A MEASURE OF FAITH IX

A MEASURE OF FAITH

PART IX

Nilengin meeting pawimawh chhawng thum kan nei tawh a, ka thluak pawh a hman tlak tawh meuh lo. Kan hotu lawk zual nena kan meeting a zo tawh a, keipawh ka che tha ve viauin ka hria. Ka taksa kham them thum chu pawn boruak daiah ka han dinpui vang vanga, ka hun neihin a la zir loh avangin Awma chu be duh viau mah ila ka be ta rih lo.

“Darkar khat hun kan hman leh chuan kan zo thei tawh mai ang,”

Ka hnungah chuan Muanhlua chu a lo ding run a, ka melh zawk a, ka melh zawk a, ka hawisawn leh nghal a.

“I che tha khawp mai, tuna kan project hi kan hlawhtlinpui viau chuan kan pahnih tan kan a tha zual dawn a, i hriat tho chu ka ring a, ka sawi lang mai mai anih chu,”a ti sup a.

“Ka lawm e, ka theihtawp ka chhuah a, kan hlawhtlinpui ngei ka beisei,”ka tih chuan a bu nghat a.

“Apui, sawi hun a ni em ka hre lo a, mahse, Awmpuia kha kalsan rawh. Natna bak engmah i hmu chhuak lo ang,”a ti a.

A mitah chuan ka en a, khap lek lo hian min lo en reng a, ka hawisawn duh lo.

“Engvangin nge ka kalsan ang? Nangmah ang lo takin ani chu a rintlak ang tih ka hria,”ka tih chuan a mit chu a chhing a, a thaw hak a.

“Keimah ang hian tumah hian tina ve lo che sela ka duh reng asin. Ka hnenah i lo let tawh dawn lo anih pawhin ani kher hi chu ni suh se. I nat nawn hi ka phal lo,”meng chuang miah lo hian a ti a.

“Ka na lo ang tih chu ka sawi thei hauh lo a, mahse, amah hi chuan min tina lo ang,”kalsawn tumin ka pen a, rang zet hian ka banah a rawn vuan a.

“I chunga ka thiltih kha min ngaidam thei dawn lo tih ka hria, keimah ngei pawh hi ka inngaidam lovang. Mahse, in kal thui hma hian ani kha thlah rawh, he thu hrilh tur che hian ka beih nasat a ngai asin. Chuvangin a harsat hma hian ti mai rawh,”a hmel chu a tak ngar a, min tihnat tuma sawi a ni lo tih chu kha leh chen kan lo inkawp ve hman avangin a hmel landan ataning ka hai bik lo.

“Enteh, ka ngam a, thutlukna ka siam anih chuan a vuak let pawh ka tawrh ngam a ngai alawm. Khawvela ka rin ber thin mahin min phatsan leh thei alawm le, midang tan phei chuan a harsa lo ngawt ang,”ka ti tawn tawn a. Ka ban a vawnna chu ka phelh a, ka kalsawn nghal a.

Muanhlua thusawi chu a awmzia ka hre lo a, ka rilruah erawh a riak reng thung. Ka phone chu ka phawrh chhuak a, Awma chu biak tumin a number chu ka dial nghal a. A tihdan thin ang takin a lo pickup rang leh viau.

“Min rawn biak hun ka lo nghak deuh tawp, i buai ka ring a,”a tih chuan ka nui sak a.

“Kan zo fel chiah a, hotel ah ka let phei tawh a,”

“Dinner kan ei chhuak dawn mi niang?”

Ka inngaihtuah deuh rauh rauh a.

“Ka chau deuh a, naktuk nileng hun ka nei dawn a, i hmandan a zirin kan inhmu zawk dawn mi?”

“A pawi chuang lo. Ka hmuhna tur che anih phawt chuan ka inhuam thui viau,”a nui ri hak a, ka nui ve suk tho.

A tuka inhmu tur chuan kan inbiakna kan titawp a, kan haw hma ni chiah inhmuhna hun kan neih dawn avangin am taka kan hun la neih chu hman ka duh. Ka inbual zawh chuan ka mu nghal a, ka chau ve deuh bawk nen chumi zan chu tui takin ka muhil ve ta bawrh bawrh a.

Breakfast kan ei zawh chuan ka room lam ka pan a, ka bungraw thenkhat chu ka pack fel a, a tuk maia chhuak tawh tur kan nih avangin a theih ang ang chu lo intihfel ka duh a ni. Ka phone chu a rawn rik chuan rangfe hian ka han ban a, Awma chuan studio lamah hna tlem a neih vanga a kal tawh thu leh ka hman hunah kal ve mai turin min rawn hrilh a, pawi ka ti lem lo. A theih ang ka tihfel zawh hnuah ka chhungte ka be leh a, ka pa pawh hma a sawn ve zelin kan hria a, kan lawm ru ve hle  a, a rilru tih hrisel phawt a tha tia doctor min rawn angin kan phak tawkin kan enkawl nasa ve hle a, a hlawhtling chho ve dawn ni pawhin ka hria. Dar 11 a rik chuan ka insiam peih thlap tawh a, ka kal chhuak ta nghal a. Breakfast kan ei lai bak khan ka thawhpuite pahnih hmel ka hmu tawh loa, mahni buai buaiin kan buai tlang pawh a ni ang.

Awma’n min hmuh chuan hlim hmel takin min lo chhawn a, a hnathawhna hmuna a hmel hmuh hi nuam ka ti zual thin. Mahni hna tui tak leh rim taka an thawk lai hmel hmuh hian keimah hi chakna  min pe thin a, ka tih theih ka rin loh tam tak hi ka tih theih phah hian ka hre thin reng a ni.

“Min lo nghak lawk rawh aw, ka zo ve tep tawh e,”a tih chuan thutna tur min kawhhmuhah chuan ka thu a.

A computer chu kawkin thlalak ho chu en turin min rawn hrilh a, nghah pahin a thlalak dah hrang hrang chu ka lo en a. Folder pakhat chuan ka mit a la bik hle a, a folder hming pawh ‘Queen’ tih ngata a dah vang a ni. Ka hawn chuan ka thlalak hlir a lo awm a, mak ti zet hian ka enkual a, ka nghahna che a rei tawh a tih khan ka lo nui mai mai a, dawt a lo sawi hauh lo. Chutiang taka a buaipui hmeichhia ka ni chu vannei ka inti thar hle bawk. Chutia ngawi renga ka enkual lai chuan ka darah a rawn khawih a, ka lo phu zuk tih a hmuh chuan a nui ri hak a.

“Heng zawng zawng hi engtin nge i neih theih zawk?”ka tih chuan ka bulah a rawn thu a.

“Ka beidawng hman thelh asin. Mahse, a tawpah chuan ka hlawhtlin phah alawm,”nui chung hian  a ti a.

“Hetiang taka buaipui tur hian engmah ka ni si lo a,”ka tih chuan ka kut a rawn vuan a, a hmer vang vang a.

“tunah chuan ka engkim i ni tawh, i telloa nun hmang tur chuan ka ngaihtuah ngam lo zawk,”a ti a.

“Min hrechiang lo mai mai nite hian ka hre thin a,”ka hmui chu a rawn hup vat a.

“Hei bak chu hriat belh pawh ka mamawh lem lo, ka ta chauh ni la, chu chu a tawk reng,”a ti hmak a.

“Ka nihna ang anga min pawm vang hian ka lawm lutuk,”ka ti a, min rawn en pahin a nui suk a.

“Ka in lamah phei ila, nge, hmundanga kal i duh zawk em?”a tih chuan ka ngaihtuah vang vanga, midang min chimbuai tu awm loa kan pahniha awm chu pawi ka ti chiah bik lo.

A in lam panin kan kal chhuak a, kalkawng tluanin ka hna chungchang kan sawi a, min tuipui thiamna leh min sawi phur pui thiam em vangin hnathawk tha berah min inngaihtir hialin ka hria. A kianga awm a hahdam tluk zetin a tawngkam hriat hi a nuam em em reng a, hei hi Awmpuia anihna tichiangtu a ni. Inchhung kan luh dawn chuan Hlutei awmlaia ka kal kha ka hrechhuak zawk a, unau mize inang lo lutuk an nih vangin mak ka la ti tawp thei lo.

“Ka inbual lawk ange aw, i duh duh dan khan lo awm mai rawh,’a ti a.

Khua a lum chhe lutuk lo a, Delhi boruak nawm vanglai tak anih avangin hrehawm ka ti em em lo. Sofa-ah ka mu a, ka phone chu ka bih kual vel mai mai a. Mutchhuakin min rawn zem chiai chiai chu ka hria, thliin min rawn chhem heuh heuh chuan ka harh zawk a, ka mutna bulah Awma chu a thu a, ka harh tih a hriat chuan a then sak a. A inbual chhung reilotea ka lo muhil chu ka inthiam chiah lo.

“Muhil mai mai la, i chau anih kha,”a tih chuan ka tho a.

“Ka muhil rei em?”

“Reilo e, minute 20 vel chauh,”

‘a zia lo e..”ka tih chuan ka bulah a rawn insawn a.

“I muhil lai ka hmuh theih phaha, ka lawm khawp mai,”a tih chuan min fiam tih ka hria, ka han nghawk deuh sak a.

Nilengin movie kan en a, a changin ka muthilhsan a, ka harh apianga ka hmu thei ringawt pawh chuan ka thla a timuang a, hetiang hi ni reng mai se ka duh.

“Apui..”

“Umm”

“I chhungte hian an la ui viau che chu ka ring a, mahse, ka rawn haw chhoh veleh inneih lam hi ngaihtuah ila a tha ka ti,”a thaw halh a, ka hnial ang tih hlau zet hian min melh reng bawk a.

“I hmanhmawh mah mah lo maw?”

Kan inkawp tantirh vel ka ngaihtuahin chutia inneih tum nghal ngawt chu la ni thei chiahin ka hre lo a, tin, ka chhungten an remtih ka la ring chiah lo bawk.

“Muanhlua nen in thawk tlang tih hrereng chung chuan hahdamin ka awm thei lo a ni,”a ti a. Ka chil chu ka lem khawlh a, duhthlan tur dang nei ila ka ti ngawt mai.

“Min ring tawk a, i rin angin ka awm bawk ang ka tih kha, hlauthawng duh suh, let leh ka tum lo”ka tih chuan a thaw deuh huai a.

“Chan che hi ka duh lo”a mitmeng tawrh har zet chuan min en kalh a, ka hawisawn thei bik lo. Chhang tawh loin a hmuiah chuan ka va fawp zeuh a, hetiang taka min chan hlau ngawih ngawihtu ka nei hian ka thinlung hi a hneh tak zet. 

Hotel ah min thlah phei a, a lo tlai deuh tawh avangin a rawn lut kawi ta lo. Room ka thlen dawn chuan Muanhlua chu a room atangin a rawn chhuak chiah a, min hmuh chuan min rawn zui nghal a. Ka inrin hman hmain ka kutah a rawn hmer pawp a, ka room lamah chuan min nam lut rawk rawk a. A chetdan avang chuan hamahaih zet hian ka ding reng a, ka rilru a fim hnuah a chetdan avang chuan ka thinrim lutuk chu a awmah ka chum a.

“Ka thusawi kha zawm I tum miah lo mi?”rum zet hian min melh a.

“I lo buaina tur pakhatmah a awm lo”khumah chuan ka thu a.

“A awm a, ka buai chu a nih hi,”a ti nghat a.

A awm dan chu ka huat zawng tak a ni, kei min phatsanin thinlung na ngawih ngawihin min kalsan a, tunah midang ka tawn veleh ka nuna a rawn inrawlh chu ka duh lo.

“I nunah khan buai la, midang nunah buai tello la a that ka ring,”ka ding a, kawngkhar chu ka kawk va va a, “I chhuak thei ang,”ka ti zat a.

Lungawi lo tih hriat zet hian min melh a, a chhuak ta tho. Inbual tumin ka mamawh tur ka phawrh chhuak a, ka room kawngkhar chu a rawn ri leh dawt a, Muanhlua tho anih ka rin avangin ka ngaihsak duh lo. Ka hminga min rawn ko ri ka hriat chuan Awma zawk a ni tih ka hria, rang zet hian ka va hawng a.

“I phone hi I theihnghilh daih a, inbiak a harsa lutuk ang,”tiin ka phone chu a rawn lek chhuak a, ka theihnghilh tih pawh ka lo la hrechhuak lo. Lut tura ka sawm chuan a rawn lut a. Ka inbual chhung lo awm tura ka tih hnuah inbual turin ka luhsan a, Muanhlua thusawi kha ka rilru kilkhatah hian a riak reng thung. Mahse, mak tak maiin a thusawi kha awih ai chuan amah runluih chakna in ka khat a, a hnena let tum tawh lo mah ila hetianga a laka nghawng ka la nei nia ka hriatna hian a laka tlawm taka ka lo awm tawh kha a chhawk deuhin ka hria.

Bathroom atanga ka chhuah chuan Awma lo muthlu bam chu ka hmu hmasa ber a, a hmel chu a chauh hmel tak zet. Ka thawmhnaw ka hak fel hnuah a mutnaah chuan ka kal a, tihharh hlau zet hian a bulah chuan ka thu a, a hmel dam thlap reng chu ka melh vang vang a. Chutia ka en reng lai chuan a rawn meng thut a, ka hawisan rang kher mai, a nui nghawr dat a, a lamah chuan min pawt hnai a, amah ngheng chialin min pawm a, ka thlakhlelh ang bawk hian min thlahlel ve tih ka hria. Engmah kan sawi lo, kan hmui erawh a rim malh malh hle. Thawk kan lak chhung tih loh chu kan inthlah phal lo a ni ber. Ka suangtuah ngai loh leh ka tum ngai miah loh chu chu zanah ka chungah a thleng a, ka duhthlanna ngeiin ka thianghlimna chu Awma hnenah ka hlan a, lungawi hmel taka min kuah laite chuan rilru hrehawmnain ka khat thung.

“Apui, eng emaw a thleng anih chuan min rawn hrilh vat ang che aw, ka rawn chho nghal vat ang,”a ti a.

Ka lu chu ka bu nghat rignawt a, tawng chhuah chu harsa ka ti.

“Ka ta chauh I ni tih hre reng ang che, reiloteah inneihna tur buaipui tura lo haw vat ka tum dawn nia. Chumi hmaa I lo rai palh anih phei chuan kan sawn hma hlauh dawn a ni mai”a ti dam dap a. A awmah chuan ka hmai ka phum kak a, hrehawm ka tihna chu a nep phah chuang der lo.

“Tunah chuan engmah inchhuanna tur ka nei ve tawh lo”ka tih chuan ka hmui chu a rawn hup vat a.

“Hrehawm lo ti reng reng suh ang che, I tan ka awm reng ang”a ti a.

-------------------------x---------------------------------x---------------------------------------x

Nidang zawng aiin kan hnaah kan rim a, kan project thar chu Central lamin min pawmsak avangin hma kan la chho nghal mawlh mawlh a, hah viau thin mah ila a hlimawm a, a phurawm bawk. Muanhlua pawh kan hotu anihna zawnah ka tan a tha reng a, a hma angin ka nunah rawn inrawlh a tum lo niin ka hre bawk. Awma pawh rawn zin chhuahna hun remchang a nei thei lek lek tawh a, chutiang tur chuan ruahmanna tam tak a siam a, a thawk rim hle bawk. Ka nunah thuk taka a tel ve tlat tawh avangin a nun hman dan engkim hriat vek ka duh thin. Chutiang hunah pawh chuan a dawhthei em em reng a, ka ti mah mah tih chang ka nei ve thin, mahse, engmah a sawisel ngai lo.

Office ban rualin Makimi nen tih tur kan neih avangin MC lamah kan inzui a, mahnia thil lei ka thiam loh thin em vanga sawm ka ni. Kan inzui kual fe hnuah dawr pakhatah hian kan hmu fuh hlauh a, hmun dang en pawh tum tawh chuangloin kan pack fel tir nghal a. Chutia kan nghah lai mek chuan Hlutei leh a thianpa chu dawrah an rawn lut ve chiah a. Min chhang duh leh chuangin ka ring lo a, ka be duh hran lo. Dawr neitu nen chuan innel tih hriat zet hian an titi bawrh a, an tawngkam pakhat chuan ka beng a verh deuh zar lehnghal.

“U Maawma chu khulamah a nghet riau a, an tum hnai tawh viau lo maw?”tia dawr nghaktuin a zawh chuan ka thinphu a lo rang ve tawp ringawt.

“Ka hre bik nang”tih paha Hlutei nui har ri chuan min ti hah.

Thawk ka la hak a, Makimi chuan uluk fe hian min en pek a.

“Khanu kha tunge a? I hmuh apianga I awmdan dik lo ziah hi ka hre reng a nia aw”a ti ta nge nge a.

“Kal phawt ang”ka tih chuan a lu a thing a, “Min hrilh phawt rawh”a ti ve ta tlat a.

Thil awmdan zawng zawng chu ka sawi ta vek a, ka sawi zawh chuan ka thawl hawkin ka hre bawk.

“A u chu a dah sang ve hle a ni maw? A u in a hmangaih phawt che chuan hrehawm ti reng reng suh”tiin min han hnem chhunzawm nghal a.

Zanah chuan ka rin loh deuhin Muanhlua a rawn leng hlawl a, ka chhungte nen an innel sa em avangin a rawn kal pawh inthlahrung ang pawhin a awm lo. Ka pa nen sumdawnna chanchin an sawi tui leh viau a, ka pa tana thu hriat nuam tak tak sawi tur a nei leh teuh a, ka pa pawh a hmel a hlim leh sarh tawh. Kan hloh tawh kan hmuh let leh theih dan tur eng eng emaw a sawi chu ka pa in a lo chhinchhiah leh kiau dawn tih ka hria. Ka nu leh pain min mutsan a, ka nau leng a lo la haw lo bawk nen kan pahnih chauh chuan kan thu ran a, sawi em em tur kan hre lo. Tv ah chuan en bik tur hre loin ka hmet kual chhen a, a nuih rik hak ah chuan ka harh chhuak chiah.

“I nervous apiangin khatiang khan I awm thin,”a ti sup a.

Ka nui ringawt.

“Apui, engvanga khang hunlai khan rilru dang putsan thei che nge ka nih tih hi ka la hre lo. Engtiklai pawha min ngaihtuah reng thin avang khan ngaiah ka lo nei lutuk te pawh a ni mahna, ka inchhir ngawih ngawih hun hi a thlen ring reng chung khan ka ti ta tho a, ka inchhir tih bak hi sawi tur a awm tawh si lo”a ti a.

“Engmah awmzia a awm tawh chuang lo a, hun liam tawh anih angin liam tir tawp ila, a tha ber”ka ti a.

“HLim taka I pasal neih hunk a thlir liam hunah ka beidawnsan chauh ang che”a ti leh a, ka chhang tawh lo.

Ka muhil thei lo chu ka inlet chhen a, tun hnaia ka awm nuam lo leh ka mu thei lo fo chu mak ka ti a, ka hah lutuk a nih te chu ka ring ringawt a. Thil pakhat hriatchhuah ka nei, ka pum chu ka han dawm ringawt a, engtinnge ka theihnghilh theih zawk? Ka period hun ka chhinchhiah thlap thlap thin a, engmah kal sual a awm ngai lo. Ka thaw dep dep a, pasal nei siloa naupai nih chu a rapthlak tur zia ka ngaihtuah a, ka bing deuh mup mupin ka hria.

Makimi bula engkim sawi chu a hun tawhin ka hria, hreh tak chungin thil thleng engkim ka sawi ta vek a, pregnancy test kid min leisak tur chuan ka chah nghal bawk a. Ka duh miah loh thil, ka duh loh theih si loh tawng thei tura ka inbuatsaih a ngai tih erawh ka hrechiang hle thung.

Muanhlua’n min koh avangin a room ah ka lut a, tihfel ngai kan han tifel leh zung zung a, ka nawm sam loh avangin engkim mai chu ka ning vel vek.

“I nuam vaklo em ni?” chik zet hian min melh a.

“Ka nuam vak lo a, ka tha leh mai ang”ka ti a.

“Naktuk lamah kan en fel leh dawn nia, va hahdam rawh”a ti ta hlauh a, ka thaw deuh huai.

Ka thutna ka va thlen chuan ka rin loh deuhin Hlutei chu a lo ding ran a, min hmuh chuan a hawi sawn hmak a, min biak tuma lokal erawh a ang viau lawi si.

“Ka u hi engtin tak nge I lo chhaih buai tih hi ka hre chak ngawt mai”a han ti nghal tawl a.

“I thusawi chu ka hriatthiam theih turin sawi la”ka lo ti a.

“A chhungte ai pawha a ngaihpawimawh zawk chu tuna a hna khu a ni asin, engkim kalsana helai hmuna haw tura I lo ti hi chu a mak ka ti”

A ngaihna hre lo zet hian Hlutei chu ka melh reng ringawt.

“Ka pa hnena engkim kalsana helama awm a duh tih a sawi khan engkim ka hrethiam vek. Tuna I hna kan pek che hi I duhtawk thei mai lovem ni? Ka u hi chu min laksak suh”a ti a, a tawng chu zawi viau mah se ka bengah erawh a ri ring hle thung.

“Ka hna hi maw?”ka aw chu a chhuak chang chang a.

“Aw, I dil pawh ni miah lo I hmuh theih chhan chu ka u in ka pa a rawn ngen nasat em vang a ni. Ka pa hian engkim hria se, a lawm hauh lo ang”a ti leh nghat a.

Chutah zet chuan sawi tur reng reng ka hre tawh lo. Ka hna hi ka thiamna leh ka tlinna vang athawk ni lovin Awma’n min lo sawi sak vang chauh a hmu ka ni. Tin, kan pu ber hi Awma pa a ni bawk. Ka khaw hmuh chu a phe deuh riai a, engmah ka ngaihtuah tak tak thei lo.

“Hello…”

Awma aw ka hriat rual chuan ka mittui chu a tla zawih a.

“Hna min dilsak turin ka ti che em ni? I khawngaih ka dil em ni?”ka mittui chu a tla zung zung a.

“Apui…”

“Mahse, khawngaih loh theih loh dinhmunah kan ding si alawm tiraw? “

A thusawi zawng zawng chu ka thinlungah hian  arawn ri nawn a, mahse, tlawm ka inti a, ka zak em em bawk. An hmuhsit let leh theihna tura thil tha taka lang a lo tih chu ka zahna titamtu mai a ni.

Ka haw chu ka lu nat chhuanlamin ka room ah ka lut tlang a, khumah chuan ka bawk thlawp a, Awma chhungte tan chuan ka itawm dawn lohzia chu ka hria. Engtiklai mah hian a eizawnna kalsan turin ka ti ngai lo, mahse, keimah vang veka chung zawng zawng kalsan tur anga an lo ngai vek chu hrehawm ka ti. Ka bag a ka test kid ah chu ka hrechhuak zawk a, bathroom ah ka tlan luh pui a. Ka en mai ngam lo, thin phu dep depa ka han en chuan pahnih hi fiah lo zetin a lo in thai sen ralh a. Pasal neilai chu ni ila hlim takin chu thil chu ka lek chhuak awm si a, a hun hmaa ka thil tihsual rah chuan tun atangin min tawrhtir nghal der chu a ni si.

Note: Ka regular thei lo hle mai, a inthlahrunawm ka ti. Tihian karleh lam a ni tur ka sawi mai thei lo, rawn complete deuh tawp ka lo tum ang..