KA MITTUI A HUL TA

KA MITTUI A HUL TA

"Thiannu, in pa hi ngaihzawng a nei chiang a ni. Hmanzanah pawh bike in Tetei a rawn phurh leh vawk vawk tawh kha" ka thiannu Sangbawihi chuan a ti hlawk hlawk a.

.

Ni e, ka pasal ka hmangaih em em leh ka innghahna hian ngaihzawng min neihsan ngei alawm. Mahse ka hmangaih em avang hian ka then thei silo. Nupa inhmangaih tawn leh inthlahlel tak, thiante pawhin an awh ve kan ni thin a, a nupui fanau te tihhlim peih leh mi fel tak ni thin kha eng hian nge heti taka a nun hi lo ti danglam ta? Mi hlim thei tak ka nih thin vei nen, thinlung na reng rengin hun ka hmang ta si a.

.

KUM 8 HMA LAM:

.

Ruah a sur nasat em avangin college kawtah chuan kan ding thap a, nihliap nen pawh han kal theihna chi ziazang a ni silo. Darkar chanve dawn a sur hnuah a ziaawm tak deuh avangin keipawh ka nihliap chu ka pawt pharh a, in lam panin zawimuangin ka kal a. Ka thiannu ve ber Sangbawihi lah a pum nawm loh chhuanlamin class a kal bawk silo. Mahnia haw hi ka hreh thin hle a ni. Vawiin lama kan thil zir te ka ngaihtuah neuh neuh a, chhum chu ala zing deuh chuai a, vawilehkhatah bike a rawn tlan a, min rawn tai thuak a, ka tlu tawp a. Bike pawh chu a tlu lek lek a, rang takin a khalhtupa chu rawn chhukin min rawn buaipui nghal a. Min sutu hmel ka hmuh rual chiah chuan ka hit nghal vek; college a kan senior, a ruka tha ka lo tih em em Hriattea a lo ni. Ka zak thar hle bawk a,

.

"Chhum a zing nasa lutuk a, kawng ka hmu tha thei loa ka tihpalh takzet a ni, i na viau em?" a tarmit phelh pah chuan a han ti a.

.

"Aih, na lo, ka tha e" tih pahin ka tho vat a, mahse ka tlukna lama ka khup ka sawhna chu a rawn na zawk a,

.

"Lokal rawh ka lo thlah ang che, damdawi hnawih te a ngai lo maw khawi maw ka lo en ang" a ti leh a.

.

"A ngai lo, engtinmah a awm lo, ka haw thei alawm" ka ti tlat a.

.

"Anih leh in inah tal ka dah ang che" a ti bur a, ka hnial pawhin awmzia a awm chuang lo. Kan in lamah chuan kan in phur ta nge nge a.

.

Kan in kawt kan thlen chuan rang zetin ka chhuk a,

.

"Ka lawm lutuk e, nih phawt" tih pahin ka tlan nghal a, inchhung ka lut tur chu ka va hawi a, hrilhhai hmel zet hian min lo en reng a.

.

Zanah chuan lehkha pawh ka zir thei lo, chhun lama ka thil tawn chu ka ngaihtuah let a, ka lo star ruk em em in min han phur haw te chu mumang ang ka ti a, ka han in sik leh ngawt ngawt thin. Zingah hma taka ka tho a, unaua upa ber leh hmeichhe awmchhun ka nih avangin in chhung chet vel chu ka kut a ni mai a, nau mipa pahnih high sikul kal lai ve ve ka nei a, ka nu leh pa nen kan panga in kan khawsa a ni. Chhungkaw hausa tak kan ni lova, ka pa hi a hmingin sorkar hna chhete a thawk ve a, chu chu kan ei ber a ni. Chutiang chu ni mahse Kristian chhungkua atanga seilian kan nih avang hian mi kan awt ngai lova, kan naupanlai atanga Pathian thua enkawl seilen kan nih avangin kan hlim a, chhungkaw dang kan awt ngai lo.

.

College gate bulah chuan Sangbawihi ka nghak a, nidang ang bawkin a rawn tlai leh hle a. Hmanhmawh zetin classroom lam panin kan kal a, kan class kan thlen hma deuh chuan Hriattea leh a thianpa chu an rawn kal a, min kal pel zet tawh na a a rawn hawi let a,

.

"I tha maw?" a ti a.

.

Sangbawihi chuan mak tih hmel takin min lo enkar a,

.

"Aw, ka tha ka tih kha, engtinmah ka awm lo" zawi sap hian ka lo ti a.

.

"Chhunah min lo nghak ru aw ngaihdam dil nan canteen ah ka treat ang che u" a ti a, ka chhan leh hma chuan a kal ta daih a.

.

"Sawmte, enge awmzia? Khapa nen khan...engtin?" Meng bial kawk chuan a ti a.

.

"A ho lutuk, thuruk" nui sak chuan ka ti a, ka rindan chiah in a hmui chu min han tih pawrh khum nghal a,

.

"Min hrilh tawp suh ahh..."

.

"Haha.... lokal rawh ka hrilh ang che" ka ti a, classroom lamah kan in kuah lut nghal a.

.

Karkhat a liam leh hnu chuan nikhat chu college canteen ah kan department ho chu kan chawl a, kan titi a kan hlim dar dar hle. Sangbawihi chuan ka khup chu a rawn sik zauh a,kawngka lam chu a melh nghal bawk a, ka va hawi ve chuan Hriattea leh Tetei chu an rawn in kai lut chiah a. Ka hit deuh mur mur in ka inhria. Sangbawihi kut chu nghet zet hian ka hum ta ngawt ngawt a, ka tawt nghal up up ni berin ka hria.

.

"Tetei hi chu ava han chhe lo tak e aw.... Hriattea hian a phu lo mawle" kan thianpa Sanga chuan alo ti a,

.

"Tetei hian a phu lo fe zawk, Hriattea te zawng hmeltha si, hausa si" Kuri chuan a lo ti thung a.

.

Class kan la neih dawn avangin kan chhuak zui ta nghal a, min hmachhawn zawngin Hriattea chu a thu a, min hmuh chuan alo nui sak a, za lo takin ka han then ve a. Tetei chu ka thik phak loh ni mahse ka va thik chiang tak em!

.

Nitin Hriattea leh Tetei chu an rawn in phur ziah a, hmuh hrehawm ti viau mah ila ka hmu chak miau si a, ka han melh hram hram thin. Inhmeh hle mah se thinlung takin inhmeh ka ti phal lo. Nikhat chu library ka lo awm rei deuh a, sana ka han en chuan class ka lo tlai der tawh tih ka hria a, haw turin ka chhuak ta nghal a. Gate ka pel fel deuh chiah a, Hriattea chu a rawn tlan ve mek a, ka bul a thleng chuan a bike a ti ding a, chuang ve turin min sawm a. Chak hle mah ila ka duh aiin ka vei dawn tih ka hriaa, hlat hram hram ka duh a ni. Chhuanlam ka siam tlat a, min kalsan ta a. Ka thlir zui vawng vawng a, muangchangin ka kal ta a. Kawikhat ka thleng a, dawr kawtah hian Hriattea chu alo ding a, a lo nui var var a. Ka hmu chu ka phu deuh zawk nghe nghe,

.

"Ka lo nghak che nia aw... mi hmuh lai khan i lo chuang zak anih ka ring a" a ti a.

.

Chutiang chung chung han chuan duh loh chu ni theiin ka hre bik si lo, ka chuan ve ta nge nge a. Kan in kan thlen chuan kal nghal mai ka tum a,

.

"Thingpui min lum dawn lo mi a?"

.

Ka va hawi a, a lo then sak a, ka chhan hma in a bike a hung rem a, min rawn zui lut nghal a. Thingpui ka lumsak a, sitting room ah thu in kan photo album chu alo keu mek a,

.

"I phalna lovin hei thlalak ka lo en ve tawp ania" alo ti vat a.

.

"A pawi hleinem, en ka phal lutuk alawm" ka lo ti ve nghal a.

.

"Sawmte, college ah hian i va induh thei ve, mi pawh hi i hre duh ngai lo" a ti a.

.

"Awihawm loh emai a... Nangmah alawm, midang an awm ve bawk sia kan be tha ngam lo che alawm" nui chung chuan ka lo ti a.

.

"Haha... Van sual mai mai... Tetei hi enge i hmuhdan?"

.

Engvanga min zawt ringawt nge maw anih le? Kan in kawm thin pawh a ni lova,

.

"In inhmeh lutuk ringawt" thik ru zet chuan ka han ti a.

.

"I van ti lawmawm... Ti daih ila, ka thianpa Danny khan a duh lutuk che a, min lo sawi sak rawh a tia" a ti a.

.

"A va ti lawmawm ve keini te min lo duh der chu... Ngaihzawng hi ka ngaihsak vak lova, ka zirlai a tihbuai ka hlau a, ka la nei thei hrih lo a" ka ti a.

.

"Ka ring reng ahh... i la innocent tih ka hria" a nui vur vur a. Amah vek chuan,

.

"Ka va haw tawh ange, thingpui i lum thiam si ka rawn in fo ang" a ti a. A tho nghal a, pawnah kan in zui chhuak a,

.

"Sawmte, thian tha tak angin ka en che ania, ka lakah hian in la hrang lo hram la ka duh. I rilru thianghlimzia pawh ka hria, i duh loh zawng ang rilru ka pu lo ania, i thian tha tak angin min en ve hram ka beisei" a ti a. A kal liam ta a.

.

BUNG-2 NA

.

Lehkha zirna dawhkanah thu in ka lehkhabu ka keu a, ka zirlaiah ka rilru a lut thei lo thung. Hriattea chu ka ngaihtuah reng a, thian ah min sawm a, thian ana en chu harsa ka ti a ni. Mahse amah ka hnaih theihna awmchhun a ni si. Nitin hmu mah ila a kiangah a hlim pui em em Tetei a tel ve zel si, ka rilru a na tam mai mai dawn ni te in ka hre hial a. Ka lu chu ka han thing nawk nawk a, he dinhmun atang hian tal chhuah ka va duh em!

.

Library kawtah ka thiannu Sangbawihi chuan min lo ko lauh lauh a, earphone in ka beng ka hnawh a, min kotu pawh ka lo hre lo, ka banah min kuai her sawk a,

.

"I beng hnawh tawh suh ka tih che kha, ka au nasa lutuk che" tum deuh bar chung chuan a ti a.

.

"Bawihte, min ngaidam rawh, hla ka nei thar a, nalh lutuk ka pe ve ang che" ka tih chuan,

.

"A ni maw.. khawi min pe nghal rawh, awi ka van lawm" a ti nghal lawng lawng a. Library ah chuan kan in zui lut nghal a.

.

Kan seat ah thu in ka phone chu ka thiannu ka pe a, a in thawn nghal malwh mawlh a. Kan thlangah mipa rual an thu a, an nui leh hak thin. Chuti lai tak chuan Tetei leh a thiannu an rawn lut ve a, mipa ho chuan an lo en thap a, lehkhabu an returned hnuah an chhuak leh mai a. Kan thlanga thu mipa pakhat chuan,

.

"Kha nu kha ni lawm ni Hriattea bialnu an tih kha?" A thiante chu a han zawt a. A nih thu an lo sawi sap sap a,

.

"Hmanzanah kan veng ami U Zoa nen an inphur ka hmu, a ruih hmel em em lehnghal" a ti a. Ka beng chu a verh zar mai.

.

"U Zoa phurh theih tawh hmeichhe pangngai tak an awm lo" a han tih chhunzawm a. An sawi zui nak nak na a engmah ka hre tawh lo. Hriattea chu ka lo khawngaih ru hle a, a bialnu chu an sawi ang a nih tak tak chuan a rilru a na dawn mange!

.

"Enge i ngaihtuah vung vung a, biak pawh i biak theih loh ania" Sangbawihi chuan a ti a.

.

"Thil engemaw mai mai ka lo ngaihtuah a, vawiin chu lehkha chhiar pawh a tui thei lo canteen ah kal mai ang hmiang" ka ti a. Kan in zui chhuak ta nghal a.

.

Library a ka thu hriat atang karhnih a liam leh tawh a, inngeih hmel tak in Hriattea te pawh ka hmu nitin a, canteen ah kan chawl ho zeuh zeuh a, Tetei a kal loh changin min phur haw bawk thin. Tetei chu an sawi ang kha ani lo niin ka hria a, a lo nih erawh chuan a inthup thiam hle ang tih ka ring. Hriattea hian a duh hle tih ka hrechiang a, keipawh a laka ka rilru a dang ve tial tial a, mipa dang erawh ka melh chuang lo.

.

Nikhat chu bazar ah ka nu nen kan kal a, ka nau hostel awm tur a bungraw ken tur kan buaipui avangin class pawh ka kal lo a ni. Hah hnep in kan vak kual a, kan riltam chu restaurant ah inhnawhpuar turin kan lut a. Rei vak lo kan thut hnu chuan Tetei leh mipa pakhat an rawn in zui lut a, ka lo en reng a, min hmu ve lem lo. Inchung lamah chuan an in zui chho a, step an lawn lai chuan an in kai a, an hlim hmel hle. Ka duh ngawih ngawih nen an in kawp a, mahse mipa dang a kawpsan reng si chuan min ti na takzet a. Hriattea chu ka khawngaih em em a, hrilh tawp mai tur ani angem ka hrethiam si lo. Zanah chuan Sangbawihi chu ka hrilh ta vek a,

.

"Thiannu, hrilh ngei ngei chi a nih chu, i hriat renga i hrilh si loh khan a khawngaihthlak" a ti a. Ka thiannu nen kan inbiak lai chuan Hriattea msg chu alo thleng a, class ka kal loh chhan te min lo zawt a, hrilh pah chuan Tetei a kal em tih ka han zawt nghal a,

.

"A nuamsam lova vawiin chu a kal lo"

.

A chhanna chuan min ti nghing lawih a, engzata tam nge dawt a hrilh tawh ang? Mahse thudik hrilh tur chuan ka huaisenna in a tlin ngang lova, ka ngawi leh ta zawk a.

.

Exam a hnaih tawh avang chuan class kan kal tha tawh lova, inah keipawh ka thwi an angin ka in chhiar ve a, Hriattea chuan min rawn be ve zauh thin. Tetei chanchin kan sawi chuan a hlim a ni tih ka hria a, a hlim chuan keipawh ka lo hlim tawk ve viau thin. Exam pawh kan zo ve tep tawh a, honours exam hmabak ka la nei a, Hriattea te erawhin an zo tawh thung. Zan dar 9 a pel tawh a, ka phone chu a awn ri ral ral a, ka han en chuan Hriattea alo ni, ka pickup vat a,

.

"Sawmte.... " a reh leh vang vang a,

.

"Hello... Hriatte.. ka tawng i hre thei em? Hello"

.

"Um... in kawtah ka awm, lo chhuak teh" phone a dah nghal a.

.

Ka kawrlum ka ha a, ka tlanchhuak nghal a, kan garage bulah a bike bawhin a lo awm a min hmuh veleh a lo ding a,

.

"Enge ni ta tun ang hunah i rawn tih a?" Ka ti a.

.

"Sawmte.... ka rilru hi ava na ve... engtinnge ka tih dawn?" A biangah a mittui chu alo luang ngiai a.

.

"Enge thil awmzia, Hriatte, enge i chungah thleng?"

.

Inchhungah ka hruai lut a, thingpui ka lumsak chu a in a,

.

"Sawmte, engvanga vanduai viau nge maw ka nih le? Hmeichhia ka lo hmangaih ve ngawih ngawih te hian engvanga min phatsan zel nge an nih?" A han thaw hawk a,

.

"Karhmasa khan kan exam laiin vawikhat Tetei te inah ka kal a, ka kal tur chu ka hrilh lawk duh lova, ka va thlen chuan a lo awm lova, a chhungte chuan keimah nen kan chhuak emaw an lo ti nghe nghe. Ka phone a, a pickup duh lo a, thinrim deuhin ka haw a. A hnuah min lo call a, damdawiinah a thiannu emergency a an luhpui thu vel a rawn sawi a. Rinhlelh ngaihna ka hriat loh avangin a thusawi chu ka lo awih vek a ni. Mahse nimin piah ah car ah mipakhat nen an in phur lai hi Danny leh Muantea ten an lo hmu leh a, ka rinhlelh phal ngai loh avangin ka thiante pawh chu ka ngei ru lek lek hial a ni. Mahse zanin khan zantirah kan inbia a, len ka tum thu ka sawi chuan a thiannu damdawiinah a riahpui dawn avangin naktuk zanah lo leng rawh min ti a, tha takin kan inbiakna pawh kan titawp a. Mahse min nawr tu hi a awm tlat, an in lan theihna lai ah chuan ka va ding ta ngawt a, rei pawh ka ding hman lo, car var hi an in bulah a rawn ding a, tah chuan a lut lai ka hmu a. An hnungah zel ka tlan a, damdawiin a riak tur an hruai dawn ah ka la ngai fan a, mahse kan in chhui tawpna hmun i hria em? Hotel Regency ah.." a in dawm kun lap a,

.

"Ka zui zel a, an in kuah lut lai chu rilru na em em in ka thlir liam ta ani. A thawk pakhat chu ka han zawt a, chumi te pahnih chu an hotel ah an riah fo thu min hrilh ta zel a, ka puakkeh lo chauh a ni. Ka va zui zel anga ka va tibuai dawn em ni ka ti a, ka in thunun theih ka rin loh avangin ka rawn tlan let leh a ni. Ka rilru ah i lo lang hmasa ber a, in la exam zo lo tih pawh ka hria, mahse Sawmte... ka lo kal ta tho anih hi" hul hak chuan a han nui a.

.

"Hriatte, ka van lainat tak em! Hetianga ti tur che hi a ni lo asin" hnem ngaihna ka hre lo hle a.

.

"Hmeichhe pakhatin heti tak maia min lo bum kawi thei hi nep ka in tia, ka zak bawk" a ti a. A hmaa a hmel rilru nat hmel tak kha thinrimna in a in thlak a, nelawm loh khawpin a hmel chu a sak a ni.

.

Thil hrechhuak thut niawm takin min melh a, khawngaih hmel taka ka lo melh chu a hrethiam ve ani ang, a nui suk a,

.

"Ka hmu che a ka tha vek tawh alawm, ka tuar thei em em ang, hmeichhe pakhat vanga nat reng ka tum hleinem" a ti a.

.

Lo len leh vat a tum thu sawiin min hawsan ta. Ka thlir reng a, ka rilru danglam tawh nia ka lo inhriatna chu ka tisual a ni, ahma ang bawk khan ka thinlungah hian a dinhmun chu ala pangngai reng.

.

BUNG-3 NA

.

Exam kan zo fel tawh a, Hriattea pawh a lo leng fo a, a khawhar rukna chu ka hmuh hmaih bik lo. Tetei chu a first love a ni a, tleirawl chhuah hlim atanga in zui chawt an lo ni awm e. Hetianga mipa amah hmangaih em em tu a phatsan thei chu a mak ka ti hle a, hmangaihna kawngah experience la nei miah lo ka lo ni bawk nen thurawn han pek emaw ka thiam lo. Thla khat a liam leh hnu chuan nikhat chu Sangbawihi nen kan bazar a, kan haw lamah chuan kan college kal pui Mary te dawrah kan chawl a, kawngpui bul mai a nih avangin mi vakvel chu ka thlir pah mai mai a, chutih lai tak chuan Hriattea leh Tetei rawn in phur lai chu chiang takin ka lo hmu a, ka zawi nghal vek thei! Khatiang taka amah phatsan tu chuti maia a pawm leh thei chu mak ka ti a, sawi tur erawh ka nei lo. Zanah chuan ka ngaihtuahna ah a khat tlat a, hmangaihna chuan a ngaidam thin an ti alawm ka ti a, .

.

Hriattea pawh ka dem ta bik lo. Chutiang ka ngaihtuah lai chuan ka whatsapp tone chu a rawn ri a, muangchangin ka han ban a, Hriattea a lo ni.

.

"Zanin chu lo len phei ka thulh mai, ka chau ve deuh a...."

.

Ka rin lawk sa anih avangin mak ka ti vak lo, tha takin ka chhang a, a hnu deuh ah chuan a msg bawk alo thleng leh a,

.

"Vawiin ah Tetei nen kan inhmu a, ngaihdam min dil nasa lutuk a.. mahse ka let thei tawh lo tih ka hrilh a"

.

Mak tak maiin chu chuan min ti hlim ru veng veng a,

.

"Chance pek leh chu a pawi dawn em ni?" A rilru hriat tum chuan ka han ti ve a,

.

"A chance hmuh a bawhpelh tawh, a thuhrimah min va lo ning awm ve, ka tibuai che hi i ning a ni maw" a rawn ti a. Chhan ngaihna ka hre lo, ka type a, ka ti reh leh a, amah zawk chuan

.

"Ka ngai che Malsawmtluang"

.

Ka thin chu a phu dup dup a, ka han dawm vang vang a, min fiam mai mai a ni ang,

.

"Hm... min bawl peih emai aa ka mu daih dawn"

.

"Ngai lo ka lo kal dawn"

.

"Aih ka mu tawh ka tih kha"

.

A reh ta vang vang a, hmu chak viau si engvanga lo hnial nge maw ka nih le? Minute 15 nu velah chuan ka nau chu ka room ah a rawn lut a, Hriattea alo len thu a rawn sawi ta mai a, mi mak tak zawng a ni chiang alawm!

.

Ka chhungte nen tv an lo en thap a, min hmuh chuan a lo nui ver ver a, ka lai kher mai. Rei vak lo hnuah ka chhungte chuan an room min pan san ta a. Amah nen chiah kan awm ta, ka bulah chuan arawn insawn a, ka khur ru der der a, ka kutah a vuan a,

.

"Sawmte, ka rilru ah i awm reng, a hma khan hrilh che ka tum a, mahse ka lunglen vang mai mai ah i ngai ang tih ka hlau a ka sawi ngam lo a ni. Chuan vawiina Tetei nen kan inhmuh khan ka thinlunga awm dik tak zawk chu nangmah i ni tih ka hrechiang ta bawk a" ka thin chu a phu dep dep a, chiang zetin min melh a, ka en tha ngam ve lo,

.

"Ka duh che Sawmte.." a ti tham chal a, ka mumang mai em ni tiin ka hna in sik ru a, a tak ngei a ni si,

.

"I thinlungah hian hmun ka lo luah ve reng reng em?"

.

Ka chil chu ka lem khalh a, ka aw chu a ri chhuak thei lo ang tih ka hlau a, ka lu chu ka bu ta zauh a, chu veleh min kuah a,

.

"Ka hrethiam e Sawmte... ka lawm e aw.. i rilru ka ti na ngai lovang ti ka tiam che" duat takin ka hnung chu abeng thak thak a,

.

"Ka fawp dawn che aw"

.

Ka meng phawk nghal hru a, a nui hak hak a,

.

"A zahthlak loh, maimitchhing tlat la, engmah i hmu dawn hleinem" a ti a.

.

A thu chu awihin ka maimitchhing ve tawp a, ka biangah dawm in ka hmui chu a rawn fawp a ka tek sawk thei, tih ngaihna hre lo in ka lo dawh ve tawp a ni mai. Second nga vel a liam ka ring, ka meng a, min lo en reng a, ka zak lutuk chu a mal ah ka sik vak a, min lo kuah a, nghet zetin,

.

"A hmasa ber ka ni ti ka hria, ka lawm e aw, a hnuhnung ber pawh ka ni duh a ni" zawi sap chuan a ti a. .

Thlamuang takin a awmah chuan ka bei ta hle hle a.

.

Ka hmangaih hmasak ber nena bultan chu a hlimawm ka ti a, ka thiannu Sangbawihi pawhin min lawmpui hle. Class kan tan leh tawh a, Hriattea erawh a zo tawh a, college a chhuahsan dawn ta. A tellova college kal chu ka phur lo hle a, zir zawm lova an chhungkaw sumdawnna enkawl a duh avangin Delhi ah thlaruk chhung sumdawnna lam training turin kal a tum a. A kal hma zan chuan a lo leng a, kan in ngaihzawn atanga kan inkalsanna hmasa ber tur anih avangin ka huphurh lehzual a ni.

.

"Sawmte, ka ngai dawn lutuk che, mahse kan hma hun hi kan thlir lo thei si lova, tha takin ka zo anga, college i zawh veleh hian neih che ka duh a ni. Chuvangin bul lo tan vat hi ka duha, chuvanga he thutlukna pawh hi siam ka ni tih hria la ka duh a ni" a ti a.

.

In ngai leh inthlahlel takin kan in thlah liam ta. A tel ve lohna hmun chu hmun ruak leh khawharthlak tak an ni zel mai. Zantin kan inbia a, a hlimchhawn ah phei chuan ka mittui chu a tla lo chauh thin. Min hrethiam em em a, min hnem a, min fuih thin. Heti taka mipa fel leh tha hi ka tawng leh in ka ring ngai lova, kan hma hun beiseina nen ka lo thlir thin pawh chu a tak ram a chang nhei ang tih pawh ka ring a ni. Ka zirlaiah theihtawp ka chhuah a, thiam thil dang neilo mah ila fate tana nu tha tak nih chu a vawikhat nan ka chak ve a ni.

.

Hun a kal bek bek a, ni a liam a, thla a ral a, Hriattea pawh a training te zo felin rawn haw turin a inpeih fel ve ta. Ka hlim a, a tello a khang thla ruk ka hman kha kum tam tak ang mai an ni.

.

BUNG 4-NA

.

Hriattea pawh nitin an dawr lamah a buai a, keipawh college lamah nitin hun ka hmang thin. Zan lamah erawh a rawn leng fo a, ka chhungte nen an inkawmngeih in ka awm loh pawhin ka nu leh pa te nen an inkawm mai thin. Ka chungah chauh ni lovin ka chhungte chungah pawh a tha hle a, ka pa mi tawng tlem tak pawh a kiangah chuan a titi ve bawrh bawrh thin. Chu chuan min ti hlim lehzual a, ka thinlung zawng zawng hi a hnenah ka hlan fel vek a ni ber.

.

Nikhat chu an inah leng a, chawei nghal turin min sawn a, a chhungte rawt chhuah ani nghe nghe. Kei erawh huphurh tak takin ka huphurh a, ka nu leh pa te ka rawn hnuah kal chu an remti a, a hun tur a an ruat ah erawh ka in peih hman lo thung. Karkhat a ral leh hnu chuan Hriattea chu min rawn hruai turin a rawn kal a, room ah darkar khat zet ka lo inkhung tawh a. Ka zam a ni, vawikhatmah ngaihzawng ka nei ngai lo tan chuan buaina tham chu a tling reng mai. A tawp atawpah chuan kan in phur chhuak thei ta hram a, an kawt kan thlen chuan haw leh ka duh hial a. Ka kutah min vuan a, ka biangah a piai zeuh a,

.

"I paltlang ala ngai dawn tho alawm, i zam rei lovang" a ti a.

.

Inchhungah chuan kan in zui lut a, a chhungte chuan min lo lawm thiam khawp mai. A nu leh pa pawh an fel hle a, a nau leh a cousin an hnena awm bakah a awmpui pakhat an i mai a. Ka huphurh aiin kan boruak chu a ziaawm a, mak tak maiin ka thla chu a muang siai bawk a ni. Hriattea nu chuan kan chhungkaq chanchinte min zawt a, a tlangpui chu ka han sawi a, an nupa chuan an bu nghat nghat a,

.

"Chhungkaw in enkawlna tha taka seilian i ni ang tih hi ka ring reng a ni. Hei chawei pawh kan la peih chiah lo a, .

Mama i duh leh in te hi han fan kual pui la" a nu chuan a han ti nghal a.

.

Hriattea chu a lo tho vat a, in chung lamah in hruai a, an in chu keini ang tan chuan a ropui mah mah a ni. A nu te room leh a pa hnathawhna room te min en pui hmasa a, an room ringawt pawh chu kan sitting room aiin a lian mah in ka ring. A unaute room chu min kawhhmuh a, a nau chiah hi nurse training in Bangalore ah a awm a, an naupang ber erawh an hnenah a awm a, a hriselna a that loh avangin lehkha a zir thei tawh lo a ni. A tawp berah a room ah min hruai a, a room chu tlemin a fal deuh bik a, a zau nuam in a thianghlim hle a. Engkim hi a awm a ni ber, mahni insitna ka nei lian hle a, tawng ngaihna pawh ka hre lo. Ka phu lo takzet ani tih ka hre thar bawk a, chutia ngawi remga ka awm lai chuan ka biangah a rawn piai a,

.

"Biak tawng i va har ve" a han ti a.

.

"Hriatte...... "

.

"Enge ni ka lalnu..?"

.

"Kan dinhmun in thlau lutuk hian min ti buai takzet ani"

.

A thaw hak a, ka kawngah a kuah a,

.

"Dinhmun vang hian em ni hmangaihna hi a pian thin? Sawmte, kan inhmangaihna hi kan dinhmun hian ti danglam lo se ka duh a ni. Nangmah hi ka hmangaih che a, nangpawhin min hmangaih a, chu chu kan tan hian a tawk viau in ka hria" a han ti a.

.

Ka dar chu ka han san ak a,

.

"Hriatte, nakin zelah hei hian min ti danglam ang tih ka hlau a ni"

.

Ka hmui chu a hup vat a,

.

"Shhh..... engmah sawi a ngai lo" a hmui leh ka hmui chu a chuktuah a, kan in fawp ta vawng vawng a.

.

"Khatiang zawng khan ngaihtuah tawh suh, ka tan rinawm la chu chu a tawk a ni mai" a ti a.

.

Inhnuai lamah a chhungte fin turin kan chhuk thla zui nghal a.

.

Hriattea te ina chaw ka ei atanga thlahnih a liam leh hnu chuan nikhat chu Hriattea'n a dawra kawi turin min ti a, dawr hi pathum lai an nei a, ama enkawl vek anih avang hian a buai ve thei hle. Ka va thlen pawhin thil chhut buaiin alo la buai hle a, a room ah chuan ka lo nghak a, rei vak lo hnuah a rawn lut ve a, karkhat dawn kan inhmuh tawh loh avangin ka ngai hle. Kan in kuah vawng vawng a,

.

"Heti tak hian i lo ngaihawm tih ka hre lo a"

.

Ka han melh a, a lo then sak a,

.

"I lo leng duh lo emai in ngai vak lo aniang" ka lo ti let thung a,

.

.

"Nangpawhin i awih lo..."

.

Kan nui dun a,

.

"Tak takin ka rawn kal hman ngang silo a, ka ngai tawh lutuk bawk si che a. Ka lo sawm tawp che alawm"

.

A khuh kharh kharh a,

.

"Sawmte...?"

.

"Um...."

.

"Sawi duh pawimawh deuh ka nei a"

.

"Aw sawi la?"

.

"Palai lam hi ka rawn tir mai dawn em ni ka ti a, ka chhungte hian min nawr nasa ve bawk sia" inthlahrun hmel takin a han ti a,

.

Mak tih hmel zetin ka melh a,

.

"Ka graduate hma hian maw?"

.

A lo bu nghat a, sawi tur hre lovin ka ngawi ta reng a.

.

BUNG-5 NA

.

A tawi zawngin sawi mai ila, Hriattea nu leh pa te chuan tik tak meuhin ka nu leh pa chu min rawn dil tluk tluk mai si a, ka pa pawhin hun la ti chiah lo mah se kan in hmangaih ve nia a hriat avangin palai te tir ve phawt tur chuan a ti a. Rang takin palai pawh an rawn tir a, kan inneih hun chu an ruat fel vat a, pasal ka nei chu a ni ve ta reng mai. Ka nu leh pa thar te chu a n tha em em a, an monu ni lovin an fanu ang chiah in min en a, kan in lam ngaih changna hun pawh ka nei mang lo a ni. Ka pasal in min duat em em mai bawk si a, ka beisei aia hmaah pasal nei mah ila vannei ka in ti a, hetiang bak hi ka tawn leh pawh ka ring tawh lo.

.

Nitin dawr lamah ka buai ve thin a, Hriattea buai lutuk pawh tunah chuan a ziaawm ve ta deuh a, sumdawnna kalhmangte zanah min hrilh a, hma pawh ka sawn ve zel a ni. Graduate loh ringawt chu tha in ka hre lova, form te ka lo fillup vek tawh bawk nen ka nu te chu exam ka dil a, an remti hle a, zan lamah lehkha te zirin ka theih ang tawk tawkin ka tang ve thin a ni. Exam dawn hnaih ah phei chuan dawr lamah pawh kal lovin lehkha zir turin ka pa chuan min ti a, keipawh hlawhtlin ngei tumin ka zir ve a ni.

.

Hriattea chu a puitling em em a, ka pa innghahna ber pawh a ni. An naupang ber Tetea pawh ina awm tawp ai chuan tiin Nupuii awmna Bangalore lamah music zir turin a kal a, kan chhungkua chu kan tlem tawh sa nen kan tlem belh leh bawk a, Tetea awm lo chu ka tan a khawharthlak hle. U tak tak angin min en ve a, ka tan pawh ka nau ka pianpui te nen danglamna an nei lo. Exam pawh tha takin ka zo fel a, dawr lamah nitin ka liam veleh tawh a, in lama awm ai chuan nuam pawh ka ti zawk reng reng e. Kan dawr bungrua la turin Kolkata vel ah Hriattea chu a zin fo a, a rawn haw apiangin thil tha tak min rawn hawn ziah a, nau kan la pai lem lo avangin min la naupang chhe chei ve hle a ni.

.

Kan inneih atang kum chanve dawn a lo ni ve ta reng mai, zing khat kan chawei chu ka pum a nuam lo a, bathroom lamah ka tlan lut vat a, Hriattea chuan min rawn umzui vat a, ka chalah a dawm a, a mangan hmel hle. Ka ziaawm hnu deuh chuan choka lamah kan phei leh a, k nu leh pa chu an lo nui sang mai a,

.

"Vawiinah damdawiin lamah kan kal dawn nia, nau kan pai ve ta a nih hmel" ka nu chuan a ti a.

.

Hriattea nen kan in en a, khatiang renga ka pasal mitmenga hlimna kha ka la hmu ngai lo. Ka pa chawei lai pawh ei zawm thei tawh lovin a lo phi ve chung a, ka nu chu a lo nawr hmanhmawh hle a, keipawh insiam turin min ti a, room lamah kan kal a. Hriattea chuan ka nu te hmuh phak lohna atang chuan min pawm a, room lam kan pan a,

.

"Pa ka ni ve tawh dawn, bawiha nu, ka lawm e aw" a ti a.

.

"Mahse.... ka lo rai kher lo maithei asin" mahni inringhlel tak chuan ka han ti a.

.

Doctor room atanga kan chhuak chu ka nu nen kan hmel chu a hlim sarh a, nau ka lo pai ngei a, thla hnih lai alo ni ve tawh. Inah haw lovin dawr lamah kan tlang a, ka nu chu ka pa awmna lamah a kal a, kei erawh Hriattea hnen lam ka pan thung a. Dawr ka va thlen chuan nidang ang bawkin an lo buai leh hle a, Hriattea chuan min hmuh veleh beisei nei tih hriat takin min lo melh a, ka nui sak a, lawm takin a nui var var a, kan dawr nghaktu senior ber chu a ko a,

.

"Hei vawiin chu ka haw hma dawn a, engkim lo ti fel mai rawh aw" a ti a.

.

A motor khalh lai chu min rawn en a, a nui reng mai a,

.

"I nu te inah chawhmeh kan lei anga kan ei phei dawn nia" a ti a.

.

Bazar lamah kan kal a, chawhmeh te kan lei hnuah ka nu te in lam kan pan ta nghal a. Ka pa hi naute duh em em mai, thenawmte nau pawh a hman phawt chuan awm peih reng mai a ni a, chutia nau kan pai tih a hriat chuan a mittui a tla a, kan hlim tlang a ni. Ka naupai lai hian in sawiselna ka nei hran lo a, mi ten rai no lai a mo nih hrehawm an tih pawh kei chuan ka hre ve lo. Ka chhungten min duat em em a, ka pasal in min duat bawk a, hei baka nuam chu a awm theih ka ring tawh lo a ni. Thla kua a lo liam chuan fapa duhawm tak mai Pathianin min pe a, ka pa chuan a hmungah David Vanlalpeka a sa a, kan hlimpui a, kan chhungkaw rohlu a ni. Hriattea pawh chutia fapa a awh em em a han neih takah chuan a puitling lehzual sawt a, ka hlim lo ang tih a hlau em em a, khawvela pa tha ber ani ka ti lo thei lo.

.

Hun leh ni an lo her liam ve zel a, kan fapa pawhin kum 5 na a hmang mek a, kan duat rawn tih hi a hre ve a, a luhlul ve phian mai. Nupuii leh Tetea pawh an zirlai zir zo tawhin an rawn haw a, Nupuii pawh private hospital ah a thawk a, Tetea pawh ka pa in music school a hawn sak a, naupang zir tir tur a hmu ve reng bawk a ni. Kan eizawnna kan tluang a, kan chhungkaw hlim vanglai ber ti ila ka sawi sual awm lo ve. In lam chu ka kutah a awm tawp a, dawr lam ah ka kal ngai tawh lo. Rilru hahdam taka awm ka ni bawk a, ka taksa pawh a mawi tawkin ka thau a, ka nulat lai ai mahin ka nalh zawk.

.

Nupa inkawmngeih tak kan ni a, zan lamah chhun lama dawr boruak te sawiin hma kan sawn zel dan turte kan nupa in kan sawi thin a, kan hma hun te pawh kan thlir dun ve nasa thin hle a ni. Hun a neih phawt chuan ka pasal hian kan nufa in min lenchhuahpui thin a, dinner pawh kan ei chhuak fo a ni. Ka nu leh pa a ngaipawimawh thiam hle a, ka nau te pahnih pawh an zirna a hautak tih a hria a, a pui nasa hle. Keipawhin a chhungte ka ngai pawimawh lo thei lova, kan thian tam tak te awh kan ni ve hial a ni.

.

Hlimna chauh hi kan tawh tur emaw ka lo ti thin a, mahse lungngaihna pawh kan ta alo ni reng si. Hriattea dawr nghak chu a lo haw tlai zeuh zeuh a, ngaih that lohna pawh ka nei hran lo. Mahse ka tan hun a nei tlem tial tial chu mak ka ti tan ve hle a, phaia a zin pawhin nidanga a kal aia rei a awm ta fo a, mgaihthat lohna pawh ka nei tam ve tial tial a ni. Ka thiannu Sangbawihi chu Kolkata ah a zir zawm a, kan pa hian a kal chuan a tlawh ziah a. Mahse hetia a nungchang a mak tak atang erawh a tlawh ngai ta hauh lo. Phone hmangin ka thiannu chu ka biaa, thil awmdan te ka hrilh a, a theih ang anga phaia kan pa awmdan lo thlithlai chu a tum a ni. Ka nu leh pa chuan kan nupa inkar boruak chu an hre vak lo niin a lang a, ka sawichhuak duh lem lo. Tetea erawh a danglam a, kan boruak chu min zawt vat reng a, mahse a u chu a buai em vang ani tih ka hrilh a, a bak chu ka hrilh duh lem lo a. Nupuii pawh ina a awm hi a tlem hrim a, a u awmdanah ngaihthat lohna erawh a nei tih Tetea chuan min hrilh a ni.

.

David-a pawh sikul a lut ve tawh a, a homework te hi a pa in a tih pui vek thin. Tunah erawh buai a in ti a, a fapa tan hun pawh a nei thei tawh lo. Zanah inah a awm pawhin laptop a thutchilh a, a phone a khawih bawk a, sumdawnna thil vek khawih a ni tih min hrilh bawk a. Han thinrim ngawt dawnin a theih mang silo, kan boruak chu a hahthlak ka ti takzet a ni. Thla khat ah vawikhat tal ka pa te kan tlawh tjin a, chung zawng zawng pawh a ti tawp vek a, kumkhat chhunga kan sumdawnna chu sang taka vawrh a tum vangin thildang a ngaihtuah hman lo tih a sawi a, kan chhungkaw tana tha tur alawm tiin huat ah ka la ngai lo.

.

Zankhat chu ka mu lai hi ka harh hlawl a, kan pa phone hi pawimawh fw ah lo chuan ka khawihsak ngai lova, mahse hemi zan erawh min tur tu a awm tlat a, inthiam lo takin ka han la a, khawih ka tum chuan password alo dah tlat a. Nidangah a dah ngai silo, chu chuan kan nuoa inkarah khi alo nasat tawh zia sawi ngai lovin min hriattir a, ka mittui chu a lo luang ngiai ngiai a. Ka fapa leh ka pasal chu ka en nawi ngawih a, tih harh hlau takin ka tho a. Kan room a sofa kan dahah chuan ka thu a, kan san tar ka en chuan zing lam dar 2 lo ri vel chiah a. Kan inneih tirh a facebook account min hawnsak chu hrechhuak in ka han lut mai mai a, kan nupaa relationship kan dah thin chu a lo awm tawh lo. Kan pa hming ka zawng nghal a, a zinna a a thlalak hmuh tur a tam hle a, kan chhungkaw thlalak chu a hide vek a, relationship ah pawh engmah dah lovin hmuh tur a awm lo. Ka thingthi rawp a, ka mittui chu a tla zawih zawih a, 'Hriatte.... i va danglam ta ve' ka ti chhuak sap a.

.

Chhunah inchhung sekrek khawihin ka buai nileng a, kan pa chu rawn haw in zin thut a ngai ti a sawi a, a insiam nghal mawlh mawlh a. Lungawi vak lo chungin a thawmhnaw chu ka rem a, kan inbe mang lo. A phone a hmang reng a, biak na hun pawh ka nei lo a ni mah zawk. A bag chu a ak a, a chhuah pahin Rs.2000 min pe a,

.

"Bawiha birthday lawm nan, a duhzawng i lo leisak dawn nia" a ti a.

.

A fapa piancham tal chu a la hria alawm ka ti a, ka thlir zui vawng vawng a. Nidang ang chu nise airport a ka thlah a ngiat leh tlat anga, buai chung chungin ka kal leh ngei ang. Tunah chuan min thlakhlelhna reng reng a nei tawh lo. Zu a in ngai lova, a rim hriat tur pawh a awm ngai lo. Fim tak chungin hetiang hian a awm a, mak ka ti a, hriatthiam a har ka ti takzet a ni. Ka nu te ka tlawh khat deuh avangin Bawiha sikul thlah pahin ka leng kawi a, ka nu leh kan naupang ber Mapuia chu an lo awm a,

.

"Mamte, i va cher ve tunlai i dam vak lo em ni?" Ka nu chuan alo ti nghal a.

.

Ni e, ka rilru a dam lova, ka taksa in alo tuar ve pawh a ni ngei ang. Mahse an rilru hah ka hlauhavangin engmah ka sawi duh lo. Mapuia chuan min melh leh zauh thin a, sawi duh a nei niin ka hria a, a room ah tih tur nei ang takin ka kal a, min lo zui vat a,

.

"Ka u, in pa hian ngaihzawng a nei ani lo maw?"

.

"Mapui, chu chu tu sawi nge i hriat a?" Ka lo ti vat a.

.

"Ka thianpa Madina kha i hria em? Kha khan an in bulah u Hriattea a hmuh ngun thu a sawi a, an thenawm nula nen chuan an in phur chhuak thin a tia" a han ti a.

.

Ka lo rin lawk ni tho mah se a tak ngei hriat chu a dan a dang khawp mai,

.

"Mapui ka nu te chu engmah lo hrilh suh aw, theihtawp ka han chhuah ve phawt anga, a tha veleh mai ang" ka ti 

a.

.

BUNG-6 NA

.

Ka phone a rawn ri ral ral a, sitting room ah Nupuii nen a kawr tur kan buapui a, hmanhmawh zetin kan room lam chu ka pan a, ka thiannu Sangbawihi alo ni,

.

"Thiannu, in pa hi a rawn zin lai a ni em?"

.

"Aw ni e, bungrua buaipui a hun leh tawh a, thawhlehni khan a rawn kal a" ka thin chu a phu dep dep a,

.

"Ka thian, pawi ka ti, ka hrilh che a ngai miau si a, in pa hian ngaihzawn a nri chiang a ni"

.

Kan ngawi dun vang vang a,

.

"Hello.. i la awm tiraw Sawmte?"

.

"Aw, Sangbawih, ka la awm e.."

.

"In pa chu ka rin a lo ang lo emai, ka thin a rim lutuk hi ka puakkeh lo chauh. Nimina ka cousin Mizoram House a awm ka va hruai a, tah chuan a nia ka hmuh, ngawi rawh kathian, kartawpah ka rawn haw awn, kan inkawm dawn nia" tiin kan inbiakna chu kan titawp a.

.

Ka melh ngai chu ka melh tlawk tlawk a, Nupuii min kohna pawh ka lo hre lo, room ah a rawn lut a, ka bulah a rawn thut chuan ka lo kuah thlawp a, ka tap ta zawih zawih a. Thil awmzia min zawt a, ka sawi thei lo, min kuah a, ka lungchhe zual pui a reh hnu chuan Nupuii chu ka hrilh ta vek a, min hnem a, min fuih a, ka lam a tan reng thu min hrilh bawk a. Tlem chuan ka ziaawm ve ta deuh a, Bawiha te putu an lo haw tawh bawk nen hlim tak anga ka lan a tul a ni. Kan chawei lai chuan Hriattea chuan min rawn be teh hlawl a, a tuka haw a tum thu a sawi a, Bawiha chanchin te min rawn zawt ve luam a, Sangbawihi kha alo hmu hman pawh a ni mahna!

.

Kan nupa boruak pawh a hma ang em em chu ani ta lo deuh a, zanah pawh chhuak lovin a awm ve ta fo a, ka nun pawh a hlim leh tan hle. Chutianga thla khat dawn kan awm leh hnu chuan a hma ang bawkin Hriattea chu a chhuak leh ta fo a, a phone hi a dek reng a ni tawp, zawi te te a mi biak a nei a, a nun pangngai ah bawk a let le tih ka hria. Ka bei a dawng em em a, theihtawpin kan nupa inkar tih that tumin ka bei a, lehlamah min thurual pui ve duh silo. Ka mangang lutuk chu ka nu (ka pasal nu) te ka hrilh ta ringawt a, mak tak maiin ka nu chuan min hnem a min tan ka rin nen thiam lo min chan tir ta hlauh a! Mak ka ti a, kha leh chen kan lo khawsa ho a, ka chunga a that lohna sawi tur ka hre lo chungin tun tumah erawh ka dem lo thei bik lo. Ka pa erawh a thinur em em a, kan nufa chu min tan bur a, na takin a zilh nghe nghe a ni.

.

"I pasal hi mi bright tak a ni a, inah i awm a, i awm mawl tawp a, hetiang te chuan a iai vat dawn reng che asin" ka nu chuan min ta chat a, engtin chiah nge a fapa lawmna hi siam ngai? 'Nupui ka nei anih chuan kei leh ka fate tan inah awm sela, keiin ei ka zawng anga, kan tan a ni chuan a theihtawpin in lamah tan lo la se ka duh' ti tu a fapa nungchang danglamzia hi a hmu duh lo lui nge a hmuh thelh?

.

Ka fapa sikul kal ka hruai a, kan thenawm lawka awm Nu Remi chuan a tupa a lo hruai ve a, kan haw tlang a, chhungkaw chanchin chu rin aiin an lo hre thui a, mak ka ti hle.

.

"Chhungkaw dinhmun inan loh hi chuan buaina a tam lutuk a, Sawmtei pawh hi kan dawm hram hram a, buaithlak chin a tam khawp mai" tihte chu ka nu min lo sawi duh dan a ni a. Ka rilru a na a, theihtawpa chhungkaw tan ka beih ve na te chu min hriatsak duh lo.

.

Zana ka fapa mu chu ka en ngawih ngawih thin a, kan pathuma kan hlim theih zia te chu ka mitthlaah a lo lang thin. A hma chuan amah ngaihsak em em tu pa anei thin a, tunah erawh fapa a nei toh paw a hrechang tawh silo. Sana ka en a, dar 12 a ri tep a, kan pa leng alo la haw lo. Rei vak lo hnuah motor ri ka hria a, a rawn haw ve hlawl a,

.

"Bawiha pa, khawngaih takin i awmdan hi sim teh, a tawk tawh viau lo em ni?" Ka mittui chu ka dang hram hram a,

.

"Ka awmdan lo sawisel turin tumah ka nunah hian thu nei an awmlo, ka mu dawn" tih leh mut a rual a.

.

Zu i leh rui nise hriatthiam dan pawh ala awm theih ka ring a,mahse chutiang ani si lo. Ka rilru a na a, ka hmangaih hmasak ber ani a, a chungah ka engkim ka nghat thin. Min thlahlel leh min ngai em em tu kha tunah chuan midang a ni tawh a, hmana ka pasal ni thin kha tunah chuan mi hrang a ni ta.

.

Chumi zan atanga zan thumnaah chuan Bawiha lehkha ka zirpui a, ka pasal erawh dawr atang ala rawn aw lo. Kan in zirtir zo tep tawh tih ah a rawn haw a, room ah a rawn lut a,phone a be mawlh mawlh a, a fapa in alo biakna pawh a ngaihsak lo.

.

"Chhuak mai rawh u.."

.

Bawiha nen chuan a pa chu kan en rual thawt a,

.

"Bawiha pa, i lakah hian tih dik loh ka nei em ni? Min hrilh la, ka insiam tha ang. Khawngaihin hetiang hian thutlukna siam lul suh" ka ti a.

.

"Thutlukna ka siam vek tawh, engmah ka sawhsawn thei lo." A ti chang rat a,

.

"Bawiha pawh hi i khawngaih lovem ni?" Ka aw chu a ri chang chang a,

.

"Bawiha chu ka enkawl vek ang, i enkawl theih dawn loh chuan ka hnenah awm rawh se"

.

A hmaah chuan ka thingthi a, ka mittui chu a tla zawih zawih a, ka tlawm a ni,

.

"Hriatte, i rilru ka ti na ngai lovang tiin min tiam kha, engtiziange heti taka i rilru hi alo danglam tak? Ka hmangaih che, ka then thei lo che" ka ti a. A kut ka vuan a, mahse a thingthla a,

.

"Ka hmangaih tawh lo che niin ka hria"

.

A na ani, chuti em em chuan maw mihring hi a lo danglam theih? Khati khawpa hmanhmawha min nei loh hlaua tal buai thin, ka zirlai pawh zo hman lo khawpa min neitu khan gunah ka hmangaih tawh lo che min ti a, ka tliak hnawp a ni ber,

.

"Ka ma che ni rawh se, ka len hlanin in lo haw dawn nia" tih leh chhuah a rual a, ka mumang nise ka va ti em!

.

Bawiha chuan a pu te alo va hrilh a, kan room ah chuan an rawn lut vek a, ka pa chuan launat takin min en a,

.

"In chhuak lovang a duh leh amah chhuak rawh se" a ti a.

.

"A pasal ber a tih lawm zawh tawh loh chuan keini dan theih ani ngawt si lo alawm le" ka nu chuan alo ti a, kan vai chuan kan melh thap a, hetiang boruak kan tawn tawh lai pawhin ka thlavang chu a der paehin a hauh duh lo. .

Ka thawmhnaw chu ka khung mawlh mawlh a, ka pa chuan min dang a, mahse tih ngaihna tak a awm silo. Tetea leh Nupuii chu an tap fap fap a,

.

"Anih leh Sawmte zanin chu va riak phawt ula, in then hi ka phal lo ania, naktukah kan lo hruai leh ang che u" ka pa chuan a ti a. Driver kan ko a, kan nufa chuan ka nu te in lam chu kan pan ta a.

.

Ka nu leh pa chuan hmangaihna nen min lo tuam hlawm a, ka nuta te thin chu a ur em em a, min thlamuan mawlh mawlh thin. Zanah ka mu thei lova, chaw ka ei thei hek lo. Ka taksa chu a chhe em em a, ka fapa avang chauh hian nun ka la chak ve a ni. Bungrua kan la fel tawh a, ka pa chuam a lo phallo nasa hle a, mahse ka pasal berin min duh tawh silo. Hlim taka ka lawi luhna chu mittui nen ka chhuahsan a lo ngai ta.

.

Kan inthen atanga thla thumna lekah Hriattea chuan nupui a nei ta mai a, tuar theih ani lo. Ka rilru hi a nu but a, ka mualpho lo chauh a ni. Hetih lai hian nun chakna ka nei lo reng reng a, ka fapa pawh ka nu leh pa in an buaipui vek a ni. Zankhat chu nasa takin ka inngaihtuah a, min hmangaih lo tu avanga nat reng hi a sawt lo a, fapa ka nei a, chhungte ka nei bawk a, beisei tur ala awm tihchu ka hre thar a, ka nu leh pa min tawngtaisakna rah a ni ngei ang.

.

Lunglen chang chu awm thin mah se ka theih ang tawkin ka tawngtai ve thin a, zawi zaeiin ka rilru na pawh a ziaawm ve ta. Ka phak ang tawk tawkin lehkha ka in chhiartha leh a, hna te ka dil ve lawp lawp a, tlin erawh a har viau thung. Ka thian pakhatin an office ah LDC hna a ruah thu leh dil ve tura min duh thu min rawn hrilh a, ka beidawng tawh viau na a ka dil ve ta a. Ka beisei loh lutukin ka tlung ta hlauh mai a, vanduaina karah pawh vanneih ni zawng alo her ve thin alo ni.

.

Nitin hlimna thar ka chhar ve zel a, ka fapa pawh an class ah a thiam ber ani zel a, a pa hmangaihna hlawh lo mah se ka nu leh pa, a putea te hmangaihna zawng zawng a chang a, Lalpan min ngaihtuah thin tih chu ka chungah a takin alo thleng a. Hlim takin ka nui leh thei angem tih pawh ka ngaihtuah mgam tawh loh laiin nitin hlim takin ka nui leh thei ta.

.

Nikhat chu office chawlh ani a, Bawiha nen bazar lamah kan chhuak a, Nupuii nen kan in hmu hlawl a, ka laizawn ang maia ka lo en thin a ni a, ka ngai ve takzet ani. An chhungkaw chanchin te min hrilh melh melh a, an hlim lohzia leh kei min ngaihzia chu a sawi a,

.

"Ka u pawh hi a hlim thlawt lo, zankhat a room a ka kal pawh in chhungkuaa in thlalak kha a lo en ngawih ngawih a, a thil tih sual khan a vaw let ve ta aniang. A hmaa zu far khat lawh in ngai lo kha tunah chuan a in reng a, dawr pawh a enkawl tha thei lo. U Sawmte, kan ngai takzet che" tiin min hrilh a.

.

Ka hnaah ka buai hle a, thla tawp hi chuan kan buai hle thin reng a, office ban hun pangmgai aia tlaiah kan bang a, kan in thlen hma kawi ah motor a ding a, ka pel dawn lai tak chuan min ko ri ka hria a, Hriattea alo ni. Zu rim a nam hle a, kan inngaihzawn laiatanga kan inneih hnu thlengin vawikhatmah zu a la in ngai lo. Ngaihzawng min neihsan lai pawh khan a in ngai chuan lova, tunah chuan amah kha ani tawh lo takzet a ni.

.

"Sawmte, min ngaidam rawh aw... Engvanga khatianga i chunga ti nge ka lo nih? Sual hian min lo luhchilh hneh em ani" a ti a. A mittui chu a hru zauh a,

.

"Min ngaidam thei tawh lo mah la ka tihpalh takzet tih min hriatsak rawh aw, lo let turin ka beisei ngam tawh lo che, ka fapa nen ka hmangaih takzet che u tih hi min hriatsak dawn nia" a ti a.

.

"Ni e, Hriatte, tunah chuan nupui i nei a, keimah ang mai mai kha chuan awm san ve suh ang che. In fa lo piang tur pawh fahrah nih tir tawh lo la, tha takin i nun i hmang tawh dawn nia" ka ti a, ka kalsan ta.

.

Ka hmangaih em em thin ala ni reng a, mahse tunah chuan ka chan tawk hi ka pawm ve thei tawh, ka mittui englai pawha ka bianga luang thin pawh tunah chuan a hul ve ta...

.