NO GOOD IN GOODBYE

NO GOOD IN GOODBYE
.
(Ka story reng reng hi ka phalna la hmasa lovin khawiah mah chhuah chhawn ka phal lo)
.
Ka fapa sikul kal tan tir buaipuiin ka hun tam zawk ka hmang a, thi lek leka ka hrin ka fapa Adria chu ka atchilh takmeuh a, chutiang bawkin ka nu leh pa bakah ka unauten an buaipui em em a. A pa duh loh leh hnawl ni mahse keini chhung tan chuan kan rohlu a ni. Ka hun kal tawh kha in bawhbuai tir ka duh lova, mahse ka fapa hmelah erawh ka hun kal tawh chu loh theih loh in alo lang thin thung. Andria school bang lam turin ka chhuak a, traffic jam avangin ka tum ai rei kawngah ka tang a, ka sana chu ka bih leh zauh thin a, ka tlai ang tih mawlh chu ka hlau ani. Vawiin ni ber khera scooty keng lova car ka keng chhuak chu mawl ka in ti hle a, awmzia lah chu a awm tawh der mai silo. Reiloteah ka bul lawkah bike a rawn tlan lut a, a inhnawh tawt em avangin kal ngaihna hre lovin a ding ve reng a, kan hmaa kawg awm dan en tuma ka dakchhuah chiah chu ka thisen kal lai hi an tawp mai dawn in ka hria. Ka bula bike rawn ding chu tu ta nge tih ka hrechiang lutuk tlat. Rem leh rem lovin ka han bih a, a hmel pa hrak leh a taksa in phutmawi tak te, a nui hmel mawi leh mi hipna ngah zet te kha a la pangngai reng ani. Ka thinphu zeih zeih chu ka han dawm vang vang a, lum tih vang ni miah lovin ka thlan fim a rawn bawl tek tek a, hetiang em em a keimaha effect ala nei hi ka duh lova, ka in haw takzet ani. KA phone ri chuan min ti phu zawk a, ka nau alo ni, traffic jam a ka tang min hmuh thu leh Andria chu aman a lam dawn thu min rawn hrilh ta hlauh a, ka lawmzia chu min hriatpui kher lovang.
.
“Fa ka duh lo, fa kan nei mai lovang tih min tiam ani lawm ni? Ka ring thei tawh lo che min chhuahsan rawh”tia in atanga min hnawtchhuaktu kha a hmel a lo la pangngai reng a, amah ka hmuh apianga keimaha danglamna bik a neih thin pawh kha kum 5 lai a liam leh hnu pawh hian ala danglam lo. Ka thiannu Tei dawr ka thlen chuan amah chiah a lo awm a, ka hmu chu ka insum zo lo, ka kuah thlawp a, “Te, a lo let leh tawh”engmah dang ka sawi thei lo, “Niminah ka hmu a, ka hlauh ang ngeiin I lo hmu ani maw?”a ti a, engkim min hriatpuitu leh min hmangaihtu thian ka neihchhun hmaah chuan ka tap ta zawih zawih a. Khang hun liam tawh ah khan ka natna te chu an dam kim tawh emaw ka lo ti a, mahse a takah ka han hmuh leh meuh chuan ka thinlung hliam te kha an lo la dam loh zia ka hre thar a, duh lo in tlawm thlak ti mah ila ka dan theih a ni silo. Ka kawng lo zawh sual tawh khan min vaw let a, ka damchhung pawhin ka siamtha thei tawh dawn silo. Rilru tawt leh ipik ru zetin inah ka haw a, ka fapa min ngai leh min thlahlel em em tu hmel ka hmuh rual erawh chuan thawklehkhatah ka thawveng hawk a. Engvangin nge ka lo tihsual tawh avang khan ka in dawm kun reng ang, beisei tur ka la nei alawm tiin ka insehruh a, “Min lo thlir reng ang che, nang ai ka hlim zawk anga, chuan ka dinhmun pawh a tha zawk ang”tia mittui nen a ka thu lo tiam tawh kha ka tihlawhtling ngei tur a ni.
.
Zan lamah bak lehkhabu chhiarna hunawl ka neih loh avangin Andria mut hnuah am takin ka inchhiar thin a, ka phu tawk hna hmuh a ka fapa hi nuamsa taka enkawl hi ka chak thin. Ka room kawngka chu a rawn ri rak a, ka nau Mapuia chu inthlahrun hmel tak hian a rawn lut a. Ka nau hi misual tak ani lo na in zu in ve zeuh zeuh hi a ching thin a, zu a in tawh phawt chuan a inthlahrung ngawih ngawih thin. A hawiher leh a cheziaah hian zu a in leh in loh chu ka hre nghal thei a, kan chhungte dangin an hriat loh pawhin kei chuan ka hai ngai lo. In chhang bung chiah kan ni bawk a, kan inkawmngeih fal hle , u mipa pahnih ka la nei bawk. An farnu neihchhun ka ni a, phaia lehkha zira an dah kha hmingchhiatna tinreng nen ka haw a, mahse kamkhat mah in ka rilru natna turin min ti ngai lo. Mi ngaih ah chuan sawn pawm ka ni a, mahse chutiang chuan vawikhat pawh ka la in ngai ve chhin lo. Mi min selna leh min diriamna zawng zawng chu min tichaktu atan ka hmang a, ka fapa a rawn pian chiah khan kan chhungkua chuan hlimna thar kan tawn belh ta reng a ni. Kan khumah chuan Mapuia chu a rawn thu a, ka fapa mu chu a thlir veng veng a, “U, in nufa hian hlim takin awm reng ula ka ti ani”a han ti a, ka lehkhabu keu lai chu ka khup a, “Mapui, kan hlim lutuk alawm, Bawihtea nen kan mamawh engkim chu in hnen atang kan dawng zel alawm”ka ti a. Chutah engemaw sawi tumin a han ang deuh zuau a,”Nimin khan Nunfela ka hmu a, sawi tur anih leh nih loh chu ka hre chiah lova, mahse I hmuh hunah a thawng lutuk loh nan che sawi ka duh bawk si a”hreh deuh tak chuan a rawn tichhuak a. Ka nui hak a, “Ka hmu tawh alawm, ka beisei loh lutuk a ka hmuh vang ani angem ka hre lova, ka hmu chu ka lo in lak paukhauhna te kha an bo vek mai mawle”ka ti a, “I lo hmu tawh maw? Ehe! Nangmaha danglam vak thin alo reh ta aniang chu maw nangmahah danglam ka hmu tawh miah lo”hlim hmel tak chuan a ti a. Kan hma hun te sawiin rei tawk tak kan titi zui a, hma hun duhawm tak hian min hmuak ve niin ka hria a, beiseina nen hma lam pan zel tura infuih tawnin mu tur chuan kan in mangtha thei ta hram a.
.
Ka nu pui turin bazar a kan dawr lam chu ka pan a, bungrua a rawn thlen thar hi chuan kan nula nen ringawt a buaipui a hautak avangin ka pui ve fo a, ka kal ni hi chuan kan nula Partei lah in nuam a lo ti nasa thin bawk. Chhun thingpui ina kan chawl tih loh chu kan buai nileng thak a, kudam nen kar tawn reng a ngai bawk nen tlai lamah chuan tawng peih pawh kan awm tawh lo. Dar 4 velah ei rawngbawl turin ka nu in min haw tir a, hmanhmawh lutuk lovin dawr atang ka chhuak a. Ka motor park na ka thlen chuan traffic police pakhat hian ka car number hi a lo chhinchhiah mawlh mawlh a, hmanhmawh takin ka pan a, thil awmzia ka zawh chuan ka car park na chu two wheeler bak park an phal lohna hmun a nih thu a lo sawi a. Nidang zawngah pawh helai hi ka park na hmun ani a, chutianga karhnih khat ka kal loh chhunga an lo phal lo chu ka hrethiam lo viau nghe nghe. Chu traffic duty la naupang hmel zet te chuan inthlahrung deuh tak hian an pute tirh anih thu leh a duty tihhlawhtlin chu a tih tur anih thu chu a han sawi a, “I lung a awi chiah lo anih chuan kan office lam ah min zui chho mai ta che, pu te hnena hriatthiamna I dil chuan an lo hrethiam thei mai tur che asin”a han tih chhunzawm a. Chulai hmunah engmah signboard in tar ka hmuh loh avangin ka thiam lohna a awm in ka in hre lova, an office lama kal ka duh thu chu ka sawi a, kan pahnih chuan kan in phur chho ta nghal a. An pu room ah min hruai a, thil awmzia ka sawi hnu chuan thil engemaw hriat fuh loh palh a awm anih chu tiin awlsam takin min chhuah leh ringawt a, ka motor a ka luh dawn chuan min man tu pa chu pawnah alo ding a, “Thil engemaw hriat sual palh a awm vang ania”ka ti a, a inthiam lo hmel ka hmuh chuan nelawm takin ka han nui sak a, chutah a rawn nui ve ta var var a. Ka ngaihtuah let a, min mantu pa chu a hnaah ala junior hle anih ka ring a, amah inringtawk lo leh hmel buai deuh nak te chuan min tihlim ta phian a. Thil engkim chik mi ka ni a, kan din tlan lai hun reilote chhung khan a kawr hmaa a hming in tar Lalthanzuala tih pawh ka lo chhiar hman tak kha mawle!
.
Zanriah kan eikham fel chuan chanchinthar alo chhuak chiah a, ka pa hi ina a awm phawt chuan chanchinthar kan en hmaih ngai lo. Infiamna khawvel a chhuah dawn apiangin ka thutna ka thawhsan thin, a chhanchu Chennaiyin Football Club striker chhuanvawr Lalnunfela chanchin an rawn puan tel apiang hian ka thinlung hi hliam in a awm nawn thin a, chu chu ka tlanchhiatsan a ni ber. Mahse hemi zan hi chuan dawihzep reng renga hun hman chu a ngai tawh lovin ka hria a, ka nau bula ka intiam ang khan hmachhawn ve zel chu ka duh tawh ani. Aizawl a ka hmuh avangin chawlh hmanga rawn haw ah ka ngai sa reng reng a, chanchinthar ah pawh chuan chawlh hmanga rawn haw a nih thu leh a mimal thil pawimawh ti tur a lo chuang chhuak anih thu a sawi te pawh an rawn tarlang a, “A nakruk bo a zawng hmu ta ani thei mai angem?”tiin fiamthu in an kap nghal zeuh bawk a. Ka chhungte chuan min rawn melh deuh thap a, ka in sangmar teuh chu an hriatthiam loh hram ka beisei. Andria chu ka malchungah a mu a, a sam chu ka tuai sak neuh neuh a, an sam kir chiat mai leh an mitmeng mawlh hi pafa an nihzia nemnghettu chu a ni. Ka muhil thei lo chu ka in let sek a, ka mipa zah ber leh ka ngaihsan em em thin kha hniam taka min dahtu ani ta a, ka hriatreng theihna tura fapa min petu chuan min hre ta miah lo ang maiin hun a hmang tawh si a. Ka mittui chu a rawn hnam sawk a, ka mittui hi a phu lo ani ti mawlh mawlh chung chuan ka khap let sak a.
.
SIX YEARS AGO
.
Chennaiyin FC leh Mohun Begun FC inkhel en turin ka thiannu Tei nen hostel atang kan chhuak a, vawikhatmah ka la en ngai lova, football hrim hrim hi ka ngaihven lova, tv ah pawh ka en ngai lo. Mahse ka thiannu Tei hi football ngaina em em mai ani a, amah chauh pawhin zanrei tak thleng tv a inkhel a en peih thin. Chutiang taka a atchilh vang chuan inkhel enpui turin min sawm fo a, ka peih ngai chuang lo. Nikhat chu min sawm ngun em vang leh amah pawh ka hmaizah zozai tawh avangin ka kalpui ve ta nge nge a, inkhel turte club hming a sawi pawh chu a sawi zawh rualin ka theihnghilh leh nghal mai a. Patling rualin ball pakhat an inchuh luih luih chu a ho ka ti ru hle a, inkhel pawh en mumal lovin ka phone chu ka bih a, Tei erawh a au na lamah a dang te pawh a ro zo tawh. Hun a tawp pawh chuan tute chak tih ka hre chuang lova, ngawi rengin haw turin ka insiam a, Tei chuan min rawn hrilhtu sar sar a, “Chennaiyin striker khu I hria em?”a ti a, ka lu chu ka lo thing mai a, “Lalnunfela ania, ani em chu hre ve la a lar tehreg nen, autograph sign tir ka duh a, lokal rawh hmu ve lawk ang midang rual khuan”tih pah chuan min kai ta dawr dawr a. Mizo dang pawh an lo awm nual a, chutianga an bawr deuh hut avang chuan chhak deuh hlekah ka lo ding a, chutia ding pah chuan mi che vel chu ka en reng a, Nunfela hmel chu hmuh tumin ka ring chu ka han fan a, chutia ka hawi lai tak chuan a rawn dak chhuak a, kan mit leh mit chu a in tawng ta sak a. Ka lo rin dan chuan Mizo mipa te lam, tha ngah zet mai leh khal deuh ni turah ka lo ngai ve rawk a, min barakhaih chiang hle. Mizo mipa ka lo suagtuah thin leh duh thu ka lo sam thin ang chu amah ah chuan a awm kim vek ni mai hian ka hria a, a sanzawng chu ft 6 a tlin lohna a tlem viau in ka ring, hmai sin lam lek lek, hnar ngul nalh tak mai, sam kir chiat ani a. A nuih zawnga a ha var rual tak mai te chuan ruihtheihthil laka a fihlimzia an lantir a, a mithmul buk lek lek te, a khabe a khuavang te chu duhthusamin a inhmeh a, amah ka lo hre ve lo chu zahthlak ka ti thar hliah hliah bawk a. Hostel kan let leh hnu te chuan engmah ka rilru ah a awm thei lo, ka laptop ka on a, Lalnunfela chanchin hriat chian tumin internet ka connect nghal mawlh mawlh a. Heti taka Mizo mipuiten an buaipui leh Mizo mai nilo India ram pawn a thlamuanpui em em hi hun kha lehchen ka lo hrelo chu ani si a, ka ngaihtuah chian phei chuan ka zak ru chem chem a. Mahse mahni tuipui miah loh thil anihna chuan thiam ka han in chantir leh thin bawk a! Mitthlaa a nui hmel hmu chung chuan muthlih tumin ka han chhing ta vang vang a.
.
College kal turin ka insiam a, tuk dang zawng aiin ka phur zawk,a chhanchu ka rin loh lutukin facebook ah betu ka nei a, tudang ni lovin Lalnunfela ani. Rei ngial reply tumin ka laptop ka thutchilh a, ka tha a khurh nasat luatah reply lovin ka out ta ngawt a, class ah pawh chuan thildang ka rilruah a lut thei lo, ka message chhan let dan tur ngawt lo chu!
.
PART II
.
Kan ban hnu chuan ngawi rengin ka haw a, Tei pawh ka hrechang tawh lo. Nidangah chuan a bang hmasa zawk kan innghak ziah a, mahse ka rilruah thildang daih a awm avamgin ka thiannu pawh chu ka lo theihnghilh phah thak a, hostel a ka let hnuah ka hrechhuak chauh ani. Message thawn in ka nawm vak loh thu leh ka hawsan thu chu inthiam lo ri takin ka thawn ta a, ka thiantha ber ani a, min hrethiam em em ang tih chu ka hria. Facebook ah ka lut a, message thar pakhat chu a lo awm leh a, ka han hawn chuan Nunfela bawk alo ni. A msg hmasa ah khan 'hello' tih chiah anih avangin chhan dan tur kha ka hre lo a, tun tumah erawh chuan ka college kalna min rawn zawt ta thung a. Min zawh chin chiah chu ka chhamg a, ngaihzawng la nei ngai lo leh hetiang lama expirience ka neih loh hrehawm ka tih hmasak ber na a ni. Min chhanletchu ja han beisei ru deuh a mahse chhanna ka hmuh mai loh avangin ka out a, phur lo takin ka lehkhabu chu ka han keu a. Rei vaklo hnuah Tei pawh a rawn thleng a, nidang ang bawkin hlim takin a rawn zai lut a, a khumah chuan a han tlu nghal a, "Thil mak deuh mai a thleng a, enge anih ring rawh le"ka tihchuan a mitko chu a han san zauh a, "Thil mak.... eng lam nge?"a nui sang a. Ka khumah chuan ka han lawn kai a, "Inkhel en tur khan min sawm lui lovang tih kha ka hlau"ka ti a, "Hey..... Nang hi.... Lalnunfela chhiatlohzia i hre ve ta ani maw?"a lukham chuan min rawn vawm zui nghal a. Rang takin ka han vawm let a,"Chu mai ani lo, min rawn be maithei bawk ahhh...."ka tih chuan a in perh tho nghal a, "Engmaw?!"a meng bial kawk a, "Chiang deuhin min hrilh rawh"ka bulah chuan a rawn mu phei nghal a. Min rawn biak dan ka hrilh chuan ka chhanna min zawt nghal a, "Um.. a tha e, ngaihsak lo ang tak khan lang lui tlat ang che"tih pahin min han siai zeuh a, "Min duh huam tu ai chuan min han induh khum deuh hlek tu te hi bawhzui an nuam in a phur awm zawk, chumi hrechiang tur khawp chuan tawn hriat ka ngah ve tawkin ka hria"a han ti zui a.
.
Zan rei tak thleng a ruka ka thil chan chu ka dawng lova, a ruk tak chuan ka chhan dan chu ka duhtawk lo hle a, a chang in ti hian ka han ngaihtuah a, hmeixhhia duh duh thlang thei chuan a duh duh a be kual anga,lo buai vak tur ani lo ti tein ka han inhrilh leh a. Mut chhuakin min rawn zem chiai chiai a, online reng chung chuan ka lo muhil daih a, ka thanharh chuan ka sana ka bih vat a, zing lam dar 1 alo pel chiah a, ka laptop chu off tumin ka han ban a, fb a msg lo awm chuan ka mutchhuak chu a rawn ti reh chiang ngei mai. Tei chu ka han ko a, a mutna ala rei lo ani ngei ang a rawn harh nghal thuai a, “Saturday ah inkhel en tura I lokal leh ka lo beisei ( “ a han chhiar ri koh koh a, “Aawiii…. I lo kal ve ngei tur ani, engtinnge I hmaih theih ang?”a ti chul a. Ka mumang anih leh nih loh chu hriat tumin ka han insik a, a tak ngei ani. Rei tak a chungchang chu sawi zuiin mut nachang pawh kan hre lova, hetiang taka mipa pakhat laka luanliamna hi ka la nei ngai lova, chu chu ka thiannu pawh hian a hrechiang khawp mai. Ka mumangah a nui hmel mawi tak mai te, a sam kir chiat mai te chu hmuh tumin ka han maimitchhing ta vang vang a. An inkhelh leh hmasak ber chu hmaih ka tum lo kher mai, ka en ta reng bawk a. Chumi ni atang chuan a lakah ka tang nghet ta nghal hmak a, ka chhuah leh theih pawh ka in ring tawh lo.
.
A tawi zawngin sawi tawh mai ila, khang hunlaia ka nuna thil thleng reng reng kha a thleng rang lutuk a, keimah hi ka inpuahchah hman lo ani ber. Nunfela nen pawh kar lovah kan inkawp chu ani mai a, hmangaihna vang ani em tih chu ka hre lo, mahse kan inhip tawn takzet ani tih chu phat rual ani lo. Ka zirna in a tuar hmasa ber a, achhanchu ka nunah a vawikhat nan mipa duh ka tawng a, ka thinlung zawng zawng hi a luah khat vek a, lehkha zir lo lek in ka lo ngaihtuah leh thin. Hmeichhe tam tak zingah a thlan bik nih chu ka lawm bawk a, min zahpui miah lova a hunawl neih ang ang ka kianga a hmang thin te chuan amah min duh zual tir a, min hrilh lawk miah lova kan college a min rawn hruai ni mawlh kha ka theihnghilh thei lo. College kawtah mi tamna lai takah rose par seng kengin min lo nghak a, miin an melh hrek hrek pawh engahmah ngai lovin ka chhuah hma chu min lo nghak a, ka va hmu thut ka hamhaih zia te kha! Tei chuan min nawr phei nawk nawk a, duhsak taka min rawn kensak rose par chu ka han la a, ka han hmin vang vang a, mitt la lo lekin a ni in min lo thlir thung a. Chutiang chuan ka rin loh deuh deuh a chet chu a ching thin a, lehlamah mi mitmei ven a ngaihzia ka hrilh chamchi a, a nui liam mai mai thin.
.
“Innei mai ang, ka nu leh pa pawh ka dil tawh a, rem an ti vek”kan hostel bula park ah chuan kan thut lai chuan a rawn ti chhuak hlawl a, “Eng a?” ka meng bial kawk a, “Innei ang ka ti anih chu”ka biangah a piai zeuh a, “I ti awm ang lo e a, ka zirlai ala laklawh si, bakah kan inzuina pawh a la rei lo lutuk”ka ti a. Anihna takah chuan a tir te atangin thil a thleng rang lutuk a, ka ngaih pawh a tha lo ve lek lek zawk. Ka kut chu a han hum a, “Mali, enteh, innei tur hian inzui rei a ngai kher hleinem, inkawp rem tur tak kan ni in kahria, kan innei anga, mahse fa chu kan nei mai lovang. Nangin I zirlai I zawm reng tho anga, kumkhat ila hmabak a, chumi chhung chuan keipawh fa nei turin ka inpeih hman anga, pangngai takin khilamah kan innei anga”a han ti dap dap a, “I kianga awm chu ka thlahlel takzet alawm, mahse nu leh pate hriatpuina tellova lo inlak ve ngawt chu thil dik aniin ka hre lo. Kumkhat chauh chu han nghak ila, chumi hnuah chuan kan innei thei tho alawm”a rilru hneh tum tak chuan ka han ti a. Mahse a hmel ah chuan rilru thlak tumna hmel a lang lo, “Ka nu leh pa hriatpuina vek alawm, I awih lo anih chuan I be thei alawm, mi tam tak pawh an inru a, chutiang chu ani ve mai. Lo inngaihtuah la, nihnih hnuah I rilru min hrilh dawn nia”a ti a, ka lo inngaihtuah tur thuin kan inthlah a. Thil tam tak ka ngaihtuah a, thil tha ber ani lo tih chu ka hrechiang khawp mai, chutih rualin Lalnunfela ka duhna chuan min nawr ve ut ut bawk si, zanhnih chhung chu mutmu pawh ka tuah mang lo, atawpah chuan thutlukna chu ka siam fel ta nge nge a, Lalnunfela nen inkhatah kan cheng dun dawn ta tihna anih chu. Ka thuthlukna ka hrilh ni chuan a hlim hle a, a flat luah lamah ka thawmhnaw kan thiar phei a, ka thiannu Tei chuan min remtihpui chiah lo na in min dang lui chuang lo. Ka duh ve zia min hriatpui tu ani a, ka zirlai thlahthlam lo tur erawh chuan min chah ngun hle.
.
Kan innei chu ani ve ta ringawt mai a, Nunfela sawi angina a nu leh pa chuan min rawn hriatpui thlap a, ka chhungte erawh chuan an hre lo. Ka lakah duh pakhat anei a, ahmaa a sawi tawh tho ani a, chu chu fa kan la nei rih lovang tih chu ani. A chhan ka hre lova, mahse keimah nena fate tihbuai lova life enjoy a duh vang leh ka zirlai z phawt ila a duh vang niin min hrilh a, a ni turah ka ngai hmiah bawk ani. Mi sual ani lova, a zaidam hle bawk a, a theih ang tawk chuan min duat ve tih pawh ka hria, mahse hetih chhung zawng pawh hian hlauhthawn rukna hian min kiansan tak tak lo. Engvangnge tih chu hre lo mah ila kan inlaichinna chu derthawng hle in ka hria a, chu chu kan chen dun atanga thla rukna lekah a takin alo thleng a, ka luak chhuak leh pum nuam lo reng avanga ka inentir chuan nau ka lo pai reng ani tih doctor in min hrilh a, engmah ka sawi thei lo. Huphurh em em in ka haw a, damdawi ka ei reng chunga ka rai chu mak ka ti a, ka hrethiam thei lo ani. Lehlamah Nunfela pawh chuan chutiang thil a thlen tawh tho chuan lawm takin a fa chu a pawm theih mai ka ring bawk a, hlau leh phur ru tak chuan a practice zawh ka lo nghak a. Nidang ang bawkin a rawn thlen hun pangngai ah a rawn thleng a, ka inentirna chanchin min zawh chuan ka lehkha chu ka pe a, a thlek vung vung a, ka lungphu te chu an chawl deuh thup hian ka hria. A rawn hawi chhuak a, “Ka hrethiam teh nuai lo, enge ni ber a?”a ti a, “Nau ka pai..” ka sawi zawh hma chuan a thutna atang a rawn tho chhuak a, “Eng a?!!!”a aw chu a zawi hle a, mahse a ring em ems i, “A theih loh, damdawi I ei ziah ani lawm ni?”ka dar ah chuan min vuan a, min thing nawk nawk a, “Aw.. Ei ziah e, ka hrethiam tawh bik lo ani”ka tih chuan min thlah a. A melh ngai chu a melh tlawk tlawk a, “Titla mai rawh”ka mitah chuan min melh ran a, “Engmaw I sawi, tihtlak maw?”ka lu ka thing a, “Ka fa ani a, I fa lo piang tur engtinnge chutiang chuan I tih theih?”ka ti a, ka mittui chu a rawn baw zawih a, “Ka thu lo anga I kal dawn anih chuan min chhuahsan thei ang”a ti a. A rilru dik tak hi enge ni ang tih ka hrethiam hlawl lo ani, “Fela, chutiang thil chu ti lul suh”ka hrawkah hnawhtu a awm a, ka tawngchhuak thei lo, “A tir atangin ka sawi lawk vek tawh, fa chu ka hmanhmawh lo ka tih kha, pa ni turin ka la inpeih lo. Eng game nge I khelh tih pawh hi ka hrechiang lutuk, ka neih duh tak tak che ring lovin nau I lo pai ani. Ka thu angina engmah I ti lova, I thu anga awm I duh alawm, nau lo piang tur pawh chu ka fa ah ka pawm lo, min chhuahsan vat rawh”a ti a, room lamah a kal nghal a. Chhuatah ka thu sawp nawk a, ka mittui chu a rawn dir zung zung a, tunah chuan ka kehchhe zo ta vek mai. Ka lo innghah ve na leh ka zahawmna te chu engatanmaha min ngailo tu hnenah ka lo hlan vek a, hlauthawng chungin risk ka la a, tunah chuan ka tihsual rah ka seng a ngai ta. Mittui nen hostel ah ka let a, Tei chuan engkim min buaipui vek a, ka natzia hria in min thlahthlam ngai lo. Exam a hnai tawh a, lehkha ka zir thei silo, ka mang a ang a, ka thiannu in min manganpui bawk a, tihtheih kan nei silo. Pass pawh In beisei tha ngam lovin ka exam a, ka zo ve thei tawk a, ka chhungte hnawhchhuah ka tawk ve angem ka hre silo. Huphurh takin ka haw a, inthup reng theih ni hek lo ka pum rawn puar zel chuan nau ka pai tih a rawn ti lang a, thil awmzia chu loh theih loh in ka sawi a ngai a. Nu leh pa, unaute hmangaihna lo nasatzia ka hriatbelh a, ka fa lo piang tur, a pian hma hauh atanga a pa in aduh loh chu kan chhungkua erawh chuan lawm takin an lo pawm ta thung ani.
.
Ka hunkal tawh ka chhui kir lai chuan ka thinlung na chu a rawn so bawrh bawrh a, min ti na em em tu khan ka mittui hi a phu reng reng hleinem tiin ka infuih sauh sauh a. Chak takin ka awm ang, ka fapa chu pa tello pawhin nuamsa takin ka dah ngei ngei ang. Ka kianga thlamuang taka mu ka fapa chu a biangah ka han fawp a, “I pa in a pek theih loh hmangaihna chu kei hian a vaiin ka pe kim vek ang che”tiin ka phun sap a.
.

PART-III
.
Andria nen dawr lam panin kan inzuichhuak a, ka nu hriselna a that vak loh avangin dawrah a awm tam thei lova, ka hunawlah chuan ka nghah chhawk thin. Andria school chawlh chhung chu nitin ka nghak a, a pangchan a chhuah chang hian min ngen ve a, ka hruai ve thin. A changchuan ka nu leh pa kiangah nilengin hun a hmang ve a, zanah erawh ala mu hrang ngam ngang lo thung. Dawr kan thlen chuan kan nula Makimi a lo awm tawh a, nula ze zawi tak mai leh tawng tam lo tak ani a, ka bulah erawh a titi ve siam siam thin. Khua a nuam vak lova, coffee kan in deuh sek a, in hralh pawh a har angreng viau. Chawhnu her ah chuan Andria school pheikhawk a that vak tawh loh chu ka hrechhuak a, kan dawr atanga hla vak lo ah chuan lei turin ka chhuak a. Kan dawr hi traffic point bul deuh lawk ani a, duty ho hi kan dawrah chuan an rawn chawl ve nasa thin. Ka let leh hnu pawh chuan Traffic police zinga ka hmelhruat tha tak Lalmama chu alo thu leh reng tawh a, "Nuthlawi hmeltha in dawr i nghah hi chuan nuam hi kan ti tlang ani"nidanga min fiam dan ang bawk chuan min lo fiam hlut a. Makimi nen chuan engengemaw sawiin an titi a, keipawh Andria nen games kan khel a, kan hlim dun ve hle. Dawr kawtah tak chuan car leh scooty chu chiang fahran hian an rawn in su bur a, hmanhmawh takin kan tlanchhuak nghal dial a, thisen chhuak ka hmuh avangchuan Andria chu ka pawm vat a, ka luh pui leh nghal a. Hlauthawng takin min pawm bet tlat a, a thaw a pangngai thlap thlengin ka pawm bet a, nui ver ver chuan min rawn melh a, "Ma, an fimkhur lo tiraw?"a rawn ti a, "Um..an fimkhur lo anih kha"ka ti a, ka nuih sak a. Rei vaklo hnuah Makimi a rawn lut a, "Scooty khalh zawk kha a thiam lo zawk anih hmel, U Mal, nangpawh fimkhur viau rawh aw"a rawn ti lut ve a. Lalmama chuan min rawn ko lung lung a, "Coffee kan duh, mi pahnih tan"pawn atang chuan a rawn ti a, "Lalmama lah hi mi hi a ngam leh lutuk mai"ka ti a. Makimi chu coffee chhuang turin a tho nghal a, Lalmama chu mi pakhat nen an rawn inzui lut a. Ka lo enchiang lem lova, "I inren lutuk a thlawna in hi i tum ringawt zel mai"ka lo ti hluk a, "Nuthlawi ta ngei hi in man a awm bik alawm"a ti a, a nui huah huah a. A bula ngawi renga lo thu ve chu ka han en chian chuan Lalthanzuala te kha ani tih ka hria. Ka va nuih sak a, a lo then ve tha a, "Hei ka nau fel lutuk Thantea anih hi, hetah hian a rawn duty thin dawn a lo duat viau angche"Lalmamachuan a ti a,"Kid thar tur ka nei tihna anih chu"ka ti a, "Hei hi Mali anih hi, nuthlawi mah nise min han duh se chuan ka iai lo teh mai ania"a han ti leh hram a. Thantea chuan ngawi rengin coffee chu a in a, a khat tawkin min rawn melh leh zauh thin. Andria chuan ice-cream lei a ngen tlat a,khua a nawm loh avangin ka remti chiah lova, mahse a ngen nasat avang chuan ka khawngaih leh deuh a, "Bawihtea hi ice-cream ka va lei pui ange lo thu rawh u"ka tih chuan Thanteachu a rawn tho chhuak vat a, "Khawi keiman ka va leipui ange"a ti a. Andria chuan a hmelhriat loh hi a duh vak ngai lova, mahse mak deuhin Thantean a pawm chuan a lo duh ve mial a ka lawm ru ngei mai. Chuti nilo se a zak ang tih ka lo hlau ani. An rawn let hnu pawh chuan an infiam a, naupang in an ngainat danah chuan a sual lo tih ka hre mai. Chu chu amah Thantea nen kan inhriat chho dan chu ani. Hun reiloteah inhmelhriat thang tawh ang maiin kan in nel a, dawr ka nghah apianga ka inleng nghet ani chhunzawm a, Andria chu a ngaina hle a, Andria pawn a ngaina ve hle bawk.
.
"Vawiin chu ka nuamsam vak lova, ka inentir dawn a"tiin zingah msg min rawn thawn a. A hma ni pawhin a taksa chu a nuam vak lo tih ka hre tawh a, in entir tura ka tih chuan a that leh mai tur thu in min chhang liam mai a, mahse zan lamah a khawsik a reh theih loh avangin in entir chu a duh ve ta hram ani. Nitin deuhthaw kan inkawm a, Andria pa chanchin ka sawi duh ngai loh pawh ka hrilh ve nual a, mahse Lalnunfela hming erawh ka sawi lang lo. A hming hi sawi chhuah harsa ka ti em em a, chumi piah lamah ka fapa hi ka ta liau liau anih tawh avangin miten a pa an hriat kher hi tul ka ti lo. Zanah phone call ka dawng a, Thantea hnen atang ani a,damdawiinah an admit thu min rawn hrilh a, a awmna te chu zawtin kan ve ngei chu ka tum a. Amah phei cuan kan a ngai lo tih min hrilh a, mahse damdawiin a awm ngai khawp chu kan ngei ka tum thung.
.
Hospital kawtah ka ding reng a, Thantea chu call ka tum a, a tlang thei mai lo. A hnu deuh ah chuan a tlang ve ta hram a, a awmna min rawn hrilh chuan ka pan vat a, min hmuh chuan alo nui ver ver a, "I lokal duh kher a ka tha lutuk alawm"a ti a. A zunkawng that loh vang anih thu leh hetiang taka ala nat ngai loh thu te chu min hrilh a, "Ka u hi chuan a ngaih serious na a rei tawh a, keimah hian ka ngaihthah hrim hrim a"a ti a. Kan lam pana mipakhat rawn kal chu ka lo thlir reng a, a hmel zahawm thlup mai chu hmuh a nuam kher mai, Thantea mutna bul chu a rawn thleng chawpchilh nghal mai a, "Kan tu i nei ani maw?"aw nelawm vak lo hian ati nghut a. A hmaa chhe lo ka lo tih rukna chu a tawngkam avang chuan ka thaichhe leh nghal vek a, "Aw, hei ka thiannu Mali anih hi, min rawn kan vang vang a,a fel khawp mai. Hei kan u neihchhun Mamuana anih hi"Thantea chuan a ti a. Chutia min han inhmelhriattir lai chuan min rawn tlemin a hmel chu a inthlak ve deuh a,"I va fel ve, i lo in chibai ang hmiang. Kan vawikhat inhmuhna ani tiraw?"tih pah chuan a kut a rawn pharchhuak a, ka lo chibai a, "Aw, tun hi a vawikhat na ani e"ka ti a. A nau chu duat hmel takin a han endik vel a, "Ka duty a zo chiah a, ka han inbual fai anga,ka rawn chhuk leh dawn nia"a ti a, "A ngai lo ang, lokal duh suh. Ka that tawh em hi awmpui pawh ka ngai lo"a ti a, "I duh loh tlat chuan ka hnial lo ang che. Mahse zanah erawh Angaihi a rawn riak ang"a han ti leh nghut a, a chhuak ta a. Thantea chu a han thaw hak a, "Ka u hi chu min hmu puitling thei lo reng reng"a ti a, ka lo nui sak a hmuh chuan a nui ve hak a, "Doctor a ni tiraw?"ka tih chuan a lu chu a bu nghat a,"Nu leh pa kan neih loh hma avang hian ka u hi nu leh pa chan chang ani a, a khirh ve viau nghe nghe ania"a ti a. An unau chanchin te chu a sawi chhunzawm a, "Middle school ka kal tantirh hian ka nu leh pa chu inentir turin Silchar ah an zin a,an rawn haw lamah an motor a accident a, a rualin an thi a, ka u Mama hi pawl sawmpahnih a zir lai ani a. Chutia kan innghahna a ruala kan chan chu hrehawm tih ngaihna pawh hre lo khawpin kan tuar a, hemi kum hian ka u chuan a zirlai pawh a exam theih loh phah hial ani. Ka nu sawidan chuan ka u a pian hnu hian doctor ten nau pai tawh lo turin an ti a, mahse anmahni thua insiam erawh an tum lo. In dang chuang lo khan nau a pai leh thei ta mai lova, fa dang chu la awt mahse an nei theitawh dawn lo ni in an inngai hial a, mahse ka u kum 8 a nih hian min pai leh hlawl a, tichuan a dang erawh a pai chhunzawm thei ta lo ani. Nu leh pa tello in ka u hian min enkawl seilian a, ka bawrhsawm em em a, doctor a zir chhan pakhat pawh hi keimah vang niin min hrilh thin.'Ka nu leh pa kha enkawl hman miah lovin kan chan a, kan nunna chu Pathian thu ani a, mahse enkawl thei lo che hian ka chan ve ang ce tih ka hlau a, chuvangin doctor hi ka zir ani'tiin min hrilh. A naupanlai atanga anih chak sipai officer pawh ni thei lovin ti hian a awm ta ani. Ka tan chuan ka hmuh theih Pathian ani a, a thu hi awih zel ka duh. Vawikhat erawh a thu lo angin ka kal ve a, mahse thuawih lohna ah pawh ka ngai chhunzawm ta hran lo"a ti a. A thusawi chhung zawng chuan a insehruh hle tih ka hria, unau inhmangaih thiam tak an ni tih ka hria, an ni ang hi an tam lo hle in ka hre bawk, "Enge i thuawih lohna chu?"ka han ti leh kher a, "Ka hna hi mawle"a nui sak a, "Ka hrisel lohna avang hian hna ka zawn pawh hi a phal lo va, dawr ka siamsak ang che a ti a, mahse anihna takah chuan ka phak tawk sorkar hna hi zawn ve ka tum ru reng a, ka zir sang thei lova, hna sang thawh erawh ka tum lo. Kan phak tawk ang zel hi hna alo awm ve a, ka hna hi ka tlin ni thlengin ka ti ve tih a hre lo"a ti a,a nui hak hak a. Hlim takin kan inkawm a, ka haw dawn chuan pawn thleng min thlah a, "Lo dam vat ang che"tiin kan in vai liam ta a. Ka haw hnu chuan Thantea te unau chu ka rilruah an awm reng a, mipa ve ve an ni a,mahse an inhmangaihna chu an lantir hreh lova, an awhawm ka ti a, an entawn tlak ka ti takzet a ni.
.
MPSC in combined exam a buatsaih chu exam ve ka tum avamgin ka in chhiar ngawrh ve viau a, dawr lam pawh ka pui ngai lo tluk ani. Thantea nen phone hmang in kan inbe ve deuh reng a, damdawiin atanga a chhuah ni chuan chawei turin min sawm a, chhungkaw thilah remchan lohna ka lo neih avangin ka kal thei ta lo. Nithum chhung chu min be duh lova, ka biak pawhin min chhang duh ngai lo. A mize naupangchhia zet chu a lawm awm ru reuh riau hian ka hria a,kan kum chu a inrual chiah a, hmeichhia chu kan lo puitling zawk a lo ni. Min biak duh loh atanga a ni li naah a bialnu nen an intihthiam loh avangin min rawn be hlawl a, a harsat laia min rawn hre ve chuan thian tak takah min ngai ve ani tih ka pawm thlap a,ka ngainat zual phah sauh bawk.
.
Ka nu damdawi ken theihnghilh pe turin dawr lam ka pan a, ka thlen chuan kawta secondhand an hawn thar chu alo thing mek a, rei vaklo lo thu lawk tur chuan min ti a, bungraw thleng thar te hu ka lo bih kual a, chutihlai tak chuan thawmhnaw en tur an rawn lut ve chiah a. Hmeichhe zawk chu a rawn lut hmasa a, a hnunga rawn zui tu ka hmuh chuan ka khawng vek a, min rawn hmuh veleh ani pawh chu a ke pen a tawp chat a, min melh ve ta reng a, "Lalnunfel.."ka thinlung chuan a hming chu vawihnih lai a lam nawn sap sap a, "Mali... alo rei ta hle mai" harsa tih hmel tak hian a rawn ti chhuak sap a. A hmeichhe rawn hruai chuan kawr ho chu a enkual a, rawn thleng thar pahnih chu a han ha chhin vel a, Nunfel hmaah chuan zei takin a in show harh harh a, a pahnih chuan ka pack sak a. Hmeichhe hmeltha tak ani a, a thawmhnaw thlan pawh chu a inhmeh takzet, a leisaktu pawh duhthusama hmeltha ani, chutiang ka ngaihtuah lai chuan," I lo dam tha zel amaw?"ka beng bulah chuan Nunfela chuan a rawn ti sap a, "Hei i hmuh ang hian ka tha e"ka ti a. Ka thinrimna chu ka thup hram hram a,min be ngam tur pawh ani lo asin, an chhuah dawn chuan min rawn biak leh a tum nia ka hriat avangin ka phone ka phawrh a, Thantea chu ka call vat a, hlim hmel takin ka nui a, hamhaih hmel takin kan dawr atang an chhuak ta a. Thutthlengah ka thu hnawk a, "I tha takzet em?"Thantea chuan min ngaihtuah tak hian a rawn ti a, ka tha tih ka hrilh a, mahse ka tha lo takzet ani. Ka mittui erawh a hul phak a, ka thinlung tawt lutuk chu ka puakkeh lo chauh thung. Andria vang chauh hian chakna thar ka neih phah thin a, mahse a fapa nena min hnawl a min kalsantu a taka han hmachhawn leh erawh a lo danglam thlawt ani.

PART-IV
.
Thantea nena kan in biaka min ngaihtuah hmel taka a tawng vel chuan ka tah a tichhuak lawi si! Ina a awm thu chu a rawn sawi a, min rawn hruai a tum thu a sawi chuan ka lo hnial vat a, mahse an ina kal tur chuan min sawm lui ta tho a. Ina haw tlang nghal chu ka hreh ru deuh bawk nen ka hnial duh ta lo. An inah vawihnih lai chu ka leng tawh a, han kal hreh na tur em em oawh la hre hran lo. Haw hreh chhan dang ka neih leh chu ka fapa Andria ani, a hmel ka hmuh rual a ka thinlung na tur ka ngaingam lo ani ber. An kawt zau nuam tkah chuan Thantea chuan min lo hmuak leh reng tawh a, Tei tih loh ah chuan ka rin ber pakhat ani. Tei lah sumdawnna buaipuiin phai lamah a hun tam zawk a hmang a, Thantea hi ka tawng lovang tih ka hlau thin. An kawtah chuan thutna nuam tak an siam a, thingpui in pah in kan thu a, ka zirna chanchinte min zawt a, thil hrang hrang sawiin a phul hlut a. Ka hun tawn hrehawm tak pawh a ziaawm sawng sawng in ka hria. An kawta motor rawn tlan lut mek chu ka thlir reng a, kan thutna bul lawk garage ah chuan a rawn tawlh lut delh delh a, "Ka u chu a rawn haw har dawn emaw ka tia, rawn ei hma leh si hle mai"a ti a, a sawi zawh rual chuan Mamuana chu a motor atanga rawn chhuk a. A beisei loh deuhin min hmu niin ka hria, "I lo leng ani maw?"a han ti liam ve puat a, a hmel nui khat ve tak chu a danglam phah eih lo. Thantea nen chuan unau an ni ve si a,lei leh van ang mai an ni ka ti rilru mawlh mawlh a. Haw ka tum lai chuan Mamuana chu a rawn chhuak a, kekawr bul a ha a, slipper a bun a, t-shirt thawl hnek hnawk a ha bawk a, amah a palian a, a thawmhnaw hak apiang chu a mawi pui hle zel mai niin ka hria. Ka lo ding uai min hmuh chuan, "Haw i tum em ni? Saw Angaihi'n chaw a chhumkep vek che ania"a ti a, Thantea chu ka va melh a, "Sawmna chang pawh ka lo hre lo che a, nia ei ve nghal mai rawh"a ti a. Chutia han ei ringawt chu ka hreh ru hle a, chaw in chhum kep tawh hnua han haw pawh chu thil nuam a ni silo, rilru nuam vak lo chuan ka awm a. Inchhung lamah lutin Angaihi chu rawngbawl pui ve tal tha in ka hria a, Angaihi hi Thantea nutei fanu ani a, thingtlang lama awm an ni a, an hnenah lehkha zir in a rawn awm ve a ni. Nula fel tak mai a ni a, la in hmu tam lo mah ila kan innel ve viau a, rawngbawl pah chuan kan titi ve mawlh mawlh a. Thantea bialnu chanchin sawiin kan phul hlut a, "U Mal, U Thantea bialnu chu thikthuchhe lutuk a ka ning"a ti a. Thantea chu chair ah a thu a, a nau cu a han melh zauh a, "A fel viau ani lawm ni? Thantea pawh a duat viau in ka lo hria a"nui pah chuan ka ti a, mahse chutia Angaihi'n a sawi takah chuan ka ngaihbel thiam veleh ta deuh. Thian anga ka kawm bawrh bawrh lai hian keipawh hi min thik ka ring bawk a. Ka phone a rawn ri ral ral a, ka han pickup chuan Andria a lo ni. A hmaa biak ka tum khan a lo muhil a, a harh veleh min rawn be turin ka pa ka chah a, min rawn biak tir alo ni a, "Ma.. lo haw vat rawh aw"a ti a, ka then sak a, "Awle... a nu hi alo haw vat dawn nia"tiin kan inbiakna kan titawp a. Ka han hawi chhuah huan Mamuana chu ka piah lawkah hian alo ding a, min lo melh run a, nuthlawi vak vel mai mai ah min ngai ang tih chu ka hlau thar leh thut a. Sitting room ah a lut tlang a, amah ka hmuh apianga ka thawk a chham lo chauh zel chu ka in hrethiam lo ani.
.
Ka mutna ah chuan tlai lama thil thleng te chu ka ngaihtuah neuh neuh a, Thantea te ina kal chu a theih chhung chuan pumpelh ka duh tawh a ni. Andria chu ka han pawm vawng vawng a, ka thunun theih piah lamah ka thinlung hian duh a tawng tih chu ka pha thei lo. Hun harsa zawk ka paltlang lai te pawh khan engkim tuar min huam pui ka hmu ve nual a, tutemah beiseina ka siamsak ngai lo. Ka phu loh ngawih ngawih te pawh an ni ve bawk a, Andria pabak kha thinlung taka ka duh hi an awm theih ka ring ngai lo. Mahse mi pakhat alo lang a, ka ban phak rual ani lo, kei nuthlawi fa pawm lai lehnghal tan hian beisei tur a awm lo. A chezia nelawm lo zet leh ngeng ngulh mai te chuan amah chu a ti pa hliah hliah a, a nui khat lutuk erawh a phenah chhan tha tawk tak a awm ka ring. Chu mihring chu tudang ni lovin Dr.Lalthlamuana, ka thianpa Thantea u chu a ni. Ka lu chu ka han thing nawk nawk a, nat nawn leh hi ka duh tawh lo, ka tihtur awmchhun chu ka fapa nuamsa taka dah hi ani tiin ka inhrilh mawlh mawlh a.
.
Huphurh chung chuan ka han exam ve a, ka rin aiin ka chhang thei viau a, ka phur phah ve sawt bawk a. Exam ka hmachhawn dawn avangin Thantea nen pawh kan inbe khat khawp a,exsm zawh ah erawh hrilh ngei ngei turin min chah a. In ka thlen chuan ka han phone nghal a, a ring quit avangin a buai anih ka ring a, thildang ka tihsan ta daih a. Chaweikhamah pawh a reh tak vang vang avang chuan ka han call leh a, a pickup dawn lo emaw tih hnuah a rawn pickup a,"Phone i va la thei lo ve.... tlai atang khan ka lo try tawh"ka lo ti nghal a, lehlam ami chuan a aw chu a han thian a, "Thantea u ka nia, hei damdawiinah a lut leh a..."muangchang hian a rawn ti a. Ka thutna atang ka ding chhuak zawk a, "Engtinnge a awm? Engtik atang nge?"ka hlauhthawnzia chu a hria ani ngei ang, "Engmah hlauhthawn tur a awm lo, naktukah test kan han nei leh anga, engkim a tha leh vek mai ang"dam dap hian a rawn ti a. Ka remchan veleh kal ngei chu ka tum a, kan inhmuh khat tawh tehlul nen chutianga damdaaiina hmuh leh pawh chu a hrehawm duh viau in ka ring. Ka tum lawk loh thil thleng avangina tuk nilengin ka buai a, zanah chuan ka han call leh a, amah ngeiin min lo chhang thei a, "Naktukah min rawn kan rawh, a bak chu i lo kal hunahchiah ka sawi ang" a ti a, a natna chungchang pawh chu engmah a sawi duh lo. A tuka kal ngei ka tum thu chu ka han sawi a, a nui hak a, "Andria lo hruai ve rawh aw"a ti , ka fapa hi a ngaina ve tak tak tih ka hria, Andria pawh in a ngaina a, hruai ngei chu ka tum a ni.
.
Hospital kawtah chuan ka fapa Andria nen kan ding leh ran tawh a, zan lamah a awmna ward min hrilh tawh avangin chu lam cu kan pan nghal a. Ka va thlen chuan a thawhpui te an lo awm ve nual a, Andria a hmuh veleh a ko vat a, Andria pawh chuan hlim takin a pan nghal a, nidang ang bawkin an in chhaih nui leh har har a. Ka hmuh hnuhnun ber ai khan alo cher ve hle in ka hria a, a mit khur thuk dak tawh ka hmuh hmaih lo. Rei vak lo kan thut hnuah a bialnu Sangbawihi leh a thiannu pakhat an rawn kal ve a, Thantea chuan Andria chu a pawm a, ka ngaihbel pawh ani maithei, Sangbawihi chu a lawm vak lo hian ka hria a. Thantea erawh chuan engahmah a ngai lem lo niin ka hria, "Test result te chu a chhuak tawh em?"ka han ti a. A lukham bula lehkha chu a rawn phawrh a, "Ka tha vak lo anih hmel"a ti sap a. Lehkha chu ka han bih ve tak na a ka hrethiam chuang lo. In kan theih hun chhung chu a zo tep tawh a, Andria chu khum atang ka han chawi thla a, "Haw in tum mi?"a tihchuan, "Kan va phei phawt ange, chanchin mon lo hrilh zel la.."ka tih lai chuan Mamuana chu a rawn thleng ve a. A nau cu a han check kual vel a, Sangbawihi chu zei tak hian a lo che ve bawk a, a mawng a zang a, hmuh pawh a nuam kher mai. Kan chhuah dawn chuan kan han hawilet a, ka vawnna atang Andria chu a talchhuak a, Thantea chu a va hrilhru a, in ngai takin an in kuah a, ka mittui chu tla lo turin ka dang kir hram hram a. Ka fapa hian pa a lo mamawhzia ka hrechhuak thar a, ka hmangaihna zawng zawng hi pe mah ila a mamawh hi ka pe kim ve thei dawn lo a ni.
.
Car bulah chuan Mamuana nen chuan kan ding a, "A tha leh vat ang tiraw?"ka tih chuan a ngawi reng a, a kawng chu a han dawm a, thawk a la hak a, "Tha leh vat se tih hi ka duh ngawih ngawih ani"a ti a. A hmel ah chuan a zam ve hle tih ka hria, doctor a ni a, a nau chungchang engkim a hre tawh tih ka hria, "A chhia emaw a tha emaw min han hriattir ve zel dawn nia. Tih theih chu ka nei tam lo khawp ang tih ka hria, mahse theihtawp chhuah ve hi ka duh ani"ka ti a, a bu nghat a. Kan tlan liam dawn chuan side glass atang ka va en a, lungngai hmel taka min thlir liam mek tu hmelah chuan beidawnna engemaw tak ka hmu a ni. In ka thlen chuan khawsak rel a lo hun chho mai bawk nen ka buai ta nghal char char a, chutihrualin ka rilruah Thantea a awm reng thung. Hun ka neih veleh kan leh ngei chu ka tum a ni.
.
Ka scooty a chian loh avangin ka siamtir a, Andria te school a kal nghal ka tum avangin ka hmanhmawh ru hle a. Ka phone a rawn ri a, Thantea hming a rawn lan chuan ka lo pickup vat a, "Mali, keimah Mamuana zawk, hmuh che ka duh hle mai"a rawn ti nghal tawng a. Ka sana ka en a, tunah mai chuan hun ka nei lo tih ka hria, "Andria te school ah kal lawk ka lo tum a, thil hmanhmawhthlak anih erawh chuan ka nau kal turin ka ti thei tho a.."ka han ti a, "Hmanhmawhthlak viau loh e, i haw hunah min lo hrilh la, ka rawn kal dawn nia"a ti ta a. Thantea natna chungchang anih chu ka ring nghal mai a, thil tha lo a thleng ngei dawn niin ka hria a, ka zam ru takzet a ni. School a ka awmlai chuan Mamuana chu ka han bia a, kan inah a rawn kal dawn nge hmun dangah min hmuh a duh tih ka zawt a, restaurant pakhat ah inhmuh mai a awlsam a rin thu a sawi a, ka awmna hmun atanga hla lo te alo ni a, ka pan ta nghal a. Ka va thlen chuan alo awm reng tawh a, min hmuh chuan a nui sak a, a nui hmel ka hmuh vawikhatna a niin ka hria! Inchung lamah min chhoh pui a, ka la kal ngai lohna hmun anih avangin chulaia hmun fianrial leh thawveng tak si chu lo awm chu mak pawh ka ti viau a ni. Ka thil ei duh min han zawt a, engmah ei ka chak loh thu sawiin coffee erawh ka in duh tih ka sawi a, ama ta tur nen a chah ta nghal a. Dawhkanah a kut chu a nghat a, a khat tawkin ral lehlam chu a thlir leh vang vang thin, "Sawi tan dan tur ber pawh ka hrethiam lo"a aw chu a han thiam kharh kharh a, "I hmuh leh i hriat ang hi ka ni tawp a keichu, ka nau anga thenrual kawm thiam chi ka ni lova mi ngainat pawh la hlawh lem lo tih ka hria. Pawn lama hun hman ai chuan ina lehkhabu chhiar nuam ti zawk ka ni thin. Ka nau hnen atang kan chhungkaw chamchin chu i hre tawh in ka ring a, ka nau hian heti taka a ring che hi a tir chuan mak ka ti a, a chhan chu in inhriatna ala rei loh em vangin; mahse rintlak tak chu i lo ni ngei ang. Ka nupui thih khan kha bak kha lungngaihna tawk turah ka lo in ngai tawh lo kha ani a, tunah lumhngaihna chuan min rawn pan leh ta ani si a.." sawi zel hasa ti takin a han thaw hak a. A nupuiin a thihsan tih a sawi lai chuan ka phu deuh zawk a, Thantea'n a la sawi ngai loh avangin nupui la nei lo ah ka lo ngai ve ngawt a ni. Coffee chu ka han lem khalh a, "Thantea chungah thil tha lo a thleng dawn i tihna em ni?"hlauthawng tak cuan ka han ti a, "A thleng mek zawk ani. Ka duh loh vanga pawm loh theih ngawt ani silo, awmdan tur ber pawh ka hrethiam lo. Ka hawina apiang hi a thim mup mup ani mai, test result kimchang kan hre tawh a, ka hlauhthawn ang ngeiin thling cancer alo ni"ka no ken lai cu ka thlauh bawl a, ka awih thei lo, "Vawihnih test neih nawn a ni a, result a danglam lo"a mittui chu a luang ta zung zung a. Ka in ring hman lo, keipawh k mittui chu a rawn far zung zung a, inhnem tur chuang kan awm lo. Engtia rei nge chutia kan awm ka hre lo, "Mamuan.. awih har ka van ti em!"ka tichhuak thei hram a, "Engatinge mi tha tak hian natna khirh tak tak te hi an tawrh a ngaih thin le tiin ka ngaihtuah thin. Damlo tam tak ka lo enkawl ve tawh thin, damna changin hlim takin an haw leh thin. Ka nau chungah erawh tih theih ka nei tlem em ani"a ti a. A kun a, a mittui chu a hru a, ani meuh pachang taka a awm thei lo chuan a tuar natzia a lantir chiang hle. A kut chu ngam leh ngam lovin ka han ban a, ka hum ta vangvang a, "Mamuan... chak taka i awm a ngai ania, beidawng mai tur kan ni hleinem. Mihring theihna a zawh vek hnuah hian Pathian hi alo che thin alawm"ka ti a, a rawn hawi chhuak a, a mittui karah chuan a rawn nui lui ta sak a.
.
PART-V
.
Hospital lam panin Andria nen chuan kan inphur chhuak a, Mamuana min rawn hrilh danin in lama haw phawt an tum a, chutatang chuan phai lam kal mai a duh thu a rawn sawi a ni. Kan thlen chuan Mamuana chuan min lo welcome tha hle a, a nau avang hian inpawh takin kan inbe ta fo a, ka rin ang em em a khirh pawh alo ni hran lo. Thantea ka hmuh chuan ka tawt up up a, hlim hmel pu reng mahse thinlung a ti na vawng vawng zel a, chu huan hmuh min huphurh tir thin. Andria nen an in chhaih lai chu ka thlir reng a, a khat tawkin Mamuana nen chuan kan nuih pui leh hak thin. Mamuana leh Andria chu ice-cream lei turin an chhuak a, an chhuah hnu chuan Thantea bulah chuan ka han insawn a, "Chawhnu lamah in chhuak thei chauh ang a?"ka han ti satliah mai mai a, "Mali, dam hi ka vanduh tak em!" beidawn hmel zet hian a rawn ti sap a, "Thaate...i dam leh vat dawn alawm hei i that sawt khawp hi"ka ti a. A tukhumah a kutpahnihchu suih in a han thaw halh a, "Ka natna hi ka hre tawh alawm, ka u hriat ah hre angin ka awm duh lo mai mai ani. A hmela lungngaihna leh zam ru tak pawh ka hmu alawm, tih lungngaih belh hi ka duh lomai chauh zawk ani"a ti a. A kut chu a rawn thlakthla a, ka lo vuan vat a, "Beidawnna tur khawp a nih loh kha, kan fight tlang dawn alawm, i tha leh ngei ngei ang"ka ti a,a kut hu ka hmer vawng vawng a. Kei a hnemtu zawk pawh chu eng ka ni bik lo, ka thinlung hi puakkeh mai tur angin a tawt ut ut a. Andria te pawh an rawn let leh tawh a, naupang rilru thianghlim tak kianga hun hman huan rilru hah te pawh a ziaawm thin. Kan haw dawn chuan Andria cu ka kai a, Thantea awmna ward kal pelin pawn lam hnaih ber kawngka chu ka pan a, hmanhmawh taka mipa pakhat rawn lut nen chuan kan insu thawi a, "Ka tihpalh lutuk"tih pah chuan arawn hawichhuak a,ka lo hawichhuak ve chiah a, Lalnunfela chu alo ni reng a. Andria chu ka vuan nghet sauh a, tawng tumin a ang zuau a, sawi ber tur hrelo chuan a ngawi leh a, Andria chu uluk em em hian a han en a, chutah a hmela danglam lo lang chu ka hmuh hmaih lo. Andria pawh chuan a melh kiau a, an mitmeng leh an sam chu danglamna pakhatna a awm lo. Chulai hmun kalsan vat chu ka mamawh ani, kalsawn ka tum chuan ka ban ah min lo chelh a, thinrim zet hian ka han melh a, a kut chu a han la thla vat a, Mamuana rawn chhuak chuan kan boruak tang ru zet chu a rawn ti dai ta hlauh a, engmah hrelo hian Andria chu a rawn pawm a, "Kal ang u le"a han ti a. Khatih laia Nunfela hrilhhai hmel khan min ti hlim thung. Min en a, chutah Mamuana chu chhan en leh a, kan kalsawn thleng chuan a dinna ngaiah a ding reng a. Motor dahna bul kan thlen chuan Andria chu Mamuana pawmna atang lak ka han tuma, nghet zet hian Mamuana nghawng chu a kuah bet tlat a, Mamuana chuan mitmei hian pawm sawn rih lo turin min han ti a. Hlauh a neih apiang hian hetiang hian a awm thin, Nunfela nen khan in hau lo mah ila kan chezia chu alo man ve hle aniang, ka khawngaih em em a, ka thin a rim thar bawk a ni.
.
Ka phone ri ah chuan ka harh hlawl a, ka sana ka enchuan zan dar10 chuah alo la nia, zantira ka fapa ka mut pui kha ka lo mu tlang ve daih chu niin, "Hello.." phak chuap hian ka han ti a. Ka thiannu Tei chuan aw zangkhang vah hian, "I mu tawh elaw..? Bei hma ve"tih pahina rawn nui leh har har a. Ka han thu chhuak a, "Bawihtea kalo mut pui a,ka lo muhil tlang ve daih a"ka ti a, "Zanin chu thil mak lutuk a thleng a, ka rawn be nghal che anih hi"a ti a. Aizawla a awmlai anih avangin kan inhmu fo a, eng thu thar nge a neih ang tih ka lo ngaihtuah mek a,"Lalnunfelan engtin tin emaw min rawn contact a"a ti a, "Eng a?"ka han ti vin deuh thak a,"Naktukah ka rawn kal ang, phone ah chuan ka sawi thiam lo"a ti ta a. Kum 6 lai a liam leh hnu hian kei emaw ka thiannu emaw avawikhat nan min rawn be pawp leh tihna anih chu! Ka fapa mu lai chu a hmai ah ka han chul a, "I khawih buai phak ka ni tawh lo, ka fapa chungah pawh nise sawi theih pakhatmah i nei lo"tiin ka han phun chhuak a, amah ngaihna leh lunglenna ai chuan huatna in ka thinlung a hneh zawk.
.
A tukah chuan Tei chu a rawn leng ta ngei a, "I pasal neih leh neih loh chungchang a rawn buaipui khawp mai a"tiin bul a han tan a, "Chuan Andria hi a fa anih leh nih loh min zawt bawk"a tih chuan, "Anih lohzia i hrilh em?"ka lo ti thuai a. Ka fapa liau liau a ni a, chutianga a zawt ngam ringawt pawh chu ka haw takzet ani. Tei chuan ka kut khur der der chu la in a han hmer sak a, "I duh loh a i hnawl hnu kha rawn buaipui tum tawh suh, englaimaha kalsan ve ngai lo tur a tawng tawh tiin ka lo chhang a, phone ka dah nghal daih a ni"a ti a. Ka thiannu chuan hun khirh ka paltlang te kha a hrechiang em a, ka lamah hian a tang reng dawn tih ka hria a ni.
.
Prelims exam result alo chuan ka lo tling ve hlauh a, result chhuak pawh ka lo hre pek lova, Thantea'n min rawn hrilh a, lawmpuina min rawn hlan a, "Ka u in a be duh che"a tih zawh rual chuan, "Ka lawmpui lutuk che, engtikahnge kan lawm ang"Mamuana chuan a rawn ti a. Ka lo nui hak a, "Prelims chauh ka la through a, chutia lo lawm nghal te chu a zahthlak emai"ka ti a, "Kan inziak tling ve thei reng reng hleinem le, dinner ka chawi dawn nia"a ti ta tlat a, hnial ngaihna pawh ka hre lo. A tuk tlaia dinner kildun tur chuan thu kan pawtchat ta ringawt a. A tuk tlaiah chuan kn inah min rawn sawm thlap a, Andria chu ka hruai tur thu a hmazanah ka sawi lawk tawh a, ka fapa a tel a remchan lohna thil chu tih fo ka duh lo. Kan pathum in kan inphurchhuak a, Andria hi ina kan khung tam avangin pawn lam boruak kan hip pui hian nuam a ti thei em em a, ka malchunga thu in pawn lam chu a bih a, a nui ver ver reng a, a sam ah chuan ka hul sak heuh heuh a, chhungkua te pawh kan ang ta riau hian ka hria a. Mahse chu ngaihtuahna ka neih rual rual chuan ka zak ru hle a, ka han maimitchhing ta ringawt a.
.
Dinner kan ei zawh hnu chuan kan haw leh mai tirah ka ngai a, mahse Mamuana chuan an in lamah min kal pui ta daih a. A chhan ka zawh chuan Thantea'n ka fapa a ngaih thu a sawi a, han hnial zui vak na chi anih loh avangin ka ngawi ta daih a. An in kan va thlen chuan tumah an lo awm lova, hrilhhai angreng tak chuan ka hawi a, "Khawnge Thantea chu?"ka ti a, "Lo thu phawt rawh"tih pah chuan ka kawrah a han pawt zeuh a, Andria a muthilhavangin ka pawm a, chu chu min laksak a tum a. Ka lo tang ve tlat a, "Tah hian muttir rawh atan pawh a nuam zawk ang"a han ti leh a, amah vek chuan, "Thantea chu Sangbawihi nen an chhuak lawk a, a lo haw tep tawh ang, i lo nghahchhuah loh chuan a lungni lo lutuk ang"tiin ka hnial theih lohna tur chu a rawn zawng ta chat a. Rilru bei lo zetin sofa ah chuan Andria chu ka mut a, Mamuana chu room ah inthlak turin a kal a. A rawn chhuah leh chuan ka bulah chuan a rawn thu ve a, ka han tawlh phei hret chuan min rawn melh hrawk a, "Min va hlau awm ve.."a ti nghut a, chhan ngaihna pawh ka hre lo. A thil ken chu a tuai vir sek a, "Mali, hrilh duh che ka nei che ani"ka lam chu a rawn hawi a, "Ka nau thiannu i ni a, mahse chutiang ringawt chuan ka en thei tawh tlat lo che, ka rilru hi i tibuai talzet ani"a han ti charh charh a. Ka nghing lawih a, ka mumang ni mai hian ka hria, "Ka duh che... ka duh takzet che ani. Han sawi kual duah ka thiam ve lo, ka rilru a awm ka sawi ve tawo mai anih chu"a ti a. Ka chhan mai lohavang chuan lei lam chu a bih ngar a, tawng chhuah ka tum a ka hrawk ah hnawhtu awm ang maiin ka tawngchhuak thei lo, "Ka rilru ang hi ilo pu ve lo anih pawhin min hrilh hreh lo la.."a han ti leh a. Ka han thu ngil a, a ban in min dehna avanga ka taksa lum ham ham chu tihreh tumin ka han tawlh phei deuh a, "Mamuan.. nuthlawi fa nei tawh lehnghal hi min duh tak tak ka ring thei lo ani"ka ti a, ka lu hu ka thing a, "Tunhnaia hetia kan inbiak fo avang leh kan inhmuh tam vang hian min duh emaw i in ti aniang"ka ti a. A lu chu a han thing ve thung a, "Keipawh chutiang chuan atirah chuan ka ring a, mahse a ni tlat silo. Andria pawh hi ka ngaina a, a chhan ka hriat siloh hian ka ngaihtuah ve ngawih ngawih asin. Pa a mamawhzia hi i haider thei bik lo, min oawm anih phawt chuan ka fapa anihna tur hi engmah in a dal lovang"a ti ta a. Ka kut pahnih in ka hmai ka hup a ka han in sut hraih a, ka darah min rawn vuan a, "In nufa hian nghenchhan tur in mamawh, chuan keipawh hian ka rin ngam leh ka rin theih tur, ka lungngaih lai leh ka lawm lai pawha ka nghen theih tur mi ka mamawh bawk. Chu chu nangmah hi i ni, hmeichhe dang ka tawn leh theih hi ka in ring ngai lo. Kan nuna nang i lo lan hma kha chuan nupui neih leh hi chakna pawh ka nei tawh lo, tunah erawh min thlaksak chiang khawp mai"a ti a. Hlauthawng tak hian min han kuah a, "Tunah mai chuan sawi tur ka hre lo ani"ka ti a, mahse ka thinlung hi chuan a thlang daih tawh. Thantea lo haw hnu chuan rei vak lo kan thu leh a, rei vaklo hnuah Mamuana chuan min thlah a, kan ina lenglut tura ka sawm chuan a khi suk a,"In ngaihtuahna hun inei tlem lutuk ang, ina i luh veleh inngaihtuah nghal ang che"a ti a. Kan in mangtha hnu chuan a tlan let leh a, a tlan liam thleng chuan ka thlir a, gate ka lut tur kan garage ka paltlang lai chuan min hnungchhawn zawng hian mipakhat hi alo ding run a, gate ka hawng chiah tih chuan chiang fe hian min rawn ko a, tunge tih chu ka hrechiang kher mai, hawilet duh lovin ka lut tlang lui a, "Nuam chen i chak bawk a, kan fapa kha a hnawk tan tawh ani lo maw?"a tih chuan ka insum thei lo. Ka hawilet a, "I tawngkam kha fimkhur rawh"thinrim vanga khur dawt dawt chuan ka han ti a. Ngeiawm zet hian a nui a, "Tlangval ina leng a, tlai tak taka haw thin tia an sawi che hi a dik anih hmel"min rawn kal hnaih a, "Min huat hmel tak khan min melh suh, ka huatna che hi a letin a tam zawk tih hi hre rawh.."ka beng bulah chuan a rawn ti thawp sat a. Harsatna tam tak mim pek hnuah min huat thu a sawi chu ka hrethiam thei lo, inchhunga luh vat chu ka mamawh ani, min kuaiher dawrh a, ka hmuiah chuan rawn fawp ta bawrh bawrh a, talchhuah tumin ka tang a, a hmaiah chuan ka ham ta buan buan a, kan che velah chuan Andria chu alo harh a, a pa nen kan in ham buai vel a hmuh chuan hlauthawng tak hian a tap ta vak a, Nunfela pawh chuan rang takin min thlah a, "Tihpalh, tih thlabar cheu ka tum lo. Mali, vawikhat tal inbe tha leh ang, sawi dun tur kan nei ani"a ti a. Enge kan sawi tawh chuang ang? Ka thinlung hian a ni hi a thlang tawh lo, engtinnge ka tih tak zel ang?
.
PART-VI
.
Ka muhil thei lo chu ka inlet thak thak a, “Ka thu ka duh luat avanga ka thuthlukna lo siam tawh kha min theihnghilhsak rawh, I tan pasal tha tak niin ka fapa tan hian a pa tih tur dik tak ka tihsak hi min remtihsak hram rawh”tia ka hmaa thingthi a ngaihdam min diltu Nunfela avang chuan mu thei lovin ka awm leh ta. Kan intawntirh atang vawiin ni thleng hian amah avanga ka hlimna ai chuan ka buaina leh ka lungngaihna hi a tam zawk. Hei ai hma hretah khan ka hnenah lo let nise chuan ka pawm ngei ang tih hi ka ring, mahse amah ngaihtuah reng renga hun hmang thin kha ka danglam takzet tawh si a. Ka fapa hma hun tur chu ka han ngaihtuah a, tunge a pa hi anih tih min zawh hunah engtinnge chhan na pek anga, a pa nen engvanga innei lo nge kan nih tih min zawh hunah engtinnge ka chhan ang? Ka han hui deuh pap pap a, a hmaa ka lo ngaihtuah ngai loh thil tam tak chu ka ngaihtuah a lo ngai ta. Muthilh ngei tumin ka han inkhuh tha sauh sauh a, ka phone ah whatsapp message a rawn thleng a, en ka tum lo zet na a ka han hawng ta tho a, Mamuana message alo ni a, “Tun ang hunah hian nangmah vangin ka muhil thei lo ang tih hi ka ngaihtuah phak ngai lo, I ngaihawm..” tih chu nui ver ver in ka han chhiar a, ka online a hmuh chuan rang tak hian min rawn call chhunzawm nghal a. Sawi em em tur hre silo khan darkar khat chuang kan han inbe tehreng a, a tawp lamah phei chuan ka lo muhil titih a, kan in mangtha chu chiang lo ruai hian ka hria a, zing a ka harh velah message ka chhiar theih turin alo hnutchhiah thlap bawk a. Ka sawifiah thiam loh hlimna hian min tuam hlep hlep a, kan tleirawl tirh a ngaihzawng kan nei tantir ang vel kha niin ka inhre ber.
.
Dawr nghakin ka buai nileng a, kan nula Makimi a dam that loh avangin a rawn kal thei lova, bungrua kan thlen thar avangin ka buai a zual a, ka thu hman meuh lo. Chawhnu lamah chuan rin loh takin Mamuana a rawn lut nawlh a, chutia buai taka ka lo che vel min hmuh chuan a theih ang angin min rawn pui nghal bawrh bawrh a, a duty zo ina haw lovin a rawn kal alo ni a, amah hi a tawngtam lo na in a thlamuanpui awm ve hliah hliah a. A khat tawka min melh leh ralh thin erawh chuan min ti zam ve deuh, “Tikhan min melh run lo la, min ti lai ve tho ania”ka tih chuan, “Ekhai! Damlo ka enlai a an natna aia I hmel hmuh ka chakna kha buaipui tham fe ani zawk ania, hetiang chuan sawrkar hian ka hna atang min ban mai ang tih pawh hi ka hlauhlel lo”a lo ti thuai a, kan in en a, kan nui dun hawk hawk a. A zualpui kan tihfel hnu chuan coffee kan dawm dun a, thutak zawk hian min han melh a, “Mali, chhanna ka duh, ka nghak thei lo che ani e”a han ti a, a mit chu a han ti zim deuh san a, “Nawr che hi ka duh miah lo, mahse I chhanna chu engpawhnise hriat vat hi ka duh ani. Thantea hi naktuk tuk leh hian Vellore lamah hruai ka tum a, kan chungchang pawh hi tihfel vat ka duh ani”a ti a. Ka coffee no chu ka han tuai vir a, “Mamuan, I laka ka rilru hi chu I hai bik lovang tih chu ka hria alawm, ka ngaia takzet che a, chuan mipa rintlak tak pawh I ni ang tih ka ring. Ka lo tisual tawh a, tihsual nawn hi ka hlau em ani. Ka hlauhthawnna chu min hriatthiampui ka ring”ka han ti a, “Ka hrethiam lutuk che asin, a hma pawhin chu chu ka lo ngaihtuah thleng vek alawm. Keipawh in nunhlui ka nei a, nangpawhin I nei a, khang kha kan theihnghilh tawh hauh lovang, mahse kan pahnih in hma hun hlim awm nei tur hian kan bei thei alawm”a ti a, mahni in ringtawk hmel tak hian min nuih sak a. Ka kut chu a rawn vuan a, “I hun kal tawhah engthilnge I lo tawn tih ka buai lo, I nunhlui zawng zawng nen ka pawm che, chutiang bawk chuan kei hi min pawm ve thei em?”a ti a. Ka hlauhthawnna te chuan min kiansan ta duak a, ka pawm ani tih lantir nan ka lu chu ka han bu nghat a, ka kut chu a han hmer salh a, “Ka lawm e”hmui phun chuan a han ti a, ka lo nuih sak a.
.
Thantea checkup a Vellore lama an awmna pawh karhnih lai ani tawh a, phone hmangin kan inbe reng thung a, kan inbiak loh hi a tlem zawk ani hial awm e. Ka chhungte tan pawh biak ka nei ani tih chu hai rual ani lo a, zawhna erawh min zawt lem lo. Min zawh hma chuan hrilh ka tum bik hran lova, ka nau erawh engkim ka hrilh thung. Hetihlai hian Nunfela pawhin min rawn be pawp ve zauh zauh a, chawlh hmanga a rawn haw veleh a chhungte bula engkim hrilha tum thu thlengin min hrilh a, awmzia a awm tawh lo tiin ka lo chhang a, chutatangchuan a reh vang vang a, Andria erawh pawisaa rawn thawn a, a pa anih anga atih tur a tih zel tur thu ala sawi ta hram a. Chutiang vel chu ani nena kan boruak anih lai hian thuk zawkin Mamuana nen chuan kan inbe tawh a, ka ngaihtuahna erawh nut but chang a awm lo thei lo. Ka duhthlanna hi a tha ber leh dik ber ani angem ka hre lova, he kawng hi zawh lo mah ila mite hmuhsitna tawk tura min paih chhuaktu hnenah hian kir leh erawh ka tum lo bur!
.
Zankhat Mamuana nen kan inbia chu ka vui der ve nuah nuah a, “Ka chhungten tunge ka biak tih zawhna min zawh hmaa an hmuh che hi ka duh ani”ka ti a, “I duh ang thlap chuan ni rawh se”nui huah huah chung chuan a rawn ti a. Thantea natna chungchanga kan luh chuan a awki chu a inthlak daih a, “A tha zel turah ngai ila, kan nunna chungchungah hian thuneihna kan nei ve silo a, chemo te kan han la tan ve anga, Pathian thu thu ani e”a ti a. A rilru hah rukzia chu ka hrethiam pha ve in ka inhria, an tum dan chuan karkhat hnuah rawn haw thei turah an in ngai a, dam taka inhmuh beiseina nen kan inbiakna chu kan titawp ta a. Sitting room a ka kal chu ka nu hian uluk tak hian min lo en zui reng a, zawhna min zawt chak tih chu ka hre ru reng a, ka nui chhuak teuh hle nghe nghe. Ka nau chuan min rawn nuih suk a, “Ka nu hi I hriat chak chu zawt ve mai la, hre chak si zawt hreh si kha a nuihzatthlak”a han ti a, kan pathum chuan kan nui ta hawk hawk a. Ka nu chuan ka biak thin chu min zawt ta nge nge a, a tirte atangin ka hrilh ta vek a, Thantea u ka tih chuan a lu chu a han bu nghat a, “Thantea u anih chuan a sual lo tawp ang, amaherawhchu engmah hi hmanhmawh lo ula, mi mit tikham te hian in lo nung hlauh ange”a ti a, chutia inpawhtlang taka kan titi ho chu keipawhin nuam ka ti.
.
Thantea hmel ka hmu chu ka thinlung hi ana vawng vawng a, a duat em em thin a sam chu hmuh tur a awm lo, a natna chuan dimna tel miah lovin a han nuai vel chu a ni si a, chutichung chuan amah kan tut e chu hlim takin a lo kawm a, hrehawm ti hmel reng reng a pu lo. A rukin ka mittui chu ka hru leh thin a, vanduai bik nia ka lo inhre thin te chu ka zak thar leh hle bawk. Inleng dang an haw hnu chuan a khum bulah chuan ka insawn a, a ban cher tak chu ka han hmer vawng vawng a, “Ka dam hunah khang kha chu a rawn mar leh zawt mai ang”ka rilru hria ni awm tak chuan a han ti a, “Thahrui a tam tho alawm le tiraw?”tiin a hlimawm zawng chuan ka han la a, “Ni e, min hnehlo tu chu an la tam viau ang”a ti a, a nui var var a. Mamuana pawh inleng te thlah a pawn lama a chhuak chu a rawn let a, “Chawei nghal rawh aw”a rawn ti lut a, ka lo hnial vat a, a lungawi lo lek lek a, mahse Andria telloh chu chhuanlamah hmangin ka hnial thei ta hram a. Ka haw dawn chuan ka motor bul thleng Mamuana te unau chuan min thlah a, “Zanah rawn kal ka rawn tum dawn nia, kan tlangval boruak a zir hian..”Mamuana chuan a ti a, “Ka tha lutuk, I len loh chuan ka tha lo zawk ang, a thuhrimah damlo lutuk ang hian min ngai lo ula, min ti damlo zo vek thin alawm”Thantea chuan a ti a. Motor chhunga ka luh hnu chuan Mamuana chu a rawn kun hniam a, ka biangah chuan a rawn fawp zeuh a, “Fimkhur deuhin khalh la aw..”a ti sap a, “Eheu! Min va zah lo sawt ve le”Thantea chuan alo ti fiam hlut a, “I tihdan ka hriat mai ania”tiin Mamuana chuan a han fiam let a, zan lama inhmu leh tur chuan kan invai liam ta a.
.
Kan chaweikham fel hnu chuan chanchinthar en in tv chu kan thlir a, Andria chu ka malchungah a mu a, ka pa chu a thutna atang a tho thurh a, “Khaia! Mama nu, Liansangi nu kha a thi tep an ti taka sin, zan lama kal tur ka tia, ka lo mangnghilh leh der mai. Mapuia’n min va hruai rawh se”a ti a. Ka nau chuan ka pa chu a han melh vung vung a, “Ka pa, ka u in inleng a nei dawn tih I hria em ni?” a han ti a, “Eng inleng maw?”a ngaihna hre lo zet hian ka pa chuan a ti a, ka nu chuan min rawn melh a, ka lo nui thaw a, “Zanin ber khera kalchhuah na I zawng chu ka u te chance pek tum I ang em alawm”ka nau chuan a han ti leh hram a. Ka pa chu a nui ta kurh kurh a, “Zanin chauh rawn len tum ani bik lo turah ngai ila, lengrei chi anih phei chuan kan hmu hman tho ang chu”a han ti zauh pek a, kan nui ham ham a. An chhuah hnu rei vak lo ah Mamuana pawh chu a rawn thleng a, Andria chu a pawm a, chanchinthar chu uluk fe hian a en a, ka pa ang chiah ani, bia pawh ni ila a hrelo ang tih tur khawp hian a ngaihven a. Andria pa chungchang hi vawikhatmah min la zawt lova, kan la sawidun ngai hek lo. Thantea hnen atang engemawchen chu a hriat ka ring a, a bak chu hriat ngai ti rih lo te pawh ani ang. Infiamna chanchin a rawn chhuah chuan engtinemaw tak nuam lo tihna ka nei riau pek a, a chhan pawh ka hre hran lo. Football chanchin hrang hrang a lang a, Lalnunfela chanchin pawh a rawn langsar leh viau a, ball a pet lai thlalak chu a rawn kuau a, “Apa Mamuan, khitiang ball khi ka duh ve”Andria chuan a ti a, “Naktukah kan lei ve dawn ania aw, inkhelhpui tur I nei dawn em ni?”a han ti let a, “Aputea nen kan inkhel mai ang, chuan I lo len hunah nangmah nen kan khel thin ang a..”a ti reuh a, a hringtupa berin a atchilh thil chu a fapa thisen ah pawh alo kai ve ani ngei ang, a putea nen hian ball chu an pet ve deuh reng ani, “Kan lei lutuk ang”Mamuana a ti a, chutah hriatchhuah nei ni awm tak hian Andria sam chu a han chul a, “In sam pawh a kir ve ve a, khipa ang khian I la thiam ve dawn ani ngei ngei ang”tiin a han fiam chhunzawm a. Andria chu lawm hmel tak hian a nui ta var var a, “Ma.. sam kir hi inkhel an thiam bik tiraw?”min rawn en ha a, nui pah chuan ka lo bu nghat a. Mamuana chuan nghet zet hian ka fapa chu a pawmbet a, a lu ah chuan a fawp zeuh a, enge a rilruah awm ang tih chu ka lo ngaihtuah thung a.
.
PART-VII
.
Ka lu chu a hai muai muai a, ka khaw hmuh a fiah lova, tawng nawk nawk thawm chu hla takah ka hria a, engmah ka hre lo chhunzawm nghal a. Engtia rei nge chutia ka awm ka hre lo, ka harh leh chuan hospital khumah ka lo mu reng a. Ka nu chu ka bulah alo thu a, ka harh tih a hriat chuan a rawn tho vat a, rilru hah hmel tak hian min rawn en a. Ka sana chu ka bih vat a, “Nu…. Ka exam ni anih kha”mangang tak chuan ka han ti a, “Bawihi, hun tha zawk ala awm mai ang, I hun ala nih loh vang mai mai anih hi”aw dam diai hian a han ti a. Ka mittui chu a rawn luang thla ngiai a, “Ka bei ve nasa asin”ka kutin ka hmai chu ka hup a, “Kan thatna tur in engkimin ro a rel thin tih kan hriat kha”ka banah min rawn vuan a, ka nu rilru tih hah belh chu tha ka ti lo. Ka in thing harh a, harsa ti zet hian ka nui lui a, “Khawnge Bawihtea?” tiin thildang ka han sawi a. Ka sawi zawh rual chiah chuan Mamuana chuan a rawn pawm lut a, “Anu chu alo harh tawh anih hi”Mamuana chuan min rawn nuih sak a, ka pang chu a rawn dek a, “I taksa a chak lo lutuk a, I hb a hniam bawk sia, chuvang a nih kha”tiin min han hrilhfiah a. Ka mutna atang chuan ka han tho a, “Kan chhuak nghal thei mai lo mi?”Mamuana chu ka han melh a, “Zanin chu riak mai la ka lo tia sin”nui vur vur chuan a ti a, a malah chuan ka han chum a, Andria chu hlim tak hian a lo nui har har a. Ka nu hmela hlimna lo lang chhuak chu ka hmuh hmaih lo.
.
“Ka rawn haw chho lawk dawn chhungkaw thilah, ka chhungte hnenah fapa ka neih thu pawh hi ka hrilh tlang nghal vek dawn”Nunfela hnen atanga ka message dawn chu ka han chhiar a, ka phone chu khumah ka theh thla tawp a, hepa hian engtinnge min tihbuai leh dawn ni. Ka fapa ball pet lai chu ka han thlir vang vang a, ka en tih hria in a rawn hawi phei vat a, “Ma… Tv a inkhel thiam kha ka ang tak tak mi?”hriat chak hmel tak hian min rawn zawt a, ka lu chu ka lo bu nghat ringawt a, “Apa Mamuana khan min tihder lo tihna anih chu, amah aiin ila thiam dawn min tia”hlim hmel tak hian a ti a. Mamuana hian a pa tak tak tih hi a hriat a hun tawh in ka hria. Andria chu pawnah a tlanchhuak thut a, ka va enzui chuan gate a Thantea rawn lut mek chu ka va hmu ve a, an rawn in pawm lut a, “Apa Thantea chu I lo ngai tawh viau ani maw?”ka ti a. Sitting room ah chuan an infiam leh nghal bawrh bawrh a, heti em em a an unaua a ngaina hma hi a mak ka ti thin. Rei vak lo hnuah chuan Mapuia inkhel turin a hruai chhuak ta a, pawn veranda ah thingpui dawmin kan thu chhuak a, Thantea hmel lo eng ta deuh chuan min ti hlim hle. Ka en reng lai chuan min rawn melh a, a khi suk a, “Hun rei tak hnua ka u nui hmel ka hmu leh hi ka lawm ani, nangmah vang ani si a”a han ti a, chutah, “Kan hma hun chu a hriat miah lo a, mahse kei hi thi hmasa tur ang zawkin ka lang ta a, ka lo thi anih pawhin I awm tawh a ka ngaihtuah lo”a han tih chhunzawm a. Ka thaw hak a, “Thante, chutiang an sawi ngai lo, thihna te hi chu kan thu ani lo chiang em a, nangpawh hlim takin I awm zel anga”ka ti a, “Sangbawihi nen engtinnge in awm tak zel?”tiin an chungchang reng reng ka lo la zawt lo tih chu ka han hrechhuak a. Mi kawng kal vel chu uluk hmel tak hian a thlir a, “Kati tawp vek, ka na tuar lai a hmuh hi ka duh lo ani”a ti chuai raih a, “Mahse chumi vang ngawt a engmah hre lova I kaltir chu a fair lo asin”ka lo ti vat a, a lu chu a han thing a,“Nakina phurrit ka ni mai tur tih inhre reng chung hian ka chelh thei lo ani”a ti ta a. A rilru natna inphum ru chuan keipawh min tin a tel ani, engmah sawi lo chuan kan thu ngawi ta reng a.
.
Hun chu a kal ngaiin a kal ve reng a, ka hun tam zawk chu dawrah ka hmang ral a, ka nu hriselna alo tha ta vak lo bawk nen ka duh ang hna pawh ka ngaihven thei lo ani ber. Dawr khar hun pangngai aia rei deuh kan in hawng a, naupang inkhawmpui a hnaih tawh avangin inhralh a nuam deuh a, chuvanga haw har deuh pawh chu kan ni. Ka haw dawn chuan ka phone chu a rawn ri a, number hlang anih avangin ka pickup lova, a pawimawh viau anih leh a rawn ti nawn mai angchu tiin ka motor park na lam chu ka pan a. Motor ka khalh laiin a rawn ri nawn leh a, ka pickup ta nge nge a. Kawngsirah chuan ka motor chu ka han hung tha pah bawk a, “Andria pa ka nia, inbe lawk ang, in kawtah ka ding lo chhuak the”a rawn ti nghal tawng a, “Inah ka awm lo, ka chhuak”tih pah chuan dah mai ka tum a, “Ka lo nghak mai ang che”tiin amah zawk chuan a han dah hmasa a. Ka chau ve deuh bawk nen ka thin chu a rim h;ur a, a duh anga thil engkim thlen tir hi ka tum lo. Ka nu chu phone a bia in ka thiannu Tei te ina chaw ka ei tum thu chu ka hrilh ta ringawt a, ka haw har deuh pawha min ngaihtuah lo tur chuan ka ti a, Tei te in lam pan chu ka pan nghal a. Hrilh lawk lovin nidangah pawh ka ei fo a, an tan thil thar ani lo. Chaweikham ah muangchangin ka inkhalh haw a, darkar hnih dawn a liam tawh avangin Nunfela chu a awm ka ring tawh lo. Garage a ka tlan luh dawn chuan a bul vel chu ka han hawi kual a, tumah ka hmuh loh avangin ka thaw huai a. Veranda ah chuan ka han ding vang vang a, inchhunga ka fapa hlim taka a nui awr awr ri chu hria in ka khi sak a, kawngkhar chu hawng in ka pen lut a, ka thil hmuh avang chuan chechang lovin ka ding khawng ta reng a. Ka mit chu ka han khap sawk a, a danglam phah chuang lo, Nunfela leh Andria chuan phone bih in an lo nuih pui alo ni. Hmanhmawh takin ka tlan a, ka fapa chu ka va phih sawn dawrh a, mak tih hmel tak chuan min lo en thap hlawm a, “Ka fapa hi ka remtihna tello chuan khawih pawh khawih tawh suh”ka thinrim lutuk chu ka khur deuh hlak hlak a, ka fapa chuan hlauthawn hmel tak hian min en kar a, room lamah ka pawn lut vat a. Khumah chuan ka han thuttir a, ka thin phu dut dut chu beng daih tumin ka han dawm a, “Ma, khapa kha misual mi?”a tih chuan chhan dan tur ka hre lo kher mai. Misual tiin hrilh ta ila a damchhungin misual angina a hre tawh dawn a, chu chu atan hian a tha ber angem ka hre lo ani. Ka lu chu ka thing a, “Ni lo e bawihte, ka thin a tirim mai mai anih kha”tiin ka han nui lui a. Ka nau MApuia chu room ah a rawn lut a, Andria chu lo awmpui turin ka ti a, ka chhuak leh vat a. Ka pa a lo awm lova, ka nu nen chuan tv chu ngawi rengin an lo en a, “Lo chhuak rawh ,pawnah inbia ang”ka ti a, ka chhuak zui nghal a. Thli chu a tawh deuh vuk vuk reng a, pawnah chuan amah hmachhawn zawng chuan ka ding a, “Ka hrilh tawh che kha ka fapa nen kan nunah hian rawn inrawlh tawh suh”ka han ti chang fak a, min ngaihpawimawh loh hmel tak chuan a han nui ri hak a, a kawng a dawm a, “Mihring te hi tumah kan famkim lo asin, kei ngei pawh khatih lai khan eng rilru pu in nge thutlukna kha ka siam ka hre tawh lo. Huaisen taka I pai tlang a fapa duhawm tak I hring hi ka chhuang reng che ani. Ka thil lo tihsual tawh ah khan tihsual nawn leh hi ka duh lo, chuvang chuan chance min pe turin ka ngen mai che ani. Min pek hma chuan ka tawpsan lo bawk ang”mahni in ringtawk tak chuan min melh ran a, ka chil chu ka lem khalh a. Ka hmangaih ngawih ngawih thin hmel kha ala pu reng a, min hip em em thin tu a mitmeng pawh a la danglam lo, chu mai ni lovin a chezia ngeng leh luhlul nghalh mai chu a la pangngai reng a. Ka kut chu ka han hum ruh a, “I chance neihchhun chu a zo tawh, I tlai lutuk tawh”tiin inchhunga luh chu ka tum a, min lo dang bet ta tlat a, “Ka fapa hian pa a mamawh asin, chu chu nangpawhin I hria, luhlul chhuah lo mai rawh. Ka tihsual tawh avang khan fahrah ani tawh a, I luhlul avang hian nih tir zel chu I tum em ni?”a ti a, min sawi nawk nawk a. Min hmerna chu talchhuah ka han tum a, a ai nghetin min tham a, ka rak that a, “Ka tihsual tawh ka pawm a, chuan siam that ka duh bawk, ka ti ngei bawk ang”a ti a, min thalh a. Thildang sawi tumin a han ang zuau a, ka pa committee bang rawn haw chu remchang ah la in ka pa rual chuan inchhungah ka lut ve ta daih a. Ka nu mitmengah chuan zawhna hlir a awm a, mahse tunah chuan engmah ka sawi thei lo. Room ah ka lut a, ka nau chuan ka phone chu a lo hmang mek a, “Hei alo lut chiah e”min hmuh chuan a ti a, phone chu mi han hlanchhawng nghal a, Mamuana alo ni a, a aw ka hre chiah chu ka insum hman lo ka mittui chu a rawn baw zawih a. Ka nau a chhuak a, ka fapa muhil bam chu a hmai ah ka chul a, MAmuana aw dam dap chuan ka lung a ti chhia ani. Ka phone chu call waiting ah ka dah avangin min rawn biak tum an awm tih ka hria a, ka han en zawk a, number save loh ni mahse tlaia Nunfela min rawn biakna kha ani tih ka hria a, chuti taka a ngampa chuan min ti thinrim takzet ani. Rei tak kan inbia a, Thantea nawm vak loh avanga a rawn len theih loh thu min hrilh chuan ka hlauhthawn a hlau leh ani ngei ang, ngaihtuahwm khawp a nih loh thu chuan a rawn chhunzawm a, a neihchhun anih miau avang hian namnul mai mai hi a thei dawn lo tih ka hria. Kan inbiak zawh hnu chuan ka phone a message ho te chu ka han hawng a, Nunfela min rawn thawn deuh hlir ani a, pakhat chuan ka mit ala zawk a, ka han hawng a, “Zanrei tak thlenga phone hmang thin, fate aia mipa buaipui zawk I lo nih hi. Kei nilo midang engzatnge I lo kawp hman ang tih hi ka ngaihtuah a, ka fapa kha ka hnena awmtir dan ka ngaihtuah mai a tul ani”tih chu. Ka tawt up up a, ka phone chu ka switchoff hmak a, chuti anih loh chuan ka thinrim in sum zo lo hian ka va bia nag rih ka hlau ani. Ka biak theih dan tur kawng a zawng tih chu ka hrethiam reng a, chhang ila a duh ang ngeiin kan inbe chhunzawm ngei ngei dawn a, chuvang a thinrim theihtawpa min siam tum pawh chu ani reng ani.
.
Thantea call ka dawn chuan hmanhmawh em em in an in lam pan chuan ka chhuak nghal a, an in peng ka thlen chuan scooty a rawn tlan chu ka lo hmu hman hram a, Sangbawihi ani tih ka hria. Ka phei zel a, an kawt ka va thlen chuan ka han in hung fel a, kawngka a in hawn avangin ka lut tlang nghal tawp a, Thantea chu ka han ko a, thawm a awm mail oh avangin a room lam chu ka pan a, ka au leh dawn chiah tih ah chuan khumah rizaiin alo in tuam hlup chu ka va hmu a. Ka pan vat a, ka koh leh chuan a inkhuhna chu a hawng a, a mit chu tahna tih hriat tak hian a sen ram a, a kut chu ka la a, na tak hian alo hmer ta ngawt ngawt a, “Ka tlawm ta ani e, ka tlawm ta”a mittui chu a rawn tla zung zung a. Ka kut chuan ka han hru a, “Thante, mi huaisen tak I ni tih ka hria, chutiangin I tlawm mai thei lovang”ka ti a, “Ka hmangaih em em chu ka kaltir ta, min haw ngawih ngawihin a hun a hmang tawh bawk anga, enge tih theih ka neih chuang ang le?”a ti sap a. Room kawngka ah chuan Angaihi chu mittui tling pam hian alo ding ve reng a, “Kal tir kher kha a ngai lo asin, hmangaihtu tak tak chuan I natna vang hian a kalsan ngai lovang che, na taka I siam rual khan nangpawh I na tel asin, I hmangaih em em chu mangtha I tih khan eng thatna chu nge hmuh I in beisei?”ka ti a. A mittui chu a han hru a, “Thudik hian a ti na daih zawk dawn si alawm, hun alokal deuh anga min theihnghilh mai ang”a tih chuan ka thin a rim thut a, “I na tih hi hrechhuak ta sic he, a damchhunga inchhir reng renga hun hman tir I duh em ni? Vawikhat te pawh I nat laia a enkawl lo che leh hmangaihna kuta vawn takngial che pawh a thei lo hi hrehawm ti ngawih ngawih in a la awm dawn ani tih I ngaihtuah thleng pha em?”ka tih chuan a thaw kawk a. Ka tho a, ngaihtuahna fim hmang hram hram se ka duh ani. Angaihi nen chuan sitting room ah kan inzui phei a, SAngbawihi lokal thu leh Thantea’n beidawng taka alo siam dan te chu min hrilh a, tih tur pawimawh tak ka nei tih chu hrilh ka ngai lo.
.
Thleng ka sil lai chuan Mamuana chu a rawn lang hlawl a, chhuna kan inbiak bak inbiakna hun kan la nei lova, a rawn kal tur thu pawh min hrilh chuang lovin a rawn lut ve mial a, ka lo nuih sang a, sitting room lamah a thu phei a. Ka nu leh pa nen an inpawh ve tawh avangin an titi ve nghal mawh mawlh a, ka thleng sil zawh chuan ka va pawh ve vat a, chanchinthar chhuah zawh hnuah ka nu leh pa te chuan mu turin room lam min pansan a. Mamuana hmel chu a dang deuh bai hian ka hria a, ka nu leh pa awm lai khan theihtawpin a inthup ve niin a lang. thingpui lum sak tum chuan ka han tho a, rang takin min paw thu vat a, min kuah ta hle hle a, “Hei hi ka mamawh zawk”a ti a, ngawi rengin kan inkuah vawng vawng a. Muangchangin kan inthlah a, “Andria pa chungchang hi kan sawi dun a hun tawhin ka hria”a ti dam dap a, min kuah a, “Amah kha ani tiraw? Kan inkhel thiam pa kha..”a nui sak a, mahse a nui hmel karah chuan a thutak ran thung, ka lu chu ka lo bu nghat a, “KA hria ani, khami zan atang khan rinhlelhna ka nei ta miah lo. Andria sam leh a mitmeng ka hmuhchian phei kha chuan hlauhthawnna in ka khat zawk. In nufa hian ka chan leh mai ang che u tih hi ka hlau ani”a ti a. Ngheta takin ka han kuah let a, “ Nang hi remchanna ah la in ka kawp mai mai lo che a, mipa rintlak tak I ni tih ka hriat vang ani. Ka tihsual tawh thil kha tihsual nawn leh ka hlauhzia chu I hriat kha, tisual nawn tawh lo tura ka mi rin chu nang hi I ni alawm”ka ti a. Hlim hmel tak hian min nuih a, “Engtikahmah min kalsan lovang tih min tiam rawh”a ti a, “Engtikahmah nang hi ka kalsan lovang che”ka ti a, duat takin min rawn fawp a, ka lo hnar lo chiang kher mai.

LAST

Ka thleng sil lai chuan patling pahnih hi an rawn leng lut a, sitting room ah ka nu leh pa ten an lo chhawn a, ka vawikhat hmuhna an nih ka ring a, khawi lam mi nge an nih pawh ka hre lo. Ka pa in thingpui lum turin min rawn hrilh a, ka thleng sil zawh chuan ka han lumsak nghal a. Ka va phei hnu chuan ka chungchang an sawi ani tih chu ka hrethiam nghal mai a. Kan inleng pa sang zawk chuan Andria chu alo pawm a, ka thut fel hnu chuan a pawmna atang chhukthla in ka malchungah a rawn lawn a, chu pa chuan uluk tak hian a rawn thlek zui vang vang a. A sam kir deuh chiai ah chuan rin dan ka nei ta, Nunfela pa anih ngei ka ring. Ka rin dan chu alo dik chiah mai, “Hei hi Bawihtea pu anih hi”tia ka pa in min han inhmelhriattir a. Inthiam loh hmel tak hian kan nufa chu min han melh a, “Mama at lutuk avanga hetianga awm hi in ni a, min ngaidam hram hram dawn nia. Kan hriat miah loh in tupa duhawm tak kan lo nei reng ani si a”a han ti a, amah vek chuan, “Khatihlai a nupui a rawn duh ut ut lai pawh khan keini chuan dan a ngaihna kan hrelo a, chuvanga remti mai pawh kan ni. Mahse I rai thu leh hetiang vel hi engmah kan hrelo, inthen zui satliah ta mai ah kan lo ngai ve bawk si a, a pa ka nihna angin ngaihdam ka dil mawlh mawlh che u”a ti a. Ka nu leh ka pa pawh chuan tawngkam that akin an lo dawngsawng a, engmah ka sawi ve lo. Ka fapa chu nghet takin ka pawm a, ka hnen atang hian tuemaw hian min laksak ang tih chiah ka hlau.

.

Ka mutnaah te chuan thil tam tak ka ngaihtuah a, ka fapa hi a pa lak atang ka ti hrang hlen thei takmeuh angem ka hre lo, chutihrualin insuihkhawm leh chu engtikahmah ka duh dawn silo. Ka sana chu ka han bih a, zing lam dar 1 alo ri der tawh. Ka mut lah chu a chhuak thei der silo, ka tho a, kan room veranda thlanglamah chuan chhuak thla in thlifim heuh heuh chu ka dawng a. Ka nunkawng zawh chhoh dan te chu ka ngaihtuah neuh neuh a, Mamuana nen hian inkawp rem tur tak tak kan ni angem tih te chu ka muthei lo chuan ka ngaihtuah kual ta mai mai a. Ka phone a rawn rik chuan ka phu nasa kher mai, chutiang hunah chuan tunge min rawn bia ang, khum a ka phone chu ka va la vat a, Mamuana hming alo lan chuan hlauthawng tak hian ka han pickup a, “Thantea a tha lo lutuk a, rawn biak loh che ka tum na a hrilh loh che chu ni theiin ka hre silo, hei hospital lam kan pan mek”tiin min rawn hrilh a. Chanchin min rawn hrilh zel tur thu chu sawi mah se ka ngaih a tha thei lo, ka nau room lamah ka va kal vat a, zan dang ang bawkin alo la mu lova, thil awmdan ka han hrilh hnu chuan hospital lam pana kal chu tha kan ti a. Andria chu a pi te bulah ka sawn a, Mapuia nen hospital lam chu kan pan ta nghal a. Kan va thlen lai hian Thantea chu nikhaw hre lovin alo la awm a, Mamuana’n min hmuh chuan min rawn pan vat a, min rawn kuah a, nghet takin ka lo kuah ve a, sawi tur engmah ka hre lo. Thantea chu ka melh tlawk tlawk a, tlangval that vanglai bera natna chimawm takin a man chu ka hrethiam thei lo ani. Zing khawvar dawnah chuan nikhua a rawn hre chho a, hospital kawtah chuan zing boruak chu ka lo hip kawk kawk a. Scooty rawn tlan lut ka hmuh chuan Sangbawihi ani tih ka hre nghal mai, min hmuh chuan a ding vat a, hlauhthawn hmel zet hian min melh kiau a, a mittui tling pam pawh ka hmuh hmaih lo. A scooty chu a han hung rem a, a hma ni khan Thantea chungchang chu kan sawi dun a, a natna vang chauh a then anih thu te chu ka hrilh tawh a. Mahse chuti mai a awlsam chuan a awih lova, tin, chutianga natna a tuar pawh amah hrilh duh lo chu a lungawi loh thu min hrilh nghe nghe anih kha. Min rawn kuah thlawp a, a tap ta hlawp hlawp a, Thantea awmna ward lam pan chuan kan inzui lut a. A bulah thu in a kut chu a chul heuh heuh a, a mittui chu a tla zung zung a, “Thante… dam tha leh hram rawh aw..”tiin a phun chhuak sap a. Ka mittui tla tur chu ka dang thei lo, ka han hru zeuh a, hmangaihna dik tak chu harsatna hmunah hian alo lang chhuak thin.

.

Chaw kan ei lai chuan ka pa chuan Nunfela chungchangte chu a sawi chhuak a, “Palai rawn tirh chu an tum a ni awm a, eng kawng pawh zawh dawn la keichuan nawr luih tumna che engmah ka nei lo, mahse Bawihtea hma hun tur erawh I duhthlanna ah a innghat thui viau thung ang”a ti a, “Mamuana hi ka duh fe zawk, engang pawhin khelmualah chuan lo hlawhtling mahse chhungkaw dinna kawngah a hlawhchham chiang emai”Mapuia chuan alo ti ve mauh a. Ka pa chuan a tarmit kar atang chuan ka nau chu a rawn melh a, “Thil hi ngun taka kan ngaihtuah a ngai a, I u te ho pawh rawn ve hrim hrim ila, I thutlukna siamna atante pawh chhungkaw in rawn khawm chu a tha alawm”a ti ta a. Ka fapa chu ka va melh a, a thleng a chaw chu a lo thai let mai mai a, engmah a la hrethiam ve si lo. Chawei chakna pawh chu ka nei tawh lo, ka thinlung hi a tawt mup ringawt a!

.

Palai pawh an rawn kal ngei a, mahse beiseina siam zui ka tum hran lo. Chiang takin ka ngaihdan nghet tak chu ka kaltlangpui a, “Ka thinlunga ser awm hi a reh thei tawh lo, chuvang chuan inneih lam chu ka rilru ah a awm lo. Mahse a pa nihna erawh a lo hnawl tawh ni mahse pa mawhphurhna tak tak ala ngam dawn anih chuan an inzawmna tihchhiat kher chu ngai ka ti lova, mahse ka thu hmu hmasa lovin engmah a rawn tih pawh ka remti chuang lo”tiin a hma atanga ngaihdan nghet tak ka lo neihsa chu ka han sawi chhuak a. Ka chhungte tan chuan a mak hran lo, midangte chuan engtinnge an ngaih ang tih erawh ka hre lo thung. Engkim tha takin kan sawi zo thei a, karkhata vawikhat Andria an in lama khawsak phalsak tura min ngen erawh lo ngaihtuah ka tum thu ka sawi thung. An haw hnu chuan kan upa ber in hrang chang tawh nen uluk takin kan sawi dun a, “Nangma tan chauh nise chuan engtikawng mahin inzawm leh hi ka duh ngai lovang. Mahse I fapa tan I nun tel hi a ngai miau si a, pa a mamawh hun ala awm ngei dawn a, chhe lutuk a inchhuah hi chu a tha love”tiin an in lama khawsak phalna chu pe turin thurawn min pe a. Harsa ti viau mah ila ka chhungte thutlukna chu hnawl vek tha in ka hre hran lova, ka pawm ve ta ani.

.

Ka fapa in a vawikhat nan a pa te in lama min riahsan zan chuan chhin khat mah ka chhing lo. Ka ngai em em a, ka lak atang a lak hran ni tur anga ka ngaihtuah phei chuan ka na ngawih ngawih a, a tello chuan engmah ka ni tawh lo. Zing lam dar 3 velah ka phone chu a rawn ri a, ka hriat ngai loh number ni mahse ka han pickup vat a, Andria ni anih thu chu min rawn hrilh a, “Bawihtea hi a mutui lai a rawn harh a, a ngai deuh che aniang”tiin phone chu a han pe vat a, “Ma… ka ngai che a, ka muhil thei lo”ka fapa chuan a rawn ti a. Hetiang tehhrepa min then hrangtu a pa huatna bawk chu a rawn lut a, “Bawihte… naktukah ilo haw leh dawn alawm, a ni khan a duat che kha fel deuhin awm tur ka tih kha aw..”ka han ti a, keimah zawk chu ka mittui a tla zung zung a. Tha taka ka thlem hnu chuan kan inbiakna chu kan titawp a, muthilh zui tumna pawh nei lovin ka tho chhuak a, kawl pawh a rawn eng tan a, thingpui in turin choka lam chu ka pan ta nghal a. Khua a var fel hnu chuan kawngka hawngin pawn boruak chu ka hip vang vang a, kan kawmthlang kawngpuia motor intlan pel zut zut chu ka thlir reng a, kan in lam pana mi rawn kal chu ka lo thlir reng a, alo hnai zel a, hai rual ani lo. Ka thutna atang ka ding chhuak zawk a, “Good morning…” Mamuana chuan hlim hmel sar hian min nuih a, chutiang ang huna hmuh chu ka inbeisei loh em avangin chhan ngaihna pawh ka hre lo. Ka biangah chuan min han fawp zeuh a, “I mu thei dawn lo tih ka hria alawm”a ti sap a, nghet zet hian min kuah a, “I mut theih loh laia tui taka lo mut bik te chu ka thei lo ani e”a ti a, ka nui ve ta var var a. Inchhungah kan inzui lut a, thingpui ka lum sak a, hetiang taka ka tana inpe hi ka la tawn loh avangin ka tan chuan mipa a zawnga famkim ber ah ka chhal lo thei lo. Ka chhungte rawn thawh thlengin a awm a, a haw dawn chuan pawn ah ka thlah a, “Nangmah chauh a hrehawm I tawrh hi ka duh lo, engthil pawh te lua a awm lo, min hrilh zel ang che”a ti a. A kal liam thleng chuan ka thlir zui vang vang a, hmangaihna hi a awm anih chuan hepa hi ka hmangaih chu a ni.

.

Nitin dawr lamah ka hun ka hmang a, ka fapa pawh a pa te in lamah a ngam ve sawt hle a, an tu hmuh hmasak ber anih avangin an atchilh bur bawk si, atan chuan nuam lo han tih theih pawh a ni lo. Mamuana nen pawh kan boruak a tha a, Thantea hriselna in hma a sawn bawk a, engthawl taka ka hun ka hman ve lai ber niin ka hria. Ka fapa chhuanlamin Nunfela chuan min rawn be pawp fova, hrehawm ka tih turin Mamuana a awm ngai lo. Engkim min hriatpui vek a, tha taka lo be turin min hrilh fo a, a hunah erawh a thikna chu a tilang ve thin. December thla chawhnu lam kan chuangkai a, kan rilru chuan Krismas lam a hawi thup tawh niin a lang. Dawr pawh inhralh a nuam viau a, khawthim thak hnu thlenga kan inhawn a tul thin. Nunfela pawh Krismas chawlh hmang turin a rawn haw chhuak a, a fapa chu a thlahlel ve tak tak niin ka hria. An inzui chhuak deuh reng a, karkhata vawikhat chiah riah ka phalsak avangin tlaiah a rawn thlah ve mai thin. Chutianga naupang hruai chhuak fo ta chu kar lovah a chanchin hriatchian chak an lo tam a, chanchinbumi te bengverh zawng tak alo ni bawk nen a fapa neih thu chuan Zoram khawvel a dengchhuak nghal a. An pahniha Lammuala an thlalak te ch u a darh chak hle a, phone keng tawh phawt chuan an kawl emaw tih tur khawpin a darh chak ani. A larna hian min tibuai ngai lova, hmana mi cool tak Malsawmzuali kha ka la ni reng a, tun thleng pawhin heng boruak hian min tibuai lo.

.

Ka nu leh ka nau chu min pui turin dawr lamah an rawn kal ve a, kan nula nen pali laiin kan nghak a, kan indaih tak tak chuang lo. Chawhnu lamah chuan tlemin mi veivak pawh an ziaawm ta deuh a, thingpui in na hun pawh kan nei ve ta hram. Andria chu a rawn lang hlawl a, min rawn kuah chuk chuk a, Nunfela chuan a rawn zui lut a, “Vawiin chu Bawiha thawmhnaw vel en ve tawh ila ka tia, a pa ka nihna angin tun tumah hi chuan a duhzawng engkim tihsak ka duh ani”a han ti a. Hnial tum chuan ka han ang zuau a, ka nu chuan a mitmeiin min rawn khap vat a, ka ngawi leh ta zawk a.Ka nu chuan a remlohna a awm hran loh thu a hrilh a, “Mali hi rawn tel ve thei sela mipa hi chuan thil lei kan thiam mang silo”a ti leh ta tlat a. Ka hnial ve nasa viau na a ka nu bawk chuan kalpui turin min ti leh ta bur si a, ka chaklo satliah nilovin ka chak lo takzet ani. Ka fapa lah chuan phur zet hian min lo sawm ve reng bawk si a, a tawpah chuan kal turin ka inbuatsaih ta nge nge a. MC lamah kan inzui lut a, Andria te pafa chu inkaiin ka hmaah an kal a, an hnungah deuh zel chuan ka kal ve a, a nihna takah chuan nuam ka ti lo ani. Ka phone a rawn ri a, Mamuana chuan inthlahrung deuh tak chuan min rawn bia a, ka buai thin em avang hian chhun lamah pawh min rawn be tha ngam thin lo. Ka chhuak tih ka sawi chuan tunen nge tih min zawt vat a, Andria nen a thawmhnaw leia kan chhuah thu chu ka han sawi a, a pa tel ve thu erawh ka sawi lang lo. Zanah a lo len tur thu sawiin kan inbiakna chu kan titawp ta a. Vawihnih lai MC kan kual nawn hnu chuan Andria duhzawng pawh kan lei kim thei a, tul ka tih loh thlengin a pa chuan a leisak a, ngaihsan hmel zet hian a pa chu a thlek vang vang thin a, tui ai chuan thisen chu alo chak ani. Kan thil lei ho chu motor chhungah kan dah zawh chuan ka nu damdawi lei kawi ka la ngaih avangin damdawi dawr lam chu ka pan a. Ka lei zo dawr atang ka chhuak chiah chu hospital thlang kawngah chuan Mamuana chu a rawn chhuk mek a, a rawn hawi thlak chuan min rawn hmu nghal mai a, a nui sak a, min rawn pan zawng hian a rawn kal a. Chutah a kal lai chu a tawp chawt a, a hmel chu a inthlak danglam nghal vek a, Andria te pafa an rawn thleng chawpchilh nghal a, Mamuana ka han en leh chuan a dinna ngaiah a lo la ding reng a, chutah hriatchhuah nei ni awm tak hian a inher a, a kal ta vang vang a.

.

In kan thlen hnu chuan Mamuana chu biak tumin a bei ngat ngat a, phone a pickup duh lo, a tawpah phei chuan a switchoff hial a. Zanah pawh chuan a hmel hmuh tur a awm lo, ka tawt up up a, in hauh changte chu nei ve thin mah ila tun anga kan boruak hi kan la tawng ngai lo. Ka muhil thei lo chu khumah ka inlet sek a, Mamuana rilru na hmel kha ka mitthlaah a cham reng a, ka inthiam thei hlawl lo. Khua var sela hmaichhanah hmuh a, engkim chu hrilh vek ka duh ani. Hma takah ka tho a, ka rilruah thildang ka ngaihtuah thei lo. Chaweikham veleh dawr lam ka pan a, kan buai em avangin ka tum angin ka chhuak thei lawk lova, Mapuia rawn thlen hnu rei vakloah chhuanlam siamin ka chhuak thei ta hram a. Mamuana te in lam pan chuan ka inkhalh chhuak a, an in ka thlen chuan Thantea leh Sangbawihi chu pawnah an lo awm a. Min hmuh chuan Sangbawihi chu a lo then sak a, “In tihthiam lohna in nei mi?”alo ti ru sa sa a, ka lu chu ka han thing a, “A mood a off rap mai, a thu tum vuau mai”Thantea chuan alo ti ve vat a,” Kan va chhuak ve lawk ange lo va kawm hlim rawh”amah vek chuan a ti a. An chhuak zui ta nghal mai a. Inchhungah chuan ka va lut a, Mamuana chuan tv alo en a, ka thawm chu hre ang pawhin a awm lo. A hnunglam atang chuan ka va kuah a, chet pawh a tum chuang lo, “Ka tihpalh takzet, a thleng nawn tawh lovang”ka tih chuan zawi muangin a rawn in her a, ka kut chu a la thla a, a mitmeng ah chuan tawrhna ka hmu ani. A room lam chu a pan ta daih a, thutthlengah chuan keimah in ka thu ta reng a, enge ka tih leh tur tih chu ka hre mai lo. Rei tawk tak ka nghah hnu chuan a hmel hmuh tur a awm thei silo, beidawng tak chuan pawn lamah ka chhuak a, motor a ka lut tur chiah chu min rawn ko a, kawngkhar bulah a ding to a, ka luhlul chhuahin motor chhungah chuan ka lut lui a. Rang takin a rawn tlan phei a, ka motor chahbi chu ala ta daih a, “Ka lungawi I duh anih chuan rawn kal nghal rawh”thupe aw tak hian a ti a. Inchhungah chuan a lut ta daih a, ngawi rengin ka zui a, a room a luh dawn chuan a rawn hawi let a, “Rawn lut rawh”a ti hmuk a, ka hnial ngam lo. Khum ah chuan a thu ngawi run a, khum tlangah chuan ngam leh ngam lo hian ka thu ve a, min ankhum bawrh bawrh se nuam ka ti zawk ngei ang. Min rawn pawt thut a, hlauthawng tak hian ka lo melh a, dimna tel miah lo hian min rawn fawp ta bawrh bawrh a. Kat hut ngai chuan ka thu reng a, chet ngaihna pawh ka hre lo. Tlemin a han inthlahdul deuh a, chutah duat takin min fawp ta a, ka hlauhna te chu an bo ta duak a, theih dan ang ang chuan ka lo chhang let ve a. A rei tial tial a, a duhthawh telh telh hian ka hria, ka rilru chu tihfim tumin a rukin tan ka lo la ve ngar ngar a, “Ka nghak thei tawh lo, ka ta ni tawh la ka duh ani”ka bengbul setah chuan a rawn ti a, a hipna na tak tak avang chuan mu leh mal ka nei thei lo. Ka kawr phelh tum chuan a rawn ban a, rang tak hian ka ding chhuak vat a, “Nilo… a theih lo”tih pah chuan ka lu chu ka thing nar nar a. Ka bulah chuan rawn ding ve in min han kuah vat a, “Tihnat chu ka tum lo, hrehawmna siamsak che pawh ka tum lo, khapa ang mai mai khan ka kalsan ve ngai lo bawk ang che. Mahse khawngaih takin vawikhat chiah ka ngaihthat nan leh ka ta I nihzia lantir nan rem min tihsak rawh”a ti a, ka namsawn dawr a, ka in ring hman lo, ka mittui chu a rawn baw zawih a. A khum bul dawhkana chahbi chu ka la a, “Min lo hmangaih ve reng reng lo tih chu vawiin ni hian ka hrechiang ta chiah e”a ti a, min hnungchhawn zawng chuan a ding nghal hmak a, “Mamuan, ka hmangaih lutuk che, mahse ka tihsual tawhnaah khan tihsual nawn leh hi ka duh lo ani. Ka ring em em che a, mipa hei zat zingah hian I danglam bik niin ka lo ngai thin, mahse… a ni lo, nangpawh midang ang chiah tho I lo nih hi”ka ti a. Ka in her a, chhuah tum chuan kawngkhar chu ka han vuan a, “Hlimna ka pe zo ve lo che, I duh tak I tawng leh ta bawk alawm, hlim takin va awm rawh u”a ti a, ka mittui chu ka khap per sak a, hawilet lovin ka chhuak nghal a.

.

Khawvel hi ka tan hian a fair hlawl lo ani, khumah chuan ka bawk thlawp a, min hmangaihtu emaw ka tih te pawh hian a tawpah chuan ka duhawmna leh ka mawina chiah hi an lo duh leh tho a, hmangaihna dik hi ka tawng ve thei ngai dawn lo niin ka hre ta hial mai. Zan lamah ka mu tlem bawk nen ka lo muhil daih chu niin, ka nu in min rawn kaihthawh chuan khua alo thim fel vek tawh a. Ka nawmsam loh chhuanlam khan dawr atang ka haw a, ka chhungte lah chuan ka damlo tak takah ngaiin min ngaihtuah viau lehnghal a. Ka nu chuan ka pang chu a rawn dep a, “Nu.. ka dam alawm, ka chau ve deuh mai mai”ka lo ti vat a, “Mamuana a rawn kal a, hmuh che a duh thu a sawi a”a ti a, chutianga a rawn kal mai chu ka rin loh em avang chuan ka nu pawh chu chhan mai ngaihna ka hrelo, “Ka rawn luh tir mai dawn em niang?”amah zawk chuan a ti a. Ka chhungte an awm kim avang chuan ka room a inbiak chu ka duh zawk reng reng a, rawn luhtir chuan ka han ti a. Rei vaklo hnu chuan a rawn lut a, khumah chuan a rawn thu a, ka mut ngai chuan ka mu reng a. A aw chu a han thian karh karh a, “Mali… vawiina ka chetdan mawi lo tak avang khan min ngaidam rawh, a thleng nawn tawh lovang”a ti sap a, “Ka tum lawk reng vang anilo tih min hriatsak turin ka duh che. Ka hmangaih che a, I tana tha lo tur thil engmah tih ka duh lova, I remtihna tellova chet phei chu ka duh lo..”ka mutna atanga ka thawh chuan a thusawi lai chu a tawp chawt a, “Mahse i che tho si a..”ka tih chuan a ngawi reng a. Ka mutna atang chuan ka tho a, ka sam hnawk niai chu ka han tawm chho tawk a, min en reng tih ka hriatna avang chuan ka melh duh lo lui a, a rawn nui chhuak hak a, rum zeta ka melh chuan a hmui chu rang takin a chip a, “I kawlh hmel tak tak lutuk ania, nupui kawlh deuh ka nei peih lo”a ti a, a nui vur vur a, ka nuih chu a za ru viau na a nui lo tur chuan ka insum hram hram a. Ka kut rawn lak a tum chuan ka lo tang tung a, na vak lo hian ka banrek chu a han hmer a, “Tum tak tak ni ila ka beidawn duh I ring em ni?” dam dup hian a han ti a, “Ka tum loh lutuk a ka hmuh cheu vang khan ka rilru kha a na ngawih ngawih a, ka chan ta che niin ka hre hial asin. Engkim kha atirah min hrilh tlang nghal la chuan ka hrethiam em em ang che, ka theih ang tawk hi chuan rilru zau ka pu ve pawhin ka inhria, ka lo hre sual ve deuh te pawh ani thei tho a.. “a han ti a, amah vek chuan, “Andria hi apa lak atang pawh hran leh tih hlat hi ka tum lo, mahse nangmah hi chan che ka hlau ani”a ti a. Ka thinrimna te pawh chu an bo zo leh ta vek mai, “Ka lo hmangaih thin a, atan ka lo inpe ral tawh thin ngei alawm, mahse ka rinna zawng zawng min tihchhiatsaktu hnena let leh hi ka tum tawh lo. I dinhmun ah ka in din tir a, I rilru tur chu ka hrethiam lutuk alawm, mahse hlauhthawn tur engmah a awm lo. Ka tan I din theih chhung chuan ka kalsan ngai lovang che”ka ti a. Min rawn kuah thlawp a, “Min kalsan lovang tih hi min tiam rawh”a ti a, ani hi kalsan ka duh ngai lovang, a kianga awm tura min duh chhung chuan kei hian ka thlah ngai lovang.

.

Krismas urlawk zan chuan Mamuana duhdan ang ngeiin Andria nen kan pathum in kan lengchhuak a, kawn chei mawi tak tak chu kan tlawh kual vel a, kan hlim tlang kher mai. Tlai atang tawhin Andria chu a pa in an ina riak turin a rawn dil tawh a, a hma atanga Mamuana lo sawi lawk tawh anih avangin riah chu ka remti ta lo ani. Thinrim deuh takin kan in atang chuan a chhuak tau a, ka ngaihsak zui lem lo a, ka theihnghilh ve mai bawk a. Veng hrang hrang kan tlawh kual hnu chuan kan in lamah kan let leh a, ka chhungte chuan tv an lo en thap a. Ka pa chuan Mamuana leh Mapuia chu ar talh turin alo ti nghal var a, thingpui lum turin keipawhin choka ka pan a. Andria pawh a putea leh Mamuana bulah chuan a awm a, a nui ar ar reng a, chu hlimna nui ri chuan min ti hlim ve veng veng a ni. Ka pa thingpui tur chawi chung chuan sitting room lam chu ka pan a, ka pa thil lo en lai mek chuan ka ke pen a ti tawp chawt a, breaking news tih headline ah a chuang kalh a-

.

“Vawiin tlai dar 4 vel khan Tuirial ah bike leh truck a insu a, bike khalhtu Lalnunfela, Chennaiyin FC tana khel mek chu nikhaw hrelo vin tunah Greenwood Hospital ah enkawl mek ani a, a hliam hi a na hle ani. Kan thudawnna in a sawi dan chuan he accident ah hian truck khalhtu Lalruatfela, Zemabawk chu zu a rui ngei tih mita hmutu ten an sawi a, Bawngkawn police station ah lak nghal a ni”

.

Ka no kenlai chu ka thlauh tawp a, ka tha chu a khur nghal zawih zawih a, ka thawm hria in Mamuana leh Mapuia chu an rawn tlan vat a, Mamuana chuan min kuah a, thutthlengah chuan min thuttir a. Chutianga awm chu ka duh reng reng lo, mahse ka in thunun hman ngang silo, Mamuana chu nghet zet hian ka vuan tlat a. Andria chuan hlauhthawn hmel tak hian min melh ran mai bawk a, Mapuia chuan a pawm sawn vat a, hlauthawng taka siam fo hi ka duh lo ani. Ka pa phone chu a rawn ri ral ral a, an inbiak dan kalhmang atang Nunfela chungchang an sawi tih hairual ani lo. Ka nu mu tawh chu a rawn tho chhuak leh a, ka pa chuan thil awmdan chu a han hrilh ve a, “A rawn tawng chhuak ve thut thut a, a fapa hming hlir a lam an tia, Bawihtea hi tunah kalpui tur nge naktukah lam zawk ni ang tih ka hrethiam lo ani”a han ti a. A tawpah chuan Mapuia leh Mamuana nen kan pali a kal tur chuan ka pa chuan rem a ruat ta a. Mamuana chu ka hmaizah viau rualin a tellova kal chu ka hreh ru em em zawk a, min hriatthiampui ve pawhin ka hria. Hospital kan thlen chuan mi an lo tam khawp mai a, Bawihtea pu chuan min lo ko vat a, mi awm lohna lam atang chuan min luhpui a, cabin ah an lo sawn lut tawh a, amah a chian loh em vangin tam tak luh theih anih loh thu sawiin Bawihtea nen chauh min luhtir an tum a, Mamuana chu ka vuan tlat a, a luh ve theih loh chuan luh bik chu ka tum lo. A tawpah chuan an phal ta hram a, a lu chu an tuam var luk a, a hliam dang erawh ka hmu mai lo. A harh zeuh zeuh a, a harh chhunah a fapa hlir a rawn lam tih chu min lo hrilh nawn leh a. Kan awmchhung chuan a harh tawh dawn lo niin a lang, a tuk lama Bawihtea hruai leh tura kan intih hnu chuan haw kan tum a. A khum bul maia thu ka ni a, chutia haw tuma kan tho chu ka banah hian min rawn vuan ta tlat a, a harh emaw tiin ka han en vat a, a meng chuang lo. Zawitein a kut chu ka la sawn a, khumah chuan ka han nghat a, “Mali..min ngaidam hram rawh, ka fapa nen hian ka hmangaih takzet che u..”tiin fiah tak hian a rawn phun chhuak a.

.

Hospital kawtah chuan Mamuana nen inhmatawn in kan ding a, Andria chu a muthilh avangin Mamuana’n a pawm bawk a, Nunfela pa in kan haw ala phal loh avang chuan kan thlen atang darkar khat dawn chu a liam leh tawh. Ka rilru chu a in sual buai deuh nuai a, Mamuana chu ka hmaizah takzet tawh a, chutihrualin a tellova chu lai hmuna awm chu ka duh teuh si lo. Rei vaklo hnuah chuan kan haw ve ta a, inchhung thleng min thlah a, ka chhungten min lo la nghak thap a, zawhna that akin aman a chhang vek a. A’ haw dawn pawh chuan pawn thlengin ka thlah a, “Ka lakah inthlahrunna tur engmah a awm lo ania aw” dam dap hian a ti a. Duat takin min kuah hle hle a, “Merry Chirstmas”tih pahin min rawn fawp ta vawng vawng a.

.

Krismas leh boruak pawh a zo tawh a, hun hlimawm leh nuam tak kan hmang dawn emaw tih laiin boruak dangin min tibuai leh ta si a, Mamuana nen pawh kan duh angina hun kan hmang thei lo. Kumthar tukah chuan phone call ka dawng a, Nunfela pa hnen atang ani a, an ina kal turin min rawn ngen a, chu kher chu hnial theih ka duh hle. Ka hnial deuh tlat avang chuan thil awmzia chiang takin min rawn hrilh ta a, “Mama hi a damchhungin football a khel leh thei tawh ngai dawn lo, a nun a beidawng em em a, fuih tu a mamawh a ni. Mali, ka fapa avanga I tawrhna kha ka hriatthiampui che, mahse tun chiah hi min pui rawh”tia min rawn ngen ngawih ngawih avang chuan kal chu ka remti ta a. Mamuana chu bia in thil awmdan ka hrilh a, min kalpui thei se ka duh bawk a, mahse a duty lai anih avangin keimaha ka kal mai chu a ngai ta ani. An in ka thlen dawn chuan ka let leh mai dawn em niang tiin ka inngaihtuah thut a, mahse engkim chu hmachhawn tlang vek ka duh leh ta zawk. Pawnah chuan Nunfela nu leh pate chuan min lo hmuak a, min hmuh chuan a nu chu a tap ta hawk hawk a, a pa chuan insum turin a han hrilh a, ka hrilhhai letling zawk hle. Inchhungah kan inzui lut a, room pakhatah hian min hruai a, Nunfela chu tukverh lam hawi zawng hian a lo thu a, “Mali alo thleng e”a pa in a tih chuan muangchang hian a rawn in her a, a mitmeng chu a thim ruih a. A rilruah enge awm ang tih chu hriatthiam a har hle, “Tikhan lo inkawm ula, eitur kan va siam ange”tiin a nu leh pa chuan min chhuahsan a. Khum bula sofa in hungah chuan ka thu a, “I chanchin ka lo hria a, a pawi ka ti hle mai”ka han ti chhuak a, ngeiawm tak hian a nui hak a, “I lawm viau zawk lo em ni?”a ti a, ka chhang lo. Rei vaklo hnuah chuan thawk a han la hak a, “Ka hma hun ka lo suangtuah ve thin te chu engmah a thleng ve dawn ta lo anih hi, ka tihsual rah vek ani”a tia, hnuai lam chu a melh ngar a, “Nunfel.. i suangtuah thin te chu ti hlawhtling thei la ka tihpui khawp mai che. Mahse tunah hetiang I nih rih avang hian chung chu a chhe ta vek tihna pawh ani chuang lova, huaisen takin hmachhawn la, I paltlang thei em em ang”ka ti a, “Anihna takah chuan ka nun atanga ka kal tir hnuah che khan engmah hi ka tluang thei tak tak lo, ka haider lui thin, ka hmangaih em em che a, chuvanga nupuiah pawh duh che ka ni. Mahse khang hunlai khan eng hian nge khati taka min tibuai ka hre lo. Ka mangah nen lam min rawn zui thin, ka luhlulna leh ka chapona avang khan rawn ngaihven zui che pawh ka duh ngai lo”a ti a. Ka thutna atang chuan ka tho a, “Hmangaihna chu sawi ve lo zawk mai rawh”ka ti hmak a, “Mali.. min ngaidam thei thlawt lo em ni?”a ti a, a mittui chu a tling pam a, “Khawngaihna tlachham lutuk ah chuan min ngai lo la, I hnenah hian ka lo let thei tawh lo ani”ka ti a, “Ka tlai tawh I tihna ani maw?”beidawng zet hian a han ti a, “A pawi ka ti, khang hun chhung zawng khan ka tan pawh nilo, I fapa tan hian ilo let ka ring thin. Beiseina tlemte ka neih pawh nang chuan min tihchhiatsak vek a, khang hrehawmna zawng zawng kha keichuan ka paltlang tawh a, ka nat thin na zawng zawng pawh tunah chuan ka dam tawh. Nang leh kei hi kan khawvel a dang daih a, inkawprem tur kan ni lo, kal kawng ve ve zawh zawk ang”ka ti a. A rawn hawi chhuak tawh lo, a room atang ka chhuak a, thui ka pen hma in thil keh ri bur ka hria a, rang zet hian ka tlan let a, Nunfela chu chhuatah thisen nen a lo awm nuai a, ka au tuar a, Nunfela chhungte chu an rawn tlan vat a. Ka tha chu a khur zawih zawih a, thutthlengah chuan ka thu hnawk a, buaina dang hmachhawn leh chu ka zuam tawh lo asin.

.

Full moon zan ani a, khua a thiangin boruak a nuam a, kan inchungah thla eng thlir pah chuan Mamuana nen kan thu a, zan dang ang lo takin kan ngui deuh riai hian ka hria a, Andria lah a pa dinhmun that vak loh avangin an in lamah a awm phei a. Karkhat dawn ICU lama a awm hnuah ward pangngai ah an sawn chhuak ve ta hram a, hma a sawn zel chuan Andria pawh a rawn haw ve vat chu ka beisei ani. Mamuana chuan nghet tak hian min kuahbet tlat a, “Mangtha tia kan inthlah zan ni tawh rawh se..”a thusawi chu a zawi na a ka bengah erawh a ring ngei mai. Min kuahna atang ka talchhuak a, “Enge I thusawi chu a awmzia?”a ngaihna ka hre lo takzet ani. Min rawn khawih a tum a, a kut chu ka lo vai thla lawp a, “Mali, thil tam tak ka ngaihtuah hian inthen hi a tha a ni”a ti dam diai a, ka thinrim chu beng daih har ka ti ngei mai, “Nangman I ngaihtuah vek a, I ngaihtuah vek hnuah I thutlukna chu min hrilh a, tichuan awlsam takin kei hian ka lo pawm in I ring bawk a..”ka thinrim lutuk chu ka tah a chhuak ngawih ngawih. Ka lu chu dim te in a rawn chul a, “Ngaih loh lamah ngai suh aw, ka hmangaih em em che a, mahse Andria hi a pa lak atang ka la hrang thei lo ani”a ti a. Ka thinrim chuan khua ka hmu tawh lo, “Awle, a tha e, engkim chu tawp mawlh rawh se. I duhdan ang ngei chuan kan inthen ang”ka ti a, “I thutlukna a hlawhtlin vang hian I hlim viau angchu”tiin ka nui lui hak a, “Nilo, chutiang ani lo, in nufa hian in kawng daltu ka ni ang tih hi ka hlau em ani”a ti a, a thusawi chu ka ngaikawi laklawh a, ka lung chu a awi thei lo. Inhnuaiah ka chhuksan a, ka room ah chuan ka inkalh hnan a, ke pen ri ka hriat chu ka room zawnah a tawp chat a, chutah muangchangin a kal zel a, thawm ka hre tawh lo. Rizai in ka khuh a, ka mittui chu a tla zung zung a, thlauhthlak ka ni nawn leh in ka inhria a, ka na ani. Tin, ka lo innghah thuk ve tawh em avangin ka na bawk a, ka lo ngaihdanah chuan harsa lai a awm anih pawhin kan pahnihin kan bei dun zel turah ka lo ngai ani.

.

Ka muhil thei lo chuan thil tam tak ka ngaihtuah a, tha taka sawi theih reng ka lo thinrim nghal vak chu awmzia a awm lo ka ti thar hle a, Mamuana chu biak leh ka duh em em a, mahse tlawmthlak ka ti bawk si. Ani lah chu a reh vung vung a, min be hmasa anih loh chuan ka be hmasa bik lovang tiin ka han insehruh a, mahse zep rual lovin Mamuana chu ka ngai ani. Nihnih zet kan inbe tawh lova, a aia harsa leh hrehawm zawk ka lo paltlang tawh avangin awlsam taka ka paltlang leh pawh ka inring. Mahse chutiang chu a ni hauh silo, ka chawei a tui lova, ka mu tha thei bawk si lo. Keimaha ka awm lahin ka inngaihtuah ngut ngut a, ka a thei mai dawn te pawh hian ka han inhre bawk a. Ka fapa pawh a pu te remti lo chung ka hruai haw a, a tello chuan ka chakna te hian min bosan ang tih ka hlau ani. Andria te school lam panin ka chhuak a, function pawimawh tak a awm avanga kal tum pawh ka ni. An school kawt kan thlen chuan tiang hawl chung hian Nunfela chu alo awm reng a, Andria chuan hlim tak hian a pa chu a pan a, a chal an thuina te chu alang kalh a, a chauh hmel hle bawk. A hmel nung sarh thin leh hlim tak thin kha a thutak ngal tawh a, ka ngainat thin kha tunah chuan a danglam zo tawh a, keimah pawh ka danglam takzet tawh a ni. Function a zawh hma deuh chuan Nunfela chu a thaw a rawn hah deuh hlek a, mipui boruak chu ala zo lo ani ngei ang. Pawnlamah a inthiarfihlim vat a, rei vaklo hnuah chuan kan bang ve ta a. Ka motor dahna lam chu kan pan a, Nunfela chu chauh hmel zet hian motor ngheng hian alo thu a, a hmel atang chuan a tha lo takzet tih a hriat a. Min hmuh chuan harsa ti zet hian a lo tho a, "I nawm loh hmel hle mai, tha lo chung chuan ilo kal duh kher a, i that loh zual phah ange"ka ti a. Ka fapa chuan a pa chu a lo kai vat a, "Ka fapa tan hian ka nun hi hman ka duh ve tawh em ani. Ka theihtawp ka chhuah bawk ang"a ti a. Ngawi rengin motor ah ka lut a, "In rualin ka lo haw ve mai ang, ka rawn inthlah tir ringawt a, haw na tur pawh ka nei lo"a ti a, Andria nen chuan an rawn lut ve nghal a. Kawngtluanin kan inbe tawh lo, an pafa erawh chuan an in chhaih reng a, hospital peng kan thlen chuan traffic jam avangin kan ding reng a. Min thlir rengtu an awm a ka hriat avang chuan ka han hawi chhuak a, kan chhak hospital gate atanga rawn tlanchhuak Mamuana chu ka han hmu a, traffic jam vang chuan alo ding ve reng a. Ka hmu tih a hriat chuan a rawn nui sak a, chu chuan min ti na zawk a, ka hawilet nghal vat a. Ka fapa chuan min lo pawt deuh nawk a, ka ngaihtuahna ka lo sawr bing lutuk a, min biakna pawh ka lo hrelo, "M.. kfc ah chawl ang"a ti ta tlat a. Phur lo zet chuan ka luh pui ta nge nge a, a pa hreh chung chu a sawm lui bawk a, kan pathum bawk chuan kan in zui lut leh ta a. Thil kan ei zawh hma hma chuan mi hrang hrangin Nunfela chu thla an rawn lakpui a, Andria tan chuan hmuhnawm tih tham tak tur hi ani a, "Apa, i van lar bik tak"a khat tawkin alo ti reng bawk a. Kan chhuah dawn chuan Thantea leh Sangbawihi an rawn lut ve hlawl a, Andria chuan hlin tak huan Thantea chu ava pan a, an han inpawm leh rih a. Sangbawihi chuan mIn kheuh zeuh a, "Biak che ka duh hle mai"a ti sap a. Nunfela chu ka va melh a, "Bawihtea nen motor ah min lo nghak lawk mai dawn em ni?"ka ti a, muangchangin an chhuak zui nghal a.

.

"Ka sawi theih chu a awm miah lo a mahse in hmel ka hmuh hian ka ngawi mai mai thei tlat lo. U Mamuana nise a nundan hmasa ang khan a nung leh tawh a, a hlim hmel hmuh tur a awm lo,nangoawh i hlim thu min hrilh ni la ka awih miah lo ang. Kumkhuaa in inchhir hlenna tur thil in ti ang tih hi ka hlau ani. In inthen hlen dawn anih pawhin rilru dam takin inthlah rawh u, rilru na taka hetianga in tawp hi a tha ka ti lo"Thantea chuan a ti dap dap a. Sangbawihi chuan ka kut chu a lo hmer salh a, "Eng thutlukna pawh lo siam la Thantea nen hian kan dem miah lo ang che. Thantea sawi ang khan vawikhat tal chu inhmu leh rawh u"alo ti ve mawlh mawlh a. Ka han tgaw halh a, "Engmah awmzia a awm lo, a thutlukna ania engmahcsawi theih ka nei ve hleinem. MIn nei duh tak tak nise chuan engkim hi min hmachhawn pui vek ka ring. Mahse tunah chuan a duh angngeiin kan awm alawm, sawi tur kan neih ka hre tawh lo"ka han ti a. Thantea chuan chiang zet hin mIn melh kawk a, "Ka hrethiam lutuk che alawm, ka u thiam loh pawh a ni ang tih chu ka ring ngei a, mahse uluk taka a ngaihtuah hnuah chauh ani chuan a thutlukna a hrilh angche. U tana tha tur chiah a ngaihtuah bawk ang, ka u anih avanga ka tan vang nilovin ka hrechiang em a, ama tan ni lovin i tan a tha ber zel a ngaihtuah ang"a ti a.

.

Thantea thusawi chu uluk takin ka ngaihtuah a, a dik ngei ang tih ka ring, engtiq awm tur nge tih pawh ka hrethiam tawh lo. Kan chaweinaah chuan ka pa chuan ka duhthlanna chungchang bawk chu min zawt leh a, "I ngaidam thei dawn anih chuan arang lama inneih vat hi a tha ber, nuthlawi chu in zuam awm a, in zahawm lo"a ti hmuk a. Ka nu chu ka va melh a, "Eng thutlukna pawh siam la i chhungte hi chuan kan thlawp zel ang che"a lo ti ve a. Ka nau chuan engmah a sawi lo ve teh mial a, "Ka pa.. inneih hi chu ka duh tawh lo ani"ka han ti tawp a. Han sawi leh mai tur paeh chu ka hre lo, "I fapa hi a lo thanlen hunah a hnenah hian wnge i sawi ang?"ka pa chuan a ti a, "Engkim hrethiam rual anih hunah thil thlendan dik tak hi ka la hrilh anga, min dem bik in ka ring lo. Ka hmangaihna zawng zawng hi ka dawn tir anga, chung chu hrethiam in ka thutlukna siam hi ka siam sual lo ani tih min la hrilh ang"mahni inringtawk tak chuan ka ti a. Ka nau chuan a kutzungpui chu a rawn ti pir va a, min han siai sak bawk a. Ka tisual nawn leh ang tih chu min hlauhpui ve takzet tih ka hria, "Vawikhat tihsual tawh chuan tihsual nawn leh hi a awl viau ania,finkhur hle ang che"ka pa chuan a ti ve ta a. Zanah chuan ka room tukverh a thla rawb eng lut kulh chu ring in light ka off vek a. Andria lah chu a pa te ina a rih zan anih avangin a riak daih bawk si, ka khua a har ru hle a, chutihrualin ka luhlulna hian min la hneh ve zel a, lungleng tak anga awm hi ka tum lo. Kum 6 lai mai mahniin harsatna ka lo paltlang tawh a, a aia na lo zawk chu ka paltpang leh thei em em ang tih hi ka hrechiang a ni.

.

Dawr lamah hritlang deuh tak chung chuan ka chhuak lui a, thawmhnaw thleng thar buaipuiin ka tal nileng leh thak a. Tlai lamah chuan ka khua chu a rawn sik hluah a, awm luih ngaihna a awm tak lovah chuan ka haw ta nge nge a. Ka nau chiah inah alo awm a, ka nawmsam loh thu hrilh in ka mu nghal a, ka lo muhil char char a, ka phone ri ral ral chuan min tiharh a. Peih lo zet hian ka han pickup a, Sangbawihi alo ni, "Thantea ICU ah an dah lut a, chanchim ka rasn hrilh che"tiin hlauthawng tak hian min rawn hrilh a. Ka harh kawk a, ka nghilh dup hian ka hria, ka nau chu ka ko chul a. Ka roomah a rawn tlan lut vat a, thil awmzia sawi pah chuan ka insiam mawlh mawlh a, motor khalh chu ka zuam loh em avangin mIn hruii turin ka ti a. Hospital ka thlen chuan Sangbawihi chuan min lo hmu vat a, min rawn kuah a, a tap hlawp hlawp a. A piah deuh ah Mamuana chu a lo thu ngui bar a, a hmel chu a pawr phang a, min rawn hmuh chuan a nui sak a. Chutianga ICU a awm ngai hial khawp ani chu mak ka ti a, kan inhmuh pawhin ala pangngai viau si a, awih har ka ti ngei mai. Zan dar 8 velah chuan Mamuana chuan ngaihtuahawm lutuk anih tawh loh thu sawiin haw turin min ti a. Sangbawihi bulah kalin ka fapa ngaihven a haw lawk ka ngaih thu leh let leh vat ka tum thu ka hrilh a, kan hawsan ta a. In kan thlen chuan Andria chu a pi malchungah alo muhil bam tawh a, Nunfela lo thu tel ve pawh chu ngaihsak lem lovin kanfapa chu room ah ka muttir a. Ka inthlak lum hnuah sitting room ah ka let leh a, ka nu chuan min mutsan a, Nunfela nen chuan in hmatawnin kan thu ran a, a tawpah a tawng hmasa zawkah a rawn tang a, "Ka chan tawk apianga lungawi hi ka tan a tha tih ka hria a,chuvang chuan nawr luih che ka tum tawh lo mai ange. Hlim takin i nun hmang la, ka chance tha ber kha keichuan ka hloh ta si a, ka vanduai ngawt mai. Ka fapa erawh a pa ka nihna angin a tana nun zel hi ka duh a, min phalsak turin ka ngen bawk che"a ti a. Engmah ka sawi loh avang chuan amah bawk chuan ahan sawi zawm a, "Thil awmzia hre rual anih hunah ngaihdam ka la dil ve ang, engtikahmah nang hi a dem che ka phal ngai lovang, ka thiam loh ngawih ngawih ani si a"a ti a, "Nunfel.. nangpawh mahni indemna nen i nun kha hmang tawh lo la, i tihsual ah kha chuan ka ngaidam che. Hlim takin awm la, tisual nawn tawh lovang che"ka ti a. A lu chu a bu nghat a, lungawi hmel tak chuan a nui ve ta sak a.

.

Sangbawihi chuan min rawn bia a, engmah tihtheih a awm chuan loh avanga kal lo mai tura min rawn hrilhna ani a. Keipawh chuan kal luih chu ka tum ta chuang lova, zing lama kal chu tha zawkin ka hria ani. Hma takah ka tho a, ka Inbual fai a, Andria school kal hma a ngaih avangin rawng chu ka bawl vek a, ka nu a rawn thaw chhuah hnu chuan hospital lam pan chuan ka tlan chhuak ta a. Sangbawihi leh Angaihi chu pawnah an lo thu a, ka pan vat a, chanchinte ka zawh chuan tlem chuan a ziaawm a an ngaih thu min hrilh a, a hmel hmuh ka duh ve ngei avangin min hruai a. Kawngka bulah Mamuana chuan phone a lo hmang mawlh mawlh a, min rawn melh zawk a, a kutin mIn hui a, a chhungah chuan mIn luhtir ve ta a. Ka rin ai daihin Thantea chu alo dawldang a, a kut chu ka han khawih a, a rawn meng zawk a. Ka mittui chu a tling pam a, a mitkhur thuk dak te chuan min ti na takzet ani, "Thante... dam leh vat rawh aw.."ka ti a, a hnara thawkna dawt an vuah chu a han khawih a, a kut chu ka la sawn a ka lu chu ka thing a,a nIngve hle anih ka ring. Rei a awm theih loh avangin ka chhuak leh vat a, Mamuana chu kalpelh mai ka gan tum a, "Haw nghal mai i tum em ni?"a tih chuan ka han hawilet a,"Haw nghal lovang, Sangbawihi te bulah ka va kal ange"ka ti a, a lu chu a bu nghat a. Chawhnu her ah chuan Sangbawihi chuan pawna ka thu lai chu min rawn ko a, Thantea chu alo harh tawh hi alo ni a, Mamuana nen min hmuh a duh avangin kan lut a. A bulah chuan kan ding dun a, a ban chu a rawn phar chhuak a, Mamuana chuan alo dawm vat a, "Keimah vang tal hian tha takin awm leh rawh u"chau zet hian a ti a, a mittui a rawn far fap a. Mamuanchun a mittui chu a han hru a, "Tha takin rawn dam leh la, keini pawh tha takin kan awm dawn alawm"a ti a,a hnuk chu a ulh ve teuh a. A chauh em avangin rei awm an phal lova, kan chhuak ta a. Damdawiin hnunglamag chuan ngawi rengin kan thu a, ka rilru chuan ka tawngtai mawlh mawlh a, Mamuana chuan ka darah min rawn khawih a, mittui tling pam hian ka lo melh a. A kut chu la thla in a lu chu a han dawm a, "Min ngaidam rawh aw.."a ti hul hak a, "Engvang ber chuan maw?"ka ti a, "Ka nau bula ka thusawi vang khan.."a ti ta a. A kut chu ngam leh ngam lo hian ka han khawih a, "Kan Intgen avang hian eng rah tha nge chhuak a, mangtha tia kan inthlah hian eng thatna nge kan hmuh? Mamuan, keichuan a tira i laka ka thutiam kha ka la vawng reng asin"ka ti a, phawk zet hian min rawn melh a, "Keipawhin ka la vawng reng alawm, ka la bawhchhe lo"a ti sap a. Ka kut chu nghet zet hian a rawn vuan a, "Ka hmangaih che a, ka hmangaih reng che, mhse i thatna tur anih beiseia khang thutlukna kha siam ka ni asin"a ti ta a, kan inkuah thlawp a, kan mittui chu a luang ngiai a, engmah sawi lovin kan inkuah a hle hle a, kan khawvel chu dinthar ani leh ta.

.

Thantea pawh tlemin a rawn kang ve deuh a, phaiah an kal leh nghal thuai a, a hna mai piah lamah a nau enkawl a ngai bawk nen ka lainat thin. Karhnih zet an cham hnuah lawm takun an rawn haw leh a,an rawn thlen tlaiah chuan an inah chawhlui kan kilho a, kan hlim ve hle. Chaweikham hnu chuan Mamuana nen an veranda ah kan thu a, thla chu a eng pup a, kan hlimna chu min tawmpui ve niawm takin kan zawn chu a rawn chhun eng sut a. Inkuah rialin kan thu dun a, "Ka chan hlen dawn che emaw tiin hlImna ka tawn leh pawh lha ka in beisei tawh lo ani a, nang ka nei che a tunah chuan ka hIim takzet a ni"a ti a, ka biangah chuan min rawn fawp zeuh a, ka lo nuih var var a. MIn han nghawk zawk a, "Nui mai mai suh, i thutak ve lo"tiin a han hawi tau vel a, ka va kuah a, "Kei deuh hi ka lawm asin, i tello chuan maw engmah kha a hlimawm vw lo"ka ti a, "kfc ah chawlh pawh kha maw?"tiin a nui sung a, ka ngei em vangin ka han chum deuh chawrh a, min pawt hnai a, "Ka fiamthu anih kha, i hlim lo tih chu i mitmengah khan ka chhiar thei vek alawm, hun kal tawh chu a liam tawh a, hlim takin awm tawh ang"a ti ta a.

.

Thla hnih a liam leh hnu chuan Mamuana nen pawh damchhunga innei a, a hrehawm leh nuam pawh hmachhawn zel turin Pathian leh Kohhran hmaah thu kan tiam ve ta. Min lawmpui tu tam tak zingah Nunfela pawh a tel ve a, thilpek tha tak min rawn thawn ve nghe nghe. Andria pawh nalh takin a in duang zaih a, pa tia a koh a, a mmawh hun apianga atana awm tur a nei chu a hlim ve takzet ani. Hun alokal zel anga, engvanga apa nen innei lo nge kan nih min zawh hun ala nei ngeiin ka ring thin. Zankhat chu Mamuana nen kan pathum In tv kan en a, kan in ngheng rial HBOlawm a, football chanchinah chuan Nunfela football khawvela a let leh thu chu ngaihnawm ti takin kan thlir in kan ngaithla a, "Apa pakhat zawk chu tv ah a lang ngun leh dawn e"Andria chuan a ti a, "Nakinah chuan apa ai khian i la lar zawk dawn tih hi ka hria alawm"Mamuana chuan a ti a, duat takin an inkuah a, "Ma... apa khian hmanah thil min hrilh asin,' I len hunah anu chungah thinrim miah loh tur, i thinrim dawn chuan keimah hi min haw dawn nia' a ti a"a ti ta reuh a. Mamuana nen chuan kan inmelh ralh a, "Bawihte.. apa leh anu chu huat tur ani lo aw, an hmangih lutuk che a, tin, keipawh hian ka hmangaih takzet ani tih hi i hrereng dawn nia"tiin a biangah chuan a fawp ta a. Ka thlir a, ka thlir ning thei mawlh lo, harsttna hrang hrang chu kan la hmachhawn zel ang, mahse ka bulah ka pasal duhtak hi a din phawt chuan huaisen takin khawvel chu ka hmachhawn zel tawh ang.