LOVER'S MOON

LOVER'S MOON 🌕🌜🌛

                                               -Mami Chawngthu

                                                                                            7th October, 2017

       October thla a lo thlen hi chuan engtin emaw tak lung hi a leng riau zel mai a, kum engzat liamta kha nge ka hre chiang ta chiah lo, ka thianpa Asa Samuel hian hla nalh zet mai hi min rawn thawn pek a. Ka duhzawng a ni ve lo ang tih veng thawng tak chung khan, "Lo ngaithla ve chhin rawh. Khawvela ka hla duh ber ania" a rawn ti deuh thlap a. Chutiang taka thianten nalh an tih chu ngaihthla ve teh ang tiin whatsapp-a hla min rawn thawn chu ka download nghal mawlh mawlh a. Tun thlenga ka hla duh em em lo ni ta, "Lover's moon" Glenn Frey sak ngei mai hi a lo ni. Vawikhat ka ngaihthlakna atang khan ka duh nghal em em a, tun thlengin ka la ngaithla kham thei lo a ni. A hla hi han sawi zau emaw, a thu nena inmila her rem emaw ka tum hran lo a, he hla leh ka nun sawi zawm ka tum pawh a ni chuang hek lo. Ka rilrua awm ang ang han thai kawi ve mai mai ka tum a ni.

       Tute pawhin thla eng hi kan lawmin ka ring a, a hranpaa lawm kher ngaiah pawh ka dah lo. Lungleng mi nih phei chuan zan khawthiang reh tak mai hnuaia thla eng han thlir dauh dauh chu a nuamin a hrehawm a, ngaih tur nei lem lo pawhin lung a leng kur ve nguai thei zuk nia! Tum khat pawh ka mu thei lo chu tukverhah dakin thla ka thlir a, thla bial zan a lo ni kher bawk nen, tumah ngaih pawh nei lêm lo khan ka mittui te kha a tla ve tho alawm☺

       Ka ngaihtuah thin a, mi tam tak chu an nunhlui ngaih vangte, an hun tawn mek avangte in thla eng hian awmzia a neiin ka ring thin. Ka suangtuahna vak velah chuan tuemaw chuan thla eng hnuaiah duhthu tinreng a sam a, a tana Khuanu ruat lo lan hun te pawh a nghak ve ngei anga, chutih lai mek chuan a kawppui la ni mai tur lah  chuan tu tana ruat nge a nih inhre hauh lo in chu chhawrthla eng hnuaiah chuan duhthu a lo sâm ve mek emaw a ni awm si a. Chu thla eng, an pahniha an intawm ngei mai hnuaiah chutia a hrang ve vea an awm lai leh an intawn hun tur lo la thleng turte chu ka suangtuahna mitthlaah chuan a rawn lang kual vel a. Ni e, tuin nge kan hma hun hria a, kan chunga thil thleng tur hria ang ni? Chung ka suangtuahna te avang chuan ka han nui leh sâk thin a, thla eng pûp maiin lenmawii tui tak maia a mu lai an en vel tur leh thla eng hnuaia a mawina lo zual tur velte chu ka ngaihtuah chho a, a kawppui la ni mai tur, la inhre hauh silote pahnih thawnthu ah bawk chuan ka kir leh thin.

"Lover's moon won't you shine on me.. I'm dancing with a memory"

Helai chang ka ngaihthlak apianga ka rilrua thu lo lut ziah chu-

"Nang hriatrengna che nen ka hun ka hmang mek a. Khi thla teh hrep khi.. hriatrengna.. nangmah ngaih veng veng na nen hun min hman tir mek ni si a. Hetiang hunah hian nangnena hun kan hman dun thin kha a ngaihawm duh bik zual riau thin tlat a ni. Duhthusamah chuan lungrual taka kan thlir dun thin chhawrthlapui khi i tan chauh eng bik lo se la, ka tan pawh hian eng han chhuah ve in nang nena kan thawnthu, hmanlai chang mai tur hi han tuai thar leh se ka ti mang e..."

       A engvang khera hlim taka lengdun thinte pawh inthena inkalsan leh mai thin nge an nih? Hringnunin a ken tel anih miau avangin engvang pawhin, tu vang pawhin a chhan chu a lo thleng thei vek ang. Hmangaihna hi a chak a, thil a tithei miau si a. Mi chakte titlawm a, mi tlawmte hnehna pe tu a ni tlat si a.

      Kan dam anga, full moon te pawh a lo la thleng fo anga, kan dam tek tek chhung chuan kan hmang fo ang. Thenkhat tan hlim zan a ni anga, a then tan erawh lunglen tizualtu a ni bawk anga, a.. a engpawh chu lo ni se, thla in eng a rawn chhuah anih phawt chuan, kan la dam ve a ni tih hriain lawm taka lo awm mai hi a tha in ka hre ta. Thihna in min nân hunah chuan full moon te hian awmzia an nei tawh dawn si lo a. Hriatrengna duhawm lo tak min lo hnutchhiah tawh anih pawhin chutah chuan tawp mai lo ila, thla pawh a mâng a, a hnuah eng mawi duhawm tak a rawn chhuah leh thei anih chuan hringnunah pawh natna kan tawk a ni thei, kan na reng dawn lo a, hlimna pawh kan tawng leh mai ang tih hi ring tlat ang u.