THAMRAL SI LO

THAMRAL SI LO

.

 (I duh emaw duh lo emaw ka thian, I hringnun hman tawh khan a zui reng si che a maw?...)

.

BACK TO DECEMBER

.

“God gave us our memories so that we might have roses in December.”

        J.M.Barrie

.

Chu thlasik khawvawt thawp sut ah chuan chakkhai lam tura chhuah pawh chu a peihawm chiah lova, mahse tlai ei tur a awm tawh miau loh avang chuan  peihlo zetin ka chhuak a. chutianga khawvawtah chuan ka savawm hmul kawrlum lian zet mai chu ka ha chhuak a, kekawr lum tak nen ka ni deuh tup a, ka thil lei duhna hmun ka thlen chuan midang lei ve tur chu an lo intlar put mai a, a tawp lamah chuan peihlo zet chuan ka intlar vet a a, ka hmaah chuan nu la valai tak mai leh a fanu ni awm tak chu an ding ve ran a, hmeichhe naupang te chuan a nu niawm tak chuan a pawm a, a tap deuh ni hian ka hriaa. Keichu naupang lawm vaklo tih takah chuan chu naupang chu rum tak mai hian ka lo melh a, naupang chu a in sut faih faih a, ka inrinloh lai tak mai chuan a naute lem ken chuan ka lu ah min rawn vaw ta pawp mai a, keichu chhuatah chuan rem lo tak mai hian ka tlu a, ka lu lah chu a thi duh ngei mai, naupang lah chu a tap nghek lehnghal a, ka sawisa chak ngei mai.

.

Anu chuan inthiamlo tak mai in ngaihdam min dil mawlh mawlh a, a rawmawl chuan ka lu a thisen te chu a hru a, damdawiina kalpui min tum a, mahse kei chu tan taktea ka tan tak avang chuan tihngaihna a hrelo, a hreawm ti bawk si chu a mittui a tling pam mai a. keichuan naupang mawlh kha ka hua a, velh ka chak em em ringawt mai ani. Ka thil duh pawh lei ta lo chuan ka chhuak vat a, ka awmna hmun lam pan chuan ka kal vang vang a. khua a vawh tehlul nen thlan hi a tla bat bat mai ni, engmah pawh ka tih a tui lova, ka laptop chu ka on a, ka facebook ta daih a.

.

Engmah pawh ei ta lemlo chuan ka muhil ta mai a, a tukah chuan ka kawruak lutuk chuan min ti harh hlawl a, kawngka kik ri ka hriat avang chuan ka thochhuak vat a, kawng ka va hawn chuan nimin maia ka lu vaw thi tu naupang nu ni ngeia ka hriat kha alo ni a, engemaw ni hi a khai a, lut tura ka sawm chuan inthiamlo hmel tak chuan min en a,

.

”nimin avang khan ngaihdam dil tur che in ka lokal ani. Ka hamhaih lutuk a engmah kha ka sawi hman ta silova, pawi ka ti takzet ani, Ely ka nia, i awmna piah lawka sawn kan awm a” a ti dam diai a.

.

Keichuan in thiamlohna tur a awmloh thu te ka sawi a, a eitur min rawn kensak chu tui ti tak chuan ka ei ta bawrh bawrh a. Kum chanve zet chu ka apartment thar hi ka luah ve tawh a, ka thenawmte erawh ka la hre lem lo. Ka thil ei lai ka ei zawh chuan ka hmaa thu Ely chu ka han melh zauh a, uluk fahran chuan min lo en reng a, kan mit a in tawn chuan rang takin a hawisawn vat a,

.

"Joseph ka nia, Joe tiin min ko thin a" ka han ti a.

A kut no siah mai, sei fai san chu a khal niap niap a, coffee lumsak ka tum amah chu a tho vat a, a lum zui nghal a. A che chu ka en reng a, engemaw ti tak chuan min hip riau mai!

.

Chumi ni atang chuan Ely nen chuan kan innel ve ta khawp mai a, a fanu Betty erawh ka la ngaina thei lo. Mahnia awm thang, naupang bula khawsa ngailo ka nih vang pawh a ni mahna! Naupang hmeltha tak erawh chu a ni chiang alawm, chhun tur a nei tha kher bawk a. Office chawlh hian a khawharthlak ka ti ve viau thin a, Ely te inah ka lut ta zeuh zeuh a, a chhungte pawh mi fel tak an ni tih chu ka hre thuai a, engvanga pa tellova a fa chu pawm nge anih tih erawh ka la hre lova, hriat nan ala tlai lutuk in ka hre lo bawk a ni.

.

Nikhat chu kan hna chungchangah awareness neiin school hrang hrang kan tlawh a, Betty te achool pawh chu kan tlawh ve nghe nghe a. Kan hun hman zawh chuan an ban chhunzaam ve mai a, motor a ka chuang tur chu gate lam ka va melh leh hram a, Betty chu mipa pakhat hian a pawm a, an nui dun var var a, mak tak maiin ka rilru chu ana zawk a. Ka mit chuan Ely chu a zawng deuh a, a hmel hmuh tur erawh a awm lo. Rilru hnual deuh takin office lam panin ka tlan vang vang a, mak ka in ti zawk ka hmeichhe naupang ngainat loh tak kha midangin an pawm vel ka hmuh chuan a nu vang nge ka lo na ve ngawt chu a nia!

.

Nu leh pa kara seilian ka ni lova, pa hlutzia chu hun reilote chauh ka hriat avangin ka thinlung hian pa a zawng ru fo thin. Ely pa Pa Rina chu ka pa ang maiin ka en vat a, ka tan chuan ka pa tih loh rual a ni lo. An in pawh in pui berah neiin an ni pawhin fapa ang maiin in en a, Ely te unau hmeichhe hlang an nih avang chuan an lawm ve hle thin. Ely nu Nu Kimi chu a kawng achin hnuai lam a zen avangin a duh ang angin a chesawn thei lova, a nu an enkawl dan te chu a mawi ka tiin ka chhuang ve hle thin. An naupang ber Bawihi kan tih mai chu a la nula a, midang pahnih erawh chuan pasal an nei thung. Ely hi an unau ah a naupang ber dawt a ni a, a pa sawi dan chuan a puitling ber a ti a, chu chu ka pawm hle nghe nghe. Zankhat chu ka khua ahar deuh avang chuan ka leng phei a, veranda ah thu in guitar ka perh a, ka zai rat rat a, Ely chu thingpui chawiin a rawn kal a, ka zai ri a hriat chuan mak tih hmel deuh hian min en ha a, ka zai khat bawk a, a awm ve viau. Ka bul setah chuan a rawn thu a, thingpui chu ka han lem khalh a,

.

"Hmanni khan Betty kha mipa pakhat nen ka hmu a"

.

Ely melh zauh pah chuan ka han ti a, a ngawi ran a, a thingpui chu a han lem ve zet a,

.

"A pa a nih chu"

.

A tawi tik tek viau! Sawi leh tur chu hre lovin kan ngawi dun vang vang a,

.

"Betty pa chanchin chu min zawt dawn lo em ni?"

.

Ka va en chuan min lo en ve reng a, ka lu chu ka bu nghat nghat ringawt a,

.

"Betty kum 2 a nih hian kan inthen a, ngaihzawng min lo neihsan a"

Ka chil chu ka lem khalh a,

.

"Ava na duh dawn ve"

.

"Ka hriat tirh chuan mi a ang maiin ka awm a, tleirawl tirh atanga inkawp chho kan ni a, ka first love a ni a, a first love ka ni bawk a, chuti maia kan inkarah inrawlh an awm theih ka ring ngai lo"

.

Ka thaw a lo chham lek lek a, a hun paltlang tawh chu a ngaihtuah let a ni ngei ang, ral lehlam chu a melh vang vang a.

.

"Ka tuar chhuak theiin ka in ring thin, a chhan chu U Puia kha ka hmangaih em a, eng thil pawh tisual se ka ngaidam dawn tih ka hria a, mahse ka tih theih bak thil a thleng a, ti hian kan awm ta chu a nih hi"

.

Ka rilru hria ni awm tak chuan heti hian a han tih zawm a,

.

"Karkhatah vawikhat Betty a hmu ve thin a, a tira chuan ka rem ti lo hle nghe nghe a, ka pa chuan Betty pa a nihna a bo chuan lo, a fanu a ni miau a tiin a rem ti ta a ni" hul hak chuan a nui a.

.

Ka en a, ka en reng a, ka khawngaih kher mai. Tih theih ka nei lohzia erawh ka hrechiang hle a, hmeichhe pakhat, a pasal tana rinawm em em leh hmangaih emem tu, hmeltha bawk si hi tu fa tehchai hian nge ti na a, a rilru hi hliam sak le? Ka rilru chuan chu hmeichhia leh a pasal chu ka dem ru mawlh mawlh a. Chumi zan atang chuan mak tak maiin Ely chu ka rilru ah a cham ta reng a, ka ngaizawng chiah em tih chu hrethiam lo mah ila ka rilru zawng a luah tan mek tih ka hai lo. Ka pa in ngaihzawng neia ka nu leh ka nau nena min umchhuah te chu ka rilruah a lo lang thar a, a tuartu tana a natzia kha la tuar lo te chuan an hre kher lovang. Ka nu rilru na leh mangang hmel te kha ka damchhung hian ka theihnghilh theih ka ring tawh lo. Tunah in nuam leh tha ve tak, kan neih phak tura ka suangtuah phak ngai lohna ah chen tir ve tawh mah ila khang a rilru na te kha an dam tak tak lo tih ka hria a, keipawh a dam hek lo. Chung vel ngaihtuah neuh neuh chung chuan ka mu a, ka lo muhil der a.

.

Betty chu ka hmu zing telh telh a, ka ngaina ve ta hle a. Naupang duhawm tak a ni tih chu hairual a ni tawh lo, a tirah min ngaina lo mahse tunah chuan min ngaina ve hle tawh a, "pute" tiin min ko thin. Ely hi kei aiin kum 4 in a upa zawk a, hmelah erawh a naupan hmel zawk thung. Ka office bang hi an in tlawh lovin ka awm ngai lova, naupang lawmzawng ka hawn ngei ngei bawk thin. Ka thawm a hriat chuan rang takin a lo tlan vat a, inchhungah ka pawm lut thin. Naupang kum 7 mi lek mah nise a fing em em a, engvanga pute tia min ko nge a nih tih leh a pa ka ni thei mai lovem ni tih min zawt thin a. Ely nen kan in melh a, kan nui ringawt thin. Ka thinlung chuan ka fanu ah ka pawm thei thlap ang tih min hrilh fova, a nu erawh ka hrilh ngam ngai lo. Nitinin Ely chu ka ngaina thuk telh telh a, kan inkar erawh ka ti chhe thei tih ka hrechiang a, chu chuan huaisenna min neihtir thei lo a ni. A pasal chu a angaih takzet tih ka hria a, engtikniah emaw chuan an innei leh in ka rin a, ka rilru na lutuk tur chu ka ngaingam lo a ni ber. Ngaihtuah loh tumin ka in hrilh fo a, a harsa tih erawh chu ka hria.

.

December thla khawvawt tak karah khan peih leh peih lovin chhuak lo ila Ely hi ka hmelhriat lovang a, naupang duhawm Betty khan min vaw lo sela he nau duhawmna hu ka hre lo hek lovang. Chung chu kjel lova lo thleng thin thlasik present ka dawn hlu tak te an ni. Thla tawp lam a ni a, thla tawp lamah chuan office kan tul thei hle a, ban hun pangngaiah kan bang ngai mang lo a tih theih awm e. Ka haw meuh chuan dar 9 lo pel fel der tawh a, Ely te tlawh kawi ka tum zet na in a tlai deuh tawh avang chuan ka tlan tlang a, kawi ka thlen dawn chuan ka han ding dat a, hmuh ka neiin ka in hre tlat a, side glass chu ka han en a, Ely leh mioa pakhat gate bula an ding a, an titu chu ka va hmu a. Chiang lehzuala ka en chuan Betty pa ngei a ni tih ka va hmu a!

.

.

In ka thleng chu ka zawi vekin ka hria, enginnge min mawlh tih chu ka hrechiang khawp mai. Kei hi zep rual lovin nuthlawi zunah ka uai ani! Chumi ni atang chuan Ely chu hlat ka tum hret hret a, ka office bang pawh an inah ka kawi tawh ngai lo. Zirtawpni ani a, office kan ban hma deuh avangin thianten dinner eikhawm an rawt a, mahni a ina inbawl chawp leh ai chuan keipawhin pawi ka ti hran lo. Kan awmkhawm hi chuan duh ai kan lo tui deuh thin a, hemi zan pawh hian ka haw hma lem lo. A khat tawka zu lem zeuh ka ching thin pawh ka la sim lem lova, hemi zan pawh hian tlem chu ka lem a, rui khawp erawh chuan vawikhatmah ka la in ngai lo thung. In ka thlen chuan ka veranda light chu a lo eng kulh a, kawngkhar chu a inkalh lo tih ka hmu nghal thuai a, ka chahbi dahna hretu chu mipakhat chauh a awm. Ka tlan lut vat a, sitting room ah chuan Ely chu alo thu a, min hmuh veleh a ding a,

.

“Joe… I va haw tlai ve”

.

“Enge I rawn tih a?”a zawhna pawh chhang lo chuan ka lo ti bul hmak a.

.

“Aa… I rawn kal ngai bawk siloa, I that leh that loh hre turin ka lokal a”a ti a, a hmel chu a ti deuh da a,

.

“Hei I hmuh ang hian ka tha alawm, a tawk mai em?”a mitah ka melh ran a, rei min en ngam lo, engvanga chutianga alaka awm nge ka nih pawh ka hre lo.

.

“Ni e, I sawi dik e. I tha anih hmel.. ka kal leh mai ang”a in her a, kal mai a tum a, ka che thut a, a hnung atang chuan a kawngah ka va kuah a,

.

“Joe” a awki ah chuan ka chetdan chu mak a ti tih ka hre mai,

.

“Shh.. Ely, ti hian awm lawk ka duh”

.

Min hnial ta bik lo chuan minute 2 vel kan awm ang, ka kut chu a la thla a, min hmachhawn zawngin a ding a,

.

“Joe, I chetdan hi a mak viau ania”

.

“Ka hria alawm, Ely… Ka duh che, chu chu I hria em?”

.

A meng phar deuh awk a, a heh hnuai lam chu a seh fan fan a,

.

“Min duh tur ani lo, aih, nilo , a theih loh” chhuah tumin kawngkhar lam a pan a, ka zui nghal a,

.

“Joe, khawngaihin min kaltir rawh, engmah I hrethiam lo”a mittui a tling pam a.

.

“Ely, kal tura min tih chuan ka kal mai ang, chu chu I duhdan anih phawt chuan ka ti ang. mahse duh lo tur chea min ti erawh ka zawm thei dawn lo anih chu”ka ti a.

.

“Enteh, hmabak I la ngah lutuk, keichu fanu ka nei a, a tan ka nun angai. Nang pawh mi tha tak I tawng mai ang”

.

“Min duh ve lo tih chu I ti lang chiang tawk tawh viau alawm, I hnemna kha ka ngaithla duh lo”tih pahin room ah ka lut daih a.

.

Khumah ka thu hnawk a, hnawl ka ni chu na ka ti a ni. Reife room a ka awm hnuah ka chhuak phei leh a, ka dining table a chawhmeh lo inkhuh chu ka han hawng a, Eli’n min siamsak ani ngei ang. Nidanga ka tih ngai miah lovin ka whisky chu ka la chhuak a, engdangmah ngaihtuah lovin ka in zo ta vek a. Ka tui in hal huam chuan min ti harh a, ka lu chu a na ngut ngut bawk a, fridge a tui chu la chhuakin ka han inkhawlh khawlh a. Chhuata ka phone let ngat chu ka han chhar a, call log ka en chuan Ely ka bia tih ka hrechhuak chiah a. ka han ngaihtuah ngial a, enge ka sawi tih ka hrechhuak zo tlat lo. Inbual turin bathroom lamah ka lut a, holiday anih avangin ka hmanhmawh hran lo. Ka inbual zo chu ka lu na dam huai tura ka beisei kha a dam mai tlat lova, a natbelh ni maiin ka hria. Damdawi chu ka han ei a, mut leh mai tha a ka hriat avangin ka mu a, ka duh anga min chhawk theih loh avangin damdawi chu ka eibelh a, ka muhil ta siai siai a. Engtiarei nge ka muthilh ka hre lo, ka han harh chuan ka khum bulah Eli leh Betty an lo awm a,

.

“Apute.. A pute”

.

“Joe”

.

Ka in her a, anmahni hnungchhawn zawng chuan ka mu a,

.

“Naupangchhia takin awm teh suh. Betty I ti hrilhhai ania”

.

Ka inher leh ta nge nge a, Betty chu alo nui sen sen a, ka han then ve sak a,

.

“Apute, dam lo tawh miah suh aw” Betty chuan a ti ta reuh a, a biangah ka piai a, ka bulah chuan mu ve turin ka han ti a, rang takin a rawn inthawlh ve kak a.

.

“Anu hi a sual lutuk alawm Bawihte”Eli melh ralh chuan ka ti a, rum zet hian min lo melh let ve a,

.

“Anu in a hau che mi?”KA mitah min melh kar a, ka lu chu ka lo bu nghat a, a nu lam chu a han hawi a,

.

“Anih chuan nizanah khan anu I tap sia, a putea hian a hau ve tho che mi?”a tih chuan kan inmelh dun thawt a.

.

Sitting room ah kei leh Ely chu kan thu a, Betty erawh chhuat ah a inkhuallem mial mial a. Tv kan en a, a khat tawkin Eli chu ka melh a, a thil en ah a rilru a pe bik lo tih ka hria. A bulah chuan ka insawn a,

.

“Ka rilru chu ala pangngai reng ania”min en chuang lo chuan a ti a,

.

“A tha alawm” a tha ka ti lo takzet, mahse engmah tih theih ka nei silo. Kan duh vang ngawtin midangte rilru kan neihsak thei lo tih ka hrechiang ta.

.

“I farnu angin min en la, I harsatnaah ka tlanchhe ngai lovang. Chutiang chiah chuan keipawhin ka nuta angin ka en che ani” a ti a. Keipawhin chutiang tak chuan en ka tum ve ang, ka thei kher angem hrelo mah ila ka tum ve tur alawm.

.

Ely te chhungkua lak atang chuan ka in la hrang tial tial a, chu chu Ely laka ka rilru putdan ka thlak dawn anih chuan ka tih a ngai tlat ani. Betty erawh ina ka awm chuan a rawn leng fo a, min ngaina em em tu he naupang hi keipawhin ka ngaina a ni.

.

Office thilah karkhat zet ka thangbo a, ka tuina bera thawk ka ni bawk a, ka hna hi ka ning ngai lo. Ka haw hnuah pawh ka zinna report pek tur ka ngah avangin in lamah nihnih chu ka inkhung tawh a, chutichung pawh chuan ka duhthusam zan report ka la siamfel thei lo. Doorbell ri ral ral ka hria a, haider luih ka tum zet na a ka va hawng ta tho a, Betty chu uite kai chungin ka kawngkhar bulah alo ding a. Min hmuh chuan a nui leh ta ver ver a,

.

“Hey!! Bawihte, I lo tha em?”ka ti a, ka pawm nghal a,

.

“A pute, a pu in ko tur che in min ti a”a ti a.

.

Ka computer ka shut down a, Ely te in lam chu ka pan a, dik tak chuan ka phur thlawt lo ani. Ka va thlen chuan an lo ri deuh nak nak a, Eli unaute pasal nei tawh te pawh an lo awm kim thap a, Ely pa in min lo hmuh chuan min lo ko vat a,

.

“Joe, hei chhungkaw chaweikhawm kan nei dawn a, ka fapa I nia, I bang thei bik lo”a lo ti a.

.

Ely unaute ho chuan min be bawrh bawrh hlawm a, an pasalte erawh keimah ang a tawng tam vaklo an nih hlawm avangin kan inbe tam lem lo. An inchungah ka thu a, khua chu ka chuan vel a, khawpui boruak rit churh chu a hahthlak lek lekin ka hria. Ka zial zuk lai chu ka zu zo a, a dang zuk tumin ka phawrh a,

.

“I zu hnem deuhin I in hre ve lo maw?”

.

Ka hnunglam chu ka hawi vat a, hmeichhe pakhat hian min lo en reng a, ka dar chu ka san ak a, zuk pawh tum chuang lo chuan ka bengah ka han zep a,

.

“Ka awm awl deuh hi chuan ka lo zu leh vak zel”nui pah chuan ka ti a.

.

“Kan vawikhat inhmuhna niin ka hria, Daphne ka nia, Ely u Marami pasal nau”a kut a rawn phar chhuak nghal a,

.

“Joe ka ni e”lo chibai let pah chuan ka ti a, a then sak a, a ha var rual siau chu hmuh anuam kher mai.

.

Kan titi dun mawlh mawlh a, Law College ah a final year na a hman mek thu te chu a sawi melh melh a, ka hnathawh te chu ka han hrilh ve thuak thuak bawk a, hmeichhe ngainatawm tak a ni in ka hria. Ka thilsawi apiang tui takin min sawipui thei a, hmeichhe bright tak ani tih ka hre nghal bawk. Ely aiin tlemin a sang deuh a, hmeichhe hleitling tak ani phawt mai, a sam chu a kawng thleng vel a sei ani a, a hmawr lam chu a kir deuh chiat a, hmai sawl lam deuh vun ngo nung sarh ani. A mitko dinglamah khuavang a awm kalh a, chu chuan a ti lang sexy hle bawk. Chung zawng zawng chu minute reilote kan awmtlan chhung chuan ka lo hrekim hman vek, mipa ka ni miau a!

.

Inhnuai lamah kan chhuk a, kan in zui ta zel a. Chaweinaah pawh ka bulah a thu a, a titi vawrh chhuah chu a changkang ru riau bawk. Chaweikham lamah party ala awm dawn a, chu erawh ka hna pawimawh tih tur chhuanlamin ka tel ta lo. Hnathawh pahin fb ah ka online a, ka hna nena in relate thil a awm avangin thildang khawih lo mahin ka online ve vat vat reng thin. Friend request ka dawn zinga pakhat chu zanin a ka thian tawn thar Daphne kha ani, ka haw dawn khan ka pro name min zawt tak alawm. KA han confirmed ve a, ka ngaihsak zui hran lo. Ka mut dawn ah chuan ka inbox dawn chu ka han hawng a, Daphne hnen atanga lawmthu sawina a ni deuh mai. A profile chu ka check chak ta tlat a, ka tihdan pangngai ni miah lo thil ani. A propic vel pawh like tu a ngah thei ngang mai, an college ah pawh a thiamthei pawl ani lehzel tih ka hria a, a mak ka ti hran lo. Ka zing tho chu ka mit a bui luk a, zanthum rim taka hnathawh chu mit a hah ve duh bawk ani. Tho mai lo chuan ka phone ka han ti nung a, messenger ah msg ka dawng a, Daphne bawk alo ni a, morning wish alo dah a, ka han chhang let ve a. Office lama in lan ka ngaih tawh avangin inbuatsaih turin ka tho zui nghal a.

.

Kan meeting zo conference hall atanga ka chhuak chu ka office lam pan mai lovin coffee in turin inhnuai lam ka pan a, General room atanga lo chhuak chu Daphne ang riau in ka hria a, ka han ko a, alo ni tak tak a. Min hmuh chuan alo nui sen sen a, coffee in pui ah ka sawm a, a rawn kal ve nghal a. Kan office ah intern ti lai mek a thiannu tan lekhabu a rawn kensak thu chu min hrilh a, fiamthu ti tak deuh hian min hmuh leh a chak vang anih bawkthu chu a han sawi tel a. Ka lo nui vur vur lai a hmuh chuan a ka a chip hmak a,

.

“Ka hmu leh chak che ka tih kha ka sut leh nghal”a ti a.

.

A sam chu ka han tuai thur zeuh a,

.

“Sut leh mai lo e, min hmu chak tak tak la ka tih vang zawk alawm”ka tih chuan a nui leh ta var var a.

.

Daphne nen chuan kan inbe ta fo a, thian ka kawm lutuk loh avangin ka kawm theih zawng tak ka tawng chu ka lawm a, nuam pawh ka ti. Weekend ah an inah ka leng ve ta zeuh zeuh a, a chhungte pawh mi fel tak vek an ni. Hunawl ka neih changing movie en turin ka chhuahpui bawk a, ka hlimpui ve takzet a ni. Ka tan chuan thiantha tak tak ani a, nulat tlangvalna lam hawiin ka en ngai lo. Ka thinlungah Ely a awm reng a, ka chan tur nilo mahse ka thinglung atang chuti maiin ka nawrbo thei biklo.

.

Movie kan en zo chu Daphne lehkhabu tura ka lei ka kenchhuah theihnghilh lam turin ka inah kan kawi a, car ah min lo nghak mai turin ka ti a, lehkhabu ka la zo kawngka ka kalh tur chu min en an awm tlat ka hriat avangin ka han hawi kual a, an veranda a Ely thu reng leh min lo en reng chu ka va hmu a. Ka hmu tih a hriat chuan inchhung lamah a lut vat a, a hmel kha adik chiah lo tih ka hria, ka awm a ti nuam lo zo vek mai. Daphne ka thlah pawh an inah lut kawi lovin ka haw leh nghal a, Ely hmuh ka duh. An inah ka kal a, eirawng alo bawl mek a, midang  chu ka hmu lem lo. Min hmuh chuan a then sak a,

.

“Dating kan zo tawh maw?”a han ti a, a hmazawna chair ah chuan ka thu a, a thiltih lai chu a ti mawp mawp a, ka lo thlir reng a.

.

“I lakah Betty a lungawi lo khawp mai, I tlawh khat a in ti a, mahse naupang mai ani a, ngaih thutak vak pawh a ngai chuang lo a”a ti a.

.

“Ely, min duh ve miah lo em ni?”

.

“Betty pawh alo haw tep tawh ang, I duh leh chaw ei ve nghal mai la”thildang a sawi daih a, mahse ka hre duh bik lo.

.

“Ely…ka mitah hian min en rawh”ka awki chu a nelawm fahran tawh lo, a ding thut a, kalsawn a tum chu ka lo dang a, min nek a, a banah ka hmer salh a, a rak that a, ka thlah rang kher mai. A ban rek chu a tuai vat vat a, min melh rum khawp mai.

.

“Tihnat che ka tum miah lo”ka ti sap a, min chhang lo. Tui hmunah thil a sil chhunzawm a, a hnung atang ka kuah a, a che ngam lo tih ka hria,

.

“Ka mita en chungin min duh loh thu hi sawi rawh. I lak atang ka kalbo vang vang tawh ang”ka ti a, ka kuai her a, min en ngam lo. A khabeah ka kuai dak a, min rawn en chuan a mittui a tling pam tih ka hmu a,

.

“Joe,…”min kuah thlawp a, duat takin a hnung ka lo chul a, “Engatinge I hriatthiam theih tlat loh? “

.

“Enge hriatthiam tur awm chuang a?”ka lo ti let a.

.

Inchungah inkuah rialin kan thu a, ka bula thu hmeichhe duhawm lutuk chuan engdangmah min ngaihtuahtir thei lo,

.

“Joe.. I future hi ka tihchhiatsak thei lo che, kan kal thui hma in kir leh zawk ang”a han ti a.

.

“Ely, ka future chu nang leh I fanu Betty te hi in ni asin, chu chu hrethiam turin ka duh che”a kawngah chuan kuahin a darah ka khabe ka nghat a, a thaw halh chu ka hre thei,

.

“Ka chungah rinna nghat ngam turin ka duh che. Ka hmangaih che”ka ti a.

.

Min en a, a then sak a, a mittui parawl kang chu ka hmuh hmaih lo, a khabe ah dim tein ka vuan a, a hmui hnawihsen tel hauh lova sen hlar mai, fawh chakawm ngawih ngawih ah chuan ka fawp ta vawng vawng a. Min thlahlel zet hian min lo chhanglet ve a, min ti phur takzet a ni. Inchung chhohna step a pen thawmah chuan rang zetin kan inthlah a, Bettty alo ni. Min hmuh chuan phur zet hian a rawn tlan a, ka lo pawm a, chhungkua tak tak ni awm a mawi kan ni.

.

Ely nen kan inzuina pawh thla 2 a lo tling ve der tawh. Ka ngai a, ka thlahlel a, hun ka neih phawt chuan a kiangah hun hman ka duh thin. Betty chu kartawpah a pa in a riahpui leh zauh thin a, an pafa inkarah thu ka neih loh avangin phal leh phal loh turah engmah ka sawi ngai lo. Mahse kei hi min ngaina thuk se tih chu ka duhdan ber a ni. Hemi kawngah hian Ely pawhin min vengthawng ru ve viau in ka hria a, nuam a tih lohna tur khawp erawh chuan engmah ka tilang ngai lo.

.

Daphne nen pawh a khat tawkin kan la inkawm ve reng a, Ely nen kan chungchang erawh ka hrilh lo. Thil zawng zawng hi sawichhuah vek ngaia ka hriat loh vang ani pakhat a, a dang leh ah chuan Ely tan thil nuam a ni angem ka hre lova, amah atanga an hria anih loh chuan lo sawi ka tum lem lo. Nikhat chu kan office ah Daphne leh a thiannu an rawn kal a, coffee in pui turin min rawn sawm a. Ka hna ka laklawh loh lai anih avangin ka zui ve a, kan thawhpui dangte pawh coffee in an lo awm nual a, nula pahnih ka zui lut ve chu mak tih hmel takin min lo nuih hlawm a, kum 3 ka thawh tawh chhungin han ngaihbel zui tur awm hmeichhia ka la zui ngai loh vang pawh ani mahna! Daphne chu ka bulah thu in a dan pangngaiin a titi leh siam siam tawh a, a thiannu nen chuan min han inhmelhriattir a, Angie anih thu leh ukil hlawhtling tak anih thu te chu a han sawi a, kan han inchibai tha leh a. A hmel chu tha hluah ani lo na a duhawmna ruk a nei reuh a, a nuih zawnga a biang sum lang kalh thin te, a chezia nu hnap mai te chu hmuh a nuam a. Tin hmeichhia chu tawng tam lo se ka duh ka ti thin a, Angie pawh hi a tam loh hmel hle in ka hria a, a ngaina tu tan chuan ngaingatawm tak tur a ni. Nidanga inhmu leh tura intiam chungin an car dahna thleng ka thlah a, Daphne motor chhunga lut tur chuan awmze nei fe hian min han siai a, ka lu ka lo thin khum a, uar zet hian a nui hawk hawk a. An tlan liam thleng chuan ka thlir a, ka tan chuan Ely tluk tu an awm thei lo.

.

Ka rin ang ngeiin zanah chuan Daphne chuan min rawn call a, a thiannu chuan min ngaihven thu leh ka number pawh a dil thu te chu a rawn sawi luam a. Ka lo chhan that vak loh avangin a lungawi vaklo tih ka hria. Chumi zan atang chuan kan inbe tha vak lo zui nghe nghe a, thian kan ni a, chutiaga awm chu tha ka ti lo viau a, lehlamah midang rilru tur ngaihtuah miah lova in nawr erawh a ti fuh ka ti bik chuang lo. Angie message chu ka dawng zeuh zeuh a, han chhan loh ngawt chu thil nuam a nih lohna chin a awm a, ka chhang ve thin. Kan office a an rawn kal bak kha kan la inhmu leh miah lova, Ely bulah pawh ka sawi lang lo. Ka tan chuan inngaihzawnna hi game ani lova, thinlung taka ka ngaihzawn te lo chu ka kawp mai mai ngai lo.

.

Ely te in lamah zanriah ka ei a, kan eikham hnuah pawh ka leng zui ta reng a. Rei vak lo hnuah a nu leh pa leh Betty ten room lam min pansan a, kan pahnih chiah in kan awm a. Ely bulah ka insawn nghal vat a, a hmui a ka han chuks tur chu alo thlesawn a, ka ti tau ta ngawt a. Min tih lungawi tumin min han chhaih vel a, ka hrelo der tlat a, a ruk chuan a nuam ka ti. A tho nulh a, engemaw tih a tum chu tiin ka han hawi chhuak a, ka mal chungah a rawn thu thut a, ka nghawng ah min kuah a, amah zawk chuan min han fawp a, ka chhang duh lo lui vel a. Min melh pah chuan a ner deuh sawk a, mahse min thlah duh chuang lo, ka titau der buai duh tawh lo, a nui ta ver ver a. Kan pahnih chungchang hi a chhungte hian an hre tawh em tih ka la chiang chiah lova. A hma in kan lo inkawp hmasak avang hian han rinhlelh vak ngaihna pawh an hre lo maithei. Ka zawt ta nge nge a, mahse an hriat pawhin a rukin an hre mai maia a rin thu leh amah chuan a la hrilh loh thu a sawi a. Ka hmel chu chik zet hian min melh a,

.

“Joe.. I thinrim mi?”a ti a,

.

“Ka thinrim leh rim loh chuan kawngro a sut vak hmel loh”ka ti deuh hmuk a.

.

Min kuah a, min han nuih tlawn vel a, thutak deuh zawk hian min kuahna kut chu ka vuan a,

.

“Ely, kan inkawp tih hi I chhungte hriat I hlau em?”ka ti a, a kut chu ala sawn a,

.

“Joe, ka chhungte hriat chu ka hlau lo, mahse mite min ngaihdan tur erawh ka ngaihtuah tel lo thei lo va, Betty pa nen kan inthen atang kum khat a tling awrh chauh ani si a”a ti a.

.

Ka hrethiam khawp mai, a thusawi chuan hmeichhia te dinhmun ala that tawk lohzia pawh a ti lang chiang viau in ka hria.

.

Ka hnaah ka buai zual a, Ely nen hun pawh kan nei thei mang lo. A changing haw lovin office ah ka riak a, ka kaisanna tur atana hun pawimawh tak nih avangin theihtawp pawh ka chhuah ve ani. Phone kaltlang erawh chuan an nufa in ka ngaihsakna ka lantir reng thung. Zirtawp zan chuan hna laklawh ka neih loh avangin in lamah ka haw a, ka haw dawn thu chu Ely ka hrilh lem lova, ka inbual zawh ah an ina kal ka tum tho avanga hrilh lo ka ni. Ka inbual zawh chuan an in lam chu ka pan a, an inbula car lo ding chu an ta ani lo tih ka hriat avangin inleng an nei anih ka ring nghal mai a, inchhung ka va luh chuan ka beisei loh deuh inleng an nei tih ka hmu chawpchilh bawk a. Betty pa chuan a fanu chu alo pawm a, Ely bulah thu in a fanu chu alo chhaih nui ar ar a,

.

“Apute..”Betty chu apa pawmna atang a rawn talchhuak a, min rawn pan nghal vat a, Ely chuan hamhaih hmel tak hian min melh reng a, Betty chu ka pawm a, Ely te thutna ep ah chuan ka thu a,

.

“Joe, in va buai awm em em ve hmuh tur I awm lo hle mai”Ely nu chuan alo ti a. kan buaina vel chu ka han hrilh thuak thuak a, tun tum angrenga an ina len hrehawm tih hi ka la nei loving. Ely chuan thingpui ka duh leh duh loh min zawt tih loh chu min biak pawh a tum hmel loh, chu chuan ka awm a ti nuam lo zual a, haw leh daih mai ka duh rum rum. Betty pa chuan ka hnathawh te chu min zawt ve luam a, a thusawi kalhmang ah doctor anih ka ring ve ngawt a, ka ringsual lo tih ka hrezui bawk. A thut danah chuan haw mai a tum hmel loh avangin phur lo takin ka hawsan a, Ely chuan kawngka bul thleng min thlah a, min mangtha na pawh ka chhanglet lo. Anihna takah chuan ka lungawi hlawl lo ani. Ka thin a tawt ut ut a, in ka thleng chu ka phone ka thlawh darh chuai a, khatiang a hmuh kha ka inbeisei miah lo. Chu ta chhapah biak that pawh ka hlawh lo ani a, a pasal hlui lakah chuan engmah ka lo ni lo. Ka zak ngawih ngawih a, tlawm ka in ti bawk.

.

Ka haw ve theih zanah chuan tui takin ka muhil ve ang chu ka tih laiin ka boruak tawn chuan min ti muhil thei lo. Khawvar hma deuhin office lam pan in ka inkhalh chhuak a, hnaah rilru sawrbing ila chu chuan min chhawk thei ber ang. Nilengin ka room ah ka inkhung a, tlai lamah kan Department head hnenah report ka pe tih loh chu ka room ka chhuahsan lo. Ka thawhpui a tam zawk an haw tawh a, ka lehkha pawimawh ka in chin fel lai chuan kan peon alo lut a, pawnah min hmu duh an awm thu a sawi a, ka roomah rawn luhtir turin ka ti a. Ka han nghak deuh a rawn kal an awm mai loh avang chuan chhuah tumin ka han ding a, ka kawngkhar a rawn ri rak a, Ely chu inthlahrun hmel tak hian a rawn lut a.

.

“Enge I rawn tih dawn?” nelawm lo zet hian ka lo ti a,

.

“Nizan atang phone che ka tum tawh a, ka be tlang thei lo che a”a ti a.

.

“Pawnah inbia ang”ka ti a, min zui a. Ka inkhalh chhuak nghal a, in lam pan lovin hmundanga hruai chu ka tum a ni. Ka hmel a hmuh chuan ka thinrim tih a hria ani ang, engmah min zawt lovin a thu ngawi reng a. In awm lohna hmun kan thlen chuan motor chu ka ti ding a, ka chhuak nghal a, ani erawh a rawn chhuak ve mai lo. Ka let leh mai loh avang chuan ka thutna ah chuan a rawn kal a,

.

“Joe… inthen ang” a fiah kelh kawlh khawp mai,

.

“Ka huaisen tawk lo ani, min hrethiam rawh aw” mi pawh a melh ngam lo.

.

“Betty pa vang kha ani tiraw?”

.

“Nilo, let leh tumna ka nei lo, mahse.. tunah mai chuan mipa dang kawp tur pawhin inrintawkna ka tlachham ani”a ti a.

.

“Sawi tur ka hre lo e”

.

“Joe, mi tha tak I tawng mai ang, kei nuthlawi mai min duh ve hi ka lawm a ka phu lo ngawih ngawih, nula pangngai tak nen inkawp ula ka duh ani”

.

“Min hnar dan chu a mawi khawp mai, I duhdan anih phawt chuan I nun atang hian ka inthiarfihlim ang. Ka tibuai zui lovang che, hnawl nih te hi chu ka inhmeh ve reng reng alawm. Ka pa hnawl nih kha ana viau emaw ka tia, mahse I hnawl nih nen hian a danglamna ka hre lo”ka ti a. Min rawn khawih tumin a kut chu a lekkang a,

.

“Nilo e, min hnem duh suh, I hnemna ka dawng reng thei dawn chuang hleinem. Ely, duhthusam te ka lo nei ve asin. Nang hi ka nupui I ni anga, Betty nen kan pathumin chhungkaw hlim tak kan ni ang tiin ka lo suangtuah ve thin a, hlim taka awm tir che u hi ka duhthusam ber ani. Mahse chungte chu duhthusam satliah ani dawn ta anih hi”ka ti a.

.

Ka inluah ka sawnna pawh karkhat a tling ve tawh a, Daphne te thiandun zarah in nuam tak ka luah thei a, ka lawm khawp mai. Ka rilru na chuan min kiansan mai an tum lova, hetiang taka min awm tirtu hi huat a theihnghilh ka duh. Angie chuan min rawn be ve fo a, keipawhin ka rilru na chhawk nan hman ka duh avangin ka lo be tha ve bawk a, ani min lo beisei ve reng tu tan lah chutianga ka biak that avang chuan ka lakah beiseina alo nei sang ve zel bawk a. A tha lo tih hre mah ila ka rilru la pengtu anih ve tlat avangin ka be chhe thei bik lo a ni.

.

Ka duhdan ang ngeiin ka hna ah ka kaisang a, mahse ka hlim thei tak tak chuang lo. Keimahah hian kimlo a awm tlat a, a tikim theitu chu hmeichhe pakhat min hmangaih let ve lo tu chu ani. Holiday anih avangin movie en tumin laptop ka inchhawp a, ka phone rawn ri pawh chu ka chhang duh lo. Karkhat ah ni 5 chhumlo chat lovin hna kan thawk a, weekend ah hi chuan awl thei ang bera hun hman ka duh ve ani. Ka en tui viau lai chuan ka doorbell a rawn ri leh a, peih lo angreng takin ka va hawng a, Angie chu ka kawngka bulah a lo ding to a,

.

“Phone I la thei bawk silo a, ka rawn kal tawp a nih hi”a han ti a. Ka call dawn kha ani ngei ang, en pawh ka lo en lo ani tak e,

.

“Enge ni ta ava pawimawh awm ve?”ka ti a.

.

“Bazar min kalpui turin ka lo sawm che a, naktuk hi ka pa birthday ania, lawmsak ka tum a mahse engmah ka hrilh lawk duh silo a, surprise ka duh deuh vang ania. Daphne ka sawm lah ina lo zin chhuak daih bawk sia, ka rawn pun ve tawp che anih hi”a ti a.

.

Bazar ah chuan thla tlaphung in kan in zui kawi a, a duh kan la lei kim loh avangin dawr pakhat ah kan lut leh a. A duhzawng a lamkim hnu chuan pawisa a pe fel a, kan chhuak tur chu Ely te nufa an rawn lang ve hlawl a, ka insawn hnua ka hmuh leh vawikhatna ani nghe nghe.

.

“Apute…”Betty chuan min rawn pan nghal a, ka lo pawm vat a,

.

“Ka duatte, I dam em?”ka ti a,

.

“Aw, mahse ka ngai thei lutuk che a, tinge hmundangah I awm daih a?”a ti a.

.

“Bawihte, aputea te khan kalna tur dang an la nei a, kaltir phawt rawh le”Ely chuan alo ti a, Betty chu ka pawmna atang a talpit a,

.

“Apute, anih leh phawt mai aw”A ti a, a nui sen sen a, ka thinlung hi a na nawn leh ta awn awn mai.

.

Ka thil in chu a thawk chak vak lo emaw tiin um khat lai ka in zo tawh a, a dang ka lam belh leh a mahse a nghaktupa chuan min pe phal tawh tlat lo. Ka phun nuah nuah a, ka sawi ber pawh chu ka hre bik lo. Dawhkan chu ka bawh a, ka lo muhil ani ngei ang, ka harh leh chuan motor chhungah ka lo awm a, driver seat chu ka melh vat a, Angie chuan min lo phur daih chu niin,

.

“Engtinnge min phurh daih theih?” la harhfim lo tak chuan ka han ti a,

.

“Mahni dose pawh hre lo khawpa in rual chu I ni lo asina ti a, a chek tlak tlak a.

.

Ka lu na ngut ngut chuan min ti harh hlawl a, ka awmna hmun chu ka hre lo, ka hawi kual vel a Angie te in a niin ka hria. Reiloteah Angie chu a rawn lut a, khuma ka thu min rawn hmuh chuan tui min pe vat a, ka lo in nghal khawlh khawlh a.

.

“I inah hruai che ka tum a, mahse chahbi ka hmu zo lova, kan inah ka hruai ta mai che anih hi”a ti a.

.

“Joe, I rilru ana tih ka hria alawm, mahse I nun a chhe zawnga hman kher hi a tul em ni”amah vek chuan a han ti a.

.

“Angie, I hrethiam ve chuang lo ang”ka han ti ngawt a.

.

“Joe, I laka ka rilru puthmang I hre vek a, min pawm ve thei mai lo em ni?”a ti a.

.

“Angie…”min rawn fawp thut a, ka in ring hman lo, nemsawn ka tum a, mahse min kuah nghet sauh a, a duhthaw telh telh bawk a. Mahni khawhar rukna lo neihsa leh rilru lo na bawk nen ka thil in hanthawh alo lang a, ka fawp let ve vat a. Chu chuan a tiphur tih ka hria, a kawr chu a phelh a,

.

“Joe, I hmangaihna hlawhchhuak dawn lo mah ila zanin chauh tal hi I kiangah hun min hman tir rawh”a ti a. Ka kamis kilhna phelh a rawn tum lai chuan ka harh chhuak a, a kut chu ka lo dang a, mak tih hmel deuh hian min melh kawk a,

.

“Angie ka tihpalh.. ka thei lo”ka ding a, ka kutah a vuan a,

.

“Joe..”A mittui a tling pam a,

.

“Ka nupui tur pawh nise inneih hmaa sex hman hi ka duh lo bur, min hrethiam rawh. Chuan I hriat angin hmeichhia hmangaih em em ka nei a, ka rilru nat vanga I laka hetiang zawnga lo khawsak hi ka duh lo ani.”ka ti a.

.

“Ka thiam loh ani, Joe… ka ngaisang lutuk che”a mittui karah a rawn nui sak a, “Ka tum lawk thil a ni bik miah lo, ka hmangaihna che hian khua min hmuh tir lo ani”a ti a.

.

Ka kuah a, a sam chu ka chul sak heuh heuh a,

.

“Mipa dang tha tak, thinlung zawng zawnga hmangaihtu che neih hi I phu ani. I tan I thiantha tak ka ni zel dawn alawm”ka ti a, a insut faih faih a, hmeichhia te mittui hian min ti chak lo fo thin.

.

In ka thlen chuan khua a var fel chiah a, mutna hun a awm tawh loh avangin ka inbual a. Ka hun tawn mek te chu ka chhui kir neuh neuh a, ka lawm na tam ber chu sex a ka fihlim hi ani. Ka theihna ani lo tih ka hria, ka nu min tawngtaisakna vang liau liau a ni. Muangmarin eirawng ka bawl a, ka rilruah Ely bawk a awm a, hun reilote tak tak kan inkawp a, heti taka ka lo hmangaih hman hi a mak ka ti thin. Min hmusit duh nise hmuhsit tlak ni in ka inhre hial a, ka duh thu a hetia awm erawh ka ni hauh si lo. Nidang zawng aiin office turin ka chhuak hma a, Ely te in lam kawnga kal chu ka rilru ah a awm tlat a, helam kawng hi ka zawh ngai lohna lam ani a, hemi tuk erawh turtu engengemaw a awm tlat a, ka inluah hlui chu ka han thlir vang vang a. A luahtu chu chhung rual deuh ani tawh anih hmel, ka lung pawh a leng ru ve deuh hlek a, chutia ka hawi kual vel lai chuan Ely te kawtah motor a rawn ding dat a. A chhung atang Ely leh Betty pa rawn chhuak ka hmuh chuan ka lungphu chu an su dup dup a, ka han dawm vang vang a, engvanga helam kawnga lo kal kher nge maw ka nih le tiin ka inchhir ta khawp mai. Inchhung an luh hnu chuan ka tlan ve nghal a, Ely khan let tumna neilo angina ka bulah khan a in sawi a, mahse fa te pa chu an lo tla na deuh ani mahna!

.

Nilengin ka awmdan a dik thei lo, duat hmel taka Betty pa in Ely a kuah lut lai chu ka mitthla ah a cham reng a, lawmpui tur ka nih laiin ka thei tlat si lo. Ka nawmsam loh chhuanlamin chawhnu lamah chuan ka haw ta daih a, engmah ka thawk thei chuang lo. Ka khumah ka thu hnawk a, ka duh bak bak thlengin hmangaihna chuan min nghaisa anih ber hi. Ka zu dah that chu phawrh in ka han tlak pap pap a, engmah hrelo a awm theih chu ka chak ber. Ka in zawh chuan um dang ka phawrh leh a, ka in zo leh em tih chu ka hre tawh lo. Hetiang a ruih chhum hmak hi ka chak dan ber ani tlat, ka ban thip zek chuan min ti harh a, ka inah ka lo awm tawh hauh lo. Ka han hawi kual vel a, damdawiinah ka lo mu reng hi alo ni. Nurse pakhat hian min lo chiu zo chiah a,

.

“Engatinge hetah ka awm?”zawi te hian ka han ti a,

.

“Zu a inhrai hlum I tum em ni? “vin deuh takin nurse chuan min han ti a, ka maimitchhing leh daih a. Helai hmun ka thlen dan awm reng reng ka hrechhuak zo lo. Ka lo muhil leh ani ang, ka harh leh chuan ka bulah Angie alo awm a, hlauhthawn hmel fe hian min lo melh a,

.

“Angie..”

.

“Joe, I lo harh ta maw.. awi ka lawm lutuk”a ti a, a au chul a, min rawn hmuh dan ka zawh chuan a ner sak a,

.

“Min rawn call kha I hretawh lo em ni? Ka rawn thlen chuan I lo chatthla fel der tawh”a ti a.

.

Ka phone lai awm pawh ka hre lo, mahse ka lo phone ve ngei chu anih hmel si, a tha zawkah ngaih mai a tha. Ka khawsik tel vang chuan chhuak mai tura in ngai kha min chhuah nghal phal ta hauh lo. Ka nawr nasat em avangin Angie chuan min hawsan a, zu avang a ka buaina ah min tanpui tu ber ni zel a, lawmawm mahse ka inthlahrung ve deuh a ni. Cabin pawnah chhuakin khawpui eng phe uar chu ka thlir veng veng a, helai hmun hi hmun nuam leh dangdai tak anih hi ka ti rilru a. Nurse in min rawn ko a, ka luhtirh a thinchhe deuh nu te kha ani a,

.

“Damlo I nih kha engahnge I lo chhuah leh dek dek zel”a han ti leh nghal pang a, ka nui hak a,

.

“Joseph tih hming te chu an han phuahsak ve che a, I nundan nen a inhmeh thak lo. Bible a Joseph nen chuan letling tak in ni”a han ti leh hram a.

.

“I hmelthat tehlul nen I ang cheh lutuk hian I hmelthat tur angina a ti tha lo che anih chiah kha”a ka ti a, min chhan ngaihna a hrelo. A ang deuh phuau a, ka lo lawm hle thung.

.

“I tawngthei emai naktukah I chhuak tawh ang”a ti a, a nui ve ta var var a. A nui hmel ka vawikhat hmuhna anih vangin ka rin ai daihin a nuih chuan a hmeltha a,

.

“I nuih khan I hmeltha lutuk”ka ti a. A chhuah dawn chuan a rawn hawi let a,

.

“Nangpawh I hmeltha lutuk, zu kha in tihchhiat tir duh miah suh”a ti a, a chhuak ta nghal a.

.

Chu nurse chu a hming ka hriat chuan ka nui hak a, Elizabeth-I ve tho alo ni a, Lizzie tiin an ko ve thung a. A hming in ziahna bu ka keu lai chuan a rawn lut a, rang takin ka thil en lai chu ka lo khup thuk a, ka nui tet tet a. A dan pangngai bawkin a tarmit kar atang chuan min han bih leh kher a,

.

“Naktukah I chhuak dawn anih chu”a lehkha rawn ken luh chu a bih mawlh mawlh a,

.

“Eng a?? Vawiinah ka chhuak duh, ka chhuah ngei ngei a ngai”ka ti a, ka hna ah ka kal a ngai takzet tawh a ni.

.

“Dam vara hnathawh chu I duh zawk lo em ni?”a han ti khauh a,

.

“Aih, ka hna ka thulh thei tawh lo, ka chhuak dawn”khum atang ka tho a, dam reng chunga chu damdawiin khuma mut chu ka thei lo a ni.

.

“I thu thu le”a ti nghat a, a in her a, kal mai a tum a,

.

“Nurse Lizzie”

.

Mak tih hmel zet hian min rawn melh kawk a, ka lo then sak a,

.

“Doctor chu min dilsak rawh aw, kartawpah in checkup turin ka local leh ngei ngei ang”ka han ti a. a thaw halh a, a lu chu a bu nghat a, a chhuak ta nghal a.

.

Damdawiin atang ka chhuak chu ka thawveng hawk a, ka hna mawlh chuan ka rilru a luah hneh bawk a, inah pawh chawl hahdam lovin office lam ka pan nghal a. Ka rin ang ngeiin ka dawhkan chu lehkha pawimawh alo let phung a. Ka han in singsa fel a a tahtawlin ka thawh chhunzawm ta nghal a. Chhun chawlh laiin rei vak lo ka chawl a, ka phone ah msg ka dawng a, ka han hawn chuan ka number hriat ngai loh ani.

.

“I damdawi kha ei theihnghilh suh ang che, damdawiin ah awm I duh leh te anih loh chuan”

.

Ka then sak a, min rawn thawntu chu hrilh hran ka ngai lo. Ka address kimchang ka submit avangin chutatang chuan ka number pawh a nei a ni ngei ang. Ka dawhkana ka damdawi inchhawp chu a thla ka han la a, ka ei that thu sawi tel pahin ka han thawn nghal a, min chhanglet tawh lo. Office ban hma hretin ka haw a, ka taksa chau hluah hluah avangin ka awm tlang thei tawh lo a ni. In ka thlen velah ka inthlak a, ka mu nghal a. Rim takin hna ka thawk fo a, ka taksa ah insawiselna ka nei ngai lo. Ka mu chu ka lo muhil tlang daih a, ka harh leh chuan zan dar 9 alo ri tep a, han mut leh nghal ka chak viau na in damdawi ei tur ka hrechhuak a ka tho leh ta nge nge a. Ka han thawh takah chuan han mut lehnghal mai chu ka peih lo a, khua a vawt deuh avangin ka khumah laptop ka chawi phei a. Ka online khat tawh zia ka ngaihtuah chhuak a fb ah ka han lut zui nghal a. Ka rilru a lo lang hmasa chu Ely ani. A hming ka han zawng ngial a, ka hmu zo ta tlat lo. Min block anih ka ring a, account dang atang ka han en leh a, a awm chuang lo. A account a chhia anih te chu ka hna ring ngawt a. Ka phone phawrh chhuakin kha nurse sangha ang maia vawt raih kha a number ka hmetchhuak a, ka han call ve tawp a. A ring quit tep tih ah a rawn pickup hram a, a aw ah chuan phurna pakhatmah a tel lo. Han chhaih kawlh chu ka chak viau na a rilru hahna nei a ang deuh a ka hriat vangin ka chhaih buai duh ta lo. Fb a a proname ka zawh chuan ho tih hmel zet hian min chhang a, ka check hnuah a khawih ngai lohzia ka hmu ta reng bawk a. Kum 2012 vela a hawn chu a ni ve ngei a, mahse thil thar lam a awm meuh lo. A propic pawh vawihnih vel chiah a thlak a, thian pawh tih tham a nei lo. Ka lawm ru riau a, a mizia common lo lutuk chuan min hip ani ber ang chu. Amah hnaih chakna engemaw tak hi min pe a, ka ngaizawng chu ani chuang hauh si lo. Ka mut dawn chuan rin loh deuhin Lizzie chuan msg min rawn thawn ve mial a, kartawpa in checkup ngei ngei tura min rawn vau na ani mah!

.

Hna pawimawh zual kan thawk zo thawkhat a, ka hahdam ve ta deuh bawk a, ka in tiam hun karah in checkup hman ta chiah lo mah ila a karleh Tuesday ah hospital lam pan chuan ka inkhalh chhuak a. Doctor nghakin kan thu thap a, a private clinic a kal chu awlsam zawk mahse he hmunah hian hmuh duh ka nei tlat a, hun ka insiam lui ve kha ani reng bawk a. Ka hmuh tum erawh a hmel avang khaawp mai. Doctor ka hmuh zawh chuan Lizzie ka bia a, canteen ah lo nghak turin min ti a, thuawih takin ka lo nghak a. Rei vaklo hnuah pawr deuh phangin a rawn lut a, a rawn nui ve suk a,

.

“Ka lo buai deuh hlek a, I call pawh ka lo hmu lawk lo”a ti a, ka lo en reng avang chuan a sam chu a han tuai mam a,

.

“Nangmah vang anih hi min lo nghah rei ka hlauh vak vek”ahan tih zawm nghal a.

.

Ka hma zawna thu chu ka hriat hnu ang riau in ka hria, min hnungchhawn zawnga a thut vang erawh chuan tunge anih ka hre mai lo. Kan thil ei zo chu kan chhuak hmasa a, pawn atanga ka va hawi let chuan Betty pa tih ka va hmu a, he hospital ah hian a thawk tih ka lo hre miah lo. Lizzie chu a duty a zawh tawh avangin thlah haw ka tum a, min hnial bik lo chuan a rawn kal ve mai a.

.

“Dr…. Ih.. Kan hma a thu pa kha..”traffic jam a kan tan lai chuan ka han tichhuak phawng a,

.

“Dr.Ruatdika kha maw?”Lizzie chuan alo ti a.

.

“Aw… Aniang, a hming ka lo hre chiah lova, Betty pa tih chiah in ka hria a”ka ti a.

.

“Anih chiah chu, naupang duhawm tak ani reuh asin. A naupan zual lai phei kha chuan hospital ah hian a pa in a rawn hruai fo a, pawm kan in chuh nasa thei mai mawle”a ti a, min rawn melh a, “In inchhung em ni Ely ten en khan”a ti leh a.

.

“Inchhung chiah love, an thenawmah ka awm reng tawh a, chhungte anga ka neih ve awmchhun chu an ni a”ka han ti a.

.

“Ka khawngaih ngawt mai Ely chu, a la naupan tehlul nen a vanduai lutuk a”a ti a.

.

“An in hruai leh tawh em?”ka lo ti vat a, rilru buai deuh hlek hmel a pu a, a lu a thing a,

.

“Dr.Ruatdika te chuan nupui a nei daih alawm, Ely alo kawpsanna nu nen khan fa an lo pai sia, Ely a let leh duh ta bawk lo nen an in hruai ta daih alawm. Mahse vawiinni thleng hian an pa chu hmana a hlim hmel ang kha hmuh tur a awm tawh lo. A hmangaihzia chu kan hriatpui vek a, engtinnge alo lerhsan theih zawk kan ti a, mak kan ti thei lutuk alawm”a ti a.

.

Ka hriat loh thil thar hriatbelh ka nei e, ka tan Ely chu beisei theih anih lohna tur ka hre lova, beiseina thar ka nei leh ta. Ka theihtawp ka chhuah dawn ani, nghah a ngai anih pawhin a in peih hun chu ka nghak mai ang.

.

Ka chhungte pawisa thawn in bank ah ka kawi a, ka han hawikual chuan Nu Kimi(Ely nu) ka va hmu a, min rawn hmuh chuan a nui suk a, ka pan phei a, enge tih a tum tih ka zawh chuan zam hmel a pu ve hlekin ka hria,

.

“Pawisa withdraw ka tum a, bank ah ka kal ngai lo lutuk a ka bangbo khawp mai”a ti a.

.

Ka thil tih tur ka tih zawh chuan kal lo mai lovin ka tihpui a, a haw dawn pawh chuan a duh lo chung ka thlah a. An kawtah chuan a chhuk a, leng lut turin min sawm na a hna tlem thawh zawh tur ka neih avangin ka haw tlang ta zawk a. In ka thlen hnu chuan Nu Kimi hmel ngui deuh lap kha ka mitthlaah a awm reng a, a pawisa lakchhuah lah chu a tam hrep a, an chhungkua in harsatna an tawk em ni tih te ka ngaihtuah a. Ka hnathawh lai pawh ka thawk tui thei lo, ka tho uaih a, thlanglam veranda ah chhuak thla in ka han hawi vang vang a. Zialzuk tumin ka han phawrh chhuak a, ka zial neih sa pawh ka lo zu zo der tawh. Ka phone rawn ri ral ral chu ka hria a, muangchangin inchhungah lutin ka phone chu ka han ban a, Lizzie alo ni, ka in bul lawkah an awm thu a rawn sawi a. Rawn leng lut ve tur chuan ka han sawm a, a thawhpui pakhat nen an rawn kal a. Engengemaw sawi chuan kan phul hlut a, an thusawi pakhat chuan ka beng riau a, Ely chungchung an sawi ni ngeiin ka hria a,

.

“Min lo hrethiam ula tuna in sawi mek kha Betty nu ani em?”ka han ti phawng a, an pahnih chuan min melh rual thawt a.

.

Thil engemaw sawi sual nei ni awm tak hian an riat ral ta vel mai mai a. ka ngaih erawh a tha hauh lo. An haw hnu chuan ka motor ka la chhuak a, Ely te in lam pan chuan ka inkhalh chhuak ta nghal a. Ka va thlen chuan Betty pa car paw halo ding leh vang tawh. Tun tum chu thinrim aiin hlauhthawnna in ka khat zawk, ka motor chhungah ka thu reng a. Engtia rei nge ka thut ka hre lo, Betty pa rawn chhuak ka hmuh chuan ka motor atang ka chhuk vat a, biak ngei ngei ka ngai ani. A motor bulah ka lo ding a, chutia min han hmu thut chu a phu ve zuk in ka hria, a insiamrem vat a.

.

“Ely chungah hian eng thil chiah nge thleng?” ka awki chu a hniam raih a, mahse a fiah tha hle thung,

.

“Mi private life ka hriat ngai loh hnena sawi chu ka tih ngai thil a ni hauh lo mai”a dar ak pah chuan a han ti a.

.

“Ka tana Ely pawimawhzia hi min hriatthiampui phak lovang, khawngaihin a chungah thil tha lo a thleng em ni min hrilh hram rawh”ka ti a. Ka ngen takmeuh a ni.

.

“Enteh thianpa, duty leh tur ka nia ka hmanhmawh tlat, ka kalna tur kha min lo kian hram ta che” a han ti a.

.

Ka thingthi rawp a, a khupah ka vuan a,

.

“Ka ngen takmeuh a che, ka hriat ngei ngei a ngai. Engpawh a chungah thleng se a chhe ber pawh nise hriat ka duh ani”ka ti a, hetiang reng hian tu lakah mah ka la tlawm ngai lo.

.

Ka khumah ka thu hnawk a, ka mittui chuan ka hmai a ti huh vek tawh a, eng thil teh hrep nge thleng mek hi ni ta ngai? Betty pa nen kan inbiakna chu ka ngaihtuah let a, Ely hian brain tumor alo nei reng amaw? Ka thaw kawk kawk a.

.

“Dik tak chuan ka thil tihsual avanga ka inchhir tawk tawh tehlul nen hetiang lehzel a tuar hi hrehawm ka ti ngawih ngawih. Kan inneih hun chhung pawh khan pasal doctor neih ve si kha a natna engmah hre lova ka lo awm te hi na ka ti ngawih ngawih a, keimah zawk hian tuar ila tiin ka ngaihtuah fo thin. A tana ka tih theih tawk chu a natna a zual zel loh nana theihtawpa enkawl hi ani. Tidam thei ila tih hi ka duhthusam ber ani, mahse chung lam thuneihna a ni si a”beidawng zet hian ati a.

.

“A dam thei tawh lo I tihna em ni?”

.

“A stage hi alo sang tawh em a, mihring atang chuan a beidawnthlak lek lek chu anih hi”a sam chu a han tuai leh pap thin a. “An ina kan inhmuh hmasak ber tum pawh khan a natna vanga hmu ka ni a, treatment lak a duh loh vangin a nu leh pa khan thlem turin min rawn ko a, I haw hnu te khan nangmah vangin a tap nasa asin. I hnenah engthilmah sawi lo turin min ngen a, ka sawi lovang tiin ka intiam a, mahse a vawihnih nan alaka ka thutiam chu ka bawhchhe leh ta anih hi. Nitin nangmah ngai em em a hun a hmanliam lai hian ka ngawihbopui thei ta ngang lo ani’a han tih chhunzawm a.

.

Engthilnge ka tih tur tih ka hrechiang khawp mai. Kei hi a natna vang chauhvin maw min lo hnawl a? A natna khum atang beisei ngam silo in ka hming alo lam thin a maw? Ka mittui chu a rawn tla leh thin, ka in thing harh a, inbual phawt ka mamawh tih hria in bathroom lamah ka lut nghal a.

.

Ka in bul lawka pangpar dawrah ka lut a, rose sen duk lawh thar hlim hlak chu hum chhuakin Ely te in lam ka pan a. An kawtah chuan ka han ding vang vang a, kawngka ka kik a, nu kimi chuan a rawn hawng a. Chutia min hmu thut chu a hamhaih ve deuh hlek a, bah nak in lut tur chuan min han sawm a, ka han hawi vel a an in chu a reh ruih mai. Ka kuta ka rose ken chu a rawn thlek deuh ha a,

.

“Ely ka hmu duh a..”ka kal chhan chu tlang takin ka sawi nghal a.

.

“A awm hleinem, a zin daih alawm”a aw chu tah chhuak aw a ang hle in ka hria.

.

“Nu Kim. Engkim ka hre vek tawh, khawngaih takin hmuh chu min phalsak rawh”ka ti a.

.

Tahzet chuan a insum thei ta lo, chhuak em em hian a rawn tap a, ka hrilhhai hial zawk,

.

“Joe… Engatinge in lo intawn kher kher le?”a mittui hru mawlh mawlh chuan a ti a.

.

“Ely hi ka hmangaih a, ka hmangaih reng bawk ang. A natna chungchanga engmah ka hriat loh avang hian engtikahmah ka inthiam thei ngai lovang. Nu Kim, thildang vanga min kalsan tum emaw ka ti asin, ani kha thinlung takin ka hmangaih a, vawiin ni thleng hian ala pangangai rnek bawk”ka ti a.

.

“Joe, heti tak hian ka fanu I hmangaih a, ka lawm takzet ani. Mahse hmabak eng tak I neih kha tihhlawhtling la a duh em em thin a, I tana phurrit nih kha a duh ngai lo. Chuvang chuan a duhna I tihhlawhtlinsak hi I bat ani. Va kal ta la, Bawihi duh ang ngeiin hlawhtlinna sang zawk chang turin bei rawh”a ti a.

.

“Ka hmuh I remti lo anih pawhin biak tal min phalsak rawh, a room bulah ka ding anga, engngemaw hrilh hriat ka duh ani, chu tal chu min phalsak rawh”ka ding hluai a, phal lo mahse ka ti tho ang.

.

Ely room kawngkhar bulah chuan ka ding a, a room kawngka chu chhunglamah a inkalh a, ka han beng deuh dat dat a,

.

“Ely, ka tawng I hre thei vek tih ka hria ania aw, engang pawhin min hnawl mahla ka beidawng ngai lovang. Chumi hrilh tur che chuan ka lokal, engang pawhin harsa dawn mahse I kianga hun hman tum hian ka bei sauh sauh ang. Min lo en reng ang che, engthil nge ka tih theih tih hi ila hre vat ang”ka ti a.

.

Ka chhuak tur chu ka han hawi let a, Ely room tukverh parda phe zuai chu ka hmu a,

.

“ka hmangaih che”tiin ka phun sap a.

.

Ka office ah zanhnih ka riak tawh a, thlakhat chhung chawlh lak ka duh avangin ka hna laklawh tak tak te thawh zawh tumin mutmu pawh tuah lovin ka thawk a ni. Ka hmel pawr fap chudathlalangah ka thlek vang vang a, ka then sak a, tuemaw tan a khawvel nih ka tum mek a ni. Chawlh lakna lehkha ka tifel a, muangchangin in lam panin ka inkhalh haw a.

.

“Joe ?” mit bial kawk in Nu Kimi chuan min melh a.

.

Ka suitcase khaia an inchhunga ka lut chu a hrethiam lo tih ka hria,

.

“Ely enkawl turin ka rawn insuan lut dawn”

.

“Tu thu in nge chu thil chu tih I tum?”

.

Chu aw lo chhuahna lam chu ka hawi vat a, Ely chu lungawi loh hmel zet hian a room kawngkhar ah a lo ding a.

.

“Keima thu in, chuan tuman min hnial thei lo”ka ti ram ve hmak a.

.

“Enteh Joe, ka tan engmah I ni lo, khatiang I tih vang khan ka hmangaih let ve dawn chuang lo che”

.

“Min hmangaih kher ka phut hauh lo, ka tihtur dik tak nia ka hriat hi ka ti dawn a, chuzawng chu ani mai”

.

“Joseph..”

.

“Elizabeth”

.

“Duhtawk phawt teh u, engpawhnise Joe han thu phawt teh khai”, Nu Kimi chuan kan boruak chu min rawn thelh dai ta hlauh a.

.

Chawei dawn thleng chuan pawh chuan Ely hmel hmuh tur a awm lo, mahse pawi ka ti lo. A nu leh pa hnen atang remtihlohna ka hmu lo bawk a, ka thil tih tum thulh ka tum bik lo. Betty chu a nu natna vangin a pa hnenah alo awm daih a, ka ngaih em avangin a pa ka dil a, a remti lutuk lo na a ka dil luih tlat avangin min hnial duh ta lova. A zan a zanin ka va hruai a, min hmu chu a hlim ve kher mai. Kan haw lamah chuan zawhna engengemaw min zawt a, a nui her her a, a nui hmel chu a nu ang chiah a tha ani.

.

“Pute, daddy tiin ka ko thei lo che em ni?”a mitmeng fiah kak chuan min melh ralh a.

.

“Engvanginnge I theih loh ang?”

.

“Takzet maw? Ihmaw a pa tak tak saw chu ka nel thei miah lo mawle”a ti ta reuh a. A tum deuh bar a,

.

“Bawihte, I pa chuan a hmangaih lutuk che alawm”a sam chu ka chul sak a.

.

‘”Mahse nau ka duh hleinem, a pa te chuan an nei tho alawm, ka duh lo reng reng”a ti a.

.

In kan thlen chuan a pi leh pu chuan an lo kuah chung a, kan thawm ah chuan Ely pawh alo chhuak ve a.

.

“Anu, Aputea hi tunah chuan apa ka ti tawh dawn, amah pawhin a phal vek”a ti a, Betty chuan min rawn melh nghal vat a, ka lo nui sak a.

.

Ka muhil thei lo chu ka in let sek a, ka room kawngkhar chu a rawn ri rek rek a, ka lo tho nghal thuai a,

.

“Joe, inbe lawk ang”Ely chuan a rawn ti a.

.

Ka tho a, an balcony ah chuan kan ding dun vang vang a, ral lehlama eng phe tliarh chu a mawi dangdai viau lehnghal,

.

“Hun ka nei tam tawh lo tih ka inhria, I tan phurrit nih ka duh lo. Joe khawngaih takin ka duhan hi min tihhlawhtlinsak rawh, chu chu ka tana I tih hlu berah ka ngai ang , min hlat la, min kalsan rawh”ral lehlam chu ala thlir reng a.

.

“Ely, chu chu ka tih theih hlu ber anih chuan thil hlu engmah ka tihsak thei dawn lo che anih chu. Chutiang chu ka hmangaih vang che a tih ngai tur pawh nise ka hmangaih lo che ni zawk rawh se. I natna hi dopui tur che leh I mamawh huna I tana ding tlat turin ani ka rawn pan che”ka ti a.

.

A mittui tla chu ka hmuh hmaih lo, a heh chu a pet fan a,

.

“Joe, a pawi ka ti lutuk aw”

.

Ka kuah a, tap chhuak ngam silo in a khur det det a,

.

“Nang leh Betty ka tawn cheu avang hian ka hlim asin, engpawh thleng se in kianga awm zel hi ka duh ani”ka mittui tla chu hruk pawh ka tum lo.