A MEASURE OF FAITH VI

A MEASURE OF FAITH 

PART VI

Apuii hmel chu rei ka melh duh lo, a ban a rawn vai chuan ka lo vai let ve zeuh a. Ka nun chu a ruak nghal rawih rawih hian ka hria. Ka kekawr iptea ka phone ah chu a rawn khur cher cher a, call ka dawng tih hriain ka han phawrh chhuak a, ka pa a lo ni.

“I thiannu chu a rawn haw tawh em? Interview lehzel kha chu ka pawt khawtlai thei dawn lo ania,”a rawn ti nghut a.

“Aw, a rawn haw meka, a rawn nang turah ka ngai,”ka tih chuan a thaw halh ri chu ka hria.

Ka pa hi mi dik, thil dik lo ti duh ngai miah lo a ni a, tunah a fapa ngeiin ka nawr avangin a tih ngai loh thil a tih a ngai dawn, chu chu a fapa a hmangaih em vanga a tihsual awmchhun a nih ka ring. Ka zah a, ka thiltih dan a dik tawk lo tih hre ma hila Apuii tan ka tih a ngai tih ka hre si a. Tui lo zetin ka hnathawhna lam pan chuan ka inkhalh chhuak a, eng thil mah tih chak ka nei lo.

Kan chhungkaw chanchin kimchang hi Apuii kha ka lo hrilh miah loa, kan dinhmun avanga ani khan min ngaina a ni lo tih ka hriat avangin sawi lan ngaiah pawh ka dah lem lo. Kan unau hi pathum kan ni a, kan upa ber hi pasal neiin hmundangah an awm a, Hlutei leh ka pa hi ina awm chu an ni deuh tawh ber. Ka nutei fapa hi a tette atanga kan hnena awm a awm ve a, hna a neih tawh avangin hmundangah a awm ta bawk a, Hlutei zir zawh hnu hi chuan ka pa nen chiah inah hian an awm tawh a ni. Kan naupanlaiin ka nu hian min thihsan tawha, ka pa in nupui dang nei ta miahloin kan unau tan a nun zawng zawng hi a hmang a, hei vang hian kan unau pawh hian kan zahin a thu kan hnial ngai lo.

Department pakhatah Director hna a chelh a, anihna vang hian tumah a en hniam ngai lova, harsa leh tanpui ngaite a enliam ngai hek lo. Amah hian duh nise nupui hmu zo tur khawpin a hmel ringawt pawh hian nula hnahkhat ngat pawh hi a phu ve bawk a, mahse, kan unau tan nuhrawn kan hrawn kha a phal lo bur a, tihian keini kan nawmsak phah ta thung. Kan naupang ber Hlutei hi a naupanlai atangin a zia hi tlemin a dang deuh a, ka pa pawh hian a naupang ber anihna laiah hian keini min enkawl khirh ang khan a lakah hian a khirh ve lo deuhin ka hria. Hei hian amah pawh mize hran deuh a puttir a, ngeiawm viaua awm erawh ka hriat loh kara a lo nei a nih lem loh chuan ka bula han sawi chu an awm lem lo. An office hnaruak ka hriat veleh ka pa be nghalin Apuii tan ka dil chawt a, ka rin ang ngeiin ka pa chuan min lo hnial nasa hle a, a tih ngai loh tawp thil a nih thu leh a tih dawn loh thu min lo hrilh tlang nghal hmiah. Ka beidawng duh lo, ka be nawn leh a, chuti taka a fapa in alaka ka la ngen ngai loh anih vangin min tihhlawhtlinsak loh chu a hreh tih a sawi a, ka khawngaih zawk. Mahse, eng nge ka tih theih awm chuang? Hei hi Apuii tana ka tih theih awmchhun a ni miau si a.

Ka sana chu ka bih leh zauh thin a, Apuii hnen atangin engmah chanchin ka la hre lo. Ka chhut danah chuan an thlen chu a hun tawh viauin ka hria. Ka bungrua ka sengfel a, haw tura ka insiam lai chuan ka phone chu a rawn ri ve ta hrama, Apuii min call na bik ringtone a nih avangin ka nui nghal sak a, hetiang taka ka mood a control hi chu a mak ka ti ve thlawt.

“Hello”

“Hei in ka thleng tawha, ka inbual zo chiah,”a rawn tih chuan a hmel awm dan tur vel ka lo mitthla a.

“I mit i ti zim san zel hi chu I duhawm ngawt mai,”ka tih chuan a rawn khek raih a.

“Min hrechiang bik lutuk, a fair lo,”a han ti ringawt a.

“I thleng tluang chu ka lawm hle mai, ka lo ngaihtuah tawh lutuk chea,”ka ti a.

“Min lo ngaihtuah chu ka lawm lutuk. Enteh maw, a mak lutuk,”eng emaw hi a ri rak rak a, “Eng hna mah ka dil si loa, interview tur kohna ka dawng ringawt maw le, a mak ka ti lutuk a, ka chhungte ka zawh lahin an hre si loa,”a ti a.

“Online-a a I dil zinga mi aniang chu, I hre lo mai mai aniang,”ka tih sak a.

“Mizoram-ah eng hna mah ka dil lo tih chu ka hrechiang khawp a,”a ti zawi sap .

“Pathianin I tana alo ruat a ni maithei asin, I kal anga a chiang mai dawn alawm,”ka ti ta a.

A ngaihna hre lo zeta a han awm vel tur ka ngaihtuah chuan a tirte atanga ka hrilh lo chu ka inthiam lo leh deuh a, mahse, a nih tur ang a ni tawh si. A hriatchhuah hunah a lawm chiamin ka ring lo a, chung zawng zawng huama ti ka ni thung.

APUII *POV*

Ka lehkha dawn chu ka han ennawn leh thin pawhin keimah ngei ka ni si a, a mka tih mai loh chu sawi tur ka hre lo. Ka nu leh pa chuan interview phawt tura min tih avangin hreh angreng tak chungin ka chhuak a, han ngaihbel tur takngial pawh ka hriat loh avangin ka zam zual sauh a. Ka pa dinhmun ka rin aia a lo that loh avang leh kan dawr pawh a lo  tlakbal tawh viau avangin engmah huphurh thei ka ni lo tih erawh ka hrechiang hle a. Interview ve tur mi engemaw zat an lo awm tawha, ka dil pawh ni loa chutianga koh ka nih avang chuan ka hmelhriat an awm mai te chu ka han ring a, ka han hawi  vela, tumah hriat ka nei chuang lo.

Ka interview chu ka chhan that em em pawh ka hre loa, a chhiat pawh ka hre hran chuang lo a. Ka tlin ka ring lo, chuvang chuan ka rilru pawh chu ka pe viau lo bawk. Ka phone a rawn ri a, Awma hming ka hmuh chuan chanchin min lo hrilh rawh a tih kha ka hrechhuak a, engmah pawh ka lo hre tawh lo. Hmanhmawh takin ka han pickup a, chanchin min rawn zawt nghal a, min ngaihtuah thin tih ka hriat hian a bulah chuan ka thla hi a muang hliah hliah zel. Min hnemna ringawt pawh hian min tichak thar leh thin. In ka thlen hnuah ka nau dawr lam chu ka pan leh a, thil kalhmang hriatchian a, kan sumdawnna tih tawp leh tawp loh tura  thutlukna siam tura ka pa min tih angin ka chhuak a ni. Dawr ka thlen chuan ka nau chuan a thil neih ang ang chu min enpui a, ka pa dam that laia kan dinhmun nen kha chuan a lo inthlau tawh hle a lo ni.

“Ka u, risk lak hi ka ngam tawh lo, tuna min betu an awm lai hian tiral mai ila a tha berin ka hria,”ka nau chuan a ti a. A hmel chu ka hmuh chuan ka khawngaih a, a naupanlai atang tawh khan sumdawnna lam khawih a chak ve ngai loh thu a sawi thinte kha ka hrechhuak a, loh theih lovin a koah a tla a, a ti ve mai a ni. A chak zawng tihna hun tha chu pek ka duha, ka pa hnenah tiral mai turin ka ngen ve tawh mai ang chu.

Ka nu leh ka pa nen uluk taka kan sawiho hnuah kan sumdawnna chu tihral kan titlu a, ka pa hmel chu ka theihnghilh tawh lovang. Kha leh chen a lo enkawl tawh kha keini a faten kan chhunzawm sak thei ta lo chu a ni a, a rilru hi a na ang tih ka hria. Chu erawh a thawi pawhin a tilang eih lo thung.

Kan interview result a chhuak tih tlangkam atangin ka hria a, thil tithei tam tak awm lai kara kei min thlan chu ka ring lo a, ka ngaihven lo bawk. Mahse, engati the fo nge, vanneihna hian min rawn umzui zel em ni? Ka tling leh tlat anih chu! Ka chhungten hmela beiseina rawn eng set set hmuh chu a va nuamin a va han hahdamthlak em! Awma nen rei tawk tak kan inbiak hnuah ka hnathawhna hmunah in report turin ka chhuak a, mahni ramchhungah ngei, ka chhungte enkawl theiin hna ka nei a ni a, ka lawmzia hi sawi a fiah chi a ni lo.

 Ka hna thar ka zawmna pawh karkhat a lo ni ve tawh a, mi pahnih min lak rual avangin thawk thar ve tho Makimi nen chuan kan inzui chawt a, kum lamah keiin aiin a u hret a, kan inthurual thei viau zel tho. Thawk thar kan nih avangin training turin min tirchhuak nghal a, kar khat vel zet chu Guwahati lamah training in kan awm nghala, kan inzui nasat vang pawh a ni ang, kan inngaiin kan inthurual em em a, engkimah kan inthu a inhmu em em zel a ni. Awma pawh a hnathawhna lamah a tluang a, chanchin kan inhrilh tawn ve reng a, ngai viau mah ila hun a neih lohzia ka hrechiang a, rawn haw tura hrilh lo turin ka la insum ve tang tang a ni. Ama tum danah chuan rawn haw chhoh vat chu a tum ve reng a, mahse, a theih mai chu ka ring lo zawk.

Kan puten meeting pawimawh tak an koh avangin Makimi nen chuan conference hall lam panin kan kal ve nghal a, thlen dawn tepah ka file pawimawh ka theihnghilh tih ka hrechhuak chauh. Hmanhmawh zetin kan room lamah ka let leh a, ka lak fel hnuah inchung lam pan chuan ka chho nghal a, ka hah lutuk vang chuan pawnah thawk te ka han la leh phawt a, tlaina chi a ni lo tih hriain inchhung lamah chuan ka lut a. Makimi chu ka han zawng nghal a, a bula thutna a lo awl tawh loh avangin a thutna lo lamah chuan ka kal a, thutna awl lo awm ah chuan ka thu ve nghal a. Makimi’n min hmuh chuan a ner sak a, kan thut tlan theih loh hi chuan nuam kan ti tak tak ngai lo. Kan pu a lo dinchhuah rual chiahin ka bula thutna awl la awmah chuan mi pakhat hi a rawn thu ve chiaha, a perfume hman chu ka hai thei ngai lovang. Ka va hawi nghal vat a, ka ring sual lo lutuk chu ka nuih a za zawk. Muanhlua chu a lo hawi ve chiah a, mak ti hmel zeta kan inen chu kan hmuhnawm viauin ka ring.

“Engtin nge hetah kan inhmuh theih?”a aw ah chuan mak a tihzia a thup bik lo.

Ka nui sak a, ka chhang lo.

Meeting chhung zawng chuan ka rilruah hna lam a lang lo, Muanhlua chu vawihnih a dinga, presentation vawikhat a pe tih chu ka hria. Amah ka hmuh tirh khan ka hna dil miah loh min lo dilsaktu a ni ang tih kha ka ngaihtuah hman a, mahse, a hmel ka hmuh rual khan a ni lo tih ka hrechiang lutuk thung. He hna hi tunge min pe, tu tih nge ni ang tih chu ka ngaihtuahnaah a rawn lut tluk tluk a, thildang ka ngaihtuah thei lo. Kan ban hnu chuan Makimi’n min rawn pan vat a, ka hmel a hmuh chuan zawhna a nei leh nghal vata, ani tluka thian min chik peih hi ka la tawng lo. ka tha tih ka hrilh chuan a awih hmel loh hle a, engmah a sawi lang lo thung. Hall bulah chuan Muanhlua chu a lo ding reng a, inhnuai lam pana kal kan tum chuan min ro ko vat a. Makimi chuan min kalsan dawn leh dawn loh a mitmeiin min rawn a, ka lu ka lo thing vat a.

“I dam tha em?”tih pahin min chibai tumin a kut a rawn lek chhuak a.

“Ka dam tha khawp mai,”ka ti a, a kut erawh ka hmu lo der hmak a.

“Ka hmu thut che kha mak ka ti deuh a, Delhi-ah I la awm char char emaw ka tih vang ania,”a ti a, a chawl deuh dat a, “Keipawh ka thawhna a la rei lo, ka thiante kaltlangin hna ruak a awm tih ka hria a, ka dil ve chawta, ka vannei ve anih hi,”a tih zawm a.

“Ka lawmpui lutuk che, kan hmanhmawh sia kan kal phawt mai ang,”tih pahin Makimi chu ka kai a, kan kalpui nghal dawr dawr a.

“Apui, eng nge awmzia? Khapa nen khan in lo inhresa ni maw?”a tih chuan ka lu chu ka bu nghat a.

“Amah kha a ni lawm ni keimahni bika kan pu tur kha, awi a that hlauh chu in lo inhre sa chu,”a tih mawlh mawlh lai chuan kan pu tur tih ka lo hre ve hauh lo tih ka hrechhuak.

“Kan pu tur maw?”ka ti hu a.

“Eng nge meeting lai khan I ngaihtuah a, an sawi kha I hre ve nange?”a ti a, mak tih hmel deuh taka min en chu ka duh lo.

“ka rilruah thildang ka lo ngaihtuah nasa lutuk a, ka lo hre lo alawm,”ka ti ta ringawt a.

Ka mutnaah chuan ka ngaihtuah neuh neuh a, Muanhlua nen office hmunkhatah kan han thawk tlanga, chu mai nilovin keimahni bik min enkawl dawn tih ka hriat chuan ka hna atanga ban vang vang chu ka chak ber. Chutiang ti thei dinhmunah chuan ka ding mawlh bawk si lo. Ani nena inhnimhnaih leh hi ka thil chak loh ber anih avangin hetah a thawk ve ang tih rin ngaihna pawh kha ka hre lo.

*Muanhlua kha kan office-ah khan a lo thawk ve reng a, vawiinah ka hre chiah a*

Whatsapp-ah Awma chu ka thawn ringawt a, tlaia kan inbiak hnuah a online leh miah loh avangin a hnaah a buai a nih ka ring. Muanhlua a thikzia ka hria a, a tilang hreh lo bawk. Tunah a hmuh phak lohna hmunah hna kan thawk tlang dawn a ni a, a ngaihdan a ni lo ang tih ka hlau a, a chhanna ka hmuh hma chuan ka ngaih a tha thei lo.