A RÛK TE IN...

A RÛK TE IN



“Lalrinthar, kan nghak che nia” tia min rawn au tu chu Lalrindiki a ni chiang lutuk.

“Ka rawn um ang cheu”tih pahin ka lukhum chu ka han ban nghal a, bathroom-ah ka han kawi leh zawk a, hmanhmawh fe hian ka tlan chhuak a. Pawnah chuan amahin a lo la ding a, midang hmuh tuma ka han thlek chuan a lo nui hak a, “Tlangval ve si insiam rei thei e, tuman an nghak peih lo che”a lo ti hmuk a. Ka bike chu lakchhuak pah chuan ka va nuih a, a lo tum hmak thung, ka tuan muang lutuk hi chu hauh ka tawrh phah reng mai chu a nih hi.

“Min lo nghah peih bik pawh ka ring hleinem”ka ti liam puat a.

“Nia, keipawh ka lo nghak che a ka inchhir”a tih chuan a nui nghawr dat a. Tunhnaiah hian kan inzui nasa a, kan inpawh zual tih chu ka hre reng. Kan hnatlanna tur hmun kan thlen chuan kan thianteho chuan hna an lo tan mawlh mawlh tawh a, keinipawh tawi khawmuang tawh lovin kan tan ve nghal a. A khat tawkin Adiki chu kan veng thenawma a bialpa chu an chhaih a, an ri leh deuh hak zel a. A bialpa hi college lecturer a ni a, tlangval fel tak a ni tih ka hria, Adiki hian a phu hlein ka hre bawk. A nungchang leh mizia ka hrechiang ve tawk bawk a, a neitu hi chu an vannei viauin ka ring. Chhun chawlh laiin a bulah ka va thu a, phone a lo hmang mek a, nin hmel zeta ka lo melh thin avang chuan an inbiakna chu a titawp ta nge nge a.

“I mak ve e”a han ti teh ngawt a, ka lo then suk a. Min ngaihpawimawhna a tihlan thin vang hian a bula awm a nuam a, a ngainatawm. Chu chu keima ngaihdan chauh a ni lova, thiante zawng zawngin an sawi dan a ni. “I bialnu nen in inbiakin ka tibuai ngai miah si lo che a”zawi sap hian a ti a. “Keichu min tihbuai ngaiin ka be ve ngai hleinem”ka tih chuan min melh ram ram a, hmuhnawm ti zet hian a meng thip lam lek lek chu ka lo en a, tunhnaia ka awmdan hi ka duh lo. Engtin emaw tak hian a bulah hian ka mizia hi a dang hret hretin ka hria, ho teteah ka thin a rim a, a hmaa ka lo enliam mai mai kha enliam a harsa tan a, inven dan tur erawh ka hre hlawl lo.

Zanah chuan ka han ngaihtuah vang vang a, tunhnai mai tak tak chauh a la ni, Adiki hi thian ang mai chuan ka en tawh lo tih chu ka inhrethiam tan a, a hnaiha awm tam loh hi ka mamawh ber a ni rih, tichuan ka pangngai leh vatin ka ring.

Inkhawm zan anih lem loh avangin leng turin ka insiam a, khawkhatah ngaihzawng ka neih loh avangin ka zalen angreng viau a, chutihrualin Sawmi aia midang thlan ka la nei ngai lo. Mipaah chuan a rinawm ber pawl ka ni ang ka ti ve hial thin a, ani pawh a ngaih a tha tih ka hria. Kan tum anga kan awm theih chuan kum thar lamah inneih kan tum nghe nghe. Aizawla lehkha zira ka awmlaia ka duh ber ka thlanchhuah ve ngat a ni a, kum 6 zet kan inkawp tawh. A karlaka han intihtauh leh intihthiam loh chang hi chu a awm ve lo thei lova, mahse rei tak a ni ngai lo thung. Chutianga rinawm taka hun rei tak ka awm hnuah Adiki a rawn lang a, Malsawmi chauh tia ka lo ngaihtuah thinna kha a rawn sawi nghing a, engtin nge ni zel ta ang?

*tunlai chu induh tur kan ti a ni maw?*

Ka whatsapp message dawn chu ka han chhiar a, Adiki hnen atangin a ni. Karkhat dawn kan inhmu tawh lo a, kan hna lama kan buai deuh avangin ka inkhawm hman lo ve bawk nen kan inhmu ngai lo ve bawk a. Ka hnaa ka kal dawn lahin an in kawng lo lam hlirah ka kal a, ka rilru a pangngai hma chuan hmuh fo loh kha ka tum ve reng a ni.

*nia, hna lamah kan buai vanglai a nia, ka chhuak thei meuh lo a* tiin ka han chhang ve a.

*anih chu, sunday ah chuan kan inhmu ve tawh ang chu. I dam lo nge mawni ka ti mai mai* a rawn tih leh chuan han chhan let viau ka tum leh hmanhmawh a, ka insum thei ta hram. Ho lam takin ka chhang a, karkhat chhung ka hnaih lo thei a, a bak zawng pawh ka thei tur a ni.
---------x-------------x----------

Training turin Aizawl lamah ka kal thei hlauh a, Sawmi pawh a lo dam tha a, ka hunawl neih zawng zawng a bulah ka hmang a, ka rilru pawh a pangngai viau chuan ka hria. A chhungte nen pawh inpawh tlang takin kan inkawm a, innei mai turah anni pawh hian min ngai nghet hmiah tawh a, min makpa chei deuh ruih tawh a, keipawh an lakah ka inthlahrung lo. Hna a neih ve tho avangin kan awmdan tur chu kan ngaihtuah ve nasa thin khawp mai. Kan innei anih chuan ka hnena awm zel turin ka duh a, a hna hi nghet lo mah se harsa taka a hmuh ve anih avangin han ban deuh tawp chu a hreh ve tih ka hria. Ka thu erawh a hnial hauh lo ang tih ka hrechiang a, hei hi Malsawmi miziaa ka duh ber chu a ni. Kum rei tak kan inzui tawh chhung hian ka thu a hnial chiam te hi ka hre ngai lo, ka ngaihdan tha tawk lo lai erawh min hrilh hreh ngai lo. 'Khuanu samsuih' in ni ang kan thianten an tih fiam thin pawhin ka ringhlel ngai hauh lo. Tin, Kristian chhungkaw din hi a thupui ber a ni a, rei tak inkawpin inzui tawh mah ila sex lamah kan fihlim a, lo inthen palh pawh ni ila tun tan mah hian a hlutna a la tlahniam lo. Hemi ni tura a insum theihnate, min control na te hi sawi duah ngai lo mah ila hei hi amah ka ngaihsanna leh a tha lama min hnuh kal tantirhna a ni. Mi sual tia sawi ni ngai lo mah ila ka zirlai piah lam thil hi ka ngaihsak lova, sunday a ka inkhawm ve tih loh chu Sawmi te ina ka len kha ka chhuah ve chhun chu a ni mai. Mahse, min kaihruai hneh em em a, Kohhran leh KTP min belhpui tlat a, chu chu vawiin thlengin ka chhawm ta zel chu a nih hi.

"Rin.. I phone a ri char char a nia" Sawmi chuan a ti a. Ka thiante leh midang zawng zawngin RT tia min koh laiin ani hi chuan tihian min ko tlat thung. Ka ipteah ka ak emaw tiin ka han indap a,"Hei ka thutna bulah hian,"tiin a kawk a. Ka han en chuan Adiki a lo ni a, thil pawimawh feah lo chuan min call lo ang tih ka chiang, ka pickup vat a. Ka rin ang ngeiin a pa damdawi tur kan khaw lama lei tur awm lo chu min rawn chah a lo ni. Chik taka min lo en rengtu chuan thil awmzia min lo zawt vat a, ka sawi ve mai a.

"Rin, hmeichhia hi chu kawm tam lo la ka ti. Ka ringhlel che tihna ni lovin distance kan ni bawk sia, inhmuh tama inkawm tam hi chuan inngainatte hi a awl a, tum lawk vang pawh ni miah lo hian ka chan ang che tih hi ka hlau a ni" a tih chuan min deng deuh dawt a. Ka hun tawn mek hi a hre leh thlap tawh ni mai te hian ka hria a, chu em erawh a nih ka ring lo leh deuh.

"Inneih hial kan sawi tawh a, midang tih  vel kha chu thil awmang lo lutuk a ni" tiin ka han  hnem a, ngaih la zet hian min han nuih var var a.

Cham reng theih ni hek lo, kan khaw lama ka haw a lo hun leh reng tawh. Ka thlen zan chuan motor ka chuang fuh lo deuh nen ka mu deuh tawp a, Adiki te damdawi ka hawn pawh ka dah phei peih ngang lo. An mamawh tawh bawk a, a nauin a rawn lam a, an ina kal a ngai lo chu ka lawm zawk. Ka lo mu tui hle a ni ang, chaweikham veleh a ka mu chu zanlai pelh hretah ka harh hlawl a. Han muthilh leh nghal mai ka tum a, ka thei ta tlat lo. Ka phone chu ka han en kual vel mai mai a, mut tihchhuah nan fb ah te ka han lut a. Adiki thianten thlalak an tagged chu a lo lang nghal a, a  bialpa Sangzuala ka hmuh tel chuan engtin emaw tak hian ka awm zawk a. Rei en lovin ka phone chu ka dah ta daih a, hetianga amaha feelings neih hi ka duh lo ngawih ngawih tawp a ni ber mai.

Sunday chawhma inkhawm ban veleh ka haw tlang nghal a, nidang ang chu nise Adiki te inah thingpui kan in anga, chawhnu kan inkhawm leh ang. Mahse pumpelh ka tum hram hram a, ka duh loh dana thil a kal hi ka hlau ber. Malsawmi chân ka duh lova, he ka rilru puthmang hi tih reh dan ka zawn a ngai mai a ni. Ka phone a rawn rik chuan rang fe hian ka han ban lawi a, mahse ka beisei lo zawk ka thiante an ni. Ka nawmsam loh chhuanlamin inah ka haw tih ka sawi a, an awih leh awih loh lam ka ngaihtuah lo. Mak tak maiin zan thlengin Adiki chu a reh a, nidangah chuan fiamthu ho deuh deuhin min rawn kap leh anga, ka lunglen vangah te a rawn puh leh ngei ang. Biak in atanga a haw tur ka hmu deuh zuai a, chu chauh chu ka hmuh chhun a ni, ka haw lamah an in chu ka han thlek vak ringawt a, kawng hnuai lamah ka peng ta a. Mahni leh mahni inhneh hi thil harsa a lo va ni tehlul em!

Kan hna lamah kan buai chho ve nak nak a, kan district chhunga khaw hrang hrangah training pein ka zin kual reng a, ka chau ve thin hle. Ka thinlungah Adiki pawh ka vei run tawh lem lova, chu ringawt pawh chu a hahdamthlak ka ti. Awmze nei miah loa rilru tih hah hi a hrehawm, a tawng tawh chuan an hrethiam ang. Karkhat chhung chutianga hun ka hman hnuah mahni inlum ka lut leh ta a, ka thianteho pawh ka haw tih hriain an rawn kim thap a. Ka inbual zo ka room a ka lut chu an titi chuan ka beng a verh deuh zak a.

"Adiki hian a la duh lo deuh an ti zawk alawm" Zomuana'n a tih chuan ka va melh a.

"Sangzuala nen hi chuan an inhmeh ve hrim hrim. Innei ngat se an inchhir lo ve ve ang" Dina chuan a lo ti bawk a. An thusawi chu ka hre mai.

"Inneih an tum deuh em ni?" Tiin ngaihsam hmel fe hian ka han ti a.

"Sangzuala hi chuan inneih a duh tawh a, Adiki hian a la duh lo deuh niawm tak a ni. A awm ve tho mai nula upa pawh an la ni bik lo a"Zomuana chuan a lo ti leh a.

Ka inthlak zawh chuan thiantehoin len an rawt avangin hah pawh sawi thei lovin ka zui chhuak ta nge nge. Kan kalna tur lam chu ka rin hriat theih nghal mai, Adiki te in lam kan pan mek. Ka thiante hian an lo ngaizawng ru ve deuh emaw ni zawk, tunhnaiah hian a chanchin an sawi tamin an inah an chuangkai zing tlat. An kawta bike ding chu ka melh nghal chat a, luh ka duh leh lo.

"Beki dawrah sawn ka lo va leng ang, min rawn sawm kawi ula" tiin an mi chhan hmain ka kal nghal daih a. Dina'n ka deuh hauin min en ang tih ka hre mai, ka nui deuh suk a.

Beki dawrah chuan ka thu ta reng a, kuhva ka kheh pui a, ka thiante chu ka rin aiin an rei daih lehnghal. Dar 10 velah an rawn ri chhuak nawk nawk a, Sangzuala'n hma a hruai a, Adiki chuan veranda thleng a thlah a , ka thiante nen an infiam chu ka va hmu phak rei ruai a, ka awmna lam pana an rawn phei mek lai chuan ka kuhva kheh chu ka lo inkhung tha mek a.

"Adiki chu pasal a nei tha dawn ngawt mai"Beki chuan a ti a.

"Ni e, an inhmeh a, an inawm khawp mai" ka lo ti ve a.

"Nangmah nen hian lo intawng hmasa ula, in inhmeh viau ang" nui chung hian a ti a, a fiamthu  a ni na vang vang a, ka lo nui ru ver ver thung.

---------x---------------x-------------

KTP sport kan neih dawn avangin group tinte kan inbuatsaih chho ve nawk nawk a, keini lam pawh Adiki te inah kan committee a, hei hi ka zin ka haw leh hnuah pangngai taka kan inhmuh leh hmasak berna a ni. Ka thutna ep chiahah a thu a, min hmu lo der lui ve ngat! Ka nui suk a, a nu te reuh sia, a duh lohnaah a nasa tih ka hre ve reng. Darkar 1 chuang zet kan committee hnuah kan zo ve ta hram a, haw nghal chu ka tum lem lo. Thianteho an chhuah vek hnuah ka la awm a, thingpui inna no vel chu asil ri rak rak a. Sitting room-a a rawn let lehchuan ka lo la thu chu min rawn hmu a.

"I haw ve nghal maw ka tia" a ti sap a.

"Thingpui hang ka la in chak deuh a"ka tih chuan a hmui a tipawrh nghal tan a.

"I duh huna i kawm a i kawm loh tur ka ni hran lo"a ti hmak a.

"Chutiang a nih pawh ka hre hleinem. Va lum rawh le, i nulat kha"ka tih chuan a phone a khawih mial mial a. "Keiman ka va lum mai ang"tih pahin ka tho a, ka kal chu min rawn zui leh ang lawi a.

"Tinge min avoid char char?"

"Rindik..."

Ka mitah min en kal a.

"I zin i lo haw leh atangin, hei thiante chunga awmdan tur a ni mi?"

Ka chil ka lem kalh a, ka rilru puthmang hi hria se, thian ti hian min la sawi duh ang em?

"Ka buaizia te chu i hre ve lo mi, ka zin kual char char a" ka han ti a.

"Hmm.. Ka ngaidam hram mai ang che"tiin a nui leh thei ta a. Ka thaw hawk a, ka hmaa tla ang chu ka paltlang vek tur a ni, engvang maha tlanchhiatsan ka tum tawh lo. A tawpna chu engpawhnise, huaisen taka hmachhawn mai chu ka tum.

Ka mutnaah te chuan ka ngaihtuah neuh neuh a, aniin thian anga min en laia ka en ve thei ta tlat lo chu ka inhau leh mawlh mawlh thin. Kan inkawma kan innelnaa pawh a la rei lo chung hian min ring tawk ve a, Sangzuala nen an chanchin pawh min hrilh ve nasa thin. Chutih lai kara a chunga hetiang rilru lo neih chu a lawm dawn hian ka hre lo lutuk a, ka inhua!

Sport kan tan tawha, Adiki nen kan inzui char char a, tihngaihna vak awm hek lo le. Dina leh Zomuana an tel ve reng bawk a, kan inhnuk kawi diah diah hlawm reng a. Kan sport zawh zanah chuan tlai tawh viau mah se Adiki te inah kan inzui lut leh tham tham a. Wai wai te kan han bawl leh rih a, Adiki'n thingpui a chhuan lai chuan dawhkana a phone dah ah chuan whatsapp message a rawn thleng a. Ka tum lawk pawh ni miah lo hian ka han melh a, a screen a Sangzuala message rawn lang chu ka va hmu chiang hle a.

*RTA nen hian ka duh aiin in inzui hnem, ka mit hi a kham ve deuh ania*

Chu thu ka chhiar chu ka inthiam lo hle chungin ka lo hnawksak thei hle dawn tih chu ka hre ve mai, mipa leh mipa chuan kan rilru kan inhmuhsak theihna tam tak a awm a, ka tilang lo viau emaw ka tihlai hian a lo hrethiam viau a nih ka ring. Ka haw hnuah Adiki chu message ka thawn a, kan inkawm hi a rem lohna a awm em tih ka zawt a, thian kan ni a, a rem lohna a awm loh thu min rawn hrilh.

*Sangzuala pawi sawi chu ka duh miah lo a nia* ka han ti hram a, a reh vang vang hnuah min rawn chhang a.

*inneih hnuah a thute chu kan la awih dawn chauh alawm* smiley a tlar deuh tuar a.

Inneih a sawi rik rualin ka thin hi a rawn thip leh veng veng tawh, ka ning.🤦‍♂

----x------------x----------

An chhungte damloh chungchangah Sawmi pawh a nu nen an rawn zin a, damdawiin lamah ka lang ve deuh zut a, ka hunawl hlekah chuan kan inawm chilh viau. Sunday tlai a ni a, ka chhungten Sawmi chu chaweiah an sawm a, a chawhmeh duh ang chi kan siam kim hle nghe nghe. Chawhnu inkhawm lovin phaiah ka lenpui a, nuam a ti leh viau. Thlate kan laa, kan hlim dun hle a, a kiangah hi chuan keipawh ka hlim a, a nun mawi tak avang hian ka bei ve deuh thlawp a ni ber. Khawhmuna kan awm lohna hian ka khawhar rukna hi a ni lo zawngin a her tir mai mai niin ka hria a, Adiki lam pawh ka hrechang mang lo. Ina kan haw hnu chuan salad kan zai a, ka chhungte nen la inhmu tam lo mah se   Aizawla ka awm laiin ka inluaha an rawn thlen ve reng thin avangin chutiang nikhuaah chuan ka inhmuhtir ve thin a, an innel ve viau hlawm. Doorbell ri chu ka lo chhawn vat a, ka rin loh deuhin Adiki a rawn lang heu a. Dawhkana ka thil chan pui Sawmi a hmuh chuan a ennawn lehngat a, chutah keimah min rawn en leha, khatih lai taka a mitmeng kha, a mitmeng mawlh kha... Keimahah hian feelings eng emaw tak a neive a ni tih ka ring nghet nghal hmiah! Kristian Thalai chanchinbu chu a rawn dah a, biak hman miah loh hian a chhuak leh nghal daih. Va umzui chi a ni miah si lo a, ka hlimna boruak a tichhe chiang viau bawk.

Sawmi te haw hnuah karkhat a liam leh tawh a, Adiki ka la hmuh miah lo. A inkhawm ngai lova, an dawr bula ka tlan pawhin ka hmu chuang lo. Han biak lah chu ka hreh laklawh vek tawh a, status a nei ngai bawk si lo, engtin emaw tak hian ka awm a, ka rilru a nuam thei lo. Thawhtan zan ka inkhawm bang Dina te inah ka kawi a, sport naa kan thlalak thenkhat kan inthawn a. Dina phone chu kengin ka inthawn mek a, whatsapp a kan thianho group a rawn nawite chu keiman ka lo chhan sak zawk zawk a.  Ka hmeh sual zarah status rawn update ho chu ka lo view kual pah bawk a, Adiki hming zawnah chuan ka chawl dat a, Sangzuala nen an thlalak a rawn dah chu ka en vung vung a. Ka phone chu la nghalin ka han en ve a, hmuh tur a awm ve lo. Henu hian ka hmuh theih loh turin a dah chiang lutuk, a awmzia chu kei hian amahah awmzia ka nei ve tihna! Ka ring sual miah lo bawk ang, Sangzuala ai chuan min thlang kher lo ang, mahse, ka rilru ang hi a pu ve tih phat rual a ni lo.

Ka haw hnu pawh chuan ka rilruah a awm reng, min pumlelh hi a tum ve ngat ngat ni tain ka hria. Engati nge hmanah khan kan lo intawn loh? Hringnun hi....

A theih chin chinah pumpelh kan in tum ngar ngar a, theih loh tawp chin hi chu a awm lo thei bik chuang lo. Veng khat, kawi khat chauh kar dana awm, kohhran khat nih bawk si chuan thil tihkhawm naa inhmuh chang a tam lo thei lo. Chungah te chuan a hmaa inkawm a, innel bawrh bawrh ang khan kan awm thiam tawh lo. Pangngai thei ang bera inbiak kan tum hram hram ni ber hian ka hria. A hma kha chuan keimah chauh hian feelings ka nei niin ka hria a, in control kha thil harsa tak a ni lo, tunah chuan venthawn tur hlir anih tawh avangin leh amah pawh hian danglamna a nei miau a, kei mipa tan lah hai theih a lo ni miah si lo, a harsa tawh a ni deuh tawp mai.

Ka office bang chu tlemin ka haw tlai deuh a, an dawr lamah kalin ka nu thil min chah lei kawi ka tum a, mahse, an dawr kawta bike lo ding avang chuan ka tlan tlang ta ringawt a. Keimah leh keimah hliam insiam belhchhah ka duh lo, an pahniha an awm ka hmuh vaih chuan ka duh loh deuh thlengin keimahah nghawng a nei dawn, ka inveng hram hram a ni ber e.

*Tunlai chu min rawn be tlem riau, i chhuak ngai pawh a ni si lo, harsatna i tawk a ni lo maw* Sawmi message.

Ni e, Sawmi thlengin ka be tlem tih ka hria, then ka duh loa, chán lah ka phal hek lo. Space ka mamawh tih ka hria  a, ka be tlem mai chauh a ni.
Reply tumin kan type na a, ka call leh ta zawk.

Ka nun buai deuh nuai chu ka thiante pawh hian an hria, a chhan ka sawi theih miau loh avangin min puih ngaihna an hre bik lo. Hun han kal deuh se, ka zia mai ang tih chu keimah pawh ka inchhanna a ni.

Zankhat kan hla zir bang chu kan group OB ho thutfual an tih avangin Adiki nen chuan kan thufual ve a. Kan thutfual chhan an sawi lai chuan thildang daih ka lo ngaihtuah, Adiki nen kan inpeng a inang a, kan pahnih chauhin kan hawna tur a thui bik tih chu. Kan pahniha kan kal tlan hunah eng nge ka sawi ang? Chung vel mai mai chuan ka rilru a luah a, ka inhrethiam tawh bik lo. Kan haw tlang ta ngei a, thianten an in pengah min pensan zo tawh a, kan pahnih chiah kan bang ta. Thui kan kal hmain Adiki thiannu Temami te in peng kan thleng nghal a, Adiki chu a ding deuh dat a.

"Temami nen tihtur kan nei a, ka pen san ang che aw"a tih chuan ka thin a rim thut. Chhan pawh chhang lovin ka kal liam vut a, heti khawpa min pumpelhna a  zawng a nih chuan a tha, ka enliam mai mai tawh ang tiin ka insehruh a. In ka thlen pawh chuan ka thin a la rim, engemaw ti taka min hip ve deuh avang maia la talbuai ka ni, neih ah ka duh pawh a ni lo tiin ka han infuih vel a. Mahse, min hip thlawt tih zawng ka pha hlei thei lo chu a ni e.

Hun a kal ve zel a, mi á lo ve ta chu Adiki pawh a pangngai hma khawp mai. A hma ang em chuan inhnaih tawh lo mah ila tha takin min bia a, ka tan lo biak that duh loa lo tih that duh loh kha a rem lem lo. Rawngbawlna kawngah pawh kan inhnuk leh hnak hnak tawh a, a hmel hlim thei tak chu a hma khan ka lo hmuh kan thin ni mai hian ka hria. Keipawhin amah ka duh ruk riau na chu a hma ang em emin a thuk tawh lo a, ka lawm viau nghe nghe. Kumthar maia nupui neih tum ka nih tawh avangin inbuatsaih theih ang ang chu ka inbuatsaih ru chho ve nawk nawk a. Ka thiantha ber Dina chiah ka hrilh a, ani nen khum siam atangin bul kan tan a, ka nun pawh a pangngai chho veleh tawh. Hetih hun lai hi September thla vel bawr a ni a, ka chhungten kumtira inneih an tih deuh vanga lo inhmakhua lawk pawh ka ni. Presbytery inkhawmpui hla tur kan zir chho mup mup a, a kar laka programme a lo tam bawk nen hunawl kan nei lo khawp mai. Zan khat kan hla zir bang chu kan haw kawngah Adiki an chhaih zauh chu ka lo hre pek a, hetiang huna ka hriatna beng chak lutuk leh ka lo dawngsawng tha thei lutuk hi ka duh lo ngawt mai.

Ka mut dawna whatsapp ka en chuan kan group committee ah an lo sawi ri leh a, ka nghing leh deuh lawih tawh! Adiki pasal nei mai tur anga an chhaih nasat lutuk hnu chuan rin dan  chin ka nei ve ta.

*pasal i nei dawn a..?*

Ka inrin hman hmain ka thawn zo der.

Minute 5 vel hnuah min lo chhang a.

*tum ve deuh chu a nih hi, mi hian an lo hre hma thei e a mak*

*ka hre tlai leh deuh ber a niang*

*hahaa.. Nangte chu news lo thei ve elawm* a rawn uang te chu ka lo haw ru deuh hlur.

*nuam awm bik.. Ha ka lo tat hriam ang*

*nangpawh i neih tep tawh kha, kan chhungkuain kan lokal ang* smiley tlar leh tuar.

Ka chhang peih tawh lo vel, hmana ka thin thip ang khan ka awm leh tawh a nih chu, ka va ning tak!

Presbytery a zawh chuan Adiki pasal neih tur hlirin kan veng chhung a khat a ni ber. November thla tawpah pasal a nei dawn, chuan kan pahnih thawnthu, A RUK TEA kan lo vawn ve kiau  chu a thamral tawh ang.

Hlim tak anga lang si, chhungril nguai burin an inneihna tur chu kan buaipui ve zel a, ka va phur lo thei tak. A pasal tur lah hian a duh hmel si, ka hmu hne leh thut thin. A tana ka tih theih sang ber an mamawh apiang lo buaipui chu hlenchhuah ngei tumin ka rilru ka siamfel tawh a, ka ti zel bawk. Keima lam inbuatsaihna thulh thakin a tan ka inpe a, a hriatthiam duh chuan a hrethiam ang.

Biak in atanga a rawn luh chuan ka kut chu ka hum ngar ngar a, ti khawp sawn a hmel te a lo tha ver reuh a nih saw maw le. An thuchham mawlh chu ngaihthlak nuam tak pawh a ni lo. Thlalaknaa ka tel ve dawn vangin ka la awm hram hram a, haw daih chu ka chak ber. Thla kan lak zawh hnu chuan chhuanlam siamin thiante chu ka hawsan a, a pasal neih nia ruai theh chu ka tum lo hrim hrim. Ka mittui te a tla reu reu ang e 🤣

--------x-------------x-------------

Kum dang ang bawkin December thla kan chuang kai a, krismas boruakin min chiah hma hle a, kohhranah leh hnathawhna lamah buai na ka ngah viau a, inah ka tawm hman meuh lo. Kan tum anga kan awm theih chuan January thla laihawl hi ka nupui neih hun a ni tawh a, a hun a thlen dawn meuh chuan a lo huphurhawm duh khawp mai. Tlangval nawmzia leh kan zalenzia han ngaihtuah thlen phei chuan neih leh loh maite a chakawm rum rum! Urlawk zanah Dina te inah thianhoin kohhran programme a zawhin ar min show tir a. Ka tlangval tawpna tur nia a lan vang a ni a, kepawhin ka hnial lem lo. Adiki thiannu Temami pawh Dina nen an nih ve avangin a rawn tel ve a, amah hi a tawng tam loh em avang hian ka nel lutuk lo. Veng khat mah ni ila ka nel loh ber zingah a tel ka ring. Thianten ar an puah lai chuan guitar ka la a, ka lo zai mai mai a, a puah lamah hi chuan min phut lem lo. Temami'n thingpui min rawn pe a, kalsawn mai lo chuan ka bulah a rawn thu ve a. Ka zai lai chu min en deuh avangin ka tawp a, amah chu ka va melh ve a. Eng emaw sawi tum hian a ang deuh zuau a, mahse, a tho a, a kalsawn leh ta daih a, ka hrilhhai angreng. Dar 1 velah kan in ei fel a, Dina'n Temami a thlah a, midang an haw zo tawh a, Dina'n riak tura min tih tlat avangin a room lam ka pan a, Sawmi biak pahin ka lo mu zal vel mai mai a. Room a rawn luh chuan phone ka lo hmang zo chiah a.

"Adiki kha i lo duh ru ve deuh thin em eng emaw lai khan" a rawn ti thut a.

Ka nui deuh hak a, chhan mai dan tur ka hre lo.

"Temami khan Adiki'n nangmah buaipui lai a neih thin thu leh nangpawhin feelings i nei ve tlata a hriat thu a thiannu kha a lo hrilh thin a. Chung vel mai mai chu maw le"a ti liam puat a.

Ka mu chu ka han thu chhuak a, uluk fein ka ngaihtuah a, ani pawhin pasal a nei tawh a, sawi chhuah hi pawina tur a awm pawh ka hre tawh lo.

"Din, ni e, a inhriat ang chuan feelings chu ka nei alawm. Min tibuai rei khawp asin"ka ti ta nge nge a.

Mak a tih ka rin nen mak ti hmel a pu miah lo, "A mak i ti nange" ka han ti leh hram a..

"Ka nei ngai lo ti la mak ka ti zawk ang" a lo ti leh et a. "Ka ringhlel thin che alawm, an ina i lo lan ve duh miah lo thin laite khan nangmah inhneh i tum a ni ang tih kha ka lo ring daih tawh. I thianpa hian ka hrechiang tawk viau che a. Ka sawipui che chuan boruak ka tih pun lun ka hlau a, a reh leh mai ang tiin ka enliam che anih kha" a tih chuan mak ti zet hian ka melh ta thung a.

Ka lo rin dan mai ni lo, a tak ngeia Adiki'n ka rilru ang chiah a lo pu tih ka hriat chuan ka then sak a.

"Lalrindik... Pasal pawh nei tawh mah la, ka nupui neih ni chuan nuam i ti bik miah lo ang"Tiin ka hriat tawk lek chuan ka han phun sap a.

.
.