A MEASURE OF FAITH VIII

 A MEASURE OF FAITH VIII

PART VIII

Ka ngaihtuah neuh neuh a, Hlutei min en danah hian a u tan ka tha tawk lo a ni ang tih ka ring thiam tawh. Hei hi chu keipawhin ka hre vek a, mahse, hetiang taka a tilang hi ka rilru chu a na ve a ni. Ka phone chu ka hmet mawlh mawlh a, Awma biak ka tuma, mahse, ka betlang thei lo. Zing atangin biak ka tum a, ka hlawhchham tawh kha a ni a, eng thil nge maw a tih engmah min hrilh bawk si loa, ka thin chu a rim tun ringawt. Ka haw tur chu Muanhlua a rawn lut nawlh a, ka bag ka lo ak deuh uai tawh a hmuh chuan min rawn pan a.

“I la haw thei lo ania, kan project chungchangah khan emergency meeting kan nei dawna, Director pawh a rawn kal mek,”a ti a. Ka thutna bula chair awmah chuan a thu zui nghal a.

Ka bag chu ka dah let leh a, engmah ka lo hriat lawk loh vang a ni a, ka lo haw hman lo hlauh chu a tihzia zawk.

Rei vaklo kan nghah hnuah Director pawh a rawn thleng a, conference hall lam pan chuan kan inzui chhuak nghal a. Mi pawimawh tak tak pawh an lo thleng kim tawh, Muanhlua bula thut chu chak lo mah ila thutna remchang ber a nih avangin ka thu ta tho a. Kan thlen chin tawh leh kan hmalakna chi hrang hrang Muanhlua chuan report a pe a, tin, kan Director pawhin Central lama kan hotute hmanhmawh tawhzia chu a rawn sawilang bawk a. Tunkara chinfel a,karthar lamah Delhi lama kalpui a ngaih tur thute chu a sawi tel a. A kal tura mi chi hrang hrang hming lang zingah Muanhlua leh keimah kan tel ve a, a khawihtu berk a nih avangin kei chu kal turin an confirm nghal a. Tin, Muanhlua pawh chu keimahni min viltu anih avangin kan pu chuan a thlang a, Directorate lama mi pakhat a kal tel bawk dawn a ni. Kan pahnih chiah kan nih loh vang chuan ka lawm tawk em em a, ka hriat vak loh mi pawh nise a tha hrim hrim.

Zanah Awma nen kan inbia a, chhun lamah hnathawka a chhuah thute, a phone battery a low thute chu a rawn sawi a. That akin kan inbe chhunzawm a.

“Karleh lamah hna thilah kan rawn kal a ngaih hmel a,”ka ti a.

“Ehe, a va lawmawm dawn ve. Tunen nge in lokal ang?”a tih chuan han sawi mai chu ka hreh deuh tlat.

“Directorate lama mi an tia, ka la hre ve chiah lo a, chuan..”

“Umm..”

“Muanhlua pawh a tel ang,”

Kan ngawi dun ta vang vang a.

“A tha alawm, hna thil anih chuan sawi theih a ni hleinem”a ti ta hram a.

“I hria tiraw, engmah ani nen kan inkarah a awm lo. Tuna kan thawh tlan hnu pawh hian ka tan engmah a nih lohzia chu mi zawng zawngin an hria ang”ka ti ta duah a.

“Ka ring che alawm, ring lo che ila I thawh ka phal nang,”a ti a.

“Hun ka neih dan tur ka hre miah lo a, mahse, hlim taka kan inhmuh ngei ka beisei,”ka tih chuan rawn nui hak hak a. Ka hahdam leh ta huai.

Ka ngaihtuah a, keipawh ni ila ka lawm viau ka ring hran lo. Hna thilah pawh nise thikthu a lo chhe hma a, Awma rilru chu ka hrethiam khawp mai.

AWMA *POV*

Apuii hmuh mawlh chu ka nghakhlel, a rawn kal chhan leh a rawn kalpui chu engpawh nise, amah ka hmuhna tur a nih chuan pawi ka ti lo. Ka tum ang leh beisei angin kei lah chu ka haw thei ta mai si lo, ka lung awi loh chang a tam mai. Ka pa hnenah chanchin chu ka zawt ve reng a, Apuii chu hna thiam tak a nih thu leh project thar khawih tur pawha rin nghal thute min rawn hrilh vea, kalo hlim ve veng veng. Hlutei nen erawh an inmil chiam lo anih karing, an inhmuh pawha a biak loh thu min rawn hrilh thin a, Apuii hian ka nau hi a ngaina vak lo a ni maithei. Chumi chungchang thuah erawh inrawlh ka tum lova, a hunah chuan an inmil ve maiin ka ring.

Apuii te rawn tur ka hriat atang khan ka hnaah theih ang angin ka inhmakhua ve a, hunk a insiam lawk a ni ber. Engtin tak nge hun an neih dan tur la hre lo mah ila a hman huna hmu tura kal chat thei tura ka inbuatsaih a ngai tih ka hria, chutiang tur chuan tan ka lo la ve a ni. An rawn kal thlak ni phei chuan ka phi deuh sek a, ka hnathawhah ka rilru ka pe thei meuh lo. Ka sana ka bih deuh sek a, ka camera meuh pawhin min awi tlei lo deuh chu a ni. Computer hmaah ka thu a, thlalak chi hrang hrang rawn lang tle tuar chu ka thlir liam vel mai mai a, nidang ang bawkin Apuii thlalak ka dahkhawmnaah chuan ka lut leh ta nge nge. Ka hmuh hmasak ber nia a thla ka lak te, a hnu zela ka laksak ho, ka nei tih pawh a la hriat loh ho chu ka bih kual a, hetiang tak hian thlalak hian hlimna min pe thei tih ka lo zir tel hauh lo.

*Airport ah kan awm mek, hotel kan thlen hunah ka lo bia ang che*

Chu message ka hmuh ringawt pawh chuan ka thin chu a phu leh nghal dup dup a, tun atanga reiloteah ka ngaih em em nen kan inhmu tawh dawn. Ka naute hnenah haw hma ka ngaih thu sawiin ka inseng fel a, in lama panin ka inkhalh chhuak ta nghal a. Ka inbual nghal zung zung a, dinner ei pui ka tum rilruk avangin ka ei tur pawh ka order lo. Ka inbual zawh hnu feah ka phone chu a rawn ri ve ta hram a, darkar tam tak a liam hmanin ka hria. An thlenna hotel a rawn sawi lam pan chuan hmanhmawh vak loin ka chhuak a, a indah fela, a inbual zawh fel hman a ngaih dawn avangin ka muangchang lui deuh a, in atanga nghah erawh ka thei tawh chuang lo. Darkar khat vel ka thang hnuah hotel kawtah chuan ka ding ta vang a. Ka phone chu phawrh chhuakin Apuii number chu ka dial nghal a. Vawihnih vel chu a ring quit, a laklawh a nih ka ring tho na a ka han call chhunzawm leh ta tho a. A tawpah chuan mipa hian a rawn pickup a, Muanhlua a nih ka rin vangin ka thin chu a sa nghal phat. Room hrana an thlen ve ngei chu ka ring a, engvangin nge a phone a lo pick up?

“Apuii ka be duh”ka ti ta nghut tho a.

“A inbual zawhah ka rawn biak tir dawn che nia”atih chuan ka dah nghal hmak.

Ka hawi chho vang vang a, a rawn call kha ka nghah kher a ngai lo in ka hria. Hotel ah chuan ka lut chho a, counter-ah chuan Apuii room number ka zawt a, min hrilh phal mai lo. Ka hna avanga ka hmelhriat pakhat zarah min hrilh duh ta hram a, min hrilhna lam pan chuan ka chho hmawk hmawk a. Engin emaw min mawlh a, ka hmanhmawh ve em em ringawt a ni ber mai. Room kawngkhar chu ka han kik dawt dawt a, Apuii chuan inbual zo hlim tih hriat zet hian towel in a lu a tuam a, kawngka chu a rawn hawng a, egmah pawh sawi loin ka lut a, kawngka chu ka kalh nghal hmak a. Ka chetdan chuan a tihamhaih anih karing, sawi mai tur pawh a hre lo.

“Khawnge I phone?”

“Ka bag ah”

Khum lam chu a pan a, a bag chu a zawng nghal a.

“Oh… Muanhlua khai zingah khan a tel aniang, ka hmu miah lo”inthiam loh hmel zet hian a ti a, ka thaw deuh huai thung.

A banah chuan ka kai a, ka awmdan engkim chu la hmu ngai lo ang mai hian a awm a, ka inhrethiam tawh bik lo. Ka lo ngaihtuah danah chuan Muanhlua kha he room chhungah hian a awm ve ka ring a, kha khan ka ngaihtuahna a ti fim thei lo anih kha.

“Ka rawn call chea, ani khan a lo la sia, ka rilru tur chu I hrethiam mai em?”ka tih chuan min rawn kuah deuh chawih a.

“Ka tihpalh aw, ka lo fimkhur loh vang anih kha”a ti sap a.

A hmel chu ka thlir vawng vawng a, a hmui chu ka tuai sak a, ka fawh chak em em kha ka fawp thei ta. Duhtawh zeta min chhan letna te chuan chin tawk min neih tir thei lo. Kan thaw a chham thleng thakin kan infawp a, kan inen a,thaw hak chungin kan innuih var var a.

“Ka kham thei dawn lo anih hi”ka tih chuan ka banah min rawn sik deuh sawk a.

“Dinner eichhuahpui che ka lo tum ve ringawt a, I chau viau em?”ka tih chuan a lu a lo thing vat a.

“Kan hun neih dan tur ka hre bik lo a, zanin hi ka free ber zan a ni maithei asin”a ti a.

“Anih chuan, insiam la, chhuak ang”ka tih chuan min hnial lovin darthlalang hmaah chuan a thu nghal a. A hmai vel a chei lai chuan mit tla lo chauh hian ka lo thlir a, min rawn melha a nui hmel te chu ka hmu ning theiin ka ring lo. Kat hut hnaih sauh sauh a, a hmaia thil hnawih a tum chuan ka lo dang a, min rawn en tuma a rawn hawi chhuak chu ka lo fawp a. A nui ri hak a, engdang mah kan ngaihtuah thei lo.

“Ka insiam zo har lutuk ang,”tiin min han nam sawn deuh a.

A inchei nasat ngai loh avangin hun pawh a hmang rei lem lo. A thawmhnaw a thlak chhungin balcony lamah ka chhuak phei a,  kan dinner eina tura atan an thlenna hmun atanga hla lutuk lo ka ngaihtuah vang vang a.

“Lalawm, ka zo”

Chutianga min ko chu midang nise ka lawm hauhin ka ring lo, ani hi chuan hetiang hian min ko reng se ka duh.

“Ka phone chu kan la lawk dawn mi niang?”tia min rawn chuan ka lo bu nghat a. Muanhlua room lam panin kan inzui a. Kawngkhar chu kan han kik dawna, a rawn inhawnga, Muanhlua chu Apuii phone keng chungin a rawn chhuak ve chiah a. A beisei loh deuha chutia min hmu tel chu mak a ti viauin ka hria.

“I phone rawn pek che ka lo tum a,”Apuii chu a be na a, keimah min melh char char thung.

“aw, rawn lak kan lo tum chiah a. Hei ka thianpa Awmpuia anih hi, dinner kan ei chhuak dawn a”a tih chuan khaw dang hawi lek lo hian min la en ta ngar ngar.

“I rawn let leh vat dawn nia. Zanah kan hna khawih hmasak kha kan tihfel a ngai dawn nia”a ti ta hmuk a.

Apuii banah chuan ka kai a, ka kal pui ta nghal daih a, khatianga thupe taka thil tih kha ka ngaithei lo. Apuii chuan ka vawnna chu paihthlak a tum a, ka vuan nghet sauh thung. Pawn kan chhuah hnu chuan ka thlah a, a kut chu a dawm vang vang a, ka lo hmer na deuh a ni maithei.

“Ka mimal nunah thu neihna neilo mah se hnaah chuan ka pu ania, ka zah ve a ngai alawm”a tih chuan ka rum nghut a. Motor ah chuan ka lut a, ka awm dan hi tun hmaa ka awm thin dan a ni lo. Hetiang taka ka thikthu a chhiat ngai pawh ka hre hek lo. Apuii chu ngawi rengin a rawn lut ve a, tumah tawng kan tum tawh lo. Motor ka tinung a, kan tlan chhuak nghal a. Ka tumdan ka thlak thuta, zanriah tur ka order na thinah order siamin ka ina min pe turin ka ti a, Apuii chuan engmah a sawi lo. Ka in kan thlen chuan ngawi rengin motor atangin a chhuk a, mak ti ang pawhin a awm duh lo. Inchhungah ka lut a, min rawn zui a, tukverh chu pawt hawngin pawn lam chu ka thlir vang vang a. Ka kawnga min rawn kuahna pawh chu hre angin ka awm duh lo.

“I lungawi loh fo dawn ai chuan ka hna atang hian ka bang mai ang. Muanhlua nen hian kan inhmuh fo a la ngai dawn si a,”a tih chuan ka hma ka sial mah mah tih ka hria.

“Chutiang engmah tih a ngai lo”ka ti a.

“A tirah pawh ka hrilh chea, engmah harsatna I nei lo tih chiang takin I sawi si a”a thaw hak a.

“Apui, ka tihpalh aw”ka tih chuan a mittui a rawn baw zawih a.

Ka kut chuan ka hruk sak a, inthiam lohna in khat nghal. Ka awmah a hmai a phum a, a insut faih faih a.

“Hlim taka kan inhmuh theihna tur ka tichhia a, ka tihpalh lutuk”ka ti a, a lungawi thleng chu ka nghak a. A mit chu arawn nuai chat chat a.

“Ka duhthlan theih chu nise ka thlan loh ber tur a ni tih I hria alawm”a ti ta reuh a.

A hmel pawi sawi lo zeta mittui ka luantir avang chuan ka inthiam lo tak zet.

“Ka hria alawm, ka insum thei dawn emaw atia, a hmel ka hmuh chiah khan ka thei ta lo anih kha, ka tihpalh tak zet”ka ti a. Apuii hi midang tan ka phal ngai dawn lo a ni tih ka hrechiang ta hle.

APUII *POV*

Awma’n hotel-ah min dah leh thlap a, ka room ka luh chuan dar 9 alo ri chiah bawk. Ani nen hlim taka zanriah kan kildun thei kha ka lawm a, kan inhmuh dan fuh chiah lo mah se a tawp kan khar dan erawh kha chu duhthusam a ni thung. Min duh ve tak zet nia ka hriatna hian inrintawkna min pe sauh a, a hre kher lo maithei. Ka inthlak fel hnuah ka hnathawh tura Muanhlua dah chu ka khawih leh a, kan pahniha tih tura a tih kha a ni a, va koh vel ka peih loh bakah Awma rilru ka hriatchian vangin awm dun tam loh ka duh.

Zingah ka thawh hmain Muanhlua’n min rawn call a, breakfast ei tura min nghah thu a rawn sawi a, ka lo mu tui ve bawk nen thawh ka lo hai ve deuh a ni. Hmanhmawh takin ka inphih fai sawk sawk a, inhnuai lam pan chuan ka chhuk vat a. Kan thianpa Msa nen an lo awm reng tawh a, thupha te ka han chawi ve deuh luam a.

“Dar 10 ah chhuak thei turin kan inpeih vek dawn nia. Zan lamah programme lo insiam kha a fuh chiah lovang,”Muanhlua chuan a ti a, a aw chu ngaihthlak a nuam fahran lo. “I ti zo em?”tih pah chuan min rawn melh a.

“Umm.. zo tawh e”ka ti tha ve mai a.

“Helai hmunah hian hna vanga kal kan ni a, affairs nei tura kal kan ni lo bawk,”a tih leh chuan ka sa ve deuh phat a, ka insum leh ta zawk.

Ani sawi tur a awm lo, ka hna tha taka ka thawh phawt chuan ka mimal nun thlenga a thunun chu ka phal ngai lovang.