan kei hi chuan mikhual neih ka peih vak ngai lo.

Ka class bang chu inah haw nghal lovin lehkhabu leiin ka khawtlai a, in ka thlen meuh chuan khua a lo thim ruih tawh. Garage lam chu ka han bih a, ka u motor a awm loh avangin office –ah an laklawh anih ka ring a, rawn haw tlai zeuh a neih thin avangin chumi vangah chuan ka ngai a ni. Inchhung ka luh chuan U Ruati chuan phone a lo hmang mek a, a hmel chu a mangan hmel deuh hian ka hria a, ka room-ah pawh lut hmasa lo vin Bawihpuia a puak lai chu ka lak sak a, phone a biak zawh hun chu ka lo nghak a.

“Hming, I u a accident a nih chu, a na vak lo chu a tia, mahse, ka ngaihtuah emai”a ti a, a kut te chu a khur der der a.

“Engtin? Khawiah?”

“A rawn haw lamah bike pakhat nen an inpel tur an inti fuh vak lo aniang, engmah chiang takin ka la hre thei bik lo”a ti a.

Hospital lam pan phawt chu tha in kan hria a, taxi lah chu a vang nasa tawh si, Bawihpuia chu ka puaa, U Ruati’n Bawihtei a kai bawk a, mi ramah chuan mang a lo ang zual duh kher mai. A tawp atawpah taxi chu kan hmu ta hram a, hmanhmawh takin hospital lam pan chuan kan chhuak ta a. Kan va thlen chuan hospital kawtah ka u leh Dsa chu kan tawk hlawl a, kan hlauhthawn ang em em thil chu a thleng lo anih ka ring.

“In rawn kal duh kher anih kha, ka tha lutuk alawm”ka u chuan a lo ti a.
“Kan ngaihtuah che alawm, kan mangang lutuk a inah pawh kan awm thei tawh lo alawm”U Ruati chuan a ti a.
“Hei Dsa a lo awm hnai hlauh a, thil a ti zung zung a, a tifel zo hma a, kan chhuak leh thei nghal alawm”a tia.
DSa chu ka va melh a, Bawihpuia chu a lo lawm a, Bawihpuia chuan a ban chu a phar chhuak a, a au ve ruai ruai a.
“Dsa’n min va dah mai a ngai dawn a ni, zanin chu riak ve se ka ti reng reng, tlai lo turin zing lamah an thlenna chu a pan mai ang chu”a ti a.
Dsa chu a han ang deuh zuau a.
“Ka phut ve khawp mai keipawhin”U Ruati chuan a lo ti a.

In kan thlen chuan ka thawmhnaw ka thlak a, ka inthlak zawh veleh eirawngbawl turin ka chhuak phei nghal a. Dsa chuan ka che vel chu ngun tak hian min lo en reng a, ka buai phah duh lo. Chaw kan ei dawn thleng chuan kan inbe lo va, U Ruati’n kan boruak chu hrethiamin a be bawrh bawrh reng a, naupang lahin an lo nel ve bawk nen, hrehawm a tih lutuk chu ka ring lo.

“Naktuk tlaiah chaw rawn ei la, chawhmeh te pawh kan lo inbuatsaih ve ang”ka u chuan kan chawei lai chuan a ti a.
“Nia, ka hre lo le, naktuk hi kan training zawh ni tur a ni a, kan rei ta viau pawh a ni thei a, sawi lawk mai theih pawh a ni chiah lo a”Dsa chuan a ti a.
“Kan ei hma ngai chuang lo va, I rawn ei hman chuan tawk viau tho alawm, rawn ei lo chuan I haw lo turah ka ngai”ka u chuan a ti a.
“Ni e, kan tum dawn nia”a ti ve ta a.
Kan chaweina kan tihfel hnu chuan balcony ah ka ding vang vang a, Delhi boruak nawm vanglai tak a ni a, ka nun erawh a buai nuaih reng thung a, ipik churh leh thawveng lo takin hun ka la hmang zel chu anih hi ka ti rilru neuh neuh a.
“Ka rawn ding chhuak ve dawn, ka tibuai em lo ang che chu maw?”
Ka han hawi let a, ka hnungah chuan Dsa chu a lo ding reng a.
“Tibuai lo e, lo kal ve rawh”ka ti a, ka bulah chuan a rawn ding ve nghal a.
“Kan hma hun hi kan lo hre lo ngawt mai”a han ti a, hul hak hian a nui a. Ka ngawih reng avang chuan min rawn melh zeuh a, amah vek chuan, “I danglam thei ang tih hi ka lo ngaihtuah ngai miah lo tak tak asin”a han ti leh a.
“Ds, kan duh vang ni miah lo hian kan chungah thil hi a lo thleng thin si alawm”ka ti a.
“Hming, ka rilru natzia hi I hrethiam pha lovang”
“Ds, pawi ka ti lutuk, pawi ka ti tak zet”
“A pawi I ti a, mahse siamthat I tum chuang si lo a tiraw?”
“Ka siam that theih vek ni se ka ti ngawt mai”
Ka darah a rawn vuan a.
“Ka beidawng mai dawn lo ania aw, kha chen kha ka nghak thei che anih chuan khatiang zat kha nghah leh che pawh ngai se, engvangin nge ka theih loh ang?”a ti a.
“Ds…”
“Min hnialna ri hriat ka duh lo, min hriatchian kha, ka sawi chu ka hlen chhuak ngei ang. Midang I nei ta anih chuan, chumi hunah chuan ka beidawnsan chauh ang che”a ti a.

Ka mittui chu a rawn tla zawih a, eng nge maw ka nih a kei ve tehlul heti taka min hmangaih chu le? A tana tih ka neih loh laiin ani chuan engkim min tihsak thin a, ka thutlukna siam hi a fuh lo tihna a ni thei ang em?

PART-X

“Mate, Sangkima te airport-ah an awm mek a, I theih chuan rawn haw hma ta che, chawhmeh I lei a ngai dawn ania”tiin college –a ka awm laiin ka u chuan min rawn bia a. Sangkima lam reng reng ka lo hre tawh lo, ka lehkhabu chu ka bag-ah ka dah lut mawlh mawlh a, hmanhmawh takin ka haw nghal a. In ka thlen chuan Dsa chu a lo awm reng a, mak tih hmel tak hian ka en a, a lo nui sak a.

“Hming, hei Dsa nen in va chhuak lawk mai dawn em ni?”U Ruati chuan a lo ti a.
“Aw, kan inthlak lawk ang e”ttiin room ka pan nghal a.
Dsa hmuh chu ka inbeisei chiah lo a ni.
“Chawhmaah kan zo fel leh ta sia, I u in a theih chuan kal hma turin min rawn ti sia, min hmu leh chu I lungawi chiah lo anih pawhin min lo hrethiam hram dawn nia”a han ti a.
“Lungawi lohna tur a awm ka hre hlei nem”ka ti a.
“Naktukah kan haw tawh dawn a, kan inhmu leh mai tawh awm chuang si lo a, ka ranw thahnemngai ve bawk hrim hrim a ni”a han ti leh a.

“Um, a tha vek alawm”ka ti a.

Hah hnepin kan bazar zo a, in lam kan pan chuan khua pawh a lo tlai tawh khawp mai. Inchhung kan lut tur chu Bawihtei a rawn tlan chhuak a, ka thil khai thenkhat chu a rawn la a

. “A ni, mikhual kan nei asin, ihmaw, hmana Aizawla kan lo zina apa Sangkima kha ania”a rawn ti bawrh bawrh a.

Sitting room-ah chuan ka u te ho nen an lo thu thap a, min hmuh chuan Sangkima chu a lo ding vat a, ka pan phei nghal a, kan inchibai a.

“I dam tha maw?”a ti sap a, ka lu chu ka bu nghat a.

Ka hnung lam chu a han en a, Dsa a hmuh chuan engtin emaw tak hian a awm a, a thutna ngaiah chuan thu leh vat a. Kan thil lei dahfel turin keipawh ka kal leh nghal a. Dawhkanah chuan kan chawhmeh siam tur ka chhawp chhuak bawk a. U Ruati chuan Bawihpuia chu a rawn baw phei a.
“Bawihpuia awm pah hian Sangkima te chu lo va buaipui ta mai che, chawhmeh chu keiman ka lo siam mai ang”a ti a. Bawihpuia chu ka laksak nghal a.

Dsa bulah chuan ka thu a, Bawihpuia chu a rawn chhaih ve zuk zuk a, chumi chhung zawng chuan uluk tak hian Sangkima chuan min lo thlir reng a, a chal a ti chuar a, a ngaihtuahna chu a seng nasa tih ka hria. A bek chu a tuai leh hauh hauh thin a, a hnu deuhah chuan a kut chu a hum ruh a, a hmela tumruhna lo lang chhuak kha ka hmuh hmaih hauh lo. A thutna atangin a tho chhuak a, Nu Mawii chuan a kut alo vuan a, a nu bengbulah chuan eng emaw hi a hrilh a, room lamah chuan a lut ta a.

Rei vak lo hnuah ka u office pawh a rawn bang a, kan boruak pawh a nuam chho leh viau mai. Chaw kan ei dawn chuan Bawihtei chu Sangkima ko turin ka tir a, an rawn inpawm phei hnup hnup a, naupang a lawm thin em avang hian naupang pawh hian an ngaina reng a ni. Chhung inkhawm kan neih hnuah chaw pawh kan ei chhunzawm nghal a, Dsa tan a hrehawm ang tih hlauin ka theihtawp chuan ka han ngaihven ve a, mahse kha chen kan lo inkawp ve tawh avang khan chuti em em a kan chhungkuaah chuan zak tur a ni tawh lo tih ka hria.
Ka thleng sil zo chu Dsa chu a bag a lo in ak uai tawh a.

“I riak dawn lo mi?”ka tih chuan a nui sak a.
“Dar 6-ah kan chhuak dawn a, heta tang chuan ka nang hman lo ang”a ti a.
“Thingpui in leh phawt la”ka ti a.
“Ka in tawh lo mai ang, a tlai chak ang reng sia. Ka thawmhnaw pawh engmah ka la rem fel lo a”a ti a.
Ka u te nen an in mangtha hnu chuan pawn lamah kan inzui chhuak a, gate bulah chuan kan ding a.
“Hming, ka lawm e aw”a ti a.
“Engvangin?”
“Reilote chhung mah nise I ngaihsakna ka dawng kha ka lawm lutuk, kha kha ka thlakhlelh ber chu a ni reng thin”a ti a. A thaw hak a.
“Tluang deuhin in kal dawn nia aw, chanchinte min lo hrilh ve ang a”ka ti a.
“Um, ni e, ka lo hrilh dawn che nia”
A inher a, min hmachhawn chuan a ding a, ka dar lehlam lehlamah chuan a rawn vuan a.
“Hming, I hlim hi ka duh ber chu a ni. Ka hnenah hian lo let tawh lo mah la I hlim tih ka hriat phawt chuan ka lawm em em ang. I hlimna tur hi ngaihtuah ve ang che aw, midang tan chauh I nun hi hmang zo bik suh ang che, a fair lo. I hlimna turin kei chu ka kiang tawh mai ang e… Hemi vang hian ka thutiam tawh kha ka bawhchhe dawn tihna a ni lo a, kha chu a la pangngai reng dawn. Mahse, tibuai tur che leh rilru nuam lo taka awm tur chuan ka rawn lang tawh lo ang”a ti a.

“Ds… “ka tap leh mai dawn in ka hria.
“Tah belh leh lutuk”tiin a nui sak a.
“Ka kal phawt ang aw, tun hi a tawpna tur a ni lo, a tawpna atan chuan I tan thil pakhat ka rawn tihsak leh ang che”a ti a. Min pawm a, kan inkuah ta vawng vawng a.

A kal liam thleng chuan ka thlir reng a, ka mittui chu ka hru zeuh a.

A liam hnu chuan keipawh inchhung lam pana kal ka tum a. Verandah thim laiah chuan Sangkima chu a lo ding reng a, ka hmuh chuan ka phu zawk a.

“Sangkim, min ti phu alawm, eng nge khatah khan I tih reng a?”ka ti a.

“Pawn boruak ka dawng ve mai mai a nih hi”a ti a.

“Inchhungah lut ila”ka tih chuan chiang tak hian min rawn en a, ka zam lek lekin ka hria.

“Hming, zanin tlaia thil thleng kha a then then kha chu ka hun kal tawha thleng ang maiin ka hria a ni. Ka hrechhuak ve thei tawh lo va, mahse, ka hahdam ta e, a chhan chu nang hi khapa kiangah khan I him tih ka mit ngeiin ka hmu a, ka farnu anga ka lo en thin I ni tih an sawi fo ka awih loh pawh kha ka awih ve ta e”a ti a.

“Sangkim… Hahdam taka I awm hi ka duh alawm, ka hlim lutuk ania aw kei chu ka ngaihtuah awm loh a nia”ka ti a.

“Ka mu hil laite hi nangmah vang hian ka harh zawk zawk thin, ka tan eng ang chiaha pawimawh nge I nih ang tih ngaihtuah hian zanpawh ka mu tha thei lo thin. Ka lu na tam zawk pawh hi hei vang a chhuak hi a ni tih ka hria, tunah erawh chuan ka hahdam ve ta tak zet e”a ti a.

Mu turin ka inbuatsaih a, ka khum chu ka siam mawlh mawlh a, ka lukham ka la sawn chiah chu thil fun hi a rawn tla nawlh a. Ka han chhar vat a, uluk taka thil infun chu tihchhiat hlau takin ka han enchiang a, ka hming chu a lo chuang kalh a. A intuamna chu ka han hawng a, pangpar bawr nalh fahran mai hi a chhungah chuan a lo awm a. A bulah chuan lehkha them hi a lo awm bawk a, ka la a, ka chhiar nghal a.

“Duhtak Hmingi, 
Suangtuahna tam tak ka neih thin zingah he thil hi a tel ve tlat a. Kum 7 chhung zet ka lo buaipui thin kha hei vawiin ni ah chuan I kutah a awm ve dawn ta. Chu chu maw, kan inneih hunah pangpar bawr nalh satliah chauh ni lo, danglam tak I hum ang tia ka lo sawi thin kha I la hrereng in ka ring. He pangpar bawr hi a lem a ni lo va, a tak tak, nunna nei a ni, mahse tui leh leithaa chawm ngai lovin I tan liau liau nung reng turin ka thiam ve dan tawk tawkin ka buatsaih a, I paih bo anih ngawt loh chuan hei hian a thihsan ngai lo ang che. Chu chuan entir ala nei fan a- Kei hi I nun atangin kal bo mah ila, ka hmangaihna che hian a kal san ngai lo ang che. I hlim hi ka duh a, I pasal neih ni ah pawh he pangpar bawr ngei mai keng chungin hlim takin I pasal tang chu bei la, ral atangin chu I hlim hmel chu ka lo thlir reng ang che. 
Hmangaihna zawng zawng hi I tan nise,
Lalduhsanga”

Ka mittui chu ka hru sawk a, ka phone ka la chhuak a, “Duhsang, min ngaidam rawh”tiin ka phun sap a. Phone a tlang thei lo, ka room-ah chuan ka vei tawn sek a, biak ngei ngei ka ngai a ni. Sam pawr phang chuan ka tho a, chhin khat mah ka chhing lo, sana vir chu ka en tlaivar zak a ni ber. Dar 5 a rik chuan bathroom lamah ka lut a, tui vawt chu ka inphuhtir sang sang a, ka harh kawkin ka hria. Ka thawmhnaw ka inthlak fel a, taxi chang turin ka chhuak zui nghal a. Taxi-a ka chuan lai pawh chuan Dsa chu biak ka la tum reng a, a switchoff tlat avangin ka be thei si lo. Airport ka thlen chuan ka phone chu a rawn ri ral ral a, Dsa hming alo lan chuan rang tak hian ka pick-up a.

“Min rawn biak I tum em ni?”a ti dam diai a.
“Khawiah nge I awm?”ka ti hrawk a.
“A… Enga tan nge I tih a?”a tih chuan ka tah hi a chhuak hluah hluah.
“Airport-ah ka awm, min rawn hmu rawh”ka ti a.
“Maw? Engmaw I sawi?”a ti bah nak a.
“Ds, min ngaidam rawh”ka ti a.
“Lo kal sawn hlek suh aw, lo awm reng ang che tah khan”a ti a, phone a dah nghal a.

Minute 10 vel ka din hnu chuan hmanhmawh em em in Dsa chu a rawn tlan a, a thaw hlawp hlawp a. Min hmuh chuan a mittui chu a tling pam a, a kut a rawn phar chhuak a, ka lo vuan nghal a, kan inpawm ta thlawp a.

“Hming, a tak tak a ni tiraw?”a ti a.
“Han insik chhin teh”ka ti a. . “Aih, ka duh lo, ka insik ang a, ka mumang mai a lo ni si ang tih ka hlau”a ti a, a nui sak a.
“Keima hlimna tur thlang turin min tih kha, I kiangah hian ka hlim ber dawn tih ka hria a ni. Ds, kha leh chen dawhthei taka min lo enkawlna te, min lo nghah thin na te kha a thlawn ngai lovang. Ds, ka hmangaih lutuk che”ka ti a.
“Ka hmangaih che, ka hmangaih reng che”a ti a.

Kan mittui karah chuan hlimna nui ri a chhuak ve ta, hma hunah eng nge thleng ang tih ngaihtuah a ngai lo, hmangaihna hi kan hmachhuan tur chu a ni. A kiangah hian ka him em em ang tih ka hria, a hlimna ber nih hi keipawhin ka tum ngei ang.

Ka bag chu ka zen a, pangpar bawr uluk taka infun chu ka la chhuak a.

“Kan inneih ni atan nangman lo kawl tha zawk ta che”ka ti a.
Hlim takin a nui a, ka thil pek chu la a, a fawp a, ka chalah a rawn fawp zeuh bawk a.
“Ka thlawh chhuah a hun der tawh ania”a tih chuan lungawi lo zet hian ka melh a.
“Heti maia ka kalsan phal che I ring em ni?”tiin min han nek salh a.
Kan in lam pan tumin taxi chu kan chang dun a, khawvel thar din tura rilru inbuatsaih chungin taxi-ah chuan kan chuang dun ta a…………..