ME & MY BESTFRIEND

ME & MY BESTFRIEND

St.Anthony's College kawtah chuan ka ding ran a, khua a lum em avangin ka lehkhabu ken chuan ka in zap hlap hlap a, class ka la neih dawn avangin ka thianten min hawsan vek tawh a, keimahin ka la awm khawtlai a ni. Peih vak lo chung chuan kan classroom lam chu ka pan a, ka luh chuan hnamdang pathum chauh an lo la awm a, tlar hmasa berah ka thu a, rei vaklo ka thut hnu chuan midang pawh an rawn luh belh a, kan department ah chuan Mizo panga chauh kan awm a, keimah chiah hmeichhia ka awm a ni. Rual pawl zau tak ka ni lova, kum hmasa lamah in hrawn kumtluan mah ila tutemah chu han kawm ka nei hran lova, ka thian lo kawmsa te bak thian thar ka nei lem lo a ni. English department an nih vek avang leh History ka lak avangin kan inkawm reng thei lova, chutiang hunah chuan library ah ka hun ka hmang thin. Chumi ni erawh chuan ka bula thutna awm ah chuan Vanlalhruaia chu a rawn thu ve a, inbe lem lovin kan awm a, ka hmuh tirh atang rengin ka ngainat chi a ni lova, a hmel chu a khawvel mi ngawih ngawih hian ka hre thin. A sam a ti phir sung a, jeans a ngaina ve hle ang tih ka ring, 1st year kan nih atang jeans nilo a hak pawh ka la hmu ngai lo.

"I zir hnem tawh em?"

Zawite hian a rawn ti sap a, ka hawi nghal vat a, a lo nui ve suk a, a nuih zawnga a biang sum lo lang kalh chu ka lo hmu ngai lo, a inhmeh reuh hle lehnghal a,

"Teuh lo" ka lu thin pah chuan ka han ti a,

"Ih.... i note ka lo hawh aw, enteh" tih pahin a lehkhabu chu a keu a, engmaha in ziak lova,

"Ka note ka ti bo daih a" a dar san ak pah chuan a tih chhunzawm a. Ka lu ka bu nghat a, madam thusawi lamah ka rilru chu ka pe leh ta daih a. 

Period a zo a, muangchangin ka lehkhabu chu ka khung fel a, Hruaia chu ka note bu ka pe a, kal nghal mai ka tum a,

"Ka lawm e aw, ka lo copy vat vat anga ka pe leh vat dawn che nia" a ti a. Thui lote ka kal a, min rawn um leh a,

"Ih.... ka lo thlah dawn che mi? " a ti a, 

"Ah... a ngai lo, kan hostel a hnai lutuk" ka lo ti vat a, 

"Ivory ah em ni i la awm?" A tih chuan mak tih hmel deuhin ka melh a,

"In hostel bula gym ah kan kal ve zeuh zeuh a, vawikhat ka hmu che alawm" nui chung chuan a ti a, 

"Um... la ni e" ka ti a. Kan hostel a awm ve tho Dimapur lam mi chuan min lo ko a, kan in zui haw ta ral ral a.

Chumi ni atang chuan Hruaia nen chuan kan țhu tlang ta ziah a, thildangah kan inbe tam lo na a kan zirlai chu kan sawi dun peih em em thung a. Ka lo ngaih ang ngawt chu ani lo tih ka hre vat a. Khawvel mi viau tura ka lo ngai chu a lo dik lo. A hnua a sawi leh danin keipawh hi standard sang deuh hlek chi leh tlema khawvel mi ve deuh niin min lo hre thin a. A ngainat zawng ka ni vak bik lo a ni awm e, ka nui ngai zen zen lova, ka thu tak reng thin niin a hria a, boring hmel min lo ti viau thin a ni awm e. Kan inkawm hmaa kan lo in judge dan vel chu a in ang hle a, kan nuih a za hle thin. Hun a liam ve zel a, 2nd year pawh kan lo zo ve mai dawn a, inkawm tho mah ila kan thian dangte an lo awm ve avangin a zawng zawng chuan kan in kawm ngai lo. Exam kan zo a, kan haw a lo hun chuan kan in ngai ve hle a, haw tlan ngei tumin ticket kan la rual a, Aizawl thleng kan kal rual thei anga, chuta tang an khua Serchhip lam a pan leh dawn a ni. Motor ka rui ngai lova, mahse ka lehkhazir nasat hian ka pum tha lo a chhuak thin a, kan exam lai hian ka lo bei ngawrh ve deuh a, motor in sawh lo na deuh bawk nen, ka chuang fuh lo hle a, ka rui chu ka zawi em em a, Hruaia chuan kawngtluanin min buaipui ta hial a ni. Ka inthlahrung a, hrehawm ka ti bawk a, mahse hrehawm ti lo tur leh inthlahrun a ngaih loh thu a sawi a, hrehawm ka ti ang tih a hlau em em zawk a, ka thla a ti muang takzet a ni. Aizawl kan thleng a, kan in thleng min thlah leh thlap hnuah an khaw lam panin a haw ta vang vang a. Ka tan hian a hlu a, a la hlu dawn chauh niin ka hre bawk. 

Khawkhatah awm lo mah ila phone hmangin kan inbe ve reng a, tunlai angin whatsapp te ala awm lo a, sms kan in thawn ve lauh lauh thin. Krismas pawh hlim takin kan hmang zo a, ngaihzawng kan neih ve ve avangin Krismas boruak ah chuan kan in be tam lem lo. Kumhlui thlah zanah chuan kan thianho in kan inah kan hmang ve a, kan hlim hle a, sms blackout day anih avangin Hruaia pawh nilengin ka be lova, a msg pawh chu ka hmu bik lova, hlim takin a hmang ve ngei ang tih erawh ka ring a. Kum thar nan minute khat chiah a awm tawh a, ka fon chu arawn ri ral ral a, ka an en chuanHruaia alo ni. Rei rial lovin ka pickup nghal a, khuang ri dap dap karah chuan "Happy new year" tiin min rawn wish a, ka thinlung chu a lawm takzet a ni. Hetatang chiah hian thiantha tak takah min ngai ve tih ka confirm ta chiah a. Tin, keipawh in thian tha tak tak ah ka ngai nghet hmiah bawk.

Kan zirna chhunzawm turin kan kal a lo hun leh tawh a, chhuk rual ila tiin kan chhuk hun tur te kan sawi a, mahse a nu dam lohna avangin kan tum hun ah tak a kal thei lova, ka thian dangte rualin ka chhuk a, a hnu karkhat leh tlem ah arawn chhuk ve thei ta chauh a ni. Kum hmasa ai mahin 3rd year kan nih atang chuan kan inkawm nasa a, kan thian dangte chu kan thlah vek a ni ber. Unau zinga naupang ber ka nih avang hian ka rilru pawh hi a naupang rei hle a, min hrethiam em em a, kei aiin a upa zawk a, ka u ang maiin ka en a, a ni pawhin a nau ang chiah in min en ve bawk a, a kiangah chuan engkim hi a leng vek a ni. Mite chuan kan in ngaizawng emaw an ti thup a, mahse hetih lai hian ngaihzawng nghet ka nei a, a ni pawhin a nei ve bawk a. Engkim kan in hrilh thin a, kan lungawi lohna te pawh kan inhrilh a, kan in fuih tawn thin. Mi min sawi danah kan buai ngai lova, in hriatchian hi kan tum a, kan in zir tawn a ni ber.

College lo ah chuan inhmuhna hun kan nei thei vak lo a, amaherawhchu thla thar apiangin kan chhungten pawisa min rawn thawnin kan lam dun a, an lo thawn har pawhin kan in nghak kher thin a, tlaiah dinner kan ei dun ngei ngei a, chu chu sawi ngai miah lova kan pahnih nunah a bet tlat a ni. Harsatna ka tawha a hnen ka thlenin ho lam takin engmah hi min laksak ngai lova, ngaihzawng chungchang ani emaw chhungkaw chungchang pawh nise a ngai serious thei em em a, chinfel dan kawng min zawnpui thin. Selection test kan neih dawn kar ah a bialnu in a rawn then thut a, kan buai dun teh asin aw! A lung a leng em em a, bakah amah hi a rinawm em avangin ala na bawk a ni. Zanlaiah te min rawn call a, darkar khat dawn te kan inbia anga, a rilru tawt lutuk chu keiin ka thiam dan danin ka lo hnem ve thin. Lehkha zir chu thahnemngai viau mah ila harsatna a tawh laia lo bihruk chu ka tum lova, vawikhatmah beidawnga min siam ngai lo tu hi tlanchhiatsan ka tum bik lo a ni. Thla khat alo vei leh chuan a ni pawh a pangngai hle tawh a, ngaiawh nan hun reilote bak a mamawh tawh lo tih ka hria a, ka chhungril hi alo hlim ve veng veng ani.

Hun chelh din lo ta chu alo liam ve zel a, vawikhat te pawh ka call leh message chhan let loh a nei ngai lova, ka tan englai pawhin a awm reng a, a hnena ka harsatna ka thlen in beidawngin min siam ngai lo. Mite hian mipa leh hmeichhia thian anih theih tak tak lo an ti thin a, mahse keini aia ti fiah tur hi a awm chuang lovang; thian kan ni a, kan inngaizawng lo. Chu chu kan hrechiang em a, kan buai phah ve ngai lo. Kan pahnih inkarah harsatna chu a thleng ve bawk thin a, mahse rei tak chhung kan in ti thiam lo ngai lo. Pathian thu ah pawh nise puih ka ngaih chuan a theih dan ang angin min buaipui a, ka tan chuan min vengtu ka Vantirhkoh a ni. Final year kan exam dawn a, lehkha zir pawh kan thahnemngai ve a, taksa chak lo chi ka lo ni ve bawk si a, zana ka lehkha zir chu luhaiin ka tlu a, ka roommate mangang chuan Hruaia alo fon a, chumi zan ber kher chuan Happy Valley ah a thiante inah a lo riak a, mahse ka chanchin a hriat veleh ke ngatin a rawn tlan a, mangang taka ka siam fo avang hian a chang chuan hrehawm ka ti ve thin. Zankhua in min awmpui a, ka guardian ah ka hman hrim hrim avangin nidangah te pawh a rawn kal fova, warden nen pawh an in hmelhriat ve hle tawh a ni. Zing lamah chuan ka tha tawh hle a, let tawh turin ka ti a, taxi fare pek ka tum a, a lungawi lo kher mai. Ka inthlahrun vang ani tih hre tho mahse thian inkarah chutiang taka inthlahrunna ka nei chu a thin a rim a, min hau zawk hial a ni. 

Exam pawh kan tan tawh a, college ah kan in hmuh bak chu kan chhuak tlem a, kan in hmu ngai lo. Phone ah erawh kan in be reng reng thung. Thla khat dawn kan exam hnuah kan zo ve ta hram a, kan nghahhlelh tak thin ni mahse kan haw anga, kan han inhmu lo vang vang tur chu kan hreh dun hle. Kan haw dawn hma ni in kan lengchhuak a, kan chhungte leh thiante thil hawn tur kan lei a, PB ah ka bialpa hawn tur kan en a, chutah pawh chuan amah tho ka mamawh leh a, Arsenal ruhkawl anih avangin a thurawn angin Arsenal jersey leh cap chu ka lei a, tun thlenga ka hawn sak pa in ala roh em em thil a la ni reng nghe nghe. Ticket kan la a, kan college life thlahna ni pahfawm in dinner kan ei dun leh a, kan dam anga kan pass ve te anih ngai chuan NEHU lamtluang kan zawh dun leh ngei ang tiin kan in tiam dun a, hun hian ka thiantha ber nen hian min la in tawn tir leh em ang chu tia beiseina nen kan hostel chu ka pan leh ta hnak hnak a.

Kan khua ka thlenna pawh thla khat lai alo tling leh tawh a, Hruaia nen pawh kan in be reng tho a, chhun lama kan hun hman te kan in hrilh a, bialpa ka neih avang leh haw ve chhun ah a tana hun pek tam te ka duh avang erawh chuan ka be hmasa lutuk ngai lova, kan inkar boruak erawh amah in min rawn zawt thin. Intihthiam loh chang te alo awm thin a, chung ah pawh chuan min fuih a, thurawn min pe fo thin. Kan result alo chhuah chuan 1st class ah kan passed ve ve a, kan hlim dun kher mai. Kan result chhuah atanga karkhatnaah chuan Aizawl ah a rawn kal a, kan in hmu chu kan hlim dun hle. MA zawm chungchang te kan sawi a, a hmaa kan lo tum dan chu kan confirm tawh ah ka ngai a, mahse MZU ah zawm mai tura a chhungten an tih thu a sawi ta tlat a, ka thinrim kher mai. Mahni thutiam pawh hlen thei lo ti hial in ka tawng chhuak a, a call ka pickup duh lova, a msg pawh ka chhang lo. A haw dawn zanah a lo kal a, mahse room ah ka awm tlat a, ka chhuak duh lo. Ka luhlul zia a hrechiang a, ka lung a awi mai dawn lo tih pawh a hrechiang ber tu ani. Beidawng takin kan in atang a chhuak a, room tukverh atang chuan ka thlir reng a, ka khawngaih reuh ngei mai. A tuk nilengin rilru nuam lo zetin ka awm a, vawi tam tak biak ka tum a, mahse ka chapona chuan be lo turin min ti tlat si. Nithum kan in be tawh lova, zep lo chuan ka ngai a ni. A ni li na zanah chuan ka fon a rawn ri ral ral a, number ka hriat ngai loh a ni a, ka pickup chuan ka thianpa, ka ngaih em em ngei chu a lo ni.

"I thin a la rim em?" A ti a.

"Rim loh i ring mi.." nui ru var var chuan ka ti a,

"Engtikahnge Shillong kan chhuk ang?"

Ka phu zawk a, 

"Engvangin maw?" Ka ti hu a,

"Nehu ah ngei kha kan ti ani lawm ni?" Nui hak hak chuan a ti a, ka thutna atang ka zuang tho zawk a, ka au chul a, ka hlim ngei mai.

A chhungte rilru a hneh tak dan te chu min hrilh a, kan nui dun thei leh ta. Kan duhdante chu a kal tluang ve zel a, interview te kan hmachhawn hnuah a tawpah chuan Nehu ah kan in ziak lut ve ta.

Fur a in tan tawh a, ruah a sur reng a, class kal pawh chu a peihawm loh viau a, first semester lamah ka duh anga ka tih that loh avangin class chu regular deuh hleka kal chu ka duh a, ka roommate erawh a la in lukhuh tlat a, class kal a tum lo a ni leh ngei ang, vawihnih vel ka han ko a, ka insiam a, ka chhuak zui nghal a. Kan class kawngka bulah chuan Hruaia chu alo ding reng a, a thawmhnaw chu a hnawm chap a,

"I rawn kal dawn lo maw ka tia, hei hostel ah let ka lo tum chiah a" a ti a. Class lam panin kan in zui nghal a, ka thiannu chhar thar Apuii chuan min lo ko a, a bula thutna awmah chuan kan thu nghal a. Class banah chuan Apuii chu ka room ah a lo leng a, a ni hi hostel ah awm lovin an unau in in an luah a ni. Hruaia chanchin chu min zawt chik hle a, "In ni lo tak tak mi a?" A tih chuan ka lo nui hak a, ka bestfriend anih thu chu ka hrilh a. College atanga inngaizawng nghet angin kan thang nasa hle a, a hmaa kan lo tuar hrep tawh anih avangin mak ah pawh kan ngai tawh lova, kan nui liam mai mai thin. 2nd semester kan exam hma deuhin Hruaia chu hostel atang a chhuak a, a cousin te nen in an in luah tawm a, Apuii te nen in hlat lutuk lovin an awm a, an rawn in thurual thin. Bazar ka duh avangin inrinni ah kan chhuak a, Hruaia leh Apuii nen kan pathum in kan kal a, ka chhuak khat bawk a nuam ka ti hle. Apuii chuan an ina riak turin min ti tlat a, hostel ka chhuahsan ngai loh avangin pawi pawh ka ti hran lo, Hruaia chu chawei turin a sawm bawk a, chawhmeh te kan lei a, hlim takin kan in zui haw ta a. Chawei kham chuan pawnah ka thu a, ka chhungte ka bia a, ka biak zawh chuan Hruaia chu ka hnungah a lo ding reng a, sawi duh a nei tih ka hria,

"Sawi nghal mai rawh" nui chung chuan ka ti a,

"Mi hi in ti hrechiang viau suh" a ti a, kan nui a, amah vek chuan,

"Ngaihzawng pangngai deuh in nei rawh min ti ziah a, ka ngaihtuah a, i sawi chu ka pawm e" a ti a.

Ka lawm hle a, mi pakhat vanga midang rin tawh loh a that lohzia ka hrilh chiam thin,

"A hmeichhia chu tunge ni ta ang?"

"I thiannu hi ni mai ang chu"

"Eehhhh. .. kan che rang maw?"

"I kutah ka dah tawp ania, min duh ve tho in ka hria a chezia velah hi chuan" a ti a, inchhungah kan in zui lut ta nghal a.

Hruaia leh Apuii pawh thlakhat lai an inngaizawng ve tawh a, kan inkawm ho reng a, midang kan kawm ngai lo. Apuii chuan Hruaia chu a duh em em a, a chang chuan Hruaia hian a duh lutuk lo em ni aw tih theih in a awm thin a, a chhan chu ka best friend hi ka hrechiang tlat. Mipa sual tak anih loh bakah lerh zawk zawk chi a ni lo bawk a, an inkarah chuan buaina a awm bik lo. 3rd semester kan țan atanga karhnihna lek ah chuan ka bialpa, a laka ka rinna ka lo nghah thuk em em chuan min then a, ka rilru a na ngei mai. Chaw ka ei thei lova, ka mu thei hek lo. Lehkha zir phei chu a theih loh hi a ni ber mai, ka natzia chu Hruaia mak tih a tling hial a. A chhan chu a rin ai daihin hmangaihna ka lo la serious a, a thian tha ber hi hetiang maia ka chak loh hi a rin loh vang a ni. Min rawn call reng a, min fuih a, sms hmangin min hnem reng bawk a, ka tan a hlu takzet a ni. Apuii pawh ka chanchin chu a țul a tih chin a lo hrilh ve a, min hnem nasa ve hle thin. Ka taksa chu Shillong ah awm mahse ka rilru leh ka thinlung chu Aizawl veng pakhat ah a awm thung a, ka lung a leng a, zep thu a awm lo ka na a ni. Hruaia chu ka hlatah a awm ngai lova, min tihhlim a tum a, Pathian thu nen a thiam dan ang angin min fuih reng bawk a, min rintawk thu a sawi tam hle bawk. Zawi zawiin ka rilru na pawh a zia ve zel a, nikhat te pawh be lova ka awm theih lohna, min phatsantu chu zawimuangin ka hlat ve hret hret a, thla a lo vei meuh chuan ka rilru na pawh a dam ve ta. Hetiang taka ka strong theih chhan chu min fuih kal tu hi a tha em a, ka thiantha ber nih hi a tlin takmeuh a ni.

Ka u accident avangin ka chhungten min chah haw a, karhnih vel chu kan inah ka awm tawh a, Hruaia nen chuan kan inbe reng tho a, Apuii nen an inkar a that vak loh thu te a sawi a, a chhan sawi chiah tur hre silo a an boruak a pangngai vak loh thu min hrilh a, ka thiannu Apuii chu tan in amah chu ka hau a, a ngawi reng thung. A hnua ka hriat leh danah erawh Apuii chuan min thik hi alo ni awm a, Apuii nen kan inkar țhat loh a hlauh avangin Hruaia chuan min hrilh duh lo a lo ni. Ka u pawh a ziaawm tawh avangin ka let thla tawh a, Apuii nen pawh kan in zui reng tho a, Hruaia nen an chungchang erawh engmah min hrilh lo. Keipawh chuan zawh kher ka tum lova, ka tha en ve tawp mai a ni. Hruaia nen pawh kan la in zui reng a, bialnu a neih avang leh a bialnu tan a nawm loh ka hlauh ruk ve deuh avangin a hmaa engkim ka tih pui thin pawh ka in sum ve deuh a, mahse a thurawn la lo chuan ka la awm thei chuang lo. Vanduaina chu kan chhungkaw chungah alo thleng leh ta tlat mai, Guwahati a ka cousin Radiology zir mek Zotea chu hospital a a duty tur a bike leh truck an insu a, a serious angreng an tih avangin keipawh kal turin ka insiam nghal a. Hruaia chu chanchin ka hrilh thuak thuak a, ka ruala kal chu a tum leh ta bur a. Apuii nen kan pathum in kan awm a, Apuii chu a ngawih reng avang chuan nuam lo ka ti lehzual a ni. Ani erawh chuan kan kal dan tur a ngaihtuah nghal zung zung a, rilru nuam chiah lo chuan kan kal ta nge nge a. Zotea hi ka patea fapa naupang ber a ni a, anmahni inah pawh awm ngai lo, kan inah hlir awm thin anih avang hian keipawhin ka pianpui unau ang maiin ka en a, a hma lawkin ka u in accident a tawk a, tunah ka nau in chutia a han tawk leh chu rilru a hrehawm duh ngei mai. Mahse ka thiantha ber ka bulah a awm a, min thlamuan takzet a ni. Kan thlen hnuah pawh aman engkim a buaipui a, hmeichhe lu zo tak ka ni lem lova, a rawn kal lo ang tih chu ka hlau hnuhnawh kher mai. Hospital ah ka riak dawn a, Zotea u Mafaki nen kan pathum in kan awm a, kan titi a, Hruaia chu a phone a rik avangin a chhuak a, a rawn let leh hnu chuan a hmel chu a ngui deuh bar a, engemaw dik lo a awm tih ka hre mai a. A phone chu min pe a, sms dawn chu min hmuh tir a,

"I thiannu chu i ngai pawimawh bawk a, awm hlen rawh. A laka i rilru chu ka hrechiang ta khop mai" Apuii thawn alo ni.

Hruaia chu ka melh a, a mitko chu a san ak a, a reply na chu ka en leh a,

"Ka thiantha ber ka thlah ai chuan nang ka thlah che a ngai dawn a nih hmel... nang ka tawn hma daih atanga ka thian, ka thian satliah nilo bestfriend hi i thik a, i lo mak zok khop mai" tiin a chhang a. 

Ka rilru chu a nuam lo, kan pahnih inkarah inthianthatna bak awm lo mahse miten a aia thuk zawk awm turin an ngai tlat si a, keini chu buai phah lo mah ila mite an buai phah ani si a tiin ka ngaihtuah a. Tlem tlema Hruaia pawh ka hlat mai a ngai tiin rilru ka siam ta a ni. Guwahati atanga kan let leh hnu chuan Hruaia chu ka hlat telh telh a, Apuii nen an hlim chu ka duhsak ber a ni. Mahse ka awmdan chu a hrethiam lo hle a, a vui a, a thin pawh a rim tih ka hria. Mahse chiang takin thil awmdan ka hrilh a, a ngaihdan ni lo mahse ka duhdan anih avangin tih ngaihna a hre bik lo. Min betu neuh neuh te an lo awm ve a, chungah chuan a puihna tel lo leh athurawn la lo chuan ka awm thei chuang lo. Engkimah ka rawn ber ala ni reng a, chhungkaw chungchang thlengin, a chhan chu ka landan leh ka rilru chhungril tak tak hi a ni tluka hrechiang an awm lo. Heng min betu leh ka star neih zawng zawng hi Apuii pawh in min hriatpui vek a, mahse hetiang chunga Hruaia min thik hi chu ka dem ve thin. Khaleh chen kan inngaizawng lova, thian kan ni thei anih chuan tun atakah engvanginnge kan inngaihzawn kher ang? 

Kan inkawm tirh atang rengin kan birthday hi kan in ngaihpawimawh sak em em a, kan in tih thiam loh lai pawh nise thinrimna leh lungawi lohna nei lo ang maiin kan birthday chu kan in lawmsak thin. Ka birthday pawh a lo thleng leh dawn a, ka hlat tak em avang chuan a hriatreng pawh ka beisei ngam lo, ka khumah lehkhabu ka chhiar a, ka roommate chu nui vur vurin a rawn lut a, 

"I thingkung ngainat deuh bulah khan nghaktu i nei ania" a ti a. 

Hmanhmawh lo fe hian ka kal a, ka han thlen chuan Hruaia chu a lo ding reng tawh a, hmuh ka rin loh em avang chuan ka phu deuh zawk a,

"Happy birthday..." a thil ken lai chu min pe a, 

"Ka lawm e, ka beisei lo asin..." ka ti sap a.

"Engtinnge i birthday ah hetiang a thlen loh i rin theih zawk a, danglam mah la kei chu ka danglam ve lo. Ka tan chuan khawvela ka țhian țha ber kha i la i reng" a ti a.

Khua a tlai tawh avangin rei pawh awm lovin an kal leh nghal a, a thianpa nen bike in an rawn kal vang vang a ni. Room ka thlen chuan present chu ka hawng a, kan pahniha kan thlalak chu a lo frame thlap a, kan chhuah dun țuma mawi ka tih em em sana chu a lo dah tel bawk a, 

"Kan inthianthatna hi eng nen maha thleng ka phal ngai lo.... nang ka tawng che hi ka nuna malsawmna ka dawn a hlu ber zinga mi a ni. Ka țhianțha ber i ni a, i ni reng bawk ang. Happy birthday, many happy returns of the day" tia ziak chu a dah tel a, a kutziak tih ka hai lo.

Zankhua in ka inngaihtuah a, engvanginnge hmeichhe pakhat vang mai maiin ka bestfriend hi ka kalsan kher ang tih chu ka rilru ah a lo lian em em a, sms chu ka thawn nghe nghe a. Zanrei tak thleng kan sawi dun a, ka lo ti dik lo ani tiin ngaihdam ka dil a, kan hlim dun hle. Hun rei tak min lo hel ve rengtu chu ka chhang ve ta nge nge a, uluk taka a nungchang engkim a lo chik hnuah ngaihzawn tlak ani tih chu ka țhianțha ber chuan min hrilh a, a zarah hlim takin ka awm veleh thei ta. Hetia ngaihzawng ka nei chung pawh hian Apuii chuan min la thik fo a, a chang chuan mihring rilru alo chhuak a, ka ngei ve lek lek thin. Mahse kan inkarah thil fel lo a awm lo tih ka hrechiang em a, huat ah pawh ka la țha duh ta lo a ni. Kan zirlai pawh kan zo ve dawn ta reng mai, ka hriatreng tawh tur hun ka hmanna hi ka ngai dawn hle. Zankhat chu Hruaia biak ka tum a, a fon a pickup theilo, hemi kum atang hian whatsapp te a awm tak avangin kan hmang ve a, msg chu ka thawn a, min reply thei ta chuang lo. A tuk zingah min rawn biaa, kan inkawm atanga a vawikhat nan a lo rui ve hi alo ni a. A inthlahrung em em a, hrehawm a ti takzet tih ka hria. Keipawhin mak ka ti em em a, vawikhatmah ala ruih ngai loh avang chuan min țhawng ve a ni. Mahse chumi hnu ah vawikhatmah a ruih ka hre tawh ngai lo. 

Kan ngaih em em leh sulhnu tam tak kan lo neihna hmun Shillong chu engtikahnge kan hmuh leh ang tih kan hre lova, ngai tak chungin kan chhuahsan ta. Mahni khua ve ve ah awm in chanchin kan la inhrilh ve reng a, kan chanchin a chhia atha engkim kan la inhrilh a, kan birthday ah pawh present kan la in thawn țawk țawk thin. 

Hun alo kal zel anga, Hruaia chuan nupui pawh ala nei anga kei ngei pawhin pasal pawh ka la nei anga, ka țhian țha ka harsatna zawng zawng ka sawi theihna ani reng anga, atan pawh chung chu ka ni reng bawk ang. Kan inhmangaih a, mahse nula tlangval in hmangaihna ni lo, thiantha dik tak in hmangaihna in a ni miau a, miten rinhlelhna in min thlir thin mah se kan thinlung hi kan hre chiang em em a, tuman kan ințhianțhatna hi an tichhe ngai lovang.