A MEASURE OF FAITH VII

A MEASURE OF FAITH

PART VII

Awma message ka hmuh chuan ka nui sak a, Muanhlua vang mai mai chuan ka hna hi ka kalsan lovang. Amah hmachhawn a ngaih pawhin ka hmachhawn anga, ka hnaah hian tha taka ka thawh phawt chuan ka hlawhtling thawkhat hlea ni ang.

Ka muhil chu ka harh chiang ngang mai, ka mumangah Muanhlua ka lo hmu hrep lehnghal, ani kha ka mang lama hmuh pawh ka duh lo. Ka sana bunlai chu ka han ena, zing dar 5 chauh a lo la ni. Muthilh lehngial ka tum pawh chuan ka thei tawh lo, ka tho ta nge nge a. Ka hmai vel ka phih zawh chuan choka lamah ka chhuak thla a, ka nu chu dawhkan bawh deuh hian a lo thu a, ka hmuh thut avangin ka phu deuh zawk nghe nghe.

“Nu..”

Ka aw a hriat  veleh chuan a rawn hawi vat a, thingpui ka duh leh duh loh min zawt a, a lo lum diam tawh a lo ni.

“Nu, tinge rilru hahna I nei mi?”amah ngaihtuah zet chuan ka ti a.

“Bawihi, tunlai chu eng engemaw hi ka ngaihtuah a, zan mut hi ka harsat riau zel alawm maw le,”a ti a.

“Ka pa vang hi em ni?”

“Aw, ni tho e. I patea leiba kan rulh vang hian kan neih a ral chu a ni deuh tawh mai bawk si a, I pa hriat vek ka duh loh vang hian I nau nen theih ang ang chuan kan han thup ve a, mahse, hriat loh tak tak chu a theih bik chuang lo a,”a aw a han thian leh phawt a, chutah,”I pa hian rei min dampui hi ka ring lo, hei ber hian min tilungngai a,”a tih chhunzawm a.

“Nu, lungngai mah ta che, theihtawp ka chhuah dawn alawm, nang berin khatiang rilru hnual I put mai te chuan engtin nge ka tih theih ang?”ka ti a.

“Ni e, ka ring tawk che alawm, engpawhnise, I hnaah hian in pute mit tlung takin han thawk la, Pathian zarah kan dinhmun pawh a ziaawm leh mai ang,”a ti a. “I pa in theihtawpa a lo beih thin a sumdawnna han tihral a ngai ber hi  a hrehawm lai ber chu a ni,”a ti a, chu thu sawi chhuah pawh chu harsa a ti tih ka hre mai.

“Ka tiral phal lo, ka theihtawpin humhim ka tum tlat ang. Tunah chuan tihian lo awm ve phawt se, mahse, ka pa ngei hian a enkawl leh dawn alawm, lo lungngai tawh reng reng suh u,”tiin ka han hnem ve ta ringawt a.

Nilengin ka nu thusawi chu ka rilruah a awm reng a, engtinnge kan dawr hi a hma anga ka kalpui leh theih ang tih chu ka rilruah hian a lian ber a, a nihna takah chuan ka huphurhzia chu ka sawi thiam lo zawk. Ka pawisa khawlsa ve lah chu a beitham hle si a, hmalakna liam tham han hmachhawp rup mai chu ka chhungte ka ti beidang thui mai mai ang tih ka hlau!

“Apui, ka room-ah lo phei lawk mai teh,”Muanhlua chuan kan room a rawn luh rualin min rawn ko a, a kalna lamah chuan ka zui ve nghal a.

“Hei hi kan project chhan tur  ania, I kutah ka dah dawn ania. I remhriatnaah a innghat thui viau dawn a, hei hi I inzirnan a tangkai ka ring a, I lo bih ve dawn nia,”lehkhabu chhah zet hi min pe a.

“Ka kal thei tawh mai em?”

Min rawn en zawk a.

“I pa a  tha em?”

Ka nui hul hak a, tun ataka min ngaihtuah awm ang taka a awm vel hi a tul ka ti lo.

“Office thil chiah ngaihtuah rawh, keimah ka ni emaw, ka chhungte pawh nise I ngaihtuah kan ngai lo,”ka ti a, ka chhuak nghal a.

Engvanga hetianga awm tlat hi nge ka nih pawh ka hre lo, ka hnathawhnaah phei chuan kan pu a ni a, a mawi lo tih ka hria. Mahse, eng nge ka tih theih chuan?

A lehkhabu min pek chu nilengin ka bih kual a, ka chau zo vekin ka hria.

“Haw tawh ila,”Makimi chu ka bulah a lo ding reng tawh a.

Sana ka en chuan ban a lo hun der tawh, ka insiam nghal sawk sawk a, kan inzui chhuak ve ta a. Garage-ah ka scooty la chhuak tura ka kal chu Muanhlua leh hmeichhe pakhat hi an rawn inzui hnak hnak a, min hmuh chuan a ding deuh chawt a. A bula hmeichhia erawh chuan min hmu ve lem lo, a tawng mawlh mawlh a, Muanhlua banah chuan a kai a, ka melh sawn nghal a. Motor chhunga an luh veleh chuan hmanhmawh fe hian ka tlanchhuak nghal a, kha nu kha khawiah emaw chuan ka hmu tawh tlat a ni. Ka thin phu deuh dat dat chu ka han dawm a, engvang mahin ka na tur a ni lo. Chu thil ka ngaihtuah rual chuan ka mittui chu a tla ta tho a, mittui hi chak lohna lantirtu a lo nih pawhin chak tak anga ka lan reng hi a ngai kher hleinem.

In ka thlen chuan ka room ka pan nghal a, khumah chuan ka tlu deuh hnawk a, khang thil kha ka hmuh fo tur leh ka la hmuh reng tur a ni tih chu ka inhrilh mawlh mawlh a. Ka phone chu ka phawrh chhuak a, Awma biak ka mamawh lutuk tlat.

“Hello”

Vawihnih vel chiah a ring a, a lo la nghal vat chu ka nuihpui leh var var a, hetiang taka ka tana a awm thin vang hian ani hi ka tan mi tha ber a ni tih ka inhrilh nawn leh ngat a.

“Vawiin I hun hman dan a nuam em?”ka tih chuan a rawn nui hak ri chu ka hria a.

“Nangmah ngaihtuah chung chea hna han thawh chu a hrehawm lem lo. Nang zawk le?”

“Kan inang chiah anih chu. Ka haw tawha, ka ngai thut chea, I laklawh ka ring deuh thoa, ka lo be ta tho bawk che a,”ka ti a.

“Nangmah aia han ngaihpawimawh tur hi engthilmah a awm chuang hleinem. Ka haw hman ve tep tawh e,”a ti a.

“Lo chhuk leh daih ka duh,”

“A nuam I ti vak nange”

“Ti tho e”

Ka rilrua thil awm ka lo sawi chhuak hman chu a tul lo ka ti leh deuh, ka lo sawi hman tawh tho bawk si.

“Ka rawn hmu vat ang che, lo inenkawl tha la aw,”tiin kan inbiakna chu kan titawp ta a.

Muanhlua nena ni tina inhmua, hna han thawk tlang tak tak tur chuan ka lo la inpeih lo pawh a ni maithei. Hei vang hian a mah hi ka la duhin ka la beisei tihna a ni lo. Khatiang khawp khan ka ring tawka, amahah ka lo innghat thuk em em bawk a, ka chhungte pawhin an ring em em a, mihring rilru ngheh lohzia leh engmah hi innghahna tlak anih lohzia tilang chiang bertu a ni ta thung.

Ka nu pangpar rawn vul tan chuan mit a la in tute mai pawhin nalh an ti a, nidanga ka lo enliam mai mai thin heng pangpar hian ka nun a tihahdam a, en reng mai hi ka duh thin. Ka pa chuan a theih ang angin tui chu a pe a, exer lak nan a hman thin avangin chhawk ka tum lem lo. Ka room tukverh chu ka hawng a, ka thlir ta reng a, pa chak tha leh viak tha tak mai thin hetianga a han awm mai hi chu a mak ka ti thin ngawt mai.  Kan naupanlai hunte kha ka mitthlaah a rawn lang a, ka nu hi fate han duat viau thiam lo chi a ni a, ka pa thung erawh chuan ka nu ai hi a awh vek a ni ber. Min atchilh theuh a, kan tuina zawng nia a hriat kha chu kawng kan zawh ve theih nan theihtawp a chhuah thin. Ka patea nikhua loh avangin kan inpui tihral a ni phawt a, chutah keini lehzelin kan tawrh a la ngai zui bawk a, helai hi chu ka ngaihtuahnaah pawh hian awm lo thei se ka duh thin. Ka pi leh pu ro hlutna chang pawh hreloa, mahni nawmna chauh a ngaihtuah vanga ka pa in a tuar hi a fair lo ka ti ngawih ngawih a. A tisualtu ber ka patea lah chuan min rawn pawh ngam tawh loa, ka pa hian ngaihtuah viau mah se keini min hmaizah vangin a tilang ngam tawh lo. Kan chhungkua pawh ka chinfel theih loh laiin ani lehzel ngaihtuah thei ka ni lo, min rawn pan anih erawh chuan ka hnar lo anga, a hranpaa va zawnchhuah erawh ka tum lo bur.

Ka ni tin hun hman dan a pangngaiin a kal a, ka hnathawhnaah harsatna ka tawk lova, Muanhlua nen kan inhmu tam lo chu ka lawm a, kan project khawih tur chungchangah erawh kan inbiak a ngai fo a, harsa ka ti tawh hran lo bawk. Awma nen kan inkar a tha viau a, hun kan neihdan a inan loh fo avangin a chang chuan kan inbe tlem a, chu chuan kan inkar a tichhe chuang lo. Min ngaihpawimawhzia a tilang hreh ngai lo a, min rintawkna hian keimah pawh min tichak thin. Office lama ka khawih zawh hman loh ka hna chu ka hawn a, khawih zawh ngei ka duh vangin ka men rei phah phian bawk. Ka phone a rawn rik chuan ka thil khawih lai chu ka dah ve chiah a, number hlang anih vangin tun ang huna min rawn biak tum chu a pawimawh viau anih ka ring. Ka phone ka lak kan rual chiah chuan kan in bulah motor ri a rawn awm nghal a.

“Lo chhuak lawk teh, inkawtah ka awm,”

Ka phone chu ka melh kawk a.

“Naktukah office-ah pawimawh chu kan sawi dawn nia,”tiin ka dah hmak a.

Tukverh atanga pawn lam lang thei atang chuan ka han hawi chhuak a, Muanhlua chu a motor nghengin a lo la ding reng a, a luhlul dan pawh a la pangngai reng. Ka mu a, ka muhil theiin ka ring chuang lo. Ka tho chhuak ta nge nge a. Kawngkhar ka hawn rikah chuan rang fe hian a rawn hawi chhuak a, min rawn pan a.

“Ka chhungte tihharh ka hlauh vang chauhin ka rawn chhuak, I sawi duh chu sawi la I kal leh nghal dawn nia,”ka ti nghat a.

“Apui, I hnenah hian lo let leh ka duh,”a ti zawi sap a.

Ka nui a, ka nuihzat vanga nui erawh ka ni lo. Engvanga chu thu chu sawi ngam nge anih, khang zawng zawng ka laka a tih hnuah lehnghal, ka thinrim lutuk chu chum pawp pawp ka chak ber.

“I tlai tawhin ka hria,”

“I rilru ka tihnat zawng zawngah khan min ngaidam rawh. Khawngaih takin ka hnenah hian lo kir rawh, I tello chuan engmah ka ni lo,”a ti a, a hmelah chuan tlawm hmel ka hmu ve ta.

“Midang vanga min kalsan tawhtu hnenah hian engtikah mah ka let lovang, sawi nawn leh pawh ka peih lo”

“Ka nghak tho ang che,”

“Tum buai duh suh”

A thaw halh a.

“I danglam dan hi ka duh lo, danglam suh,”min rawn hnaih a, ka tawlh hnung sauh thung a.

“Danglam hmasa chu nangmah hi I ni alawm, I danglam a, ka danglam ve thei tih hi ka lantir dawn chauh,”ka duh aiin ka aw chu a la nem, chu chu ka duh lo.

“In chhungkaw chanchin hi kei tluka hrechiang an awm lo, in dinhmun zawng zawng hi ka hre vek asin. Hetiang renga I pa lungngaihna thlen hi I duh ka ring chiah lo, in thil hloh tawh kha pe kir thei tur cheu ka ni tih I hre dawn nia. I lo inngaihtuah ve mai mai dawn nia,”a ti a. A motor ah chuan a lut a, engmah sawi tur ka hre lo.

A tlan liam chu ka thlir a, amah haw ngawih ngawih lo thei lova min siam avang chuan ka thinrim bawk. A thusawi kha a dik chiah, kan chhungkaw harsatna tawh mek hi ani khan a hrechiang lutuk, tin, min tanpui thei dinhmunah a ding tih chu a sawi kher ngai lo khan ka hre ve bawk. Mahse, ani tanpuina dil kha engtikah mah ka tum lova, ka dil ngai bawk hek lovang.

Kan project thar khawih tur lamah ni tin ka buai a, hah viau thin mah ila ka tuichilh bawk a, nuam ka ti. Inah ka awm tlem hle a, mut nan ka hmang a, a bak chu office lamah ka awm deuh chawt. Makimi nen kan thil khawih a inan loh avangin a hma angin kan inzui tam thei tawh lova, kan hunawlah erawh inhmuh hram kan tum thin. Ka hnathawk ka laklawh deuh avangin midang rualin ka chhuak hman lova, ka hman veleh chuan lunch ei turin ka chhuak ve a, kan room atanga ka chhuak chiah chu HLutei ka hmu hlawl mai, amah chuan min hmu ve lem lovin ka hria. Kan boruak teh tun avang khan han biak pawh chu ka hreh ve tumhrang a, ka enliam ta ringawt a. Canteen ka thlen chuan ka thianteho thil ei zo an rawn chhuak ve chiah a, Makimi erawh chu min nghak turin ka ti a, min thutpui veleh nghal mai a. Kan hna chungchang leh thil dang dang kan sawi kual fe hnuah ka thil ei tur chah pawh a lo thleng a, ei mawlh mawlh pahin Makimi thusawi chu ka lo zawm ve leh zauh thin. Ka ei zawh dawn lamah Hlutei chu a rawn lang ve zat a, a hnungah zuitu an awm ta thung. Ka va enchian chuan Muanhlua bialnu kha a ni tih ka hria, ka hawisawn leh hmain Hlutei chuan min rawn hmu ve ta chiah a, rei erawh min melh lem lo. Kan thutna piah deuhah an thu a, kal chhuah pahin mawi hnaiah tiin ka han be hram a. Ka thiltih tawha ka inchhir pawl tak tur a ni zui nghal bawk.

“I dam maw Hlute?”tia ka zawh chuan min chhan tum hmel a pu lo, a nui tawi tak ringawt a, ka hai chu a ni si lo.

“In inhria em ni?”tia Muanhlua bialnuin a zawh chu chhanna a awm lo anih ka ring, a reh zui nghal hmak.

Pawnah chuan ka ding vang vanga, Hlutei hian engvangin nge min huat tlat tih hi ka hrethiam lo. Makimi chuan min melh deuh zak zak a, min zawh tur a nei tih ka hrethiam mai. Mahse, engmah sawi ka tum lo, ka kal a, min rawn zui nghal dawr dawr a.