A MEASURE OF FAITH- III

A MEASURE OF FAITH

Part III

“Hey”

Ka bulah chuan a rawn kal hnai a.

“Hey…”

“Pawi I tih loh chuan I bulah hian ka lo thu ve ang chu?”, min rawn nan a mitko a san zeuh a.

“Tehreng mai, lo thu rawh”, tiin ka thutna chu ka lo insiamrem a.

“Lalawmpuia ka nia”, tih pahin a kut a rawn phar chhuak a.

“Lallianpuii,” ka lo chibai let ve var a.

“Apui tiin an ko thin bawk che a”, a tih chuan mak ti zetin ka en a, a lo nui var var a.

“Chu, min va hre leh si awm ve”ka tih chuan a camera chu min rawn pe a.

Ka en chuan ka thlalak a lo tam ngei mai, hmanni tlaia helai hmuna ka kalna leh vawiin lama ka thlalak a lo awm nual a, engtin nge ka hming nen lam a lo hriat theih zawk. A camera chu ka pe let a.

“Min zui ru chu a ni em lo maw?”ka ti a, keimah zawk chu ka nui hak a, ka zawhna chuan a tih thinrim loh hram ka beisei. Mahse, ka thu loin ka thla a la ve tho alawm le!

“I remchan hunah ka studio-ah lo leng lut ta che”, a ti a.

“Aw, a… ka hre chiah lo”

“Hei ka business card a nia, khawngaihin vawikhat tal chu rawn leng lut rawh”tih pahin a card chu min pe a.

“Aw le, ka lo tum dawn nia”ka tih chuan a bu nghat a.

“Ka kalsan tawh mai ang che aw, hnathawh tur tlem ka la nei a”tiin min kalsan zui ta nghal a.

A kal hnu chuan a card chu ka han en a, photojournalist a lo ni. Ka lo rindan chuan tlangval khawsak nuam taka Delhi vela khawsa, chhungte thawhchhuaha camera man to awrh chhuak ve ringawt emaw ka ti a, ka lo ring sual ve deuh chu a ni. A card chu ka bag ah ka ak a, hun ka neih remchan veleh Daphne sawma kal ngei chu ka tum.

Ka hnaah ka buai ve bawk a, lunglenna hun pawh nei mang loin ka awm a, Muanhlua chu theihnghilh bik lo mah ila biak pawh tumna ka nei tawh lo. A sawi ang ngeiin ani pawhin min rawn be lova, chuvangin engang pawhin ngai mah ila biak ka tum bik lo. Hun a liam anga, heng ka tawrhna hi a tawp ve ang tih ka ring tlat bawk. Amah hrechhuak miah lova ni ka hman chang a awm ve zeuh zeuh a, mahse, zan lamah erawh amah ngaih vangin ka mu thei lo fo thung. Atana ka mittui sen ka tum tawh lova, mahniin ka bei ve tauh tauh a, ka la hlawhtling ve chek ang chu!

Kartawp chawlh hman dan tur Daphne nen chuan reife kan han rel a, shopping zawha dinner ei chhuah te kan han rawt bawka, a tawpah chuan thil pakhat ka hrechhuak hlawl, Lalawmpuia kha! Kartluanin ka lo hrechhuak tawh reng reng lo. Ka bag chu ka han zen vat a, card chu ka phawrh chhuak nghal a, Daphne chu thil awmzia hrilh pahin a peih anih phawt chuan kalpui ka duh thu ka sawi a. Ka rin ai daihin a lo phur lehnghal, a contact number indah chu call ka han tum mai a.

“Dear, chuti taka a sawm che chuan a lo hre thuk viau che pawh a ni maithei, surprise zawk ang”, Daphne chuan a ti a. A tha dawn hlein ka hria, ka phone chu ka dah leh ta zawk a.

A hun a lo thlen dawn meuh chuan ka rilru ka thlak leh deuh thut a, chutia ka hmelhriat pawh nilo sawmna han tihhlawhtlin tawp chu ka hreh ve deuh. Kawng lehlamah erawh ka Mizopui a ni a, thiantha taka insiam zelna remchang a ni tihte ka ngaihtuah tel bawk a, engpawhnise, Daphne bula ka lo sawi tawh avangin ka kal ngei chu a ngai a ni phawt mai. Engtin tin emaw kan zawng chhuak thei mai a, ka lo call hmasa lo chu ka inchhir leh tan der tawh. Daphne chu hma ka hruai tir a, kawngkhar bul lawkah hian hmeichhe pakhat a lo awm a, Awmpuia hmuh kan duh tih ka sawi chuan Magazine atan shooting an neih mek thu leh lo nghak mai tur chuan min han ti a.

“Apuii hming hi min va sawi rik sak ve reng reng la”,Daphne chuan a lo ti vat a.

Min hnialna pawh nei chuang loin room lehlamah chuan a va lut a, rei vaklo hnuah an pahnih chuan an rawn inzui chhuak a. Min hmuh chuan hlim takin min rawn pan a, a hnathawk lai kan tihbuai vanga ka inthiam loh thu ka lo sawi nghal a.

“Hunawl kan nei tak tak chuang lo a, pawi ti deuh reng reng suh, I thiannu hi..?”tih pahin Daphne lam chu a melh a. Kei hian inhmelhriattir nachang ka lo hre pek lo.

Oh.. Ka tihpalh lutuk, Daphne, ka bestfriend a nih hi, Chuan, Daph, ani hi Awmpuia..” “Awma”a lo ti vat a. Nui pahin, “Awma tih tur anih chu”ka ti zuinghal a.

A hnathawhna lama kal tura min sawm avangin kan zui lut ve ta nge nge a, a studio chu a pawn lama a lan dan ang aiin a lo phui sui a, model nalh zet hi camera hrang hrangin an lo tin thluah lehnghal, a zam awm zawk hlein ka hria.

“Thlaleh chhuak tur Magazine cover tur ka buaipui lai ania, tun tum chu a hautak hrep a”, Awma chuan a ti a. A naute pahnih chu koin an tih leh dan tur chu a hrilh zung zung a.

“Apui, minute 20 min lo nghak lawk ula, ka hman ang”a tih chuan ka lo inthlahrung zawk.

“Nidangah pawh kan la inhmu thei zawk ang chu”,ka ti a.

“Thil engemaw hmuh cheu ka duh hrim hrim alawm, khawngaihin min lo nghaka lawk rawh u”, a tih avang chuan hnial talh ka tum ta bik lo.

“Dear, I thianpa thar hian a star deuh chein ka hria”ka bengbulah chuan a rawn ti sa sa a.

“No.. I hresual nih chu”, tih pahin ka han nghawk deuh a, ani erawh awmze nei takin a ui hak thung.

Reilote chhungin an zo ve ta a, an duh ang pawhin an thawk lo ang tih ka lo hlau zawk.

“Kan rawn kal hun a fuh chiah loin ka hria, I duh ang pawhin I ti hman lo ang tih ka hlau”,ka tih chuan a then sak a.

“Ka duh ang tawk bak hi chu nalh leh chuang tur a awm tawh lo”,a lo ti fiam a, rei tak lo inhre tawh kan angin ka hria!

“Hei hi karleh lawkah exhibition-ah pho chhuah ka tum a, nalh in tih ve ngei ka beisei”,tih pahin thlalak pakhat hi min rawn pe a. Kan han en chuan keima thlalak a ni. Park-a ka kal hmasak zawk kha a ni chiang mai, rilru natna thuk tak ka nei tih ka hmelah chuan a lang chiang em em a, chu ai mah chuan chutiang taka ka chhungril ber pawh phochhuak thei khawpa a talent neih chu mak ka ti zawk.

“Ka sawi chhuak thiam lo, a ropui tak zet”, ka ti hluai a.

“A ropui lutuk..”Daphne chuan ka thusawi thlawp zet hian a lo ti ve bawk a.

“Ka model hi a thlawna hman ka tum miah lo ania, dinner ka treat ang cheu”, a tih chuan Daphne nen kan inen rual a.

“A ngai lo..”kan ti rual thawt a, Awma erawh a lo nui mai mai a.

“Ka hman nghal a ni mai, kan kal dawn nia”, a tih chuan hnial ngaihna pawh kan hre tawh lo.

“Shopping in duh chuan kan kal hmasa dawn nia”,kan rilru hria niawm takin a ti lehnghal a, hepa hi mi mak tak zawng a ni ngei mai.

Kan pathum chuan kan inzui chhuak ta hlawm a, Ambience mall lamah kan mamawh kan indap kim a, mipa tan hian a ninawm viauin ka ring thin. Hmeichhiain duhtawka mamawh kan han lamkhawm meuh hi chuan hun hi a lo kal duak thin a, hmun khatah kan duh a lo awm kim lo a, a hrang hranga kan han zawng leh thinte hi kan tlin hian ka hre thin. Muanhlua khan hetiang neuh neuh hi a peih lohzia kha ka hrechiang a, mipa dang pawh hi an nih tho ka ring. Darkar thum zet hun kan hman hnuah kan zo ve thei hram a, kan vawikhat chhuahnaa chutia a hun tam tak ka paihsak chu Awma lakah chuan ka inthlahrung ve deuh.

“I ning em?”, Daphne kalsawn lawk hlan chuan Awma chu ka zawt a.

“Teuh lo, I awm ve phawt chuan kha aia rei pawh ka la peih”, tiin min chhang, ka ngei ru zawk.

Dinner kan ei zawh meuh chuan khua a lo tlai duai tawh. Ka haw na tur lam chu a hnaih zawk avangin thlah ngai ka inti chiah lova, Daphne thlah tura ka tih chuan Awma chuan min rawn melh deuh kawk a, “Ka thlah ve ve ang che u”, a lo ti hmuk a, ka ngawi ta hle hle a.

“Dear, thlah ka ngai lo ania, ka nauin station-ah min nghak ania”Daphne chuan a ti a.

“Station-ah chuan kan va drop ang che”, ka chhan hmain Awma chuan a lo ti vat a, Micromax mercury avenue lam pan chuan a inkhalh chhuak nghal a, helai hi metro station a ni. A sawi ang ngei chuan a nau chuan a lo nghak a, keimah vangin dawt a sawi lo tih ka hriat chuan ka thaw huai, “Kan inhmu leh vat dawn nia”tiin kan in thlah liam ta a.

Chutia Awma nen chiah kan nih takah chuan a nuam lo ka ti thar leh deuh riau, ka lakah rilru eng emaw a pu pawh a nilova, chutianga ka awm chu ka inthiam lo zawk. Ka hna chungchang min zawh angte tha takin ka hrilh a, keipawhin ka zawt let ve nual bawk. Times of India ah a thawh bakah tuna ama mimal studio changtlung tak a din ve tawh thute chu a sawi lang a, Magazine hrang hrang hian an ruai tel tih chu sawi lang lo mah se a dawra kan awm khan ka hre vek hman thung. Darkar chanve kan tlan hnuah ka inluahna kan thleng a, leng lut tura sawm chu ka duh na a, zan lam a nih tawh avangin a mawi lo hma tih hriain ka sawm duh ta lo. Chhuah tumin car kawngkhar chu ka vuan a, rang zet hian ka kut chu a rawn man a, ka phu deuh zawk.

“Mizo thiltihkhawmnaa I hmel ka hmu thei ringawt pawh kha ka lawm tawk em em thin a, tunah chuan ka motor-ah ngei I chuang a ni a, a mak ka la ti reng”, a ti sap a.

“Maw?”, a thusawi chu hre mah ila chu zawhna chu ka zawt ta tho.

“I tan kha chuan mipa pakhat chauh an awm tlat a, ngaihven nachhan tur kan awm ve lo alawm, khang hun chhung zawng zawng khan nangmah chiah hi ka lo ngaihven ve thung che a”,a ti leh a.

Ni e, a sawi dik chiah. Khawi hmunah pawh khan Muanhlua nen kan nih zel avangin midang ka lo hrechang ngai lova, thian tia sawi tur pawh Daphne bak ka nei lo reng a ni. Amahah ka innghata, khawvelah hian mipa amah chauh an awm ni mai khan ka lo hria pawh a ni mahna! Ka thaw hak a, ani khan min tina si a.

“Ka kal phawt ang e”

“Ka lo nghak reng ang che”

“Min nghah chhuah ka ring chiah lo”

“Kha leh chen ka nghah theih che chuan a aia rei pawh ka nghah zel theih che ka ring”

Ka va en chuan min lo melh reng a, ka hawisawn nghal vat a.

“I tum chhin tal thei lo em ni?”a tih chuan tawngkaa chhang lovin ka bu ringawt a.

“I hnaiha awm tal chu min remtihsak la…”

“I rilru a na mai mai ang. Muanhlua kha mi zawng zawng hriat khawpa inkawp kan ni a, ka hmangaih em em a, engtikah emaw chuan a lo let leh maithei bawk a, nghak chhuak ta si ila I na dawn asin”, ka ti a. Engvanga chutiang zawnga sawi nge ka nih ka inhre chiah lo, nat nawn loh nan ka inveng ti ila a dik ber ang.

Inchhung ka luh hnu chuan ka taksa tang mar at chu ka thlahdul thei chiah, engtin nge ka thusawi kha a dawn sawn ang tih ka hre lo a, ka lakah beiseina a neih loh khan a tan pawh a tha zawk. Mi fel tak a ni a, mahnia thiamna nghet nei leh Delhi khawpuiah pawh photojournalist tam tak zinga a tha ber zinga mi ni pha ngat, chanchinbu lian tam takin an hnena thawk tura an duh em em a ni a, a future a enzia leh a hlawhtlin mekna chu ka hmuh hmaih lova, chutih lai kara kei, hmangaihnaa vanduai tak, min kalsantu la ngai em em reng hi a tan ka tha tawk thei ngai lovang.

Khumah chuan ka mu meng kar a, ka whatsapp message rawn thleng ho chu ka check kual zung zung a. Chung zingah chuan ka pa dam that theih vak loh avangin inentir tura an rawn kal tur thu ka nauin min lo hrilhna a tel. Ka nau chu biak ka han tum zet na a, ka nu zawk ka bia a. Ka pa chu ngaihtuahawm tak anih lem loh thu leh doctor-te pawh anmahni zawkin refer tura an ngen vanga rawn kal tur an nih thu a sawi a. Ka rilru tihah lo turin min chah bawk. Ka pa hi kum kalta atang khan a chak lo sawt riau a, natna sawi em em tur hre silo in a chau tial tial a ni ber. Kan chhungkaw sumdawnna pawh a enkawl thei tawh lova, ka nau Mama hian a enkawl ta ber. Ka nuin ka pa enkawl leh inchhung enkawl a kawp a, ka pa enkawl hi hautak viau angin lang lo mah se dawhtheih a ngaih viau ka ring, ka pa hi a phunchiar tak em avangin! Chutiang the nuaih anih avangin keipawhi helama inenkawl chu a tha ka ti a, ka bulah han awm ve deuh se thain ka hre bawk.

Ka zirna chhunzawm zel chu ka chak a, ka huphurh tel bawk a, a chhan ber pawh hnathawk paha zir tur chuan ka tlin loh ka hlau a, hnadang zawn dawn lahin hei aia hunawl ka ngah na tur ka hmu mai bawk si lo, kumkhat chhung chu ka inkhawl phawt a tul reng reng. Awma ka hmu ngai lova, Muanhlua nen kan inbe ngai hek lo. Ka chhungteah ka rilru zawng zawng ka pea, chu chu hahna a tling tawk thin hle bawk. Ka pa enkawlna senso tum ve vek ka duh avangin ka inkhawl ang ang chu ka hmang a, min enkawl tawh thinna zawng zawng vang khan hei hi tih ve ka duh hrim hrim. Ka nau sawi hmangin kan sumdawnna chuan a hma a lo pha tawh lo nasa bawk nen, theihtawp chhuah chu ka tum a ni.

Ka nu leh pa nghakin airport-ah ka thu ran a, flight an delay vangin tum aia rei fe ka awm tawh. Ka dara rawn vuantu an awm avangin ka han hawichhuak a, Awma chu ka bulah tak hian a lo ding reng a.

“Eng nge I tih dawn?”ka tih chuan, “Nangmah zawk kha..” a lo ti ve a.

Ka nu leh pa ka nghah mek thu leh flight delay vanga tum aia rei ka awm tawh thu ka sawi a. A bag chu a hma lamah a han pawm a, ka bulah a rawn thu a.

“Ka lo nghahpui ang che, a khawharthlak awm em mai”, a ti a. Ka hnial fe chung pawhin a awm lui tlat si a, ka inthlahrung viau mai.

“Eng nge I tih reng reng?”tia ka zawh chuan, “Kan hna kaihhnawih ania, airport hi chu ka thleng phei leh mai zel”,tiin awlsam fe hian min chhang a.

“I phone min lo pe lawk”

“Engvangin?”

“Thil tha deuh ka pe ang che”

Ka phone chu ka pe ve mai a, engemaw a type mual mual a, a phone chu a rawn ri ral ral a.

“I phone number neih dan awlsam tak anih kha”tiin a nui ta var var a.

Note: Vawiin chu kan thiannu-in pasal a nei a, hunawl ka ngah vak loh avangin a mood-ah ka awm hlei thei lo, min lo hrethiam teh u J