I KIANGAH CHUAN

I KIANGAH CHUAN

.

Police station kawt ah chuan ka han ding vang vang a, ka naute chu MSU huaihawt sikul kal hma suh loh avanga sikul kal tur an lo dan avangin police in an khawm a, chumi buaipui tur chuan ka kal a. Thil awmzia ka sawi chuan police duty pakhat chuan SDPO hmu turin min lo ti a,a room ah chuan min hruai nghat a. Ka duh ka sawi mawlh mawlh chhung zawng chuan ngawi rengin min ngaithla a, a mitmeng thip zet leh a hawiher vel chu ngainatna pakhatmah ka nei lo. A staff te chu ka naute ho ka nau te ko tur chuan a han ti a, a file khawih lai chu a bih leh nghal mawlh mawlh a. Ka naute thianho pali chu a room ah an rawn kal diah diah a, an thiltih lai chu chhunzawm tawh lo tur a ti pah chuan a hau nghek a, kilkhat atang chuan ka lo thlir reng a, ka lam a rawn hawi a, DC a rawn kal tur thu leh chumi hma chu an chhuah theih loh thu min hrilh zui nghal a, chutianga min ti kual chu ka haw kher mai. Darkar thum zet pawnah ka awm a, DC pawh chu a rawn kal a, a let leh hnuah chuan ka naute pawh an rawn chhuah zui a. Ka duh ber leh ka kal chhan ka naute an lo chhuak ta bawk a, in lam panin kan in khalh haw leh nghal a. .Ka zirna avangin hmun dangah ka awm bo char char a, tun kar tir mai khan ka zirlai zir zovin ka haw a, nithum emaw lek ka la awm tih in ka naute chungah hetiang thil hi alo thleng a ni. Unau zingah upa ber ka ni a, hmeichhe awmchhun ka ni bawk a. Ka nau chiah Mama hian B.Com 4th sem a zir mek a,kan naupang ber Tetea erawh Pawl sawmpahnih a kal mek thung. Ka pa hi sumdawng mi a ni a, khaw hrang hrangah zin kualin a vakvel thin a, chutatanga ka nu nen pawh hian in tawng an ni. Atirah chuan ka nu chhungte chuan an duh lo hle a, mahse ka nu hian ka pa chu a hrechiang a, a ring ngam bawk a, a nei ta a ni. Ka pian hnu kumhnih thleng chuan ka nu chhungte chuan ka nu chu an ngaihsak duh lo nghe nghe a ni. Mahse ka pa hi dik leh rinawm tak a ni a, a sumdawnna kawngah pawh malsawmna te a dawng zel a, vahchhuah reng ai chuan tiin dawr a siam ve ta rawih a, a tifuh chho hle a ni. Ka nu chhungte pawhin chutia ngaihthah reng chu harsa an ti a,tha takin an pawm zui ve ta a. Ka pa chuan a chunga chutianga an tih chu a rilrua a hre reng lova, puih an ngaih naah a tlanchhe ngai lo. Kei erawh chuan ka pi leh ka pu te chu thinlung takin ka nel thei lova, ka pa ka ngaihsanna erawh a zual em em thung. Tunah chuan a hmaa dinhmun hrehawm ve raka awm thin ka pa chu a nupui fanaute tan innghahna tlak tak tak a ni tawh a, a fate min duat em em a, kei ngat phei chu a fa hmung koh ka nih avang hian min ngai hlu lehzual a ni. Ka nu pawh hi pasal te zahthiam tak mai a ni a, ka pa in a saqi tawh chu a fate hriatah a hnial ngai lo. Nu mawl ve tak leh lehkhathiam lo ni mahse kan unau tan chuan ani baka hlu an awm thei chuang lo..Zan lamah ka men rei deuh avangin ka thawh chuan ka chhungte chu an lo chhuak vek tawh a, chawhmeh ka han en kual a,artui kan mai chu ka tum a. Lei sa kan lo neih loh avangin thenawm dawrah lei turin ka kal nghal a, ka haw leh lam chuan Gypsy rawn tlan chuan kawng khuar a tui chu min han dai per chhuai a, ka au ring kher mai. Motor chu a ding a, ka tlan phei vat a,

 .

"Hey, i mit i meng lo em ni a? Tui tlingte kha i hmu lovem ni?" Ka ti nghal tawn tawn a,

 .

"Ngaihdam dil ta che" a piaha thu chuan ati a, ka va en chuan hmannia SDPO ka hmuh pa ngei kha a ni..Driver chuan ngaihdam min dil a, chu SDPO aruka ka hmel huat zet chuan ka mitah tak min melh a,

.

"Ti khan i duh tawk tawh em? Kan tlai dawn a, i lung a la awi loh chuan tlai lamah ngaihdam kan rawn dil leh dawn che nia" a tih chuan rum zetin ka melh a, hmalam alo en ran tawh thung. Lungawi lo zetin ka kal a, inchhung ka luh hnu pawh chuan ka thin ala rim a ni. Mipa chapo lutuk leh in dah sang lutuk, ka mi huat ber an ni. Hmeichhia ah pawh nu chi ka ni lem lova, ka rilrua awm sawichhuak mai zel chi ka ni bawk. .Chu thil a thlen atanga karhnih a liam hnu chuan ka thiannu Seni fon bo avangin FIR kan thehlut a, mi thilruk avanga man an lo awm nual nen duty pawh an lo buai viau a, min buaipui hman an la awm mai loh avangin pawnah kan nghak a. A rei tak deuh avang chuan kan lut a, tumah hmuh tur an awm lo. A hnu deuh hlekah ASI pakhat a rawn kal a, min buaipui nghal zung zung a, chutia thil awmzia te kan sawi lai chuan SDPO ngeiawm zet chu a rawn lut a, 

.

"Buaina pawh chu i va ngah bawk ve mawle aw" zawi sap chuan a ti a. .Ka thiannu phei chuan hre awm ang pawhin a lang lo, ngei hmel zetin ka melh a, min lo en kar a, ka zam duh bik lo. Ngeiawm deuh hian a nui huk a, a kal ta daih a. Ka ngei na chu a zual sauh a, ka haw hluah hluah a ni ber. Pawnah chuan a motor chu ka chhir hrep a, ka car a ka lut tur chu ka han hawi a, a room tukverh atang chuan min lo thlir reng a, nasa tih hmel zet hian a chal a ti chuar nang a, a tihdan ang chiah chuan ka nui ve huk a, kan tlan ta daih a. Tutemah hi zahlo takin ka ti hmasa ngai lova, ka ngaitheih loh zawnga an awm erawh chuan ka zaidawh hran lo. Ka nu leh pa mize zawi em em an ni a, hemi kawngah hian ka nu chuan ka pu(a pa) ka chhun tih a sawi thin. .Zanah chuan ka thiante ho an rawn leng a, ka haw hnua kan inhmuhkhawm leh hmasak berna a ni a, kan hlim ve dar dar hle. Ka pa chuan news a en a, ka va hawi phei lai tak chuan ka mi huat em em pa chu a lo lang mek a,

.

"Awi! Khi mihring khi alawm ka huat ngawih ngawih" ka ti a, ka au a ni ber.

.

Ka thiante chuan min en hu hlawm a, ka pa pawhin mak tih hmel zet chuan min lo en ve bawk a, ka thianpa Atea chuan,

.

"Engvanginnge i huat ngawt a, a fel teh asin" a lo ti vat a,

.

"Ka hua hi ni tawp mai, mi chapo lutuk" ka ti a, Atea bawk chuan.

.

"Ka u Mama thianpa ania, Zomuana te chu fel kan lo ti viau asin" a ti a. Engmah pawh sawi zawm tawh lo chuan thildang kan sawi kai ta daih a..Ka theih ang angin dawr lamah ka pa chu ka pui a, mahni tawkah ka buai ve thin viau a. Buaina dang katawk hran ta lo bawk nen SDPO ka huatna pawh chu ka hrechang tawh lo. Nitin zingkar atangin dawrah kal a, tlai thim dawnah ka haw a, mahni tawkah buai takin hun ka hmang ve a. Nikhat chu thawmhnaw a lo thleng thar a, kan nula nen kan rem tha mawlh mawlh a, thawmhnaw en tura lokal te chu an hmel pawh en lem lovin ka lo bia a, mipa tawng ri ka hriat chuan ka han hawi chhuak a, kan SDPO pa chu a lo ni reng a. Ani pawh mn hmuh chuan a chal a ti chuar nang a,

.

"Zabuaii bawk maw?" A ti nghat a..Ka hmui chu ka han tih pawrh khum ringawt a, ala nui tak ang vur vur lehnghal a. A nula hruai chuan kan kawr zawrhlai pakhat chu a duh a, a leisak nghal a. Chutia an kal liam hnu chuan mak tak maiin ka rilruah a awm ta reng a, ka lo duh ru tawh nge ka in hrethiam lo, a nula rawn hruai pawh chu ka thik ti tih der a! Ka lu chu ka han thing nawk nawk a, khatiang mi chapo lutuk, nihna avanga midang hnuaichhiah ching lakah ka rilru ka pe ngai lovang ka ti a, ka phun chhuak sep chu kan nula chuan alo hria a, a lo nui sang a, ka zah ve leh hnuhnawh deuh avang chuan ka haider lui thung..Thian ngaina leh thian te huikhawm peih tak ka nih avang hian kan in pawh ka thiante len luh tamna ber a ni a. Hmun hrana ka awm pawhin ka awm lai ang tho in ka thiante chu kan inah an ngampa a, ka nu leh paten an lo zir bawk a, nuam an ti ve hle thin. Engkim hi a eng zawngin kathlir ve thin a, ka nynah hian harsatna ka tawk ve nual tawh a, mipa avangin ka na hle tawh bawk. Mahse chu chuan tumruhna leh chhelna min pea, hmalam panin ka la kal ve zel zawk a ni. Kan thianho rau rau ah pawh Atea nen hian kan inkawmngeih zual a, naupan tet atanga inkawm chho char char kan ni a, kan in bul lawkah hian an awm thin. Tunah erawh kan veng bul deuh lawkah anmahni inhmunah in an sa a, an insawn tawh a ni. Mipa thian ka ngah a, ka kawm nasa bawk a, ka tan an rintlakzia pawh ka hrechiang ve hle. Hmundanga ka awm lai pawhin Atea chu kan inah a tal tam hle tho a, a changin a riak a, ka nu leh pa pawh hian fapa ang mai hian an en ve a, ka hmun ruak luah khattu ani an ti thin. Phaia ka awm hnu kumhnihna atang chuan zu a in zeuh zeuh tih ka hria a, ka hau nasa thei hle a. In nasa tak nilo mahse tleirawl sual pawh neilo an tih hial thin chutianga a awm chu ka ngaithiam lo a ni. Chutiang chu i mahse ka thiantha anih na a bo chuang lova, ka thuruk engkim min hriatpui tu leh min fuihtu ber ala ni tho a, kan pahnih inkarah zep ruk a awm ngai lo. Hetianga zu in a chin chhoh chhan pawh hi a bialnu a hmangaih ve ngawih ngawih in an inkawp reng laia pasal a neihsan vang a ni a, a tuar hle a, amah a rinawm em avangin na pawh a ti a ni. .Dawr lamah ka awm a, nidang ang bawkin ka buai a, kudam nen ka kar tawn sek avang chuan ka hah ve viau. Dawr ka han thlen leh chuan Atea chu a lo thu reng a, a lo nui var var a, a bulah hmeichhe pakhat hi a lo thu bawk a, thil awmzia chu ka hrethiam chiah lo. Chu nu chu ka han en chiang a, a rilru ti na em em tu leh amah phatsan a midang hnena kalsantu Nupuii kha a ni tih ka hria a, hlim taka nuih chu harsa ka ti. Ka thianpa ber lah chu hlim hmel takin a khi reng si a, dik tak chuan ka rilru a natpui a, hetiang mai maia a pawm leh hi ka lo ringlo a ni. Zanah chuan a rawn leng a, thil awmzia ka zawh chuan Nupuii chu a pasal nen an lo inthen a ni awm a, ngaihdam a dil nasat em avangin a naidam tih min hrilh a. Ka awmdan ah chuan ka lawm vak lo tih a hria ani ang, 

.

"Tluang, ka nep tih ka hria alawm, ka thiantha ber i ni a, i rilru tur pawh ka hrethiam khawp mai. Mahse ka lo hmangaih viau a ni maithei" a ti ta thlawt a..A hmel ka en a, ka khawngaih thar leh riau a, chutia lo duh lo ve ngawt tur ka ni lo, ka thianpa hlimna chu ka duh pui tur a ni tiin ka ngaihtuah leh ta zawk a. Nupuii nen an inkawp leh atang chuan kan in pawh a rawn dak khat ta hle a, a hlim a, a tlei hle a nih ka ring. Nikhat ka dawr nghak haw lam chu kan hna dil vel tur chungchangah hmuh ka duh a, an in ka lan khat deuh bawk avang chuan ka tlawh kawi a, inchhung ka va luh chuan Atea nu chuan rawng a lo bawl mek a, ka nu tiin ka ko a, Atea pawh hian ka nu leh pa chu ka koh ang hian a ko ve mai bawk thin a ni. Atea awm na ka zawh chuan vawk chaw a pe mek a,sitting room ah nghak turin min ti a. Thawveng angreng tak chuan an sitting room chu ka pan a, mi pakhat lo thu te chu Atea u a ni emaw ka ti mai a, ka thawm hriaa alo hawi chhuah chuan SDPO pa bawk chu a lo ni. Mak tih hmel zetin kan in en haw a, beisei loh tak hian kan in hmu leh nulh thin anih hi ka ti rilru a. A police form nen niloa kahmuh vawikhatna a ni a, a lang pangngai ve viau nghe nghe. U Terina chu aroom atang a rawn chhuak a, a thianpa bula thut pah chuan,

.

"Tluangte, i va rawn lang khat ve tunlai inbuai deuh em ni?" A ti a.

 .

"Aw.. Buai ve angreng, ka pa a zin a, keimah chauh in dawr ka buaipui a" ka ti a. SDPO-a chuan min lo melh run a, ka zam ve ta lek lek mai. ."Anih chu, nang zawng i puitling khawp mai. E taka hei ka thianpa hi ka lo inhmelhriattir ang che, Zomuana ani hi, kan SDPO ania, college atanga inkawm char char kan nia. Chuan in Zomuan, hei Tluangtei a nih hi, nula fel tak a nia" U Terina bawk chuan arawn ti a. Chutia a sawi lai tak chuan Atea chu a rawn lut a,."Tluangte, i lo lang ve hlawl a, ka nu pawh a vui viau ania i rawn lang khat lutuk a" arawn ti bawrh bawrh a. Zomuana chuan uluk fahran hian ka chezia chu alo thlek a, dik taka sawi chuana hmaa ka ngei hluah hluahna kha a awm tawh lo. Atea room lam kan pan a, kan application vel kan buaipui a kan tih zawh chuan keipawh haw ve ka tum nghal mai a, Atea nu chu room ah a rawn lut a,

 .

"Tluangte i lo leng khat si a, hei chaw ka chhum kep che ei ve nghal mai rawh. I u Terina thianpa chawei ah kan sawm a, ar te kan talh a" a ti a. .Ka hnial na in Atea nen chuan min nawr lui tlat si a, ka chhungte chu bia in chawei ka tum tih ka hrilh ta nge nge a. Atea nen chuan choka lamah salad kan siam a, engengemaw kan sawi a, kan nui leh hak hak thin. Ka lo sawi hmaih pakhat chu Atea hi kum 5 chauh ala nih laiina pa in a thihsan a, an unau pathum an ni a, an upa ber hmeichhia hian pasal a nei tawh a ni. U Terina hi College ah Asst.Professor in a awm mek a, a pa pension an la tel bawk a, khawsak nuam tawk tak an ni ve tih kan zep tel leh lawk duh ani.

.

Chaw kan eikham hnu chuan motor ka ken loh avangin Atea chuan min thlah a tum a, U Terina chuan in la zei fe hian min rawn nuih a,."Thianpa nen hian in haw rual dawn nia, vengkhata awm in ni alawm, thingpui sen hang te kha va lum leh hrih rawh" a ti a..Kawng thui tak kal dun tur nilo mah ila ka huphurh ru hle a, mahse han hnial lah chu nuam ka ti bik silo. Thingpuite kan in zawh hnu chuan kan haw ve ta a, ngawi rengin kan tlan a, a tawpah chuan a mipa zawk chu a tawng ta nge nge a,."Hmannia mi kha in dawr em ni?"

.

"Um..."."Chuan lehkha te i la zir em?"

.

"Zir tawh lo..."

.

"Enge i zir thin?" Ava dilchhut mai mai tak,."BBA ka zir a, ka zo tawh"

.

Kan ngawi leh ta reng a. A huhang chu ana ka ti, boruak hip tur chu a hip zo vek emaw tih mai tur a ni a, amaherawhchu hemi zana ka hriatchian em em chu mipa hmeltha tak a ni tih hi. A ngo lova, hang lutuk erawh anilo. A hnar ngul sang vah le a khabe zum lam lek lek te, a mithmul vei lama khuavang lian vaklo dum kalh te chuan a ti pa hliah hliah a. Chung zawng zawng ka ngaihtuah lai chuan kan in bul kan lo thleng der tawh a, ka chhuk vat a,

 .

"Mangtha le aw" a ti a, ka chhanna pawh nghak lem lovin atlan tlang ta daih a. Pawnah chuan ding in boruak chu ka hip vang vang a, ka thaw hak a, inchhung lamah ka lut ta a..Mak tak maiin chumi zan atang chuan ka mi ngei leh huat em em thin chu ka vei ta tlut mai a, yu hnenah mah ka sawi chhuak lo. Ka thiantha ber Atea pawh ka hrilh ngam lova, a reh leh mai chu ka beisei bawk a ni. Veng khata awm ta chu inhmuh leh hlawl chang a awm a, ka hre lo lui a, a chang leh ka pumpelh a, hmuh tam loh chu ka duh ber a ni. Zankhat ka inkhawm bang chu a motor in min rawn umpha a, thui vaklo min tlanpel a, a ding leha, rawn hawi chhuak in

.

"Lo chuang ve la" ati a,."A hnai tawh emai a ngai lo mai" ka ti ve mai a..Engdang sawi lo chuan a tlan leh nghal vung vung a, dik tak chuan ka chak ngei alawm, mahse amah hnaih lo a awm hi ka tan a tha si. Mutna ka siam a, ka mut hnu deuh lawkah Atea chuan min rawn bia a, arilru ahah hmel hle lehnghal,."Tluang ka lokal dawn lo tho leh mai rawh ka lo thleng tep" arawn ti a. Ka thianpa berin buaina a tawk anih chuan hahdam takin ka mu thei bik lo, ka tho a, sitiing room ah chuan ka lo nghak a, rei vaklo hnuah arawn thleng a, ."Ka nu in min hau a" a ti a, zu a in tih ka hria, rui lutuk erawh chu a ni lo,."Engvanginnge a hauh che a, i sual aniang chu" ka lo ti a,

.

"Nupuii hi a duh thei thlawt lo, Tluang engtinnge ka tih dawn, neih ngei hi ka duh ani " a thu kun deuh lap a.

.

"Nghak ve deuh la, a thuhrimah hna pawh i la nei lova, han nei ve phawt la, ka nu pawhin a la phal maithei asin" ka ti a.."Nangmah nen hian innei turin ka nu chuan min duh tlat alawm" a fiamthu anih ringin nui thaw chungin ka va melh a, thutak fe hian min lo melh thung a,

.

"Nuthlawi anih bakah amah hrim hrim ka duh lo a ti bur a, engkim i hriat kha ka nu luhlul zia chu" ati a. Amah vek chuan,

.

"Mo ka nei dawn anih chuan Tluangtei chiah ka duh a tia, bialpa i neih thute dawt ka hrilh ringawt" a ti a.

.

"Tha deuhin awm la, zu in lo la, i nu tana rintlak turin awm la, pawm hun ala nei hrim hrim ang" ka ti a. Thingpui ka lumsak a, a in zawh chuan tha taka inthlah in a haw ta a.

.Chumi zan atang karhnih vel a liam veleh tawh a, Atea pawhin chanchin dang em em a nei lova, a khat tawkin min rawn tlawh tih loh chu kan inah a rawn chuangkai tam lo. Chawlhni zan a ni a, chhun atangin ka khua a sik a, ka mu reng a, dar 8 velah chuan ka damdawi ei ten min chhawk avangin chawei turin ka tho chhuak a. Chaw ka ei lai chuan Atea chu arawn lang hlawl a, chaw ala ei loh avangin ei ve nghal turin ka ti a, mi pawh hnial lem lo chuan a rawn kil ve mai a. Kan eina vel ka sil a, siting room ah ka nu nen an titi a, ka va thu phei ve a, ka thu fel chiah tih ah ka pa inkhawm pawh a rawn bang a. Thingpuite ka lumsak hnu chuan mu turin an room min pansan a. Ka thianpa chu chik takin ka en a, rilru hahna a neih khan a la kiansan lo niin ka hria,."Tunlai kan boruak te a tha em?" Nui chung chuan ka han ti a.

.

"Tluang, thil tam tak ka ngaihtuah a, sawi duh pawh ka nei, mahse sawichhuah hi a har ka ti bawk si" a ti a.

.

"Eng thil nge ni a? Ka lakah chuan engmah zep a ngai hleinem" ka ti a, uluk takin min melh a,

 .

"Ka nun dan hi ka ning tawh a ni. Nangmah chauh hian i siam tha thei, i kiangah chuan ka hlim a, ka nun chhungril ber hi a hlim thin" hnuai lam a melh leh ran tawh a, ka beisei loh tak thil anih avang chuan ka hamhaih ve hle bawk a,

.

"Ate... i uang emai a..."

.

"Uanna chi a ni em ni Tluangte? Harhfim vekin asin i hnenah hian ka lokal..".Ka thiantha ber a ni a, thian ang pawhin ka hmangaih ngei alawm, mahse nulat tlangval in duhna leh in hmangaihna lam in ka la en chhin ngai lo.

.

"Ate... nangte chu ka thiantha ber i nia, tiang zawngin ka en ngai lo che" ka ti a,

."Ka hria alawm Tluangte, keipawh hian ka hrethiam bik lo. Nupuii kha ka hmangaih emaw ka lo tia, mahse maw nangmah hi i lo ni zawk tih hi ka hrechhuak a ni" a thaw hak a,."Lo ngaihtuah ve rawh aw vawikhat tal, ka beisei sang ngam miah lo, mahse min huat phah nan leh min kawm duh loh phah nan hmang lo hram ang che" a ti a. A haw ve ta a..Mut pahin Atea thusawite chu ka ngaihtuah let neuh neuh a, in thianthatna bak keimah ah chuan aawm lo. Mahse engtinnge thiam taka ka chhan ang tih ka ngaihtuah a, hriatthiam a harsa takzet a ni. Kawng lehkamah ka thian ni mahse khawvela ka rin ber leh ka thuruk engkim hretu a ni a, a ni tluka min hrerhiam leh min dawhtheitu hi an awm chuang in ka ring lo. Ka vei ruk ve em em Zomuana lah chu ka beisei phak ah ka dah lova, kei ve tehlul hi min ngaihven ve der si lo. 

.

Hun a kal ve zel a, October thla kan chuangkai ve ta der mai, dawr thil buaipuiin ka zin kual nasa em em a, inah ka awm hman mang lo a ni ber. Atea nen pawh kan la inkawm reng a, mahse min hlat ta riau in kahria a, kei chuan ka en dan ala dang chuang lo. Ka thian a ni a, a ni reng bawk dawn a ni. Kan pahnih chungchang chu a sawi tawh ngai hauh lova, keipawh chuan ka lo ngaihtuah zui tawh hran lo. Nupuii nen an inkawp leh tawh tih kan thian dangte ka atangin ka hria a, ka bulah erawh engmah a sawi lova, hria ang pawhin ka awm duh bik lo. Zomuana nen chuan kan inhmuh nikhua in kan inbe ve ta zeuh zeuh a, vengkhat kan nih avang hian inhmuh hlawl hlawl chang kan ngah a, a nui hmel ka hmu ngai lo. Nikhat ka dawr nghak chu a rawn lang tehmial a, hruai a rawn neih leh ring in a hnunglam chu ka lo melh vat a, ka rilru hria ni awm takin a nui suk a,."Vawiin chu keimah chauh in" a ti a, ka lo nui ve mai a,."Naktuk hi ka nu piancham a nia, kawr leisak ka duh deuh a, min thlan pui thiam deuhin ka ring a" a han ti leh a. A duhzawng tur nia a rin chu kan enkual a, a tawpah ka thlansak chu a la ta a.."Chawhnu chhuakah thawn ka duh a, ka kal leh mai ang" a ti a, kal tum chuan a han ding hluai a, chutih lai tak chuan Atea chu a rawn lut ve chiah a, an han in be luam a, a kal ta a. Atea chuan pawisa puk min rawn dil a, kan pahnih tan chu chu thil thar a nilo, cheng 500 ka lo pea, hmanhmawh angreng takin a chhuak lehnghal a. Kawngkhar a pel tep tih ah chuan a lo kir leh a, 

.

"Tluang, bike racing naah ka tel ve dawn a, duhsakna min hlan ve la" a ti a, a tui na ber pakhat a ni ve reng reng a, vawi tam tak ti tawh lo turin kan hrilh a, thu erawh a awih chuang lo.

.

"Tel tawh lo turin kan ti si che a, engahnge i tel leh thin, i chesual ang tih ka hlau thin emai" ka lo ti a. Mhni inrintawk hmel takin a nui a, ka phone a la a,."Thla la dun ang, i lo en anga ka chak mai ang" a ti a, min kuah a, a hmet mawlh mawlha, ka biangah a fawp zeuh a, engmah sawi lovin a chhuak zui nghal a. A awmdan chuan ka ngaih a ti tha lo ru hle a, hriatthiam chiah si loh hian ka hlauthawng a ni. Min dawrtu an rawn awm neuh neuh a, ka rilru pawh chu an la peng ta vat a. Inkjawm zan anih avangin dawr khar hma tumin ka inbuatsaih meka, ka fon chu a rawn ri ta ral ral a, kan thianpa Sawma a lo ni a,."Tluangte, Atea a accident, hei a na angreng khawp mai, a chhungte kan be tlang thei lo, lo biak tum ve la Pu Khuma mual ah kan awm" a ti a, fon pawh a dah leh nghal a. Ka ding khur zawih zawih a, ka hlauh ruk thin chu a lo thleng ngei a ni. Ka in thing harh a,motir ah lut in a chak thei ang berin Pu Khuma mual chu ka pan a, midang fon nachang oawh ka hre tawh lo, ka nu but a ni ber! Ka thlen chuan mi an lo pungkhawm hnem hle tawh a, Atea hmel chu ka zawng a, ka hmu mai lo, Sawma chuan min lo ko vat a, ."Sawma khawnge Atea chu? Engtinnge tuna a awm?" Hlauhthawng zet chuan ka han ti a,."Police leh medical lam an lokal mek a, kan khawih che ngam lo, na ati lutuk a a lu vel" hmui khur hlak hlak chuan a ti a. .Reiloteah police an rawn thleng a, ambulance a rawn thleng zui nghal bawk a. Truck khalhtu wrong side a rawn tlan chu mipuiin an lo man a, police kutah chuan an hlan nghal a. Zomuana pawh thil thleng zawtfiah in a buai hle a, medical team ten Atea chu motor a hlan theih turin an lo buaipui mawlh mawlh bawk a, a bula chuan ka ding a, ka en ngawih ngawih a, kan dawr a alo kalna pawh ala rei lo tehlul nen tunah hetiang hian a awm chu a ni si a, mak ka ti a ni. A hmel hmuh tumin ka kal hnai a, ka khur zawih zawih a, ka dara min vuantu chu tunge tih hriat tuma ka en chuan Zomuana alo ni, ka motor chahbi chu a la a, ngawi rengin min kai a, aman ka motor chu a khalh a, ambulance hnungah zel chuan kan tlan a. Damdawiin chu nidang dang zawng aiin a hla ka ti a, ka kut te chu a thlan hluam tawh. Kan thlen chuan rang takin ka chhuk a, U Terina leh a nu chu ka va hmu nghal vat a, kan hlauthawng tlang tih kan hmelah chuan a lang. Ngawi rengin chanchin kan ngaichang a, tumah inhnem tur chuang kan awm lo. Chanchin hriain nula leh tlangval engemawzat an rawn kalkhawm a, pawnah an ding thup a, ka nu leh pa pawh an lo thleng a, Atea nu bulah an awm chawt a. Mi awm lohna hmunah ka kal a, ka rilru in ka tawngtai mawlh mawlh a, tun tum ang renga Pathian ka dawr thuk hi a la awm ka ring lo. U Terina'n min rawn zawng a, min hmuh chuan rang takin ICU lam kan pan a, kawngkhar ka hawng tur chiah chu tap ri ka hria a, ka mit sulh a, engmah ka hre lo zui nghal a..Ka harh chhuah chuan damdawiin khum ah ka mu a, ka bulah Zomuana chu rilru hah hmel zetin a lo thu a, ka mumang emaw ka tih chu a tak ngeia thleng mek a ni tih ka hre nghal bawk a, khum atang ka tho chhuak a,."Atea kha...." ka sawi zawm thei tawh lo, ka mittui atla zawih zawih a, Zomuana chuan min lo kuah vat a, a awmah hmai phumin ka tap ta zawih zawih a..Ruang ka kil lai pawh chu mumang ang riai hian ka hria a, ka thiantha ber, min hmangaihtu chu kumkhua atan ka thlah liam mek a ni si a. A damlai khan a hlutzia ka hrechhuak zo lo a, tunah zawng ka nunah hian a lo pawimawhzia ka hre chho dawn chauh a ni. Thlan atanga kan haw hnuah chuan an in lam kan pan leh a, Nupuii chuan min rawn umpha a, mahni ka lo inngaihtuah nasat luat ah Nupuii lam reng reng ka lo hrechang tawh lo. ."Tluangte, i thianpa hian a thi tur hi a lo hre lawk ni maiin ka hria, nimin tlai khan a lokal a, kalaptop a engengemaw a khawih a, a zawh veleh Tluangtei ka tlawh dawn atia, arawn chhuak nghal a, ka laptop ah chuan a pendrive a vuah chu a la lo tih a hnuah ka hmu chauh a ni. Tum vang pawh ni em em lovin ka hawng a, i kawl tur niin ka hria" tih pahin pendrive chu min pe a. Zanah chuan hun ka neih loh avangin ka thil kawl pawh chu ka phawrh chhuak lo. Ka muhil lai ka harh hlawl a, ka mumangah Atea ka lo hmu nasa em em a, ka than harh pawh chuan ka bulah awm ang maiin ka hria a,

 .

"Ate.... Ate..." tiin ka au chhuak chul a, mahse kan hnenah a awm ve tawh lo tih chu ka hrechhuak chawpchilh ta nghal a. Beidawng takin ka thu a, Nupuii thil min pek kha ka hrechhuak zawk a, ka laptop ka la a, pendrive ah chuan engthilnge awm tih hriat tumin ka han hawng a, folder pakhat "Darla" tih chu ka hawng vat a, fiamthua min koh hlut dan ani reng a ni. Kan thlalak hlimawm taktak chu video in a lo siam a, ka birthday kan lawm zan a kan cake in barh uang tak tak a kan lak te, hun hlimawm ber ber kan hman dun te chu a awm a, ka mittui atla zawih zawih a, aw! na hi ka va han ti tehreng em! Atawp a kan thlalak pakhat caption a a hman mawlh chuan min ti tap tam a,

.

"Ka thiantha ber leh ka hmangaih em em Tluangte, hlim reng rawh aw. A theih chhung chu ka venghim tlat dawn che a ni, nang aiin khawvel hi ka lo chhuahsan hmasa anih pawhin thlarau khawvel atangin nangmah venghimtu vantirhkoh ka ni reng ang" tiin..Ka tho a, mut reng a chhuak lo, ka room tukverh chu ka hawng a, vana arsi lo phe uar chu ka thlir reng a,."Lalpa ka thianpa kha ka hmangaih ani tih hi lo hriattir ve rawh aw" tiin ka phun sap a. .Atea thih atangin thla khat a liam tawh a, amah kan ngaihna leh kan rikru natna chuan ziaawm lam pan a hnekin a zual emaw tih mai tur a ni. An inah ka lang tam hle a, ka lan loh deuh chuan U Terina'n min rawn lam vat thin. Nilai zan ani a, ka taksa a chauh deuh avangin inah ka awm a, rin loh takin Zomuana alo leng lut hlawl a, Atea thih atang khan mumal takin kan la inhmu lo a tih theih awm e. Tv kan en dun a, lainat hmel takin min melh leh zauh thin.."Tluangte, hnem vak dan che pawh ka thiam lo, a hun lai ania, i tah a chhuah pawhin in sum reng reng suh" a ti a. .Chutiang hnemna chuan ka rilru a ti no thin, ka kut chu a la a, nghet zetin a hmer a, ka mittui a tlak loh nan ka in sangmar teuh thung a!."Atea kha ka thiantha ber a ni a, a ni aia rin ngam tur kha khawvelah hian thian dang ka nei lo. Ka tan a hlu em em a, ka harsat lai leh manganlai in ka kiangah a awm a, min hnem a, min fuih thin. Mahse a thih dawn darkarah pawh a kiangah ka awm ve thei silo, hei hian ka rilru ati na em a ni" ka ti a. Ka mittui chu a luang ngiai a, a kut in a hru a,

.

"Ka hrethiam lutuk che alawm, i tan a hlut tur zia pawh, mahse nangmah hmangaihtute i chan vek lo tih hrereng la, i tan kan awm reng a ni tih pawh hrereng ang che" a ti a. Ka han melh a, min lo en reng a, engvanga a kiangah hian thlamuang viau nge ka nih ka hre lo. Ka hriatchhun erawh chu ka rilru natlai bera ka kianga awm tlat kha a ni tih hi..Chumi zan atang phei chuan Zomuana chuan min thlahthlam lo lehzual a, rawn len a hman loh pawhin fon in min rawn be tawk tawk thin. Zankhat a rawn leng chu thil ho mai mai kan sawi a, Atea thih hnua ka nuih leh hmasak ber a ni ang,."Nuih dan pawh i theihnghilh zo ta emaw kan ti mai dawn alawm, i nuih khan i hmeltha lutuk" a ti a.

.

Ni e mahni tawka lu zo ve tak, hlim tak thin khan nui hmel pu lovin reitak ka lo awm tawh tih ka hrechhuak a, 

.

"Tluangte, hmeichhe kawlh tak leh nasa tak nia ka lo ngai che kha ka tihsualzia nitinin ka hriatbelh anih hi" amah vek chuan a ti a. Engdanga chhang lo chuan ka nui suk chauh a, ."Nui ringawt suh. Ka hmuh hmasak ber che khan huat che ka tum nghal ringawt asin" ati leha.."Kei chuan ka tum pawh nilovin ka haw takzet che asin, i chapo hmel si, thinchhe ropui si" ka lo ti vat a. Za lo zet in a nui hak a,."Ka motor ke i pet phei kha chuan i nasa ka ti lutuk" a ti a.

.

"Anih chuan engvanginnge min rawn hnaih si?" Hmeichhe rilru takin ka zawt phawng a,

.

"A chhan chu mi nunnem tak i nih vangin" ati leh ang lawi a,."Tluangte, ka rilru dik tak hi sawi a hun em ka hre chiah lo. A tira ka ngaihdan che leh ka rilru chu i hriat tawh kha, ka ngainat chi i ni lova, tin ka mit la chi i ni lo bawk. Mahse Terina te ina ka hmuh che a Atea nen inpawh hmel taka in awm ka hmuh chiah khan ka rilruah thikna alo awm ve tawp a, ka duh lo hle nghe nghe." A ngawi ta daih a.."Chuan...?" Ka lo ti a, min en a, a then sak a,."I ngaithla zel duh dawn em ni?" A tih chuan ka lo bu nghat a,."In inngaizawng emaw ka tih cheu avangin a rukin ka na hle ringawt. Mipa in ti pa ve tawk tak ka nih avangin chutianga ka awm chu tlawm ka in ti hle bawk. Mahse ka hriat loh chhungin ka lo ngaihven leh viau thin che a, Atea accident tlai khan inngaizawng ni lovin thian in ni tih ka hrechhuak ta bawk a" a ti a, a chil a lem khalh a,."Ka lawmzia leh Atea avanga ka rilru hahna kha a inzat vel hial ang" a ti a.

.

A sawi tum chu hre riai mah ila a tak ni turin ka la ngai ngam lo ani ber,

.

"I thiantha ber i sun laia i laka ka rilru lo phawrh chhuah tum ve chhen erawh ka insum hrama, ka insum tluan thei ta lo a nih hi. Tluangte ka duh takzet che ani" a ti ta a..Makti leh awih loh hmel takin ka melh a, mitmeng de sawrin min lo melh a,."Zomuan, i ti taktak em?" Amah pawh melh ngam lo chuan ka ti a, a mitah tak en turin min ti a, zam ru takin ka en a,."Tun ang reng hian ka la thutak ngai lo asin" a ti a, ."I sawi anga hmeichhe tha tak hi ka ni lo asin" ka tih chuan ka hmui a rawn hup vat a,."Ka laka i rilru dik tak min hrilh ve la, chu chu ka duh chu a ni" ati a.."Zomuan.... keipawhin ka duh che alawm" ka ti sap a.."Tluangte, ka lawm e, hlim takin i awm ang tih hi ka beisei tlat a ni" a ti a, a kut pahnih chuan ka biangah dawm ka hmui khur der der ah chuan arawn fawp ta vawng vawng a..Ka nun ah mipa pakhat chauh ka ring thin a, chu chu ka thiantha ber a ni a,mahse khawvelah a awmve tawh lo. Tunah chuan nghen chhan tur dang ka tan an lo lang leh a, engtiang chiah in nge ka tan a rintlak anga, ka tan a hlut ang tih chu hun in ala hril ve zel ang chu..Nitin dawr lamah ka buai a, ka nau Mama chuan a college kal loh changin min pui a, ka pa chu kan awl ve thei tawh a ni. Amaherawhchu kan pian hma atanga sumdawng a nih avangin kan tluk lo em em a, sumdawnna kalhmang hriat loh tam tak kan nei a, atawpna chu ama hnenah vek kan thlen thung. Zomuana nen kan inkar boruak pawh a tha zel a, kan inah a rawn chuangkai fova, ka nu leh pate nen pawhan innel ve viau tawh. .Zana ka mu hi a chang chuan ka harh chhuak hlawl a,engkim hi ka mumang ang vek te hian ka hria a, Atea pawh ala dam niin ka hre thin. Chung mangchhia ka tih mai te chuan thlakhat dawn min tibuai a, a ruk tak chuan in entir mai pawh ka duh hial a. Zomuana bulah phei chuan ka sawi nghe nghe a, ngaihthatlohna tur a awm loh thu leh a reh veleh maia a rin thu min hrilh a. Keipawhin ka sawi duh ta lem lo. U Terina nupui nei tur mawlh chu lawmna lam mah nise hrehawm kan ti a, mo neih chak ber leh phur ber thin a awm ve ta si lo. Zomuana pawh mopa a dinpui dawn avangin inneihna tur thil buaipuiin a hun a hmang tam hle a, an hak tur engkim chu ka kutah an dah a, Atea lo dream thin ang in nectie pawl anawrh anga, mipa lam chuan rawng pawl an ha vek bawk dawn a ni. Chutiang ka sawichhuah leh karelpui lai te chuan ka thinlungin Atea a zawng a, beiseina beidawnthlak atan chauh pawh a hmel hmuh in beiseiin ka hawi kual leh ruai thin! .Hun chelhdin loh ni ta chu U Terina te inneih ni pawh alo thleng ve ta reng a, coat suit nena Zomuana a han in duang zar chu mit a tlai ngei mai. Tleirawl te te chuan an en duh fal hle a, an phun leh sap thin. Uluk takin ka en a, keipawh hian ka chhuang ngawih ngawih a ni. Inneih programme te kan hman zawh chuan thla kan la a, Zomuana nen pawh uluk em em in kan la dun mawlh mawlh a, kan thla lak lai te chuan hmeichhe tleirawl leh an nau zawk te chuan min rawn hnaih tiau hlawm a, min en rawn a ni ber. Mipa hian engtinnge a duh zawk tih melh hian min melh in k hre tlat pek a!.Ka rilru hria ni mai awm tak hian ka kut ala a, a kawngah min vawn tir a, ka darah akut pahnih a nghata, thla chu a han lak tir leh a. Min nuih sak a, uar fe hian min han siai zui nghal a, ka lai leh pek hle. Zan lamah chuan engkim tihfel hnuah haw tumin keinipawh kan in siam a, pawn kan thlen chuan UTerina'n min rawn ko let leh a, midang chu an haw vek tawh. Atea room atang a nu chu a rawn tap chhuak a, bawm lian lutuk lo hi a rawn lek chhuak bawk a,

.

"Atea khan ka nupui man tur hi cheng 10 thir hlir alo khawl thin a, kan bungrua vel singsakna lamah hei Zuali(a nupui) hian arawn haichhuak hlawl a, chhungkua chauh in hmuh ai chuan tiin ka ko let leh che u a ni" U Terina chuan a han ti a..Zomuana chuan chu bawm chu a han ban a, tala tereuh te inainkalh a, a chahbi erawh a in vuah tel thung. Lehkha chu a la chhuak a, ka va bih pui ve a, a u nupui man atana akhawl anih thu te chu a lo ziak lang a, kan vai chuan kan tap a, Zomuana takngial pawh a mittui a parawl ve kuang a. Kan hawn kawng tluanin kan tawng lo, kan rilrua awm erawh a in ang viau in ka ring. Kan kawt kan thleng a, ngawi renga kal ka tum a, rang takin a rawn chhuak vat a, ka banah chelhin,

.

"Tui deuhin mu rawh aw" a ti a..A mitmeng chu ka chhiar thiam lo, na hmel ka hmu tel tlatun ka in hria, ka lu ka bu nghat a, min pawm ta vawng vawng a..Ka mut hmunah ka ngaihtuah a, ka thianpa chu a thi tawh a, engmah tih danglam theih a ni tawh lo. Mahse keini la dam zawkte hian hmabak hlen tur kan la nei a, lungngai reng tur kan ni lo tih te ka rilru ah a awm a. Mahse Atea kha zawng mi danglam bik a ni tlat a, ka nunah sulhnu a hnutchhiah hnem a, chuti mai chuan ka tawrhna hi a tawp thei lo a ni. Zomuana tana hrehawm turin ka awm ang tih erawh ka hlau a, min hrethiam viau mahse a ruk tak chuan keipawh ka inthlahrung a ni. .Ni a liam a, kar a ral a, thla a vei ve zel a, Zomuana pawh training turin Delhi lamah a liamthlakatul a, thla thum chauh ni mahse kan tan chuan a rei mah mah a ni. Akal hma zan chuan a lo leng a, a awm loh chhunga ka mal tur zia te ka ngaihtuah a, ka tah a chhuak hle. Duat takin min kuah a, a kiangah hi chuan ka thla pawh a muang thin hle reng a ni.."Ka lo haw hunah chuan inneih ngei ka duh tawh dawnania, i rilru lo inbuatsaih ang che aw" a ti a.

.

"Nghakhlel takin i lo haw hun tur ka lo thlir thin dawna, beidawng chuan min siam em lo ang chu maw" ka han ti let a.."Ka ta i nih loh chuan tu ta mah i ni bik lovang, Tluangte... ka hmangaih takzet a ni. Hrehawm lo ti reng reng suh aw, hlim takin kan awm tlang vat ang" a ti a. Ka sam chu a chul heuh heuh a. 

.

"Ka ngai dawn lutuk che" ka ti a, ka mittui chu ka khap per sak a,

.

"Keipawhin ka ngai dawn lutuk che" a ti a, kan in kuah rial a, chu zan reh leh vawt tak hnuaiah chuan lungchim takin kan in fawp vawng vawng a..Khawhar ru em em in hun ka hmang chho a, ka thian kawm thin te a then nuoui an nei a, hmundanga hnathawka awm te an ni bawk nen, Atea thih hnu chuan thian kawm tur mumal pawh ka nei tawh lo. Zomuana nen erawh nitin kan inbia a, kan hun hman dan te kan inhrilh tawn thin. Ka nau Mama thianpa Lawma hi kan inah a rawn leng lut fova, min rawn nel ve em avang hian keipawhin ka lo nel vat a. Thian ka nei lo bawk nen kan inkawm ve ta fo a, a rilru a puitling a, naupang zawk mahse kan inkawm tawk hle. Chutiang chuan khawhar lutuk lovin ka awm ve a, Zomuana pawh ka hrilh a, a lawm ve hle nghe nghe..Nikhat chu kan dawr ah Lawma chu a rawn leng lut a, in lamah rawn leng fo mahse dawrah chuan vawikhat a rawn kal na a ni. Lawma hi mipa fel tak ani reuh a, sawi tawh ang khan a kum a la naupan ang ai hian a puitling a, ka nau ai mah hian kan inkawm rual zawk a tih theih awm e. Khua a that vak loh avangin mi vei vak an tam lo hle a, ka hritlang bawk nen dawr khar mai ka lo tum lai tak a ni. Zomuana nen kan inbiak zawh hlim a ni a, haw mai ka tum thu ka hrilh a, mahse Lawma a lokal leh tak avangin ka la inkhar thei lova. Engengemaw sawiin kan titi luam a, a kha tawkin min rawn melh leh ralh thin. Chu erawh ka hai der lui tlat thung. Mihringte hian engemaw hriatna riau kan nei thin a, keipawhin nau ang leh thian anga ka en Lawma awmdan chu ka man thiam vat a. Chumi ni atang phei chuan a rawn kal tam in rei min rial lo a ni ber. A awmdan a dang tak deuh avang chuan tlemin hlat hret hret ka tum a, mahse thil awlsam tak chu a ni lo. Ka awm loh pawhin ka nau nen an inkawm avangin a leng tho a, pumpelh ka tum nasat leh a rawn in lar hnem emaw tih mai tur a ni..Zomuana awm loh atang thla hnih a liam tawh a, hunawl apianga inbia kan ni bawk a, kan hun hman dan pawh kan in hriatchian sak hle. A rawn haw a hnai tawh bawk a, hlim taka inhmuh hlan mawlh chu ka nghakhlel tawh a. Mahse mak tak maiin vawilehkhatah a awmdan chu a in thlak a, biak pawhin a buai chhuanlamin rei kan inbe hman ngai lo. Ngaihthat lohna leh hlauhthawnna em em ka nei lova, an training a zawh dawn tawh vang niin ka ngai tawp mai a ni. Mahse ka biak loh chuan min biak a tum ta reng reng lova, ka biak pawhin pickup loh chang a nei ta fo a, ngaihthat lohna chuan min rawn tuam vat a, ka tana rinawm lo turin ka ring phal lova, mahse a awmdan avang chuan thla a muang chuang hauh si lo. Zankhat chu biak tum in ka call a, vawihnih lai a ring quit a, a hnu minute 10 velah a rawn call back a, chuta a thusawi chuan min ti na kher mai,

.

"Kan inbiak tawh loh hi a tha in ka hria, i kawng chu zawh la, keipawhin khawdang hawi lovin ka hma chiah ka en ang" tiin.

.

Ka hrethiam lova, a hrilhfiahna ka phut a, mahse eng chhanna mah min pe thei lo.

.

I KIANGAH CHUAN PART-III-V

.

Ka chunga thil thleng te hi engmah hriatthiam ka nei lova, a mak tih mai loh chu! Hun reilote chhung lek pawh ka tan a rinawm thei lo chu a mak ka ti takzet a ni. Ka innghahna an tliak zel hi a mak lehzual ka ti. Lawma chuan ka awmdan chu a lo man vat a, min zawt thin a, mahse engmah ka sawi ngai lo. Tu bulah mah sawi ka duh lova, mahnia tuar chhuah chu ka tum ve tawp a ni. Full moon zan a ni a, ka nau te nen kan pathum in kan in chungah kan zai a, ka mitthlaah Atea a lo lang a, a ni chu awm se tuna ka lungngaihna zawng zawng pawh hi ka hrilh leh vek anga, rilru dam takin min siam leh ngei in ka ring a ni. Lawma pawh zan dang ang bawkin alo lang a, a rawn thlen hnu rei vak lo ah inhnuai lamah ka chhuksan a. Reiloteah an ni pawh an rawn chhuk ve mai a, thingpuite ka lum a, kan in ho a, Lawma chuan fiamthu a thawh a, kan ri leh dar dar thin. Ka inleng deuh bik ah an dah tawh avang hian ka chhungte chuan min mutsan diak a. Kan pahnih chauh in tv kan en a, zan dang ang lo takin a ngawichawi riau a, keipawhin sawi tur ka hre bik lo.."Tluangte, engmah hrilh takah min ngai lo mah la i awmdan hi ka hai bik lo, rilru natna i nei tih ka hria, ka bulah tal hi chuan sawi la i thawl hawk ang ka ring" mi pawh melh chuang lo chuan a han ti a.."A ni khawp mai, mahse Lawma sawi chhuah tlak lawh a ni lo atin ni" ka ti a,

.

"Tluangte, i laka ka rilru put dan chu dah tha la, hai vek rawh. Keipawh ka in control nasa a, ka paltlang ve mai ang. Mahse i thiantha tak, i innghahna tlak nih hi ka duh a ni" a ti a.

.

"Tu chungah mah innghah hi ka tum tawh lo, min kalsan zel a, ka ngam tawh lo a ni" thaw hak chuan ka ti a, chiang takin min melh a, a mitmeng lian mawi kel kawl taka min melh hi chuan a zam awm riau thin.."Ka hrethiam che alawm" hul hak chuan a ti a, tv lam a melh leh ran tawh a.."Phatsan nih hi a hrehawmzia i la hre ve kher lo maithei, tu emaw i beiseina leh i innghahna khan kalsan che sela, a chhan pawh awm lo lehnghal in, i na ve viau in ka ring. Chu chu tuna ka hun tawn mek chu a ni mai" ka han ti veleh hnuhnawh a..Engdanga min chhang lo chuan a ding hluai a,."Ka va haw tawh ange, naktuk zanah ka lokal leh dawn nia" a ti a..Pawn thleng ka thlah a,."Tluangte engmah hi kan tuar theih loh tur thil kan chungah a lo thleng ngai lo ania. I chakna haichhuah in a awm ngei ang tih ka ring a, chuan i lamah ka tang reng bawk ania" a ti a. Kan in mangtha hnu chuan a kal a, a kal liam thlengin ka thlir a. Chutiang zawng chuan ka lo mgaihtuah ngai hauh lo..Ka hun tam zawk dawr lamah ka hmang a, Zomuana pawh a rawn haw tawh tih ka hriaa, hmuh erawh ka la hmu lo. Hmu miah lo ila ka duh a, mahse ka pumpelh reng theih erawh ka in ring lo. Zawhna tam tak ka pai te hi a hmaah chhawpchhuah a, hmaichhanah ngei chhanna min oek hi ka duh a, na dawn mahse hriat ka duh a ni. Hun tha erawh ka hmu lawk lova, a rawn haw atanga thla khat hnuah ka hmu ve thei ta chauh a. Atea birthday alo thlen ni chuan an inah chaw kilho ila an tih avangin kan chhungkua in min sawm a, dawr ka nghah avangin ka chhungte rual pawhin ka kal ve lo. Nidang ai chuan ka in khar hmaa, Atea te in ka pan nghal a. An kawtah chuan gypsy ka hriatchian em em pawh a ding vang a, Zomuana pawh a tel ve tih chu tu hrilh mah ka ngai lo. Hmuh duh hle mah ila tuna kan boruak nen erawh a chakawm lova, pumpelh theih chu ka duh mah zawk. Inchhung ka va luh chuan ka nu te nen an lo titi mawlh mawlh a, kan boruak chu chiangkuangin ka chhungte pawhin an hre lova, mahse engemaw ti chuan an hre thawi in ka ring. .Choka lamah ka awm daih a, U Terina nupui Zuali nen chuan thil tih tul amg chu kan ti dun mawlh mawlh a, tawng duh ve tak mai ani reuh a, a bula awm chu a nuam hle a ni. Atea chanchin kan sawi a, ka ngaih zia ka sawi lai chuan Zomuana chu a rawn lut phei ve a, Zuali chuan a lo be nghal bawrh bawrh a. Kei erawh tawngthei lo ang maiin ka ngawi reng a, an thusawi pawh hriat mumal ka nei lo. Chawdi kan ei kham hnu chuan rei vak lo kan thukhawm leh a, ka pa committee a ngaih avangin kan chhungkua erawh haw mai kan tum a. Atea nu chuan Zomuana rual a haw mai tur chuan min ti leh ta tlat a, hnial tura ka duh em em in a hnial ta mang silo. Rilru bet lo zetin ka awm ve ta a, Atea room ah ka kal a, a birthday a ka present ho chu ka en a, uluk takin a dahkhawm a, a bialnu thilpek a dah that ngai loh laiin ka thilpek erawh a roh em em thin. Ka in rin hma in ka mittui a rawn baw zawih a,

.

"Ate, thlarau khawvel atang pawhin ka veng reng ang che i tih kha, i thiannu hi ka na asin" ka ti sap a. Ka mittui chu ka hru a, Zomuana a haw duh tawh ka rin avangin ka chhuak a. Atea nu chuan min pawm vawng vawng a, engmah sawi lo mah ila kan thinlung erawh a inpawh a, kan na dun a ni. Kan haw kawng chu a thui ngei mai, Atea puala hun kan an ni ah chuan engmah buaina dang chu ka duh belh lova, pawn lam hawiin ka rilru ka kawm melh melh a. Kan in kawt kan thlen chuan nawi rengin ka chhuk a, Zomuana chuan min zui tih reng ka hre lo. Gate ka vuan chiah chu min kuai her lawp a,."Enteh, in thiam lohna pakhatmah hi i nei lo em ni?" A ti chang fak a, a ngaihna hre lovin ka hawi hu a,

.

"I mitmeng pawisawi lo hmel zet phena thinlung bawlhhlawh in phum ru kha ka haw ngawih ngawih" a sehchilh nawk nawk a,."Zomuan min thlah rawh a na ania, i thusawi chu ka hre lo" ka ti a,."Ni e ni e, ka khawih lovang che ka ti tak asin" min thlah a, ."Mahni hi kan in hrechiang ber alawm tiraw? Ha.... nang zawng i lo ropui ber e" tiel zet in a nui vel a.."Zomuan i thusawi hi ka hriatthiam theih nan min hrilhfiah hi ka phut a ni" ka ti a, ka thinrim chu ka khur hlak hlak a.

.

"Eng hrilhfiahna mah ka pe lo ang che, minpe zawk tur i ni asin. Mahse vawiin thlengin mi thianghlim ber an maiin i la leng a, tu rilru tak ti na ang che maw! Atea pawh kha hetiang ka tawn ang hi a tawng ve lo ang tih a hriat hleinem, a hmangaihzia che lah ka hria a, a rilru na in khatiang khan... " a hmai ah ka eng thuai a, rapthlak tih hmel zetin min melh a, ka in sum zo lo a ni.."Ngawi tawh rawh, tenawm pa, vawikhatmah ka hmaah raan in lan leh tawh suh" tih leh inchhung luh ka rual a, ka khumah ka bawk thlawp a. Ka mittui chu a luang zawih zawih a, Zomuana min puh na zozai kha ka tuar thei lo a ni..Ka mu tak na a, chhin khat te pash ka chhing lo. A rinawm lo zawkin thuam lohna zawng zawng min pumbilh tur chu ka hrethiam thei lo a ni. Zingah pawh chuan ka tho chhuak peih lo a, ka nawmsam loh chhuanlam in dawr pawh ka nghak peih lo a. Ka room chu ka chhuahsan lo, zan hmasa lama thil thleng chu ka ngaihtuah reng a. Eng thil sual nge chuti khawpa tenawm min ti tura ka lo tihsual chu ni ta ang? Ka nunah hian rinawmna ka ngaipawimawh em em a, chutih laia ka nihna ni miahlo a min puh chu ka thin a rim em a ni. Zanah pawh chuan ka tho chhuak peih lo a, Lawma raan kal pawh chu ka lo kawm peih lo. A haw hnuah whatsapp ah min rawn bia a, min ngaihtuah hle a, heti khawpa ka chunga tha leh ka thiantha nih duh em em chu a lakah ka ngawhngawl duh ta bik lo. Zomuana nena kan inhmuh dan leh kan thil sawi te chu ka hrilh a, a mi puhna hre hman lova ka in sum hman ta lo chu pawi a ti hle a, mahse kei erawh chuan second khat chauh pawh a thusawi kha ka ngaithla thei tawh lo a ni..PART IV.Ka nitin hun hman dan ngaiin ka hmang a,mahse thinlunga hliam na tak pai chungin a ni tawh thung. Zomuana hliam min siam sak hi a na em a, chuti maia dam thei pawh ka ni lo. Ka mumang thlengin min ti buai fo a, mi tenawm tak ka ni tih chu ka bengah hian a rawn ri nawn fo thin. Inhmuh nikhua pawhin in hre ngai lo ang hmakin kan awm thin a, a hmela mi tenawm anga min ngaihna lo lang chhuak thin hi na ka ti a ni. Zankhat ka hla zir zo ka haw chu kan in bulah Zomuana ka hmu hlawl a, motor chhungah a thu a, hmuh loh der chu ka tum na a min hmuh veleh a rawn chhuak a, kaltlang ka tum a, ."Hey...." pawr zet hian a ti a. Zu rim nam hak chu ka hrua a, mak ka ti hle. Vawikhatmah zu a in ka la hre ngai lova, a driver ngei pawhin a in a la hre lo.

.

"Hla chu i zir ve tak tak meuh em ang chu maw?" A ring chu a an san deuh ak a, ."Enteh Zomuan,ka hmaah rawn in lan tawh suh ka tih kha, i rilru tenawm zet ang kha pu ve turin min mgai suh" ka ti a.

.

"Wow..! Ava ropui ve.. Nang ai mah hian huat che hi ka duh ang, huat ngawih ngawih che a hmuh tawh miah loh che hi ka duh asin" a motor ke chu a han pet a,

.

"Mahse engvanginnge nang kher hi ka lo hmangaih che a, hetiang hmeichhia kher hi ka lo tawn che" a tukhum chu a han dawm vang vang a,."Enge ka tenawm na leh ka tih dik loh chu chiang takin min hrilh ta che. Engmah sawi tur hre si lo hian khatianga min puh na dan kha i nei lo ania" ka ti a.."Hre lo zawk mai rawh, nge i hre lutuk zawk hi i inthiam lo ve deuh pawh hi ka hrethiam lo ve. I hlim chuan atawk mai zel e" tih leh a motor chhunga luh a rual a. Chak takin a tlan nghal a. A vawikhat na atan a mi puhna chu chiang taka hriat ka duh a ni. .Tlawm ah pawh ka la thei tawh lova, ka call a vawithum lai a ring quit a, a pickup lo. Engemaw keimah hian ka hriat loh thil lian tham tak inthup a awm ngei in ka ring ta tlat a. Han puhmawh tur erawh ka zawn ngial pawhin ka hre lo. Vawi tam tak biak ka tum a, mahse chumi zan aang chuan ka tana biak theih in a awm tawh ngai lo. U Terina chuan kan chanchin a lo hre thawi a, min rawn be vat a, thil aemzia ka hriat lohzia te ka lo hrilh a, engemaw tak hriat a tum tur thu a sawi a. Chumi kan inbiak atana ni thumna velah chuan min rawn be leh a, ."Tluangtei nen kan chungchang hi a tawp vek tawh. Sawi chhuah leh thar thawh hi a tulna ka hre tawh lo. Hlim takin awm sela, phuar tu a neih loh hi a tha zawk alawm" tiin alo hrilh a. A chiang tawk tawhin ka hria, kan in kar hi a tha thei tawh lova, a chat hmak tawh a ni tih hi.

.

Keipawhin hmalam ka pan chu a ngai tawh a, ka vanduaina te theihnghilhin hma thar ka lak a nhai ve dawn tawh a ni. Englaipawhin ka tana awm reng thin Lawma chuan min hnem a, min fuih a, ka la kal be thei hram hram a ni. Ka chhungte pawhin ka chanchin chu an hre vek tawh a, min khawngaih hle a. Ka rilru tih thawven nan zin turin min ti fo a, keipawhin ka hnial hran lo. Boruak thar hip te pawh chu a tha ka ti a, ka pu te khua chu tlawh ve ka rilruk ta a ni. Ka pu hi an bialah MLA te pawh lo ni tawh thin a, kan chhungkua nen chuan in zawmna nei lo awm tak kan ni. Politics kan buaipui loh em em laiin ka pu erawh chuan a tuichilh a, Pathian thu sawi ai chuan politician te nena politics chungchang sawi chu nuam a ti zawk a. Hei vang hian zin pawh ka peih lo thin. Mi in ren leh uikawm tak a ni a, mahse a tu hmuh hmasak ber ka nih avang hian min duat em em a, phai a ka awm lai pawhin ka account ah pawisa hi alo dah zung zung a, chutiang chuan ka tan hian engkim a phal a ni. Ka zin dawn tih a hriat phat atang ka room tur a lo buaipui tir ani awm a, a hnuah ka pi in min hrilh leh nghe nghe a. Ka ngaina ve telh telh bawk a ni..Ka putea te nen an awm ho a, ka unaute ho chu la naupang ve tak tak an nih avangin ka kawm rual anla awm lo. Ka pu Mama fa te erawh kan inkawm rual hlawm a, a fanu upa ber Matleii phei chu ka zin chhung ka pu te in lamah a rawn cheng ve a. Kan inkawp chawt a ni. Ka cham atanga karhnih a liam hnu chuan MLA in khua a rawn tlawh dawn an ti a, ka pu pawh a buaiin inah a awm hman meuh lo. Matleii pawh chu a tul ang buaipui turin a hruai zia a, kei erawh min ti ve ngai lo thung. Engang pawhin min tir sela ka kal dawn lo tih a hrechiang ve hle a ni. Tlai khat Matleii rawn haw chu zawhna mitmeng nen a lo haw a,."U Tluangte, vawiinah nangmah ang deuh mikhual a lokal ve asin. Nangmah emaw ka ti a, i rawn kal ve thut emaw ka tia, mahse nangmah i ni bawk silo" a ti niah niah a. Ka lo ngaih pawimaah vak loh avang chuan a lawm vak lo lehnghal.

.

In a awm reng ai chuan tiin ka pu Mama te ina len ka tum a, Hall bul lawka awm an ni a hall ah chuan function an hmang mek a, an ri deuh nak nak a. Ka kal pelh dawn lai chuan hmeichhe pakhat hi dawr atang a rawn chhuak a, ka hmu chiah chu ka ding ta reng a. Ani pawh min hmuh chuan mak tih hmel takina ding a, kan in en ta reng a, Matleii thusawi chu ka hrechhuak zawk a. Kan lo in ang tak hle mai ka ti rilru a, ka kal ta a. Ka ngaihtuahnaah chuan a cham zui reng a, hetiang tak hian mihring hi a lo in an theih em ni tiin ka ngaihtuah a, a hmui chung dinglam sira khuavang awm erawh ka neih ve loh thil a ni. Tlaiah chuan ka pi bulah a thuphungin ka sawi a, a lo bengkhawn viau a, ka pu hnenah pawh a sawilai ka hre nghe nghe. Kan chhungte ni se chuan kan inhria anga, kan inah pawh hian a rawn kal ngeiin ka ring a, mahse ka pi leh pu chuan an sawi chhuah tak loh avangin keipawh ka ngawi liam ve ta mai mai a ni..Thla khat dawn ka cham hnuah chuan haw zai ka rel ve ta a, ka pu chuan la phal lo mahse ka pa ka khawngaih tawh avangin ka tum lui ta tho a. Ka haw dawn tukah chuan ka pi in counter thleng min thlah a,."Mamte hun kal tawha i pu thiltih sual zawng zawngte hi theihnghilhsak vek hram ang che aw, i hriat loh tam tak pawh ala awm a, hun hian ala rawn hai lang anih pawhin ngaidam hram ang che" a ti a.

.

A thusawi awmzia chu ka man lem lova, ka aw liam ve ta mai mai a. Kan kal chhuak dawn ta, ka pi chuan min kuah vawng vawng a, kan in mangtha a, keinipawh kan kal liam ta. Kawngtluanin ka muthlu a, mumang mak deuh ka lo nei a, ka pu te khuaa keimah ang tak ka hmuh nu kha chiang takin ka lo hmu a, min lo en reng a, a hmel ah chuan tanpui ngai nawih ngawih hmel hian ka lo hmu a, ka harh hlawl a, mak ka ti ngei mai. Darkar riat dawn kan tlan hnu chuan kan in chu ka thleng veleh ta der a, ka chhungte chuan min lo ngai ve tawh hle a. Ka pa chuan dawr a nghah avangin inah a lo awm velo a, ka ghil tawn chungchang chu ka nu ka hrilh a, ka sawi lai chuan a mitmeng chu a phelh deuh in ka hria, ka mgaihbel mai mai pawh a ni maithei. Ka inbual laiin ka pa pawh a lo haw a, ka nu chuan ka thil hrilh chu a lo hrilh chhawng ve mawlh mawlh a, chiang deuh zawka hriat chu tum viau mahse vawikhat chauh kan inhmuh avangin sawi tam tur ka hre lo..Dawr lamah nitin ka liam leh tawh a, ka zinna lama ka thil tawn te pawh ka lo hrechang tawh lo. Zomuana pawh ka hmu zeuh zeuh a, a chang chuan min biak tum niawm tak hian a ka a ang zuau thin a, mahse ka hmuh veleh ka kalsawn thin. Mi sawi ka hriat atangin ngaihzawng a nei leh tawh niin ka hria a, ka rilru chu a na ve hle a, mahse chung thil ai mah chuan ami ngaihdan diklo khan ka thinlung hi a ti na zawk a ni. Tum loh deuhin tumkhat chu bazarah Zomuana nen chuan kan in hmu a, hmeichhe pakhat men an ni a, keimah in mamawh thil lei turin ka chhuak a ni. Ral atangin ka hmu a, hun reilote chhung leka midang nena ka hmu tur chu ka ngam ngang lo a ni ang, helna tur ka zawng a. Min lo hmu ve reng ang tih pawh ka hre lo, mi dawr hnung atanga ka chhuak chiah chu kan in tawk ta tho a. A nula kalpui nu chuan banah a vuan a, kal pelh ka tum lai chuan Zomuana chu ka melh a, min lo melh ran a, hmanhmawh takin ka kal hmawk hmawk a. Motor bulah ka ding vang vang a, thawk ka han la vang vang a, ka thil lei tum pawh ka la lei lo tih ka hrechhuak a, mahse kir leh chu ka chak lo a ni. Motor ah ka lut dawn a, kawngka ka vuan a, ka bul lawkah Zomuana a lo thleng leh reng tawh.."mahni purse a tla tih pawh hre lo khawpin i kal chak a" a ti a, ka purse chu a rawn lek chhuak va va a, hmanhmawh taka ka in her na lamah ka ti tla a ni ngei ang. Ka ban a, mahse min pe duh mai lo,."Ka hmanhmawh deuh a" ka ti a.

.

Ka chhip atanga ka ke ler thleng chuan min thlek a, a hmui a liak huh zauh a,."A na i ti a ni tiraw?" A ti thawp sap a,."Eng chu maw?" Ka ti let a,

.

"Hmeichhia nen min hmu tlang kha.." ati leh a, a kuta ka purse a ken chu ka la thla hmawk a,

.

"Hei te chu engmah a ni hleinem, hei aia hliam na zawk hi ka thinlungah hian a awm a ni, nangma min pek ngei kha" ka ti a, rilru na takin ka en a, inthiam lo hmel chu a pu ve in ka hria, ka theihtawpa chakin ka tlan a. .Ka biangah ka mittui chu a rawn luang ngiai ngiai a. Ri bur ka hria a, ka khaw hmu a fiah lo zui nghal a. Ka harh leh meuh chuan damdawiin khumah ka lo mu reng a. Chet ka tum a, ka ke chu a che thei ta hauh lo. Ka pa ka hmu hmasa ber a, "a harh tawh e" an tih ri ka hre riai riai a, ka muhil zui lehnghal mai a. Ka harh leh chuan khua a thim tawh a, ka bulah ka nu chuan a mittui a hru mawlh mawlh a, ka harh tih a hriat veleh ka pa te a hrilh nghal a. An rawn lut a, Zomuana pawh chiang lo riau in ka hmu a, a hmel hmuh chu ka duh lo a ni. Khawngaih hmel taka min melh te chu ka duh lo takzet a, ka haw mawih ngawih a ni..Karkhat zet damdawiin kan awm hnuah in lamah kan haw ve ta a, ka dam huaiin ka in hria. Ka accident dan chiangkuang takin ka hre lova, ka mittui in ka khaw hmuh a ti fiah loa, speed sang taka ka khalh bawk si avangin kawngpang ka lo tauh a ni awm e. Ka hnungah Zomuana'n minlo umzui reng a lo ni a, chu nilo se min hmu vat tu pawh an awm dawn lo a lo ni. Inah ka haw hnuah U Terina nen min rawn tlawh a, chu bak chu a rawn lang ta bik lo. Ka ke chu an la cher reng avangin duh ang ang in ka la chesawn thei lova, in chungah ni lum aiin ka thu chhuak tih loh chu ka room ah ka in khung deuh tawp a ni. Nikhat chu chutia nilum ka ai lai chuan kawmg thlang lamah keimah ang tak ka pu te khuaa ka hmuh kha ka zu hmu a, belhchian tumin ka han tho a, mahse ka ke lam na chu ka lo hre tah lo, pen ka tum chiah chu ka tlu hnawk a, ka thawh chhuah leh meuh chuan a lo awm tawh lo. Chiang taka a ni kha hmuh ka chak a, ka duh bawk a ni. Ka ke la damlo chu ka haw hle a, a kalna lai ni awm tak chu ka tir zui vawng vawng a..PART V.Ka hliam te pawh an dam tan a, mahniin inchhung dungah chuan ka tei kual ve thei tawh a. Kan sumdawnna zauh tumin ka pa in hma ala mek a, ka theih tawk tawk ka thluak hmangin ka lo ngaihtuah ve bawk a. Zankhat chu ka room ah ka awm a, ka thil ruahman sa te ka en kual a, ka nu leh pa chu ka room ah an rawn kal ve a, ka thil ruahman te pawh ka han hrilh ve a. Tha an tiinin phur pui hle nghe nghe a ni. Ka nu chu ka bulah arawn thu a, ."Mamte, zanin hian i pa nen thu pawimawh tak mai hrilh tur che kan nei a ni" a ti a. Ka pa pawh chu a rawn in sawn hnai a, ."Phirpui i nei a, i pute khua a i hmuh kha chu i phirpui ngei chu a ni" a han ti a..Ka nu leh pa chu ka en a, dawt sawi hmel an pu lo,."Engtinnge chu chu a nih theih?" Ka ti a. Ni e, vawikhatmah a thawi pawhin chu thu chu ka la hre lo a ni.."I nu nen kan inneih khan kan rethei em em a, engmah pawh kan nei lova, chutah i nu in nau an pai a, theihtawp chhuah a tan kan lak pawhin pawisa chu kan nei thei chuang lo. Nau chu kan han nei ngei a, phir kan nei ta cheu a, nang hi i piang tlai zawk a, i phirpui chu a upa zawk tihna a nih chu. Kan nau chhartu nurse kha fa nei thei lo a ni a, an nupa chuan fa an awt ve em em thin. Kan retheihzia hriain i unaunu chu min dil thin a mahse kan phal ngai lo. Tumkhat chu in unau chuan indamlo vak a, damdawi leina takngial pawh kan nei lo. I pu hnenah mangang takin laaisa puk ka dil rawih a, mahse ka hlawhchham takah chuan ka bei a dawng ve ta hle a. Enkawlna tha in dawn vat loh chuan in nunna atan a hlauhawm thei tih kan hre si, chutah chuan nurse te nupa bawk chuan min rasn dil leh a, enkawlna tha tak hnuaiah an enkawl anga, tin nangpawh enkawlna tha ber i dawng ang tih min tiam bawk a. Zankhua in i nu nen kan tap a , mikhualna hmunah tumah hriat kan neih lohna hmun ah chuan kan mang a ang a, duhthlan tur dang kan nei ta lo a ni. Tichuan i u chu nurse te chuan an enkawl ta a, vawikhatma hemi chungchang sawichhuak lo tur hian kan in tiam bawk a ni. Mahse vawiin ni thleng hian i nu nen kan mittui hi a la hul reng reng lo ani. Khatihlai khan inbiak pawhna te ala tha lo bawk nen khawiah nge an awm zui zel tih takngial pawh kan hre thei ta lo" ka pa chuan a han ti a. Thawk a la hak a,."I hmuh thu i sawi atang khan hmuh leh in beiseina hi i nu nen kan nei thar ta a, a theih dan ang ang in chanchin te pawh kan han chhui zui a. I unaunu chu Kolasib an lo awm a, a nu leh pa chuan an fa neihchhun anih avangin an duat em em a, an duat khawlo chho ta tih te kan han hre zel a. Kan in thiamlohna chu a nasa telh telh a ni. I pute khuaa i hmuh pawh khan officer pakha nen an lo inkawp vanga lokal ve a lo ni awm a, officer choice an tih chu a lo ni ve reng mai. Kan rilru a na em em a, nimin khan Kolasib a a nu chu kan be fuh hlauh a, tap zawih zawih in ngaihdam min rawn dil a, tunah pawh kan khuaah a awn zin thu leh ahaw hun tur takngial pawh an hriat loh thu min lo hrilh a, tkaia kan chhuah pawh khan kan rin zawn ta vak mai a ni. Hotel pakhat ah kan va hmu a, tah chuan kan fanu chu kan va hmu ta a ni. Chanchin kan sawi chuan a rilru a na ve khawp mai mahse a puitling reuh a, a chhan dik tak kan sawi chuan a ngaithiam ve deuh a. In inhmuh hma a engkim sawipui che hi kan duh vang ania. I u chu i nu in a hming a phuahsak a, Lalawmpuii tih chu an put hlen tir ve a ni" a ti ta a..Ka pa thusawi zawng chuan ka lo thaw dep dep a, ka unau chu ka lainat kher mai. Keini chu hetah nu leh pa dik tak thlazar hnuaiah kan seilian a, a hun hman thin dan mawlh chuan ka rilru a ti na ngei mai. A bul ber chu ka pu bawk kha a ni tih ka ngaihtuah a, ka haw dawn tum a ka pi thu min hrilh te chu ka hrechhuak thar leh uai2 a, he thil vang hi a nih ngei ka ring bawk a ni. Kan inbuatsaih dan leh remruat ang in ka u Puii chu kan inah ka pa in a rawn hruai a, ka naute chuan an hrethiam lo hle a, an la naupang bawk nen thil thleng chu a rang teh thut bawk em a, thil awm lo lutuk pawh a ni bik lo. Puii chu kei ai mah in a lian a, a ti a nung sarh bawk a, a ngawichawi a, kan hmel tih loh chu in an na r.eng kan nei lo. Kolasib lama a nu leh pa pawh kan in a a awm chu an ngaih a ngam a, an duat em em hauh pawh an hauh phal loh chu ka pa in a hau ang ti mawlh chu an rawn hlau a ni..Zanah chuan kan titi dun malh malh a, kan inhmuh hmasak ni chu ka sawichhuak a,."Keipawhin mak ka ti lutuk a, khatiang em em a in ang kha a awm theih dawn em ni ka ti a, ka nu leh pa ka zawt ve nghe nghe alawm" a ti a, a chil chu a han lem khalh a,."Ka chak ber chu unau neih a ni thin a, nau pathum lai ka lo nei reng cheu a, a mak a ka lawm bawk si. Mahse in unaunu ve hi chu ka chhuanawm loh takzet a ni" a ti chuai raih a, ka kuah vat a,."Khua i la tlai reng reng hleinem, in siamthat nan hun tha i nei mek alawm. I lamah kan tang tlat a, kan vaiin kan tangrual dawn alawm" tiin ka han hnem a..Kan vengah gospel a rawn awm hlauh a, ka u nen chuan kan lut tlang a, ke ai mahin Pathianah lawmna a chhar hnem a, ka lawmpui ve hle. Kolasib lama chhuk chu a chak tawh em em a, kha chen a nu leh pa alo tihhrehawm avang khan nunthar nena haw chu a phur ve hle a ni. Keini lah in kan la ngai em em si a, ka nau te mawlh chuan kei ai an ngaina emaw tih mai tur a ni. A zaidam em em a, a bula awm chu a hahdamthlak reng a ni. Lawma vairam lam zin pawh a lo haw a, kan chanchin te ka hrilh tawh avangin kan inah a rawn lang ve vat a, ka u chu a en ngun khawp mai. Zandang ang lo takin ngaihtuah muk hmel fe hian a thle leh bak thin. Ka chhungte mut hnu chuan khunkhan takin a thu a,."Tluangte Zomuana hian a hmu tawh cheu em?" A ti phawng a, chhungkuaah ka rilru ka lo pe nasa bawk nen ka lo hrechang meuh lo.."hmu nang.. " ka lo ti ve mai a,

 ."Engemaw tak hi chu a awm ang tih ka ring ta tlat" a han ti nawn leh a.

.

"Engthilmah a awm lovang, Lawma kan chhungkua in rin loh tak boruak kan tawng chho a, ani lam reng reng pawh ka lo ngaihtuah lo" ka ti a. A zinna chanchin te chu ka zawt kual ta daih a, a rilru erawh thildang ah a awm tih ka hria..Ka dam ve tawh viau a, dawr nghah chu la phal chiah lo mahse pawnah chuan ka kal ka kal ve tawh a, ka u pawh a nu leh paten an ngai tawh bawk nen haw thla phawt sela tiin ka pa ten an rel a, unaunu awt ngawih ngawih thin ka ni bawk a, ka huphurh kher mai. Pawnah chuan buh kan thap a, kan titi a kan nui dun bawk bawk a, engemaw tla ti thuai ah kan unau chuan kan hawi chhuak vat a, mak ti em em in Zomuana chu kan hmaah a lo ding reng a. A hnungah Lawma a lo ding bawk a,ka u chuan kan boruak a hrethiam vat a, Lawma nen inchhung lamah in chhai ar ar pahin an lut a. Khawdang hawi lek lovin ka hmaa mi chuan min la melh reng a, ka hlau lek lek zawk.."Hei hi i ni lo.." thawp sat hian a ti a, a fon a phawrh a, thlalak pakhat chu min hmuh nghal a..Ka u leh mipa pakhat inkuah rial lai thla chu a lo ni.."Thil lian tak ka tisual a ni" thuthlengah chuan a thu hnawk a, 

.

"Tluangte... khuavang i nei ve lo tih pawh ka lo ngaihtuah thlen pha reng reng lo asin" a ti a. 

.

Ka hriatthiam loh thil chu hrilhfiah in ka awm ta.."Kan training naah khan ka thianpa hian a bialnu chungchanga sawi fo thin a, zankhat chu thlalak min hmuh ta a,he thlalak ngei hi. Nangmah nilo turah ka ngai lo hrim hrim a, ka natzia kha i hrethiam pha lo vang. Hmeichhe duh duha kawh kual theih tiin a la sawi leh ta nghal a, kha zan ah khan thi daih ila tih ka duh ber" a ti a.."Ngawi renga min tuar tir kha a fair lo takzet a ni" ka lo ti a..Min khawih a tum a, ka lo in dang a,."Ka tawrh hnemzia kha i hre pha bik lovang" tih leh inchhung tlan luh ka rual a. Kha chen engmah pawh hre lovin ka tuar a, thinlung na em em in min siam a, awlsam tak chuan ka palzam thei lo a ni..Nitin min biak tumin a rawn call thin a, mahse ka chhang ngai lo. Engkim kha min hrilh ve nise hetiang thlenga kan buai pawh ka ring lo a ni. Lawma chuan Zomuana a khawngaih thu leh a in thiamlohzia min hrilh reng a, palai ah a hmang a ni ber. Ka u pawh Kolasib lamah a awm leh tawh a, nitin kan inbia a, zin ve vat tur in min saw a, tihhlawhtlin ngei pawh chu ka tum a ni. Dawr lamah ka hun ka hmang leh tawh a, ina hun hman reng ai chuan nuam pawh ka ti zawk. Tlai khat ka dawr nghak haw chu kan in bulah Zomuana a lo awm reng a, min hmu lo emaw tiin rang takin gate ka hawng a, mahse ka banah hneh zetin min chelh bet a, ."Min thlah nghal rawh" tiin ka chum pawp pawp a, engahmah a ngai lo. A motor ah min nemlut a, au ka tum chuan ka hmui rawn hup tu an awm a, side glass atang Lawma tih ka va hmu thei a.."Tluangte, mun ngaidam rawh, in tan vek ania ka tih" a han ti tham tiak a..Kan tlan zel a, Lawma chu an in bulah a chhuk a,."I chhungte bulah i haw tlai tur thu hi ka hrilh vek tawh ania" a ti a. Rum zetin ka melh a, a nui suk thung a, kan tlan leh nghal a. Pu Khuma mual ah kan ding a, motor atang chuan ka chhuak vat a Zomuana chuan min rawn um nghal a,."Tluangte.. khawngaih takin min ngaidam rawh. Ka ngen takmeuh che ani" a ti a,."Vawikhat tal pawh a chhan kha min hrilh ni ila chuan ka na lo tur" ka mittui chu a rawn baw zawih a, min kuah a, talchhuah ka tum a, mahse min kuah ngheh em avangin ka che thei lo.."I ngaihdamna ka dil mawlh mawlh ani, Tluangte, ka hmangaih luat ah che khua ka lo hmu lo a ni. Pawi ka ti, min ngaidam hram rawh" a ti a. Ka mittui chu a hru a,."Englai mah hian ka la phatsan ngai lo che, ka hmangaih che a, mahse huat che ka tum thin . He thlalak hi ka en apiangin ka thin a ur a, mahse ka hmangaih loh phah thei chuang silo che a" a ti a.."Ka hua che, ka haw takzet che" ka ti a, duat takn min pawm hle hle a,."He hmun, i thian tha ber i channa hmunah ngei hian hei hi ka tiam a che, i rilru ka ti na leh tawh ngai lovang. Nitin ka hmangaih che anga, i rilru ka hliam leh tawh ngai lovang" a ti a. Tah zet chuan ka in sum zo lo, ka kuah a, nghet zetin min kuah let a, engmah sawi lo mah ila ka rilru chu a hrechiang tih ka hria..Thla hnih a liam leh meuh chuan a hmaa ka hlimna bo ta zawng zawng te kha an lo kir a, hlimna chhiarsen loh ka chang mek a ni.

.

Zomuana nen chuan in chungah kan thu a, thla a eng nuam hle a, Kolasib a ka zinna chungchangte kan sawi dun a, kan hlim ve hle. Ka kut chu a khawih neuh neuh a,."Ka nupui i ni duh angem?" a ti a, mittui tling pam in ka lu ka bu nghat nghat a, lungngaihna karah lawmna ka chhar ve ta. Englai pawha ka kianga awm a min veng tura intiam ka thianpa chuan min pui ni ngeiin ka ring a,."Kan pahnih in kan khawvel hun hi kan chhiar tawh anga, harsatna pawh kan pahnih zelin kan hmachhawn tawh ang. I KIANGAH chuan engmah hi ka hlau lova, I KIANGAH chuan thlamuang leh hlim takin ka hun ka hmang ang tih hi ka ring tlat a ni" ati a, a hmui lum thar thar chuan duhthawh leh uar zetin min fawp a, hma hun tha zawk beiseina nen ka lo chhang let ve a. ."I KIANGA kan lo kal ve hma loh zawng hlim taka kan awm theih nan Lalpa hnenah min lo dilsak thin rawh aw" tiin van lam thlir in ka phun sap a.