A MEASURE OF FAITH-IV

A MEASURE OF FAITH

Part IV

Ka pa natna hmuhchhuah theih a ni mai lo chuan min tihrehawm hle a, amah lah that lam pan tak tak thei si loin a awm a, investigation chi hrang hrang min tih tir hnuah pawh hmasawnna kan la hmu thei chuang lo. Ka sum inkhawl ve sa pawh a phai chak hle a, ka naute pahnih zirlai an la nih ve tho bawk si avangin kan neihsa khawih chet vak ka hreh bawk si, mahni tawkah ka rilru pawh a hah ve viau mai. Damdawiin kan awm chhung leh kan chhuah hnuah pawh Awma chu a tangkai hle a, kawng engkimah min buaipui a ni ber. Ka nu nen an inpawh em em a, mi rilru tha leh tluang tak anih thu ka nu hian a sawi zing ta viau bawk.

Ka hna ka kal ve reng a ngaih bawk si avangin chhun lamah ka nu leh pa chu an in awm chawt a, ka hna pangngai bakah night college-ah part time in ka thawk tel ta bawk a, chau viau thin mah ila ka pa tana ka thawk ve thei chuan chakna min pe thin. Ka nau sawi danin kan sumdawnna kal mek hi awmze neilo tluk a ni tawh a, ka patea leiba ngah lutuk khan min tichhe vek niin a sawi. Hei vang hian ka pa pawh a taksa ai mah chuan a rilru hi a dam lo nia a hriat thu min rawn hrilh tel bawk a, ka pi leh pu sumdawnna chutia han ral tir chu a hreh ve dawn em bawk a ni. Chhungkaw khawsak harsa tak ni lem lo mah ila a chang chuan kan in leh lo chan thut thei turte khan ka lo ngaihtuah vak vak thin a, khang hunlai atang tawh khan ka thinlung hian engemaw tak a lo hre ve pawh a ni hial maithei.

Class ka la zo chu ka chau ve tak zet a, haw mai tura ka insiam lai chuan ka whatsapp message chu a rawn ri ral ral a, Awma a lo ni.

*Kawtah ka lo nghak che*

Ka va chhuah chuan a car bulah a lo ding a, min hmuh chuan a lo nui sak a.

“Min hruai tum hrim hrim nge I nih chhuahna I nei zawk?”ka ti a.

“Ka lo hruai ve hrim hrim dawn che, zan lam hi chu kal tawh lo la ka duh”a ti a.

“A harsa hleinem”ka lo ti awlsam et a.

“Apui, henglai hi hmeichhe tan a him lo ka ti, thlamuangin min awmtir thei lo. Kal tawh lo mai rawh”a ti leh a, ka lo nui mai mai thung.

“I nu pawh ka sawipui ang ka tia, heta I hlawh tello pawh hian I in manage thei tho ang”,a ti han tinawn leh a. Chutah amah vek chuan, “E, taka, I thla ka lak kha ka hralh tawh asin. I account number min pe la”a ti a.

“engvangin maw? I ta tur alawm”ka tih chuan a lu a thing a.

“Ka ta tur chu ni lo e, ka rin phak baka miin an hlut kha mak ka tia, a ropui thlawt. Chu tluka lawmawm ka tan a awm lo”a ti ta daih a.

“Aih, kha chu ka chanpual tur a ni lo”ka tih leh chuan a rum deuh nghut a.

“Min hnial hi engtikah nge I bansan ang le?”

Ka nui ta hak a.

Kan inkawt kan thlen chuan chhuk mai lovin kan thu a, sawi duh nei niawm takin min melh leh zeuh thin.

“Ka pa rawn hmu ve la”tiin ka han sawm a.

“Apui, ka nghah chhuah theih che chu I la ring lo tho em?”

Ka va melh chuan kan hma lam chu a lo melh ngar a.

“Nangmah ka ngaihtuah vang zawk che alawm”ka tih chuan ka kut chu a rawn vuan a, lak sawn pawh ka tum chuang lo.

“Tun maiah chuan min chhan kher ka phut loa, ka beisei lo bawk. Mahse, khapa hnenah khan I let leh ang tih hi ka hlau ber a, chuvangin I hnaiha awm tlat hi ka duh a..”

“Ani hnenah khan let leh tumna ka nei lo”

Ka kut chu a hum nghet sauh a.

“I inpeih hun ka lo nghak ang”a ti ta a.

Engvangin nge nat ka hlauh vang maia min hnaih tumtu apiang ka kal tir kher ang? Mi dawihzep nih ka duh lo, keimah hmasa kha nih leh ka duh, Muanhlua’n amaha innghat lo thei loa min siam tawh avang khan amah kha ka mamawh kher lo. Ka rinchhan theih, ka nghengchhan theih, mi rintlak tluka ka tana tha an awm chuang lo. Hun hi han liam leh deuh se, Awma tana mi tha tak ka nih ve theih pawh ka inring.

“I beiseina tihthlawn ka duh lo, hun reilote min lo nghak la, ka inpeih ve mai ang”ka ti a. Hlim hmel taka min en kha ka thinlungah hian ka vawng tlata, a kiangah hian ka him ang tih ka hrechiang a ni.

Thla khat zet ka pa kan enkawl hnu chuan an haw ve thei dawn ta. Tlem tlemin hma a sawn ve in kan hria a, kan lawm ve hle. Awma’n ka  thlalak a phochhuah tak kha Rs. 20,000 laiin a lo tiral a, a vaiin min hui tir vek lehnghal, inthlahrung hle mah ila ka tan liau liaua a tih anih vanga phochhuak anih thu min hrilh ve tlat thung. Part time hna ka thawh chu a thu awihin ka chawlhsan ve bawk a, pangngai takin inngaihzawn thu sawi lo mah ila kan in care tawn a, kan pahnihah hian kan tlei ve viau mai bawk. Ka zirna chhunzawm ka duh phawt chuan zawm turin min nawr nasa hle a, sum hlawm ngai a awm pawha sawi hreh lo tur leh ka theih huna rul mai tura min tih chang pawh a tam, chu em erawh chu ka duh bik lo. Ka pa in ka tana a lo dah hran ve chu ka nu leh pa remruatna in ka la chhuak a, chu chu ka nau sumdawnna enkawl mek tihchangtlun nan ka hmang a. Ka pa pawh a enkawlna a hautak lo ve telh telh tak avangin ka naute zirna pawh buaina tawk lem loa an zawh theih ka beisei.

“Dear, advertisement site ka lo thawn che, I thawh tur tha deuh, tuna kan hlawh let hnih aia tam hlawh theihna ka hmu, lo check nghal rawh”Daphne chuan a rawn ti a, rang takin a thil min rawn thawn chu ka en nghal a. Ka tling kher lo anih pawhin ka ti ve ngei ngei ang.

Ka hmaa building lian to lurh chu ka en reng a, ka zam ve tak zet. Ka hnathawh mekah khan hlawh tlem mah se pressure a na loa, ka thawh tawk a ni ka ti fo thin a, mahse, hmasawn zel nan erawh a tawk zo lo. Interview tura inlan mi engemawzat karah chuan ka thu ve ran a, vaiho hi an confi na hi ka awt thin. Ka rilru chuan ka tawngtai mawlh mawlh a, ka thawhna tura chung lam khian a lo ruat anih chuan awlsam taka ka tlin ve mai chu ka ring.

Chau zetin thutthlengah chuan ka mu a, ka interview ka tih that loh em avangin ka ngui deuh viau a, mahse, beidawn hi chak lohna a ni tih ka hria a, ka ngaihtuah chhunzawm duh tawh lo. Awma ka rilruah a rawn lang thuta, ka phone chu la chhuakin ka han call nghal a. Ka beisei loh zetin hmeichhiain a rawn pickup nalh!

“Awma ka be thei angem?”ka ti ban charh a.

“a inbual a, a inbual zawhah ka lo biak tir dawn che nia”, lehlam ami chuan a rawn ti a.

Ka phone chu dah mai nachang pawh ka hre lo, tunge a phone pickup tu kha ni ta ang le? Chutah chiah chuan amah chan hlauhna ka nei thiam ve chiah. Minute 5 hnu velah a rawn call back a, ka lo chhang tha duh lo vel!

“Titau kan va ang ve”tiin a rawn nui kur kur a.

“Ti taua ti tau lo turin engmah ka ni hleinem”ka tih chuan a nui ta hawk hawk a.

“I duhawm thin em mai. Kartawp chawlh chu ka studio-ah min rawn pui ta che. Model nalh deuh deuh an rawn kal dawn nia”a ti a. A hnathawhna hmun hi ka ning thei lo, tui tak leh rilru zawng zawng pea a tuina ber a thawk lai hmuh hi chuan eng hna pawh ani ang hian thawk ila kan hlawhtling ang tih hi ka rilruah a lo lang thin.

“Ka chak zawng tak a ni alawm”ka han ti ve a, hmeichhia a phone pickup tu kha zawh ka duh viau na, ka zawt ta lo.

Kan inhmu vat dawn nia tiin kan inbiakna chu kan titawp ta a. Engtik lai emaw atang khan ka thinlung hi a luah a, amah ka lo ngaihtuah veng veng thin tihte chu ka han ngaihtuah let a. Min ngaihsaka min ngaihventu hi kan tan an lo hlutzia ka hre tawh bawk. Muanhlua kha ka theihna zawng zawngin ka hmangaih a, ka ngaihsakna kha a dawng nasa a, khatiang khan tumah hi ka ngaihsak leh thiam pawh ka ring lo. Ani khan min hmangaihve em ka hrelo, min ngaihsak ve thin bawk mah se ka ngaihsakna kha a nasat zawk avangin ngaiah a lo nei pawh a ni thin anga, keimah ngeiin ngaihsak tak taktu ka tawn hnu hian a lo hlutzia ka hre ve ta a nih hi!

Kartawp lo thleng tur chu ka urlawk nasat vang nge, a lo thleng har ka ti hle a. Kan hna ve vea kam buai avangin kan inhmu khat bawk nen, ka ngai a ni tih hi ka pha thei bik lo.

“Tunlai chu vei lian deuh nei I ang”Daphne chuan a ti a, min chiktu tan chuan hriat a har ka ring lo.

“Dear, Awma hi mi tha tak chu a ni”thu khuh deuh tak chuan ka ti a.

“Mi tha tak a ni tih chu ka hmuh hmasak ber atang khan ka hre tawh. A duh che tih pawh ka hre vek ania, nangmah hi I inhawn phawt chuan in inkar chu a fel mai ka ring a”a ti a.

“Ka tawrh nawn leh hi ka hlau em a ni”ka tih chuan, “Huaisen takin hmachhawn zawk la”tiin min lo fuih a.

“Ka hre lo le, a chang chuan Muanhlua hi lo let leh tur ang tlat hian ka suangtuah thin. Inchhirin lo kir ta se, engtin nge ka awm ang le? Ka kir chu ka ring tawh miah loa, mahse, ka chunga a thiltih hi a chungah a let hi ka ring thin a, thleng lo se ka duh. A chhan chu ka lo pawm tawh dawn lo , na takin a aw manga, kei ang hian a vannei ve dawn hauh si lo”ka ti a.

“Kan hmangaih tak takte lakah hi chuan kan rilru hi a nghet thin asin. Ani khan a chan che hi pawi a la ti dawn chauh a ni. Tunlai khawvelah nang anga rilru nghet leh rinawm hi an vang tawh asin”a lo ti ve nghal zat a.

Ka rilru tak tak a ni ka sawichhuah, midang laka rilru pek zung zung hi harsa ka tih ber a ni miau a. Chuvang erawh chuan ka rilru hi a nem tihna a ni lo, ka hmangaihna avang khan na ve lo se tih ka duhsak mai chauh a ni.

A tawp atawpah chuan ka nghahhlel kartawp chawlh pawh kan thleng ta, Awma nen kan lo intiam tawh ang khan nilengin a studio lamah hun kan hmang anga, dinner kan eichhuak bawk ang. A hun tiamah tak a nau chhawrin min rawn lam a, ani erawh chu a hnathawh laklawh laiin a kal chhuak thei lo. Ka va thlen pawh chuan camera a lo siai leh vang vang tawh. Gallery lama phochhuah tur ramhnuai thlalak chi hrang hrang a siam chu ka lo en lawr dan dan a, a changin model kawr haktirtuah ka lo tang bawk a! nilengin chutiang chuan a kiangah hun ka hmanga, nuam ti taka a chetla vel ka hmu thei ngawt pawh chuan kartawp chawlh nawmna min tem tir niin ka ngai. Dar 5 ah chiah a zo fel a, kan dinner eina tur ka zawh chuan min hrilh duh lo. A naute bulah chinfel tur a hrilh a, kan chhuahsan zui nghal a. Motor-a minute 25 vel kan tlan hnuah kan kalna tur chu ka rin hriat deuh, a chenna hmuna min hruai a tum chiang.

“I in lamah maw?”ka ti hu a.

“Umm… surprise tur che ka nei a”

Ka thin chu a phu nghal dup dup a.

“Eng nge?”mahni inringtawk lo zet hian ka zawt a.

“Ka hrilh che chuan surprise a ni nang”a nui tak ang vur vur a.

Reilote kan tlan leh chuan kan thleng ta. Ka awmdan chu a nuam thei lo, ka duh loh deuh thil thleng tur a awm niin ka hria. Motor atanga ka chhuak pawh chua ka kut ka hmu deuh run a, ka rilru hrethiam miah lo hian min kuah a, inchhung lam chu kan pan a. Doorbell a hmet a, second hnih hnuah a rawn inhawng a, chutah chiah chuan ka hlauhthawn thil chu ka hrechhuak, kha hmeichhia, Awma call lo pickup tu ni ngei tur chu kawngkhar bulah chuan a lo ding nghal a, ka ke pen a tawp chat a, ka kawchhung hi a rawn so nghal a, ka ngaihtuahna hi thleng dik lo hram rawh se.