A MEASURE OF FAITH -XIII

Chapter XIII

*APUII POV*

Awma tlan thla hlawk hlawk chu ka en reng a, koh leta a fa a nih thu hrilh chu ka duh. Mahse, a va harsa tak em! Ka phone ka la chhuak vat a, Muanhlua ka call nghal a. Thil awmzia chu hrilhin kan ina kal turin ka ti ta ringawt a. Minute 15 rei ber niin ka hria, a rawn thlen chuan thil awmzia chu ka lo hrilh a.

"Apui, engkim a hriat mai hi a tha berin ka hria" a ti a.

"Ka hrethiam lo, a awih ka ring tawh lova, keimah hi ka inthiam thei tawh lo. Ka ti na lutuk tawh" ka tih chuan a tir atanga ka thutlukna lo siam kha ka tihsual zia ka hrechhuak. An chhungkua tihdarh ka tum lutuk naah Awma rilru ka lo hliam thuk lutuk!

"Ka lo hmu dawn nia, keiman engkim ka sawipui anga a fel vek mai ang" a tihte chuan ka tah a chhuak vek.

"Ka tibuai nasa lutuk che" ka tih chuan ka chan chhiatzia ka hria.

"I tan ka awm reng ka tih kha, a bik takin tuna i harsatna tawh lai ngat phei chuan" ka darah a rawn vuan a, "Chak takin awm ang che, i tawrhna a tawp tep tawh ania aw" a ti lawm lawm a.

Ka muhil thei lo chu ka in let chhen a, Awma na tuar hmel kha ka mitthlaah a rawn lang leh thin. Khatiang tak khan a na ang tih ka lo ngaihtuah phak lo, keima lam chiah ka inngaihtuah a, a chhungten min pawm ka rin lohna chu ka hma ka sial vang tih ka inhrethiam tawh. "Lalawm, min ngaidam rawh" ka ti mawlh mawlh a. Whatsapp ah lutin a  phone number chu ka han hmet chhuak leh a, ka lo la block reng a ni. Ka han unblock a, a dp ah kan pahnih thlalak a hman ngar ngar aiah khan thil dang a lo hmang ve tawh a. Chung mai mai pawh chuan amah chan min hlauhtir zo vek tawh.  Khua var vat se, Muanhlua chuan hrilhfiah thuai se tih chu ka nghakhlel tak zet.

Khawvar rualin ka tho nghal zat a, ka taksa na thum mai leh ka lu na deuh bur chu tihreh tumin tui vawtin ka han inbual ringawt a, tlem chuan ka ziaawm deuh e. Darthlalangah chuan ka han inen a, ka hmel lo tla ve deuh riai chu ka en reng a, ka nun hnawk leh buai nuai chu ka ngaihtuah let neuh neuh a, hetiang tur tih hi ka inhre bik der mai si lo a. Ka khawvel hmasa, Muanhlua nen hlim taka hun kan hman hnua rilru na tawpkhawka min siam leh sit e, a hnua Awma ka tawn dan zawng zawng, a fa hial ka pai tak dan te chu hmanah khan hetiang hi a thleng dawn tih min hrilh nise ka awih lo ang. Engati nge hetiang taka ka nun hi a buai chhoh bik tak tih hi ka ngaihtuah fo a,  chhanna erawh ka hmu lem lo.

Chaw chu tlem ka han ei ve a, a tui hlawl lo hi a hrehawm ka ti. Tih luih ngial ka tum pawhin ka hlawhchham fo a, ei tur dang ka ngaihtuah leh mai a ngai dawn a ni. Kut ka sil laiin ka phone chu a rawn a, hmanhmawh zet hian ka ban a, Muanhlua a lo ni.

“Apui, hei Awmpuia te in atangin ka haw mek a, amah pawh a lo awm lo”a tih chuan ka zawi nghal vek.

“Khawnge a kal an hria em a chhungten?”ka han ti a.

“A kalna chu ka zawt duh ta lo mai, a nau chiah a lo awm a, a u awm loh thu a sawi a, chu bak chu engmah ka zawt duh ta lo. Amah ngei hmuh ka duh si avangin nakinah ka va kal  leh mai ang ka tia”

“Ka lawm lutuk aw, ka tibuai hle mai che”

“Chanchin ka lo hrilh leh vat ang che, hei motor ka khalh bawk sia, ka dah phawt aw”

A tawng tawp lam chu ka hre tha thei lo, motor ri tuar ri leh au tuar ri ka hria a, hlau lutukin ka phone ka thlauh tawp a. Thil tha lo tak a thleng a ni ngei ang, accident, ni lo, a ni lo ang.

Ka phone chu rang takin ka chhar a, khur ru hlawk hlawk chuan ka han call back a, a tlang thei lo. Ka nu rooma awm chu ka ko a, ka aw khur nghal ringawt chu ka duh lo lutuk.

“Nu, Muanhlua chungah thil tha lo a thlengin ka hria”ka mittui te chu a rawn tling nghal ringawt. Chutia ka sawi lai chuan ka phone a rawn ri a, hming inziak ka hmuh chuan ka thaw deuh huai, “Min ti hlauthawng alawm…”ka ti nghal hmuk a.

“Ka pi, hei phone neitu hi a accident a, hospital lam kan pan pui dawn chiah a nia…”engmah ka hre tawh lo.

Ka phone ken lai chu ka nu in min laksak a, an inbe mawlh mawlh thawm chu hla taka ri angin ka hria, ka nu in min kai a, thutthlengah min thuttir a, ka awmdan mumal lo zet vang chuan ka nu pawh ka timangang ngawt ang. Ka nu leh ka nau chu an vei chhen a, ka pa bula thil awmzia an sawi mawlh mawlh laite chuan ‘keimah vang vek’tih chiah ka rilruah a awm. Ka nau in ka room-ah min hruai a, ka thawmhnaw hak tur a lakchhuah chu ngawi rengin ka ha a, damdawiinah kan kal dawn a ni ang.

Damdawiin kan thlen chuan Muanhlua nu leh a u ka hmu nghal a, casualty ah an lo luhpui fel deuh chiah a ni awm e. Damdawiin kan thlen hian ka rilru a fim vek tawh a, ka ngaihtuahna erawh a kal thui ngei mai. Ka nauin thil awmzia a zawhlai chuan ngawi rengin an bulah ka ding a.

“Tukin zing ka tho chu motor a lo tinung vut vut a, tun ang hunah chuan exer lain a chhuak daih zel si a, hna thil pawimawh a nei a nih ringin ka zawt ta lem lo. A kal dawnah erawh ka va chhuak a, mi hmuh tur a neih thu leh a rei dawn loh thu min hrilh a, kan hriat leh chin chu tun hi a ni mai. A motor khalh hre chiang chuan a tlan chak ngai lohzia in hria anga, tunah pawh hian a thiam lo zawk a nih hi ka ring lo”rilru hah hmel takin a ti a. Keimah ka lo intiam lo ngawih ngawih, thil tha lo zawk a thleng em lo ang chu!

Mipui tam deuh chu ka zo dawnin ka hre lova, mi awm lohna lamah chuan ka kal a, ka chungah lo tisual tawh mah se ka tan a hlutzia ka hrechiang telh telh. Ka hlim loh hlau reng rengin a awm a, harsatna ka tawhin ka bula awm tam ber leh min chinfelpui inpeih reng chu amah chiah hi a ni.

“Apui..”

Ka hnunglam chu ka hawi a, Muanhlua u pasal nei tawh, U Tlani a lo ni.

“A dinhmun a tha lo viau em?”ka ti a.

“Zep lo chuan, a dinhmun hi a tha meuh lo a nih hmel. Doctor kan han ngaichang chhin phawt ang, kan boruak hi a hrehawm tak zet a ni”nuih luih chu a tum ve ngial a, a hlawhchham a ni.

“A hmuh theih tawh em?”

“Hmuh theih loh, ICU lamah dah turin an ruahman mek a, kan thlentirh khan ka hmu ve zuai a, chu bak chu keipawh ka hmu thei lo.”a ti a.

Gate a motor rawn tlan lut mek ka hmuh chuan ka thin a rim hlur. Awma leh Hlutei an rawn inphur a, kan zawn an thlen chuan motor a ding a, Hlutei a rawn chhuak a. Awma erawh motor dahna tur zawngin a tlan leh nghal.

“U Tlan, eng nge thil awmzia? Hei, chanchin kan hre chiah a, kan rawn kal nghal a”a ti zung zung a, ka awm ve tih hre angin a awm chhin miah lo.

U Tlani chuan a tlangpui a lo hrilh mawlh mawlh a, an ina a kal haw lam tih a hre ve awm reng sia, chutiang engmah a sawi lang lo chu mak ka lo ti. Kan dinnaa Awma a rawn thlen chuan U Tlani leh Hlutei chu an kalsawn chiah a, mahnia lo hmachhawn chu ka chak lo hle mai.

"A pawi ka ti khawp mai"zawi sup hian  ti a. Tu nge pawi ti lo ang?

"Ni e, ka tan hian a pawi zual khawp mai"ka tih chuan min en reng a, a thaw halh a.

Sawi leh mai tur hre lo chuan kan ngawi ta reng a, chutah thil hrechhuak thut niawm tak hian min rawn en a, engemaw sawi a tum lai chuan a nau rangkachak chuan a rawn ko ta hlauh a, a kal hmain ka kalsan daih. Kha hun reilote kha ka tan a hlu tih ka hria, ka sawi  duh sawi nan a tawk lutuk tih pawh ka hre bawk. Mahse, keimah vanga tawrh phah hial an awmlaia mahni chauh inngaihtuaha chet lo lak ve hmanhmawh kha ka duh si lo. Amah Muanhlua nen ngei chinfel ka duh tlat si a ni.

 Thil tih theih vak a awm loh avangin in lamah kan haw a, tlai lama kal leh ka tum. Ka tan a theihtawp a chhuah thin a, tunah pawh keimah vangin hetiang hian a awm tih ka hria, ka theih dan anga na tuara a awm lai hian tihsak theih neih ve ka duh.

Zan lam ka mut miah loh avangin chhunah chuan ka muhil ve sek a, ka harh huaiin ka hria. Tlaiah chuan keimahin damdawiin lam chu ka pan a, zahthlak zawnga lak tur chu nise ka dinhmun hi a zahthlak ka ti ngawt ang, mahse, tunah tak hi chuan ka zahna hi ka inhnehtir thei lo. A chhungten min lo hmuh chuan min lo ko vat a, min lo dawngsawng tha hle. Amah ICU lama a awm avangin duh ang angin a luh theih loh a, chanchin ngaichang leh ngaihventu erawh an la tam viau thung.

“Apui, tun ang huna zawhna lo inzawh chu a hrehawm viau a, mahse, vawiin lama kan thu hriat hi a lawmawm bawk si a. Hetiang chanchin lungchhiatthlak deuh kan tawh laia nau I pai thu kan hria kha kan lawm bawk si a”Muanhlua nu in a tih chuan ka phawk kher mai.

“A hrehawm ti lo la, kan lawm lutuk zawk a nia”a tih leh phei chuan awm ngaihna pawh ka hre lo.

“Engtin nge in hriat a?”ka ti ta ringawt a.

“Mama thianpa Awmpuia inti khan min hrilh a, APuii hi lo ngaihsak hle rawh u, nau a pai bawk si”a ti a lawm. Mittui karah kan han nui leh rih a, a mak zawk khawp mai”a tih chuan engmah ka sawi tawh lo.

Tunah kher hi chuan a fa anih thu pawh hrilh ila, a awih dawn lo tih ka hre tawh. Chuvangin hemi vanga Muanhlua chhungte an lo nui thei anih chuan ka ngawi tlat ang. Tunah ni lo, a hunah thudik chu a la lang dawn tho a, a ni lo tia an hlimna lo tihchhiatsak kher tul ka ti lo a ni.

Doctor chuan hun reilote hmuh theih a nih thu a rawn sawi chuan ka thutna atangin ka ding hluai a, tuman min chuh pawh an tum bik lo. Zam angreng takin ka lut a, nikhaw hreloa lo mu bam chu ka pan ruak a, ka rin ai daihin a tha lo. A kut leh bek vela hliam chu ka en renga, ka khawngaih tak zet a ni.  A kut chu ka han vuan a, min kalsan ang tih ka hlau ngawih ngawih. Amah vangin ka nun beidawn em em lai pawhin chakna ka neih leh phah a, min venhim a tum laia a thu ka awih loh vangin hetiang hian hrehawm takin ka awm phah a, a thu kha lo awih ni ila ka na em em bik kher lo maithei, mahse, mihring ka ni ve miau si a, hmangaih ka lo nei kha ka thiam lo a ni bikin ka hre si lo.

“Lo tha chhuak leh ngei ngei rawh aw, I tello chuan engmah ka ni lo tih I hriat kha”ka mittui chu a rawn luang thla nghal ngiai a. “I that chhuah leh hma chuan naute hi I fa a nih loh thu ka sawi dawn lo, chuvangin nangmah ngei I dam leh anga, thudik chu I chhungte I hrilh dawn nia. I tha leh tur a ni, I hria em?”tiin ka tap zawih zawih a.

(Note: Vawiin chu min hmangaiha, min atchilh em em thintu ka nite-in zai pui a tawk a, rilruah thildang a awm thei lo hle mai, a tawi chung chungin dah loh aiah ka dah ve a ni e. Chapter tawpna tura ka lo ruahman tawh a ni a, a theih ta rih lo a ni.)