A MEASURE OF FAITH -XI

Chapter XI

*AWMA POV*

Ka mi hmuh pahnihte avang chuan ka thil in lai ka tawp chawt a, hei kher chu ka beisei phak bak a ni! Hlutei hnen atangin Muanhlua leh Apuii an inkawp leh tawh tih ka hria, keimah ngeiin finfiah ka duh avangin ka hna la inpeih lo chungin Aizawlah ka haw a. Ka han hmuh leh hriat tak chu kan inkara thil zawng zawng kha Apuii’n tih tawp vek a duh tih hi. Ka na a, ka zak ngawih ngawih bawk. Kum tam tak a liam hnua ka hmeichhe hmasak leh hmasak ber, ka nupui ni mai tura ka lo ngaih khan min then thut a ni a, awmdan tur ber pawh ka hre tawh lo.

High school kan kal laia atanga ka kawp thin Melody rawn haw lai a lo ni ve bawk a, kan in lamah a rawn chuangkai zing hle. Ka nau Hlutei nen an inkawmngeih em em a, kan inthen hnuah pawh an pahnih bik hi chu an la inpawhin an la inbe tha hle tih ka hria. Chuvang chuan kan ina a rawn leng lut tam pawh ka sawisel theih a ni chiah bik lo.

“U, Melo-i hian a la nghah reng thu che hi a sawi ve ziah a nia”Ka room ah Hlutei chu a rawn lut a.

“Min nghak thlawn dawn anih chu”ka lo ti mai a.

Ka ti tak tak, Melody nen hian kan inkar siamthat leh tumna rilru hi ka pu ngai lo. Ka chak ber kawng ka zawh dawna kal lo tura min tih tlat te, ka kal lui anih chuan kan inthen tur thu a sawi kha ka rilruah a rawn lang thar leh a. Ka tuizawng min tuipui theih loh avanga inthen kan nih avangin let leh hi ka tum ngai lo. Ani pawh model hlawhtling tak a ni tawh a, la inkawp ni ngat ila chu modeling lama a kal hi ka phal hauh lo ang. Hyderabad-ah vawihnih vel chu magazing cover atana an hman dawn avangin hna kan thawk tlanga , min biak pawh a tum nasat zual phah hle nghe nghe. Ka rilru a danglam tawh thu leh ani nen kan inkawp zui a rem tawh lo tih chiang takin ka hrilh a, min rawn be zui tawh bik lo. Chumi hnuah tun hi kan intawn leh hmasak ber a ni a, keimaha danglam a awm loh danah hian inngaihzawnna pangngai bak kan inkarah a lo awm lo pawh a ni ang.

Thla khat lai chawlh ka lak avangin ka cham ve ngat ngat mai aniang chu! Ka pa min kawhhmuh angin kan inhmun pakhat chu ka hnathawhna atana duang turin k inbuatsaih a, Delhi chhuahsan chuang si loa chutiang thil dang tih kawp chu ka lo rilruk ve reng a nih avangin ka chawlh neih chhungin inbuatsaihna chu ka kal pui ve mek bawk a ni.

“Restaurant thar an hawnah khan va leng lut ve ila, I thil tih tumah pawh nasa takin a pui maithei che asin”

Melody chu ka car nghengin a ding ar ar a, ka duh aiin kan inah a chuang kai zing ta viau.

“Hun ka neih hunah ka kal mai ang” ka ti deuh hmuk a.

“OP, thian ang tal hian min en thei lo mi? Min la haw viau em ni?”a tih chuan tlemin ka inthiam lo ve deuh.

“Ka ngaihzawng hluite thianah ka siam zui ngai lo a, ka tihpalh”ka tih chuan a lo ner deuh nang a.

“Aizawl kan cham chhung tal hi chu inngeih ve deuh hlek ila, sual I inti ve lo mi?”a ti leh hram a.

Ni e, ka lo ti lutuk deuh pawh a ni ang, ka tan a tangkai phian maithei bawk a, Apuii laka ka rilru na lutuk pawh a la peng maithei asin.

Ka thianpa Thara hna thar tlin lawmnaah Melody nen kan inzui a, pangngai taka hmeichhia ka chhuahpui leh hmasak ber Apuii ka rilruah a rawn lang nghal zat. Ani chuan rilru dang pu tawh mah se ka la pu ve thei thlawt lo, engtikah emaw ka hnenah a lo let leh hi ka ring tlat. Ngaihdam min dilin lo let leh turin ka hnen a lo pan anih phawt chuan ka lo pawm le hang, chutiang khawp chuan ani kha ka hmangaih a ni.

Kan thiante zinga awm pawh a hma angin nuam ka ti tawh lo, keimahah hian kim lo riau hi a awm tlat tawh. Melody nen thla te kan han la ve bawk a, ka mitthlaah Apuii hlir a awm thung. Ani aia pian nalh zawk, tlangval tam takin kawp an chak leh a bula awm ringawt pawh an chak em em ka bulah a awm a, ka hlim zo chuang lo.

Melody ka thlah hnu chuan muangchangin Apuii te in awmna lai tura ka ngaih ah ka tlan a, a sawi dan kha a lo fiah fel em a, buai miah loin an in kawng chu ka zawh thei tlat. Step bula waiting shed awm thlengin a sawi lai ang chiaha chiangin ka hmu zat a, kawng chhak lam chu ka hawi vang vang a, kan inkar chu chiang takin titawp dun tawh mah ila engemaw tak hi keimahah beisei ka la nei tih ka hria. Chumi avang erawh chuan lo let tura va ngen emaw ka tum hauh lo, kei aia thlan zawk a nei anih chuan inrawlh buai ka tum lo. Ka dinna piah lawka car rawn ding chu ka en zui reng a, a chhung atanga rawn chhuak chu Muanhlua tih ka hmuh chuan steering chu ka chum pawp a. Ka thisen lum pup chu thunun tumin boruak chu ka hip vang vang a, na taka a kalsan hnuah min lo chhuhsak leh a ni a, ka rilru dam nan tal khawih hrep ka chak! Chu erawh ka ti tur a ni lo, ka induhtawkna leh chapona heti khawp hian min tihchhiatsak tawh a, a bak engmah thlen tir ka tum lo.

In ka thlen veleh Melody nen kan thlalak chu IG ah ka post a, ka tih ngai miah loh thil a ni. Ka account hi ka tuizawng thil, ka thlalak ka duh em em phochhuah nan bak ka hmang ngai lo. Mahse, ka thinlung hian he thil hi ti turin min ti tlat a, ka inrin hman hmain ka post zo der. Comment engmah hmuh ka peih loh avangin apps pawh ka uninstall nghal a, tlem talin na ve se tihna rilru ka la put vang a ni tih chu ka pha thei bik lo e.

Ka lo tum dan ang zawng zawng ka thlak a, a tam thei ang ber Melody nen kan inzui a, mahnia awm ai chuan ka khawhar pawh a ziaawm. Chutiang chu ni mah se engmah kan inkarah thlen tir ka tum lo, harhfim rengin ka hun ka vawng a, chet fuh loh palha amaha inhnuh tan ka tum lo. Ani hian engtinnge min en chiah ka hre lo a, ka bula awm erawh nuam a ti tih ka hre ve tho. Min sawm angin restaurant kalpui pawh ka tiam thei ta bawk a, a hmel hlim nghal sarh chu hmuh nuam ka ti.

Kan thil  chah a lo thlen har deuh avangin cold drinks kan in a, pawn lam chu ka hawi vang vang a, heng lai bawrah hian hetiang taka restaurant changkang a awm a nih si chuan ka ruahmanna pakhat chu ka thulh mai a ngai dawnin ka hria. Chutiang thil ka ngaihtuah lai chuan Apuii ka hmu thut a, ka awmna hrechang lek lova han koh mai ka tum a, chutih lai tak chuan Muanhlua ka hmu tel nghal. Min rawn hmu ve tih ka hriat ringawt pawh chuan ka thin a rawn sa zak a, hetiang khawpa keimaha hmun a chang thuk leh min khawih lutuk hi ka duhdana a ni miah lo. Ka awm dan teh thut avang chuan Melody chuan hamhaih angreng tak hian min melh a, ka thian hluite ka hmu tih ka sawi chuan awih hmel chiahlo hian a bu nghat tho. Ka thil tih a tui lo nghal rawih, kan thil ei pawh chu a tui leh tui loh ka hre lo. Ka duh ber chu he hmun chhuahsan vat hi a ni. Keimah maia ka kal loh avangin chu erawh a rem kher lo. Lallianpui, min va ti rethei tak em!

*MUANHLUA POV*

Apuii hmel tla ve deuh kiam chuan ka rilru a ti na, engtinnge khang hunlai khan ka lo kalsan theih zawk le? Hlutei phuba lakna a ni tih a inhre miah lo te hi ka khawngaih ngawih ngawih. Keima thiam loh vek hi a ni, khatiang khan ani hi phatsan lo ila chuan tunah pawh hlim takin kan awmdun awm si a, ka tihsual rah keimaha tuar mai loa ani’n a tuar tel hi a hrehawm ka ti.

Doctor room atanga a rawn chhuah chuan a rawn nui ve seih a, ka hmuh khat tawh zia ka hrechhuak zawk. Ka bulah khan himin a inhre thin a, keimaha a innghat tawp thin. Vawikhatmah keimah nilo mipa a hnaih ka hre ngai lova, khawvelah hian keimah chiah mipa ka awm ni mai awm kha a ni. Chutiang tak chuan ani hian min hmangaih a, keimahah rinna a nghat thin. Vawilehkhatah chu chu ka tihchhiatsak a, amah chauha hrehawm taka awm turin ka kalsan a, ka ngaihtuah zui ngam tawh lo. Ka hlimna tur emaw tia ka thlante khan hlimna min thlen zo lo tih ka hriatchhuah chuan ka lo tlai tawh. Awmpuia nen an boruak ka hriat rual chiahin na takin a awm dawn a ni tih ka hre daih tawh. Amah Awma hi misual a ni lo, mahse, a nau mizia hi ka hriatchian em avangin Apuii tan a tawrhhlelhawm dawn tih ka hria. Theihtawpin dan ka tum ve a, an lo luh thuk ve tawh em avangin thil harsa tak a lo ni tawh. Chu mai bakah ka sawi leh tih anih chuan engahmah a ngai dawn lo tih ka hria, ka rin ai thuk zawk an lo thleng hman hi a pawi ka tih ber lai chu a ni.

“Kali la”

Ka harh chhuak zawk a, clinic atangin kan inzui chhuak a, tihian nupa ni zawk ila tih ka ngaihtuah lai chuan ka nui chhuak deuh hak a, ka hmaa kal chu a rawn hawi let a, ka lo then ringawt a.

“I haw tlang nghal dawn nge dawrah I let leh ang?”ka tih chuan min chhang mai lo.

“Khawvelah hian kan duh ang ringawt hian thil hi a lo thleng thei miah lo a, kan dil ang hian lo thleng ta vek se Pathian hi kan mamawh dawn lo tihna a ni bawk si”

Ka zawhna nena inmil lo zet hian a rawn tichhuak phawng a.

“Tun thleng hian mak ka la ti, nau ka pai chu ni ve ta mai sia”a nui hak a.

“Pathianin I enkawl thei tih a hria a, chuvangin a pai tir che a”ka lo tih chuan a bu nghat a.

“Kan inthen chhan dik tak hi hria se chuan a chhungte kalsan a duh ngei dawn si a, ka ngai ngam thlawt lo a ni. Ka ti dik tho  tiraw?”a mittui chu a tling pam a.

“Ka hre lo, Apui ka hre lo tak zet!” uar zet hian ka lo ti a, ‘I duhthlanna a ni miau a, sawi theih ka nei si lo a”ka tih chuan a rilruah enge awm ang ka hre lo.