A MEASURE OF FAITH- II

A MEASURE OF FAITH

  -Mami Chawngthu

 

Part II

Muanhlua thianpa Peter-a hmu turin ka chhuak a, ka laka a thil thup hi hailan  a hun tawh. An hnathawhna hmun ka thlen chuan amah chu awlsam takin ka hmu nghal a, min hmuh chuan a hamhaih deuhin ka hria. Biak lawk ka duh thu ka hrilh chuan chhuanlam a siam zet a, ka hmel a hmuh chuan min pumpelh theih a inring chiah bik lo a ni ang, a thutna lamah chuan kan inzui lut a.

“I dam tha em?”

“Muanhlua hian ngaihzawng dang a nei tiraw?”, a zawhna pawh chhang loin ka ti nghal tawng a.

“Apui..”, a chawl dat a, “A pawi ka ti lutuk”, a ti hul ta hak a.

“Engkim min hrilh rawh, engmah zep a ngai lo ania”

“Dik tak chuan mi rilru nghet tak I ni a, I tih tawh ti tlat chi I nih vang hian Muana pawh hian a hrechiang che a, chuvanga engmah hrilh ngam lo che ania”a tih chuan ka kut chu ka hum ngawt ngawt a. “A tirteah pawh hrilh rawh ka tia, ‘A inpeih hunah ka hrilh mai ang, a rilru na lutuk hi a a thei deuhthaw ang’ a tih vangin a hrilh ngam lo chea, keipawhin ka ngam mai bik lo. Mahse, hrilh che chu ka lo tum tawh hrim hrim a, a fair lo ka tia”a ti leh a.

“Engtia rei nge ni tawh?”ka aw chu a chhuak thei chang chang a.

“Thla khat vel chu a ni tawh ang. Apui, ka thianpa mah nise a thiam lo zawk a ni a, I lamah ka tang tlat ania.”a tihte chu hla taka tawng ang mai hian ka hria a.

Ni e, thla khat vel anih chuan a dik chia hang, a awmdan danglam ka tih tan hun nen a inmil thlap, chumi hma deuh pawh chu a ni mah zawk ang.

“Ka lawmpui lutuk tih I lo hrilh dawn nia”tih pahin ka bag chu ka la a, ka chhuak ta nghal a. Ka awm reng chuan ka mualpho mai dawnin ka hria.

“Apui, I tha tak zet maw?”Peter chuan min lo umzui a lo ni.

“Aw.. Aih.. Ka hre lo. Min ngaihtuah suh”ka nui lui sak a.

Ka room-ah ka inkhung nileng a, engmah ka ti peih lo. Ka ngaihtuahna chu a nu bulh bulh a, engmah ka ngaihtuah thei lo. Ka phone a rawn rik chuan a screen-a Muanhlua hming lo lang chu ka hmu phe ruai a, a rik tawp rual chuan a rawn ri nawn leh nghal zat a, pickup ka tum lo. A tawpah phei chuan ka switch off ta hial a. Ka mittui a tlak loh leh ka tap a, ka awmdan chu a mumal lo tak zet. Tlaiah Daphne class bangin min rawn hmuh chuan min rawn kuah vat a, thil awmzia engmah ka hrilh loh avangin a hrilhhai hle ang tih pawh ka ring.

“Dear, eng nge thil awmzia?”, min rawn kuah a.

Engmah ka sawi thei lo, ka tap zawih zawih a, ka tah tawp thlengin ngawi rengin min kuah a. Ka mittui chu a hul thei lo, ka tap leh thin a, dawhthei takin min nghak a, a tawpah chuan thil thlen dan leh thil awmzia chu ka sawi thei ve ta hram.

“A pawi ka ti lutuk, chutiang mi a nih chu ka lo ring lo asin maw le. Mahse, lungngai miah suh aw, a lo let leh em em ang”a han ti a.

A phone a rawn rik chuan pawnah a va chhuak a, rei vak lo hnuah a rawn lut leh a.

“Muanhlua’n gate bulah a nghak che anih chu”a ti a.

“Ka hmu duh lo”khumah chuan ka inthawlh leh vat a.

“Inhmu ula a that ka ring”

“engmah a that phah dawn chuang lo”

Min chhang tawh lo. Tunah tak hi chuan tumah awm lo se, duh tawkin tap ila ka thawl hawkin ka ring. Ka puan sin lai chu dim tein a rawn inhawng a, Daphne a nih ka rin vangin ka lo dang lem lo.

“Inbia ang”, tih ri ka hriat chuan ka inperh tho nghal a, Muanhlua inthlahrun hmel taka ka khum bula lo ding chu ka melh nghal a.

“Engmah sawi tur a awm tawh lo. Engkim a tawp vek”ka ti a. Ka khumah chuan a rawn thu a.

“Apui, min ngaidam dawn nia”a tih chuan engkim a tawp tih a tichiang telh telh thung.

“Engtin nge a thlen theih? Ka chhungte bulah engtin nge ka sawi ang? Kei aia duh a lo neia, kan inthen tawh ka ti dawn mi?”zawhna hlir ka zawt a, ka mittui chu ka dang thei hek lo.

“Min ngaidam rawh u, I rilru ka tihnat vang hian I chhungte pawh ka zah khawp mai”

“Ka pa rinna che I tichhia asin, engtin nge hetiang tak hian I lo danglam theih?”ka mittui tla leh tur chu ka duh tawh lo.

“Intawng lo tur kan lo intawng a ni mahna! Kei aia tha hi I phu a ni, kei hi chu englai mah hian I tan ka tha tawk lova, chuvangin I tana mi tha tak I tawng vat mai ang”a ti a.

“Hun hian ka rilru na chu a la liampui ve mai ang, min ngaihtuah duh suh”ka ti a, ka rin aiin ka aw chu a chhuak pangngai.

Zanah ka mu thei loa, chaw ka ei thei hek lo. Hetiang tak hian ka na ang tih ka lo ring phak ngai lova, amaha ka lo innghah thukzia ka hrechiang telh telh bawk. Engkimah Daphne’n min ngaihtuah a, keimaha ka awm a phal lo bur. Muanhlua pawhin min rawn biak a tum ngun a, kan inbiakna hian rah tha a chhuah dawn lo tih ka hria a, ka be duh lo hrim hrim.

Kan exam a hnai a, lehkha ka zir that theih loh rei avangin zir leh pawh chu a har duh khawp mai. Mahse, beidawn erawh ka tum bik lo. Ka theih ang angin ka inbih ve bawk a, Muanhlua vang bawkin ka mittui a tla leh thin. Ka zirlaiah min pui nasa em em thin a, ka lakah hian sulhnu a hnutchhiah hnem lutuk a, keimaha paltlang vek tur chuan ka huphurh a ni. Engtin tin emaw exam chu kan zo ve mai a, result tha tak neih ka inbeisei lo. Daphne bawkin hna zawn a rawt a, a tih ang apiangah ka kawi kual ve vel mai mai a ni. Computer exam pawh kan zo fel a, kan hna dilna interview result nghah pahin Shimla lamah kan kal a, ka hlimna tur anih beiseiin Daphne chuan ruahmanna engkim a lo siam fel vek a, ka tan hian a thil tih zawng zawng hi ka rul seng lo ang. Khawi hmunah mah hlimna tak tak ka hmu lo, heng hmun pawh hi Muanhlua u hnathawhna hmun a ni a, kal dun kan tum reng laiin kan boruakin a zir ta lo kha a ni a, ka nunah hian a tel hnem lutuk a, ka buai phah a ni berin ka hria. Ni li kan cham hnuah Delhi lamah let leh turin kan inbuatsaih a, chutih lai chuan phone call ka dawng a, kan interview result a chhuah tawh thu leh thawk tura lak ka nih thu min rawn hrilhna a lo ni. Min biak zawh hnu lawkah Daphne pawh an rawn bia a, kan pahnihin lak kan ni ve ve tih kan hriat chuan kan hlim hle a, Muanhlua nen kan inthen hnua thinlung taka ka nuih leh hmasak berna a ni hial ang.

Delhi pana kan tlan lai chuan ka rilruah thil tam tak ka ngaihtuah a, kan inkar tawp hlen tawp tura ka ngaihtuah hian a dik theiin ka hre lo. Ka nun atanga kal hlen tura ka duh loh chuan ka theihtawp ka chhuah ve chu a dik a ni lom’ni? Ka phone ka la chhuak a, whatsapp ah lutin a message tur chu ka type mawlh mawlh a. Min chhan pawh ka ring hran lo, mahse, rei vak lo hnuah min rawn chhang ve nghal zat a.

*I tha em, ka ngaihtuah lutuk che ania*

Min rawn chhan dan chu han en mai chuan min ngaihtuah tak takte pawh a ang ve alawm. Ka chhang tawh lo.

Hostel atanga insawn chhuah kan tum avangin bungrua chu kan in pack fel a, Daphne nen kan awmtlang tawh lo tur chu ka huphurh ru kher mai. A naute college kal tur an rawn awm tawh dawn avangin inluah an tum a nia a, keipawh ka pa in inluah tura min tih avangin ka luah ve dawn bawk a ni.

“Office-ah kan inhmu ziah dawn tho alawm tiraw?”ka ngaihtuahna hria niawm takin a rawn ti a.

“Mahse, ka ngai ngawt ang che”ka ti a.

“Keipawhin.. inenkawl tha la, I hlim hmel hi hmuh a nuam lutuk ania”a ti sap a.

Kan motor biak an rawn thlen tawh avangin inngai tak chungin kan inthen ta a, engkimah ka hma a hruai thin a, keimaha bul tan turin ka rilru pawh ka siam nghet ve thei tawh. Ka inluahna bul lawkah ka hmelhriatsa te an lo awm ve bawka, khawhar lutuk chuan ka awm dawn bik lo e.

*I hnaa I kal hmasak ber ni tur a ni sia, ka lo thlah dawn che mi?*

Muanhlua msg ka hmuh chuan ka nui var var a, ka address te hrilhin min lo hruai hun chu ka lo nghak tawp a. Minute 10 hnu velah a rawn thleng a, ka hnathawhna hmun tur lam chu kan pan ta nghal a. KAawngah chuan kan inbe tam lo khawp mai, a ngaihtuahna a seng nasa a ni ang, a hmelte chu a tla ve deuh dakin ka hria a.

“Tunlai I hah em ni?”, rei fe kan ngawih hnuah ka ti a.

“Hah ve khawp mai. Zan ka mu hman mang lo”a ti a.

Nidang anga ngaihtuah chiam a rem tawh loh avangin ka ngawi ta vel mai mai a.

“Mizoram lamah hna ka zawng ve tawh dawn emawni ka tia, tunlai chu kan chhungkuaah buaina neuh neuh kan tawk nasa a, ka pa in min rawn bia a”a ti a, “KA hreh em em lo bawk a, ka rilru erawh ka la siam fel mai thei lo”a ti leh nghat a.

“Anih chu..”

“Ka phak tawk hna chu hmuh ve mai te pawh ka inbeisei tho a, ka hre lo le”min rawn en pah chuan a ti a.

“I tan thil har engmah a awm hleinem. I tling leh mai ang”ka ti a. Pawn lam chu ka melh vang vang a, tihian kan inkar chu a tawp zeal, a tawp hlen tak tak dawn tih chu ka inhrilh mawlh mawlh a.

“Engkimah khan ka lawm e”a ti a, ka va en a, min lo en ve reng a.

“Lawmthu sawina tur a awm hleinem”ka ti a, “Ka lo be fo ang che, thian tal chu kan ni zawm thei ang chu tiraw?”a ti a, ka bu nghat a. Ka duh chiah em tih hre lo mah ila ka rilru a inpeih hma chuan ka remtih a ngai. A telloa ka nun ka hman theih hunah chuan inzawmna nei miah loin ka awm ve thei tawh ang.

Ka inhnawk zualpui ka thian fai tawh a, kartluana chhuah chuan weekend hi a hlu bik a, ka thawmhnaw ka su pah mek a, thla hnih zet ka hnaah ka kal ve tawh a, nuam ka ti a, company lian leh lar ni em em lo mah se bul tan nan erawh ka duh tawk viau thung. Chutah ka thian, ka engkim Daphne nen kan thawk tlang thei bawk a, hei bak chu tunah chuan duhthusam dang ka nei bik lo. Muanhlua nen kan inbe ve deuh zeuh zeuh a, min rawn biak hlawl chang a awm a, anihna takah chuan keimah zawkin ka biak hi a tam zawk. A tirteah khan chiang takin ka hrilh a, ‘Ka rilru inpeih hma chu ka rawn be thin dawn che nia. Lo let leh tur chuan ka ti dawn lo che, mahse, reilote chu ka la tihbuai che a ngai dawn ania, chu pawh ka ngaih tawpkhawk ah lo che chuan ka lo be lo ang che’ ka ti a, a pawm thlap. Ka be tlem tial tial a, biak loh tawp erawh harsa ka la ti ve. Chawhnu lamah mamawh lam khawm tumin ka chhuak a, ka card pakhat zawk ka lo keng chhuak hauh lo tih dawr ka thlen hnuah ka hre chiah. Ka card ken chhuah zawk chu Muanhlua pin min generate sak a ni a, ka pin kha a tira min hrilh bak ka lo zawt tawh lem loa, ka hman ngai tawh loh avangin ka hre chhunzawm lo hrim hrim. Ani erawh thil hre thlap thlap chi a nih vangin a theihgnghilh ka ring lo. Ka phone chu phawrh chhuakin a number chu ka dial a, a ring quit thak avangin ka han tinawn leh a. A pickup dawn lo emaw ka tih hnuah a rawn la hrama, mahse, hmeichhia a ni thung.

“Eng nge I duh ?”a rawn tih chang fak a.

“Muanhlua ka be duh lawk a”ka tih chuan a nui hak ri ka hria.

“Ti nge I rawn la biak ziah a, rawn tibuai tawh suh”a ti ta zek a. Tawng leh ka tum chuan a lo dah fel hman daih tawh. Ka thil lei tum pawh lei thei ta lo chuan ka chhuak a, ka zak ru chem chem mai. Muanhlua chu ka ngei bawk a, min lo ning viau anga, ka biak tawh loh nan a ti aniang tihte ka ngaihtuah a, ka rilru a na a, ka thin a rim bawk. Ka inluahna bul lawka park ah chuan ka lut a, ina haw mai pawh ka chak lo. Naupang infiam ri nak nak chu ka en reng a, rilru natna awmzia hre miahloa hun kan hmanlai kha a lo ngaihawmzia min ngaihtuah  chhuahtir bawk. Helai hmunah hian kal ziah ila ka rilru pawh a thawlin ka ring. Darkar chanve vel ka thut hnu chuan ka haw ve ta a, hna thawh tur ka hawn tho avangin zan hun lo thleng tur pawh ka huphurh lutuk lo.

Ka thil lei tum ka hlawhchham takah chuan kal nawn leh ka peih chiah loa, noodles ka kawl tho avangin ka ei ta vel mai mai a. Daphne nen rei tawk fang kan inbiak hnuah Muanhlua’n min lo call a tum tih ka hmu chiah, ka call back duh ta chuang lo. Whatsapp message a rawn thleng nghal zat a, amah tho a ni.

*Vawiin kha sorry lutuk aw, ka phone kan inchuh nasa lutuka, a thinrim leh vak ai chuan ka tia a lo pickup anih kha*

Chu message ka chhiar chuan ka nuih a za deuh tlat, ka thiam loh erawh a awm tho, biak tawh loh hi a tha ber a nih hi ka ti rilru a, ka chhang duh ta chuang lo.

Nikhat chu ka hnathawhna hmuna ka awmlaiin ka nuin min rawn bia a, a theih chhung ka sawi lo ang ka tih Muanhlua nen kan chanchin chu min rawn zawt a. Kan inthen chhan dik tak sawi chu mak tak maiin ka hreh tlat a, chhuanlam eng engemaw siamin ka insawi fel the ihram. Chu chuan ka rilru erawh a tinuam chuang hauh lo. Ka nu sawi hmang khan a bialnu te lam hi thil tithei ve tak an nih ka ring, tuna Mizoram lama let a duh chhan hi a nih ka ring bawk. Ka tum lawk pawh ni miah loin Muanhlua chu ka call a, min rawn biak a tum apianga ka biak duh loh thin avangin a lo pickup duh pawh ka ring lo. Mahse, rang fe hian a lo pickup a, thil thleng tur hre lawk ni ila chuan biak ka tum hauh lo tur a ni a.

“I duh huna min biaka, min biak loh tur ka ni em ni? Ka ngaihtuah luatah che ka tisual a nih hmel. Min rawn be tawh lo la, ka rawn be tawh lo bawk ang che. I rilru a nat em avang hian kan khawngaih che a, kan dawh hram hram chea, chuvanga la bia che ka nih hi”, atih rual chuan ka nghing lawih a.

“Enteh, min dawh hi ka ngai miah lo ania. Min hmangaihtu leh min ngaihsaktu chhungte leh thiantha hi ka nei ve tho ania” ka ti a. Ka mittui tla tur chu ka khap per sak a. “Tun atang chuan inhre ngai lo angin kan awm dawn nia”, ka phone chu ka hmet thi nghal a. Khumah chuan ka thu ngawi reng a, ani khawngaih kha ka ngai reng reng lo.

Ka hnathawhna atangin ka haw hma a, engmah ka ti tui thei lo. Ka rilru chu tihnat sak nawn ka ni leh ta. Ina haw pawh chu ka chak chuang lo, park ah chuan ka kawi a, mi awm lohnaah chuan ka thu a, boruak chu a nuam tawk vel chiah hian a awm a, thawm awm lohna hmuna mahnia awm chu ka chak ber a ni. Ka hnung lama thawm rawn awm avang chuan ka hawi chhuak a, mi pakhat hi camera keng chungin ka thut lohna lamah chuan a lo ding reng a. A hma khan ka hmu miah loa, a rawn kal lai ka hriat loh avangin a lo awmsa a nih ka ring. A camera chu a lek kual a, ka awmna lam a rawn tin chuan mak tih hmel deuh hian min rawn en a, min hmu mai bik lo anih ka ring. A insianrem vat a, a rawn nui sak a, ka lo then lui ve hram a.