A MEASURE OF FAITH - X

Chapter X

Office ka luh ruala Awma hmel ka hmuh chuan ka ding chat a, ka luhna lamah chuan chhuah leh tumin ka inher a, hmanhmawh zet hian a rawn phei a, ka banah chuan min vuanin min kai chhuak ta dawr dawr a. Ka kal tlai ngai loh avangin ka thawhpuite kal an la awm mang lova, min dawr tumtute erawh an awm deuh nual tawh. Chutia mipa leh hmeichhia inpawt ta nawk nawk chu mak tih hmel zeta lo en tawk lah an bo lo. A car dahna kan thlen chuan min nam lut nawk a, rang zeta rawn lut ve nghalin min tlan chhuahpui nghal a. A hmel chu ka han melh zawk a, biak ngam chi pawh a ni lo. Hetiang taka a thinrim hmel hi ka la hmu ngai lova, awm dan tur ber pawh ka hre lo. Min hruai tumna chu zawh pawh ka tum hran lo. Ka maimitchhing daih a, engtia rei nge kan tlan pawh ka hre lo, motor a tih din chuan ka meng chhuak a. Hmun fianrial zetah hian kan lo awm reng tawh.

“Chhuk rawh”a ti nghut a.

Ka bag chu ka han hmer vak a, hnial a sawt lo tih hriain ka chhuk ve mai a. Ani pawh chu a rawn chhuak ve nghal a.

“Ka call I pickup duh lo a, ka message I chhang duh lo bawk a. Engtia awm  nge I tum?”a tawngkam chu a nem fahran lo hle.

“Hetia awm vel mai mai hi ka tum”ka tih chuan a ner nawk a.

“A chhan ka hre thei ang em?”

“A harsa zawngin awm lo teh, kan nun pangngaiah khan let leh ila a tha”ka ti a, a thaw hak a.

“I hna tur ka lo sawipui vang che in maw? Ka pa bula request ka siam kha ka tisual a nih chuan min ngaidam rawh. Mahse min kalsan tur khawpa thil sual chu a ni lo tiraw? Eng hian nge I rilru let tir che?”a tawngkam chu a dam deuh tawh.

“Engmah sawi belh tur ka nei lo. Ka hna pawh hi thla thar atangin ka chawl tawh dawn a, min duhsaknaah erawh ka lawm e”ka aw chu pangngai thei ang bera rik chhuahtir ka tum ngar ngar a.

“Tenawm…”a ti sap a.

“Ni e, ka nihna dik tak a ni”ka tih chuan a mitmenga huatna hlira khatin min melh a.

“Vawikhat chiah ka ngen leh ang che, kal suh. I duh ang apiang ka ti ang, I tan awm reng tura ka intiamna kha min tihhlawhtlintir rawh. Nangmah nena hun hmang dun tawh tura ka suangtuah zawng zawngte kha chuti maia an thamral chu ka phal lo a ni”tlawm intih hmel zet hian a ti a, ni e, hetiang em ema tlawma ka siam hi keipawh ka indem ngawih ngawih. Mahse, a chhungte nen ka inthen tir thei lo, ka thei ngai lovang.

“Thutlukna ka siam tawh a, ka thlak thei tawh lo, min hrethiam rawh”ka ti lui ta tlat a.

“I duh dan a nih chuan, chu chu kan tawpna ni rawh se. Tun atang chuan nang leh kei hi mihrang kan ni tawh ang, I duhdan a ni bawk a, I piang ve a ni tih hi ka hre tawh ngai lo vang”motor lam chu a pan phei a, chak fea a inkhalh chhuak chu ka thlir reng a, a tlan liam chuan ka thu hnawk a, ka pumchhunga naute vang chauh hian dam hi ka thlahlel tawh.

Office ka thlen rualin Muanhlua’n min rawn hmu nghal vat a, ka tahna avanga ka mit bui vek chu a hmuh duh lovin ka thutna pan ka tum a, min lo dang vat a.

“Eng nge I chungah hian thleng?”a aw chu a zawi hle na a, hetiang hian min ngaihtuah lutuk vangin a aw a chhuak tha thei thin lo tih hre tur khawpin kan inhrechiang ve hman.

“engmah a thleng lo, keimaha awm ka duh”ka nui lui a.

Ka in rin hman hmain ka banah min kai lawp a, min kalpui ta dawr dawr a, kan thawhpuiten mak tih hmel zeta min lo en te chu hre lo ang hmiahin a awm a, inhnuai garage kan thlen chuan min vawnna chu a thlah a, rum zet hian ka melh a.

“Motor ah lut rawh”

“Ka duh lo, keimaha awm ka duh tih ka sawi kha”

Chutah chhan let hlauhawm khawpa min melh hrawk takah chuan thinrim zetin ka lut ta nge nge a. Driver side ah rawn thu lut nghalin a tlan chhuak ta vut a, zawhna siam ka peih tawh loh avangin ka thu ngawi ta hle hle a. Tunah chuan keimahin ka fa lo piang tur hi ka buaipui a ngai tawh anga, ka rila rah ka fa lo piang tur hi ka huphurh lo, ka tihsual rah ni mah se ka hmangaih ngawih ngawih tawh. Mahse, a harsa lai ber tur erawh chu tunge a pa tia zawhna ka dawn changa chhanna ka pe thei lo tur hi a ni. Ka mittui chu a rawn luang ngiai a, Muanhlua’n nghet charha min rawn vawnna pawh chu ka dahsawn duh lo. Hmun pakhat kan thlen chuan a lo reh raih a, khawi hmun nge tih pawh ka hre lo, motor a tih din rual chuan a chhuk vut a, motor chhungah chuan keimah chauha awmin  ka rilru natna zawng zawng tihbo tumin ka tap ta. Lalmuanhlua hian min hrechiang lutuk hi ka duh lo, mahse, tunah chuan ka tana awmchhun ni miau si a, ka tan a la pawimawh deuh deuh maithei bawk.

“I zia deuh tawh em?”

Ka han hawi chhuak a, min ngaihtuah tih hriat zet hian min lo en a, ka lu chu ka bu nghat a.

“Hmundanga kal I duh em?”dam dapa a tih chuan ka chhang lo.

Ngawi rengin a rawn thu lut a, ka mit bui luk chu ka duh lo tak zet.

“Engtia rei nge Awmpuia te nen hian in inhriat tawh?”tia ka zawh chuan a bek rawn pawng deuh tawlh ka hmuh chuan a rilru ka hrethiam lo.

“Ka zawt lo angah che ngai mai rawh”tih pahin ka maimitchhing a.

“Nau I pai em?”

Ka meng kawk a, ka thu ngil nghal zawt.

Chumi rual chiah chuan motor chu a tiding nghal zat bawk. Ka khur ru der der a, engmah sawi tur ka hre lo, ka laka rinawm zo lo lakah hian hetiang tak hian ka zah let hun a thleng ang tih ka ngaihtuah thleng ngai lo.

“Apui…”

Ka va melh chuan a mitah mittui a lo tling pam a, ka hrethiam lo telh telh.

“I laka ka thil tihsual kha a tawk viau asin, I tuar hnem tawk tawh. Chuvang chuan I tawrh reng hi a tulna a awm lo, Lalawmpuia hnenah chuan engkim ka sawi ang, nangmah chuan he thil I paltlang hi ka remti dawn lo”a aw chu a nghet churh a , a ti duh tak tak ang tih ka hre bawk.

“Muanhlu, chu thil chu I ti thei lo, I ti ngai lo ang. Khawngaihin ti suh, ka tanghma chiah haiin an chhungkua ka tidarh thei lo”

“Nangmah chauha paltlang tur chuan a nasa mah mah a ni’a ti dam dup a.

“Ka thei alawm, min ngaihtuah suh. He khawvelah hian vanduai tur bik ngawih ngawiha ka lo piang  chhuak bik erawh a mak ka ti”

Min kuah thlawp a, a awmah chuan ka tap ta hlawp hlawp a.

Office-ah kan let dawn emaw ka tih laiin kan in lam kan pan tih ka hria, engmah tih ka chak lova, mi zinga awm ka peih hek lo. Ka chhungten an hriat hunah, chutih hunah chiah chuan a ni chhanna ka pe thei dawn lo tih hria a ka rilru a nat em em!

Hun a liam a, kar a liam a, banna ka thehluh atangin vawiin ni hi ka thawh chhuah hmasak ber a ni. Inchungah ka nu pangparho chu tui ka pe a, ka karkhat chhung zet inngaihtuah nan leh ka thinlung atang a Awma paih chhuah tumin ka bei a, ka zirchhuah tak zawk erawh chu heng harsatna zawng  zawng hi mu chunga tawrh chhuah chi a ni lo. Ka tho anga, nui chungin heng ka hun tawn thim tak hi ka la thlir let ang. Chutianga awm thei tur chuan harsatna hi inhnehtir mai lovin, ka bei let zawk tur a ni. Ka pumchhunga naute, ka fa lo piang tur tan hian a innghahna tlak ni turin ka bei ve hram hram ang.

Ka taksa lo danglam ve zel chu thup theih loh chin a lo thleng a, ka nu leh pa rilru na hmel hmuh tluka hrehawm hi ka la tawng ngai lo. Min hau lo mah se an rilru a na tih ka hria, chu chuan tumruhna min pe zual sauh thung a. Tunge a pa tia min zawh ka chhang lo tih loh chu an zawhna engmah chhan hmaih ka nei lo. Muanhlua a ni lo tih an hrechiang em em a, Awma an lo la hmelhriat hman lo chu ka lawm tak zet. Chuti ni lo se chuan ka pa hian chet a la ngei ngei dawn tih ka hria a, chu chu an chhungkaw tan ka duh si lo.

Ka patea a dam veleh tan a, buaipui ngai lutuk a ni ta lo bawk nen kan bula awm reng nuam a ti lo a, kan remti lo chung inhnuaiah a han awm hrang ve chawt bawk a. Chaw erawh a ala ei hrang meuh chuang lo. Bank lamah nithum chhung kan inzui chhuak a, a pawisa la neih zawng zawng ka account ah a dah vek a. Inhmun an lo hralhna erawh a inenkawl nan ka pe let thung. A inthiam lo ngawih ngawih reng hi hmuh hrehawm ka ti a, ka thiam ang tawkin ka hnem ve a, hmasawnna ropui tak a ni. Pafa inhmelma tawh, ngaidam thei pawha ka inrin tawh loh kha hmangaih takin ka han kuah leh thei a ni a, ka chhungril hi a hlim veng veng thin.

Zan khat  chu kan dawr ka enkawl chhoh dawn avangin bungrua chi hrang hrang chhut fel a, kan lo tlakchhiat ve hman fe tawh avangin bul han tan that leh chu a huphurhawm duh kher mai. Ka rilru tih thawven nan IG ah chuan ka han lut dawn a, a apps pawh ka lo nei tawh lo. Ka han install tha leh a, ka luh chuan ka hmuh chak loh ber ka va hmu hmasa ber. Awma thlalak a lo intlar thla put a, nula chhelo zet nena an thlalak ka hmuh chuan ka thaw chu a tawp mai dawn hian ka hria. Ka enchiang a, ka tluk ngai miah loh tur khawpa chhe lo, pian leh pumrua pawh a hmeichhiatpuite ngei pawn nalh kan tih tur chi a ni! Ka na zual dawn tih hre mah ila comments chu ka chhiar hram a.

*first love can never die tih hi chu a tidiktu in ni e*

*high school lovers meet again*

*khawvela inhmeh berte hi engmah hian a lo dal tak tak thei lo anih hi*

A tam lutuk ka hre seng tawh lo. Ka hriat chhun erawh chu a hmangaih hmasa ber hnenah a let leh ta tih hi a ni. Kan inkawp chhung kha hun rei tak ni lo mah se, mipa rilru tha leh nghet em em, a ngaihdan pelh chinah erawh mahni na dawn mah se tawrh inpeih at a ni thung tih ka hria. Muanhlua nen ka tehkhin chang pawha ka dahsan thinna leh min hneh bertu pawh, ka mood awmdan apiang a hrethiam a a hre hrang vek thei kha a ni. Khawvela hmeichhe vannei ber ni tura lo inngai tawh khan ka cho loh chhungkua ka lo cho a, ka ni ve thei ngai dawn ta lo.

Ka pum chu ka han khawih a, hei hian beiseina thar min pe leh thin. Chu ni lo se dam chhan hi awm lo tiin khawvel hi ho ka ti ngawtin ka ring. Ka tihsual tawhah thiam ka inchan lova, huaisenna nasa zawk min pe tih erawh ka pha thei lo ang.

Dawrah ka awm a, ka nawmsam vak loh avangin ka nau te ho che pawh ka pui peih lo. Bungrua an dahna tur ka lo hrilh peih ve hram hram a ni ber. Zan lam ka mu tlem a, hei hian ka taksa hi a nghawng ve deuh a ni ang. Ka pa pawh dawr enkawl thei tur khawpin a fit ve tawk tih doctor ten an hrilh a, ka theih loh chhung a rei dawn avangin ka theih laia chhawk hram erawh ka duh thung. Dawr bula motor rawn ding dawtah chuan ka han hawi chhuak a, kan dawr opposite chiah hi restaurant changkang zet an hawn thar a ni a, a vanglai tak ala nih avang hian lut leh chhuak hi an indawt deuh zut reng. Motor atanga lo chhuak ka hmuh rual chiah chuan lehlam atangin hmeichhe pakhat a lo chhuak leh chiah a, a mawi leh mawi loh lam ka ngaihtuah lo. Bungrua chuan ka inhliah vat a, ka nau te hoin mak min lo ti viau a nih pawhin chutiang lehzel ka ngaihtuah hman tawh lo. Delhi a awmlai ai mahin a taksa chu a lo nalh zual ni mai hian ka hria, a che vel chu a fel thlup a, Melo-in (a hmeichhe kawp chu model lar leh chhe lo zet Melody a ni tih ka hre tawh a) a banah a vuan a, Awma erawh chuan han vawn leh tih a nei lem lo. A kekawr ipte chu rem lo zet hian a zen deuh tut a, chumi ka hmuh vang ringawt chuan ka lo nui deuh hak a. Delhi khawlaia kan inzui dat dat laite ka mitthlaah a lang a, min khawih lo khan a kal duh ngai lo. Min kaih loh leh min vuan bet tlat anga, kan awmdun chhungin min khawih phak loa awm a duh ngai lo. A overcoat hak chuan ka mit a la zual, kan pahniha kan lei, ka thlansak ngei kha  a ni. A pian nena inrem zet, amah tilang lian lo deuh tura kan thlan kha a ni. Ka biang a rawn lum thla pap a, rang fe hian ka han hru tawk a.

Engtia rei nge chutianga ka thut ka hre lo, Muanhlua’n ka dar a rawn khawih chuan ka harh chhuak leh chiah.

“I va nawm loh hmel ve”a tih pawh chu chhan nachang ka hre lo.

Ka pang a rawn dek a, a hmel a ner nghal sung a.

“I khua a sik tih pawh I hre miah lo a ni maw?”a tih leh chuan ka awm nuam lo run kha ka khawsikin min tham tih ka hre chiah. Ka lo nui ringawt a.

Ka dawhkanah eitur a rawn dah a, ka duhzawng hlir a ni. Mahse, ka tah a chhuak deuh tlat.

“Ka ei chak lo”ka tih chuan min rawn thutchilh a.

“I taksa hi I duat a ngai tih chu kei aiin I hrechiang zawk, riltama awm phal loh bur”tih pahin min rawn hawnsak a tum a, chu em chu ngai ka ti ta bik lo. Ka ei a, ka rin aiin ka ei tui phian lehnghal.

“Vawiin hi ka in checkup hun a nia, I haw pahin ka hming min lo ziahsak thei angem?”inthlahrung deuh tak hian ka ti a.

Min chhang ta lem lo chuan a phone a phawrh chhuak a, tuemaw hi a be bawrh bawrh a. Ka chungchang an sawi takah chuan doctor a ni tih ka hre thei, doctor hmelhriat a nei tha tih hre mah ila tuna ka doctor nen hian an inhria tih ka lo hre miah lo.

“I inentirna lehkha ka hmuh khan Rinmawia tih ka hria alawm, ka cousin nen hian an zir tlang thin a, kan inhre tha ve viau a”a phone be zo chuan a rawn ti a.

“A nih chu,  a va tihzia ve”

“Thil I ei zawhah kan kal dawn nia. Hmanhmawh lo la, clinic ah thil tihfel tur ka ngah a , ka awm nileng a tia, kan hman huna kal mai turin min ti a”a la ti leh ta zel a.

“Muanhlu.. ka tibuai lutuk che, keimahin ka kal mai ang”ka tih chuan a dar a san ak a.

“Enteh Apui, tuna I chunga ka thiltih ve hi chu a nep tham lutuk. Khang hun chhung zawng zawnga I laka ka tihtur ka lo tih lohte, a nachang ka lo hriat lohte kha ka siamthat leh nan hun hian hetiang zawng hian a lo duang niin ka hria. Ka hnenah lo let leh tura ka beisei vang che a nilova, min pawm thei tawh ngai dawn lo mahla naute I neih hma tal hi chu ka buaipui che min phalsak rawh. Chumi hnuah chuan tibuai tawh lo tur chea min duh anih chuan ka rawn inrawlh tawh lo ang”a ti a.

Sawi leh tur hre lo vin ka thil ei lai chu ka melh reng a, tunah hi chuan nghenchhan tur ka la mamawh a, ka tana a inhuam a nih phawt chuan lo hnial chu ka tum tawh lo. Mahse, ka nunah erawh a rawn luh leh hi ka remti tawh lo, mahni kea din theih ka tum a, mipa hi ka mamawh ber an ni kher lo.

Ka thil ei zawh chuan ka inti fai leh a, inentir hun pangngai ni loa kan kal dawn anih chuan tlai loh a tha ber ang. Ka awm loh chhunga an lo buaipui turin ka la tih felloh ho chu ka han hrilh leh thuak thuak a, ka let leh huna thil awlsam zawk nan ka ziak fel thlap bawk a. Ka inpeih ta, Muanhlua a motor la chhuak tura a kal chu ka lo nghak a, ka pasal tura ka lo ngaih thin kha a ni ta lo chiang si a. Chu mai nilo in a bialnu hlui, midang fa pai mektu a buaipui tih hi a rin phak bak a ni ve thin ngei ang. Ka bula motor a rawn inhun chuan ka thutna tur lam ka pan a, chuta ka hawi chhuak chuan ka tum loh tawpin Awma’n dawr chhung atanga min lo en reng chu ka han hmu a. Muanhlua rawn dak chhuakin lut vat tura min ti chu hmel thim hmukin a melh zui a, ka en ngam tawh lo. Rang fe hian ka lut a,a ka awmchhung sa pup pup chu ka dawm a, ka thaw kawk a. Min la theihnghilh thei bik lo ang tih ka hriatna mai maite hi min hnemtu an ni a, ka chan a chau tih ka hre chawpchilh nghal zat zel bawk a!