A MEASURE OF FAITH- V

A MEASURE OF FAITH

PART V

“Ka nau Hlutei anih hi”Awma chuan a ti a, “Apuii ka nia,”tih pahin ka kut ka phar chhuak a. Ka hmel chu en zawh vek a tum emaw tih tur khawpin min melh a, chutah phur hmel vak loh hian a rawn phar chhuak ve a. Vawikhat ka biak fuh palh tum khan a mizia tur awm ang chu ka hrethiam deuh, mahse, engmah ka hmelah ka tilang lo. Awma nen chuan rawng kan bawl nghal char char a, Hlutei erawh chu sofa ah duhdah zetin a thu a, a phone chu a kheuh neuh neuh reng a, min nel tum angin a awm lo a, han biak chiam ka thiam bik lo bawk nen ka pawh duh hran lem lo.

“Ani hi chu a naupang ber tih takah a mizia hi a la naupangchhia lutuk a, hriatthiam hi a ngai deuh thin ania,”Awma’n a tih chuan ka lo bu nghat a.

“Helamah a awm ve reng nge?”tia ka zawh chuan, “Awm reng lo e, a certificate vel lam turin a rawn kal leh lawk a, a haw chho leh vat ang”a ti a.

“A nih chu, I khawhar lutuk pawh a zia ve deuh ang chu,”ka lo ti ve mai a.

Kei ai mahin rawngbawl a thiam zawk, a sirah amah pui turin ka lo ding ve mai mai a ni deuh ber. Ei tur kan buatsaih zawh hnu chuan inchung lamah kan chhuak chho a, boruak chu a nuam tawk chiah a, hetiang hunah hian Mizoram ka ngai thin. Ka pa dinhmun avangin ka duh ang anga haw chhoh te a remchang lova, anmahni tihbuai loh dan leh puih theih dan tur ka ngaihtuah ve reng avangin haw chu ka ngaihtuah ngam rih lo a ni ber.

“Thil vei lian deuh nei I ang”

Ka va en a, min lo en reng avangin ka hawisawn leh nghal a.

“Apui, i inbunruahna tur tal pawh ka ni thei lo mi? I rilru dik tak hi min hrilh la ka lawm ngawt ang. I tan hian phurrit nih ka duh miah lo ania, nghah chhuah tur I awm dawn lo anih pawhin tlang takin min hrilh la, ka nawr lui lo ang che. I mamawh hun apiangah erawh ka awm zel tho ang,” a ti dam dap a.

“Keimah zawk hi phurrit ka ni ang tih ka hlau a, dik tak chuan mipa rin harsa ka tawh em em bawk si. Engemaw hlekah ka ringhlel che anga, buaina ka thlen mai mai ang che tih hi ka hlau a ni,”ka ti a.

Min rawn din hnaih a, a lamah min pawt hnai lehzual a, amah en thei turin ka darah chuan a kutin a rawn vuan a.

“Ka hmuh hmasak ber atang che khan ka umzui tur hmeichhia I ni tih ka hre daih tawh, mahse, hmangaih tak I lo nei reng a ni tih ka hriat khan ka beidawng hle a, mahse, midang tan khan ka phal chuang lo che. Khang hun chhung zawng zawng khan I hmelhriat tal nih theih dan kha ka dap nasa a, hun remchang erawh ka hmu ta mai lo. Kum 3 hnuah ka rilru dik tak hrilh thei chea ka bula I awm hi mak ka la ti reng asin,”a ti a.

Engmah ka sawi thei tawh lo, ka che hrat a, a kawngah chuan ka va kuah a, a awmah chuan ka hmai ka phum a, ka hnuk a ulh nghal titih der. A thaw hak a, duat taka min rawn kuah letna te chuan ka rilru a tinem a, ka innghah ngamna mipa a ni ang tih ka hria, mahse, Muanhlua avanga ka tawrhna kha ka theihnghilh phah si lo. Ka rilruah hian hlauhthawnna, rinhlelhna a inpawlh nawk a, ka duh vang ni hauh siloin amahah ka intulut zel lawi bawk si.

“Ka lawm e, min lo nghah tlat avang khan ka lawm e,”ka ti chhuak ve ta hram a.

Mu chungin ka ngaihtuah neuh neuh a, Awma bula ka awm chuan kan chhungkua vanga ka rilru hahna te hian min kiansan duak hian ka hre thin. Ka hmui chu ka han khawih ringawt a, duhtawh taka min fawhna hmui kha, a rim te chu ka hnarah hian a la cham veng vengin ka hria, keimah chuan ka nui var var a.

*AWMA POV*

Apuii ka hmuh hmasak ber tum kha ka la theihnghilh thei lo, Delhi Mizo thiltihkhawmnaah thla ka lakkual laiin ka hmu fuh a, amah chauha a ding lai a ni nghe nghe. A thla chu ka la mawlh mawlh a, ani lah chuan ka awm ve tih hre map lo hian a thiante bulah chuan a nui var var reng a, hmuhnawm ti taka ka thlir reng lai chuan mipa pakhat hian a rawn kai sawn ta daih mai a. Khatiang khan hmeichhia ka vawikhat hmuhnaah lehnghal ka rilru an la peng ngai lo. Dinner ei zawh hnu lamah haw turin ka inbuatsaih a, ka bungrua vel ka inremkhawm laiin ka motor bulah tak motor a rawn ding a, ka han hawichhuah chuan amah tho chu ka han hmu leh a. A mipa zawkin thil theihnghilh a nei a ni maithei, an rawn tlan chhuahna lamah a hank al leh a, keiin amah chauh ka melh laiin ani thung chuan a thianpa kalsawnna lam chu a thlir dauh dauh a. Khaw dang ka melh thei lo chu a ni ber e, a mitmeng mawlh kha ka theihnghilh thei lo. Khatiang khan engtikah nge min melh ve anga, min en ve ang tih hre lo mah ila hmeichhe rilru nghet leh ze nghet tak nei a ni tih ka thinlung hian a hre tlat.

Ka theih ang angin a chanchin ka chhui ru ve reng a, JNU ah a kal tih leh a cousin nen in an luah tih thlenin ka hria a, mipa ka hmuh kha a bialpa a ni tih ka hre chho ta zel bawk a. Ka rilru atanga dahbo a, beisei zui tur ka ni lo tih hre mah ila amah ah khan ka duh engkim a awm avangin chuti maiin ka ban san thei lo. Hmeichhe dangin ka rilru an la peng lo mai ni loin ngaihtuah pawh ka ngaihtuah ngai lo. Mahni tawka invawng uluk leh eizawnna lamah pawh mahni intodelh ve tak ka nih avangin ka phu tawk hmeichhia min beiseitu chu an awm ve reng thin. Apuii laka rinawm taka lo awm chu ka tih tur niin ka hre tlata, a atthlakzia ka hria, tih ka duh tlat thung.

Kum 3 zet ka nghah hnuah ka tan hun tha a rawn inher a, ka beiseina ten min liamsan mek laiin ka tana ruat a lo ni ve reng  anih chu. Chung zawng zawng ka ngaihtuah chuan beidawnna hi inhnehtir tur a ni lo tih hi ka hrechiang lehzualin ka hria, engkimah hian.

Ka inluaha zanriah min rawn ei pui duh kha ka lawm hle a, Hlutei awmlai a lo ni bawk nen a remchang hlein ka hria. Chutah ka beisei ngam loh chhanna ka hmu bawk nen ka tan khawvel hi a hlimawm a, dam chhan awm ngawih ngawih hian ka hre thar bawk. Muhil thei loin ka let chhen a, a hmel pawisawi lo leh a hmui fawh nuam tak te kha ka mitthlaah a rawn lang a, ka hmui chu ka han tuai ringawt a. Ka phone chu ka lukham hnuai atangin ka la chhuak leh nge nge a.

*Ka muhil thei lo* tih ringawt chu whatsapp ah ka va thawn a.

*Enga tinge?*

A lo reply ve nghal vat avangin a la muhil bik lo aniang.

*ka ngai che a*

Chu erawh min reply mai lo. A hnu deuh ah chuan a rawn online leh va a.

*keipawh*

Tawi viau mah se chu ringawt pawh chuan ka mut a ti tui hle.

Ni tin buai tak leh hah takin hna thawk thin mah ila rilru chhungril berah hian Apuii a awm a, keimaha hetiang taka zun a nei hi a mak ka ti a, hlim taka awm tir hi ka thil tum lian ber a ni. An chhungkuaah a pa natna piah lamah eng harsatna tak nge an tawh ka hre mai thei lova, awlsam tak chuan min hrilh ka ring lem lo. Ka chik peiha, ka ngaihven peih hle a ni loh chuan engmah a hnen atang hi chuan ka hre lo ang. Chutiang mi chu a ni a, midangah a innghat mai mai lo tih ka hre daih tawh. Ka phone chu a rawn ri ral ral a, phone screen-a Apuii hming lo lang chu ka hmuh rualin phur zet hian ka pickup nghal a, ngaiah ka nei thei dawn lo niin ka hre hial!

“Interview result a chhuak a, ka tling ve ania aw,”a rawn ti lang lang a.

“Hna I dil tih ka hre miah lo ania,”tiin ka lo vui der a.

“Heyyy…. Thinrim miah suh aw,”a tih chuan ka nui ru hak a, a langah erawh ka thinrim der lui tlat thung a.

“Dinner min treat dawn chuan ka ngaidam ang che,”ka tih chuan a rawn nui ta hak hak a, ei chhuahna tur hmun duh a rawn thlan hnuah dar 6 a lam turin min ti a, kan inbiakna kan titawp zui nghal a.

Nidang zawng aiin darthlalang hmaah chuan ka ding rei a, ka nalh phah viau pawh chu ka hre lem hlei lo a. Ani erawh chu engtin pawhin rawn inchei se a inhmeh leh viau tawh tih ka hria, a inchei loh te hian a nalh hlei hleiin ka hria. Dar 6 ah chiah a inkawt ka thleng a, ka biak lawk avangin pawnah min lo nghak tawh a, min hmuh chuan hlim hmel takin min lo nuih a, hei hi ka ngainat chhan dik tak leh ka laka a zun chu a ni tih ka sawi chhuak tawh em?

“Ka tlai lo chuan ka hria”

“I lo thleng dik chiah e”

Kan tlan chhuak nghal a, a hna chungchang chu han zawh ka tum deuh na a, a sawi hun ka nghak ta zawk a. Rei vak lo chu sawi tur hre loin kan awm a, pawn lam chu a melh vang vanga, a rilruah eng nge awm ang tih ka lo ngaihtuah daih thung a.

“Ka hna thar chungchang chu ka nu leh pa ka hrilh a, thawk loa haw chho zawk turin min lo beisei deuh a,”a tih chuan ka motor chu ka tiding dawt a.

“Eng maw?”pangngai thei ang berin ka tawng chhuak thung.

“Ka pa tha thei lo lutuk khi ka nu a mangang deuh a, ‘min rawn tawiawm tawh zawk mai la’ a tia, ka hrethiam tawh bik lo,”a tih chuan a kun deuh lap a, ka khawngaih reuh.

A kut chu ka vuan a, nghet zet hian ka chelh a, ka lamah ka her deuh a, a mittui tling chu thup tum viau mah se ka hmu hman tho.

“I nu leh pa thu awih chu a tha alawm, kan duh dan ang ngawt hi a tha ber  a ni bik lova, sum chu I thawk chhuak teuh thei tho anga, mahse, nangmah ngei hi an mamawh chu I nih hmel si a, I hrethiam em ka sawi awmzia chu,”ka ti a, a bu nghat a.

“Tunah kan pahnihin hun hlimawm tak kan hmang chho ve dawn tan chauh a, ka tan hian a hrehawm dawn lutuk tih ka hria, mahse, ka ring tawk che a, chuvang chuan I chhungte thu chu awih zawk la ka duh a, nakinah inneih te an phal loh phah ang,”ka nui deuh tih a hriat chuan min rawn nghawk deuh sawk a.

“He hna hmu tur pawh hian ka bei ve nasa asin le, hlawh pawh a tha ve thawkhat bawk a, engvanga min koh haw kher hi duh nge an nih tih hi ka rilru tibuaitu zawk ania.”a tih chuan ka rilrua awm, ka sawi chhuah ngam loh tak a ni.

“Chutiang engmah a awm lovang, I rilru tihahdam la, an duh ang chu tihlawhtling phawt la,”a langah erawh ka ti thung a.

“Ka huphurh leh nachhan pakhat chu..”

A ngawi ta daih a.

“Eng nge pakhat chu?”tiin ka lo nawr a.

“Nangmah”a rawn ti ta reuh a. A kut chu ka fawp vang vang a, ka huphurhzia hi ka sawi lang ve chiam anih chuan a huphurh telh telh dawn tih ka hre si a, ka rilru ang pawh ka sawi ngam ve si lo.

“Kan inhmu leh vat dawn alawm. I awm lohte chuan I awmna hmun rawn pan deuh reng a ngai dawn a, min lo ning zawk ang tih a hlauhawm,”ka ti a, a rawn nui ve thei ta.

Kan thil ei pawh chu a tui leh tui loh lam ka hre lo, Apuii telloa awm chu ka huphurh lutuka, chu ringawt chu ka rilruah a awma, ka ni deuh nghulh hian ka hria. Ani pawh a hlim vak lo tih ka hria, kan pahnih tan hun tha a rawn inher chhuak a, mahse, kan inthen leh mai a tul dawn si. Hmundangah kal loin a inluah lamah kan let vat a, leng lut tura min sawm chuan ka zui nghal vata , min sawm lo mah se len luh chu ka tum sa reng tho. A inthlak chhungin thingpui ka lo lum a, ka lum so chiah a, room atangin a rawn chhuak ve chiah a. Awmhmun thawmhnaw mai mai a hak pawh hian ka mitah chuan tuma tluk phak a ni lo. T-shirt lian deuh hnek hnawk a ha a, trackpant tight lam pang a pian ti lang nalh zual tak a ha a, a t-shirt a len avangin mit a tikham chuang lo. Thingpui kan inchhung chuan tumah mahin tawng kan tum lova, hmabak hlen tur huphurhawm tak nei ang mai hian kan melh ngai  chu kan melh deuh ngar ngar ni maiin ka hria.

“Ka rilru natna tur engthil mah ti suh ang che,”a tih chuan ka va melh a, a mitmeng fiah kak, zahawm angreng tak chuan min lo melh reng a. A kuta no chu ka lasawn a, side table ah chuan ka dah a.

“I hlimna hi ka duh ber a ni alawm, min ring la, ka thusawi chiah lo awih thin ang che. Midangin eng thu pawh sawi se, ka ka atanga chhuak anih loh chuan lo awih ngawt lo la, ka thu I lo ngaichang thin dawn nia,”ka ti a. Min ngheng chial a, a sam rimtui zet chu ka hip vang vang a.

“Ka lo tum dawn nia, mahse, chanchin min rawn hrilh ve reng ang che,”a ti a.

Min kalsan daih ang tih hlau tak hian nghet fe hian ka kuah tlata, a nui nghawr dat chuan ka thinlung hi a rawn nghawr nghing pha tlat. A hlimna hian min tihlim tih chiang takin ka hre thar bawk. A hmui sen no chel chu ka fawp kham thei lo, ani pawhin min thlahlel ve tih a lantir hreh lova, chu chuan min tiphur viau bawk. A pawi tur chin erawh a inveng thiam hle a, hrehawm miah si loa min melh rum velte chuan amah hi a lan duhawm tir tih a hre miah lo ang.

“Thu tha phawt teh,”a ti deuh hlar a, ka lo nui mai mai thung.

“Ka ngai ngawt ang,”tiin a hmui chu ka tuai a.

“Keimah ai pawhin maw?”a ti hmak a.

“Nangmah zawng zawng nen hian maw le, chuan hei hi chu a special takin ka ngai bawk anga,”ka ti a, a nui a, ka zakah a rawn dek a. Kei lahin ka huat ber a nih avangin ka inlet pawpa, ka vir deuh nawk a, engtin tin emaw ka delh bet a, a kut chu ka man sak a, a nui hawk hawk a. Ka nuih a za ve ta miah lo, theihtawpin inthunun ka tum ngar ngar a, ka awmdan a hrethiam lo lutuk te chuan a thianghlimzia a tilang zel a.

Ka thawhsan thut a, ngawi rengin ka thu ta hle hle a.

“I thinrim mi?”ka hnunga rawn bei chungin a ti a.

Ka tawngchhuak mai thei lo, ka mualpho mai dawn hian ka hria.

“Mawh…”

“Thinrim lo lutuk mah mah,”tiin a hnarah chuan ka piai zeuh a.

“I ngawi hmuk sia, I thinrim emaw ka tia lawm,”a tih chuan hma lamah ka pawt a, a rawn inher ve nghal a.

“I duhawmna hian min ti a lek lek a, chuvang chu alawm,”ka ti a.

“Ka hrethiam che alawm, hrehawm tis uh,”a ti ta reuh a.

“Engmaw I hriatthiam?”ka aw chu ka duh aiin a ri chhuak chang hret.

“Muanhlua khan min tina viau mah se ka duh lo chung chu min nawr lui ngai miah loa, vawi tam tak hunthawl kan nei chung khan a insum ve tang tang thin a, ka duhdan min zah sak avang khan kei lahin ka duh phah zual sawt bawk a,” a tawp daih a, sawi tam a inti deuh pawh a ni maithei.

Kha pa hming kha ka hriat apiangin ka na ngawih ngawih zel mai hi ka inhrethiam lo.

“Lalawm… min ring lo em ni?,”tih ri chuan min tiharh zawk a.

“Ka ring che alawm, ka ring lutuk che,”ka tih chuan ka lo ngawih reizia ka hrechhuak ve chiah.


@Note: Story kal laklawh laia chawlh hi chu a chhiartu tan pawh a tuiawm loh thin tih ka hria, mahse, MP inthlanna lamah ka duty dawn avangin ka chawlh a ngai leh pek dawn a, ka va inthlahrung thin em! Naktuk lamah training in kan kal leh anga, tuk lehah Polling Station lamah kan kal chhuak tawh anga, ni 11 hi inthlan ni a ni leh bawk anga, tunkar chu kartawp lamah bak hunawl ka nei dawn lo niin a lang. Min hrethiam thin a, min lo hrethiam mawlh mawlh mai teh u.